قبل الخطوبه بيومين فاطيما كانت بتتكلم مع معتز وبتحكيله ع لفهم والدوخه ..فى يوم فاطيما كانت مع ماريا وسلمى عند الترزى علشان فستان سلمى فااتصل بيها معتز بعدت عنهم وخرجت تتكلم معاه :
فاطيما باابتسامه: ياالو
معتز: يا الوهات.. ايه الاخبار
فاطيما: اهو عند الترزى بتظبط اخر تظبيطات ف الفستان ..انا لو من الترزى كنت مسكت المازوره وخنقت سلمى وعلقتها ع باب المحل عبره لمن يعتبر ... دى زهقتنى انا شخصيا
معتز بيضحك: وانتى هتسبيه يعمل كده
فاطيما : لا طبعا ..داانا اعمله كفته واكله ... لو عاوز انا اعمل كده دى بنت عمى وانا اولى اعلقها
ضحك معتز: ربنا يكمل فرحتهم ع خير وعقبالك
فاطيما: وماله ان شاء الله .. متتاخرش بقى يوم الخطوبه ؟
معتز: اممم بصراحه مش هقدر احضر واعتذرت ل خالد
فاطيما بزعل: ليه ..انا قولت فرصه نشوف بعض بدل الكلام واحنا منعرفش شكل بعض ونتجمع كلنا وعماد هيكون موجود يعنى الل ف الجروب كلهم
معتز: وانا كمان نفسى بس حصلت ظروف ومش هقدر بجد
فاطيما بزعل محبتش تزن علشان متبنش انها ملهوفه تشوفه: اوكيه .كنت هتنبسط بجد معانا ..تتعوض ف الفرح ؟؟
معتز: ان شاء الله
خلصت فاطيما الكلام وقفلت وع وشها ملامح زعل انه مش هيحضر وخلصت لف ورجعت البيت ونامت وهى زعلانه كان نفسها تشوف معتز لانها مشفتهوش خالص لا صوره ولا كاميرا لمده 3 سنين وحست ان لسه مفيش نصيب ..جه يوم خطوبه سلمى وكانت زى القمر وماريا وفاطيما مسبوهاش ..من قبلها بيوم كانوا معاها فى شقتهم ف القاهره فى اوضتها وكانوا سهرانين بيتكلموا ... وكالعاده فاطيما ماسكه طبق سندوتشات وبتاكل وقاعده ع الارض وماريا بتكلم عماد وسلمى عماله تراجع حاجتها وتبص ع الفستان وهو متعلق ... راحت فاطيما بهدوء قربت من سلمى وفى ودنها : مبرررررررررروك يا عروستنا
اتخضت سلمى: يهددك هقطع الخلف
فاطيما: اتنبينى وانا موافقه بس بشرط الاوضه الل هنام فيها تكون فيها التلاجه علشان هتكسف لو خرجت قدام خالد
ماريا خلصت وجت ع كلام فاطيما: ماتنيمك جوه التلاجه احسن بس تلاجه ايه الل هتشيل كل دا
فاطيما: انا عصفوره ياناس ..انا نافشه نفسى بس علشان محدش يعرض نفسه عليا هيلاقينى انا اعرضيت اكتر منه
ضحكت سلمى وماريا .: ماريا: مبرووك ياسولى مش مصدقه بكره خلاص كلها كام ساعه وهتلبسى دبله خالد
سلمى بسعاده: انا مش مصدقه نفسى خالص فرحانه بطريقه متتوصفش
فاطيما: ايوه ياعم .. يلا الله يسلهوا انتم الجوز مربوطين رسمى
سلمى: عقبالك يا طيما ..
فاطيما: ان شاء الله ... قولولى ياعيال هو احساس ارتباطكم بشخص بتحبوه حلو كده ... يعنى فعلا يستاهل معانتكم دى والل كنتم فيه
ماريا بتغمز ل فاطيما: جربى وهتعرفى
فاطيما: مالها عينك يا ميمى اجى اخزقهالك ياحبيببتى
ماريا بتضحك: لا شكرا
سلمى:اقولك انا
فاطيما: قول ياعم الرومانسى
سلمى: مفيش احلى من احساس انك تكونى مع شخص بيحبك وبتحبيه بتحسى وقتها ان اى حاجه ف الدنيا هتهون مهما كانت وخصوصا يكون الل بتحبيه يستاهل كده لانه مش مقصر معاكى ف حاجه .. وقتها تحسى انك لو تطولى تجيبى نجمه من السما ليه هتجيبهاله ... سعاده ملهاش وصف هى تتحس بس لان وصفها ملوش كلام يكفيه
فاطيما مبتسمه : دا طلع احلى من سندوتش البسطرمه دا ع كده
ماريا شدت السندوتش : ماتقولينا يا ست طيما انت ايه رايك ..يعنى الشخص الل هترتبط بيه عاوزه يكون ايه واحساسك هيكون ايه مستقبلا يعنى من غير خزق عيون اهو
سلمى: صح يا طيما احكيلنا كده انت ع طول كلامك هزار ولا مره اتكلمتى بجد ف موضوع الحب دا
فاطيما مسكت سندوتش واخدت قضمه : اممم اقولكم انا ...
سلمى وماريا: هااااا
فاطيما: امممم يطمنى
سلمى: يعنى
فاطيما: انا برغم ضحكى وهزارى وقوتى الل الكل شايفها انا جوايا جبانه وضعيفه .. بخاف وخصوصا من الوجع ..يطمنى وميوجعنيش ...
ماريا:وايه تانى؟
فاطيما قضمت السندوتش :امممم يكون انسان قد المسئوليه ..انا محتاجه الل يشيل مسئوليتى ودا مش معناه انى مش هقدر اتحمل مسئوليتى لوحدى لا خالص بس محتاجه احس باحتياجى ليه دايما بضعفى معاه واحتياجه ليا دايما اكون من اولوياته وملجاءه الوحيد لانى هكون كده ليه لوحده .....اكون زى الريشه ف وجوده وف حضنه ودا ولا هيقلل منى ولا هيقلل منه ... عاوزه يسعدنى لانى هسعده .. عاوزه كل واحد فينا ميستناش من التانى يعمل ايه علشان يردله ..لا كل واحد فينا يتسابق ع مين الل هيسعد مين وهيفرحه والحكايه مش مستاهله معجزات بحاجات بسيطه ... اهتمام .. سؤال... احتواء .. امان .. استقرار ..احتياج كل دا مع بعض حب .. ونتمسك ببعض مهما حصل ونقاوح ... لما اكون ف حضنه مش هحتاج حاجه من الدنيا لانه هيكون ملجاء الامان ليا ومش عاوزه اكتر من كده يضمنى لحضنه وانا اغرق فيه وميوجعنيش لانى مبحبش اتوجع .. لانى خايفه اتوجع لانى مش عارفه وقتها هفضل فاطيما ولا هتغير لاسوء وهظلم ناس معايا ... ودا سبب مخلينى مستعجلش ف الارتباط ..لانى عاوزه ارتبط يكون ف النور زى عماد وخالد يحسسنى انه بيحارب علشانى وانا هحارب معاه واتمسك بيه زى ماانتم عملتم .... عاوزاه شارى مهما كانت المغريات قدامه وميتنزلش عنى وابقى من الاساسيات ف حياته مش اضافى ... انا هحبه بجد لانه هيكون اول واحد واخر واحد يدخل واديله قلبى يحافظ عليه ويصونه ...
ماريا وسلمى متفاجئين من كلام فاطيما ومتنحين ليها وع وشهم ابتسامه ..لاحظت فاطيما انها اندمجت اوى راحت مسكت سندوتش : ويحب منير ويحب الاكل ميسبنيش اكل لوحدى ويقعد باصصلى زيكم كده
ماريا: يخربيت فصلانك ..اكل كنتى ماشيه كويس
سلمى باابتسامه: ربنا ينولك الل انتى عاوزه لانك يا طيما تستاهلى كل خير
ماريا بخبث: ونفرح بيكى عن قريب ويبقى جروب واحد جمعنا
فاطيما لاحظت تلميح ماريا قامت : لا انتى بقى محرومه من الاكل هاتى السندوتش
قامت ماريا تجرى من ع السرير وفاطيما وراها وسلمى قاعده تضحك عليهم ..... !
ابتدى حفله خطوبه سلمى وابتدت الحفله والرقص والهيصه وطلبت فاطيما يشغلوا اغانى منير وكانت بترقص مع ماريا وسلمى وخالد والكل كان فرحان ... كانت فاطيما كل شويا تبص ع موابيلها ملقتش لا رساله ولا مكالمه من معتز واستغربت اوى .. شويا وهى واقفه مع ناس قرايبها وكانت ماريا قاعده مع عماد ..موابيلها رن ولاقت رساله من معتز
وباعتلها " 2/6/2/22"
بصت لرساله اوى وهىاصلا مش فاهمه معناه ايه راحت سلمى نادت عاوزه فاطيما فحطت الموبيل ف الشنطه وراحت ل سلمى .. وشويا تليفونها رن فخرجت علشان تررد فى هدوء وهى خارجه كانت ماسكه كوبايه من غير ما تقصد خبطت شاب كان بيتكلم فى موابيله وادلقت شويا بيبسى ع جاكت الشاب ومن اللى حصل فاطيما اتحرجت اووى بصت لشاب وع وشها قلق كان شاب اطول منها وجسمه جسم رياضى مفعم العضلات (حلوه مفعم دى
) لونه بشرته قمحى وشعره قصير وعيونه عسلىفاطيما محرجه ولانه اطول منها : سورى ..سورى انا اسفه
الشاب باابتسامه: ولا يهمك ..
فاطيما : ممكن تروح الحمام تنضفها بمايه هتطلع ع طول لاسف مش معايا كلينكس
الشاب باابتسامه: مفيش مشاكل ..
انا هخليها كده ذكرى من بنوته جميله زيك خبطتنى
فاطيما استغربت من رده و لاحظت انه بيعاكس فبعد الابتسامه والاحراج اتحولت بوش خشب: بعد اذنك
الشاب لاحظ تغيرها المفاجئ وهى ماشيه راح سألها : هى دى قاعه خطوبه عمرو وسلمى
وقفت فاطيما وبصتله بنظره حاده:ليه هو انت داخل تليفزيون قناه التوكتوك شو ..... هنا خالد وسلمى
الشاب ضحك : وكمان دمك خفيف انا بهزر ..اقصد خالد وسلمى
فاطيما بنص ضحكه تريقه: ها ها ها انت من اصحاب خالد اكيد
الشاب باابتسامه: وانتى من اصحاب سلمى
فاطيما مردتش ترد محبتش تفتح معاه كلام فب اسلوب جامد : اه هى دى القاعه اتفضل .. بعد اذنك
ولسه هيتكلم سابته فاطيما ومشيت وبرغم كده ابتسم ودخل القاعه وطول ماهو واقف عينه منزلتش على فاطيما والشاب دا كان معتز ....كان حضر الحفله من اولها وكانت متعمد يحضر ويشوف فاطيما ويشوفها وهى بتتصرف ع طبيعتها علشان يتاكد من احساسه اللى حاسه اتجاهها ... واتعمد ميعرفهاش انه هو وقال لخالد ميقولش انه هيحضر حتى سلمى معرفتهوش.. وكان بيراقب فاطيما من بعيد وبعد الموقف اللى حصل بينهم عينه منزلتش عن فاطيما وفاطيما لاحظت انه بيبصلها كتير وكانت بتتجنبه ... ماريا لاحظت وش فاطيما متغير
ماريا: طيما ..مالك
فاطيما: فى شخص ثقيل اووى فاكر نفسه خفيف الدم عمال يبص عليا وعمال يقرب منى ويفتح كلام الظريف
ماريا بتخبطها: ماهو انتى مزه يابت اكيد عجبتيه هتخرجى من الخطوبه بعريس اشطه اووى
فاطيما بصتلها: ميمى اعقلى وحيات اهلك ..متبقيش انتى وهو
هو انا من اللى بحضر افراح علشان عرسان
ماريا: لا بس لو حصل مفيش مشاكل .. عموما هو فين دا عاوزه اشوفه
فاطيما: لا مش هقولك علشان انتى هبله ومش بعيد هتروحى تقفى قدامه علشان تشوفيه وهتفضحينا وهيفهم غلط وهتفتحى حوار ملوش لازمه انا هنفضله
ماريا: علشان خاطرى فين دا ها ها ...
فاطيما: اهدى بقى والله اقول لعماد انك بتعكسى ولاد
شويا واتحرك الشاب يتصور مع خالد ومجموعه شباب
ماريا حبت تكتشف بنفسها ولاحظت شاب واقف عينه ناحيتهم : هو دا
فاطيما بصت : ايوه هو دا وافصلى بقى
ماريا بصت تانى : يخربيتك ..دا جااممد اوى .. اشبطى فيه يابت
فاطيما: بت ما تبتك وشبطه تاخدك .. روحى خوديه هو باين انه نفس عرق رخامتك
ماريا بتضحك: مينفعش مش شايفه الدبله وبعدين اكيد مسلم ابصله ازاى
فاطيما بصت ل ماريا: هو عماد فين
ماريا: هناك اهو قاعد مع بابا وماما
فاطيما : اشطه اوى .. هروح علشان عاوزاه ف كلمتين عن خطيبته اللى بتبصبص لمعازيم
ماريا راحت شدت فاطيما: يخرب عقلك مجنونه وتعمليها استنى انا بهزر
وانتى حره تكلميه تولعى براحتك بس فكى كده وبلاش قلبه الوش دى
هو معتز مكلمكيش ولا ايه .. ضيع فرصه يشوفك وانتى مزه كده
فاطيما بملامح زعل واتنهدت: والله كان نفسى اشوفه فعلا بس ظروفه بقى واضح كده هنشوفه ع فرح خالد وسلمى اللى منعرفش امتى هيحصل
ماريا بتضحك: ايوه بقى .. انتى وقعتى ولا ايه قرررى
فاطيما حبت تخلع من السؤال : انتى قولتى عماد فين
ماريا بسرعه: سورى سورى ..انا رايحه لسلمى مش هتيجى
فاطيما ضحكت: جايه وراكى هروح بس اعدل الطرحه دى وعاوزه اقلع الجزمه شويا رجلى وجعتنى يهدده الكعب ماله الكونفرس ياناس
ماريا: طيب يلا انا كمان عاوزه اقلع الجزمه شويا تعالى نروح الحمام
فاطيما : يلا
وفاطيما وماريا وهما رايحين اتجاه الحمام لاحظت فاطيما بالشاب اللى واقف دا وباصص عليها بصتله وبنظره حاده ردلها النظره باابتسامه .راحت بصت قدامها ومشيت دخلت هى وماريا الحمام وكان فى بنات بيظبطوا الميكب وماريا وفاطيما اول ما دخلوا قلعوا الجزم وكان ف كراسى
راحوا قعدوا ...
فاطيما: ايه المرار دا رجلى مش حاسه بيها
ماريا: ولا انا ياختى
فاطيما: انتى بتلبسى كعب عالى عادى انا مش عادى معايا خالص
قلت البس كونفرس بينك سلمى مردتش وحلفت ما يحصل معان الناس هتركز مع العروسه مش معايا
ماريا بتضحك: تصدقى هيبقى منظره نكته لابسه سواريه على كونفرس
نسيتى كل الل يعجبك والبس اللى يعجب الناس
فاطيما :دى مقوله فكسانه قالها واحد بيحب يتمنظر ع الناس والناس تشوفه وتمدح فى لبسه الصح كل والبس اللى يعجبك لانك انت اللى لابس واللى بتاكل وطبعا اقصد اللبس اللى يريحك وف نفس الوقت ميجرحش عين الناس يعنى مش واحده تنزلى عريانه وتقول انها حرانه ودا لبسها فى مجتمع لو شاف لحمه مش مستغطيه عند الجزار هييقف يبص عليها
ماريا بتضحك : يا تشبيهاتك . ناس بتفهم الحريه البس غلط اصلا
فاطيما: بيعاندوا المهم الموضه والواوووووو تتقالهم تلاقى واحده لابسه ضيق وخانقه بس المهم يشوفه عليها ويعجبهم وتتعاكس ..انا مرارتى بتتفقع من الل لابسين لمعاكسات .. المهم البسى اللى يناسبك ويناسب تربيتك وبيئتك انت المحيطه متبقيش حاجه شاذه ومش كل الموضه تنفع
وملكش دعوه بالناس .. يعنى تكون لابسه جيب فى مصر وتسافر امريكا تلبسى شورت علشان الناس مش عاجبهم الجيب هناك .. ارضى نفسك مش الل حواليكى ... ربنا ادانا عقل نفكر بيه
ماريا: وانتى يا فليسوفه ملبستيش اللى يعجبك ويريحك ليا
فاطيما :ماانا اشتريت الفستان دا والجزمه كانت هديه من سلمى وع ذوقها
وهو انتى فاكرانى هلبسها تانى.. هتروح جنب اخواتها وانا من امتى بلبس كعب كده
ماريا بتضحك: مجبر اخاك
فاطيما: كانت معرفتكم معرفه سوده ...
ماريا وفاطيما ضحكوا ورن موبيل ماريا وكان عماد وبسرعه لبست ماريا جزمتها ماريا بتبص ع الماريا ع نفسها وتظبط الميكب بسرعه وشعرها: انا هخرج علشان عماد رنلى
فاطيما: هحصلك هعدل الطرحه وجايه
ماريا: اوك
فاطيما بصت لماريا خارجه : انتى خارجه علشان خطيبك والتانيه قاعده مع خطيبها سيبونى بقى مع نفسى لغايه ما حبيببى يجى
كان فى واحده قريبه سلمى واقفه وبصت لفاطيما
فاطيما بابتسامه: لا متفهميش غلط انا بتكلم ع البوفيه حبيبى ..العلاقه التى لا تسؤء اطلاقا ومطيعه ... سمعتى قبل كده سندوتش زعل منك وقالك مش هتاكلينى لانك اتاخرتى ولا طبق محشى قالب وشه عليكى ... الاكل يا ساده الاكل
ضحكوا كل اللى ف الحمام ع كلام فاطيما ... وشويا وخرجت فاطيما وكان البوفيه اتفتح راحت عند البوفيه وكان اوبن بوفيه ..اخدت طبق ووافقه سمعت صوت جنبها :
كان معتز لاحظ نظره فاطيما للاكل : الورق العنب دا شكله جامد
فاطيما نفضت ولا سمعت وراحت اخدت مكرونه ..
معتز: فعلا المكرونه دى شكلها تفتح النفس
فاطيما نفخت وبعدت عنه شويا راح هو قرب منها وقبل ما تحط كفته راح حطلها ..الحركه دى نرفزت فاطيما
وقفت وحطت الطبق وبصتله: نعم ..حضرتك فى حاجه ..
معتز باابتسامه: الكفته باين عليها حلوه فقلت احطلك
فاطيما: ليه ..شايفنى مبشوفش ولا ايدى مش موجوده
وانا حره مش هاكل كفته ..اتفضلها انت كلها .. ايه العالم دى ياربى
سابت فاطيما الطبق وراحت متنرفزه قعدت ومعتز وقف ابتسم اووى
ماريا لاحظت فاطيما مفيش طبق قدامها ..راحتلها: ايه دا مش هتاكلى ..ايه حصل ف الدنيا معجزه
فاطيما بعصبيه : ماهو ف ناس كده ربنا يبعتهم يسدوا نفسك
ولولا اننا ف خطوبه سلمى ومش عاوزه اعمل مشاكل كنت ظبطته
ماريا بتبص لاقت الشاب باصص ليها ومبتسم :: دا ايه دا ماله
فاطيما : لا هخليه يغلبنى ..ولا عاش اللى يسد نفسى
ماريا شافت فاطيما واقفت: رايحه فين
فاطيما: هاكل .. هجيب اكل ليا واقعد اكل
ماريا ضحكت ع فاطيما .. راحت فاطيما تجيب الاكل وكانت بتحاول تتمالك نفسها علشان محدش يلاحظ راحت جابت الاكل وقعدت وكانت عاوزه حاجه ساقعه فقامت وكان معتز واقف يجيب لنفسه ولسه هتمسك الكانز ..معتز مسكه ..فمعتز قربه ليها: اتفضلى
فاطيما من غير ما تبص : لا شكرا ..
بتبص فاطيما ع بيبسى ملقتش غير سفن وميراندا وانواع تانيه والبيبسى اتاخد كله الا الاخيره اللى ف ايد معتز راحت اخدت السفن
معتز: بس انتى بتحبى البيبسى هتشربى سفن ازاى
فاطيما وقفت مكانها وبصتله: انت ايه عرفك
معتز بسرعه عمل حوار : انتى سيبتى كل الل موجود ومسكتى البيبسى وبعد ما اخدته فضلتى تدورى فااكيد كنتى بتدورى عليه ... لانك بتشربيه دا طبيعى
فاطيما قربت خطوه وبتتمالك نفسها لانها اتنرفزت: بص هقولك حاجه
اعتبرنى مش موجوده هنا وبلاش النظرات والابتسامات دى ..لانها مش هتجيب معايا سكه فى بنات كتير جايين علشان النظرات والابتسامات دى وماشاء الله كتير واحلى وارفع فياريت تبطل علشان مش عاوزه اعمل مشكله ممكن
معتز متفاجئ من طريقه الحاده بتاعه فاطيما: انا اسف انى ضايقتك
بس حسيت انك ظريفه فقلت نتعرف
فاطيما: لا حضرت انا مش من بتوع نتعرف .. انا جايه هنا افرح وارقص واكل زى ماانت شايف .. اتعرف وستظرف لا مش انا .. اتفقنا يا اسمك ايه
معتز لسه هيقولها اسمه قاطعته..: مش مهم اعرف .. اتفقنا وانجوى بقى خطوبه صاحبك وان شاء الله تقابل بنت من بتوع نتعرف وتكمل يومك.. بعد اذنك
مشيت فاطيما وبرغم انها مضايقه لكن حاسه بحاجه غريبه اتجاه الشاب دا نبره صوته قريبه لمعتز لما بتكلمه ف الموبيل قلبها دق بسرعه هى فسرته انه من توترها من الموقف ... ومعتز وقف متفاجئ من كلام فاطيما
وطريقتها وابتسم وراح قعد مع اصحابه والابتسامه مغبتش عن وشه ...
فاطيما وهى قاعده حست بقلبها دق ..ماريا لاحظت انها متغيره
ماريا: مالك..الواد الحلو دا ضايقك تانى
فاطيما: صوته مالوف ليا اوووى حاسه انى سمعت الصوت دا بجد
بس مش عارفه اجمعه ...اسلوبه وطريقته نرفزونى مش عارفه اركز
ماريا : بصراحه اللى يشوفه يتلوح مش ميركزش
فاطيما بصتلها ..: عماد
ماريا اتنفضت .. عماد: ايوه يا طيما
فاطيما : كنت عاوزه اقولك حاجه
ماريا خبطت رجل فاطيما ..عماد: اتفضلى
فاطيما: ميمى
ماريا عماله تخبط ف رجل فاطيما فضحكت فاطيما ...: ميمى وانت ان شاء الله فرحكم هيكون احلى من كده
عماد باابتسامه: عقبالك يا طيما
ماريا: يارب
فاطيما مالت ع ماريا: لمى نفسك بقى علشان المره الجايه هفتن
ماريا : ماشى ماشى
خلصوا حفله الخطوبه واتصوروا مع العريس والعروسه ورجعت ماريا وفاطيما ع السنطه وف الطريق كانت فاطيما بتبص ع الموبيل بعد الرساله اللى بعتها معتز مبعتلهاش حاجه تانى جربت تبعتله ع الشات مكنش فاتح ... فمن التعب رجعت البيت اترمت ع السرير نامت ...!!
فى نفس الليله فى بيت سلمى كانت سلمى ف اوضتها غيرت وقاعده ع السرير بتبص ع الدبله ومش مصدقه نفسها وع وشها ابتسامه واحساسها بالفرحه عازلها عن الدنيا .. تليفونها رن وكان خالد
سلمى: الو
خالد: وحشتينى يااحلى عروسه
سلمى باابتسامه: بجد كنت حلوه
خالد: زى القمر ...انا كنت خايف عليكى من عيون الناس كانوا مبينزلوش عينهم عليكى
سلمى: مش اوى كده ..ليه متقولش عينهم منزلتش من عليك وخصوصا البنات ماشاء الله قرايبك البنات اكتر من الرجاله
خالد بيضحك: انتى كنتى مراقبه الناس بقى ومكنتيش معايا
سلمى: انت فى قلبى ومش هتخرج
خالد: بحبك
سلمى: بحبك
فى الوقت دا باب اوضه سلمى خبط وكان باباها ومامتها وقفلت مع خالد
سلمى: اتفضل
دخلوا .. مامتها : شكلك مش هتنامى انهارده الاجهاد اللى كنتى فيه دا كان زمانك نمتى زى الفيل
باباها: الفرحه صعب تنيم حد ...ولا ايه يا سولى
سلمى باابتسامه ومردتش ..راح باباها قعد جنبها ومسك ايديها اللى فيها الدبله.. باباها: مبسوطه يا سلمى
سلمى: اوى اوى يا بابا بجد ربنا يخليك ليا يا حبيبى
باباها: الحمد الله يارب دايما ويخليكى ياحبيببتى
سلمى: صحيح يابابا هو انت وافقت ع خالد بسرعه ليه كده انا كنت مش متوقعه بسرعه كده وعملت حسابى ع كلام وحوارات ووقت كتير و..
باباها قاطعها : انتى بتحبيه
سلمى اتكسفت هزت راسها
باباها: وهو بيحبك
سلمى بسرعه: اوى اوى اووى يا بابا
باباها:انا كنت رافض فى الاول لكن اتكلمت مع عمك وهو اللى اقترح عليا الخطوبه دى قالى لو فاطيما مكانك هيعمل كده .. العلاقات اللى ف النور وبمعرفه الاهل اامن واحسن بكتير
اولا :البنت هتحس بالامان واحنا معندناش اغلى منكم
ثانيا: اختبار لارتباطكم ..انه مش مجرد مشاعر وكلام حب انما افعال
ودا هيبان مع العلاقات الواضحه انه ملزم يثبت كده ومش هيقضوها رومانسيه لان الحياه بين اتنين مش كلام ووعود لكن بفعل
ثالثا: اختبار لخالد ... هيبقى قد كلامه ولا لا واختبار ليكى انتى اختارتى صح ولا لا
كلام عمك اقنعنى جدااا ومامتك اقتنعت بخالد بنسبه كبيره وانا سالت عليه مكدبش عليا ف حاجه فبدل ما يتكلموا بعض من ورانا ومحدش يعرف احنا هنكون معاكى ومعاه ..غلط ننصحه غلطتى ننصحك
النور احسن بكتير من الضلمه يا سولى
سلمى قامت حضنت باباها: ربنا يخليك ليا يا حبيبى
باباها: ويخليكى ليا ويكمل فرحتك يا حبيببتى ويطلع خالد يستاهلك فعلا
مامتها: كده المثلث مفضلش غير فاطيما ..يارب نفرح بيها قريب
باباها: يارب
سلمى : يارررررررررررررب
فى نفس الليله كان معتز رجع ع البيت ودخل اوضته غير هدومه وطلع البلكونه ولع سيجاره ومفتحش نت ..كان بيفكر فى قرار ينفذه ...طول ماهو واقف وافتكر تصرفات فاطيما وع وشه ضحكه كبيره وحس ببهجه وفرحه ... وافتكر محادثه كانت بينه وبين فاطيما
فلاش باك
فى يوم كانوا بيتكلموا ع النت فى شات وكانوا سهرانين مع بعض
معتز: قوليلى انتى اكتر حاجه بتحبيها
فاطيما : الاكل والشيكولاته والنوم ومنير
معتز : ههههههههههههه لا بجد
فاطيما: انا بعشق الشيكولاته وانا بسمع لمنير صوته خيال بيسفرنى لزمن تانى والاكل بحبه مبعترضش عليه وبيسلينى والنوم حبيببى خيالى الشاطح ..اى حاجه نفسى فيها وانا نايمه بتحصل
قالها محمود درويش : لنا ف الخيال حياه
معتز: يا واد يا مثقف
فاطيما: وانت .. انا ملاحظه انك دايما بتنزل ع صفحتك صور عمرو دياب واغانيه
معتز: الهضبه ..دا عشق وبحب اسمع لمنير برضه بس الاساس عمرو
والاغانى القديمه ..حليم. سومه.. فيروز.. كده يعنى
فاطيما : بجد ..انا كمان بحب اسمع الاغانى القديمه واتفرج ع الافلام القديمه انا وتوحا ع طول بنتفرج مع بعض .. رومانسيتهم مفيش زيها كده
اناقه احمد مظهر وجنتله احمد رمزى ورشدى اباظه و رجاله صحيح
معتز: ايه التخبيط دا ..احنا رجاله اوى
فاطيما: ماهو انا مشفتكش علشان احكم ههههههههههههه
معتز: الل يسمعك بوصفك ليهم كده انك عاوزه تعيشى ف فيلم ابيض واسود كلاسيكيات زمان
فاطيما: زمان مكش فى حاجات معقده كده وكل حاجه ببساطه
الحب وتعبير عن حب .. كانوا صادقين بجد
معتز: انتى محبتيش او اعجبتى بحد قبل كده
فاطيما: كتيررررررررر
معتز :بجد؟
فاطيما: هههههههههههه فى الاحلام اى بطل يعجبنى واحبه احلم بيه وان انا البطله حاليا شغاله مع الهندى كده شاروخان وشاهيد كابور ورانبير ياااااااااااااااه ..خيال دا نعمه ياابنى
معتز: لا ع الواقع مفيش
فاطيما: لا محصلش لسه .. قلبى لسه بكرتونته ومفتاحه
معتز: مواصفات الشخص اللى هياخد المفتاح دا ايه بقى
فاطيما: امممممم .. يطمنى ويكون محتاجنى ويحسسنى بالامان وميوجعنيش ولا يسيبنى ويكون قد وعوده كله دا بالمختصر بيحبنى بجد
معتز سكت لحظه : وايه تانى
فاطيما: طبعا يكون اخلاقه كويسه لانى اصلا مش هعرف حد اخلاقه استك
معتز: ههههههههههه استك
فاطيما: انا دقيقه ف الحاجات دى معانى ع ثقه ان الحب هيجى خبطه كده من غير أستأذان
معتز: ازاى
فاطيما: انى هقابل شخص واحبه واصلا انا مش هكون مخططه لكده قلبى هو اللى هيختار وهنا تاتى الزعامه لقلبى فى الاختيار .. فااتمنى اختياره يكون صح لانى مش حمل تجارب ولا هو وعاوزه تجربه واحده اعيش بيها عمرى لغايه ما اموت .. عارف ليه
معتز: ليه
فاطيما: لو حد اداك تفاحه واخدت قضمه منها بتبقى غير لما عشره كل واحد ياخد قضمه التفاحه شكلها بيتغير غير كده بيدبل ومتعرفش ترجعها ولا تحافظ عليها .. فالقضمه الواحده من شخص واحد تقعد معاك التفاحه فتره اطول عن اللى ياخد منها كتير قلوبنا كده تكون لشخص واحد افضل بكتير انها تكون مع كتير انا اتمنى اللى ارتبط بيه يكون صادق وحقيقى حبه
معتز: هيكون محظوظ بيكى
فاطيما: او انا اللى محظوظه بيه
افتكر معتز كلام فاطيما وقرر يبعتلها ماسج اعتراف
وكانت بالارقام
"
2/3/27/6/13/28/25/28
24/6/3/1/5/23/22
1/27/18/8/22 & 24/13 &26/2/18/8/22 & 18/25/22
2/6/2/22 "
ضغط على زرار انتر وع وشه ابتسامه وحط ايده ع قلبه ...!!
تانى يوم صحيت فاطيما فاصله وجسمها مهدود ..خارجه من الاوضه
فاطيما بتتوجع: اه يانى يا ضهرى .. اه يانى يارجلى .. اه يانى يا وسطى
اه يانك كلك يا طيما ... اصحابك هيكسحوكى يا طيما مش هتنفع بنكله يا طيما هتتجوزى ازاى ياطيما وانتى متكسحه كدهون يعنى اه اه
حماده شافها وبيضحك: ماهو انتى اللى كنتى عامله زى فرقع لوز كده مش ثابته وعماله ترقصى احسن تستاهلى
فاطيما بتزغر ل حماده: بقولك ايه يا بشمهندز متفتكرش انك دخلت هندسه هيبقى ممنوع الاقتراب منك والله اجيبك تحتى اعملك عجله عربيه يعملوا فيك اختبارات سرعه ..لم نفسك
حماده : قادره وتعمليها يا فيله
راح بسرعه ع اوضته وفاطيما: ماشى يا معزه ماشى
جددتها : خشى خديلك دش يفوقك كده
فاطيما بصوت تعبان: معانى مش قادره بس هدخل علشان اصلى
راحت فاطيما اخدت دش ع السريع وراحت ع اوضتها تصلى خلصت صلى بصت ع الموبيل لاقت رساله من معتز كانت فرحانه فتحتها لاقتها كلها ارقام ومش فاهمه .. فاتصلت بيه
فاطيما: الو
معتز: مال صوتك
فاطيما: اتهديت امبارح مش قادره
معتز: عارف
فاطيما: عارف ايه
معتز: اكيد يعنى رقصتى وهيصتى فجسمك وجعك
فاطيما: اه جدااا هو انت فين
معتز: ف مشوار ..
فاطيما: مش فاضى يعنى
معتز: ساعتين وهروح المحل نتقابل اون لاين
فاطيما: اوك
قبل ما تقفل: ميزو
معتز: ايوه
فاطيما سكتت لحظات: لالا خلاص لما نتقابل بليل ع الشات
قفلت فاطيما وهى بتجمع الصوت : شبهه اوى ..يخلق من الشبهه اربعين
خلصت فاطيما اللى وراها واخوها ف اوضته بيذاكر وجددتها نامت ومامتها نزلت مشوار هى وباباها عملت كوبايه شاى بلبن ومعاه طبق بسكويت وبيتيفور وفتحت اللاب ولاقت معتز مستنيها
فاطيما لسه هتبعتله كان هو اللى بعتلها : بخ
فاطيما: ههههههههه ياما
معتز: ياما هههههههههه
فاطيما: متستناش منى مامى دى انسى
معتز: خلاص بقى بعد سنين دى اتعودت..ايه الاخبار
فاطيما: تمام الحمد الله ..وانت
معتز: نمام .. ايه اخبار الخطوبه امبارح
فاطيما بحماس: كانت روووعه بمعنى الكلمه سلمى كانت زى القمر وخالد قمر كانت خطوبه قمرات واليوم كان جميل قوووى ياريتك كنت موجود
معتز: ماانا كنت موجود
فاطيما: بجد ..فين ومكلمتنيش ليه
معتز: هههههه مش انتم موجودين يبقى انا موجود
فاطيما: ياراجل هههههههه
معتز:احكيلى كده انتى عملتى ايه
ابتدت فاطيما تحكى ونسيت تسأله ع الرساله ..وحكتله كل حاجه وجت ع الموقف الل حصلها معاه
فاطيما: وهناك اتعرضت لموقف زباله من شخص فاكر نفسه دون جوان ..ثقيل اووى ورخم
معتز: ليه عملك ايه
فاطيما: معرفش هو كان بيستظرف وبعدين حسيت انه مراقبنى بجد خنقنى ولولا اننا ف خطوبه سلمى كنت فرجت عليه الفرح
معتز بيضحك: بجد ..لدرجه دى ضايقك ..هو كان وحش ولا ايه
فاطيما: مش حكايه وحش ولا حلو بس طريقته مستفزه او يمكن ان اللى معقده انا بروح الافراح افرح واهيص مش اقلب عريس وانا خارجه .. واضح انه هو كان رايح يتعرف بس اكيد عنيه كان فيها حاجه
معتز: ليه
فاطيما: البنات كانوا مزز جسم وجمال سابهم وركز معايا انا ..اه انا مش تخينه اوى بس مليانه عن كل البنات والشباب بيركزوا مع الرفيعين اوى .. معرفش انا ركز معايا ليه اكيد احول ..مع انه امور يعنى مش وحش
معتز: انتى ركزتى ف شكله بقى
فاطيما: اخر مره ركزت وفاكره ملامح يعنى مش اوى وصحيح بالمناسبه صوته قريب اوى لصوتك .. انا لاحظت كده بعد ما كلمتك تانى صوتكم مقارب اووى
معتز سكت لحظات: اكيد هيكون متقارب
فاطيما : ليه اخوك التؤام هاهاهاهاه
معتز: لا انا
فاطيما اتفاجئت: بتهزر
معتز: لا انا ..انا حضرت الخطوبه من اولها امبارح
فاطيما متفاجئه وتنحت .. معتز لاحظ انها سكتت : طيما
فاطيما: وسبتنى اخبط فيك كده واشتمك
معتز: هههههههههههههههههههههههه بصراحه مزجتينى اوى
فاطيما: نعم حضرتك
معتز: عجبنى موقفك اوى وكلامك
فاطيما: ومقولتش ليه انه انت بقى وكنت متخفى ليه حتى خالد مقاليش انك موجود
معتز: اسمعينى بس من غير عصبيه
فاطيما: ها
معتز: انا حضرت لان خالد كان هيزعل وانا اللى قولتله بعد ما شاورلى عليكى وحبيت اشوفك ع طبيعتك بتتصرفى ازاى .. زى ما بتحكى ولا بتحورى علينا
فاطيما: وشوفت ايه
معتز: شوفت انك بنت بميت راجل
فاطيما: بتتريق
معتز: عيب عليكى .. لا خالص .. اغلب البنات الايام دى بتروح افراح تتعرف على شباب هناك منهم يصاحبوهم او يرتبطوا بيهم ويتجوزوهم قليل او نادر جدااا لما اشوف بنت لبسه ومتشيكه ورايحه فرح علشان تنبسط وفرحانه لاصحاب الفرح مش علشان مصلحه تتطلع بيها وبصراحه كنت بختبرك وعديتى من الاختبار باامتياز ...
فاطيما بتجمع فرحت انها شافته وزعلت من اللى عملته: تصدق انك رخم فعلا انا هقفل
معتز: استنى استنى ...
والله ما قصدت حاجه بس حبيت فعلا اشوفك ع طبيعتك
فاطيما رسمت ابتسامه: ماشى يا معتز ليك مره
معتز: بس بجد يا طيما انا مبسوط انى اتعرفت عليكى انتى حاجه اساسيه فى يومى ولما شوفتك احساسى اتاكد اكتر
فاطيما: احساس ايه
معتز سكت لحظات : انا بعتلك رساله امبارح
فاطيما: اه صحيح .. ايه حوار الارقام اللى معاك يابنى انا كنت ادبى
معتز: عاوزه تعرفى معناهم
فاطيما: ياريت
معتز : بسيطه هقولك ازاى
فاطيما: ازاى
معتز: الارقام دى بترتيب حروف الابجديه
هتلاقى كل رقم لحرف .. اكتبى الحروف بنفس ترتيب الارقام من الشمال مش اليمين ..هيظهرلك الكلام
فاطيما: طيب ثوانى اعملها
معتز بسرعه: لالا استنى
فاطيما: ايه
معتز: مش دلواقتى لما نقفل اعمليهاوانا مسافر يومين وراجع هستنى ردك
فاطيما : رد ايه
معتز: اعمليها وفكى الشفره وهتعرفى ... عاوز اقولك كل حرف من الكلام بجد ويلا سلام علشان ورايا حاجات
فاطيما مش فاهمه ولسه هترد لاقته خرج اوفلاين
ابتدت تدور ع جوجل رسمه لحروف علشان متتلغبطش ونزلتها وابتدت تفك الشفره ومعاها ورقه وقلم ومعتز خرج بره المحل يشرب سيجاره وهو متوتر من رد فاطيما معانه حاسس بنسبه ان فى قبول ..
ابتدت فاطيما تركز وتكتب الحروب :انا مبعملش ف المذاكره كده
وجمعت الرساله واتفاجئت بيها لما شافتها وكانت
" بتوحشينى
محتاجلك
اوعدك مش هبعد عنك
بحبك "
خصوصا اخر كلمه " بحبك " اللى كان بيبعتها كتير الفتره الاخيره
الكلام خلى فاطيما متصلبه مكانها .. مخضوضه.. مش فاهمه الاحساس اللى سيطر عليها ودقات قلبها الل حاسه بيها ...
لاقت رساله من معتز ع الموبيل
" مهما كان ردك انا هتقبله ونكون اصحاب انا مش عاوز اخسرك لكن مشاعرى حقيقيه اتجاهك ومتاكد منها وبعد يومين هستنى ردك "
اترسمت ابتسامه ع وش فاطيما معانها مخضوضه لكن مش عارفه ترد تقول ايه ....
قعدت فاطيما سرحانه فى اوضتها باصه لرساله ولورقه فى ايديها وع وشها ابتسامه وفى نفس الوقت متصلبه مسكت موابيلها تكلم ميمى تجيلها تحكيلها ..لاقت موابيلها مقفول وبعتت لسلمى تكلمها مكلمتهاش ...
جددتها ندهت عليها تتفرج معاها ع فيلم هندى لشاروخان
فاطيما: ايوه يا توحا
جددتها: حبيببك هنا اهو
فاطيما اتفزعت: حبيببى .. حبيببى مين وفين
جددتها: مالك .. انا اقصد شاروخان فى فيلم ليه هيتعرض اهو
تعالى نتفرج عليه مع بعض
فاطيما : اه .. طيب
جددتها : اعمليلنا حبه فيشار مع كوبايه شاى كده
فاطيما : حاضر
راحت فاطيما ومع سرحانها ف كلام معتز حرقت الفيشار مرتين والشاى اتهرى منها غليان دلقته وعملت من جديد وعملت فيشار مش محروق وراحت قعدت جنب جددتها
جددتها: انا شميت ريحه حريق انا قلت ولعتى ف المطبخ ..امك كانت عملتلك فرح
فاطيما: كله تحت السيطره
وابتدت الفيلم وفاطيما لحظها الحلو كان فيلم رومانسى
توحا: حلو الفيلم دا .. البطل دا تحسيه بيحب بجد
فاطيما: توحا ..هو ازاى الواحد يحس انه بيحب
توحا: بسيطه اوى
فاطيما: ازاى
توحا: الامان والاستقرار والاحتواء ببساطه لما يحس ان الدنيا كلها تتمحور ف شخص واحد بس عن باقى البشر ...لما تلاقى مفتاح ضحكتك معاه عن غيره .. لما قلبك بيدق ليه لوحده عن غيره مجرد انك تسمعى اسمه تحسى بسعاده ولما تسمعى صوته تحسى انك طايره وعينيكى فيها لمعه عن اى حد زى عينك كده دلواقتى
فاطيما ارتبكت: ايه انا ..
توحا بتتضحك: الحب مش عيب ولا غلط يا طيما.. الغلط والعيب هو ازاى نتصرف ف الحب دا ونتعامل معاه الاشخاص هما اللى بيقرروا الحب دا حلو ولا وحش .. الحب نعمه من ربنا واحنا يا نحافظ عليها او نهملها
وهيبقى الغلط فينا مش فى الحب ....مش سومه غنت يلى ظلمتوا الحب وقولتوا وعدتوا عليه مش عارفه ايه العيب فيكم يا فى حبايبكم .. اما الحب ياعينى عليه ..ياعينى عليه ...
فاطيما ابتسمت: الله عليكى يا توحا يا رومانسى
توحا: ربنا يفرح قلبك بحب تستاهليه ..حب الحلال
ولا تدوقى وجع القلب ابدا يا حبيببتى ...
فاطيما اترمت ف حضن توحا: يارب.. يخليكى ليا يا توحا
توحا: يلا نكمل الفيلم بقى
فاطيما : يلا
كلام توحا وضح لفاطيما احساسها اتجاه معتز نوعا ما حست ان اللعبه اتقلبت بجد .. مر يومين والمفروض ترد ع معتز و طيما مش عارفه تاخد قرار مختاره وخايفه الساعه 4 بعد نص الليل مامتها شافتها رايحه اتجاه المطبخ :
مامتها: مالك ياطيما رابطه راسك كده ليه مصدعه
فاطيما بصت لمامتها: جعااانه وكتر التفكير وجعنى دماغى هشوف اعمل ايه اكله
مامتها: بتفكرى فى ايه ..ومش لسه واكله سندوتشات بطنك هتوجعك
فاطيما:هى بطنى ولا بطنك روحى يا جيهان شوفى سكتك
دخلت فاطيما وسط المطبخ: اعمل ايه
بصت لاقت 5 كياس اندومى صغير راحت عملت 3 منهم واخدت الاتنين معاها فى الاوضه تاكلهم كده ... وهى بتاكل قعدت تفكر وفكرت فى ميمى وعماد والسعاده والحب اللى هما فيها لانهم بيحبوا بعض وفى سلمى وخالد وحبهم لبعض وسعادتهم انهم مع بعض .. حست انه دورها انها تعيش سعادتها مع اللى قلبها دقله محسبتش انه معرفه نت وانها مشفتهوش اعتمدت ع احساسها وتجارب اللى حواليا الناجحه وقلبها بيقولها وافقى .. مسكت موابيلها ع الفجر وقررت بعد تفكير قرر قلبها وطغى ع عقلها القرار وبعتتله رساله مختصره بطريقه هو يفهمها
27/6/13/3/25/28
يعنى وحشتنى
بعد ما بعتت بدقتين بعتلها معتز الرد
Love You More AnyThing My Gift
ابتسمت ونامت او معنى اصح معرفتش تنام غير الصبح وكانت احلامها ورديه وصحيت ع تليفون من معتز
فاطيما ردت : الو
معتز: وحشتينى ____________________________________
يتبع
ليست هناك تعليقات:
إرسال تعليق