زهرة التوليب (11)

(11)

 لاحظه "عثمان" وقرب منه : مالك يا "طارق" انت كويس ....؟
 بصله "طارق" :  غدير.. يا بابا.. غدير ..
_ ايوه اسمها غدير و ..
سكت للحظات "عثمان" وملامح المفاجئه : غدير ..هى دى صاحبه سلسله التوليب ..!
_ ايوه ..
 قرب منها "طارق" وملامح توتر وغضب وحزن ع وضعها ..  رجعت والدتها ودخلت الغرفه بعد السلام .. عرف نفسه "طارق" عليها وافتكرته ورحبت به وخرجوا يقعدوا :
بنبرة حادة : هى "غدير" ايه اللى حصلها وصلها لكدة  ..؟
_ مش عارفه اقولك ايه يا "طارق" .. كانت كويسه لكن لما باباها اتوفى تعبت شويا وبعدها اتحسنت شويا وشويا تعبت ودخلت مستشفي فى فرنسا 8 شهور وخرجت كانت كويسة فى مرحلة علاج ونقاهه والدكاترة قالولنا انها بخير   لكن فجاءه واحنا بنرتب لفرحها  لقيناها متغيره مبتتعرفش ع حد فينا وكانت بتجرح نفسها ومبتاكلش لدرجه انها ضعفت وكان بيحصلها حالات اغماء كتير قولنا من قله الاكل  وبعدين دخلت فى حاله نوم مبتصحاش  دخلت المستشفي تاني وعرضناها ع كذا دكتور لكن مفيش فايده لغايه ما دكتور "عزت" كلمته وقالى ع دكتور "عثمان" واتمنى يكون علاجها عندك ...
 بنبره غضب : لكن اكيد فى سبب اللى وصلها لكده ..
مسك دكتور "عثمان" ايد "طارق" ونظر له نظره يطلب فيها يهدي :
_ مبدائيا كده من التقارير اللى شوفتها سواء من دكاترة هنا او المستشفي اللى كانت فيها بره مصر من بداية مرضها من 6 سنين هى جسمانيا  هى عندها ضعف عام من قله التغذية جهاز المناعه عندها ضعيف  وسهل تتظبط  بمقويات وفيتامينات لكن المشكلة  نفسيا  التشخيص المكتوب فى التقارير ان عندها مرض معروف ب اسم "اختلال الانيه " يعني حصل خلل فى "الانا"  دخلت فى حاله انفصال عن نفسها مبقتش تتعرف ع نفسها وبالتالي هتفقد القدرة انها تتعرف ع اللى حواليها  ,, "انا" عندها هى بقت فى اتجاه وجسمها فى اتجاه تانى اغراب عن بعض  ,, مثلا تكلموها وتعرفوها ع حاجات عن نفسها بيان عليها الاندهاش والاستغراب والصدمه  اكنكم بتتكلموا عن شخص تاني متعرفوش ,,مثلا تشاورلها ع ايديها فمتتعرفش عليها ,,تبص فى المرايا مش قادره تتعرف ع جسمها لانها مش حاسه بوجوده .. لما تكون لوحدها وتبص ع اى جظء من جسمها بتستغربه وبتبدء تجرح نفسها وهى فاقدة الاحساس بالالم لان اعتقادها ان اللى بيتجرح دا مش هي حد تاني اللى شايفاه فى المرايا دايما ..المريض بينفصل عن كل حاجه ذكرياته واحاسيسه ..
_ فعلا دا اللى حصلها وزاد اكتر علشان كده كانت بتاخد مهدئات تنام ...
_  من افظع الاحاسيس اللى بتمر ع الانسان  لما  بينفصل عن نفسه بيفقد احساسه وذاته,, فاقد الشعور بكل حاجه ورافض الاستمرار فى الحياة ,, وانعزالة عن الحياة بيحصل فى ااقل من ثانيه زى مفتاح النور اول ما بينطفي فى ااقل من ثانية المكان بيضلم ,,فهو بيهرب ..!
_ ودا من ايه ؟
_ هو بيكون عرض من مرض الاكتئاب الحاد من الوحدة والعزلة و القلق الشديد مع الضغوط النفسية الشديدة اللى ملهاش حل عندة او فاقد القدرة ع مواجهتها ومفيش حل غير الهروب .. المريض بيحس ان روحه بتنسحب منه وبيعيش فى عزلة ووحدة .. بيكون تواصله بالواقع الخارجي انقطع فبيقد الاحساس به زى مريض (اختلال الواقع) بيشوف الاشخاص والاماكن غريبة عنه وانه ميعرفهمش لان حصل فصل بين احساسه وادراكه ,,فى (اختلال الانية) المريض بيفقد القدرة ع التعرف ع نفسه بينفصل عن نفسه وعن اللى حواليه ,, الانفصال  بيكون  منفذ للهروب من الضغوط النفسيه المحاصره للمريض  بيحس انه انفصاله ل اتنين جسد وروح ان واحد منهم يتحمل الضغوطات والتاني بيهرب يستخبي بيكون غير ملحوظ ودا الروح  .. فى مشاكل ملهاش حل بيعيش الانسان محاصر بيها وكل الطرق مسدوده قدامه .. زى السفينه اللى حصلها حريق وهى وسط المحيط وهو لا بيعرف يعوم ومش قادر يطفي النار بيدخل حاله من الشلل ... ا ..فبيحصل الاختلال وبينفصل نفسه عن جسمه وبيكون غريب مع نفسه ومع اللى حواليه ...( اختلال الانية ) هى غالبا بتيجي لوحدها وبتختفي لوحدها لما الضغط والمشكله ينتهو..لكن انتوا والتقارير بتقول انها بتتعالج من 6 سنين  بتتحسن وترجع تاني لحالتها وسأءت ووصلت ل حاله النوم  دى من سنه ونص ودا معناه ان الضغوط زادت والمشكلة متحلتش ..!
_ مشكلة ايه ...وضغوط ايه ..؟
_ لا احنا منعرفش المريض والمقربين منه هما اللى يعرفو ومن التقارير ان الدكاتره محدش فيهم وصل ل المشكلة لكن بداؤ بالعلاج وسبب فشل العلاج  ان هى نفسها رافضه فى الاوعي انها تستجيب ..
_ والحل يا دكتور .. ؟
_  مفيش حل غير انها تصحي لان استمرارها ورافضها انها تقوم وحبسها فى الاوعي  له نتائج اتمني منوصلهاش لازم نحل المشكلة وتتعالج ..,, الظروف الحاليه احنا  مسافرين بكره الفجر  ,, فممكن اقترحلك دكتور ممتاز من مستشفى دكتور "عزت" يكون مسؤؤل عن "غدير" تحت اشرافى الشخصى  و ...
 قبل ما يتكلم "عثمان" اتكلم "طارق": بعد اذن الدكتور "عثمان" ودكتور "عزت" انا هكون مسؤؤل عن حاله "غدير" تحت اشراف "دكتور "عثمان" ..
اتفاجئ "عثمان" من الكلام:  "طارق"...
_ بعد اذنك يا دكتور ..
_ انت طيارتك بكره ..؟
_ مش هسافر هأجل السفر ..
 محاولش دكتور "عثمان" مجادلة "طارق" وهو شايف ملامح وجهه المتوتره ونبره صوته الغاضبه الحادة ,, استكمل حديثه مع  والده "غدير"  وانتهوا ع انتظار اتصال من دكتور "عزت" هييبلغهم ايه اللى هيحصل فى الايام القادمة ...
 خرجوا من الفيلا فى حاله صمت ودكتور "عثمان" بيراقب انفعالات "طارق" المفاجئة ,,  وصلوا المستشفي وابتدوا يتكلموا عن حاله "غدير" وسط سكوت "طارق":
_ شوفت يا "عثمان" بنت زى القمر يحصلها كده فى عمرها تكون فى الحالة دى ,,مش قادر اقولك اهلها حاولو كتير ومقصروش لكن النتيجة زى ما انت شايف كده يا "عثمان " ..
_ ماهو العلاج من غير معرفة المشكلة اللى سببت الحاله دى وانها تكون كده هيكون مجرد مسكنات ,,لازم نعرف السبب علشان نصلحه ونعيد اندماجها مع نفسها بدل الانفصال اللى حصل ..
_ يعني معقوله ولا دكتور عرف ..؟!
_ المريض لازم يساعد الطبيب يا "عزت" ..الطبيب لوحده مش هيقدر  واضح انها مقرره وحبست نفسها فى الاوعي روحها ضعفت وهربت وخايفه تواجهه .. تواجهه ايه مش عارفين  .. عموما انا هكون متابع معاكم ودكتور "عز" ...
قاطعه "طارق": انا اللى هكون مسؤؤل عنها يا دكتور "عثمان" ..
_طارق ..
_ دكتور "عزت" انا محتاج كل تقارير الطبيه ل حالة "غدير" اللى هنا او اللى بره وتشخيص وراي كل دكتور وطريقه علاج اللى اتبعها معاها ونتيجتها  وارقام الدكاتره دى لو ينفع ..
 _ " طارق" انت فاهم معني كلامك ايه ؟
فى داخله "هدير" :
_ ايوه ..انا مش هسافر وهقعد هنا وهتابع حالتها دا بعد اذنك ..
_ لكن ..
_ أطمن يا دكتور ,, دا لا قرار لحظه غضب ولا متسرع انا طول الطريق بفكر ومفيش غير الحل دا ,, انا مش هقدر بعد ما شوفت "غدير" بالحالة دى ومساعدهاش ,,مش هقدر اسافر واكمل حياتي عادي .. !
لاحظ اصرار "طارق" دكتور "عثمان ":
_ وشغلك والمرضى اللى مستنينك فى لندن ؟
_ انا هأجل كل حاجه ..انا هتكلم مع المستشفى وهرتب كل حاجة  متقلقش ..
_ المهم يكون دا قرارك ..
_ اكيد ..,,
_ تمام .. تقدر يا "عزت" تبلغ اهل "غدير" ان الدكتور المسؤؤل عن حاله "غدير" هو "دكتور طارق" ودا هيكون تحت أشرافي الشخصي ..
_ واتمني تجهزلي التقارير يا دكتور "عزت"
_ تمام ..
ابتسم "طارق": عن اذنكم هعمل مكالمه للمستشفى فى لندن
 خرج "طارق" ولاحظت"هدير" تغيرره واتفاجئت من قرار عدم سفره وعرفت حكايه "غدير" واتفاجئت:
_ ايه دا .. قبل ما يسافر بيوم يشوفها ..
_ وشافها فى اسوء وضع ليها للاسف ..
_ وفعلا مش هيسافر ..؟!
_ مدام قال كده يبقى مش هيسافر فعلا ..
_ وحضرتك يا دكتور "عثمان" ؟!
_ للاسف مش هينفع لكن هتابع معاه و"طارق" دكتور شاطر متقلقيش ..
خرجت "هدير" تبحث عن "طارق" وكان بيتكلم فى الموبيل وانهى مكالمته وقربت منه "هدير":
_ مش عارفه اقولك ايه يا "طارق" .. فرحانه لك علشان شوفت "غدير" ولا زعلانه علشانك علشان شوفتها فى الوضع دا ...؟!
اتنهد "طارق": المهم انى شوفتها قبل ما ارجع .. كنت هندم لو رجعت ومشفتهاش وهى كده ..
لاحظت ملامحه المتوتره : "طارق" متقلقش ,,""غدير" هتكون كويسه دا انت بنفسك اللى هتابعها مع الدكتور "عثمان" افضل دكاتره فى الطب النفسى .. مفيش حاله وقفت قدامكم ..
_ ان شاء الله هتكون كويسة ان شاء الله
_ هتكون كويسه واحسن بوجودك معاها انا حاسه بكده لان"طارق" مستحيل يسيب حد غير لما يكون كويس .. وبالاخص لو محتاجله ...
_ ان شاء الله .. عن اذنك هعمل مكالمه تانيه ..
_ اتفضل ..واعمل حسابك هنتغدى سوا ..
_ تمام  ..
اتنهدت "هدير"  وازعجها انزعاج "طارق" ل اول مره من بعد وفاه والدته تلاحظ ملامح الخوف والقلق مسيطره عليه بالطريقه دى ..:
_ ياتري كان الحلم انها بتندهلك تستنجد بك فعلا يا "طارق" ...

 خلص "طارق" مكالماته وكانت فى انتظاره "هدير" خرجوا يتغدو محاوله منها تهدي من توتره وفزعه واتكلموا وهما بيتكلموا اتصل "ماجد" ب "طارق" واتجمعوا مع "ياسر" و"منة"" فى المطعم  وحكى "طارق" ع الموقف كله وبقراره :
_ يعنى انت عدم سفرك مش هياثر عليك يا "طارق"؟
_ انا اتكلمت مع مدير المستشفى وطلبت اجازه مفتوحه مؤقتا وهووافق واتكلمت مع صديق ليا يكون مسؤؤل عن حالاتى وهعمل استشارات اونلاين معاهم  وقت ما يحتاجونى شخصيا الفتره اللى هقعدها فى مصر ..  يعني هكون متابع معاهم مش بعيد الفتره دى ...
_ وانت محدد الفتره ؟
_ لا بس ان شاء الله مش هطول وهتكون "غدير" احسن ..
_ والله انا ما صدقت لما "منة" قالتلنا ع حاله "غدير" وانها فى الحاله دى سنين .. ياترى ايه اللى وصلها لكده اكيد فى سبب ..؟
_ واضح انها حاجه فاقت قدرتها ع التحمل مقدرتش تستوعبها فهربت وانا موجود علشان اعرف السبب وهعالجها ...
اتكلم "ماجد": مش عارفه هتصدقوني ولا لا ,, بس "غدير" كشخصية هى من زمان شخصيتها ضعيفه يا جماعه ..انا مشفتهاش بتقرر حاجه لوحدها ..
بنبره غضب : لا يا "ماجد" ,,"غدير" شخصيتها مش ضعيفه هى كانت محتاجه اللى يفهمها بس فى شخصيات بسيطة بتتعامل طبيعي وتلقائي محتاجة اللى يقربلها ويفهمها ويساعدها ..
_انا مقصدتش حاجه بس انت لما سافرت "غدير" كانت زى التايهه يا "طارق"
لاحظ هيحصل شد فغير "ياسر" الموضوع :
اتكلم "ياسر ": كنت محتار"ياطارق"  من الحلم وتكراره وانك مش فاهمه اتفسر الحلم لما جيت مصر
_ فعلا مكنتش فاهم الحلم ,,صوتها ونبرته وانى مش شايفاها قدامى كانت بتعانى وبتستنجد بيا
_ الحمد الله انك شوفتها قبل سفرك ...
_ الحمد الله ... "منة" ممكن تحكيلى "غدير" كانت عامله ازاى لما كنتى بتشوفيها فى الكليه .؟
_ امممم ... والله يا "طارق" اللى فاكراه انها كانت لوحدها يعنى لما كنت بشوفها كانت لوحدها سماعات الهاند فرى فى ودنها وماشيه لوحدها ولما كنت بوقفها كانت بتلجلج فى الكلام يعنى عارف لما تكون مش عارف تقول ايه او مش فاكر الشخص دا  ,,فكانت بتختصر الكلام و بتمشى ع طول .. عرفت من اللى معاها انها مكنتش بتتكلم مع حد وحضورها كان قليل ودايما تخرج العربيه بتكون مستنياها تركبها وتمشى ..
_ يعنى لما كنتى بتتكلمى معاها كانت بترد عليكى وتتفاعل يعنى  زى زمان ..؟
_ لا خالص كانت ردودها قليله يعنى زى اه .. ايوه .. لا .. يعنى .. تحس ان مش عارفه ترد عليا تقولى ايه ..
_ اممم ..
_ اه افتكرت فى مره شوفتها واخدت معايا حاجه ساقعه برتقال وبيبسى وقولتلها عازماكى واختارى انتى عاوزه ايه بصت ل ايدى وملامحها اتغيرت حسيت انها قدام مساله فيزيا ..
_ هى بتحب البرتقال ..!
_ ايوه ما دا اللى استغربتله ,, انا كنت بهزر معاها لكن حيرتها وانها مقدرتش تختار واستاذنت ومشيت بسرعه ..
_ كان ليها اصحاب يعني حد بيكون معاها دايما ..؟
_ لا بصراحه مشفتش انا كام مره اللى شوفتها فيهم كانت لوحدها ..
_ تمام ...
_ هتتحسن يا "طارق" مش كده دى لسه صغيره ع اللى بيحصلها دا ..؟
_ انا معاها ومش هسيبها ان شاء الله هتتحسن  ..  هستأذنكم انا دلواقتى علشان محتاج اراجع تقاريرها قبل ما اروح ليها بكرة ومحتاج اقعد مع دكتور "عثمان" قبل ما يسافر نتكلم فى كام حاجه ...
 _ تمام .. وابقى طمنا ..
_ اكيد ..
 مشي"طارق" ونظر "ماجد" اتجاهه: صدقوني سبب اللى "طارق" بيدور عليه موجود من زمان وهو مش شايفه ,,"غدير" مكنتش طبيعيه يا جماعه وانتم كنتم ملاحظيين كده ..
 ردت "منة": ايه يا دكتور .. انت ناسي انها اختفت عننا 15 سنه منعرفش عنها حاجة ,,اكيد حصل حاجات كتير منعرفهاش وكمان هى كانت متعلقه ب والدها وفراقه اكيد اثر فيها .. مش هنجم
_ الايام هتقولكم ان "ميجو" كان عنده حق ..
اتنهد "ياسر":  "طارق" مضايق اوى وباين ع ملامحه كان مبسوط من يومين وبيضحك
رد "ماجد":  اى واحد فينا لو مكانه وشوفنا حد فينا فى حاله "غدير" هنتضايق ونزعل  اكيد ..
ردت "منة" : ربنا يقدره وشفاها تكون ع ايده ....

رجع "طارق" الفندق ومقدرش ينام ومسك التقارير وابتدا يدقق فيها ويراجعها لوقت ما صحى "دكتور عثمان" وشايف "طارق" الورق حواليه واللاب مفتوح :
_ معقوله منمتش ؟
_ لا مقدرتش حبيت اكون راجعت التقارير الطبيه والتشخيص وكل حاجه اتكتب عن "غدير" علشان اعرف ابدء ازاى ؟
_ محتاجنى فى حاجه ؟
_ اكيد لما هحتاجك هكلمك يا دكتور ..
_ يادوب اغير هدومى وافطر علشان الطياره ..
_ وانا هوصلك ..
 جهز "دكتور عثمان" واتجهوا للمطار :
_ تسافر بالسلامه يا دكتور ..
_ الله يسلمك .. زى ما اتفقنا هرتب امورى هناك وراجعلك ,,
_ متتعبش ولا تضغط نفسك يا بابا ..
_ متقولش كده ..مش يمكن "غدير" ظهرت علشان ترجعنا تاني مصر
_وانا مستنيك ..
_ ومش هاكد عليك هتعمل ايه مع "غدير" ..؟
_ متقلقش يا دكتور انا تلميذك وان شاء الله لما ترجع هتكون اتحسنت
_ انا واثق فى ابنى وقدراته ..

مشى "دكتور عثمان" واتحرك "طارق" لعنوان "غدير" واول من قابله كانت  "نادين" زوجه "بسام" :
_ اهلا يا دكتور ..
_ اهلا بحضرتك ..
_ تشرب ايه ؟ قهوه ولا شاى ولا ..
_ ممكن قهوه من غير سكر مغليه ..
_ 5 دقائق وهتكون جاهزه ..
  تمعن "طارق" النظر فى الفيلا بتركيز وبشخصيه "نادين" الودوده .. احضرت القهوه :
_ شكرا ع القهوه ..
_ العفو ..
_ ماما خرجت عندها ميعاد عند الدكتور
_ لا مفيش مشاكل ..ممكن اشوف "غدير " ؟
_ اتفضل ..
 دخل "طارق" غرفه "غدير" وكانت مغلقه وانوار مطفيه وضوء بسيط :
_ ع طول الاوضه كده ..؟
_ من وقته ما دخلت فى حاله النوم وهو دا وضع الاوضه بما انها نايمة ..
_ بس هى مش نايمة نوم طبيعى علشان تحتاج هدوء قاتل وضلمه طول اليوم كده ..
_ مش فاهمه ؟
_ يعنى نومها دا مرضى مش طبيعى ,, هى مش نايمه كام ساعه وهتصحى,, الجو المحيط بيها دا السكون والهدوء دا بيساعدها تستمر فى نومها لان كده  مفيش اى تغيير بيحصل لا فى فرق بين ليل ولا نهار كله واحد عندها ..
_ بس هى حاسه علشان تحس بالتغيير ..؟!
_ ايوه  فى الاوعى هى حاسه بكل حاجه لكن جسمها متخدر بطلب من الاوعى ..
_ اهاا ..
 اتحرك "طارق" اتجاه الستائر وفتحها ودخل نور الشمس الغرفه وابتدا يبص ع تقارير الطبيه  اليومية ويبص ع المؤشرات ع الاجهزة  ,, كانت "نادين" استاذنت وخرجت وشويا وددخلت ومعاها كوب عصير ..:
_ اتفضل يا دكتور ..
_ شكرا ..
_حضرتك محتاج حاجه ..؟
 _ كنت عاوز اسألك ع كام حاجه ممكن ؟
_ ايوه طبعا ..
 خرجوا من الغرفه وجلسوا فى الصالون :
_ انتي تعرفي "غدير" من امتي ؟
_ اعرف "غدير" من زمان .. اعتقد انك مش فاكرني ,,انا بنت خاله "غدير" اللى عايش فى فرنسا وكنا بننزل اجازات ,,انا فاكرة ع طول "غدير "كانت معاك ومع مجموعه تانية ..
_ اهاا افتكرتك ..
_ لكن فترة تعب بابا منزلناش مصر لسنين لوقت ما اتجوزت "بسام" ونزلت معاه ..
_طيب  كنت عاوز اعرف اول انطباعك عن "غدير" لما شوفتيها لما نزلتي مصر ..لان انا محتاج اجمع معلومات علشان اوصل لسبب لحالتها علشان علاجها  ..
_ انا اتجوزت "بسام" من 6 سنين ..انا كنت عايشه انا واهلى بره مصرفى فرنسا واتخطبت انا و"بسام"  فتره قصيره واتجوزنا ...لما رجعت مصر كانت "غدير" دايما قاعده ساكته ومبتتكلمش كتير والرد ع قد السؤال وعرفت انها بقت كده من بعد وفاه باباها ومامتها كانت المسؤؤله عن كل حاجه تخصها.. مكنتش بتختلط بحد  ,,قليله الكلام ,, ومكنتش بتطلب حاجه ,, وكان بيحصل اغماء كتير لغايه ما دخلت مستشفى فى فرنسا 5 شهور تتعالج  وخرجت وبعدين رجعت دخلت 8 شهور وخرجت وبقت كويسه وقولنا نجهز للفرح  وكنا بنجهز لفرحها ووقت التجهيزات اتغيرت وانعزلت اكتر وتصرفات غريبه بقت تظهر عليها ..
_ زى ايه ؟
_ يعنى بتسرح كتير وممكن لو فضلت قاعده فى مكان متتحركش منه ...كانت بتبصلنا بنظرات استغراب واندهاش اغراب بالنسبالها .. نظراتها لنفسها فى المرايا غريبة زى ما بتشوف حد اول مرة كانت كتير بتبص ع ايديها وع جسمها زى اول مره تتعرف على جسمها ... رفضت الاكل .. حوادث كتير حصلتلها مره لقيناها ماسكه سكينه وبتقطع ايديها  وبتنزف ومره كان فى ازاز مكسور مشيت عليه ونزفت واللى استغربناه انها مبينتش اى ملامح وجع .. لغايه ما اغمى عليها من وقتها سنه ونص  وهى فى وضعيه النوم دى .. دكاتره شافوها ودخلت مستشفي فى فرنسا  كلهم يقولو عضويا مفيش مشاكل لكن المشكله نفسيه ومش عارفين ايه السبب وكتبوا تقاريرهم ...
_ متفاجئ "طارق" من كلام "نادين": مين اقرب حد ليها ؟
_ الناس اللى حوالين "غدير" كان  باباها ودلواقتي مامتها وبسام وانا  و"رامي"
_ مين "رامي " ؟
_ خطيبها ..!
_ وخطيبها موجود ولا ..
_ ايوه موجود ودايما بيطمن عليها رغم ان شغله دايما سفر وشغله فى الشركة فى فرنسا هو و"بسام" لكن بينزل زيارات يشوفها ويرجع ..حد غيره كان سابها 6 سنين من اول ما ظهرت عليها الاعراض وهو متمسك بها ولغايه دلواقتى لابس دبلته ومستنيها ..
_ خطوبتهم كانت عن حب ولا تعارف ؟
_ دا ع دا .. هما اتقابلوا فى حفله واتقدملها ووافقو واتخطبت وبعدها تعبت ..
_ هو موجود خطيبها فى مصر  ..؟
_ حاليا مسافر بس راجع كمان اسبوعين  ؟
_ ممكن تبلغيه محتاج اتكلم معاه ..
_ اكيد ..
_اسف ع الازعاج ..
_ لا ابدا .. واى حاجه محتاجها انا موجوده مبخرجش من البيت ..

فى خلال اسبوع غير "طارق" العلاج  وكان فى انتظار رد فعل من "غدير" وفى الوقت دا  اتكلم "طارق" مع كل المحيطين ب "غدير" من الخدم  و داده "عزيزة" اقدم واحده من طقم المساعدين فى المنزل دايما بترافقهم فى كل مكان ول ارتباطها بهم ووالدتها و"بسام" اخوها ماعادا خطيبها لانه مسافر  ,, والكلام كله متشابه نفس كلام "نادين" عن وصفهم ل "غدير" وحالتها ..بعد مرور اسبوعين فى يوم زار "غدير" وقرب منها :
_ ايه يا "غدير" السبب ؟!.. ايه السبب اللى فضلتي تهربي عن انك تواجهيه؟! .. انا مش عارف اوصل للسبب .. ايه السبب اللى مخليكى رافضه تصحى وتفضلى نايمه..خايفه من ايه ؟! اوعدك مش هسيبك ..انا متعودتش ان مرض اى مرض يهزمنى وهعرف ,,,

خرج "طارق" واتجه للمستشفى ودخل فى غرفه "هدير" وملامح الاحباط مسيطره عليه :
_ ايه يا "طارق" مفيش جديد ..؟
_ خالص .. مش عارف ابدء منين ,, مر اسبوعيين ومفيش اى رد فعل غيرت الادوية ومنعت المهدئات لكن هى رافضه تقوم ,,, ومش عارف السبب ولا عارف اوصله من اللى حواليها .. كلهم اجمعوا انها تعبت فجاءه ,, طيب ازاى وايه السبب محدش عارف ..
_ متضايقش نفسك كده وهتوصل اكيد لطرف الخيط اللى هيساعدك متوترش نفسك ..
_ ان شاء الله .. انا كنت محتاج طلب منك ؟
_ خير ..
_ محتاج ممرضه تكون معاها 24 ساعه تكون كفاءه وجديره بالمهمه
_ انا اعرف واحده ممتازه هتلاقيها بكره هناك ..
_ انا هقوم اروح الفندق علشان هتكلم مع دكتور "عثمان" ..
_ تمام ..

تاني يوم  "طارق" فى الفيلا عند "غدير" وصل "رامى"  خطيب "غدير " .. كان "طارق" بيتكلم فى الموبيل بره الغرفه ولاحظ وصول "رامي" وقفل المكالمة وراقب تصرفاته ,, دخل "رامي" غرفه "غدير" وقرب منها وباسها فى قورتها  ولمس خصلات من شعرها ووقف لحظات وابتسامة ع وجهه ,, دخل "طارق" الغرفة ولاحظ دمعه نزلت من عين "رامي" ومسحها .. اتفاجئ "طارق" من تصرفات "رامي " لكن قرب منه وبعد السلامات خرجوا فى الحديقه يتكلموا :
_ هى وضعها ايه يا دكتور زى ماهي ..؟
_ حاليا زى ماهي لكن ان شاء الله هتتحسن ..
_ انا متاكد انها هتصحي فى يوم
لاحظ "طارق" ملامسه "رامي" لدبله الخطوبة وابتسامته :
_ انا اتكلمت مع الكل ومحتاج اتكلم معاك واسئلك كام سؤال عنها ممكن تساعدني ...؟
_ اتفضل طبعا ..
_ انا محتاج تحكيلى اول انطباع اخدته عن "غدير" ..؟
ابتسم "رامي": اممم اول مره شوفت "غدير" كان فى حفله عشاء عندهم فى فرنسا  ,, بحكم الشراكة اللى بينا والشركة الجديده اللى بيني وبين "بسام" ,, اول ما شوفتها كانت قاعده فى حديقة لابسة فستان لونه ازرق طويل واسع مربعه ايديها و مغمضه عينيها ورافعه راسها للسما والهوا كان بيحرك شعرها ,,مش عارف انا حسيت ب ايه خطفتني من غير ما تعمل حاجه  معرفش ازاى  يمكن دا الحب من النظرة الاولي ..؟!  وبعد ما اتعمقت العلاقه بين الاسرتين عرفت شخصيتها هى اساسا كانت هادية وقليلة الكلام واعجبت بيها اكتر  لتربيتها وانها مطيعه ل اهلها ,,مبتهتمش بالخروج ولا السهر اغلب وقتها مع والدتها و"نادين  واكيد هى كانت مناسبه ليا خصوصا بعد قرب العيليتين وانا كنت بدور ع انسانه فيها صفات "غدير"  .. مكدبش عليك يا دكتور  فيها سحر لغايه دلواقتي بحسه كل ما اشوفها..!
_ اسف ع سؤالى .. هى كانت موافقة عليك ع الخطوبة يعنى ..؟
_ اكيد طبعا .. معتقدش انى هتجوز انسانه غصب عنها ولو مكنتش موافقة كانت رفضت او قالتلى ..
_ طيب بما انك كنتم مخطوبين قبل 6 سنين والخطوبة تمت بموافقتها وسط العيلتين .. انتم ك اى اتنين مخطوبين بيتتكلموا مع بعض فى اى حاجه .. ياترى هى اتكلمت معاك فى حاجه .. اشتكت من حاجه ..  انا عارف ان دا تطفل بس انا محتاج اى حاجه تساعدنى ولو بسيطه اساعدها تخف واكيد انت كمان عاوز كده ..
_ اكيد طبعا  انا كل مره بنزل مصر بتمني تكون صحيت ..
_ تمام ..
_ من وقت خطوبتنا لقبل ما يحصلها الحاله دي  معتقدش انها اتكلمت فى حاجه معينه .. احنا اغلب تجمعاتنا عائلية وانت عارف التجمعات العائليه صعب المخطوبين يقدروا يقعدوا لوحدهم .. لكن لما بنقعد هى كلامها قليل كسوف وخجل بنات الناس وانا احترمت قله كلامها دا ع اعتبار اننا مخطوبين ولما نتجوز الحاجز هيتشال اكيد ..
_ وانت ملحظتش عليها حاجه معينه ..؟
_ نسيان .. سرحان.. اوقات نظرتها ليا تجهلنى مش عارفانى .. بس الدكاتره قالو اعراض طبيعيه من الادوية ..
_ فى اعتقادك سبب مرضها 6 سنين واستمراره ايه ؟
_ انا عن نفسى فكرت ملقتش سبب ..هي عايشه فى مستوى اى واحد تتمناه .. اسرتها بتحبها جداا ومهتميين بيها جداا جدااا .. اى حاجه بتكون عندها من غير ما تطلب .. يمكن فراق والدها اثر فيها لكن مكنتش اتوقع بالشكل دا ...
_ ممكن اسالك سؤال شخصي اكتر ..؟
_اتفضل
_انتم مخطوبين من 6 سنين ,,وشوفتها وهى بالوضع دا ودخولها المستشفي كتير ,,سبب تمسكك بيها ايه واستمرارك فى الخطوبة ..يعني اعتقد انك ممكن تشوف واحده تانيه فى وضع احسن ..؟
ابتسم "رامي": كلامك صح ,,ممكن اشوف واحده تانيه فى وضع احسن لكن مش هقابل واحده احبها زى ما حبيت "غدير" .. سبب استمراري فى الارتباط دا انا بحبها من اول ما شوفتها من غير ما اتكلم معاها من غير ما اسمع صوتها وجودي فى المكان اللى هى فيه سعادة ..انا لما بسافر بكون ملهوف ارجع اشوفها حتى وهى كده  ,, وهستناها مهما طالت المدة وانا ع يقين انها هترجع تاني ...!
ابتسم "طارق":  اسف انى طولت عليك ..
_ لا ولا يهمك .. انا عرفت انك كنت جارها زمان وكنتم اصدقاء مقربين ف انا حاسس انها هتخف ع ايدك
_ هعمل كل اللى اقدر عليه ..
_ وانا واثق ..
 خلص "طارق" كلام مع "رامى" وموبيل "رامي" رن وبعد وتعمق "طارق" فى "رامي" وبعدها دخل غرفه "غدير" يتاكد انها اخدت علاجها ووقف وبصلها :
_عايشه حياه كويسة جداا واهلك حواليكي ومرتبطة بشخص بيحبك ومستنيكي .. ايه سبب هروبك ..ايه ..؟

فى نفس اليوم اتصل "ماجد" واتجه للمطعم وقابل"ماجد" و"ياسر":
_ ايه مفيش اخبار ..
_ ولا اى جديد ..
_ لو محتاج اى حد فينا احنا موجودين ..
بملامح احباط : انا بس عاوز اعرف السبب حد بس يقولي من ايه دا ..
_ يعنى يا "طارق" انت مش عارف اسباب الحاله دى ..؟
_ "اختلال الانيه" بيكون بسبب ضغوطات نفسية قاسية بتضغط ع الانسان بتضعفه وبتفصله عن نفسه فبيفقد شعوره بكل حاجه منها نفسه وحاجه من الاتنين بيحصل يا انتحار يا هروب وهو حاله النوم زى "غدير" ويعتبر موت بالبطئ ..
_ طيب شوف ضغوطات ايه اللى وصلها لكده ؟
_ اللى سمعته انه محصلش حاجه ..كل كلامهم انه فجاءه ..
اتكلم "ياسر : اتكلمت مع خطيبها ..؟
رد "ماجد": اه صح .. ما ممكن يكون خطيبها السبب يعنى مبتحبوش او هو انسان مش كويس ومغصوبة عليه يعني ممكن يكون هو سبب الضغط ..
_ لا خالص .. اتكلمت معاه وهو انسان فى قمه الذوق والاحترام وبكلام الكل الخطوبه تمت برضا الطرفين وغير كل دا بيحبها لوقتنا هذا ومستنيها ..
سكتوا "ماجد" و"ياسر" :
ابتسم "طارق":انا هستأذن علشان كمان ساعه هتكلم مع دكتور "عثمان "

رجع "طارق" الفندق اتكلم مع دكتور "عثمان" وقفل ووقف فى البلكونه ومسك السلسله واتنهد وبص للسما وملامحه كلها قلق وافتكر حاجة  ..!
 تاني يوم فى فيلا "غدير" دخلت "نادين" ومعاها القهوة ل "طارق" :
_ اتفضل القهوة  ..
_ شكرا ..
_ الاوضه اتغيرت خالص انا مش فاكره امتى الستاير اتفتحت ومكان السرير اتغير
_  اهو محاولة تحس بالاختلاف ,, لانها محتاجه تحس بالواقع الخارجى اكتر من السكون اللى عايشاه جواها ..
_ كويس ...
_ انا كنت عاوز اسئلك ع حاجه لو تعرفى ؟
_ اتفضل ..
_ "غدير" زمان كانت متعوده تكتب فى نوتس خواطر ليها يوميات كده ..هى كانت مستمره فى الكتابه ولا ..؟
_ اه فعلا كنت بشوف معاها نوت فى ايديها دايما ..
_ ممكن اعرف هى فين اخر نوت كانت معاها او كلهم لو ينفع ..
_ بصراحه مش عارفه,, كلهم دى صعبه لان اغلبهم اعتقد انهم فى فرنسا لكن افتكر انى شوفت نوتس هنا ثوانى ...
 اتجهت لدولاب "غدير" وفتحت درج ومسكت نوتس :
_ اعتقد دى كانت اخر واحده معاها التاريخ مكتوب اهو لكن مش مكتوب فيها كتير صفحتين بس  .. كانت معاها قبل ما يحصلها اللى حصل ولاقيتها واقعه وشيلتها فى دولابها ..
_ ممكن اشوفها ..؟
_ ايوه اتفضل ..وانا هبعت للبيت فى فرنسا يبعتولنا النوتس بتاعتها  فى اقرب فرصه ..
_ ياريت وبشكرك جداا ..
 قعد "طارق" ومسك النوتس واتفاجئ "طارق" بالكلام" اللى  "غدير" كاتباه من 3 سنين .."
_save me .. انا مين ..؟! انهاردة  وقفت قدام المرايا سالت مين اللى قدامى دى؟! .. انا مين ؟!.. نفسى بعدت عنى ولا انا اللى بعدت عنها .. كرهتنى ولا انا اللى كرهتها ..معقول ان الانسان تضيع منه نفسه .. فى الحاله دى اكون انا مين من غير نفسي .. نفسي هربت مني وسابتني لوحدي بعاني ,,انا مش عارفه انا عايشة ولا ميتة ..ممكن حد يقولي الميت بيحس ب ايه ؟! ..انا مت فعلا لكن بتنفس والموت يعني افقد القدرة ع التنفس ,,مش حاسه بحاجه حواليا يعنى ميته لكن بتنفس وقلبى بيدق يعنى عايشة .. اللى حواليا كلهم بياكدوا انا عايشة لكن انا مش حاسة بكده ..بكون معاهم وعيونهم عليا مترصداني ,,لو اتحركت بتتحرك معايا ودا معناه انا عايشة ,, لكن انا غريبة عن نفسى احنا اتنين منفصليين لما وقفت قدام المرايا كنت لوحدى وقدامى انسانه تانيه تشبهنى ولابسه نفس هدومى ..ارفع ايدى بترفع ايديها ..احرك وشى بتحرك وشها زى.. المنطق بيقول انا اللى فى المرايا وعقلي بيؤكدلي ,,ولكن الحقيقة انا حاسه بغير كده ,,اللى قدامي دى مش انا ومش قادرة اتكلم لان مفيش حد هيسمعني ,,.. فى يوم "نادين" دخلت الاوضه سالتها مين اللى فى المرايا  دى قالتلى وهى بتضحك انتى يا "غدير" قالتها بثقه واريحية لكن انا مش حاسة بكلامها اللى فى المرايا دى واحده تانية .. انا مش مصدقاها .. لوقتلت نفسي هتختفي اللى ظاهرة قدامي ,, حسيت انه لا مش هتختفي لانها حاجه وانا حاجه  مسكت ازازه وجرحت ايدي علشان اوجعها لقتها ساكته بتنزق ,,.. انا فقدت الشعور والاحساس وكل حاجه مشابهه ..فى لحظات الليل الكل نايمين لكن انا بحس بضلمة بتمني الموت ..الموت خلاص من اللى حساه دا ,,انا مين ؟! انا الغريبة عن نفسي .. انا باكل وبشرب وبتنفس يعنى عايشه لكن انا مين ؟ )  .. نظر "طارق" ل "غدير" وهى نايمة وملامح حزن اترسمت ع وجهه ولاحظت "نادين" :
_ فى حاجه يا دكتور ..؟
_ انتى قولتى هى كتبت دى من3سنين ..؟
_ ايوه كنا هنا فى مصر .. وبعدها معتقدش انها كتبت لانها تعبت ..
_ ازاى محدش حس بيها لدرجه دى .. ؟!
_ ازاى وكلنا كنا معاها .. وهى مشتكتش ولا قالت حاجه ؟
_  كانت بتعانى لوحدها ,,كانت روحها بتنسحب منها بالتدريج وهى مقدرتش تمنعها ..

 خرجت "نادين " خلص "طارق" النوتس كانت كاتبه بس اللى قراه وبعدها صفحات فاضية فعاد قراءه الكلام تاني وكرر قراءته كذا مرة مردد سؤال "ايه سبب الانفصال دا" ومقدرش يوصل ل الاجابة .. 

مر شهر وحاله "غدير" زى ماهي ,,ففي يوم  و"طارق" فى غرفه "غدير" خبط ع الباب "بسام" وودخل بص ع "غدير" وطلب يتكلم مع "طارق" :
_ حاله "غدير" ايه دلواقتى فى تحسن ؟
_ انا بحاول وان شاء الله هيكون فى ..
قاطعه "بسام": دكتور "طارق" انا بجد بشكرك ع اهتمامك وانك مسافرتش علشان "غدير" لكن اعتقد كده كفاية ..
 اتفاجئ : مش فاهم ..؟!
_ مر شهر ع وجودك وعلاجك لغدير لكن مفيش نتيجه ولا اى رد فعل منها ..وطولنا فى مصر ولازم نرجع فرنسا  ف  انا حجزت ليها وهنسافر فرنسا فى دكتور كلمته وقالى ادخلها المستشفي هناك عنده ويتابعها وبجد شكرا ع مساعدتك ..
 بغضب : لكن شهر دى مده قصيره اوى علشان تحكم  ع علاجي فى حالات بتاخد شهور
_ انت نفسك قولتلى اسبوعين والعلاج هيعمل رد فعل وهيبان لكن مر شهر و"غدير" زى ماهى .. وبصفتى اخوها وموافقه من خطيبها ووالدتها قررت هنرجع فرنسا ممكن علاجها يكون هناك ,, المحاولة هنا فشلت زى اللى قبلها وانا مش هحط اختي تحت التجربة لشهور ل احتمالية هتصحي ولا لا ..انا عارفه اننا تعبناك واجلت حياتك وشغلك .. دلواقتي  هترجع لحياتك ووهنشوف الدكتور فى فرنسا هيقول ايه ..؟
_ افهم من كده انك حجزت خلاص ..
_ كمان اسبوع هنسافر ..
بنبره اصرار : يبقى لسه قدامى اسبوع علشان اقول انى فشلت ..
_ اللى انت شايفه وبكرر شكرى لك ..عن اذنك ..
 مشى "بسام" وملامح الاحباط والصدمة واليأس سيطرت ع "طارق".. اتصل "ماجد" وطلب يقابله وكان محتاج يرجع الفندق ويتكلم مع دكتور "عثمان "  ف اتفق هيكلمه تاني يوم ..

فى بيت "ماجد"  قاعد مع "فونا" و"صبا" و"منة",, اتصل "ماجد" ب "طارق" يطمن عليه وع "غدير" وعرف كلام اخو "غدير" وقفل  قربت "جاسمين" بنت "ماجد"  :
_بابا هو انكل "طارق" مش هيجي ؟
_ لا يا حبيببتي اليومن دول انكل "طارق" مش فاضى خالص لما هيخلص اللى وراه هيجي ,, وباعتلك معايا بووووسه كبيره استلمي يلا ..
ضحكت "جاسمين" ودخلت غرفتها :
فونا:  اخبار "غدير" ايه يا اولاد فى تقدم ؟
_ زى ماهي يا "فونا"..."طارق" شبه مبينمش بسببها  وبعد اللى اخوها قاله هيخليه مينمش فعلا
اتكلمت "منه": شهر وحالتها زى ماهي .. فى حاجه غلط ..!
اتكلمت "صبا": مش عارفه ازاى "طارق" كل دا ومش عارف يلاقي السبب ..
رد "ماجد": روحي انتي واعرفيهولنا يا شارموك هولمز شرم الشيخ
_ غلس
ردت "منة":  مش وقته منك له ..
ردت "صبا" والله بتكلم بجد .. يعني اكيد فى سبب بس ازاى مش عارف يوصله اصلا شخصيبة "غدير" زى الورقه البيضا سهله جدااا  ومعرفش انا اخوها ايه المستعجل دا حالتها محتاجه وقت ويقوله شكرا سلام ويروح لحد تاني ..هو ايه فاكره مطعم  دخل معجبهوش الاكل فهيروح مطعم تاني ..؟!
اتكلم "ماجد": امثلتك شبهكك ..تفكيرك فى الاكل حتي فى الظروف دى ..
_مش احسن مااقول بيروح لحاله انسانيه وزهق ويروح لحاله تانيه وهكذا يا ..
بسرعه سكتها "ماجد": ايه دا بكابورت فتح ,,انتي ناسيه انك فى البيت و"حزينه" جوه وتسمع ..
_ ال يعني متعرفش ..
ادخلت "منة": متتلمو بقي وانت اسكت متستفزهاش انت عارف انها دبش مبيهمهاش حد ,,
_متاسفين ياست مرجانه ..
_ ايوة كده اتلم ..
 اتكلمت "فونا": بس "طارق" صعبان عليا و"بسام" عندق حق برده اخ قلقان ع اخته يا ولاد .. بيقولك سنه ونص مفيش جديد وحبيببتي تعبت قبل فرحها ..
رد "ماجد": ماهو" طارق" اللى غلطان اتكلم بقلب جامد وقاله اسبوعين وهتصحي او هيبان اى تغيير واهو ,,كان طول المده لشهر او شهريين ,,
ردت "منة" :مهما كان مينفعش يقوله كده دا ساب كل حاجه علشان اخته ..
_ فعلا مستفز .. "بسام" طول عمره واحنا صغيرين كان مستفز فاكره يا فونا ..
 ضحكت "فونا": ايوه فاكره ..لما كنت بقدمله حاجه مكنش بيحب ياخدها علشان بيقرف
اتكلم "ماجد": اقوم ايه اطلع عند "طارق" واحطها فى كوبايه تانيه واخلى "طارق" يديهاله وبياخدها زى الاهبل وبعد ما يشرب اطلعله لساني واجري ...
ضحكوا واتكلمت "منة": والله كانت اياام فقر ولا لما كان بيلبس اللى ع الحبل ويقابلنا فى بير السلم ويبصلنا بقرف ,, رغم ان اخته معانا
ردت "صبا": ماهو كان بيقولها معرفتك مقرفه استنضفي ويا حبيبتي مكنتش بتعرف ترد ف كنت بطلع شقتنا واستني لما يقف تحت البلكونه ودلقه عليه مايه ابهدله واستخبي ميعرفش مين ودايما البت سماح كانت بتلبسها ...
ضحكت"فونا": كنتم شياطين ..
_ بس غلابة وبوساء يا فونا
_ كلكم الا الموكوس ابني
_ الله ع حنان الام ..
ردت "منة" : ياتري طارق هيتصرف ازاى ..
ردت "صبا": دلواقتي "طارق" هيدخل معركه وتحدي مع نفسه اكون او لا اكون ..ادعوله ..

 رجع "طارق"  الفندق واتكلم مع دكتور "عثمان" مكالمه فيديو  ولاحظ ملامح اليأس والحزن المسيطرة ع "طارق" :
_ مالك يا "طارق" زرعتها جرجير طلعلك برسيم ولا ايه ؟
 ابتسم "طارق" نص ابتسامه : لا دا كده الحكاية بجد .. مالك ؟
 _ حاسس انى عاجز يا بابا .. مش عارف ولا قادر اساعد "غدير" حاسس انى فاشل .. محاولاتى معاها فشلت ولا اشارة تحسن ظهرت .. العجز سيطر عليا وحاسس انى معنديش حاجه اقدر اساعدها بها ..
_ ايه نبرة اليأس والاحباط دى ؟! وانت اكتر شخص عارف لما اليأس والاحباط بيسيطروا ع الانسان اثرهم بيكون سئ جداا عليه ..!
اتنهد "طارق" وبنبره غضب : احساس العجز مدمرنى ...
_ "طارق" انت عارف مشكلتك ايه ؟
_ ايه .؟
_ انك بتتعامل مع "غدير" معامله شخصية ودى مخلياك مشتت ومتسرع وانفعالي وبيمتلكك الغضب ,,عاملها انها مريضه عادية علشان تقدر تفكر تساعدها ازاى ..
اتنهد "طارق" واستكمل دكتور "عثمان" كلامه :
_ انت انسان وطبيعى يمر عليك حالات صعبه تحس باليأس فيها لكن لو انت هتيأس هتعالج وتساعد المحتاجين لك ازاى؟! طبيعى تمر عليك فترات يأس لكن هتحاربها بالامل هتوجد الامل بنفسك حتى لو كدب لكن مش هتستسلم لليأس ابدا  .. اليأس بيبقى اشاره تجدد الامل جواك وتكمل مش توقف وتنهار ..!
_ بابا .. هو انا استعجلت لما قولت هتابع حاله "غدير" ؟
_ ليه بتقول كده ..؟
_انا حاسس انى اتحملت مسؤؤليه "غدير" بثقة ذياده حاسس انى مش قدها وان فى احسن مني  ؟!
_ وليه متقولش انك انت مستعجل ..!
_ مستعجل ؟
_ ايوه مستعجل النتيجة ..لان "غدير" تعرفها شخصيا عاوزها تشفى بسرعه وتكون طبيعيه فى اقصر وقت ممكن ..استعجالك  ولد جواك يقين ان حاله مريضه سنين هتخف فى شهر.. غرور الدكتور اللى جواك صورلك انك ممكن تنجح فى اللى فشل فيه دكاتره اللى قبلك فى مده قصيره جداا غير المتوقع ...
 اتنهد "طارق": ممكن ..
ب ابتسامه: "طارق" انا فى مسيرتى المهنيه خلال45  سنه مرت عليا حالات من وجه نظر الطبيه والعلاجية مستحيله نسبه الشفاء ليها زيزو .. لكن فجاءه بتحصل للحالات دى حاجات الطب والعلم عجزوا عن تفسيرها وكانت بداية شفائهم وعلاجهم لدرجه كنت بسئل نفسى ازاى الحالات دى خفت بالطريقه دى ايه السبب ..المريض اللى قدامي دا  جسد ضعيف هزيل ع حافه الموت فجاءه تترد فيه الروح ويكون فى منتهى النشاط والحيوية ومقبل ع الحياة ..!
_ وعرفت السبب ؟
_ السبب فى الحياة نفسها .. سر الروح ومصيرها ,, الحياة مليانه بالمعجزات فى لحظه بتبدل حال لحال ودا سر الكون لرب الكون اضعف الاسباب اللى بنجهلها  بتكون اقوى طرق العلاج  .. "غدير" مريضه ب "اختلال الانية "  انفصلت عن نفسها فقدت الاحساس بالواقع وانعزلت فى الاوعى ..هى مستسلمة لمصيرها بدون اى مقاومة ..  دخلت حرب رفعت الراية البيضا بدون ما تحارب او تجرب ..ايه اللى هيحصلها فى الاوعي وبعد كده  الله اعلم دا لغز روح الانسان يعلمها خالقها بس ..انت دورك انك تخليها تنزل الرايه البيضا وتجمع ارادتها وتحارب وترجع...انت هتكون المرايا ليها هتساعدها تجتمع مع نفسها ,, دا دور الطبيب النفسى يساعد الاشخاص لتحديد مصائرهم ووجهاتهم .....
_ حاولت كتير لكن مش قادر اوصل للسبب او طرف الخيط اللى ابدء منه .. و"بسام" حدد السفر خلاص وقالى اسبوع واحد مش عارف هعمل ايه فى الاسبوع دا وانا جربت كل حاجه ..
_ لسه قدامك فرصة ,, الاسبوع دا فرصه ل اخر يوم فى الاسبوع يعتبر فرصه ,,قبل ما تتحرك من البيت يعتبر فرصه انتهزها ومتضيعاش دور تانى شوف ايه ممكن يتعمل .. لان مفيش مشكله غير بسبب وليها حل .. معاك المشكله دور ع السبب علشان توصل للحل ..!
_ هحاول ...
_ هتوصل لنتيجه انا متاكد ...
_ بابا .. مش عارف اشكرك ازاى .. فى لحظات يأسي انت بتقويني ..
_ مش مستنى منك شكر .. مستنى منك تبلغنى بتغيير فى حاله "غدير" ونتائج جديده انا واثق ان ابنى الدكتور "طارق" عمره ما فشل ولو فشل بيحاول ويستمر بمحاولاته وبينجح ..
ابتسم "طارق" وقفل مع "دكتور عثمان" وحس بشحنه تشجيعيه واتنهد ومسك السلسله وحطها امامه  ورجع فتح تقارير "غدير" يتفحصها تاني بكل حماس واراده  بيدور ع السبب  والعلاج  ...!

كلام "عثمان" حفز "طارق" انه يكمل ل اخر لحظه قبل سفر "غدير" اتحمس وابتدا مع "غدير" ,,  مر الاسبوع كانت النتيجه نفسها لا يوجد تقدم ...  ف اخر يوم قبل سفر "غدير" ب كام ساعه  قعد "طارق" فى  غرفه "غدير" ينظر ليها بحزن .. قرب منها وطلع السلسه :
_ خلاص كام ساعه وهتسافري ..مش عارف اقولك ايه ,, اني خذلتك ,, انا مقدرتش الحقك ,, استنجادك بيا مكنتش قده ,, انا حاولت وفشلت يا "غدير" فشلت اساعدك ,,انا اسف ع فشلي,, ( مسك السلسله)  عارفه انا كنت عاوز اشوفك علشان ارجعلك السلسه ,, فاكره سلسله  التوليب ( فتح ايديها وحط السلسله وحط ايده عليها وضمها )  مش ناسى انا لما  روحنا المشتل والمدرسة قالت نختار زهرة ونعمل عليها بحث وانتى وقفتى عند التوليب وابتسمتى وقتها ابتسامتك كانت اجمل ابتسامة شوفتها اجمل من التوليب انا مشوفتكيش مبسوطه كده وانتي بتبصلها  ..وكان عيد ميلادك قرب حوشت و فعيد ميلادك عملتلك السلسله دى هدية نفس الزهرة اللى كنتي واقفه قدامها  واول ما شوفتيها ابتسمتى نفس الابتسامة للزهرة .. ابتسامتك جميلة اوى .. لبستك السلسله وكنتى فرحانه بيها وفرحتك كانت اسعد لحظه وقتها عندي  .,, انتي عارفة انا كنت بحب اشوف ابتسامتك اوى كنت بحاول اعمل اى حاجة علشان تفضلي تضحكي ومبتسمة  ولما "ماجد" شدها واتقطعت زعلتى وكنتى بتعيطى ومكنتيش راضية تقوليلى مالك وعرفت .. عارفه عرفت ازاى ... شوفتك وانتى ماسكها وبتعيطى وقتها مستحملتش اشوف دموعك واخدتها اصلحهالك ووعدتك هرجعها كمان اسبوع لكن انتى سافرتى وقتها لجدك ووقتها ماما حجزت تذاكر الطيران ,, ومعرفتش ارجعهالك مكنش ينفع اسيبهالك كنت عاوز اديهالك واشوف ابتسامتك ,, ومن وقتها وهى معايا واول حاجه كنت عاوز اعملها ارجعهالك اول ما رجعت مصر .. لكن مش هديهالك وانتى كده ...هديهالك زى مااخدتيها اول مره فاكرة والبسهالك واشوف ابتسامتك اللى هى احلى ابتسامة فى الدنيا ,, اسفه اني مقدرتش اساعدك اسف .
ضم "طارق" ايده ع ايد "غدير" اللى فيها السلسله و بدموع نازله من عين "طارق "حس بضمه ايد "غدير" ل ايده اللى فيها السلسله واتفاجئ وتخيل انه وهم  وبص عليها شاف دموع من عنيها وحس بحركه صوابع ايديها تاني ومسك ايديها :
_ غدير .. انتى سامعانى يا غدير .. غدير ..
من فرحه رد الفعل فرح جداا "طارق" وحس ان حصل رد فعل اللى كان منتظرة ودخلت "نادين" :
_ دكتور .. عربيه الاسعاف بره جايه تاخد "غدير" علشان السفر و ..
_ سفر ... مفيش سفر ..
_ فى حاجه يا دكتور ..؟
_ غدير .. حركت ايديها .. غدير عملت رد فعل ..
_ بجد .. ودا معناه ان فى تحسن ..
_ ايوه ..
فرحت "نادين" ومسكت الموبيل هتتصل ب والده "غدير" و"بسام" و"رامي " وقفلت ورجعت بملامح حزينه :
_ فى حاجه ؟
بملامح"حزن": يا خساره اللى انت عملته هيروح بسهوله لدكتور فرنسا بكره لما نسافر ..
_ "بسام" مصمم انها تسافر ..
_  لا مفيش سفر .. "بسام " فين ..؟
دخل "بسام" : اتفضلوا يا جماعه علشان نلحق موعد الطياره ..
قرب "طارق" وبلهجه اعتراضيه :
_ لا مفيش سفر .. "غدير" عملت رد فعل بسيط ودا بداية كويسة يعني فى امل وهعرف ابدء و ..
_ كويس انا مش معترض ع اللى حصل وحاجه كويسه ,, فى فرنسا يكملوا الدكاترة اللى انت بدئتو ودى حاجه كويسة ,,
_ ازاى غيري يكمل اللى بدءتو انا المسؤؤل عن حالتها والدكتور "عثمان"
_ وانا قولت لحضرتك شكرا لغايه كده وان امبارح اخر يوم من مهلة الشهر والمستشفي فى انتظارها وموعد الطيارة ..
بعصبية اتكلم "طارق" لانه عارف انها لو سافرت مش هيقدر يشوفها فى "فرنسا " : "غدير" مش هتسافر وهتكمل علاجها هنا ..انا بحاول افهمك ان فى حالات بتقعد سنين وانتم جربتوا كل حاجه فى ال 3 سنين الاخيره ارجوك اسمعني ومتسافرش ..
 بنبره عصبيه : دكتور "طارق" انا عيله "غدير" وخطيبها ووالدتها فى انتظارها هناك من امبارح وهما موافقين ..و"غدير" هتسافر .. يلا بسرعه بعد اذنكم لازم نكون فى المطار فى خلال ساعتين ..!

يتبع ,,

زهرة التوليب (10)

(10)

مع اصرار "هدير" ومحاولة يائسه من "طارق"   نفذ "طارق" كلام "هدير" وغمض عينيه واتمني بشدة كل الاشخاص اللى قال اسمهم يكونوا موجودين مع رغبة شديدة فى روية "غدير" ..وفتح عينيه وكانت مرقباه "هدير":
_ اتمنيت ..?
_ ايوه ..
_ غمض عينك وهات ايدك  وعد ل 10 وفتح عند رقم 1
_ ليه ؟
_ ماقولنا مفيش اسئلة اليومين دول ..
_ تمام ..
 عمل زى ما قالت "وعد من 10 وقرب لرقم واحد وفتح عينيه
_ فتح عينك وبص وراك ..
 بمنتهى البساطه بيبص وكانت المفاجاءه
 _معقولة .. ايه دا ..؟!
 ظهر "ماجد" و"اميره" وولادهم و"ياسر" و"منه" وجهاد" وبناتها وحماتها و"ايفون" للحظه كان مترقب ظهور "غدير" معاهم ,,وعينه ع الباب للحظه صدق ان الامنيه اتحققت لكن مكملتش ...
 قرب منهم وسلم عليهم بفرحه : ايه المفاجاءه دى ..؟
اتكلم "ماجد": اول ما قالتلنا "هدير" انها عاوزه تحتفل بعيد ميلادك بشكل مختلف و اننا نقضى مع بعض الويك اند كلنا مع بعض ب ولادنا وسلاطتنا  مترددناش ,,
 اتكلم "ياسر":  عاوزين نعمل ذكريات مع بعض نعوض بيها غياب 17 سنه اللى مرو مننا
 بص "طارق" ل "هدير": عيد ميلادى ..؟
_  هو كمان 10 ايام  ووقتها هتكون فى لندن ولو طلبت منك تفضل لوقتها هترفض وهتقولي مش هينفع ,, فقولت اخطفك و نحتفل به كلنا معاك قبل ما تسافر ويكون عيد ميلاد عمرك ما هتنساه  ..
 سكت "طارق" من المفاجاءه :
_ انا عارفه انك مش هتكون مبسوط  وانت بتحتفل به لوحدك من غيرهم وخصوصا انك يوميا معاهم فحبيتك تقضى اكتر وقت ممكن وسط الناس اللى بتحبهم وبيحبوك فى مكان يخلد جواك ذكرى علشان تحن وترجع تانى ومتغبش ...
 ردت "منه": "هدير" بتعمل معجزات علشان تعلقك ب مصر ومتسافرش يا دكتور
ضحكوا :
رد "ماجد" : ع فكره  "صبا" هتحاول تخلع لكن لو معرفتش اعذرها يا "طروق" مبيستغنوش عنها اصلها شريكتهم بالروح هناك ..
ضحكوا كلهم  و ضحك "طارق": مش قولتلك دى مكيده ..
_ بس حلوه صح ..
_ جدا جدا جدااااا
ياسر اتكلم : طيب يلا بقى اللى لسه واصلين يدخلوا يغيرو هدومهم واحنا هنحضر الغدا جعانين و"ماجد" لو مااكلش دلواقتي هياكل عيل من العيال ...
 دخلوا  غيروا ملابسهم وخرجوا اتجمعوا واتغدوا ,,تانى يوم صباحا استيقظ الجميع فى تمام الساعه 7 ووجدوا "طارق" مستيقظ :
_ طارق انت منمتش ؟
_ لا يا "ميجو" نمت لكن حبيت احضر مشهد الشروق ..
 بيتاوب : وانا كمان كان نفسى اوى بصراحة  ..
_ اقفل بؤقك دا لتبلعنى ..
_ هاهاها اوعي ميجو يبلعك
وسط ضحكات "ماجد وطارق" استيقظ الجميع واتجهوا لحديقه تناولوا الافطار واتجهوا للشاطئ
 "هدير" بتبص لساعه  واتجهت ل "طارق":
_ يلا بينا نروح نجيب السمك للغدا
_ ايوه يلا ..
"ماجد"  بصوت عالى : متتاخروش انتو هتجيبو السمك  معمول مش هتصطادوه ها  متستغلوش الفرصة انا عيني عليكم حتي وانتم بعيد ..
ضحكوا واتجهوا بالعربيه لمحل السمك :
_ اهلا يا دكتوره "هدير"
_ ازيك يا حج :عبد الحميد "
_ بخير ونعمه .. غيبتوا علينا المرادى
_ اشغال  والله المستشفى والمرضى
_ الله يعينك ويشفى كل مريض يارب ..
_ اعرفك بالدكتور "طارق" ممكن تقول صديق طفولتى ..
_ اهلا يا "دكتور" نورت الجونه ..
_ شكرا يا حج منوره بااهلها ..
 _ هات كراسى ل الدكاتره وجهز طلبهم يا "عماد" ..
قعدوا ع الكراسى وطلب ليهم اتنين شاى واجب ضيافه :
_ الدكتور عزت عامل ايه وصحته ؟
_ بخير الحمد الله باعتلك السلام وبيقولك اتوصى بالطلب
_ احنا عنينا ل الدكتور عزت واحلى طلب سمك وجمبرى وكابوريا واستاكوزا لكم ..
_ تسلم ياحج ...
نظر الحج "عبد الحميد" ب تركيز ل "طارق ":
_ دكتور "طارق" انت جيت "الجونه" قبل كده لوحدك ..؟!
ابتسم طارق : لا اطلاقا .. دى اول مره
 ردت "هدير": يا حج عبد الحميد اللى قدامك دا بقاله 17 سنه مجاش مصر
_ انا حاسس انى شوفتك قبل كده ..؟!
_ يخلق من الشبه اربعين ..
_ او يمكن حكم السن بقى..
_ ليه كده يا حج انت لسه شباب ..
_ والله يا دكتوره "هدير" بقالى فتره بحس بحاجات غريبه كده مش فاهمها
_ لو تعبان متسكتش وروح اكشف ..
_ روحت وعملت كل الفحوصات واهو ( طلع ملف بالفحوصات ) والدكتور قالى انى سليم مفيش حاجه غير سكر يتظبط وضغط بس ,,
مسك "طارق" الملف وبيقلب فى صفحاته :
_ _ فعلا كل حاجه طبيعى شويا سكر عالى  وانميا بسيطة وبالعلاج هيتظبطوا ..
_ مالك يا حج "عبد الحميد" بتحس ب ايه ؟
_ يعنى  اوقات كده بروح اماكن وبحس انى روحته قبل كده لا ومش ظن لا تاكيد وبكون واثق حتى تفاصيل فى المكان بكون عارفها يعنى مش بحتاج حد يعرفنى المكان ,, انا جيت هنا قبل كده ذاكرتى بتأكدلى انا جيت هنا لكن الحقيقة ان دى اول مره ازور المكان دا لكن احساسى بياكدلى العكس ,,, ولما بقابل ناس ل اول مره بحس انى قابلتهم واتكلمت معاهم قبل كده لكن هما بيأكدولى انها اول مره ,, زى اللى حصلى مع دكتور "طارق" انا جوايا احساس انى شوفته قبل كده لكن الحقيقه انه دى اول مره يجى مصر من 17 سنه ,, وبيحصلى كده كتيرمع زباين  وبدخل فى حاله تصدييق وحاله تكذيب وبتوه مش قادر ارسى ع حاله ,, صراع بينى وبين نفسى اكدب الحقيقه واصدق احساسى ولا اللى حواليا بياكدولى الحقيقه واكذب احساسى ,, اقربلها امبارح "على" ابنى بيحكيلى ع موضوع وهو بيحكى وانا مركز معاه وسط كلامه  حسيت انى عارف كل تفاصيل الموضوع وبيقول كلام انا سمعته قبل كده وقتها خوفت سيطر عليا الخوف لان انا متاكد ان دى اول مره اسمع عن الموضوع ... السن دا ولا ايه انا مش فاهم .. ؟!
 ابتسم "'طارق": انت قلقان ليه كده الموضوع بسيط جدااا
_ بسيط ازاى يا دكتور دا انا بدخل فى مناقشات مع اولادى واصحابى واهلى بين هما كدابين وانا احساسى صح ..
_ الموضوع بسيط متعقدهوش على نفسك ... مبدائيا انت جسمانيا الحمد الله كل المؤشرات تطمن
_ طيب المشكله فين ...؟
_ انت محتاج تعمل زيارتين تلاته لطبيب نفسى الحل عنده ..!
_ هو انا اتجننت ولا ايه ..؟
ضحك "طارق":  لالا يا حج  بص هقولك انا .. حالتك دى اسمها فى الطب النفسى " الرؤية السابقة" يعنى اللى بتشوفه دلواقتى انت شوفته قبل كده واللى بتسمعه سمعته قبل كده .. اللحظه الحالية عشتها قبل كده .. الجديد بيكون بالنسبالك قديم والغريب بيكون مألوف والغير معروف بيكون معروف .. كل انسان لما بيتعرض لموقف جديد او بيقابل شخص جديد او مكان جديد  عليه بيحس بخوف وتوتر فى المره الاولى وفى المره التانيه بيختفى الخوف والتوتر دا لان حصل الالفه بينك وبين المكان او الموقف او الشخص دا وبيتسجل فى الذاكرة ,,"الرؤية السابقة" هى خداع الاحاسيس ..هى تزييف الالفه يعنى الانسان بيحس انه شاف الشخص دا ويعرفه او المكان دا وحافظه ,, فهى تعتبر تزييف للواقع  ,,بيكون خداع فى صورة يقين هي بتكون اليه دفاع ضد القلق والخوف وتوتر وضغوطات بيتعرضلها الانسان وهو غير واعي فبالتراكم بيحصل رد فعل ب عرض  .. والتفسير الفيسولوجى لحاله "الرؤية السابقة "  ( مسك "خالد" ورقه ع المكتب وقلم ورسم رسمه للمخ وابتدا يشرح ) معروف ان مخ الانسان بيكون عباره عن كرة مقسومه الى جزئين نص ايسر ونص ايمن ,, الطبيعى ان النصين دول يشتغلوا مع بعض لكن فى حاله "الرؤيه السابقه" فى واحد من النصين بيستقبل قبل التاني  الواقع الخارجى اماكن, اشخاص ,مواقف, احداث وبتتخزن فى الذاكره وبعدها ب ااقل من اجزاء من الثانية يستقبل النص التانى نفس الواقع ,,فى الحاله دى بيكون واقع قديم لانه استقبله وخزنه قبل كده .. علشان كده بيحس الانسان  انه عاش الموقف دا قبل كده او راح المكان دا قبل كده او شاف الشخص دا قبل كده .. هو بيكون احساس صادق لان واحد من نصفى المخ عاش اللحظه قبل النص التانى وفى الحاله دى بيكون الانسان عاش مرتين ... !
_  وبتحصل من ايه دى ..؟
_ بيصاب بها المريض فى حالة الاجهاد الشديد سواء اجهاد جسدى او نفسى ,, تراكم الهموم والمشاكل بتكتر وبتحصل فى بعض حالات الصرع لما بتكون البؤرة فى الفص الدماغى وهى نفس البؤرة اللى بتكون سبب اختلال الانية والواقع ودا معناه ان الفص الدماغى هو المسئؤل عن الادارك والحقيقه والواقع ولو بيتأثر بنتأثر احنا كمان  ...!
_ وليها علاج ..؟
_ اكيد .. علشان كده قولتلك انت محتاج تزور دكتور نفسى مرتين تلاته وهو هيتابع معاك وهيحسن من حالتك .. ومفيش داعى للخوف ...

وصل شاب ومعاه طلبيه السمك : الطلبيه جاهزه يا حج ..
 _ وصلها للعربيه
وقفوا : شكرا يا حج ع السمك ..
_ انا اللى بشكرك يا دكتوره "هدير" انك جيتى ومعاكى دكتور "طارق" وفهمنى انا عندى ايه ..
_ مفيش شكر يا حج "عبدالحميد"
_ نورتوا الجونه واى طلب احنا تحت الخدمه ..
_ تسلم يارب ...
 ركبوا العربيه واتحركوا :
_ ليه اى حد يسمع دكتور نفسى ع طول يطلع فى دماغه الجنون ..؟
_ دا اعتقادات مجتمع السائد ان المريض النفسي يعني مجنون ع الرغم ان الجنون مرض مش اساس الطب النفسي و لان الطب النفسى مش مختص فى الجنون الطب النفسى مختص فى نفس البشرية بكل معاناتها ومشاكلها .. فى منها المرئية وفى منها الغير مرئية .. وفى جاهلين  بيكونوا مرضى ومحتاجين مساعده من طبيب نفسى لكن مش عارفين .. وفى عارفين لكن خايفين علشان ميتقالش عليهم مجانين  فبيسكتوا وللاسف حالتهم بتسوء اكتر ,,اول طريقه العلاج النفسي هو اعتراف المريض انه مريض و انه فى حاجة لمساعده من الطبيب النفسي وانه عاوز يعدي المرحلة دى لان من غير اعترافة ولا ارادته هيبقي علاجه مجرد تتضيع وقت ...
_ بس بجد لو فى زيك كتير يا "طارق" هتساعد الناس بمنتهى البساطه كده ..
_فى زى كتير ومش شرط متخصصيين فى علم النفس ,, احنا كلنا بشر,, احنا محتاجين بس نحس ببعض وبمعاناه بعض مش شرط نعيشها لكن لما نحس ان فلان محتاج مساعدة واقدر اساعده مبخلش وااقدم المساعدة لان فى يوم انا اكيد هحتاجها وبعدين  الصدفه والقدر اللى بيجمع اللقاءات  البشر ..
_ صدقت يا دكتور ...
_ يلا بسرعه علشان هياكلونا ...
_ حاضر ...

فى توقيت رجوع "هدير" و "طارق" كان الجميع جالسين امام الشاطئ ,, "ماجد" نايم و"اميره" مشغوله فى الحديث مع "ايفون" وحماه "جهاد" و "جهاد"  و"منه" بجانب الاطفال بيتحدثوا .. و "ياسر" فى البحر ... قرب منهم دكتور "عثمان" وجلس بجانب الاطفال :
_ تسمحولى اقعد معاكم ...
_ اتفضل يا جدو ..
_ بتعملوا ايه بقى ..؟
_ بنعمل قلعه ..
_ اممم كلكم اللى عملتوها ولا حد معين ..؟
_كلنا ...
_ برافو عليكم ..
وابتدا "عثمان" يبنى معاهم القلعه واندمج مع الاطفال :
_ قولولى انتم مبسوطين ؟
_ جدااا
_ انتم شاطرين فى المدرسة كده ..
 اغلبهم ردوا عليه ان درجاتهم
full mark  ابتسم "عثمان "
_ برافو ..
سمع حوار بين بنت "ماجد" جاسمين " وبنت "جهاد" "ريناد" :
_ قومي هاتي التاب يا رينو من جوه ..
_ لا يا "جاسمين" احنا اتفقنا مع انكل "طارق" اننا جايين هنا نغير جو ونلعب مع بعض والتاب دا مش وقته ..
 ابتسم "عثمان" للكلام  وكمل معاهم لعب وكلام ...:
_ قولولى كده بتتمنوا ايه لما تكبرو  ؟
كانت ردودهم مختلفه ..
_ طيب حاليا ايه اكتر امنيه عاوزينها تتحقق ؟
 نظروا الاطفال لبعض  واجابت "جاسمين" ابنه مراد :
_ بتمنى بابا وماما يبطلوا خناق ...
_ هما دايما بيتخانقوا ..
_دايما لما الاتنين يكونوا مع بعض  يتخانقوا وبابا يسيب البيت وينزل ..
لاحظ "عثمان" ملامح الحزن على وجهه "جاسمين" ونظر ل بنات "جهاد ":
_ وانتم بتتمنوا ايه ؟
_ نشوف بابا ويقعد معانا ويلعب معانا
_ بس بابا مسافر للشغل ..
_  يعتبرنا احنا شغل كمان ولا هو بيحب الشغل اكتر ..
_ وانت يا "يوسف" :
_ عاوز شوكولاته ..
 ابتسم "عثمان": بصوا للبحر كده :
بصوا الاطفال كلهم :
_ غمضوا عينكم وواتمنوا امنيه وارموها البحر وان شاء الله هتتحقق
_ بجد ...
_ طبعا .. لازم نصدق ونأمن ب امنياتنا علشان تتحقق فى وقتها ..غمضو عينكم كده يلا ..
 كان معاه شنطه مخبيها فيها شوكولاتات واتمنوا امنيه رموها البحر وفتحوا عيونهم وشافو الشوكولاته وفرح "يوسف"ابن "ماجد" جدااا والبنات ..
_ جدو .. امنيه "يوسف" اتحققت .. امنيتنا هتتحقق دلواقتي ..
_ امنيه "يوسف" اتحققتت لان معادها دلواقتي ..لكن امنياتكم هتتحقق ان شاء الله لكن فى وقتها ,,لازم نتعلم ان  مش كل الامنيات بتتحقق فى وقت واحد كل امنية وليها وقت محدد تمام ..
ابتسموا: تمام ...
_فرحوا الاطفال ونفذوا كلام "عثمان" ورجعوا يكملوا لعب وتمعن النظر فيهم ونظر الى اهاليهم وشعر بوجود حاجز بينهم غير مرئى ليهم ... وبعد لحظات ظهر "طارق و هدير " واستيقظ "ماجد" وحضروا الغدا وجلسوا يتناولوا الغدا ... وجلسوا بعد الغدا يتكلموا ويضحكوا  ووجهه "ياسر " سؤال ل دكتور "عثمان":
_ دكتور "عثمان" عاوز اسأل حضرتك سؤال ؟
_ معاك المايك اتفضل
 ضحكوا : فعلا التعب الجسدى بيكون له علاقه بالنفسيه ؟
_ طبعا ... الجسم ماهو غير رد فعل للروح وبيتأثر باى تأثير بيحصل للروح الانسان .. ومعظم الاوقات المرض النفسى بيكون سبب ل امراض عضوية مش فيروس ولا نقل عدوى ..
_ ازاى ..؟
_ يعنى الحقد والكراهية والحسد بيسببوا الضغط الغالى وبيحصل جفاف واضطرابات فى الغدد الصماء واوقات عسر هضم دائم وارق وشرود ,, والاشمئزاز والنفور بيكونوا سبب ال امراض الحساسية ..
 اتكلمت "ايفون": يعنى لما اكون قرفانه من حاجه معنى كده انا معرضه يحصلى حساسية ؟
_ ممكن,, لان الحساسيه اصلا نوع من انواع النفور .. نفور الجسم من مواد غريبة عليه ..
_ وايه تانى يا دكتور ..؟
_ الياس والاحباط والتشأؤم بيعمل انخفاض الكورتيزون فى الدم ... والغضب والعصبية بيسببوا ارتفاع الادرينالين والثيروكسين فى الدم بنسب كبيرة ,, علشان كده بننصح اى شخص عصبى  انه يهدى وميستسلمش لحاله الغضب والقلق واليأس  لانه كده بيمهد الطريق بسهوله لقرحة المعدة والسكر والقولون العصبي  وامراض الغده الدرقية واوقات كتير ذبحه ...
_ ودا بيكون علاجهم ايه ؟
_ بسيطه ... عصبى هدى من عصبيتك ,, متشأؤم  تفائل .. كاره حياتك حاول تكون محب ومتبصش للجزء المظلم  وركز ع الاجزاء الصغيره اللى فيها النور .. اتصالح مع نفسك وحياتك ..
_ مش سهل يحصل كده ؟
_ اكيد مش سهل لان الانسان بيفضل فى حرب معلنه مع انانيته وطمعه حرب بيكون اطرافها القلب والعقل والاصرار والاستسلام والصبر والايمان ... واصعب حرب هى حرب الانسان مع نفسه .. والانتصار على الانانيه مش هتحصل بسرعه لانها معركه حياه والنتيجه بتكون مذهله لما الانسان يتصالح مع نفسه ويحبها والحب يكون هو القائد ...
بضحك "ماجد": يعنى لو تعبان نفسيا حب علشان تخف صح..؟! لا دا الطب النفسى سهل اوى ..!
ضحكك "عثمان": انت بتقولها بسخرية لكن كلامك صح .. الحب معجزه الالهية غير مرئيه لكن بنحسها وعلاج ل امراض كتير ... لما الانسان حاسس بالحب فدا معناه حصله انسجام بين جسده وروحه .. الانسان السليم الخالى من الامراض بيكون عنده انسجام تام مع روحه ونظام فى جسده ...علشان كده مهم جداا الانسان يحب نفسه ,,ولو صدف حالات بتعانى ومقدرتش تخف ودا لانها مش فاهمه يعنى ايه الحب  ودا لان الواقع والاحداث المحيطه بالانسان ضاغطه علىه نفسيا وكل انسان عنده قدره تحمل له نقطه بدايه ونقطه انهيار ... فبيلجا لمهدئات والافراط فيها برغم ان العلاج بسيط وهو يتصالح ويحب نفسه لكن فى الوقت اللى احنا فيه الحب مش لقى مكانه لان كل واحد ماسك مسدس وحاطط صباعه ع الزناد فى اى لحظه هيضغط فعايش فى توتر هو واللى حواليه ..
_ لكن تشخيص الامراض بيكون ميكروب دايما ؟
_ مسألتش نفسك سؤال  كلنا مع بعض بنشم نفس الهوا وبناكل نفس الاكل وبنشرب نفس المايه ليه شخص واحد اللى تعب والباقيين لا ...؟!
_ لان مناعتنا مختلفه ...؟!
_ ايوه زى ما "جهاد" قالت  جهاز مناعتنا مختلف اللى دوره حمايه الجسم من اى اعراض خارجيه هتاثر ع توازن الجسم ... وهنا جهاز مناعه كل انسان بتختلف عن التانى بمعنى اصح فى مننا قاوم وفى مننا مقدرش واستسلم والمرض اتملك ضعفه واتملكه .. والانسان ضعيف الاراده بيكون روحه ضعيفه وهالكه ومحتاجه مساعده لتقويتها ... علشان كده ممكن يكون امراض الصدر مرض نفسى وتكرار الانفلونزا يرجع ل اسباب نفسية ... رغم ان العلم أكد ان امراض الصدر بتكون نتيجه ميكروب والانفلونزا فيروس .. لكن فكرو فيها كده امراض الصدر والانفلونزا الاتنين عدوى والعدوى مبتحصلش غير بشرط القابليه والقابليه النفسيه هى الحاله الجسديه ...
لاحظ "عثمان" ملامح تعجب من كلماته ع وجوههم  واستكمل :
_ هحكيلكم حكايه حاله واقعيه هتوصلكم كلامي  .. فى عيادتى فى لندن دخل شاب 26 سنه ,,قعد ساكت ل 10 دقائق وبصلى
*فلاش باك *
 _ دكتور .. انا اترددت كتير اجى ومكنتش عاوز اجى ..
_ والسبب ؟
_ انا جيت علشان رغبتى بالانتحار زادت لدرجه انا خايف من نفسى ..!
_ احكيلى الحكايه ..؟
_ انا ولد وحيد ل امى وابى عشت معاهم صراعاتهم وخناقتهم دايما لما يتقابلوا يتخانقوا مع بعض ع ابسط الحاجات ... بينسوا انى موجود ,, مرت فتره وانفصلوا وانا عمرى 14 سنه والاتنين اتجوزوا اشخاص تانين وكل منهم معاه اولاده  وكنت بين البيت دا والبيت دا .. مفيش اهل ولا اقارب استنجد بيهم للى عشته .. معامله زوج الام القاسية وامى بتكون شايفه مبتدافعش عنى ولو حصل خلاف بسيط مع ابن زوجها مبتسمعش وتهنى وكل ما بتشوفنى تطلع غضبها من والدى عليا ومع والدى يطلع غضبه من والدتى عليا ,, كنت بدخل اوضتى وانعزل عنهم ... والاكل كان عباره عن بقايا وممنوع اطلب زيادة  والمطلوب ارضى باللى هيتحط قدامى زى باقى البيت والمصروف كان مفيش اعتماد ع ان امى او ابى هيدونى لكن انا مكنتش بطلب  .. عشت وشايف اولاد زوج امى وزوجه ابى عايشين فى رفاهية وبيتمتعوا بالحنان والاهتمام والرعاية منهم ... كنت بدخل اوضتى بحاول ارسم او العب ب الالعابى المكسره ,, عشت معاهم زى القماشة بيشدوها ويرموها فى اى مكان بدون اهتمام  كنت اداه لتفريغ غضبهم من بعض فيا ...
 فكرت اكمل دراستى واتخرج من الجامعه وابدا حياتى بعيد عنهم .. نزلت اشتغل فى مصنع بويات اصرف على نفسى وعلى دراستى وفى مره  صدرى تعبنى وكحيت بحده ونزل دم وبعد الفحوصات قالى انى مريض التهاب رئوى حاد  ومطلوب ادخل المستشفى للعلاج ,,, واتحجزت فى عنبر ومفيش حد فكر يزورنى ,, 6 شهور فى المستشفى للعلاج وخرجت اخيرا والتشخيص انى خفيت من المرض نهائي  ... فرحت انى خفيت  وراجع لحياتي ورجعت البيت لكن اكتشفت انا رجعت لمأساه من غير خناق لكن استقبلونى بخوف ورعب من حد يقربلى ... اكل فى اوضتى ولوحدي  وفى طبق معين وبيتغسل بمعقم وكتير بيترمي فى الزباله  ولو خرجت اقعد معاهم يسيبولى المكان ويدخولو اوضتهم .. اتكلم مع حد فيهم يبعد عني مسافه كبيره او يتجاهلني انه مشغول ..اصحابي قاطعوني ..عشت فى عزلة وغربة وانا وسط اهلى,,  ولسبب غير معروف رجعلى اعراض المرض تاني  ورجعت المستشفى تانى 6 شهور للعلاج وحيد ... تحاملت وصبرت وخرجت من المستشفي قررت اكمل دراستي  ودخلت الجامعه واتعرفت ع بنت حبيتها قررت اتقدملها واعيش حياتى معاها بعيد عن اهلى .. لكن هى رفضت واتفاجئت وملامح رعب وخوف كانت فى ملامحها  لما عرفت انى كنت مريض وبتعالج بعدت نفسها عنى  واصدقائى فى الجامعه اتجنبونى حالتى الصحيه انهارت ودخلت المستشفى تالت ..اخرج وارجع ادخل تاني ولسه خارج من اسبوع ... انا لوحدى .. حواليا ناس لكن لوحدى ..  لما انا بتعب ليه مش بموت انا بكون مستعد  .. معامله اللى حواليا بتموتنى وانا عايش ,, مش قادر اتحمل عاوز اموت ...
الكل فى حاله عدم استيعاب :
_ متقولش يا دكتور انه مات ؟
_ لا دخل المستشفى عندى وبيتعالج ... عاوزه اقول ان المأساه الحقيقه مش فى مرضه  لان المرض مجرد عارض طارى لحقيقة تانيه اعمق هى الغربة والوحدة والعزلة اللى اتفرضت عليه من اللى حواليه  ,, الماساه الحقيقه هى الغربة اللى عاشها ,, مرض الصدر ماهو الا عرض من اعراض الغربة والوحدة .. بمعنى انه ياكل لوحده وعايش فى بيت وسط ناس لكن مش شايفهم بيبعدوا عنه خوفا من العدوى رغم انه خرج من المستشفي بتقرير انه سليم لان مش هيخرج وهو تعبان هيسيبوه ينقل العدوي  هو صدق انه تم شفائه لكن اللى حواليه رفضوا يصدقوا وعاملوه انه مريض واجب تجنبه .. ابحاث كتير اكدت ان امراض الصدر اسبابه نفسية اكتر من عضوية وان الميكروب والعدوى مش كفايه لحدوثه ... هو ببساطه المرض لقى بيئه نفسية متفتفه يعيش فيه ويظهر ... المريض بيكون محتاج عاملين علشان يتم الشفا ,, عامل نفسى وعامل الادوية ,, الادوية الدكتور مسئؤل عنه والعامل النفسى اهل المريض والبيئه المحيطة بالمريض  هما المسؤؤلين عنه .. منحسسش المريض بمرضه منكبرش احساسه وخوفه لكن ندعمه ونشجعه يقاوم المرض ويطرده .. فى حالات كتير حالاتها متاخره لكن كلها تفائل وامل وعايشه صراع مع مرضها ومبتتنازلش ودا لان حواليها اشخاص بيدعموها وبيشجعوها لدرجه انها بتنسى مرضها وانها طبيعيه .. لكن لو قابلت العكس وعاشت فى وحده بتكون فريسة سهله للمرض ,,, مناعة بتضعف وضعف واستسلام فطبيعي المرض يرجع بقوة لان مفيش حاجة تصده ,,
علشان كده بقولكم اذى النفس ممكن تكون اسوء من الميكروب والفيروس والحاله النفسيه ممكن تكون سبب فى امراض كتير صداع وضغط وسكر والسرطان وممكن تكون سبب فى العلاج منها ... ! نراعي اللى حوالينا لان بتصرف بسيط ممكن يتأذي واحنا مش حاسين ..!
مسك "ماجد " راسه : ايه دا يعنى الصداع اللى ملازمنى دا ممكن يكون عرض نفسى ؟
 ضحكوا الكل ورد دكتور "عثمان": ممكن لكن علشان تتاكد انت محتاج تزور دكتور وتعمل فحوصات وتتاكد بنفسك ...
_ اول ما هرجع ع طول ... مكنش يومك يا ميجو ياابن ايفون ووليم شوفتو الجواز بيعمل ايه بيحولنا لمرضي نفسييين ,,ياريتني ما اتجوزت ,,
 اضايقت "اميره" ولاحظ "طارق" و"دكتور عثمان"
 واتكلم ياسر : شكرا يا دكتور ع المعلومه
_  اهلا بك فى اى وقت ...
  قامت "هدير" ودخلت وخرجت ومعاها تورته :
_ يلا حالا بالا بالا حيو ابو الفصاد
_ حطت التورته ع الترابيزه واتفاجئ "طارق":
_ تورته كمان ..
 بص عليها شاف صوره اتصورها كلهم امبارح ع البحر مطبوعه ع التورته
_ ايه دا ..؟
_ دا احنا كلنا كل اللى بتحبهم فى اللحظه دى فى التورته
_ بجد مش عارف اقولك ايه ؟
_ متقولش حاجه اتمنى امنيه يلا وطفى الشمعه ؟
 اتجمعوا حوالين "طارق" وغمض عينه وطفى الشمع

انهوا جلستهم وجلس دكتور "عثمان" فى المطبخ بيصنع كوب من الشاي ولاحظه "طارق وقرب منه
_ اكيد صدعت يادكتور ..
_ لا خالص ..تشرب شاي
_ اكيد
_ بعتلى مسج وقولت عاوزني ..في حاجة ..؟
_ تعالي بس كده نشرب كوبيتين الشاي بره وهقولك ..
_ تمام ..
قعدوا : الشاي بالنعناع مفيش بعده
_ جدااا ..
_ قولي يا طارق .. انت ملاحظ اللى انا ملاحظه ..؟
_ اللى هو ايه ..؟
_ اصحابك .. عندهم مشكله فى علاقتهم ببعض .. باين جدا فى سوء تفاهم وعند ومكابره
_ بتتكلم ع "ماجد" و"اميره" ..؟
_ و"ياسر" و"منه" و"جهاد" وزوجها .. الكل بيعاني وبيكابر ..
_ انا لاحظت كده لكن مقدرتش اعمل حاجة كل واحد شايف ان عنده حق والعند صعب تغلبه ..
_ بس اعتقد اننا لازم نمدلهم المساعده ع الاقل نجرب .. علشان اولادهم حقهم عليهم يعيشوا حياه سوية طبيعيه .. مينفعش يعيشوا كده ..
_ انا معاك فى اللى انت عاوزه يا دكتور ..
_ تمام ..يبقي اتفقنا ..

تاني يوم قضوا ع البحر واخر النهار قعدوا مجتمعين فى الحديقه بعد ما اولادهم نامو :
_ الجو هنا تحفه
_ جدااا ..
نظر دكتور "عثمان" ولاحظ تجاهل "ماجد" ل "اميره" و"منه"ل "ياسر" وحديثها مع جهاد ..
_  بقولكم يا شباب .. ايه رايكم نلعب لعبه ؟
_ اتفقنا ..هنلعب ايه ؟
_ بما انكم جميعا مريتوا بتجربة الزواج فهطلب منكم تغمضوا عينكم 5 دقائق وتصفوا ذهنكم من كل حاجه وتتخيلوا قصه حب بين اتنين متزوجين وتوصفوها بكلمه واحده تمام ..
ردت "هدير" : انا وطارق متجوزناش يا دكتور ..
ضحكك"عثمان" تخيلى يا هدير ..
استغربوا لكن وافقوا وغمضوا عينهم ومرت 5 دقائق وملامح وجوهم بتتغير وفتحو عينهم واستغربوا من ملامح وجوهم كانت "منه" بتدمع و "ماجد" متعصب و"ياسر" بيتألم و"جهاد "اخر واحده كانت مبتسمه ودموع نزلت من عينيها و "اميره" دمعت :
_ ها قولولى كده ؟
رد "ماجد":فتور
رد "ياسر" افتقاد
ردت "منه" الالم
ردت "اميره" وحده
ردت "جهاد" حضن
استغربوا لرد "جهاد" وقالوا فى صوت واحد : حضن
ردت "جهاد" وبتحاول بتمسح دموعها : ايوه حضن ..
 انا اسفه دموعي دى  لاني متاثره بغياب زوجي ووحشني وافتكرت حضنه ..
رد "دكتور عثمان ب ابتسامه : وانا اتفق مع "جهاد " .. الزواج والحب يعني حضن ..!
_ حضن .. ..؟
_ الحب يعني حضن والحضن يعني احتواء والاحتواء مدام موجود عمره ما هيسبب افتقاد ولا خناق بين الطرفين  لان هيكون فى تفاهم ومصالحه بينهم ودا هيخلينا نحس بمشاعرنا المتبادله المليئه بالسعادة والطمانينة .. ومش هيكون هناك فرصة للفتور فى العلاقه ولا ملل( نظر ل ماجد و اميره )  لان كل طرف متمسك بالتاني اكتر وحياتهم متجدده بالحوار والتفاهم  وبالتالى مش هيعيشوا فى الالم يسببللنا دموع توجع روحنا (نظر الى منة)  ولا هنعيش فى وحده رغم وجود الطرف التاني جنبنا ( نظر الى اميرة ) وبالتالي مش هيبقي في افتقاد (نظر الى ياسر) لان شريكي معايا وانا محسسه بوجوده معايا ,, الحضن هو الخلاص ن ألم الحياة هو مغناطيس كلام كتير بيتقال من خلاله "اطمن ,متخافش, انا معاك, مش هسيبك لوحدك , وحشتني " من غير ما تتكلم معناه بيوصل وبيطمن الطرف التاني وبيطمنك ,, الحضن بيكون ملجا كتير متجاهيلنه وشايفينه شئ ثانوي فى العلاقة بالرغم انه اساسي واهم شئ .. فى دراسة بتقول انك وقت معانقتك لشخص لمدة 20 ثانية الجسم بيفرز هرمون ( الاوكسيتوسين) وهو هرمون بيزيد من الثقه والحب والارتباط بين الاتنين بنسبة عالية جداا وكل ما زاد وقت الحضن كل ما انخفضت ضغط الدم والتوتر والخوف والغضب بين الشخصيين ودا بيؤثر بشكل ايجابي ع سلوكهم اجتماعيا وشخصيا ,,
_ يااااه ...
_  برغم ان فى كتير شايفين ان الحضن عادي لكن تجاهله واهماله بيكون سبب فشل علاقات كتيره بتوصل لمرحلة التعود والروتين ,, بيظهر وقتها الفتور والالم والوحده والافتقاد ..ببساطة لو الطرفين فى علاقتهم فاهمين انهم كل اللى محتاجينه فى علاقتهم من غير كلام انهم يغرقوا فى حضن بعض علشان يشفوا ارواحهم الغير مكتملة ويطلقوا خلاصها فى اعماقهم لتكتمل كل روح بالتانيه بالناقص منها وهيبقوا وقتها عرفوا قيمه علاقتهم والشخص اللى معاهم والاتنين هيعرفوا يعني ايه حب ..يعني ايه زواج وحياه واولاد ....
 الكل منتبهه لكلام "عثمان" واستكمل :
_ ودا هيرجع ع اولادهم لما يشوفوا الام والاب متفاهمين محتويين بعض لان اول اشخاص بيعرفوهم معني الحياه والدنيا هما الام والاب .. الطفل اللى بيشوف امه وابوه بيتعاملوا بحب واحترام وحوار دايم  وتقدير وحنان واحتواء صادق بيكبر وبيكون انسان سوي وقوي وفاهم يعني ايه علاقه بين اتنين .. لكن لما بيشوفهم بعاد عن بعض وخناق وفى فتور بينهم كده مش هيقدر يعيش حياته للاسف ..
 ردت ايفون : بس يا دكتور طول ماهو احتياجاته موجوده اكله وشربه وتعليمه فى مدرسه كويسه اكيد هيكون انسان كويس ..
_  يا مدام ايفون الطفل مش محتاج يلبس وياكل ويشرب ويتعلم بس الطفل محتاج تربيه نفسية شحنه نفسيه تقويه يقدر يعيش ويواجهه الدنيا ودى بتكون من الاب والام هما اللى بيكونوا مصدر الامان والثقه طول ماهما شايفين امهم وابوهم متفاهمين محتويين بعض هيكونوا فى امان لكن الام فى اتجاه والاب فى اتجاه وعايشين فى صراعات الطفل بيكبر مشتت تاهه فاقد معاني كتير فى الدنيا ..فى حاجات اهم كتير من الاكل والشرب ... علشان كده الدخول فى علاقه مش سهله الطرفين لازم يكونوا واعيين انهم هيكملوا بعض ودا مسؤليتهم هتكبر بوجود طفل محتاجهم هما الاتنين مع بعض ... الطرفين يحتو بعض وطفلهم يشبعو احتياجاته النفسية يضموا يطمنوه زى ما هما اطمنو .. ابنك او بنتك لما بيخاف بتضميه فى حضنك تطمنيه وزى ما الطفل بيحتاج لحضن علشان يطمن ..الكبار محتاجين علشان يطمنو ..!
رد "ماجد": الحياه صعبه يا دكتور ومتطلباتها بتاخدنا ..!
_ يا شباب الحياة مش بالتعقيد دا .. ببساطة عاوز تخس يبقي تقلل من اكلك وتتبع نظام غذائي ورياضه ,,عاوز يكون معاك فلوس وغني يبقي تجتهد وتسعي فى شغلك من غير كسل ,, عاوز تكون سعيد وتعيش السعادة يبقي تدور ع شخص يشاركك السعادة علشان تحس بها ,,الحياة مش معقدة الحياة محتاجة صبر واجتهاد وارادة واختيارات صح ...!
اتكلموا شويا  واستاذنت "منه" قعدت ع الشاطي بتمسح دموعها لانها تذكرت كل لحظاتها  مع "ياسر " ...
نظرات "ياسر" تابعت "منة"  وشافها لوحدها ووقف لاحظه "خالد" وخبطه فى كتفه :
_ ايه ..؟
_ ايه ايه .. روحلها يلا ..
 ابتسم "ياسر " واتجه ل "منه" وكانت قاعده ع الشاطئ :
_ ممكن اقعد معاكى ..
_اتفضل طبعا ...
 قعد بجوارها وكانت "منه" بتنظر للبحر وساكته :
_ انا مكنش اتخيل  اننا هنتجمع وهنقضى يومين مع بعض
_ فعلا مفاجاءه "هدير" جميله ..
_ فعلا لولا مفاجاءه "هدير" مكنتش هقدر اشوفك ولا اقعد معاكى كده
بصت "منه" ل "ياسر": ليه يعنى مااحنا دايما بنتقابل و من قريب كنا مع "صبا" و..,
_ وحشتيني يا "منه"
سكتت "منه" وكرر "ياسر" كلامه : وحشتيني
 وقفت" منه" وبتمشى بخطوات سريعه لحقها "ياسر" ومسك ايديها يوقفها :
_ منه ..
 زقت ايده :ياسر.. ارجوك متقولش حاجه ..
_ "منه" انا مش عارف اعيش من بعدك ,, كل مره ارجع الشقه بكون حاسس انى هلاقيكى ,, سامحينى مش هيتكرر اللى حصل تانى اوعدك انا بحبك يا" منه" ..
_ بس ياا"ياسر" بس ,,مش عاوزه اسمع حاجه منك انت اتاخرت واتاخرت اوى ع كلامك دا
_ مينفعش تدينى فرصه تانيه ؟
_ فرصه تانيه .."ياسر" ,, ال 4 سنين اللى كنا متجوزين فيهم كانوا عباره عن فرص واعذار انا بديهملك وانت بتضيعهم ببساطه ,, انا تعبت  ,, حقيقى تعبت ومش هقدر اعيش تانى اللى عيشته انا وصلت لمرحله ووقفت ع رجلي معنديش استعداد انهار تاني ...
_ صدقينى مش هيتكرر ,,
_ وانا مش مصدقاك ,, مش مصدقااك انه مش هيتكرر لانك قولتلها اكتر من 100 مره مش هيتكرر وحصل .. قولت انك مش هتتاخر بره البيت وتسيبنى لوحدى طول اليوم واتكرر ,, قولتلك انا محتاجه اتكلم معاك كذا مره وانتى مبتسمعش وقولت هتبقى تسمع ,,, قولتلك  وجودك معايا فى مناسبات اهلى حاجه مهمه عندى وانت مكنتش بتيجى وكنت بتستهل وتقولى باتى عندك علشان مش فاضى تسيب اصحابك وتيجى تاخدنى ,,, تعبت من انى شايله المسؤلية لوحدى وانت مجرد زائر فى البيت تاكل وتنام ووقت ما تطلبنى بمزاجك وغير كده مش شايفنى ... تعبت انى ست وراجل البيت وانت موجود .. انت حسيت انى قادره اتحمل فبدل ما تساعدنى زودت عليا وعلشان مشتكتش عملت نفسك مش شايف وزودت اكتر ... انا لما كنت تعبانه  والدكتور قال محتاجه راحه وتعبت فى البيت وكلمتك وانت كنت مع اصحابك ع القهوه قولتلى جى واتاخرت ورجعت شفتنى  واقعه فى الحمام ,, وبعدها كنت محتجالك جنبى لكن انت شغلك واصحابك كانوا اهم بمعنى اصح انت كنت اهم من اى حاجه تانيه عندك .. انا حبيتك لما وعدتنى انك هتكون معايا فى كل خطوه وكل قرار ,, حبيتك لما حسيت انى من اولوياتك مش شئ مركون ,, حبيتك لما اكدتلى مش هتتغير ووعدتنى هتفضل معايا .. بعد الجواز اتغيرت وكل كلامك اتبخر ,,, مش دى الحياه اللى عاوزه اعيشها معاك ,, مش دى الحياه اللى عاوزه اعيشها وولادى يكبروا شايفنها .. انفصلنا كان فى صالحنا احنا الاتنين ,,
_انا كنت مشغول عنك علشان مستقبلنا وحياتنا يا منه و ..
_ياسر .. انا متجوزتش علشان اكل واشرب والبس هدوم جديده ,, انا كنت كده فى بيت اهلى , انا اتجوزت علشان حبيت وقررت اعيش الباقى من عمرى مع اللى بحبه ,, اعيش معاه انا وهو مع بعض ..
_  انا حسيت بغلطتى وندمان عليها صدقينى ومش هيتكرر تانى و ..
_ تمام .. لكن قولي  هنسي ازاى انك وصلتني لقرار اقتل ابني ب ايدي علشان ميجيش لدنيا .. انا اول حلم حلمته بعد ما اتجوزنا انى اكون ام ل طفل منك زى اى واحده فى الدنيا بتحلم بطفل يكون من اللى بتحبه ,,لكن انت خلتني اقتله ,,انا كل ما بفتكر اننا كنا متجوزين وان انا عملت كده بكره نفسي يا "ياسر" بكره نفسي ..ومش قادرة اسامح نفسي ع كده ..
_ كانت غلطة وتسرع منك ومع بعض كل حاجه هتتصلح صدقيني انا اتغيرت ..
_ وانا مش مصدقاك يا"ياسر"  .. ارجوك خلينا نحافظ ع علاقه الصداقه اللى بينا ع الاقل كانت افضل من لما اتجوزنا ,,, ارجوك متبوظهاش لانها لو باظت هتبقى دمرت اخر حاجه ممكن تربطنا ببعض ,,,
 مشيت خطوتين : مدام بتقولى شايفانى صديق ليه متجوزتيش تانى بعدي ..
 بصتله :  لان الغلطه الاولى بتكون عاديه لكن الغلطه التانيه بتكون غباء وانا مش هغلط تانى نفس الغلطه بنفس التسرع ,,عارف اسوء حاجه انك تكمل باقي عمرك بنفس العادات الغلط مع الناس الغلط بنفس القرارات الغلط مفيش اسوء ان الواحد ميبقاش قادر يتغير  ..وانا قررت مكملش فى قراري الغلط واتغيرت واتمني انت كمان تتغير ونفضل اصحاب والا هتخسرني نهائي ...
 _منه  ..
 بخطوات سريعه اتحركت "منه" اتجاه الفيلا وكان " طارق" و"هدير" و"ماجد" قاعدين:
 هدير : استني يا "طارق" هجبلك علاج ل لمعدتك هيريحك ..
اتحركت "هدير" وبص "ماجد" ل "طارق" وبيغمزله :
_ فى ايه ..؟
_ فى ايه انت يا دكتور ..؟
_ معدتي وجعاني ..
_ لا الف سلامه .. بس برده مقولتش فى ايه ؟
_ انت عاوز ايه  يا "ماجد" بغمزك دا حولتني ..
_ طيب ايه هتفضلوا كده كتير ؟
_ تقصد ايه ..؟
_ لا متقوليش انك غبى بجد مش بتستغبى ..؟!
_ فى ايه ياابنى ..؟
_ انت مش حاسس بحب "هدير" .. دى لهفتها وتخطيطها لمفاجئتك لعيد ميلادك ونظراتها واهتمامها بك مخصوص وبتفكرك ب الدوا و و و ,, اقول ايه كلنا عارفين وشايفين هى بتحبك  ودايبه فى دباديبو
 ابتسم "طارق": فعلا هى عقليات ,, ليه دايما لما تشوفو اتنين قريبين لبعض بدون تفكير بتقرروا من نفسكم  ان علاقتهم حب ,,مبتفكروش ليه علاقه صداقه مثلا .. ؟!
_ صداقه .. ودا ازاى يعنى  ..؟
_ صداقه .. زى علاقتك ب "منة و جهاد و صبا "كده .. يعنى اللى يشوفكم وتعاملكم مع بعض يقول بتحبو بعض مثلا ...
_ لا طبعا احنا اصحاب وعشره عمر واخوات كمان ..
_ بالظبط دى علاقتى مع "هدير" يمكن مختلفه عنكم لكن المسمى لعلاقتنا صداقه واخوه
_ بس هى مش كده خالص نظراتها بتقول انها بتحبك بجد ..اسمع مني ؟
_ انت اللى دماغك شايفه كده ,, "هدير" انسانه محترمة وصديقه مقربة ومن اقرب الناس ليا فعلا ..
_ طيب ممتازه اهي يعني زوجه مضمونه واعتقد انها مش من نوعيه "حزينه" هتنكد عليك ..
_ وهو يعني علشان هى انسانه كويسة و احنا قريبين لبعض لازم نتجوز ,, فى حاجه اسمها مشاعر وتوافق وتفاهم ,, الزواج خطوة مش سهلة دى حياه بتتبني وكتير بتتغير وجهه نظرنا لحاجات ,, مش مهم انا عاوز ايه ولا هى عاوزه ايه ..المهم ان اللى احنا عاوزينه احنا الاتنين يكون واحد لاننا هنعيش مع بعض ...
_ انت ليه بتكلمني بعمق هو علشان انا تعليم حكومي وانت تعليم بره ..
ضحك"طارق": "ماجد" علاقتي ب "هدير" مش هتفهمها لانك شايفها من بره مش جوه العلاقه علشان تحكم ..
_ ماهو اوقات اللى جوه العلاقه مبيشفوش حاجات ,, اللى بره اللى زى حالاتي بيشوفو وواجب عليهم ينبهوهم وكده .. وبصراحة "هدير" لقطه .. وغير كده مفيش "غدير " خد "هدير " هاهاهاها
 اتفاجي "طارق" : ايه ..؟
_ ايه ايه ... انا لولا سفرك كنت متاكد انك هتكون متجوز غدير لان مفيش غيرك اللى يقدر يفهمها
_ ليه هى اتجوزت دلواقتي وعايشه حياتها ومستقره .. افكار الطفولة دى خرجها من دماغك ..
_ مش قادر يا "طارق" يمكن علشان لبست فى "اميره" فى الفتره دى ..طفولة مشردة
ضحك" طارق": تستاهل والله ..
_ ماشى ياعم الصديق شمتان فيا  ماشي  
 رجعت "هدير" بالعلاج وقعدوا يضحكوا ووشافوا "منة"  متجهه اتجاهم ملامحها متغيره :
_ فى ايه يا منه ؟
_ لا مفيش يا طارق ..
_ قوليلى فى ايه الواد"ياسر" عملك حاجه ؟
_ مفيش يا ماجد ... انا داخله انام تصبحوا ع خير ..
ودخلت الفيلا ورجع" ياسر" وقعد جنبهم وملامحه متغيره  ,, اتحرجت "هدير": هقوم اعملكم شاى  وبنعناع طازه مخصوص ل" طارق"
 _ فى ايه يا ياسر  ؟
_ مش عارف اعمل ايه يا "اطارق" ,, انا كل محاولاتى بتفشل وهى مش قادره تسامحنى ولا تنسى
اتكلم "ماجد":انا قولتلك ياابنى فكك بقى منها وعيش حياتك ..
 بنبره عصبيه : افكنى منها ازاى,, انا بحبها يا "ماجد " بحبها ولا عارف ولا قادر احب غيرها ولا انساها ,,انا كل ما برجع البيت بحس انها هتخرج من الاوضه ,, لمما بنام بحس بوجودها جنبى .. انا مش متقبل فكره طلاقنا من الاساس انا هودتها بس علشان هى صممت ..
رد "طارق" :
_انت يمكن عرفت انك بتحبها بعد انفصالكم لكن قبل كده لا هى كانت بتحبك اكتر ..!
_لا حبيتها ..
_ لا محبتهاش ..
_ لا حبيتها ..
_ انت حبيت الطريقة اللى دخلت بيها حياتك وملت الفراغ اللى فيها بس ,, انتم علاقتكم كانت صداقه وانتم الاتنين عارفين كده واتقربتوا ع اساس دا لكن فى وقت  هى كانت علاج لتجربه فاشله ووقت الغرق بنتعلق ب قشاية ..اتخلط عليك المشاعر الصداقه انها حب وقررت تستغلها تكمل علاجك بحبها لك وهى علشان حبيتك وافقت لكن مكنتش تعرف انها هتعاني  ..مع الوقت انت كنت ضامنها  لانك اتاكدت من حبها وانها جمل هتستحمل وانشغلت قررت بطريقة غير مقصودة نتيجه التجربة الاولي انك متحبش بكل مشاعرك وتكوني عملي ودا اثر عليك مع "منه" وبعدك عنها .. والبعد اللى حصل فى علاقتكم ..انت شايف دا صح لكن دا كان بدايه فشل العلاقه انك تشغل نفسك بالشغل وتبعد عن مراتك دا فشل حتي لو ظروف الحياه جبراك ع كده ..انت معاك انسانه فى البيت حياتها وكل عمرها وهبته لك تضيعه انت فى انتظار ... انت اتصرفت غلط ودا اللى دفعها لما عرفت انها حامل تعمل ابشع جريمة اى واحده ممكن تعملها وهى تجهض طفلها ودا  لانها حست بوحده وببعد منك ومحبتش الطفل يكون هو الرابط بينكم لانها بدأت علاقه حبك ليها هو الرابط والطفل نتيجه مش اساس ... حاسب نفسك هتعرف انها معاها حق تفكر مليون مره دا لو عاوزه ترجعلك ..
كلام"طارق" كان عنيف اتجاه "ياسر "
رد "ياسر": اعمل ايه اكتر من اللى بعمله قالت اصحاب وافقت وهاودت اعمل ايه تاني وهى قافلة كل الطرق..؟!
_ انت حاسس ب ايه لما بتتكلم معاك ؟
_ بوجع كل مره بحسها موجوعه
_ حاسس انها كرهتك ..
_ مش عارف لكن دايما بيكون فى عتاب فى عينيها ولوم ليا ,,
اتكلم "ماجد": انا واثق  ان "منة" بتحبك لسه لكن موجوعه من اللى عملته ,,
_ ايه الثقه دى ..
_ كانت اتجوزت انتم  مطلقيين بقالكم3 سنين .. فاهم يعنى ايه 3 سنين وهى دايما بترفض ,,وانت كمان رافض تتجوز غيرها ,,انتم بصراحه بتعذبوا بعض دى ملخص علاقتكم
اتكلم "طارق": فكره عدم ارتباطها تاني دا مش تاكيد ع انها لسه عاوزة "ياسر" مش شرط ,, "ياسر"   اسمع لقلبك واستشير عقلك ومتتنزلش عن الامل اللى متمسك به ,,حاول مره ومليون ل اخر طاقه عندك الحب ب اثبات مش كلام واصرارك هيوصلها ا صدقك وندمك والخوف اللى عندها هيختفى ..
اتكلم " ماجد": ايوه حاول مره ومليون لا تيأس يا صديقي ..
بص "طارق"  ل "ماجد" :
_ وانت؟؟!
_ وانا ايه ..؟
_ انت  عايش حياتك غلط خالص ..حالات انسانيه وجاهل اهم حاله فى حياتك هى مراتك ام ولادك .. مشاعرك واهتمامك للى بتوزعه بره فى علاقات هوائيه هى اولى بيها ..
_ انا حاولت انت فاكر انه بمزاجي انا ..
قاطعه بحده :  تحاول تانى وتالت ورابع .. انت محاوله واحده وكسلت وبتخسرها .. هى اتجوزتك علشان بتحبك وانشغلت مع ولادك دا لانك رميت المسؤليه عليها مينفعش انتم الاتنين تتخلو عنهم ..انت عاوز تكون فى الشغل وترجع تلاقيها البيت نضيف والولاد اكلين ونايمين وهى كمان مستنياك متشيكه .. انت متعرفش يومها بيكون ازاى وبيمر عليها ازاى ...انت متعرفش الضغوط اللى مرت عليها وعايشاها وهى محتاجه ايه ..انت دورت انت محتاج ايه منها لكن مفكرتش هى محتاجه ايه منك ودا كان بدايه الخلاف  انت حكمت ع مراتك بسرعه واتصرفت بناء علي اعتقادك وصدقته .. انت محتاج تراجع حياتك يا "ماجد "..انت عندك اطفال وشايفين ومفيش طفل غبي وحياتهم فى رقبتكم ..
_ يعني اعمل ايه ..
_ فى جمله قالتها "صبا" وفعلا حسيت بمعناها دلواقتي ..
_ ايه هى دى كلها حكم ؟
_ قالت ان اغلب  صفات الانسان  وراثية الا الاستحمار فهو مجهود شخصي ,,!
_ انت تقصد انا حمار ..
_ لا بتستحمر .. راجع نفسك شويا يا "ماجد" متستهترش بالفرص علشان متندمش وعلشان ولادك ,,افتر انك اختارتها وانك بتحبها وهى بتحبك واللى بينكم سوء تفاهم بس محتاج انتم الاتنين تتكلموا وتسمعوا بعض والاهم تعترفوا بغلطكم .. فكر ... !
 استغربوا "ماجد" و"ياسر" من حده كلام "طارق" ليهم :
_ انا عارف اني اتكلمت معاكم بنبره عنف لكن كل واحد فيكم محتاج يفوق ويلحق قبل ما يفوت الاوان ,, ال 5 شهور اللى كنت معاكم فيها نتم تايهيين بتهربوا من مواجهه الحقيقه ,,عاوزه اقولكم اللى خسرتوه مش هين واللى هتخسروه مش هيكون هين ,,الحقوا نفسكم ..
_ انا قايم انام تصبحوا ع خير ..
واستاذن "ياسر "  يدخل يننام  ومعاه "ماجد" ورجعت "هدير" بالشاي :
_ هما راحو فين "ماجد" و"ياسر" ؟
_ دخلو نامو ..
_ والشاي ..؟
_ نشربه احنا ...
 قعدت "هدير" بجانب "طارق" ولاحظت ملامحه المتغيره :
_ صوتك كان عالي يا "طارق" واتعصبت عليهم ..
_ الاتنين مش مقدرين حياتهم ولا اللى معاهم ..
_ اهدي بس وكل حاجه هتتحل روق ..
_ ان شاء الله ..
_ انا هقوم اتمشي شويا
_ تحب اكون معاك و..
_ لالا ارتاحي انتي انا بس محتاج ارتب افكار ومش هتاخر ..
_تمام ..
 قام "طارق " واتمشي ولاحظ "جهاد" قاعدة لوحدها قرب منها :
_ انا قولت انك نمتي ..
لاحظ "جهاد" وهى بتمسح دموعها :
_ مالك يا "جهاد" .. فى حاجه ضايقتك ..؟
_ اتكلم بصراحة ..
_ سامعك ..
_ انا "مصطفي" وحشني جدااا ,, كلام دكتور "عثمان" عن الحضن حسسني ب افتقادي له جدااا ..
_ طيب كلميه ..
_ لا يا "طارق" انا وحشني احس بوجوده مش محادثه صوتيه وفيديو .. انا عاوزاه يضمني فى حضنه ويضم بناته فى حضنه ,, انا بعمل اللى عليا علشان اعوض مكانه لكن مبقدرش ارد ع بنت منهم لما تقولي بابا واحشني يا ماما وتشوف  صاحبتها وهى فى حضن ابوها ..
_ الحل فى ايدك يا "جهاد" مش صعب ..
_ هو ايه ؟
_ تتكلمي معاه لو فى فرصه ع ينزل مصر ويستقر ينزل ولو مش هينفع ياخدكم تعيشوا معاه هناك زانا عرفت انه ينفع وانتي اللى رافضه بتوفري ,, انتي مشاعر الوحده وجعتك وهو كمان اكيد عايش فى وحدة ,, ازاى فى السنه ينزل شهر واوقات 15 يوم ,, هيعمل ايه فى ال15 يوم اللى نصهم بيضيعوا زيارات ل اهل ومعارف ,,15 يوم هيعوضوكم عن غيابه ,,
_ لكن ..
قاطعها "طارق": "جهاد" الفلوس بتتوجد علشان نستمتع بيها مش علشان هى تستمتع بتعاستنا ,, العمر فى علم الغيب واليوم هدية من ربنا نستمتع ونستغله ونستني بكرة باللى فيه ,, مقولتلكيش تعيشي فى بذخ لا عيشي فى حدود امكانياتك مع بناتك وجوزك وانتم مع بعض ,, فكرتك الراسمالية وتحويش الفلوس بتاخد من عمرك وسعادتك وسعادة زوجك وبناتك ,, يعني ايه فلوس بتتكوم وانتي مفتقدة زوجك بالطريقه دى وبناتك مفتقدين ابوهم وهو نفسه مفتقدكم ... اللحظه وانتم مع بعض متجمعين ع سفره واحده او بتتفرجو ع تليفزيون او بتتكلموا احسن كتير عن وانتم بعاد علاقتكم فيديو بس ,, العمر بيمر ومش هيستناكو ,, فكري كده فى مصلحتك ومصلحة بناتك وزوجك وكفايه بعد ووجع ,, انا غبت عنكم 17 سنه ومكنوش سهليين عليا بره ,,فكري كدة وانتهزى صحوة الفقد اللى حساها دى ,, انتي وزوجك صغيرين افرحوا ببعض مع بعض مش ع طريق فيديو ومكالمات وهدايا لما يرجع ,, انتي قولتيها ,,الزواج يعني "حضن" .. انتي موحشكيش تترمي فى حضنه كده وتنسي الدنيا ..
ابتسمت: جدااا ..
_ يبقي ننتهز الفرصه واتكلموا وظبطوا الدنيا وهنا او هناك انتم مع بعض هتعيشوا وهتكونو احسن من فرقتكم دى .. ولا ايه ..
ابتسمت "جهاد": شكرا يا طارق بجد شكرا ..انا اول حاجة هعملها لما ارجع هتكلم مع "مصطفي" وفعلا انا ظروفي احسن من ناس كتير ..وعلشان بناتي وعلشان نكون مع بعض فى احلى سنين عمرنا ..
_ تمام .. حبايه الشجاعه دى خلى مفعولها مستمر لوقت تكلميه ..
ضحكت: اكيد .. شكرا يا "طارق "
_ يلا بقي روحى نامي جنب بناتك ونتجمع الصبح ..
_ تمام .. تصبح ع خير ..
مشيت "جهاد" واتنهد "طارق" ورمس جسمه ع الرمل وبص للسما .. !

قرب الشروق راود "طارق" نفس الحلم وصوت "غدير" وهى بتنده عليه وقام من النوم مخضوض وبص حواليه وكان لسه الكل نايمين وبص ع الساعه وكانت 5 الفجر ,,قام وخرج من الغرفه ونزل اتجاه الشاطئ وقعد ع الرمل وماسك السلسله باصصلها وبيتنهد .. وفى اللحظه دى قربت منه "هدير" :
_ انا قولت اكيد هلاقيك هنا فى الوقت دا ...
_ هدير ..انتى لسه صاحيه ..؟
_ نمت وكنت عاوزه اشرب وشوفتك وانت خارج من الفيلا وقولت اكيد هتقعد ع الشاطئ ,,
قعدت جنبه :انهارده اخر يوم وبكره الفجر كلنا هنتحرك وكمان 4 ايام هتكون فى لندن ..
اتنهد "طارق": الاجازه خلصت بسرعه جداا ..
_ مكنتش قادر تمدها شهر كمان ..؟
_ مكنش ينفع خالص المستشفى والمرضى بتوعى ظبطت جدولى ولازم ارجع ..لكن هحاول انزل تاني ..!
_ اعتقد كده انت عملت كل اللى مخططله ..
_ اهم حاجه محصلتش  ..
_ ازاى يعنى شوفت اصحابك وقضيت الاجازه معاهم ومعايا محتاج ايه تانى ..؟
 مسك السلسله وباصصلها : محتاج اطمن عليها انها كويسه ..!
_ لسه الحلم بيتكرر ..
_ ايوه هو اللى قومنى من النوم ( بص للسلسه ) نبره صوتها  محسسانى بقلق عليها ,,بتنده عليا ومش شايفها زى بتستنجد بيا او هى فى مشكله او ازمه مش عارف ,,,
_ متقلقش ان شاء الله هى كويسه وكله هيكون تمام ..
_ يارب .. واضح ان السلسله هترجع معايا ..
_ دايما مش كل حاجه عاوزينها بتحصل كامله فى جزء بيكون ناقص ,, فبالتالى نبص ع الجزء المكتمل ونفرح به  وان شاء الله الجزء الناقص هيحصل اللى  يكمله  ,, عارف كلام مين دا ؟
 ابتسم "طارق": دكتور بيتكلم كتير ..
_ وقت ما نجحت فى الثانوية وكنت زعلانه وبعيط لان ماما كانت تعبانه وبتعمل عمليه صعبه  ومسافرين كلهم معاها  وانا لوحدي هنا  وقتها كلمتني وقولتلى ان بابا واصحابى وقرايبى وانت وعمو عثمان فرحانين بنجاحى  ايوه الفرحه ناقصه بوجود ماما لكن مش دايما كل حاجه عاوزينها بتحصل كامله فى جزء بيكون ناقص فبالتالى نبص ع الجزء المكتمل ونفرح به وان شاء الله الجزء الناقص هيحصل حاجه تكمله ,,,
 ابتسم "طارق": صح ,,,
_ فيعنى انت حصل اكتر مما كنت مخططله الاجازه دى فنقول الحمد الله يمكن فى مقابلتش "غدير" علشان تنزل اجازه تانى قريب وتشوفها ,,
 _ ايه جرعه التفائل الفظيعه دى .. انا كنت يأست خلاص كلامك يا "هدير"  طمنى ..
_ احم احم .. بنرد جزء من اللى بتعمله معايا يا دكتور ,,
_ بجد انا لو لفيت الدنيا مهلاقى زيك انا محظوظ انك فى حياتى ..
 ابتسمت " هدير": انا اللى محظوظه انك فى حياتى ..
_ وبجد شكرا يا "هدير" ع اليومين دول والخطفه والمفاجئة وتجميعه دى بجد مش هقدر انساهم
_ يبقى ترجع تانى ونتجمع تانى ..
_ ان شاء الله ,,ممكن اطلب منك طلب ؟
_ اتفضل ..؟
_ انا محتاج مساعدتك وانا مسافر ..؟
_ ازاى ..؟
_ هتكوني انا فى غيابي مع "ماجد" وياسر" و"منه" و"اميره" و"جهاد" وصبا" معاهم وتساعديهم وانا هكون متابع وااقرب اجازه هنزل ..
_ تمام اللى انت عاوزه اعتبره حصل ..
قاموا ورجعوا غرافهم ناموا ساعتين وكانوا الكل صحيوا نزلو قضوا اليوم مع بعض وتاني يوم الفجر اتحركو للقاهرة ..وهما فى طريق العوده دار حوار بين دكتور عزت ودكتور عثمان :
_ عثمان .. فاكر حاله البنت اللى حكتلك عنها ..؟
_ ايوه..
_ خدمه لصديقك تعملها زياره وتشوفها كانت بره مصر وحالتها صعبة الدكاتره احتارو معاها ومفيش علاج قادر ع علاجها .. ممكن تشوفها قبل ما تسافر وتكتب تشخيص بالحاله وعلاجها ايه وانا عندي دكاتره ممتازيين انت عارفهم ..
_ اكيد طبعا ...
_ هحدد ميعاد وتشوفها قبل ما تسافر ..
_ ان شاء الله
اتكلمت "هدير": مشكله الدكاتره ان فى كل مكان فى حالات بتحتاج مساعدتهم ..
ضحكك"طارق": انتى بتقولى فيها قبل ما نروح المطار فى لندن  بساعتين دكتور "عثمان" كان عنده استشاره مستعجله لمريض ,,,
_ علشان كده مستعجليين ع رجوعكم لندن يا دكتور " عثمان" ..؟!
_ "طارق" بالعافيه عرف يظبط جدوله وميقدرش يتاخر عن كده لكن وعد هنظبط شغلنا وهننزل مصر تانى .. خلاص بقي مش هنكرر البعد تاني ..
_ يارب تنفذوا وعدكم ..

 رجعوا القاهره وابتدا "طارق" يجهز لرجوع للندن وقبل رجوعهم بيوم اتصلت "منة" :
_ "طارق" ... انا زميلى اللى قولتلك عليه بعتلي عنوان فيلا "بسام" اخو"غدير"  فى الشيخ زايد  ,, دا اللى قدر يتوصله  ينفع ...؟!
_ طبعا ينفع ..ابعتهولى بالظبط ..
_ هقفل وابعتهولك ..
 قفلت وبعتت العنوان ,,, خرج وشاف والده الدكتور "عثمان" جاهز :
_ ع فين يا دكتور ؟
_  دكتور "عزت" مستنينى هنروح نشوف حاله بنت صديقه تيجى معانا ؟
_ انا رايح مشوار فى الشيخ زايد  ؟
_ ايه دا دا طريقنا .. تعالى معايا نشوف الحاله وبعدين روح مشوارك حتى هتوفر عليا وقت وكلام احكيلك عنها ..
ضحكك "طارق": تمام يلا واهو توصيله مجانيه ..
_ يلا بينا ..
 فى الطريق عثمان و عزت بيتكلموا و"طارق" ماسك السلسله وباصص لها وبيتمنى يقدر يطمن ع "غدير" اقصى حاجه بيتمناها  وكان ناوي انه لما يطمن ع اخبارها هيسيب السلسله فى الفيلا ,, وبص ع العنوان ,, وبعد مرور وقت  اقتربت السياره لفيلا ونزلوا وبص "طارق" ع المكان ودخلوا الفيلا ... وقابلتهم زوجه اخ المريضه :
_ اهلا يا دكتور "عزت"
_ ازيك يا " نادين " ..
_ الحمد الله اتفضلوا ..
دخلوا قاعدوا فى الصالون : ماما فى مشوار نص ساعه وهتكون هنا انت عارف لسه راجعين من السفر
_ اها ,, و"بسام" عامل ايه واخباره ؟
_ بخير ..فى الشركة وباعت لحضرتك السلام ..
_ الله يسلمه .. اعرفك بصديق طفولتى وعمرى دكتور "عثمان" وابنه الدكتور "طارق" والاتنين من اشطر الدكاتره النفسيين فى لندن ..
_ اهلا بكم .. تحبوا تشربوا ايه ؟
_ لا شكرا
_ لا مينفعش .. كل حاجه موجوده ..
_ ممكن قهوه ,,
_ ثوانى وهتكون هنا ...
 لاحظ "عثمان" سكوت "طارق" وملامحه متغيره : مالك يا "طارق" ..؟
_ مش عارف اول ما دخلت الفيلا حاسس بحاجه مش فاهمها ..
_ احنا لسه شوفنا حاجه ..اصبر لما نشوف الحاله ...
ضحكك"طارق": حاضر يا دكتور ..
اتكلم " عزت ": الحاله اللى هتشوفها دى ابتدت العلاج النفسى من 7 سنين بعد وفاه والدها بسنتين .. كانت مبتتكلمش فى حاله سكون ومفيش اى انفعالات بتحصل وكانت بتجرح نفسها كتير من غير ما تحس  اتحسنت واستقرت حالتها فترة لكن كانت بتدخل مستشفي لمده شهر او اتنين تتعالج وتخرج اتحسنت لفتره قصيرة وقرب موعد فرحها دخلت فى حاله من السكوت ومكنتش بتتعرف ع اللى حواليها ولا ع نفسها كتير بتقف قدام المرايا مستغربه نفسها ,, اخر مره وقعت منها كوبايه مايه ومشيت ع الازاز وهى فاقدة الاحساس بالالم فكتبلها الدكتور ادويه تدخلها فى حاله ثبات ونوم حمايه من تعرضها لل أذى  ومع الوقت  لاحظوا عدم استجابتها ل الادوية ودخلت فى حاله نوم دايم رافضه الاستيقاظ من سنه ونص.. اغلب الدكاتره اللى شافوها هنا وبره اجمعوا انها رافضه تصحي من غير معرفة السبب و مفيش اى استجابة رغم مؤشراتها الطبية كويسة  ,,, كانت بره فى مصحه للعلاج لكن مكنش فى نتيجة  ف انا طلبت من والدتها ترجع بيها مصر ودكتور "عثمان" موجود  يشوفها لانى واثق انه هيقدر ع الاقل يعرف مفتاح علاجها اللى دكاترة كتير مش عارفين  ,,
اتكلم "طارق": هى عمرها قد ايه ؟
_ ا 31 سنه ..
_ وفين ملف علاجها ..؟
 فى اوضتها ..
_ اتفضلوا القهوه ...
_ ممكن ندخل ل "غدير " يا "نادين" :
اتفاجئ "طارق" من الاسم وحس بقبضه فى صدره ووقف للحظات ونده عليه "عثمان": طارق .. تعالى
للحظه اتمنى انه يكون تشابه اسماء,, اتكلم مع "نادين": هى الفيلا دى رقمها كام ..
_ رقمها 133
مسك موبيله وبيبص ع الرساله اللى ارسلتها "منة"  شاف الرقم وهو بيحاول يجمع موبيله رن وكانت "منة":
_ منة ..
_ انت شوفتها يا "طارق" .. هى فعلا تعبانه زى ما عرفت  ..؟
بملامح مفاجئه :عرفتى ايه ؟
_ ان "غدير" تعبانه جدااا بقالها سنين واختفائها دا لانها كانت بتتعالج ..هى فعلا تعبانه ولا هى كويسة هو فى ايه يا "طارق"  ؟
_ اقفلى دلواقتى يا "منه" وهكلمك ..
  قفل الموبيل وهو بيحاول يستوعب اللى سمعه بص اتجاة الغرفة بخطوات تقيله دخل غرفه "غدير" وكان دكتور "عزت" كان بيراجع ع تقارير الطبية اليومية  ل "غدير" ودكتور "عثمان" بيقرا تقاريرالتشخيص  وبيبص عليها  ... وقف "طارق"" فى ذهول وبيقرب من "غدير" وهى نايمه ع السرير ومتعلق فى ايديها المحلول  وحواليها اجهزة  واثار جروح فى الايد التانية معلمه وبصوت ضعيف وتوتر  : غ غ دير ,, انتى غدير ,,
 لاحظه "عثمان" وقرب منه : مالك يا "طارق" انت كويس ....؟
 بصله "طارق" :  غدير.. يا بابا.. غدير ..
_ ايوه اسمها غدير و ..
سكت للحظات "عثمان" وبملامح مفاجئه : غدير ..هى دى صاحبه سلسله التوليب ..!

 يتبع ,,,

زهرة التوليب (9)

(9)

تاني يوم كان "ماجد" جاهز وكانت "اميره" صاحيه :
_ انت جهزت ..؟
_ ايوه يا دوب الحق هعدى ع "طارق" ونقابل "ياسر" و "منه" ع الطريق
_ انتم ليه مش مع بعض فى عربيه واحده الطريق طويل وفى ملل ..؟
_ يعنى "ياسر" بينتهز اى فرصه علشان يكون مع "منه" ع امل يعنى يلين دماغها ويفكهم من حكايه الصحاب اللى بيمثلوها دى ..
 بنص ابتسامه: الانسان دا غريب ..
" ياسر" بيموت نفسه ع "منة" بعد ما كانت معاه وخسرها بسبب اهماله وتجاهله ليها طول الوقت ..كانت بتتمني تقعد معاه ساعة بس دلواقتى بيتلكك ع اى لحظه يكون معاها ..
_ ماهو الانسان كده مبيحسش بالحاجه غير لما تتبخر ..!
_ وانت لسه محستش ولا  عاوزها تتبخر علشان تحس ووقتها مفيش حاجه ترجع ..؟
استغرب "ماجد"من كلام "اميره": ايه دا اللى تتبخر ؟
_ انا يا "ماجد...
 انت عايش حياتك طول وعرض وانا مرميه هنا ..مش شايفني ولا انا اصلا مش موجوده ..؟
_ يووووه ابتدينا ...
_ انت عارف سبب انى مرضتش اجي معاكم ليه وقولت ل "صبا" ان "يوسف" تعبان وعنده متابعه مع الدكتور ومقدرش اسيبه مع ماما ..علشان متوجعش لانى تعبت ..
_ ليه حد فيهم بيزعلك كلهم بيحبوكي ..كلهم مستحمليين دبشك حتى"صبا" ..
_ انا موجوعه منك انت ..انت اللى بتوجعني يا "ماجد" .. هروح معاك وفى نفس اللحظه مش هكون معاك  معاك .. تركيزك اصحابك واللى هيكونوا اصحابك هناك وانا لا مش موجوده ..
_ انتى اللى بتنكدى ع نفسك يا "اميره" ..انتى اللى بتقلبي وشك ولا حد ميت عندك .. وانا مبحبش كده ..
_ مسالتش ليه بكون كده .. "ياسر" برغم اللى عمله وندمه 3 سنين متمسك ب امل انه يرجع ل "منة" ولما بتكون موجوده مبيشوفش غيرها ..رغم انه مسموحله فى الوضع دا انه يشوف غيرها وغيرها لكن هو رفض ومتمسك بالامل حتى لو ضعيف .. جهاد جوزها مسافر لكن يوميا معاها ع الاسكيب وتليفونات بيحاول ميحسسهاش انها لوحدها علشان بيحبها .. انا بقى فين فى حياتك ؟! ام عيالك حتى دى مش مقدرها .. انا فين يا "ماجد" ؟!..انا اتجوزتك علشان بحبك واستحملت كل تصرفاتك الغلط وانت بتسوق فيها ولا بتفكر فى الانسانه اللى عايشه معاك ..
_ انتى جايه تعاتبينى دلواقتى يا "اميره" بعد 9 سنين جواز .. انتى مش غلطانه خالص انا اللى غلطان ووصلت علاقتنا للوضع دا صح ..؟! انا شيطان وانتى ملاك .. انتي  مقصرتيش ولا بعدتي وكل ما احتاجك حتى نتكلم تقوليلى تعبانه,, قرارات اللى المفروض اشارك فيها بتقرريها لوحدك  ,, اقولك نخرج تقوليلى مبحبش الزحمه ولو خرجتي بتقلبي وشك .. العيال بتكسري كلامي قدامهم خوف منك لغتيني من الاخر ..انا لسه الغلطان ..
_ انت لو اهتميت وسألت كنت عرفت ليه بكون تعبانه علشان طول اليوم مع ولادك طلبات والبيت وطلباتك علشان ترجع البيت تلاقي البيت نضيف وهدومك نضيفه وولادك نضاف و ..
_ يا سلام ... لو ع النضافه الشغالات كتيره و"ايفون" بتعملى بالظبط اللى بتعمليه واكتر ..
_ سالت نفسك ليه مبحبش الزحمه ..مفكرتش ليه انه عاوزه اقعد معاك لوحدنا وانت مصمم ع الخروج علشان تبص ع دى ودى براحتك وانا زى الفازه جنبك ع الكرسي صح ..
_"اميره" انت عاوزه تطلعيني انا الغلطان  وانتى الملاك .. وانا صاحي ومزاجي رايق ومش عاوز اى حاجه تعكره واقولك حاجه,, احسن حاجه حصلت فى السفر دا انك مش موجوده .. اقعدى فى البيت بقى نضفيه واهتمي بالعيال واندبي حظك انك يا ملاك يالى لا بتقصرى ولا بتغلطي اتجوزتي شيطان اللى هو انا ...
 خرج "ماجد" بعصبيه قفل الباب و"اميره" دموع نزلت من عينيها موجوعه من "ماجد" ... وصل "ماجد" ل "طارق" وركبوا العربيه واتحركو ولاحظ تغيير فى "ماجد" سكوته الغير معتتاد :
_ ايه دا انت مفطرتش ولا ايه ؟
_ لا فطرت .."حزينة " قامت بالواجب بصراحه اداتني وجبه تكفيني اليومين اللى هغيب عنها فيهم تعويض يعني ...
ضحكك"طارق": هو انتم اتخانقتوا ولا ايه ؟
_ السؤال غلط .. انت تستغرب لو متخانقناش ..تستغرب لو كنت مبسوط وهى تسيبني من غير ما تكدرني .. بلاش كلام عنها لان سيرتها بتعصبني .."ياسر اهو "
وصلوا ونزلوا من العربيه وسلموا ع بعض واتحركو ..وفى عربيه "ياسر" :
_ ياسر ..؟
_ ايون ..!
_ عربيه "ماجد" فاضيه يعنى مفيش حد معاه غير |طارق" ..؟
_ اه ماانا شوفتها زيك ..
_ طيب ايه حكايه ان "اميره" جايه ومتبقاش لوحدك فى الطريق و ..
_ ماهو ..ماهو.. فعلا كانت جايه ورجعت فى كلامها اكيد ..وبعدين هيفرق معاكي ايه جت او مجتش ما انتي كده كده كنتي هتكوني معايا ..
_ لا كنا هنركب عربيه واحده بدل اتنين ..!
_ وليه نزنقها ع نفسنا وربنا موسعها علينا ...
 لاحظت ابتسامه"ياسر": دا تخطيطك صح ..؟
_ ركزى فى الطريق معايا لو عاوزانا نوصل ...
_ ماشى يا "ياسر "لما نوصل ..
_  كنت عاوزك معايا يا "منه" ومش عاوز حد تاني يشغلني عنك طول الطريق ..
_ ياسر ..
_ بصى للطريق خلينا نوصل ..
_ لما نوصل ..
_ ان شاء الله ,,,

  وصلو شرم الشيخ ودخلو القرية وكانت "صبا" فى انتظارهم :
_ يا ويلكم يا ويلكم بالبيبول الحلوه ..
 ضحكك "ماجد": "صبا" تعليم حديث مشغلنها هنا علشان تطفش السياح
_ اللى بيضايقوني بس وواضح ان فى واحد منهم مش هيلحق يحط رجله جوه وهلغي حجزه وارجعه زاحف بالشبشب ...
_ انا اسف يا بيه ..انا غلطان يا بيه .. القريه نفسها متشتغلش من غيرك انا عارف ...
_ ايوه كده اتعدل ..
ضحكوا واتكلم "ياسر": عارف يا "طارق" "صبا" مجنونه وتعملها والله ..
_ اهلا يا "طارق" نورت شرم الشيخ حيث البحر والسما والهدوء (شاورت ع وجهها ) والوجهه الحسن "صبا" ..
ضحكوا :  دا نورك يا "صبا" ..
_ تعالو معايا اوريكم الغرف ..
 اتحركو ودخلو غرفهم وكانت "منه" فى غرفه و "طارق" و "ماجد" و"ياسر" مع بعض ..
_ معلش يا جماعه كنت عاوزه لكل واحد غرفته الخاصه علشان يصيع براحته وفى المداري من غير ما يتقفش  بس حصل لغبطه فى الحجوزات وانا حجزت الجناح دا ليكم اهو بقى صيعوا ودارو ع بعض انتم حريين ربنا شاهد ع افعالكم كفاية ذنب انى جبتكم هنا  ..
 ضحكوا كلهم  وغمزلها "ماجد": لغبطه حجوزات ولا دا تأمين علشان تعرفي ايه اللى بيحصل مننا ..
 بملامح براءه: انا .. انا .. وبعدين ايه عرفك ان انتم هتقولولى بتعملو ايه ؟
 شاور "ماجد" و"ياسر" ع "طارق" :
_ نشلتي على الشخص اللى استحاله يكدب ..
ضحكت "صبا": المهم غيرو هدومكم ويلا نتغدى وانجوى بقى  وكده اخلص شغلي وهتلاقوني نطالكم اشطاااه
_ اشطاااه ..
 مشيت "صبا" لما موابيلها رن ورمى "ماجد" جسمه ع السرير :
_ ياااااه 4 ايام ننام ع المناظر الطبيعيه والوجوده الحسنه ونصحي عليهم احنا جينا الجنه ..
_ ايوه معاك حق
 خبط "ياسر": اه ما انت جبت جنتك معاك ..
 _ جنه ايه ؟
 _ جنه سمنه بطعم  الزبده فلاحي طبيعيه 100 %
 ضحكك"ياسر" و"طارق" ع الش "ماجد" وخبطوه بالمخدات ...!

 نزلوا ع المطعم وكانت "صبا" واقفه مع طقم المطعم بتتكلم معاهم ولاحظها "طارق" بملامحها الجاده :
_ اللى يشوف "صبا" من بعيد ميشوفهاش من قريب ..
اتكلم "ماجد" : ليدر كده وشخصيه قويه لكن كلها حنيه
ضحكوا واتكلم "ياسر " : هى "صبا"  كده فى الشغل شغل .. وفى الهلس مفيش اهلس منها
قربت منهم وهما بياكلو :
_ محتاجين اى حاجه ..؟
_ لا شكرا يا معلم ..هتخلصي امتي ؟
_ ساعه كده هسلم مكاني وهبقي فضيالكم ...
لاحظ "ماجد" وجود "حمزه": ايه داااا ؟
بص "ياسر": حمزه ...
 بملامح طبيعيه : انتوا متفاجئين ليه كده ؟
_ مقولتيش انه هيكون موجود يعني ..
_ واقول ليه ..هو نزيل زى اى نزيل هنا حر يعني  هو انا بقولكم تقارير النزلاء ..
لاحظ "ماجد" نبره حده "صبا": اهااا .. طيب انا نسيت السلطه هجيب سلطه عاوزين سلطه هجبلكم سلطه
 ولاحظ "طارق"و" ياسر" و"منه" قفلوا الكلام وابتدوا ياكلو ...
  قرب منهم "حمزه" وسلم عليهم واتجهه لترابيزه تانيه مع اصدقائه ..  مرت ساعه وخلصت "صبا" الشفت واجتمعت مع اصحابها ع مطعم ع البحر :
_ ايه رايكم المطعم  دا لسه متجدد بس تحفه فى الليل ..؟!
_ جداا جميل ..
_ بجد مبسوطه يا "طارق" انك موجود اها مش كلنا بس تتعوض
_ اكيد .. وفعلا المكان جميل جدااا ..
لفت انتباه "ماجد" بنت اجنبيه وغمزلها ابتسامتله : العب .. احب الشغل السريع دا ..!
 خبطته "صبا " فى رجله: يخرب عقلك لحقت اتلم بقى
_ المصري معروف بجاذبيتة التي لا تقاوم
_ يا سلام ..
_ بقولك ايه فكك ..انا مبجبرش حد ع حاجه .. انا عينى طرفت وهى غمزت يعنى قلبها مال ..!
 _صبا" : ايه يا هضبه ...
_ ثواني وراجعلكم ..
قام "ماجد" واتجه للبنت وقعد يتكلم معاها واتجه معاها للبار فشاورت "صبا" للبار مان وهو بيقدم مشروب ل "ماجد" يحط فيه خروع وفعلا اول ما داقه راح رجعه ع البنت وبهدل هدومها هزائته  ومشيت ,,, انهارت "صبا" من الضحك "وياسر ومنه وطارق" وقرب منهم"ماجد"  وقامت تجري"صبا"  وجري وراها "ماجد" عاوز يدلق عليها العصير ...

 مر وقت وهما قاعدين لاحظ "طارق" كل واحد فيهم ماسك موبيله ب اهتمام :
_ ايه .. مش اتفقنا مفيش موابيلات غير المكالمات المهمه بس ...
_ ثواني بس اشوف اخر بوست كام بنت عملت لايكس
اتكلمت "صبا" تلاقيه عامل لنفسه ايميلات ب اسم بنات وبيعمل لنفسه ..اصله كان نفسه يكون بنوته ومقدرش يا عيني يغير مصيره البائس  ..
_ هاهاهاها ...
اتكلم "ياسر": شوفت البوست بتاع الحادثه معموله شير فى كذا بيدج والناس مضايقه ..
_ "منة" انتي بتعملي ايه ..؟
_ برفع صوره ع الانستجرام للبحر علشان اصحابي يشوفوها ...
_ اممممم  ..ممكن اسالكم سؤال يا شباب ؟
_ اتفضل يا دكتره ...
_لما بتمسكو الموبيل وتدخلو ع السوشيال ميديا بيكون ايه هدفكم ؟ بتتواصلوا مع المتابعيين اللى عندكم ازاى بتقدمولهم ايه فى منشوراتكم ؟
اتكلم "ماجد" : بقدملههم positive energy مليش فى البؤس انا
رد "ياسر: زى ماقال "ماجد" شويا بوستف انيرجي لكن انا بيشدنى الاحداث ونتناقش فيها ونسمع اراء ووجهات نظر بعض ..
ردت "منه": امممم بوستس تشمل توعيه دينيه ودنويه يعنى مع مناظر طبيعيه
بص ل "صبا" : وانتى يا "صبا" ..
_ لا انا اعمق من كل دول ..
_ ازاى ..؟
_ انا بنشر تفاهه انيرجي اخدنا ايه من الجاد غير المرض والهم وسندوتشاته مش حلوه الشبراوي احلى
 وسط كلامهم الجد فصلوا ضحكك من كلامها :
_ انتى فقر ..
_بس كويس تعاملكم مع السوشيال ميديا
غمزله "ماجد": متنساش انه كتير بيكون للمراقبه شخص ما .. نزل بوست ايه .. اعجب بصوره فين .. قال رايه فى ايه ..وهكذا ..
_ حدفه "ياسر" بمنديل هو و "منه": ايه ..دا بيحصل ع فكرة ..
اتكلمت "صبا":الراجل مكدبش عارف الاتنين دول(شاورت ع "ياسر" و"منه" ) بيراقبوا بعض فى صمت بس للحق مراقبه "ياسر" تكسب ..دا مره غلط وهو بيلف ع البوستس عمل لاف وكانو بعد انفصالهم وكانوا اتفقوا انهم ميعرفوش بعض
ضحكك "ماجد" و"طارق" ومنه و"ياسر اتحرج ..
_ غير مقصود ..
_ ماهو دايم الغير مقصود بيكون مقصود لكن احنا مش حاسين ..
_ عارفين ان السوشيال ميديا دا اكبر عدو لينا لو مستخدمناش صح  ..ممكن نبني اعداء واصدقاء من خلاله ..
_ اها ..كتير ..
_  فى نوعية من البشر بيدخلو ينشرو اكاذيب واخبار مغلوطة وبيغلطوا فى ناس تانية بالالفاظ وصور مش ظريفه وفى بيدخلوا ينشرو طاقه سلبية علشان هما حاسين بكده ..علشان كده سالتكم ع نوع منشوراتكم وبصراحه اكتر حد عجبني هى "صبا" .. انسانه داخله قاصده ترسم ابتسامه ع وجوه ناس متعرفهاش ..لان فى  ناس كتير  داخله تهرب من هموم ومشاكل واشخاص مكرهينهم فى حياتهم .. هربانين من نصايح ومن احداث واخبار مبتخلصش ... عاوزين حاجه تتضحكهم تخرجهم بره المود كده يعنى ..
_ انت عارف يا "طارق" انا باخد تريقه انى تافهه بطريقه لدرجه فكره اروح اكتبلهم فى البطاقه اللقب علشان اثبتلهم ان انا عاجبني تفاهتي
_ضحكوا ع كلامها  واتكلم "طارق" : ماهو الحياه مش كلها جد ولا كلها تفاهه ,,لكن الاتنين مع بعض مينفعش فى موضوع جد نقلل منه ولا موضوع تافهه نكبره ونعمل مشكله ,, ندى كل موضوع حقه وحجمه ,,لكن المطلوب  ننشر ايجابيات لان هموم الحياة بتكتر مع الايام واحنا بشر وعندنا طاقه حمولة وعلشان لما تقابلنا حاجه سلبية نقدر نتقبلها ونتعامل ,, والاغلب نحارب الجد بالضحكه وابتسامه .. عارفين لما تحطو بوست مبهج فيه طاقه ايجابيه اللى بيشوفه بتشحنه بطريقه غير مقصوده وبيكمل يومه مبسوط  .. علشان كده الضحك والمنشورات الخفيفه بتكون من افضل المنشورات غالبا الوحيده اللى مفيهاش لا خناق ولا شتيمه ولا اى حوارات ممكن تحصل ..
رد "ياسر" : انشر طاقه ايجابية هتاخد ثواب لكن هتنشر طاقة سلبية هتاخد ع قفاك
ضحكوا ع كلام "ياسر ":
ردت "صبا":  اه والله .. الناس التافهه دى عالم رايقه كده برنساويه فى دمهم
رد "ماجد" : اشجيني يا برنس البرانيس ...
  ردت "صبا": لكن ان جينا للحق يا جماعه
_ ها ..؟
_ انا عمري ماشفت اتفه من ميجو ...؟!
كان "ماجد" بيشرب" ودلق المايه وبص ل صبا :
_انا يا اتفه خلق الله ...
_مالك يا "ميجو" انا بمدحك يا بيبي
فى الوقت دا قرب منهم اصحاب "صبا" :
_ احنا قولنا اختفيتي كده يبقي اكيد مع اصحابك ..
ابتسمت :صبا: يا ولاد الايه تعالو اقعدو معانا
قعدوا :طبعا انتم عارفين الموجودين فهعرفكم ع "طارق" ,, دكتور "طارق" اللى ياما زهقتكم ب سيرته
_ ايوه الوحيد اللى فيكم كان بيذاكر ..!
ضحكوا : ايوه .. اعرفك يا "طارق" دول اصدقا السوء اللى بيبوظولي الدايت
ضحكوا : احنا برده ولا انتي ,, متصدقهاش يا دكتور ,,دى في  وقت الراحة بنجبها من المطعم ولو حد فينا عاوز يتكلم معاها تسأل الاول هتأكلوني ايه ,,دى بتبتزنا بالاكل ...!
_انت تصدق الكلام دا يا "طارق" ..؟
 تدخل "ماجد": هيصدق ..هيصدق ونص  دا اول مره يشوفك جابك من بوفيه عيد ميلاد بنتي ..
 ضحكوا كلهم وقعدوا يتكلموا ويضحكوا قرب منهم "حمزه " شافته واحده من اصحاب "صبا"
_ "حمزه" احنا هنا تعالي ..
كلا من "ياسر" و"ماجد" و"منه" بصو ل "صبا" ولاحظوا انها مشغولة بالكلام وبتضحك  وتجاهلت وجود "حمزه" ولاحظ "طارق" تصرفاتهم ورد فعلهم ,, قعد "حمزه " وعرفوه ع "طارق" .. ابتسم "حمزه" ووجه كلام"طارق":
_ اعرفك من زمان "صبا" مكنتش بتبطل كلام عنكم كلكم وكانت بتتمني تتجمعوا تاني زى الاول  وواضح امنيتها اتحققت بعد 17 سنه..ومبسوط انى قابلتك ..
_ واضح انك صديق "صبا" من زمان ع كده ..؟(
_ ممكن تقول اول شخص "صبا" عرفته هنا كان انا ....
_ اهاا ...
 نظر "طارق" ل "صبا" وكانت متجاهله وجود "حمزه" وبتهزر مع "ماجد وياسر" و"منه" وباقى اصدقائهم ... اتكلموا كتير ومنهم صديقه "صبا" وجهت كلام ل "طارق " :
_ دكتور ممكن أسألك سؤال اعتقد حضرتك الوحيد فى القاعده دى هترد رد منطقي ..؟
_ اتفضلي ..!
_ الحب بيقوي ولا بيضعف  ؟
ابتسم "طارق": اممم .. طيب انتم ايه رأيكم ..؟
_ يا دكتور احنا عاوزين رأى حيادي لان نصنا بيقول بيقوي ونص بيقول بيضعف ,, العلم بقي شايف ايه ؟
ضحك "طارق": مفيش فى المشاعر حاجه اسمها علم ,,لان الحب عباره عن مجموعه مشاعر موجوده فى الاوعي مع الوقت بيحصل ليها استفزاز بيخرجها للعلن زى الكره والحقد والغيرة ..
_ طيب قولنا رأيك انت مع انه بيضعف ولا بيقوي ..؟
_فعلا الحب بيقوى لكن بيضعف ف نفس الوقت ..
السؤال هنا بيقوى مين ؟! وبيضعف مين ؟!
ردت "منه":ممكن ارد انا ..؟
_ اتفضلي ..!
_ الحب بيقوى اللى احنا بنحبهم وبنسلملهم قلبنا ومشاعرنا وايامنا الجايه وبنقدملهم كل حاجة لمجرد بس اننا نرضيهم ويفضلوا معانا ميسبناش وهما يا اما يقدروا دا ويحافظوا علينا ويقوونا معاهم يااما يضمنوا وجودنا ويركنونا ويستكبروا الكلمه الطيبه لينا ,,يهملو اللى بيحبوهم بجد وبيعيشوهم فى الالم ووجع الوحدة رغم وجودهم ,, الحب بيضعف الطرف الل بيحب بجد .. بيضعفنا احنا .. احنا اللى بنيجى على نفسنا علشان اللى بنحبهم رغم قساوتهم بنقاوح ونتوهم انهم بيحبونا بجد ونقدملهم اعذار من نفسنا ونستحمل من غير اعتراض ع أمل انهم يقدرونا وميحسسناش أننا ضعاف اوى كده ,,كدبه بنعيشها ونتمني كل لحظه تتحول لحقيقه لكن لا حياه لمن تنادى ...
الكلام أثر فى "ياسر" شعر بوجع "منه" وهى بتتكلم وعن احساسها اللى عاشته ..
_ اللى معترض ع كلام "منه" يتفضل ..؟
سكتوا كلهم وكمل "طارق" كلامه :
_يبقي متفقين مع "منه" ..العلاقه الصح الاتنين بيقو بعض بوجودهم مع بعض ب أحساسهم وتفاهمهم واحتوائهم لبعض ,,لكن العلاقه اللى فيها طرف ضعيف وطرف قوى العلاقه كده محكوم عليها بالفشل والمعاناه والعذاب ال ملوش آخر اللى غالبا بينتهي بندم وكره للحب نفسه المتمثل فى الشخص اللى مقدرش الحب دا وكان سبب الوجع والالم اللى عشنا فيه وسابنا عايشينه .. لما هتكونو فى علاقه وقتها هتحسو بالقوه او الضعف ...فالصح نختار اللى نقوي معاه مش اللى يستغلنا ويقوي علينا ويضعفنا وخطواتنا تكون متساوية بعيد عن كلام الحب والرومانسيه لان الواقع مختلف ودايما بنتفاجئ فى العلاقات لما بتتعمق بالحقائق والكدبه مبتستمرش وبتبان وبتوجع صاحبها مش اللى كانت علشانه.. عارفين يعني ايه شخص اختارك تكون من أولوياته ,,اختارك يكمل عمره اللى جي بكل لحظاته وايامه وسنينه معاك انت بس بالرغم ان فى غيرك افضل منك لكن شايفك انت بس ,,قرار مش سهل علشان كده الاستعجال وسيطرة المشاعر كتير بتأذينا والتأني بيكون أفضل لانه قرار مصيري بينقلك من مرحلة لمرحلة تانية يا تكون قوي سليم مستقر عارف انت عاوز ايه يا تكون بواقي انسان ضعيف تايه ,, تايه عن نفسك ,,فـ اختيارك اللى هيحدد مشاعرك هتوجهها فين ولمين ..!
... ! اتكلمت "صبا": ببساطه كده ..قلبك دا امانه مش سهل تفرط فيه  ال محظوظ الل ب يلاقى الل بيقدرو ويحافظ عليه والتعيس الل بيفرط فيه.. حياتك امانه واتخلقت علشان تعيشها صح فـ اختار اللى يمسك أيدك وميسبهاش ,,الل فى لحظه ضعفك يكون هو مصدر قوتك ,,الل تحتاجه تلاقيه ويواجهه بيك ومعاك وجنبك الأيام,, اللى يصبر الى مالانهايه من زهق ولا ملل  .. الل يكون سندك وحمايتك... اللى يحس بك من غير كلام ,, اختار صح... اختار حياه تعيشها مع شخص الصح..!
 رغم عدم توجه كلام "صبا" ل "حمزه " لكن الكلام وجع "حمزه" وأستأذن وقام ولاحظوا اللى موجودين و"طارق":
_ ها عرفتوا  كده الحب بيقوي ولا بيضعف ..؟
_ وصل وشكرا يا دكتور ...

موبيل "صبا" رن وقامت ترد وهى واقفه بتتكلم فى الموبيل وخلصت المكالمه قرب منها "حمزه":
_ صبا ..!
التفتت بملامح جد : ايوه ..
_ ممكن 10 دقائق ..
قاطعته: ليه ؟! .. فى مشكلة فى حجزك ولا عاوز تغيير غرفتك ,,ممكن تتوجه ل اللريسبشن وهيساعدوك انا حاليا وقت راحتي يعني مليش اى علاقة بالشغل ..الوقت دا ملكي ومبحبش ازعاج فيه .. عن أذنك ..!
مشيت "صبا" خطوتين وحاول يمسك "حمزه" ايديها ونفرته وبنبرة حده :
_ ايه اللى بتعمله دا ..؟!
_ بقولك 10 دقائق مش اكتر يا "صبا" ..
_ ولا دقيقتين ..و ياريت متتعداش حدودك تاني ولو حصلت هطلب الامن ...
مشيت "صبا" ووقف "حمزه" مكانه وكان مراقبهم "طارق".. كان "ماجد" و"منه" مشغوليين بالكلام مع اصحاب "صبا" قرب من "ياسر"  :
_ ياسر .. !
_ ها ..
_هى "صبا" و"حمزه" فى بينهم حاجه ؟
_ يااااه الموضوع كبير جدااااا ...
_ ازاى..؟
_ احكيلك انا .. الظروف اللى مرت بيها "صبا" غيرت فيها حاجات كتير وبصراحه اللي شافته وعاشته مكنش سهل ,, لما اشتغلت هنا كان هدفها شغل وحياه جديده تلاقي نفسها فيها  وبس واحنا اللى كنا فى حياتها ,,مع الوقت اتعرفت ع "حمزه" ماهو كان شغال هنا معاها  مر وقت وبقوا اصحاب جداا .. عرض "حمزه" عليها الارتباط  رفضت ,, راح عرض  الجواز رفضت بمعني قالت انها مش عاوزه تدخل فى علاقه زواج فى الوقت الحالى .. مر مده وبعدها عرفت ان "حمزه" ارتبط ببنت نزيله تركيه عايشه فى المانيا واتجوزها وسافر وبعد سنه رجع وحاول يتكلم مع "صبا" لكن هى قفلت الكلام معاه وبتعامله زى ماانت شايف ..
_ يعنى هو متجوز دلواقتي ؟(
_ ايوه ..
_ وعاوز منها ايه ؟(
_ قالنا عاوز يوضحلها سوءالفهم .. كلمنا  نكلمها لكن "صبا" زى ما "ماجد" بيقول "صبار" اشهرت عن شوكها  مفيش فايدة وطلبت مننا منتكلمش ولا نفتح الموضوع  واحنا احترمنا رغبتها .
_  مرت فتره قد ايه ؟(
_  5 سنين .. وفي  ال 5 سنين بينزل اجازه فترة يقعد يحاول مع "صبا"  يتكبس ويرجع وهكذا زى ماانت شايف قدامك  لا هو بيزهق ولا هي بترجع فى كلامها ...
_ بس باين انه فى مشاعر اتجاهها و ..
_ هو اللى مقدرش يفهم "صبا "صح .. هي غير اغلب البنات الجواز دا اخر حاجه تفكر فيه ولان الفكره مش في دماغها ..محتاجه تقتنع بيها علشان تفكر وهو بتسرعه خسرها  حتي صداقه رافضه ..
رجعت "صبا" وقعدت همس "ياسر" : اقفل بقي بدل ما تقفلها علينا ,,وانت ولا اكنك عرفت حاجه ..
رجعوا اتكلموا كلهم وبعد العشا اتحركوا كل واحد لغرفته يرتاحوا ...!

رجعت "صبا" غرفتها وكان فى بوكيه ورد وظرف موجودين من غير ما تقرب منهم رددت : "حمزة" .."حمزة" .."حمزة" ..
كانت "منة" شاحن موبيلها مش لاقياه ف اتجهت لغرفة "صبا" تاخد الشاحن منها ..كان الباب مفتوح دخلت :
_ "صبا" الشحن بليز لان الشاحن بتاعي مش لاقياه ..
كانت "صبا" قاعده وبتبص ع بوكيه الورد ..
_ ايه دا .. بيجلنا ورد وحركات ,, بس دا عبيط ولا ايه كان بعتلك وجبه كومبو ولا تورته ايس كريم احسن علشان يعمل مفعول ..  لكن مش بعيد تاكلي الورد ..
 لاحظت "منة" سكوت "صبا" :
_ مالك يا "صبا" .. فى ايه ؟
 قربت "منة" من بوكيه الورد ولسه هتمسك الظرف :
_ سبيه يا "منة" مكانة ..
_ فى ايه .. اعرفي من مين الاول ..
_ دا "حمزة" .. "حمزة" اللى بعته ..
_ طيب شوفي مكتوب فى الظرف ايه ..؟
_ لا مش عاوزة ..
_ طيب متضايقيش نفسك كده تحبي اخدة واروح ارجعهوله واديله كلمتين ..
_ لا ... قوليلي كنتي عاوزة ايه ..؟
_ الشاحن ..
_ هناك اهو لكن متناميش عليه الصبح اخده منك ..
_ يا ساتر ..ناقص تمضيني ع وصل ..
_ لو ينفع اخد رهن كنت هاخد دا انتي مدمره الشواحن ..
ضحكت "منة" ماشى يا مدمرة المطابخ ..
خرجت "منة" ومسكت "صبا" الظرف وحطته فى الدرج  ودخلت تاخد شاور ..!

 قرب الشروق نزل "طارق" ع البحر يتمشي وهو بيتمشي ع الشاطي لاحظ "صبا" واقفة ع الشاطئ ورجلها في المايه قرب منها :
_مش خايفة من جنيه البحر لتشدك ...
التفت "صبا" لمصدر الصوت  وابتسمت:
_ طارق..ايه اللى مصحيك دلواقتي انا قولت دخلت في  غيبوبة مع الاموات "ماجد" و"ياسر"
نظر اتجاه البحر : واسيب المنظر دا لمين ؟؟؟
أبتسمت "صبا": لا ولما تقرب وتقف هنا معايا الاحساس مختلف..تعالي وقرب وحط رجلك فى المايه وأستمتع بلحظة و احساس مش هيتكررو .. وأرمي اى حاجة تضايقك فى البحر يشده الموج بعيد عنك ..
ابتسم "طارق" وقرب منها حافي ووقف بجانبها :
_انتي بقي ايه حصل وضايقك ومنمتيش غيرلما ترميه فى البحر
ابتسمت "صبا" : محدش يقدر انا "صبار " انت نسيت...
_  صبار ايه أنتي قلبك قلب خصايه ..
 ضحكت "صبا": انت بتعاكسني فى مثل هذا التوقيت  الرومانتيك هصدق وهقول بتتمحرش بيا ..
محاولة من "طارق" ل "صبا" تتكلم ":
_ بجد قوليلي بصراحة رميتي ايه فى البحر الموج ياخده بعيد  ..؟
_ رميت كل حاجة,, رميت اليوم اللى عدي بكل مافية واحتفظت بكل لحظة حلوة فيه .. انا من وقت ما جيت هنا  اتعودت كل يوم وقت الشروق اكون ع البحر ارمي اليوم اللى فات واجهز لليوم الجديد وهكذا ..
_ انتي مبسوطة هنا يا "صبا" شغل وانك بعيدة  ..
_ كان احسن حل فى الوقت اللى قررت فيه ومع الوقت حسيت انه  فعلا كده ..
_ انا سمعت من "ياسر" و"ماجد" بالظروف اللى مريتي بيها فقدانك ل والدك ووالدتك واخوكي ,,
كملت "صبا" ب ابتسامة : ومعاملة عمي وتخلى قرايبي عني ومحاولتي لانتحار بسبب غصب عمي عليا الزواج من ابنه .. بؤس حكايتي بؤس نكدو عليك انا عارفة ..!
اتفاجئ"طارق": انتحار .. انتي ..؟
_ اوووبس يبقي محكوش .. متتخضش كدة هى لحظة ضعف  كنت معتقدة انها حل لكل مشاكلي وظروفي وقتها ,,
_ ايه الدافع اللى وصلك لقرار دا ..؟
_ مش متخيل أنت تعيش مع ام منهاره نفسيا بعد فقدانها الزوج  وبعده ب 3 سنين تفقد الابن اللى شايفاه سند لينا وفجاءه بقينا لوحدنا ,, وبدل ما تقويني بقيت انا بحاول اقويها تكمل وهى مستسلمة .. 3 سنين عايشة مع ام مريضة رافضه الحياة وانا بقويها تتمسك بالحياة علشاني ,,عشنا لوحدنا  ومفيش حد قرب مننا ودا لان عمي لما رفضت اتجوز ابنه قاطعنا وخالي علشان مصالحه مع عمي قاطعنا وبقينا فى الخلا.. لولا محاولاتي للشغل ومساعدات ناس لينا اللى اولهم "فونا" و اهل "منه" مكنتش عارفة كنت هعمل ايه وقتها ..
_ معقولة مكنش فى حد خالص كلهم اتخلو عنك ..؟
_ كان قدامي يا اقبل الجوازه وعمي وخالي يتكفلو بمصاريف علاج ماما يا ارفض واتحمل مسؤؤليه قراري ويقاطعونا ماديا ومعنويا  ...
_ هو انتي كنتي عايشه معاهم ولا فى القاهره ..؟؟ ؟
_ بعد وفاه بابا ,,عمي بعتلنا نروح نعيش جنبه فى البحيرة  يعني منبقاش لوحدنا  كنت اخدت معهد سنتين وجبت تقدير هدخل 3  الظروف الل حصل منعتني .. ولان بابا كان شغله خاص متأمنش عليه واخدنا فلوس قليله جداا بمصاريف القاهره مكنتش هتكفي وخلصت فعلا  فسافرت انا وماما واخويا .. بعد سنه من سافرنا الصعيد اخويا اتعرض لحادثه وهو راجع من الشغل ومات ,,ماما انهارت وبعد وفاته بسنه عرفنا مرضها وتكاليف علاجه ,, ويا اتجوز يا اتحمل مسؤؤلية مرض ماما  لو حصلها حاجه ..
_ وابن عمك  رفضتيه ليه ؟
_ ابن عمي انا معرفوش اصلا غير اسم لكن كنت بروح لمرات عمي اديها حقنه ولما شافني  عجبته وطلبني .. رفضت لان ابن عمي متجوز 2  وابوه بيصرف عليه وحياته كلها سهر ومخدرات ,, انت عارف سهل اوى كنت اخد منه فلوس لما عرضها عليا وناسي ان انا بنت عمه وعاملني زى اى بنت جايه من الشارع  لو كنت طاوعته كنت اخدت فلوس كتير  لكن لما شافني بصده طلب من ابوه يتجوزني يعنى ياخد اللى هو عاوزه بالحلال  واعيش بلقمتي ويتكفلو بعلاج ماما .. وابوه طبعا طلبات ابنه اوامر ..مش قادرة اوصفلك حياتي وانا بشتغل فى البيوت علشان اجمع ثمن علاج ولما عمي ضغط ع امي وهى طلبت مني اتجوز انا رفضت اكتر وصممت  وكان ضغطهم اكتر وكذا بيت رفض يدخلني يا انا سرقت يا تحرش يا الحاجات اللى بتحصل ,, وعمي وخالي وقرايبي ولا يعرفوني لاني بنت "مسعود" القاهرويه اللى متربتش اللى مبتسمعش كلام الكبار ,,,
_ مرجعتيش ليه بيها ع القاهره ..
 ضحكت "صبا": ارجع ازاى ومين كان هيوافق لا عمي ولا خالي وماما نفسها مكنتش موافقة ومكنتش اقدر اسيبها لوحدها وامشي ..
_ وبعدين ..؟
_ اممم .. ماما اتوفت وبعد ما ادفنت بساعتين عمي قرب مني وقالي .. "صبا" من انهارده هتكوني فى البيت عندنا .. مكنتش حاسة بنفسي كنت هناك وابتدت مضايقات ابن عمي لغايه ما قدرتش وصرخت وقال انا اللى كنت بتحرش به تصدق ... وطبعا هو صح وانا غلط فعمي حكم عليا نكتب الكتاب فى اليوم دا ودا كان ايه بعد علقة محترمة من اللى قلبك تحبها تقولش قفشوا حرامي (ضحكت) اعترضت ورفضت وانضربت,, عارف انت احساس انك عاجز متعرفش تروح فين ولا لمين انت لوحدك فعليا,,انا  معترضتش ع اللى بيحصل ومتقبله قدري لكن لحظتها كنت بتمني لو فى طريق واضح امشي فيه ولا شخص واحد  اروحله ينقذني   حالة من العجز متتحكيش ,, كان مفيش قدامي غير ان الموت راحة  ما هما سبقوني اللى كنت بحس بالراحه فى وجودهم  وأختفت كل الطرق معاهم .. شوفت  ازازه كانت مكسورة مسكتها وقطعت شرايين ايدي وللاسف لحقوني وسمعت ابن عمي  بيوشوشني وبيقولي "لو حتي جثه هتجوزك يابنت عمي"  تقولش كان ولهان بيا وبينا غراميات ولا قيس وليلى (ضحكت) ,,عرفت ان كتب الكتاب هيكون تاني يوم ,, فى الفجر محستش بنفسي غير وانا بهرب من البيت رغم تعبي وساعدتني مرات ابن عمي الاولي  الله يباركلها  خرجت ورحت اتجاه محطه القطر  واول ما وصلت محطه مصر  فى القاهره وقعت من طولي مفقتش غير فى المستشفي و "فونا" و"ماجد" و"منه" ومامتها وباباها و "ياسر" حواليا ,,عرفت اني لما وقعت اتصلت بيا "فونا" ورد عليها واحد وقالها اللى حصل .. قعدت فى المستشفي اسبوع وخرجت وعمي وخالي جم وكانو عاوزين يرجعوني معاهم لكن "فونا" وقفتلهم وبابا "منه" ومامتها وهددته "فونا" انها عملت محضر بالحاله اللى دخلت بيها المستشفي وانهم السبب  وخلتهم يكتبوا تعهد ميقربوش ليا ويخلو مسؤليتهم لو حصلي حاجة  وان "فونا" هى المتحمله ل اى حاجه هتحصلي ... قعدت معاها شويا  وشويا عند مامت "منه" و"ياسر" دورلي ع شغل ونزلت فى مطعم ومن واحد شغال هناك عرفت حوار الغردقه وقدمت ومن وقتها فضلت اتنطط فى كل مكان لغايه ما استقريت فى شرم الشيخ  وزى ماانت شايف زالفل ..
 اتعجب "طارق" من ثبات "صبا" وابتسامتها وان مفيش دموع  وهى بتحكي :
_ "صبا"  انتي ازاى كده
 ابتسمت "صبا" : عارف يا طارق انا لما كنت فى المستشفي كنت هحاول انتحر تاني وكنت متاكده ان محدش هيلحقني لكن قابلت راجل كبير فى السن جدو يعني وقالي جمله من غير ما يعرف تفاصيل قالي ( لو استسلمتي للدنيا متلوميش غير نفسك ,,الدنيا عاوزه اللى يقاوح ويحارب ويدور ع مكانه فيها لانها مش سهله لانها مش دايمة ) فكرت فى كلامه دا وقررت اكون انا "صبا" مهما كانت الظروف ايه ..!
_ اللى انتي مريتي به مكنش سهل .. !
_ ومكنش صعب ..!
_ ايه ..؟
_ اقصد ان فى اصعب من كده فى الدنيا لناس تانية فى مكان تاني ,, اللى حصلي بالنسبه اللى بيسمعه صعب لانه ممرش بالتجربه او ان الموت يخطف اقرب الناس لك وتبقي لوحدك فاقد اتجاهاتك مش شايف غير الموت حل ,,اعتقد انت مريت بنفس الاحساس دا  يا "طارق " لكن وجود دكتور "عثمان" معاك وجنبك هو اللى ساندك ووقفت ع رجلك وبقيت اللى انت فيه دا ...
ب ابتسامه كملت "صبا":  انا راضيه الحمد الله لان ربنا بيدي كل واحد ع قد استطاعته للحمل دا ودا كان حملي ومقدرتي  وقدري.. "طارق" الظروف احنا مبنخترهاش احنا بنتحط فيها زى الطفل اللى مبيعرفش يعوم واترمي فى البحر يا يلطش لغايه ما يوصل يا يستسلم ويغرق ,, دا نتيجه قراره مش نتيجه رميه فى البحر ,, و طريقة تعاملنا مع المواقف هى اللى هتبين احنا ايه بالظبط وهنوصل ل ايه .. .. كانت معكم "صبا مسعود" من وسط البحار
ضحك "طارق" : انت ازاى قدرتي تتغلبي ع كل اللى فات دا ؟
ابتسمت "صبا": بسيطه جدا(شاورت للسما ) اتوكلت عليه حياتي كلها وبسبب اللى حصلي ومريت به  رجعت ل اللمه الحلوة "منه" و"ياسر" و"ماجد" و"جهاد" و"فونا" وانت ,, لو كنت استسلمت لضغط الظروف  مكنتش هشوفك ..مكنتش هعرف انا عاوزه ايه من حياتي ولا جيت هنا واشتغلت شغل بحبه ووصلت للى انا فيه من رضا .. انا الحمد الله رغم خساراتي الكتيره اللى صعب ع اى حد يستحملها استحملتها  وربنا كرمني لانه مسبنيش لوحدي ..اه فقدت أيماني فى وقت وكنت هموت نفسي لكن ربنا بيبعتلنا فرصة وانا مسكت فيها وكانت بداية مرحلة تانية من حياتي والحمد الله راضية جدا ع اللى وصلتلها شغل ومستقرة ماديا الحمد الله واصحابي موجودين سواء هنا او انتم وفونا موجوده ومامت وابو "منة" يعنى الحمد الله هطلب ايه تاني ..!
_مفكرتيش ترتبطي .. قالولي انك رافضة الفكره خالص ..ياتري دا بسبب تجربة وفشلت؟
_ لا خالص ولا جربت ولا فكرت ادخل تجربة ..
 اتعجب من ردها الجاد وانكرها "حمزه" :
_ طيب ايه رفضك ..؟
_ اممم ممكن تقول انا غير مؤهلة ادخل فى علاقة عاطفية او زوجية ..!
_ ليه ..مش انتي بتقولي انك راضية للى وصلتيله واكيد اى انسان بيحتاج شريك كونس يعني يكمل معاه ..
_ انا محتاجة صديق يكملني قبل ما يكون زوج او شريك ,,محتاجة شخص يلفت انتباهه التفاصيل الصغيرة ويسمع الاغاني اللى بحبها ويفهم انا ليه بحبها ,, عاوزه شخص يتفرج ع الافلام اللى بحبها معايا ولو شاف فيلم بيتعرض يندهلي بسرعه اتفرج معاه مش يقلب التليفزيون ,, محتاجة شخص يقبل الدبش اللى بيطلع مني ويستحمل مزاجي  المتقلب ,, محتاجه لشخص ينتشلني من نفسي قبل ما اغرق ,, محتاجه شخص لما يعرف اني زعلانه يطلب يشوفني  ويكون معاه حاجه بحبها عارف انها هتفرحني ,,محتاجه لشخص اقعد معاه ع الرصيف فى الشارع مش كافيه ولا مطعم نضحك ونهزر ولما اكون زعلانه يهديني اغنية تليق بحالتي وميسبنيش غير لما اضحك واروق ويمشي من غير مايعرف سبب مضايقتي ايه لو مقولتش  ,,محتاجه شخص ميسألنيش ايه اللى مضايقك ومزعلك ونتوه وسط الاسئلة لاني اوقات مبعرفش انا مضايقه من ايه اساسا هى حاله بتيجي من غير اسباب المهم يخرجني منها  ,, محتاجة شخص يتقبل عيوبي ويطمني .. انا طول الوقت مش مطمنة..ايوه راضيه الحمد الله لكن مش مطمنة  ..الفراق بقي متوقع مع كل شخص اعرفة .. محتاجه أطمن مش احب واتحب ,, دا اللى محتاجاه فى حياتي هى دى الفراغات اللى محتاجه املاها ومش هتنازل عنها مهما حصل لا هدخل فى تجارب ولا ههدر من نفسي لاني اخدت وقت طويل لغايه ماقدرت اقف ع رجلي ,,
_ لكن ..
_ عارفه هتقول زيهم دا فى الاحلام بص هناك كده (شاورت ع رجل مسن وزوجته ) دا استاذ محمود ومدام فتحية ,, متجوزين من 55 سنه ومن وقت ما اشتغلت كل سنه يجو هنا يحتفلوا بعيد زواجهم وعرفت قبل ما اجي انهم ع طول بيعملوا كده ,,انا عاوزه علاقه زى دى ... (شاورت ع اتنين فى عمر 40 ) ودول مستر كرم ومدام امل متجوزين من 5 سنين ولوقتنا هذا متغيروش ع بعض وسعدا جداا لانهم حابين الحياه مع بعض ,, وفى مستر "محمد" مديري متجوز من 15 سنه وتقديره واحترامه وحبه لمراته مقلش مع بعض ,,انا بقولك ع الامثال دى ليه ,,لان الحياه اللى عاوزة اعيشها موجوده والشخص دا موجود بس هى حكايه صبر ووقت وانا مش مستعجلة مدام انا عارفه عاوزة  ,,انا طلباتي بسيطة غير معقده وهقابله امتي الله اعلم انا عايشة حياتي وربنا وقت ما يريد هيحصل ممكن يطلعلي من البحر فجاءه ,,اتخبط فيه ,,يخبطني ,,اتخانق معاه  ,, لا هستعجل ب ارتباط علشان عمر وسني  ولا علشان خلفه,,  لان انا محتاجه اطمن واستقر علشان اولادي يعيشوا مطمنين ومستقريين ,,
_ ومقابلتيش خالص شخص دا ؟
_ لا ..
_ وحمزة ..
ضحكت : حمزة .. هما حكولك ع دى كمان ولاد الايه ؟
_ انا مفهمتش منهم وعاوز افهم منك .. فين المشكله ؟
_ المشكله مفيش مشكلة .. انا وحمزة كنا اصحاب جدااا وكان هو اقرب شخص ليا هنا وساعدني كتير اول ما جيت بصراحة .. لكن كان نفسه قصير فيه صفات حلوه جدااا وفيه حاجات كتير من اللى قولتلها  وكنا بنقعد نتكلم ونهزر وناكل ونشتغل مع بعض .. عرض عليا الارتباط وانا رفضت ..عرض عليا الجواز علشان يبنلي انه جاد فى العلاقة وانا رفضت .
_ ليه ؟
_ لان عرض الزواج مش دايما  القصد منه ان الشخص دا جاد للعلاقة فى علاقات كتير بتبتدي بزواج ونهايتها غير متوقعه تعاسه وطلاق وخيانه وندم .. فى كتير بيفكرو ان الزواج وسيلة علشان اللى ميتعملش فى الحرام يتعمل فى الحلال ,,غفوة وبيفوقو بعدها ع الواقع ... وانا مبفكرش كده ,,انا عاوزه حياه اطمن فيها مع شخص يستحق اوهبله عمري وايامي ومشاعري ونكون اصحاب قبل ما نكون زوج وزوجه ,,,
_وايه حصل ..
_ ولا حاجه رغم صفاته الحلوه لكن مطمنتش ,, انا عاوزة اقتنع بفكرة الزواج علشان اقرر  لكن هونفسه قصير و عاوز يتجوز ودا حقه فراح اتجوز ..
_ وانتي مزعلتيش ..؟
_ امممم زعلت لاني خسرت صديق ..
_ بس واضح انه زعلان ع خسارة اكتر من صديق ..
_ دا شئ يرجعله.. هو اللى اختار ,,يمكن لو "حمزه" فهمني اكتر كان هيحصل حاجه لكن هو استعجل مفهمنيش ,,
_ انتي مبسوطة وانتي لوحدك ..؟
_ الحمد الله لان قبل ما ادور ع حد يكون معايا انا محتاجه القي نفسي الاول ..
 "صبا" .. انتي مين ..؟
بصت اتجاه البحر وابتسمت : انا مين .. انا شخصية معقدة بس مريحة ,, كئيبة بس فى نفس الوقت مبهجة ,,تافه جدااااا بس فى الجد عصبية جدااا جدااا ,, مستعجلة لكن صبورة ,, اجتماعية لكن بحب اكون لوحدي ,, متوقعه فراق اى حد  وبيأثر فيا فراقهم لكن مببينش .. انا الباحثه عن ذاتها وسط البحار "صبا  مسعود "
 ضحكك "طارق" : انتي عارفة .. رغم كلامك واللى كتير يفهمه انه توهان ,,انتي اكتر واحده عارفه عاوزة ايه وومش بسهولة اى حد يقدر يشاركك حياتك محتاج حرب علشان يفوز بيكي ,, انتي تبانى انك سهلة لكن انتي صعبه جدااا ..
_انا سهله للى يقدر يفهمني لكن الغبي ربنا معاه بقي  ...
 فى سؤال محيرني ممكن
_ اتفضل المايك معاك ..
_  انتى كده لوحدك واغلب وقتك هنا ..لما بتحسي انك غرقانة بتنقذي نفسك ازاى ؟
|ابتسمت : امممم حاجات كتير بتساعدني ,,دعوة أمي اللى بتردد ع وداني دايما  ,, ذكريات طفولتي اللى مش هتتكرر ,, ضحكي وهزاري مع بابا واخويا ,,الشروق واول ضوء شمس ,,ريحة اوراق الشجر والمطر وريحه الارض بعد المطر ونسيم البحروصوت الموج ,,النجوم والسحاب  وقدرتي الكبيرة ع التخيل وثقتي ان كل مر سيمر وكلامي المستمر يوميا قبل ما انام مع ربنا ..
ابتسم "طارق": ايه الوصفه السحرية دى ؟
_ شوفت بقي ..احسسك انئ بائسة بس انا اسد يلا فى ايه ..
 ضحك "طارق" :فظيعه ...
_ واهو كل يوم بكون هنا استمتع واصفي ذهني من اليوم علشان ابدء يوم جديد بلحق نفسي من الضغوطات مش بسمحلها تهزمني  وهكذا ..عرفت بقى ..
_ دا انتي موسوعه  ومش باين عليكي اللى جواكي اكبر من اللى ظاهر
_ والله جينيس كلموني لكن اعتذرت لاني مش فاضية عندي شغل كتير
ضحك "طارق": بجد يا "صبا" انا اتفاجئت بيكي جدااا ,, بعد ما رجعت وشوفتك مكنتش اتخيل انك بالقوة دى بجد برافو عليكي ..
_ ما احنا لازم نضعف علشان نقوي ولما نقوي مش هنستسلم للضعف تاني ونلحق نفسها ,,والصح منكررش الغلط مرتين لكن نتعلم ونحدد احنا عاوزين ايه ,,
_ صح .. الاراده والقرار هما اقوي سلاح الانسان يتسلح بيهم ويواجهه بيهم اى ظروف تقابله
_ صح يا دكتور ...
  اتجهه للبحر واتنهد وطلع السلسة وشافتها "صبا"
_ ايه دا هى لسه معاك ؟
_ انتي فاكراها ..؟
_ ايوه طبعا دى سلسلة "غدير" اللى أنت أشترتهالها فى عيد ميلادها ولما لبستها "ماجد" رخم عليها واتقطعت ...
_ ايوه صح ..
_ وزعلت اوى ومش فاكره حصل ايه سالت ماجد قالى اتصلحت ..
_ ماهو انا اخدتها منها اصلحها وحصل موضوع السفر المفاجئ وملحقتش ..
_ ياااه مكنتش اتوقع انها معاك لسه ..
اتنهد "طارق": هترجع لصاحبتها .. صحيح انتي زيهم متعرفيش حاجه عنها ؟
_ والله يا "طارق" انا عن نفسي كنت زيك مش ع تواصل كامل معاهم كنت مشغوله فى اللى كنت فيه .. وفجاءه هما لاحظوا اختفائها وظهرت فى الجامعه وشافتها "منه" وبعدها اختفت تاني ..بس اللى اقدر اقوله انها اتغيرت كتير بعد ما سافرت يا "طارق" ساكته مكنتش بتتكلم ومامتها مكنتش بترضي تنزل ولو طلعلنا ليها كانت بتحس انها مراقبه من مامتها وغير مرتاحة فقللنا من الطلوع عندها ..
 اتنهد "طارق" ولاحظت "صبا" :
 ب ابتسامه "صبا":  متقلقش اتمني امنية وارميها فى البحر هترجعلك وانا واثقه ان زمن المعجزات مخلصش لان رب المعجزات موجود .. تفائل كده وسيبها ع الله
 ابتسم "طارق": ان شاء الله خير ..
 ظهرت الشمس وابتدا الناس تظهر :
_ ايه رأيك فى الساعتين دول ..
_ زى ما قولتي كل حاجه راحت خلاص ..
_ ابقي تعالي كل يوم ...
 يلا انا هطير انام ساعتين قبل ما ميعاد شغلى وانت كمان نام قبل ما الاوغاد ما هيسيبوك فى حالك ....
_ تمام .. كانت دردرشه سعيده
_ يو ويلكم يا دكتور ..

اتجهه "طارق" لغرفته وكانو"ياسر" و"ماجد" نايمين وكمل نوم ...!
صحيوا  وابتدا يومهم طبيعي ولما انهت "صبا" شغلها قابلتهم وقعدت معاهم ع الشاطئ هى واصدقائها وضحكوا وهزرو وكالعادة حاول "حمزه" يتكلم مع "صبا" وصدته ولاحظ "طارق" وسمع "ماجد" وهو بيبص اتجاههم :
_ ياريت تسمعه .. تسمعه بس بدل المرمطه دى ؟
قام "طارق" واتجه ل "صبا" وهى واقفه ملامح وجهها توتر وقلق :
_ لو سمحتيله بفرصه  التوتر والقلق اللى كل ما يكلمك بتظهر هتختفي
انتبهت للصوت : طارق ..
_ اسمعي نصيحتي واسمعيه ..
_ مين دا ..؟
_ حمزه ..!
ضحكت: هو انت فاكر انا مضايقة بسبب حمزه ..لا خالص دا حصل لغبطة فى حجز وانا كنت المسؤؤله
_ وحمزه ..
_ لا حمزه ايه .. كان بيقولي انه مسافر بكره وكده ..
اتنهد "طارق" وبص ع "ماجد" و"ياسر" و"منة"  : انتم اتغيرتوا خالص ,,اللى يشوفكم وانتم بتضحكوا وعايشين الايام ببساطة ميعرفش اللى جواكم ايه ...
_ تقصد مشاكل "ماجد" مع "اميره" و"منه" وياسر " وانا ..
 بيبص عليهم وهما بيضحكوا و"صبا" بتضحك:
_ "طارق" ميغركش الثبات اللى احنا فيه دا كل واحد فينا الواد قلبه بيوجعه محتاج حد يدلعه بس هو ستر ربنا اللى مداري ..
ضحك "طارق" ع كلامها :
_ ايوه كده اضحك كل حاجه هتاخد وقتها وهتتحل ..يلا نرجعلهم وننسي معاهم  هشربك بيبسي لغايه ما تنسي يلا ...!

كمل "طارق" اجازته مع اصحابه ورجعوا القاهرة وكان مستمتع بالوقت اللى قضاه مع "صبا" ولاحظ فرق السنين والتغيير اللى حصلها والقوة اللى فيها رغم اللى مرت به ولوحدها ..!

فى يوم و"طارق" فى مطعم "ياسر" و"ماجد" ومعاهم "احمد" اخو "ياسر " وكالعاده "ياسر" و"ماجد" بينقارو فى بعض :
_ اهو بسببهم قفلونى من الجواز واحد مطلق بيعانى والتانى متجوز وبيعانى
اتجه "ياسر" للكلام "احمد": انت هتحور علينا ..انت الل رافض اصلا يابنى دا كل ما يتعرف ع واحده وتبقى كويسه وهيدخل فى الجد بيخلع وش بدون مقدمات ..!
_  اخلع قبل ما البس واكون زيكم ..
_ تاخد "اميره" ونص املاكى وتدينى حياتك دى..
_ والحالات الانسانيه ..؟
_ لا دى اعز ما املك افرط فى "اميره" لكن الحالات لا دا مجهود عمر ...
اتكلم "ياسر": بس انت اصلا مش عاوز تتجوز بتعشمهم وبتدخل العلاقة ليه ..
رد "ماجد" : بيقولك الرجل يذوب مرتين فى الحياة,,الاولي لما واحدة تقوله بحبك بيذوب عشقا ,, والتانية لما تقولة تعالي اتقدملي بيذوب زى الملح وبيختفي ,,هو دا "احمد"المذاب ,,
 ضحكوا كلهم ع كلام "ماجد":
 اتكلم "طارق ": هسألكم سؤال هو الراجل فينا محتاج ايه مش هو قوي وقادر يتحمل مسؤلية نفسة والحياة .. محتاج ايه ؟
 رد "ماجد" محتاج واحده تدلعه وتهشتكه مش تنكد ع اللى جابوه ..
ضحكك"طارق": هو فعلا محتاج واحده فى حياته ,,  الراجل بالرغم من قوته الا انه فى احتياج دايم للمراة فى حياته تحسسه بالضعف ومهما عمل وصرخ وزعق وصوته سمع الدنيا الا ان احتياجه ليها بيروضه تلقائى وبيوجهه  ليها ..
_ وايه سبب احتياجه ليها بقى ؟
رد "ماجد": العيال اكيد ,,
_  الرجل لما بيحب بيفتح قلبه وروحه وبيته وبيستقبل روح تانيه بيتونس بيها وبيفرح بوجودها زى لما بيفرح  ب اشعه الشمس فى عز الشتا وبتدفيه او كوبايه مايه بارده فى عز الحر وبيكون مع الانسانه دى بوجوده كله وبجسمه وبطبيعته وعاطفته وعقله وثقافته وبيستمتع معاه بكل حاجه من غير كراهية ولا انانية ولا غيرة .. فهو محتاج ليها علشان يبنى حب حقيقى محتاج ليها علشان يبنى بيت محتاج ليها علشان يكون مسؤل عن عيله خاصه به هو,,هى اللى هتساعده فى تكوينها  .. هو بيكون عارف انه ضعيف وبيقاوم وبيحاول يتخلص من ضعفه دا ,, علشان كده بيصاحب حالات انسانية ولما واحده تقرب اكتر منه ولما بيحس انه هيقرب ع الجواز بيهرب .. يعنى بيتجنب الوقوع فى الاحتياج الدائم بالوقوع فى الاحتياج المؤقت .. يعنى يدخل فى علاقه لفتره يشبع بيها احتياجاته مهما كانت وبعدها كل واحد يروح فى طريقه بدون اى التزامات وهكذا ..
 بينظر "ياسر" اتجاه "احمد وماجد": العلاقات المؤقتة  كتير بيلجاء ليها عن الدائمه ..!
_ الخوف ... خوفه مخليه يتردد بياجله فكره الزواج سنه ورا سنه ..
 رد "احمد": وايه سبب الخوف دا ؟
_ خايف يضعف عاوز يحافظ ع قوته ,, خايف انه مش هيقدر يتخلص من العلاقه بسهوله ويجبر ع الاستمرار فيها ,, خايف يبنى بيت ع كذبه ووهم الحب ويكتشف انها شهوة ..علشان كده بالنسباله الموت فى العزوبيه افضل بكتير من الزواج ...
اتكلم "ماجد": بجد بلا وجع دماغ احتياج ونيله ايه عندك انا عاوز ندمت ندم عمري اني اتجوزت
 رد "طارق":و عندك "ياسر" ندم ع انفصاله عن "منه" وعاوز يرجع ومش عارف لانه محتاجاها .. مش كل الحالات واحد ..وضعك يختلف عن وضع "ياسر" عن غيرك ... مينفعش نقارن نفسنا بغيرنا ونقول ان التجربة الواحده سواء فشل او نجاح يبقي كل التجارب زينا ,,
 اتكلم "احمد":لكن صعب قرار الزواج دا  الراجل بيضحى بكل حاجه فى سبيل ارتباطه بيضحي  بحريته وراحه باله فى سبيل بيت وواحده مستقبلهم مجهوليين ياعالم هيرتاح ولا هيتنكد عليه ..
 رد "ماجد": هيتنكد عليه اسالني انا ..احنا بنضحي بحاجات كتيره ..!
رد "طارق":ماهى الواحده اللى وافقت انها تتجوزك  دى بتضحى بعمرها وراحه بالها وصحتها ومجهودها الذهنى والنفسى والجسدى علشان توفرلك بيت هادى,,والاطفال اللى بيحسسوك بالوجود هى اللى بتشيلهم فى الرحم ل 9 شهور علشان يجو الدنيا ..الولاده والحمل مش حاجه هينه يا جماعه .. احنا مش هنزايد ونقول مين بيضحي اكتر,, الاتنين بيضحوا مفيش طرف بيضحى اكتر لكن الفشل بيبدء لما طرف منهم مبيقدرش التضحيه دى ..فالرجل اللى بيتردد فى قرار الزواج  او بيهرب ويذوب دا مش شطاره منه ولا لانه ذكى دا لانه فاشل ومش عاوز يظهر فشله .. فاشل فى تحمل مسؤؤلية حياه اكبر من حياته الشخصية ,,
 سكتوا كلهم واكمل "طارق" حديثه:
_ عارفين ان فى دراسات اثببتت ان الرجل احسن سن لزواج هو ال 30 ؟
_ ليه
_ بيقولو ان من 10 ل 20 بيكون سن المراهقه بيكون لسه محددش عاوز ايه ولسه مواجهش الحياه ..ومن عمر 20 ل 30 بتستحوذ عليه الرغبة الاغلب بيشدهم للعلاقات بسبب الرغبة لكن من 30 لما فوق بيكون استقر نفسيا  واهم صفه بتكون فيه الحنيه والعطف ودا اللى اغلب البنات بتطلبه وبتستناه وهو بيراعي النقطه دى ,,,
_ يا سلام ...
_  كلنا عارفين ان سنين الشباب بتختفى مفيش حال دايم واحلام الرجل بالزواج  وشروطه بتقل مع تقدمه فى العمر .. يعنى فى ال30 بيحلم يتجوز زوجه جميله متعلمه من عيله محترمه ومع تردده بيضيع فرصه بعد التانيه لغايه ما يوصل ل 40 سنه  وبيفقد غرور الشباب وبيتنازل عن شروطه وحلمه فى عروسه احلامه بتقل وحلمه بيتوقف انه يدور ع عروسه مناسبه من عيله محافظه تقدر الحياه الزوجيه ,, فلما يتقدم به السن اكتر 45 سنه وفيما فوق بيدور ع عروسه عندها ظرف او مشكلة مش هقول عيب لاننا احنا اللى بنخلق العيوب هى بسبب الظرف او المشكلة دى هتوافق عليه بدون شروط زى مثلا روايه "وجهان فى المراه" بتحكى عن مدرس اتقدم فى السن وابتدا يدور ع عروسه لكن كان الشرط  انها تكون مش جميله وفرح جدااا لما لقى "مارى جوزى" عامله عانس اتقدم بها العمر وغير جميله والسبب مناخيرها كانت كبيره ضخمة فكان مفيش حد راضى يتجوزها وكانت هاديه مبتحبش السهر ولا الرقص ولا الاختلاط بالناس ودا كانت اسباب اعجابه بيها ... اتجوزها وانجب منها ولدين وعاشوا فى سعاده لكن اثناء سفره ظهر طبيب تجميل واجرت الزوجه عمليه جراحيه لمناخيرها لتصغيرها لتجميل امام زوجها لما يرجع وتفاجئه وبعد العمليه اتحولت ل اجمل واحده فى المنطقه وفجاءه انقلب هدوء البيت الى جحيم بقت تسهر وتخرج شافها زوجها  بتخونه مع شاب اصغر واوسم منه ,,,
_ دا فيلم شويكار دا بس هى مخنتش جوزها ..!
_ انا بحكيلك الروايه الاجنبيه مش الفيلم يا "ماجد" ..!
_ اسف كمل ..
_ عاوز اقول يعنى انك علشان تهرب من فشلك من خوفك وهروبك سنين فتختار حاجه ع انها مضمومنه دا مش اكيد ... لما تكون مهيئ نفسيا وماديا وقادر ع تحمل مسؤؤلية انسانة هتعيش معاك وهتشاركك فى مسؤؤلية اطفال انتم الاتنين متحملينها وجه وقت الاختيار تختار اختار انسانة عاوزة تعيش معاك وانت تعيش معاها مش مجرد تكمل رساله ولازم تتجوز وتخلف  وجاهل المستقبل .. حطوا اساس مع بعض لعلاقتكم وحياتكم بعيد عن الخوف والتردد ,, بعيد عن العلاقات المؤقت المستنزفه للعمر وللمشاعر والروح  ,, العلاقات المؤقته بتستنفذ مشاعرك واحساسك بيتبلدو لما تقابل الانسانه اللى تستحقهم مش هتعرف تحبها لانها اهلكت روحك فى علاقات تانية وهتتحول من علاقه حب ومشاعر هتكون علاقتكم علاقة جسدية بس ,,ف ليه نعيش كده واحنا ب ايدنا نقرر نعيش صح ... قصه المدرس دى المصيده اللى اصطادته مكنتش فستان قصير ولا جمال خلاب لكن احساسه انها هتكون راحته وهيكون مطمن فى غيبته ...علشان كده يا "احمد" متهربش من حاجه ممكن يجيلك وقت وتبقى مجبر تقرر وتاخد قرار غلط ب اختيار غلط غير مناسب نتيجه تضيعك لفرص كتير افضل .... مجرد نصيحه لو لقيت حب بجد توجه بعلاقه فى النور وعيشوا مع بعض الحلو والوحش الحياه هتكون مختلفه عن العلاقات المؤقته ,, خايف من المستقبل طول ما اختيار صح وانسانة متفاهمه وماسكين ايد بعض هتواجهو المستقبل من غير خوف ,,,
_ شكرا ع النصيحه يا دكتور
كملوا قعدتهم وكل واحد رجع بيته ....!  

اقتربت اجازه "طارق" ودكتور "عثمان" على الانتهاء  وفى اخر اسبوع من الاجازه كان "طارق" فى الفندق فى غرفته اتصلت "هدير":
_ الو ..
_ متقوليش انك نمت ..؟
_ لا خالص كنت بقرا فى كتاب ,,
_ طيب تمام ابقى ادهولى اقراه
_ قبل ما اسافر هسيبلك كل الكتب اللى قريتها
_ واللى مقريتهاش كمان ,,
ضحك"طارق":  واللى مقريتهاش  اى طلبات تانيه ؟
_ ايوه اهم طلب اللى اساسا انا متصله علشانه ..
_ اؤمرينى ..
_ متاكد ..
_ من ايه ..؟
_ انى اامرك ,,يعنى هتنفذ طلبى مهما كان ؟
ضحك"طارق": انا ابتديت اقلق عاوزانى اموتلك مين ,,ماهى فرصه اقتله واسافر ولا حد هيعرف
ضحكت"هدير": لا مش لدرجة دى .. انا بعرف اخلص امورى بنفسى يا دكتور
_  ايه الطلب ؟
_ هقوله بس متسألش ليه وازاى ماشى ..؟
_ تمام
_  بكره الساعه 6 الصبح تكون جاهز انت والدكتور "عثمان" همر عليكم اخدكم فى طريقى ومعايا بابا  ودكتور "عثمان" عارف ومجهز نفسه ..اتفقنا
_ 6 الصبح .. ليه ؟
_ احنا اتفقنا متسألش بقى ...
_ طيب مش اعرف علشان اظبط امورى ..
_ انا مظبطه كل حاجه متقلقش .. واعمل حسابك انك هتتخطف ليومين ومن غير اى تعليق .. يلا تصبح ع خير واشوفك الصبح ..حوول
 قفل "طارق" وملامح استغراب من مكالمه  ونظر اتجاه دكتور "عثمان" وكان نايم .. استكمل قراءه الكتاب وفى تمام الساعه 6 صباحا كانو فى انتظار "هدير" ووالدها .. اتحركت السياره وجلس "طارق" بجوار" هدير" وفى الخلف دكتور "عثمان" ودكتور "عزت" :
_ مش هتقوليلى خطفتينا ع فين ؟
_ استنى دى مفاجاءه
_ دكتور عثمان انت كمان مش هتقولى ؟
_ انا وعدتها مش هقولك حاجه وانت عارف انا لما بوعد ..
_ عارف عارف .. عموما هعرف هعرف بما اننا كلنا مخطوفين
 اتحركت السياره ع الطريق الصحراوى  وبعد مرور ساعات وصلوا الجونه  ,, وقفت السياره امام فيلا  ,,خرج "طارق" :
_ ايه الجمال دا ؟
_ ايه رايك فى الخطفه حلوه صح ..
_ امممم جدااا الجو روعه ..
_ اهو انا قولت اخطفك انت ودكتور "عثمان" يومين قبل ما ترجعوا لندن بحاول اعلقك بالحاجات الحلوه اللى فى مصر علشان تحن دايما ومتغبش عنا ..
ضحك"طارق": انتى عاملاالى مكيده بقى ..
_ وهو انت شوفت حاجه لسه المفاجاءه الكبيرة جوه .. يلا ندخل ..
اتكلم"عثمان": الجو تحفه يا عزت
_ وهتعجبك الفيلا من جوه هترجعلك ذكريات الاسكندرية ..
دخلوا الفيلا وقعدوا فى الحديقه :
_ ايه رايك يا "طارق" البحر تحفه صح ..؟!
_ جداااا ...
_ اهو الواحد يجى يقعد هنا وينسى الدنيا ..
_ معاكى حق .. القاعده قدام البحر مش هتحتاجى حاجه تانى من الدنيا .. لما كنت فى شرم الشيخ  طول الوقت كنت قاعد ع الشاطئ مع "صبا" والشباب
_انت اسبوع وهتسافر صح ؟
_ اها ..
_ طيب  قولى كده تتمنى مين يكون معاك هنا فى اخر ايام لك فى مصر  ..؟
_ "ماجد" و"اميره" و"منه" و"ياسر" وصبا" وفونا و...
سكت لحظات وكملت "هدير": وغدير ..
_ يعني ..
_ اقولك ع حاجة مجرباها .. تيتا زمان كنا بنيجى هنا كل سنه معاها  وكانت بتقولنا اللى تتمنى امنيه وترميها فى البحر الموج بيرجعها لصاحبها وتتحقق ...
ابتسم "طارق": بجد ..
_ انت مش مصدق  .. انا اتمنيت ادخل كليه الطب واتخصص تخصص انجح فيه واتحقق ولما بابا تعب وعمل العمليه اتمنيت انه يخف و هاله اختى انها تنجح واخر مره كنت هنا اتمنيت تنزل مصر و تكون معايا وتتمتع بالمنظر الجميل دا .. واهو اتحققت ..
_ عاوزه تقنعينى ان كل امنياتك اتحققت ..؟
_ مش كلها اكيد لكن اغلبها اتحققت  واهو احنا واقفين جنب بعض اهو وجرب مش هتخسر حاجة  ...
_ امممم
_ بص للبحر وخد نفس جامد منه واتمنى امنيه ,,صدقني مش هتندم جرب يلا ..
 مع اصرار "هدير" ومحاولة يائسه من "طارق"   نفذ "طارق" كلام "هدير" وغمض عينيه واتمني بشدة كل الاشخاص اللى قال اسمهم يكونوا موجودين مع رغبة شديدة فى روية "غدير" ..وفتح عينيه وكانت مرقباه "هدير":
_ اتمنيت ..
_ ايوه ..
_ غمض عينك وهات ايدك  وعد ل 10 وفتح عند رقم 1
_ ليه ؟
_ ماقولنا مفيش اسئلة اليومين دول ..
_ تمام ..
 عمل زى ما قالت "وعد من 10 وقرب لرقم واحد وفتح عينيه
_ فتح عينك وبص  وراك
 بمنتهى البساطه بيبص وكانت المفاجاءه :
_ معقول ...؟

يتبع ,,,