مشيت حياه فرحانه ومستعجله عاوزه تشوف عمرو وف نفس الوقت كانت مامت ادم متوقعه ان ادم هيبقى مع حياه
نزلت حياه واتمشت لغايه شقه عمرو ال بعدها بشارعين واشترت علبه شيكولاته وقفت قدام العماره تظبط نفسها واخدت نفس وطلعت عاوز تثبت لمامت عمرو انها رجعت احسن وخفت فعلا مش مريضه
فى الوقت دا مامت ادم اتصلت ب ادم : ادم الحق ال حصل
ادم مخضوض : فى ايه ....
مامت ادم : حياه .. حياه راحت لعمرو
ادم : ايه وسبتيها تنزل وتروح ليه ؟
مامته: معرفتش اعمل ايه اصلا انا اتفاجئت لما جت
ومعرفتش اقولها حاجه انا قلت انت هتتصرف
مامته: عمرو ياادم اتجوز منى وحياه رايحه هناك
ادم اتفاجئ ومش عارف يتصرف : وليه تسبيها تنزل طيب
مامته: معرفتش اقولها حاجه وكنت مستنياك لما تيجى واقولك وشوف هتتصرف ازاى وتبلغها
ادم : انا جى بكره
قفل ادم مع مامته وهو مش عارف ايه ال هيحصل وفكره عمرو اتجوز منى حياه هتتستوعبها ازاى وهيحصل ايه لما تشوف بعنيها قلق ع حياه ازاى هتستوعب الخبر دا من غير مقدمات ... اتصل بشركه الطيران مش لاقى حجز طياره غير بعد بكره الصبح .. حجز وكان مش ع بعضه وحياه كانت لسه مشغلتش تليفونها ....!!
الوقت دا حياه اخدت نفس وماسكه علبه الشيكولاته وع وشها ابتسامه طلعت قدام باب الشقه قامت تعدل ف هدومها والسعاده كبير ع وشها .. رنت الجرس ومتوقعه عمرو ال يفتح علشان دى اجازه ومفيش دراسه .. الباب فتح بصت وع وشها ابتسامه لاقت منى
منى اتفاجئت بحياه: حياه ..انتى رجعتى
حياه مفاجئه بمنى انها تلاقيها ف البيت خليتها تتصلب لثوانى وبعدين بصت لمنى وع وشها ابتسامه
حياه: هى دى حمد الله ع السلامه بعد سنه مشفناش بعض
منى بترتعش ومخضوضه : ها .. اه طبعا حمد الله ع السلامه
راحت حياه حضنت منى : وحشتينى يا منمونتى
فى صوت من جوه : مين يا منمن
منى متصلبه : دى ..دى .. حياه يا ماما
حياه مستغربه ان منى بتنادى ع مامت عمرو ماما .. حياه قامت داخله
وف ايديها علبه الشيكولاته ورايحه ع اليفنج روم ومامت عمرو بتتفرج ع التليفزيون
حياه مبتسمه: مساء الخير يا طنط
مامت عمرو اتخضت لما شافت حياه : حياه
حياه راحت حطت العلبه وسلمت ع مامت عمرو وحضنتها وباستها: وحشتينى يا طنط
مامت عمرو: ها .. حمد الله ع السلامه رجعتى امتى
حياه قعدت: انهارده الصبح واستغربت لما ملقتكمش عند ادم
حياه مكنتش اخد بالها من هدوم منى ال هى هدوم يتقعد بيها ف البيت مش خروج ولابسه شبشب بيت .. فااستغربت ومنى عماله ترتعش من المفاجاءه ومش عارف تقول ايه ... مامت عمرو جمدت قلبها : منمن قومى هاتى كوبايه عصير من ال انتى عاملااه لحياه
حياه : هى منى عملت عصير
مامت عمرو: وكيكه كمان ولا تتغدى معانا منى مفيش زيها
حياه لاحظت ان منى منطلقه ف البيت عند عمرو
حياه باابتسامه: طبعا منى مفيش زيها ماشى عصير
شويا وطلبت حياه تدخل الحمام راحت الحمام وهى خارجه لمحت صوره متعلقه ف الصالون قربت منها تشوف مين العروسه والعريس دول .. وكانت المفاجاءه منى وعمرو حياه وقفت قدام الصوره تستوعب مش قادره وال عليها فضلت واقفه باصه لصوره ف الوقت دا خرجت منى من المطبخ ومعاها صينيه شافت حياه واقفه ف الصالون وباصه ع الصوره راحت حطت الصينيه ووقفت جنب حياه ..
منى مربعه ايدها رايحه ناحيه حياه : مش تقوليلى مبروك
حياه بهدوء بصت لمنى : مبرووك
جت حياه راحت ناحيه الباب علشان تمشى منى اتكلمت
منى بلهجه حاده: انا مااخدتوش منك يا حياه
عمرو اتجوزنى برغبته وباارادته مش انا ال جريت عليه
حياه واقفه مديه ضهرها لمنى .. منى كملت كلام :
انتى سيبتى عمرو ..انتى مكنتيش تعرفى كان بيمر باايه وحالته النفسيه ايه ..انا الوحيده ال كنت جنبه انا حبيت عمرو قبلك ..اول شخص احبه كان عمرو وبسببك اتعلقت بيه انتى خبيتى عليا انك بتحبيه وخليتنى اضحكوه بينكم ..انا اختارت عمرو قبلك انا مكتوبلى عمرو عنك ..عمرو بتاعى انا من الاول
لفت حياه وبصت لمنى وع وشها ابتسامه وحايشه دموع ف عنيها
حياه: مبروووك يا صاحبتى يا اختى مبرروك
فتحت حياه باب الشقه وخرجت وقفلته وراها
خرجت مامت عمرو : كويس الكلمتين دول علشان متفكرش تعمل حاجه
منى بصت لمامت عمرو وقعدت ع الكرسى وحطت راسها بين ايديها
حياه نازله ع السلم بتحاول تستوعب المفاجاءه وصدمتها ف اقرب اتنين ليها
ماشيه ساكته وسرحانه وحايشه دموع ف عنيها .. وصلت شقتها ودخلت ع اوضتها واترمت ع السرير باصه ع السقف ومش بتنطق ودموع بتنزل من عنيها
فى حاله صدمه ....!!!
عمرو وصل البيت وشايف منى وشها متغير ومتغدتش معاه ولا مع مامته
عمرو: هى مالها
مامته باصه ف الطبق: اصل اصل
عمرو: انتوا اتخنقتوا ولا ايه
مامته بصت لعمرو: بصراحه حياه كانت هنا
عمرو الشوكه وقعت من ايده : مين ..حياه وهنا
مامته: احنا كلنا يااابنى اتفاجئنا بوجودها... انا ومراتك كنا قاعدين فى امان الله لقينا جرس الباب رن راحت منى تفتح لقت حياه ف وشها دخلت قعدت مكمنلتش 5 دقايق ..دخلت الحمام وخرجت شافت صورتكم ال ف الصالون
وبعدها نزلت ..
عمرو مذهول ومتفاجئ: ومحصلش حاجه تانى
مامته: بصراحه انا كنت متخيله هيحصل شد شعر وحاجات بس لاقيت حياه اهدا من التلاجه بصراحه... المهم خلاص هى عرفت وانتوا متجوزين ..ركز ف بيتك ومراتك وحياتك ..وهى الله يسهلها
عمرو وباصص قدامه: وهى كويسه .. خفت
مامته مستغربه من سؤاله: باين انها اتحسنت .. انما خفت معتقدش متغيره عن ما سافرت اكيد العلاج وبعدين خلاص ياعمرو ركز ف بيتك ها وكل منى عامله البطاطس ال بتحبها اهى كل يلا ..
عمرو فضل متنح لطبق وبعدها مأكلش وقام دخل المكتب ..
فتح درج المكتب وطلع العلبه ال فيها دبله حياه وبص ليها ...!!!
__________________________
فضلت حياه يوم بحاله نايمه ف اوضتها ومامتها مش عارفه مالها لانها مبتتكلمش ...رجع ادم من السفر وقعد سمع الحكايه من مامته وعرف انها شبه مقطعه خالته بسبب انها اعترضت ع جوازه عمرو كده .. فنزل وراح لحياه
مامت حياه فتحت الباب .. مامت حياه بقلق: ادم الحمد الله انك جيت
ادم مخضوض: ليه حصل حاجه
مامت حياه : حياه من وقت ما عرفت ان عمرو ومنى اتجوزوا وهى نايمه ف اوضتها مبتخرجش انا كنت هقولها والله بس هى كانت اسرع منى انها تعرف
ادم: متقلقيش ياطنط ان شاء الله خير
راح ادم خبط ع الباب ..حياه: هنام يا ماما
ادم من ورا الباب: انا ادم يا حياه هدخل
حياه: ادخل ياادم
دخل ادم لحياه اوضتها لقاها نايمه ومقفله الاوضه ..
ادم: ايه بيت الظلام دا يا بنتى دخلى نور ربنا الاوضه خليها تتهوى
راح ادم ناحيه شباك اوضتها ..حياه: ادم انا هنام متفتحش حاجه
ادم: طيب يلا نتغدى
حياه: مش جعانه
ادم: هتروحى المستشفى تعرفى هتيجى تاخدى العلاج امتى وتعملى التحاليل امتى
حياه: هروح
ادم: فى حاجه يا حياه مالك
حياه: عاوزه انام
ادم: خلاص مستنيكى بكره تمام
حياه: تمام
خرج ادم ولاحظ تغيير حياه بنسبه كبيره بعد ما رجعت وردودها عليه كمان غريبه محبش يفاتحها غير انها هى ال تتكلم مش عاوز يضغط عليها
مامت حياه قلقانه: ها ياادم قالتلك حاجه
ادم مش رضى يقلق مامتها: متقلقيش يا طنط بكره الساعه 10 هاتيها وتعالى المستشفى علشان تبتدى علاجها هنا
مامتها: يعنى حياه كويسه
ادم مبتسم: ان شاء الله هتبقى احسن متقلقيش انا مش هسيبها
خرج ادم من شقه حياه وبدل ابتسامه بعلامات قلق وتوتر من ال جى ..
تانى يوم راحت حياه المستشفى مع مامتها واتغيرت حياه بقت ساكته ومش بتتكلموبترد الكلمه ع اد الكلمه ... وابتدت تاخد علاجها وبعده تروح البيت
تفضل نايمه ف السرير لغايه ما تروح المره التانيه ... !!
الفتره دى عمرو كان خايف يواجه ادم او حياه نفسها فكان بيتجنبهم .. مرت فتره وحياه عملت تحاليل مرتين وف المرتين النتيجه كانت مش كويسه وفى النازل لدرجه ان الاعراض ابتدت تظهر ع حياه تانى من اغماء وسخنيه وضيق تنفس والدكاتره المتابعين لحاله قايلين حالتها النفسيه مأثره عليها جداااا ودا السبب الرئيسى حتى لو هى مشتكتش
واتحجزت حياه ف المستشفى ..
ودخل ادم يتكلم معاها لاقاها دموع نازله من عنيها ومش بتتكلم
ادم قرب ايده مسح دموعها وبصتله حياه..
ادم: ممكن اعرف ال بتعمليه دا هيوصلك لفين
حياه : لل ربنا كاتبهولى هيحصل بعدين او دلواقتى انا راضيه
ادم : وايه ال ربنا كاتبهولك
حياه: الموت
ادم قلبه انقبض من الكلمه: حياه انتى بتستهبلى صح ال يشوف لما كنا مسافرين مش يشوفك كده فين التفائل والامل ال كنتى بتقاوحى علشانهم واتحسنتى وبيهم رجعتى بيتك وحياتك
حياه باصه ل ادم: راحوا خلاص ..لانهم واضح مش كانوا موجودين انا كنت واهمه نفسى
ادم: لا موجودين يا حياه وهتخفى وانتى متماسكه بيهم
حياه ضحكت : هخف بيهم.. املى ياادم كان عمرو انا كنت عاوزه اخف بسرعه علشان اكون مع عمرو ..بس واضح كده انى زى ماقالت مامته
انسانه مريضه مينفعش نتجوز ..هيربط نفسه بواحده هتقضى حياتها مستشفيات .. انا هسيبها ع ربنا وزى ما تيجى انا اتاكدلى مش ليا نصيب ف الدنيا دى ولا حظ فليه اضيع وقت واتعب ال حواليا انا لو منكم تسيبونى اعجل بموتى احسن ..انا اخف ليه مفيش سبب مقنع اعيش علشانه
ادم: مامتك وباباكى
حياه ودموعها نازله: اكتر اتنين بدعى ربنا يعجلى بيومى علشانهم علشان الوجع والحزن ال فى عينيهم بسببى عاوزه ارحمهم من ال هما فيه
ادم: وانا
حياه ودموعها نازله :انت لو فى الحاله ال انا فيها وال بيحصلى كنت هتعذرنى بجد
ادم حس بأستسلام حياه السئ جدااا فبص لحياه بعد تفكير لدقيقه
ادم: وهو انتى فاكره انتى لوحدك كده
حياه: لانى فعلا لوحدى ال عندى سرطان
ادم : وانا كمان
حياه من ال سمعته تنحت ل ادم: بتقول ايه
ادم اتشجع: انتى فاكرانى بسافر فرنسا تبع المستشفى شغل
انا بروح علاج ..انا اكتشفت المرض وبعالج نفسى ومحدش يعرف خالص ولا ماما وكنت مش هقولك بس عاوز اعرفك ان فى زيك وعايشين
حياه متفاجئه : ادم
ادم مسك ايد حياه: حياه انتى تستحقى تعيشى حياتك .. لسه اللحظات الحلوه مشوفتهاش ولا عيشتيها لسه حاجات كتير هتحصلك احسن من ال فاتتك ..مش اخر الدنيا موقف وحش .. تفائلى واصرارك وكلمه يارب هتهون وتشفى...انا قدامك لا اشتكيت ولا مبين وعايش كويس جداااا زى ما انتى شايفه
حياه بتستوعب : ادم بتتكلم بجد
ادم:بتكلم بجد وعلشان تصدقى هبتدى معاكى وهاخد معاكى العلاج
حياه دموع نازله من عنيها: ادم
ادم راح مسح دموعها: احنا مع بعض وانا مش هسيبك ابدا فاهمه يعنى انتى مش لوحدك هخرج ابعتلك الغدا وهاجى نتغدا سوا تمام
حياه هزت راسها وخرج ادم وقلبه كان بيدق ومش عارف قال كده ازاى وكدب ع حياه بس لاحظ انه عرف طريقه يساعد بيها حياه لو ع حساب نفسه ويدعى المرض علشانها وعاهد نفسه طول ماهو جنبها هيخلي ايامها كلها سعاده والضحكه ترجع تانى وتبقى احسن ...!!!!
فضلت حياه يومين ف المستشفى يظبطوا العلاج ولاقوا لسه مفيش تحسن
ففكر ادم يسافر هو وحياه فرنسا وتتعالج هناك
جت مها خبطت ع الباب ودخلت ولاحظت ادم وشه متغير
مها: مالك ولا مش محتاج سؤال حياه صح ؟
ادم بينفخ: مش عارف اعمل ايه مفيش حل غير انها تسافر فرنسا لعلاج هناك
هناك فى امكانيات احسن من ال موجوده ف مصر وكمان التأهيل النفسى هناك افضل
مها لاحظت قلق ادم: خلاص متتعبش نفسك بالتفكير انا هتصرف
ادم: هتعملى ايه
مها: مش انت عاوز حياه تسافر .. هسافرلك حياه
ادم : ازاى
مها: هتصرف متقلقش انت
خرجت مها وادت امل ل ادم ان حياه هتسافر وشويا ع بليل
راح ادم ع اوضه حياه شايفها نايمه ع السرير وسرحانه نفسيتها مدمره
دخل ادم وع وشه ابتسامه : حياه ايه النوم دا قومى يلا نتمشى
حياه: لا مش عاوزه
ادم راح شد كرسى وقعد قدامها: وبعدين يعنى هتفضلى كده
حياه ساكته .. ادم: انا زيك اهو ومفيش حد ملاحظ عليا حاجه
ليه انتى مستسلمه كده ..
حياه: الحمد الله
ادم : ليكى عندى خبر حلو
حياه بصتله: خير
ادم : اممم مش هقولك غير لما نتمشى سوا ولا هتزعلينى
قامت حياه وخرجت من اوضتها واتمشت مع ادم ف جنينه المستشفى
ادم بلجه بهجه: الله الجو جميل اووى الحياه فيها حاجات حلوه كتير الواحد يتمتع بيها يا حياه
حياه بصتله : تفائلك ملوش حدود
ادم: لانى عايش ب امل ومتمسك بيه
حياه : ايه هو بقى
ادم : انتى
حياه بصتله بااستغراب : انا
ادم بيضحك: الحياه ..الحياه لو متمسكتيش بيها هتسيبك
وانا عاوز اعيش وانجح واشفى مرضى علشان كده بكافح مع الحياه يا حياه
حياه ابتسمت .. ادم : مسألتيش ع الخبر يعنى
حيته: مش هيفرق بس خير
.. ادم : هتسافرى فرنسا وتكملى علاجك هناك ..ايه رائيك ؟
حياه: مش ليه لازمه ..ال باخده هناك اخد هنا ..مش عاوزه اسافر
ادم: معايا يا حياه هتسافرى معايا ومش هتبقى لوحدك
حياه: انا مش عاوززه اسافر لان النتيجه معروفه
وانت فى الاول قدرت تتغلب على مرضك وتعايشت معاه
يعنى بيا او من غيرى هتكمل ..
لسه ادم هيتكلم لاقى رساله من تليفونه من مها انها عاوزه ف مكتبها
ادم بص لحياه: لينا كلام تانى لانى مستعجل ف حاجه وبعدين هنتكلم تمام
وصل ادم حياه لااوضتها وراح بسرعه ع مكتب مها :
مها: تدينى كام
ادم بفرحه: حياه هتسافر
مها : متعرفش انا حاولت اد ايه
ادم بفرحه: بجد مش عارف اشكرك ازاى يا مها انتى رديتى فيا الروح
مها لاحظت التغير من مجرد ان حياه هتسافر وتتعالج
مها: بس انا مكملتش كلامى ياادم
ادم: خير
مها : امم ف شرط ف سفر حياه
ادم: شرط
مها: انت هتشتغل ف المستشفى هناك لمده سنتين مندوب من المستشفى هنا لهناك هناك بعتوا عاوزينك وانت رفضت عرضهم لما كنت هناك انا اتصلت بيهم لاقيت دى الطريقه ال تسمح لحياه تروح تتعالج هتبقى حالتك ال داخل بيها المستشفى والمسئول عنها تماما ..
ادم من غير تفكير: موافق
مها: ادم فكر انت كنت رافض تسافر من الاساس
ادم: مش محتاج تفكير علشان حياه اعمل اى حاجه وانا مستعد
ودلواقتى مفيش غير انى ادور ع طريقه اقنعها بيها تسافر بااقتناع وانها عاوزه تتعالج
مها مستغربه من ادم لكن حبيت تشوف ضحكته تانى ...!!
كان ادم الشفت بتاعه ورديه ليل ف المستشفى وسهر طول اليل يفكر ف طريقه وفتح النت وقعد يدور ع حاجات جت قدامه فكره حس انها ممكن تغير من تفكير حياه كتير فقرر ينفذها .. تانى يوم الصبح بدرى ..!!
راح ادم اوضه حياه وخبط ع الباب
حياه: اتفضل
ادم: لالالا منظر العيانين دا مش عاوزه يلا قومى البسى
حياه: مش قادره بجد ياادم
ادم: متحاوليش انا قررت خلاص قومى البسى هنروح مكان ونرجع ع طول
انتى فطرتى
حياه: الحمد الله
ادم: يبقى الكلام ع الغدا اتفقنا يلا بسرعه
حياه بعد الحاح واصرار من ادم قامت لبست وادم كان مستنيها
ادم اول ماشافها ابتسم: ايه القمر دا
حياه بتبتسم نص ابتسامه: قمر بالستر ف قمر تعبان كده
ادم : اممم لما يكون ف غيوم مش بيبان وبيبقى بهتان لكن لما تمطر او الغيوم تروح بيظهر وينور
حياه لاحظت انه بيلملح عليها: ها هتودينى فين ع الصبح كده
ادم : مشوار حسيت انه هيفرق معاكى لما نروح يلا
حياه: يلا
مشى ادم مع حياه اخد عربيه واحد زميله وراحوا ع مستشفى 57357
واستغربت حياه الاول ان ادم راح اشترى هدايا كتير وكانت فاكره انها رايحه عيد ميلاد الاطفال دخل ادم وهو وحياه ع اطفال بيتعالجوا وع وشهم ابتسامه
حياه: انت جبتنى هنا ليه
ادم باابتسامه : هتعرفى تعالى معايا
ادم مسك ايد حياه وماشى وبيقرب من طفل وبيديله هديه
ادم: اسمك ايه
الطفل: محمد
ادم: عاجبتك الهديه يا محمد
الطفل: اوى شكرا
ادم: قولى يا محمد نفسك تبقى ايه لما تكبر
الطفل: ان شاء الله لما هخف هذاكر وهبقى طيار علشان الف الدنيا كلها
ادم باس راس الطفل: ان شاء الله
فضل ادم يوزع هدايا ع الاطفال ويتكلم معاهم وحياه واقفه سامعه .. حياه واقفه وايديها بترتعش من كلام الاطفال ..قرب منها ادم لقاها واقفه بعيد
ادم: هو انتى جايه تتفرجى
حياه بتبص ل ادم : انت جبتنى هنا ليه
ادم: علشان تشوفى ال اسوء منك واصغر منك وكلهم تفائل وحياه
بيرسموا مستقبلهم وبيقهروا مرضهم بعزيمه واصرار مش تشائم واستسلام
حياه عنيها دمعت: ادم انا
ادم مسك ايدها الاتنين بايده وطبطب عليها ومسح دموعها
ادم: حياه انتى لازم يكون عندك اراده علشان تعيشى بصى شوفيهم عاملين ازاى وايه وبيضحكوا بابسط حاجه فاهمه يعنى ايه باصيين لبكره ومتفائلين خير ف ربنا .. انتى مش غريبه عنهم انت زيهم وانا كمان
راح ادم مسك هديه : يلا روحى اتأقلمى معاهم وقربى منهم خدى منهم الامان والراحه ادى الهديه دى ووزعى عليهم الامل فى ربنا والضحكه الحلوه من حياه يا حياه
حياه مسكت الهديه وبصت لادم وابتسمت وراحت لطفله اتكلمت معاها وادتها الهديه وقعدت حياه وادم يلعبوا ويتكلموا مع الاطفال وادم حس انه جاب حياه ف المكان الصح كبدايه لطريق علاجها ..!!!
قعدوا شويا مع الاطفال واتغدوا معاهم وقعدوا لغايه بليل وكان ادم معاه أذن انه يطول ف المستشفى بما انه دكتور
خلصوا قعدتهم وخرجوا .. ركبت العربيه حياه: انا تعبت نرجع بقى المستشفى
ادم بص ع الساعه وقالها : لا اليوم مخلصش لسه تروحى الحسين
حياه بصتله: الحسين الساعه داخله ع 10
ادم بيضحك: وهو الحسين ليه وقت بيقفل فيه .. تعالى نروح ونشرب حمص الشام من هناك اصلى نفسى فيه اوى
حياه: يا راجل
ادم شغل العربيه: وهو انا لسه هستناكى ولا ايه هيا بينا ..
راح مشى بالعربيه ادم ووصل الحسين نزلوا اتمشوا وكان الوقت مش مبين انه متاخر محلات فاتحه وقعدوا ع قهوه الفيشاوى وشربوا حمص الشام وطلب ادم رز بلبن علشان حياه بتحبه وختموها الاتنين بكبتشينو ...
حياه: ادم انا هنام منك وحاسه انى تعبانه
ادم بص ع الساعه: يعنى الفجر فاضله ساعتين مش خساره نمشى
نصلى الفجر هنا ونتحرك تمام
حياه : تمام
ادم : قومى ريحى ف العربيه وهبقى انبهك تقومى قبل الفجر علشان تدخلى تتوضئ
حياه : اوك .انا هدخل اصلى ركعتين الاول
ادم: تمام وانا كمان يلا
دخل ادم وحياه المسجد اتوضوا وصلوا وادم دعى لحياه انها تخف وهو باصص ليها بعد ما سلم... خرجت حياه من المسجد ركبت العربيه وغمضت عينها ..ادم من ورا الازاز وقف جنب الشباك وفضل باصص عليها ولا حس بالوقت ولا بالوقفه ل ساعه لغايه ما سمع الاذان الاول راح نبهها وقامت حياه ودخل هو وهى صلوا الفجر وخرجوا
حياه مبتسمه: الواحد حاسس براحه غريبه
ادم باصصلها ومبتسم: مش قلتلك هتنبسطى
حياه : يلا بينا
ادم: يلا
وادم وهو ماشى رجله اتخبطت ف طوبه مش شايفها
حياه اتخضت : ادم انت كويس
ادم بيعرج: استنى نقعد شويا لغايه ما تفك وهشوف
قعدوا ادم وحياه ع الرصيف ف وسط الميدان وحياه قلقانه ع ادم
حياه: حرك رجلك كده
ادم: متقلقيش انا بس هحركها شويا وهتفك متقلقيش
حياه: طيب الحمد الله
وهما قاعدين الشروق ابتدا ونور ربنا ابتدا ينور
ادم: الله انا بحب الشروق جدا
حياه : فعلا احساسه حلو
ادم: الشروق دا بعد اليل الضلمه علامه ع ان كل حاجه بتحصل بتضايقنا او بتحصلنا ليها مخرج من عند ربنا وهتنور طريقنا واننا مش نستسلم ونيأس ونقول نصيبنا كل حاجه وحشه ليها اخر وفرج
حياه بصت ل ادم مردتش عليه ..ادم كمل كلامه:انتى طول اليوم بتسألينى ليه اخدت المستشفى الاطفال انا انهارده اخدتك ولفيت بيكى المستشفى وجينا هنا مخصوص علشان كذا حاجه
اولا: تشوفى الاطفال وتفائلهم ببكره برغم اوجاعهم وألمهم
ثانيا: تشوفيهم راسمين مستقبل لانهم رافضين الحاضر بمرضه وهيتغلبوا عليه بالامل
ثالثا: جينا الحسين هنا ودخلنا نصلى علشان تحسى انك مش لوحدك
ربنا معاكى ف كل خطوه وكلمه يارب بتغير كتير ولما صليتى ارتاحتى
رابعا: تحضرى الشروق بره الشباك والبلكونه تبقى جوه لحظه الشروق
تحسى بالنور ال جه بعد ضلمه .. بالامل ال يقولك ال جى احلى واحسن اتشجعى مش تستسلمى
خامسا : طلب ورجاء سافرى فرنسا معايا نكمل العلاج هناك
لو مش علشانك انا بطلب جميل منك كونى معايا علشان مش ابقى لوحدى ونشجع بعض ونحارب المرض مع بعض
حياه سامعه كلام ادم دموعها نازله وهى بصاله : هخف بجد ياادم انا حاسه انى خلاص خلاص
غمضت حياه عينها ودموعها نازله قام ادم من جنبها وقعد قدامها مد ايده ومسح دموعها من ع خدها وتلقائى قرب منها وباس عنيها الاتنين
حياه اتاخدت من حركه بوسه العين دى وفتحت عينيها وبصت ل ادم
ادم وع وشه ابتسامه : هتخفى يا حياه ودموعك دى مش هتنزل غير لفرح لانها متستهلش غير كده و ان شاء الله انتى تقدرى تتغلبى ع اى حاجه يا حياه وانا معاكى ومش هسيبك ابدا ووعد وعهد قدام ربنا شاهد عليا
ادم :قولتى ايه نجهز اوراق السفر ونسافر
حياه سكتت لحظات وحست باامان لكلام ادم وهزت راسها بالقبول
ادم فرح واترسمت ابتسامه كبيره : ايوه بقى بدل ما كنت بتعالج ف المستخبى ابقى معاكى
حياه ابتسمت نص ابتسامه ..
ادم: هعرف مامتك وباباكى ونجهز وتسافرى من المستشفى تمام
هو السفر هيبقى خلال اسبوع ان شاء الله
حياه باابتسامه : ان شاء الله
وبصت حياه لسماء و وبتدعى ربنا وادم باصصلها وبيشكر ربنا ...!!
__________________________
عمرو من وقت ما عرف ان حياه رجعت وكل يوم عاوز يروح يشوفها ومش قادر
فى يوم وهو قاعد فى البيت ف مكتبه كانت منى ومامته قاعدين بيتكلموا
مامت عمرو: بتقولى ايه دخلت مستشفى ؟
منى: فى اقل من اسبوع من رجعوها تعبت ونقلوها المستشفى بتاخد علاجها هناك وادم معاها
مامت عمرو:لا حول الله يارب
دا ال يشوفها وهى هنا يقول خفت خالص اتاريها كانت بمتثل الشفا
منى : احتمال
مامت عمرو: الحمد الله انكوا اتجوزتوا لكانت ضحكت ع عمرو بانها كويسه
ولو اتجوزوا كان زمانه قاعد جنبها ف المستشفى زى ابن خالته كده
منى ساكته .. مامت عمرو: مقصدش يا حبيببتى انا اقصد ان انتى ال مكتوبه ل عمرو مش هى وربنا يسهلها سكتها ويشفيها
منى : ان شاء الله
ف الوقت دا عمرو سمعهم وعرف ان حياه تعبت ودخلت مستشفى
رجع ع مكتبه فتح الللاب وفتح الصور القديمه وقعد يتفرج عليها وهو حاسس بتأنيب ضمير ..!!!
تانى يوم عمرو لاقى نفسه رايح ع المستشفى يسأل ع حياه سأل فى الاستعلامات ..
عمرو: لو سمحت عاوز اسأل عن مريضه اسمها حياه فى اوضه كام ؟
موظف الاستعلامات: الانسه حياه لسه خارجه حالا مسافره ع فرنسا
عمرو متفاجئ: فرنسا
موظف الاستعلامات: ايوه يا فندم طيارتها كمان ساعتين
عمرو بص ع ساعته وبسرعه خرج ركب عربيته وراح ع المطار قعد يدور ع حياه
ولاقاها قاعده وجنبها ادم واتصلب مكانه ومش عارفه هو يروح يقول ايه ولا يعمل ايه وهيشرحلها ايه ..هو كان عاوز يشوفها .. شويا وقامت حياه وادم علشان طيارتهم وعمرو خرج ركب عربيته لغايه ميعاد الطياره لما طارت واتحرك رجع البيت ودخل منى كلمته مبيردش عليها دخل ع المكتب وقفل ع نفسه وقعد ع الكرسى وحاسس بخنقه لاقى نفسه بيفتح الللاب وفتح صور حياه
ودمعه نزلت من عينه ...!!!
_________________________
وصلت حياه فرنسا فى المستشفى وقعدت ف اوضه تانيه وجواها قرار انها تبقى اقوى علشان تقوى ادم ال معاها فى نفس المعاناه مينفعش تفضل ضعيفه كان اول يومين راحه واستسلم ادم شغله
ادم: انا متشكر جدا ع تعبك يا دكتور معايا
دكتور مايكل: احنا فعلا محتاجين دكتور شاطر زيك ف مجالك
عملياتك كلها ناجحه برغم صغر سنك بس هتبقى دكتور جراح متميز ف مجالك
ادم مبتسم: شكرا جداا لذوقك .. لكن ليا طلب ممكن
دكتور مايكل : اتفضل طبعا
ادم : اممم لو ينفع العمليات ال هشارك فيها مواعيد تتظبط بعيد عن جلسات العلاج لحاله ال معايا علشان عاوز اكون معاها كنوع من التشجيع وانا وعدتها مش هسيبها لوحدها
دكتور مايكل: انا مقدر شعورك وهنحاول نظبطها الا العمليات الضروريه
ادم: اه طبعا ال متتاخرش معنديش مشاكل
دكتور مايكل : تمام
ادم: هستأذن حضرتك علشان عاوز دكتور مراد
دكتور مايكل: اتفضل
خرج ادم راح ع مكتب دكتور مراد خبط ع الباب ودخل
دكتور مراد: دكتور ادم..حمد الله ع سلامتك
ادم مبتسم: الله يسلمك يا دكتور
مراد: كنا مفتقدينك هنا وفرحت اوى لما مها كلمتنى وقالتلى انك جى معاك حياه كمان
ادم: بمناسبه حياه كل الاوراق والتحاليل الاخيره عندك ومعاك
مراد وعلامات قلق ع وشه: اه وصلتلى وشوفتها وواضح جدااا هبوط ف النتيجه والحاله بتسوء والعلاج مش هيبقى ادويه بس هنزود الكيماوى شويا
ادم: انا عارفه وان شاء الله هتتظبط وهنخف منه قريب
بس انا ليا طلب عندك ممكن
مراد: اتفضل طبعا يا ادم
ادم : انا هحضر جلسه العلاج الكيماوى مع حياه
مراد بيضحك: دا طبيعى حالتك وبتطمن عليها عادى
ادم بيبص ل مراد: هحضر معاه مش متفرج هحضر معاها هاخد جلسه زيها
مراد تنح من كلام ادم: بتقول ايه يا ادم جلسه ايه عاوز تاخد كيماوى ..داانت دكتور وفاهم ازاى تقول كده
ادم قاطعه وهدى من توتره: مش هاخد زى ما هى بتاخد انا هعلق محاليل بس بدل كياس العلاج ال هى بتاخدها انا هيتحطلى فيتامينات
عاوز ابقى زى زيها وف نفس الوقت نبتدى سوا ونخلص سوا ممكن عاوز يبان اننا الاتنين بناخد جلسه زى بعض
مراد استغرب اوى من ادم: ليه هتوصل لدرجه دى
ادم: علشان عاوز اشاركها فى كل لحظاتها ..انا مش قادر اشاركها وجعها واشيله منها هبقى معاك وماسك ايدها ...انا عاوز كده وشرط هى متعرفش لانى مفهمها انى عيان زيها فدا هيكون اتفاق بينى وبينك والممرضه ال هتحط العلاج
مراد متفاجئ جدا ا: اول مره اشوف حد بيعمل كده مع حد انت بتحبها
ادم سكت: عاوزها تخف
مراد: خلاص اتفقنا مفيش مشاكل
ادم: مش هأكد عليك محدش يعرف حياه متعرفش ولا عاوزها تعرف
انا لما القيها اتحسنت هعرفها |
مراد: متقلقش
خرج ادم وهو مرتاح انه ظبط كل حاجه تخصه ورتب لحياه علاجها ازاى وامتى
وراح عندها الاوضه خبط ودخل : بتعملى ايه يا توتا
حياه قاعده ف البلكونه : قاعده .. بشم هوا العليل
ضحك ادم وراح شد كرسى وقعد جنبها: ماشى ياام عليل انا جيت علشان اقول اننا من بكره هنبتدى العلاج
حياه: لوحدى
ادم: ودا ينفع طبعا لا انا معاكى علشان نشجع بعض
حياه سمعت اتحفزت اكتر ..ادم: ونشوف مين ال هيخف الاول بقى
حياه بتضحك: ان شاء الله
ادم: يلا تصبحى ع خير والصبح اشوفك بقى
حياه: وانت من اهله
خرج ادم وراح ع اوضته ف سكن ونام ع السرير وهو بيفكر وبيدعى ربنا يعجل ف شفاء حياه...!!!
تانى يوم راحت حياه مع ادم اوضه ال هياخدوا فيها علاج الكيماوى وقعدت حياه وادم والممرضه جهزت حياه وعرفتها انه هياخد وقت وادم حطتله والاتنين قعدوا يتكلموا وشويا حياه غفلت نامت .. ادم طول ماهو قاعد باصص ع حياه .. قام بهدوء وقرب منها لقى دمعه نازله من عنيها تلقائى
راح يمد ايده ومسحها وقرب باس بوسه خفيفه ع عنيها الباب خبط وقف يبص مين واتفاجئ ....
_______________
يتبع
ليست هناك تعليقات:
إرسال تعليق