تانى يوم فضلت فاطيما مع ماريا طول اليوم لغايه المغرب كانت احسان مشيت .. رجعت فاطيما البيت ودخلت اوضتها وبعد تفكير كتير واخدت قرار تتكلم مع معتز لانه من وجهه نظرها قرار ياخده اتنين افضل من شخص واحد فتحت نت واتلككت ان النت بيفصل ..راح اتصل بيها ..!!
معتز: متجيبوا نت كويس انتم فقرا بلاش نت ابو ربع جنيه دا
فاطيما: هقدم طلب حاضر
معتز لاحظ صوتها المتغير : مالك يا طيما متغيره من امبارح
فاطيما انتهزت الفرصه: موضوع كده شاغلنى
معتز: خير ..احكى ..
فاطيما سكتت لحظات ومش عارفه تبدء ازاى : موضوع يخص واحده صاحبتى تهمنى
معتز: خير .. احكى
فاطيما: امممم هى مرتبطه بزميلنا ف الكليه هو اكبر بسنه ..ومتقدملها عريس وزميلنا دا لسه مشتغلش علشان يتقدملها وهى مش عارفه تعمل ايه تتكلم معاه ولا تعمل ايه..انت ايه رأيك ؟
معتز: بسيطه مش معقده زى ما بتقولى
فاطيما: ازاى
معتز: انتى قولتى زميلك دا مشتغلش يعنى مش هيعرف يفتح بيت و ومعندوش دخل ثابت هيروح لاهلها يقولهم ايه ؟
فاطيما: بيحبها
معتز ضحك: ببساطه كده.. كان زمان كل الل بيحبوا بعض اتجوزوا
فاطيما: ليه ما خالد راح كلم عمو وهو مش معاه حاجه لسه ودخل الجيش واهو مخطوبين وهو بيقاوح مع ظروفه وميمى وعماد وغيرهم .بيحصل اهو
معتز: بصى يا حبيببى اسمعى .. الجواز ليه 3 اركان ..الركن العاطفى والنفسى والمادى اللى بيسند الاتنين الاولانين العاطفى والنفسى هو المادى .. حياه مستقره ماديا مشاكلها ااقل يعنى خناقات ااقل يعنى حياه احسن
فاطيما: والحب ..لو بيحبوا بعض هيساندوا بعض هيبقى العامل النفسى والعاطفى موجودين ماهما دول مهمين برضه ف اى علاقه
معتز: صدقينى دا كلام رومانسيات وغير كده لو سألتى زميلك دا هتلاقيه بيقولك اروح اقولهم ايه هيبقى راجل شحت وبياخد مصروفه لسه ..الكلام دا تلاقيه فى الافلام والمسلسلات ..لكن بصى ع الواقع كتير خناقات وانفصال بعد حب كبير
فاطيما: مابقولك بيحصل وخالد عملها
معتز: خالد دا حاله خاصه .. أستثناءات ومش كل البيوت زى بعض ولا كل الاهالى زى اهل سلمى فى تفهمهم
فاطيما: ماهو يجرب ويتكلم معاهم هو هينجم من بعيد ..مش يمكن يطلعوا متفاهمين والدنيا فى اللذيذ زى خالد وسلمى
معتز: ولو اتصدم وجرحوه هيبقى استحاله هيرتبطوا وهيلبسوها ف اقرب عريس ... لما يروح يتقدم ويتكلم يبقى معاه اساس افضل علشان يبقى واثق منه مش كلام ....انا عن نفسى مش هجازف غير وانا واثق وجاهز بنسبه كبيره علشان لما اتقدم اكون استاهل ادخل البيت لان بيوت الناس مش حدايق عامه ادخل اتفسح فيها ..لازم اكون قد مسوليه الارتباط والانسانه اللى معايا ولا ايه
فاطيما يأست : والحل طيب متكلمهوش ولا تعمل ايه حيرتنى
معتز:هيعمل ايه ولو كلمته الحل عندها هى
فاطيما : ازاى
معتز: لو بتحبه بجد وبيحبها وهى عارفه ظروفه كويس وهو هيقدر دا هتصبر عليه وتستناه وان شاء الله ربنا هيكرمهم لو مش هتقدر توافق ع العريس وتقول نصيب
فاطيما: نعم
معتز: فى بنات كتير مبتستحملش ظروف اللى بيحبوهم فبتستسلم لعريس الجاهز وبيبقى نصيبها وتقولك نصيب وهو تلاقيه محاولش يكون نفسه ومقضيها تسالى لغايه ما بتضيع ويقول نصيب ... هى بايدها تقرر تستناه لغايه ما يتحسن ظروفه او تسيبه وتتجوز وهو ف الوقت دا يقاوح مع ظروفه الحياه مش رومانسيات بس الواقع مختلف
فهى اللى تقرر عاوزه ايه ...
فاطيما بتركيز كررت الجمله : هى اللى تقرر عاوزه ايه ...!!
كملت فاطيما المكالمه مع معتز وقدر ينسيها توكسافين وامه اقصد محسن وامه والحوار نفسه ورجعت لطبيعتها تهزر وتضحك لغايه الصبح بيتكلموا واخدت من حوار معتز الاجابه الل هى عاوزاها حتى لو مش مباشره ..!!
واستمر الوضع زى ماهو كلام معتز مع فاطيما وخالد وسلمى وماريا وعماد .. مرت فتره بدون اى مشدات مستقره لجميع وشبه فاطيما مبترحش كليتها غير يوم او يومين بدل اربعه ف الاسبوع .. و معتز كان كل ما بينزل شغل وفاطيما تتطمن شويا مبيكملش اسبوعين ويسيبه
ابتدا الترم التانى لاخر سنه لفاطيما وماريا ف الجامعه وعدى عادى من غير جديد وامتحنوا .. ونزلت سلمى اجازه الصيف نزلت ع القاهره يومين وراحت ع السنطه تقعد اسبوع .. واتجمعوا التلاته بنات عند سلمى فى اوضتها
ماريا: كنتى وحشانا يا سولى والله
فاطيما ماسكه موابيلها ومش مركزه ..
سلمى: والله انتم اكتر .. ولا ايه يا طيما
فاطيما : ها .. اه فعلا وحشتينا
سلمى: هى ع طول كده سرحانه
ماريا بتضحك: دا ف احسن حالاتها دى اوقات بتنعزل وبتكون ف عالمها الخاص بس هى ومعتز ومبشوفهاش معتز يا سولى سيطر عليها خلاص ...
سلمى راحت قربت من فاطيما وشدت الموبيل : انتى يا ست جايه تقعدى معايا ولا مع الموبيل احنا اتفقنا نقعد مع بعض منردش ع موابيلات غير لضروره بس ايه اللى بتعمليه دا
فاطيما : متبقيش رخمه ..هاتى الموبيل
سلمى حدفته ل ماريا : اقعدى معانا مش الموبيل
فاطيما راحت اتجاه ماريا تاخد الموبيل حدفته ل سلمى تانى
وقفت فاطيما وبنرفزه: والله لو مجبتوش الموبيل دلواقتى لهسيبكم واطلع شقتنا
لاحظت سلمى وماريا ملامح فاطيما راحت سلمى ادتها الموبيل : لدرجه دى
فاطيما: اصل انا بتكلم ف موضوع مهم مع معتز وانتم اتحشرتوا ينفع كده
انا كنت بعمل كده معاكم
سلمى وماريا بصوا لبعض : لا بصراحه
فاطيما: هخلص معاه وهقفل الموبيل انا قلقته انى معاكم بس عاوزه اعرف عمل ايه ف شغل انهارده ادعوله يارب يثبت اقدامه
ماريا: ان شاء الله دعيالك من قلبى يا طيما
فاطيما: بقولك ادعى لمعتز مش ليا
سلمى بتضحك: ما انتم الاتنين واحد ولا مش واحد
فاطيما: لا نص
ضحكوا البنات ... ماريا اوك يا طيما خدى وقتك وانا هعمل مكالمه لعماد وجايه
سلمى شافت كل واحده ماسكه موابيلها : اشمعنى انا انا كمان هكلم خالد ...
راحت سلمى اتصلت ع خالد ورد عليها وطريقته متغيره ..
سلمى : مالك يا خالد
خالد: مفيش يا حبيببتى بس ارهاق طول اليوم ف المكتب وشبه كنت لوحدى ومذاكره فصلت
سلمى: ارتاح طيب مينفعش كده
خالد: ان شاء الله .. انتى ايه الاخبار .. وحشتينى
سلمى: برغم انك تعبان وبتقولى وحشتينى طالعه منك حلوه اوى قولها تانى كده
خالد بيضحك: وحشتينى ..وحشتينى
سلمى: انت اكتر
خالد: باباكى كلمنى انهارده صح
سلمى : بجد..
خالد: اها ..عاوز يقعد معايا ف موضوع ..
سلمى : موضوع ايه ..اه افتكرت
خالد: ايه
سلمى: اقولك انا واعمل نفسك متفاجئ لانى عرفت بالصدفه لما كان بيتكلم مع ماما واحنا نازلين مصر ..
خالد بيضحك: اسرار حرب قولى قولى
سلمى : اصل بابا لاقالك وظيفه كويسه ف الشركه اللى شغال فيها ومستعدين يوظفوك مرتبها حلو جدااا وهيوفرولك شقه وعربيه يعنى حياه اريح ووقت احسن لمذاكره
خالد متفاجئ: ودا كان اقتراح مين
سلمى: انا بصراحه كان بيقولى اوظفك كنت بقوله يشوفلك انت
خالد بخنقه : ليه ..انتى زهقتى انا عارف ان الفتره طولت بس انتى عارفه انا بعمل الل اقدر عليه يا سلمى
سلمى بسرعه : لا خالص والله بس انا فعلا عاوزاك تبقى جنبنا هناك ..الحياه هناك مريحه وانا متعوده عليها وغير كده الوضع ف مصر مش متظبط لسه ومدام فى فرصه ليه تقول لا جرب وشوف وصدقنى مش هيكون عليك حمول كتير زى ماانت ف مصر كده ..وكمان علشان يتوفرلك الوقت لدكتوراه
خالد: ماشى ياسلمى ..يلا اقفلى
سلمى حست انه قفش : مالك ياخالد
خالد: مفيش ياسلمى بس مكنتش عامل حسابى ع الموضوع دا وكويس انك فتحتيتنى فيه قبل والداك مكنتش هعرف اعمل ايه
سلمى : طيب بص فكر فيها واقعد اسمع الكلام مع بابا وشوف انت عاوز ايه وانا معاك
خالد: بجد.. معايا
سلمى: انا معاك ف كل حاجه .. المهم عندى راحتك يا خالد
خالد: حاضر يا سلمى .. هفكر وهرد عليكى
سلمى: وكله خير
خالد: ان شاء الله
قفلت سلمى وهى وشها متغير كانت فاطيما وماريا خلصوا تليفوناتهم
ماريا : انا اسرع واحده فيكم لان الاستاذ طلع نايم احب فى مين انا دلواقتى ها ها ..يسافر ووافقنا ..اغلب مكالماته نايم ..سورى يا ميمى اصلى مرهق ايه المرار دا
فاطيما بتضحك :وانا الاستاذ طلع فاشل ... مفيش شغلانه بيثبت فيها
ماريا وفاطيما ضحكوا ماريا: اتلم تنتون ع تنتن
فاطيما: والاتنين حظهم انيل وانيل
سلمى كانت ساكته ... فاطيما لحظت : واضح انهم تلات تناتنين
ماريا: مالك ياسولى
سلمى: بابا بيفكر يشغل خالد معاه ف الشركه ف دبى
ماريا: طيب دى حاجه كويسه
سلمى: جداا مرتب محترم وهيدوله شقه وعربيه يعنى بالمعدل دا ع اول السنه هبقى متجوزه وعايشيين يعنى
فاطيما بتتنهد: يا بختكم
ماريا: بتقرى ع بنت عمك يهدك
فاطيما بتخبط ماريا: يابت انا اقدر ..
انا بس بقول ان خالد هيبقى حمار لو رفض العرض دا
سلمى: ماهو دا اللى قاقلنى
ماريا: ليه
سلمى: اصل بابا وماما اتكلموا وكده عدت فتره طويله ع خطوبتى انا وخالد
فاطيما: اه صح
سلمى: ووضع خالد بيتقدم ببطئ ابطئ من السلحفه
ماريا: ظروفه كده
سلمى: ماما وبابا فكروا انهم يدوروا ع وظيفه كويسه ويظبطوله الدنيا ف دبى ومنها اكون جنبهم ومنها هتبقى اريح لخالد .. وفعلا حصل كده ومش ناقص غير موافقته ... ولو رفض اهلى مش هيستحملوا سايبنى مخطوبه لاجل غير مسم قلقانه ياخدوا خطوه يبعدونا عن بعض ... بظروف خالد انا موافقه ومعنديش مشكله استناه .. بس اهلى معزوين شايفينى بكبر قدامهم وخصوصا بعد ما اتجوز مصطفى هناك ومفضلش غيرى مركزين عليه ...خايفه بقى خالد يصمم ويتمسك برائيه ويرفض كده هيحطنى انا وهو ف موقف صعب مش عارفه هيحصل ايه
فاطيما: خالد شخصيه عاقله اكيد هيفكر وهيدور ع حاجه لصالحكم
سلمى: بكره هيروح يقابل بابا قبل ما بابا يجى السنطه وهنشوف ايه اللى هيحصل
ماريا: خير ان شاء الله
فاطيما: خير ان شاء الله..
سلمى: يارب
فى اللحظه دى مامت سلمى داخه بصينيه فيها جاتوه وبيبسى : الحاجه الحلوه لحلويين
قامت فاطيما بسرعه: حبيببتى يا طنط تسلمى
بصت فاطيما لبنات وقعدت ع الارض وجنبها الصينيه ...
ماريا: بتعملى ايه
فاطيما: بفكر ومحتاجه اشحن
ماريا: واحنا
فاطيما: انتم ايه واحد خطيبها بيفكر والتانى نايم وقالبين وشكم
ماريا: ياسلام وانتى ايه ماهو الحال من بعضه ع اساس ان معتز فرحك
فاطيما: سيبينى بقى استفرد بالصينيه دى لانى فى مرحله قرار حاسم
ماريا: حاسم الل هيقع منك
فاطيما قامت نطت ع السرير : هبططك هخليه يرجع ميلقيش منك حاجه عدله هيلاقيكى اسفلت
ماريا : الحقينى يا سلمى فاطيما هتفطسنى ومش هبقى عروسه
راحت سلمى زقت فاطيما والاتنين طلعوا عليها وبيزغزغوها وقضوها ضحك وهزار وناموا ......!!!
تانى يوم كان خالد مستنى والد سلمى ف الكافيه اللى قابله فيه اول مره
راح والد سلمى ف الميعاد وكان خالد ف انتظاره .. قعد وطلب اتنين قهوه
والد سلمى: ايه الاخبار يا خالد
خالد: الحمد الله ياعمى
والد سلمى : واخبار شغلك
خالد: الحمد الله شغال.. اه مش زى ما كنت متوقع بس الحمد الله
والد سلمى اخد شفطه من فنجان القهوه : انت عارف انت وسلمى مخطوبين بقالكم قد ايه
خالد بتوتر: عارف
والد سلمى بلهجه حاده : وانت زى مانت مفيش خطوه حصلت والتزماتك بتزيد علشان اخواتك .. انت هتقضيها خطوبه ... انا وافقت ع خطوبيتكم علشان تاخد خطوه مش تركن كده ولا ايه
خالد بيعدل نفسه وبيجمع شجعاته وثباته: ان شاء الله ربنا هيسهل الدنيا بتظبط حاجه حاجه
والد سلمى قاطعه : خالد انت مكانتك عندى كبيره واحترمت شجاعتك وكلامك معايا وارتباطتك بسلمى وتمسكك فيها ... وعلشان انت زى مصطفى وانا عندى مصطفى وسلمى اهم اتنين ف حياتى ويهمنى سعادتهم بااختصار ياخالد انا وفرتلك فرصه كويسه جداا ف الشركه اللى انا فيها بمؤهلك مرتبه مجزى جدااا وهيدولك عربيه وهيوفرولك شقه مناسبه وهتقدر تكمل الدكتوراه .. ايه رأيك
خالد : حضرتك انا ..
والد سلمى قاطعه: خالد ..انا لولا انى عارفك انك انسان كويس ومجتهد بس الظروف اللى مخبطه معاك زى اى شاب ف الوقت دا بالظروف دى غير مسئوليتك قدام اهلك وكمان سلمى الحمل تقيل عليك كان بيوصلى اخبارك وعارف انت بتعمل ايه وبتكافح قد ايه ومسؤلياتك بتزيد .. انا يوم ما خطبت سلمى وانا اعتبرتك ابنى التانى واثبتلى بموقفك وصراحتك معانا انك راجل بمعنى الكلمه فااسمحلى اساعدك لو معتبرنى زى والداك
خالد: دا شرف ليا ياعمى
والد سلمى: يبقى تسمع الكلام ..لانك بظروفك دى واستمرار توسعها مش هتعمل خطوه مع سلمى وهتفضلوا مخطوبين هناك هيوفرلك وقت ودخل ثابت وهتقدر تكون اسره وتراعى اسرتك اللى هنا ... خطوه لقدام لحياتك والعمر مفهوش كتير ولا ايه
خالد: انا مش عارف اقول ايه
والد سلمى : دلواقتى متقولش حاجه ..العرض قدامك فكر فيه كويس وهستنى ردك قبل ما نرجع واتمنى نرجع بخبر يفرحنا كلنا ...
خالد اتنهد: ان شاء الله
خلص والد سلمى القعده وقام مشى وخالد قاعد بيفكر ف كلامه وعرضه المفاجئ وشويا قام مشى وكلم سلمى وقفل بسرعه لانه محتاج يفكر
من غير ضغط ..كانت سلمى قاعده مع فاطيما وماريا عند فاطيما ..وبتحكيلهم ع اللى حصل
فاطيما: انا لو مكان خالد هقولك نقرا الفاتحه ياعمى وخدنى معاك ف اول شنطه
ماريا: اه والله فرصه زى دى مبتجيش كتير
سلمى : اه والله ربنا يهديه
فاطيما: صحيح ايه الشغل اللى يوفرله شقه وعربيه دا .. هو كل الل يشتغل ف دبى كده
ماريا: اه صحيح ... ما عماد ف الكويت لكن نزل ف شقه مع زمايله تبع الشركه مش شقه لوحده
سلمى باصه لاتنين ومبتتكلمش ..
فاطيما لاحظت: اوعى يكون اللى ف بالى
ماريا بصت ع فاطيما وبعدين بصت ع سلمى : معقوله انتم اللى جبتوا الشقه
سلمى هزت راسها : ايوه
فاطيما : يا شيخه
سلمى: انا واهلى جهزنا كل حاجه وطلبت من بابا حوار الوظيفه وهو رحب ودور وبعد ما مصطفى اتجوز وسافر مكانه فضى فقلت فرصه خالد يجى هنا وهيشتغل بمؤهله .. وانا وماما دورنا ع شقه قريبه من الشركه
ومن البيت وبابا خلص فيها والعربيه فعلا الشركه هتتديهاله علشان هيطلع شغل بره اوقات ...
فاطيما: يا بنت الايه
ماريا: والله ناصحه
سلمى: ماهو انا عارفه ظروفه والدنيا معاه ضيقه .. سفره وجوازنا هتفتح معاه الدنيا وهيبتدى حياته اللى عاوزها ودا من غير ما اخنقه ... انا سيباه ع راحته من غير ضغط ولا طلب وهو مش مقصر ... فدورى انا كمان اعمل اللى عليا اتجاهه ومقصرش ..
فاطيما سرحت: فعلا معاكى حق
بصت فاطيما ع سلمى وماريا : انا جوعت حد هياكل معايا
ماريا: انا
سلمى: وانا
فاطيما :يبقى قوموا معايا نعمل هجمه مرتده ع المطبخ ونسخن الاكل وناكل ..
ماريا وسلمى: يلا بينا
مر فتره وكان ميعاد نتيجه الكليات تظهر وفاطيما كان باين عليها القلق اووى غير كل سنه راحت ماريا تجيب نتيجتها وفاطيما رفضت تنزل .. فراحت ماريا بعد ما جابت نتيجتها راحت كليه فاطيما تشوف النتيجه وكانت المفاجاءه ... مشيت ماريا ومش مصدقه من الصدمه راحت بسرعه ع فاطيما كانت سلمى قاعده معاها بيتفرجوا ع االتليفزيون مع توحا
والده فاطيما فتحت الباب ودخلت ماريا ووشها مقلوب
والده فاطيما: مالك يا ميمى
ماريا: لا مفيش يا طنط المشوار هدنى بس والجو حر
والده فاطيما: عملتى ايه وشوفتى نتيجه طيما
بصت ماريا : ها .. لا لسه الاسبوع الجى
والده فاطيما: ان شاء الله خير ربنا ينجحوا
ماريا بنبره توتر: ان شاء الله ..هما البنات فين فين طيما
والده فاطيما: قاعدين مع توحا ادخلى
دخلت ماريا واقفه مصدومه بصت ع سلمى وفاطيما : انا عاوزاكم ف كلمتين
دخلت ماريا الاوضه بسرعه وسلمى وفاطيما بصوا لبعض ..
توحا: هى ميمى مالها
فاطيما: مش عارفه وهى عامله زى المتحولون كده
سلمى: تعالى نشوف مالها
قامت فاطيما وسلمى ودخلوا الاوضه شافوا ماريا قاعده ع حرف السرير وباصه ف الارض
سلمى: ميمى ..مالك
فاطيما: فى ايه يابت
ماريا باصه لفاطيما : النتيجه ظهرت
فاطيما ملامح وشها اتغيرت ...
سلمى : فى ايه بت خضتينى انتى طالعه بمواد
ماريا: انا نجحت بتقدير عام جيد جدا
سلمى: طيب مبروك يافقر قالبه وشك كده ليه والبت دى عملت ايه
ماريا باصه لفاطيما بنظره غضب : سقطت
سلمى متفاجئه: ايه .. طلعت بكام ماده.. دى طلعت صافى ترم اول وولا سنه نزلتها ايه حصل
ماريا بعصبيه : ماهو دا اللى مش فاهمها بصراحه .. ماهو لو ماده واتنين كنت هقول مفيش مشاكل
سلمى: اومال ايه
راحت فاطيما قعدت ع حرف السرير : الترم كله
سلمى متفاجئه: ال 6 مواد سقطى فيهم ازاى
ماريا بعصبيه : ماهو دا اللى هيجننى .. ازاى ال 6 والدرجات صفر و1 او 2 درجات الرئفهازاى ال 6 مواد يا فاطيما..وانتى كل يوم كنتى بتنزلى تروحى الامتحان
فاطيما اخدت نفس : لانى ببساطه مكتبتش اجابات
سلمى قعدت جنبها: نعم .. ليه
فاطيما: علشان انا قصدت انى اعيد السنه
ماريا: نعم
فاطيما قامت وقفت وبصالهم: من الاخر انا ملقتش وسيله قدامى تدينى وقت اكبر غير انى اعيد السنه
سلمى متفاجئه: ليه
ماريا متفاجئه : ايه السبب اللى يخليكى تتضيعى سنه من عمرك
فاطيما بنبره توتر : ماما وبابا مستنينى اخد اليسانس وباب العريسان هيتفح سواء محسن او غيره فهدبس ف جوازه مش عاوزاها مهما رفضت انا عارفاهم هيزنوا عليا وهيحطونى تحت ضغط نفسى كبير انا مش هستحمل وهما عندهم ستر البنات واجب شرعى ... ومعتز ظروفه لسه مش مظبوطه علشان حتى يتقدم مش ثابت ف شغله .. وكده طول ماانا لسه ف الكليه بدرس محدش هيتكلم معايا ف حوار الجواز دا انا عارفه
سلمى: ايه الهبل دا
ماريا بعصبيه : ايه التخلف دا
فاطيما: سموه تخلف ..او تسموه هبل .. هو دا الحل اللى لاقيته مناسب لموقف دا انا بحب معتز ومش عاوزه غير معتز .. انا حقى اعيش زيكم وزى اى بنت ترتبط باللى بتحبه وانا عارفه ظروف معتز وزى ماانتى يا سلمى مستحمله خالد بظروفه وانتى يا ماريا مستحمله عماد بظروفه علشان بتحبوهم انا كمان مستعده استحمل ظروف معتز مهما كانت المهم اكون معاه انا مش عايزه اكون مع غيره
ماريا: هو معتز عارف انك هتعملى كده
فاطيما: لا طبعا كان رفض .. انا بدى فتره اطول لعلاقتنا
ماريا بعصبيه :وهتقولى ايه لمامتك وباباكى ع سقوطك دا
فاطيما: عادى .. هيضايقوا شويا وهيعدوها
سلمى: انتى كده بتضيعى مستقبلك ..
فاطيما بنظره حاده لماريا وسلمى : مستقبلى مع معتز وانا فكرت وقررت ومش هرجع فى قرارى انا هتمسك بمعتز مهما كلف الامر لو عمرى انا موافقه ... ادعولى بس ربنا يوفقه والدنيا تظبط معاه واصلا انا لو اخدت اليسانس هحطه تحت المرتبه لا هشتغل ولا انيل مانتم عارفين بابا .. شغل مناسب من غير بهدله اوك بس كله بعد الدراسه
الكليه هتدينى وقت اكتر من غير ما اخنق ع معتز ...
ماريا: انا مش موافقه ع كده
سلمى: ولا انا
فاطيما اخدت نفس : انا عاوزه كده دى حياتى ودى قراراتى ومتحمله المسئوليه مهما كانت
ماريا: انتى واثقه السنه الجايه هيتحرك معتز
سلمى: ولو متحركش هتعملى ايه
فاطيما: هعيد السنه تانى وتالت لغايه ما ظروفه تتظبط
انا متمسكه ب معتز ومش هسيبه ابدااااا ..انا عمرى ما حبيت ولا اعرف ايه حب ومعتز هو الل حسسنى بيه ..فرحتى بحسها معاه حياتى ملهاش طعم من غيره لو عدى يوم من غير ما نتكلم مبستحملش .. انا بحب معتز بجد وهو بيحبنى وهو الانسان الوحيد الل رسمت حياتى معاه واننا نكون مع بعض فى بيت واحد وان شاء الله ربنا هيجمعنا مع بعض زى ماجمعكم بالل بتحبوه
كلام فاطيما وتصرفاتها مش عاجب لا سلمى ولا ماريا بس هما عارفين مدام حطت ف دماغها حاجه هتعملها حتى لو رفضوا هما ...!!!
عرفوا اهل فاطيما بالنتيجه ومتكلموش كتير لكن بالنسبالهم 6 مواد الترم كله دا اللى مستغربينه بعد كلام حمدوا ربنا وفرحتهم بنجاح حماده نساهم شويا فاطيما .... فى نفس اليوم اتكلمت فاطيما مع معتز ع الشات :
معتز: متزعليش نفسك ان شاء الله تعوضيهم السنه الجايه
فاطيما: ان شاء الله
معتز: بس غريبه تشيلى ترم بحاله
فاطيما بسرعه الفت حوار: ماهو انا قلتلك ف مادتين مكنتش مذاكراهم كويس و3 مواد تخص دكتور كان سحب كارنيهاتنا وعلم عليها اننا هنشيل المواد دى والاخيره معرفش معانى حليت
معتز : اممم عموما شدى حيلك السنه الجايه
فاطيما: ان شاء الله .. قولى انت عملت ايه ف الشغل انهارده
معتز: شكلى كده هنزل هجرب دى كمان الل حلو فيها انها مش مكاتب وفيها سفر محافظات فهجرب كده واشوف ارتاحت هكمل مرتحتش هينضم لاخواته
فاطيما باصه لمحادثه: ربنا يهديك يا معتز وتثبت
ردت عليه فاطيما: ان شاء الله تكون خير
معتز: ان شاء الله .. المهم
فاطيما: نعم
معتز: وحشتينى
فاطيما : وانت كمان
معتز: شويا وهكلمك ع الموبيل
فاطيما: اوكيه هستناك
قفلت فاطيما وشويا فضلت تتكلم مع معتز لصبح وحوار سقوطها هى نسيته خالص مفكرتش فيه
وجودها مع معتز نساها الدنيا
مر يومين وفى يوم فاطيما قاعده قدام التليفزيون ماسكه الموبيل ومبتتفرجش اصلا شافتها توحا وندهت عليها عاوزها فى اوضتها .. دخلت فاطيما أوضه جددتها وكانت قاعده ع السرير خبطت بديها ع السرير وراحت فاطيما قعدت وفتحت توحا كيس فيه حلويات وادته لفاطيما واترمت ف حضنها :
فاطيما: حبيببتى يا توحا .. ايه الحضن الجامد دا
توحا: ماهو انتى الل حرمتى نفسك منه .. كنتى بتسألى عليا وبتنامى ف حضنى دلواقتى كل فين وفين لما اقعد معاكى شويا .. هو اللاب والموبيل اخدوكى مننا ولا ايه يا طيما
فاطيما: لا خالص يا توحا انا اقدر دانتى الحب الحب
توحا: يا بكاشه انتى .. بجد الموبيلات بتاعتكم دى والكمبيوتر بوظ بيوت كتير .. الحاجات دى معموله علشان الناس تتواصل ببعض مش تنسى بيها بعض .. انتى وحماده من وقت مادخلتوا الكليه ومبقناش نشوفكم ومواعيد اكلكم اتغيرت وع طول ماسكينه ف ايديكم التليفونات
فاطيما: عصر التكنولوجيا يا توحا ..
تلاقيكى بس غيرانه انه مكنش موجود ع ايامكم بس
توحا بتضحك: بالعكس انا فرحانه انه مكنش موجود ع ايامنا ..ايامنا كانت احلى والعيله معناها احلى وكلنا بنتكلم مع بعض وفى وش بعض مش فى وش شاشات حديد .. خالتك بقت تبعت رسايل لامك ع الموبيل تسأل عليها مش بتكلمها كمان ... الحاجات دى دمرت معنى الاسره الحقيقى والعلاقات الناس ببعض بقت برساله دلواقتى ودهورت الحال لانيل ...
فاطيما: امممم بصراحه معاكى حق بس نعمل ايه العاده بتبقى طبع لاسف مع تطويل المده
جددتها: وع كده افهم انك ممكن تعيدى اخر سنه تانى
فاطيما تنحت: ها
جددتها مسكت ايديها :انا وابوكى وامك واخوكى استغربنا بسقوطك ترم بحاله واحنا مش متعودين منك ع كده وحوار نجاح حماده غطى شويا لكن انا منستش ابوكى وامك يتعاملوا عادى لكن انا لا ... طيما حبيببتى ميحصلهاش كده وتقعدى ساكته انتى كنتى قلبتى الدنيا وروحتى الكليه قلبتيها ..السكوت الل فيكى دا اكدلى ان فيه حاجه
فاطيما بتحاول تخلع: لا توحا مفيش
توحا بتطبطب ع ايد فاطيما: معتز السبب
فاطيما بسرعه: لالالالا خالص معتز ملوش علاقه
توحا: اومال مين الل ليه علاقه ..احكيلى يا طيما مينفعش تبقى لوحدك ولا انتى بتعملى حاجه غلط وخايفه تحكى
فاطيما : لا خالص
فاطيما قعدت جنب جدتها: هحكيلك ودا سر بينا علشان تعرفى انى مبعملش حاجه غلط .. بصى ياتوحا الحكايه بقى ..
وابتدت تحكيلها ع الموضوع كله باارتباطها ومقابلتها ليه ...
جددتها باابتسامه: انتوا شوفتوا بعض ازاى الاول
فاطيما: شفنا صور بعض ع النت يعنى من صور الخروجات الل بحطها وهو عرفنا شكل بعض يعنى ومن صور الواتس وكده التكنولوجيا يا توحا
توحا :اوك.. طيب يعنى علشان بتحبيه تسقطى سنه
فاطيما: بدى لنفسى وليه فرصه ظروفه يا توحا وحشه اوى
جددتها: بصى يا طيما.. مبدء انتى بتكلميه دا كلنا عارفين الل بيكلموكى محترمين وانتى حاطه حدود لكل واحد وانا لاحظت ان معتز مميز عنهم ومتكلمتش قولت انتى كبيره وعارفه بتعملى ايه واحنا واثقين فيكى وفى تصرفاتك لاننا مربين صح .. لكن انك تنزلى القاهره مخصوص تشوفيه غلط ومحدش يعرف اكبر غلط
فاطيما: ميمى عارفه
جددتها: ميمى زيك بنوته صغيره الغلط فى عمركم بيبقى اكتر من الصح .. عاوزه تعملى كده وعاوزه تشوفيه يكون معاكى وبمعرفه حد كبير اخوكى او مامتك
فاطيما بتضحك: يعنى اروح اقولهم عاوزه اشوف فلان
جددتها: اه مش عيب ولو امك وابوكى موافقوش ولا اخوكى انا هوافق وهخليه يجى وهو لو عاوز يشوفك يتفضل يشوفك وسطنا دا الصح لكن العيب اللى عملتيه .. ..فميتكررش تانى ممكن
فاطيما اتحرجت: حاضر
جددتها:ربنا مدينا حياه واحده او معنى اصح كل شخص عنده حياته الل هيعيشها ولفتره الل ربنا محدده ليه وكاتبهاله صح
فاطيما: ايوه
جددتها: يبقى مينفعش نضيع حياتنا وسنينا علشان حد مهما كان مين ..الل تعمل كده الام لان دى رسالتها اتجاه ابنائها حياتها بتكون موهوبه ليهم .. لكن اى حد غيرها بيكون مسئول عن حياته... والعمر الل بيعدى منه مبيرجعش ولا ايه
فاطيما حست بتخبيط توحا بالخفيف ع سقوطها وحبت تخلع : وصلت يا توحا خلاص
جددتها بتضحك وشافت موابيلها بيرن : انا هسيبك تردى ع موبيلك ..لكن عاوزه اقولك جمله واحده النور مفيش احسن منه الصراحه والوضوح فى العلاقات بين الناس وبين العيله الواحده افضل بكتير من الضلمه والاهل عزوه وستر لبنت والشاب لما بيتقدم لبنت بتكون فخوره بنفسها وبااهلها ع تربيتها .. مثلا ضرس لما يوجع مره مينفعش تاكلى حلويات ويسوس اكتر لان اخرته هيتخلع .. غلطتى مره وكلتى حلويات ووجعك نلحقه بالعلاج ومنكررش تانى ناكل عليه ولا ايه...
قامت فاطيما باست خد توحا وفهمت من كلامها ان اللى حصل ميتكررش تانى تنزل القاهره تشوفه : وصلت يا توحا ومتقلقيش عليا انا عارفه بعمل ايه وانتى معايا كل حاجه هتكون تمام
وخرجت فاطيماوهى حاطه ايديها ع قلبها وبتكلمه: انا مغلطتش صح ..ايوه انا مغلطتش
جددتها باصه عليها : يارب يا طيما تكونى فهمتى ويسترها عليكى ..
مرت فتره وقرب ميعاد سفر سلمى وكان والدها ف انتظار اجابه خالد
كانت سلمى عند جددتها ف القاهره فعزموا خالد ع الغدا ... راح خالد وقعد مع باباها .. والد سلمى: ها يا خالد معرفتنيش اخر قرارك
خالد: انا فكرت كويس وموافق حضرتك عرفنى المطلوب منى ايه
والد سلمى: ممكن تعرفنى سبب موافقتك
خالد: سلمى
الد سلمى: مش فاهم
خالد: سلمى هى مستقبلى وحياتى وان شاء الله ام اولادى واجبى اتجاهها انى احسن من وضعى وانتهز اى فرصه متاحه ليا علشانها
عاوز اريحها متعبهاش وانا فكرت لاقيتها فرصه هتساعدنى احقق جزء من راحه سلمى
والد سلمى انبهر بكلام خالد بانه اثبتله مع الوقت انه بيحب سلمى بجد
والد سلمى باابتسامه: ان شاء الله لما نسافر هظبتلك كل حاجه وهبعتلك
خالد: ان شاء الله
عرفت سلمى وفرحت وعرفت فاطيما وماريا وفرحولها جداااا .... !!
سافرت سلمى وابتدت نهى ف تجهيزات الفرح وراحت فاطيما وماريا معاه لفرش الشقه وهيصولها ماريا مع فاطيما ف المطبخ بيرصوه :
فاطيما: اشتغلى بذمه ورسى عدل يا ميمى علشان يتردلك قريب
ماريا بتضحك: ماشى يا خالتى فاطيما يخليكى لمخطوبين
فاطيما: شقه البت نهى حلوه بجد وجهزها حلو
ماريا: اه فعلا .. كنت متوقعاه ع الطريقه الاسلاميه
فاطيما بصتلها: تقصدى ايه
ماريا : يعنى زى زمان كده نقوشات ترجع لعصر الفاطمى دماغ محمد بقى
فاطيما: اها ويجيبوا زير وقله صح اعدلى كلامك
ماريا بتضحك: انا اصلا مش مصدقه انى بفرش لنهى
فاطيما: ليه
ماريا بتوطى صوتها: كنت متوقعه انى من محرمات الدخول هنا
فاطيما بعدت عنها : ليه انتى مريضه بمرض معدى اوعى
ماريا عطست هزار : اهو انتى كمان اهو
اصل انا وانتى مثال لخروج عن المالؤف ف المنطقه
فاطيما: لا مخلاص بقى اللى كان فاهم غلط فهم الصح والدنيا اتظبطت
دى ام دانيال بتفرش دولاب العروسه زغرطى يابت
ماريا : لولولولووولى عقبالى يارررب
فاطيما: قريب ياررررب وانا كمان لولولولووولى
خلصوا فاطيما وماريا فرش الشقه لنهى وهيصولها وراحت فاطيما تتصل ع معتز لاقت موابيله مقفول مركزتش وفضلت طول اليوم تحاول مقفول .. فتحت النت تشوفه لاقيته اوف لاين ...خلصت مع نهى فرش الشقه ورجعت بليل قبل ماتنام بتجرب برضه مقفول هى اصلا متعرفش هو فين ولا ايه فضلت فاطيما اسبوع مش عارفه توصل لمعتز وهى مش فاهمه هو فين واختفى ليه وبعتتله ع الشات ورسايل
" ارجوك طمنى عليك انا قلقانه اوى "
تانى يوم كلمها ع الموبيل :
فاطيما: لا ياراجل لسه فاكر
معتز: وحشتينى بجد ..عامله ايه
فاطيما: كنت فين
معتز: كنت مسافر تبع الشغل ل اسوان وموابيلى فصل شحن والله وانا مش بحفظ ارقام زى ماانتى عارفه ومفيش نت انا حتى لسه داخل البيت وبهدومى مغيرتش كلمتك اهو
فاطيما بعد ما كانت قافشه هدت: متتكررش تانى ممكن
معتز: وحشتك
فاطيما: بصراحه اه وقلقت عليك اسبوع مش عارفه اوصلك
معتز: معلش يا حبيبى ظروف شغلى كده عموما لما تلاقى موبيلى مقفول بيبقى فاصل شحن وانا مسافر واول ما هرجع هكلمك متقلقيش انا بخير طول ماانتى بخير
هاخد دش ع السريع وهكلمك متناميش
فاطيما :حاضر
قفلت فاطيما وع وشها ابتسامه: وهو انا هيجيلى نوم خلاص
شويا وموابيلها رن وكان معتز
معتز: وحشتينى اووووووووووووووى
فاطيما: كدااااب اوووووووووى
معتز: ان شاء الله ملحقش اصحى
فاطيما: متقلش كده بعد الشر عليك ان شاء الله الل يكرهوك ويحبوك حبه صغننين
معتز بيضحك: صغننين
فاطيما: اها ...
معتز: بجد يا طيما الاسبوع دا برغم انه هده حيل وتعب بس مروحتيش عن بالىومهونه عليا التعب دا
فاطيما: معرفش انا ايه شغل البهدله دا والشحططه دا
معتز: ادعيلى بس ربنا يرزقنى بشغل احسن علشان ننجز بقى
فاطيما: تنجز ايه
معتز: اصل بفكر اتأهل شوفيلى عروسه وكلميهالى
فاطيما بتضحك: وياترى مواصفاتها ايه حضرتك
معتز: اممم بسيطه جدااا .. بنوته زى السكر ..دمها خفيف وبتضحك ع طول ... وانا معاها سعاده الدنيا بحسها ... بنت بميت راجل ..جدعه ..بتحبنى قد ما بحبها معان دى صعبه لانى ببساطه بمووت فيها اول حرف من اسمها طيما
فاطيما من الفرحه بالكلام وسعادتها اترسمت ابتسامه كبيره ع وشها : بس
معتز: وكنت عاوز اعرف هى بتحبنى ولا لا
فاطيما: تسمع منى
معتز: اسمع منك
فاطيما: دى مش بتحبك
معتز: لا بجد
فاطيما: عدت مرحله الحب بمراحل بتموووت فيك
معتز: وانا بعشقها ..ربنا يخليها ليا ولا اتحرم منها
فاطيما: ولا منك يارررب
معتز: خليها بقى تستعد لانى هخطفها قريب
فاطيما بتضحك: ماشى وهى ع اهبه الخطف اخطفها ونبى
معتز: ونبى لاختطفها انا
وفضلت تتكلم فاطيما مع معتز وزعلها منه راح ولا كان موجود ونامت وع وشها ابتسامه وتانى يوم صحيت بصوت عالى : ايه دا فين الفطار جعاااااااااااااااااااااانه
مامتها: انا افتكرت هتعملى ريجيم
فاطيما: ريجيم دا ليه ناسه هفتانه ياناس انا
مامتها:حاضر حاضر هتفضحينا
فاطيما: لا استنى انا هدخل المطبخ اتعامل اصلا فى ورك فرخه كان ف التلاجه هنقنق فيه هو وطبق المكرونه الل معاه لغايه ما تحضرى الغدا ..!1
حضرت فرح نهى هى وماريا وكان فرح ع الطريقه الاسلاميه لمكن الكل انبسط ... كان معتز بيختفى يومين ويرجع وفاطيما كانت بتتفاجئ باانه عاملاها تاج ع اغانى ف الول عنده وكانت برغم ان الشغل خاطفه ع وصفها لكن كانت بتفرح انه فاكرها ... وكان بيختفى باليومين او اكتر مده كانت اسبوع وفاطيما اقلمت نفسها ع كده لانه وضحلها ظروف شغله ... لكن بعد مرور شهرين ع شغل دا معتز اختفى فاجاءه واكتر من اسبوع ..الاسبوع بقو اسبوعين والاسبوعين بقوا شهر ولا اتصلاات منه ولا رساله وفاطيما بتبعتله كتير يطمنها لغايه ما لاقت رساله منه ع الايميل " متقلقيش انا بخير وقريب هكلمك " نوعا ما اطمنت لكن نفسيتها اتغيرت وبقت وحشه لان معتز اختفئ فاجاءه وكانت متعوده عليه وكانت ع طول فاطيما بتطلع زعلها ونفسيها ف الاكل واوضتها بقت عباره عن اكياس شيبسى وحلويات بكميه اكتر من الاول وع الغدا لاحظوا انها بتاكل اكتر من الاول والل عليها تقولهم : فى ايه جعانه . جعااانه
مر 4 شهور ع اختفاء معتز وابتدا العام الدراسى وطبعا فاطيما مش هتنزل الترم الاول فمحستش بان الدراسه بدءت خصوصا ان ماريا سافرت ل ماريان تقعد معاها يومين لانها تعبانه وكانت فاطيما لوحدها ولما سلمى وماريا يسألوها ع معتز مكنتش بتبين انها زعلانه اوى ون معتز مشغول فى شغله وفى يوم فاطيما خارجه من المطبخ بطبق بطاطس كبير شافتها مامتها : لمين كل البطاطس دى
فاطيما: ليا ولمعتز
مامتها: مين
فاطيما بصوت عالى: ليا ولنفسى الله بلاش اكل
راحت قاعده ف البلكونه حاطه سامعه هاند فيرى بتسمع لمنير ,بتاكل بطاطس محمره وبتكلم نفسها
فاطيما: معتز بيحب البطاطس المحمره بالكاتشب .. فاكل واحده لمعتز (حطت بطاطسايه فى بوقها ) وهاخد اتنين ليا لانى بحبها اكتر (حطت بطاطستين فى بوقها ) واحده لمعتز واتنين ليا ..واحده لمعتز واتنين ليا .... وفضلت فاطيما تاكل ليها ولمعتز ومره واحده موابيلها رن وكان رقم معتز مصدقتش نفسها واتنرت والطبق وقع ع الارض بلهوجه لمت اللى وقع وردت بسرعه :
فاطيما بقلق : معتز .. معتز انت كويس
معتز : وحشتينى وحشتينى ..وحشتينىىىىىى
فاطيما بتدمع : والله انت حيوان
معتز حس بيها ان صوتها صوت واحده هتعيط : مالك بس
فاطيما: انت حيوان علشان تغيب كل دا فاجاءه
معتز بيضحك: مكنتش اعرف انى هوحشك اوى كده .. بس عاوز اقولك انك وحشتينى اكتر بكتيرررررررررررر
فاطيما بصوت زعلان: لا ياراجل اضحك عليا .. 4 شهور ويومين يا معتز
معتز بيضحك: انتى حسباهم باليوم
فاطيما: رخم
معتز : بجد انا اسف ع الغيبه دى بس مش بمزاجى بجد ..وغير كده كنت عاوز لما اكلمك اكلمك وافرحك لانك متعوده منى ع الاخبار المنيله قلت افرحك من نفسك مره
فاطيما اترسمت ع وشها ابتسامه ونسيت ال 4 شهور ويومين : ايه الخبر الحلو
معتز : الخبر الحلو امممم تدفعى كام
فاطيما: بطل رخامه بقى
معتز:بذمتك موحشكيش رخمتى دى
فاطيما: لا
معتز: خلاص مش قايل
فاطيما: بطل غلاسه بقى .. ايه الخبر
معتز:علشان بحبك بس هقولك الخبر هو انى .....
________________
يتبع
ليست هناك تعليقات:
إرسال تعليق