مقدر فى السماء (12)

(12)

فى يوم ف الشركه مهاب كان قاعد ف الشركه الباب خبطت 
مهاب: ادخل 
سمع صوت سهر: بيبى وحشتنى 
مهاب وقع القلم من ايده وبص ناحيه الباب ولاقى فعلا سهر قدامه ...
مهاب:سهر
سهر مبتسمه: مفاجاءه حلوه مش كده
مهاب متفاجئ وضحك نص ضحكه: اه جدااا بس مقولتيش ليه واونكل كمال سبتيه ولا ايه لوحده
سهر قعدت : انت بتحقق معايا استنى اخد نفسى واطلبلى حاجه اشربها
مهاب قعد وطلب عصير وجه ..
سهر : لا اونكل كمال ف فرنسا وانا راجعه تانى ع طياره بليل
جيت بصراحه بالصدفه كان اونكل محمود بيكلم بابا وكان فى اوراق لبابا وهيبعتهاله بالبريد فقلت انا هاجى اخدهم وارجع ومنهم اشوفك لانك وحشتنى جدااا
مهاب ارتاح انها راجعه : اهااا .. طيب كويس
سهر بصت لمهاب: كويس انى راجعه
مهاب اتلجلج: لا اقصد ان اونكل بقى كويس وقادر يشتغل شويا
سهر: مش اوى بصراحه لولا مراقبتى عليه كانت زودها بس حاجات خفيفه كده المهم يلا نتغدا بره ودلواقتى علشان الوقت
فكر مهاب بسرعه : يلا بينا انا اصلا موريش حاجه
قفل مهاب ال وراه واخدت سهر الاوراق وراحوا يتغدوا وف الطريق بعت مهاب رساله لرقيه انه ف ميتنج وبعت لمامته انها تخلى بالها من رقيه لانه هيتاخر
قضى اليوم وحاول يلهى سهر ع قد ما يقدر انها متسألش عن رقيه ولا اى حاجه وهى كانت مبسوطه وحاسه ان مهاب رجعلها وكانت فرحانه بالوقت ال قضته معاه .. وصلها مهاب لمطار ورجعت سهر فرنسا وارتاح مهاب من العبء دا ..لكن وهو راجع فكر ولاقى انه مهما دارى عليها هتعرف
فقرر انه يشوف وقت مناسب يقول لسهر ..!!!
_________________________
فى يوم مهاب كان اجازه فقعد ف البيت اتغدى مع رقيه ودخل المكتب يخلص شغل ورقيه قعدت تتفرج ع تليفزيون وكان ف برنامج بيتكلم عن الامومه والاطفال وكانت مندمجه اووى مهاب خرج من المكتب راح يشوف رقيه بتعمل ايه
مهاب: ياترى انتى مندمجه فى ايه كده
رقيه : دا برنامج طبى بيتكلم عن الامومه والطفوله لل بيبقى عندهم اول بيبى وجايبين امهات بيتكلموا اهو منهم نستفيد
مهاب : ومفيش اباهتهم دايما الاب منسى كده
رقيه بتضحك: لا فى
مهاب راح قعد جنب رقيه : ادى قعده اشمعنى انتى تستفيدى
رقيه: اصل انا اول مره
مهاب : ع اساس ان عندى دسته
رقيه بتضحك : اتفضل اتفرج
جت فقره فى البرنامج بيتكلموا عن ان ضرورى الاب والام يكونوا محتويين بعض والاب يهتم بالام لانها بتبقى متقلبه المزاج والنفسيه نتيجه تغيرر هرمونات فى جسمها من الحمل فبتحب جوزها دايما يهتم بيها ويدلعها والتلامس زى مسك الايد والاحضان والتقارب والتقبيل شئ مهم علشان الطفل وسعاده وانه يشعر بسعاده والابتهاج لان الحاجات دى بيعزز هرمون الاندروفين هرمون يهدى الاعصاب ويشعر الطفل بالابتهاج والسعاده وهو داخل رحم امه
و جايبين ام واب جداد وبيتعاملوا مع بعض بلطف ورومانسيه وحب
اتحرجت رقيه ومهاب اتوتر وبصوا لبعض وبعدين رجعوا بصوا ع التليفزيون
خلص البرنامج والاتنين محرجين من ال سمعوه وشافوه قعدوا جنب بعض ساكتين
شويا ورقيه : انا هقوم اعمل كيكه نفسى فيها
مهاب : احم وانا هدخل المكتب نسيت حاجه
رقيه: عاوز حاجه اعملهالك
مهاب: لا متتعبيش نفسك انا شويا وهنام
رقيه قامت : طيب
مهاب قام بسرعه ودخل المكتب وقعد يكلم نفسه: فى ايه هو انا مالى كده
الاندروفين ...!!!
_______________________________
تانى يوم مهاب فى الشركه تليفونه رن وكانت سهر
مهاب: الو
سهر: بيبى وحشتنى عامل ايه امبارح مكنتش بترد ع مكالماتى
مهاب : امبارح ..
سهر : اها انت ناسى كنت فين امبارح كنت فين يا بيبى
مهاب افتكر انه قضى اليوم كله مع رقيه
مهاب كدب ع سهر : اها .. كنت مع نهله اصلها جت اجازه يومين فكانت وحشانى وقعدت معاها
سهر : طيب .. ع فكره انا عاوزه اقولك حاجه
مهاب : خير
سهر : وانا مع بابا اتعرفت ع رجل اعمال فرنسى كلمته عن مشروعنا
وعجبه الفكره وعنده موافقه انه يمول المشروع ..ها ايه رأيك
مهاب اتغيرت نبرته : رأى فى ايه ..
هو انتى مع باباكى تهتمى بيه ولا تتفسحى وتتعرفى ع ناس
سهر حست بعصبيه مهاب: مهاب انا قلت اساعدك ف حل مشكلتك مع باباك ورقيه علشان لما تنفصلوا المشروع ميقفش او معرفتش تخليها زى ما اتفقنا تسيبك تسيبها وتبقى لا محتاج ليها ولا لباباك ونبتدى مشروعنا ونتجوز
مهاب سكت لحظات ومش عارف يرد : سهر ركزى دلواقتى مع باباكى .. باباكى الاهم دلواقتى
سهر استغربت من رد فعل مهاب : مهاب انت ورقيه عاملين ايه مع بعض
مهاب: عاملين ايه يعنى زى ماانتى عارفه
سهر: والتنازل
مهاب: قريب هانت متستعجليش الاحداث
سهر : عاوزه اسمع خبر حلو قبل ما انزل علشان لو نزلت ولاقيت مفيش حاجه معرفش انا جننونتى هتعمل ايه
مهاب ضحك : ها ها ها .... الا جنانك اهدى كده
سهر : طيب يا بيبى تمام انا هقفل وابقى رد ع اتصالاتى
مهاب : تمام
قفلت سهر ومهاب مش عارف يبلغ سهر بحمل رقيه ازاى ويخليها تلغى التفكير ف انها تدور ع حل علشان خلاص هو مش محتاجه...ّ!!!!
____________________________
فى يوم مهاب صحى بدرى وخرج من اوضته لاقى الفطار جاهز ع السفره
بص ناحيه المطبخ شاف رقيه واقفه ... مهاب: رقيه
رقيه باابتسامه: صباح الخير عقبال ما تلبس النسكافيه هيكون جاهز
مهاب : مش قلنا ترتاحى وانا عليا تحضير الفطار وانتى الغدا
رقيه بتضحك: لا لو اتعودت على كده هتتعب انت ..كفايه عليا الفتره ال فاتت
وبعدين انت سمعت من الدكتور ان انا بقيت كويسه ولازم اتحرك مش متعوده ع القعده كده
مهاب : ماشى بس برضه خلى بالك وشغل ف الحديقه تحت ممنوع غير لما اكون معاكى
رقيه بتضحك .. مهاب: بتضحكى ع ايه
رقيه : افتكرت زمان لما زرعنا مع بعض الورد ف دمنهور
مهاب ابتسم...رقيه : يلا بس البس علشان تلحق تفطر
دخل مهاب ولبس ورقيه باست ف بسكت الزباله لاقت علب سجاير مرميه وفيها سجاير خرج مهاب وهما قاعدين يفطروا
رقيه : مهاب هو انت رميت علب السجاير دى
مهاب: اه
رقيه باابتسامه: ليه ..ولا باظت
يبيضحك مهاب : سجاير بتبوظ دى اغلى نوع يا بنتى
بس انا قررت انى ابطل صحتى ب بقى وخايف عليها
ضحكت رقيه: يارب دايما عقبال ما تكملها ع خير
بتبص رقيه ع المكتب مهاب لاحظ انها بتلمح ع ازايز الويسكى
مهاب : كل حاجه وليها وقتها ..المهم انا نازل دلواقتى عاوزه حاجه اجبهالك
حوار الوحم دا مفيش نفسك ف حاجه
رقيه : اممممممم بصراحه ف حاجه نفسى فيها من امبارح وكنت هبعت اجبها
مهاب : اوعى تقولى شيكولاته
رقيه بتضحك : ايوه بس المرادى بسكويت بالشيكولاته
مش عارفه نفسى فيه اوووى
مهاب بيضحك: لالالا كده الموضوع كبير مش عاوز ابنى ولا بنتى يبقوا بوحمه
رقيه بتضحك: ماهو انا هنقفذ ما احاول انقاذه وهبعت اجيب
مهاب : لا متعبعتيش انا هبعتلك
تمام يلا انا نازل اشوفك ع الغدا
رقيه : ان شاء الله
قام وقف مهاب وبسرعه باس رقيه ع خدها : لااله الا الله
لاقيه بصت لمهاب ع تصرفه : ها
مهاب بيدارى توتره : علشان البيبى انتى نسيتى التقبيل وهرمون الاندروفين
رقيه ضحكت : ها .. سيدنا محمد رسول الله
خرج مهاب وع وشه ابتسامه ورقيه كمان كان مبسوطه من تصرفات مهاب ال اتحسن اكتر من الاول من وقت ما حملت ...!@!!!

خرج مهاب من الشركه بعد ما خلص شغل وراح محل حلويات كبير واشترى كميه كبيره من افضل واغلى انواع البسكويت بالشيكولاته ورجع ع البيت ودخل وحطهم ع السفره .. رقيه طلعت من عند خالتها تجهز الغدا شافتهم فرحت اووى وراحت تفتح العلبه وتاكل منها من غير ما تحس ..مهاب خرج من الاوضه بعد ما غير وشاف منظر رقيه وهى بتاكل بشراهه
مهاب قرب منها وبيضحك: براحه محدش هياكله منك .. كله ليكى ع فكره
رقيه اتحرجت: سورى اصل لما شوفته مقدرتش اقاوم وحم بقى
مهاب بيضحك: الف هنا ..
بص مهاب ع شفايف رقيه لاقى ف فتافيت بسكويت من غير ما يحس مد ايده ولمس شفايف رقيه واخد الفتافيت وحطهم ف بوقه ورقيه تنحت من الموقف
مهاب لاحظ ال عمله من غير ما يحس راح جمع نفسه
مهاب : ايه هنتغدى بسكويت شيكولاته ولا ايه
رقيه : ها ...اه صح 10 دقايق والاكل هيجهز
مشيت رقيه بسرعه ورجعت تشيل علبه البسكويت الكبيره مهاب راح بسرعه وشالها ودخلها المطبخ واقفه رقيه تحضر الاكل لمست شفايفها جسمها قشعر وكانت فرحانه جدااا ..... حضرت رقيه الغدا وبعد الغدا دخل مهاب المكتب ورقيه دخلتله عصير وخرجت قعدت تنضف زرع ال ف البلكونه ولما حست بتعب راحت شغلت التليفزيون وجابت طبق فيه بسكويت بشيكولاته وقعدت تاكل وهى بتتفرج خرج مهاب من المكتب وشاف رقيه قاعده راح قعد جنبها : بتتفرجى ع ايه
رقيه: ع فيلم لاقيته لذيذ قلت اكمله
مهاب : خلاص اتفرج معاكى
رقيه مسكت الطبق ال فيه البسكويت : تاكل بسكويت ولا عاوز اقوم اعملك حاجه
مهاب : لالالا شكرا
مهاب فضل يبص ع رقيه من تحت لتحت وهى بتاكل وقعد يتنحنح ويقرب من رقيه شويا شويا ... رقيه مسكت بسكوته وحطيتها ف بوقها مهاب راح ندا عليها
مهاب: رقيه
رقيه بصت وفى بوقها بسكوته كسرتها : امم
وكانت رقيه وشها قريب جدا من وش مهاب راح قرب مهاب بسرعه منها وقرب شفايفه منها واكل حته البسكوته ال كانت مكسوره منها وفى نفس الوقت باسها ...
رجع مهاب وبياكل البسكويت : اممم لا طعمه حلو عندك حق تحبيه
رقيه اتصلبت ف مكانها من المفاجاءه
مهاب بصلها ووقف بيدارى توتره : هرمون الاندروفين يا رقيه والبيبى
رقيه هزت راسها مهاب بص عليها لاقىع شفايفها شيكولاته استغل فرصه ورقيه مذبهله قرب منها وشال الشيكولاته من ع شفايفها بشفايفه
وبص لرقيه : الاندروفين .. انا داخل المكتب
دخل المكتب مهاب بسرعه وقلبه كان بيدق بسرعه ومستغرب من جرائه مع رقيه ومبسوط ف نفس الوقت ورقيه حطت ايدها ع شفايفها وابتسمت وحطت ايدها ع بطنها : الاندروفين .. الاندروفيين
______________________________
مرت الايام ومهاب وعلاقته مع رقيه بقت احسن من الاول وسهر كل ما تتصل بمهاب يطمنها ويثبتها بكلمتين فى يوم رقيه راحت المستشفى علشان المتابعه وراح معاها مهاب
رقيه متوتره من الفرحه: انهارده هيقولولنا بنت ولا ولد
مهاب : ان شاء الله
رقيه : يارب تكون بنت ولا انت عاوز ولد
مهاب مسك ايد رقيه يهديها وباسها: انا عاوز انتم تقوموا بالسلامه
رقيه ابتسمت والممرضه ندت ع اسمهم يدخولو...دخولوا اوضه الكشف وعملوا كشف السونار كالعاده والمرادى كان علشان يعرفوا نوع الجنين
بعد ما مر شهرين ....
الدكتور : جاهزين تشوفوا البيبى
رقيه ماسكه ايد مهاب : ايوه يا دكتور
مهاب باابتسامه: ايوه يلا
الدكتور شغل الجهاز وابتدى يعمل السونار وكان الجنين باين منه ملامح وابتدى يتكون
الدكتور : دا الراس والرجل والايد اهى
رقيه: بنت ولا ولد يا دكتور
الدكتور : انتوا عاوزين ايه
مهاب : بنت او ولد مش مهم المهم يجى بالسلامه
الدكتور ابتسم : احب ابشركم انها بنوته
رقيه فرحت اوى : بجد يا دكتور بنت
الدكتور : اها بنت ان شاء الله والشهر الجاى هتبان اكتر بس بنوتك بتقولك اهتمى بيا يا مامى واتغدى كويس وبلاش اجهاد
مهاب بحركه لا اراديه مسك ايد رقيه وبباسها ..رقيه رد فعل مهاب فرحها
الدكتور: البنات حبايب ابوهم خلى بالك يا مدام رقيه بيبقوا دلع والاهتمام عن الام
مهاب : انا معنديش اغلى من الاتنين ربنا يقومهم بالسلامه
الدكتور : ان شاء الله
المهم لازم تتغدى كويس علشان نسبه الانميا وتشربى لبن وتاكلى منتجات الالبان
رقيه : ان شاء الله
مهاب بسعاده: متقلقش يا دكتور كله تحت السيطره

خرجت رقيه ومهاب من عند الدكتور وهما فرحانين وف الطريق رقيه حاطه ايدها ع بطنها ال ظهرت شويا : تيجى بالسلامه يا حبيببه قلبى
مهاب بصلها وابتسم وكان فرحان .. وهما راكبين العربيه
مهاب: تحبى تروحى فين
رقيه بصتله: البيت مش هنرجع البيت
مهاب : لا طبعا .. هنتغدى برضه احنا التلاته
رقيه ابتسمت وبصت ع بطنها : بابا هيعزمنا بره مش بقولك يا بختك
مهاب : ها عاوزه تروحى فين
رقيه : امم مش عارفه اى مكان انا اصلا معرفش اماكن
مهاب : طيب تمام
ومهاب لسه هيدور العربيه تليفونه رن وبص لاقاها سهر راح قفل التليفون
رقيه: قفلت الموبيل ليه
مهاب : انهارده اليوم ليكم مفيش شغل مفيش تليفونات ولو البيت عاوزنى هيتكلم ع تليفونك
رقيه ابتسمت: اوك
راح مهاب مول واخد رقيه ونزل ودخلوا وكان ماسك ايد رقيه ومش سايبها تمشى لوحدها ورقيه كانت ف منتهى السعاده مش مصدقه .. دخلوا
محل كبير بيبع ملابس اطفال ولعب .. مهاب هو ورقيه قعدوا يتفرجوا وفرحتهم انها بنوته اشتروا سرير ولبس ولعب ...ورجعوا ع البيت راحوا فرجوا مامت مهاب ع الحاجه وبشروها انها بنوته واتصلوا بااهل رقيه يبشروهم وفرحوا وطلعوا ع شقتهم ....دخلوا الشقه وهما مبسوطين اووى وفرحانين قعدوا يرتاحوا بعد ما الموظف الامن والخدامه طلعوا الحاجه مع مهاب
رقيه: اشترينا حاجات حلوه اوى يارب تلبسها ف الهنا
مهاب : ان شاء الله
رقيه بصت لمهاب: انت كنت عاوز ولد ولا بنت
مهاب : انا بحب البنات وبعدين بنت ولد دا رزق من عند ربنا مينفعش نعترض
رقيه : الحمد الله ..الحمد الله
مهاب : المفروض نفكر فى اسم ليها ياترى ايه
رقيه مسكت السلسله ال مهاب جبهالها : مش محتاجين ندور اسمها موجود
بص مهاب ع السلسله: ياسمين
ابتسمت رقيه : ايوه ياسمين ايه رأيك
ابتسم مهاب وافتكر ان السلسله دى كانت ابو بوسه ليهم واول بدايه قربه لرقيه واول حاجه اشتراها واحساسه وقتها
مهاب باابتسامه : موافق ..تيجى بالسلامه ياسمين
رقيه : ان شاء الله
وقفوا الاتنين ووقفوا بين اوضتين ال بيناموا فيها
مهاب: احنا هنحط الحاجه دى فين
رقيه احتارت : مش عارفه
مهاب وقف يفكر ومش عارف لانهم بيناموا ف اوضتين منفصلتين
رقيه حست ان مهاب محروج : هاخدها عندى معايا ما كده كده هتكون معايا
مهاب ابتسم لرقيه: اتفقنا هدخل الحاجه
دحخلوا الاوضه يحطوا الحاجه وركبوا السرير الصغير وكان شكله جميل اوى وفيه العب ال اشتروها
مهاب وقف يبص ع السرير وبص ع رقيه : انا خارج بقى غيرى واقعدى براحتك
رقيه : اوك .. انت هتنام
مهاب : لا هاخد دش واحلق دقنى وانام علشان عندى ميتنج الصبح
رقيه : ممكن اطلب منك طلب
مهاب: اتفضلى
رقيه بكسوف: عندى احساس غريبه انى عاوزه احلقلك دقنك انا
مهاب استغرب: اشمعنى
رقيه : نفسى اجرب ممكن... متخفش مش هعورك هاخد بالى وبعدين الاندروفين ياسمين عاوزه تحلق لباباها
مهاب ضحك : اوكيه
خرجت رقيه من الاوضه وجاب مهاب حاجات الحلاقه وابتدت رقيه وع وشها ابتسامه تحط لمهاب الكريم وبراحه بتحلقه مهاب كان عنده احساس بسعاده اول مره يحصل معاه كده ورقيه كان فرحانه اوى .. خلصت رقيه حلاقه
ومهاب بص لاقى انها معورتهوش ولما خلصت رقيه راحت باسته ع خده : نعيما يا باباى
مهاب باابتسامه: شكرا
رقيه: انا هدخل ارتاح شويا تصبح ع خير
مهاب مسك ايد رقيه .. رقيه: عاوز حاجه
مهاب معرفش يقول ايه بصلها وقام وقف وقرب منها وباسها ع خدها : وانتى من اهله .. الاندروفين
رقيه ابتسمت ودخلت الاوضه ومهاب اخد دش وراح ع اوضته ينام
عمال يتقلب ع السرير مش عارف ينام قام خرج من اوضته يتمشى لاقى نور اوضه رقيه منور ...خبط عليها ودخل : انتى منمتيش لسه
رقيه: كنت بقرا ف الكتاب شويا وهنام ..انت مش عارف تنام
مهاب راح اتوتر وعمل نفسه بردان: مش عارف حاسس انى سقعان اووى
رقيه اتخضت وقامت : بردان ازاى واحنا مش ف شتا ولسه مجاش يبقى من التكييف هو مفيش غطا عندك اقوم اجبلك
مهاب بسرعه: لا مش مستهله هو لو يعنى ينفع
رقيه قاطعته : يبقى الاوضه ال هناك برد وتكيفها جامد ودى دافيه انا هنام هناك وانت هتنام هنا
قامت رقيه وجت تخرج راح شدها مهاب : هو لو احنا الاتنين نمنا فى اوضه واحده غلط يعنى .. والاندروفين
رقيه : ها
مهاب اتوتر وحاول يعدل كلامه: اقصد يعنى الاندروفين وياسمين مش عاوزين نبوظ نفسيتها مش سمعتى الدكتور .. التلامس والتقبيل يعنى عادى يعنى
رقيه : انا خايفه اضايقك
مهاب : لالا مفيش مضايقات
راح مهاب ورقيه ناموا ع السرير رقيه ع حرف السرير ومهاب ع حرف السرير وفى فراغ كبير ف النص بالطريقه مهاب واحده واحده قرب ورقيه كانت مديه ظهرها لمهاب ... مهاب كان قريب لرقيه راح ندا على رقيه
راحت رقيه لافت نفسها تبص عليه وهى بتلف لاقت نفسها ف حضن مهاب
مهاب بيحاول يدارى توتره: الفراغ ال ف النص دا بيدخل هوا وانا بردان
وبعدين مش كده احسن علشان الاندروفين وياسمين
رقيه اتصلبت لما فاجاءه لاقت نفسها ف حضن مهاب ودى تعتبر المره التالته
رقيه هزت راسها ... مهاب براحه مد ايده وحضن رقيه راحت رقيه سندت راسها ع صدره وحست براحه غريبه كانت مفتقداها ومهاب وهو حاضن رقيه حس بسعاده كان مفتقدها ونامت رقيه ف حضن مهاب ...!!!
تانى يوم الصبح صحيت رقيه وقامت براحه علشان متقلقش مهاب وحضرت الفطار ورجعت تبص ع مهاب لاقته نايم لسه .. قربت منه تصحيه فضلت تبص عليه وبايدها لمست شعره وخده وحاسه انه بتحلم وفاجاءه مهاب كان صاحى وعمل انه هيعضها اتخضت رقيه
رقيه: مهاب
مهاب بيضحك: اتخضيتى انا اسف ...
رقيه: صباح الخير الفطار جاهز
مهاب : تمام هحصلك
خرج مهاب بعد ما لبس وقعد يفطر مع رقيه ورقيه طول ماهى قاعده مبتسمه
ومهاب ملاحظ كده : الاندروفين عامل شغل
رقيه بصت لمهاب راح مهاب باصص ع بطنها : مش كده يا ياسو
رقيه بصت ع بطنها وضحكت : واضح فعلا
مهاب : وهو الاب ايه غير تضحيه علشان اولاده وبيدور ع سعادتهم هو دا دور الاب والام دورها تساعد باباهم علشان يسعدوا اولادهم .. مش كده ولا ايه
رقيه بصت لمهاب: اها فعلا
مهاب خلص فطار وقام وقف : يبقى علشان ياسمين وسعادتها وتكبر كويسه
وانتى قاعده هنا اتسلى كده وانقليلى حاجتى زى ما نقلتيها المره الاولاانيه لااوضه
رقيه بخضه: انقلهم فين
مهاب شاور ع الاوضه ال بتنام فيها رقيه ال هما اوضتهم ف الاساس : مع ياسمين انا مش هسيب ياسمين تنام لوحدها ولا ام ياسمين
اتحرجت رقيه لما سمعت الكلام دا .. مهاب: يلا اشوفك ع الغدا
راح مهاب باس خد رقيه : الاندروفين ... لااله الا الله
رقيه باابتسامه: سيدنا محمد رسول الله
_________________________
خرج مهاب وكان فرحان جدا ان علاقته مع رقيه اتطورت بالشكل دا
واول ما ركب العربيه بص ع موبيله لاقى اتصالات كتير من سهر ووقتها فكر ف سهر وقال لنفسه:لازم ضرورى اتكلم مع سهر واوضح لها كل حاجه ... مينفعش افضل بكدب عليها كده وسهر هتفهم اكيد ..انا هيجيلى بنت ولازم اراعى ربنا هانت هى كمان اسبوع جايه هتكلم معاها لما اشوفها وهفهمها الوضع
راح مهاب الشركه وهو ف مكتبه دخلت السكرتيره عليه بقلق
سكرتيره: مستر مهاب مستر مهاب
مهاب : خير ف ايه
السكرتيره: مستر محمود تعب ف المكتب
ولسه هتكمل الكلام مهاب بسرعه راح مكتب باباه وكان تعبان طلبوا الدكتور وطلع انه محتاج راحه وبسبب الاجهاد تعب اخده مهاب وراح ع البيت وبقى كويس لما اخد العلاج ... ف نفس الوقت ال مهاب اخد باباه وروحوا البيت
سهر وصلت الشركه وكانت مفاجاءه ودخلت تفاجئ مهاب مش لاقته وعرفت ان ابوه تعب وراح البيت قلقت سهر وراحت البيت بسرعه تطمن على ابو مهاب ... جرس الباب رن وفتحت الخدامه ودخلت سهر
دخلت سهر والكل قاعد مهاب ورقيه وامه وباباه : مساء الخير عليكم
مهاب شاف سهر اتصلب ومامته وباباه قابلوها بترحاب ورقيه كمان
ام مهاب: حمد الله ع السلامه يا سهر ايه المفاجاء دى
انتى مش كنتم جايين كمان اسبوع
سهر بتضحك: حبينا نفاجئكم بابا فى البيت وانا روحت الشركه عرفت ال حصل لااونكل محمود مقدرتش اقعد جيت اطمن عليه ..الف سلامه يا اونكل
ابو مهاب : الله يسلمك يا حبيببتى وبابا عامل ايه صوته بصراحه طمنى اخر مره كلمته
سهر : الحمد الله العمليه التانيه تمت ع خير وبقى كويس جدااا وطبعا حطاه تحت المراقبه وانت يا عمو محتاج مراقبه ولا ايه يا زوزو
مامت مهاب : انتى بتقولى فيها يا سهر .. مهاب هيبقى مسئول الفتره الجايه مكان باباه وباباه هيشتغل هنا قدام عينى اه هينشغل عن رقيه شويا بس هنعمل ايه
سهر بصت ع رقيه شايفاها متغيره تخنانه اكتر من اخر مره شافتها قبل ما تسافر ...سهر بتضحك: رقيه انتى نسيتى نفسك كده ليه
مامت مهاب : عقبالك يا حبيببتى رقيه حامل ف الرابع والحامل بتبقى كده
سهر سمعت حامل اتصلبت مكانها وتنحت : مين ال حامل
رقيه باابتسامه: انا يا سهر عقبالك يارب ويرزقك بالذريه الصالحه
مامت مهاب: ياسمين ان شاء الله ولا ايه يا ابو ياسمين
مهاب بيتلجلج : ها .. اها اها
رقيه : اقعدى يا سهر واقفه ليه
سهر مش عارفه تتكلم ولا تنطق ولا تعمل اى حاجه موابيلها رن
مامت مهاب: تليفونك يا سهر .. سهر
سهر انتبهت : ها . اه
بصت سهر ع الموبيل : عن اذنكم انا همشى دلواقتى وهبقى اجيلك يا اونكل تانى سلام
خرجت سهر بسرعه ومهاب خرج وراها .. سهر وهى خارجه مش مصدقه ال سمعته وان مهاب قرب من رقيه لدرجه الحمل دموع نزلت تلقائى من عنيها ... ومهاب خاف عليها تسوق وهى كده راح لحقها قبل ما تركب العربيه ومسك ايديها وشدها لغايه الحديقه ال جنب البيت ....
سهر زقت ايده: نعم .. فى ايه
مهاب بملامح ضيقه: سهر .. انا اسف
سهر بتضحك وهى بتعيط : اسف .. اسف ع ايه بالظبط
ع انك كدبت عليا ع انك نقضت وعدك وخالفت شروطى برغم مساعدتى ليك
انك فى الاخر هتبقى بابا من ولاد رقيه .. رقيه يا مهاب
مهاب شايف سهر بتنهار قدامه فقرر يكدب عليها علشان تهدى : انتى افهمينى الاول وبعدين اتكلمى حمل رقيه دا جه غلطه مش مقصوده وشروطنا هى هى موجوده
سهر سكتت وبصتله: المفروض اصدق
مهاب عمل حوار ع سهر : انا ف يوم شربت وزودتها ورجعت البيت معرفش ايه حصل تانى يوم مكنتش فاكر حاجه مكنتش ف واعى يعنى .... وبعدها لما سافرتى عرفنا حوار الحمل دا ... يعنى غلطه غير مقصوده منى
والتنازل هى كانت هتعمله والحمل خلااه يتاخر لانها هتكتب نسبتها لبنت
سهر بصت لااسلوب مهاب : يعنى
مهاب كمل الحوار : يعنى انا مجبر ف الموضوع دا وهشوف اخره ايه وكنت مستنيكى علشان ابلغك وخطتنا ماشيه زى ماهى متغيرتش
سهر صدقت مهاب ومهاب لاحظ انها صدقت :
سهر : بس مش قادره استوعب انك لمستها
مهاب بيمسك ايد سهر ويهديها: تصدقينى لو قلقتك مش فاكر حاجه
انتى ممكن تسأليها لو مكدبانى هتقولك كنت سكران .. امر واقع وبصراحه حوار التنازل باسم البنت كده احسن بالكتير لانى انا هبقى الواصى
سهر صدقت مهاب وراحت اترمت ف حضنه : مهاب .. انت مبتكدبش عليا
مهاب حاول يتماسك مفيش حل غير انه يحور ع سهر علشان متعملش مشاكل : هو دا ال حصل وانتى ساعدينى وخلينا نكمل ال بداناه ولا ايه
سهر بصت لمهاب : اتفقنا
مهاب : يلا روحى ع البيت ع طول بلاش سهر يا سهر
سهر راحت ركبت العربيه وكان مهاب عملها غسيل دماغ بس طول الطريق مضايقه من حمل رقيه ومهاب مضايق انه كدب بس دا الحل ال قدامه ..!!

رجعت سهر بيتها وهى ع وشها علامات حزن واكتئاب برغم من كلام مهاب
دخلت من غير ما تقول كلمه دخلت ع اوضتها باباها قلق دخلها الاوضه شافها قاعده عماله تمسح ف دموعها
باباها : مالك يا سهر فى ايه
سهر بتمسح دموعها: مفيش يا بابا
باباها: انت عرفتى ان رقيه حامل انت كده علشان كده
سهر بصت لباباها: انت كنت تعرف
باباها: من فتره وانا ال محبتش اقولك وانا كنت عاوزك تشوفى بنفسك
سهر: اشوف ايه
باباها: ان مش ليكى نصيب مع مهاب ..مهاب نصيبه مع رقيه
محاولاتك القديمه ودلواقتى كلها فاشله مش هتكسبى حاجه هتخسرى كل حاجه وقت وعمر وكله
سهر بحزن: انا بحب مهاب كله من اونكل محمود
باباها: محمود مغلطش
سهر : انت عارف اونكل محمود عمل كده ليه .. لو تعرف مش كنت هتقول كده
باباها بصلها: علشان رفض جوازكمن مهاب علشان يتجوز بنت اخوه ال وعدهم لبعض من صغرهم
سهر استغربت من ان باباها عارف : انت عارف الحكايه
باباها: من قبل ما يحطوا رجلهم ف المانيا
من وهما ف دمنهور ف بيتهم .. انا حضرت سبوع رقيه نفسها
الموضوع مش بسيط زى ماانتى فاكره دى عيله ال رابطهم ببعض مش فلوس ال رابطهم دم .. مكتوب ليهم يفضلوا مع بعض مهما غابوا وبعدوا ..
محمود رغم انه عاش بره مصر ولف العالم لكن دماغه وقلبه فلاح ال بيزرع الارض ال بيعشق الطينه والارض والعيله عنده دا معناها كبيره ميتوصفش ..
وانتى ومهاب علاقتكم كانت صداقه انا ى عن نفسى مكنتش اتوقع تتطور كده او انتم من ورانا تعملوا كده وترتبطوا وترتبوا كل حاجه واحنا مجرد مستمعين
غلط ال عملتوه .. وغلط انك سببتى ف المشكله دى ودخلتى نفسك ف العيله دى
سهر بملامح حزن: انا بحب مهاب
باباها: وابو بيحبه وبيحب بنت اخوه .. محمود بيحب عيلته
سهر: يعنى مفيش فايده
باباها: انسى بقى يا سهر اعتبريه صفحه واتقفلت مهاب بقى اخوكى وشوفى حياتك
سهر بنظر حزن : ان شاء الله
خرج باباها من الاوضه وهى اضايقت من كلام باباها واخدت نفسها ونزلت سهرت مع ليلى صاحبتها ....وهى قاعده مع ليلى كانت بتشرب وتعيط ليلى لاحظت كده
ليلى: سهر مينفعش ال بتعمليه دا ..دا مش هيغير حاجه
سهر : انا ضيعت مهاب بايدى ..انا سلمته لرقيه بنفسى يا ليلى
ليلى : سهر خلاص ال حصل حصل
سهر بسكر: وبيقولى انها حملت منه بالغلط كان سكران قال
ليلى : ممكن ع فكره
سهر : انا مش عارفه اعمل ايه يا ليلى انا بحب مهاااااب
ليلى مسكت ايد سهر وهى بتشرب : كفايه كده ويلا بينا تروحى
روحت سهر وليلى صعبانه عليها شكل صاحبتها ...
__________________________________
فى يوم صاحب مهاب يوسف حب يحتفل بعيد ميلاد مراته
فعزم مهاب وكل اصحابهم واكد ع مهاب ان يجيب مراته معاه يتعرفوا عليها
مهاب: تجهزى ع الساعه 8 يا رقيه
رقيه بتبص ع نفسها: ازاى تاخدنى كده قدامهم بكعبرتى كده
مهاب بيضحك: ال يعنى كنتى مارلين مورنو قبل الحمل
رقيه زعلت : الله يسامحك
مهاب مسك ايد رقيه: انتى كعبورتى انا ومش مهم عندى راى اى حد
وبعدين عاوز اخرج ياسمين ولا ايه يا ياسو الاندروفين يا روكا
رقيه ضحكت : اتفقنا
جهزت رقيه واخدها مهاب وراحوا وهما داخلين ...رقيه كانت متوتره راح مهاب مسك ايدها ودخل واستقبلهم يوسف صاحبه ومهاب اغلب الوقت ماسك ايد رقيه ودى كانت مطمناها ومش كان بيسيبها لوحدها وخصوصا لما شاف سهر ... سهر شافت منظر مهاب اضايقت بصت ع موابيلها كان مهاب باعت رساله لسهر يعرفها ان رقيه جايه وتتحكم ف نفسها علشان الخطه
سهر حاولت تتماسك وهى شايفه مهاب ماسك ايد رقيه وعمالين يضحكوا ... جت ليلى صاحبتها جنبها
ليلى: والله يا بنتى ميستهلكيش
معرفش انا عاجبه ف الطخينه دى ايه حتى مش حلوه .. ذوقه زى يوسف مبيقدروش الجمال
سهر وهى باصه ع مهاب : انا لازم اعمل حاجه ومهاب يرجعلى مش هستحمل انا
ليلى : كبرى بقى وعيشى وقتك مع الاحسن منه
سهر بعد لحظات من السكوت بصت ل ليلى : انا محتاجاكى ف حاجه تعالى بره
خرجت ليلى : ها فى ايه
سهر بملامح الشر : انا قررت اخد حقى بنفسى ومهاب حقى غصب عن الكل
ليلى: ازاى يعنى هتعملى ايه
سهر : هقولك انا وعاوزه مساعدتك
وحكت سهر ل ليلى ال هتعمله
_________________________________

سهر لاحظت ان مهاب بيجنبها وبيتلكك بموضوع خطتهم علشان رقيه متلحظش حاجه ... فى يوم مهاب جاله اتصال من صاحب ليه عزمه ع حفله توديع علشان مسافر فتره طويله...مهاب معرفش يخلع منه وراح لوحده لانه رفض انها تكون موجوده ف الجو دا لانه عارف ان فيه شرب
نزل مهاب وهو قرر انه مش هيشرب كتير ...
وصل مهاب المكان وكانت سهر وليلى موجودين والكل
سهر: عاش من شافك يا بيبى
مهاب : لا والله مشغول يا سهر انت عارفه المشروع لسه بنجهز فيه
سهر: افتكرتك مشغول مع رقيه والبيبى
مهاب بصلها وضحك ضحكه غريبه: انا ههههههه لالا انسى
سهر بصت لمهاب : هنسى حاضر
الكل رفع الكاسات ومهاب وشربوه نخب صاحبهم ال عزمهم .. غمزت سهر ل ليلى وبعتت لمهاب مجموعه من اصحابه قعدوا يغصبوه ع الشرب .. لغايه ماشرب وسكر وعاوز يروح ومش عارف... سهر سندته هى وليلى وركبته العربيه وسهر اخدته ع شقه ليلى وطلعوه....مشيت ليلى وسهر حست انها استفردت بمهاب .. ومهاب كان سكران جدااا
سهر: ف سرها: مش رقيه حملت غلط انا كمان هحمل بالغلط
فضلت سهر تفوق مهاب شويا وتحرك فيه لاقته راح ف نوم عميق بعد محاولات فاشله منها انه يقربلها ملقتش اى استجابه من مهاب وهو سكران سمعت صوته وبيردد اسم رقيه وياسمين وقال : رقيه محتاج لحضنك انتى فين يارقيه ... وقتها سهر أيقنت ان مهاب مش كان سكران وكان واخد السكر حجهعلشان يقرب من رقيه ... فضلت طول اليل سهر باصه لمهاب وحاسه بكدبه عليها والوقت دا قررت فعلا تاخد حقها وترجع مهاب مهما كلف الامر ...تانى يوم صحى مهاب لاقى نفسه ف شقه ليلى وكانت سهر سابتله ورقه عرفته انه نام قام بسرعه فاق وراح ع البيت دخل براحه الشقه كانت رقيه نايمه دخل كمل نوم ف الاوضه التانيه

تانى يوم رقيه شافت مهاب نايم ف الاوضه التانيه وصحى علشان يفطر
رقيه: هو انت رجعت تنام ف الاوضه التانيه ليه حصل حاجه
مهاب بيجمع: رجعت متاخر ومحبتش اقلقك فنمت هناك ..يلا انا نازل
باس مهاب خد رقيه ونزل وهو مش عارف شرب لدرجه دى ازاى معانه اخد قرار يبطل ركب عربيته وراح الشركه ....!!!!
________________________________________
فى يوم ابو سهر سافر علشان الشغل فسهر قررت تكمل خطتها
كان عيد ميلادها قرب كلمت مهاب ع تليفونه
سهر: بيبى عيد ميلادى قرب
مهاب: كل سنه وانتى طيبه
سهر: ياسلام فين الهديه
مهاب: امم احلى هديه لسهر ال تختاريه
سهر : هديتى عاوزاك تسهر معايا وتطفى الشمع معايا بكره
علشان انا هسافر لبابا فرنسا ومش هفضل قاعده لشهر الجاى
مهاب : هتعمليه ف الكازينو يعنى
سهر: لا ف البيت ..هستناك بكره بقى يلا سلام
قفلت سهر وهى واخده قرار تكمل خطتها ومهاب اخد قرار يتكلم مع سهر وينهى الموضوع اصلا علشان رقيه وبنته

تانى يوم مهاب نزل وقال لرقيه انه رايح يقابل واحد صاحبه
واشترى هديه وراح بيت سهر خبط ودخل واستغرب لما شاف البيت فاضى
مهاب: هو مفيش حد جه ولا ايه
سهر: ف الطريق تشرب ايه
مهاب: عصير
سهر: لا انهارده عيد ميلادى كاس واحد ممكن
مهاب : علشان متزعليش كاس واحد علشان عاوز اتكلم معاكى ف حاجه
خرجت واداته لمهاب وشربه ع بوق واحد : انا كنت عاوز اقولك
سهر : سمعاك
ببطى مهاب حس ان الويسكى دا مركز حس بدماغه تقيله ..!!
تانى يوم الصبح قلق مهاب مد ايده لاقى حد كان فاكريها رقيه راح يفتح عينه باابتسامهلاقى سهر ال نايمه جنبه شبه عريانه قام منتور من ع السرير وبيبص لاقى نفسه ف اوضه سهر ف بيت سهر بص ع نفسه لاقى شبه عريان وع سهر حاول يفتكر ال حصل ومش عارف يفتكر اى حاجه خالص
سهر قلقت من النوم : صباح الخير يا بيبى
مهاب بسرعه قام يلبس هدومه : سهر هو ايه ال حصل
سهر: ايه دا معقوله مش فاكر حاجه
مهاب متوتر: لالالا هو ايه ال حصل اخر حاجه فاكرها كنت قاعد وشربت كاس بعدها مش فاكر اى حاجه
سهر بينت علامات حزن : انت امبارح فضلت تشرب تشرب لغايه ما سكرت
لاقيتك مش قادر تروح طلعتك هنا ترتاح روحت انت ....
مهاب : عملت ايه انا
سهر حطت ايدها ع وشها ودموع نازله من عنيها : مش قادره احيكلك ايه حصل هقول ايه ولا ايه مهاب انا ضيعت خلاص
مهاب اخد الصدمه انه عمل علاقه مع سهر وهو مش واعى اتصلب مكانه ومش بينطق سهر قامت لبست وراحت جنب مهاب وبتعيط: مهاب انا مش هجبرك ع انك تتجوزنى انا هسمع كلامك فى اى قرار هتاخده ..
راح مهاب مكملش يسمع كلام سهر وقام بسرعه ونزل ركب العربيه ومش مستوعب قعدت يخبط ف الدريكسيون بعصبيه ومش فاهم ولا فاكر حاجه اعتمد ع كلام سهر ...رجع البيت دخل كانت رقيه نايمه راح قعد باصصلها بنظرات ندم وباس راسها وحط ايده ع بطنها وفى سره : اسف يارقيه
وراح ع المكتب يفكر هيعمل ايه ... وبص ع ازايز الويسكى ال ف المكتبه اخدها كلها فضاها ف الحمام ورماها ف الزباله غير هدومه مهاب وكتب ورقه لرقيه انه ف الشغل ونزل مش عارف هيروح فين بس نزل علشان رقيه متلاحطش حاجه وراح قعد فى مكان بيفكر يستوعب ال حصل ..!!!
__________________________________
مر اسبوع ومهاب بيحاول يتجنب سهر وسهر لاحظت كده راحت بعتتله رساله وقالتله ***انا هسافر فرنسا لبابا واليله ال قضتها معاك كانت اسعد ليله ف عمرى ..انا مش هطلب منك حاجه انا هسافر وهسيبك تخلص الموضوع وخطتنا تخلص لان احنا هنتجوز ودا اكيد ..اشوفك ع خير يا بيبى اموووواه **
قرا مهاب الرساله وحس براحه ان سهر بعدت وسافرت وقرر انه يفاتح رقيه ف الموضوع الاصلى ولما رقيه هتعرف هيتصرف هو مع سهر ف الموضوع التانى ...!!!
فى يوم كان قاعد هو ورقيه بيتفرجوا ع فيلم ورقيه كانت مبسوطه اوى فيلم رومانسى مهاب قعد معاها وشايف علامات السعاده ع وش رقيه شافوا مشهد عرض جواز ...!!!
رقيه بسعاده: الله .. جميل اووى
مهاب بص لشاشه : انتى عاجبك كده
رقيه: اى بنت بتحب المفاجاءات والحاجات دى
مهاب ضحك: دا البنات دماغها فاضيه فعلا
اخرت الفرجه ع الافلام ..انا داخل المكتب
قام مهاب ودخل المكتب بص ع نتيجه ال ع المكتب بالصدفه لاقى ان عيد ميلاد رقيه قرب كمان اسبوعين فافتكر ال عملته ليه فقرر يعملها مفاجاءه !!!
___________________
 يتبع