الاخيره
(27)
رجعت "جميله" مع "على" ع بيت هبه وطويل الطريق مبيتكلموش ولا عاتبوا بعض لكن ماسكين ايد بعض وساكتين وبعد الترحيب والغدا دخلت "جميله" اوضتها ترتاح ودخل "على" اوضته وشويا باب الاوضه خبط وكانت "هبه" .. هبه: على
على: ايوه يا بيبو تعالى
هبه قفلت الباب بشويش ومشيت بشويش
على : فى ايه ؟
هبه: علشان عبدالله وجميله ميسمعوش
على بيوطى صوته: ليه.. هنقتل حد فيهم
ضحكت هبه: ضحكتنى وانا داخله اتكلم جد
على : عاوزه تقولى ايه
هبه: بصراحه كده بعد كل الل حصلك دا هتعمل ايه فكرت ؟
على : اممم .. بفكر
هبه: وجميله هتعمل معاها ايه
على: ما قولتلك هفكر وهرد عليكى متزنيش بقى وقومى نامى
هبه: برضه مبتفهمنيش حاجه ماشى ياابو على ماشى
على ضحك: يلا اخرجى عاوز انام
هبه خرجت وعلى قام فتح الشباك وبص ع السما : حلهالى من عندك يارب
مر يومين ع وجود "جميله" ف مصر ف المنيا راقت ورجعت ابتسامتها .. ف يوم "على" اخد "جميله" ونزلوا عند الارض وقاعدين وجميله ع وشها ابتسامه و"على" عينه منزلتش من عليها
على : جميله ..
جميله: ايوه
على: من يوم ما جيتى وانا مرضتش اتكلم معاكى واقولك ان الل حصل ..
جميله قاطعته : متقولش حاجه يا على ..الل حصل حصل خلاص وانا قفلت ع كل الل فات ..برغم حلاوته كان فى قساوه ..انا خبيت عليك وانت خبيت عليا كل واحد افتكر ان كده ف صالح التانى ووجعنا بعض من غير ما نحس ودفعنا من حياتنا وجع والالم عشناه ..دلواقتى قدامنا فرصه تانيه نبدء مع بعض من جديد وبوضوح وانا مش عاوزه اضيعها ..ممكن يا على
على ابتسم: انا اسف بجد ع اى وجع حصلك بسببى ..
جميله ابتسمت: انا الل اسفه ع اى وجع حصلك بسببى من وقت ما قابلتى وبيحصلك مشاكل وبتتأذى واخيرها فلوسك انت واحمد الل ضاعت بسببى بجد انا اسفه
على مسك ايديها: لالا مش بسببك .. ومش زعلان لان انا استسهلت واستعملت فلوس مش نضيفه ف شغل نضيف كنت بتحايل ع الحلال بالحرام وبرغم مكاسبه لكن راح ف غمضه عين دا نتيجه تصرفى انا مش انتى وعقاب ليا ودرس ان الحلال مهما كان قليل احسن بكتير من حرام كتير .. انتى علمتينى اشوف الدنيا صح يا جميله ..انتى ساعدتينى استغل الفرصه التانيه اغير بيها حياتى ومرجعش لل عملته مهما الدنيا خبطت فيا .. انتى عملتى كتير بجد ..
جميله ابتسمت ..على: نمسك مع بعض الفرصه التانيه ونبدء حياه جديده بالمصارحه ومفيش كدب ونقفل ع كل الل فات من حياتنا ... تقبلى يا جميله تتجوزينى .. زى ماانتى شايفه انا مش هقدر اقدملك حاجه ضمان لكن الل اقدر اقدمه ليكى عمرى الل جى ل اخر يوم فيه هكون معاكى ومش هسيب ايدك .. تقبلى تتجوزينى وتقبلى بظروفى الجديده دى
جميله ودموع نازله من عنيها : موافقه اكون شريكتك ف كل لحظه هتعيشها .. موافقه اكون معاك ف اى مكان ..موافقه ابتدى معاك من الاول ايدى ف ايدك ومش هسيبك
رجعوا ع البيت وعرفوا هبه بالخبر انهم هيتجوزوا وزغرطت :
هبه بفرحه: هيبقى فرح الكل بيحكى عليه ياابو على
على بهدوء: مفيش فلوس علشان الفرح .. الغى الفرح
هبه بصت ل جميله وجميله هزت راسها ...
هبه : وماله بلاش فرح .. نعمله ع الضيق هاخد جميله ونلف ع محلات علشان نشوف فستان بقى ل احلى عروسه
جميله : لالالا متتعبيش نفسك مفيش فستان
هبه بصت ل على هز راسه : نعم ودا من ايه ؟
جميله: لان ببساطه مفيش فلوس لا اشترى فستان ولا أجر حتى انا وهو بلاطه
هبه ب استغراب :ناقص تقولوا مش هتشتروا اوضه نوم جديده
على : واجيب اوضه نوم ليه واوضتى هناك سرير ودولاب كبير ومكتب وشباك
هبه: لالا انتم بتهزروا صح
جميله ضحكت: بصى يا بيبو ..الظروف حاليا لا تسمح باى مصاريف يا دوب مع على تمن الماذون وقرشين نمشى بيهم حالنا ف القاهره لغايه ما يلاقى شغل ليه ..مش هنصرفهم ف مناظر
هبه: مناظر .. يعنى هتتجوزا سكويتى كده ومن غير بدله ولا فستان ولا اوضه نوم وهتدخلى ع عشف قديم وغير كده مش هتقعدوا هنا وهتقعدوا ف شقه عين شمس .. ليه كده وانا ممكن اتصرف ليكم بقرشين
على : لالالا تتصرفى وابقى مديون لا كفايه حياتى كلها عايشها بدفع ديون فلوس وافعال .. انا عاوز اعيش وهى موافقه تعيش معايا ع كده .. ولا ايه يا جيمى
جميله ضحكت: طبعا .. الشكليات دى لناس لكن انا الل هعيش والظروف هى الل حكمت بكده
هبه باصه ل الاتنين: بجد مش لاقيه كلام
على ضحك: خلاص قوم اعمليلنا صينيه كيكه عاوزين نشبع علشان داخلين انا والغلبانه دى ع ايام كحت
ضحكت جميله: واتوصى ونبى علشان شكلى هشوفها ف الاعلانات بس بعد كده
على ضحكت: اعلانات وهتتفرجى ع تليفزيون ليه وهدفع كهربا منين
جميله: صح .. انام بدرى علشان اصحى بدرى ماله نور ربنا حتى التليفزيون بيوجع العين
على: ايوه كده شاطره
هبه ضحكت ع كلامهم: والله انتم الاتنين مجانين ... !
كتبوا الكتاب واخدها "على" ورجعوا ع القاهره وقبل ما يروحوا شقه "عين شمس"
راحوا زاروا ام وابو جميله ف مقابرهم وام على ف مقابرها وعرفوا بخبر زواجهم .. رجعوا ع شقتهم واول ما دخلوا باب العماره مره واحده "على" شالها وطلع بيها السلم وفتح باب الشقه وشالها ودخل بيها :
جميله بتضحك .. على مسك ايديها : كان نفسى افرشلك الشقه دى زى اى عروسه وتدخلى بفستان فرحك وانا شايلك .. ربنا يقدرنى ومخلكيش محتاجه حاجه
جميله مسكت ايديه وباستها : انا مش محتاجه غير حضن الل مخرجش منه ابدا
على ابتسم وغمزلها ... جميله عملت مش شايفه : انا جعانه اوى تعالى ناكل
على مسكها: احنا لسه واكلين مش ضاربين سندوتشات بره لحقتى تهضمى
جميله اتكسفت: اقصد اعمل شاى نهضم يعنى
راح على شالها : ما احنا هننهضم دلواقتى
دخل على وشايل جميله اوضته وابتدت اول يوم حياتهم الزوجيه ... تانى يوم "على" نزل يسأل عن الحج "عبدالله" علشان التاكسى لكنه كان اتوفى وفضل يلف ع شغل لمده اسبوع لغايه ما لقى شغلانه سواقه عربيه بضايع توزيع لمحلات واشتغل ..!
كان احمد لما رجع مصر وطبعا راجع بولا مليم فنزل محل باباه بتاع الادوات المنزليه يمسكه لغايه ما يلاقى شغل .. ففى يوم كان هيروح ل على وجميله فكان على مش ف البيت لسه مرجعش ف راح عند هدى يقعد معاها شويا وينزلوا سوا ل على وجميله ..
هدى : اتفضل الشاى
احمد: تسلم الايادى يا ام شيماء يا حياتى
هدى ضحكت: العفو
احمد بص ع الساعه : هيتاخر الاخ دا ولا ايه
هدى : الله يعينه بجد بيتعب اوى
احمد شاف هدى متأثره ل على اوى : بيتعب اووى ولا مره قولتيلى كده وهو انا بلعب ما انا بشتغل انا كمان اهو
هدى ضحكت: بس انت قاعد ع كرسى وف محلك ملكك لكن على بيلف بالعربيه طول اليوم
احمد : ياعينى عليك ياابو حميد .. تعاطف ام شيماء راح ل على ونفضتلك
هدى ضحكت : انت فظيع
احمد ضحك: انتى افظع بجد مش عارف مستحملك ليه ها تعرفى ليه ؟
هدى اتكسفت : قول انت
احمد : علشان شيماء طبعا ياام شيماء هيكون بسبب ايه يعنى
هدى ضحكت: رخم .. رخم
احمد ضحك: بجد يا هدى انا لو لفيت مش هلاقى زيك واحده غيرك ف الظروف الل انا فيها والل حصلى كانت بعتنى وش من غير ما تدفعلى حق الرجوع .. انتى صابره عليا ومعترضتيش وواقفه جنبى بجد انتى نعمه
هدى : لانك تستاهل اعمل اكتر من كده .. مسكت ايدى ف وقت كنت وحدى فعلا ورجعت ضحكتى وحسستنى بالحياه ولاقيت ان فيها الالوان غير الاسود الل عشت فيه سنين .. انت الل نعمه ف حياتى
احمد: طيب بما انك نعمه وانا نعمه .. النعم بتتباس وتتحط جنب الحيط ايه رايك تبوسينى وابوسك .. ماهو النعم واجب نشكر ربنا عليها
هدى بصت ل احمد: بجد
احمد: اه صدقينى انا سمعت الشيخ بيقول كل واحد عنده نعمه يبوسها من خدها وبوقها علشان ربنا يباركله فيها
هدى ضحكت: مين ان شاء الله الشيخ دا
احمد: الشيخ احمد ابو حميد الل هو انا .. معنديش حريم تسمع لشيوخ اغراب
هدى خبطته ع ايده: ظريف
احمد: وبحبك
قعد "احمد" يناكف ف هدى ويلعب مع اسماء وشويا "على" رجع البيت فنزل له "احمد" و" هدى " ... احمد: لووول عاش من شافك
على : مشغول والله ف الشغل بلف طول اليوم
احمد: اه ياعينى علشان كده صعبان ع نعمه
على : نعمه مين
احمد: ام شيماء .. ما انا قررت اسميها نعمه ام شيماء علشان ابوسها واركنها
على ضحك: مش هتتلم بقى ونفرح فيك
احمد : بوضب الشقه الل ف البيت اهو كتر خيره الحج ساعدنى اخيرا حس انى ابنه
على :يلا ع خير الله
احمد: نعمه مصممه انى معملش فرح معان ابويا الل هيدفع فهنكتب ف مسجد النور ف العباسيه وانت هتكون شاهد
على : اكيد لازم اكون شاهد ع الجريمه دى
احمد: توكلنا ع الله ...
فى يوم على رجع من الشغل ومعاه شوكولاته ل جميله دخل الشقه شافها متلغبطه
على: فى ايه
جميله: مش فاكره انا حطيت ملح ل الرز ولا لا
على بيضحك: دوقينى كده
جميله : اتفضل
على ملامح وشه اتغيرت: انتى بتطبخى رز ولا بتخللى رز
جميله: قليل صح احط تانى
على : اييييييييه استنى الملح اكتر من الرز يا حبيببتى ..
هو علشان رخيص مكتره منه مش كده يا حبيببتى مش كده
جميله بزعل: انا نسيت خالص كنت بمسح الشقه ومش فاكره حطيت كام مره
على : هاتى رغيف ونغمس انهارده يا حبيببتى وخلى الرز زى المكرونه بتاعه كل مره لبط ام هشام.. البط بياكل احسن منى وانا باكل بالعيش
جميله بملامح زعل : اسفه
على ضحك ومسك ايديها باسها : اسفه ع ايه دا كفايه انك بتحاولى وهتوصلى ان شاء الله
جميله ابتسمت .. على : بس وغلاوتى لما تعملى اكل ركزى اكتر لاحظى انى بلف طول اليوم ومش كتير بلاقى حمامات
جميله ضحكت: حاضر.. انا اسماء قالتلى ع طريقه صينيه البطاطس هعملها بكره
على : كويس انك قولتى هعمل حسابى حاضر ف علبتين كشرى ...
جه يوم كتب كتاب "هدى" و"احمد" وكانت فرحانه والكل كان ملاحظ كده عن لما كانت متجوزه اول مره .. "على" فضل معاهم طول اليوم مع "احمد" و"جميله" كانت مع "هدى" و "اسماء".. و"ايمان" كانت قاعده عند خالتها ف دمنهور الفتره الل اتجوز فيها "على" حبت تبعد .. المهم البنات مسبوش هدى وكانت فرحانه لغايه ما جه اخدها احمد من الكوافير وهى لبسه فستان الفرح وراحوا ع استدويو التصوير واتصوروا وراحوا ع مسجد النور .. ف الوقت دا جت ايمان وراحت تبارك ل هدى : مبرووك ياهدى الف مبروك
هدى بسعاده: الله يبارك فيكى يا ايمى تسلميلى
ايمان: ربنا يجعل حياتك سعيده ويعوضك ع كل الل فاتك
هدى : الحمد الله كرم ربنا كبير اووى يا ايمى لما بتضيق بتفرج الحمدالله
ايمان: ماشاء الله عليكى الفستان جميل
هدى بصت لفستان: دا ايجار وساعدتنى اسماء وجميله ف اختياره
ايمان ضحكت: قولتيلى اسماء ..اكيد اخدت لففتك ع حوارى ومحلات جانبيه علشان السعر
هدى : وماله الفستان يا ايمى وحش
ايمان: لا مقصدش والله ..
هدى ابتسمت ل ايمان: مش مهم قيمه الفستان يا ايمى المهم الل هيتلبسله الفستان هى دى الفرحه الل بجد .. واحمد احلى فرحه حصلتلى ف حياتى هو وشيماء
ايمان اتحرجت : ربنا يفرحك اكتر واكتر
بصت ايمان شافت على ماسك ايد جميله وبيتكلموا وبيضحكوا ..
جميله: هدى زى القمر
على : والواد احمد طالع برنس
جميله: بس هدى احلى منه بصراحه
على: لا احمد احلى
جميله: الاتنين ولا تزعل نفسك
ضحك على سكتوا شويا وبص ع جميله وهى باصه ع هدى ..
على : سرحتى ف ايه
جميله: فستانها حلو اوى ايه رأيك اختيارى انا واسماء اول مره اختار لحد فستان فرح
على : اسف ياجميله انى حرمتك من اللحظه دى
جميله ابتسمت: اللحظه معاك احلى واحلى متقولش كده ..
مسك على ايد جميله وباسها ...!
مرت فتره ع جواز على وجميله واتوطدت علاقه جميله مع اسماء اكتر من ايمان وكانت اسماء ساعدت جميله ف حاجات كتير ف تعليم الطبخ وتدبير امور البيت وكانت دايما تروحلها وتقعد معاها ... فى يوم اسماء راحت تقضى اليوم عند مامتها وشايفه ايمان متغيره فكلمت "جميله " تروح تقعد معاهم لغايه ما "على" يرجع وبالصدفه كانت شاهنده موجوده تزور ايمان ..:
شاهنده: ياااه وحشنى المحشى اوى تسلمى يا سمسم عرفت انك الل عملتى الاكل
اسماء: الف هنا يا شاهى .. اكيد اكل المصرى مفيش زيه
جميله ضحكت: اه طبعا لدرجه انى ف محاولات اتعلمه اهو وعلى يا حبيبى بيستحمل التجارب دى
ايمان: عملتى ايه ف السفريه دى يا شاهى ؟
شاهنده بتتنهد: والله المرادى بعد اخر عمليه الدكتور قال مع العلاج والمتابعه ان شاء الله ربنا هيكرمنى ... ادعولى
جميله: ان شاء الله ..
اسماء : كان نفسى البت هدى تبقى معانا بس عازمه قرايب جوزها
جميله: اه فعلا كانت القاعده هتحلى
اسماء: انا فرحانه ليها جدااا بعد الل شافته ربنا عوضها خير
جميله: ربنا جميل اووى وكرمه ملوش حدود مهما طالت المده بيفرجها بالاوى كمان
اسماء: ماشاء الله علينا احنا الاربعه متزوجات ايه رايكم يا بنات ف الجواز بقى
شاهنده ضحكت: ليه الفضايح دى
جميله: استرى علينا
اسماء: لالالا اصل الجواز دا مغامره بجد وانا مستمتعه بيها جدا بكل احداثها وانتم
شاهنده: انا كنت فاهماه غلط .. شكليات قدام الناس علشان ميتقلش عليا عانس او سايبه وصوره علشان كلام الناس .. لكن اكتشفت متاخر انه حياه بجد واحلى ما فيها شريكك يكون معاكى ف كل حاجه.. عادل استحملنى كتير وانا مكنتش حاسه ولما قررنا ندى علاقتنا فرصه تانيه فرقت كتير ..
جميله: الجواز عقد بين اتنين بيتعاهدوا فيه ع الحلو والوحشه ..بيتعاهدوا انهم مع بعض ل اخر العمر .. بيتعاهدوا ان مهما حصل من تخبيط ف الدنيا يقوو بعض
بصوا ل ايمان... ايمان: الجواز حياه وراحه بال اكتر من راحه بخروجه او بفلوس تصرفها ع طقم جميل ولا هديه غاليه .. الجواز خطوه يا تكون قدها يا تفشل فيها وتخسر
اسماء حبت تغير الكلام علشان ايمان .. اسماء: قولينا يا جميله انتى مش مضايقه انك ملبستيش فستان فرح وكده مندمتيش ع قراركدا ؟
شاهنده : اه صحيح ولا فرح ولا فستان وداخله ع جهاز قديم .. طيب كنتى البسى الفستان دا حلم كل بنت انها تلبس الفستان دا ف اليوم دا ؟
جميله ابتسمت : دا حلم طبيعى لكل بنت اكيد .. لكن قبل ما نفكر ف الفستان نفكر ف الانسان الل هنلبسله الفستان دا عامل ازاى .. ايه الل رابطنى به .. ايه سبب الل هيخلينى اعيش معاه .. هستحمل ظروفه ولا لا .. ايدى هتكون ف ايده ولا هسيبه لوحده يحارب .. دا الاهم من الفستان ..قبل ما تختارى الفستان اختارى الانسان ..الفستان ساعه ساعتين وهتقلعيه ويتعلق لكن انتى هتعيشى حياه ...
شاهنده : حاسه انى بسمع على لدرجه دى بهت عليكى
جميله: على علمنى حاجات كتيره اوى ف حياتى ..
جميله بصت ع الساعه .. اسماء: رايحه فين
جميله : هنزل بقى علشان على قرب يرجع
اسماء: استنى شويا طيب ولما يرجع يكلمك
جميله: لا انا قولتله هترجع تلاقينى ف البيت انا بحب اكون ف البيت وهو يفتح باب الشقه ويلاقينى ف وشه يبوسنى من خدى ويدينى مخدراتى اليوميه الشوكولاته
شاهنده ضحكت: ايه الحب دا كله
جميله: واكتر من الحب كمان
اسماء : طيب كلميه الاول بدل ماتروحى وتقعدى لوحدك
راحت جميله كلمت على وعرفت انه هيتاخر شويا واتفق يرنلها لما يقرب
شاهنده: عيون بتلمع معقوله بعد سنه جواز زى ماانتى متغيرتوش
جميله ب ابتسامه: لاننا عرفنا يعنى ايه الحب الحقيقى
اسماء ب ابتسامه: ايه بقى الحب الحقيقى ؟
جميله ب ابتسامه: احنا بتمر ف حياتنا قصص حب كتيره لكن قصه واحده الل بتعرفنا ايه هو الحب الحقيقى ... الحب الحقيقى علاقه بين اتنين ..علاقه واضحه بينهم من غير تمييز ولا تحميل طرف اكتر .. الحب الحقيقى هو الاصول قبل ما يكون كلمه ..كل حاجه فيه اصول ..لما حبيبك يكون تعبان تكونى اول واخر واحده جنبه بس من غير كلام ولا طلب منه ماسكه ايده ومتسبهاش ..لما يكون ف ازمه تساعديه بالل تقدرى عليه ومتحسسهوش انه لوحده لان الازمه اكبر اختبار للحب والعلاقه بين اى اتنين يا يخرجوا منها مع بعض يايخرجوا منها بعاد عن بعض ..الحب مش حاله بتروح وبتيجى وكلام اغانى بنسمعه وبنسرح مع كلامتها ولا هدايا ولا خروج .. الحب هو احتواءك لحبيببك ف وقت احتياجه وضعفه. لما الدنيا تقفلها ف وشه لكن حضنك انت مفتوح علشانه ..الحب الحقيقى هو انك تسعدى الل بتحبيه ب ابسط الحاجات وتحاولى تكبريه وتساعديه يعلى حتى لو وقع تمسكى ايده وتشجعيه انه يكمل وانتى معاه ..الحب الحقيقى انك تختارى الشخص الصح الل يستاهل كل حاجه حلوه ف الدنيا وتحس انها قليله عليه .. !
شاهنده واسماء وايمان مبهورررين اوى بكلام جميله وايمان دمعت من كلام جميله وقامت دخلت الحمام ... ف الوقت دا رن على وقامت جميله نزلت راحت شقتها شويا على وصل دخل نده ع جميله خرجتله باسها من خدها واداها شوكولاتتها وحضرت العشا واتعشوا ..!
خرجت اسماء من الاوضه وشاهنده وايمان لوحدهم
شاهنده: ايمى مالك
ايمان: مفيش
شاهنده : ايمى.. مش ناويه ترجعى بيتك
ايمان سكتت.. شاهنده: ادى لنفسك ول مازن فرصه تانيه وابدوا مع بعض بدايه جديده زى ما انا عملت انا وعادل .. كتير بتجيلنا الفرصه التانيه واحنا بنهملها .. بلاش تهملى فرصه مش هتتعوض ومازن مستنيكى لانه بيحبك بجد وصابر عليكى .. اقفلى ع كل الل فات وحافظى ع الل جى
ايمان باصه ل شاهنده .. شاهنده: انا عارفه انى كنت مقصره معاكى جدااا بس جه الوقت الل نلحق فيه اخر امل العمر بيعدى مننا وتمسكنا بالماضى مش هيزود حاجه ...
ايمان دموعها نازله حضنتها شاهنده: ربنا بيغفر ويسامح يا ايمى ..استغلى فرصتك ومتضيعهاش
بعد تفكير كتير من ايمان سافرت ل مازن واتفاجئ بوجودها واتكلمت معاه وقررت تدى لحياتها مع مازن فرصه تانيه ...استمر شغل "على" المرهق لغايه ف يوم جه عبد الله جوز هبه وهبه يزوروهم وقعدوا واتغدوا وقعدوا يشربوا الشاى ..:
عبدالله: ايه اخبارك ياابن خالتى
على : الحمد الله ماشى الحال
عبدالله: نحمد ربنا.. مبسوط ف شغلك
على: اهو الموجود يا عبد الله الحمد الله
عبدالله: انا جيت وعاوز اتكلم معاك ف موضوع بصراحه
على: خير
عبدالله انا قدمت معاش مبكر من الشغل بسبب الاصابه الل حصلتلى
على: اه هبه قالتلى
عبدالله: وطبعا مش هقعد زى الحريم ف البيت ..فقررت انى اعمل مشروع صغيره هناك ف المنيا وعاوزك معايا
على اتفاجئ: معاك ازاى وانت عارف ان انا مش معايا حاجه
عبدالله: متقلقش كده .. احنا هنفتح مكتب توريد واستراد فاكهه وخضروات والمكتب مش بعيد هنفتحه ف الشقه الل ف الدور الاول ف البيت بتاعنا يعنى مجرد اجراءات بس وانا كنت محوش قرشين مع المكافاه نظبطه ونبدء ع بركه الله
على : وانا هعمل معاك ايه
عبدالله: عيب عليك ياابن خالتى .. اكيد هتبقى شريكى انا مش بفهم ف الحسابات والحاجات دى انا ليا ف تخليص الاوراق
هبه دخلت وهى سمعاهم وطلعت من شنطتها مبلغ ملفوف ف ظرف : اتفضل
على : ايه دا
هبه:دا الفلوس الل كنت بتبعتهالى كل شهر من وقت ما سافرت مع نصيبك من ايراد الارض كنت بحطهم ف البوسطه لانى مكنتش محتجاهم ..عبدولى حبيببى مش مخلينى عاوزه حاجه
ادخل بيهم وربنا يرزقك ويرزقنا
على بيجمع : لكن ياجماعه
هبه: ملكنش يا على .. تعالى اقعد معايا ونبقى مع بعض بدل كل واحد ف مكان وبدايه جديده لرزق ان شاء الله خير علينا .. قولى حاجه يا جميله
جميله : ادوا على يفكر وهنرد عليكم
عبدالله: هستنى ردك وان شاء الله موافق
قعدوا شويا ومشيوا وقعد على وجميله يتكلموا وشويا وجميله اقنعت على نوعا ما .. ف يوم جميله اتكلمت مع هدى وهدى حكت ل احمد .. ففى يوم احمد كلم على وعزم نفسه ع العشا عند على .. جه واتعشى وهما قاعدين طلع ظرف فيه فلوس كتيره وحطه ع الترابيزه :
على : ايه دا
احمد: دا جزء من تمن المحل
على : وجايبه ليه هنا وهتبيع المحل ولا ايه ؟
احمد : علشان مينفعش يا صاحب عمرى تدخل مشروع من غيرى انا معاك معاك
على : مشروع .... انت عرفت انا لسه ..
احمد قاطعه: لسه ايه يا جدع ..ربنا فتحلنا باب جديد برزق حلال وانت لسه بتفكر .. انا مليش ف بيع الصينى والحلل وانت عارف من زمان ومفيش شغل وانت هتقضى عمرك سواقه كفايه بقى .. هكملك باقى الفلوس وناخد ميكروباص انا وانت وجيمى وام شيماء وشيماء وامها ونحتل المنيا ايه رايك
على : احمد انا مقولتش ليك علشان مش عاوز ادخل ف حاجه وتخسر فلوسك تانى بسببى
احمد: ايه الل بتقوله دا ياعلى .. احنا ع الوحشه والحلوه مع بعض وانت مخسرتنيش فلوسى ولا حاجه وبلاش عقده الذنب دى .. انا معاك قلتلك حتى لو لجهنم ومش هسيبك
على ابتسم: انت اجدع صاحب شوفته
احمد: وانت بخيل اوى فين البسبوسه الل قولتلى عليها
ضحك على : هاتوله البسبوسه هيفضحنى ... !
ابتدا عبدالله بتأسيس مكتب وعرض على ع محمد جوز اسماء انه يشتغل معاهم لان ظروفه كانت وحشه وحب يساعدهم ووافق واتنقل على وجميله واحمد وهدى ومحمد واسماء وعاشوا ف المنيا .. استمر الشغل فتره ومع الوقت اتظبط وبقى كويس نوعا ما .. ف الوقت دا هدى وجميله كانوا حوامل .. بعد فتره ولدوا وجابوا بنات .. على سماها "امل" واحمد سمى بنته"هدى" .. مرت سنتين وجميله حملت تانى وجابت بنت وسماها على " حياه " فكان كل الل بيسأله ع اسمهم كان بيقوله "جميله امل حياه على " وكان بيقولهم ان الاسامى التلاته بتحكى قصته ... بعد شغل محمد جوز اسماء مع على ف الشركه الجديده وضعه المالى اتحسن عن الاول ودا فرق معاهم كتير عن الاول وحسوا ان صبرهم جه بنتيجه ..
جمال بعد 4 سنين من انفصاله عن اخته وكان بيقاوح لغايه ما على اقنع جميله تكلمه وتسئل عليه ورجع الكلام بينهم وف مره نزل جمال زياره لمصر وزار جميله ف بيتها وشاف بنتها وفرح بيهم جدا وعرض ع جميله وعلى يرجعوا معاه ويشتغل هناك لكن الاتنين رفضوا يسبوا حياتهم ف مصر واستقرارهم وجميله قالتله" بيتى مفتوحلك ف اى وقت يا جمال وانا لما الظروف تتحسن وعرفت اجيلك هاجى ازورك ان شاء الله " ...
استمر شغل على حبه كويس وحبه نوعا ما مريح بس احسن بكتير ن الاول ... ففى عيد ميلاد جميله قرر يعملها مفاجاءه ف اتفق مع هدى وهبه واسماء ياخدوا جميله تختار فستان فرح وتقيسه ..اخدتها هدى وقالتلها انها عاوزه تشتريه لواحده قريبه احمد نفس مقاسها وفعلا خلتها تختار وتقيس .. راح على بعدها اشتراه وجهز قاعه .. وفى يوم عيد ميلادها الصبح صحيت جميله شافت بلونات قدامها ع السرير مكتوب عليهم "Happy Birth Day Gamila " عرفت انه على لانه كل عيد ميلاد ليها تصحى تشوف بلونه عاده مقطعهاش ..وشويا لقت بناتها داخلين ومعاهم شوكولاته وحضنوها " كل سنه وانتى طيبه يا مامى " فرحت اوى وباستهم وخرجت لقت الفطار جاهز ومعاه تورته وعلى ب ابتسامه" كل سنه وانتى معانا ".. ابتسمت جميله وفرحت وفطرت واخد على البنات ونزلهم عند هبه وطلب من جميله تلبس يروحوا مشوار لبست وهى مش فاهمه اخدها ع بيوتى سنتر ودخلوا وشافت الفستان الل اخترته ع مانيكان : ايه دا
على : انهارده عيد ميلادك..ملقتش مناسبه احلى من دى علشان اعوضلك اللحظه الل حرمتك منها .. انهارده مش عيد ميلادك بس لا وكمان فرحك .. يلا ياعروسه اجهزى عقبال ما اجهز
جميله مش مستوعبه من المفاجئه وشافت هدى جتلها هى واسماء :
اسماء: يلا يا عروسه وانت اطلع بره يا عريس
على : اخرتها كده ماشى
نزل على علشان يجهز وجميله مش مصدقه نفسها .. لبست الفستان وعملت الميكب وكان فستان محجبات .. واستنت على يجى واول ما على شافها بالفستان تلقائى عينيه دمعت وراح اتجاهها وبفرحه وسعاده :انا اتخيلت انى اشوفك احلى لكن متخيلتش هتكونى بالجمال دا كله
جميله بصت ل على وب ايديها مسحت دموعه : بجد مش عارفه اوصف الل حساه
على : انا اسف انى حرمتك من فرحه اللحظه دى علشان تحكيها لبانتك
جميله: بناتى حاسين من غير ما احكى بان ابوهم احسن اب ف الدنيا بعزيمته واصراره ومقاوحته واخدنا ف حضنه ومش فكر لحظه ف نفسه عنا
على باس ايديها: ربنا يخليكم ليا ويقدرنى اعيشكم ف سعاده
جميله: سعادتنا واحنا معاك
وابتدوا على وجميله عينيهم تدمع من السعاده
اسماء: ايه دا كده هنبوظ الدنيا يلا علشان المفاجاءه الكبيره لسه مخلصتش ..
اخدها على ونزلوا ركبوا عربيه وكان حاجز مكان on air ف الهوا الطلق اتفاجئت جميله ومش مصدقه بصت ل على :ايه كل دا
على : تعويض عن الفرح الل معملتهوش ليكى يلا بقى يا عروسه
وابتدت الزفه والفرحه وجميله كانت حاسه انها ف حلم وبناتها كانوا لبسين فساتين بيضا ووافقين معاهم وكان منظر يجنن ... خلص الفرح ورجعوا ع البيت وتانى يوم الصبح جهزوا وسافروا يقضوا شهر العسل ف الساحل ... نزلوا الفندق غيروا هدومهم وارتاحوا .. تانى يوم نزلوا بدرى ع البحر وجميله قاعده الابتسامه مش مفارقه وشها : على بجد مش مصدقه نفسى
على مسك ايديها باسها: دا ااقل حاجه اعملهالك اردلك بيها جزء من الل عملتيه معايا ..صبرك عليا واستحملتى ظروفى وكنتى معايا ف اى مكان وجتلك فرصه ترجعى لحياتك موافقتيش واتمسكتى بيا ..انا لو اطول اجبلك نجوم من السماء مش هقصر معاكى يا اجمل حاجه ف حياتى ياام بتانى
جميله: ربنا يخليك لينا يارب
مسك ايديها وبصوا ع بناتهم وهما بيلعبوا ع الشط :
قامت جميله تلعب مع بناتها وبص على عليهم هما التلاته وقال : "امل" من غيره الانسان ضعيف ..موجود دايما حوالينا من وقت ما اتولدنا لكن احنا بنستصغره وبنتجاهله برغم انه بيعمل معجزات وبيقولنا ب ارادتك وتصميمك هتوصل.. "حياه" لغز كبير ملوش حل غير المقاوحه ..الحياه مليانه فرص ودروس نتعلم منها وطرق اختيارنا الل بيحدد مصيرنا .. "جميله" نتيجه كل حاجه عملتها خير وصح ف حياتك ربنا بيكافئنا بيها علشان نحس ان تعبنا مش كان ع الفاضى ..."جميله" هى حياتى وشريكتى ومستقبلى ...
جميله بصت ل على : على يلا تعالى نتمشى انا وانت والبنات ع الشط
على قام: جى اهو
ومسك على وجميله بناتهم وامشوا ع البحر وكملوا مشوار حياتهم ..!
__________________________
ودى كانت نهايه حدوتنا.. توتا توتا حلوه ولا ملتوته
عارفه انها ملتوته
اصلى رغيت كتير 
مستنيه رأيكم اجمالى عن القصه ايجاب او سلب
________________
القصه بالاحداث والشخصيات والمواقف والبلاليين والشوكولاته والبهدله والفرح والعياط واحداث اخر حلقه كلها كل دا حصلت حقيقى من (10 سنين )
يعتبر القصه اتنقلت بالظبط بنسبه 70% و 30% التاتش بتاعى
والل حكالى القصه دى هو "احمد" بذات نفسه لان دا الوحيد الل اعرفه فيهم والحاجات الل ميعرفش تفاصيلها انا كنت بحط التاتش بتاعى (30%) وبطلق العنان لخيالى وارغى زى ماانتم شوفتوا
صور ل الاشخاص او حتى احمد نفسه دى صعبه جدااا
كنت هجيب صوره احمد لكن ظروفه العائليه لا تسمح مراته بتغير وكدهون
اتمنى انى عرفت انقل تجربه حصلت وبتحصل كتير دلواقتى وساعدت حد يفهم حاجات كتير
وخرجتوا من القصه بافاده ...
بشكر كل واحد وواحده استحمل وصبر معايا لمده 27 حلقه
واستحمل التفاصيل ورغىوبشكركم جدا جدا جداااا ومهما قولت مش هوفيكم حقكم بجد
ان شاء الله القصه الجايه مش دلواقتى خالص خااالص انسووووووووونى
ادونى وقتى ارتاح
__________________________
المغزى من القصه
________________
1_البساطه ..كل ما تكون بسيط ف حياتك حياتك هتكون اجمل
2_متقارنش حياتك بحياه غيرك لان غيرك كتير بيتمنى حياتك
3_القناعه والرضا بحياتك نعمه لو حسيتها بجد هتفرق معاك كتير
4_الاهل ..
عامل اساسى ف تكوين نفسيه اولادهم احتواءهم والاهتمام بيهم بيفرق كتير ف شخصيتهم .
5_الاخوات
مش شرط يكونوا شبهه بعض الاسم المشترك واحد لكن الشخصيات مختلفه "البطن قلابه"
6_ ساعد غيرك لو محتاج مساعدتك مش لازم يتكلم علشان تحس
7_الفلوس مش كل حاجه ..الفلوس وسيله لحياه مش شرط الحياه
8_الولد بالنسبه لــ اخته سندها وضهرها وحمايتها بعد ابوها وقبل جوزها .. لو قصر اتجاهها ميستغربش لو لقى الغريب طمعان فيها وبينهشها .. احتوى اختك واحميها هى مش محتاجه منك غير اهتمام وسؤال مش طالبه منك تديها من الفلوس كام
9_ شوكولاته .. ورد .. بلونه.. كتاب ..
حاجات بسيطه بس معناها اكبر وخصوصا لما تكون من شخص بنحبه
10_ مهما الدنيا خبطت فيك ونكدت ع نفسك وقلت مش قادر يارب ..اعرف ان فى غيرك حاله انيل منك وعايش راضى وبيقاوح وابتسمته ماليه وشه وبيقول يارب
11_الازمات ف حياتنا بتعرفنا مين الشخص المخلص ومين المجامل ..مين الل بيحبنا بجد ومين الل مش فارقين معاه .. اتعلم من ازمتك ومتستناش حد يعلمك
12_الصحاب .. مش بكترهم ممكن صديق يغنى عن الكل وممكن صديق يضرك و يبعدك عن الكل ..اختار صاحبك الل يساعدك ووقت الشده جنبك وف مشكلتك يدورلك ع حل ولو غلطت ينبهك ولو عاوز تعمل حاجه يمسك ايدك ويشجعك .. ابعد عن الصاحب المنظر بيبقى منظر من غير اثر
13: خلى عندك مبدء ف الحياه ثابت ميتغيرش لان دا الل بيكون شخصيتك ولو المبادئ اتغيرت بتتحول من انسان لكائن هلامى الشكل ملوش ملامح
14_الحياه مش سهله ومطباتها اكبر اختبارتها .. كل ما تقع قاوح وقوم تانى
ومتديهاش الامان اوى لانك متعرفش من اى اتجاه هتجيلك الضربه
15_ الاصرار والعزيمه انك توصل لهدفك..
مهما قابلت عقوبات مفيش مستحيل لان دايما ف حلول وسكك متستسلمش
16_قبل اى قرار ادى نفسك فتره تفكير ومراجعه قبل القرار لان مهما كان قرارك انت الل هتتحمل نتيجته سواء بالايجاب او السلب
17_ اسمع نصايح الل حواليك ودا مش معناه انك غلط وهما صح لا اسمع ممكن رائيهم يوضحولك حاجه مش شايفها ..ياكدولك رائيك ..او تفهم شخصيته الل قدامك
18_بر الوالدين نعمه ربنا ع الارض لانهم اكتر اتنين مش محتاجين منك حاجه غير انك تكون كويس .. متبخلش عليهم بسؤال او هديه بسيطه لانهم لما بيروحوا بياخدوا روح الحياه معاهم ..
19_اعرف دايما ان مهما غلطت هتدفع تمن غلطتك سواء وقتها او بعدها .. ومينفعش تصلح غلط بغلط تانى ... واجهه الغلط بالصح و متستسهلش الغلط لان تمنه بيبقى صعب وتقيل ..
20_
البنت لما بترتبط بالولد بيكون ليها زوج واب واخ وصديق والولد لما يرتبط بالبنت بتبقى ليه ام واخت وبنت وصديقه لو طرف فيهم قصر اتجاه التانى يبقى العلاقه ف طريق الفشل
21_ لما تحب وتتحب دى احلى حاجه ف الدنيا بعيد عن كلام الاغانى والافلام ..واعرف انك بتحب وبتتحب من الافعال اكتر من الكلام
22_ متستغلش حب الطرف التانى ليك وتستنزف مشاعره وحبه لانه ممكن يتعب ويسيبك وميرجعش تانى
23_قرار الارتباط "الزواج" قرار مصيرى ملهوش علاقه بفرحه الفستان ولا بمكان الفرح ولا هروب من كلمه عانس ولا هروب من تجربه فاشله او حياه يأسه .. الزواج بيكون قرار انك عاوز تعيش مش تدفن نفسك بالحياه علشان ترضى كدبه كدبتها ع نفسك او مجتمع ..
الزواج حياه مشتركه بين اتنين فى الوحش قبل الحلو ..الاتنين عاوزين علاقه ناجحه مش طرف بيحارب والتانى طراوه
24_ فشلك ف علاقه حب اى كان الاسباب مش نهايه الدنيا .. هتتاثر وهتتوجع وهتتألم .. دا لانك كنت صادق خد فترتها وفوق لنفسك و متستسلمش لوجعك دا .. متعرفش ايه هيقابلك
25_قرارك ان هترتبط بشخص سواء عاطفى او رسمى دا معناه انك قابله بكل ما فيه الوحش والحلو شيله واحده وهو قابلك بكل ما فيك
26_ الارتباط ف النور احلى كتير عن الضلمه
27_ الحلال مش الصح والغلط ..
الحلال هو قرار انك تخلى حياتك حلال فلوسك حلال علاقاتك حلال قراراتك حلال
28_الاحتياج مش احتياج مادى بس ..
الاحتياج العاطفى تاثيره اقوى ع الانسان وبيكون محتاجه اكتر
29_ انك تقابل شخص يشجعك ع الغلط سهل لكن انك تقابل شخص يساعدك تصلح الغلط ف دا صعب .. متعتمدش ع حد وكون ميزان نفسك وبوصله نفسك ف حياتك
30_ متحكمش ع حد غير لما تعامله .. دايما المظاهر خداعه واحنا بشر مش ملايكه
31_ تكرر الغلط ف حياتك دا دليل ع انك مبتتعلمش من اخطائك مش ان الظروف الل عملت كده
32_ الفرص بتجى بااستمرار ف فرص بتصلح وف فرصه لبدايه جديده وف الحالتين لو ملحقتهاش انت الخسران لان ف فرصه لما بتروح مبترجعش زيها ..استغل الفرصه واكسبها ومتخسرهاش لان الفرصه بتجيب فرصه تانيه
33_ كل انسان اتولد صفحه بيضا لكن الظروف هى الل بتكون شخصيته ..
34_ المطلقه او الارمله ليها حق زيها زى البنت هى انسانه ربنا خلقها ليها حقوق متحكمش عليها وتبقى جاهل واعمى زى المجتمع
35_مش بالمكان تحدد انبساطك .. ممكن تقعد ف مكان غالى تبهر لكن متنبسطش وممكن تقعد مع حد بتحبه ع الرصيف وتحس انك ف عالم تانى
36_ السعاده مفهومها بسيط .. الرضا .. القناعه.. استغلال المتاح ليك من غير الطمع ف الل مع غيرك ..الاجتهاد والاصرار
37_اختيار شريك حياتك مش شرط الاساسى يكون الحب .. الاهم منه التفاهم والاحترام والتقدير والاحتواء ان اتجمعوا دول هتطلع بنتيجه هى الحب
38_الحياه كده هتعيشها كده هتعيشها ف اختار طريقك فيها وقاوح لان مفيش حل تانى
39_المصارحه بين اى اتنين .. مهما كانت الكدبه صارح به الطرف التانى لان مهما طالت الايام صدفه واحده او موقف واحد يكشف كدبتك وبسببها تخسر شريكتك
40_ كل انسان ليه حق ف فرصه تانيه لكن قراره هو الل هيحدد اتجاهها
41_ الغربه .. هى كلمه حروفها قليله لكن تاثيرها واحساسها ولا كلام الدنيا تكفى .متستسهلش ان فلان مسافر يبقى الحياه بيس .. متعرفش انت ظروف الل سافر دا ولا احتياجه ايه
42_ الل بيسافروا يشتغلوا بره اغلبهم مش بيقعدوا ف تكييف وبيقبضوا بالدولار ف ناس بتشقى طول اليوم وبتحرم نفسها من حاجات علشان تبعت قرشين ل اهلهم متحكمش لمجرد انك شوفت جواز سفره لان كتير جواز سفرهم بيبقى تأشيره لخروج من البلد والخروج عن حاجات كتير الله عالم بيها
43_ ان غلطت والل بيحبك عدهالك مره دا معان انه بيحبك ومش عاوز يخسرك مش معناه انه مهما غلطت هيعدهالك لان تكرر الغلط هيخليك تخسره اكيد
44_الحب الاول مش دايما هو الحب الاخير ..الحب الاول درس يا تنجح فيه وتكمل يا تسقط وتدخل امتحان تانى ومش معنى سقوطك فيه يعنى الدنيا انهارت لا بالعكس دا بيبقى درس تراجع فيه نفسك وتشغل مع قلبك عقلك وتعرف تفكر وتقرر كويس .. واعرف كويس انك عاجلا او اجلا هتلاقى حبك الحقيقى متستعجلش
45_ مع كل نهايه .. بدايه جديده متستسلمش
رغيت كتير
اشوفكم القصه الجايه فى امان الله وحفظه
ليست هناك تعليقات:
إرسال تعليق