فاطيما ردت وهى نايمه خالص وبتحلم: الو
معتز: وحشتينى
فاطيما وهى نايمه :ها
معتز بصوت حنين : وحشتييييييييينى
فاطيما بتضحك وهى مغمضه عنيها ونايمه فاكره نفسها بتحلم : الله الحلم حلو اووووى زى الحقيقه انا حاسه انى سمعاك بجد يامعتز
معتز بيضحك: ماهو حقيقى وانا بكلمك
فاطيما فتحت عينها متفاجئه وبصت لاقت الموبيل ف ايديها واسم معتز ظاهر راحت اتنترت من ع السرير وقعت ووقعت الموبيل : دا بجد .. دا بجد اتصل معتز تانى بيها ..فاطيما متوتره : اعمل ايه اعمل ايه
اهدى يا طيما اهدى 1..2..3 ..وردت عليه
فاطيما بتتمالك نفسها: الو
معتز: فى ايه انا سمعت همده انتى وقعتى ولا الموبيل الل وقع
فاطيما بتلجلج: ها.. اصل ..اصل اتكعبللت ... صباح الخير
معتز بيضحك: صباح كل حاجه حلوه
فاطيما مكسوفه جداا : ها
معتز بيضحك: وحشتيييينى جدااا اليومين الل فاتوا كنت بحاول انفذ وعدى واديكى وقتك تردى ومش قادر اوصفلك سعادتى برسالتك ..
فاطيما مكسوفه ومحروجه ومش عارفه تقول ايه : احم احم ...صاحى بدرى ليه كده
معتز بيضحك وفهم انها مكسوفه : رايح انترفيو وقلت اسمع صوتك علشان اليوم يبتدى باحلى صوت ف حياتى سمعته
فاطيما من الكسوف معرفتش ترد قلبتها هزار : هبقى اسجلهولك حاضر وتخليه معاك
معتز: تسجلى والطبيعى موجود ومعايا مينفعش
فاطيما مكسوفه وبتغير ف الكلام : احم احم .. انت قولت شغل ايه
معتز حس بكسوفها وهاودها : شركه واحد صاحبى شغال هناك قالى طالبين مؤهلات هروح اقدم ويا مسهل مالواحد لازم يخطط لبكره ولا ايه
فاطيما باابتسامه : ربنا يوفقك ... لما ترجع ابقى طمنى
معتز: اكيييد ... هتنامى تانى ؟
فاطيما: دا معقول انام تانى انا خلاص صحيت
معتز: طيب اسيبك انا ولما اخلص وهعمل مشوار كده ولما ارجع البيت هكلمك اوك
فاطيما: تمام .. فى امان الله
معتز: اصحى وفوقى كده وافطرى .. لااله الا الله
فاطيما مبتسمه : حاضر .. سيدنا محمد رسول الله
معتز: هتوحشينى
فاطيما بضحكه : ايوووه يا ماما جايه اهو
معتز بيضحك: مااشى .سلام
قفلت فاطيما هى ومعتز وع وشهم ابتسامه كبيره وبهجه زى اى اتنين فى اول ارتباط السعاده المسيطره عليهم لانهم مع بعض ..او معنى اصح لقوا بعض ... قفلت فاطيما وبصت ع الموبيل ورمت نفسها تانى ع المخده وحضنت الموبيل وع وشها ابتسامه وكملت نوم او معنى اصح تكمل الحلم ..!!
ابتدئ الترم التانى وكان مختلف عند فاطيما عن الاولاانى لان المرادى مكنش تمثيل مكالماتها مع معتز لكن حقيقى واستمرت مكالمات معتز مع فاطيما وعاشت فاطيما الحاله اللى مش فاهمها لكن مبسوطه بااحساسها وفرحانه ...فى يوم كانت نايمه ف اوضتها دخل محمد اخوها يصحيها عاوز اللاب وصحيت فاطيما من ازعاج اخوها محمد وهو بيصحيها
فاطيما بعصبيه: ايه ..ايه .. ايييييييييييه
محمد: بتزعقى ليه ..
انا بقولك عاوز الللاب بتاعك علشان الللاب بتاعى بيتصلح
فاطيما بنص عين: مش احنا اتفقنا ممنوع الاقتراب
محمد: متقلقيش مش هدعبس فيه بس فعلا محتاجه عاوز النت ضرورى
مش عيب لما يكون عند اختى الكبيره الللاب مبتعملش بيه حاجه غير شات وبليل كمان واخوها يحتاجه وتقوله لا وكده
فاطيما : اضحك عليا اضحك ... هتدفع كام
محمد: هدفع كام .. انتى هتمصلحى من اخوكى
فاطيما: وهو فى غيرك امصلح عليه .. انجز هتدفع كام يااما انزل عند صحابك او السيبر ع اول الشارع ....
محمد: الل انتى عاوزاه يا ستى ..تحبى بيتزا ولا حواوشى ولا شاورما
فاطيما ريقها جرى وفتحت عينها الاتنين : اشطه اممممم اتنين شاورما جامبو واتنين كانز بيبسى وشيكولاتتين جلاكسى .. اشطه
محمد: اتنين انا مش عاوز ع فكره ايه الغرامه دى
فاطيما: وحد جاب سيرتك ... دا ليا ولنفسى ..انا بحب اظبط نفسى معايا مينفعش اكل ونفسى لا ... حب نفسك يااخى
محمد : ماهو فاطيما لو مقالتش كده مين هيقول ...امرى لله لولا الحوجه وانى محتاجه ضرورى
فاطيما بتزقه ناحيه الباب: مفيش للاب اخرج
محمد: خلاص اسف ياستى اللى انتى عاوزه ..هو احنا عندنا كام فاطيما وكام نفسها
فاطيما باانشكاح :ايوه كده خده ومش عاوزاه بطاريه فاضيه
انت عارف انا بسهر طول الليل وبحتاجه ومدعبسش ف حاجه متخصكش هرفع البصمات وهعرف ها ..
محمد: حاضر ياسياده اللوز
مشى خطوتين ماسك اللاب رجع خطوتين : طيما
فاطيما: ها
محمد: ماانتى معاكى موبيل بتحتاجى الللاب فى ايه ها ..ها
فاطيما بتمسك الللاب: اخرج بره مفيش لللاب
محمد بسرعه: خلاص خلاص ..
خرج محمد بالللاب وقرب من الباب بص لفاطيما: ع فكره الساعه 2 هتفضلى نايمه فاطيما سمعت 2 اتفزت من ع السرير ومسكت موابيلها تبص عليه ليكون معتز اتصل عليها وهى مسمعتش ولكن ملقتش اتصال منه لكن لاقت رساله " وحشتينى "
محمد لقاها ابتسمت : مالك فى ايه
فاطيما : لا مفيش .. مفيش انا قايمه اهو
قامت فاطيما حطت موابيلها ع الشاحن وخرجت دخلت الحمام واتوضت ورجعت تصلى ولما خلصت صلى لاقت رساله من معتز
" طيما انا لسه بره وهتاخر بليل نتكلم .. طمنينى عليكى بتعملى ايه "
ردت فاطيما
" ترجع بالسلامه خلى بالك ع نفسك .. انا صاحيه وكنت بصلى وهجهز مع ماما الغدا ونتقابل بليل "
رد عليها معتز
" اوك ومتتاخريش ف الرد عليا كده عاوز اطمن عليكى .. هتوحشينى لغايه ما اكلمك "
فاطيما ابتسمت " وانت كمان "
معتز " لااله الا الله
"فاطيما : " سيدنا محمد رسول الله
"بعد اخر رساله فاطيما حضنت الموبيل حست ان الدنيا بتضحكلها والاحساس اللى حساه مش قادره توصفه ودقات قلبها الل بتزيد كل ما بتسمع او تقرا رسايل معتز ...خلصت صلى وخرجت قعدت مع جددتها وكانوا بيعملوا محشى وراحت فاطيما شمرت وقعدت معاهم
فاطيما : الله ..الله
جددتها: قولى ماشاء الله
مامتها: اخيرا اتشمللتى وجيتى
فاطيما قعدت جنبهم وبتقور بتنجان : ايه يا جيجى انتى عارفه ان المحشى اختصاصى تسويه واكل وانتم الحشو
مامتها: دا زمان دلواقتى انتى كبرت اقعدى اتعلمى علشان لما تكونى ف بيتك وجوزك قالك عاوز محشى هتعملى ايه ..
فاطيما: بسيطه .. هنعزم نفسنا يا عندكم يا عند مامته
واهو يعتبر زياره وغدوه
جددتها بتضحك: يعنى اى اكله مبتعرفيش تعمليها هتاكلوا بره
فاطيما: يعنى
مامتها: سامعه يا توحا
جددتها: لا يا حبيببتى مينفعش كده .. لازم تتعملى الاساسيات علشان تبقى ست بيت شاطره .. مهما البنت كبرت والزمن اختلف البنت معروف مكانها فين الل مينفعش حد يعوضه هو بيتها وجوزها واولادها دا اساس حياتها والاكل شئ اساسى تتعلمه البنت علشان لما تكون ف بيتها متحتاجش لاى حد مهما كان حتى مامتها وجوزها يتعود ع نفسها واكلها الل هيميزها عن اكل اى واحده
فاطيما: لا والله ..وبعدين انتم نفسكم اعلى منى وبصراحه انا اخاف ع بطون العيله
جددتها: ماهو انتى لو مجربتيش ف بيت اهلك هتجربى ف بيت جوزك
فاطيما بتضحك: اه اجرب فيه ..مش هو اللى عاوز ياكل الله
مامتها: علشان متكمليش اسبوع وترجعى تنورينا
فاطيما بتضحك: لدرجه دى هوحشكم
جددتها: يا لمضه .. لا اتعلمى علشان تبقى شاطره انتى نفسك .. والاكل من ايدك شهد .. كملى علامك لان الاكل دا فن والتكرار فيه بيميز البنات عن بعض والراجل مهما اختلف مكانته لما بيلاقى مراته بتعمله الاكل الل بيحبه وبتحطله الاكل بنفسها بيسعده جداااا ويفرحه لان دا تعبير عن الحب
فاطيما: بجد حاجه محيرانى ...هو اللى هيتجوزنى هيتجوزنى علشان اطبخله واغسله هدومه واكويها هو هيتجوز بنادمه ولا هيتجوز فلبينيه بورقه متشغبط عليها
مامتها بتضحك: متشغبط عليها
فاطيما: ايوه ورقه متشغبط عليها انى مراته هتسلمونى لراجل بورقه متشغبطه.. هتسلمونى تسليم اهالى
جددتها بتضحك: دمك شربات يا طيما ..بجد يابخت اللى هيتجوزك
فاطيما بتغمز لجددتها: بذمتك يا توحا واحد هياخد واحده زى كده بخفه الدم والطعامه دى هيركز ع اكل ومحشى دى جملتين منى هتشبعه اسبوع ولا ايه
جددتها بتضحك : ايوه ايوه ...
مامتها: انتى بتهاوديها يا توحا ..عرفيها ان الجواز حاجه تانيه الراجل لو مرجعش ولاقى اكلته جاهزه وهدمته مغسوله ومكويه والبيت نظيف بيعمل حرب .. الجواز يعنى حياه واسره مش رومانسيات وكلام حب ... فتره اللى قبل الجواز حاجه وبعدها حاجه تانيه .... لما يتقفل عليكى باب انتى وجوزك هتبقى ملزومه منه ماديا ومعناويا وهو كمان ملزوم منك تجهزيله اكله كويسه توضبيله هدومه ميرجعش يلاقى الشقه مكركبه ومش نضيفه ..بيت الزوجيه امان وراحه لراجل ولست ولو الاساسيات مش موجوده فيه هيبقى بيت مهجوز ملوش روح ... تعمير البيوت مش سهل دا بالافعال علشان يعمر البيت ويدوم يبقى بايد الراجل والست
فاطيما ماسكه المقوار ورافعته: اذن فهى الحرب ..هيعمل حرب هيلاقى حرب مضاده ..انا عارفه يا جيجى كل دا بس ماهو انا بنادمه يعنى والمفروض يعرف كده .. مش هياخدنى كامله متكامله اكيد هيكون فى نواقص فيا مهما اتعلمت من بيت اهلى زى ماهو هيكون مش كامل ..لان القاعده بتقول احنا نكمل بعض يعنى هنستحمل بعض ..لكن هيلاقينى مبعرفش اعمل محشى يبقى خلاص خربت دا ظلم لا اسمح بيه اطلاقا
مامتها: بنات اليومين دول مدلعين اوى يا توحا
فاطيما: السبب اهلهم يا بنت توحا ... يعنى الل تمنع بنتها تقف ف المطبخ وتقولك مذاكرتها اهم ولما تخلص الجامعه تبقى تمسكه وملزوم منها ومتعرفهاش الاساسيات من طبيخ وتنضيف وكله وتيجى وقت ما تتخطب مطلوب من البنت تتعلم كل دا ف شهرين تلاته او سنه او سنتين الخطوبه وامها تزعل لما تلاقى حماتها بتتريق على اكلها ولا جوزها كمان ... انتم الل بتعملوا ف بناتكم كده .. التعليم من الصغر واحده واحده ومع الوقت هيبقى عاده دا اعرفه انما كبس كبس ..غلبتى مذاكره قرب الامتحان العيال ينفضوا لسنه كلها ويجوا قبل الامتحان يدبسوا ف كميه ورق ومطلوب منهم يذاكروه وينجحوا واهلهم عاوزينهم ينجحوا مش يفهموهم ذاكروا واحده واحده ..دا لولا توحا وتشجيعها ليا كنت مش هعرف احمر بطاطس بسببك يا جيجى
مامتها: يعنى غلط علينا احنا اننا مش عاوزين نشتت بناتنا ويركزوا ف مذاكرتهم ..
فاطيما بتضحك: ع اساس ان البنات دى ماشاء الله من المتفوقين والاوائل .. دا اغلبهم مقضينها سقوط ف الجامعه ومجاميع زباله ف المدارس ياشيخه خلينى ساكته .. دا لولا دعاكم كنت مريحه جنبكم ... ماهو ياامهات الايام دى يا تحولوا البنت لفلبينيه يا تخلوها هانم وتبقى فلبينيه فى بيت جوزها ... وفى الحالتين البنت بنتصدم صدمه عمرها
جددتها: يعنى انتى شايفه ايه
فاطيما بتضحك : اممم ياخدنى يجربنى شهرين تلاته نفعت نكمل منفعتش يرجع فلوسه والورقه ..اشطه
جددتها: تجربه ...
فاطيما: مش هو اللى عاوز محشى
مامتها: كل دا علشان بنقول اتعلمى وبطلى دلع
فاطيما باصت مامتها: هو بعد جيجى
وراحت باست جددتها: وبعد توحا ..هينفع اعمل اكل هنا ف البيت ... لا يجوز قانونا دا انتم سمعه البيت ..اصبروا عليا اتجوز وهبهركم والله هبهركم
وهما قاعدين سمعت فاطيما موابيلها بيرن : ثوانى وراجعه
قامت فاطيما بسرعه : حاضر
مامتها: ربنا يهديكى يا بنتى ويرزقك باابن الحلال
جددتها: ربنا يروقها بالل يستاهلها ويحافظ عليها ..ابن الاصول المتربى
مامت فاطيما: وايه الفرق يا توحا
جددتها: ولاد الحلال كتير كلنا ولاد حلال .. انما الاصل والتربيه قليل اوى اللى تلاقيه فيه ابن اصول ومتربى بيخاف ربنا قبل اى حد.. بيحافظ ع شرف وعرض بنات الناس ومن غير اى غرض خالوق وفاهم يعنى ايه علاقه مش متهور ومتسرع .. راجل قد كلمته .. ودا من الاصل والتربيه
مامت فاطيما: الله عليكى يا توحا يا بركتنا
توحا : ادعى لفاطيما باابن الاصول المتربى المتقى وانا حاسه ان شاء الله هيرزقها بالاحسن
مامت فاطيما باابتسامه: ان شاء الله وتفرحى بيها
توحا: ان شاء الله
الوقت دا كانت فاطيما راحت تبص ع موابيلها اللى ع الشاحن وكان معتز فرحت اوى وردت
فاطيما: الو
معتز: الله .. احلى الو بسمعها وسمعتها
فاطيما: معتز .. انا بتكسف ها
معتز: نفسى اشوفك قدامى وانتى مكسوفه كده
فاطيما بتضحك: تكلمنى الصبح تقولى صوتك ودلواقتى عاوز تشوفنى .. ع بليل هتعوز ايه
معتز بيضحك: ارجوكى افهمينى صح
فاطيما ضحكت : ايوه ايوه
معتز: كنت بتعملى ايه
فاطيما: محشى
معتز بيضحك: لا بجد
فاطيما: اه والله .. كنت قاعده مع جيجى وتوحا وعاملين حفله محشى انهارده فكنت بساعدهم
معتز: مامتك وجددتك
فاطيما: ايوه
معتز: الله ..الله انتى ليكى ف عمايل الاكل التقيل دا
فاطيما : انت فهمتنى غلط.. بقولك بساعدهم يعنى اقطع ورق كرنب .. ااقور بتنجان .. اسويلهم المحشى واكله .. هذا اقصى مساعداتى لكن دا ميمنعش انهم ساعات بيدونى فرصتى فى الابداعات
معتز: ايه دا .. هو انتى من البنات المدلعه اللى مبتدخلش المطبخ وكده
فاطيما بتضحك: لو كده عندك اعتراض ولا ايه
معتز: لا خالص .. جريتى ريقى ليه كده وانا لسه مفطرتش
فاطيما : ايه ..
بصت ع الساعه لاقتها 4
فاطيما: كل دا ومفطرتش ليه كده
معتز: بفكر فيكى
فاطيما: لا انا بتكلم جد : ليه كده
معتز: انشغلت ف كام مشوار وشربت قهوتى وشاى وباكو بسكوت..قلت هرجع البيت اتغدى
فاطيما: وانت لسه بدرى ع ما ترجع البيت
معتز: لا انا ف الطريق وقربت ..انا قولت اكلمك اسمع صوتك يصبرنى ع صوصوه بطنى
فاطيما بلهجه جامده: بطل استهبال يا معتز ومتعملش كده تانى ... انت بره اشترى سندوتشات فرضا تعبت ولا حاجه ... بطل اهمال
معتز: ايه خايفه عليا
فاطيما سكت لحظات: ها
معتز بصوت حنين: خايفه عليا
فاطيما اتكسفت: لا خايفه ع المحشى يتحرق .. يلا سلام دلواقتى علشان بينادوا عليا
معتز ضحك: اوك.. روحى كملى وانا هكلمك تانى
فاطيما : اوك
قفلت فاطيما وع وشها ابتسامه وسرحانه سمعت صوت عالى : طيماااااااااااا
رجعت بسرعه ل ارض الوقع وانتبهت: ايوووووه جايه حاضر
فى الوقت دا كانت سلمى فى بيتها فى الامارات وقاعده ف اوضتها وبتتصل ب خالد
سلمى: ازيك ياخالد
خالد: الحمد الله .. انتى عامله ايه
سلمى: الحمد الله برغم انى حاسه بملل اوى
خالد بيضحك: ليه كده مش بتروحى جامعتك
سلمى : بروح جدولى يومين بس والباقى بنفضله مش مهم
و بابا قالى لو عاوزه انزل معاه ف الشركه هيوفرلى مكان
خالد: وانتى مستعجله كده ليه استنى لما تخلصى انتى قدامك كام شهر وخلاص ..
سلمى: مش استعجال ..يمكن علشان متعودش ع قاعده البيت
خالد : لا اتعودى بقى ... انتى عاوزانى ارجع من الشغل ومش الاقيكى
سلمى: ودا ينفع داانا هكون مستنياك ..
خالد: انا بدعى ربنا يقرب اليوم دا
سلمى: وانا كمان
خالد: اوعدك انى هعمل كل اللى هقدر عليه علشان اثبت لاهلك انى جدير بيكى
سلمى: حبيبى انا عارفه انك هتعمل كده وهما عارفين
خالد: عارفين حاجه.. وشايفين حاجه تانيه ..الاثبات اكبر دليل ع انى بحبك وعاوزك ومش هتسلى بيكى .. وان شاء الله هثبتلهم كده
سلمى مبسوطه بكلام خالد اللى حسسها بالامان : ربنا يخليك ليا
خالد: ويخليكى ليا يااحلى ما شاف قلبى قبل عنيا
سلمى: بحبك
خالد: بعشقك
وفى نفس الوقت فى القاهره فى السنطه عماد وماريا قاعدين ف حديقه الجمعيه لكن ملامحهم متغيره ...:
عماد ماسك ايد ماريا : ميمى انتى عارفه ان دا علشاننا
ماريا: عارفه صدقنى .. بس هتغيب سنتين كتير
عماد: انتى عارفه الفرصه بتاعه الشغل دى جتلى وهما بس سنتين هسافرهم ف فرع الشركه ف الكويت وهرجع اتثبت ف فرع القاهره ..ووقتها هنقدر نتجوز ع طول ومش هتاخر
ماريا بدمعه نازله من عنيها: انتى لما قولتلى ان فى شغل اتقدمت ليه واتقبلت فرحت وقلت ربنا مسهل الامور .. انما سفر ومش اشوفك سنتين كتير يا عماد
عماد بيمسح دمعه ع خد ماريا : انا ليا ف السنتين 3 شهور اجازه واى فرصه هنزل علشان اشوفك وصدقينى مش سهل عليا انى ابعد عنك كتير كده بس دا علشان حياتنا .. وبعدين انتى وافقتى ع شغل القاهره
مفرقتش القاهره من الكويت
ماريا خبطته: لا ياخويا تفرق .. القاهره انا كنت هنطلك وهشوفك سهله انما الكويت لما توحشنى اعمل ايه
عماد : رنيلى بس وانا ف اى وقت هكلمك انا اساسا مش هقدر ابعد عنك
وكل يوم هكلمك ومش هنام غير ما اسمع صوتك ..
ماريا: بجد هوحشك يا عماد
عماد مسك ايد ماريا وباسها: انتى معايا ووحشانى
ماريا ابتسمت ..
عماد: ايوه هى دى الابتسامه اللى انا عاوزها
ماريا: هتوحشنى اوووى
عماد: وانا بحبك اووى
وصل عماد ماريا لغايه باب العماره وحست بخنقه من حوار سفر عماد
فراحت ع فاطيما وطلعت ورنت الجرس ..
فاطيما: ايوه جاييه ..مين دا اللى حماته بتحبه كده
فتحت الباب لاقتها ماريا.. باابتسامه: اكيد طبعا انتى شميتى محشى جيجى وتوحا وجيتى تطفسى معانا
ماريا باابتسامه: انا حماتى بتحبنى
فاطيما بتغمز ل ماريا: وانتى بتموتى ف ابنها ..
ماريا شافت جده فاطيما: السلام عليكم .. ازيك يا توحا
توحا: بخير يا ميمى انتى عامله ايه
فاطيما: اكيد مجوعه نفسها علشان المحشى انا عارفاها
توحا: الاكل كتير ويكفى الحبايب وحبايب الحبايب
فاطيما بسرعه: هى اه تاكل .. هناكل حبايبها كمان ليه فتحينها سبيل محشى
ماريا ابتسمت نص ابتسامه ولاحظت فاطيما كده : مالك يا ميمى
بصت ماريا ل فاطيما وعنيها فيها دموع : عاوزاكى يا طيما
فاطيما اتخضت وقلقت : تعالى اوضتى تعالى
بصت فاطيما لجددتها: توحا ..احنا ف الاوضه الاكل يجهز صفرى بس
جددتها ضحكت: اصفر ..ماشى
دخلت فاطيما وماريا الاوضه وملامح ماريا كئيبه ودموع نازله من عنيها
فاطيما اتخضت : فى ايه يا ميمى ..حصل ايه قلقتينى
ماريا بشحتفه: عماد
فاطيما : يالهوووى .. سابك
ماريا اتخضت: بعد الشر .. لا
فاطيما : ايه عمل حادثه
ماريا خبطت فاطيما: تفى من بقوك لا بعد الشر عليه ان شاء الله اللى يكرهوه
فاطيما: ياادى النيله ..زعلك طيب
ماريا بتشحتفه: هيسافر
فاطيما: اتقبل خلاص ف شغل القاهره ..طيب دا خبر كويس والقاهره مش بعيده يعنى داانتى ممكن تعسكرى عندى ماريان علشانه ..
ماريا: هيسافر الكويت .. الشغل الجديد هيسافر سنتين ويرجع ع فرع القاهره
فاطيما اخدت نفسها: يهددك يا شيخه خضيتينى طيب فيها ايه ربنا يكرمه
ماريا: هيسافر سنتين ومش هشوفه غير 3 شهور بس فيهم
فاطيما بتضحك: انتى مزهقتيش منه طول الوقت ف وشك كده .. دى سلمى بطل بقى
ماريا: ظروفى غير ظروف سلمى ... وبعدين هيوحشنى اوى
فاطيما مسكت ايد ماريا : طيب اهدى كده .. دا مسافر شغل مش هيلعب
ربنا كرمه بشغل ثابت وهيتحسن وضعه علشانك ان شاء الله
ودول سنتين هيطيروا هوا صدقينى ... وغير كده النت مخلااش حد بعيد .. فى برامج كتير تتكلمى فيها وتشوفيه الموضوع بقى اسهل من زمان ... انتى مرتبطه ف زمن التكنولوجيا يا بت
ماريا: يعنى انتى لو ارتبطتى بحد بعيد هتكتفى بالنت بس
فاطيما سكتت لحظه: هو بصى مش هكتفى بس لو الظروف حكمت زى سلمى وخالد هكيف نفسى ع الوضع هعمل ايه يعنى ...
وبعدين صدقينى السنتين هيخلصوا بسرعه ..فكى بقى وبلاش نكد
ماريا : ربنا يصبرنى
ف الوقت دا معتز بعت رساله ل فاطيما فتحت فاطيما الموبيل والرسايل
وشافت رساله معتز " وحشتينى " لاحظت ماريا ابتسامه فاطيما ولمعه ف عنيها اول مره تلاحظها جالها فضول بصت ع الرساله وشافت الكلمه
والمرسل معتز ... بصوت عالى متفاجئه: معتز
فاطيما انتبهت بعد ما سرحت من وجود ماريا : يخربيت هتقطعى خلفى
ماريا شدت الموبيل ومش مصدقه : معتز .. وانتى يا طيما
فاطيما اتوترت.. ماريا: من امتى وايه وازاى احكى
راحت فاطيما مسكت ايد ماريا: اهدى كده وبلاش جنان
ماريا: يا واطيه مخبيه علينا واحنا الكحه مش بنخبيها عليكى
فاطيما: والله ابدا مش مخبيه كنت هقولكم .. بس ملقتش وقت مناسب
انتى كنتى مشغوله مع ماريان وولادها وسلمى مع موضوع خالد ومحصلش اننا اتجمعنا علشان نتكلم
ماريا قعدت وبسرعه نسيت مود الكئابه اللى فيها واترسمت ع وشها ابتسامه وفضول تعرف التفاصيل
ماريا: احكيلى بقا
فاطيما باابتسامه : الحكايه بقى ...
حكت فاطيما ل ماريا الموضوع لغايه اخر رساله جاتلها
ماريا لاحظت لمعان عين فاطيما والابتسامه اللى مبتغبش وهى بتحكى : الله يا طيما
فاطيما: فى ايه
ماريا: انتى بتحبيه بجد
فاطيما باابتسامه: انا مش عارفه ايه هو الحب زى ما انتى عارفه انا بالنسبالى الحب شيكولاته .. اكله حلوه ... طبق حلويات وصايه ... فيلم رومانسى اعيش فيه غير كده معرفش .. لكن الاحساس اللى حسيته اتجاه معتز ومعاه واحساسى لما بسمع صوته ونتكلم .. حاجه كده تخلينى انعزل عن الدنيا واتمنى مرجعش لدنيتى وافضل معاه .. ببقى مبسوطه معاه جداااا ..ومرتاحه اووى لما اعترفلى بحبه مخوفتش بالعكس ارتحت ولاقيت نفسى من غير ما افكر برد عليه لو دا معناه حب وانى بحبه .. يبقى بحبه
ماريا بسعاده وبصوت عالى : يبقى دا الحب يا طيما .. اخيرا وقعتى يا طيما .. وقعتى وحبيتى يا طيما
فاطيما: يهدك ..هتفضحينى
ماريا حضنت فاطيما: انا مبسوطه اوووى علشان انتى بتحبى انتى تستاهلى يا طيما احسن واحد ومعتز من زمان انا حاسه انه هيكون بينكم حاجه ... بجد مبسوطه مبسوطه
فاطيما : سبحان مغير الاحوال .. بسرعه كده نسيتى سفر عماد
انتبهت ماريا : اه صح.. خلينى ف موضوعك ...انتى المفاجئه
فاطيما باابتسامه: ياسلام
ماريا : انتى مبسوطه يا طيما ها قلبك بيدق اوى اوى
حسيتى بيا انا وسلمى وتريقتك علينا
فاطيما بتضحك: هو انا انا ف البدايه موصلتش زيكم لسنين .. بس فعلا عزرتكم هو فعلا احساس ملوش وصف بالكلام احساس حلو كده
ماريا: وجه الوقت اللى هنتريق عليكى فيه وهنشوفك متبهدله
فاطيما : والله هفضحكم باسراركم اللى معايا انا مجنونه واعملها
ماريا بتضحك: واطيه وتعمليها ...
مامت فاطيما ندت عليها: طيمااااااا هاتى ميمى ويلا علشان الاكل جاهز
ماريا: هو دا وقت اكل ..تلاقيكى شبعانه
فاطيما بتضحك: وايه دخل الاكل ف النفسيه بالعكس انا نفسى فتحت اكتر
ماريا: طفسه طول عمرك
فاطيما : يلا ننقض ع محشى الوصايه دا وبعدين نرجع نكمل رغى
ماريا: انا مش هسيبك انهارده وهكلم ماما هعرفها انى هنا
فاطيما: اشطه ..كلميها وحصلينى وغيرى هدومك بالمره
بجامتك ف الدولاب مغسوله ومطبقه
ماريا : اوك
خرجت فاطيما كملت تجهيز السفره وبصوت عالى : الله الله ياجمالو ياجمالو يامحشاتو يا فرخاتو
مامتها بتضحك: داانتى ناقص تصوريه
مسكت فاطيما موابيلها: والله ما اكسرلك كلمه صوره فوتشنيك كده لفيس والانستغرام وابداع جيجى وتوحا
ابتدت فاطيما تصور اطباق المحشى وكان بكل انواعه كرنب وورق عنب وبتنجان وفلفل بالالوانه وكوسه غير المخللات والفراخ المشويه والرقاق بالحمه ...(انا جوعت والله
)ماريا كانت بتكلم مامتها وعماد وغابت .. فاطيما بصوت عالى: ميميييييييييييييييي والله هاكل ومش هستناكى
خرجت ماريا بسرعه من الاوضه : ع الله .. الله الله الريحه مغرقه البيت
يسلم ايديكم ..طبعا توحا وجيجى اقصدهم
فاطيما: كده يا واطيه .. الحواوشى اللى عملته الاسبوع اللى فات ايه اتنسى
ماريا بتضحك : انتى قولتى اهو الاسبوع اللى فات وشكرتك ونفختك عليه
انما ف اكلات عملاقه بتحتاج مدح اسابيع لان تاثيرها بيقعد شهور
جده فاطيما بتضحك: يخرب عقلكم يابنات .. الف هنا يا حبايبى
مامت فاطيما: لا والحلو ايه رز بلبن وبسبوسه بالقشطه
فاطيما : اى اى .. قلبى .. بطنى .. امعائى
ميمى : الليله ليله انتحار
فاطيما: انتوا ورثتوا ولا ايه ...
مامتها: لا وانتى الصادقه قبضنا وبعدين اللى يسمعك يقول مبتاكليش
ماريا: وهفتانه
فاطيما: محدش يكلمنى انى سأغرق ف المحشى
ماريا: وحماده وعمو فين مش هيتغدوا معانا
مامت فاطيما :هو هيتاخر انهارده واكله موجود واهو الاكل يكفى 100
فاطيما : هو بصراحه يكفى اكتر من 100 .. الشعب المصرى بيحب الكتره فى الاكل ..ليه منعملش زى الدول المتقدمه ناكل علشان نعيش مش نعيش علشان ناكل عجبا لكم ايها المصريين
ماريا: ايه دا ياجماعه ..مين اللى بتتكلم فاطيما .. عاشقه الاكل
اللى دايما فى ايديها اكل وبوقها مش فاضى طول ماهى فاضيه
فاطيما بتضحك: يعنى يرضيكى نرمى الاكل دا المثل بيقولك خسر بطنك ولا تخسر حاجتك ولا ايه يا توحا
جده فاطيما: دا يا حبيببتى اسمه كرم ورزق .. يعنى مثلا ميمى مكنتش عامله حسابها انها هتتغدى معانا نصيبها اتعمل لانه رزقها وجت .. وفى اطباق رايحه لجيران لانهم عرفوا ان فى عندنا محشى وقلنا هنبعتلهم
دا رزقهم... مفيش اكل بيترمى ..اللقمه رايحه لصاحبها
ماريا: صحيح ماما بتقولكم عاوزه طبق ورق عنب واتوصوا
ضحكوا كلهم : .. فاطيما: بس بجد حاجه غريبه احنا اغلب زبالتنا عباره عن بواقى اكل ليه منعملش ع قدنا ..فى بيوت بتعمل الاكل يكفى اسبوع واستحاله العيال وابوهم لمده اسبوع ياكلوا من نفس النوع.. مانعمل ع قدنا او اكل يومين ع اساس لو حد جه يبقى رزقه عادى يعنى ..انما الزباله بتكون عباره عن بواقى اكل بالهبل ..دا اسمه تبذير واستهبال مش كرم
..ماريا: اه فعلا يا طيما .. ماما كانت بتعمل الاكل بيقعد كتير ب التلات وبالاربع ايام نعدى اول يوم وتانى يوم .. نيجى ع تالت يوم نشترى اكل من بره وهى لما بتلاقيه مركون بترميه ..اوقات بقولها حرام وانها توزع الاكل ع اللى محتاجه
فاطيما: والله ف ناس بتفرح باى حاجه وبااقل حاجه كمان لو نتعلم نقتصد فى الاكل ..اولا زبالتنا هتقل .. الحشرات والكائنات الغريبه اللى بتنتشر دى هتقل ..الروايح .. الاكسجين هيتعدل حاله وهيبقى احسن ..لحسن الزباله بقت ماركه مسجله لروائح غير كده هنلاقى نفسنا احتاجنا حاجات تانيه وبالعكس اكلنا اكل كتير وانواع كتيره بنفس التكاليف الاكله ولا الاكلتين
ماريا: ورمضان اكتر شهر بيعانى كده والاعياد عندنا
فاطيما: يا لهوى ع عربيه الزباله لما بتيجى تشيل الزباله معاناه .. بحس ان القطط والكلاب هتبعت لاصحاب الزباله رساله شكر مع الزبالين من كترت الاكل المرمى
ميمى: احنا هنا فاهمين الكرم غلط
فاطيما: الله يرحمه كرم ..
احنا فاهمين حاجات كتير غلط ... كلى كلى
مامت فاطيما: لما تخلصى اكل يا طيما تودى الاطباق دى
فاطيما: هتخلونى اهضم قبل ما اكل اشطه هبقى ارجع اكل تانى
ميمى : واقتصاد الاكل
فاطيما: يعنى اقعد جعانه
ضحكوا كلهم وهما قاعدين وهما بياكلوا
ميمى: يسلم ايديكم المحشى تحفه
مامت فاطيما: اتعلمى يا ميمى انتى ع وش جواز ومسئوليه متبقيش خايبه زى اختك معتمده علينا
ميمى ملامح وشها اتغير .. فاطيما: ليه يا جيجى فكرتيها ليه
انا مصدقت الهيها بصوباعين محشى
مامت فاطيما: ليه فى ايه
فاطيما بسرعه: لالالا مش اللى جه ف بالك ..معان اللى يشوفها كده يتوقع ان عماد قلبها ولف ع مزه من القاهره تانيه
راحت ميمى خبطتها ف رجلها: رخمه .. عماد هيسافر يا طنط سنتين فبالتالى مفيش جواز ولا اى حاجه غير لما يرجع اصلها ناقصه تأخير
جده فاطيما: متستعجليش يا ميمى كل حاجه وليها وقتها .. ربنا اللى بيرتبلها حياتنا وبيعمل الاحسن لينا ... سفره دا خير ليكم ان شاء الله ..مش حاجه وحشه اطمنى دا رزق جايلكم ان شاء الله
ماريا: هيوحشنى يا توحا هقعد سنتين مش هشوفه غير 6 شهور
يعنى هيغيب عنى 18 شهر
مامت فاطيما: ايه دا مبتتكسفيش وبتقوليها علنى كده هيوحشنى
فاطيما بتهزر: قليله الادب ..انا هقول ل امها تربيها ..عيب يابنت
ماريا: الله ..فى ايه بقول اللى حساه وبعدين دا خطيبى وهيبقى جوزى
فاطيما: مفيش مشاكل .. خليه يوحشك ف سرك راعى انك قاعده وسط
الارمله الطروب توحا ... زوجه مع وقف التنفيذ جيجى .. عذراء الربيع طيما
حالات مستعصيه يابنتى
ضحكوا كلهم ع كلام فاطيما .. مامت فاطيما: ايه زوجه مع ايقاف التنفيذ دى
فاطيما: قوليلى اخر مره قالك فيها منعم بحبك كانت امتى
اعتقد لما محمد جه صح
خبطت مامت فاطيما فاطيما : لمى نفسك
ومين قالك ان ابوكى مبيقولهاش .. هو لازم يعنى يقولى كل يوم بحبك بحبك
فاطيما : اومال يقولها ازاى .. احنا بنلاقيهم ف التليفزيون بيقولوا كده
جده فاطيما: الحب اللى بجد تصرفات مش كلام يا طيما
لما تلاقى جوزك حنين عليكى وبيهتم بيكى وبيخاف عليكى حب
مامت فاطيما: يعنى مثلا من يومين لما رجلى وجعتنى ابوكى عمل ايه
فاطيما: جاب المرهم ودعكلك مكان الوجع
مامت فاطيما: اهو كده بيقولى بحبك .. ولما بعد كل اكله حلوه يبتسم ف وشى ويقولى تسلم ايديكى كده بيقولى بحبك ... لما اتعب ويناولنى العلاج ف ميعاده ..كده بيقولى بحبك ..لما يدخل علينا بحاجه حلوه وبيتسم ف وشى ..كده بيقولى بحبك لما الاقيه يتصل بيا لما يكون ف الشغل يطمن عليا ..كده بيقولى بحبك الحب مش كلمه زى زمانكم دا كده ..الحب افعال
ماريا عجبها اوى الكلام اللى سمعاه: الله يا طنط ايه الرومانسيه دى كلها
فاطيما: شايفه حب الابيض والاسود والسمنه البلدى
مش السبكى والزبده الصفرا
ماريا ضحكت: انا هاجى اخد كورسات هنا بقى طول فتره غياب عماد
مامت فاطيما: من غير كورسات دا احساس وتلقائيه
فاطيما بتغمز لمامتها: يا جيجى يا جااامد انت يابتاع الاحساس والتلقائيه والمحشى
ماريا: يخرب شيطانك يا طيما حتى ف الرومانسيه حاشره الاكل
فاطيما: الرومانسيه مبتشبعبش ..لكن طبق المحشى يشبع
مالت ماريا ع فاطيما: ومعتز يشبع ولا
راحت فاطيما خبطت ماريا ف رجلها وراحت تحط قدامها محشى: دوقى يا حبيببتى الورق العنب دا جامد
بتدارى توترها : مكسوفه تطلب بحطلها
ضحكت ماريا : وعرفت اظبطتك اخيرا
فاطيما باصه ل ماريا: لينا اوضه هنتلم فيها هتنامى ع الارض انهارده
ماريا: هنشوف
خلصت ماريا وفاطيما الاكل وشالوا الاطباق وغسلوا المواعين وعملوا كوبيتين شاى مع طبقين رز بلبن وبسبوسه وراحوا بيهم ع اوضه فاطيما ...!!!
فاطيما: يلا هيصى ظبطتك وجبه تمام اهو وحلو كمان
مبتعملهاش لما بكون عندكم
ماريا:حرام عليكى تحبى اعدلك الاكل الل كاتلتيه
فاطيما بتضحك:لا لا شكرا
ماريا قاعده ع السرير جنب فاطيما وماسكين كوبايه الشاى : طيما
فاطيما: ها
ماريا: ربنا يخليكى ليا .. انا انهارده مكنتش عارفه هعديه ازاى
قعدتى معاكى فرقت كتير من غيرك مكنتش عارفه هعمل ايه
فاطيما: هتقعدى تعيطى وتكتئبى وتنكدى ع نفسك ..عارفه انا موال البنات دا
ماريا بتضحك: يافقر انا بتكلم بجد ..
فاطيما باابتسامه: طيما تتيح لكم كل سبل الراحه والتمزيج يا مرحب بكم
ماريا: يا معتز ياابن المحظوظه
فاطيما بتضحك: مش كده برضه... انا ع طول بقوله بوس ايدك وش وضهر
ماريا: ربنا يكمل فرحتك ع خير وتحصلينا
فاطيما اخدت نفس :يارب
ماريا: وبمناسبه تحصلينا دى الضلع التالت تعالى نكلم سولى ونرغى معاها ونحكيلها خليها تفرح ..
فاطيما: اوك يلا
اتصلت ماريا بسلمى وعملوا مكالمه فيديو وقعدوا يتكلموا واتكلمت ماريا مع عماد ونامت وفتحت فاطيما الشات وقعدت تتكلم مع معتز لغايه ما بطاريتها فصلت واتصل بيها معتز وكان الوقت 5 الصبح وميمى كانت نايمه جنبها
فاطيما: الو
معتز: وحشتينى
فاطيما: ياسلام ماانا كنت لسه بتكلم معاك
معتز: الدقيقه الل بتعدى من غيرك بتوحشينى فيها
فاطيما بكسوف: معتز انا بتكسف ها قلتلك
معتز: وحد يتكسف من حبيبه
فاطيما: ها
معتز: ها ايه ... انا حبيبك ولا لا
فاطيما: مفيش تغيير سؤال
معتز: لا
فاطيما: خلاص مش هرد
معتز: تعرفى انك لغايه دلواقتى مقولتليش بحبك
فاطيما: بجد ..وانتى مستنى اقولهالك
معتز: اه ..عاوز اسمعها منك ..ممكن
فاطيما: ودا ليه يعنى ...
معتز: عاوز اسمعها منك ..
انا بحبك وعاوز اسمعها منك حقى ولا انتى مبتحبنيش
فاطيما سكتت لحظات وبتردد : مش حكايه مبحبكش
معتز: اومال ايه الحكايه
فاطيما: الحكايه ان انا خايفه ... خايفه
معتز: خايفه من ايه
فاطيما: خايفه انى اكون بحلم او عايشه وهم مع نفسى ... خايف تكون انت مش متاكد من احساسك ومبسوط بلحظه ... خايفه افوق ع كابوس انا مش قده ... خايفه من كل حاجه
معتز: فاطيما انا متاكد مليون % ان انا بحبك وبحبك جدااا ومبسوط بالحظه علشان معاكى لانى بحبك انتى ... وعاوزك متخافيش طول ماانتى معايا .. انا كنت اعرف واحده قبلك معايا ف الكليه وحبيتها وارتبطنا لكن لما جيتاقارن بين احساسى ف الوقتين لاقيت احساسى معاكى اقوى وخصوصا ان الجرح اللى ف العلاقه الل قبل مش موجود لانك داوتينى من غير ما تحسى ... وجودك يا فاطيما حسسنى بالحب وحبيتك بجد ... وهفضل احبك ومش هسيبك مهما حصل ودا وعد منى ليكى
فاطيما سامعه كلامه اتاثرت اوى واترسمت ع وشها ابتسامه : توعدنى مهما حصل
معتز: اوعدك مهما حصل هنفضل مع بعض
فاطيما : انت بقيت حاجه مهمه اوى ف حياتى ويومى يا معتز ... يومى فرق كتير عن الاول بوجودك .. ربنا يخليك ليا
معتز: ويخليكى ليا يا حبيبه قلب معتز
فاطيما: طيب يلا اقفل بقى ونام
معتز: وانتى هتعملى ايه
فاطيما: هنام هحاول انام .. هصدق كلامك انى مش بحلم وهنام
معتز: ليه مش هتعرفى تنامى
فاطيما: نيمنى لو تعرف
معتز: اممم عاوزه انيمك ازاى
فاطيما: احكيلى حدوته
معتز: ايه شغل البيبهات دا
فاطيما: مش عاجبك احنا فيها اشوف حد يحكيلى حدوته
معتز: ع الله تعمليها تشوفى مين وانا موجود هيطير فيها رقاب لو حد بصلك ...خلاص بقيتى تخصى معتز امام ..
فاطيما سمعت كلامه ابتسمت وحست بقشعريره من كلامه : طيب احكيلى يلا
معتز راح نام ع السرير : كان يامكان يا طيما يا ملاك مايحلى الكلام الا
فاطيما باابتسامه: بذكر النبى عليه افضل الصلاه والسلام
معتز: شاطوره ... كان فى ولد اسمه معتز عايش حياته لوحده دخل كليته وافتكر انه هيلاقى الحب هناك وكدب ع نفسه وعاشه .. لغايه ما جت صدفه وكانت احلى صدفه واتعرف ع بنوته زى القمر اسمها طيما ...بنوته بتضحك الدنيا بتضحك معاها ... خطفته من دنيته المعزوله وعايشته ف احلى دنيا معاها ... ومن وقتها والولد معتز مش قادر ولا هيقدر يستغنى عن فاطيما لانه بيحبها اوووى اوووى اووى
فاطيما سامعه كلامه وبتروح ف النوم ...
معتز: طيما
فاطيما وهى بتنام : اممم
معتز: بحبك اووى اوووى اووى
فاطيما تلقائى وهى بتنام : وانا كمان
ونامت فاطيما وكانت مكالمه معتز بالنسبالها حلم ف الواقع كملته فى حلمها وهى نايمه وطول ماهى نايمه كانت الابتسامه مبتغبش عن وشها من السعاده
_______________________
يتبع
ليست هناك تعليقات:
إرسال تعليق