الفراشة الزرقاء (10)

(10)

اتجه مدير دار الزهور للقسم وعمل بلاغ ضد" سميه" باانها خاطفه "تميمه" ودا لان التحقيق اثبت عكس بلاغها وعكس كلام" تميمه" .. البلاغ وصل لدار الامل والحياه واستلمته "سميه" فى حاله من الذهول واتصلت ب "جلال" وخرج من الشركه واتجهه لدار دخل المكتب شاف "سميه" ماسكه البلاغ وفى حاله ذهول :
_ انا متهمه بخطف "تميمه" يا "جلال" ..!
_ هو دا اللى كنت عامل حسابه وحذرتك منه يا "سميه" مش كل حاجه تقدرى تعمليها لوحدك ولا كل الناس بتفكر زيك  ,, اهو بالبلاغ دا  وجود "تميمه" عندك فى البيت يعتبر خطف
بملامح قلق : بس انا مخطفتهاش وفى شهود انها كانت فى حاله سيئه واقعه  قدام البيت مغمى عليها والدكتور "كمال" موجود اللى كشف عليها
_ ممكن كل دا يقولوا شهاد زور ..
 بصت سميه ل جلال : انت مش مصدقنى ليه يا "جلال"
حاول يهدى من عصبيته وقرب منها : يا حبيببتى انا اللى مضايقنى انك حطيتى نفسك فى موقف سئ مش اكتر اكيد مصدقك لكن  المحضر دا ب الاستدعاء للنيابه ينفى كل حاجه وواضح ان الشخصيه اللى قدامنا شخصيه مش سهله
_ انا هدافع عن نفسى قدام المجرم دا مهما حصل
 مسك ايديها وطبطب عليها : اسمها هندافع مع بعض ,,انا معاكى ل اخر الطريق دا لكن عاوز اعرفك حاجه ,,عاطفتك وحماسك مش سمحالك تفكرى فيها انك دلواقتى فى مركز ضعف ,,معنى انهم مصدقوش البلاغ وثبت عكسه  يعنى انتى مش معاكى حاجه غير "تميمه" بس
_ يعنى هيحصل ايه ..؟
_للاسف  هياخدوا "تميمه" ويرجعوها الدار تانى
_ لا يا جلال البنت مرعوبه من الاسم واللى بيحصلهم هناك  ,,انا قلبى مش هيستحمل ارجعها للعذاب دا تانى لا لا
_ مفيش حل غير كده دلواقتى ممكن لما ترجع يثبت حاجه عليه وتنقذيها  ,,
 بملامح حزينه: انا اوصلها ليهم ب ايديا لا لا مش هقدر
_ "سميه" انتى اول مره تلغى عقلك كده ليه ؟
بدموع نازله من عينيها: محتجانى يا "جلال" لما اخدتها فى حضنى حسيت براحه غريبه ولما لاقيتها بتقولى ماما قلبى اتخطف حاسه انها بنتى ,, انا مش عاوزاها تبعد عنى يا "جلال" ا ...
 مسح دموعها وطبطب ع ايديها : اوعدك هنشوف حل متقلقيش .. بس نحل المشكله المحضر دا الاول

رجعت "سميه" البيت  ودخلت شافت "تميمه" قاعده مع "هشام" فى الليفنج بيتفرجوا ع فيلم وبيضحكوا ,, وقفت لحظه وحسيت ان  ظهور "تميمه" فرق معاهم وفى حس فى البيت ,, دموعها نزلت لما فكرت ان "تميمه" هتمشى دخل "جلال" وشافها واقفه وبصلها مسك ايديها وضغط عليها :
_ قولتلك متقلقيش واللى انتى عاوزاه هيحصل بس اصبرى ...
_انا طول عمرى كنت بتمنى اعيش اللحظات دى اشوف ابنى وبنتى مع بعض مستنينى لما ارجع مش متخيله انى كنت بحلم بعد ما اتعلقت ب "تميمه" هسيبها تبعد عنى
_ متقلقيش كل حاجه هتكون احسن مما تتخيلى
 بصت "سميه" ل "جلال" نظره عينه ليها وابتسامته طمنتها  ,,استجمعت مشاعرها ومسحت دموعها ودخلت هى و "جلال" وقربوا ل الليفنج  مبتسمين :
_ ايه الجمال دا بوب كورن وسندوتشات وشيبسى وشوكولاتات احنا دخلنا قاعه سينما
 ضحكوا "هشام" و "تميمه " قعدت "سميه" بجوار "تميمه " مسكت ايديها :
_ ايه الاخبار "هشام" عرف ياخد باله منك يا "تميمه"
قامت "تميمه" وحضنت "سميه" : اوى اوى يا ماما
 كلمه ماما هزت سميه من جواها وحضنتها ودموعها نازله : حضنك حلو اوى يا "تميمه"
 تدخل "هشام" فى الكلام : ااحم احم وحضنى ايه وحش
 فردت دراعها التانى وقام "هشام" حضنها وحضنت الاتنين :
_ انتم اجمل حاجه شافتها عنيا ربنا يديمهم احلى حاجه فى حياتى ولا تبعدوا عن عينى ثانيه
 بصت ل "جلال" هز راسه وابتسم ونظره عينه ليها "اطمنى" ,,
 لاحظ هشام دموع "سميه"  رغم عمره 15 سنه لكن  لكن عقليته اكبر من عمره حس ان فى حاجه .. دخلت "سميه" تنيم "تميمه" وشويا   وخرجت كان "هشام" صاحى مستنيها :
_ انت لسه منمتش يا حبيبى
_ مستنيكى يا ماما ..ممكن  أسئل حضرتك سؤال  ؟
_ اتفضل ...
_ ممكن اعرف فى ايه ؟
_ مفيش يا حبيبى سلامتك
_ لا فى وارجوكى متكذبيش عليا  واضح جدا ان فى حاجه مزعلاكى وباين انها كبيره
 قعدت "سميه" وباصه ل "هشام" : كبرت يا "هشام" وبقيت تلاحظ كل حاجه
_ مش انتى مامتى واى حاجه ليكى الحظها .. فى ايه بقى ؟
اتنهدت "سميه": " تميمه" بعد بكره هتمشى هترجع الدار اللى كانت فيها
اتفاجئ "هشام" : ليه وهترجع ازاى للراجل المتوحش  الحقير هناك
_ البوليس ملقاش حاجه من كلام "تميمه" واتهمونى انى خطفتها وقولت لظابط هرجعها  فى خلال يومين
_ وهتسبيها يا ماما تروح هناك تانى ويحصلها اللى حصلها تانى ؟
 بملامح حزينه : مش عارفه يا "هشام ",,"جلال" قالى هنشوف حل بس المهم دلواقتى انها ترجع الدار لان المحامى قاله ان كل حاجه تثبت انى خطفاها حتى لو "تميمه" قالت عكس كده وانها تقعد هنا بطريقه غير رسميه دا غلط
 فكر "هشام" بسرعه : اكيد فى حل ميخلهاش تقعد هناك تانى
_ اكيد فى حل هنشوف هنوصل ل ايه  ؟
 للحظه فكر "هشام" فى فكره  : ماما .. بما انهم مهتموش بكلام "تميمه" يبقى الحل انهم يشوفوا اللى بيحصل صوت وصوره ..
_ يعنى ايه ؟
_ نسجل للراجل الحقير اللى هناك واللى بيعمله واللى بيحصل فى الدار من غير ما يحسوا ونقدمه للبوليس ويشوفوا وكده ننقذ "تميمه" واللى معاها
 الفكره عجبت "سميه" : فكره .. عرفتها منين دى ؟
_ من افلام التجسس الاجنبيه
 ابتسمت "سميه": يا جامد  ..بس مين اللى هيسجل وازاى من غير ما يتكشفوا ..
_ "تميمه" نقولها وهى اكيد عارفه وحافظه المكان وقالتلى فى مره ان هناك فى داده اسمها  اعتقد داده "سعاد" بتحبهم ممكن تساعدهم كمان ...
 الفكره والكلام عجبوا "سميه" ابتسمت وقامت حضنت "هشام" : حبيبى يا "هشام" ...
ابتسم "هشام" : اعمل اى حاجه علشان ابتسامتك دى يا ماما ..!


واتفقوا ان مفيش حد غيرهم يعرف حتى "جلال" لان "جلال"  تانى يوم الصبح قررت "سميه" تتكلم مع "تميمه" هى و"هشام"
هيعترض بشده لانها طريقه فيها مخاطره عليهم وع "تميمه" ففضلت "سميه" متقولوش لغايه ما يحصل نتيجه ووعدها "هشام" انه مش هيحكى  .. حضرت "سميه" الفطار ودخلت غرفه "تميمه" وفطروا سوا وبعد الفطار اتكلمت معاها :
_ "تميمه" انا عاوزه اتكلم معاكى فى موضوع بس لا عاوزاكى تخافى ولا تعيطى مفيش حاجه فى الدنيا تخليكى تخافى فاهمانى
 بملامح حزينه : انا سمعت كل حاجه امبارح كلامك انت و"هشام" وعرفت انى بكره راجعه الدار تانى
 مسكت "سميه" ايد" تميمه" : "تميمه" بصيلى هنا متوطيش راسك كده  ل اى حاجه تحصل واجهى ودافعى عن حقك ومتخافيش,, متخافيش مهما حصل متخليش خوفك يسيطر عليكى ,, فى حل وهتخرجى من المكان دا وهترجعى هنا تانى وسطينا متخافيش الحكايه محتاجه شجاعه منك وصبر اليومين اللى هتقعديهم هناك ممكن ..
 اتكلم "هشام" : ببساطه كده يا "توما"  ماما هتديكى كاميرات تحطيها فى اماكن محدش يلاحظها الاماكن اللى بيحصل للبنات فيها الضرب  ولما الراجل الحقير دا بيقرب منكم هنصور كل حاجه وهنبلغ عنه وقتها هتخرجى انتى والبنات من الدار  ,,المهم محدش يمسك الفيديوهات دى غيرك  ولا يعرف مكان الكاميرات ومتقلقيش سهله التركيب وانا هعلمك ...
_ انا مش هقدر لوحدى لكن هحاول حاضر
 "سميه" اتكلمت : "هشام" قالى انك قولتيله على داده "سعاد" لما تروحى اديها رقمى هكتبهولك خليها تكلمنى ضرورى وهى هتساعدك
_ حاضر حاضر
 مسكت "سميه" ايد "تميمه" : متخافيش يا "تميمه"  انا و "هشام" و بابا "جلال" معاكى انتى مش لوحدك
 بصت "تميمه" ل "هشام" كان مبتسم : متخافيش
 ابتسمت" تميمه" واتحمست : مش هخاف  وهخرج وهخرج البنات من هناك ...!

تانى يوم فى الموعد المحدد خبط باب البيت وكان الظابط ومعاه محضر استلام "تميمه" وكانت" سميه" اشتريتلها ملابس جديده وبكل ثقه اتحركت "تميمه" وقبل ما تمشى بصت على "سميه" و"هشام" نظراتهم ليها قوه وتشجيع مسمحتش للخوف يسيطر عليها ,, خرجت مع الظابط ومشيت وقعدت "سميه" تهدى نفسها وتدعى ان الموضوع يعدى و"جلال" جنبها :
_  الحمد الله الموضوع خلص كده  كده نقدر نفكر فى حل نخرجها هى والبنات من هناك
 بص ل "سميه" شافها متوتره وبتهز فى رجاها مسك ايدها :
_ "سميه" متخافيش هنلاقى حل وهتخرج من المكان دا انا مش ساكت يا "سميه" ,,
_ ان شاء الله
_ دلواقتى احنا محتاجين نفكر ازاى هيخرجوا وفين هيقعدوا لو كانت "تميمه" لوحدها كنت هقولك تعيش فى الدار مع الاطفال او تعيش معانا البيت كبير لكن معتقدش بتمسكها بالبنات اخواتها ان كلهم هيعيشوا هنا او فى الدار دول محتاجين مكان ليهم
 كانت "سميه" ناسيه المكان وان فى اجراءات وروتين وورق  وزاد القلق الموضوع كبر عن توقعها لكن هداها "جلال":
_ متقلقيش ولا تزعجى نفسك فى حاجه هنلاقى حل لكل حاجه تمام
 ابتسمت "سميه": تمام

رجعت "تميمه" الدار وقابلها المدير بضحكه سخريه ودخلت عنبر مع البنات اتجمعوا حواليها  وبعد ما اطمنوا عليها قربت ليها اقرب واحده ليها فيهم "نرمين" :
_" تميمه" انتى كنتى فين بجد ؟. فعلا كنتى مخطوفه ؟
_ مخطوفه ايه يا "نرمين"  انا كنت هربانه
_ ورجعتى ازاى ؟
_ نصيبى بقى
_ انا لما عرفت انك اختفيتى قولت انك هربتى من الجحيم دا,, تعرفى بعد ما اختفيتى نزلوا فينا ضرب علشان نتكلم انتى فين ومش مصدقيين اننا مش عارفين  مكانك حتى بصى (وريتلها جروح فى دراعها ورجلها )
_ انا كنت فى الجنه فى مكان كنت حاسه انه مش فى الارض
_ كنتى فين ؟
_ هحكيلك بعدين المهم انا عاوزاكى تساعدينى فى حاجه  انتى بس  ماشى ؟
 بملامح توتر : تهربى تانى ولا ايه لا انا مش حمل انضرب تانى .
 مسكت "تميمه" ايد "نرمين": لا هنخرج كلنا من هنا ونحبس العفريت
_ ازاى ؟
 حكت "تميمه" ل "نرمين" صديقتها على الخطه واتحمست لكن خافت اذا فشلت لكن شجعتها "تميمه" ,, قابلت داده" سعاد" وادتها الورقه اللى فيها الرقم وكلمت" سميه" وقابلتها بليل واتفقت معاها انها تساعد البنات مقابل انها هتشغلها فى مكان احسن  بمرتب افضل ,,, ابتدت "تميمه" تعلق الكاميرات بمساعده من "نرمين" وداده "سعاد" ,, ومر شهر والكاميرات سجلت كل حاجه كان صعب يخرجوا الكاميرات لكن بصعوبه حصل .. فى السر سلمت "سعاد" الفيديوهات ل "سميه" وفى البيت" سميه" و"هشام" قعدوا يتفرجوا على التسجلات وشافوا افعال المدير القذر ضرب واهانه واعتداء على البنات وفى مشهد منهم ضرب ل "تميمه" قلب "سميه" وجعها  ,, تانى يوم اتجهت "سميه"  لقسم الشرطه وتقدم بلاغ فى الدار والمدير واستغربت من رد الفعل الامبالااه  :
_ دا تسجيلات غير قانونيه مش هتفيدك فى حاجه لازم اذن نيابه علشان التسجيلات دى تتم
_ ازاى يعنى هطلب اذن نيابه بالتسجيلات والنيابه نفسها مصدقتش البلاغ الاولاانى ؟
_ حضرتك احنا روحنا وكل حاجه كانت سليمه ومفيش حاجه من كلام حضرتك دا
_ واللى قدامكم دا ايه حصل اهو مش دليل دا ؟
_ بقول لحضرتك تسجيلات غير قانونيه
_ يعنى دا اخر كلام
 قرب منها الظابط وبصوت واطى : بلاش تدخلى فى مشاكل مع دار الزهور المدير اللى هناك له صلات كبيره وممكن يأذيكى واحنا عارفين ان عندك دار حافظى عليها علشان متتقفلش  انا بنصحك بس
 بصت "سميه" نظره استغراب ان ظابط بيتكلم كده وان المشاهد محركتش ولا شعره منهم  وهى خارجه قابلها ظابط تانى ونصحها انها تذيع الفيديوهات على الانترنت والبرامج التليفزيونيه علشان يستفزو راى العام والنيابه تتحرك ,, فعلا رجعت على البيت نزلت فيديوهات على اليوتيوب وبعتت نسخ للبرامج التليفزيونيه وساعدها "هشام" الفتره دى "جلال" كان مسافر و"سميه" و "هشام" كانوا بيتحركوا مع بعض  ,, يومين والفيديوهات انتشرت ومعدين البرامج اتصلوا بيها وابتدت تعمل لقاءات وكان بيشجعها "هشام" واتفاجى "جلال" بتصرفها استناها لما رجعت من اللقاء كانت ضيفه فيه  وشافت "جلال"  :
_ "جلال" حمد الله ع السلامه يا حبيبى
 بملامح غضب : كل دا يحصل وانا معرفش يا "سميه"  لدرجه دى انا مش مهم عندك ؟
 _ لالالا متقولش كده انا فعلا كنت هقولك لكن  انا مكنتش اعرف ان فى نتيجه يا "جلال" شهريين و "تميمه" بعيده عنى بتتبهدل هناك وانا مش قادره اعمل حاجه وانت مقولتليش ع حل ,, رغم معرفتى ان نسبه نجاح المحاوله دى ضعيفه لكن محبتش اقف ساكته  انا اسفه انى خبيت عليك
 اتدخل "هشام" فى الكلام وهو شايف ملامح غضب "جلال" وانه زعل من "سميه"  : انا اسف يا بابا لكن الفكره دى كانت فكرتى ماما ملهاش ذنب  ,,انا اللى اقترحت عليها الفكره وشجعتها ع تنفيذها
 لاحظ "جلال" ان "هشام" بيدافع عن "سميه" ابتسم رغم غضبه  :
_ جه اليوم اللى "هشام" يدافع عنك ويحميكى منى 
 ابتسمت "سميه": ابنى حبيبى
_ ماشى اطلع منها وانتم حزب كده
 مسكت ايده "سميه": انا اسفه ,, متزعلش منى يا "جلال" صدقنى مكنتش اقصد اكذب ها ,,ها ,,ها
 "هشام"  ادخل وبخبث : اصلا يا ماما من امتى بابا بيزعل منك ,, ولا مره حصلت هتحصل دلواقتى هو مش زعلان علشان خبيبتى هو زعلان لان الفكره بتاعتى انا وانتى وهو مش جزء منها
 بصله "هشام" وابتسم وبص ل "سميه" وبنبره هادئه : ايوه ,, اللى مضايقنى انك خاطرتى بنفسك بالطريقه دى انتى وهو ,, انتم الحياه اللى انا عايشها ومقدرش اشوف خدش فيكم ,,, توعدونى متكرروش كده تانى وفى اى حاجه اى حاجه تشاركونى معاكم حتى لو بتليفون
 بصت "سميه" ل "هشام" وغمزتله  واتجهوا الاتنين فى حضن "جلال": حاضر نوعدك
 ابتسم "جلال": تعالوا احكولى بقى الخطه بالخطوات بكل حاجه
 قعدوا وحكت "سميه" و "هشام" تفاصيل الخطه :
_ المهم النتيجه ايه دلواقتى ؟
_ مستنيين اهو
 مسك "جلال" موبيله : الخطوه الاخيره هتكون امضاء "جلال عامر "
اتصل بالمحامى وطلب منه يتابع القضيه والتطورات وان البنات دى لازم تخرج قفل معاهم وبص ل "سميه" :
_  كده خلصنا من جزء ,,حددتى هيخروجو على فين ؟
 بصت "سميه" ل "هشام" وابتسموا واتعجب "جلال" من رد فعلهم وب ابتسامه ردت "سميه":
_ فيلا الشيخ زايد فاضيه وانا قدمت طلب  لتضامن الاجتماعي  وهحولها لدار صغيره للبنات بس
اتفاجى جلال : انتى كمان جهزتى المكان وابتديتى الاجراءات ؟
 مسكت ايد "هشام": انا و"هشام"
ابتسم "جلال":  ماشى  انا كنت هقترح مكان لكن انتى جهزتيه خلاص
 ابتسمت "سميه": ومتقلقش كله على حسابى هجهزها وافرشها بالرصيد اللى فى البنك بفلوسى اللى مركونه
 مسك ايديها" جلال" : احنا اتفقنا اننا مع بعض فى كل حاجه  سبينى اشاركك  وهنعمل الدار مع بعض ..
 ابتسمت "سميه" ووقفت واترمت فى حضن "جلال": ربنا يخليك ليا يا "جلال"
 حضنها : ويخليكى ليا
 "هشام" واتنحنح : احم احم وانا  وانا
 الاتنين بصوا ل "هشام" وحضنوه : وانت كمان اهو ... !

خلص المحامى الاجراءات واتقبض على مدير الدار واتقفلت سمح ل "سميه" تاخد 10 بنات  منهم "تميمه" كانت اوراقها خلصت اخدت تميمه و9 بنات منهم فى عمرها 13 والباقى اصغر سنه منها  ووصلوا البيت فى الشيخ زايد وكان "هشام" علق بلاليين فى الحديقه وقفت "سميه" وبصت للبنات
_اهلا بيكم فى بيتكم يا بنات
؟ ظهرت تورته  قالت |نرمين" : تورته ايه دى
 ابتسمت "سميه" وهى باصه ل "تميمه" : انهارده عيد ميلاد "تميمه" والتورته التانيه ترحيب بكم فى بيتكم
جريت" تميمه" وحضنت "سميه" : شكرا يا ماما
ضمت "سميه"  "تميمه" وكانت السعاده ملت حياتها فى اللحظه دى ...!

 خلصوا الاحتفال بالعيد الميلاد والترحيب  وقعدت "سميه"  معاهم :
_ البيت دا بيتكم ومحدش هيقدر يخرجكم منه غير ب ارادتكم واكيد محدش هيحافظ على البيت غيركم ,, انتم هنا اخوات وكلكم بناتى اللى تحتاج حاجه متترددش وتقول واللى يضايقها حد تقول انا عاوزاكم متخافوش من اى حد ولا من اى حاجه ,,  اللى حصل فى الدار التانيه يتنسى لانه استحاله يحصلكم هنا وانا موجوده ,, انسوا ومتستسلموا ل الوجع اللى جواكم من اللى عشتوه واقفلوا الصفحه وابتدوا من الاول هنا معايا ,,انا عاوزاكم واثقيين من نفسكم وتكونوا اقوى من ظروفكم اللى اتفردت عليكم ,, متفتكروش انكم مختلفيين عن غيركم لا ,,لان غيركم مش احسن منكم ,, الانسان بيكون افضل من غيره ب افعاله  واخلاقه وسلوكه وتصرفاته ,,, الخوف مرفوض هنا والصراحه والوضوح هو هيكون حياتنا مع بعض ,, ممنوع الكذب ,, ممنوع التلفظ بالالافظ سيئه ,, ممنوع الاهانه ,, كلكم هنا زى بعض مفيش واحده اعلى من التانيه ,, اللبنات الكبيره تهتم بالاصغر منها ,, تمام ,,!
_ تمام
_ الدور التانى فيه 4 غرف كل غرفه فيها 3 سراير يعنى كل غرفه فيها 3 بنات ,, الاختيار يرجعلكم وبعدين عن توزيع الغرف كلكم عايشين فى البيت دا تمام ,, داده "سعاد" هتكون مرافقه ليكم مش خدامه ليكم بمعنى كلنا هنخدم فى البيت دا لانه بيتنا هنصحى من النوم ننضف سرايرنا وغرفتنا وباقى البيت هيتقسم الشغل علينا ,,  فى اتنين هيجوا مره فى الاسبوع لتنضيف لكل تنضيف باقى الاسبوع على كل اللى قاعدين فى البيت ,, المطبخ البنات الكبار هيتعلموا مع داده "سعاد" الطبيخ والاكل وهيتقسم ع الكل حاليا هيكون فى مساعده ل داده"سعاد" ومشرفتين يقعدوا معاكم  ,, وانا حاليا هبقى المسئوله عن المشتريات بره البيت لوقت ما تعرفوا الاماكن وهيكون تقسيم برضه ,,ليه قولت كل دا علشان دا بيتكم وانتم اللى عايشين فيه وهتحافظوا عليه تمام ..
_ تمام ..
_ اخيرا اعرفكم ب "هشام" ابنى واخوكم وقت ما تحتاجوه هيكون موجود معاكم ,,, يلا  روحو على غرف نومكم واشوفكم الصبح ان شاء الله
 البنات شالو شنطهم وطلعوا ووقفت  "تميمه" بصتلها "سميه":
_ واقفه ليه يا حبيببتى اطلعى اختارى الاوضه مع اخواتك
 بدموع نازله من عينيها : شكرا يا ماما شكرا
 حضنتها "سميه": انا اللى بشكرك انك ظهرتى فى حياتى يا "تميمه"
"هشام" ب ابتسامه : لا كده اغير لا هغير بقى بجد
 ضحكت "سميه" وحضنته هو كمان وبص "هشام" ل "تميمه" و"تميمه" بصاله وابتسموا ...!
طلعت "تميمه" لغرفتها ووقفت "سميه" مع :هشام":
_ الحمل تقيل يا "هشام" قدها تشيله معايا
_ انتى معاكى راجل يا ماما مش سوسن
ضحكت"سميه" : سيد الرجاله كمان ,, زى ما قولتلهم انت اخوهم الكبير وهتكون سرهم ودراعى اليمين هنا
_ وهناك كمان انا معاكى فى اى حاجه وكل حاجه يا ماما متقلقيش مش هخذلك وهتفتخرى بيا وهمشيلك البنات دى ع عجين ميلخبطوش
 ابتسمت "سميه" وحضنته: ربنا يباركلى فيك يا حبيبى ....!

  قعدت اليوم دا سميه مع البنات هى و"هشام" لان "جلال" كان مسافر ,, تانى يوم صحيوا البنات فطروا وابتدوا ينضموا مكان الفطار وقعدت "سميه" تسمع لطلباتهم واكتر طلب اتمنوه التعليم عاوزين يدخلوا المدرسه ,,, وعدتهم "سميه" انها هتدخلهم ,, قبل ما ترجع "سميه" ع البيت  اتصل بيها "جلال" وكان قدام الفيلا  نزل "هشام" وكان معاه شنط كتير  دخل بيهم "جلال" وقربت منه "سميه":
_ ايه كل دا ؟
 ابتسم "جلال": هدايا ترحيب للبنات فى بيتهم من بابا "جلال"
 ابتسمت "سميه" ونزلوا البنات فتحوا الشنط وكانت ملابس وعجبتهم جدا وفرحوا وفرحت "سميه" بفرحتهم بيهم ,,, رجعت ع البيت ومكنتش عارفه تنام خرجت قعدت فى الليفنج بتفكر هتدخل 10 بنات مدرسه ازاى  ,, حس "جلال" ب ان "سميه" مش نايمه قلق وقام بيدور عليها شافها قاعده قدامها ورقه مكتوب فيها 10 وعليهم دائره وسهم ل مدرسه وباصه للورقه ومحستش به :
_ لالالا كده انا هقلق
 انتبهت "سميه" : "جلال"  صحيت ليه ؟
 قعد جنبها  : ازاى انام وانتى مش جنبى وايه اللى مخليكى سرحانه كده (مسك الورقه )  وايه رقم 10 دا ؟
 ب ابتسامه : البنات ,, قبل ما تيجى كنت قاعده معاهم اعرف طلباتهم وكده وسمعت منهم عاوزين ايه اجمعوا عاوزين  يدخلوا المدرسه  والدراسه قدامها شهر وتبدء وانا مش عارفه هلحق ولا لا وهقدملهم ازاى والمصاريف و ..
 "جلال" ابتسم : بس بس انتى معقداها كده ليه ,, انا كنت مجهزلك المفاجاءه لكن واضح مليش نصيب افاجئك ,,انا ليا صديق عنده مدارس بتاعته وفى منها مدرستين قريبين ليهم هطلب منه واكيد مش هيكسفنى
_ ل 10 يا "جلال" كتير لو واحده ولا اتنين ماشى
_ وهو راجل متدين ولما هيعرف هما مين واحنا بنعمل ايه هيوافق صدقينى
_ لا انا مش عاوزاهم يتعلموا شفقه وفى المدرسه يعاملوهم انهم ايتام ويحصل تميز بينهم وبين باقى التلاميذ يسمعوا كلمه تضايقهم ولا حاجه لا  ,,انا عاوزه ادخلهم مدارس زيهم زى اللى بيدخلوها ميفرقوش عن اى حد هناك
_ ومين قالك ان حد هيقولهم كلمه ,, هو شخص يعتمد عليه ,, يومين وهرد عليكى  ولو مش وافق هيدخلوا المدارس ,, "سميه" تتمنى و "جلال" ينفذ .. متقلقيش

سكتت "سميه"  بصلها "جلال" ب ابتسامه: لالالا احنا متفقناش على كده متقلقيش قولت طول ماانا معاكى وجنبك وماسك ايدك (مسك ايديها ) متقلقيش على اى حاجه ,, انا موجود فى الدنيا علشان ابتسامتك متغبش فين بقى
 ابتسمت "سميه": حبيبى ربنا يخليك ليا
_ ويخليكى ليا
_ يلا بقى علشان فى حلم محتاجك فيه وصحيت اندهلك يلا نكملوه بقى
ضحكت "سميه": يلا
 كان "هشام" شايفهم من بعيد وابتسم وسابهم ومشى ...!

مر يومين فعلا وقابل "جلال" شخصيا صديقه صاحب المدرسه واتفق معاه واخد اوراق البنات ال 10 وقدملهم فى المدرسه وطلب ان محدش فى المدرسه يعرف هما مين ويتعاملوا زى الطالبات والمصاريف هتندفع فعرض صديق "جلال" انه حابب يشارك فى عمل الخير ويدفع نص المبلغ لكن "جلال" رفض فصمم صديقه انه هيتحمل نص المبلغ وبعد الحاحه واصراره وافق ...!

 فى يوم بعد ما اتغدوا "سميه" مع البنات و"هشام " :
_ "هشام"  هتقدر تجيب الشنط اللى فى الشنطه
_ ايوه يا ماما ..
_ روحى معاه يا "تميمه" انتى وبنتين كمان
 مشيوا "تميمه" والبنتين مع "هشام" :
_ "هشام" ,, شنط ايه ..؟
 بيوشوشها : متفجرات احنا هنفجر البيت بيكم
 ضحكت "تميمه" : يا سلام
_ هتشوفى بنفسك 
فتح "هشام" الشنطه وطلع الشنط وشالوها واتجهوا لليفنج وكل البنات قاعده ولاحظوا ان كل شنطه عليها استكير ب اسم بنت منهم وطلبت "سميه" من "هشام" يوزعها عليهم واخدوها وطلبت منهم يفتحوها ,, فتحوها وهما فى منتهى الشغف يعرفوا ايه الهديه ,, واتفاجئوا انها ملابس مدرسه كامله طقم وشوز واوادت مدرسيه ..
ابتسمت "سميه" وهى شيفاهم مبسوطه :
_ جهزوا نفسكم بقى  الدراسه قربت و اول ايام الدراسه بابا "جلال" جهز باص ليكم هيعدى ياخدكم ويرجعك
l قاموا البنات اترموا فى حضنها : شكرا يا ماما "سميه" شكرا يا ماما "سميه"
 حضنتهم "سميه" : حبايبى ربنا يوفقكم عاوزه بقى مذاكره ودراسه وتقديرات جميله  وبابا "جلال" قالى اقولكم ان اللى هتجيب درجات عاليه ليها هديه شدوا حيلكم بقى ...

اول يوم دراسه كانت "سميه" صحيت بدرى واتجهت لبيت البنات وصحيتهم هى وداده "سعاد" حضروا السندوتشات واللبن وطلعت ع غرف البنات وابتدت تجهزهم ويلبسوا لبس المدرسه  ونزلوا فطروا وكان الباص موجود نزلوا كلهم واتجهوا للمدرسه ونزلت معاهم "سميه" ودخلوا المدرسه وابتدوا اول يوم  وكانوا مبهوريين بيها لانهم اول مره يدخلوا مدرسه كانوا فى الدار التانيه بيذاكروا فى الدار ويروحوا ع الامتحانات بس .. دخلت "سميه" معاهم وعرفتهم اماكنهم واتكلمت مع المدرسين  وفضلت قاعده لوقت خروجهم ورجعوا على البيت وكانوا فى منتهى السعاده و"سميه" سعيده جدااا بيهم ... بليل رجعت حكت ل "جلال" عن تجربتها انها توصل البنات لمدرسه زى الامهات وانها استنتهم كانت فرحه بالنسبالها  و "هشام" كان سعيد بيها وهو شايفها سعيده ..!

ابتدوا يروحوا المدرسه كل يوم وقبل ما تروح "سميه" الدار كانت بتنزل مع "هشام" كان بيروح مدرسته وهى تروح للبنات تطمن عليهم ويخرجوا وهى تروح الدار وكانت بتطمن عليهم فى التليفون من داده "سعاد" والمشرفتين الموجودين معاهم ...فى يوم وهما فى المدرسه كانت "نرمين" قاعده بتاكل السندوتشات ووقعت على هدومها فمسحت ب ايديها ففى بنت شافتها وملامح الاشمئزاز على وشها وشوشت بنت تانيه وكانوا بيتكلموا على "نرمين" شافتها "تميمه" وهى ملامح حزن اترسمت على وشها :
_ مالك يا "نرمو" حد خطف منك السندوتشات ؟
_ لا
_ مالك بس ؟
_ "تميمه" انا عاوزه اكون معاكى مش عاوزه اكون هنا لوحدى
_ ما انتى عارفه مش هينفع انا اكبر منك بسنه مش هينفع
 عيطت "نرمين" واتخضت "تميمه": فى ايه ؟
حكت" نرمين" ل "تميمه" على البنات واضايقت "تميمه" لتصرفهم وتجنب "نرمين" ومحدش عاوز يصاحبها اتجهت للبنات بتكلمهم :
_ ممكن اعرف انتم عملتوا كده ليه مع" نرمين " مش هى صاحبتكم برضه
 بنبره تعالى : لا" نرمين" مش صاحبتنا
_ اومال هى ايه ؟
_ هى بنت غلبانه ملهاش اهل مستر "عبد الرحمن" عطف عليها وعليكى وخلاكم تدخلوا المدرسه الغاليه دى
اتفاجئت "تميمه":ايه ؟
_ وهو انتى فاكره ان مفيش حد عارف المدرسه كلها عرفت انكم معندكمش اب ولا ام وقاعدين فى دار ايتام  وباينه اوى من الباص اللى انتم فيه وانكم مبتكونش فى الباص معانا  .. واحنا حريين نصاحب مين ومنصاحبش مين
 الكلام ضايق "تميمه" جدااا ولاحظت من البنات التانين  انهم بيتعرضوا ل اهانات من زمايلهم ومبيتكلموش  ففى يوم
" تميمه" شافت بنت بتضايق "نرمين" راحت شدتها من شعرها وضربوا بعض وطلبوا استدعاء ولى امر "تميمه" وكانت "سميه" واتفاجئت من تصرفات "تميمه" والبنات والشكوى المتكرره منهم ,,, رجعت ع البيت وقاعده وهما قدامهم  وبتتكلم معاهم سكتوا وطلعوا ع غرفتهم وتانى يوم مشرفه اتصلت ب "سميه" ابلاغتها ان البنات رافضين يروحوا المدرسه ,, خلصت شغلها فى الدار ورجعت ع البيت وقاعده معاهم اتكلمت "تميمه":
_ احنا مش عاوزين نروح المدرسه
_ ممكن افهم فى ايه مش انتم كنتم عاوزين تروحوا مدرسه مش عاوزين دلواقتى ليه  ؟
حكوا البنات على المضايقات والكلام اللى بيحصلهم فى المدرسه من زمئلاهم  اللى اتكررت اكتر من مره ومع كل مره كانت بتزيد ودا اللى وصلهم يتخانقوا فى المدرسه واضايقت لكن مبينتش وابتسمت :
_ هو دا اللى ضايقكم ؟
_ ايوه
_ ويضايقكم ليه .. انتم غلطتوا فى حاجه وهو علشان هما مش عاوزينكم تقوموا انتم مترحوش  انتم كده بتنفذوا كلامهم
_ مش فاهمين ..؟
_ المدرسه دى بتاعتكم وبتاعتهم  وانا قولتلكم انتم متفرقوش عن اى حد حاجه معاملتكم وسلوككم واخلاقكم اللى هتميزكم عن غيركم غير كده لا ومينفعش تهربوا من المشكله  اتمسكوا بحقكم مش انتم عاوزين تتعلموا اهو ليه تضيعوا فرصتكم ببساطه
 كلام "سميه" حمس البنات واعتذروا انهم اخدوا القرار دا ,,  ورجعت" سميه" على البيت وهى مضايقه وشافها "جلال"  :
_ ينفع كده يا "جلال" هو دا اللى اتفقنا عليه ؟
_ مالك بس ايه حصل ؟
_فى ان اتفاقك مع صاحبك خذلك والمدرسه كلها بتتكلم عن البنات انهم ايتام وعايشين فى دار وكلام مش لطيف ,,
اتفاجى "جلال" واتصل بصديقه وقاله انه معرفش غير المدرسين ففهم" جلال" ان الكلام وصل ل البنات من رغى المدرسين واعتذر صديقه ل "جلال" ووعده مش هيتكرر تانى,, تانى يوم ذهبوا للمدرسه عادى وكل واحده فيهم رافعه راسها وبتردد لنفسها انا زى زيهم مفيش فرق ودا حقى وهحافظ عليه ,,, مرت مده وفى مره فى البريك اتخانقوا البنات مع مجموعه بنات تانين واتصلوا بسميه واشتكوا من انفعال البنات رجعت على البيت واتكلمت معاهم وفهمتهم غلطتهم وكان قرار "جلال" انهم يدرسوا منازل حفاظا على مشاعرهم ومنعا لمشاكل والبنات وافقواو"سميه" حست ان الحل دا انسب ليهم حاليا ,,!
انتهى عام الدراسى ونجحوا وكان هديه :جلال" ليهم تاب لكل بنت فرحوا به جدا  واثناء الاجازه كان "هشام" مع "سميه" فى الدار واوقات كان بيروح لوحده يوصل طلبات لو "سميه" مش فاضيه ,, ففى يوم مكنش شايف "تميمه" دور عليها فى البيت كله مشفهاش سمع صوت من خلف البيت فى الحديقه الخلفيه واتبع الصوت  شاف "تميمه" قاعده فى الحديقه وبتتفرج على فيديو :
_  انتى هنا وانا بدور عليكى
_ الجو هنا هادى وكل شويا بيندهولى هربت منهم
_ بس مكان هادى ,,بتتفرجى على ايه ؟
_ بص يا "هشام" بيرقصوا حلو ازاى
_ اها بريك دانس  شفته وشفت فيديوهات كتير لناس كتير بترقص كده
_ تعرف انا اتعلمت كذا حركه بص (سابت التاب وابتدت تقلد الحركات)
_ ايه دا يا "تميمه" انتى مقلدها بالظبط
_ انا طول ماانا قاعده بتفرج عليهم وفى اوضتى قدام المرايه اقلدهم ببقى مبسوطه اوى
_ طيب جربتى البليه ؟
_ لالا مستمتعتش البريك دانس والهيب هوب كده  ,, ببقى مبسوطه وانا برقص
_ يعنى هتكونى راقصه هيب هوب مشهوره
بتضحك "تميمه" : طبعا


 لاحظ "هشام" اهتمام "تميمه" غير باقى البنات انها مهتميه ب الرقص الغربى ف ابتدا  يركز ويجمع سيدهات وفيديوهات رقصات  البريك دانس وهيب هوب  وفيما يتعلق بالرقص الغربى ل "تميمه" وكانت بتفرح بيها جدااا واغلب وقتها كانت بتتفرج ع الفيديوهات وتقلدها  كان الرقص بالنسبه ل "تميمه" اكتر حاجه بتحبها لانها بتقدر تنفس عن احاسيسها عن طريقه ويعتبر منفذ للهروب ليها وانعزالها عن الواقع اللى معلم جواها وجع بتحاول تهرب منه ,,,مر سنتين ع الاوضاع الجديده المستقره البنات فى بيتهم و"سميه" فى الدار و"جلال" معاها وفى الشركه و "هشام" قسم وقته لكل دا وحياتهم كانت مكتمله من وجهه نظرهم وسعداء بيها ,,فى خلال السنتين عاد "هشام" سنه منهم وبعدها  خلص "هشام" الثانويه العامه واحتفل به "جلال" فى البيت مع" سميه" :
_ مبروك يا" هشام" مجموعك جميل اوى
_ شكرا يا بابا
_حضنته "سميه" : مبرووك يا حبيبى
_ شكرا يا ماما
_ السنه اللى عدتها الحمد الله ماثرتش معاك
_ الحمد الله
_ ها يا "هشام" نويت تعمل ايه ؟
ضحكك "جلال":طبعا "هندسه" اومال مين هيمسك الشغل بعدى ويساعدنى
ضحكت "سميه": معتقدش انك من الابهات الديكتاتورين  اللى بيتحكموا فى مصير اولادهم يا "جلال" ,, "هشام" هو صاحب الحق فى اختياره يدخل ايه ويدرس ايه كمان ؟
 ضحك" جلال" : بتكسبى نقطه عنده علشان يحبك اكتر ماشى يا "سميه" وانا موافق
ابتسم "هشام" : يعنى مهما قولت هتوافقونى عليه ؟
_ طبعا يا حبيبى
 قام "هشام" من مكانه وقعد بين "سميه" و"جلال" ومسك ايديهم وبصلهم وعلى وشه ابتسامه :
_ انا قررت اسافر لندن وادرس هندسه هناك زى بابا "جلال"  وارجع اشتغل معاه فى الشركه ..الايام اللى كنت بروح فيها حبيت الجو والشغل وقررت ادرس اكتر فى المجال المعمارى وابقى زى بابا
_ ابتسم جلال  : يعنى اختيارك من غير ضغط
 ابتسم هشام : من غير اى ضغوط ,,انتم كل حاجه ليا وانتم احلى حاجه فى الدنيا ومش شايف احلى منكم وانت يا بابا مثلى الاعلى وبتمنى اكون زيك بدايه من الدراسه ل الشغل ل حياتك
 ضحكك "جلال": دا انتى عاوز حياه "جلال" لكن ع صغير
_ يارررريت لكن اعتقد مفيش فى الدنيا زى ماما "سميه" لسه مجتش
ابتسمت "سميه" وحضنته: يا حبيبى ,, بص مهما قررت واختارت احنا معاك
_ وانا واثق من كده
 طلبطبت :سميه"على ايده : لما تسافر ابقى زور مامتك يا "هشام" كتير كلمتك يا حبيبى
 سكت "هشام" وكمل "جلال" : صح يا "هشام" مهما كان هى مامتك
_ ان شاء الله
 قام وقف :يلا يا ماما
_ رايحين ع فين وسايبنى
_ انا وعدت "تميمه" والبنات انى هحتفل معاهم بنجاحى وعازمهم على العشا
_ هتاخد الجيش دا بره
 ضحكت "سميه": لا هنعزم الجيش مكانه ,, ماتيجى معانا يا "جلال"
_ انا هنام عقبال ما ترجعوا انهارده كان فى شغل كتير
_ تمام يا حبيبى ومش هنتاخر عليك
_ ثوانى وجى يا ماما
 مشى "هشام" بص "جلال" ل "سميه" :
_ مش ملاحظه تعلق "هشام" بالبنات والبيت هناك و ,,,
قاطعته "سميه" :هو معتبرهم اخواته انت ناسى انه كان معايا خطوه بخطوه فى الموضوع دا ,, متقلقش
_ مش قلق لكن حياه "هشام" مقفوله احنا والدار وبيت البنات حتى "رجاء" كل ما تكلمنى تقولى خطفتوا الولد مننا ونستيوه اهله علشان كده كل ما اسافر ليها اخده معايا ,,
_ هو هيسافر يدرس فى لندن وهيكون له اصدقاء كتير ودنيته هتوسع  متقلقش
_ هيوحشنى اوى
_ هينزل اجازات هو ميقدرش يبعد عننا
اتجه" هشام"  و"سميه"  لبيت البنات وطلبوا العشا وقعدوا مع بعض  واتعشوا وفى اخر السهره قالهم "هشام" انه هيسافر ملامح كل البنات اتغيرت وزعلوا  حتى "تميمه" لكن "هشام" وعدهم انه مش هيتاخر وهينزل زيارات دايما وهيرجع بهدايا كتيره ليهم ,,, !

جهز "هشام" اوراقه وحدد يوم السفر واتجه لبيت البنات قعد معاهم ومع داده "سعاد" والمشرفات وبيسئل ع "تميمه" عرف من "نرمين" انها قاعده فى الحديقه فى ضهر الفيلا اتجه ليها وشافها وهى واقفه بتقلد حركه و فاتحه فيديوهات :
_ يعنى بدل ما تقعدى معايا قاعده مع الفيديوهات
 ابتسمت "تميمه": ماهو انت اللى عاملهمولى يعنى منك
قعد "هشام" وبص ع الفيديوهات : هتوحشينى يا "تميمه" ؟
 بصتله وابتسمت "تميمه" : وانت كمان  هتنزل اجازات ولا هتكسل
_ هو انا اقدر ابعد عنكم اكيد الاجازات هكون معاكم
_ تمام
_ متنسنيش  يوميا تبعتيلى حصل ايه والموبيل معاكى علشان لما اتصل انتى رويتر البيت تحكيلى
_ انتى ناسى "نرمين" دى اكتر
ضحكك"هشام" : اعمل ايه بحب اسمع صوتك انتى ..
 ابتسمت "تميمه":
_ ولو احتاجتى اى حاجه قوليلى اجيبهالك وانا جى
_ هتجيبهالى من لندن
_ اجيبهالك لو فى اخر الدنيا انا عندى كام" تميمه"
 ضحكت تميمه: واحده بس
_ ايوه كده اضحكى
_ يعنى ما فى هندسه فى مصر اشمعنى لندن ؟
_  عاوز اكون زى بابا "جلال" وعاوز اكون معاه فى شغله دايما  فحبيت ادرس اكتر علشان لما اشتغل معاه افيده واحس انى زودت حاجه ,,
_ ماشى يابشمهندس "هشام" مقدما ..على الله بس بنات اوروبا يزغللو عينيك وتبقى فاشل وتضيع فلوس تذكره الطيران
ضحكك"هشام" : لا متقلقيش المذاكره المذاكره
ضحكت "تميمه" وكمل "هشام": عاوزك تذاكرى كويس وتجيبى مجموع كبير علشان تحصلينى السنه الجايه هناك فى لندن ونلفها مع بعض ونرجع نشتغل مع بعض فى الشركه
_ ان شاء الله ,, تروح وترجع بالسلامه يا "هشام"
_ خلى بالك ع نفسك ومهما حصل كلمينى وانا هكلمك ع طول
_ حاضر
 خلص قعدته "هشام" ورجع البيت كانت شنطته جاهزه قعد فى المطار مستنى موعد اقلاع الطياره فتح موبيل وفتح الصور واتفرج ع صوره مع البنات وبالاخص" تميمه" والابتسامه ماليه وشه ...!

 مر سنتين على سفر "هشام" لندن وكانت حياه "تميمه" فى البيت مع البنات وفيديوهات وتدريبات على رقصات البريك دانس والهيب هوب والرقصات الاخرى  ووصلت لمرحله انها تسمع اى موسيقى وتصمم حركاتها كهوايه وكانت "نرمين" من حبها فى الاكل والحلويات كانت بتتعلم  طرق التورته والحلويات وكانت المسؤله عن اى مناسبه فى البيت من اتجاه الاكل  وكل بنت كان ليها هوايه معينه ركزوا فيها يشغلوا وقتهم ,,, خلصت "تميمه" ثانويه عامه هى وكام بنت منهم "نرمين" فى يوم قعدت "سميه" مع البنات  :
_ ها يا بنات حابين تعملوا ايه بعد الثانويه ؟
سكتوا ..: لا انا بسالكم هتكملوا ولا عاوزين ايه بالظبط مجاميعكم كويسه
 ردت" تميمه" بحماس : عاوزه ادخل الجامعه احنا عاوزين ندخل الجامعه
_ طيب مقولتوش كده ليه من الاول
_ محروجين بصراحه مش عاوزين نكون حمل تقيل عليكى يا ماما اكتر من كده
_لا يا حبيبتى لا حمل تقيل ولا حاجه بابا "جلال" متكفل بيكم لغايه متتجوزو مدام انتم مجتهدين فى مذاكرتكم يبقى اى حاجه بسيطه ,,, يبقى خلاص جهزوا نفسكم بكره هعدى عليكم ونروح نجيب ورق التنسيق ونشوف هنكتب ايه ..!
_ حضنوا البنات "سميه": شكرا يا ماما
 خرجوا البنات وطلبت "سميه" من "تميمه" تقعد معاها والبنتين خارجين بصوا ل "تميمه" نظره غيره من اهتمام "سميه" الزياده بيها  :
_ ماهى "تميمه" اللى ع الحجر كفايه انها مخلياها الكبيره علينا ومرقبانا اكيد هتدخلها جامعه خاصه وبفلوس قد كده واحنا هنروح حكومه
_ لا متقوليش كده ماما "سميه" مبتميزش بينا
_ مبتميزش بينا ايوه لكن مكانه" تميمه" مختلفه عندها
_ يابنتى بطلى غل وحقد بقى  ,,:تميمه: لولاها كان زماننا متمرمطين فى الدار التانيه احنا فى نعمه احمدى ربنا
_ الحمد الله

قعدت "سميه" مع "تميمه" :
_ من امتى يا" تميمه" بتتحرجى ولا بتتكسفى منى ...
_ لا يا ماما مقصدش كده بس فعلا محبتش نتقل المصاريف عليكم
_ واحنا اشتكينا ليكم ,, يا حبيببتى كل واحد وربنا كاتبله رزقه وانتم كل واحده بتاخد رزقها واللى مكتوبلها,, لانكم بتسعوا وانتى بتجتهدى ونتيجه اجتهادك جايزه ,, والحمد الله ربنا بيكرمنا علشانكم
_ ان شاء الله لما اشتغل ,,,
قاطعتها "سميه": لما تشتغلى وتعتمدى ع نفسك هيكون لنفسك مش هتعتمدى علينا احنا ما الا وسيله لكن الاساس هو انتى فاهمانى
_ تمام يا فندم
_ فكرتينى" بهشام "
_ كلها اسبوعين ونازل
_ شايفه الولد كلمك وقالك ومقاليش
_ اووووبس مش يمكن حابب يفاجئك
_ اه منكم انتم الاتنين
حضنتها "تميمه" : ربنا يخليكى لينا يا ماما

دخلت" تميمه" غرفتها وموبيلها رن وكان "هشام" :
_ مبترديش ليه اطرشيتى  من كتر الهاند فرى فى ودانك ؟
_ كنت فى ميتنج يا بشمهندس مع ماما "سميه"
_ اهاا نأسف ع الازعاج اصلك مبترديش و"نرمين" مبتردش ولا البيت انا قولت اتخطفتوا ,,,
_ لا كنا مركزيين
_ ونتيجه  ميتنج تحديد مصير ايه ؟
_ هنروح بكره نجيب ورق التنسيق ونقدم
_ مبرووووك  ونويتى ع ايه يا فاشله وانا اللى كنت عامل حسابى انك هتكونى هنا معايا
_ انا اصلا مبحبش الرياضيات ودخلت ادبى هدخل هندسه ازاى حتى الوسطه مش هتنفع لو فكرت
_ ماانا قولتلك ادخلى علمى علوم وانا هبعتلك هنا
_ لا شكرا ,,انا مش بتاعه هندسه
_ طيب عاوزه ايه حددتى ولا لسه
_ هو مجموعى  مرحله تانيه ف تجاره او اداب او حقوق
_ زى بقيت المصريين يعنى ؟
_ ايون
_ و "نرمين"... اكيد اقتصاد منزلى
ضحكت" تميمه": هقولها عليك بجد ,, بس "نرمين" مش عاوزه تكمل تعليم هتكتفى بالثانويه وحله المحشى زى ما بتقول
_ ايه حله المحشى دى ,, هديه التخرج دى ؟
_ لا هى تتعلم خلطه المحشى من وجهه نظرها افضل كتير من التعليم
_ متعقليها يا بنتى متخليهاش تضيع نفسها كده ؟
_ كلمتها كتير لكن هى مصممه ومبسوطه بقرارها
_ ربنا يوفقها ويوفقك
_ شكرا ,,ربنا يستر بس وهشوف ادخل ايه ؟
_ هتسلكى فى اى حاجه المهم اختارى انتى عاوزه ايه واعرفى ان فى ضهرك رجاله  متخافيش
- انا بصراحه قلقانه من جو الجامعه دا يا "هشام" مش لو انت هنا كنت ساعدتنى,, اروح الجامعه ومعايا حد بيبقى افضل لو روحت لوحدى
_ الجامعه مفيهاش مساعدات يا "تميمه" دى تجربه شخصيه تخوضيها مع نفسك وتتعلمى منها ايه الصح والغلط ,, الحياه الجامعيه مجتمع تانى غير مرحله المدرسه ومتقلقيش مدام انتى بتتصرف صح ومش ماشيه ورا كلام حد ولا ورا موضه هتمرى منها على خير
_ دى بسيطه اوى محدش يقدر يغيرلى تفكيرى
_  عاوزه اقولك دخول الجامعه دى معركه مع نفسك بعيد عن مجال التعليم وانك اخدتى قرار تدخليها يبقى تستجمعى شجاعتك وتخوضى المعركه الفكريه والاخلاقيه بره سور البيت  المهم اتمسكى بمبادئك واخلاقك وعينك متزغش كده ولا كده ولا ارجع القيكى بتشربى سجاير يالهوووى
_ لالالا انا اكبر من كده انا هشد هيروين على طول
_ ايوه كده دا الكلام الصح يا معلم

قدمت "تميمه"  ودخلت كليه تجاره القاهره وكانت فرحانه جدااا بانها داخله جامعه وهتقابل وهتتعامل مع ناس تانين غير اللى فى البيت  ويوميا كان "هشام" بيكلمها وفى اليله  اول يوم الجامعه كانت متوتره  نزلت من غرفتها لخلف البيت فى الحديقه و حطت سماعات الهاند فرى وشغلت ميوزك وابتدت ترقص عليها فى الحديقه لغايه ما تعبت وقعدت على الارض وفى سرها (فينك يا هشام ) فى اللحظه دى موابيلها رن وكان" هشام" :
_ انتى بتيجى ع السيره
_ كنتى بتنمى عليا مع مين ؟
_ مع نفسى كلهم ناموا انا اللى صاحيه
_ صاحيه اكيد حاطه سماعات الهاند فرى وبترقصى صح
_ انت معايا ولا ايه ؟
_ انا مسافرتش انا جنبك اهو
 ضحكت تميمه : بكره اول يوم فى معركه الجامعيه
_ خدى نفس جامد وانطلقى
_ بتتريق .. انا اول مره اخرج واتعامل مع ناس قدى وخايفه اغلط و..
_ هتغلطى ,, اغلطى عادى جداا دا شئ طبيعى لانك انسانه مش ملاك المهم انك لما تغلطى تتعلمى من غلطتك متكررهاش زى الحماره كده
_ بتغلط فيا ..؟
_ دا لو كررتى غلطاتك بتكونى حماره خفى العند اللى عندك ده وكل حاجه هتكون تمام ,, صدقينى فتره وهتعدى ,, انا عارف ان لو معاكى حد فى المكان هيزود من ثقتك بنفسك لكن الحقيقه ان الثقه بتخرج من الشخص نفسه لنفسه مش من اللى حواليه ,, ف انتى هتعديها ومتخافيش واقفى ورافعه راسك وعينك فى عين اى حد يقابلك لان ببساطه انتى زيهم متفرقيش حاجه عنهم ..
_ تمام
_ يلا وبكره لما ترجعى ابقى ابعتيلى احكيلى عن اول يوم جامعه
_ حاضر
_ وكفايه هدت حيل وقومى نامى
_ حاضر
_ وحشتينى
_ وانت اكتر ,, تصبح ع خير
_ لا عندى صباح الخير
_ صباحك فل ...
 قفلت "تميمه" مع "هشام" ومكنش جايلها نوم فضلت تسمع فى ميوزك وترقص لغايه ما تعبت فعلا ونامت ,,, صحيت تانى يوم لبست وجهزت ونزلت وصلت للجامعه وقفت قدام الباب الكبير واخدت نفس ورددت كلام هشام" راسى مرفوعه وانا زى زى اى واحده هنا مختلفش عنها فى حاجه ,,, دخلت وابتدت تدور على جدولها واخدت الجدول وحضرت محاضرتين ورجعت على البيت شافت "نرمين" قاعده جنب داده "سعاد" بيتفرجوا على التليفزيون .. قربت منهم وبتبص شافتهم بيتفرج على برنامج اكل :
_ ماشاء الله ,, واضح كده ان فى اكله معكوكه قريب هتتجرب فينا
 ضحكت "نرمين" : لا لسه لما اجيب التكه الاخيره
_ ايه يا داده البت دى مستلماكى كده ليه
_ والله يابنتى دى الوحيده اللى بتونسنى فيكم كلكم  يا قاعدين فى اوضكم يا بره فى جامعتكم وهى اللى قعدت معايا
_ ماهى كان قدامها فرصه تكمل هى اكتفت ب الثانويه
_ ياحبيببتى انا مش بتاعه تعليم انا بتاعه اكل
_ لكن التعليم هينفعك
_ لا خالص هاخد الشهاده وهحطها تحت البطانيه لكن الاكل وحلاوه الاكل دا اللى بيعيش وهتشوفى لما افتح المطعم بتاعى الخاص هتشتحتفى علشان تاخدى ميعاد واحجزلك مكان
_ طيب بمناسبه المواعيد هنتغدى ولا لسه هنستى التكه الجديده
_ لا الاكل خلصان فى المطبخ
_ طيب هتاكلى معايا يا "نرمين"
_ اكيد ,,, هقوم احضر معاكى
_ وانتى يا داده
_ لا يا حبايبى مش جعانه بس اوعوا تنسوا نار البوتجاز شغاله كنا هنموت مخنوقيين بسبب الانسه "نرمين"
_ متقلقيش يا داده مش هموتكم بغاز هتموتوا متسممين من اكله وهتكون جمعاء مش هسيبكم لوحدكم
 خبطتها "تميمه": جتك النيله فى الفاظك اتجرى قدامى
 دخلوا المطبخ وابتدوا يسخنوا الاكل وحطوه وقعدوا يا كلوا :
_ رجعتى لوحدك ليه فين البت "هناء" مش هى كمان فى جامعه القاهره
_ ايوه لكن اداب انا تجاره
_ يعنى مش جنب بعض
_ ايوه,, وبعدين انتى عارفه هى لا بتحبنى ولا بتطيقنى
_ مرات ابوها انتى
_ براحتها بقى انا كذا مره اتكلم معاها وهى مش قادره تسمع غير نفسها مع نفسها بقى
_ سيبك منها احكيلى اول يوم عدى ازاى الخوف والتوتر
_ لالالا عادى ولا حاجه جبت الجدول وحضرت محاضرتين ورجعت اهو
_ حلو احساس انك تروحى جامعه وتخرجى من البيت يعنى
_ اها .. تقابلى ناس وتعرفى الدنيا حتى لو هتتفرجى عليها من المواصلات
_ طيب كويس المهم انك مبسوطه
_ اها الحمد الله ربنا يعدى ال 4 سنين على خير
_ ان شاء الله

 خلصت "تميمه" اكل وغسلت المواعين ودخلت غرفتها اتكلمت مع "هشام " وقفلت نامت ,, مرت السنه الاولى ل "تميمه" فى الجامعه عادى جدا كانت الاول منعزله بتسمع ميوزك وسماعات الهاند فرى لكن مع الوقت اتعرفت ع بعض اصدقاء  وقبل امتحانات الترم التانى عرفت ان فى مسرح فى الجامعه ودخلت معاهم المسرح واتفرجت ع عرض مسرحى وكان فيه فقره عرض راقص والبنت اللى كانت بتأدى الدور اعتذرت وكانوا معلقيين اعلان شافته صديقه "تميمه" وشجعتها انها تقدم وقدمت واتفرجوا ع جزء من رقصاتها واعجب بيها الجميع وانضمت للمسرح ,, بساطه "تميمه" كانت بتجذب ليها اصدقائها ومنهم شاب  اكبر من "تميمه" بسنتين  اسمه "امير" كان مساعد المخرج العرض المسرحى كان بيحضر عروض "تميمه" وكان بيتلكك ب اى حاجه ويتكلم معاها ولاحظت "تميمه" اهتمامه بيها وعجبها اهتمامه ,, ففى يوم "هشام" بيتصل ب "تميمه" كان بيدخل ويتنج كان بيستغرب لان دا مكنش بيحصل ,,اتصل تانى وتالت لغايه ما جمع الخط وردت "تميمه":
_ ايوه يا اتش
_ بتتكلمى مع مين كل دا انتى مش عارفه ان دا الميعاد اللى بكلمك فيه ؟
_ليه بتقفش كده ما انا لاحظت الويتنج وقفلت
_ كنتى بتتكلمى مع مين بقى ؟
_ ها ..
_ بتتكلمى مع مين ؟
_ دا زميل ليا فى الجامعه كان بيسألنى ع حاجه
_ نعم ,,جامعه ايه وانتى فى اجازه الصيف و مين دا ؟
_ امير ,,مساعد المخرج كان بيقولى ان بكره البروفه اتغير ميعادها 
_ كل دا البروفه ,,  استنى ,,مش دا اللى قولتيلى انك لما وقعتى شالك لصيداليه ؟
_ ايوه
_هو مساعد مخرج عروض ولا مساعد مخرج احاسيس
_ بص يا "هشام" علشان انا مش فاهمه فممكن انت تفهمنى ؟
_ ايه ؟
_ هو لما حد يهتم بواحده زياده عن بقيت اصحابها يكون ايه ؟
_  يكون شخص تافهه
_ بكلم بجد
_ ممكن يكون معجب بيها
_ بجد
_ وانتى فرحتى ليه كده ؟
_ اممم مش عارفه بس انا مبسوطه ب اهتمام "امير" ليا هو دا معناه ان انا كمان معجبه به
 سكت "هشام" ومن المفاجاءه مش لاقى رد عليها :
_ هشام انت معايا ؟
_ ايوه
_ انا كنت عاوزه احكيلك لما كنت هنا الاجازه اللى فاتت بس مكنتش متاكده من حاجه فقولت  هستنى لما ترجع الاجازه الجايه  واحكيلك اكون اتاكدت بس برضه مفيش حاجه واضحه  بس بما ان الموضوع اتفتح فقولت اقولك
_ يعنى انتى معجبه ب "امير" وهو معجب بيكى
_ هو متكلمش صراحه بس تصرفاته غريبه معايا عن باقى البنات و"اسيل" صاحبتى بتقولى هو معجب بيا
_ وانتى معجبه به ؟
_ انا بكون مبسوطه ب اهتمامه بيا بصراحه مختلف كده
 سكت "هشام" للحظات : "طيب يا "تميمه" انا هقفل دلواقتى لان فى ويتنج هكلمك تانى
قفل "هشام" وهو مش مصدق ان اول سنه ليها فى الجامعه  "تميمه"  اعجبت بشاب وبالسرعه دى وحست بخنقه ومكنش عارف يرد عليها ,, و "تميمه" فضلت قاعده تفكر وتدخل ع اكونت "امير" وتقرا البوستس اللى اغلبها تلميحات وتبتسم وتبص ع الساعه وتستغرب ازاى "هشام" متكلمش تانى وفى الاخر استسلمت للنوم  تنام ,,,!
_____________________
يتبع