فاطيما: انت حيوان علشان تغيب كل دا فاجاءه
معتز بيضحك: مكنتش اعرف انى هوحشك اوى كده ..
بس عاوز اقولك انك وحشتينى اكتر بكتيرررررررررررر
فاطيما بصوت زعلان: لا ياراجل اضحك عليا 4 شهور ويومين يا معتز
معتز بيضحك: انتى حسباهم باليوم
فاطيما: رخم
معتز : بجد انا اسف ع الغيبه دى بس مش بمزاجى بجد ..وغير كده كنت عاوز لما اكلمك اكلمك وافرحك لانك متعوده منى ع الاخبار المنيله قلت افرحك من نفسك مره
فاطيما اترسمت ع وشها ابتسامه ونسيت ال 4 شهور ويومين : ايه الخبر الحلو
معتز : الخبر الحلو امممم تدفعى كام
فاطيما: بطل رخامه بقى
معتز:بذمتك موحشكيش رخمتى دى
فاطيما: لا
معتز: خلاص مش قايل
فاطيما: بطل غلاسه بقى .. ايه الخبر
معتز:علشان بحبك بس هقولك الخبر هو انى سيبت الشغل الل كنت فيه واشتغلت شغلانه تانيه احسن منه بكتيررررر
فاطيما: بتاع السفر دا بجد كويس اوى
بس دا يخليك تغيب 4 شهور
معتز: استنى بس عليا اسمعى الحكايه قبل جنانك ما يطلع .. انا اصلا لاقيت اعلان عن تقديم وظايف فى شركه طيران سعوديه فقلت اجرب ..وكان من شروطها لقبول اخد كورس تدريب لمده 4 شهور لو نجحت فى امتحانه هتقبل ومردتش اقولك علشان مكنتش عارف النتيجه ايه وقلت استنى لما اخلصه وامتحن واعرفك بالنتيجه وهى انى نجحت واتقبلت الحمد الله
فاطيما: بجد ..مبروووك الف مبروك ..بس استنى انت قولت طيران السعوديه يعنى مش هتكون ف مصر
معتز: لا هكون بس مش دايما انا هكون فى قسم العلاقات العامه وهسافر فى كذا بلد مع الشركه لفروعها يعنى لانها فاتحه فروع فى كذا بلد طبيعه الشغل كده
فاطيما: هو انا اخلص من سفر محافظات هيطلعى سفر بلاد ايه الشحططه دى
معتز: بس دى احسن بكتير مرتبها مجزى جدااا دا غير السفر والاقامه وكل حاجه ع حساب الشركه انا حاسس ان دا عوض ربنا ليا لصبرى انا وانتى
فاطيما: انا وانت
معتز: اه انا وانتى .. انا كنت عاوز اخد خطوه بس مكنتش عارف اعمل ايه سيبتها ع ربنا سهلى طريقى ..اثبت ف الشغل والدنيا تكون تمام وهخطفك من بيتكم رسمى
فاطيما اتكسفت: طيب ياعم الطياره ..هتبتدى امتى شغلك
معتز: من الاسبوع دا الشركه الرئيسيه ف السعوديه هنروح هناك شهرين كده تدريب فعلى غير الاولاانى نعرف نظام الشغل ايه وكده وبعدين نرجع ع فرع مصر وهنشوف خط السير ازاى وربنا يسهل ...ادعيلى
فاطيما: ربنا يوفقك ويصلحلك الحال يارب
معتز: اقولك سر يا طيما
فاطيما: قول
معتز: ال4 شهور دول زى سنه مروا عليا ودايما فى بالى وافتكر كلامنا واضحك افتكرونى مجنون بجد ومكدبوش انا فعلا مجنون بيكى
فاطيما مبتسمه ومنشكحه بالكلام : ثبتنى ثبتنى ..ع الله بس لما تشوف مزز بره والمضيفات عينك متزوغش وتنسانى انا عارفه الرجاله عينيهم محتاجه مقوار
معتز بيضحك: صدقينى مهما شوفت عينى وقلبى مفهمش غير طيما
فاطيما: تسلملى يارب.. ممكن طلب
معتز: أومرينى
فاطيما: متغبش كده وع قد ما تقدر طمنى عليك انا بقلق عليك وبتوحشنى بجد من غيرك حاسه بوحده فظيعه ويومى طووويل
معتز: سلى نفسك بشغل لغايه مالدراسه تبتدى كده بس المهم يكون شغل كويس مفهوش بهدله ..
فاطيما: هشوف .. قريت رسايلى
معتز:اها قريت رسايلك وفرحت جدا بيهم وعاوز اقولك والله انا الوحيد اللى من غيرك ..واول فرصه هطمنك متقلقيش ...وطول ماانتى بخير انا هكون بخير
فاطيما: يارب دايما تكون بخير
معتز: كنتى بتعملى ايه بقى
فاطيما: باكل بطاطس بالكاتشب ليا وليك
معتز: الله كان نفسى فيها
فاطيما: متقلقش مليت التنك
وكملت فاطيما تتكلم مع معتز لغايه ما بطاريتها فضيت ودخلت اوضتها وقالتلهم انها هتنام وحطت موابيلها ع الشاحن ورنت ع معتز اتصل بيها وفضلوا يتكلموا ويحكوا لصبح ....!!!
ابتدا الدراسه وميمى عرفت ان عماد لسه متحددش ميعاد نزوله وهى وفاطيما شبه عاطلين وميمى مش لاقيه شغل .. فأقترحت ع فاطيما ينزلوا يدورا ع شغل مؤقت ..راحت ماريا اشتغلت ف مركز طبى تبع الكنيسه الل بتروحها وفاطيما فى مركز طبى تانى جنب بيتها كان الدكتور معرفه باباها وبعد مقاوحات وافق ابوها انها تنزل وهى كده كده جنب البيت ... فاطيما كانت متفقه ع معتز انها تحكيله ع خط سيرها طول ماهو غايب وتبعتله ف رساله ع الفيس لان موبيله مش شغال وكانت فعلا بتحكيله ع كل حاجه من اول ما صحيت لغايه ما بتنام ...!!
نزلت فاطيما وماريا الشغل المؤقت و فى يوم صحيت فاطيما بدرى الساعه 9 ودا لان البنت الل معاها غيرت ميعاد الشيفت علشان رايحه مشوار ..صحيت فاطيما مقريفه لانها مبتحبش تصحى بدرى وكان موافقتها ع الشغل انها هتمسك شيفت بليل من 4 ل 11 ..صحيت فطرت ونزلت المركز وقعدت عند عياده الباطنه تتدخل العيانين لدكتور وكده ...مع الوقت العياده مليانه عيانين والدكتور مجاش تتصل عليه مبيردش ويكنسل ..الساعه بقت 2 والدكتور ميعاده 12 ومجاش لسه ولا اعتذر ... لاقت فاطيما ان فى ناس كبار عيانين وتعبانين من القعده واطفال بتعيط ومش عارفه تعمل ايه ... راحت كلمت ماريا ع الشات :
فاطيما: ميمى
ماريا مردتش
فاطيما: ميمىىىى ميمىىىىىىىى ميمىىىىىىىىى
ماريا: ايوه ايوه يا طيما
فاطيما: هو انتى انهارده قاعده عند دكتور ايه تخصص ايه يعنى
ماريا : ليه
فاطيما: متردى عليا وانجزى
ماريا : باطنه بس ليه
فاطيما: وشغال ولا لسه مجاش هو كمان
ماريا: لا شغال يا ماما دا ميعاده الساعه 11 ومن 11 ونص شغال بس ليه
فاطيما : هو كويس صح ..مضمون يعنى
ماريا: اه الدكتور وليم ممتاز جدااا عن اللى قبله بس ليه فهمينى
فاطيما : اقفلى وهقولك
قامت فاطيما تعمل محاوله اخيره و تتصل بالدكتور مبيردش .. راحت بصت لعيانين وقربت منهم : انت الل خلتنى اعمل كده
فاطيما: الف سلامه عليكم ...
العيانين: هو الدكتور اتاخر كده ليه ولا هو مش جى
فاطيما مش عارفه ترد: والله ما اعرف
راجل كبير : انا تعبان اوى حرام الل بيحصل دا كان قال كنا روحنا بيوتنا
فاطيما : بص يا حاج هو واضح انه ف ظروف عنده وانت والل موجودين حالات تعبانه اوى مش مستحمله القاعده ..صح ؟
كلهم: ايوه
فاطيما : عارفين مركز مريم العذراء الل فى وش كنيسه مريم العذراء
ردوا : ايوه
فاطيما بصوت واطى ليهم بعد ما بصت حواليها : هناك دكتور وليم ممتاز روحوله هو هناك دلواقتى ومفيش زحمه هناك وصدقونى ممتاز وانا هجحجزلكم من هنا تروحوا تدخولوا احجزلكم ولا ايه ؟
مدام شايله ابنها: يعنى ع ضمانتك
فاطيما: الضامن ربنا لان بايده الشفا بس اسمع انه ممتاز وبدل قاعدتكم دى واغلبكم تعبانين والجو حر وفرهده وبراحكتم بس بشرط هتروحوا هنا محدش يعرف يعنى انتم مشيتوا براحتكم تمام ...
مشيت خطوتين سمعت: خلاص احجزيلنا
فاطيما بصتلهم: قولولى الاسامى كده واحد واحد
مسكت موابيلها وفتحت الشات وكتبت الاسامى وبعتتها لماريا وقالتلها احجزيلهم واخدتها ماريا وسجلتهم وراحولها ودخلوا كشفوا ..وجه الدكتور لاقى العياده فيها 3 بس :
الدكتور: فاطيما هى العيانين فين
فاطيما بملامح دهشه : معرفش يادكتور هما كانوا تعبانين لاقيتهم قالولى ميعادهم الساعه 12 ودلواقتى 3 روحوا باين معانى قلتلهم ان حضرتك ممتاز ومش هتتاخر يعنى برضه مشيوا فمعرفش
الدكتور: كان ف مشوار مهم اعمله الاول
فاطيما: بس كانوا تعبانين اوى مستحملوش القعده كنت حضرتك اتصل بالمركز وخليتهم يحجزوا ف وقت تانى ..الجو حر وفرهده
الدكتور بصلها: دخليلى المريض بعد 5 دقايق
فاطيما: حاضر
واتكرر الموقف دا تانى المرادى لماريا كان دكتور الاسنان عندهم متاخر وفى ناس تعبانين بعتت لفاطيما وكان فى دكتور كويس عند فاطيما اسنان وعملت نفس ما عملت فاطيما وبعتت العيانين ع فاطيما ... اتكرر الموضوع دا بين ماريا وفاطيما كذا مره لغايه ما اشتكى دكتور ل اداره المركز الطيبى والمدير طلب يتكلم مع فاطيما :
فاطيما: عاوز الحق يادكتور ولا اكدب
الدكتور: الحق طبعا يا طيما لولا انك بنت عبد المنعم عشره عمرى كان زمانى طردتك من غير ما اسمعك
فاطيما: الحق بقى بيقول ان الدكتور يستنى العيانين انما فى دكاتره هنا بيستهبلوا بمعنى يستهبلوا .. يعنى ايه دكتور يتأخر 3 ساعات وسايب عيانين تعبانين منهم اطفال وكبار مش مستحملين ... دا ربنا اداله هبه انه يخفف عنهم مش يتعبهم .. فبصراحه انا ببعتهم لدكاتره كويسيين فى شغلهم ومواعيدهم ... معرفش انا ايه مريض يستنى دكتور دا ..طيب لو مات يعنى او حالته اتدهورت هتبقى ايه النتيجه .. صعبوا عليا انا دورت ع حل وعملت كده وفى نفس الوقت الدكاتره الكويسين الل هنا بيجيلهم عيانين من المكان الل ببعت ليه العيانين ... يعنى ممكن تقول تبادل عيانين ..
الدكتور بيضحك ع طريقه فاطيما: بس كل دكتور وظروفه ومينفعش الل بتعمليه دا كده بتخسريه عيانين
فاطيما: هو الل بيخسر عيانينه .. لو اهتم بمواعيده وبيهم هيكتروا مش يتنك عليهم ومفيش حاجه اسمها ظروف هما بياخدوا فلوس ومرتب ع كشفهم دا والعيانين بيدفعوا فلوس علشان يخفوا ..نقوم ايه نمرمطهم وبفلوسهم ايه المرار دا
الدكتور بيضحك : لولا دمك الخفيف كنت قفشت منك .. بس يا طيما انا هعديلك الل فات لان الدكاتره اشتكوا وعرفوا انك بتوزعى العيانين .. فميتكررش دا تانى
فاطيما: موعدش حضرتك
الدكتور: نعم
فاطيما: انا مش هستحمل اتفرج ع حد تعبان وبيتوجع واقف ساكته انا اسفه ... وهزيل عنك الحرج وانا همشى ومش جايه تانى وشكرا ع الفتره القصيره دى ..بعد اذن حضرتك
ومشيت فاطيما والدكتور معرفش يقولها ايه وسابها براحتها ..!!
عدى الترم الاول وفاطيما معندهاش امتحانات وجه الترم التانى اللى هتعيده كله .. وكان استمر مكالمات معتز لفاطيما كل ما بينزل مصر ويفضلوا يتكلوا ويحكوا فى يومين الاجازه وهو يشوف تقريرها اليوم الل بيتبعت ..ففى يوم كانوا بيتكلموا شات :
فاطيما: انا مبقتش عارفه اكلمك زى الاول بقيت استناك زى العيد والله
معتز: انا احلى ولا العيد
فاطيما: انت طبعا وفى حاجه مضايقانى اووى شوفلى حل
معتز: منى يا خبر لالالا قولى مقدرش ع زعل حبيبى انا
فاطيما: انا بكون مضايقه وشايله منك اوووى واول ما بتكلمنى بنسى ..الزعل بيتبخر دا من ايه ..انت عاملى عمل نفسى اخد موقف مش عارفه
معتز بيضحك: اه عاملك عمل فى قلبى
فاطيما: ياقلبى ..
معتز: لدرجه دى بتحبينى يا طيما
فاطيما: انت لسه هتسأل ..انا مبحبش غيرك
معتز: وانا بحبك انتى ...
فاطيما: ثبتنى ثبتنى
معتز: لا ابدا دى الحقيقه
فاطيما: علشان واحشنى هعديها ماانا ياما عديت مجتش ع ديه
معتز بيضحك: ايوه انتى القلب الكبير .. صحيح شدى حيلك بقى الامتحانات قربت اهو عاوزين نقفش اليسانس يا طيما
فاطيما : ان شاء الله ربنا يسهل
معتز: طيما كنت عاوز أسالك سؤال
فاطيما: اتفضل ؟
معتز: انتى ممكن تزهقى منى .. يعنى تتعبى وانتى مستنيانى كده .. عندك طاقه تستحملى ولا فصلتى
فاطيما: طول ماانا معاك لا هزهق ولا هتعب ولا همل .. انا ع قلبك
معتز: لا غلط ..انتى فى قلبى
فاطيما: يعنى انت بتقولى انى ف قلبك وانا مستحملش ..حبك الل مشجعنى ومقوينى يا معتز ... ربنا يخليك ليا ..وعاوزه اقولك انا هنا مستنياك ومش هسيبك
معتز: بحبك
فاطيما: بحبك
وجه وقت الامتحانات وفاطيما ف نص الليل خارجه من اوضتها دخلت قعدت ف المطبخ اخوها محمد داخل يعمل لنفسه شاى شافها اتخض لاقاها قاعده ع الارض ومفتحه حلل المحشى وبتاكل والنور مطفى :
محمد: طيما .. يخرب عقلك كنت هموت من الخضه
فاطيما بصتله : بس انت ممتش اهو شحت واحد قدامى اموت واعرف انت بتطول ازاى
محمد: زى ماانتى بتتخنى ازاى .. ارحمى نفسك مفتحه حلل المحشى وبتاكلى والساعه داخله ع الفجر كده ..
فاطيما: بفكر وانا مبعرفش افكر وانا جعانه بصراحه فقلت املى التنك وربنا يسهل
محمد: ودا بدل ما تذكرى كلمتين او تتوضى وتصلى ركعتين لله تدعى فيهم .. الله يرحم الثانويه مكنتيش بتقومى من ع السجاده كنا قربنا نناديكى يا حاجه
فاطيما بتتضحك بسخريه: وانا مستعده اخليهم يندهوك يا مرحوم امشى اطلع بره سيبنى لوحدى
محمد بيبص حواليه: ع فكره المطبخ دا ملكيه عامه يعنى بتاعنا كلنا انا مش ف اوضتك
فاطيما: هو انا ف المطبخ ..انا افتكرت دخلت اوضتى
محمد بيضحك : واضح ان الموضوع عميق عمق حلقه الورق عنب
فاطيما بصت لاقت ماسكه حله ورق عنب : امشى وتعالى كمان شويا امشى
محمد: الله عاوز اعمل شاى
فاطيما: امشى دلواقتى بدل مااقوم ارمى الشاى ف الزباله مجنونه اعملها اخرج
محمد اتخض: البت اتجننت
ومشى محمد وفاطيما رجعت ل الاكل والتفكير : هتعملى ايه يا طيما
هتعملى ايه يا طيما وخصوصا بعد اللى سمعتيه ..
"فلاش باك :
فى نفس اليوم فاطيما كانت خارجه من اوضتها سمعت حوار بين امها وابوها
امها: احسان بتزن عليا عاوزه طيما لمحسن وانا مش عارفه اقولها ايه
ابوها: طيما لسه بتدرس لما تخلص وتاخد الليسانس يحلها ربنا
امها: دى عاوزه خطوبه والجواز بعدين وبعدين محسن ميتعوضش يا منعم
ابوها: هو ميتعوضش فعلا اخلاق وتربيه ومستقر وانا اتمنى لبنتى كده .. بس ياجيهان احنا اتفقنا لما طيما تخلص امتحانات علشان متشغلش بالها
امها: طيب انا هطمن احسان مؤقتا وان شاء الله نفرح ف الصيف
ابوها: ان شاء الله
سمعت فاطيما الكلام دا انصدمت معرفتش تعمل ايه فاتوغلت فى الاكل علشان توصل لقرار وترسم خطه الامتحانات وخطه مضاده لا توكسافين وفازلين ...!!
كان صابح امتحان فاطيما وابتدت فاطيما بتنفيذ الخطه ولاحظت امها انها مقامتش من النوم وراحتلها لاقتها تعبانه وماسكه بطنها :
مامتها: مالك يا طيما
فاطيما: بطنى وجعانى يا ماما
مامتها: من لغك بليل حماده قالى انك كلتى محشى باافترا معرفش انا فى ايه
فاطيما بتتوجع: هو انتى جايه تشوفى مالى ولا تقطمينى اه يا بطنى
ومره واحده قامت فاطيما تجرى ع الحمام وقعدت ترجع ومن كتر الترجيع اغمن عليها ومع الوقت كان وقت الامتحان عدى .... راحت فاطيما 4 امتحانات حلت فى 2 ومحلتش فى 2 وكده فاضلها ماده ومش عارفه تعمل ايه فصحيت الفجر وعمال تصرخ من الوجع: اه يا دراعى اه يا دراعى
دخلوا عليها مخضوضين : فى ايه
فاطيما: وقعت ع السرير ع دراعى مش قادره احرك كف ايدى ..اروح الامتحان ازاى انا
باباها من قلقه: مش مهم الامتحان المهم نطمن عليكى لبسيها يا جيهان نروح نكشف عليها
فاطيما تنحت كشف يعنى اشاعه يعنى مش هيبان حاجه : دى مخبوطه يا بابا خلاص هروح الامتحان وامرى لله
بعد مقاوحات لبست وراحت الكليه ورجعت مثلت العياط انها معرفتش تمسك القلم وتتكتب وجابت علاج من الصيداليه وهتبقى كويسه .... النتيجه لحوار دا كله ان فاطيما لما النتيجه ظهرت نجحت ف مادتين وشالت 4 وهتعيد السنه تانى حست فاطيما ان كده خطتها نجحت (غلط اللى عملته دا ) وفى دى استغرب باباها ان فاطيما متأثرتش بانها سقطت لتانى مره ع التوالى واستغرب من تصرفات توحا معاها فقعد مع جددتها واتكلموا بالعقل وجددتها مقالتش غير "انها خايفه تجوزوها غصب عنها علشان كده بتتعمد تسقط " فقرر يتكلم مع فاطيما فدخل عليها الاوضه لاقاها قاعده قدام الللاب وبتسمع منير وبتاكل ف شيبسى ..:
باباها: مشغوله يا طيما
فاطيما: لا يا حبيبى تعالى
قعد باباها وبصلها: انا مش عاوزك تزعلى ع سقوطك لتانى سنه ف اليسانس يا طيما
فاطيما اتحرجت: نصيب والحمد الله ماهو حضرتك شوفت الل حصل
باباها : اها شوفت الل حصل بس مش عارف سبب الل حصل ومهما كان السبب ميستهلش تضيعى سنتين من عمرك ولا ايه
فاطيما : ها
باباها : انا اتكلمت مع توحا وقالتلى انتى ليه عملتى كده
فاطيما قلبها وقع فى رجليها وانه عرف موضوع معتز: قالت ايه
باباها باابتسامه ومسك ايد فاطيما يطمنها: انك خايفه مننا نغصبك ع حاجه
احنا من امتى يا طيما بنعمل معاكى كده او غصبناكى ع حاجه .. حصل قبل كده؟
فاطيما: لا
باباها: يبقى محصلش العمر دا كله استحاله يحصل دلواقتى وانتى عروسه
فاطيما بسرعه: اهى عروسه دى الل رعبانى
باباها: انتى لما سمعتى كلامى انا ومامتك دا كلام بندردش سوا احنا مجبناش مأذون وجوزناكى .. ودا مش سبب يخليكى تسقطى تانى ... ايه الفايده من كده احنا لو عاوزين نغصبك مش هنستنى النتيجه ممكن نتجوزك ونقولك كملى ف بيت جوزك
فاطيما متفاجاه: بجد ممكن تعملوا كده
باباها: انتى لدرجه دى مش واثقه فينا انتى مكنتيش كده ايه غيرك ... وخلاكى تعملى كده
فاطيما: مش عارفه انا دماغى جت كده
باباها: وانا الل بحلف بعقلك ورزانتك طلعتى مفوته ... حبيببه بابا انا عاوزك طول ماانا عايش متقلقيش من حاجه او تخافى طول ماانا عايش لا هتتغصبى ع حاجه ولا هتعملى حاجه مش عاوزها بالمقابل حافظى ع مستقبلك وحياتك متخفيش يا طيما وانا ف ضهرك ومتضيعيشاحلى سنينك بسبب خوف ومن غير ترتيب كده ..بلاش تفويت دا وارجعى طيما الل بنحلف بعقلها وتصرفاتها وبكررها متخافيش وانا موجود ف الدنيا
فاطيما رمت نفسها ف حضن باباها وبتعيط: انا اسفه يا بابا انى فكرت لوحدى ونفذت من غير ما اتكلم معاك .. انا اسفه
باباها باس راسها: واسفك مقبول بس ميتكررش تانى ممكن اى حاجه تقلقك كلمى معايا اعتبرينى صاحبك من صحابك الل بترغى معاهم ومتقلقيش الشعريتين البيض مأثروش يعنى انا شباب
فاطيما باست خد باباها: سيد الشباب يا حبيبى
باباها: وعد مش هتعملى كده تانى واى حاجه هتتكلمى معايا
فاطيما باابتسامه: وعد
قام باباها باس راسها
باباها: قوليلى بقى عاوزه ايه من تحت اجيبه وانا جى
فاطيما: هتعزمنى ع العشا يا منعم
باباها: والحلويات كمان
فاطيما: لا انت رنلى وعرفى انت فين وانا انزل اجيب حاجتى بنفسى وانت تحاسب
باباها ضحك: حاضر من عنيا ساعه وهكلمك
فاطيما : وانا ومعدتى ف انتظارك يا حبيبى انا اموووووواه ..
ظهرت نتيجه محمد اخو فاطيما واتخرج اخيرا وبقى مهندس محمد عبد المنعم رسمى والزغاريط اشتغلت ف البيت والكل جه يهنى وطيما نسيت سقوطها وفرحت بااخوها اوى .. وفى يوم وهما قاعدين يتعشوا :
محمد بيكلم طيما: ياترى احط البكاليوريوس فين ياترى
طيما بصتله: حبيببى عندك حيطان الشقه كتير وفاضيه اختار المكان الل انت عاوزه وسيبلى المراتب مااحنا اتفقنا ولا ايه
محمد: يا سخريه القدر انا اتخرج قبل اختى الكبيره ..اختى الكبيره
باباه: بس يا محمد مضايقش طيما
فاطيما: معرفش انا مجبتوش ولد تانى ليه كان زمان ابو لسان طويل دا علقوه ف الجيش ياحظك يا طيما
مامتها: ليه حرام عليكى يا طيما حماده حبيببتى ميتبهدلش
فاطيما: ميتبهدلش .. هو الجيش بهدله دا مصنع الرجوله يا ست جيجى
محمد: مكنتش اتخيل انك بتحبينى اوى كده يا طيما
فاطيما: داانا بحبك من معاميعى
محمد: والله لو دورت مهلاقى مكان من الحشر بتاعك
فاطيما: يارب ياخدوك الحى ويعملولك ازاله ع طولك دا
محمد : وانا الل كنت عاملك مفاجاءه خساره فيكى ياام لسان طويل
فاطيما: يا حسره انت ومفاجاءه خير هتدينى البكاليوريوس بتاعك اتفسح بيه شويا
كلهم ضحكوا .. محمد: ياام لسان طويل كنت هاخدك معايا شرم يومين طالعهم مع اصحابى وعامل حسابك
فاطيما: ومين الل دفع انت لالالا استحاله
محمد: شوفتى بقى البذخ
مامتها: والله فرصه تخرج شويا دى مبتنزلش الشارع ولا بتخرج وع طول قدام اللاب وموابيلها
باباها: روحى يا طيما غيرى جو
فاطيما: اممم هفكر وهرد عليك
محمد: لا مفيش تفكير ردى حالا احنا مسافرين كمان يومين
فاطيما: والبت ميمى اعمل حسابها
مامتها: ميمى عند ماريان خليكى ف نفسك
فاطيما: ميمى نفسى يا ست .. لو فاضيه هتيجى معايا وهدفعلها انا
محمد: ماشى يا ختى شوفيها بس انتى اكيد
فاطيما: ان شاء الله
خلصت فاطيما عشا ودخلت اوضتها وفتحت الفيس وبعتت لمعتز انها مسافره يومين مع اخوها وحكتله ...!!!
كلمت فاطيما ماريا وعرفت انها مطوله عند ماريان ومش هينفع تسافر معاها فراحت تسافر مع محمد واصحابه ووصلوا لفندق الل حاجزين فيه وفاطيما قاعده حاطه سماعات الهاند فرى ف ودنها ولابسه شنطه كروس مليانه حلويات وماسكه كيس شيبسى تاكل منه ... نزلوا وطلعوا اوضهم ومحمد كان قعد فاطيما مع بنت زملته اسمها ياسمين ف اوضه واحده ...
فاطيما رمت نفسها ع السرير: يا مفاصلى ياانى ايه خرجنى من بيتنا معرفش
ياسمين: اعتبريها خروجه يا طيما
فاطيما: هو علشان نجح بيذلنى انا عارفه
ياسمين: لا بالعكس دا اول شخص فكر فيه محمد اول ما قولنا رحله قالى طيما تيجى معانا تغير جو انا عاوز اخرجها ...
فاطيما بصت لياسمين: قالكم كده ولا قالك
ياسمين اتوترت : ها
فاطيما: اصل طيما دى بيقولهالى هو والناس القريبه ليا معتقدش ان اصحابه عرفينى علشان يتكلم بعشم كده ويقولولى طيما
ياسمين بتوتر : لا ماهو قالى كده
فاطيما بتضحك: قالك... طيب ماشى
ياسمين بتوتر : انا هاخد دش علشان الطريق وكده
دخلت ياسمين بسرعه وضحكت فاطيما عليها : هو باين محمد ابو نخله رابط مع شجره ولا ايه ..باين سفريه فل الفل
شويا ونزلوا علشان يتغدوا وخلصوا الغدا وفاطيما فضلت قاعده ف الكافتيريا جايبه طبق جاتوه وشوب كبير ساقع بتشرب منه محمد اخوها قربلها
محمد: يخربيت طفستك لا راحمه نفسك هنا ولا ف السنطه
فاطيما: عاوز منى ايه ياعم انت .. ركز انت مع اصحابك
محمد: انا مطلعك علشان تغيرى جو وتشوفى ناس والبحر وتنبسطى
فاطيما: انا مبسوطه عليهم شويا جاتوه بيدوب كده بيدوب
محمد مسكها من ايديها: قومى عاوزك
فاطيما: متشدنيش استنى ياعم استنى
محمد: قومى وارجعى كملى عاوز اعرفك ع حد
فاطيما بصت لمحمد : الشجره
محمد: ايه
فاطيما قالت لجرسون: شويا وجايه سيب الل ع الترابيزه زى ماهو
محمد بيضحك: متحركش حاجه علشان دى ممكن تفترسك
فاطيما: انا عارفه ايه محطوطه وهرجع ارفه البصمات
ضحك الجرسون ومشيت فاطيما ع البحر مع محمد وكانت ياسمين قاعده .. محمد باابتسامه: ياسمين ..اعرفك بطيما .. طيما اعرفك بياسمين
ياسمين باابتسامه: شرم منوره
فاطيما باصه لجو: دا نور ربنا ع فكره
محمد خبطها: طيما بتحب تهزر ع طول يا ياسمين
ياسمين: اها .. تليفونها رن وبعدت ياسمين
محمد: كيلو السكر الل ف لسانك لميه ها انا عاوز اعرفك على ياسمين
فاطيما: ليه ها ليه
محمد بااحراج: علشان ..علشان
فاطيما : بتحبها صح .. قول قول
محمد باابتسامه: بصراحه اه .. وكنت ناوى اتقدملها بس بعد ماهى تخلص لانها فاضلها سنه اكون انا اشتغلت وظبطت امورى ..
فاطيما: ماتروحلهم بالشهاده ياعم دانت بشمهندز
محمد: مينفعش يافالحه اقولهم ايه انا لسه متخرج ممعيش حاجه لا طبعا اظبط حالى واوضب الشقه واستلم الشغل واتقدملها علشان استاهلها ..
فاطيما باابتسامه مسكت خدود محمد وشبت لانه اطول: والله وكبرت يا صغنن وبتحب وبتتكلم ع المسئوليه يا صغنن
محمد زق ايديها: اعقلى يا طيما الناس
فاطيما بتضحك: انت بقى مطلعنى علشانها اعترف
محمد: لا ابدا بس ميمنعش اننا ننتهز الفرصه ولا ايه
فاطيما: ماشى ياعم الانتهازى
شاف محمد ياسمين مقربه منهم : طيما اظبطى الحياه ها
فاطيما: العشا ع حسابك اشطه
محمد: يا طفسه اشطه
قربت ياسمين .. فاطيما: يا هلا حبيببتى حبيببتى شرم منوره
ياسمين: دا نور ربنا
فاطيما ضحكت: بترديهالى اشطه ..
حماده انا وياسمين هنبقى انتيم حبيببتى حبيببتى
ياسمين بتضحك: انا بهزر
فاطيما: وانا كمان وفرصه سعيده يا قمر
محمد: اسيبكم انا بقى مع بعض واشوف الشباب
مشى محمد وفضلت ياسمين مع فاطيما بيتكلموا واتصاحبوا وكانت ياسمين بنوته لذيذه وحكت لفاطيما انها حبت محمد اخوها من اول ما دخلت الكليه لانه ساعدها كتير ولسه محمد معترفها من قريب ومن حبها ونظرتهم كانت واثقه انه بيحبها وصبرت واستحملت 4 سنين .. فرحت فاطيما بكلامها وحست ان الل بيحب بيعمل المستحيل ويصبر ومفيش لا .....!!
قضت فاطيما اليومين وكانت بتكلم سلمى وماريا ع شات الفيس وبيتكلموا وبيحكوا وكانت لما بتقفل كانت بتلاقى محمد اخوها قاعد مع ياسمين
وكانت فرحانه بشكلهم اووى ومن فرحتها وان معتز واحشها كانت بتتخيل وجوده وانها هى ومعتز مكان محمد وياسمين قاعدين بيتكلموا ويهزوروا وسرحانه ف خيالها ومبتسمه لغايه ما سمعت صوت اغانى عالى فاقت ورجعت لواقع وبصت ع محمد وياسمين وبتدعيلهم ربنا يفرحهم .. وكانت تفتح وتبعت لمعتز "وحشتنى " وكانت بتحكيله ع كل حاجه وكانت تشغل منير وتقرا اخر شات معاه ... عدى اليومين ورجعت فاطيما ع السنطه وكانت مبسوطه بتغيير الجو ..!!| وكان معتز بعتلها رساله يطمنها عليه ويطمن عليها وفرحت اكتر فاطيما بالرساله !
رجعت ماريا من عند ماريان ع طول ع فاطيما وكانت فاطيما قاعده ف اوضتها مشغله منير وفاتحه اللاب وعماله تقرا اخر رساله لمعتز وتسمع الاغانى الل كان معتز عاملها منشن فيه وسرحان
دخلت ماريا بدون تخبيط اتخضت فاطيما: يهدك يا منيله فى ايه الباب معمول يخبطوا عليه مش يتزق
ماريا راحت مسكت فاطيما وعماله ترقص معاها : عماد ..حدد ميعاد نزوله كمان شهر وهنتجوز ..هنتجوز انا وعماد ..عماد وانا هنتجوز
فاطيما بتضحك: يخرب عقلك اتهبلتى قبل ما يجوزك اعقلى طيب
ماريا بتنطط بترقص : مش مصدقه يا ناس .. خلاص هانت وهشوفه وهكون معاه ف بيت واحد
فاطيما بتضحك: مبروووك يافقر .. اخيرا هتتنيلى لولولوووولى
ماريا: من بكره تفضى نفسك ها ها الفستان والكوافير وباقى الحاجات اجمعها علشان هنروح نفرش الشقه الاسبوع دا كله كله يكون جاهز عقبال ما يرجع ياادوب اخده من المطار ع الكنيسه
فاطيما بتضحك: فصلتينى ضحك يخرب عقلك .. هتخطفى الواد
ماريا : الصبح بدرى تجهزى ها ها .. يلا انا همشى الصبح القيكى قدامى ها
مشيت ماريا وهى مجنونه وطايره من الفرح وفاطيما فرحانه بيها ..بعتت لسلمى وعرفتها لاقتها فتحت
فاطيما: البت اتجننت
سلمى: يابختها
فاطيما: انتى بتقرى عليها ولا ايه
سلمى: ماهو حظى الهباب المفروض كان زمانى متجوزه لولا الفقر
فاطيما: حصل ايه يابت
سلمى: خالد لما جه واتظبط وقلنا الحياه خلاص واهو هنرتب بقى لحالنا
ف الشركه معرفش انا سمع منين ان الشقه مكتوبه بااسمى وبتاعتى وانا قايلاله ايجار وقررنى واعترفتله بكل حاجه وترتيبات اهلى وان الشقه فعلا بابا جبهالى بااسمى واضايق اوى وكان عاوز يرجع مصر ..بعد مناقاشات عدى موضوع الشغل لانه فعلا كان فى مكان فاضى لكن الشقه مستحيل يعديها واتفق مع بابا انه مش هيتم الجوازه غير لمايدفع جزء كبير من تمن الشقه والعقد هيفضل بااسمى لكن عاوز يقعد ف شقه هو جايبها بفلوسه
ولسه سنه بقى يا مسهل ..
فاطيما : يا حظك ياسولى.. بس عاوزه اقولك كل حاجه بوقتها ..متستعجليش والاهم ان خالد معاكى وقدامك وان شاء الله نفرح بيكى قريب ..
سلمى: كان نفسى ابقى مع ميمى يوم فرحها هى الل اتحدد فاجاءه فرحها
فاطيما: ولا يهمك لما تيجى هنعمل فرح تانى بوجودك
سلمى بتضحك: هههههههه وماله.. عقبالك يا طيما
فاطيما: يارررررررررررررب
سلمى: هو مفيش جديد .. معتز ايه اخد الناقه وخلع
فاطيما: اهو ربنا يكرمه .. بيعمل اللى عليه وربنا يكرمه وكل ما بيكون ف مصر بيكلمنى ودايما بيبعتلى رسايل يطمنى عليه مش ناسينى يعنى
سلمى:وبعدين دا داخل ع سنه اهو كل دا مكونش حق الدبلتين
فاطيما: معرفش..انا مش عاوزه اضغط عليه لان معرفش طبيعه شغله ايه هو مش مستقر ف مكان .. كله ف وقته الصبر جميل
سلمى: ماشى بس ياريت بعد كا كله نتيجه
فاطيما: اقفلى ياسللمى اقفلى المجنونه هتجيلى الصبح وعاوزه انام
سلمى: هكلمكم بكره
فاطيما: ان شاء الله سلام
قفلت فاطيما مع سلمى وحبت تحكى لمعتز ع فرحتها ب ميمى وبعتتله رساله مفصله عن الاحداث وعن احساسها وقفلت وشغلت منير ونامت ع السرير ...!!!
تانى يوم الصبح ماريا من فرحتها منمتش فلبست ونزلت راحت لفاطيما ودخلت عليها الاوضه وهى نايمه ونطت ع السرير جنب فاطيما وبتصحيها
ماريا بتحرك ف فاطيما: طيما طيما طيماااااااااااااااااااا
فاطيما بصوت عالى : فى ايييييييييييييييه ع الصبح دا ف حد يصحى بنادمين كده ..
ماريا : قومى يلا علشان ننزل
فاطيما بصت بنص عين ع الموبيل لاقت الساعه 9
فاطيما : ماهو حاجه من اتنين يا انتى مجنونه ياانتى هبله .. ننزل الساعه 9 فين هو فى محلات فاتحه دلواقتى مش قلتلك هعدى عليك الضهر يكونوا فتحوا... هنروح من دلواقتى نعمل ايه هنفرش قدام المحلات يا هبله
ماريا : انا مبصتش اصلا ف الساعه وبعدين عقبال ما تقومى وتفوقى هيبقى الضهر عرفاكى قومى قومى قومى
فاطيما: حاضر ..حاضر.. حاضرررررررررررررررررر
قامت فاطيما وهى مشبعتش نوم ومقريفه وراحت الحمام تغسل وشها وتفوق ..وماريا رمت نفسها ع السرير وابتسامه كبيره ع وشها .. خلصت فاطيما ولبست وفطرت ونزلت هى وماريا وكعاده فاطيما تعدى ع السوبر ماركت تملى شنطتها علشان فرهده اليوم مع ماريا ... وابتدوا يلفوا ع المحلات وفاطيما مفرفره من ماريا هدت حيل وع طول ماسكه حاجه ف ايديها بتاكل فيه بسكويت ..شيكولاته.. سندوتش شاورما او بطاطس وكل اللى عليها تقول " بشحن اللى بيضيع منى يا مفتريه " و وكانت بترجع فاطيما من مشاوير ماريا هلكانه ويادوب تدخل ترمى نفسها ع السرير وتبص ع الرسايل الفيس تشوف معتز بعتلها حاجه وتكتبله ع الل فيه وتنام واستمر الوضع دا لغايه ما عماد رجع وماريا اخدت فاطيما معاها القاهره عند ماريان علشان تكمل حاجات ليها وراحوا يستقبلوا عماد ف المطار ووافقين مستنين وفاطيما بتبص حواليها
فاطيما: انا اول مره اجى مطار هو ليه كبير اوى كده وزحمه
ماريا: اسمه مطار زى محطه القطر كده بالظبط اكيد هتلاقيه زحمه
فاطيما: وهتعرفى تشوفى عماد ف الزحمه دى
ماريا: انا لو مشفتوش بعينى ..قلبى هيشوفه ويقولى
فاطيما: يا سلام ياسلام ..الرومانسيه هتولع المطار
ماريا بتغمز لفاطيما: بلاش انتى يا طيما هسيحلك هنا
فاطيما بتضحك: لالالا ركزى مع عماد احسن
شويا وعماد خرج من باب الخروج الركاب وشافته ع طول ماريا :
ماريا بفرحه: عماد.. عماد اهو يا طيما .. عمااااد
عماد شافها وعمل ورفع ايده بيحركها وبسرعه اتحرك وماريا اتحركت ناحيته ومن غير ترتيب ماريا اترمت ف حضن عماد وعماد حضنها ...
وكان مشهد اغلب الل ف المطار مركزش لان دا طبيعى بيحصل لكن الل ركزت اووى فاطيما وتنحت ... تخيلت نفسها مع معتز وعاشت ف خيالها واحساسها لدرجه انها انفصلت عن الواقع واترسمت ابتسامه ع شفايفها ودمعه نزلت من عنيها ... راحت ماريا وماسكه ايد عماد قربوا لفاطيما : ماريا: طيما ..
رجعت فاطيما لواقع وانتبهت : عمده حمد الله ع السلامه مصر نورت
عماد: الله يسلمك يا طيما .. ليه تتعبى نفسك وتيجى لغايه هنا كده
فاطيما: اولا مفيش بين الاخوات تعب .. ثانيا مقدرش اسيب قدرى لوحدها دى وقت ماعرفت انك راجع خلاص واتهبلت ربنا يصبرك يارب
عماد بيضحك: ربنا يخليكى ويخليها ليا
ماريا: ويخليك يا حبيببى .. يلا علشان انا موقفه تاكسى بره كل دا
هنروح ع ماريان نتغدى وبعدها نرجع ع السنطه
عماد: يلا بينا
مشيوا التلاته وركبوا التاكسى وراحوا عند ماريان وكان مايكل هناك اخو ماريا واتغدوا وع بعد المغرب نزلوا ركبوا العربيه مع مايكل ورجعوا السنطه ورجعت فاطيما ع شقتهم ودخلت ترتاح بصت ع الرسايل ملقتش حاجه غيرت هدومها وخرجت تعملها نسكافيه كانت توحا نايمه ومامتها بتتفرج ع التليفزيون وباباها بره وحماده ف اوضته دخلت ليه لاقته بيتكلم ف الموبيل مع ياسمين حبت ترخم عليه :
فاطيما: الله الله.. وعماله انادى ومبتردش بتنفضلى ينفع كده يا ياسمين
محمد: وطى صوتك يا مصيبه عاوزه ايه
فاطيما: كنت هسألك اعملك معايا نسكافيه ولا ملكش نفس
محمد: لا شكرا ..اخرجى بقى
فاطيما لفت وراحت اتجاه الباب ورجعت تانى : حماده اعملك نسكافيه وبسكويت انا شرياه طعمه حلو مش هتخسر راجع كلامك
محمد بفغيظ: مش عاوز ياستى شكرا شكرا ...
فاطيما : براحتك ...
ادت وشها لباب ورجعت تبص لمحمد: راجع نفسك البسكويت طازه و ..
محمد بغيظ: اطلعى بره يا طيما ..اطلعى بره
فاطيما: خلاص خلاص مترفزش كده ياعم الله ,,
|خرجت فاطيما وبتكلم نفسها: انا غلطانه انى فكرت فيه ... (حطط ايديها ع معدتها) انا اسفه بجد بعد كده مش هفكر ف حد غيرك انت مهمه لولاكى مكنتش استحملت حاجات كتير .. للحق لولاكى انتى ومعتز هيا اللى المطبخ لشحن ...
وراحت المطبخ عملت طبق بسكويت محترم ومج كبير نسكافيه ودخلت اوضتها ...فتحت الللاب ملقتش حاجه تعملها وخصوصا ان الجروب من بعد ما هجرته ومبقتش تدخله بقى قليلين اوى اللى بيدخلوا فيه لان كله الل اتخرج والل خطب واللى اتجوز بقى عباره عن اخبار وبس وقعدت تقلب ف الفيس شويا وراحت فتحت رسايل معتز ومحادثاتهم مع بعض وقعدت تقرا فيهم تسترجع اللحظات الحلوه وبتستحضره ف الوقت دا وبعد ما خلصت بعتتله كلمه " وحشتينى اوووى " وقفلت الفيس وشغلت منير واترمت ع السرير واسترجعت مشهد المطار وابتسمت : ربنا يكمل فرحتك يا ميمى وتكونى فرحانه ع طول يارب ...
فى يوم كانت فاطيما قاعده يومين مع ماريا ف القاهره علشان بيفرشوا شقتها موابيلها رن وكان معتز ولما عرف انها ف القاهره قالها تيجى المطار تقابله لانه عاوز يشوفها وهو قدامه 4 ساعات وهيسافر تانى .. فاطيما من فرحتها ولانه واحشها خلعت من ماريا واخدت تاكسى وكان معتز مستنيها واخدها وقعدوا ف الكافتيريا :
معتز باصص لفاطيما وعلى وشها ابتسامه : وحشتينى يا طيما
فاطيما بكسوف: انت كمان ..
معتز: برغم من دى تانى مره اشوفك بس لاحظت انك اجمل من مره الاولى
فاطيما اتكسفت وحبت تخلع: انا اصلا كنت فقدت الامل انى هشوفك
معتز: لا والله بس ظروف شغلى انتى عارفه
فاطيما: يعنى افهم من كده هيتكرر واشوف تانى
معتز: هيتكرر
فاطيما: ادينى اماره
معتز بعد تفكير طلع ميداليه مفاتيحه واداها الميداليه : امممممم .. اعتبريها رهن كل ما اشوفك هاخدها واديكى حاجه تانيه منى لغايه ما اخدها ايه رائيك
فاطيما: الله حلوه اللعبه دى
اخدت فاطيما الميداليه وفرحت اوى وقعدت شويا وقامت ركبها معتز التاكسى ومشيت وعماله تبص ع الميداليه وفرحانه بيها وانها شافت معتز ..لكن افتكرت وعدها لجددتها انها مش هتنزل تقابله مهما حصل وانها كسرت الوعد قالت فى سرها: معلش يا توحا قلبى مقدرتش اوقفه
..!!________________ يتبع
ليست هناك تعليقات:
إرسال تعليق