(25)
انتبه "لوهان" لضمه ل "ريم" وابعدها وتمالك افكاره :
_ اسف لكن ..
_ لا عادي ..يلا نمشي
_ انتى كويسه ..
_ كويسه ..
استقلا السيارة وطول الطريق صامتين ,, وصلا لمنزل "ريم" :
_ انا اسفه اليوم كان جميل وانا ختمتها بتراجيدي
ابتسم "لوهان": لا بالعكس انتى كنتى محتاجه تقولي الكلام دا واحنا اصدقاء
_ صح اصدقاء
_ تصبحي ع خير
_ تصبح ع خير
عاد "لوهان" الى المنزل ووقف امام اللوحه المرسله من "نيويورك" وللحظات راي وميض بسيط لمشاهد واشخاص غير واضحين الملامح وكان الذاكره بتتمرد ع صمتها وشعر بصداع شديد واستسلم للنوم .. وفى اثناء نومه راوده حلم ك احلام كثيره متكرره ولكن الشخص الثابت فيها وهى "ريم" بتبكي وهى بتنظر اليه .. فتح عينه ووجد اثار لدموعه ع الوساده ,, استمر يشعر "لوهان" بمشاعر واحاسيس مختلفه غير مفهومه اتجاه "ريم " ....!
فى الكافيه دخل "جى وو" كمفاجاءه لصديقه "لوهان" لكنه كان غير موجود ولكن لمح وجود "ريم" واقترب اليها خطوات وبملامح مفاجاءه :
_ ريم .. انتي ريم صح
اتفاجئت "ريم" بوجوده: جى وو..؟!
بملامح سعاده : عامله ايه بجد مبسوط جداا انك هنا انا مكنتش اتوقع تكوني هنا بجد ,, اخيرا "يومي" عملت حاجه صح فى حياتها محدش قالي ان "لوهان" ذاكرته رجعتله ورجعتوا لبعض ,,
_ ثواني وطي صوتك الاول
_ ليه ..
_ "لوهان" لسه مش فاكر حاجه ..
اتفاجئ : ايه .. وازاى وانتي هنا ..؟
_ تعالي نخرج من هنا دلواقتي وهعرفك كل حاجه ..
خرجوا واتجهوا لمكان قريب وجلسا وروت "ريم" الحكاية كلها وملامح صدمه ودهشه "جى وو":
_ انا مش عارف اقولك ايه ؟ انا مش قادر استوعب كلامك اساسا !!
"يومي" ساكته وعارفه وانتي موافقة تعملي كده ,, وهو مفتكركيش خالص ..؟!
_ لا ..
_ انتى غلط .. الصح اول ما عرفتي انه موجود تواجهيه و تقوليله انك مراته انك حب حياته انك كل حاجه وبنته ..
_ وبعدين ..؟
_ بعدين ايه .. اكيد كان هيبقي فى رد فعل واستجابه ولو بطيئه ,, "لوهان" لما فقد الذاكره كان بيتمني يعرف اى حاجه عن الماضي اللى اتنسي واكيد كان هيفرق معاه وجودكم ..
_ لكن رغم وجودي معاه و"جنه" لكن مفتكرش حاجه ,, وانا مش هضغط عليه علشان يفتكرني ويتأذي ,, انا مقدرش اعرضه لصدمة ويدخل غيبوبه تاني احتماليه انه يصحي منها ضعيفه ,, هو مستقر و..
_ انتي بتتوهمي يا "ريم" .. مستقر ايه ..؟ انتم الاتنين مش عايشين وانتم بعاد عن بعض ودى حاجه انا متاكد منها ,, انا مستحيل اسكت ع اللى بتعملوه فى نفسكم دا ,,انا هروح اعرفه كل حاجه ..
مسكت "ريم" ايده : ارجوك "جى وو" ,, متعملش كده ,, "لوهان" انا كنت معاه 4 شهور وفى خلال ال 4 شهور مفتكرش حاجه ,, وهو حياته مستقره دلواقتي مش هقدر ادمرله الاستقرار اللى وصله ,, انا عارفه معني الانسان لما يكون تايهه وغير ثابت الاحساس بيكون ايه ولما بيستقر بيبقي وصل لشط الامان ,, انا المهم عندي انه بخير ...
_ انتى هتستسلمي وهتسيبي "يومي" تغلبك ,, هتسبيها تسرق حياتك ..؟
_ انا مش هقدر اعمل اكتر من اللى عملته ومش هجازف ب اى تصرف هيأذيه ,,
_ يعني هتفضلي كده صديقه ..
_ ممكن تقول صداقتنا قربت ع هايتها انا الاسبوع اللى جى بعد الافتتاح هرجع "لندن" و"لوهان" يقفل الصفحه دى ..!
_ ريم ..
_ لو بتحب "لوهان" فعلا ارجوك اعتبرني مش موجوده ولا تعرفني ,,
_ مش هقدر ..
_ ارجوك ..
بملامح غضب : هحاول ..
_ اوعدني
_ اوعدك ...
عادا الى الكافيه وعادت "ريم" لعملها وكان "لوهان" وصل المكان رحب ب "جى وو" واتجهوا الى الخارج ,,, اثناء حديث "لوهان" عن "ريم" لاحظ "جى وو" انه بيتحدث عنها برسميه واتقانها لعملها ولم يلاحظ اى كلام يدل ع تذكره لها من الماضي ولكن شعر بنفس مشاعر اول ما اتعرف "لوهان" ع "ريم" وانجذابه اليها تملكته رغبه بالافصاح عن الحقيقه لكن وعد "ريم" قيده ,, تاني يوم حضرت "يومي" مع "لوهان" للقاء نظره اخيره ع المكان وكانت ممسكه يد "لوهان" وبتتعامل بنعومه ولطف ك ثنائي محب ,, وكانت متعمده التصرف امام "ريم" ,, اتجه "جى وو" بالقرب من "ريم":
_ غلط اللى عملتيه وبتعمليه يا "ريم" .. انتى المفروض تكوني ماسكه ايده ومعاه فى كل خطوه مش هى .. مكانك هناك جنبه مش واقفه متفرجه هنا ..
_ مش مهم مكاني اللى الناس شايفاه فين لان انا متاكده ان هى مهما عملت مش هتقدر تاخد مكاني اللى فى قلبه ,,
_ ريم ..
_ هو بخير ودا المهم دا المهم ...
سكت "جى وو" ووقف يشاهد ما يحدث من نظرات "ريم" وهى بتتمالك دموعها وتصرفات "يومي" الاستفزازية و"لوهان" الحائر ,,, كان الافتتاح بعد يومين وتقديرا لمجهود "ريم"و المساعدين قرر "لوهان" ان يعزم طقم العمل و"ريم" ع العشاء فى احدي المطاعم :
_ شكرا ع العشاء
_ دا ااقل حاجه اعبرلكم ع شكري ل اهتمامكم وان المكان ظهر احلي مافي تخيلي ..
_ الفضل يرجع ل "ريم" اهتمامها ان المكان يوصل لشكل دا ..
_ شكرا "ريم"
_ يو ويلكم ..
_ مش محتاجين اقولكم كلكم مدعويين ع حفله الافتتاح اكيد ..
_ اكيد طبعا ..
فى المكان كان رجل مسن وزوجته يحتفلوا بعيد زواجهم ال 75 واشتغلت الموسيقي ورقصوا .. نظرت اتجاههم "ريم":
_ شعور جميل احساس الحب طويل الامد لا بيتغير ولا بينفصل بيكون متماسك
نظر "لوهان" اليهم : ان شخص يستمر معاك عمرك كله مفيش اروع من كده
تحدث احد الاشخاص : ياتري ايه السبب اللى وصلهم لمرحله دى ؟
ردت "ريم": الحب ..
_ الحب مصطلح غير مفهوم لانه بيعتمد حدوثه ع الصدفة ..!
ردت "ريم" ب ابتسامه: مفيش فى الحب صدفة ولا فى حياتنا ,, ,,كل شئ مقدر من الاول انه يحصل ,, القاء والفراق ,, الحزن والفرح ,, والحب ,,الحب علشان يتحقق مش محتاج صدفة ,,الحب محتاج شخصين مقدر ليهم يتقابلوا يثبتوا انهم يستحقوه ..
_ وازاى نعرف ان الشخص دا هو المقدر لينا نحبه ..؟
ابتسمت "ريم": امممم هو شخص صعب نسيانه و اخراجه من تفكيرك ,, يدخل قلبك ويملا الفراغات اللى فيه (غمضت عنيها) لما عينك مش شايفاه قلبك بيرد عليك بدقاته انه موجود هنا (اشارت ع قلبها) ,, فى وجوده مفيش ظلام لانه بيكون الشمس اللى نورت حياتك ,, وفى الليل بيكون قمرك ..النجوم فى السما بتغير من ابتسامته فبتحاول تثبت انها احلي وانت مش شايف غير ابتسامته ,, الصعب معاه بيهون ,,هو الوحيد اللى فاهمك من غير كلام وامنياتك بتتحقق معاه ,, ابسط الحاجات معاه بتكون اعظم حاجه فى العالم ,, لمسه ايده بتكون علاجك و سلاحك اللى بيواجه خوفك ,, هو دليلك وثقتك و امانك واطمئنانك وسكينتك ,,هو رفيقك وصديقك ووينسك قبل ما يكون حبيبك وانت معاه بتكون مش عاوز حاجة تاني من الحياة ولما بيبعد بيكون معاك ومهما طال الغياب يقينك باللقا القريب اكيد ..!
اغمض "لوهان" عينيه ووضع يده ع قلبه لمعرفه الاجابه مين المقدر له وجد تكرار ومضات الذاكره لكن بظهور "ريم" فى بعضها وتسارعت دقات قلبه وتفاجئ وفتح عينيه بسرعه ونظر اليها ب ملامح صدمه ,, وتناولا العشاء واشتغلت موسيقي واقترح الجميع ان يقوم "لوهان" و"ريم" برقصه ووافقت "ريم" ,, ابتدت الموسيقي :
_ لو دوست ع رجلك بعتذر مقدما
_ مفيش مشاكل ..
وريم" بين يدى "لوهان" بخطوات بطيئه ع نغمات الموسيقي نظر اليها "لوهان" بتركيز ولاحظ تسارع دقات قلبه :
_ ريم..؟
_ ايوه ..
_انتي مكرهتيش زوجك ؟
_ لا
_ رغم بعده عنك السنين دى وبدون اى اتصال حبك متأثرش بحد تاني ؟
_ لان حبه فى قلبي مش فى عقلي ,, زى مافى ذاكره للعقل فى القلب ذاكرة ,, فى اقوال ان القلب ضعيف لكن ذاكرته اقوي لانها صعب تتنسي حتى لو العقل نسي ,, ببساطه هو عايش فى كل نبض بحسها ,, انا حبيته ,, وبحبه ,, وهحبه ل اخر يوم فى عمري ,,لانه يستحق الحب دا
_ البعد معلمش قلبك القسوة ؟
_ يتعلم القسوة ازاى وهو اتعلم الحب منه ,, رغم بعاده ومهما عمل قلبي عمره مايقسي عليه ..
_ انتي ازاى كده مش شايفه غيره ,, وياتري هو يستحق فعلا الحب دا ..؟
_ امممم ,, انت حسيت قبل كده انك مقدر لشخص ما ..؟
سكت "لوهان" لحظات: ايوه .. لكن ...
_ مفيش لكن كل حاجه فى حياتنا مقدره ,,الفرح والحزن ,,اللقا والفراق ,, والحب ,, كل واحد فى الحياه مقدر له شخص ما فى مكان ما مجهول امتي هنقابله دا اللى منعرفوش لكن هيتم اللقا فى يوم ,, مجرد احساسنا انه موجود مهما كانت الحواجز والصعاب هنقرب فى يوم وهنتقابل لاننا نستحق دا لاننا نستحق الحب المقدر لينا واحنا مع بعض ,,مفيش انسان وحيد طرف الحبل بيكون فى اتجاه واخره بيكون فى اتجاه تاني وبيتحدوا عند نقطه معينه يا هيحصل قريب ياهيحصل بعيد,,..!
انقطع التيار الكهربائي :
اتفاجئت "ريم": يلا نرجع ليهم ..
مسك يداها واستوقفها ووسط الظلام تحدث "لوهان":
_انا حقيقي حاسس بغيره اتجاه زوجك من حبك له ,,انا بحسده عليكي انتى مش مجرد انسانه عادية انتى الجنه ع الارض وبعده عنك اكيد هو فى جحيم ,,عاوز اقولك انا مش عارف لما تسافري هقابلك تاني ولا لا لكن عاوز اقولك انا ممتن للحظه اللى جمعتني معاكي وعرفت يعني ايه حياه ويعني ايه حب ..!
عادت الاناره وللحظات استمرا بالنظر فى اعينهم حتى انتبها من صوت حولهم وعادا الى المجموعه وملامحهم متغيرة وكملوا اليوم واتجهوا الى منازلهم وقام بتوصيلها "لوهان":
_شكرا ع السهره
_ لكن الرقصه مكملنهاش زى الباقيين والكهربا قطعت
ابتسمت "ريم" وصمتت :
_ بعد بكره الافتتاح ..
_ ايوه ..؟
_ هتعملي ايه بعد كده ..؟
_ راجعه "لندن" انا اللى كنت هنا علشانه خلص اقعد ليه تاني ..
_ انا ممكن اتكلم مع صاحب الشركه يجهزلك عقد تاني و ..
ابتسمت "ريم": لا شكرا .. انا ليا حياه فى "لندن" وشغلي هناك ..
بنبره حزن: يعني مش هشوفك تاني ..
ابتسمت "ريم" ونظرت اليه : انا سعيده انى شوفتك ولو حصل والقدر جمعنا واتقابلنا تاني اكيد هكون سعيده ,..!
_اتمني يحصل ..
تصبح ع خير ..
_تصبحي ع خير ..
اتجهت "ريم" للداخل وتحرك "لوهان" الى منزله وجلس فى غرفه المكتب وتنهد تنهيده عميقه مع شعوره بدقات قلبه المتسارعه وتفكيره الزائد فى "ريم" ,,لم يستطع النوم من التفكير والحيره مما يشعر وتكرار الوميض وظهور وجه "ريم" حتى فى احلامه ... من كثره التفكير استسلم للنوم فى مكانه ,, تاني يوم اتجه للكافيه لرؤيه اللمسات الاخيرة ونظراته ل "ريم" اغلب الوقت ,, منتصف اليوم ذهبت "ريم" الى المنزل ل شعورها بالارهاق وكانت بتابع عبر الموبيل ,, ليلا اتجهت "ريم" للكافيه للنظره الاخير قبل الافتتاح غدا ,, فا استقلت سياره "مريم" واتجهت للكافيه ووجدت الانوار مضاءه اغلقتها واتجهت للمطبخ وجدت "لوهان" امامه طبقين من الباستا و4 زجاجات من الكحول :
_ مستر "لوهان" ..؟
_ ريم .. انتي جيتي انا كنت مستنيكي انا عملت الباستا و..
لاحظت "ريم" عدم اتزانه :
_ انت شربت كتير ..
نظرت حواليها وحاولت تساعده ع الوقوف واتجهت للحوض وامالت راسه وفتحت المايه البارده ,, ثم اخذته فى الخارج فى الهواء واحضرت له شئ دافي ولكن تاثير الكحول موجود :
_ انت كويس .. محتاج تروح مستشفي ..؟
_ انا بخير .. بخير
_ هطلب تاكسي لان صعب تسوق كده ..
مسك ايديها : انا كداب ..
_ ايه ..؟
_ انا مش كويس ,, مش كويس خالص ..!
نظر الى "ريم" : احنا اصدقاء صح ..؟
_ ايوه ..
_ لا مش اصدقاء ,, انتي مين .. عاوز اعرف انتي مين ؟
_ انا ..
_ ايوه .. انتي مين ,, انا قبل ما تظهري كنت صدقت الحياه اللى عايشها و استقريت وحياتي منتظمه متجوز واصحابي وشغلي كل حاجه كانت واضحة بالادله ,, ظهرتي وكل حاجه اتلغبطت ,, انا عارف انه مش صح ,, ومينفعش احس بكدا لكن مقدرتش اسيطر ع مشاعري من اول مره شوفتك ..اول مقابله هنا ودموعك كانت بتوجعني كأن انا السبب فيها ,, ( وضع يده ع قلبه) قلبي حس بخلل طول الوقت فى كل مره بكون معاكي,, مش قادر مبصلكيش ودايما بدور عليكي حتي لو متكلمتش معاكي فشايفك بعنيا كفايه ,, معاكي بحس انك مش غريبة عني ,,مينفعش يوم يمر من غير ما اشوفك او اكلمك ,,قبل ما بنام لازم اكلمك ,, معاكي بحس بالامان والطمائنية اللى كنت بدور عليهم ,, بتظهريلي فى مشاهد غير واضحه حتى احلامي بتكوني فيها ,, انا مش عارف اى حاجه بعد كده ,, ضمير ,, ذنب ,,
_ انت مش فى واعيك هطلب عربيه و..
_ انتى متجوزه وبتحبي جوزك اللى غايب عنك سنين ومتعرفيش حاجه عنه وانا متجوز ومستني طفل قريب ,,تخيلي مهمنيش كل دا وانه غلط ومفكرتش فيه اصلا وببقي عاوز اكون معاكي ,, عارفه كام مره ببقي عاوز اضمك فى حضني وبتردد فى اخر لحظه ,,عارف ,,عارف انه مينفعش وغلط ,, لكن مش قادر ولا فاهم انا تعبت ..تعبت ومش قادر اكمل كده مش قادر ..
بدموع تتساقط: لدرجه دى وجودي سببلك كل التعب دا ..
- ايوه .. انتى ظهرتي ليه؟! ظهورك لغبط كل حاجه جوايا ,,انا لودلواقتي قالولي تتمني ايه كنت قولت انك متظهريش فى حياتي ومحسش بكل اللغبطة دى والوجع دا ,, انا تعبان ,,تعبان جدااا
انهمرت دموع "ريم" وسقط "لوهان" فى حاله اغماء من الكحول ساندته "ريم" وهى بتبكي :
_ انا اسفه .. انا اسفه ..
طلبت تاكسي وطلبت من السائق توصيله للمنزل وعادت الى المنزل وكان "امير" فى انتظارها ورأها تبكي :
_ فى ايه يا "ريم"..؟
_ امير عاوزه ارجع "لندن" ..
_ تمام احنا راجعين بعد يومين ..
_ ارجوك عاوزه ارجع "لندن" بكره الصبح انا مش قادره اقعد اكتر من كده مش هقدر ..
_ حاضر حاضر مهما كان بكره هتكوني فى لندن ..
اتجهت "ريم" لغرفتها وفتحت كف يديها ودموعها تتساقط ع الحرف ,, تاني يوم سافرت "ريم" الى لندن ,, استيقظ "لوهان" وشعر بصداع رهيب وغير متذكر غير مقتطفات وانه قابل "ريم" لكن الحوار غير متذكره ,, استجمع شتات نفسه واستعد وذهب للكافيه ل الاحتفال ب الافتتاح وعيونه تبحث عن "ريم" وسط الجمع ,, حضر جميع المدعويين و"ريم" غير موجوده ,, اتصل بها ولكن موبيلها كان مغلق ,, سئل احدي الحاضرين وعلم انها عادت الى "لندن" ,,شعر بضيق وحزن وملامحه كانت حزينه طول الحفله ولاحظ ذلك "جى وو" ولكن لم يتحدث معه ,,,!
عادت "ريم" الى المنزل فى "لندن" وكان فى استقبالها حنان وعاصم و"رامي" ,, اول ما دخلت "ريم" المنزل ونظرت الى "عاصم" انهمرت فى البكاء واتجهت الى حضنه وضمها "عاصم" بحنيه الاب وتفاجئت "حنان" من تصرف "ريم" ,, منع "عاصم" "حنان" من اى كلام واسكاتها ,, اتجهت "ريم" ع غرفتها وجلس "امير" مع حنان وعاصم :
_ هو ايه اللى حصل يا "امير" .؟
_ انا مش عارف زى زيكم ..احنا كنا هنيجي بعد يومين فجاءه هى طلبت تسافر ,,
تحدث عاصم: اكيد فى سبب انها ترجع قبل ميعاد سفرها بيومين لكن لغايه ما "ريم" تتكلم محدش يتكلم معاها ولا يسألها ممكن ,, ممكن يا "حنان" ..
_ حاضر يا عاصم حاضر .. انا اساسا كنت رافضه فكره انها تقعد هناك وهو فى الحاله دى ,, اهى رجعت ايد ورا وايد قدام وهو لا افتكرها ولا اى حاجه .. عذبت نفسها ,,
_ حنان .. مش عاوزك تتكلمي مع "ريم" فى اى حاجه تخص الموضوع دا ..
رد "امير": رغم قرار ريم الغلط لكن هى لو معملتش كده مكنتش هترتاح يمكن النتيجه كانت صعبه عليها بس التجربه وصلتها ل كل الكلام اللى عاوزين نقوله هى عاشته
_ ولوقت ماهى تتكلم مفيش حد هيفاتحها فى الموضوع تمام ..
_ تمام ..
عاد "لوهان" للمنزل بعد انتهاء حفله الافتتاح ,,"يومي" بسعاده :
_ اخيرا اليوم عدي كانت حفله جميله ..
_ اها .
_ مالك .. فى حاجه مضايقاك طول الحفله ساكت ومبتتكلمش ؟
_ لا بس تعبان شويا
_ نروح المستشفي ..؟
_ لالا انا هرتاح شويا الفتره اللى فاتت اجهدت فيها من تجهيزات ..
_ طيب يلا نطلع اوضتنا ترتاح ..
_ شويا وهحصلك ..
وضعت يداه ع بطنها : انا وبيبي مستنينك ..
_ اوكيه ...
اتجه للمكتب ووضع الجاكت ع كرسي وجلس ع المكتب واطلق تنهيده عميقه وحاول الاتصال ب "ريم" لكن الرقم كان مغلق وزاد من ضيقه ,, بجانب الجاكت لمح الجواب كان "جى وو" اعطاه فى الحفله من "ريم" ,, جلس فى المكتب وفتح الجواب :
_ لوهان ,,افضل وقت عشته كان معاك واعتز جدا بصداقتك المميزه ,, عاوزه اقولك اسفه وشكرا ,, اسفه ع اى حاجه حسيت بيهاوحيرتك وشتتك وتعبتك بسببي ,, وشكرا ع الوقت اللى سمحتلي اكون فيه معاك واحنا بنجهز الكافيه ,,الوقت دا كنت محتجاه جدا فى الفتره الاخيرة كل لحظه فيه كانت بالنسبالي حاجه كبيره ومهمه ,, انت ساعدتني جداا اكثر مما تتخيل بالوقت دا ,, انا ممكن اكون كنت متمسكة بحاجات مكنش ينفع اتمسك بيها وفهمت كده متاخر ,, انا لو كنت قابلت زوجي فى ظروف مختلفه من غير الالم وحزن اللى عاشه كانت الامور هتكون مختلفة بالنسبه لينا ,,كنا هنكون مع بعض لكن القدر قراراته بتختلف عن رغبتنا ,, عاوزه اقولك الوقت اللى قضيته معاك ساعدني اسامحه عن الالم اللى حسيت به لما بعد عني وسابني لوحدي وتذكرت افضل الاوقات من حياتنا مع بعض ,, انا مش هقدر اقول انى هنساه رغم بعده ومش عارفه هقابله تاني ولا لا ورغم افتقادي واشتياقي له,, لكن هقول انا هقدر اكمل حياتي ودا بسببك ,, مش هنسي الوقت اللى قضيته فى كندا معاك ,, , كن سعيد فى حياتك واتمنالك تحقق الاستقرار والامان وتجمع الاجزاء اللى بتدور عليها فى حياتك وقتها اتاكد انك هتتمسك بيها ,, اتمنالك كل السعاده لانك تستحقها ,, ريم ..!
انهى "لوهان" قراءه الجواب وتساقطت دمعه من عينيه جاهل مصدرها وسببها هى والنغزه فى صدره وفجاءه شعر بصداع وبوميض ومشاهد اكتر ب اشخاص وريم ,,,!
فى "لندن" مر يومين ع عوده "ريم" الى "لندن" وكانت صامته اغلب الوقت ,, جلست فى الحديقه مع "جنه" واتي "عاصم" بعصير الفراوله والشوكلت ل "جنه":
_ شكرا ..
_ انا عملت العصير مخصوص ليكي ..
_ شكرا يا اونكل ..
_ انا جيت اقولك العصفوره قالتلي عاوزه تتكلمي فجيت بسرعه انا هسمعلك مهما كان كلامك ..
سكتت "ريم" ودموعها تتساقط :
_ انا كنت غلط ..
_ يعني ..؟
_ كنت غلط لما فكرت اكون معاه وثقت فى حبنا وقلبه وانه هيفتكرني من غير ما اعرضه ل اى أذي او خطر ,, كنت فاكره انا هستفز ذاكرته واجبرها تفتكرني لكن اللى حصل كان العكس ,, وجودي شتته وعذبه ودخله فى متاهه ,,صداقتنا كان ستاره بيداري وراها مشاعره وعاش فى صراع والالم ,, مشاعره ليا منعها لانه محبش يدى مشاعره ل انسانه متجوزه بتحب جوزها اللى سابها وبعد عنها وهو متجوز ومنتظر طفل .. حس انه بيغلط ووجودي معاه بيستمر فى الغلط ,, كان لازم ابعد وابعد جدااا عنه ,, انتم صح لما قولتولي مفضلش جنبه هتعذب بنسيانه مكنتش اعرف انا بعذبه بيا ومقدرش يفتكرني ,,, انا اسفه ..
_ ريم .. انتى حاولتي ومفيش غلط ,,كنتي هتعرفي منين اللى هيحصل متشيليش نفسك ذنب ,,
_ انا كنت سبب الالم عاشه لدرجه انه اتمني انى مكنتش اظهر فى حياته ,, ظهوري ضره اكتر ,,
_ دلواقتي هتعملي ايه ؟
_ هو مستقر هناك وبخير دا اللى عاوزاه ,,دا قدري وانا متقبلاه مش هقدر اغيره ..
مسك ايديها : توقعي اى حاجه يا "ريم" الحال بيتغير فى لحظه ,, نصيحتي ليكي اهتمي بحياتك وبشغلك وببنتك اكتر حاجات محتجالك دلواقتي ,, قاعدتك كده مش هتفيدك وسيبي الايام زى ماهي ولو القدر غلبك انه يبعده عنك اثبتي للقدر انك قوية وهتكملي ,,
_ حاضر ..
مر شهرين ع افتتاح الكافيه لكن "لوهان" كان غير سعيد دائم الشرود قليل الحديث ,, فى كل مكان يتذكر "ريم" وتكررت الوميضات بكثره ولاحظ التغيير "جى وو" :
_ لوهان .. مش ملاحظ انك متغير المكان دا كنت حاطط عليه امال كتيره لكن انا شايف انك مهمله .
_ حاسس ان انا تعبان ,, مش قادر اركز فى ولا حاجه ,, صداع فظيع من وقت ما بنام لوقت ما اصحي حتي فى نومي .
_ ليه كده ..
_ بفتكر مواقف ب اشخاص اول مره واكتر شخص "ريم" حتى فى احلامي بتظهرلي
_ محاولتش تكلمها ..؟
_ لا مش هينفع مش هينفع ..
سكت "لوهان" لكن "جى وو" قرر ياخذ خطوة لعدم اراحته لوضع صديقه ,, ففى يوم اتصل ب "يومي" وكانت فى البيت :
_ موضوع ايه المهم اللى طلبتني علشانه ؟
_ لوهان ..
_ ماله لوهان ..؟
_ "يومي" ,, وقت ما حصلت الحادثه انا طلبت منك نبلغ "ريم" لكن انتي كان عذرك انك محبتيش تقلقيها لوقت ما نطمن ع حاله "لوهان" وانا معترضتش لان كان المهم وضعه الصحي ,, ولما عرفتي فقد الذاكره استغليتها لصالحك ,, اخدتي "لوهان" وسافرتي "كندا" ومفيش حد قدر يوصلك ,,بعدها بسنة عرفت بالصدفه انكم اتجوزتوا وهو مفتكرش اى حاجه ,,قولتلك مينفعش وكنت هقوله كل حاجه لكن لما تعب فجاءه الدكتور نصحنا نبعد عنه اى توتر وضغط نفسي وهو كان محتاج يستقر ووعدتيني لما حالته هتستقر هتعرفيه ,, لكن انتي عملتي ايه سرقتي ذكرياته وايامه مع "ريم" واقنعتيه ان انتي اللى كنتى معاه بكام صوره وبكام حكايه مزيفه اللى حواليكي اكدوهاله ,, انا كنت مستني تاخدي الخطوة دى وانا جيت هنا علشان اعرفه كل حاجه لكن يشاء القدر وتظهر "ريم" والقدر يجمعهم تاني مع بعض وبدل ما تساعديه يرجعلها بعدتيهم عن بعض اكتر ,,استغليتي تقرير الدكتور ان ممكن يحصله حاجه وضغطتي ع "ريم" علشان ترجع "لندن" يا اما هتكون معاه ومش فاكرها ,, كنتي بتستلذذي وانتى شايفاها وهى بتتعذب فى كل لحظه وهى معاه وهو مش فاكرها ولا فاكر بنته ,, انتي عارفه انا سكت ليه؟! , مش علشانك ,, "ريم" اللى طلبت مني اسكت ,, ريم اتقبلت الواقع اللى انتى زيفتيه وبعدت ,, ريم وبنتها مكانهم هنا مع لوهان ,,,انتي سرقتي حياه لوهان يا "يومي" ,,
_ لا انا مسرقتش ,, القدر اللى سمح ل ريم بفرصه انا كمان سمحلي فرصه ,,واهى كانت معاه 4 شهور ومفتكرهاش لانه مش عاوز يفتكرها لانه حبني انا وعاوز يفضل معايا ..
_ ومين قالك مفتكرهاش ,, "ريم" مع "لوهان" فى كل لحظه ,, وهو صاحي وهو نايم ,,انتي مش ملاحظه الفرق بين قبل ظهور ريم وبعد سفرها والتغيير اللى حصله ,, "لوهان" افتقد ريم يا "يومي" ,, ولانه فاكرها غريبه عنه ومتجوزه بقي بيتجنب الكلام عنها علشان ميجرحكيش لكن الصح هو انه يفتكرها ويكلمها ويرجعلها لانها مراته .. مراته وحبيبته ,,حب عمره وام بنته ..
_ جى وو لو سمحت دى حياتنا مش هسمح ل اى حد يدخل فيها ..
_ لا هدخل لانه صديق عمري ومش هسكت بعد كده وهو بيدمر قدامي ,, وصحيح اللى تسمح انها تدفع فلوس لناس يبعتوا جثه ل "ريم" علشان يقنعوها انه جوزها مات وتقنعه انها حبه الوحيد وتسرق ذكرياته مع اللى حبها وتنسبها لنفسها اتوقع انها تزييف حملها علشان تربطه بيها اكبر ..
_ ايه اللى بتقوله دا ..؟!
_ اللى بقوله ( اخرج ورقه من جيبه ) اخر تيست عملتيه فى المستشفي من شهر واثبت ان مفيش حمل ,, ودا معناه انه مكنش فيه من الاساس ,,"يومي" فوقي من الوهم دا انت بتظلمي "لوهان" وبتظلمي نفسك معاه ,, لوهان محبكيش ولا هيحبك زى ماانتى عاوزه ,, لوهان بيحب ريم وبس .. بيحب ريم وبس ..
_ جى وو..
_ صدقيني لما يعرف مش متخيل هيكون رد فعله ايه ..
_ وهيعرف منين ولا مين هيقوله ,, انت مستعد تتحمل مسؤلية اى حاجه هتحصله لو عرف ..
_ انا ..
فى اللحظه دى دخل "لوهان" ومصدوم من الكلام وماسك راسه من الصداع ولانه شعر بتعب وقرر يرجع البيت يرتاح سمع كل كلامهم وبيسترجع مواقفه مع "ريم" وحديثها عن زوجها ودموعها وبعض المشاهد اللى بيفتكرها كان الموقف صدمة بالنسباله :
_ لوهان ..
بيحاول يتماسك وماسك راسه :اللى سمعته دا بجد .. ريم مراتي وجنه بنتي ,,
قربت "يومي": لوهان اسمعني الاول و ..
لسه هيتكلم وقع اغمي عليه فى الارض ,, بسرعه اتنقل للمستشفي ولكن استمر فى غيبوبه مده15 يوم ,, كانوا فى حاله من التوتر والقلق بسبب وضعه الصحي والاصابه ,, استيقظ "لوهان" من الغيبوبة واول اسم نطق به "ريم" ,, بعد الفحوصات والكشف تبين اثر الصدمة كانت عامل محفز ل استرداد الذاكرة لكن هو بحاجه الى جلسات علاج ل اتمام شفائه الكامل واسترداها الكامل وكانت رغبته ,, ورفض مقابله "يومي" وكان "جى وو" ملازمه ,, مع عوده ذاكرته شعر بالالم والوجع لتجاهله ل "ريم" ,, وروي "جى وو" ع كل حاجه وعن "ريم" وانها تحملت اقسي ما تستطيع للبقاء بجانبه من الالم والوجع ,, خرج من المستشفي وزار "مريم" و"ادمز" وعلموا برجوع الذاكرة وطلب منهم معرفه ما حدث ل "ريم" ف فترة غيابه ,, عاد الى الفندق واعاد قراءه جواب ريم الاخير وكان يبكي بحرقه :
_ لوهان .. ممكن تهدي انت ناسي انك لسه تحت العلاج ومينفعش تضغط ع نفسك كده ..
_ انا مش قادر اتخيل ازاى معرفتهاش ,, انت متخيل "ريم" عملت ايه ,, عارف ريم مرت ب ايه ,, ابشع احساس فى الكون ان اللى بتحبه يجهل وجودك وميعرفكش ويعاملك ك الغريب ,,
_ انت مكنتش تعرف ,, انت مقصدتش تعمل كده اهدي ,,وغير كده انت حبيت "ريم" تاني احساسك اتجاهها كان حب يعني ماانكرتهاش ,,
_ انا مش مسامح نفسي ولا هسامح نفسي ع اللى عملته فيها وكنت سبب وجع ليها ..
_ ريم نفسها عذراك يا "لوهان" ,, واللى انت بتعمله فى نفسك دا مش هيفرحها ولا هيرجعلها اللى فات ,, انت عارف تعمل ايه ,, تكمل علاجك وترجعلها دى اللى هى عاوزاه ,, ترجعلها وترجع ل "جنه" ترجع لحياتك اللى اتسرقت منك 3 سنين ,,,
_ هواجهها ازاى بعد ما انكرت وجودها ..
_ ريم بتحبك ,, واللحظه اللى هتشوفك قدامها هتغفرلك اى خطا مقصود او غير مقصود ,, حبكم اقوي من المستحيل انت ناسي انتم مع بعض ازاى ,, انتم مريتوا بكتير متتضعفش وحبك هيقويك ,,
كلام "جى وو" شجع "لوهان" وحفزه ع استكمال علاجه لعوده الى "ريم" ...!
فى "لندن" "ريم" عادت الى عملها فى الديكور وتحفيز وتشجيع اللى حواليها كان عامل مهم فى استمرارها ,, كانت بتفتقد "لوهان" دائما وكانت بتبكي اشتياقأ لكن كانت تتجنب السؤال عنه ومكتفيه ب احساسها ,, كان "امير" يعلم بحاله "لوهان" وتابعها من بعد وحاول الا يتسرب خبر دخوله المستشفي ل "ريم" ونجح فى ذلك ,,وكان اكبر المساندين ل "ريم" ,, فى يوم الويك اند تجمعت العائله وكان الغداء باربكيو شواء فى الهواء الطلق ولاحظت "رنا" نظرات "امير" ل "ريم" وهى بتلعب مع جنه وملك :
_ اللى بتعمليه فى "امير" دا حرام يا "ريم " ..؟
_ هو ايه اللى بعمله ..؟!
_ امير بيتعذب من انتظاره ليكي ,,هيموت عليكي يا بنتي وانتي ولا هنا ,, الكل ملاحظ وانتي لا انه بيحبك ..ومستني توافقي ويتقدملك رسمي ..
_ استني بس ,, انا موعدتش "امير" ب اى حاجه علشان يستناني وبعدين اوافق ع ايه؟
_ تتجوزو .. امير بيحبك ..
_ وانا متجوزه ..
_ نعم .. و شهاده المحاكمه انك ارمله بتعمل ايه انتي قانونا غير متزوجه حره ومعاكي ورق يثبت دا
_ ورقه ايه اللى ترتبطني او تفصلني عن "لوهان" ,,ماما اللى صممت عليها وسبتها لكن لا انا متجوزه ..
اقتربت "حنان" : مالكم يا بنات ..؟
_ الحقي "ريم" يا ماما .. بكلمها ع "امير" ترحمه من عذاب الانتظار وانها حره نفسها تقولي انها متجوزه ..
_ ايه يا "ريم" دا ,, انتي نسيتي ولا ايه ..؟
_ انتم اللى نسيتوا انا متجوزه وجوزي مسافر
_ جوزك مين .. جوزك اللى مش فاكرك ولا فاكر بنته ؟
كلام "حنان" الجارح صدم "ريم" وحاولت "رنا" تهدي الامور :
_ ماما متقصدش يا "ريم" هى تقصد ..؟
_ لا اقصد يا "رنا" ,, هى محتاجه تفوق بقي من الوهم اللى عايشه فيه دا ,, "لوهان" صفحه واتفقلت من 3 سنين ,, من الاساس هما مش لبعض ,, انهم يكونوا مع بعض دا كان مستحيل واللى حصل اكبر دليل ع كلامي ,, عايشه فى انتظار ملوش ملامح ,, ممكن تقوليلي مين اللى مهتم ببنتك وبيعاملها زى بنته وهى شايفاه ابوها ,, مين اللى فى مدرستها ولا لما بتتعب بيجري ويسأل ويهتم ,, مين يا "ريم" .. ابوها اللى ناسيكم ولا "امير" ,,, فوقي بقي من الخيال والاحلام وبصي ع الواقع ,,
_انا مش خياليه ,,انا متجوزة و"جنه" عارفه ان ابوها مسافر ولو مرجعش انا متجوزه وابوها "لوهان" ,, ولما اموت هموت وانا مرات لوهان وبس حتى لو مش موجود ,, و"امير" علاقتي انا وهو بعد اذنكم متتدخلوش فيها ..عن ازنكم ..
فى الوقت كان "امير" واقف مع "فريد و"عاصم" :
_ ايه يا "امير" متعبتش من النظرات الصامته دى
تدخل "عاصم": تقصد من الانتظار الصامت ..
ضحكك"امير": هو انا وقعت بينكم ولا ايه ..؟
_ بجد يا "امير" كفايه كده واتكلم معاها واعترفلها بحبك اللى كلنا ملاحظينه دا
ابتسم "امير": لدرجه دى انا واضح ..؟
ابتسم "عاصم": الحب مبيتخباش طول ماهو حقيقي ..
_ انت حبك ل "ريم" غيرك كتير ولغايه دلواقتي مفيش غيرها فى قلبك و ..
تدخل "امير": و احلى حاجه حصلتلي فى حياتي ان انا حبيت "ريم" ,,مقدر ليا احبها لكن حب غير متبادل ودا قدري ,,استوعبته متاخر واتقبلته ,, "ريم" بتحب "لوهان" سواء موجود معاها او لا .. زى ما انا بحبها سواء معايا او لا ,, هى قلبها معاه مفيش مجال لشخص تاني يدخل ,, انا مش زعلان بالعكس انا وجودي معاها وهى بخير دا اهم بكتير من مسمي علاقه بيكون بينا ,, سعادتها هى و"جنه" اهم حاجه فى حياتي بس كده ..
سكت "فريد" وابتسم"عاصم" ووضع يده ع كتف "امير" :
_ انت كده امير ابني وصدقني فى يوم هتقابل اللى تكون قدرك وانت قدرها ..
_ يا مسهل الحال ..
ذهب "امير" يلعب مع "جنه" و"ملك" و"رامي" ,, اقتربت "ريم" وتمعنت النظر فى "امير" ومعاملته مع "جنه" ولاحظ "امير" نظراتها واقترب منها :
_ لو عاوزه تتعرفي اسف انا مرتبط
ابتسمت "ريم"..: عاوزه تقولي ايه ؟
_ اممم هو واضح اوي ..
_ انا "امير" يا "ريم" . قولي فى ايه سامعك ..؟
_ مش ناوي تفرح اللى فى البيت بك مش ملاحظ انك العازب الوحيد ومطول
ضحك: مش لما القي بنت الحلال ..
_ معقوله ملقتهاش انت بتلف العالم ..
_ بلف العالم لكن قلبي فى مكان واحد ,, بلف الف الف وارجعله تاني ..
لاحظت"ريم" التلميح عليها :
_ مش يمكن قلبك فى مكان الغلط وانت مش حاسس ..
_ امممم معتقدش انه غلط لانه اكتر مكان قلبي فى امان فيه
_ انسي يا "امير" انساني وشوف حياتك
_ لو انتى قدرتي تنسي "لوهان" انا هنساكي ..
_ لكن ..
_ لكن انا مش عاوز حاجه منك ,,مش مستني مقابل ولا رد ولا ارتباط ولا اى حاجه ,, انا الاول كنت ممكن اعمل اى حاجه علشانك لكن انتي والاحساس اللى حسيته اتجاهك عرفني ان اللى بيحب حد مش شرط يكون معاه ,,اللى بيحب حد يتمناله الخير والسعادة ولو ب ايده مساعده يقدمها بكل حب وميستناش مقابل ,, اللى بيحب ميبقاش اناني ولا طماع ,, اللى بيحب يحب الحب نفسه الاحساس ويشكر الشخص اللى كان سبب ظهور الاحساس دا ,, الاحساس دا اللى علجه من كل الافكار الغلط ,, حبي ليكي يا "ريم" لا بشروط ولا فى انتظار مقابل ,, انا بحبك ودا قدري وانتى بتحبي لوهان ودا قدرك ومينفعش ندخل فى الاقدار لانها مرتبه من اول ما اتخلقنا ..
_ انا اسفه
_ ايه ..؟
_ انا اسفه ع اى حاجه عملتها لك من غير قصد
_ متتاسفيش انا اللى بشكرك انك سمحتيلي اكون جزء من حياتك ,, انا علاقتي بيكي مش مهم المسمي ايه,, صديق اخ رفيق حتى لو عابر سبيل فى حياتك هاخد فترتي وهختفي انا موافق , المهم انك تكوني بخير علشان انا اكون بخير واى حاجه هقدر عليها هعملهالك اكيد ,وياعالم فى وقت ما القدر يفاجئني ويكافئني بقدري اللى منتظرني فى مكان ما فى الكرة الارضية زيك ,, بما انك احتليتي كوريا ف انا هتجه ل افريقيا او امريكا الجنوبيه اهو نبقي منتشرين فى العالم ونبقي احنا كينج ذا وورد
ابتسمت "ريم" وتساقطت دموعها : بجد يا امير انت انسان جميل جدا ويا بختها اللى هتكون معاك
ابتسم "امير": ويا بخت "لوهان" بيكي ..
_ لوهان ..
_ القدر يا "ريم" بيفاجئنا بحاجات غير متوقعه وانا حاسس انك هتتكافئي ع انتظارك وايمانك بحبك .. لكن فى الوقت المحدد انا متاكد ..
ابتسمت "ريم": انت من احلى مكافاءات القدر ليا يا "امير" ..
_ يلا بقي ندخل تلاقيهم نسفوا الايس كريم يلا ..
_ يلا ..
مر مده ع علاج "لوهان" وتحسن وحدد موعد سفره الى "لندن" ,,فى الفندق حاولت "يومي" تقابله وكان بيرفض وعرف انها حاولت الانتحار واتجه للمستشفي :
_ انا كنت عارفه انك هتيجيلي ..
_ ايه اللى عملتيه فى نفسك دا ,,ايه السبب اللى يوصلك لكده ؟!
بدموع: انت .. بعدك عني يعني موتي .. انت مسمعتنيش ولا حتى سالتني عملت كده ليه ,, انا عملت كل دا علشانك ,,انا لا رتبت ولا خططت زى ماانت فاكر الحكايه حصلت مفاجاءه ..
_ المفروض اصدق ..
_ الحفلك ب ايه انا مقصدتش اى حاجه ,,
_ انتى مش حاسه انك غلطانه ..؟
_ هو حبي لك غلطه .. انا عمري كله محبتش غيرك ولا عرفت احب غيرك ولا هعرف احب غيرك ,, حاولت ومقدرتش ,, ولما اتجوزت انت و"ريم" استسلمت وبعدت لكن مقدرتش ابعد عنك ,, لما كنت بشوفكم مع بعض كنت بحس بنار جوايا ,,ببقي عاوزه اروحلها واقولها مكاني هنا انا المفروض اكون هنا ,, استحملت علشانك وسكت ,,كنت بموت كل لحظه بعيد عنك واستحملت ,, لما قابلتك فى ايطاليا كنت واحشنى جداا ولما حصلت الحادثه لو طلبوا روحي علشانك كنت اديتهلهم ,, القدر بعتلي فرصه الاول قولت فتره حلم اعيش فيه شويا ع ان ذاكرتك هترجع لكن مرجعتش وعرضت عليا الجواز وقتها حسيت انك رجعتلي ,,ايوه رجعتلي لانك ليا انا ..
_ انتى سرقتي حياتي مني يا "يومي" ,, سرقتي 3 سنين من عمري ومش من حقك ,, انا طول عمري بحبك لكن زى اختي الصغيره عمري ما لمحتلك ولا عاملتك ب اكتر من كده ,, انتى وهمتي نفسك وصدقتي الوهم دا ,, غلطاتك غفرتهالك لكن المرادي صعب ,, انتى فرقتيني عن الوحيده اللى حبيتها ومحبتش ولا هحب غيرها ,, فرقتينى عن بنتي ,, خلتيني لما قابلتهم اتجنبتهم وجهلت وجودهم ,, خلتيني اعيش احساس اتعذب به وهى قدامي ومش قادر اخدها فى حضني لانه مينفعش ,, متخيله هى شايفاكي فى حضني وساكته وهى الاحق ,, انتى متخيله ,,معتقدش ,,لانك مبتحبيش حد غير نفسك ..
_ لا بحبك انت ..
_ لا بتحبي نفسك وبس .. حبك لنفسك ملي قلبك حقد وغيرة وطمع ان كل حاجه عاوزاها تاخديها ومش مهم غيرك يحس ب ايه ولا يمر ب ايه المهم انتي ,, مفيش رضا بقدرك وبحياتك مشوفتيش مين بيحبك وهو معاكي ,, انا لو غفرتلك اللى عملتيه معايا مش هقدر اغفرلك اللى عملتيه مع "ريم" واللى حسته "ريم" ,,, من انهارده مفيش حد اعرفه اسمه "يومي" وعيشي فى عزله ووحده يمكن لما تعيشي لوحدك تقدري اللى كنتى فيه ودمرتيه بنفسك ,,
انهارت "يومي" بالبكاء وخرج "لوهان" من المستشفي ودخل "جى وو" و"يومي" بتبكي اقترب اليها وضمها : انا مش هسيبك يا "يومي" المهم انك تحسي بغلطتك اللى عملتيه صعب صعب ,,
قرب يوم عيد ميلاد "جنه" ال 6 وكانت "ريم" بتجهز ل الاحتفال لكن "امير" تولي مسؤلية الحفلة :
_ هيتأجل العيد الميلاد اسبوع لان فى شغل ضروري مش هقدر ااجله
_ مفيش مشاكل يا "امير" مش لازم حفله كبيره نحتفل مع بعض فى البيت وخلاص
_ااى تقولي كده يا "ريم" لا طبعا "جنه" يتعملها احلى عيد ميلاد وانا وعدتها انه هيكون احلي عيد ميلاد هتشوفه فى حياتها ولازم اكون موجود ,, انا مرتب كل حاجه تمام يا "ريم"
_ تمام يا "امير " ..
مر الاسبوع وجاء يوم 14 مارس وكان "امير" منظم الحفله فى مكان مفتوح واتجمعوا جميعا وحان وقت التورته والشمع و"امير" غير موجود :
_ رامي ..هو امير فين ؟
_ هو بعتني علشان عاوزك هو مستنيكي عند النافوره اللى هناك دى
_ اوك انا رايحه خلى بالك من "جنه"
_ متقلقيش يلا روحي ..
اتجهت "ريم" لنافوره ووقفت تبحث عن "امير" ,, وهى واقفه سمعت صوت من خلفها :
_ريم ..
اتجمدت للحظه من الصوت والتفتت وكانت مصدومه :
_ لوهان ..
كان "لوهان" مرتدي قميص وبنطلون متطابق مع اللى كانوا ريم اختارتهم قبل سفر ايطاليا يحضرر به عيد ميلاد "جنه" ,, اقترب منها خطوه : ريم ..
_ انت هنا بتعمل ايه ,اقصد فى حاجه ؟
كان ماسك بوكيه ورد وعلبه شوكولا : ايوه ,, عاوز نسافر كوريا و اقابلك كل يوم الصبح وانتي قاعده فى الحديقه بتسمعي الميوزك من الهاند فري واكذب عليكي واقولك صدفه وانا بكون قاصد ,,( اقترب خطوه) واقابلك تاني واقولك عاوز نكون اصحاب وانتى ترفضي ,,(اقترب خطوه) واقابلك صدفه فى التخييم ونلعب واكون حصانك الاسود ,, ونبقي اصحاب (اقترب خطوه ) واقابلك الصبح وانتي فى الحديقه و اشرب عصير الفراوله كل يوم معاكي (اقترب خطوه ووقف امامها ) عاوز اكلمك صبح وبليل وانام ع صوتك,, ععاوز العب معاكي لعبه .. ؟
اتفاجئت "ريم" : ايه ..؟
_ نلعب لعبه اننا مرتبطين ونروح نهر الهان ونحضر احتفالات الربيع ونطلع برج نامسان ونعلق قفل كاتبين عليه امنيتنا ونرمي المفتاح وناكل كيمباب وراميون وداكبوكي واكل كوري حلال ,, نلعب ونتراهن وتكسبيني وتحكمي عليا اكل اكل حار ,, وبعد الاكل نروح السينما وتمسكي ايدي واحنا بنتفرج ع فيلم كوري اترجمه ليكي واعترفلك بحبي ل اول مره ,, نخرخ بعد الفيلم ونشتري ايس كريم ونشتري ملابس كابلز جاكت زى بعض ونتصور ونروح نرسم حروفنا فى ايدينا ,,(قرب اكثر ),, و نطلع رحله ونطلع الجبل انا وانتي لوحدينا ,, وفى بيتنا فى نيويورك افجئك بالباستا اللى بتحبيها لكن احتمال كبير هنسي الملح لكن عادي لانها كده هتكون صحيه( مسك ايديها وتتساقط دموع "ريم" ووضع قبله فى كف ايديها ع الحرف ) تسمحي ل قلبي يرجع يتنفس حبك وعيوني تتملي بصورتك واضمك فى حضني واشوف ابتسامتك اللى النجوم بتغير منها لانى مشفتش احلى منك ,, تسمحيلي امسك ايدك ومش هسيبها ..
كلام "لوهان" ذكر ريم ب كل ذكرياتها مع "لوهان ومواقف جمعتهم مع بعض من الماضي ,, عرفت "ريم" ان ذاكرته رجعت : لوهان انت ..
تساقطت دموع "لوهان": انا اسف يا "ريم" ,, اسف ,, اسف ع كل لحظه اتوجعتي فيها معرفتكيش فيها ,, اسف انى بعدت عنك وسبتك تبعدي ,,اسف ع الجرح اللى سببته ليكي ,,اسفه انى مفتكرتكيش لما شوفتك .. اسف ع دموعك اللى كنت سبب فيها طول الوقت اسف انا اسف
_ لوهان ....
مسك ايديها الاتنين وفتح كف ايديها وقبلها :
_ انا عمري ما كنت لحد تاني غيرك ولا هكون,, دايما كنت حاسس ان فى حاجه كبيره ناقصاني ,, كنت حاسس انا مش عايش ,, (مسك ايدها ووضعها ع صدره)مع كل دقه كان بيفكرني بيكي ولا عمره نسيكي ,, كل دمعه كنت بشوفها كانت بتوجعني ,, انا ال 3 سنين كنت مش عايش يا "ريم" ردت الروح فيا لما شوفتك رغم كنت ناسيكي لكن حبك انتصر ع فقدان ذاكرتي لانك جنتي ع الارض وكنت فى جحيم ,, وحشتيني ,,وحشتيني ,, بحبك
انهارت "ريم" فى البكاء وحضنت "لوهان" :
_ لوهان ..انت رجعت ..رجعت ..!
_ ومش هسيبك تاني مهما حصل ولا هبعد عنك لحظه ولا عن بنتنا "جنه" ..
كان من مسافه قريبه واقف "امير" و"عاصم" و"فريد" وحنان" ورنا" و"مريم" وادمز" ,,
ابتسم "فريد ": برافوا عليك يا "امير "
تحدثت "رنا": كل دا تخطيط امير بجد ..
تحدث عاصم: امير كان عارف كل حاجه ورتب كل حاجه سافر وقابل "لوهان"
ابتسم "امير":ماهو ان اوان الوقت اللى يرجعوا لبعض كفايه فراق ليهم ,, هى انتظرت وهو كمان ,,كان فاضل وقت مناسب ومفيش احلي من مناسبه ذكري لحبهم وويرجعوا لنفس اللحظه اللى اتفرقوا فيها يجتمعوا فيها تاني عيد ميلاد بنتهم ,,
"حنان": انا بجد مش مصدقه دا ولا الافلام كل ما اقول انهم يكملوا مع بعض مستحيل يتمسكوا ببعض اكتر
ابتسم "عاصم": لان حبهم ضد المستحيل ,, حبهم سلاحهم ضد النسيان والمستحيل ,, القدر جمعهم مع بعض من الشرق والغرب علشان يثبت ان الحب ملوش مكان معين ولا اشخاص معينين ,,الحب محتاج اتنين يتقابلوا ويثبتوا انهم يستحقوا يكونوا مع بعض ودا من اختبارات القدر ليهم ولحبهم يستحقوا ولا ,, هما الكل اجمع ع انهم لقائهم مستحيل لكن المستحيل مش هو ال مش قادرين نخليه يكون هو ال ربنا مش عاوزه يكون ومع ربنا مفيش مستحيل مع حبهم لبعض مفيش مستحيل فى قاموس قدرهم مفيش مستحيل ولقائهم مش مستحيل ...!
انتهت ...!
رووووووعة
ردحذفعياط حقيقي وانيهار ف لحظة رجوعهم لبعض للمره المليون نفسي ابطل اتاثر بالروايه دي
ردحذف