وجه وقت امتحانات اخر السنه وفاطيما وماريا وسلمى وخالد ومعتز وعماد كلهم مشغولين ف امتحانتهم ... فاطيما ف البيت كانت هى واخوها محمد بيمتحنوا هى اول سنه ليها ف الكليه وهو سنه 3 ثانوى .... كانت بتذاكر فاطيما وخرجت من اوضتها شويا كالعاده تدور ع حاجه تاكلها شافت نور اوضه محمد اخوها والع فمشيت اتجاه الاوضه وخبطت ودخلت ...
فاطيما بنبره هاديه : حماده ...
محمد مردش ...
فاطيما بصوت اعلى سنه : حمااااااده
محمد مردش ....
فاطيما بتكلم نفسها : هو مبيردش ليه ليكون من كتر المذاكر الواد فطس .. هو طاحن نفسه ليه كده انا مش عارفه يا ناس ....
قربت منه فاطيما وخبطته ع كتفه وبنبره عاليه: حماده
محمد اتفز: فى ايييييييييه خضتيتنى داخلله تتسحبى ليه كده
فاطيما اتخضت : فى ايه يا واد . يهدك خضتنى هتقطع نسل طيما كده وبعدين انت كنت بتخترع الذره وانا معرفش
محمد: عاوزه ايه يا فاطيما ..
اخرجى علشان بذاكر ومركز متفصلنيش ..اخرجى
فاطيما حبت تهز تخرجه من الجو : مالك ..هو انت مش مذاكر كويس ..عادى يا حبيببى غش ..الغش لناس الل حالتنا يجوز يا بيبى
محمد بصلها بنظره غيظ: اغش ... فى اخت تقول لاخوها غش بدل ما تقوله ذاكر
فاطيما بتضحك: ماهو علشان انا اختك بقولك كده ومش كل الناس اختهم طيما ..انت معاك كنز لا يقدر بمطعم .....وبعدين دا انت محظوظ هتمتح والدنيا كده ثوره ومحدش مركز انا بجبلك الاخر غش ومحدش هيقولك حاجه .. وهتشوف الل هيغش ومذاكرش هيجيب مجموع اكبر منكوهتقول طيما قالت فبلاش تتعب نفسك اوى كده خدها نصيحه من ناس خبره
محمد: متشكر ياعم الخبره
فاطيما : يا واد انا خايفه على صحتك هتتطحن نفسك ف مذاكره واحتمال كبير تحصلنى ف حقوق
محمد : نعم يااختى ودا من ايه انا مجموعى ف تانيه اكتر من مجموعك فى تانيه وتالته ..ادخل حقوق ليه ؟
فاطيما : يا حماده يا حبيبى انت امل البيت دا ..مش املهم ف الثانويه .. نيفر ايفر ... املهم ف المستقبل واسم العيله داانت الزغلول بتاعهم ..هتتعب نفسك ف مذاكره وهدت حيل وهتتعب وهنصرف عليك علاج وادويه وياعالم هنلاقى الل ترضى بيك بعد البهدله دىوتتجوزك ولا لا وتقعد فى البيت
محمد متنح لفاطيما وفاطيما حست انها اوفر
محمد: طيما انتى عاوزه ايه ..دخلتى هنا ليه
فاطيما حست انه فعلا مش نافع معاه هزار من كتر تركيزه : كنت هسألك تحب اعملك سندوتشات حلاوه بالفسدق ولا حلاوه بالشيكولاته
محمد: خدى انتى الحلاوه واخرجى مش عاوز
فاطيما بهزار : ولا حته صغننه
محمد: انتى موركيش مذاكره
فاطيما: دا الرست .. كل نص ساعه رست هموت نفسى ولا ايه
محمد: وانتى الصادقه كل نص ساعه سندوتش ..
فاطيما حطت ايدها ع بطنها: فكرتنى ليه اروح اعمل السندوتشات جوعت اوى
محمد: انا كان رائ تدخلى تربيه منزليه طبيخ واكل
فاطيما:تصدق فاتتنى دى لو سقطت احتمال احول
محمد بصوت عالى: يخربيت طفستك اخرجى اخرجى
فاطيما : خارجه اهو .. يلا ذاكر ايها الطالب النجيب يا فشخره العيله المستقبليه يا زغلول العيله
كان محمد هيحدفها بكتاب جنبه جريت فاطيما وخرجت من الاوضه ..فاطيما: هو الخسران هعمل نصيبه واخده معايا ف الاوضه ماهو نصيب اخويا يبقى نصيبى ... يلا يا طيما .......!!
وابتدت الامتحانات اخر السنه وسط توتر بسبب قله المذاكره والاحداث اللى حصلت وكان بسبب خوف وقلق الاهالى فكان ابو فاطيما وابو ماريا بيودوهم كليتهم ويرجعوا ياخدوهم كل امتحان وكانوا الكل بيطمنوا ع بعض ع الجروب واخبار كل ماده وكان شعار فاطيما بعد كل امتحان لما حد يسألها
"لا تسألنى من انا " ومحدش فاهم هى عملت ايه ...!!!
وابتدت اجازه الصيف بعد الامتحانات فاطيما ومحمد ..وفاطيما مستسلمه ولا ف دماغها لكن محمد اخوها قلقان ... وجه يوم ظهور نتيجه محمد
فاطيما: متقلقش يا حماده ناجح وقلتلك مكانك محجوز مكانى ف حقوق
راح حدفها بمخده كرسى الانتريه ...محمد: بس يا فاشله
محمد وهو قاعد قدام الكمبيوتر النتيجه ظهرت ..
محمد بقلق : النتيجه ظهرت ..
مره واحده فاطيما قامت زقته بقوه وقعدت مكانه ..
فاطيما: انا ندراها اشوفهالك انا
محمد بيزقها : قومى هشوفها انا
فاطيما بتزقه : والله ما هيحصل داانت الغالى الزغلول ياواد
مامتهم : اخلصوا حد فيكم يشوفها
جددتهم: ربنا يكرمك يا محمد ياابن جيهان
فاطيما بصت ل محمد: انا الكبيره ..هشوفهالك بس بشرط
محمد: خير
فاطيما: لو جبت مجموع الل انت عاوزه او معنى اصح دخلت هندسه تعزمنى ع كنتاكى كومبو وتشتريلى علبه شيكولاته جلاكسى واسبوع تشربنى فيروز ع حسابك وقت ما اعوز
محمد: ياطفسه
فاطيما :ها موافق انت ع قلبك اد كده انا عارفه
محمد : ولو ااقل
فاطيما: اممم ككفايه الكومبو واتنين كانز فيروز اناناس
محمد: برضه ..اخلصى طيب
فاطيما: بيس
وفتحت فاطيما وشافت النتيجه ونجح وجاب 98.4 % قامت مامتهم زغرطت والجيران طلعوا يهنوا فاطيما مسكت محمد من راسه : مبروك يا زغلولى مبروووك ...عارف لو مجبتليش الل قلت عليه هتلاقينى مشردالك ف الشارع وع الفيس انك كنت بتبرشم وهصور ورق وهقول كنت بتاخده معاك ...
محمد بصلها: اختى وواطيه وتعمليها حاضر ..انا هكلم بابا اطمنه وهنزل لعيال
فاطيما : طير يا كومبو وتعالى بالجلاكسى طير .....فى نفس اليوم بليل فاطيما كانت قاعده مع محمد وبيتكلموا وبياكلوا بعد ما اشترالها الكومبو والحاجه الساقعه ....
فاطيما: مقولتليش اصحابك عملوا ايه
محمد: تصدقى الواد عبد الله الفاشل جاب 88% دا كان ميح ميعرفش حاجه ودخل دور تانى ف تانيه وعدى تالته صافى من الغش اكيد ...والواد مصطفى برضه ..انا اتفاجئت الكل نجح وبمجاميع ..
فاطيما بتضحك: يا ولاد المحظوظه ..مش قلتلك غش تجيب مجموع اهو هتلاقيهم داخلين كليات وهما مش فاهمين يعنى ايه مدرج مش بعيد يفتكروه قاعه سينما
محمد ضحك: والله ما بعيد
فاطيما: والله حاجه كويسه اهو يفرحوا الناس بحاجه شويا بدل النكد الل احنا فيه من وقت الثوره والناس الل بتموت ...
محمد: الحمد الله الواحد فلت منها ع خير
سكتت لحظه وهى بتاكل فاطيما :ياخساره فيها ايه لو كنت سقطت وعدت السنه كان زمانى جبت مجموع اتفشخر بيه اكتر
محمد: مكنش اللاب جه يا فالحه
فاطيما: اه صح ... وبعدين ماشيه معاك ياعم .. للاب جديد وموبيل جديد هتلعب معاك يااسطى
محمد: تانى يااسطى تانى ..دانتى لسه مخلصتيش اكل من اللى جبتهولك
فاطيما : خلاص خليها زغلول ينفع
محمد قام وعمال يخبط طيما بالمخده وفاطيما بتعض فيه ...!!
مرت مده والنتيجه الكليات طلعت والكل نجح.. فى يوم كانت فاطيما فاتحه نت وكانت ف الجروب مع اصحابها الموجودين وشويا بقى كل واحد مشغول ف الخاص بتاعه .. معتز دخل كلم فاطيما خاص
معتز: بتعملى ايه
فاطيما: باكل اتفضل
معتز بيضحك : لا بجد
فاطيما: والله ما بهزر فعلا باكل جبت طبق من العشا اكمله هنا وبقلب فى الاخبار بشوف الدنيا بره فيها ايه
معتز: الف هنا ...واضح انك ملقتيش حاجه حلوه
فاطيما: بسبوسه فى التلاجه
معتز: ايه ?
فاطيما: هو دا الحلو لو تقصده ولو مقصدوش انا اقصده
معتز: ثوانى
قام معتز وبعد 10 دقايق رجع واتكرر الحركه دى كذا مره
معتز: كنا بنقول ايه
فاطيما: هو انت مشغول فى ايه كل شويا تقول ثوانى كده
بتخترع القنبله النوويه ولا عليك مراقبه
معتز: لا يا لمضه ..انا مش فى البيت اصلا
فاطيما:ايه دا اطردت من بيتكم
معتز بيضحك: ههههههه يخرب عقلك لا قاعد فى انترنت كافيه
فاطيما: ليه يابنى تصرف بره وانت عندك فى البيت تقعد براحتك
معتز: لا مش بصرف داانا هاخد فلوس كمان
فاطيما: هتاخد فلوس ...ليه هتعمل ايه ..اوعى تكون هتشتغل فى قله الادب اه حال البلد واقع بس مش لدرجه الانحراف اوعى
معتز بيضحك: يخربيت فقرك ... هو انتى معندكيش احتمال انى اكون بشتغل فيه لازم الافكار الشيطان دى
فاطيما: اوووبس سورى .. ظلمتك
معتز: دا الطبيعى بتاعك
فاطيما: بس ليه انترنت كافيه ..انت خريج تجاره
معتز: ع اساس ان كل خرجين التجاره شغالين وحياتهم زى الفل
فاطيما: اومال بيعملوا ايه ..بيعلقوها ف الصالون
معتز: لا بيحطوها تحت المرتبه ..انتى متفائله اوى يا طيما
انا اصلا مستنى الشهاده اخدها واشوف موقفى من الجيش وهخلع ع بره
فاطيما: متخليك جوه ياعم الطفشان
معتز: بالعقل كده .. فى الاول علشان عاوز تشتغل يبقى بكوسه ووسطه تظبطك دلواقتى والبلد متنيله كده لو معندكيش واسطه محترمه ومضمونه هيتنصب عليكى فالواحد يخرج بره يتعامل مع الاغراب ع الاقل هما هيكونوا محتاجين شغل وانا محتاج فلوس يعنى خد وهات ..من غير مفاصله وحاجات كتير
فاطيما: دا انت مرتبها بقى
معتز: انا يا فاطيما بشتغل وانا ف الكليه مكنتش بقعد برغم انى مش محتاج بس حبيت يبقى معايا فلوسى ومعتمدش ع بابا والمصروف والحمد الله خبطت ف كام شغلانه كانوا بيجيبوا مصاريفى وفهمت ان الحياه العمليه غير التعليم.. التعليم فى بلدنا شهاده بس علشان نتفشخر بيها ... وميتقلش عليكى جاهله برغم ان ممكن تلاقى حد معاه ماجستير ودكتوراه وفرحان بالدرجه العلميه لكن جاهل فى محتواها ..هو اخدها علشان يتقاله يا دكتور قبل اسمه ..
فاطيما: ايه التشائم دا انا مكنتش فاكراك كده .. انت بتتكلم صح لكن الاستسلام لواقع مش صح ... كل واحد لو اشتغل بذمه وضمير الدنيا هيتصلح حالها ... فلو كل الل فى مصر سافروا بره مين اللى هيشتغل فى مصر ..الحراميه هنسيبهالهم .. اومال ثوره ايه وبتنجان ايه الل قامت وشباب مانوا علشان الحال يتصلح .. ا
معتز: الاغلبيه العظمى كده ع الواقع .. والكويسين مش باينين ومنهم حظهم مش مساعدهم وتلاقيهم لو خرجوا بره بيلاقوا نفسهم ...
فاطيما: علشان كده هتطفش ع بره
معتز: انا هشوف هنا لاقيت حاجه كويسه ومناسبه ليا تمام ..
ملقتش يبقى الطفشان هو الحل
فاطيما: ربنا يكرمك بالاحسن..بس متنسناش بقى
معتز: مقدرش اكيد انساكى..انتى بقيتى حد مهم عندى يا طيما
فاطيما لاحظت انها كانت جمعت الكلمه وهو وجهلها هى الكلمه فمركزتش
معتز: ثوانى
فاطيما: لا براحتك انا هقوم دلواقتى
معتز: هتفتحى امتى تانى
فاطيما: فى ميعادى هتلاقينى طول الليل اونلاين
معتز: هستناكى ..لااله الا الله
فاطيما : سيدنا محمد رسول الله
قفلت فاطيما مع معتز وراجعت كلامه لاقت انه معاه الحق بنسبه كبيره ف كلامه وعجبتها دماغه العمليه وانه مش هيستسلم لظروف وانه بيقاوح علشان يوصل وشغال ف الكافى انترنت برغم نقده لوضع البلد حست انه بيقاوح ودا قليل فى بعض الشباب الخريجين ....
فى يوم ماريا راحت الكنيسه وراحت الجمعيه تبع الكنيسه متطوعه لنشاط خيرى للايتام او مستشفى صغيره لعلاج المحتاجين ..وكانت بتقضى اغلب ايامها هناك كتطوع لاحظت ماريا يومين عماد مش بيظهر لا فى الكنيسه ولا الجمعيه ...فى يوم راحت ماريا وقعدت ف الحديقه وكانت بتدور ع عماد ومش لاقته اتصلت ع فاطيما ومردتش وكانت بتنفخ .. راحت مسكت الموبيل تفتح نت واتكدرت من الاخبار .حست بحد قعد جنبها بصت لاقته عماد وع وشه ابتسامه
عماد: مساء الخير
ماريا باابتسامه عريضه: عماد....مساء الخير
عماد: ايه الاخبار
ماريا: تمام .. انت فينك اليومين اختفيت فاجاءه
عماد: كنت محتاج افكر فى حاجه واخد قرار
ماريا: خير
عماد باصص ل ماريا بتردد: ماريا انا كنت عاوز ..
ولسه هيكمل كلامه رن موبيل ماريا وكانت فاطيما ..
ماريا بملامح غيظ فى سرها وهى باصه لموبيل: يعنى دا وقتك
ماريا بصت لعماد: ثوانى ممكن
ردت ماريا ع الموبيل: طيما ..حبيببتى
فاطيما: انا فقدت الامل انك هتردى انتى فى الجمعيه ولا الكنيسه حددى مركزك
ماريا: ف الجمعيه
فاطيما:طيب وانتى راجعه ابقى اشحنيلى لان حماده مش هنا وانا شايله الشقه ومش هعرف انزل
ماريا بتحاول تنجز: حاضر يلا سلام
فاطيما: متاخريش الشحن علشان عاوزه ارن ع سلمى مدخلتش نت
ماريا: حاضر مش هتاخر
قفلت ماريا ورجعت بصت ل عماد: ها كنا بنقول ايه
عماد : انتى مشغوله هتمشى دلواقتى
ماريا بسرعه: لالالا دى فاطيما صاحبتى او معنى اصح اختى احنا متربين سوا طلبت اشحنلها وانا راجعه ع البيت مش ضرورى يعنى
عماد: فاطيما البنت اللى دايما بتجيلك الكنيسه والجمعيه وتخرجى معاها
ماريا باابتسامه : قدرى اللى مش ينفع اهرب منه
عماد: كويس ان صاحبتك الانتيم مسلمه ?
ماريا بااستغراب : ودى فيها ايه ..غير كده علاقتى بفاطيما مش بنحددها هى مسلمه وانا مسيحيه احنا زى ما قلتلك اخوات ومتربين مع بعض .. الوطن لجميع والدين لله
عماد بااستغراب : اتمنى تكون هى كمان بتفكر زيك
ماريا بملامح جد : انت لو عرفت فاطيما هتحبها اووى وهتلاقى كل اللى قلته دا فيها هى بتعامل الناس لنفسهم بعيد عن ابوك مين ولا دينك ايه .. بيتنا وبيتها واحد مفيش فرق بين البيتين وعلاقه اهلنا علاقه قرايب ..اختى بقولك اتمنالها الخير قبلى لانى واثقه انها بتتمنالى الخير قبلها ..علاقتنا ببعض علاقه ربنا خلقنا والعلاقات الل ربنا خلقها صعبيحصلها حاجه
عماد: بجد مبسوط من علاقتك بيها متزعليش من كلامى
ماريا باابتسامه:لما تعرفها وتقربلها هتحبها اكتر طيما دى عشقى وسلمى احنا مثلث ومفيش زعل
عماد: تمام
ماريا باابتسامه: انا هعملك ادد ف الجروب معانا وتشوف معاملتها ازاى ومعاملتنا كلنا ازاى مع بعض بجد هتحبهم اوى
عماد: اوك مفيش مشاكل عندى
ماريا : صحيح انت كنت مختفى فين
عماد رجع لتوتره : ماريا ممكن اعزمك على حاجه ساقعه الجو حر
ماريا لاحظت عماد متغير : اوك
عماد قام وقف: 5 دقايق وراجع
قام عماد بسرعه وبياخد شهيق زفير علشان يتشجع فى كلامه وفعلا متاخرش ورجع ومعاه اتنين كانز بيبسى وفتح علبه ماريا وادهالها
عماد: اتفضلى
ماريا باابتسامه: ميرسى ..
برضه مقولتليش كنت مختفى فين وقرار ايه اللى اخدته
عماد اخد نفس وبص ل ماريا: انتى عارفه انى خلصت بكالوريوس تجاره وانا وحيد امى وبابا متوفى وبفكر افتح مشروع صغير مؤقتا لغايه ما الاقى وظيفه مناسبه
ماريا: اه ..ربنا يوفقك
عماد اخد نفس : وطبيعى مش هعيش باقى حياتى لوحدى
ماريا: اه طبعا
عماد: ماريا
ماريا بصتله: ايوه
عماد: تشاركينى حياتى
ماريا تنحت: ها
عماد استغل فرصه وهى متنحه مذهوله: احنا بقلنا 3 سنين ف الجمعيه والكنيسه وشوفتك ومن اول يوم اتشديت ليكى وكنت حابب اتعرف عليكى عن قرب ومستنى الفرصه لكن مكنتش عاوز اديكى وعود انا مش ضامنها .. فقررت مفتحكيش غير لما اتخرج واحدد انا هعمل ايه
ماريا متفاجئه : عماد انت تقصد مش فاهمه
عماد قاطعها: ماريا انا عاوز اروح اقابل باباكى واتقدملك
وقلت افاتحك علشان لو انتى رافضه محركيش ولا احرج نفسى
ماريا وقعت من ايديها الكانز ومذهوله: عماد
عماد مسك ايديها: ياريت توافقى تكونى معايا
ماريا مش مصدقه اللى شايفاه ولا اللى سامعاه
عماد باابتسامه: موافقه
ماريا تلقائى هزت راسها باابتسامه ...عماد: بحبك
خلصت ماريا كلام مع عماد وبسرعه رجعت ع البيت وقبل ما تدخل عمارتهم راحت ع فاطيما
فى الوقت دا فاطيما كانت لابسه ترينج التنضيف ورابطه راسها باايشارب رابطه الخدامين وبتنضف مروحه السقف وكانت مشغله اغانى منير وكانت جددتها بتنضف النيش ومحمد اخوها كان فى اوضته
واشتغلت الاغنيه وكانت (شئ من بعيد لمنير )
فاطيما غنت الاغنيه ع طريقتها وكانت كالاتى :
اول ما ابتدت الاغنيه وقفت وندهت ع جددتها : توحا
جددتها بصتلها : ايوه
فاطيما مع كلمات الاغنيه بصوتها وبطريقتها : شئ من بعيد ندااااااانى ..وقالى يا طيما تعاااالى وجرالى ما جرالى ... (جددتها بتضحك ) كملت فاطيما : مش بايدى يا توحا ..دا مش بايدى يا توحا ... (ابتدت ترقص وبصت ع يمينها ) نادانى من يمينى ولسه بينادينى وبيقولى يا طيما حصلينى ع بلد العجايب ...يالهوووى (بصت ع شمالها ).نداانى من شمالى قال ايه المهر غالى ..تعالى قوام تعالى خدى من الحب نايب (راحت حضنت جددتها : هو دا الحب كله
ورجعت فاطيما تكمل رقص وغنى ع طريقتها..خرج محمد ع صوتها : منير لو سمع صوتك والل عملتيه ف اغنيه كان حبسك ...
فاطيما بصتله حدفته بحته القماشه الل فى ايديها جرى ودخل اوضته تانى ... والاغانى شغاله طلعت ع السلم تنضف مروحه السقف ..كانت ميمى وصلت طلعت وقعدت ترن الجرس وفاطيما كانت مشغله اغانى لمنير بصوت عالى ..
راحت مامت فاطيما فتحت الباب : ميمى فى ايه هتبوظى الجرس
ماريا مش مجمعه نفسها: طيما فين يا طنط فين
مامت فاطيما: اهى متشعلقه ف المروحه
راحت ماريا اتجاه فاطيما ومسكتها من رجليها : انزلى عاوزاكى بسرعه بسرعه
فاطيما قفشت ف السلم: يهدك هقع يابت فى ايه
ماريا بتوتر: بسرعه انزلى
فاطيما اتخضت ونزلت ودخلوا اوضتهم وقفلت الباب
فاطيما بقلق: فى ايه
ماريا شدت فاطيما وقعدتها : عاوزاكى تركزى معايا واسمعينى
فاطيما : فى ايه انجزى انتى شايفه ورايا مسح وفرش و..
قاطعتها مارياوباابتسامه كبيره: عماد عرض عليا الارتباط وعاوز يتقدملى رسمى
فاطيما تنحت : مين .. ايه ..ايه
ماريا من الفرحه : عماد طلب منى يقابل بابا ويتقدملى يا طيما
فاطيما من الفرحه صرخت .. مامتها دخلت اتخضت: فى ايه
فاطيما : مفيش مفيش اخرجى يا جيهان مش وقتك خالص
مامتها: والعك الل بره دا
فاطيما: هتلاقينى ماكنه ببطاريه 1000 فولت دلواقتى وهخلصهالك يلا بقى
خرجت مامت فاطيما ورجعت فاطيما قعدت قدام ماريا وحكتلها ومن الفرحه ماريا كانت بتتلغبط
فاطيما بفرحه: عماد دا برنس .. والله برنس وانا اللى كنت فاكراه تلاجه
طلع بوتجاز 6 عيون وشوايه وفرن بيعمل احلى الطواجن والاكل
ماريا: يخربيت تشبيهك .. بجد انا فرحانه ومش مستوعبه خالص يا طيما
فاطيما حضنت ماريا : واخيرا يا موزتى هتفتحى الخط عقبال سلمى وخالد ينطق
مامت فاطيما من بره : طيماااااااااااااااااااا ابوكى قرب يرجع من الشغل
فاطيما : دا وقته ... بت يا ميمى انتى وراكى حاجه
ماريا: لا انا كنت راجعه ع البيت وعديت عليكى
فاطيما كلمى امك وعرفيها انك هنا وغيرى وحصلينى نخلص الشقه دى ونقعد براحتنا
ماريا بسعاده: اشطه
وخرجت ماريا وفاطيما وابتدوا ينضفوا وواحده تمسح وع اغانى منير كل شويا يرقصوا الاتنين ومحدش غيرهم فاهم مالهم ...
مامت فاطيما ل توحا: البنات اتهبلت ربنا يشفى
توحا باابتسامه: ربنا يسعدهم ويفرحهم دايما دول فرحه البيت
واستمرت حفله الرقص والتنضيف واستحموا وغيروا ودخلوا اوضه فاطيما وبعتوا لسلمى تعرف اخر الاخبار ومكنتش موجوده شويا ونزلت ماريا راحت شقتهم وفاطيما كانت فاتحه نت ودخلت سلمى وعرفت الخبر :
سلمى: بتحكى بجد
فاطيما: يابنتى الموضوع طازه وكلمتها من شويا لاقتها اتكلمت مع مامتها
وباباها وحددوا الخميس هيجى عماد يتكلم معاهم لوحده الاول ..ميمى لو هتموت دلوقتى هتموت من الفرحه انتى مشفتهاش ..عماد فعلا برنس خطط ورتب ونفذ مش زى ناس مقضينها تلميح
سلمى بالرغم انها فرحانه لميمى بس زعلت ع حالها اللى مش مفهموم فكتبت : ربنا يفرحها دايما
لاحظت فاطيما اسلوب سلمى اللى متغير : مالك يا سولى ?
سلمى: مفيش يا طيما
فاطيما: على طيما برضه .. انتى شكلك زعلتى انا بهزر معاكى
سلمى: بصراحه انا مضايقه من نفسى وهمه نفسى بحاجات مش هتحصل وكل ما اقرر ابعد الاقيه بيكلمنى واقرب اكتر وهو مش موضح موقفه..الاول قلت دراسه ومشغولودلواقتى خلص جامعه وبيشوف موضوع الجيش وحال البلد خربان عندكم وهيحضر ماجسير ودكتوراه ... خالد مركز ع الدراسه اكتر يا فاطيما مش حاسس بيا
فاطيما حست من طريق كلام سلمى انها مضايقه : متقلقيش نفسك ع بلاش ان شاء الله هنلاقى حل متعرفيش ظروفه ايه اصبرى شويا ..ميمى كانت سلمت امرها لربنا وشوفتى حصل ايه سبيها ع ربنا وربنا هيحللك كل حاجه ...؟
سلمى: ان شاء الله .. انا هقفل دلواقتى ولو خالد فتح رنيلى لانه قافل موبيله ومدخلش طول اليوم
فاطيما : حاضر
قفلت سلمى وهى مضايقه وفاطيما مش عارفه تعمل ايه . شويا ومعتز فتح وظهر اون لاين
معتز: مسائووو
فاطيما: مسائووو ..فى ميعادك بالظبط انا بفكر اظبط الساعه على دخولك
معتز: بتتريقى
فاطيما: لا خالص والله بس فعلا كل يوم الساعه 11 الاقيك اونلاين
انا بقيت اعرف الساعه من غير ما ابصلها منك
معتز: اول ما بستلم من صاحبى بفتح ع طول
فاطيما: ايه الاخبار
معتز: وحشتنينى
فاطيما : هههههههههههههه ابتدينا ع فكره لسه السهره طويله علشان اقول عليك هيست من السهر
معتز بيضحك: اهو لماضتك دى اللى وحشتنى هو انتى فاكره انك انتى اللى وحشتينى
فاطيما: حاضر هبقى الفلك منها شويا باين عليها من المظاهرات والثوره بقت شاحه ف القاهره تعالى السنطه هتلاقيها كتير
معتز: اكيد مش انتى موجوده ..انا راضى بيكى
فاطيما: بيكى ع العالى هههههههههههههه
معتز: فقر هظبط كام حاجه وهرجع متقفليش
فاطيما: هقفل اروح فين انا قاعده اهو
شويا ورجع معتز : .. بخ
فاطيما: ياما
معتز: ياما هههههههههههه
فاطيما: عاوزنى اقولك ايه يا مامىىىىى
معتز: مش لايقه عليكى حلوه ياما
فاطيما: اى خدعه
معتز: انا مش شايف حد من المجموعه فاتح مفهوش غير احمد ورضا
فاطيما: سلمى كانت فاتحه من شويا وخالد مختفى عن الانحاء وميمى بتحاول تجمع نفسها و الباقى سارحين هتلاقيهم شويا ودخلوا
معتز: مالها ميمى
فاطيما: اسكت مش هتتخطب قريب ان شاء الله
معتز: بجد ..مبروك بس دى لسه ف الكليه
فاطيما: هو انا بقولك هتتجوز .. دى خطوبه ادعيلها بس
معتز: ومين دا حد تعرفيه
فاطيما: اسمع يا برنس ..
وحكت فاطيما ل معتز للى حصل ..
معتز: والله بجد حاجه كويسه ان الظروف دى فى البلد واللى بيحصل
وفى حد بيفكر فى ارتباط وارتباط رسمى
فاطيما: علشان هو ملوش ف المشى وبيحب كل حاجه رسمى باين شخصيته صريحه كده
معتز: انا لو مكانه مكنتش اتسرعت كده وخصوصا ان عندهم الجواز دا قرار مش سهل
فاطيما: اها زى عندنا الجواز بالاربعه بس مين ال يقدر
معتز: ادينى امكانيات وانا اقدر ونص
فاطيما: والله شكلك بق..دا اللى يقدر ع واحده يبقى برنس تقولى اربعه
معتز: الراجل هو الل يقدر يحكم ع نفسه هيقدر ولا لا لو الظروف سمحتله
فاطيما: يعنى ظروفك لو سمحت هتتجوز اربعه وهتعرف تعدل بينهم
معتز: لو قادر ممكن جدااا..بس انا ارجح وافضل انى اتجوز واحده تكون اربعه
فاطيما: مش فاهمه ازاى يعنى ؟
معتز: يعنى تكون صاحبتى واختى وحبيببتى ومراتى
فاطيما : يعنى 4 فى 1 برت بلاس يعنى
معتز : هههههههههههههه اه حاجه زى كده ضد القشره والتساقط والتكسير ولنعومه
فاطيما: ايه ياعم الشامبو
معتز: يعنى انتى مثلا عاوزه الل تتجوزيه يكون ايه جوزك بس
فاطيما: لا وصاحبى
معتز: مفرقتش كتير من كلامى الشخص الل تعيشى معاه وتلاقى فيه كل اللى محتجاه ..صعب او اقولك مستحيل هيبص بره .. يعنى مراتى مثلا لما تكون صاحبتى احكيلها كل حاجه براحتى من غير ماتفهم غلط
واختى لما احتاجها ف مشوره وحبيببتى لما احتاج لحبها ومراتى لما تحتوينى ..الست الذكيه هى اللى تقدر تكون الاربعه دول لجوزها
وتحسسه بيهم فعلا مش كلام وخلاص
فاطيما: ماهو ممكن تكون كده ويبص بره برضه دا طبع ف الرجاله
معتز: يبقى فى الاساس مش بيحبها او حبهم قل ..او هى مش عامله تغير يشده ليها ...العلاقه ذكاء من طرفين مش طرف واحد ..خد وهات علشان تحس بالوجود مش خد خد خد ومفيش هات خالص ..الانسان ومشاعره مش بطاريه تفضى وتترمى فى بطاريات بتشحن بالكهربا او بالطاقه الشمسيه ..دول اصحابهم بيحافظوا عليهم علشان مش هلاقوا زيهم ..
فاطيما: بس برضه متنكرش ان فى نوعيه سواء رجاله او ستات فاهمين الارتباط والعلاقات غلط يعنى اللى يضمن حد بيسيبه جنبه يخلل ويبص بره عادى
معتز: وبرضه فى الل يضمن حد يهمل او تهمل ف نفسه وتقول ماخلاص اتجوزنا احنا هنا فاهمين الارتباط غلط ..فاهمين انه عباره عن ورقه واتنين شهود وعلاقه حميميه وعيال واكل وشرب .. العواطف والمشاعر بتبقى اخر حاجه نفكر فيها بتبقى فى الاول عاليه وبتهبط ولما نعليها تانى نبقى اصلا نسينا هى كانت عاليه ازاى علشان كده بنقول كان زمان بيحبنى ..وهو بيقول كانت زمان بتهتم بيا.. ثقافه المجتمع ولان الكل بيبص لبعض فشايف العادى بتاع غيره هو العادى بتاعه ويكون كده وبينتشر الجمود والامبالاه
فاطيما: هو المجتمع التيت دا فعلا مش فاهمين ..حافظين... بس اقولك اغلب الرجاله فعلا عينهم بتزوغ ولو حبيببته او مراته او خطيبته عملوله ايه .. وخصوصا المتجوزين لما ياخد الل هو عاوزه من العلاقه وبعد كده عرف الدنيا ماشيه ازاى بيبقى ضامنها ويبص بره ... الواحده ممكن تضحى باى حاجه لو لاقت شخص بيحبها بجد زى ماهى مهما كانت .. ويحسسها انها هى الوحيده الل شايفها والل فى قلبه وعينهوهى تقدر دا وتحسسه انه هو الوحيد فى الدنيا عندها وقدامها .... دا الل بنشوفه ف الافلام لان الواقع بيقولك الحاجه الذياده بتقلب العكس .. لو طرف من الاتنين ضمن حب الطرف التانى بيهمله وبيستنزف مشاعره وحياته وعمره ومن غير ما يدى لانه اتعود انه ياخد .... ثقافه انا وطمع الل مسيطره ع البشر ..بجد حاجه زباله
معتز لاحظ جديهفاطيما: ايه الكلام الكبير دا
فاطيما بتهز : من الل بنشوفه يااخويا
فاطيما من كلام معتز حست ان دماغه عاليه اوى وكل ما بتقرب منه ويتكلموا اكتر فى اى مواضيع بتتعمق اكتر ومعتز اتشد لفاطيما اكتر وبقوا يوميا يتقابلوا بليل يتكلموا لصبح ...!!!
جه يوم الخميس وعماد راح البيت عند ماريا وفاطيما كانت معاها فى اوضتها
فاتحين الباب نص فاتحه علشان يسمعوا الكلام ...عماد كان اشترى علبه شيكولاته من النوع الغالى ..مامت ماريا قدمت العصير وقعدوا وابتدوا الكلام
ابو ماريا: اهلا بك استاذ عماد
عماد: اهلا بك
ام ماريا: اشرب العصير
عماد: شكرا.. انا جى لحضرت وطالب ايد الانسه ماريا وان شاء الله اخرج ومعايا موافقه
ابو ماريا: انا من وقت ما ماريا قالتلى وسالت عليك ف الكنيسه والجمعيه الكل شكر فيكبس محتاج اسمع منك انت مخطط ل ايه وظروفك ايه
عماد: انا يا عمى مخلص بكالوريوس تجاره السنادى واخدت اعفا من الجيش وقاعد مع والدتى ..ولينا 10 فدادين عن والدى عايشن ع دخلهم مع معاشه وهفتح مكتب محاسبه انا واتنين من اصحابى هنا مؤقتا لغايه ما الاقى وظيفه كويسه وطبعا هقدم ف كل مكان ...يعنى الحمد الله الناحيه الماديه كويسه
ابو ماريا: والشقه
عماد: البيت اللى احنا قاعدين فيه بتاعنا وفى شقه ليا لوحدى تحت شقه والدتى لانى مقدرش اخد شقه بعيده ابعد عنها وانا وحديها .
ابو ماريا: انت عارف ان ماريا رايحه تانيه كليه يعنى جواز دلواقتى بدرى اوى
عماد: انا حبيت ارتبط بماريا وحبيت علاقتى بيها تكون رسميه
خطوبه لما تخلص كليتها نتمم الفرح
ابو ماريا: ادينا اسبوعين نفكر ونسئل وانت كمان ليك حق تسئل وهنرد عليك
عماد: اتمنى يكون رد الل مستنيه ونفرح كلنا
ابو ماريا: ان شاء الله
خرج عماد من عند ماريا وخرجت ماريا وفاطيما يسمعوا كلام باباها
ام ماريا: باين عليه انسان محترم اوى
ابو ماريا: فعلا ..واضح انه شارى ميمى اوى ..بس لازم ناخد وقت نسئل عليه ونفكر
ام ماريا: صح
مامت ماريا غمزت ل ماريا وفاطيما علامه ان فى قبول راحت فاطيما حضنت ماريا وفى ودنها: مبروووك يا عروسه
رجعت فاطيما متاخر من عند ماريا وفتحت النت وبعتت ل سلمى كل اللى حصل علشان تشاركها الفرحه وكلمت معتز وحكتله وفضلوا طول الليل يتكلموا .... هزار وضحك ...
مر اسبوعين فعلا وسئل ابو ماريا ع عماد وع كلامه واتاكد فعلا انه كان صادق ف كل كلامه وادى ماريا فرصه تفكر تانى علشان متكنش اخدت قرار الموافقه لمجرد انها عاوزه تفرح ووافقت ماريا واتحدد ميعاد الخطوبه الرسمى قبل بدايه الدراسه ...وكانت فاطيما مشغوله مع ماريا ف تجهيزات
الخطوبه ...فى يوم فى الشارع ماشين وقفت ماريا بتبص وراها : طيما ..ايه يابنتى انجزى عاوزين نلحق الدنيا قبل ما تليل
فاطيما ماشيه بالعافيه من التعب: الله يهدك يابعيده . كل دا علشان جزمه
ماريا رجعتلها خطوتين: المحل دا اتفقت معاه وقال هيجبها انهارده ..الخطوبه كمان اسبوع وعاوزه كل حاجه تكون جاهزه
فاطيما بتعب: كسحتينى منك لله ... اخر محل دا وقبل ما ندخله هاتيلى سندوتش من عصير هقع منك
ماريا بتضحك: حاضر يا ستى هجبلك بس لما نخرج هنرتاح شويا وبعدين نروح لخياطه علشان الفستان
فاطيما : مكنش يومك يا طيما والمرمته
راحوا المحل فعلا وصاحب المحل كان مجهز طلب ماريا واخدته وراحوا ع مطعم لعم ماريا وطلبوا اكل وقعدوا ...ماريا لاحظت فاطيما رحرحت
ماريا: متقوليش انك قلعتى الجزمه
فاطيما قامت وقعدت مربعه ع الكرسى : اه ياانى انتى متنطقيش يخربيتك دى خطوبه لما هتتجوزى هتعملى فيا ايه تانى ... اسبوعين لف لف لف لف فرهدتينى يحرقك
ماريا بتضحك: انتى شغاله دعا فيا ينفع كده وانا عروسه
فاطيما: انا هتكسح منك وهتضحكى عليا بغدا وكمان مش هتدفعى حقه ابوكى اللى هيدفع
ماريا: الله ... هو انتى ليكى اكل ولا بحلقه ... هلغى الاكل
فاطيما: ابقى شوفى مين اللى هتمشى معاكى ..انا لو مااكلتش دلواقتى هفضحك وهفضح عمك وهقول انكم بتبيعوا شاورما كلاب .. وانتى عارفه ظروف البلد والكلام بيصدقوا اى حاجه وانتم ايه بقى هيتوصوا بيكم علشان مطعم صاحبه مسيحى وبيعزوكوا اوى
ماريا بتضحك: يحرقك ..هتعملى فتنه طائفيه علشان مااكلتيش اومال لو حاجه تانيه هتعملى ايه
فاطيما : هرشح نفسى لرئاسه .. وشعار عاوز حل فاطيما هى الحل
ع الاقل هاكل الشعب وهشبعه ههههههههههههههههههههه
ماريا: كده ضمنا البلد خربت اكتر
فاطيما: قوليلى بقى عمده كلمك انا شوفتك قبل ما ندخل المحل كنتى بترغى
ماريا باابتسامه: كنت بقوله انا بعمل ايه بيطمن عليا وباعتلك السلام
فاطيما: الله يسلمه ..هو انتى ليه مش ضفتيه صحيح معانا يتعرف علينا ..والله احنا مش بنعض
ماريا: عملتله بس هو مش بيفتح كتير مشغول ف تجهيزات مكتب المحاسبه مع صحابه ودلواقتى لخطوبه وكده يعنى
فاطيما: وكده يعنى ..ماشى ياستى .. بس عرفيه احنا هنكون اصحاب غصب وميفكرش انه ياخدك منى وهسكتله ..الخطوبه دى تمت بعد موافقتى ها
ماريا بتضحك: هو انا اقدر استغنى عنك ياقدرى مستحيل ع قلبك
فاطيما : بموت فيكى يا وزتى
ماريا: يخليكى ليا يا بطتى
ماريا شايفه الاكل بيقرب منهم بصت لفاطيما واستغلت لحظه الرومانسيه اللى بينهم : طيما يا حبيببتى
فاطيما كانت بتقرا رساله جتلها من معتز : نعم يا قلب طيما
ماريا: لو خيروكى بينى وبين سندوتش شاورما هتختارى مين
فاطيما بصتلها: ايه اللى بتقوليه دا ..انتى بتقارنى نفسك ب سندوتش
ماريا حست بفاطيما اتغيرت : يعنى ايه
الاكل اتحط ومشى الجرسون : لما تقارنى نفسك قارنى بالكميه السندوتشات دى بسلطاتها بالحاجه الساقعه انا سندوتش مش هيشبعنى اصلا ..هبله صحيح
ماريا بتضحك: والله كنت عارفه مهما كان مين هتختارى الاكل عنه
نفسى اشوف اليوم اللى هتتنيلى وتحبى هتبقى عامله ازاى
فاطيما: هههههههه والله يااخت ميمى انا معرفش بالظبط هكون ازاى بس بما انى شايفاكى انتى والاخت الهبله سلمى متنيلين فطبيعى هتنيل
بس الحاجه الوحيده اللى شبه متاكده منها هو الاكل ... هيزيد ممكن لكن عمره ما يقل .. انا والاكل ومنير تؤام لا منفصل
ماريا بتضحك: انتى هتقوليلى .. واخبار معتز ايه
فاطيما: تصدقى الواد دا دماغه حلوه اوووى ..كلامك فخيم كده تسمعيه يفحمك بالكلام عقلانى وواقعى اووى .. بجد ببقى مبسوطه وانا بتكلم معاه ..وفرحانه بصداقته
ماريا: هى صداقه بس ..مكبرتش عن كده
فاطيما بتبص ل ماريا: ميمى انتى هتاكلى شكلك شبعانه
راحت تشد طبق السندوتشات اللى قدام ماريا ..ماريا بسرعه: استنى استنى
فاطيما: بلاش اسلوب التوقيع ف الكلام دا ..لو ف حاجه هقولك انتى وسلمى انا مش هخبى عليكم اكيد
ماريا : متقفشيش كده ..بس انا شايفه معتز كويس وشخصيته عاجباكى وهو متقرب منك عن اى حد ف الجروب
هو انتم مشفتوش بعض يعنى ولا صور ولا فتحلك كاميرا حتى زى خالد وسلمى لما بيتكلموا
فاطيما : تصدقى لا محصلش اهى سنه اهى عدت يعتبر ولا هو طلب ولا انا طلبت بس عادى يعنى احنا اصحاب ومش هيفرق معايا شوفته ولا لا كده كده هى علاقه متحدد مصيرها ..
ماريا : اصل قلت لعل وعسى هنسمع خبر قريب يعنى
فاطيما : ركزى ف خبرك انتى اللى مكنتيش مرتباله دا
ماريا بتضحك: تصدقينى يا طيما ..انا اصلا كنت عامله حسابى انه هينطق لما اكون ف رابعه وهخلص مش بالسرعه دى
فاطيما: طلع سهن ومرتب كل حاجه ..قوليلى صحيح انتى مقتنعه بعماد فعلا ..انتوا الارتباط عندكم مش سهل دا جواز
ماريا: انتى هتعملى زى بابا ولا ايه ..طيما انا عماد بالنسبالى كل حاجه حلوه شوفتها .. حسيت بطعم الايام ولهفه لما بشوفه ..مجرد لما بيقولى صباح الخير او مساء الخير بس بحس بفرحه بتكفينى لتانى يوم... انا بحب عماد فعلا حياتى كلها رتبتها عليه وكنت بدعى ف صلاتى اتجمع بيه وربنا سمع دعايا وهو انسان كويس جدااا لما تقربيله هتحبيه بجد ,,,,
فاطيما ماسكه سندوتش : حبيه انتى كفيه انا هحب ف دا
ضحكت ماريا : مفيش اى تطور ف موضوع سلمى ..خالد منطقش
فاطيما بغيط: ابن المفكوكه ولا بينطق ولا بينيل وهى مش قادره تبعد عنه
ومقضيها تلميح ومبيتحركش
ماريا: ليكون حاسس بيها وبيستهبل يا طيما وضامنها ماهو ف عيال كده لو كده لازم نظبطه
فاطيما: الله الله ع الكلام هى الخطوبه بتغير كده وقلبك جمد يا ميمى
ماريا بتضحك: واكتر العلاقات الصح هى اللى ف النور ولا ايه
فاطيما: طيب ياعم الشعاع انا اصلا بفكر ف حاجه اعملها بس مستنيه بعد خطوبتك كده
ماريا: خير ياعبقرى
فاطيما : حاجه بس محتاجه فعلا مساعده معتز
ماريا : هتعملى ايه
فاطيما : هحكيلك واحنا ماشين يلا علشان هنتاخر اوى كده
ماريا : اوك يلا بينا
خلصوا مشاويرهم ولما رجعت كانت فاطيما فاصله دخلت رمت نفسها ع السرير من التعب
مقدرتش تفتح نت لاقت من معتز :
"انا مش هفتح اليومين الجايين لانى مسافر وهكلمك بكره ع الموبيل ...لااله الاالله
"فاطيما: سيدنا محمد رسول الله
قفلت فاطيما ورمت الموبيل جنبها وكانت هترجع لنومها وبعدين فتحت عنيها
فاطيما: هى ايه حكايه لا اله الا الله دى الل كتر .. هو اسلم ولا ايه ....وهو بيقولى انه مسافر ليه ..اول مره يعرفنى انه مش هيفتح نت هو دا عادى ولا انا من التعب مـأوفره الكلام ..
يهدك يا ميمى كسحتينى رجلى ودماغى ..يارب صبرنى ع البلوتين دول ميمى وسلمــ ولسه بتكمل اسم سلمى راحت ف النوم ......!!!
____
يتبع
ليست هناك تعليقات:
إرسال تعليق