الحب لا يهتم بالوقت او المكان يحضر عندما لا نتوقعه ..الحب يمكن
ان يسبب الم بقدر ما يسبب سعاده هناك من يفقد صوابه وهناك من يحلق فى الاحلام ويطير ع اجنحه الحب كـ الطيارات الورقيه وينفصل عن الواقع ومادياته ... فهل ستستمر الطياره الورقيه فى الطيران ام ستسقط ام انها لم تطير من الاساس ؟
_______________________
فى مركز السنطه فى محافظه الغريبه فى شقه فى عماره رقم 8
بيسكن عائله متوسطه مكونه من ام واب وجده وبنت وولد ...
فى يوم الساعه 11 بليل قاعدين ع سفره ..
الام: طيمااا .. طيمااا
الاب: قوم يا حماده انده ع طيما علشان العشا
محمد بلا مبالااه: مش مستاهله اقوم ...هى هتشم ريحه الاكل هتيجى لوحدها ..هى علاقتها بالاكل علاقه حساسه بتحس بيه
الاب بيضحك: عيب كده دى اختك الكبيره روح اندها هى متوتره اليومين دول علشان نتيجه الثانويه قربت
محمد بيضحك : طيما توتر وتقلق.. هاتلها بس حلويات او ماما تعملها اكله من ال بتحبها وهيروح التوتر دا ..طيما تقلق لو جعانه ومش لاقيه اكل
الام بتضحك : لا بجد فاطيما متغيره اليومين دول حتى اكلتها مش قد كده زى الاول .. قلقانه اخر سنه بقى وداخله جامعه عقبالك يا حماده
الاب: السنه الجايه هتبقى زيها وهتشوف يعنى ايه قلق
محمد: انا .. زى فاطيما لالالا انسوا فى فرق سرعات سرعات واوزان سيدى الرئيس وبعدين انا واثق من مجموعى هيبقى ف حدود 95 %
الام بحمقه : ياريييت وبعدين انت تطول تبقى زيها
محمد بيضحك : قصدك وزنها
الام خبطته ع كتفه : لو سمعتك هتبططك اسكت ولم لسانك وروح اندها
محمد: مش رايح روحى انتى اندهيها
الام قامت من ع الكرسى : ماشى ياابو لسان
راحت الام اتجاه اوضه فاطيما وخبطت خبطه ودخلت لاقت فاطيما قاعده ع سجاده الصلى ورافعه ايديها وبتدعى
فاطيما : يارب .. انت عالم بحالى انا عاوزه انجح . مش طالبه اكون من المتفوقين .انا عملت ال قدرت عليه مكنتش هقدر اذاكر اكتر من كده هتجنن لو كنت ضغطت ع نفسى .. وانا لو اتجننت ولو حصلى حاجه
هنا فى البيت مش هيقدروا يعيشوا من غيرى مش هيلاقوا زى انا عارفه ونفسى افرحهم وافرح .. انا غلبانه وبنت طيبه وانت حنين ع عبيدك وبتدى كل واحد ع قد مجهوده ..انا مش طمعانه القى اسمى من الاوائل معان دى واسعه شويا ..لالا واسعه ايه دى كتير اووى .. عاوزه انجح بمجموع
يدخلنى جامعه ان شاء الله جامعه التاهيل الاجتماعى انا راضيه وكمان علشان بابا يجبلى اللاب .. هو وعدنى لو نجحت ودخلت جامعه هيجبلى اللاب ليا لوحدى من غير الرخم محمد وتناحته مش بيخلينى افتح الكمبيوتر ولا اقعد براحتى دايما ناططلى كده ويقومنى وهو علشان ولد فبيفرد نفسه عليا.. انا عاوزه اللاب خاص ليا ولا الحوجه ليه .. يارب عاوزه للاب .. اللاب يارب ليا
مامتها واقفه سامعه وبتضحك : طيما ايه ال بتقوليه دا انتى بتدعى ولا بتشحتى يا حبيببتى
فاطيما بصت لمامتها: الاتنين بدعى وبشحت وهو لو مشحتش من ربنا هشحت من مين يعنى .. وبعدين ربنا قابل وعارف انا عاوزه ايه
مامتها بتضحك : الللاب صح
فاطيما بنظره حب ومنى : اه يا ماما هو دا .. وهخلص من غلاسه ابنك ال لو قعدت عليه هفطسه
مامتها بتضحك: انا عارفه ان كلام من ورا قلبك لانه اخوكى حبيبك
فاطيما: امر واقع ..مش كنتى جبتى بنت كانت نفعتنى بدل المرمطه اللى انا فيها دى بسبب ديك البرابر
مامتها: عاوزه بنت
فاطيما : يا لو حصل ماتفكروا كده ولو جه ولد ياريت اهو يتعاقب محمد ع ال بيعمله فيا ويدخل جيش داانا هفرح فيه فرح
مامتها بتضحك: يخرب عقلك .. انتى الثانويه لحستك .. يلا قومى علشان العشا
فاطيما بتعدل نفسها: لا مليش نفس هكمل صلى ودعى ..النتيجه بكره او بعده وعاوزه اعمل حمله دعا مكثفه
مامتها: قومى كلى حاجه خفيفه وارجعى كملى ..دانتى لو ذاكرتى ع قد صلاتك دى كنتى هتبقى من المتفوقين
فاطيما: وابقى من المتفوقين ليه .. المتفوقين ليهم ناسهم
انا عاوزه انجح واجيب الللاب وشكرا
مامتها: طيب يلا قومى
فاطيما: لا
مامتها بتقرب منها: دا انا عامله بسطرمه بالبيض ال بتحبيها وبطاطس محمره ومعاها كاتشب و...
فاطيما ريقها جرى ع كلام مامتها وقاطعتها بنبره عاليه : ماما
مامتها اتخضت: فى ايه خلاص متتحوليش
فاطيما قامت وقفت وقلعت الاسدال: يلا بينا ع العشا
خرجت فاطيما تقعد ع السفره جنب محمد ...
باباها: بتعملى ايه كل دا يا طيما
فاطيما وملامح بؤس وتوتر : مفيش كنت بصلى
محمد: والله لو عملتى ايه ..انتى فاشله يا حبيببتى
فاطيما بصت بتزغر ل محمد: هتلم نفسك ولا احولك لقرص البيض دا
محمد بيزق نفسك: لا مقصدش يا طيما اقصد يعنى خلاص الامتحانات خلصت والنتيجه هتطلع انتى هتعملى ايه بقى بالجلسات الدعا المكثفه دى ها
فاطيما: ماهو انت مش هتحس بالاحساس دا غير السنه الجايه او معنى اصح لما تبقى ف تالته لما تحس ان مصيرك واقف ع دراجات فى ايد بنادمين زيك كده ياعالم هيبقوا عندهم ذمه ولا ذمتهم استك
باباها بيضحك: اخوكى معاه حق مش انتى حليتى خلاص مفيش حاجه تتعمل
فاطيما: مش ربنا قالنا اسعى يا عبد وانا اسعى معاك
باباها: ونعم بالله .. ايوه
فاطيما: وانا ذاكرت ع قد سعتى ومقدرتى وروحت لطعت الكلمتين ف الورق
باباها: وبعدين
فاطيما: الباقى ع ربنا بقى انا متوكله عليه ينجحنى ومع ربنا مفيش مستحيل
محمد: ايه برنامح العلم والايمان دا
فاطيما: هاهاهاها .. لولا انك اخويا الوحيد والحاج عاوزك كان هيبقى برنامح ابحث عن الجانى
الكل ضحكوا ... محمد بيضحك: وبعدين انتى بتقوليلى احساسى لما ابقى فى تالته انا عارف انا عاوز ايه وبذاكر علشان ايه انتى بقى بتعملى ايه ولا اى حاجه بتذاكرى انتى وميمى وبتقضوها رغى وبتدخل معاكم سلمى بالتليفون واغلب وقتك تليفزيون او ع الكمبيوتر
مذاكره بذمه مشفتش انا ...
فاطيما: خلاص يا اسطى عارفه انك عبقرى العيله خلاص
محمد بااستغراب : يا اسطى
فاطيما بتاكل: مش انت عاوز تدخل هندسه ميكانيكا
وهيتقلك حاجتين .. يا بشمهندز .. او يا اسطى
محمد: ايه الجهل دا ادرس 5 سنين ف الكليه وبدل ما يتقلى مهندس يتقلى بشمهندز
فاطيما: خليك واقعى بقى .. ورشه العربيات ال ع اول الشارع ال انت قاعد فيها طول اليوم مع مصطفى واهو مش متعلم اصلا خريج اعداديه قد الدنيا بتقله ايه .. مش يا بشمهندز مصطفى
محمد: لا تفرق انا ان شاء الله هيكون معايا شهاده
فاطيما بتبص حواليها وبتشاورله ع حيطه فوق كنبه الانتريه ..
فاطيما بتشاور: بص العدل حلو انا هحط شهادتى هناك وشهادتك هحطها جنبى يعنى الشهاده هتكون هناك متعلقه علشان الحاج والحاجه يتفشخروا بيك ولو طمعان ف الحيطه كلها خدها يا اسطى انا عندى مرتبه السرير تكفى من الشهاده شهادات
محمد : يااسطى تانى
مامتها بتضحك: لا ان شاء الله محمد هيبقى مهندس قد الدنيا
محمد بيفرد نفسه : ان شاء الله .. انا داخل علمى رياضه مش علشان العب مش ادبى زى ناس
فاطيما: لما نشوف يا بشمهندز محمد بلاش يااسطى اهو
باباهم: خلاص بقى كفايه رغى ولماضه انتى وهو واتعشوا
فاطيما: هى توحا فين
باباها: فى اوضتها نايمه اتعشت بدرى ونامت
فاطيما باابتسامه: بابتى حبيببى
باباها : ايوه يا حبيببتى
فاطيما بدلع :انت طبعا يا بابتى عند وعدك هتجبلى اللاب لما انجح صح
باباها: تجيبى مجموع كبير
فاطيما وشها اتغير ونبرتها : لالالا كده انت غيرت ف كلامك ياحج مينفعش كده ..انت كنت محدد وقلت تنجحى محددتش مجموع كبير ولا صغير المهم ميبقاش ف دور تانى صح يا ماما صح يا محمد
بتبص ل محمد: لالا بلاش محمد صح يا ماما .. اصحيلك توحا تقولك
باباها بيضحك : خلاص خلاص . ان شاء الله بس انجحى وادخلى جامعه مش معهد تمام
فاطيما سابت العيش ورفعت ايديها : يارب انت شايف ال بيحصل انجح وجامعه يارب علشان اللاب
محمد: لدرجه دى ..ما الكمبيوتر موجود
فاطيما: لا يا حبيبى دا هيبقى بتاعى يعنى ولا هتلمسه ..احسن من الشلل ال بتعملهولى كل ما افتح الجهاز قومى بعمل دونلود ع حاجه.. قومى هكمل صحابى.. قومى الوقت متاخر كفايه كده.. انا اختك الكبيره وبتعاملنى ولا اختك الصغيره
محمد بيفرد نفسه: علشان انا الراجل
فاطيما بتزغر: والله
محمد اتخض راح ضحك: البسطرمه دى تحفه دوقى كده
فاطيما بتاكل البسطرمه: ايوه كده اتظبط ... الله يا جيجى ع البسطرمه تحفه فنيه ومذاق عال العال والله وطبيخك اتطور يا فوزيه
مامتها بتضحك: الف هنا يا حبيببه قلبى
راحت فاطيما حطت طبق البسطرمه قدامها لوحدها
محمد بااعتراض : طيما انا باكل معاكى مينفعش تحطى الطبق قدامك كده
فاطيما بتاكل وبتمنع محمد يقرب من الطبق : انا ف حاله نفسيه وحشه ومحدش يكلمنى عندك اعتراض
محمد : اه صح الاكل مينفعش اعترضلك عليه داانتى ممكن تاكلينى لو فكرت اعترض ...سلمتى امرى لربنا وهاكل جبنه مالها الجبنه
فاطيما :حلوه الجبنه مفده لمهندسين وخصوصا لو معاها خيار ..
راحت فاطيما جابت رغيف وقسمته نصين ومليتهم بسطرمه ببيض وشالت طبق البطاطس ووقفت
فاطيما: انا داخله اوضتى هنقنق ف دول علشان مش جعانه وهكمل كورس الدعا علشان قلقانه اوى ومليش نفس
محمد لسه هيتكلم ..: فاطيما.... ماما
مامته بتضحك: سيبها انا هقوم اعملك غيرهم
وقامت مامت فاطيما تعمل بسطرمه بيبض غير ال اخدتها فاطيما ...
ودخلت فاطيما حطت الاكل ع المكتب وكان موابيلها بيرن وكانت سلمى بنت عمها بتكلمها من الامارات
فاطيما: الو.. سولى
سلمى: طيما.. انا قلت اكيد هلاقيكى صاحيه
بصت فاطيما ع الساعه كانت قربت ع 12 : وانتى ايه مسهرك كده الساعه عندك 2
سلمى: اجازه بقى وانتى عارفه سهرانه ع النت مع اصحابى وبنرغى
فاطيما: اصحابك برضه ماشى
سلمى : قرك دا بسببه الواد مبينطقش .. بفضل فاتحه قدامه مبيكلمنيش غير لما يبقى ف حاجه كلمتين وبس ارحمينى
فاطيما: ماتكلميه انتى انا قلتلك انجزى
سلمى: لا يا شيخه اروح اكلمه اقوله ..خالد هو انت معجب بيا ولا انا متهيالى
فاطيما بتضحك: تصدقى فكره .. متعمليها اهو تجيبى اخر
سلمى: انتى هبله صح ..
فاطيما: يعنى عارفاه بقالك 6 شهور ف جروب ع الفيس وحاسه بتلميحاته وسؤالك لما تغيبى وقلقه عليكى دا فى الجروب ولا البودى جارد بتاعك يابنتى ..مش عارفه تجرجريه يتكلم ويقولهالك ونخلص
سلمى بتتنهد: لا ياختى مش عارفه .. انتى هتعملى ايه لو مكانى
فاطيما: انا ومكانك امممممم .. هو انا بقعد ساعه ع بعضها ع الفيس زيك
وبعدين انا معرفش لانى اصلا معرفش ايه الارتباط ال من ع النت دا ... تعجبى بواحد مشفتيش غير صوره وكمان ياعالم صورته ولا بيضحك عليكى واتشديتى لـ اهتمامه ليكى .. ما ممكن يكون بيتعامل مع كل كده مش الجروب دا فيه بنات غيرك وكتير انتى عارفه بيكلم مين ولا بيعمل ايه ...
سلمى: فاطيما.. انتى بتقلقينى ليه؟
فاطيما: بصراحه اتخنقتلك .. اصله مقلش حاجه وانتى بتنجمى ... اصبرى لما يتكلم يا اما تسئليه انتى .. تحبى اسئلهولك انا ..ها ؟
سلمى بسرعه: لالالا بلاش انتى انتى هتدبسينى وهتخلى شكلى زباله
فاطيما: عيب عليكى والله ابدا .. انا كلامى معاه خفيف كومنتات ع البوستات بس
سلمى: وهتدخلى خاص تكلميه وهتكلميه عليا وش
فاطيما: اممم .. هفكر ف طريقه
سلمى : لالالا شكرا ... المهم بلاش تتنجننى وتعملى حاجه ها
فاطيما: حبيت اخدم ... وبعدين انا مليش دماغ افكر ف حد ولا حاجه غير النتيجه دلواقتى واللاب اللاب
سلمى: اه صح نستينى انا كنت بتصل اطمن عليكى واسئلك النتيجه بكره اكيد
فاطيما بتتنهد: يا بكره يا بعده بالكتير
سلمى: ان شاء الله خير مش انتى حليتى كويس
فاطيما: معرفش
سلمى: نعم.. مش كل امتحان كنتى بتقولى حليتى وكويس
فاطيما: يعنى بذمتك اقولك محلتش ولا عكيت.. اكيد هقول الحمد الله
انا كتبت بس مش واثقه انها الاجابه الصح ..اصلى اطلقت خيالى ف الاجابات
سلمى بتضحك: نعم يا حبيببتى اطلقتى ايه؟
فاطيما: خيالى .. اكيد كنت ناسيه حاجات اسيب الورقه فاضيه
فاطلقت خيالى يجمع ال فاكراه مع حاجات مشابهه وبخط حلو وتسطيره تمام واخدت لاخر دقيقه
سلمى: وميمى كده ولا ايه
فاطيما: ميمى دى دحيحه .. ال يخلى اختها ماريان دكتوره نساء وولاده واخوها مايكل مهندس بترول وباباها محامى ومامتها موجه فى مدرستنا عاوزاها تبقى ايه حضرتك واضح جينات التفوق فى دمهم
سلمى بتضحك : مدام عارفاكى معتقدش انها هتبقى احسن من كده
فاطيما: دا ليها الفخر اصلا انها ذاكرت معايا بصراحه هى ساعدتنى ف حاجات كتير ومايكل كمان كتر خيره
سلمى: الله يسامحك كانت عاوزه تدخل علمى وانتى ال اقنعتيها ب ادبى
فاطيما: انا قلتلها راى بصراحه ورغبتى المكبوته انى مذاكرش لوحدى
وهى كمان ..احنا من صغرنا واحنا مع بعض ف المدرسه من ابتدائى وانتى كنتى معانا لغايه ما سافرتى وهى كملت معايا وبعدين انتى دخلتى علمى عملتى ايه دخلتى تجاره عندك صح
سلمى: لما نشوفك يا عبقريه هتدخلى ايه
فاطيما: هدخل الحمام
سلمى: نعم
فاطيما: اقفلى علشان عاوزه ادخل الحمام ..الواد محمد شكله بصلى ف البسطرمه حاسه انى محتاجه الحمام حالا يلا سلام
قفلت بسرعه فاطيما ودخلت الحمام وخرجت وهى ماسكه بطنها مامتها شافتها
مامتها: فى ايه يا طيما
فاطيما بملامح تعب شويا: بطنى وجعانى يا ماما ممكن تعمليلى حاجه دافيه
محمد وهو قاعد قدام الكمبيوتر : من لغك فى الاكل وعكك اكيد بطنك مستحملتش
فاطيما بملامح غضب: لم نفسك بدل ما ...
وهى هتتكلم مسكت بطنها ودخلت الحمام تانى ....محمد بيضحك: احسن
مامتهم: محمد بطل غلاسه ع اختك كفايه عليها توترها بسبب النتيجه
محمد: انا عارف والله بس اعمل ايه بحب اغلس عليها
مامتها : انا هدخل اعملها حاجه دافيه
خرجت فاطيما دخلت اوضتها ومامتها جابتلها الحاجه الدافيه وراحت تمسك طبق الاكل ال دخلت بيه
مامتها: انا هاخد دا معايا
فاطيما بصت ع سندوتس البسطرمه وباقى البطاطس : لالا خليهم
مامتها: ليه
فاطيما: هنقنق فيهم يا ماما ماهو انا مش هنام غير لما اصلى الفجر
مامتها: مش بطنك وجعتك بلاش عك يابنتى
فاطيما: سيبيهم يا جيجى انا عارفه نفسى الاكل هيخرجنى من توترى
مامتها بتضحك : مفيش فايده فيكى
خرجت مامتها وسابت كوبايه الحاجه الدافيه ومسكت فاطيما الطبق وبصتله
فاطيما: قال اسيبكم ال ال يدخل اوضه فاطيما ميخرجش منها سليم ولا باقى منه حاجه
ومسكت فاطيما السندوتش واكلته وهى مستمتعه ...
خلصت فاطيما اكل وموابيلها فصل شحن فخرجت شويا
محمد نده عليها : طيما تعالى اتفرجى معايا هيعجبك اوى
فاطيما: هتفرج على ايه حاجات مقرفه ال بتشوفها دم وكده
محمد: لالا دا فيلم كوميدى حلو واهو ينسيك شويا توتر النتيجه
بصت فاطيما ع الساعه لاقت لسه بدرى ع الفجر : طيب ممكن اقعد شويا افتح الفيس
محمد: لالا هتيجى تتفرجى اشطه غير كده قدامك التليفزيون
فاطيما: مدام فيها فرجه هنا او هناك استنى لما اجيب شويا الشيبسى والبسكويت ال ف الاوضه نتسلى بيهم
محمد: انتى مش بطنك وجعاكى
فاطيما: لا خلاص راح الوجع وجوعت
محمد: ربنا يستر عليا
راحت فاطيما اوضتها وجابت الحاجات وقعدت تتفرج مع محمد وماسكه فى ايديها كيس شيبسى كبير وقعدت تضحك هى ومحمد.. وفعلا نسيت شويا توترها من النتيجه لكن منسيتش انها تاكل ...
الفجر اذن وقاموا الاتنين يتؤضوا وصلوا الفجر مع باباهم ومامتهم وجددتهم توحا خلصوا الصلى .. فاطيما راحت ل جددتها: توحا ادعيلى من معاميع قلبك
جددتها: ربنا يسهلك طريقك ويكرمك يا فاطيما يابنت جيهان
فاطيما: لا ركزى حددى انجح وادخل جامعه والاهم اجيب اللاب
جددتها بتضحك: ربنا ينولك ال فى بالك يا حبيببتى
فاطيما باست ايد جدتها: تسلميلى يا توحا يارب ويخليكى ليا
مامتها: يلا نامى يا فاطيما
فاطيما: مش عارفه هقعد مع توحا شويا
مامتها بتتأوب: طيب هدخل انام انا الساعتين دول علشان اصحى مع باباكى احضرله الفطار
فاطيما: اوكيه ..يلا بينا يا توحا
قامت فاطيما وهى ماسكه ايد جددتها ودخلوا الاوضه وطلعت جددتها ع السرير وقعدت جنبها
فاطيما: خدينى فى حضنك يا توحا كده
جددتها: تعالى يا حبيببه توحا انتى
فاطيما دخلت ف حضن جددتها : ياسلام هو دا الحضن التمام كل التوتر راح
جددتها لمست ايدها ع شعر فاطيما وبتضحك . جددتها بتقرا قران ع راس فاطيما نامت وهى ف حضن جددتها لتانى يوم ...!!
ع الساعه 1 الضهر دخلت مامتها تصحيها ..
مامتها: طيما: يلا يا حبيببتى قومى الساعه 1
فاطيما فى غيويبه: طيب طيب
مامتها: طيما قومى يلا كفايه كده
فاطيما: حاضر قايمه قايمه
مامتها: يلا قومى اغسل وشك وافطرى وطلعى الاكل لفراخ فوق السطوح واسقى الزرع علشان انا نازله السوق ومش فاضيه
فاطيما بنص عين: حاضر ياست هانم وتحبى اغيرلك ليهم بالمره
مامتها بتضحك: لمضه طول عمرك ..يلا قومى اكليهم وحطيلهم مايه علشان يدعولك
فاطيما: يدعولى
مامتها: اه طبعا
فاطيما : لا داانا هعمل احلى واجب معاهم
خرجت مامتها فاطيما بتقوم وبتتأوب وبصت ع نفسها ف المرايه : يوم تانى جديد يا طيما صباح الفل معان الضهر أذن بس يومك كده ابتدى يا قمر اموووووووواه
وقامت فاطيما غسلت وشها وخرجت فطرت واخدت اكل الفراخ والطيور وطلعت ع السطوح ....وابتدت حط اكل ليهم ومايه .:
فاطيما: انتوا عارفين انا مش بقوم من نومى بالسهل ومش لاى حد ... انا صحيت ليكم بسببين ... اولهم علشان تاكلوا وتشربوا وتانى حاجه علشان تدعولى واخد ثواب وانى انجح ...يارررب .... يلا يا حبايبى كلوا مم يلا ..واشربوا ابوووه يلا علشان تكبروا وتربروه وندبحوكوا وناكلكم احنا هم هم هم ...
فى الوقت دا سمعت فاطيما صوت من وراها : اللى هيسمعك هيقول عليكى هبله
فاطيما بتبص : ميمى ... عاش من شافك بدرى كده
ماريا: اصلى رايحه الكنيسه
فاطيما : ايه دا مش قولتيلى مش رايحه فى حته وهتجيلى نقعد بليل سوا ولا دى حمله دعا مكثفه علشان النتيجه
ماريا بملامح وشها متغيره: اصلى نسيت حاجه امبارح وهروح اجبها
فاطيما قامت وقربت من ماريا : حاجه ونسيتيها ياسلام وياترى الحاجه دى اول حرف منها عماد
ماريا اتحرجت: انا ..هروح علشان اشوف عماد لا خالص ...
فاطيما: ميمى
ماريا : لالالا مش علشان عرفت انه هناك انهارده اقوم اروح انا كمان لا لا
فاطيما بتضحك: اه صح ميصحش ..
ماري بتضحك: من غير تريقه ..اه رايحه علشان عماد رايح هناك انهارده
فاطيما: قولى بقى ... هو انتى ايه اخرت المراقبه دى مبينطقش
ماريا: لا بينطق
فاطيما متفاجاءه: نطق ..ايه ..ها ..ها
ماريا: بيسلم عليا
فاطيما: سلمتها ام حسن ...
ماريا : هتتريقى تانى انا ماشيه
فاطيما: ليه ياربى كده توعدنى باتنين هيجبولى شلل سباعى وانا لسه صغيره
ماريا : نصيبك ... يلا انا ماشيه ولما ارجع نكمل علشان متاخرش
فاطيما : طيب سلام ..
ورجعت فاطيما بصت لفراخ والطيور والله انتم الفايده الوحيده ع الاقل ليكم لازمه وعارفه نتيجتكم .. ااكلكم علشان اكولكم ..الله عليكم بالملوخيه وانتتم مشويين كده وطبق سلطه جنبكم ولا بتنجان مخلل ..الله الله ..انا جعت ليه كده ... انا هنزل اعملى سندوتش واطلع اكمل ...
ونزلت فاطيما تجيب سندوتش تاكله تسد جوعها ...!!!
تانى يوم فاطيما كانت نايمه فى اوضتها وكالعاده نايمه متاخره مامتها دخلت عليها الاوضه تصحيها :
مامتها: طيما ... طيما ..اصحى يلا
فاطيما: فى ايه ياماما مش هطلع ااكل فراخ تانى انا انا مش شغاله عندهم
مامتها : فراخ ... قومى ميمى ع التليفون عاوزاكى ضرورى علشان النتيجه
فاطيما فتحت عنيها : النتيجه ..ظهرت
وبسرعه قامت فاطيما من ع السرير وراحت ع تليفون الارضى وردت ع ميمى
فاطيما بقلق: ايوه يا ميمى نجحت ولا
ماريا: قافله موبيلك ليه يا خالتى
فاطيما: فصل منى ونسيت ..قوليلى النتيجه ظهرت
ماريا: دخلت ع السايت لاقيت بيقولوا فى الساعات القليله هتظهر فقلت اعرفك
فاطيما: تعرفينى ايه انا جيالك
وقفلت فاطيما التليفون بسرعه ودخلت اوضتها لبست اسدال الصلى وجابت موابيلها : ماما انا عند ميمى ها
ونزلت فاطيما بسرعه وراحت عند ميمى وكانت ميمى ساكنه فى العماره اللى جنب فاطيما ع طول
رنت الجرس وفتحت ماريا: ايه السرعه دى
فاطيما: انا مش هتحرك من هنا لما النتيجه تظهر
ماريا بتضحك: ع اساس انها اول مره يا بنتى انا كتير بشك انها شقتكم والله
فاطيما: ع اساس انك مبتدخليش شقتنا وبطردك منها اكتر الاوقات
ماريا: القعده مع توحا بقى
وهما بيتكلموا مايكل اخو ماريا كان خارج من اوضته ..
مايكل: انا سمعت صوت عالى قولت طيما هنا
فاطيما: مايكل ازيك
مايكل: تمام ...وانتى
فاطيما : تمام مستنيه النتيجه وتحديد المصير
مايكل: خير ان شاء الله متقلقيش
فاطيما: ان شاء الله
بصت فاطيما ع مايكل وكان متشيك: انما ايه الشياكه دى يا هندسه
ماريا: اخويا طول عمره شيك يا حبيببتى
فاطيما: عارف يا مايكل لو كنت مسلم كنت مسبتكش والله كلبشت فيك
مايكل بيضحك: ربنا يبعتلك فى ال تكلبشى فيه
فاطيما: يجى اللاب الاول وبعدين افكر
ماريا: ياادى اللاب اللى طلعلك فى الحظ
مايكل: انتى بتحلمى بيه
فاطيما: اللاب يعنى الحريه بالنسبالى وهروب من محمد وسيطرته
اللاب مش جهاز دا اسلوب حياه بالنسبالى ..محدش فاهمنى يابشر
ضحك مايكل: فقريه يا طيما .. يلا انا خارج وبالنجاح
فاطيما: ان شاء الله
خرج مايكل .. فاطيما: مايكل شكله كده رايح مشوار مهم
ماريا: رايح يقابل ياسمين بقى
فاطيما: هنفرح بيه قريب ولا ايه ..
ماريا: يارب ..
فاطيما بصت ل ماريا: وانتى مفيش جديد
ماريا: ولا قديم ..
فاطيما: نعم يا خالتى .. انتى امبارح كان الاحد ورجعتى متاخره انا قلت هتاجرى اوضه هناك وفضلت مستنياكى ولا جيتى
ماريا: لمى نفسك.. كنت هناك اه وقعدت اغلب اليوم .. بس مفيش فايده
مقضينها نظرات من غير اقوال سلم وخلاص
فاطيما: هو ايه حكايتكم انتم الجوز انتى وسلمى واحده بتحب فى واحد مقضيها تلميح مصارحش وواحده مقضياها حب بالنظرات وهو متكلمش بيسلم بس ... ايه ال بتعملوه دا
ماريا: لما نشوفك يا اختى هتعملى ايه انتى
راحت فاطيما ماسكه ماريا وقفت وراها وحطت دراعها حوالين رقبه ماريا : انا لو اعجبت بواحدمش هقضيها زيكم .. هعمله كده وهقوله هتنطق ياض ولا الوحك
ماريا زقت فاطيما وبتضحك : وانا احب اقولك انك مش هتشوفيه تانى
هتنطق يا ض ولا الوحك جتك لوحه يا شيخه
فاطيما: اجيب من الاخر انا.. احنا عصر السرعه مش زيكم
انتى داخله على سنه والتانيه 6 شهور ...
ماريا: مش عارفه بقى
فاطيما : ربنا ينتعكم بالسلامه ونشرب المغات ..اقصد الشربات
ماريا: اتريقى اتريقى
فاطيما بتضحك: المهم دلواقتى امك عامله غدا ايه
ماريا: مش عارفه
فاطيما : استنى كده
شمشمت فاطيما: فراخ فى الفرن وملوخيه ورز بشعريه
ماريا: عرفتى ازاى انا معرفش
فاطيما: اهو حالا معمول الارز بشعريه
خرجت مامت ماريا: طيما ازيك يا حبيببتى
فاطيما: الحمد الله يا طنط ..
ماريا: ماما انتى عامله رز بشعريه
مامتها: لسه مقلباه وموطيه
ماريا: يخرب عقلك يا طيما اومال انا مبشمش زيك كده ليه
فاطيما: علشان مش مصاحبه الاكل لو عامله علاقه معاه هتلاقيه عامل لينك معاكى دايما فى كل مكان ...الحب الحقيقى الاكل .. الحب الذى لا يخذل ومش بيسلم بس
ماريا خبطت فاطيما: عسل يا طيما عسل
فاطيما ضحكت: المهم انا هتغدى معاكم انهارده
مامت ماريا: طبعا يا حبيببتى وهعملك صينيه بسبوسه بالقشطه ال بتحبيها
قامت فاطيما باست مامت ماريا: يخليكى ليا يا طنط
دخلت مامت ماريا تكمل الغدا.. ماريا: بجد يا طيما نفسى احب الاكل زيك كده
فاطيما: ياسلام ..هو فى زى الاكل ولا حلاوه الاكل
ماريا: بس غريبه انتى ع ال يشوفوكى فى الاكل يقولوا عليكى بكبوزه بتتدحرجى انما انتى مليانه بس مش اوفر .. انا اعرف واحده بتاكل ااقل منك وخلاص قربت ع الانفجار
فاطيما: هو انا اه مليانه وطخينه عنكم بس مش لدرجه الاعاقه انا مليش ف العود الفرنساوى بتاعكم دا .. والاكل دا نعمه وانا بتلذذ فى نعم الله
ماريا: يا مؤمنه انتى
فاطيما بتضحك:...يمكن علشان بتحرك وشغل البيت وطلوع ونزول السلم عندى لعندك لسطوح وهكذا اه جسمى زايد شويا ..شويا بس موصلتش لمرحله الانفجار بس احسن مااكون سلكه سنان زيك انتى وسلمى ..
سلمى بتعمل دايت معرفش انا ايه الحرمان ال فيكم دا
ماريا: انتى عارفه كانوا مسمينا احنا التلاته ايه من صغرنا فاكرنا
فاطيما بتضحك: خوفو وخفرع ومنقرع علشان الحجم
ماريا: ماشى يا خوفو هبص ع السايت تانى
فاطيما: انا جيت بسرعه مفيش اى نقنقه عندكم
ماريا : استنى الحاجات ال جبناها سوا مااكلتش منها كتير
فاطيما: هاتى نقنق لغايه الغدا .. لحسن حاسه ان توترى سادد نفسى خالص وانتى جايه هاتى السجاده علشان اصلى العصر
ماريا: ماتدخلى تصلى ف اوضتى
فاطيما: لا اصل انا ناويه اباركلكم الشقه ههههههه يلا يابت ومتنسيش كيس الشيبسى الكبير انا عارفه انك مفتحتوش اصلا هاتيه ها اهو يفتح نفسى ال مسدوده دى
ماريا بتتضحك: لا يا شيخه اومال لو فرحانه هتعملى ايه
هنصحى من النوم هنلاقيكى واكله حماده اخوكى
فاطيما: لا رخم واكيد طعمه مش حلو .. لو فكرت اكل هبتدى بيكى انتى
وراحت فاطيما تزغزغ ماريا وفضلوا يضحكوا وقعدوا شويا وماريا عماله تعمل ريفرش لصفحه النتيجه وهما قاعدين الموقع فتح ..
ماريا مخضوض: طيما طيما ..الموقع فتح
فاطيما راحت نطه ع ماريا : طيب يلا اكتبى ارقام الجلوس
ماريا ايديها بترتعش: انا خايفه
فاطيما زقتها : اوعى انتى انا عاوزه اطمن ع مستقبلى .. اللاب توب
راحت فاطيما قعدت قدام الكيبورد وبتجمع نفسها هزارها وضحكها راح من خوفها من اللحظه دى .. راحت للامان حطت رقم ماريا الاول ..:
ماريا: دا رقمى
فاطيما: ميصحش اكون ف بيتك واحط رقمى الاول .. صاحب البيت الاول
ماريا : لا يا شيخه
فاطيما ضغطت ع انتر والصفحه بتحمل وكل من فاطيما وماريا بيدعوا النتيجه تبقى كويسه ظهرت الدرجات وبصت ماريا عليها وبسرعه راحت حسبتها : 88%
ماريا مبسوطه وفرحانه: الحمد الله .ماما ماما انا نجحت
بصت ماريا ع فاطيما انها تكتب رقمها شايفاها متصلبه
ماريا: مكتبتيش ليه رقمك انجزى
فاطيما مسكت صوباعها: صوباعى وجعنى اصل وانا بكتب رقمك ضغطت جامد ..اه يا صباعى اه
ماريا راحت زقتها : صباعك برضه
راحت ماريا كتبت رقم فاطيما وفاطيما مغمضه عنيها : ميمى اخبطينى ع طول بالمجموع واحسبيه انا مش هفتح غير لما تقولى ها .. ماشى يابت ..ها
ماريا بنبره مخضوضه: ايه دا يا طيما دا
فاطيما حطت ايديها ع قلبها: فى ايه انجزى
ماريا : لالالا مينفعش بجد دا انا مش مصدقه
فاطيما مخضوضه راحت فتحت عنيها : ايه شلت كام ماده هو التاريخ ابن الجزمه انا مالى انا بنابيليون وسنه كام عملوله عيد ميلاده الاول
ماريا بتضحك ع كلام فاطيما وانها مبصتش ع الشاشه اصلا : نجحتى يابت وكمان جايبه 81 %
فاطيما بصت لماريا : بجد ..طيب احلفى
ماريا: بصى اهو
بصت فاطيما وجمعت هى الارقام ومكنتش مصدقه
فاطيما بسعاده: وهدخل كليه وهجيب اللالاب توب هييييييييييييييييييييييييه
ماريا قامت حضنتها والاتنين فرحانين من نجاحهم وخرجت مامت ماريا وزغرطت ليهم
فاطيما: انا هنزل هروح اطمن ماما وبابا وتوحه
ماريا: اوكيه
مامت ماريا: استنى اتعشى معانا انا هجهزلك العشا معتبر علشان نجاحكم
فاطيما : بلاش اغراءات يا طنط انا لو جيجى مظبطتنيش انا جايه
ولو مجتش الصبح هاجى اخده اشطه
ماريا: مبتسبش حقها ابدا
فاطيما: ارضاء المعده واجب وطنى يلا سلام
ماريا : طيما
فاطيما: ايه
ماريا: صحيح هو جالك عيد ميلاد نابليون الاول عملوله امتى
فاطيما: حاجه معروفه اكيد وعنده سنه اصل انا ال عملتهوله
ماريا بتضحك: يخرب فقرك يلا امشى
فاطيما بتضحك: اشطه سلام
ونزلت فاطيما فرحانه وطلعت فرحت البيت ومامتها زغرطت والجيران طلعوا يباركوا بليل بعد العشا باباها كان اشترى تورته وفاطيما قاعده منشكحه :
فاطيما ل باباها: نجحنا اهو وهندخل الكليه ناقص ايه ع الاتفاق
باباها: من عنيا يا طيما الاسبوع الجى هيكون عندك
محمد: كل دا ع 81% اومال لو جابت 90 % او 95%
فاطيما : لا انا الارقام دى سبتهالك تشد حيلك انت تجبها يا بشمهندز حماده
مامت فاطيما: الحمد الله انها نجحت انا كنت شاكه اصلا
فاطيما: شاكه .. ليه بابا متجوز دبوس هههههههههههههه
الكل ضحك .. مامتها: انتى اكبر دبوس جبته
فاطيما: من كتر شكشكتك فى عبد المنعم
باباها بيضحك: يخرب فقرك ولسانك دا
قوليلى ناويه كليه ايه
فاطيما: لسه هشوف وربنا يسهل ..تجبلى اللاب وانا هشوف
باباها: ان شاء الله
جدتها: وانا هديتى ليكى هجبهالك لما اقبض المعاش
فاطيما قامت وحضنت جدتها: انتى هديتى يا توحا .. انا برضى بكاش موافقه
مامتها: يخرب عقلك علشان تجيبى اكل
فاطيما: مش الكليه دى محتاجه لبس وطرح وجزم وشنط واكل يتصرف عليهم هحوش من دلواقتى
محمد: انتى هتروحى علشان تاكلى
فاطيما: ع حسب الكليه ال هدخلها .. يا هاكل ف البيت يا هاكل هناك فيها .. المهم مقعدش جعانه
محمد: طيب خلى بالك لتفتكرى اللاب فطيره وتاكليها
فاطيما: الفطيره دى ال انت بتعملها ع السرير
محمد راح حدف فاطيما بمخده الانتريه راحت فاطيما حدفته بمخده التانيه
باباهم: بس بس بس انتوا مبتعرفوش تتكلموا من غير خناق
محمد: سمعتها يا بابا قالت ايه
فاطيما: بهزر يا جدع بهزر يا بشمهندز
محمد: رخمه
فاطيما طلعت لسانهها ليه .محمد: شايف يا بابا
باباها: فاطيما بطلى رخامه ع اخوكى يااما مفيش للاب
فاطيما سمعت كده قامت هووووب نطت جنب محمد وتبوس فيه: حماده حبيبب طيما انت ياناس يؤغتى
الكل ضحك ع تصرفات فاطيما ومحمد وكملوا القعده واكلوا التورته ال اشتراها باباها ...!!!
خلصوا القعده ودخلت فاطيما اوضتها وهى فرحانه اخيرا توترها راح
راحت اتوضت وصلت ركعتين شكر لربنا انه سمع دعاها وفرحها .. واللاب هيجيلها موابيلها رن وكانت سلمى بنت عمها
فاطيما بسعاده وانشكاح: سولى سولى
سلمى بتضحك: طيما ..مبرووك يا حبى
فاطيما: الله يبارك فيكى يا حبى
سلمى: مش هسئلك جبتى كام والحاجات بتاعت الناس الكبار دا
فاطيما بتضحك: المهم نجحت وهدخل كليه علشان شرف العليه انتى فاهمه عمك ومراته بيجلهم حموضه من معاهد
سلمى بتضحك: ايوه ايوه هو فيروس ومنتشر ف العيله كلها اومال انا ومصطفى دخلنا كليات ليه
فاطيما: والاهم اللاب هيجيلى الاسبوع الجى وهنطلق ع النت والفيس براحتى وهزهقكم وهترحم من شلل ورخمه محمد
سلمى: ماهو انتى ال رفضتى اجبهولك الاجازه ال فاتت وقولتى لا
فاطيما: علشان تزلينى يا اختى لا ..وبعدين انا بحب حاجاتى بابا يجبهالى
هو مخلفنى ليه يعنى علشان يجبلى طلباتى
سلمى: ربنا يخليكوا لبعض ..عاوزه هديه ايه بقى احنا كمان شهر نازلين
فاطيما: اممم مش عارفه ..حقى ناشف
سلمى: لا بجد يا طفسه ..عاوزه ايه انا مش عارفه اجبلك ايه
وبقيت اقلق ف حوار الهدوم دايما يبقوا ضيقيين اوى او كبار اووى وبتشحتيهم
فاطيما: ماهو انتى ال مش دقيقه فى اختيارك
سلمى: طيب قولى عاوزه هديه ايه نجبهالك انا ومصطفى وماما وبابا
فاطيما: والله ماعارفه تعالى ويحلها ربنا
سلمى : طيب هتعرفى تفتحى نت دلواقتى ولا محمد قاعد
فاطيما:مش عارفه
سلمى : انا بعت ل ميمى وتعالى ندخل نحتفل بنجاحكم ف الجروب
فاطيما: امم اشطه هعمل براشوت على الرخم يلا سلام
قفلت فاطيما مع سلمى وقبل ما تخرج من الاوضه بصوت عالى : محممممممممممد
وفتحت الباب وخرجت : محمممممممممد محمممممممد
محمد قاعده قدام الكمبيوتر: فى اييييييه فى ايييييييييه
فاطيما بسهوكه : حماده حبيب طيما اخويا الوحيد والاوحد
محمد: هاااا عاوزه ايه
فاطيما: قوم ساعه من ع الجهاز هفتح ابص بصه مطوله وهقوم مش هسهر وعد
محمد: انا بعمل حاجات مش فاضى
فاطيما بصت ع الشاشه وخبطته ع راسه: حاجات ايه ياابو حاجات
بتحضر الماجستير دا انت بتلعب
محمد بصلها: مش قايم
فاطيما بصوت عالى : بابااااااااااااا يا بابااااااااااا
باباها: فى ايه
فاطيما: قول لمحمد يقوم عاوزه افتح الفيس شويا سلمى وميمى واصحابى موجودين شويا وهقوم وهو مش راضى
باباها: قوم يا محمد شويا ل اختك
محمد قام بينفخ: ماشى ماشى
فاطيما بتقعد وفرحانه: كلها كام يوم ومش هتلاقينى جانبك واشبع بالكمبيوتر كله
فتحت فاطيما ايميلها ودخلت الجروب ولاقت سلمى مثبته بوست تهنئه لنجاحها هى وماريا دخلت شويا ودردشت مع اصحابها ف الجروب وعلشان هى ادمن دخلت تشوف مين دخل ولاقت اسم جديد .... خلصت وقامت وقعدت هى وجدتها تتفرج ع التليفزيون وقدامهم طبق فيشار كبير وباقى التورته والحلويات ....!!
تانى يوم نزلت فاطيما تجيب لمامتها حاجات من السوبر ماركت ع اول الشارع .. دخلت فاطيما السوبر الماركت : السلام عليكم
عم عبد المجيد : وعليكم السلام ورحمه الله وبركاته ..طيما
فاطيما باابتسامه : ازيك يا محمد .. ازيك يا جدو ياعسل انت
محمد حفيد عبد المجيد كان معاه ف المحل هز راسه ل فاطيما لانه كان بجيب حاجات لزبونه
عبد المجيد: مبروك يا طيما سمعنا الزغاريط وعرفنا انك نجحتى
طيما سندت ع المكتب : كده مفيش حجه يا حاج خلصت ثانويه
ولازم تيجى تتكلم مع بابا لان الناس بيجيبوا ف سيرتنا مينفعش كده
ضحك عبد المجيد: مش احنا اتفقنا هكون نفسى واجيب الموتوسكل
فاطيما بتضحك وغمزتله: وانا هستناك يا حاج الموتوسكل حلم حياتك وانا هساعدك وطز ف الناس
عبد المجيد ضحك: يخرب عقلك يا فاطيما دمك زى العسل
انا لو كنت قدك مكنتش سيبتك
فاطيما: ومين قال انك كبرت دانت مربع ف قلبى من جوه جوه
داانت الراجل الوحيد ال بدينى كل حاجه بحبها من شيكولاتات وشيبسات وكانزات مظبطنى يعنى يا حاج ومبتقوليش لا
عبد المجيد بيضحك : المحل كله تحت امرك يا طيما
فاطيما: تسلملى يارب .. ونبى جهزلىالطلبات اللى مكتوبه دى عقبال ما ارجع
ومشيت فاطيما ومحمد عينه منزلتش من عنيها وجده لاحظ
جده : واخرت البص دا ايه
محمد:ها
____________________
يتبع
ليست هناك تعليقات:
إرسال تعليق