(1)
الامل ... طوق نجاه من الغرق .. شعاع نور فى وسط العتمه .. نسمه هوا ف عز الحر .. ايد تتمد ليك ترفعك ..الامل فى ربنا عز وجل ان مهما حصلنا فرجه قريب بأذن الله ..
الامل بيغير حياتنا وحياه ال حوالينا لانه بيديها معنى واصرارنا بتمسكنا بيه هنوصل ونعدى ..
وربنا يبعتلنا الامل فى حاجات حوالينا وممكن يكون شخص♥ ...
الامل مش مجرد كلمه الامل حيـــاه عايشنها
بـالامل بتبتدى الحياه ومن غير الامل بتنتهى الحياه
____________________
جرس الباب رن واتفتح الباب :
عمرو: صباح الخير
خالته: عمرو حبيبى صباح الورد حمد الله ع سلامتك
عمرو حضن خالته : الله يسلمك يا خالتو والله وحشانى
خالته: حبيبى نورت
عمرو بيضحك: وحشتينى يا خالتو وبعدين قلت افطر معاكو هو ادم فين
خالته: ادم جوه نايم رجع متاخر وكان بيذاكر
عمرو: لا يصحى يفطر .. هو واخدها سخن سخن كده مذاكره ايه مش خلص وبقى دكتور جراح
خالته: الماجستير بقى
عمرو : حضريلنا انتى الفطار وانا هصحيه نفطر سوا
خالته: تمام
راح عمرو اتجاه الاوضه وفتح الباب بهدوء كانت ضلمه كحل
راح فتح النور وبيبص ع ادم لاقاه نايم زى القتيل
مشى بخطوات هاديه اتجاه ادم وقرب من ودانه : ادوووووومى
ادم اتفز من ع السرير وبص لاقاه عمرو راح حدفه بالمخده : يخربيت هزار البوابين بتاعك دا
عمرو بيضحك: هى دى وحشتنى ياابن خالتى
ادم بيبص نص عين : نعم دانت لسه مسافر بقالك شهرين ومزهقنى ع الفيس والتليفون هتوحشنى امتى ها ..؟
عمرو راح حدف المخده ع ادم : علشان كده هقعد ع قلبك هنا شويا
ادم بيضحك: لا ياراجل ماانا عارف انك هتيجى تقعد معانا لغايه مااهلك ينزلوا مصر ع اخر السنه
عمرو بيغمز ل ادم: هنقضيها سهر وكده
ادم بيقوم من ع السرير : قضيها انت انا ورايا مستشفى الصبح ومذاكره
وبعدين انت مش وراك شغل ولا ايه ..مش انت جيت بدرى عنهم علشان شغلك .. بطل طيش انت لسه متخرج
عمرو بيضحك: ودا ماله عن دا .. عموما انا قاعد ع قلبك يلا قوم افطر معايا
انا جيت من الطياره ع عندكم
ادم : انا قايم اهو اسبقنى
عمرو : اشطه وفتح البلكونه دى خلى نور ربنا يدخل
راح عمرو فتح البلكونه وبيشم هوا الصبح وبيبص حواليه باابتسامه
عينه جت ع بلكونه العماره ال قدامه شاف بنوته بتسقى زرع وبتحط اكل لعصافير ومعاها كاميرا حوالين رقبتها وبتصور فيهم لاقى نفسه واقف مكانه وفضل باصص عليها وهى مش واخده بالها
ادم وهو خارج من الاوضه: هاخد دش ع السريع انا
عمرو من غير ما يبص : اشطه براحتك
شويا ودخلت البنوته دى وقفلت الستاره ودخل عمرو وهو مش عارف ايه عاجبه ف ال شافه .. خالته حضرت الفطار وقعدوا ع السفره وادم لسه مخرجش من الحمام
عمرو بصوت عالى : يا دكتور كل دا تاخير هفطر وهنفضلك
ف الوقت دا باب الشقه خبط فاقيمه ام ادم تفتح فعمرو قام الاول يفتح الباب
فتح عمرو الباب لاقى البنوته ال شافها من البلكونه هى ال واقفه وع وشها ابتسامه : صباح الخير
عمرو ابتسم: صباح الخير
خالته بصت مين ع الباب : توتا
حياه: صباح الخير يا طنط
خالتها زقت عمرو ال متنح : صباح الورد يا حبيببتى
حياه: المفتاح بتاع الروف علشان عاوزه اخد كام صوره لورد ال فوق
المفتاح ال معايا مش لاقياه معلش يا طنط انا اسفه ع الازعاج
ام ادم: من عيونى يا حبيببتى ولا يهمك ثوانى
وقفت حياه مكانها ادم خرج وراح يقعد ع السفره شاف حياه واقفه
ادم : حياه صباح الخير
حياه : صباح الخير يا دكتور
ادم: ايه هتصورى الزرع والورد ال فوق
حياه: انت عارف بقى المسابقه قربت ومحتاجه اجمع اكتر صور
ادم: لو احتاجتى حاجه عرفينى
حياه باابتسامه: ميرسى
ام ادم جابت المفتاح وادته ل حياه واخدته وطلعت ع الروف
وعمرو وادم قعدوا ع السفره يفطروا
عمرو: مين دى ؟
ادم وبياكل : دى حياه جارتنا ال ساكنه قدامنا ف العماره
عمرو: مااخدتش بالى منها
ادم بيضحك: هو انت كنت بتيجى اصلا علشان تاخد بالك انت كنت بتيجى عندنا بالعافيه .. هو احنا كنا بنشوفك الا ف المناسبات وع طول اسبوع ف الجامعه وشهرين ف الامارات حتى الاجازه مبتصدق تخلص امتحانات وتطير
عمرو بيضحك: متقلقش انا قاعد اهو مش رايح ف حته هزهقك يا دكتور
ادم بيضحك: ماشى يا دكتور مستقبلا
عمرو: ان شاء الله هحضر الدكتوراه وهنبقى اتنين دكاتره متقلقش
احنا مشرفين العيله دى يا دوووومى
ام ادم رجعت بالشاى وهما بيفطروا وشايفاهم بيضحكوا : ربنا يسعدكم دايما
عمرو: بس اسمها غريب اوى
ادم بياكل: مين
عمرو : جارتك ..حياه اسم غريب
ادم بيبص ل ادم : لانها فعلا حياه
عمرو : لا ياراجل .. وبعدين صور ايه ال هتصورها دى
ادم بتلقائيه : داخله مسابقه صور لنباتات والورد وكده لهواه فبتصور ال موجود ف الروف
عمرو: اها ف المشتل ال انت عامله فوق
ادم بيخبط عمرو: بتتريق انت لو شفته مش هتخرج منه اصلا
عمرو بيضحك: وماله هشوفه مانا قاعد
ادم: انت مش هتروح الجامعه
عمرو: ميعادى بعد بكره هقابل دكتور رفعت وهاخد الجدول
والدراسه كمان اسبوع
ادم بص ع الساعه : انا خلصت فطار يادوب الحق اروح المستشفى
عمرو: طحن كده مش تقعد معايا انهارده انا لسه جى وواحشك كمان
ادم بيبص ل عمرو: بس مستقبلى واحشنى اكتر
انت قاعد هتروح فين يعنى انما يوم من مستقبلى يضيع يفرق معايا
عمرو بيضحك: ماشى يا دكتور افتكرها
ادم بيضحك: اشوفك ع العشا لانى هتاخر انهارده
قام ادم يلبس وعمرو دخل الاوضه ال جهزوها ليه وحط هدومه شويا خرج رايح ياخد دش جرس الباب رن
راح فتح الباب وكانت حياه وباابتسامه: طنط موجوده
عمرو مبتسم: جوه
حياه: بعد اذنك اديها المفتاح وقولها حياه خلصت
عمرو : حاضر
ومشيت حياه وبص عمرو لمفتاح وابتسم خرجت خالته من المطبخ
خالته: مين يا عمرو
عمرو مبتسم: بنوته ال اخدت المفتاح
خالته: اه حياه
عمرو: ايوه ادتنى المفتاح وبتقولك هى خلصت
خالته : ماشى يا حبيبى حطه ع ترابيزه السفره وانا هشيله انت عاوز حاجه
عمرو: لا يا خالتو انا هاخد دش وهنام شويا
خالته: هصحيك ع الغدا
عمرو: اتفقنا
اخد عمرو الدش ورجع نام ع السرير واتصل بمامته يطمنها
عمرو: نونو
مامته: وصلت يا حبيبى
عمرو: وبكلمك وانا نايم ع السرير بعد مافطرت كمان
مامته: وخالتك وادم عاملين ايه
عمرو: تمام متقلقيش انا هنا
مامته بتضحك: لا انا كده هقلق عليهم
عمرو: يلا بقى ياهناء عاوز انام
مامته: ماشى ياحبيبى ولما تصحى كلمنى
عمرو: ان شاء الله سلام
قفل عمرو ونام ....
____________________
وصل ادم المستشفى وراح غير ولبس البلطو وخرج من اوضه بعد ما غير
ومشى خطوتين سمع صوت بينادى عليه من ضهره : دكتور ..دكتور ادم
بص ادم ع الصوت : مها ..دكتوره مها
مها باابتسامه: صباح الخير
ادم: صباح الخير
مها: ع طول مستعجل كده
ادم بص ع الساعه: ف عمليه هساعد دكتور يحى كمان ربع ساعه
مها: من وقت ما اتخرجنا ومش بقينا نقعد مع بعض مش طيالك انا مفطرتش لسه
ادم بيضحك وبص ع الساعه: كمان ساعتين نفطر سوا اتفقنا
مها باابتسامه: اتفقنا
راح ادم حضر العمليه وخلصها رجع ع مكتبه جتله رساله ع موبيله من مها
" مستنياك ف الكافتريا "
خرج ادم وراح ع الكافتيريا لاقاها قاعده وطلبت فطار لفردين ومستنياه
ادم قرب منها : سورى ع التاخير
مها: ولا يهمك نص ساعه مفيش مشاكل بس المشكله هتحصل عصافير بطنى قطعتنى
ادم ضحك : يلا افطرى قبل ما يطلعوا يفترسونا
قعد ادم ومها مسكت سندوتش قربته ل ادم : اتفضل
ادم : اوووبس انا مش هقدر اكل لانى فطرت قبل ما انزل
انا هشرب النسكافيه معاكى سورى
مها حطت السندوتش ف الطبق وربعت ايدها ورجعت ورا بالكرسى: يعنى استناك وتقولى فطرت
ادم: انا اسف بجد استعجالى نسيت اقولك فعلا فطرت الصبح وشبعان
فهصالحك ونتغدى سوا انا قاعد لغدا ..افطرى انتى
مها: عقاب ليك هتدفع تمن الفطار دا.. بس انا هفطر كل دا
ادم : كلى ع اد ما بتشبعى والباقى هيروح لصاحب نصيبه يا ستى
النسكافيه بلبن صح
مها باابتسامه: ايوه
قام ادم جاب كابتشينو ليه ونسكافيه ل مها ورجع قعد
مها بتبص ل ادم: مش ملاحظ حاجه من وقت ما اتخرجت بقالك سنتين ومش بقينا نقعد مع بعض ..فين حق الصداقه الصبح عمليات ومرور ع مرضى وبعديها ف المكتبه او ف البيت تنام
ادم بيضحك: ماانا اهو قدامك ..انتى عارفه تخصص الجراحه مش بسيط ومحتاج تركيز
مها: انت بتلمح انى اخترت اطفال علشان اسهل شكر يا دكتور
ادم: انا قلت كده دا علشان انتى لسه صغنونه فهتعرفى تتعاملى مع الاطفال
مها بتخبط ادم: بتتريق ماشى
ادم: بجد اعذرينى ع انشغالى يا مها بس بجد عاوز انجز ف الماجستير علشان ادخل ع الدكتوره
مها : دا ميمنعش تطمن عليا وتعرف اخبارى دا ايام الكليه كنت بتسئل من غير ما اقول ..هو اه كان ع فترات بس كنت بتسئل ..الصداقه يا دكتور الصداقه
ادم بيضحك تليفون رن :.. ادم: الو .. 10 دقايق بالكتير وهكون عندك
قفل ادم ومها بصتله: هتقوم
ادم: ف مريض كنت عامله عمليه وجه يتابع
مها: وانا ال قلت تشتغل معايا ف مستشفى مع بابا ونبقى براحتنا بس بابا استغلك وخلااك تنسانى
ادم وقف وع وشه ضحكه : انا انساكى ازاى مقدرش يلا اشوفك ع الغدا وع حسابى بدل الفطار ال طار
مها: تمام
مشى ادم ومها منزلتش نظرها من عليه وع وشها ابتسامه وتنهيده ...
__________________________
تانى يوم صحى عمرو وادم وقعدوا يفطروا قبل ما ينزل ادم المستشفى
ادم: ايه يا دكتور تحت الانشاء هتعمل ايه لغايه ما تروح الجامعه
عمرو بيضحك: تحت الانشاء ماشى يا دكتور دور اول
ادم: دور اول ؟
عمرو: مش انت لسه متخرج بقالك سنتين يبقى لسه دور اول
وكمان معملتش الماجستير يبقى لسه والفرق بينا سيكا متفردش نفسك عليا
ادم بيضحك: سيكا ياابنى انت تقولى ابيه هو انا قدك فرق بينا 4 سنين
عمرو : ابيه الدكتور دور اول ولا تزعل
مامت ادم خرجه ومعاها صينيه عليها الشاى : زى ماانتم من صغركم كل ما تشوفوا بعض تنقاروا ف بعض بس مش ع الصبح كده انتو مفطرتوش
ادم : اهو جالك ال يونسك بدوشته
ام ادم: يخليكوا انتم الاتنين ليا يارب ولا اتحرم من دوشتكم
ادم : بجد يا عمرو هتقضى الاسبوع دا ف البيت كده ولا ايه
عمرو: اممم والله ياادم مش عارف عموما اسبوع مش كتير وهانت
ادم: وقت ما تحس بزهق عرفنى وافضيلك نفسى ونخرج سوا
عمرو : تمام
ادم بص ع الساعه: انا خارج يا ماما عاوزه حاجه
مامته: سلامتك يا حبيببى ربنا يسهلك امورك ويصلحلك حالك
راح ادم باس راس مامته : تسلميلى .. سلام يا دكتور تحت الانشاء
مشى ناحيه الباب عمرو رد عليه : سلام يا دكتور دور اول
فتح الباب ادم ونازل ع السلم قابل حياه ..: حياه
حياه باابتسامه: دكتور ادم
ادم مبتسم: طالعه الروف
حياه ماسكه الكاميرا : ايون ..انا عارفه مزهقاكم بس حد قالكم اعملوا الروف فيه زرع وورد جميل كده
ادم بيضحك: الروف والبيت تحت امرك ولو احتاجتى اى حاجه كلمينى
حياه باابتسامه: تسلملى يا اجدع دكتور ف المنطقه
ادم: هى المسابقه امتى قولتى كمان اسبوعين
حياه: اها هقدم الصور كمان يومين وربنا يسهل
ادم مبتسم: ان شاء الله هتكسبى المركز الاول والصور هتنزل ف المجله
حياه بتغمز ل ادم: اممم اوعى يا دكتور اكسب بالغش مش علشان انت وصيت عليا يروحوا يكسبونى وغيرى يستاهل انا مبتدئه لسه
بيضحك ادم: لالالا خالص انا سمعت عن مسابقه لمبتدئين التصوير الفوتغرافى تحت سن ال20
وقلتلك بس دا ال عملته مجهودك بقى ال يثبت
حياه : ان شاء الله هشرفك ..
ادم: من النوادر اصادفك لوحدك من غير منى
حياه: فكرتنى ليه بنت الايه وحشانى وقعدت الاجازه كلها ف البلد
ادم: باين عليكى زهقانه من غيرها
حياه مبتسمه:التصوير من الحاجات ال بتفصلنى وتخلينى مبسوطه
ومزهقش ولا احس بملل ..وبعدين هى هتروح منى فين راجعه بكره علشان الجامعه اول الاسبوع
ادم : ان شاء الله ..
حياه: اسفه عطلتك وصدعتك
ادم: لا ولا يهمك ..
حياه :يلا اشوفك بعدين سلام
ادم: سلام
نزل ادم وطلعت حياه الروف .....
عمرو خلص فطار وقاعد بيقلب ف التليفزيون خالته قعدت جنبه
خالته: منورنى يا حبيبى والله
عمرو: تسلميلى يا خالتو دا نورك هزهقكم انا شويا
خالته : تزهقنى ايه داانت مؤنسنى انا وادم
يلا انا نازله السوق عاوز حاجه معينه ع الغدا ولا اى حاجه بتحبها
عمرو : ال هتعمليه هاكله كل ال بتعمليه جميل
خالته مبتسمه: تسلم يا حبيبى عموما انا مش هتاخر
ولو زهقت اطلع فوق ف الروف ادم عامل زرع وورد جميل اوى هتعجبك القعده فوق
عمرو: ربنا يسهل
خرجت خالته وعمرو قعد ف اوضته شويا وقرر يطلع الروف اخد المفتاح من درج المكتبه وطلع لاقى الباب مفتوح دخل من غير ما يعرف مين موجود
راح يتفرج وانبهر بمنظر الزرع والورد والقعده نفسها ...وهو ماشى لاحظ حد قاعد ع الارض ومركز اوى قرب لاقاها حياه حاطه سماعه هاند فرى ف ودنها
وعماله تصور ورد ومركزه ابتسم عمرو تلقائى ووقف يتفرج عليها وع محاولتها ازاى بتصور .. خلصت حياه وبترفع راسها لاحظت ف حد واقف بصت اتخضت .. عمرو اتحرج: انا اسف خضيتك
حياه حاطه ايدها ع صدرها وشالت سمعات الهاند فرى : شويا
عمرو قرب : بجد اسف بس اولا معرفش ان ف حد هنا
ثانيا اتفاجئت بيكى
وثالثا بصراحه مقدرتش اقاوم اشوفك وانتى مركزه ف التصوير كده
حياه قامت ن ع الارض ووقفت : حصل خير
عمرو مبتسم مد ايده : اعرفك بنفسى بما ان الصدف عماله تيجى ورا بعض ونتقابل فالواجب اعرفك بنفسى علشان متتخضيش تانى .. عمرو ابن خاله ادم وجى ارخم عليهم واقعد شويا معاهم
حياه ابتسمت ومدت ايدها ل ادم: اهلا بيك كنت بسمع عنك
عمرو وماسك ايد حياه: اممم سمعتى كويس ولا وحش بقى
حياه بتضحك: لا خير متقلقش ادم مبيقلش كلام وحش ع اى حد حتى لو وحش ...اعرفك بيا انا ح,,
عمرو قاطعها : حياه جاره ادم ف العماره ال قدامه ال بتحب التصوير
حياه شدت ايدها وبتضحك: هو باين اوى كده
عمرو : من وقت ما جيت ومش شوفتك بتعملى غير كده ..هو انتى بتدرسى
حياه: اولى كليه تجاره ان شاء الله
عمرو: ياااه يعنى لسه خريجه ثانوى جديده
حياه بتضحك: بكرتونتها ربنا يسهل
عمرو: بس ايه دخل التصوير ف تجاره مدخلتيش ليه مثلا فنون جميله
حياه : مكتب التنسيق بقى الله يكرمه وبعدين التصوير هوايه
واهو يااشتغل محاسبه يا اشتغل مصوره
عمرو: وانتى عاوزه ايه فيهم
حياه: لسه مجربتش بصراحه المحاسبه وعموما هشوف الايام الجايه
عمرو: خير ان شاء الله
حياه : استاذنك انا دلواقتى وبعتذر لو فاجئتك بوجودى
عمرو: لا ابدا انا ال اسف .. وعموما حصل خير
حياه: حصل خير .. مع السلامه
عمرو مد ايده : مع السلامه
سلمت حياه ع عمرو ونزلت وهو وقف وع وشه ابتسامه ورجع يتفرج ع الزرع والورد وقعد ع الكرسى ومستمتع بالمنظر ..!!
_______________
عمرو كان يوميا يطلع الروف ف الوقت الصبح يقعد شويا وينزل وكان فاكر هيصادف حياه تانى ومكنش بيحصل ..فى يوم نزلت حياه تجيب طلبات من السوبر ماركت وهى خارجه وبتبص ف الشنطه ع الطلبات
خبطت فى شخص : انا اسفه ..انا
عمرو مبتسم : حياه
حياه : عمرو ..
عمرو: ايه الصدف دى
حياه: معاننا ف شارع واحد وجايز نقابل بعض بس فعلا صدفه
عمرو: عامله ايه
حياه: الحمد الله وانت
عمرو ماسك صدره : بعد الخبطه دى احتمال ابقى كويس
حياه اتخضت: بجد خبطتك جامد انا اسفه
عمرو بيضحك: انتى طيبه اوى صدقتى بسرعه انا بهزر
بقالك كام يوم مبتجيش الروف يعنى خلاص بطلتى تصوير
حياه بتضحك: لا مبطلتش بس مش محتاجه صور دلواقتى
عمرو: اهاااا .. طيب عموما صدفه سعيده ابقى خلينا نشوفك احنا جيران
حياه: ان شاء الله ابقى سلملى ع طنط وادم
عمرو مد ايده : سلام
حياه بصت ع ايدد وسلمت : سلام
مشيت حياه وعمرو واقف بيبص عليها ومش عارف ايه الفرحه لما بيشوفها البياع ال ف السوبر ماركت نده عليه: طلبات حضرتك ايه
عمرو انتبه: ها .. اه الورقه اهى لو سمحت هات ال مكتوب فيها
البياع: حاضر
اشترى عمرو الطلبات وطلع ع البيت ...
وهو فاتح اللاب توب بتاعه وقاعد ادم رجع ..: السلام عليكم
عمرو: وعليكم السلام يا دوك
ادم : مقضيها شات انت ها يارب تتقفش من واحده من ال بتعرفه
عمرو بيضحك: مش انا يا دوك وبعدين كله عارف انها صداقه ليست الا
ادم: ماما نايمه ولا ايه
عمرو: اها ... غير هدومك بقى ونتعشى سوا
فرصه لا تعوض هحضرلك انا العشا باايدى يا دوك
ادم : لالالا كده كتير يا دوك تحت الانشاء
عمرو: هانت اول ما هبتدى انزل الجامعه انسى انى اقعد استناك يلا انجز علشان جعان
ادم : خلاص 5 دقايق
عمرو : تمام
دخل ادم غير هدومه وخرج لاقى عمرو جهز العشا
ادم: ماشاء الله عليك ست بيت نمره واحد
عمرو بصوت مرقعه: يارب الاكل يعجبك يا سي ادم عاملهولك بايدى دول
ادم بصوت خشن : تسلميلى يا امينه
ضحكوا ادم وعمرو وقعدوا يتعشوا
عمرو: جميله ال انت عامله ف الروف دا معانك اغلب الوقت بره امتى بتعتنى بيها
ادم: انا اوقات وماما واوقات حياه
عمرو: اممم بس جميله القعده بجد فيها..دماغك حلوه يا دوك
ادم: اهو ازهق من البيت اغير جو فوق وكده كتير بذاكر فوق
عمرو بيفكر : اممم فكره حلوه بتاعه المذاكره دى
ادم: بتقول ايه
عمرو: لا متركزش معايا كل مربى انا نقيت البرطمان بنفسى
ضحك ادم وكملوا عشا ودخل ادم غير هدومه وعمرو فتح الللاب وقعد سهران قدامه بيكلم اصحابه ..!!!
_______
تانى يوم الصبح جرس باب شقه حياه عمال يرن بصوت عالى
فتحت مامت حياه : انا قلت كده مفيش غيرك يعمل كده ع الصبح
منى باابتسامه: صباح الورد يا طنط بزمتك مش افتقديتنى
دخلت منى وقفلت الباب وحضنت مامت حياه : وحشتينى يا طنط والله
مامت حياه: انتى كمان جيتى امتى يا عفريته
منى : من نص ساعه طلعت الشنط وطلعت ليكم ع طول فين بنتك الوحشه
مامت حياه : اخص عليكى بنتى زى القمر
منى بتضحك: ماهو انا عارفه انا برفع من معنوياتى جنبها
مامت حياه حضنتها: وانتى زى القمر انتوا الاتنين اخوات انتى من صغرك قعدتى هنا اكتر من ف شقتكم تحت
منى : تسلميلى يا احلى طنط يلا انا داخله لتوتا
راحت منى ع باب اوضه حياه خبطت زى ال بيطبل وحياه حاطه مخده ع راسها
منى بصوت عالى: انا جيت .. انا جيت.. انا جيييييييييييت
راحت حياه حدفت منى بالمخده : يخربيت قلقك ع الصبح يا مصيبه
منى مسكت المخده: هو دا الترحيب
راحت منى رمت نفسها ع حياه: وحشتينى يا توتيت حياتى انا
حياه بصوت مخنوق: هموت يا بنت اللذينه قومى
منى حاضنه حياه: مش هسيبك وحشانى هاتى بوسه
حياه : اوعى يابت هموت
منى : هاتى بوسه الاول بقولك
راحت حياه باست منى راحت منى خبطت حياه بالمخده ف وشها : اهى مخدتك رجعت كده صافى
حياه مسكت المخده : يخربيت هزارك
منى: بصت ع وش حياه: ايه الدم دا انا عورتك ولا ايه
حياه لاقت دم من مناخيرها : يخربيت هزار الصعايده دا شوفتى عملتى ايه
منى: اتلككى بقى انتى اى خبطه بيحصلك كده ومتغلطيش ف الصعايده علشان اهلى يقطعوكى ها
بتضحك حياه وقامت حضنت منى : وحشتينى يا مصيبه كنت مفتقداكى
منى وحاضنه حياه: وانا كمان وربنا انا مصدقت وصلنا وطلعتلك
.يلا بقى نفطر لانى جوعت يلا وكمان علشان بعد الضهر ننزل اجيب لبس علشان الجامعه بعد بكره وناقصنى حاجات كتير
حياه: ناقصك ايه مش اشترينا الحاجات والبس قبل ما تسافرى داانتى سافرتى شهر مش سنه
منى : ملكيش دعوه ..ولا قلقانه ابقى احلى منك
حياه: هو انا اطول يا منمونتى
منى: ايوه ارفعى معنوياتى ارفعى انا عارفه انى قمر
حياه: والله قمر بس خفى الفرح ال بتعمليه ف وشك د ولبسك
منى قاطعتها : حياه خليكى ف نفسك يلا
انا هروح اشوف عصافيرى ف البلكونه وانتى انجزى
قامت حياه دخلت تغسل وشها وراحت منى ع البلكونه ..منى بتبص ع العصافير: عصافيرى حبايبى وحشتونى ..البت حياه كانت واخده بالها منكم ولا بتنفضلكم حبايبى انا حبايبى انا
ومنى واقفه راحت تبص عادى من البلكونه بصت قدامها ع بلكونه ادم عادى لاقت واحد متعرفوش واقف وسيم وطويل مززز يعنى ع كلامها ومتنحه
حياه ندت على منى ومسمعتش راحت لغايه عندها لاقتها واقفه عماله تبص من تحت لتحت ل عمرو .. قربت حياه تشوفها باصه ع مين لاقت عمرو
ولاقته بص عليهم راحت حياه ابتسمت وهزت راسها زى ال بتسلم عليه وهو كمان ردلها السلام منى بصت عليهم وبيسلموا ع بعض : حياه مين دا وبتسلمى عليه ازاى كده
حياه مسكت ايد منها: تعالى جوه هتفضحينا
منى متنحه من منظره: مين دا اسيبك شهر ارجع الاقى تطورات ف المنطقه
حياه: دا عمرو ابن خاله ادم رجع من الامارت وقاعد عندهم شويا
منى بفرحه: بجد القمر دا قريب ادم
حياه: عمرو يا منى ال ادم كان بيجيب سيرته
منى: اها افتكرت ...مكنتش اتوقع انه كبر وبقى مز كده بجد انى حقا منبهره
حياه: منىىى دول جيرانا ودا ضيف بلاش جنانك دا ها
منى : يلا افطرى خلينا ننزل
حياه: هتاخدى العصافير
منى وبتبص ناحيه البلكونه : لا خليهم هنا انا شايفاهم مرتاحين هنا وانا هبقى اطمن عليهم هنا
حياه بتضحك : مع نفسك يلا كلى
خلصت منى وحياه الفطار ونزلوا اشتروا باقى حاجات محتاجينها ورجعوا قعدوا مع بعض ومنى شبه متنحه ع البلكونه ...!!!
______________________
جه اول يوم جامعه حياه صحيت ولبست وخارجه من اوضتها وماسكه راسها
مامتها: مالك يا توتا
حياه: منمتش كويس وقلقانه ياماما اول يوم جامعه وكده
مامتها حضنتها: ان شاء الله هتبقى احلى سنين تقضيها الجامعه واهدى كده
هى هيبه الاوانيه بس .. وهتتعودى
حياه باابتسامه: ان شاء الله .. قوليلى يا ماما لبسى كده حلو
مامتها: جميل اوى واحلى حاجه بساطته يا حبيببتى
يلا خلى بالك ع نفسك
حياه: حاضر يلا سلام
نزلت حياه بسرعه الدور ال تحتها وخبطت ع شقه منى فتحت مامت منى
حياه مبتسمه: صباح الخير يا طنط
مامت منى: صباح الخير يا حبيببتى
حياه: اوعى تقوليلى منى مصحيتش
مامت منى بتضحك: مصحيتش ايه دى ممكن تقولى منمتش قعدت تجرب كل الهدوم وتصور نفسها انا تعبت منها ونمت
حياه بتضحك: لسعه بنتك يا طنط
مامت منى: سبحان ال مخليكم مع بعض اختلاف الشرق عن الغرب
حياه: انا داخله ليها ...
دخلت حياه اوضه منى لاقتها قاعده قدام التسريحه وعماله تحط ميك اب
حياه: ايه دا ..ع فكره احنا رايحين جامعه مش فرح
ايه كل ال ف وشك دا يا بنتى .. ولابسه بيلمع ع الصبح هتنورى وانتى ماشيه
منى بصت ع حياه لاقتها لابسه بنطلون جينز عادى وعليه تىشيرت وحجاب بسيط وبصت ع وشها لاقتها شبه مش حاطه حاجه : ايه ال انتى عاملااه دا
حياه: انا برضه
منى: يابنتى احنا رايحين جامعه مش مدرسه يعنى هتلاقى ال بيلبس وبتتزوق وكده
حياه : اهاااا ع فكره احنا رايحين ندرس مش نظبط شباب هناك منى اهدى كده
منى: حياه خليكى ف نفسك انا خلصت
حياه: وانا هتبرا منك قريب
منى راحت انكيجيت حياه: ولا تقدر تبعد عنى يا عويس
حياه: حبك مؤبد يا سنيه
ونزلت منى وحياه وراح ركبوا الميكروباص ونزلوا قدام الكليه وشافوا الدفعه الجديده والبس زى عرض ازياء
حياه منبهره : ايه كل دا
منى: مش قلتلك لازم تثبتى انك احلى مهما حصل
حياه بصت لمنى: مليش دعوه بغيرى انا ف نفسى يا حبيببتى يلا
منى: اه هقولك ايه ماهو انتى حلوه هتحتاجى الحلاوه الزياده فى ايه
حياه بتضحك: يابنتى انا لا حلوه ولا بتاع انتى حبى نفسك هتلاقى نفسك ملكه جمال وبطلى انك تحسى انك اقل جمال ها
منى بصت ع حياه : بقولك يا توتا مش خساره شعرك يستخبى كده
انا لو عندى شعر زيك كده اتباهى بيه ع طوله وجماله يا بنتى
حياه بتضحك: اصلى بصراحه سمعت ان جهنم حر وانا مش عاوزه اتعلق منه
منى: نعم تقصدى ايه
حياه: ربنا يهديكى وتلبسى الطرحه والهى انتى قمر بس مش حاسه بنفسك صح
منى: طبعا انا قمر
حياه: يلا ياقمر
ودخلت حياه وهى منبهره بحياه الجامعه ومنى ماشيه بتناكه زى ال بتقول ياارض اتهدى ما عليكى قدى واخدوا الجدول وقعدوا يتمشوا ف الجامعه وبعدين روحوا وهما داخلين الشار ع كان ادم راجع البيت
ادم: حياه
حياه بصت ع الصوت: ادم ..
منى خبطتها: دكتور ادم يابنتى
ادم بيضحك : منى حمد الله ع سلامتك نورتى المنطقه
منى: احم.. ميرسى يا دكتور طبعا نورتها هو ف زى نورى
ادم ضحك: راجعين من الكليه
حياه: اه يا ادم .. ايه الدنيا دى انا مذبهله
منى : حياه فضلت متنحه لكل حاجه بتشوفها لدرجه انى مشيت بعيد عنها
حياه: مكنتش متخيله الكليه كده وال فيها كده
ادم: المهم انك جيبتى جدولك ومتصاحبيش اى حد
منى: هتصاحب ال هصاحبه هو انا هبله اسيبها تصاحب اى حد
ادم بيبص لمنى وبيضحك: الكليه لدراسه يامنى مش خروجه
منى: عارفه يا دكتور دراسه واجتهاد
ادم: محتاجين اى مساعده اى حاجه
حياه: ميرسى جدا
فضلوا يتكلموا ادم ومنى وحياه لغايه ما وصلوا البيت وكل واحد طلع ع شقته ,,!!
__________________________
تانى يوم ف الكليه كان ف جدول منى وحياه سيكشن محاسبه
دخلوا قعدوا وهما عمالين يرغوا دخل المعيد ..
عمرو: صباح الخير
الكل : صباح الخير
حياه تنحت لما شافت عمرو ومنى كمان: حياه مش دا عمرو
حياه: اه
منى: مش كنتى تقولى انه معيد عندنا
حياه: مكنتش اعرف
منى : بس دا طلع مز اوووووووووووووى
عمرو: الصف ال ورا الصوت ..
انا اسمى عمرو وانا هدرسلكم ماده المحاسبه الترم دا مؤقت لغايه ما استاذ محمد يرجع من اجازته واى حد عنده اى استفسار انا موجود واعتبرونى اخوكم الكبير ومتتكسفوش ولا تتحرجوا من حاجه اتفقنا
الكل: اتفقنا
عمرو: .. نبتدى
بص عمرو باابتسامه ناحيه حياه ومنى والاتنين متنحين مكانهم
خلص عمرو السيكشن وخرج راح ع مكتبه وحياه ومنى متنحين
منى: يخربيت جماله ايه دا هو فى جنتله كده
حياه : صدفه غريبه
منى باابتسامه كبيره: احلى صدفه يعنى هنشوفه ف الكليه الصبح وبليل فى البيت
حياه بصت لمنى : منى ايه ال بتقوليه دا ال يسمعك يقول عليه من قرايبنا
اعقلى كده ويلا بينا
منى: اعقل دا باينلها بدايه سنه زى الفل
نزلت حياه ومنى راحوا الكافتيريا ورجعوا حضروا المحاضرات ورجعوا ع البيت
فى نفس اليوم حياه قاعده مع مامتها وباباها :
ابو حياه : توتا قومى هاتى جهاز السكر علشان حاسس ان سكر عالى عندى
حياه: حاضر يا بابا
راحت حياه تدور ع جهاز السكر مش لاقته رجعت ليهم تانى
حياه: ماما هو فين الجهاز ؟
ام حياه: اه ..افتكرت انا كنت اديته لاام ادم علشان جهازها كان عطل الصبح
روحى هاتيه من عندهم
نزلت حياه من عمارتها وطلعت العماره ال قدامها وطلعت قدام شقه ادم ورنت الجرس
وعمرو ال فتحلها الباب باابتسامه: حياه ازيك
حياه مبتسمه: ازيك يا استاذ عمرو
عمرو بيضحك: استاذ
حياه: مش حضرتك مدرسى ف الكليه يبقى استاذى ولا ايه
عمرو:انا بصراحه مكنتش اتوقع انى اول سنه ليا ادرس يبقى ليكى
حياه:انا بصراحه اتفاجئت علشان انت مقلتليش يعنى
عمرو بيبص ل حياه: يعنى انتى سألتى
مامت ادم سمعت صوت حياه: ادخلى يا توتا
حياه: طنط ماما بتسألك لو خلصتى جهاز السكر علشان بابا عاوزه
مامت ادم: اه يا حبيببتى ثوانى واديهولك
دخلت مامت ادم تجيب الجهاز .. وعمرو: لو احتجتى اى حاجه متتكسفيش
حياه ابتسمت وخرجت مامت ادم ادتها الجهاز ونزلت حياه راحت ع شقتهم
شويا ورجع ادم ولاقى عمرو فاتح اللاب وقاعد ف البلكونه ال فى اوضه ادم
دخل ادم: وانا اقول ايه النور دا
عمرو: نورى صح
ادم: لا نور المبه طبعا قلت ماما نسيته ولا حاجه
عمرو: ايه يواد الخفه دى
ادم: متكلمنيش لانى خلصان خالص وعاوز انااااااام
عمرو بيقفل الللاب :طيب انا هخرج بره ماهو انتم مدينى اوضه بتطل ع منور وانت مبرتع ف اوضه ببلكونه
ادم: تعالى يا حبيبى اقعد هنا متحرمش نفسك من حاجه
عمرو بمسكنه: علشان انا مغترب ولوحدى بتعاملونى كده
ادم حدف عمرو بمخده: اطلع بره بمسكنتك دى
عمرو بيضحك: طيب يلا ارتاح
ادم: نسيت اسألك اخبار اول يوم ايه ف الكليه يا دكتور تحت الانشاء
عمرو : امممم كان لذيذ وعدى
ادم: طيب كويس يلا اخرج بقى
عمرو وهو خارج رجع لف : اه صحيح نسيت اقولك مش طلعت جارتكم طالبه عندى
ادم : مين جارتنا دى
عمرو: حياه .. دفعه سنه اولى انا بدرسلهم ماده محاسبه بدل زميل مسافر
واتفاجئت بيها وسط القاعدين
ادم : بجد ..طيب كويس جدااا خلى بالك منها بقى واشرح عدل وهسألها
عمرو : هو ف زى شرحى انا داانا السنادى مخصوص هشرح مش زى اى شرح .
تليفون عمرو رن ... طيب يلا ارتاح
خرج عمرو يرد ع الموبيل وادم رمى جسمه ع السرير من التعب نام بهدومه
خلص عمرو تليفونه وخرج ف البلكونه وبيبص حواليه وبص ع بلكونه حياه وابتسم : سنه خير ان شاء الله
__________________________
فى يوم منى قاعده بتذاكر مع حياه وحياه لاحظت انها مش مركز ومش ع طبيعتها
حياه: مالك
منى: حياه انا عاوزه اقولك حاجه ...
حياه: ها
منى سكتت لحظات :......_________________________
يتبع
ليست هناك تعليقات:
إرسال تعليق