الفراشة الزرقاء (13)

(13)

 وفاه "سميه" كان مفاجئ للكل ,,.الخبر كان صادم للجميع لانها كانت كويسه وبخير ومشتكتش ولامره ,, كانوا البنات واطفال الدار فى حاله حزن عميقه  و"هشام" كان مش قادر يهونها عليهم لانه موجوع اكتر منهم ,, والكل لاحظ رد فعل "تميمه" بعد مرور اسبوع من وفاه "سميه" قاعده وبتكمل دروس (الزومبا) والحجوزات واغلب وقتها بتتفرج ع التليفزيون مع "نرمين" وكانت بتقعد مع البنات  لكن كانت بتختلى بنفسها لوحدها فى قاعه التدريبات لوحدها تشغل ميوزك وترقص كتير لغايه ما تتعب وتقع ع الارض ترجع تدخل غرفتها تنام وكان يومها كده ,, محدش شافها بتعيط زى باقى البنات ولا بتشتكى ولا بتتكلم والحياه مستمره و"هشام" لما شافها كده فى يوم بعد ما اطمن ع البنات اتجه لمكان التدريب وزق الباب وشافها بترقص ولحظته ابتسمتله :
_ هشام ,, انت جيت امتى ؟
_ من شويا قولت قبل ما ارجع البيت اشوفكم لو محتاجين حاجه
_ لا تسلم كل حاجه هنا تمام ,,انت عامل ايه  ؟
 قرب منها "هشام" وبيبص فى عينيها وهى مبتسمه : انتى اللى عامله ايه ؟
_ انا تمام وزى الفل اهو
_ "تميمه" ,, هتفضلى كده ل امتى ؟
_ مش فاهمه ؟
_ كاتمه الوجع والدموع جواكى ,, عيطى وخرجى كل حاجه جواكى
 بصتله "تميمه" ولاحظ "هشام" دموع فى عينيها متجمده : ومين قالك انا لو عيطت هرتاح  او هيغير حاجه ,,
خرجت "تميمه" وقعدت ع الارض فى الحديقه  وقعد جنبها "هشام":
_ طيب احكيلى وقوليلى حاسه ب ايه علشان اساعدك
ابتسمت "تميمه": "هشام" انت اللى فيك كفايه وعاوزاك متقلقش عليا ,, هقولك حاجه  انا كنت متوقعه  اللى حصل دا يحصل فى يوم يعنى ممكن تقول متفاجئتش اوى ,,  و"ماما سميه" او بابا "جلال" الاتنين ميستاهلوش اننا نعيط ونهدم كل اللى عاشوا يعملوه لينا ,, هما حطوا الاساس احنا نكمل حياتنا  ومنسمحش لا لحزن ولا وجع يأثر عليا  وانا مش هسمح للحزن يسيطر ع حياتى  
_ المهم انك بخير
_ الحمد الله .. طمنى عليك انت اخبارك ايه والشركه ؟
_  لغايه دلواقتى كله تمام
_ يعنى ايه ؟
_ متشغليش بالك المهم خلى بالك من البيت والبنات وانا ههتم بالدار
_ هو البيت والدار مين هياخدهم ؟
_ انا بعت ل بنات خاله ماما "سميه" واعلمتهم يعنى لانهم الورثه  الشرعيين ليها
_ طيب واحنا ,,
قاطعها "هشام": عاوزك متقلقيش لا انتى ولا البنات البيت دا بيتكم ومفيش حاجه هتتغير ,,طمنيهم واطمنى ..
 لاحظت "تميمه" قلق فى عيون "هشام" ومحبتش تضغط عليه ابتسمت : تمام ...!

فى يوم نزلت "نضال" مصر وكانت فى حاله صعبه جدااا ,,قابلها "هشام" فى المطار واول ما شافته حضنته وانهارت فى البكاء ,, طلبت منه تروح البيت عنده وقفت قدام الباب رجلها مش قادره تتحرك تدخل قعدت ع الارض وانهارت فى العبكاء و"هشام" بيحاول يهديها ,, حاول "هشام" يدخلها البيت ودخلت ع غرفه "سميه" وافتكرت لحظاتها مع "سميه" وضحكهم وكلامهم مع بعض وطلبت من "هشام" يسيبها ويخرج ,,خرج وقفل الباب وهى واقفه باصه ع السرير مكان "سميه" قربت لمست المخده والسرير وحطت ايديها ع صدرها ودموعها نازله ,,حضنت المخده وغمضت عينيها ,, بعد ساعات قلق "هشام" انها مخرجتش فتح باب الغرفه بهدوء وشافها نايمه ,,, اتصل "هشام" ب "تميمه ":
_ ايه يا "هشام" ايه الاخبار ؟
_ من وقت ما جت وهى عماله تعيط ومنهاره ودخلت اوضتها ونامت
_ صعبه عليها الموقف صاحبه عمرها  بس ليه نزلت وهى تعبانه
_ انا اتكلمت مع اونكل "اشرف" قالى لما هى عرفت الخبر دخلت المستشفى  واول ما فاقت صممت تنزل مصر حاول يمنعها مرضتش وحجزلها ونزل معاها
_ ربنا يصبرها
_ يارب ,, انت اخباركم ايه ؟
_ الحمد الله متقلقش علينا
_ "تميمه" انا تايهه الفتره دى وحاسس انى بعيد عنكم لكن كل حاجه داخله فى بعض و ..
قاطعته"تميمه": متقولش حاجه يا "هشام" احنا عارفين ومقدرين وبقولك متقلقش علينا ركز انت فى شغلك ومشاكلك

قفل "هشام" مع "تميمه" وقعد فى الليفنج بعد مرور 5 ساعات خرجت "نضال" من الغرفه وشكلها تعبانه شافها "هشام" :
_ طنط انت تعبانه نروح المستشفى
_ لا انا عاوزه اروح اشوفها يا "هشام"
_ حاضر
 بدموع نازله من عينيها : عاوزه اشوفها ,,انا قلبى وجعنى اوى انى مودعتهاش يا "هشام" عاوزه اروحلها
_ حاضر .الصبح نروح مع بعض حاضر ادخلى ارتاحى انتى
  وهى داخله الغرفه : وهشوف الراحه فين وهى اخدت كل حاجه حلوه معاها وسابتنى
 تانى يوم اتجهوا للمقابر واول ما دخلت قرات الفاتحه و"هشام" حط كرسى وقعدت باصه لقبر "سميه"  طلبت من "هشام" يخرج ويسيبهم مع بعض :
_ "سميه" يا نص عمرى اللى عشته ,, يا احلى ايام عشتها ,, يا كل لحظه ضحكت من قلبى كانت معاكى ,, يا كل حزن فى قلبى كنتى بتشيليه ,, دلواقتى مين هيحس بيا بعدك يا "سميه" ,, مين لما اتخنق واحس ان الدنيا قفلت عليا يفتحلى باب النور ويخرجنى ,, لما قولتيلى معندكيش حاجه تعيشها لحد مكنتش اعرف انك بتقوليلى انك ماشيه ,, (حط ايديها ع صدرها) قلبى مش قادر يستوعب يا "سميه" انك مش هتكونى موجوده ,, مكنتش اتخيل انك هتمشى بالسرعه دى ,, استحملتينى كتير ولا عمرك زعلتى منى ,, كده فجاءه تسيبنى لوحدى وانتى كنتى اهلى وناسى كنتى انا , كده تاخدى منى روحى معاكى ,, الله يرحمك يا اغلى واطيب انسانه قابلتها ومش هقابل غيرها ,,, ربنا يجعل بالايام واقابلك وتاخدينى فى حضنك ,, الله يرحمك  ويرحمنى ويصبرنى ربنا ع فراقك يا غاليه ..
 مسكت "نضال" مصحف وفتحته تقرا منه كتير ودموعها نازله ,,قرب الغروب ومشيت مع "هشام" اتجهوا لبيت البنات وقعدت معاهم وعينيها ع "تميمه"  اتكلمت معاهم واطمنت عليهم وسابتلهم مبلغ مع "هشام" ليهم وهى ماشيه كانت "تميمه" بتوصلها للعربيه مسكت ايديها "نضال" وبصتلها :
_ تميمه ..
_ ايوه
_ انتى عارفه انتى كنتى اقرب بنت ل "سميه" كانت معتبراكى بنتها كانت بتحبك اوى ,,  ممكن طلب ؟
_ اتفضلى طبعا
 _ ابقى اسئلى عليا مش عاوزه احس ان صلتى ب "سميه" اتقطعت ,,لما بشوفك بحس انى شايفاها ممكن
_ اكيد طبعا
_ واى حاجه تحتاجيها اى حاجه كلمينى انا متقوليش ل "هشام" معاكى رقمى اتصلى بيا
_ حاضر
 ركبت العربيه ومشيت و"تميمه" اتنهدت واتجهت لملجاءها حطت السماعات فى ودانها وابتدت ترقص ,,,!

 مر شهور ع وفاه "سميه" فى  يوم "رجاء" نزلت مصر وكانت فى الشركه واتجهت لمكتب "هشام" علشان تقابله :
_ ازيك يا حبيبى عامل ايه ؟
_ الحمد الله يا عمتو بخير
_ انا عارفه صدمه فراق "سميه" كانت مفاجاءه للكل والله الله يرحمها
_ الله يرحمها
_ وانت دلواقتى عامل ايه اقصد عايش ازاى ومع مين ؟
_ لوحدى فى البيت من البيت  للشغل ومن الشغل للبيت
_ يعنى مبتروحش الدار ولا فيلا الشيخ زايد
_ لا بروح لما يحتاجونى لان الفتره دى مضغوط بسبب مشروع الشركه داخلاه فواخد تركيزى
_ اهاا .. الله يعينك يا حبيبى ..عرفت ان قرايب" سميه" بنات خالتها  نازليين كمان شهر من لبنان علشان يستلموا الميراث
_ ايوه
_ ياترى هيعملوا ايه فى الدار والفيلا ؟
_ هيعملوا ايه اكيد هيسيبوهم زى ماهما
_ انت سألتهم ,, وبعدين انت عارف سعر المتر فى المكانين دول ايه ؟ مين المجنون اللى هيسيب فلوس دى كلها تترمى ع الارض
_ اعتقد يعنى هما سنين مكنوش بينزلوا مصر ومهتمين مش هيفرق معاهم فلو هيبعوه انا هشتريه منهم
_ وانت معاك فلوس تكفى الاتنين انا ع مااعتقد المشروع الجديد  واخد  رصيد كبير دا غير القروض
_ هدبرها ان شاء الله
_ انا ممكن اساعدك لو حابب
_ بجد يا عمتو
_ اه طبعا لانى حاسه انك عاوز تحافظ على الدار والفيلا
_ اى حاجه عاوزاها هعملها ؟
_ "رانيا" بنتى ,, انت عارف هى بتحبك من زمان وانت مش مهتم بيها ,, انا هدفعلهم المبلغ واشتريهم الدار والفيلا وهيكونوا زى ماهما مش هغير فيهم حاجه لكن المشترى هتكون "رانيا" بنتى وانت هتكون جوزها فطبيعى فلوسكم واحد وكده هتكون حافظت ع الاتنين ,,ايه رايك ؟
 _ انا لو فكرت فى الجواز مش دلواقتى انتى مش شايفه الظروف ؟
_ ظروف ايه عمك مات من سنتين و"سميه" مر اكتر من 6 شهور ,, ومينفعفش تعيش فى حزن الحياه مستمره
 ابتسم "هشام":  ولو رفضت عرض الجواز ؟
_ هشتريهم برضه ب اسم "رانيا" لكن المرادى ملكش حق تعترض ع اللى هيحصل فيهم يعنى خليتهم بيعتهم فضيتهم كده يعنى  ,,لانى ببساطه مش هقبل ولا هوافق ان حكايه "جلال" و"سميه" تتكرر تانى لكن ب اسمين مختلفيين "هشام وتميمه" ,,,
_ عمتو انتى بتقولى ايه  ,, ؟
_ مش انا يا حبيب عمتو اللى بقول ,,العيله كلها اللى بتقول اهتمامك بفيلا الشيخ زايد والفلوس اللى كانت بتتصرف على اللى هناك ,, "هشام" انت مش  ابن اخويا انت ابنى  يعنى دمى وانا مش هخليك تغرق نفسك زى" جلال "..
_ ومين قال انا هتجوز "تميمه" ؟
_ عينك وانت بتقول اسمها بتقول انك بتحبها وعاوز تتجوزها وانت بالنسبالها فى الظروف دى بالذات  لقطه ولو محصلش الجواز دلواقتى شور هيحصل بعدين ,, ف ليه بقى اسيب بعدين وانا اقدر اقفل ع الموضوع من دلواقتى  ايام "جلال" ملحقتش ومش هسمح يتكرر تانى وفلوسنا تتبعتر يمين وشمال كده
_ عمتو انا مش هسمح ل اى حد يدخل فى حياتى  و ..
قاطعته " لا يا "هشام" بتدمر حياتك هدخل لانى عمتك  وانت ابنى واكتر واحده تخاف عليك  وبحبك ولا انت عاوز تبيع اهلك كلهم مقابل واحده لا ليها اصل ولا عيله هتكونوا انتم الاتنين ايتام ,,
 اتعصب "هشام": عمتو ..
_ خلاص بلاش تتجوز "رانيا"  لكن اتجوز اى حد تانى الا "تميمه"  الا "تميمه" انا مش هسمح اعيش تانى مع "سميه",, فكر ورد عليا لكن متتاخرش عليا ...
 خرجت" رجاء" و"هشام" فى حاله ذهول من كلام  "رجاء" والتفكير اللى سيطر عليه انه يتكلم مع قرايب "سميه" ويشترى منهم قبل "رجاء" لكن المهم الفلوس هتتدبر ازاى  ....!


 قرايب" سميه" اتكلم معاهم "هشام" وحددوا السعر وكان مبلغ كبير ومكنش معاه المبلغ دا بسبب المشروع  فطلب فتره يدبر المبلغ  وحاول ياخد قروض لكن  كان صعب ,,, جهز نص المبلغ  واتصل بيهم وعرف انهم مش نازليين وانهم وكلو محامى يخلص الاجراءات ف اتصل بالمحامى   وقابلوه :
_ انت بتقول ايه ؟
_ بقول لحضرتك ان البيعه تمت والفلوس وصلتلهم من اسبوع
 متفاجى "هشام": مين اللى أشترى ؟
_ مدام "رجاء عامر "
 اتصدم "هشام" لما عرف  ان الدار والفيلا بقوا تحت رحمه "عمته رجاء"  كان فى قمه الغضب اتصل ب عمته :
_ اشتريتيهم يا عمتو
_ كده كده كانوا هيتباعوا وهما مستعجليين فقلت انا  احسن ما الغريب يشتريهم وهما طلبوا فلوسهم كاش  وانت البنك رفض يديك قرض بسبب قرض المشروع  والمبلغ اللى معاك ربع اللى طلبوه ,,فمتقلقش هما موجودين لكن قرارك هيحدد هعمل فيهم ايه ؟
_ عمتو . انا عاوزك تعرفى انا   لا هتجوز "تميمه" ولا غيرها ,, ارجوكى خلى كل حاجه زى ماهى
_  ومين قال انا هغير حاجه انا بس هصلح اوضاع  مش صح
_ مش فاهم ...؟
_هتعرف بعدين ,,
قفلت "رجاء" و "هشام" مش عارف ايه فى دماغها ... خبر ان "رجاء" اشترت الفيلا والدار محدش عرفه لسه ,, ففى يوم  كانت "تميمه" و"نرمين" قاعدين  بيتفرجوا ع التليفزيون  مع بنتين تانين كلهم ملامحهم متغيره وصمت هو سيد الموقف و "تميمه" فاصله عنهم بسماعات الهاند فرى فتحت عينها وقامت خرجت قعدت فى الحديقه الخلفيه نامت ع الارض وباصه للسما  ,, ,, تانى يوم الصبح اتجهت "تميمه" للدار تطمن ع الاطفال فى الوقت دا اتجهت "رجاء" ,,, البنات قاعدين جرس الباب رن فتحت "نرمين" الباب  ,,, وكانت" رجاء " ودخلت وقعدت وقدمتلها "نرمين" عصير وقعدت هى و 4 بنات  :
 "رجاء" بتبص على الفيلا : امممم ,, جميله جميله
 ب ابتسامه ردت "نرمين"  : ماما "سميه" اللى وضبتها كده
_ الله يرحمها مكنتش تعرف ان عمرها قصير
_ الله يرحمها
  مسكت العصير واخدت شفطه : ماشاء الله ايه الجمال دا
 ابتسمت "نرمين" : عجبك بجد ؟
_ جدااا ,, واضح انك شيف محترفه ,,  الطلبات كويسه ع مشروعك الصغير دا
_ اه الحمد الله
_ يا بخته اللى هيتجوزك هيربرب زيك كده
 ضحكت "رجاء" والبنات و "نرمين" ضحكت نص ضحكه
 حطت العصير وبصت ع البنات :
_ فين "تميمه"؟
_ فى الدار انهارده هتقضى معاهم اليوم وهترجع بليل اكلمها تيجى
_ لالا خليها لبعدين ... المهم يا بنات انتوا  ناويين تعملوا ايه ؟
_ فى ايه ؟
_ اقصد يعنى انتم كنتم 10 ,, اتنين منكم اتجوزو و 2 سافروا واستقروا بره ومفضلش غيركم انتم 6 ,, خططكم المستقبليه ايه ؟
 ردت "هناء": احنا مكناش بنخطط ل اى حاجه ماما "سميه" كانت هى اللى بتعملنا كل حاجه
_ يا حبايبى .. انا عاوزاكم تعتبرونى زى ماما "سميه" بالظبط ..  انا لما اشتريت الفيلا ....
 اتفاجئوا ان "رجاء" اشترت الفيلا وتفكيرهم انها هتطردهم ردت "نرمين": هتمشينا من هنا ؟
_ لالالا امشيكوا فين  انا لما اشتريت الفيلا مسؤليتكم فى رقبتى انتم ايتام وملكمش حد متخافوش ومتقلقوش من حاجه انا مجهزالكم ترتيب لحياتكم هيعجبكم جدااا
 ردت "نرمين": ازاى يعنى ؟
ابتسمت "رجاء" هدخل الفرح بيتكم ولا انتم هتقضوا حياتكم فى حزن اللى مات الله يرحمه
_ يعنى ..؟
 _ فى عريس جى ل "سلوى"  بكره ,, شاف صورتها  وهى موافقه
 بصت "نرمين" ل "سلوى": امتى دا حصل ؟
 ردت "هناء": انا اتكلمت معاه وعرفتها
_ انتى يا "هناء"
 ردت "رجاء": راجل محترم وهيصونها ,, جى بكره يتفق ع الفرح كمان اسبوع
اتفاجئت "نرمين": اسبوع وهى هتعرفه فى اسبوع ؟
 بصتلها "رجاء": ايوه ,, ولا هستنى سنتين تلاته يحبوا بعض ,,دا جواز
 قامت وقفت "رجاء": انتى بقى يا "نرمين" ب ايدك الحلوه دى هتعمليلنا احلى عشا وحلويات وعصير من دا روعه ,,عاوزاكم تشرفونى يا بنات ,,اشوفكم بكره ,,,
 مشيت "رجاء" ودخلت "سلوى" و "هناء" غرفتهم و"نرمين" قاعده مش فاهمه حاجه ... بليل رجعت "تميمه" ع البيت  واتفاجئت ب ان البنات فى غرفهم و"نرمين" فى المطبخ ,, دخلت المطبخ وشافتها :
_ بتعملى ايه متاخر كده اتفجعتى  ؟
_ "تميمه" شوفتى اللى حصل ؟
_ ايه يا رويتر
_ هيبقى عندنا فرح قريب
اتفاجئت "تميمه":  فرح مين ؟
_ البت سلوى جايلها عريس ووافقت حتى من غير ما تشوفه موافقه وبكره جى يشوفها وتشوفه  ولو عجبته هيتجوزوا فى خلال اسبوع
_ خلال اسبوع ليه ؟
_ علشان هو مسافر شغال فى الاسكندريه هتروح تبلبط هناك
_ وجى منين دا ؟
  حكت "نرمين" ل "تميمه" ع "رجاء" وانها بقت مالكه الفيلا الجديده وانها هى اللى جابت العريس ل "سلوى ":
_و"سلوى" قالت انها موافقه من غير ما تشوفه ؟
_ مش فارق معاها هى عاوزه تخرج من هنا وخلاص
 سكتت للحظات "تميمه": قوليلى بقى اعمل التورته شوكولاته ولا كريمه ولا فروله ولا نص ونص ولا ...
 و "نرمين"  بتتكلم اتفاجئت ان "تميمه" قامت :
_ رايحه فين ؟
_ كملى العك دا  دا وجايه
 طلعت" تميمه" على غرفه "سلوى" خبطت ودخلت وشافت "هناء" معاها وبنتين تانين  :
_ "سلوى" ممكن 5 دقايق بس
خرجوا البنات ميلت عليها "هناء" : متخليهاش تقنعك ترفضى دا لقطه يابنتى كفايه هتخرجى من هنا بدل ما تترمى فى الشارع
 خرجوا البنات وبنبره هاديه :
_ سمعت ان فى عريس جايلك انهارده ؟
_ ايوه ,, مدام "رجاء" قالتلى انه عجبته الصوره وجى علشان يقعد معايا
_ وانتى موافقه فى المطلق كده مش تقعدى معاه وتشوفى مناسب ولا حتى ؟
_ اشوف يا" تميمه" ,, اشوف ايه هو انا ولا انتى ولا اى بنت هنا لينا حق نختار احنا مجبرين على الاقل هى سالتنى  ووافقت
_ ايه اللى بتقوليه دا يا" سلوى" ,, انتى انسانه وليكى حريه الاختيار اكيد  وترفضيه او تقلبيه دا يرجعلك لكن بالعقل شوفيه واتكلمى معاه الاول  مش توافقى كده ..
_  مش مستاهله كلام يا "تميمه" انا عاوزه اخرج من هنا وكل ما كان بدرى كل ما كان احسن
_ مش فاهمه
_ مش فاهمه ولا عامله نفسك مش شايفه بعد وفاه بابا "جلال" الدنيا اتغيرت وبعد وفاه ماما "سميه" كل حاجه اتغيرت ,,  مش هيسيبونا نقعد هنا طول العمر ,, اللى كانوا مهتمين بينا ماتوا خلاص يا "تميمه" احنا ايتام يا "تميمه" ملناش حد والصح اللى يلاقى طوق نجاه يمسك فيه قبل المركب ما تغزق
_ ومين قال اننا هنغرق ؟
_ البيت دا هيتباع يا "تميمه" ..انتى فاكره "رجاء" اشترته علشان تاخد ثواب ,, لو رفضت العريس هتطردنا بره ,, ع الاقل العريس دا رضى بيا بظروفى  ومكان هقعد فيه وهيكون بيتى
_ سلوى
_ خلاص يا "تميمه" انا بدعى دلواقتى انه يوافق عليا هو دا همى دلواقتى
 طريقه واستسلام "سلوى"  ضايقت" تميمه" ولسه هتكمل كلامها  ندهت على البنات ودخلوا علشان يساعدوها فى اللبس والميكب وخرجت "تميمه" وهى رافضه اللى بيحصل لكن صاحبه الشأن مستسلمه  ,, نزلت المطبخ وساعدت" نرمين" وكانت سرحانه وبتفكر فى كلام "سلوى " خلصت وطلعوا غرفتهم  ,, نامت ع السرير "تميمه" بتفكر فى اللى حصل فسمعت صوت "نرمين" :
_ توما
_ ايوه يا نرمو
_  هو لو اتجوزنا يبقى احسن ؟
_ احسن من اى اتجاه ؟
_ استقرار وحياه بدل مااحنا قاعدين ع كف عفريت كده ؟
قامت قعدت ع السرير : انتى خايفه يا "نرمين" ؟
قعدت "نرمين "ع سريرها :انا مرعوبه اصحى فى يوم يقولولنا اخرجوا من هنا وانا معرفش هروح فين ولا هعمل ايه انا معرفش غير الاكل وهنا انا معرفش الشارع فيه ايه يا "تميمه"
_ نرمين ,, الجواز مش حل,,  لما تقررى تتجوزى اختارى الشخص اللى تعيشى معاه متقبلك كلك بظروفك وانتى تكونى مطمنه معاه مش مجرد جواز وتخلفى ومتعرفيش اصلا هو متجوزك ليه وتتفاجئ به بعد الجواز ومتعرفيش تسبيه
_ ماهو لو مطلعش كويس يبقى اتجوزت وخلفت  هكون اسره وهعيش احساس الاسره اللى اتحرمت منه مع اولادى امان يعنى
_ امان ازاى وانتى مش هتكونى مطمنه وبعدين  لو طلع زوج مش كويس واهله مش كويسين فرضا  تعيشى انتى وولادك فى حياه نكد وغير سعيده ,, انتى جايباهم للدنيا يتعذبوا مش كفايه اهلك اللى جابوكى زى اهلى اللى جابونى ورامونا وسابونا بنتعذب كده ,,انتى ترضيها ل ولادك  يعيشوا نفس الحياه دى ,,
سكتت "نرمين": ما ممكن يكون كويس
_ لو كويس مفيش مشاكل يا حبيببتى المشكله انك متعرفيش هو كويس ولا لا ودا بيبان من التعامل ,,, اى بنت طبيعيه اهلها بيسالو كتير ع العريس والبنت ليها حريه الاختيار بتقعد معاه مره واتنين وتلاته وتقرر مش نستسلم ونوافق لمجرد اننا نهرب ونلحق نفسنا  احنا نفرق عنهم ايه ..اعرفى كويس  احنا لينا حق نختار نكون مع مين,, مين يقربلنا ,,مين يكون اب اولادنا لان ببساطه احنا مش عاوزين نكرر اللى عشناه مع اولادنا ..بلاش نكون انانيين ونختار حلول لينا ويكون اولادنا ضحيه زواج فاشل يتعذبوا فى المستقبل  ,,
 قامت "نرمين " ونامت وحضنت "تميمه ":
_ "تميمه" مهما حصل متسبنيش ,, انا مش عاوزه اكون لوحدى متسبنيش لوحدى يا "تميمه"
_ اسيبك بس واروح فين ,,احنا مصيرنا اتكتب مع بعض وهنفضل مع بعض متخافيش
_ انا بحبك اوى يا "تميمه"
_ وانا كمان داانتى اللى بتاكلينى يا شيخه
ضحكت "نرمين" : كان ايه رايك فى سلطه البتنجان تحفه
ضحكت "تميمه":  كنت هرجع اه بس تحفه
_ اخص عليكى يا رخمه
_ عكى يا حياتى وانا اكل
 حضنت تميمه  نرمين وناموا وهما فى حضن بعض وضحكوا و"تميمه" طمنت "نرمين" لكن هى كانت قلقانه من بكره ومحبتش تقلقها معاها فطمنتها ان كل حاجه هتكون بخير  ...!

تانى يوم ابتدت "نرمين" تجهز فى الحلويات وساعدتها البنات وكانت "تميمه" بتبص على" سلوى" وردود افعالها وشايفاها مبتسمه وسعيده شكلا لكن من غير روح ,, روحها منطفيه ,,  بعد ساعات قليله وصل العريس وكانت المفاجاءه شكلا اكبر من "سلوى" 20 سنه   شعره ابيض وباين عليه مدخن شره لانه داخل بالسيجاره ولما قعد واتكلم  طريقته مش لطيفه وعرفوا انه عايش لوحده  مع مراته  المريضه بشلل مبتتحركش وعنده طفليين وان "سلوى" هتعيش معاهم فى شقه فى بيتهم مع مراته وهتكون فى شقه لوحدها  معززه مكرمه ,, "رجاء" وافقت ع كل كلامه و"سلوى" ساكته وباصه ع الارض و لكن "تميمه" حست ان فى حاجه غلط واستسلام "سلوى" دا غلط كانت هتدخل فى الكلام ,, فوجهت "رجاء" سؤالها ل "سلوى ":
_ ها يا عروسه نقرا الفاتحه
 هزت راسها "سلوى" بالقبول : نقرا الفاتحه
 الكل  رفع ايده يقرا الفاتحه الا "تميمه" واقفه فى حاله من الذهول للحظه اتمنت "سميه" تكون موجوده كانت هتوقف المهزله دى وتطمن "سلوى"  ,, مشى العريس  و "رجاء" وقعدت مع" سلوى" مكانها متحركتش قعدت جنبها "تميمه" :
_ "سلوى ",,انتى بجد موافقه عليه ارتاحتيله؟
_ المهم هو ارتاحلى ودا المهم عندى
 ردت "تميمه" بعصبيه : "سلوى" دى حياتك مينفعش الا مبالااه والاستسلام دا انتى فاهمه بتعملى ايه ؟
_ مفيش لا مبالااه يا "تميمه" ,, هو شافنى وعجبته وانا موافقه فيها ايه دى ؟
_ انا شايفه انه مش مناسب ليكى ,, لا شكلا ولا مضمون ولا مستقبل دا اكبر منك ب 20 سنه لا انتى تستاهلى حد احسن
_ وهيجى منين الاحسن يا "تميمه " ,, خليكى واقعيه وبصى حواليكى احنا لوحدنا مفيش حد معانا ,, مين اللى هيوافق على واحده فى ظروفى ملهاش اهل وقاعده فى بيت مع بنات زيها عايشه ع التبرعات ,, عيله مين اللى توافق انى ادخل فيها وب اختيارى ,, انتى نسيتى اللى حصلك فى الجامعه لما كنتى معجبه ب الشاب اللى كان معاكى عرف بس انك يتيمه سابك من غير ما حتى يتكلم معاكى ,, "تميمه"  كتر خيره انه قبلنى كده وراضى ...
_ غلط تفكيرك دا يا "سلوى" ,, انا اختارت غلط وفكرت غلط  وقتها وفهمت غلطتى ومش هتتكرر ,, احنا منفرقش عن اى حد ,, متقلليش من نفسك كده ,,انتى فيكى حاجات مش عند غيرك مينفعش تستسلمى لظروف اتفردت عليكى
_ لا صح يا "تميمه" لان وجودنا هنا مش دايم ,, احنا مش زى بنات العائلات تقعد فى بيت اهلها براحتهم احنا قاعدين ومش عارفين هنمشى امتى .. انا صح انتى اللى خياليه  انزلى ع ارض الواقع وعيشى حقيقتك انك لوحدك ,,
_ سلوى
_ "تميمه" خلاص دا اخر كلام ولو بتحبينى افرحيلى ع الاقل اكدبى عليا لانى مش هرجع فى كلامى ...
 قامت "سلوى" و"سميه" و"تميمه" من ضيقه "تميمه" ومحدش قادر يسمعها ويفهمها وسمعت الكلام نفس البنات ان وجودهم مؤقت وهيتطردوا فى اى وقت وملهمش حد   وانهم مستنين دورهم فى الجواز زى ما وعدتهم "رجاء" ,,دخلت على قاعه تدريبات "الزومبا"   وشغلت ميوزك وابتدت ترقص حركات عنيفه  بتحاول بتهرب من اللى بيحاوطها من افكار وخوف وتاكد ع انها صح وهما الغلط ,, كان فى الوقت دا "هشام" كان مسافر ورجع عليهم عرف موضوع العريس وحاول يتكلم مع "سلوى" لكن هى مصممه  وسأل عن "تميمه" وعرف مكانها واتجهه ليها ولحظها "هشام "  بترقص حركات عنيفه وخاف تأذى نفسها  راح مسكها ووقفها :
_ "تميمه" ..
_ "هشام"
_ مالك ايه مضايقك كده ؟
_ مفيش اناحبيت ادرب بس
_ يعنى انا مش عارف الفرق بين التدريب وبين الصراع
_ صراع  ؟
_ ايوه  الحركات العنيفه دى اللى لما تكون مضغوطه بتحاولى تهربى بيها وكذا مره اقولك هتأذى نفسك كده ... فى ايه مالك ؟
 مسكت ازازه المايه : انا خارجه عاوزه اشم هوا
_ يلا بينا
 قعدوا فى الحديقه :
_ ايه اللى مضايقك كده بقى كل دا علشان "سلوى" هتتجوز وتمشى ؟
_ مش حكايه هتتجوز وتمشى حكايه انها فكرت غلطت لا اقتنعت بالعريس اللى اكبر منها ب 20 سنه ومجرد انه عاوز واحده تغسله هدومه وتعمله اكله علشان مراته مريضه  الله يشفيها  مش معترضه على مراته المريضه بالعكس لكن هى استسلمت ما اختارتش هى مدورتش على حياه تعيشها هى استسلمت لخوفها  ,, هى ليها حق تختار وتقبل او ترفض مش ترمى نفسها كده  ,,
_ انا حاولت اتكلم معاها لكن  هى مقتنعه بكده ...
_هى مش مقتنعه  هى خايفه ,, وشايفه ان الجواز اسلم حل ليها ,,انا عارفه اننا زى اللى قاعدين على قنبله فى اى وقت هتفرقع لكن  دا مش سبب يخلينا نخسر حياتنا كده ,,
_ مش فاهم ؟
_ كلنا عارفين ان عمتك "رجاء" مبتحبناش وفى اى وقت سهل تقولنا يلا بره ,, مكنش فى حد بيحبنا غير بابا "جلال" و ماما "سميه" وانت ,, الكل شايف ان البيت دا عقبه كبيره وخساره ليهم ,,
_ فرضا لو كلامك دا بجد يبقى تفكيرها هى والبنات صح والجواز حل
_ لا عمر الجواز  ما كان حل,, لو كان حل كنت وقفت معاها وشجعتها لكن دا هروب وبترمى نفسها فى مجهول هى حتى مفكرتش فيه ,,
_ وانتى ... لو حد عرض عليكى الجواز هتوافقى ..؟
_ لا طبعا
_ لا طبعا
_ ايوه انا لا هتجوز هروب ولا خوف انا قرار الجواز هيكون ب ارادتى واختيارى واكون مقتنعه ,,هتجوز يعنى ابنى حياه مع شخص نعيشها مع بعض نبنى حياه ل اولادنا احسن من اللى عشتها  ,,وبعدين ازاى اتجوز واخلف ولاد انا نفسى مش هكون سعيده وتايهه ,, هو العالم ناقص بؤس علشان ازوده
_ ما يمكن يكون بيحبك ومش هيحسسك بكده
_  الله اعلم
_ يعنى انتى مش عاوزه تتجوزى ؟
_ انا عاوزه اطمن لما هطمن وقتها قرار الجواز هيكون تلقائى خالى من خوف ولا هروب ولا انى استغل او اظلم اللى معايا ولا اظلم ولادى فى المستقبل ,, حاليا انا محتاجه اطمن نفسى اكتر ما محتاجه حد فى حياتى ....!

قامت "تميمه" ودخلت البيت و"هشام" اتنهد تنهيده عميقه وبص للسما وحس انه كل ما بيقرب خطوه بيحصل حاجه ترجعه خطوتين ...!

 مر الاسبوع وتمت جوازه "سلوى" وبعدها ب شهريين جه عريس تانى لبنت تانيه اسمها " ابتهال " والعريس المرادى كان مختلف عن عريس "سلوى"  ,, مطلق اكبر من "ابتهال" ب 4 سنين شغال محاسب فى البحيره  محترم ولبق فى كلامه شكلا مقبول وووافقت "ابتهال" رغم اعتراض "تميمه" ع ان الجواز تم فى اسبوعين,, مر فتره والبيت صفف ع "هناء" و "نرمين" و "تميمه" وبنت تانيه ,, بعد فتره البنت الرابعه "هدى"  اتقدملها عريس عن طريق "رجاء" ووافقت لكن الجوازه كانت هتم بعد 6 شهور لانه مسافر وكل اللى شافته صوره وهتتجوز بتوكيل وتسافر  ,,,, ,,, اللى لحظته "تميمه" ان ولا واحده من البنات مبسوطه ولا عاشت سعاده العروسه متعملهمش فرح كتب كتاب ومشيوا وهما وافقوا ع كده حتى الفستان الابيض واحده بس منهم اللى لبسته,, فقدت "تميمه" الامل فى اقناعها ترفض لانها هتكون زوجه رقم 3 وهتعيش بره مصر ,,رفضت البنت تسمعلها ولاحظت ان "هناء" كانت بتقنع البنات يوافقوا ,,, ففى مره و"هناء" بتتكلم فى الموبيل بره البيت سمعتها "نرمين " :
_ ايوه يا مدام" رجاء" كل حاجه تمام متقلقيش انا واخده بالى من كل حاجه بتحصل  ولو فى جديد هعرف حضرتك
 قفلت ولفت شافت فى وشها "نرمين ": انتى يا "هناء" شغاله جاسوسه علينا لمدام "رجاء" وانا اقول هى عارفه كل حاجه ازاى ولا اكنها عايشه معانا فى البيت .. انتى يا "هناء"
 _ فى ايه يا "نرمين" هو انا عملت ايه يعنى ما كانت "تميمه" بتنقل اخبارنا ل ماما "سميه" فرقت عنها ايه انا ,,مش "رجاء" هى صاحبه البيت اللى احنا فيه دا حقها تعرف كل حاجه
_ اه "تميمه " كانت بتقول اخبارنا لماما "سميه" لكن مكنتش بتفتن علينا  ,,كان لو فى مشكله كنا بنحلها مع بعض ,, لو واحده فينا عاوزه حاجه كنا بندبرها مع بعض ,, مش ننقل حتى اكلنا ايه وتقلل من الميزانيه وبتقول اصراف وبقت تاخد نص ايراد اى شغل بيجيلى انا و"تميمه"  ماما "سميه" عمرها ما عملت كده ,, مينفعش تقارنى بينها وبين "ماما سميه" يا "هناء"
_ الله يرحمها بقى ... "نرمين" اقولك نصيحه اخت ,, انسى اللى فات لان اللى جى مختلف خالص 
_ مش فاهمه ؟
_ من الاخر  متسمعيش ل "تميمه" اوى كل واحده فينا بطولها لا معانا حد ولا هيكون ورانا حد ,,متعتمديش عليها لانها اول ما تجيلها الفرصه هوب مش هتلاقيها وهتلاقى نفسك لوحدك زى البيت دا كان مليان بنات واتبخروا  ,, دورى ع مصلحتك بنفسك ,,
_ وانتى دورتى ع مصلحتك ؟
_ ايوه مدام "رجاء" وعدتنى هتشوفلى شغل فى مكان كويس وهمشى من هنا قريب
_ هتسيبى البيت اللى عيشنا فيه ,,هتسيبى بيتنا
_ فوقى كده بيتنا ايه ,, البيت دا بيت مدام "رجاء"  وقريب اوى البيت دا هيفضى وهتبيعه تستفاد به ,,دورى ع مصلحتك والحقى نفسك قبل ما تغرقى واللى هتغرقك "تميمه " ..
 سابتها ومشيت "هناء" ووقفت "نرمين" للحظه تراجع كلام "هناء" حست بخوف ورعب وقفت بصت ع البيت فجاءه قلبها اتقبضت بصت ع الشارع خافت اكتر واقفه مكانها متصلبه شافتها "تميمه" حط ايدها ع كتفها : نرمو
 اتفزت "نرمين" وبصت ل "تميمه" : تميمه
_ مالك فى ايه ؟
_ انتى هتسبينى يا "تميمه" وابقى لوحدى
 شافتها جسمها بيرتعش مسكت ايديها وكانو تلج : مالك ايه حصل ؟
 بدموع نازله من عينيها : هتسبينى يا "تميمه" انا معرفش حد ومليش حد غير هنا ,, انا هموت لو خرجت بره لوحدى يا "تميمه" هتسبينى لوحدى ها ..ها ؟
 حضنتها "تميمه" وشايفاها بتعيط وباين عليها الخوف : اهدى ,, اهدى ,, متخافيش انا مش هسيبك انا معاكى  وانتى معايا فى كل خطوه  هنعملها مع بعض ,,متخافيش انتى مش لوحدك
 حضنتها اوى "نرمين" وهى بتعيط وحست "تميمه" بمدى رعب وخوف "نرمين " اخدتها ع غرفتهم ونايمتها وغطتها وقامت شدتها "نرمين" ونامت جنبها "تميمه" لكن كانت صاحيه بتفكر ..!

 تانى يوم صحيت بدرى وكانت "نرمين" فى المطبخ بتعمل شغل مطلوب منها ولاحظت "تميمه" ملامحها المتغيره مش بتضحك ولا بتهزر زى كل مره ... اتجهت ل ميعاد تدريبها ورجعت بليل قعدت مع "نرمين" وهى  قاعده قدام التليفزيون  قعدت جنبها" تميمه" بياكلوا :
_ منك لله يا شيخه هنفجر بسببك
_ وهو انتى بيحوء معاكى حاجه انتى ارفع من عصايه المسح
_ علشان بهضم المصايب اللى بتحدفينى بيها بالتمارين كله بيسيح
_ شوفتى بشغلك ازاى بملى علشان تسيحى ,,من غير اكلى كنتى هتسيحى  العضم وهتختفى ياعنيا وحالك هيتوقف
_  بس يا بكابوزه
_ بكابوزه وفرحانه ملكيش دعوه
_ البيت فضى علينا  فين هناء وهدى
_ قاعدين فوق
_ كان البيت مليان بنات
_ اه فعلا البنات كانوا عاملين حس
_ حد من البنات كلمك ؟
_ لا بقالى كتير محدش فيهم كلمنا اتجوزو بقى مشغوليين
_ طيب ايه رايك يا "نرمو"  نسافر ليهم اسكندريه بكره ل" سلوى" و"ابتهال"  بعد ما اتنقلت اسكندريه  نشوفهم ونبقى اتفسحنا
_ موافقه وكده كده معنديش شغل اليومين دول
_ ولا انا
_ هتقولى ل "هشام"
_ هبعتله اقوله هو مسافر وراجع كمان اسبوع
تانى يوم الفجر جهزوا "نرمين" و"تميمه" قالوا  ل "هناء" و "هدى" رفضوا ,, اتجهوا لمحطه القطار ووفى خلال ساعتين وصلوا خرجوا من محطه مصر واتجهوا على البحر ووقفوا وهما فاتحين درعاتهم  ومبسوطين بالجو ,, وقفوا تاكسى واتجهوا على عنوان "سلوى" ووصلوا رنوا جرس الباب وفتحت ليهم "سلوى" لكن شكلها كان غير متوقعه خاسه ورابطه راسها ولبسه جلابيه مش نضيفه :
اتفاجئت بيهم : " تميمه" ,, "نرمين"
 ابتسموا البنات :" سلوى"
 لاحظو انها وقفت مقالتلهمش يدخلوا .. قالت "نرمين :
_ ايه يا لولى هنفضل بره ولا ايه دا حتى احنا جايين من سفر
_ تعالو ادخلو تعالو
 وهما داخليين سمعوا صوت واحده قاعده قدام التليفزيون بتاكل فى فاكهه وبتتفرج وحاطه رجلها على الترابيزه : مين يا "سلوى" ,, متقفيش ترغى كده وانجزى علشان تخلصى الشقه وتعملى الغدا ولا انتى عارفه هيحصل ايه ؟
 الجمله ذهلت "تميمه" و"نرمين" بصوا لبعض ول "سلوى" :
 "سلوى" بصوت : دول اخواتى "تميمه" و"نرمين"
_ اخواتك مين دول وانتى يتيمه اصلا ملكيش اهل
 دخلت "تميمه" وبصتلها : احنا اخواتها اللى كانت عايشه معاهم
 اتعدلت فى قعدتها : اهاا .. عند مدام "رجاء"  اهلا يا حبايبى منوريين
 نرمين : الله يخليكى
_ اتفضلوا اقعدوا اتفضلوا ,, معلش الشقه مكركبه بنضف بقى وكده
" تميمه" بصت ل "سلوى" : بتنضفى كل دا لوحدك مفيش حد بيساعدك وانتى مجبسه دراعك كده
_ والله اتحايلت عليها اقوم اعمل معاها لكن هى رفضت ومردتش
بصتلها "نرمين"  ع رجلها : مش حضرتك رجيلكى مكنتش قادره تحركيها وكنتى ع كرسى بعجل يوم كتب كتاب "سلوى"
 اتفاجئت الست : ها .. الحمد الله ربنا الشافى والله من وقت ما جت "سلوى" وكتر خيرها راعتنى وخفيت الحمد الله
_ حمد الله على سلامتك
 قربت "تميمه" ل "سلوى": عاوزين نقعد معاكى
_خديهم يا حبيببتى اوضتك اخواتك واكيد بينكم كلام وكده
 اتفاجئوا : اوضتك ,, مش انتى قاعده فى شقه لوحدك
 ردت الست : ماهو ابو محمد اجرها علشان المعيشه وكده واحنا كلنا قاعدين هنا بنونس بعض يلا يا حبيببتى خوديهم ع اوضتك
 دخلوا غرفه نوم "سلوى" :
_ سلوى ايه دا هو فى ايه ؟
_ مفيش يا "تميمه" ,,
_ ومقوليش ليه ع موضوع الشقه دا انتى ليكى شقه تقعدى فيها
 ردت "نرمين": لا والست اللى خفت دى مش هو قال انها مبتتحركش خالص  ايه جوازه منك شفاها
 مسكتها من دراعها : وايه اللى  كسر دراعك دا ؟
_ وقعت
_ وقعتى ,,
 بصتلها "سلوى" ودموع نازله من عينيها : وقعت على جدور رقبتى يا "تميمه" تمسكى وعندى لبسنى فى حيطه مش عارفه اخرج منها ..
_ فى ايه فهمينا ؟
 حكتلهم سلوى ان بعد اول اسبوع جواز كان كل كلام جوزها كدب  مفيش شقه وان مراته مش عيانه ولا حاجه وانه اتجوزها علشان تخدمهم  وانها طول الوقت شغاله فى البيت وان نسيت او كسرت حاجه غصب عنها بنتضرب منه واوقات منها وبتتشتم وبتتعاير طول الوقت ان معندهاش اهل
اتفاجئت "تميمه": وانتى ساكته ليه  انتى ممرش ع جوازك 7شهور حصل كل دا
_ علشان فعلا معنديش اهل ولا مكان اروحله ,,
_ ازاى يعنى ؟
_ كلمت مدام "رجاء" قالتلى استحملى جوزك  ورجوعى للبيت ممنوع ف سكت واستحملت
_ انتى هبله كنتى ترجعى ووقتها هنشوف مين هيمنعك
_ هى هتمنعى يا "تميمه" انا مليش مكان هناك ولا فى اى مكان  ودا بيت جوزى ,,و انا وافقت اتحمل مسؤليه اختيارى وقولت مهما كان مش هعترض وانا موافقه وهستحمل
_ انتى كده بتموتى نفسك ,, مش معنى اختارتى غلط فدا يخليكى تكملى فيه فوقى والحقى نفسك
_ انا كده كده ميته انا جيت ع الدنيا ميته من نظره الناس وكلامهم وتلقيحهم علينا فى كل لحظه بيموتنا وهما مش حاسين  ,,على الاقل هنا اسمى متجوزه وفى اربع حيطان ساترينى وهيكون معايا ابنى
_ انتى حامل ؟
_ ايوه فى الرابع
_ سلوى .. انتى بتحكمى ع نفسك وع ولادك بحياه كلها بؤس ليه كده ؟
_ اعمل ايه ؟
_ سلوى ...
 لسه هتتكلم "تميمه"  باب الاوضه اتفتح وكانت مرات جوز "سلوى" : معلش يا جماعه ع تطفلى بس زى ماانتم شايفين كده الشقه مكركبه وانا مش هقدر اخلصها وورانا اكل لحسن الراجل يجى يقلب الدنيا ولا ايه يا "سلوى"
 تغيرت ملامح سلوى من الرعب ووقفت : ايوه خلاص هما ماشيين اصلا
 وقفت "تميمه" و "نرمين" متفاجئين من تصرفات "سلوى" واستاذنوا ومشيوا وطلبت منهم ميزورهاش تانى  نزلوا  وهما فى حاله ذهول ,,, اتغدوا فى مطعم قعدوا ساكتين  مبيتكلموش من الذهول واتجهوا لعنوان التانى "ابتهال" اتصلوا بيها وكانت فى انتظارهم  من اللى شافوه فى بيت "سلوى" رعبهم انه يكون نفسه اللى فى بيت "ابتهال" ,,لكن  لما وصلوا وكان البيت مختلف شكلا ومضمومنا عن بيت "سلوى" هادى ومنظم  وزوج "ابتهال" لما وصلت" تميمه" و"نرمين" سلم عليهم ونزل  انبهرت "نرمين" بالشقه وملابس "ابتهال" لكن ركزت "تميمه" فى ملامح "ابتهال" رغم ابتسامتها :
_ ايه يا توتا  مفكرتيش تيجى تشوفينا
_ صدقينى ع بالى بس مش لاقيه فرصه ومبسوطه انكم هنا
 لاحظت" تميمه" دموع فى عين "ابتهال" :
_ مالك يا "ابتهال"
_ مفيش مبسوطه انى شوفتكم بس اصلكم كنتم وحشنى انا كنت قربت انسى الكلام
 نرمين:  طيب طمنينا عليكى فى حاجه فى السكه ولا ايه
ابتسمت "ابتهال" وحطت ايديها ع بطنها : اه الحمد الله انا حامل
 فرحت "نرمين" و "تميمه".. للحظه دمعه نزلت من عين "ابتهال":
_ فى ايه يا "ابتهال" ومتقوليش مفيش هو جوزك مزعلك
 نرمين دخلت فى الكلام : بيضربك ولا بيعايرك وبيقولك كلام يضايقك
_ لا خالص
_ طيب فى ايه راجل محترم ومؤدب ولا بيشتمك ولا بيعايرك بيتمك ولا بيمد ايده عاوزه ايه بقى ؟
 دموع نازله من عين "ابتهال" : عاوزه احس انى عايشه انا عايشه فى فراغ لوحدى
 تميمه :  فراغ ايه ؟
_ حياتى فاضيه يا "تميمه" انا لما وافقت انى اتجوز كنت بدور على حياه اعيشها مش الجواز يعنى حياه  كنت خايفه اضغط ع نفسى واتجوز زى "سلوى" وقولت هطلب فتره تعارف قبل الجواز لو حصل  وضغطوا عليا ,, لكن وقت ما شوفته حسيت انه كويس و مناسب وقبلت ظروفه وتقبل ظروفى وانا قولت دى بدايه كويسه مع العشره هنعرف بعض
_ ايوه ...
_ لكن اللى شوفته فراغ ,,عايشه مع شبح فى البيت  مبيتكلمش كتير قاعد ساكت ,, حتى وانا معاه مش حاسس بيا هو بس معايا علشان مهمه محدده عاوز اطفال  ,, اه مكفى بيته  ومش مخلينى عاوزه حاجه  ومصاريف اهله لكن انا فين من حياته 5 شهور متجوزه وعايشه لوحدى  ,, اول يوم جوازنا قالهالى صراحه متجوزنى علشان اخلف ومليش اى طلبات تانيه طول ماهو مكفى بيته,, طول اليوم فى الشغل ولما بيرجع البيت يا فتح اللاب والموبيل يا سهران مع اصحابه ,, هتقولولى اتكلمى وحاولى تتقربليه حاولت وكتير ولما عرف انى حامل فرح لحظتها وبس لما بيحب يطمن بيسالنى الولد عامل ايه مبيسالنيش انا عامله ايه ,,كلامه معايا الفتره دى موجهه للى فى بطنى بس ,,خلاصه حياتى انا كنت مجرد هدف اجبله عيال بس كده هو عاوز اولاد بس مش عاوزنى انا ,, انا زى الاباجوره دى تنور لما يحتاجها غير كده مطفيه بس ,,
_ انتى اتجوزتى خوفت واتوهمتى انه طوق نجاه ليكى  مفكرتيش كويس انه كان مستعجل ع الجوازه تتم وكتب كتاب حتى الفستان ملبستهوش وانتى وافقتى ,, اصعب علاقه  مش اللى يهينك ويضربك اصعب علاقه اللى تعيشى معاه تحت سقف واحد ويحسسك انك مش موجوده ,,انتى كده اختارتى العذاب ,,,ربنا يتولااكى ويتولى اللى فى بطنك
 كلام "ابتهال" صدم" نرمين" "وتميمه" نزلوا من عندها نفسهم مقفوله من اى حاجه واتجهوا لمحطه القطار وفى الطريق ساكتين وصلوا البيت ودخلوا على غرفتهم وناموا على سريرهم :
_" تميمه"
_ ها
_ هو الجواز وحش كده ,,
قعدت ع السرير : مش عارفه ,, لكن لا معتقدش انه وحش ,, اختيارنا هو اللى بيتوقف عليه رائينا الجواز كويس ولا لا
_ اللى شوفناه يخلينا ثابتين ع موقفنا منوافقش على اى جواز
_ بس هيجى يوم وهنتجوز اكيد المهم هنتجوز مين وهنعيش ازاى فاهمه
 _ تميمه" ودا هنعرفه منين اذا كان الاتنين دول والله اعلم الباقيين عايشين ازاى كلهم اتفاجئوا لما اتجوزوا
_ "نرمين" متنكريش ان "فريال" و" اميره" و "صفاء" اختاروا اللى اتجوزوهم وكان ب ارادتهم وعايشين الحمد الله كويسين مع ازواجهم واولادهم ,, وادى "ابتهال" و"سلوى" علشان خافوا وحبوا يهربوا واتوهموا ان الجواز نجده كانت النتيجه سيئه عليهم لوحدهم ,, علشان كده يا "نرمين" مش اى حد نتجوزه مش اى حد لاننا ببساطه مش ااقل من اى حد ..
_ صح
 قامت "تميمه" وقعدت جنب "نرمين " ومسكت ايديها :
_ "نرمين" توعدينى وعد
_ ايه ؟
_ مهما حصل ومهما الدنيا ضغطت علينا مش هنعمل حاجه ضد رغبتها ,,مش هنستسلم مهما حصل
ابتسمت "نرمين": حاضر
_ ومتخافيش انا ايدى فى ايدك ومش هسيبك ل اخر يوم فى عمرى وصدقينى هتقابلى اللى يستحق قلبك وانتى هتختاريه لا ظروفنا ولا خوفنا هيسيطر ع قراراتنا ,,فاهمااانى
_ حاضر اوعدك
_ نامى بقى ومتفكريش كتير
_ ماشى تصبحى على خير يا "توما"
_ وانتى من اهله يا "نرمو"

قرب موعد اتمام زواج "هدى" وكانت "رجاء" متكفله ب كل طلباتها حاولت "تميمه" هى و "نرمين" ينصحوها رفضت تسمع ليهم واللى ساعدها ع تمسكها بقرارها وجود "هناء" معاها مشجعاها ,,, اتجوزت "هدى" وسافرت والبيت صفصف ع "تميمه" و "نرمين" و "هناء" بس ,,,  بعد فتره زارتهم "رجاء" وقعدت مبتسمه لي "نرمين " و "تميمه ":
_ها يا بنات فكرتوا هتعملو ايه ؟
 نرمين وتميمه بصوا لبعض : هنعمل ايه ؟
_  ايوه يعنى خططكم للمستقبل هتروحوا فين لما تخرجوا من هنا كده يعنى
 نرمين بنبره خوف : هنخرج من هنا ؟
 ابتسمت "رجاء": ايوه يا حبيببتى  هتخرجوا ع بيت اجوازكم ان شاء الله ماهو مفضليش غيركم
ردت "تميمه": ومين قال اننا عاوزين نتجوز
_ انا ,, انتم بنات كبار فى سن الجواز  و"سميه" الله يرحمها لو موجوده كانت هتعمل كده
 ردت "تميمه": معتقدش انها كانت هتعمل اللى حضرتك عملتيه وهتعمليه لسه
_ مش عاوزين تتجوزوا يعنى ؟
_ لا مش عاوزين
_ايه خططكم  هتفضلوا قاعدين هنا طول العمر ولا انتم مستنين حد معين ؟
لاحظت "تميمه" تلميحات "رجاء" عليها :
_ لما يظهر الشخص المناسب اللى هنختاره ب ارادتنا  اكيد هنتجوز غير كده لا
 تجاهلت "رجاء" كلام "تميمه" و طلعت  صورتين ل عريسين وحطتهم ع الترابيزه :
_ متتعبوش قلبى ,, دول اتنين شافوا صوركم ووافقوا عليكم وكمان اسبوع هيجوا تشوفوهم ونتمم الجوازه كمان شهرين
 قامت وقفت " رجاء" وماشيه ,, وقفت "تميمه : انتى ليه بتعملى كده معانا ؟
بصتلها "رجاء": بعمل معاكم كده ليه ,, هو لما استركم واجوزكم واعيشكم مع عائلات  ابقى غلطانه
_  انتى مش بتجوزنينا انتى بتطردينا من البيت بس بطريقه شيك علشان محدش يقول انك طردتى ايتام
_ بطردكم ,, كبيره الكلمه دى يا "تميمه"
_ ترضى لبنت من بناتك تتجوز واحد من اللى انتى جيبتيهم دول
 ضحكت "رجاء" وقربت ل "تميمه ":
_ "تميمه" انتى نسيتى نفسك ولا ايه ,, بناتى مين اللى اسوايهم بيكم ,, انتى ناسيه انتم مين وعايشين ازاى ,, انتم ايتام لا ليكم اهل ولا اصل ,, و "سميه" و "جلال" الله يرحمهم انتم صعبتوا عليهم لموكم فى البيت دا ,,ودلواقتى البيت بقى بتاعى وعلشان مطردكمش زى ما بتقولى بجوزكم بضمنلكم حياه بس فى مكان تانى ,, ماهو انا مش عبيطه زى "سميه" اسيبلكم بيت بالمساحه وفى المكان دا تعيشوا فيه لوحدكم ,, حرام انى ارمى فلوسى ع الارض ,,
_ يااااه ,, لدرجه دى شايفنا قليليين اوى كده لدرجه انك تتحكمى فى حياتنا وتستشغلى خوف كل واحده بالطريقه دى ,, احنا م خترناش اننا نكون ايتام ,, ولا اختارنا حياتنا كده ,, واحنا مش حمل ع حد
_ لا حمل وحمل تقيل كمان ,, انتى مش مستوعبه المصاريف اللى بتتصرف والى اتصرفت عليكم ,, كفايه بقى كده,, اعقلى وخليكى زى اخواتك واتجوزوا واعملوا اللى انتم عاوزينه لكن بعيد عن هنا وانا كده مغلطتش فى حقكم انا بجوزكم وبخليكم فى حمى راجل لان الدنيا صعبه اوى تواجهوا لوحدكم ولا ايه يا "نرمين "
 "نرمين" كانت مرعوبه وملامحها متغيره وبترتعش شافتها "تميمه" وب انفعال :
_  احنا مش محتاجين راجل يحمينا  احنا قادرين نحمى نفسنا
_ و "هشام" دوره ايه فى حياتكم هو اللى ساعدكم فى كل حاجه منه مشروع "نرمين" وانتى دروس الزومبا ,,لو لوحدك هتقدرى تعمليها لوحدك ,, اعقلوا كده وفكروا صح
 بنبره حاده : لا انا ولا "نرمين" هنتجوز بالطريقه دى ..
_ يبقى تسيبوا البيت بس كده ,, وقدامكم شهر ويبقى كده عدانى العيب ( بصت ل "هناء") وانتى بكره تعاليلى اعرفك مكان شغلك فين ؟
 مشيت "رجاء" وبصتلهم "هناء" وبصت ل "نرمين": قولتلك يا "نرمين" ان مفيش حاجه مضمومنه انجوى بقى انتى وهى ,,,!
قعدت "تميمه" جنب "نرمين" حضنتها وحاولت تطمنها :
_ متخافيش مش هيحصل حاجه انا مش هسيبك مهما حصل فاهمانى ومتعمليش حاجه غصب عنك خليكى معايا
حضنتها "نرمين" وطبطبت عليها "تميمه" وتفكيرها انشغل هتخرج من البيت هتروح ع فين ولمين ,,!

مر يومين ودماغ "تميمه" شغاله بتفكر وشايفاها "نرمين" برغم محاولاتها تطمنها لكن انعزالها لوحدها مبين انها مش عارف تتصرف ,, كلمت "هشام" وكان مسافر رجع ع المطار ع "عمته":
_ "هشام" حمد الله ع سلامتك يا حيبيبى
_ عمتو ايه اللى انتى عملتيه دا مع "تميمه "
_ اها ..هى اتصلت بيك اشتكتك وانت جى تتخانق معايا مش كده
_ لا طبعا ,, لا هى اتصلت ولا انا جى اتخانق بس مش فاهم انتى ليه حطاها فى دماغك
 بصتله بنظره غضب : لانى كل ما اشوفها اشوف "سميه" وانتصارها عليا وانا مش عاوزه حاجه تفكرنى ب "سميه"
_ لدرجه دى بتكرهي "ماما سميه"
_ خدت منى اخويا وخدتك وخد فلوسنا عاوزنى احبها
_ بابا "جلال" اختارها هى وانا اختارت اعيش معاهم والفلوس معملتهمش طيارات ورق ولا مراكب ولا ضيعتهم فى الشوبنج كله للدار وبيت البنات
_ استغلت طيبتكم وعاشت وسكت ,,الله يرحمها بقى ,, لكن مش هعيد تانى حياه "سميه" معاك انت اللى فاضيلى انت اغلى عندى من اى حاجه يا "هشام" انت مش ابن اخويا انت ابنى ,, ومتخفش مش هجوزك "رانيا" لكن "تميمه" لازم تخرج من حياتنا لازم لو بتحبنى يا "هشام"
_ انا مش عارف انتى خايفه من ايه ,,"تميمه" مش معاها حاجه
_ "تميمه" زى "سميه" مالناس فاكره ان معهمش حاجه لكن هما بيكون معاهم كل حاجه
مسكت ايد "هشام": انا مش عاوزاك تبعد عنى يا "هشام" كفايه خسرت "جلال" و"رافت"
_ انا معاكى يا عمتو متقلقيش لكن متضغطيش ع "تميمه فى موضوع الجواز
_ انت ناسى ولا ايه هى بنت وطبيعى هتتجوز
_ يبقى بحريتها وبقرارها مش غصب ,, البنات التانين ضعفوا وخافوا لكن "تميمه" غيرهم
_ غيرهم فى ايه ,, هى مش ظروفها زيهم يتيمه وانا بعمل الصالح ليها بجوزها فيها ايه دا المفروض تشكرنى
_ وهتطرديها ليه ؟
_ دا كان تهديد علشان تعقل  وبعدين  بيتى وانا حره مش هقعد فيه بنتين بس الاول كان فيه بنات وصفصفوا عليهم  ولما اشتريته مفكرتش اركنه انا مش دافعه قليل ,,
_يعنى هتعملى فيه ايه هتقعدى فيه
_ لا هبيعه فى كذا حد عرض عليا مبلغ اكبر من اللى دفعته لما يفضى البيت هبيعه
_ هتبيعيه ,,,
_ وبما انك هنا انا بفكر ابيع الدار كمان
اتفاجى "هشام": ايه ؟
_ مبفهمش انا فى حوار دار الايتام دا مسؤليه وانا مش عايشه هنا ,,هعرضه للبيع قريب انا حبيت اعرفك
_ مينفعش الدار تتباع مينفعش  ولا بيت البنات
_ هو انت عاوز الدار وفيلا الشيخ زايد  ؟
_ ايوه
_ خلاص اشتريهم وكاش وقدامك شهر قبل ما ارجع
مقدرش يتكلم "هشام" ودخل دوامه حيره وهو عارف معنى الدار المعنوى وانه ذكرى من "جلال" ونفس الوقت فيلا الشيخ زايد  لو اتباعت "تميمه" هتروح فين وهى ملهاش حد ,, رجع ع الشركه وراجع الارصده المبلغ المطلوب ل المكانين غير كافى   والفلوس اللى هيقدر يجهزها فلوس الدار بس  ,, تانى يوم الصبح اتجه للمقابر ووقف قدام قبر "جلال" و "سميه" :
_ انا مش عارف اتصرف واعمل ايه ,, الدنيا كلها ضاغطه عليا وبحارب من كذا اتجاه ,, مش قادر اسيب الشركه يستغلوها ولا قادر اسيب الدار ولا بيت البنات ,, انا جيت قولت تساعدونى بحل ,, انا فكرت كتير علشان "تميمه" متبعدش عنى  وفى نفس الوقت هحافظ ع الفيلا  واهرب من ضغط "عمتو رجاء" وهو مفيش غيره ساعدونى انها توافق ,,,
 اتجه لشركه  خلص شغل متاخر وطلع ع بييت البنات  شاف "هشام" نور الغرفه شغال قرب وسمع صوت الميوزك زق الباب وبص شاف " تميمه" وهى بترقص عرف انها مضغوطه وبتحاول تهرب ,, قعدت على الارض وبتنهج صقف ليها "هشام" :
_ الساعه 11   وقولنا بلاش كده بليل عندك طول النهار مشبعتيش
_ "هشام" ,, جيت امتى"
_ انا هنا من زمان
 ابتسمت "تميمه ": تعالى نخرج الجو كتمه هنا
 بص حواليه : حر ازاى دى برد
 خرجت قعدت  "تميمه" وبصت ل "هشام" :
_ ايه المناسبه يا اتش مبتجيش متاخر كده غير لسبب قول
_ مقولتليش ليه ع الحوار اللى حصل مع عمتو
 ابتسمت "تميمه": نرمين ,,نرمين
_ ايوه "نرمين" طلعت احسن منك وقالتلى ,,احنا بينا كده مش اتعودنا دايما نكون مع بعض
 بصتله "تميمه": دى مشكلتى وانا هحلها متقلقش
_ مشكلتك ؟
_ ايوه ,, انا هحلها قبل الشهر ما يخلص
_ انتى بتعملى فرق يا "تميمه"
_ مش فرق ربنا يعلم انت ايه فى حياتى  علشان كده ان شاء الله هوصل لحل  قريب
_ انا مش عاوزك تبعدى عنى يا "تميمه"
_ وانا مقدرش ابعد لكن ,,
_ انا عندى حل لمشكلتك وارجوكى مترفضيش  ؟
_ لو اقدر عليه هعمله اكيد
_ نتجوز ...!
________________________________
يتبع