(19)
للفجر قعدت "تميمه" مع "حازم" يتكلموا وسمعوا اذان الفجر :
_ ياااه الفجر أذن
_ ايوه فعلا ,, اصليه وهنام
_ هو ينفع اطلب منك طلب ؟
استغربت "تميمه" : لو اقدر
_ ممكن نصلى مع بعض بمعنى نصلى الفجر حاضر هتوافقى اكون امام الصلاه ؟
استغربت "تميمه" وسكتت لحظات ولسه هترد رد "حازم":
_ اوكيه يبقى اتوضى وهتلاقينى ف الصاله مستنيكى بس متتاخريش
نزل بسرعه وهى واقفه متفاجئه من الطلب ,, نزلت واتوضت وصحت "نرمين" والشباب وصلوا وكان "حازم" الامام ,, خلصوا صلاه ورجعوا ع غرفتهم وناموا ,,, صحيت "تميمه" ع موبيلها بيرن وكان "هشام" كان بيعرفها انه فى الطريق بصت ع الساعه كانت 7 الصبح ,, صحيت وفاقت كان هو وصل ,,فرحت جدا لما شافته والشباب فرحوا بوجوده وانه هيحضر الفرح ,, حضروا الفطار وواحد من الشباب اتجه لغرفه "حازم" يصحيه وخرج بيتأوب ولسه هيقول "صباح الخير " شاف "تميمه" قاعده جنب "هشام" وبتضحك وبتهزر لاحظ فرق شاسع عن وجودها معاه ووجودها مع "هشام" ,, غسل وشه ورجعلهم وهيقعد :
_ صباح الخير
ردت "نرمين": صباح الخير ايه الكسل دا انت جى تنام هنا
_ معلش بقى نمت بعد صلاه الفجر
_ ومنمتش طول الليل ليه بقى بتحب ولا بتعد النجوم ؟
_ وانتى الصادقه كنت قاعد مع النجوم
بص "حازم" ل "هشام": حمد الله ع سلامتك
_ شكرا .. اتمنى تكون مبسوط معانا
_ هو انتم اول مره اشوفكم انا ع طول معاكم
ابتسم "هشام": اقصد تكون معانا بره شرم ,, انت فى شرم شغل لكن هنا انت ضيف معانا
لاحظ "حازم" طريقه "هشام" انه بيلقح عليه كلام : اهاا ضيف ,, الضيف اللى بيحس بغرابه وعدم راحه فى المكان ويكون محرج انه يتحرك او يتصرف وانا حسيت بعكس كده ,,عموما مهما كان المكان معاكو بيكون مختلف وانا بعرف ابسط نفسى متقلقش عليا المهم انكم مبسوطين
_ اكيد ..
مسك رغيف وابتدا ياكل : وهو دا المطلوب اثباته يلا مش هتاكلو ...
ابتدوا ياكلوا وخلصوا اكل وابتدت "تميمه" و "نرمين" يساعدو العروسه ومامتها والشباب مع "حازم" فى ترتيبات الفرح و"هشام" كانت المكالمات مش سمحاله يكون معاهم اغلب الوقت بيتكلم فى الموبيل ,,, تم الفرح وكل فرح والعروسه مشيت والمعازيم وطلعت "تميمه" و الشباب و "حازم" و "هشام" فوق سطح البيت وعملو قعده وقعدو ع الارض وكانوا جايبين "ذره مشوى" بيشووه ولب وترمس تكمله للسهره ,, قعدوا يتكلموا ويضحكوا ولاحظ "حازم" اندماج "تميمه" مع "هشام" وحب يعرف نوع العلاقه ايه بطريقه ما :
_ عارفين بيقولوا ان الافراح بتجيب افراح ورا بعض يعنى خطوبه "نرمين" و"عبدالله" وبعدها اخت "مسعد" وياعالم مين اللى جى (بيبص ع "تميمه" و"هشام" و"هشام" لاحظ)
رد "هشام": ان شاء الله حياتنا هتكون كلها افراح محدش عارف بكره فيه ايه ؟
وجه "حازم" كلام ل "تميمه": و "تميمه" مخططه للفرحه دى برضه ؟
_ انا بفكر فى مستقبلى حاليا والمسابقه بعد كده اى حاجه تانيه راكناها
_ يعنى مغرتيش من "نرمين" و "اخت مسعد"
ضحكت "نرمين" : تغير مين يا عم ,, دى فريزر متنقل هى شايفه الجواز حاجه مش ضروريه بمعنى مش اهم حاجه فى الوجود فى حاجات تانيه اهم فى حياتها هى رامياه كده للقدر وقت ما يجى النصيب
_ يعنى افهم من كده ان حتى الفكره مش فى دماغها ؟
ردت "نرمين": لا خالص
رد "هشام": محدش عارف هيحصل ايه بكره احنا بنفكر وبنرتب حاجات وفجاءه يحصل غير المتوقع
لاحظ "حازم" تلميحات "هشام" حس انه بيحذره يقرب ليها ابتسم "حازم": اه فعلا .. انتوا عارفين ان لسه فاضل شهريين ع السفر
_ ايوه
_ انا عازمكم كلكم قبل ما ترجعوا شرم تيجوا تقضوا يوم معايا فى الاستوديو بتاعى ,,زى ما انتم استقبلتونى عندكم انا كمان عاوزكم تيجوا عندى ايه رائيكم هتتيجوا
رد احدى الشباب متسرع : اكيد احنا واخدين اجازه اسبوع قبل ما نرجع "شرم" نتجمع ونروح
_ خلاص مستنيكو ..؟
كان "هشام" مركز مع "حازم" و"حازم" كان بيضحك ويهزر وكان بيحاول يجر كلام مع "تميمه" ودا ضايق "هشام" حس بقلق من وجوده معاهم ,,, وهما قاعدين واحد من الشباب اتكلم :
_ ما تيجو نلعب لعبه كده ؟
_لعبه ايه؟ هتقول صراحه هقولك فكك
_ لا هنلعب لعبه اعتراف بمعنى ان كل واحد يختار شخص يعترفله بحاجه اى حاجه والطرف التانى ملوش حق يعترض حتى لو شتمه
ضحكوا كلهم : موافقين
_ موافقين
نبدء من عند "حوده " يلا
_ امممم انا اعترافى هيكون ل "حازم "
"حازم" ضحك: من اولها كده طيب اخبط بس براحه
ضحكوا : عاوز اقولك اانا اسف لانى فهمتك غلط واتخدعت من المقابله الاولى وقولت عنك كلام مش لطيف سواء مع نفسى او وسطيهم ,, لكن لما عرفتكعن قرب واتعاملت معاك حسيت انك واحد مننا ,, وعرفت ان الانطباع الاول مش بيكون ادق عن معاملتك للشخص دا وان لازم اعرفه كويس علشان اكون حكم وراى نهائى من غير ظلم ,,انا اسف
ابتسم "حازم": لاننا اصحاب ومفيش اعتذار بينا لكن مقبول اعتذارك واتمنى تكون انت كمان تقبل اعتذارى ع اللى عملته
_ مقبول ,,, يلا مين بعدى (رفعت ايديها "نرمين") يلا يا نرمو
_ احم ,, بما ان "عبد الله" مش هنا علشان اعترفله وهخلى اعترافى بينى وبينه لما نرجع (ضحكوا) ف انا هعترف ل "مسعد" وهو اعتراف قريب ل اعتراف "حوده "
مسعد : خير
_ بصراحه يا "مسعد" انا مكنتش طيقاك برضه فى الاول كنت متشائم وكئيب كده كل ما كنت بتتكلم بحس الدنيا بتغمق بتغمق على طول كنت بتحبطهم ومكنتش فكرت ايه السبب وحكمت عليك بسرعه واخدت موقف منك واتجنبتك ودا كان غلط لاننا اصحاب فى مجموعه واحده فكان الصح اعرف مالك ظروف الحاله دى وبعدين احكم ولما عرفت ظروف تعب باباك وانك كنت الفتره دى مش عارف تجمع تمن العمليه كان تعبك انك مش قادر تساعده .. اسفه انى فكرت فيك بالطريقه المتسرعه دى
ابتسم "مسعد" : ولا يهمك وانتى اختى ومينفعش ازعل منك
ابتسمت "نرمين": يلا مين يبدء بعدى ( ماندو رفع ايده ) يلا يا ماندو
_ انا اعترافى ل "تميمه"
اتفاجئت "تميمه": خير
_ انا اول ما شوفتك وانبهرت بطريقتك فى الرقص وحبيت تشاركى معانا وانا كنت ليدر المجموعه ولما هما طلبو منك تكونى الليدر كتحفيز ليكى وتشجيع حسيت بخنقه واضايقت حسيت انى مقصر معاهم علشان كده مش عاوزينى ,, فكرت ب انانيه ان ازاى بنت تكون ليدر مجموعه من شباب وكنت بستنى انك تغلطى علشان اقولهم هى دى اللى اختارتوها لكن مع الوقت وحبك لمجموعه واجتهادك فى تصميم الراقصات وان مجموعتنا اتشهرت اكتر من التجديدات اللى عملتيها لينا حسيت ان انتى تستحقى تكونى الليدر وان القياده مش كلام بس وصوره لكن افعال وحب لمجموعه ,, وان مفيش فرق بين شاب وبنت فى اى حاجه اللى يفرق افعالهم عملوا ايه وانتى عملتيلنا كتير دا غير وقوفك جنبنا طول الوقت ,, ف انا قدام الكل بقولك انا اسف
ابتسمت "تميمه": واسفك مش مقبول
اتفاجئوا " ايه "
ابتسمت : علشان انت اخويا والاخوات مفيش بينهم اسف
ابتسم "ماندو" : يلا مين اللى بعدى (رفع ايده شاب تانى )
_ انا اعترف او معنى اصح اشكر "هشام" ع انه وثق فينا وساعدنا وبفضله بعد ربنا وصلنا للى وصلنا ف انا نيابه عن مجموعتى كلها ب الليدر نقولك شكرا
ابتسم "هشام": انتوا اللى تستحقوا الشكر لانكم اثبتولى مع الايام ان نظرتى فيكم كانت صح وانتم تستحقوا الفرصه والنجاح
رفع ايده "حازم" : ممكن اقول اعترافى
_ اتفضل
بص ل "تميمه": انا بحب "تميمه "
الكلمه كانت زى القنبله والكل اتفاجئ ومنهم "تميمه" بصتله باستغراب و"هشام" اتصدم
_ ايوه بحب "تميمه" ,,اصرارها وقوتها وشجاعتها انها تواجه اى حاجه وانها لو وقعت بترجع تقف ,, جدعنتها اتقانها وحبها اللى تعدى مرحله الشغف للرقص ,,احساسها لما بترقص ,, كل الحاجات دى تخلى اى حد يحب شخصيه "تميمه" وانها اثبتت جدارتها انها تكون ليدر مجموعه من الشباب ,, هى شخصيه جديره بالثقه والاحترام
ضحك "حازم" لما شافهم بصيين له ب تركيز وملامحهم متغيره : هو انتم كنتوا فاكرين حاجه تانيه ولا ايه ,, ؟
ارتاحت "ملامح وشهم لكن "تميمه" بصتله وهو بصلها وغمزلها ولفت انتباه "هشام" ورفع ايده
_ ممكن اقول اعترافى
_ اتفضل يا "هشام"
_ هو مش اعتراف هو تاكيد ع حاجه موجوده ل "تميمه "
ابتسمت "تميمه" وكمل كلامه :
_ انا وعدتك انى هفضل معاكى وف ضهرك واوعدك واجدد وعدى انى مش هسيبك مهما حصل
ابتسمت "تميمه" ورددت "نرمين": وانا طيب
ضحكوا الشباب ورد حوده : انتى عندك" عبدالله" خلى "توما" تاكل عيش هى كمان بلاش طمع
كملوا قاعدتهم ولعب بص "حازم" ع الساعه :
_طيب يا شباب انا هستأذن انا علشان يا دوب انام ساعتين لانى مسافر واعرف اسوق ,, وع اتفاقنا قبل ما ترجعوا شرم هتتفقوا مع بعض وتيجوا الاستوديو عندى نقضى يوم مع بعض تمام ,,,
_ تمام ,,
_ خلاص معاكم رقمى وحددوا الموعد وكلمونى هكون مستنيكم ,, سلام اشوفكم قريب
نزل "حازم" وبص "هشام" ل "تميمه"/
_ هو انتى هتروحى الاستوديو بتاعه ؟
_ لو هما رايحين احتمال اروح معاهم بصراحه عندى فضول اشوفه بنفسى انا شوفته مره فى فيديو ع اليوتيوب لكن عن قرب لا
_ اوكيه,, انتى طبعا هتقعدى معانا الاسبوع دا فى القاهره
_ ايوه طبعا اومال هقعد فين
_ وانتى يا "نرمين" ؟
_ والله كان نفسى لكن انا اخدت يومين بس علشان لما اسافر معاكم اخد الاجازه الكبيره
_ ولا علشان "عبدالله" ؟
ضحكت "نرمين": بس بقى متكسوفنيش
ضحكوا كلهم وكملوا القاعده ورجعوا ع غرفتهم وناموا ,,, !
تامنى يوم الصبح اتحرك "حازم" وع الضهر اتحركوا مجموعه الشباب معادا "مسعد" هيقعد مع اهله قبل ما يرجع "شرم",, اتفرقوا الشباب 3 كانوا فى محافظات بيزورو اهلهم وال 3 الباقيين بيزورو اهلهم فى القاهره و "نرمين" اتجهت مع "تميمه" للدار قضت يوم معاها وتانى يوم رجعت ع "شرم" وقعدت "تميمه" مع الاطفال وكانت مبسوطه وهى بتحكيلهم عن "سميه" و "جلال" والدار والورد وبتنصحهم يهتموا بيها ,,,فى يوم قعدت معاهم فى الحديقه بعد المغرب وبتكلمهم عن الورد :
_ زى ما قولتلكم الورده دى وردتكم الخاص تحافظوا عليها وتهتموا بيها ,, علشان تفضل حلوه كده
_ حاضر
بصت ع السما وقربت طفله ليها عمرها 9 سنوات : "تميمه" انتى بتبصى ع ايه ؟
شاورتلها ع نجمه : ع النجمه دى
_ الله دى حلوه اوى ؟
_ انتى عاوزه تكبرى تكونى ايه ؟
_ اكون دكتوره علشان اكشف على اخواتى هنا وميتعبوش خالص
_ ان شاء الله ,, عارف بقى علشان تكونى دكتوره تعملى ايه ؟
_ اخلى بالى من نفسى واهتم بنفسى زى الورده كده
_ الورده دى حياتك لكن علشان تحققى حلمك ارفعيه للسما زى النجمه العاليه دى (شاورتلها ع النجمه ) واجتهدى علشان تتحقق وتقدرى تمسكيها
_ هو انا اقدر امسك النجوم ؟
_ ايوه تقدرى بشرط انك متخافيش ولا تستسلمى ووتجتهدى علشان تستحقى تلمسيها وحلمك يتحقق
ابتسمت الطفله : يبقى انا ههتم بنفسى زى الورده بتاعتى واحلم وارفع حلمى فى السما زى النجمه واذاكر كويس وواجتهد هقدر احققه
_ شاطره ويلا بقى علشان تنامى
باستها الطفله ومشيت ورجعت بصت ع النجمه وافتكرت انها رددت كلام "حازم" قامت من مكانها ودخلت نامت ..!
تانى يوم "هشام" اتصل ب "تميمه":
_ ايوه يا "هشام"
_ بقولك ايه يا "تميمه" مس "امل" مسافره علشان مامتها تعبانه الاسبوعين دول ممكن تمسكى مكانها لغايه ما ترجع
_ مافى مشرفات تانين احسن منى ؟
_ انا عاوزك انتى انا مسافر يومين وراجع علشان اشوف عمتو "رجاء" تعبانه وطلبتنى وهكون مطمن
_ اوكيه بس كده اجازتى هتطول
_ متقلقيش انا اتكلمت شرم وطلبت مد الاسبوع ل اسبوعين
_ ماشى
قفلت "تميمه" ومستغربه من طلب "هشام" ولانها مبتحبش الامور الاداريه الروتين ومكتب وكانت بتحب تتعامل طبيعى وحره ,, تانى يوم الصبح وهى فى المكتب بتراجع اوراق لحفله عيد ميلاد طفله من الدار الباب خبط :
_ ادخل
دخل شاب من مجموعتها : لا ليدر ليدر فى كل مكان ليدر
بصتله "تميمه" وضحكت : يا سلام ,,
قرب منها وسلم : تشرب ايه
_ اى حاجه تفوق يا سياده المديره الليدر
ضحكت"تميمه" : مش اوى كده دا مؤقت بس
_ والله المكان مناسب ليكى لما حكتيلنا عن المكن مكناش نصدق انه بالجمال دا ,, دا انا هاجى انا والباقيين نقعد هنا يومين
ضحكت "تميمه": ليه شايفه فندق ,, بقولك يلا نطلع بره علشان جو المكاتب دا بيخنقنى
_ يلا
خرجت معاه وقعدوا فى الحديقه وعجبه الورد :
_ زى ما وصفتى بالظبط
_ الوصف بينقل نص الصوره لكن الرؤيه وانك تكون قريب بتشوف الصوره كامله والاحساس بيكون اوضح
_ فعلا ,,انتى وصفتيلنا المكان لكن لما شفته طلع حاجه تانيه ,,
_ المهم طمنى ع الاخبار الشباب مبسوطين فى الاجازه
_ ايوه جدااا .. هما عارفين ان الاسبوع دا اخر اجازه وفرصه ليهم قبل ما يرجعوا شرم ويتفرموا الشهرين اللى قبل السفر
_ تمام ...
بص حواليه واتنهد وابتسم :
_ ياريتنى كنت جيت من بدرى هنا بدل ماانا عمال الف فى الشوارع من خنقتى
_ المكان هنا بيديك طاقه ايجابيه فظيعه ,, وبعدين مالك ايه خنقك ؟
_ عارفه لما اقرب الناس ليكى يخنقوكى ويندموكى انك شوفتيهم
_ مين دول ؟
_ اهلى .. دايما يتخانقوا معايا لا عاجبهم اختياراتى ولا حياتى ولا حتى البنت اللى عاوز ارتبط بيها
_ اكيد يعنى ليهم اسباب
_ اسبابهم ان انا لسه محددتش طريقى هما شايفين شغل فى شرم وقفتى فى المحل هناك دا مش ارض صلبه اقدر اقف عليه وافتح بيت ,, وان الرقص دا مش حاجه تاكل عيش وانى ارتبط ببنت بظروفى دى حاجه غلط ومش وقته ,, هو انا يعنى كنت اعرف انى بحبها ,, بجد انا فكرت انى استقر فى شرم واشوف شقه واتجوز البنت اللى عاوزها اهلها موافقين
_ من غير اهلك ؟
_ من غير اهلى ,, انا قولتلهم اعتبرونى يتيم مليش اهل
ملامح "تميمه" اتغيرت " : ايه التخلف اللى بتقوله دا ؟
_ فى ايه يا تميمه ؟
_ فى ان تفكير اصغر طفل هنا احسن منك بمراحل ,, يعنى ايه علشان اهلك معترضين ع اسلوب حياتك ف انا تستغنى عنهم ببساطه كده ,, وايه اهل اللى انت عاوز تخطبها دول ازاى يوافقوا ع حاجه زى كده ,, يعنى بنتهم يرضوا انها تهرب من البيت وتقول انا معنديش اهل ,,, انت مستسهل كلمه يتيم ,, اليتيم حاله وجع طول عمره بسبب انه محسش بالامان وسط اهله ,, متخانقش معاهم وحس بخوفهم عليه ,, محسش قد ايه هو مهم فى حياه حد ,, مطلوب منه يقف ع رجله من غير ما حد ينصحه ولا يوجهه والدنيا هى اللى تخبط فيه وتعلمه ,,
_ انا مقصدتش يا "تميمه"..
قاطعته : انا عارفه انك مضايقنيش انك قولت يتيم وانت مش فاهم معناه ,,اللى ضايقنى انك بسهوله قررت تبيع اهلك ,, بص ,, الاهل مهما كانوا معاملتهم حلوه او صعبه او مش قادرين يفهموا تفكير ولادهم ازاى لكن الاكيد انهم عاوزين ولادهم احسن ناس فى الدنيا ويعيشوا احسن منهم بكتير ,, وبالتالى انك تعيش وتعمل اللى هما مقدروش يعملوه ,,هو بيشجعوك ع كده علشان تستقر وتجيب اولاد يعيشوا احسن منك هما دول تفكير الاهل انما دايما بيتمنوا الاحسن والافضل ل اولادهم ,,, بيختلف بقى طريقه تعبيرهم يا ب اعتراض يا خناق وممكن يتفاهموا ,, ومهما حصل استحاله يتبرى من ابنه ويقول انا معنديش ولاد ,,
_ فى اهالى بيستغوا عن ولادهم فعلا وعايشين
_ انت عارف عايشين ازاى واحساسهم ايه ,, الظاهر مش كل الحقيقه الظاهر بيكون كدبه ,,المشاعر الاصدق هى اللى مبتظهرش والوجع اللى بيموت بيكون جوانا محدش بيحس به ,, وبعدين ازاى اهل البنت دى يوافقوا عليك كده من غير اهلك ,, عيالك لما يكبروا هيقولوهم ايه اهل ابوكم ماتوا وهما عايشين ,,عاوز تحرم اهلك انهم يفرحوا بك .
_ يعنى اعمل ايه ..؟
_ اهدى كده ورتب افكارك من الاول واهم حاجه تفكر فيها اهلك مستحيل تستغنى عنهم مهما كانت الاسباب لانهم هما اللى وهبولك الحياه ميباقش جزائهم تموتهم وهما عايشين ,, اهلك متبعدش عنهم تتخانق وتتعصب لكن ترجعلهم ,,هما يتخانقوا ويتعصبوا عليك تستحمل وترجعهلم ,,هما كبروا فى السن وانت مش هتفضل صغير انت هتكبر وهتكون زيهم ترضى ابنك يعمل معاك كده ,,
_لا طبعا
_ اهو اللى مترضهوش ليك مترضهوش ل اهلك ,, لانك هتكبر واولادك هيعاملوك زى ما اتعاملت مع اهلك ,, ومتستسهلش انك تكون لوحدك بعيد عنهم وان اليتم دى حاجه حلوه ,, اليتم اصعب احساس موجود ,,
_ ماشى خلاص ,,
_ رايح فين ,,
_ امى بعتتلى رساله وقالتلى اتغدى معاهم
ضحكت "تميمه": شوفت ,, انت حاول تفهم بس اختلاف العقليات والازمنه وحاول تتهاون معاهم لانك فى يوم هتكون فى مكانهم وولادك فى زمن تانى ,,,
_حاضر ..
_ والبنت اللى موافقه تاخدك بطولك كده دى كلمها لو عاوزاك تستناك تثبت ع رجلك ويكون بموافقه اهلك ,, انتم مش هتعيشوا لوحدكم فى الدنيا انتم معاكم ناس والاهم اولادكم يكبروا وسط عيله تحتويهم وتحبهم بدل ما يعيشوا مكروهين وكارهين ,,
ابتسم : قولنا مفيش غيرك ليدر .. تمام
_ واى وقت عاوز تيجى انا هنا ,, هرجع بعدكم ب اسبوع لانهم هنا محتاجينى
_ تمام ,,
مشى خطوتين ورجع ,,: توما ,,
_ ايوه؟
_ مش هنروح استوديو "حازم" قبل ما نرجع شرم
_ ظبطوها وعرفونى اظبط نفسى هنا
_ تمام
كان كل يوم "هشام" يكلمها وياكد عليها متسبش الدار مهما كان وكانت دى طريقته انه يشغلها بالدار ومترحش استوديو "حازم" ,,مر يومين و اتصل بيها اتنين من الشباب انهم عاوزين يروحو استوديو "حازم" وقالتلهم يروحوا لوحدهم لان "هشام" طلب منها حاجات فى الدار ومشغوله ,, لكن الحاحهم عليها انها تروح معاهم علشان ميروحوش لوحدهم عرين الاسد زى ما وصفولها المكان عرفوا يستفزوها ووافقت استأذنت ساعتين من الدار واتصلوا ب "حازم"وقالوا انهم جايين وقالهم انه فى انتظارهم وبعتلهم العنوان ,, كانت جاهزه وصلوا للدار ولعبوا مع الاطفال شويا واخدوا "تميمه" واتجهوا ل استوديو "حازم" ,, دخلوا المكان وانبهروا به ب تصميمه ومكانه ,, دخلوا وكانوا اعضاء فريقه بيدربوا وشافتهم "ندى " :
_ اهلا
_ اهلا بيكى
_ خير اقدر اخدمكم فى حاجه فى الاستوديو بتاعنا
حست "تميمه" بنبره تريقه منها : انا مش عاوزين الليدر بتاعك هو اللى قالنا نيجى هنا
_ حازم
_ ايوه حازم .. هو فين ؟
_ مش موجود ,,
اتفاجئت "تميمه" : مش موجود (بصت ل اللى معاها ) مش موجود واكد عليك تيجى
اتكلمت "ندى" بسخريه: هو كده زوم بينسى لان فى حاجات اهم فى حياته شغلاه
بصتلها "تميمه" وحست انها بتقلل منهم ف اخدت اللى معاها وماشين وكانت مضايقه وهما خارجين قابلوا عضو من تيم "حازم" ورحب بيهم :
_ يااهلا بيكم فى الاستوديو
_ اهلا بك انت ..
_ تعالو ادخلوا
رد شاب : لا شكرا .. الليدر بتاعك ادانا ميعاد وخلع
_ لا مخلعش دا كان قايلنا ومعرفنا انكم جايين وهو قاعد اتصلت والدته وقالتله ان والده تعب ودخل المستشفى ف اكد علينا نخليكم تستنوه لغايه ما يرجع ,,هو هناك فى المستشفى دلواقتى ( مسك موبيله يتصل ب "حازم" وكان مغلق ) باين شحن موبيله خلص
ردت "تميمه": ع العموم عرفه اننا نفذنا كلامنا وجينا لاننا بكره كلنا راجعين شرم علشان نجهز نفسنا للسفر
_ حاضر
وقف احدى الشباب : مش الصح اننا نروح نزور باباه هو فى شرم مكنش بيتاخر عن اى حد
_ ها ايه رايك يا "توما" وزياره المريض صدقه واهو حسنه تشفعلنا وربنا ينجحنا ونوصل للفاينل
ضحكت "تميمه": انت بتشحت فكرتى بطالب ثانوى ليله الامتحان مبيقمش من ع السجاده دعوات علشان ينجح
ضحكوا : ها قولتى ايه
_ اوكيه
اتجه الشاب الى داخل الاستوديو واخذ العنوان واتجهوا للمستشفى .. وهى داخله "تميمه" موابيلها رن وطلبت من اللى معاها يدخلوا الاول ,, دخلوا وسالو ع غرفه والد "حازم" ووصفلهم الممرض ,, اتجهوا لغرفه كانت فاضيه وسالو ع "حازم" وشافهم :
_ ايه دا انتم هنا ؟
_ احنا قولنا مينفعش نعرف ان باباك تعبان ومنجيش
_ بجد شكرا ليكم
_ هو جوه ندخل نسلم عليه
ابتسم "حازم": لما نلاقيه نبقى نسلم عليه كلنا تعالو دورو معايا عليه ,,,
فى الوقت اللى "حازم" بيدور ع والده ,,كانت "تميمه" من الوشه مش سامعه الصوت كويس ف بعدت واتجهت لخلف المستشفى :
_ ايوه يا "هشام" مكنتش سامعه ؟
_ انتى فين كده ؟
_ كنت رايحه الاستوديو لكن مكنش هناك فجيت ازور حد اعرف فى المستشفى
_ طيب متتاخريش
_ حاضر
قفلت "تميمه" وسمعت صوت كحه بتبص شافت راجل كبير فى السن لابس لبس المرضى وبيدخن .. بصت حواليها وحست انه هربان هنا علشان يشرب السجاير ,, عملت ان رجلها اتلوت وقعدت جنبه ع الرصيف :
_ رجلك كويسه ؟
_ اه الحمد لله
بصت ع ايده شافت الكلانه وعرفت انه مريض فى المستشفى :
_ هو انت جى تزور حد هنا ؟
_ لا انا عضو هنا فى المستشفى
ضحكت "تميمه": اهااا ,, تبقى مستخبى هنا
ضحكك: ايوه ,, نفسى فى سيجاره وهما مانعينى من التدخين رغم انى قولتلهم مره واحده مرضوش
_ اكيد مانعينك علشان خايفين عليك وع صحتك
_ هيخافوا عليا اكتر منى ,, انا اللى عايش المرض مش هما ,, وانا مش عاوز احرم نفسى من اى حاجه نفسى فيها ,, هى حياه هعيشها مره واحده مش هعملها اعاده يعنى والايام اللى بتمر مش هترجع
_ بس انت كده بتأذى نفسك
_ وهو انا لو سمعت كلامهم هعيش زياده ومش هموت ,, انا كده كده ميت ع الاقل مش هموت محروم هكون عملت اللى نفسى فيه وراضى ع حياتى ,, العمر قطر ماشى ع طول شوفتى قطر بعد ما مشى ع طول رجع بضهره وراه ,,
_ اممم ,, تمام لكن انت قولت سيجاره واحده وانت بتضحك عليا وبتولع فى التانيه كده خم بقى ولعب مش نضيف
مسكت السيجاره وطفيتها وضحك: وانا اللى كنت فاكر انى دوبتك بعيونى الدوبلى طلعتى ناصحه
_ احنا ماشى نأذى نفسها لكن منسيبش نفسنا للاذيه ونقول احنا عاوزين كده ,, حبه كده وحبه كده
ضحكك: انتى اسمك ايه ؟
_ تميمه ؟
_ اسم جميل ل بنوته اجمل ,, "تميمه" احنا عايشين فى الدنيا لفتره محدده منعرفش هتخلص امتى ومينفعش نأجل حاجه ممكن نعملها دلواقتى لبعدين لاننا مش عارفين هنكون بعدين موجودين ولا لا ,, حياتك عيشيها واستمعتى بكل لحظه فيها متأجليش حاجه تقدرى تعمليها دلواقتى ,,متمنعيش قلبك يعيش وروحك تعيش بسبب خوف او هواجس .. من الاخر عيشى
ابتسمت "تميمه": حاضر
_ وابتسامتك جميله اوى متخليهاش تختفى ل اى سبب مهما كان
_ حاضر
_ انتى عارفه انا ارتاحتلك جداا حاسك انك بنتى
_ انت عندك بنات
_ عندى بنتين وولد ..
_ ربنا يباركلك فيهم
_ يارب ,, انتى جايه تزورى حد من اهلك هنا ؟
_ والد صديق ليا هنا
_ انا معطلك معايا ورغيت معلش
_ لا بالعكس انا مبسوطه انى قابلتك ,, تحبى اوصلك لغرفتك
_ لالالا انا هروح لوحدى ,, فرصه سعيده
_ انا الاسعد
مشى الرجل ووقفت "تميمه" تبص عليه لغايه ما دخل وهى رجعت لفت ودخلت من البوابه وموابيلها رن وكانت "نرمين" رجعت ردت عليه ورغت معاها شويا ورجعت سألت ع الغرفه واتجهت ليها وكانوا اصدقائها بيستعجلوها ,, خبطت ع الباب ودخلت وكان "حازم" واقف :
_ اهلا يا "تميمه"
_ الف سلامه على والدك ان شاء الله يكون بخير
ابتسم "حازم": الحمد الله اتفضلى
دخلت "تميمه" الغرفه : مساء الخير (بتبص ع السرير كان الرجل اللى قابلته واتفاجئت ) انت ,,
قرب "حازم": اعرفك يا بابا "تميمه "
_ اهلا يا حبيببتى اهلا بيكى اسمك جميل
_ اهلا يا عمو الف سلامه ع حضرتك
_ الله يسلمك
_ ماما و "حنين" اختى
_ اهلا
_ اهلا
اتكلمت مامت "حازم": نفسى اعرف انت بتروح تغطس فين وبتهرب من الممرضات كده احنا بنقلب المستشفى عليك ومش بنلاقيك
_ متتعبيش نفسك ولا هتلاقو المكان ,,
بص ل "تميمه" وغمزلها وضحكت هى وغمزتله ,,,
_ نستأذن احنا والف سلامه ع حضرتك يا عمو
مدت ايدها وسلمت عليه حست براحه اتجاه ابو "حازم" وكانت مبسوطه انها شافته ,, خرج "حازم" بره الغرفه :
_ بجد انا بشكركم جداا ع زيارتكم واسف انى منفذتش وعدى معاكم
ردت "تميمه": لا ابدا ولا يهمك ظروفك اكيد والمهم صحه باباك طبعا
_ اكيد ان شاء الله نتجمع هناك ونقضى اليوم كله
_ ان شاء الله
سلمو عليه ومشيو ورجعت "تميمه" ع الدار وقعدت مع الاطفال ووصل "هشام" وقعد معاهم ونامو وقعدت فى الحديقه :
_ احلى نسكافيه ل احلى "توما"
_ شكرا يا اتش ,,بس عرفنى هتتخانق معايا ؟
ضحكك" ليه ..علشان سيبتى الدار وخارجتى
_ شوفت علشان مقولتلكش روحت مستشفى بدل الاستوديو
ضحكك"هشام": بعد كده متكررهاش
_ حاضر
_ بس تعرف ابو "حازم" راجل طيب وزى العسل تشوفه ترتاحله اوى وتحبه
_ كويس ,, هو "حازم" كان هناك ؟
_ ايوه طبعا مش ابوه .. ربنا يقومه بالسلامه
_ ان شاء الله
سكتوا شويا ..:
_ عارفه يا "تميمه" انتى لما بتكونى فى الدار بحس ان الروح اترددت فيها وفيا بجد
_ اممم حاسه ان الجمله الجايه دى تقديمتها
ضحك"هشام" قفشتينى ... بجد نفسى ترجعى القاهره تانى ونرجع زى الاول واهو "نرمين" معاها "عبدالله" يعنى مش لوحدها
_ هو علشان اتخطبت او اتجوزت خلاص اشيل ايدى عنك واخرجها من حياتى ولا ايه بالعكس انا هفضل معاها وفى ضهرها ل اخر يوم فى عمرى ,, انا عيلتها وهى عيلتى يا "هشام"
_ مقصدتش كده اكيد ,,القصد ان خوفك عليها يقل عن الاول لانها مش لوحدها
_ والله ابدا ,, "نرمين" اختى وبنتى الصغيره كل ما بتكبر بخاف عليها اكتر ,,
_ يعنى انتى مش عاوزه ترجعى القاهره فعلا ؟
_ مفكرتش او معنى اصح هيكون اخر حاجه اوصلها لو ملقتش قدامى حلول تانيه ,, وحاليا انا ليا حياتى وشغلى واصحابى والمسابقه ,, حياتى فى شرم مليانه كتير وهناك مبسوطه ,, وانا كده كده ع طول هنا اهو مبتاخرش يعنى
_ تميمه ,, انا عاوز اقولك حاجه وكنت متردد
_ قول
_ دايما بحس ان الوقت مش مناسب او الظرف غير مناسب وحاليا مش عارف صح ولا غلط
_ قول وخلاص وانا هحكم
_ تميمه ,,انا ...
_ ها ..
اتردد "هشام": بعد المسابقه هبقى اقولك
_ وهستنى كل دا
_ لما ترجعى ومعاكى تذاكر البرازيل هقولك ,, وعد
_ اممم اوكيه ,,,
تانى يوم صحيت بدرى افتكرت والد "حازم" ف نزلت بدرى واتجهت للمستشفى ومعاها ورد وخبطت ع الباب وكان قاعد ع السرير ودخلت وهو فرح لما شافها :
_ اهلا بصديقتى الكتومه
ضحكت "تميمه": اهلا بصديقى اللى بيدوخ الناس
_ انا غلبان
ضحكت "تميمه": عامل ايه انهارده هربت برضه ؟
_ لا انهارده محطوط تحت المراقبه الشديده معرفتش رغم انى عاوز ادخن سيجاره واحده بس ومش راضيين
_ مش راضيين خالص
_ خالص
_ طيب يلا بينا
اخدته "تميمه" وهربت من الممرضه واتجهوا لمكان اللى شافته فيه اول مره وشرب السيجاره :
_ انت قولت واحده بس
_ واحده بس ,, قوليلى يا "تميمه" انتى فى موضوع الرقص دا بقالك كتير
_ امممم ,, يعنى من صغرى لكن اول مره ادخل مسابقات وكده
_ "حازم" حكالى عنك كتير اوى لدرجه انا كنت هنزل شرم مخصوص علشانك
_ يااااه لدرجه دى
_ ايوه ,, انتى عملتى اللى غيرك مقدرتش تعمله فى سنين ,, "حازم" اتغير خالص وانه يشتغل ويندمج فى الحياه غير الرقص دا كان مستحيل يعمله ,, وان حد يهتم به كتير كده صعب تحصل ,, بعد الحادثه اللى حصلتله والظروف اللى حصلت اتغير وبقى انسان تانى ,, لكن من وقت ما ظهرتى وهو بقى احسن ...كنتى فين من زمان
ضحكت: كنت فى الدنيا ,,بس واضح ان علاقتكم مش اب وابن
_ حازم اخويا الصغير وصاحبى مش ابنى ,, وع فكره كتير كان بيهربنى من مامته زيك كده علشان اشرب السيجاره فى البيت وكان بيدارى عليا زيك (ضحكوا ) بس بجد شكرا ع اللى عملتيه فى "حازم" احنا فقدنا الامل انه يحس بحاجه تانيه غير الرقص ,,لكن انتى غيرتيله حياته واترددت فيه الروح اللى كانت غايبه
الكلام كان غريب ع "تميمه" ومتفاجئه منه : انا كمان بتمنى احلامك تتحقق وتكسبى المسابقه
_ انت كمان ؟
_ ايوه , حازم عاوزك تكسبى المسابقه
_ رغم فريقه داخل ؟
_ قال انتى تستحقى الجايزه اكتر من اى حد لانك مش زى اى حد
سكتت "تميمه" قاموا يرجعوا للغرفه واتكلموا وضحكوا فى الطريق ورجعوا ع غرفته وهما ماشين بيتكلموا شافتهم "حنين" اخت "حازم" :
_ كنت فين يا بابا قلقتنى عليك ؟
_ كنت بتمشى مع "تميمه" يا "حنين" حسيت انى مخنوق وطلبت منها تساعدنى
_ وليه تتعبها معاك
ردت "تميمه" لا خالص مفيش تعب
رد باباها : احنا اصحاب ومفيش بين الاصحاب تعب صح (غمزلها)
ردت "تميمه": صح (غمزتله )
دخلوا غرفته ونام ع السرير واخد العلاج ونام فخرجت "تميمه" ومعاها "حنين" وقعدوا فى الاستراحه امام الغرفه :
_ معلش يا "تميمه" بابا تعبك
_ لا خالص ,, دا انا حبيته جدااا
ابتسمت "حنين": بس تعرفى انتى احلى كتير من كلام "حازم"
اتفاجئت: انا .. بيتكلم عنى انا ؟
_ يوووه دا كل ما يرجع من شرم معندوش سيره غير "تميمه" عملت .. "تميمه" قالت .. وخناقاتكم وكلامكم كل حاجه لدرجه انى حبيت اشوفك اوى واتفرجت ع فيديو العرض الاول والتانى وبجد برافوا عليكى اتقان ومهاره وحب بجد زى ما قال "حازم" انت الرقص اتخلق للى زيك وانتى بتزودى عليه مش هو اللى بيديكى
فرحت "تميمه" من كلام "حازم" : مش اوى كده
_ لا واكتر كمان ,, دا "حازم" مفيش حد لفت انتباهه زيك كده ,, قابل فرق كتير وفى رقصهم حلو ويشد الانتباه لكن ولا اهتم ,, الا انتى حسيت من كلامه انك لقى كنز .. وفرحت انكم اصحاب بعيد عن المنافسه
_ اه ,
بصت "تميمه" ع الساعه: بجد فرصه سعيده انى شوفتك وابقى تعالى شرم اقعدى يومين وبجد هتنبسطى معانا
_ لما ترجعوا من مسابقتكم وتكونى كسبانه ان شاء الله
ضحكت "تميمه": ع فكره اخوكى موجود فيها هو كمان
_ ع فكره اخويا بنفسه نفسه انتى اللى تكسبى هو قالى كده
فى اللحظه دى شافهم "حازم" وقرب : ايه دا ,, تميمه عندنا يا مرحبا
_ جت من شويا وكانت بتتمشى مع بابا
_ بجد ,, طيب كويس المهم ميكونش عاكسك يا "توما" اصل بابا مدوب قلوب العزرا
ضحكت "تميمه" و "حنين": ربنا يقومه بالسلامه
مشيت "حنين"
مد ايده : سلام
مدت ايديها : سلام
بتشد ايديها فضل ماسكها : شهر ونص ونتقابل فى ارض المعركه
_ن شاء الله
_ انا عاوزك تكسرى الدنيا وتفوقى توقعات اى حد
اتفاجئت "تميمه": هو انت مش فى المسابقه ,,؟ اتمنى لفريقك يكسب ,,!
شدها قربت منه : انا بجد بتمنى انتى اللى تكسبى وحاسس انك هتكسبى فعلا ,,
_ ان شاء الله ,, مش ناوى تسيب ايدى
_ هسيبها بشرط
_ ايه؟
_ انك تقوليلى اننا اصحاب ولو موفقتيش هدخل للحج يشوف الحكايه دى اصله مينفعش يقولى انك صاحبته وانا مش عارف
ابتسمت "تميمه": ماانتى ابتسامتك حلوه اهو انهارده عيد يا جدعان
شدت "تميمه" ايدها : بايخ ,, يلا سلام
مشيت "تميمه" واتكلم "حازم" بصوت عالى : اشوفك هناك وهتكسبى
ابتسمت "تميمه" وركبت تاكسى وصلت للدار كان "هشام" هناك وقالتله انها كانت بتزور مريض ,, دخل "حازم" غرفه والده كان صاحى وشاف "حازم" وقعدوا يتكلموا .. كررت "تميمه" زيارتها ل ابو "حازم" مرتين كمان وكانت دايما بتشوف "حنين" هناك :
_ معاكى رقمى اهو تكلمينى
ابتسمت "تميمه": اكيد ا
_ والله يا "توما" انا لما قربت منك حبيتك اوى حسيتك اختى اللى عمرى ما شوفتها
_ ليه كده ؟
_ مش فاكره كنت مجتش لسه فى بيقولوا اتخطفت وفى بيقولوا ماتت بعد ولادتها ,, المهم علشان مش عاوزه اكدرك
_ نكون ع تواصل دايم
_ وهستناكى تيجى شرم
_ اكيد ,,,
,, بعد اخر زياره عرفت من اتصال من "حوده" ان والد "حازم" اتوفى ,, زعلت جدا عليه واتجهت ع العزا هى و "هشام" والشباب .. ولاحظت "تميمه" تاثر "حازم" بفراق والده ,,, رجعت الدار وتفكيرها انشغل ب "حازم" لانها فى الفتره القليله عرفت علاقتهم ببعض ايه شكلهم ايه واخر مقابله مع "والد حازم" وصاها عليه وكانت مستغربه واكد عليها ,,, كانت اخدت رقم "حنين" يومين كانت بتتصل تسأل عليها وعرفت ان "حازم" نام فى الاستوديو ومرجعش البيت من وقت الوفاه ,, وهى كانت هتسافر شرم تانى يوم فلبست وخرجت واتجهت ل الاستوديو وكان مقفول بسبب حاله الوفاه وعرفت من حارس الامن ان "حازم" جوه ,,دخلت وبتدور عليه شافته قاعد ع الارض فى كورنر فى قاعه التدريبات وساند راسه ع الحيطه ومغمض عينه ...كان النور ضعيف شغلته وانتبه "حازم" وبص ليها :
_ تميمه
بتحاول تهزر : بتحضر ارواح ولا ايه ؟
_ انتى بتعملى ايه هنا
_ كنت فى مشوار قريب من هنا وعرفت انك جوه والمكان فاضى فقلت اشوفك بتعمل ايه ؟
_ قاعد
قعدت جنبه ع الارض وسكتوا ..:
اتكلمت "تميمه": انا عارفه صدمه ووجع فراق اقرب شخص ليك فى الدنيا عامله ازاى ,, بتحس ان الحياه وقفت وان طعم الحاجات اختفى والامان اختفى و المجهول بقى مرعب و فقدت متعتك فى الحياه ,,حتى الدموع رافضه تنزل ولما بتنزل بتكون سيول ونغز فى صدرك ,,بتتمنى تنام لفتره طويله تصحى تكون استوعبت او نسيت ع الاقل وللاسف مش هتنسى ,, وكلام الناس اجمد ساب راجل مينفعش تعيط الرجاله مبتعيطش لا عيط هو يستحق انك تحزن عليه لانه مش زى اى حد فى حياتك ,, متستسلمش لناس يحددو تحزن ازاى .. احزن وعيط اه العياط مش هيرجعه لكن هو يستحق تحزن عليه ( دموع "حازم" نزلت ) لكن متخليش الحزن يسيطر على حياتك تعكتف وتوقف حياتك وتنهار لا هو مش هيحب كده ,, لانه وهو عايش مكنش بيحب كده كان بيحب الضحك والهزار بيحب يعيش ,, فهو بالتالى ميستحقش انه يزعل لانه شايف اقرب حد موقف حياته وعازل الناس ,,, بتحبه بجد اعمل الحاجات اللى كانت بتفرحه وهو عايش ,,شوف كان بيحب ايه واعملها ,, شوف انت كنت بتعمل ايه وكنت سبب فى ابتسامته ,, خليه فرحان حتى بعد ما مات وانت هتفرح ,, متستسلمش للحزن لان دا ضلمه لو دخلتها وملحقتش نفسك هتغرق ومش هتفرح اللى مات ولا هتفيدك ,, احنا كلنا رايحين مفيش حد مخلد ع الارض وحياتنا هى حياه واحده نعيشها واللى سابونا احنا ولا هننساهم لانهم محفورين فى ذكرياتنا وقلبنا وروحنا وحقهم علينا اننا نفرحهم بينا وبنجاحنا وان حياتنا كويسه ,, الموت مش حاجه وحشه دا سنه الحياه اللى عايشنها ,, فنعيش ونفرحهم ومنكنش سبب فى حزن ليهم ..!
ابتسمت "تميمه " وبصت ل "حازم" كان بصصلها : احنا عايشين ولازم نعيش الحزن نخليه قوه وحب اللى بنحبهم وفارقونا نخليه دافع لينا ,, هما سابقونا لمكان احنا فى يوم هنروحله يعنى لو بتفكر فى الموت متستعجلش هو جى جى
ابتسم "حازم" وكملت"تميمه": عيش حياتك وكمل طريقك دى احلى حاجه تقدمهاله
قامت وقفت : وهستناك فى لوس انجلوس ولن ارحم احد
ابتسمت وخرجت ورجع قعد ع الارض تانى وراجع كلام "تميمه"...!
رجعت "تميمه" شرم واتجمعت مع مجموعتها وكانوا بيتدربوا ولاحظت ان "حازم" مظهرش واتكلمت مع "حنين" وسالتها قالتلها اغلب الوقت قاعد فى الاستوديو وان فريقه ملاحظه انه لسه مرجعش فى المود ,,, كان فى يوم شخص طلب يقابل "تميمه" وكانت مدير فندق كبير فى شرم ..:
_ ايوه
_ انا عرفت انك بروفيشنال فى عروضك وشوفت العرضين اللى ع اليوتيوب وانك هتسافرى للعرض التالت ان شاء الله
_ ايوه ان شاء الله
_ انا هقدملك عرض ممكن يعجبك ويفيدك وفى نفس الوقت هيفيدنى
_ اتفضل
_ فى حدث كبير هيتم فى شرم الاسبوع الجى وفى عروض كتير هتتقدم وانا عاوزك تقدمى عرض من عروضك فيه لان اغلب المستثمرين اجانب وفكره ان بنت مصريه تتفوق ع ليهم فى منطقتهم الرقص يعنى هتشد وتجذبهم اكتر ,, ومنها عرض مباشر ليكى يفيدك مع المسابقه كشهره ,, ايه رايك
فرحت "تميمه" وخصوصا ان مقابل المادى كان كويس لكن فكره انها لفتت انتباه حد دى كانت مطيراها من السعاده :
_ انتى وليكى حريه تختار الفريق معاكى او اى شخص يشاركك المهم تكونى موجوده
للحظه افتكرت "حازم" : انا ممكن اطلب طلب صغير
_ اتفضلى
_ فى شخص عاوزاه يكون معايا هو مشترك فى المسابقه اللى انا فيها ,,
_ طيب كويس كلميه ورتبوها مع بعض
_ لا ..مش عاوزه انا اللى اتكلم ,, زى ما حضرتك كلمتنى كلمه واتفق معاه وعرفه ان انا موافقه ومعرفش مين شريكى ولما يوافق سيب الباقى عليا وصدقنى هتشوف احلى عرض ,,,
اتفق معاها ومشى واتجمعت مع فريقها وحكتلهم واتحمسوا انهم هيشاركوا وبعد يومين كلمها مدير الفندق وقالها انه رفض لانه مش مستعد واتفاجئت ,, اتصلت ب رقمه ومكنش معاها اخدته من واحد من فريقها ,, :
_ الو ..
_ يعنى لما تيجلك فرصه بترميها كده ..افهم دا غرور ولا استبياع
بيحاول يجمع : مين معايا ..؟
_ تميمه .. اللى رفضت تشارك معاها فى العرض ,, ليه ؟
_ مش مركز ومش جاهز
_ انت ناسى ان بعد 15 يوم هنسافر علشان مسابقه انتى مستبيع اوى كده مش فارق معاك ولا انت خايف تيجى الكل يركز ع حركاتى انا وانت تكون مجرد ضيف شرف
كلام "تميمه": استفز " حازم..
_ ليه انت ناسيه انا مين ؟
_ لا معرفش مين لو محتاج تثبت تعالى وشاركنى العرض ,, سلام
قفلت بسرعه وهى استغربت من اصرارها انه يكون معاها وهو استفز من طريقتها تانى يوم وهى فى المطعم شافته قدامها واتخضت :
_ حمد الله ع السلامه ..
_ ممكن نتكلم
ابتسمت: اخلص الشيفت ونقعد ونتكلم .. خلصت الشيفت وقعدت معاه :
_ ما كان من الاول
_ بجد انا مش جاهز انا جيت افهمك انا مبهربش لكن معنديش الرغبه ب انى اعمل اى حاجه
_ راح فين شغفك .. دفنته مع اللى راح يعنى حكمت ع نفسك بالموت ..
_ تميمه ..
_ اسمعنى للاخر .. الرقص بالنسبالنا مش رياضه ولا علشان فلوس ,, مهرب بنلجاء له من الدنيا ووجعها ,,بنتحرر من كل حاجه فيها ضدنا ومينفعش نتستسلم ,, قاوح وجرب واعتبرها منافسه صغيره بينى وبينك تقول مين اللى هيكسب تذاكر البرازيل
ابتسم "حازم" اوكيه ..
يبقى روح ارتاح وبكره تعالى الجيم بعد ما اخلص نتفق مع بعض ع كل حاجه
قامت ورجعت المطعم وحس "حازم" براحه وبقبول لكلام "تميمه" و "تميمه" فرحت انه جه ولاحظت "نرمين" فرحتها ومركزتش معاها ... تانى يوم اتقابلوا فى الجيم وكانت "تميمه" قاعده ع الارض مستنياه قعد ع الارض : ها جهزتى حاجه ؟
_ فى كام فكره فى دماغى نتناقش فيهم مع بعض ونقرر
_ اوكيه
ابتدت تتكلم "تميمه" و"حازم" مستمع ليها وخلصت كلامها : ها ,,
_ ها ايه ؟
_ ها ايه ,, انتى مسمعتنيش كل دا ؟
_ لا سمعتك بس عاوزانى اقولك ايه هو بعد اللى قولتيه فى كلام يتقال
ضحكت "تميمه": ايه اللى بتقوله دا ؟
_ يعنى انا معنديش حاجه ,,واللى انتى عاوزاه اعمليه
_ نعم ..
_ اه صدقينى انا لو عصرت دماغى مش هجيب ربع اللى فكرتى فيه ,, ف انتى فكرتك ان نعرفهم ان فى الشرق الاوسط فى اكفاء فى مجال الرقص الغربى وبمهاره واتقان مش مجرد تسليه ولا للفلوس ,, وانا معاكى اكيد فى كده ,, عاوزه تثبتلهم ان مفيش فرق بين ولد وبنت فى الشرق الاوسط وان اللى يقدر يعمله الولد تقدر البنت تعمله والاثبات ان انا وانتى فى عرض واحد متساويين ,, وانا معاكى ,,
_ ما انت مركز اهو اومال كنت حاسه انك سرحان ليه ؟
_ بجمع
وقفت "تميمه" طيب يلا نبدء
_ يلا
ابتدت "تميمه" تتدرب هى و "حازم" وفى يوم رجعت ع البيت وكانت "نرمين" مستنياها :
متحمسه اوى يا "توما " انتى .. دا عرض مش مسابقه
_ مهما كان ايه انا بحب اقدم حاجه كويسه مهما كانت مكانها
_ و"حازم" عامل ايه معاكى
_ كويس بحاول ارجعه زى الاول
_ انتى مهتميه به اوى بعد بعد وفاه باباه هو مش صغير
_ هو مش صغير لكن الوجع كبير عليه ,, انا عرفت باباه واتكلمت معاه واتعاملت معاه حبيته وارتحت معاه وكنت بشوف سعادته لما بيحكيلى عن "حازم" لما بيشوفه بيعمل حاجه بيحبها بيكون فرحان ولو شاف "حازم" زعلان او مضايق اكيد هيزعل وانا مش عاوزاه يزعل ,,عاوزه روحه تكون سعيده ومرتاحه وهو شايف ابنه مكمل موقفش والحزن مسيطرش عليه ,,
_ تميمه انتى اوفر بجد
_ اوفر ,, يعنى لما بنعمل الحاجات اللى ماما سميه وبابا جلال بيعملوها وبنحس بسعاده بنكون اوفر
_ متقارنيش دول ب ابو حازم
_ ليه هو مش انسان زيهم وهو اب ودا ابنه ,, وبعدين انا اتعلمت من ماما "سميه" انى مفرقش بين اى حد ولما يكون فى ايدى مساعده اقدر اعملها ل اى حد هعملها بدون تردد يكفى انه يكون سعيد حتى لو روح انا بكون سعيده ومرتاحه لما بحس ان روح الشخص دا مرتاح وسعيد
_ طيب يا محضره الارواح مقولتيش ليه ل "هشام" بقى انك انتى اللى طلبتى "حازم"؟
_ علشان معرفش ليه "هشام" مبيحبش ولا يتقبل وجود "حازم" معملش حاجه تخليه يقفل منه كده
_ مش يمكن بيغير عليكى منه ؟
_ بطلى هبل يغير ايه ,,
_ والله انتى اللى هبله او بتستهبلى
_ المهم يا رويتر "هشام" ميعرفش ,,هو عارف انه عرض اتقدملى انا و "حازم" لاننا المشاركين المصريين فى مسابقه رقص دوليه ماشى
_ حاضر ,,
فى اخر تدريب ل "حازم" و "تميمه" وفريقتها قعدوا ع الارض :
_ توما بتخلص علينا يا رجاله
ضحكوا كلهم واتكلمت "تميمه": دا تسخين لكن استنوا لما نسافر هتتفرمو
ضحك"حازم": انتى عنيفه اوى معاهم رغم انك بنت
_ مفيش حاجه اسمها بنت ولا ولد ,, فى حاجه اسمها اقدر اعملها او مقدرش اعملها ,, واحنا مش محتاجين دلع
_ انتى كل حاجه واخدها عند كده ,, انا مش بقارن بين ولد وبنت لكن لو شخص تقمص شخصيه شخص تانى هينسى حقيقه شخصيته ,, وانتى بنت وتقمصك دور الراجل انتى كده بتدفنى البنت جواكى
ضحكت "تميمه": مين قال انى بدفن البنت جوايا .. هو علشان برفع شعرى ديل حصان وبلبس كاجول وجينز وكوتشى ابقى مش بنت انا عارفه بعمل ايه ومش علشان ابينلك انت او اى حد انى بنت الون شعرى ولا البس كعب عالى ولا اتكلم برقه واحط ميكب والبس دريسات ,, كده مش هبقى بنت هبقى مانيكان للفرجه وانا عمرى ما اكون فرجه .. عاوزين يتفرجوا عليا يتفرجوا ع نجاحى واجتهادى مضمونى لكن شكلا لا بالنسبالى يشوفونى معدومه الانوثه احسن ,, لانى مفيش حد اهم من نفسى اثبتلها انا مين ,,
_ انا اسف سووورى
غمزتله: ولا يهمك يلا نكمل
وقفت "تميمه" ووقفوا وكانوا هلكانين لكن هى كانت مركزه ...!
تانى يوم "هشام" كان موجود وكان شايف "تميمه" وهى بتعمل بروفه قبل العرض بتاعهم مع "حازم" ولاحظ ضحكها معاه ,, شافته "تميمه وجريت عليه :
_ كنت هزعل اوى لو انت مش موجود معايا يا "هشام"
ابتسم "هشام": وانا مقدرش اكون بعيد عنك وانتى فى اسعد لحظات حياتك
مسكت ايده وب ابتسامه : ربنا يخليك ليا انا كنت عندى باور فظيع لما شوفتك
طبطب ع ايديها وابتسم: متقلقيش ولا تخافى طول ماانا موجود انا معاكى
وقف "حازم" يبص عليهم من بعيد وشاف "تميمه" وهى مبسوطه وتصرفها لما شافت "هشام" وسعادتها انه حضر ,, وقبل ما يدخلوا يبدوء عرضهم شاف "تميمه" بتبص ع "هشام" وكان بيشجعها وهى كانت سعيده ومتحمسه جداا ,, دخلت وبدءت العرض مع "حازم" والاتنين كانوا مندمجين مع بعض وكان عرض فى مايه واندمجت "تميمه" ولفتوا نظر الجميع ورغم ابهار الجميع برقص وحركات "تميمه" المتقنه لكن "هشام" كان كل ما يلمس "حازم" "تميمه" كان بيتخنق ,, خلص العرض واتجهت "تميمه" ل "هشام" و "نرمين" :
_ ايه رايك يا هشام
ابتسم "هشام": مش محتاجه راى انتى ..
"نرمين" اتكلمت : انا هسبقك اجهز السهره احتفالا بالمناسبه دى
مشيت "نرمين والشباب و "حازم" كان بيبص على "تميمه" و"هشام" و "هشام" لاحظ .. غيرت هدومها "تميمه" وقاعدين مع الشباب سهرانين بيحتفلوا وشاف "هشام" مدح الشباب ل "تميمه" و "حازم" وانهم افضل كابلز بيرقصوا حس بخنقه ,, مسك "حازم" قطعه بيتزا وبيحطها قدام "تميمه" وبيضحك وهى ابتسمت من غير ما يحس "هشام" خرج ولاحظت "تميمه" انه كان ساكت اغلب الوقت ,, خرجت وراه وكان واقف :
_ مالك يا "هشام" خرجت ليه
بصلها وملامح وشه متغيره وساكت :
_ مالك فى حد ضايقك ,,فى حاجه ضايقتك ؟
سكت "هشام" وقربت منه "تميمه" ومسكت ايده : فى ايه قولى ؟
مسك ايديها :" تميمه " انا عاوز اقولك حاجه مهمه ردك هيفرق معايا اوى فيها
_ ايه هى بلاش تقلقنى
_ تميمه ..انا ...
______________________________________
يتبع
