فى يوم رقيه بصت ف النتيجه عرفت ان عيد ميلاد مهاب قرب وعاوزه تشتريله هديه نزلت لخالتها تاخدها وتخرج زى ما مهاب قالها تجبله هديه وتجهزها
راحت عند خالتها
رقيه: صباح الخير يا زوزو
خالتها : صباح الفل يا عيون زوزو
رقيه: وراكى ايه انهارده
خالتها: فى ناس اعرفهم جايين ع العصر كده
رقيه: امممم طويب
خالتها: ليه ف حاجه
رقيه: كنت هاخدك ونتمشى شويا ..بس مفيش مشاكل مره تانيه
خالتها : خليها بكره
رقيه : اوكيه
قعدت شويا رقيه والضيوف وصلوا استأذنت وخرجت لحديقه وبعدين جتلها فكره انها تخرج هى تتمشى حوالين البيت ودى اول مره تعملها ففكرت لاقت ان لو معاها خريطه لمكان مش هتوه .. طلبت من موظف الامن يجبلها خريطه للمكان والاماكن ال حواليه وفعلا جبلها الخريطه ومن غير ما تقول لخالتها جازفت واتشجعت وخرجت ...وصلت لكذا مكان وكانت مبسوطه اوى وكانت بتدور ع مكان المول .. شافت محل ايس كريم راحت اشترت ايس كريم شيكولاته وهى خارجه من المحل واحده خبطتها وقع منها وهى مش حاسه الخريطه مشيت شويا ودورت مش لاقتها ومش كانت عارفه ترجع ازاى وكانت كمان ناسيه موابيلها ..... حست انها تاهت خلاص حاولت تفتكر الاماكن نسيت
لانها كانت معلمه عليها ع الخريطه ... وهى واقفه وعماله تبص حواليها وملامح وشها متغيره شافها هيثم وهو راكب العربيه وكانت بيلمح ولاحظ توترها وانها مش ع بعضها ركن العربيه ونزل راح ناحيتها خبطها ع كتفها
هيثم : الجناينيه بتعمل ايه بره دلواقتى
رقيه اتخضت وبصتله: هيثم خضيتنى ..الحمد الله انك جيت
هيثم لاحظ ملامح وشها اتغيرت وكانت هتعيط اتخض: ف ايه مالك
رقيه بصوت مخنوق: خرجت وتوهت ومش كنت عارفه ارجع بقالى ساعتين عماله الف ف المكان
ضحك هيثم : يخرب عقلك خضتينى افتكرت حاجه حصلتلك توهتى هما ف البيت ميعرفوش انك خرجتى
رقيه بملامح ضيقه: لا .. انا اتفلسفت وخرجت وقلت هرجع ع طول كنت عاوزه اوصل لمول ال هنا اشوف حاجه
هيثم ضحك: يلا بينا طيب
مشيت رقيه مع هيثم وركبوا العربيه
هيثم : كنتى عاوزه تشوفى ايه ف المول
رقيه: هديه ..
هيثم: لعمك ولا خالتك
رقيه: عيد ميلاد مهاب الاسبوع الجى قلت اشتريله هديه واديهاله
هيثم: ياااااه مهاب الرخم دا
رقيه: لو سمحت متقلش عليه كده .. هو مش رخم
هيثم ضحك: بتزعقيلى علشان قريبك هنزلك ومش هروحك
رقيه : هعيط وهقول خاطفنى
هيثم : تحبى تروحى البيت ولا تروحى المول تشوفى ال عاوزه
رقيه : مش عاوزه اعطلك
هيثم: لا عطله ولا حاجه انا كنت خارج اتمشى زهقت من قاعده البيت
رقيه : يبقى يلا ع المول يا بليه
هيثم بص لرقيه وطلع شيكولاتايه من العربيه : اتفضل يا اسطى التموين
فرحت رقيه : ايوه كده المزاج يتعدل بقى
هيثم فضل باصص لرقيه وهى فرحانه والابتسامه ع وشها وسرح ورقيه لاحظت ونبهته: انت باصللى فيها ولا ايه
هيثم فاق من السرحان : ها .. يلا بينا ع المول
اخدها هيثم وراح ع المول قعدت تلف وتتفرج واشترت ساعه لمهاب واخدها هيثم وقعدوا وجبلها عصير
هيثم: وادى العصير الموز بلبن والتشيز كيك شيكولاته ..حاسس انى خارج مع ولاد اختى حياتك كلها شيكولاته
رقيه : بحبها اعمل ايه ماهى ال وصلتنتى لكده
هيثم لاحظ رقيه بتشاور ع جسمها: ع فكره انتى مش تخينه انتى مليانه شويا يعنى ممكن تبطلى شيكولاته وحبه رياضه هتبقى تمام
رقيه بصتله: وليه انا حابه نفسى كده
هيثم بيضحك: بحب انا الناس ال بيحبوا نفسهم اوى كده
رقيه : اصل احنا لو متصحبناش ع نفسنا هنتعب فانا متصالحه معايا والحياه بيس
هيثم باصصلها: هو انتى مفيش مشاكل ف حياتك انتى واخده كل حاجه ببساطه كده
رقيه افتكرت مهاب وعلاقتها بيه بس مينفعش تتكلم مع هيثم عنه فاابتسمت : عادى يعنى مش بكبرها لانى لو قفلت وزعلت مش هتتحل
هيثم : لا نظريه
رقيه : انت صحيح مقولتليش شغال ايه قدملى cv علشان لو جتلى شغلانه تانيه اطلبك معايا مساعد
ضحك هيثم : اقدملك نفسى .. هيثم عبد العليم
مهندس ديكور بس ف هولندا فاتح شركه صغننه ع قدى لتنظيم الحفلات الكبيره وكل حاجه تخصها وعندى 28 سنه ولا اعول عندك عروسه
رقيه بصتله: ازاى واحد ف جنتلتك دى ووسامتك قاعد فرى كده هما البنات اتعمو
هيثم : انا عارف يااختى
رقيه بتضحك: لا بجد ليه مش مرتبط لدلواقتى انت محبتش خالص
هيثم اتنهد : انا جربت مره ومش ناوى دلواقتى خالص
رقيه: ارتباط
هيثم: لا جواز
رقيه: وانفصلت ليه
هيثم بيضحك نص ضحكه : خانتنى مع صاحبى فى اوضتى
رقيه حطت ايدها ع بوقها من الخضه: ايه ..انت شفتهم
هيثم ع وشه ابتسامه: انا موجعنيش المنظر ع قد ما وجعنى الكدبه ال صدقتها انه اخويا وهى محافظه عليا بس فعلا الكلام حاجه والافعال حاجه تانيه
رقيه حبت تغير الموضوع: ربنا يرزقك بالخير قريب
هيثم اتنهد: الحمد الله انا تركيزى بقى شغلى والاسطى بتاعى
رقيه بصتله: انا ..
هيثم لاحظ كلامه : اقصد الشغل يعنى لما يبقى ف شغل
هو انتى قاعده هنا ولا هتنزل مصر يعنى جايه زياره
رقيه ببابتسامه: لا اقامه ان شاء الله
هيثم: انا جيت زياره لهدى بصراحه كنت مخنوق وعاوز ارجع بس هطول شويا
رقيه ببابتسامه: طيب كويس اتمنالك اجازه سعيده
هيثم باصص لرقيه: اسعد من كده اجازه مفيش
رقيه : ها .. طيب يلا بينا علشان كده هتاخر عليهم
هيثم : يلا بينا
ركبت رقيه وهيثم العربيه .. رقيه فضلت ماسكه الشنطه ال فيها الساعه وع وشها ابتسامه وهيثم من غير ما يحس حس بحاجه شدته ل رقيه وبيبص عليها وهى مش واخده بالها وصلت لبيت
رقيه: ميرسى ياهيثم ع الانقاذ
هيثم بسرعه: لالالالا انا مينفعش معايا ميرسى انا بحب حقى ناشف
رقيه بتضحك: يعنى عاوز ايه فلوس
هيثم : اعزمينى بره ع اى حاجه ان شاء الله كوبايه شاى
رقيه بتضحك : ماشى ان شاء الله
هيثم : هستنى الا مش مسامحك ها وهدعى تتوهى تانى ومش تلاقينى تانى
رقيه : كده يا بليه وانا قلت بقى ليا صديق ف الغربه
هيثم: اهلا بيكى ف الغربه
مشى هيثم ودخلت رقيه خالتها كانت قلقانه ومش عارفه توصلها بسبب تليفونها ال نسيته
خالتها: ايه يا رقيه كنتى فين
رقيه : اسكتى يا خالتو اقعدى احكيلك
قعدت رقيه وحكت لخالتها ع ال حصل
خالتها اتخضت: يعنى لو مش كان هيثم شافك كان زمانك تايه ينفع كده
مش قلتلك انا ننزل بكره استعجلتى ليه
رقيه: حبيت اجرب واعتمد ع نفسى يا زوزو عموما مش هتتكرر متقلقيش
خالتها : الحمد الله انها جت ع كده
اطلعى ارتاحى شويا
رقيه : اوك
طلعت رقيه شقتها وبصت ع موابيلها لاقت اتصالاات كتير من خالتها ومامتها وعمار اخوها ولا اتصال من مهاب
بالرغم انها زعلت لكن قالت لنفسها: كويس علشان ميقلقش ويركز ف شغله
ودخلت اخدت دش
شويا ومهاب وصل عند البيت وال وصلته كانت سهر
مهاب: ع البيت ع طول ياسهر متلفيش
سهر مسكت ايده: متيجى نسهر انهارده شويا وحشنى اسهر معاك يا بيبى
مهاب: ف الويك اند احنا بشتغل
سهر: عموما لمده شهر هتبقى معايا لوحدى لما نسافر
ضحك مهاب : احنا مسافرين شغل
سهر : الصبح لشغل . اليل لينا يا بيبى
مهاب : ان شاء الله
نزل مهاب من العربيه ومشى ندت عليه سهر ورجع
سهر: وطى اقولك حاجه
وطى مهاب شويا راحت سهر باسته : دى تصبيره لغايه ما نسافر
مهاب اتفاجئ بص حواليه ومشى دخل البيت طلع ع الشقه لاقى رقيه مستنياه
مهاب: انتى لسه صاحيه
رقيه : احضرلك العشا
مهاب: لا بس ممكن فنجان قهوه مظبوط ع المكتب
رقيه باابتسامه : حاضر
عملتله القهوه ودخلت المكتب حطيتله القهوه ووقفت شويا مهاب لاحظ
مهاب بص لرقيه: فى حاجه
رقيه قعدت وحبت تفتح كلام مع مهاب: مش انا تهت انهارده
وحكت لمهاب ع ال حصل وان هيثم لحقها ورجعت البيت ومن غير ما يحس مهاب بعصبيه: ايه الاستهتار دا بتخرجى لوحدك ليه
رقيه اتخضت من اسلوبه: اصل ..انا
مهاب : من غير اصل ولا حاجه متخرجيش لوحدك تانى
رقيه : حاضر
خرجت رقيه وهى حاسه انها حرجت نفسها بس برضه بررت : كان لازم يعرف يعنى
__________________________
تانى يوم صحيت رقيه بدرى وحضرت الفطار لمهاب وهو بيفطر طلب من رقيه تجبله تليفونه من ع المكتب قامت وكان جنب التليفون جواز سفر وتذكره طيران ..رجعت لمهاب واداته التليفون
رقيه: هو انت مسافر
مهاب: اها شغل هتفق ع معدات ف الارجنتين لمده شهر او ااقل
رقيه باابتسامه: طيب كويس انك قلتلى
مهاب: كنت هقولك بس انتى سبقتى السؤال
رقيه: هتسافر امتى
مهاب: ع يوم 15
رقيه لاحظت انه هيبقى عيد ميلاده صابح يسافر 14 : طيب كويس تسافر بالسلامه ربنا يوفقك
مهاب: انتى بقى بلاش تقعدى لوحدك وانزلى اقعدى تحت مع ماما
رقيه : ان شاء الله
وفطر مهاب ونزل راح الشغل ودخلت رقيه اوضتها مسكت علبه الساعه عماله تبصلها باابتسامه
رقيه: ياريت يسافر وهو لابسك اهو حاجه منى هتكون معاه
رجعت الساعه ف العلبه وقفلتها وحطتها ف الدولاب وقررت تدهاله قبل ما يسافر ...!!!
__________________________
رقيه وقفت تعمل الغداء ال هتبعته لمهاب ومعاه العصير البيتى وجهزته وطلبت من موظف الامن يوصله لمهاب ف الشركه وراح وداه ف ميعاد الغدا
مهاب كان قاعد ف المكتب بيشتغل دخلت سهر عليه : بيبى مشغول
مهاب مش بصلها : ايوه
سهر راحت قعدت : طيب انا عزماك ع الغدا بره نخرج بره جو المكاتب دا
مهاب بصلها: لا مينفعش ورايا حاجات كتير اعملها قبل ما اسافر وغير كده الاكل موجود
شاور مهاب ع التربيزه وعليها الاكل ال رقيه بعتتله ...سهر بصت ع الاكل : اها زى كل يوم
مهاب باابتسامه: انا الدكتور قالى من اخر تعب انى مش اكل اكل جاهز وكمان انا قلقان ع انى اتعب تانى واحنا عندنا سفر وشغل
سهر باابتسامه : طيب يلا قوةم ناكل سوا وبصراحه اكل البيت طعم اوووى تسلم ايدها طنط زوزو
مهاب بص لسهر ومرداش يقولها انه رقيه ال بتعمله : ها .. اه فعلا يلا
قام مهاب وقعد هو ورقيه ياكلوا دخل عليهم المكتب ابو مهاب
ابو مهاب: انا باين حماتى بتحبينى
سهر: وبنتها بتموت فيك يا اونكل
ابو مهاب بيضحك: طبعا طبعا .
مهاب: اتفضل معانا يا بابا ولا اتغديت
ابو مهاب: اممم الاكل شكله شهى جدااا هقعد اكل معاكم
سهر قامت وقعد ابو مهاب وهى قعدت ناحيه التانيه ...
ابو مهاب بياكل وبيستطعم الاكل : طبعا يا سهر الاكل دا احلى من المطاعم
سهر باابتسامه: جداا يا اونكل من وقت سفر بابا وانا مقضياها مطاعم لغايه ما زهقت
ابو مهاب : باباكى اول مل يرجع من جولته ان شاء الله ليكم عزومه ف بيتنا
سهر وهى مندمجه ف الاكل : طبعا يا اونكل هنيجى هنفوت الاكل الجميل دا ازاى
ابو مهاب بيضحك: بصراحه اكل رقيه ميتميزش عن اكل زينب الاتنين نفسهم ف الاكل فظيع
سهر تنحت : هو مش طنط زوزو ال عملت الاكل دا
مهاب شرق : اصل
باباه قاطعه: لا من وقت ما مهاب تعب والاكل ال بيجيله من البيت والعصاير رقيه ال بتعمله بنفسها .. وزى ما انتى شايفه اكل روعه
سهر حاولت ترسم ع وشها ابتسامه وبتبص ل مهاب: طبعا يا اونكل طبعا
خلص ابو مهاب اكل وخرج من المكتب ومهاب توه ال حصل : يلا يا سهر ع مكتبك علشان تخلصى ال وراكى
سهر بملامح عصبيه: انتى مقولتليش ليه
مهاب عمل نفسه مش فاهم: مقلتش ايه
سهر: الاكل ال بيجيلك من البيت رقيه ال بتعمله مش طنط
مهاب : وهيفرق معاكى ايه رقيه ولا طنط دا اكل
سهر باصه لمهاب : مهاب انت متاكد ان علاقتك بيها زى ما اتفقنا
مهاب بصلها: ايوه يا سهر زى ما اتفقنا ويلا بقى ع مكتبك ممكن
سهر : اوك
مشيت سهر وهى مضايقه ان مهاب خبى عليها ومهاب حس انها اضايقت ...!!!
__________________________
قبل ميعاد سفر مهاب بيومين راحت رقيه الحديقه عند هاله تشوفها لو محتاجه حاجه قعدت وكان الورد ابتدا يفتح قعدت قدامه رقيه واتكلمت معاه
رقيه : انا مش بعرف اتكلم مع حد غيركم .. مهاب مسافر وهيغيب شهر بحاله
هيوحشنى جدااا بس هو مسافر علشان شغله ومستقبله مينفعش اقوله بلاش .. بالرغم انى بشوفه مره الصبح وبليل بس الحظه ال بشوفه فيها بتبقى عندى مده طويله ..انمما هقعد شهر بحاله مش اشوفه
هيوحشنى اووى ..
فى الحظه ديه ظهر هيثم بعد ما عرف انها بره من الخدامه وراح بسرعه
هيثم: انتى مهاجره ولا ايه
رقيه : هيثم ..ازيك
هيثم باابتسامه: زى الفل وانتى
رقيه : الحمد الله
هيثم: نفضتيلى ف حوار العزومه ولا ايه
رقيه: لا خالص بس مشغوله شويا
هيثم: مالك وشك متغير كده ليه
رقيه بصت لهيثم حست انها عاوزه تتكلم حد يساعدها : مشكله لواحده صاحبتى قريبه منى
هيثم: خير ..ممكن اساعدك
رقيه بصت لهيثم لحظات : متجوزه وجوزها حساه بعيد عنها وعيد ميلاده قرب وعاوزه تعمله حاجه تفاجئه ومنها تقربله ومش عارفه وسالتنى وانا معرفش
هيثم بيضحك: بس كده بسيطه ..تلبسله قميص نوم شفتشى وبس
رقيه تنحت لهيثم: هيثم
هيثم: بهزر بهزر .... اممم بصى يا ستى ممكن تعمل عشاء جميل بسيط وتورته صغيره وتفاجئه انها فاكره عيد ميلاده وتحتفل معاه وبس
اى راجل ع وجه البسطيه لو شاف مراته بتعمل كده وفاجئته هيفرح جدا وهيقدرها ومش هينساها
رقيه: انت فاكر هتجيب نتيجه يعنى
هيثم: لو مجبتش مش ابقى سومى بس مع كلمتين من القلب والدنيا هتبقى تمام
رقيه الفكره علقت معاها لانها مش عارفه هتديله الساعه لمهاب ازاى
وعجبتها حوار عشا والتورته وخصوصا انه مسافر تانى يوم
هيثم شاف رقيه سرحت : معاكى شيكولاته
رقيه لاحظته : ها ...لسه مخلصاها
هيثم طلع من جيبه : يخربيتك عودتينى عليها بقت ف جيبى امسكى يلا
اخدت رقيه من هيثم شيكولاته وبعد ما كانت زعلانه فرحت وسابته ومشيت رجعت ع البيت ...!!!
رجعت رقيه البيت طلعت ع شقتها ا ودخلت لقت ف وشها مهاب اتفاجئت
رقيه : مهاب
مهاب بص لرقيه : مالك اتخضيتى شوفتى عفريت
رقيه باابتسامه: لا اتخض ازاى انا بس متعوده عليك تيجى متاخر فى حاجه
مهاب اتلجلج : اصل لاقيت مفيش شغل جيت ارتاح شويا
رقيه فرحت : انا كنت لسه هجهز الغدا وابعتهولك
مهاب : مفيش داعى بقى اكله هنا
رقيه باابتسامه: بجد هتتغدى هنا
مهاب : لو مش عاجبك انزل اتغدى تحت
رقيه بفرحه: ساعه وااقل من ساعه والغدا يكون جاهز
مهاب: طيب فنجان قهوه معاكى ممكن
دخلت رقيه بسرعه ع المطبخ تحضر الغدا ودخلت لمهاب كوبايه عصير
مهاب: انا طلبت قهوه
رقيه: العصير افيد ومش هيسد نفسك ع الغدا
مهاب اخد الكوبايه من غير ما يتكلم
اتغدى مهاب مع رقيه وشويا نزل واول ما ركب العربيه سهر اتصلت عليه
مهاب: الو
سهر: انت فين يا بيبى
مهاب بص حواليه : ف مشوار وراجع ع الشركه
سهر: مستنياك
مهاب قفل مع سهر وبص لتليفون وكلم نفسه: هو انا كدبت عليها ليه
اه علشان متعملش حوار ...!!
ومشى بالعربيه وصل لشركه ...!!
__________________________
جه يوم عيد ميلاد مهاب وصحى الصبح عادى وفطر وهما ع الفطار
رقيه : مهاب
مهاب: ايوه
رقيه: هتتاخر انهارده
مهاب: معتقدش لانى طيارتى الصبح بدرى
رقيه: طيب ممكن طلب
مهاب: ايه هو
رقيه: تعمل حسابك نتعشى سوا هنا ممكن ..
مهاب اتلجلج : اممم اوك
رقيه باابتسامه: شكرا شكرا
مهاب لاحظ ان رقيه ابسط حاجه بتفرحها اوى منه ومش زعلانه منه ف حاجه
سابها ونزل راح المكتب لاقى السكرتيره بتكلمه : كل سنه وحضرتك طيب
مهاب : ليه وانتى طيبه
السكرتيره: عيد ميلاد حضرتك
مهاب : يااااه انا كنت ناسى ميرسى ليكى
دخلت سهر المكتب : بيبى كل حاجه جاهزه الطياره الساعه 8 الصبح
مهاب: ان شاء الله
خرجت سهر بعد ما اتكلمت مع مهاب واستغرب انها مش قالتله كل سنه وهو طيب محطش ف دماغه وشاف شغله .... خلص شغله واتفق مع سهر يقابلها ف المطار ويسافروا سوا ,,, روح مهاب ورقيه شافته من البلكونه راحت دخلت بسرعه وحضرت الاكل والشموع ..فتح مهاب باب الشقه اتفاجى من ال شايفه اضاءه هاديه ودخل لاقى شموع ع السفره وهو واقف ومش مستوعب ال شايفه سمع صوت من ناحيه المطبخ بص لاقى رقيه ماسكه تورته : happy birthday to you ,,happy birth day to you ...hapy birth day to ypu mohab ..happy birthday to yo
وقف مهاب من المفاجاءه مش قادر يستوعب ال رقيه عملته : ايه كل دا
رقيه باابتسامه: يلا طفى شمعه السنه الجديده واتمنى امنيه لسنه الجديده ... اتمنى كل حاجه حلوه وان السنه ال خلصت تاخد معاها كل حاجه وحشه حصلتلك
مهاب باصص لرقيه حس بالقشعريره وراح نفخ ف الشمع
رقيه: ان شاء الله تكون سنه احلى من السنين ال فاتت وبدايه خير ليك ويتحققلك كل ال بتحلم بيه وتعيش ف سعاده وراحه بال
مهاب مش قادر يتكلم حاسس انه اتصلب مكانه وقلبه عمال يدق
رقيه : يلا اقعد الاكل هيبرد
مهاب وهو بياكل عمال يجمع نفسه : مش كان لازم كل دا يعنى
رقيه باابتسامه: انا مهما عملت يبقى قليل ليك ودى حاجه بسيطه
مهاب: شكرا
رقيه: انا ال بشكرك انك وافقت تيجى نتعشى سوا قبل ما تسافر
مهاب باصصلها وبيدارى توتره: انا كنت فاضى يعنى موريش حاجه وكده كده كنت راجع بدرى
رقيه باابتسامه حطت ايدها ع ايد مهاب : مش مهم السبب المهم انك معايا دلواقتى .. يارب الاكل عجبك
مهاب دارى توتره بالاكل : اها جميل تسلمى
وهو بياكل قامت رقيه ورجعت بعلبه ف ايديها : اتفضل
مهاب : ايه دا
رقيه: هديه بسيطه اتمنى تعجبك
مهاب فتحها لاقاها ساعه: جميل بس جبتيها منين
رقيه بتضحك: فى اليوم ال تهت فيه كنت نازله علشان اجيبها
مهاب حس بقشعريره : انتى جازفتى انك ممكن تتوهى علشان تجبيلى انا دى
رقيه : ايوه وياريت تعجبك
مهاب بص ع الساعه وبص ع رقيه وافتكر لما دخل الشقه حس انه متلغبط بس ال متاكد منه انه انبسط ..اتعشوا سوا وكل واحد دخل ينام ورقيه فرحانه انها احتفلت مع مهاب بعيد ميلاده ومهاب مش عارف ينام ومش عارف السبب وقلبه عمال يدق ومش فاهم ماله ....!!
__________________________
صحى مهاب الصبح بدرى لاقى رقيه مجهزاله الفطار فطر ونزل وصل المطار كانت سهر مستنياه ركبوا الطياره وسافروا ووصلوا الفندق وكان اوضه مهاب جنب اوضه سهر ... سهر خبطت عليه ودخلت
سهر راحت ناحيه مهاب وحضنته: اخيرا يا بيبى بقينا لوحدنا
مهاب راح براحه بعدها عنه : احنا جايين شغل مش نقضى شهر عسل
سهر بتضحك: لا انا تسيبلى نفسك الشهر دا كله
مهاب مشى بعيد عنها : انا مرهق اوى عاوز ارتاح من السفر علشان عشا بليل
سهر : اوك يا بيبى انا هعدى عليك بليل ننزل سوا
مهاب: اتفقنا
خرجت سهر ومهاب باصص عليها وحاسس بحاجه غريبه مش فاهمه
فتح شنطته يطلع هدوم بص لاقى علبه ال فيها الساعه هديه رقيه مسكها واترسمت ع وشه ابتسامه ورجع حطها تانى ..... جه وقت العشا ولبس مهاب والباب الاوضه خبط فتح وكانت سهر لابسه فستان شبه جسمها كله باين
مهاب: ايه دا كله
سهر بدلع: علشان يا بيبى متبصش لحد لما ننزل غيرى
مهاب بيضحك: يلا بينا
نزلوا ع العشا واتكلموا ف الشغل وبعدها اتفقوا يشربوا احتفال بالاتفاق
سهر قامت وصبت لمهاب كاس كبير مليان احتفالا وهى كمان ومسكالكاس وقربه من بوقه افتكر كلام رقيه ع الشرب عمل نفسه شرب وحطه تانى ..سهر كانت قاعده عمال تهزر وتضحك مع الضيوف الاجانب ومنهم واحد طلب منها ترقص وقامت ترقص مهاب اضايق من الموقف والجو فاستأذن وقام خرج طلع اوضته .. شويا وسهر جتله الاوضه ومعاها ازازه ويسكى ...!!!
مهاب مستغرب: ايه دا
سهر شبه سكرانه: هنحتفل مع بعض يا بيبى
دخلت سهر وجابت كاسين : انا لاحظت انك مشربتش معانا فقلت نشرب سوا
مهاب: بس انا مش عايز يا سهر وانتى كفايه كده
سهر بصت لمهاب: ليه ومن امتى انت بتقول لشرب لا احنا مش وقت شغل
مهاب: بس احنا هنا لشغل وانتى كفايه كده وروحى اوضتك نامى
سهر : مهاب انت فى حاجه مغيراك
مهاب اتعدل فى كلامه : لاحظى ان لسه فى عقد مش مضيناه علشان باقى المعدات وانا قلقان طبعا
سهر قامت حط ايدها حوالين رقيهوحضنته: متقلقش يا بيبى انا ظبطتلك كل حاجه والعقود هتتمضى من غير كلام
مهاب شال ايدها : طيب يلا روحى نامى
سهر : انت الخسران يلا تصبح ع خير
خرجت سهر ومهاب اخد نفسه وفعلا حاسس انه اتغير وازازه الويسكى قام دلقها ف الحمام ولاقى نفسه طلب عصير شربه وهو نايم ع السرير رقيه بعتتله رساله ع الموبيله بص عليها ** خلى بالك ع نفسك ومتنساش تاكل اكل كويس علشان متتعبش تانى ..ترجعلنا بالسلامه فى امان الله *** قرى مهاب الرساله وابتسم ونام .!!!
__________________________
فى يوم رقيه راحت عند هاله تشوف الحديقه وهى واقفه بعتت رساله لمهاب تطمن عليه زى كل يوم من وقت ما سافر .. شافها هيثم من الشباك نزل بسرعه
هيثم: وانا اقول الدمنيا منوره ليه
رقيه : علشان الشمس موجوده طبعا
هيثم ضحك: ايه الش الرخيص دا ...وبعدين انتى بتهربى منى كل مره ع العزومه
رقيه بتضحك: ماهو انا جايه علشان اقولك عليها عاوزها امتى انا مش معايا رقمك
هيثم : ايه دا ينفع كده يعنى لو جالى شغل هتجيبنى منين
رقيه : نسيت بقى
هيثم مسك موابيلها ورن ع نفسه : رقمى دا سجليه وهتعزمينى امتى
رقيه : امم لو اضى دلواقتى اوكيه
هيثم بفرحه: ياسلام لو فاضى انا فاضى ع طول 5 دقايق اغير وهنزل
رقيه: وانا كمان هقول لخالتو وستناك قدام البيت
هيثم بسرعه غير هدومه ونزل استنى رقيه ف العربيه قدام البيت وخرجت رقيه ومعاها خالتها
خالت رقيه: هيثم خلى بالك ع رقيه
هيثم: متقلقيش يا طنط مش هتوه تانى
خالت رقيه : انبسطى يا روكا ولو ضايقك الولد دا عرفينى
رقيه : متقلقيش يا طنط انا بعرف اخد حقى بنفسى
هيثم: المراه الشرسه
ضحكت رقيه ومشى هيثم بالعربيه
هيثم: هنروح فين
رقيه: بص انا معرفش اى حاجه هنا انت ودينا وانا هدفع تمام
هيثم: اممم تمام كده يلا بينا
مشى هيثم ونزلوا مكان زى وسط البلد ولفوا ع محلات كلوا ايس كريم وقعدوا يتصوروا وراحوا ع مطعم من اختيار هيثم علشان يتغدوا ...!!
رقيه: يااااااااه الاماكن هنا جميله اوى
هيثم: انتى مبتخرجيش خالص
رقيه: لا انا اخرى اخرج اقعد مع الورد والزرع وبس
هيثم: ليه كده حتى طنط زوزو بتخرج
رقيه: مليش ف قعدت الستات الكبار دى والكلام بتاعهم انا برتاح وسط الورد وزرعى
هيثم سرح ف وش رقيه : علشان كده انتى جميله
رقيه بتضحك: تسلم ربنا يخليك بس بلاش اوفر
هيثم: ال بيحب الحاجات الجميله بيبقى جميل يا رقيه ودا هبه من ربنا .. الله جميل يحب الجمال
رقيه: احرجتنى يا هيثم
رقيه غيرت الموضوع: وانت شغلك دا تنظيم ديكور وتنظيم حفلات دا ليه معملتوش ف مصر
هيثم: علشان انا ابتديت ف هولندا وعجبنى الخياه هناك واستمريت وغير كده محبتش اهرب
رقيه: تهرب من ايه
هيثم: من منى ... ال كنت متجوزها
رقيه: هى كانت شغاله معاك
هيثم بنص ضحكه: ايوه ممكن تقولى زميلتى من الجامعه وسافرنا احنا التلاته مع بعض وقلنا نعمل مستقبلنا مع بعض وكل واحد واثق ف التانى كافحت واتبهدلت واتمرمطت علشان الشركه تحط رجلها وتثبت .. وكانت الشركه ضايعه وانا بمجهودى كبرتها وخليتها من اكبر الشركات المعروفه ف تنظيم الحفلات وهى عليها الاشراف وصاحبى .. يمكن اهمالى ليها خلااها تنجذب لصاحبى ..او امانى لصاحبى خلااه يطمع فيا وفى مراتى ... بس ال مش قادر انساه منظرهم وهما بيخدعونى وبيضحكوا قدامى ومعايا وف ضهرى بيطعنونى
رقيه حست بهيثم بيتكلم من غير ما تسأله وملامح وشه اتغيرت مدت ايدها حطتها ع ايده : هون ع نفسك يا هيثم ربنا ليه حكمه ف كل حاجه بتحصلنا
متفكرش ف اى حاجه حصلت ال حصل خلاص مش هيتغير ال بيتغير ال جى ال بايدنا نغيره لااحسن يخلينا ننسى ال فات ... حط اتكالك واملك ف ربنا وربنا كريم بيعطى من وسع .. وجرحك هيطيبه هياخد وقت بس انت متفكرش فيه علشان يروح زى ورق الشجر ف الخريف بيموت ويقع وبيظهر عليه هى الحياه كده ... تفائل بربنا وبال جى احسن
هيثم حس بحاجه غريبه اول ما رقيه حط ايدها عليه وابتسامتها خلى قلبه يدق ومش فاهم من ايه بعد ما كان وشه زعلان وحزين ابتسم
رقيه باابتسامه: ايوه بقىلا ضحكتك حلوه متطبلهاش ولا تحرم نفسك منها
ويلا اطلبلى واحد تشيز كيك شيكولت واتوصى بيا
هيثم ضحك: يا طماعه هو انا قلت علشان هدفع بتستغلينى
رقيه: انت ال صممت تدفع وانا مالى بقى
هيثم ضحك: عينى ليكى ال انتى عاوزاه
قضت اليوم رقيه مع هيثم ووصلها لغايه البيت ونزلت وهو نزل معاها
هيثم : اليوم كان جميل يا روكا بجد ميرسى جدااا
رقيه: انا ال بشكرك بجد ع الخروجه ال ع حسابك دى
هيثم: بس ف كوبايه شاى عندك
رقيه بتضحك: مش بتنسى حقك خالص
هيثم: واسف انى نكدت عليكى شويا
رقيه : متقلش كده انت بجد شخص انا بعتز بيه جدااا واى وقت تحب تتكلم انا موجوده نحط السور وتعالى
هيثم بيضحك: اشطه اتفقنا
رقيه باابتسامه: تصبح ع خير
هيثم: تصبحى ع خير
فضل واقف هيثم لغايه ما دخلت رقيه البيت وروح البيت ودخل اوضته رمى نفسه ع السرير وحط ايده ع صدره وابتسامه اترسمت ع وشه ...!!!!
__________________________
فى يوم رقيه خرجت تتمشى عند البيت شافها هيثم نزل بسرعه وجرى ناحيتها
هيثم: رايحه فين لوحدك كده
رقيه: مفيش هتمشى شويا حوالين البيت
هيثم: وتوهى
رقيه بتضحك: لا متقلقش انا شبه حفظت المكان
هيثم : لالالا مينفعش كده انا هتمشى معاكى علشان انا حاسس بملل
رقيه: يلا بينا
ومع الايام استمرت رقيه كل ما تخرج تقابل هيثم وهو يقولها صدفه يتمشوا ويضحكوا ويهزوا وهيثم يتكلم معاها ويرجعوا البيت ...!!1
__________________________
فى يوم مهاب كان عنده ميتنج وخلصه سهر زنت عليه ينزلوا يعملوا شوبنج ونزلوا موول سهر دخلت تشترى حاجات ومهاب كان بيتمشى عدى ع محل عارض سلاسل وخواتم بيتفرج عليهم عينه جت ع سلسله ع شكل زهره الياسمين ال رقيه زرعاها ف الحديقه عندهم وهى من الانواع ال بتحبها فشدت انتباهه فدخل المحل واشتراها وع وشه ابتسامه لما بص عليها واول ما ظهرت سهر خبى السلسله ف جيبه ودخلت محل تانى سهر ومسك الموبيل اتصل ع رقيه ..!!
مهاب: الو
رقيه: مهاب .. عامل ايه
مهاب بيحاول يتكلم جد: انا الحمد الله انتم عاملين ايه
رقيه: الحمد الله انت عامل ايه
مهاب: انا تمام ..هى ماما عندك
رقيه: لا ليه
مهاب اتوتر: اصل ..اصل كلمتها ومش ردت قلت الاقيها معاكى
رقيه: تحب انزلها بالموبيل
مهاب بسرعه: لالا مفيش داعى انا قلت اطمن عليكم ولو عاوزين حاجه
رقيه: ترجعلنا بالسلامه ودا ال عاوزينه
مهاب : احم.. وانتى مش عاوزه حاجه
رقيه: انت
مهاب: ايه
رقيه: انت ترجع بالسلامه مش عاوز غير كده
مهاب لاحظ قلبه دق بسرعه واتوتر : طيب هقفل دلواقتى علشان ورايا حاجات
رقيه: مهاب .. لااله الاالله
مهاب متنح: سيدنا محمد رسول الله
قفل مهاب مع رقيه ولاحظ قشعريره ف جسمه وقلبه بيدق وفى الحظه دى ظهرت سهر فوقته من توهانه ومشيوا وطول الطريق عمال يفكر ليه اشترى السلسله ...!!!
فى نفس الوقت هيثم كان بيتمشى ودخل محل بيبع سلاسل ودور على سلسله ع شكل ورده واشتراها يديها لرقيه هديه ...!!!
فى يوم هيثم كان قاعد فى الحديقه قدام الورد ال زراعاه رقيه وسرحان اخته هاله قربت منه ولاحظت سرحانه
هاله: هيثم
هيثم مبيردش
هاله: بصوت اعلى: هيثم هيثم
هيثم اتخض: ايه ايه يا هدى براحه
هاله: انت سرحان كده ليه وبقالك كام يوم لازق هنا اشمعنى
هيثم: اصل هنا طراوه والباقى الاماكن حر وبعدين خليكى ف نفسك
هاله: بقى كده ماشى
هيثم : هدى ما تكلمى رقيه تيجى تشوف الزرع دا عامل كده ليه
هاله: ما تكلمها انت وبعدين ماله الزرع عادى اهو
هيثم : انا اكلمها لا انتى قوليها تيجى
هاله: مسكت موابيلها كلمت رقيه وجت
رقيه : صباح الخير
هيثم باابتسامه وفرحه: صباح الجمال
هاله: : صباح الفل سورى لو ازعجتك
رقيه: لا خالص فى ايه بقى
هاله: : الزرع دا شوفيه كده
رقيه بصت : لا عادى ع فكره دا بياخد وقت لغايه ما يكبر
هاله بصت لهيثم لاقته مركز ع رقيه وسرحان : سمعت يا بشمهندس
رقيه بتضحك: واضح ان هيثم منمش كويس
هيثم بسرعه: هو ال يقعد هنا يعرف ينام
هدى : ايه دا .. انا كنت اعرف واحد المفروض يرجع هولندا لشغله من اسبوع ولسه قاعد
هيثم: بتطردينى قدام جارتك ينفع كده
رقيه بتضحك: لا متقصدش داانت منور المنطقه يا بشمهندس
هاله: : استنى هجيب الشاى نشربه سوا
رقيه: لا المره الجايه لانى نازله مع خالتو ..اشوفكم بعدين
هيثم: باى باى
بليل دخلت هدى الاوضه ع هيثم لاقته ماسك سلسله فى ايده وسرحان وع وشه ابتسامه
هاله: : يااااااااه بقالى 5 سنين مشفتكش بالمنظر دا
هيثم اتلجلج: مش تتنحنحى
هاله: : احم احم .. سرحان فى مين يا بشمهندس وايه ال معاك دى
هيثم: لا ابدا عادى
هاله: والله هفرحلك مين قولى
هيثم : بصراحه يالولو معرفش ايه حصلى قلبى ال نسيت انه بيدق ازاى بقى يدق ويقلق نومى ..قابلت واحده من اول مره شوفتها حسيت بصاروخ اخترق قلبى وبقيت عاوز اشوفها ولما بتكلم معاها برتاح وافضفض من غير خجل
هاله: باابتسامه: اخيرررررررررا يا هيثم ف واحده خلت قلبك يدق وانا اقول بقيت تخرج كتير وترجع مبسوط مين المحظوظه
هيثم: تعتقدى
هاله: اتكل ع الله واتكلم معاها بس مش هتقولى مين
هيثم بص ل هدى وهيقول : لا لما اتاكد الاول واخد الرد هعرفك انا هروح اتكلم معاها
هاله: يا مسهل الحال يارب
__________________________
مر الشهر وقرب ميعاد رجوع مهاب وشبه خلص كل حاجه تخص شغله وقبل ما يرجع بيومين حس بتعب وكانت نزله برد عاديه واتاخر عن النزول خبطت سهر عليه وقام فتح
سهر : ايه يا بيبى فينك كده ..؟
مهاب بيكح: لا مش هقدر انزل يا سهر انزلى انتى
سهر بعدت عنه : انت تعبان
مهاب بيكح: شويا هرتاح وهبقى كويس
سهر وهى بعيده: لا الف سلامه عليك تحب اكلمك دكتور
مهاب: لا شكرا انا طلبت دوا وهيجيلى
سهر : معلش يا بيبى مش قادره اقربلك لتعى منك وانا بتعب اوى ف ..هخرج انا دلواقتى ولو احتجت حاجه كلمنى وانا هبعتلك ال انت عاوزه
مهاب اندهش من رد فعلها : لا شكرا
جت تخرج سهر ..مهاب نده عليها: سهر
سهر: ايوه
مهاب: هو انتى لما كنت تعبان اخر مره مجتيش تزورينى ليه
سهر بلجلجه: بصراحه يا مهاب انا بخاف اتعب او اتعدى من اى حد فبتجنب اكون ف الاماكن ال فيها امراض معديه وسمعت ان الدكتور قال ممنوع زياره علشان العدوى وكده والحمد الله انت بقيت كويس
مهاب متنح: اها ..
سهر: اقولك سلام انا دلواقتى
خرجت بسرعه سهر واتفاجئ جداااا مهاب من رد فعلها لما عرفت انه تعبان وفكر انه لما تعب المره ال فاتت كانت مفكرتش ولا مره تزوره واستنت شويا واتصل ع اوضتها لقاها مش موجوده وسأل عليها فى الريسبشن عرف انها سهرانه فى الديسكو قفل مهاب وفاجاءه جت ف باله رقيه وال عملته لما تعب وانها تعبت ومكنش همها ومسك موبيله وقعد يبص عليه كتير لغايه ما ..!!!اخد القرار .
__________________________
ف يوم رقيه كانت قاعده فى الحديقه وسرحانه بتفكر ف مهاب سمعت صوت من وراه : رقيه ...
بصت بسرعه رقيه ع الصوت :....
___________
يتبع
ليست هناك تعليقات:
إرسال تعليق