(2)
جده : واخرت البص دا ايه
محمد:ها
جده: جهز الطلبات لبنت علشان متقفش كتير
محمد اتوتر : حاضر حاضر
رجعت فاطيما واخدت الطلبات : شكرا يا جدو تسلملى
جده: مبرووك تانى ع النجاح وعقبال التخرج والعريس
فاطيما: عقبال ما تفرح بمحمد وتشوف عريس منور كده
محمد قرب منهم: انا سامع اسمى
فاطيما: منستغناش طبعا يا محمد
محمد باابتسامه: مبروك يا طيما ع النجاح
فاطيما: تسلم ..
محمد: وهتدخلى ايه؟
فاطيما: لما مكتب التنسيق هيحدد
محمد: ان شاء الله كليه حلوه انتى تستاهلى كل خير
فاطيما: تسلم يارب .. يلا السلام عليكم علشان كده اتاخرت
ومشيت ومحمد باصص عليها لغايه ما دخلت العماره ودخل المحل
جده: اتحرك وكفايه بص بقى
محمد : ها
جده: هتقضيها بص ل امتى... اتحرك اهى خلصت ثانويه وداخله جامعه وماادراك ما الجامعه وشبابها وفاطيما تتخطف
محمد اتوتر : معرفش انا بتتكلم عن ايه يا حاج بصراحه انا داخل اشوف اللى ورايا جوه ...
ومشى محمد دخل جوه المحل .. جده: علشان اهبل ....!!
فى يوم ابو فاطيما رجع من الشغل بدرى واخد فاطيما وراحوا يشتروا اللاب
فاطيما كانت محتاره عاوزه ايه فالمهندس اقترحلها نوع كويس وسعره كويس ف نفس الوقت اشترته والمهندس ظبطلها كل حاجه وعرفها تتعامل معاه ازاى طول الطريق فاطيما فرحانه جدا بللاب ال اشترته وكانت حضناه ودخلت الشقه وفتحته قدام مامتها وجددتها توحه ومحمد اخوها ....
توحا: حلو يا طيما ماشاء الله تتهنى بيه ياحبيببتى
مامتها: كده بقى انا اتاكدت انك مش هتقومى من قدامه
باباها: لا طيما وعدتنى فى الاجازه حاجه والدراسه حاجه
فاطيما بتضحك: اه طبعا طبعا
محمد : طيما حبيببتى اختى الكبيره الوحيده
فاطيما: لا انسىىى ...ايه الممنوعات الل تخصنى هنا
محمد : الاكل بتاعك وحلوياتك وشيبساتك وموبيلك ومنير لو شغال واوضتك بالعموم يعنى
فاطيما: وضيف عليهم اللاب بقى من المحظورات هنا ..انا سيبتلك الكمبيوتر اتشقلب عليه براحتك .. وانا هقوم اتشلقب ع اللاب بتاعى حبيبى ف اوضتى لوحدى ... عن اذنكم
ضحكوا كل الل قاعدين ..اخدت فاطيما اللاب ودخلت اوضتها وفتحته وع وشها ابتسامه كبيره
فاطيما: اخيرررررررا جيت يا رمضان وهستفرد بيك وبمنير واسمعه بمزاج ياسلاام ... ابعت لعيال اعرفهم بقى ..
بعتت ل ماريا وكانت فاتحه وقعدت ترغى معاها وشويا ودخلت سلمى
سلمى: طيماااااااا ايه النور دا
:Dفاطيما: احم احم ..دا نور الللاب علشان جديد بس
B| ماريا: مبروك يا طيما
:*فاطيما: عقبال عندكم يارب ..
:* :* سلمى: كده هتكونى موجوده ع طول وتوفرى عليا مكالمات الدولى
:Pفاطيما: قال يعنى انتى ال بتدفعى دا ابوكى ال بيدفع
:Pماريا: انتوا هتتخنقوا ولا ايه دا بدل ما نحتفل
3:) فاطيما: صحيح.. عموما يا سولى كلها اسبوع وهتكونى عندى
;)وهظبتك..واوعى تفتكرى انك اكبر منى بسنه دا يبقى حاجه فشر
:Pماريا بتضحك: بصراحه فاطيما عندها حق خافى يا سلمى دا حماده اخوها مظبتها وهى اكبر منه بسنه
:Pفاطيما: اه يا ميمى ياواطيه بتتريقى عليا
>:( سلمى : هههههههههههه والله ياجزم وحشنى ووحشتنى القاعده معاكم اوى
:* ماريا: وانتى كمان والله وفرحت اوى انك جايه♥
فاطيما: دى جايه اسبوع وراجعه معرفش انا ايه الاجازه دى
:/انتوا فقرا ابوكى ع قلبه اد كده مش عارفين تطولاوا الاجازه
سلمى: انتى بتقرى ع عمك يا بت
:Oفاطيما: ع اساس بتكلمى رابعه
:v ماريا: لا بتكلم اولى
:pسلمى: يخرب فقركم ..بس فعلا ظروف شغل بابا ومصطفى لسه مستلم شغل جديد واصلا هو مش نازل معانا ..احنا نازلين علشان نشوفكم
:*فاطيما : تيجى بالسلامه
:*سلمى: تعالوا ندخل الجروب نرخم ع خلق الله شويا
3:)فاطيما: اه صحيح هو مين الشخص الجديد ال دخل دا مين ال دخله معانا
سلمى: اه ..دا صاحب خالد كلمنى واستأذنى يضيفه وانا قلتله اوك
^_^فاطيما: قلتى اوك ع اساس انه جروب السيد الوالد مش احنا اتفقنا اى حد يدخل نوافق احنا التلاته ولا علشان من طرف استاذ خالد
:/سلمى: ايه يا طيما ماهو انتى مكنتيش بتفتحى اصلا وحصل ايه يعنى
:(ماريا: فاطيما مبتحبش تكون ف مكان مع حد غريب يعنى
:Dسلمى: لا هو شخصيه لذيذه ومحترمه وكفايه انه من طرف خالد
^_^فاطيما : ههههههههههههههه من طرف خالد ماشى هنعديها
:vبس انتى قولتيله ع فتره التجربه لو اضايقنا منه او كان شخصيه مش كويسه وهربان من قفص الزرافه هيحصله ايه
3:)سلمى: قلتله طيما هتطيره
3:)فاطيما: اشطه
3:)ماريا: هقوم اعمل مج نسكافيه وهرجع تانى
3:)سلمى: وانتى يا طيما جايبه اكلك جنبك ولا هتقومى
:pفاطيما : ها ها هاها .. هى دى حاجه انساها الخزين كله ف الاوضه
;)سلمى : طيب يلا يا طيما انا وانتى ننتطلق
3:)فاطيما: شدى الحزام وانظرى لاامام ... هوووووووبا
3:)سلمى : هههههههههههههه هوووبا
3:)ودخلت فاطيما وسلمى الجروب وحطوا بوستات وقعدوا يرغوا ويهزووا
وكانت فاطيما ال شاغله الجو بهزارها وضحكها ...!!
فى يوم نزلت فاطيما وماريا يسحبوا الملف بتاعهم من المدرسه وهما راجعين ..فاطيما: ميمى تعالى نجيب حاجه من السوبر ماركت
ماريا: يلا الجو حر اصلا
دخلوا السوبر ماركت .. فاطيما: السلام عليكم يا حج عبد المجيد
عبد المجيد: وعليكم السلام يا طيما
ماريا راحت اتجاه تلاجه الحاجه الساقعه وكانت التلاجه جنب محمد وهو واقف ..ماريا فتحت الباب وبتدور ع كانز حاجه معينه بتشربها وبتسئل محمد لاحظت انه مش سمعها بصت عليه لاقته باصص ع فاطيما ووشه مبتسم وهى بتتكلم مع جده ... راحت ضحكت ماريا
فاطيما: يلا يا ميمى انتى هتدخلى ف التلاجه فاتحاها وواقفه قدامها
ماريا بتبص ع محمد: اصل بسئل محمد ع حاجه ومبيردش وانا مش لاقياها
محمد انتبه لكلام ماريا: ها.. بتدورى ع ايه
ماريا: انا صوتى اتنبح يا محمد يا محمد يا محمد
محمد اتحرج: سورى مااخدتش بالى عاوزه ايه وانا اجبهولك
فاطيما بتضحك: بطلى رخامه ع محمد دا مش قدك واكبر منك كمان
ماريا بتبص لفاطيما وبتغمزلها: يا حنينه
محمد طلع اتنين كانز : اتفضلى
فاطيما: ميرسى يا محمد
lماريا بتضحك : طيب يلا بقى يا طيما
فاطيما وقفت : يعنى ادخل هنا واخرج بكانز بس ...استنى لما املى التنك خزين فى الاوضه بيشحر ..
ماريا : يهدك .. نفسى تحبينى زى ما بتحبى الاكل كده
فاطيما بتبص ل حاج : ينفع كده يا جدو تقارن نفسها بالاكل
يعنى ينفع اقولك بتحب تبيع العصير ولا البيسى اكتر
الحاج: الاتنين زى بعض ملهمش علاقه
فاطيما بصت لماريا: اهو رد عليكى الاتنين زى بعض اوعى بقى اروح اشوف هجيب ايه لحسن نفسى رايحه ل الاندومى
ماريا: املى يا حبيببتى املى
خلصت و راحت فاطيما تحاسب وماريا واقفه بتبص ع محمد وهو بيبص ع فاطيما وهى واقفه مع جده ... ضحكت ماريا وخرجت هى وفاطيما ..
فاطيما: بتضحكى ع ايه
ماريا: ف حاجه انا شاكه فيها بقالى فتره وباين انها صح
فاطيما: هو ايه دا يا كرومبو
ماريا بصت ل فاطيما: بتتريقى طيب مش هقولك
فاطيما: والله انتى رخمه .. فى ايه يابت
ماريا: خلاص خلاص هقولك بس اتاكد سواء صح ولا لا
ودخلت ماريا عمارتها وفاطيما طلعت عمارتها ....
ولان ماريا حطت الموضوع ف دماغها وهى ساكنه ف الدور التانى وقدام السوبر ماركت فكانت حاطه محمد تحت المراقبه ولاحظت فعلا انه بيطلع من المحل وبيبص ع بلكونه فاطيما .,.... فقررت ماريا تطلع تتكلم مع فاطيما ....
لبست وراحت لفاطيما وكانت قاعده مع جددتها يطبقوا الغسيل ومحمد اخوها قدام الكمبيوتر ..جرس الباب رن
فاطيما: افتح الباب يا محمد
محمد: افتحى انتى ..انتى اقرب
فاطيما: افتح الباب يا حماده
محمد: لو قومت الدور هيروح عليا
فاطيما: افتح الباب يا حماده بدل مااجى ابططك
محمد : خلاص خلاص ..ربنا ع المفترى
فاطيما بصت لجدتها: هو قال حاجه
جددتها: لا يا حبيببتى قال يارب تخلصى الغسيل وتنجزى
ضحكت فاطيما وجددتها لانها سمعت كلامه وعرفت ان جددتها غيرته ...فتح الباب ورجع قعد قدام الكمبيوتر
ماريا : ازيك يا توحا عامله ايه
توح: الحمد الله يا حبيببتى انتى عامله ايه ومامتك وباباكى واخواتك
ماريا: الحمد الله باعتينلك السلام
توحا: الله يسلمهم من كل شر ...
ماريا: طيما
فاطيما مركزه ف تطبيق الغسيل: ها
ماريا: عاوزاكى ..قومى
فاطيما: اقعدى طبقى معايا غسيل الشارع دا الاول . انا مش مستوعبه ان كل دى هدومنا لبسوها امتى مش عارفه انا ...
ماريا مسكتها من دراعها: اسمعى الكلام وقومى
فاطيما: فى ايه اكتشفتى الذره ولا ايه .. انا مش هقوم غير لما اخلص الغسيل دا لحسن جيجى مستلمانى بقالها كام يوم انى مقصره ف شغل البيت وقاعده ع الللاب وبترسم انه يتسحب منى ... وانا يتسحب منى دمى ولا يتسحب منى لللاب توبى واكلى استحاله
ضحكت ماريا وجددتها ... ماريا : ياسلام
فاطيما :عاوزه اثبتلها ان انا مش مقصره وقدها وقدود .. ارغى وانا سمعاكى قوليلى تاخدى حته سندوتش مربى بقشطه مقولكيش دى عمايل توحا ولا اقولك متاخديش خشى اعملى لنفسك
ماريا: نفسى اشوف ايدك فاضيه من الاكل امنيتى قبل ما اموت
فاطيما: يبقى مش مكتوبلك تتحقق الامنيه وهتموتى
توحا: انا هقوم اصلى العصر يا بنات واقعدوا براحتكم
فاطيما: ادعيلنا يا توحا
توحا: ان شاء الله
ماريا: مش هتقومى برضه
فاطيما: انجزى فى ايه .. الموكوس نطق ولا حاجه
ماريا: لا مش ليا
فاطيما اتخضت : مش ليكى .. ايه طلع بيحب واحده تانيه واداكى شقلباظ ف الهوا ..عماد الموكوس ابن الموكوسه
ماريا قاطعتها: يابت اهمدى ..الموضوع ميخصنيش
فاطيما: طمنيتى احكى طيب وانا سمعاكى محمد مش مركز وماما ف المطبخ وتوحه ف اوضتها وبابا ف الشغل وسلمى ف دبى
ماريا : بتهزرى ..طيب اشطه هكلمك وانت هنا
فاطيما اخدت قضمه من السندوتش وكملت تطبيق غسيل
ماريا بتجمع نفسها: طيما
فاطيما: ها
ماريا: عارفه محمد حفيد عم عبد المجيد
فاطيما: اه عارفاه ماله
ماريا باصه لفاطيما وهى مش مركزه: باين كده انه بيحبك
فاطيما : بيحب.... بيحب هههههههههههههه
ماريا: انا مبهزرش انا بتكلم بجد
فاطيما تنحت ونبرت صوتها عليت : محمد
محمد اخوها سمعها افتكرها ندهت عليه : نعم
ماريا: لا مفيش يا حماده ركز ف ال بتعمله وانتى يا مصيبه وطى صوتك ...
فاطيما: ايه ال بتقوليه دا
ماريا: بقول باين ان محمد بيحبك يا طيما
فاطيما نبره صوتها عليت تانى : محمد
محمد اخوها: فى ايه ايوه
ماريا: مفيش يا محمد مفيش
فاطيما متنحه ل ماريا.. ماريا: انا كنت شاكه بقالى فتره كل ما تكونى عندهم مبينزلش عينه عليكى وانا كنت بقول عادى بس هو باين اوى لما ركزت وراقبته من البلكونه عندى ..
فاطيما متفاجئه وصوتها على: محمد
محمد اخوها: فى ايه يا طيما
ماريا: مفيش يا حماده
ماريا: وطى صوتك... اه انا راقبته من البلكونه وكانت دايما يخرج من المحل يبص علي بلكونتك فقلت اقولك بقى علشان تبقى عارفه
فاطيما مش مستوعبه وضحكت بصوت : محمد
محمد اخوها قام من مكانه وراح ناحيتها: محمد ..محمد.. محمد.. فى ايه
فاطيما بصتله : ها
ماريا شدت فاطيما: معلش يا حماده اصل اختك نص دماغها ضربت
محمد: نصها هى اصلا ضاربه كلها مش شايفه كميه الاكل ال بتضربه
فاطيما بصت لمحمد وراحت حدفته بكيس مخده كانت بتطبقه: امشى يلا
ماريا شدت فاطيما ودخلوةا الاوضه ...ماريا: انتى ملحظتيش خالص
فاطيما بعد ما استوعبت الكلام: لا خالص يابنتى هو بيعاملنا عادى
ماريا بتغمزلها: بس الواد يستاهل ..مز وطول وكده
فاطيما بتضحك: انتى عاوزاه اهلى يقروا عليا الفاتحه قريب
ماريا: ليه بعد الشر
فاطيما بتضحك: لان ببساطه فى واحده عنيها من محمد وانا عارفه وكنت بحاول افتح سكه معاه علشانها
ماريا اتفاجئت: مين دى .. استنى استنى تقصدى
فاطيما بتضحك: ايوه هى ... نهى
ماريا: بس واضح انه بيحبك انتى
فاطيما: بس انا مبحبوش ..اقصد بالمعنى ال تقصديه انا بعزه مش اكتر
وال احق بحبه نهى مش انا ...
ماريا: وهتعملى ايه بقى
فاطيما: اممم لو كلامك صح هيبقى موضوع كبير ولازم محمد يفهم ان مفيش حاجه ناحيته علشان ميضيعش وقته ف وهم ويضيع عمره ويضيع حب نهى ال بجد ...
ماريا: هتقوليله كده
فاطيما: اه ..
ماريا متفاجئه: قادره وتعمليها..
فاطيما: فى حاجات لازم تتشجعى وتاخدى وقفه فيها مش زيكم كده انتى والانسه سلمى
ماريا: ابقى عرفينى هتعملى ايه.. ياخساره كنت فاكراه هتنضمى لنادى
فاطيما: نادى الهبل العظيم
ماريا: ماتفكرى يا طيما
قامت فاطيما : يلا يا ميمى امك بتنده عليكى
نزلت ماريا من عند فاطيما وفاطيما بتفكر تفتح موضوع مع محمد ازاى
وهى واقفه ف البلكونه شافت الحاج عبد المجيد مشى راح يصلى العشا ف الجامع ومحمد لوحده ف المحل فنزلت تتلكك تشترى حاجات ليها ... اتشجعت ودخلت وع وشها ابتسامنه كالعاده
فاطيما: السلام عليكم
محمد ابتسم: وعليكم السلام .. ازيكك يا طيما
فاطيما بتبص ع المكتب: هو جدو راح يصلى
محمد: اه ..عاوزه حاجه
فاطيما: هاخد حاجات كده اتسلى فيهم وانا قاعده فوق
راحت فاطيما اتجاه الحلويات والشيكولاتات وبتختار وف نفس الوقت بتدور ع طريقه تفتح كلام وكمان الوقت بيمر مينفعش تطول كده ف المحل ... ولسه هتلف لاقت محمد ف وشها اتخضت
فاطيما: محمد خضتينى
محمد اتحرج: سورى بس جبتلك شنطه تحطى فيها
فاطيما مسكت الشنطه: اه ..اوكيه
لفت وشها لحاجه وهى بتشترى : مش هنفرح بيك يا محمد قريب بقى
محمد: ان شاء الله
فاطيما: لا انا بتكلم بجد .. انت شقتك موجوده وشغلنتك هنا ثابته لانه يعتبر محلك بعد طول عمر جدو يعنى مش ناقصك غير بنت حلال
محمد اتشجع : ماهو انا كنت عاوز اتكلم معاكى ف كده
فاطيما: ليه شايفنى فاتحه مكتب بنات الحلال .. اختك اخيرها تسألها ايه احلى اكله فى حلويات هكذا انما عرايس متلقيش
محمد: يعنى ايه :
فاطيما : يعنى انا لاغيه الفكره بالنسبالى فصعب افكر فيها لحد غيرى ... جيت العنوان الغلط
محمد اتفاجئ من كلام فاطيما: يعنى ايه لاغيه الفكره
فاطيما: الجواز .. ف البيت مفيش جواز غير بعد ما اخلص جامعه
وبعد الجامعه يحلها ربنا وبصراحه عندهم حق هو انا هدرس ولا هحب .....وانا مش هتجوز غير شخص بحبه ..وبما انى معرفش اصلا ايه حب
فالفكره كلها راكناها .. لما يحين ربنا
محمد: بس ف بنات كتير مبيفكروش كده
فاطيما بتضحك: اه اعرف وف منهم اتخطبوا دلواقتى وعادى
هى تفرق من بنت لبنت ... زى نهى عارفها معندهاش مانع ترتبط او تتخطب دلواقتى وبيجلها عريسان كتير وهى رافضاهم علشان بتحب وال سمعته منها انها مش عارفه تفكر غير ف ال بتحبه وهو مش حاسس بيها
محمد: يعنى انتى مبتفكريش ف حد
فاطيما مسكت الشنطه : فى دول والكليه ال معرفش هعمل ايه فيها وانى هصحى بدرى دا حوار وبعدين كل شئ فى وقته .. اوقات بنفتكر حاجات هناخدها وسهله وهى ف الاساس مش لينا فالافضل ننجز ومنضيعش وقت ف المكان الغلط يعنى ونضيع الصح ال ممكن يكون قدامنا ومش شايفنه علشان وهم
كلام فاطيما نازل ع محمد زى جردل المايه الساقعه مش مخليه عارف ينطق
فاطيما حست انها كانت اوفر : يلا حاسبنى ع الحاجه دى وان شاء الله
لما تنوى متنساش تعزمنى وتعرفنى انا زى اختك اى حاجه عاوزها هعملهالك احنا اخوات ولا ايه
محمد وملامح وشه متغيره: ان شاء الله
حاسبها محمد ومشيت وهى وشها متغير : ياترى فهم كلامى ولا لا
ومحمد واقف بيبص عليها: لدرجه دى مكنتش شايف صح كل ال رسمته كان خيال ووهم مفيش نصيب ..!!
مر يومين ونزلت سلمى واسرتها من الامارات ل السنطه وكانوا الكل ف انتظارهم ... بعد السلامات والترحيب وتوزيع الهدايا ..كان ل سلمى شقه تحت شقه فاطيما.. نزلوا مامتها وباباها يرتاحوا ..لكن فضلت ماريا وسلمى مع فاطيما ودخلوا اوضه فاطيما وقعدوا .. دخلت فاطيما الاوضه ومعاها صينيه فيها سندوتشات وحلويات وطبق كبير فشار ..
سلمى : وحشتونى يا جزم
ماريا : والله انتى ال وحشتينا .يااااااااااه اخيرا اتجمعنا كده
سلمى بتمد ايديها تاخد سندوتش فاطيما ضربتها : متحفيش راعى ان ليكى اخوه هياكلوا
ماريا: انا مش جعانه
فاطيما: اشطه.. هاكل بدالك انا جعانه
مدت ماريا ايدها واخدت سندوتش: لا هاكل اضمن حقى مش عاوزه انام جعانه عفضحك
فاطيما: مجنونه وتعمليها
قعدوا ع السرير ..
ماريا: ميرسى يا سولى ع الهدايا الاكسسورات والبارفان روعه تسلمى
سلمى: انا قلت اجبلكم حاجات تنفعكم لدخول الجامعه ظبتكم يعنى
فاطيما: حلوين .. بس كتير ال جبتيه دا بجد
سولى: ماهو انا سألتكم اجبلكم ايه وانتوا عملتوا مؤدبين.. طبعا لبس ميمى هعرف اجب مقاسات لانها من 5 سنين زى ماهى .. انما طيما .
فاطيما: مالها طيما حضرتك
ضحكت ماريا: متقصدش ..يعنى قصدها انك بتخسى عن لما تيجى يعنى
فاطيما: ياجماعه دى خطه انا مبحبش حد يلبسنى ويشتريلى هدوم ع ذوقه انا بحب اشترى حاجتى بنفسى علشان كده بطخن..انا ال هلبس ياجدعان ..
سلمى: نظريه تحترمى عليها ... علشان كده قلت الحاجات الخفيفه دى
افضل واحسن ومناسبه ليكم للكليه .. اكسسورات وبرفان وشنط وطرح واسكارفات لميمى
ماريا: ميرسى بجد يا سولى يخليكى لينا
سلمى: تسلمى ياحبيببتى ..
بصت سلمى شافت اللاب توب: هو دا الاستاذ ال كنتى عاوزاه
فاطيما باابتسامه كبيره: اه شوفتى حلو ازاى وحاطه جنبه فازه بورد وبعيد عن الشباك والهوا ...مفيش حد بيلمسه غيرى ..اسمع منير حبيبى لوحدى
ماريا: عشقها الاول
فاطيما: منير يعنى الحب والاحساس استنى هشغلكم اغانى ليه
شغلت فاطيما وكانت اغنيه احمر شفايف : فاطيما : قول يا كينج قول
سلمى وماريا ضحكوا ...
ماريا: يابنتى من ساعه ماجبته وبتقولى بصيله متلمسهوش
فاطيما: علشان لسه فلوسه حيه ..والحاج موصينى لو حصله حاجه مش هيجيب غيره غير لما اخلص كليه يعنى هستنى 4 سنين وهتحط تحت تناكه ورخامه البشمهندز
سلمى بتضحك: صحيح محمد مطلبش واحد هو كمان
فاطيما: نعم ..طلب طبعا ..بس بابا قاله لما يخلص ثانوى زى ويدخل جامعه
ولو فعلا جاب مجموع كبير ودخل هندسه هيجبله موبيل جديد وللاب احدث حاجه مكافاءه ع اجتهاده
سلمى: وجابهولك ليه
فاطيما: مكافاءه انى مشتلتش مواد ههههههههههههههه
سلمى: ناويتوا تدخلوا كليه ايه
ماريا: لسه جواب التنسيق احتمال الاسبوع دا
فاطيما: الواطيه قلتلها اكتبى حقوق معايا مرضتش وكتبت اداب
سلمى: يخرب عقلك انتى كمان عاوزاها تختار زيك
فاطيما: علشان منبعدش عن بعض ونبقى ف مكان واحد
ماريا: انا عاوزه ادرس انجليش وانتى ملكيش ف مذاكره وبعدين مليش ف الحفظ انا بتاع حقوق دا .. كفايه انك اقنعتينى احول ل اادبى معاكى اسكتى وانا كان نفسى علمى
فاطيما: طيب عينى ف عينك كده كنتى هتجيبى المجموع دا بذمتك
ماريا: بصراحه لا
فاطيما: اشكرينى بقى انى وجهتك لطريق الصح يا واطيه
سلمى: اصيله من يومك يا طيما
ماريا: بس انا سمعت كلامك وقدمت ف جامعه طنطا
سلمى: ليه كنتى عاوزه ايه
فاطيما: الواطيه كانت عاوزه تروح القاهره تقدم عين شمس او القاهره
ماريا: ماهو انا مكنتش واثقه انى هروح كنت هكتبهم وخلاص
فاطيما: ولو جت معاكى بالحظ تسيبنى يا ميمى اهون عليكى اشترى السندوتشات الشاورما لوحدى والحلويات اضربها لوحدى اهون عليكى
ماريا راحت حضنت فاطيما: ولا اقدر يا طيما
سلمى: العشق الممنوع .. ع فكره مينفعش ترتبطوا
انتى مسيحيه وانتى مسلمه
راحوا ضحكوا ... ماريا: فاكرين الفتره ال كنت بحب فيها مصطفى اخوكى يا سلمى وعشت الوهم فتره وكده
فاطيما بتضحك: كانت ايام عنب انتى كنتى بتنزلى من هنا بالعافيه
لدرجه شكيت فيكى انك اسلمتى وقتها والله
سلمى: كانت ايام فقر
قعدوا يضحكوا ويتكلموا ... راحت سلمى فتحت كلام
سلمى: مفيش جديد حصل فى موضوع محمد
ماريا : لا خلاص الواد فقد الامل بعد بوقين ال خبطتهمله فاطيما
بقى يتعامل عادى وفعلا مبقاش يبصلها مراقبتى الايام ال فاتت لاحظت تغير ف وضعه واضح كده انها سدت ف وشه الباب وهو استسلم
سلمى: عبيطه ..محمد انسان كويس ومؤدب وكفايه انك عارفاه
فاطيما: انتوا بتتكلموا فى ايه ..هو علشان مؤدب وكويس يبقى خلاص ارتبط بيه واحبه واتجوزه هى دى الشروط بالنسبالكم
سلمى: اومال ايه هى الشروط حضرتك
فاطيما سكتت لحظاتت ومسكت طبق الفيشار واكلت شويا : اممممم مفيش شروط
ماريا بتضحك: سلمى فكك منها بنت عمك هبله كفايه الفيشار عليها
سلمى بتضحك : لا فهمينى ازاى
فاطيما : مفيش شروط انى احب شخص .. انا اه معرفش ايه هو الحب واحساسه ايه بس ال عارفاه وواثقه منه انه بيجى فاجاءه كده من غير ترتيب ولا شروط .. بتقابلى شخص ومن غير ما تحسى تلاقى نفسك رايحه ناحيته بتفكيرك واحساسك وبيملى حياتك وعقلك وقلبك وفاجاءه تلاقى نفسك حبيتى سواء الشخص دا كويس او وحش يعنى من الاخر زى البطيخه متعرفيش جواها غير لما تفتحيها والتجربه ال هتدخليها نتيجتها
هى ال هتحكم ع العلاقه والشخص صح ولا غلط .. الحب زى البطيخه
ماريا: بطيخه|..اكيد واحده بتعشق الاكل هتقول ايه غير بطيخه
ضحكوا.. فاطيما: لا انا بتكلم بجد.. احساس الحب غريب ملوش وصف ومحدش هيحس بيه غير صاحبه فصعب اوى تحطى شروط ... انتى مش هتشترى عماره فبتختارى .. انتى بتسكنى العماره لما ترتاحى فيها بتكملى مرتاحتيش بتسبيها ..بيبقى الحكم بعد فتره مش وانتى بتكتبى العقد وبعدين وانتى ونصيبك هتقع بيكى هتعمر معاكى يعنى الغيب محدش يعرفه ... وبعدين انتوا بتسألونى انا ال مجربتش ولا ارتبطت ولا اعرف ايه هو الحب غير انى اتفرج عليه افلام واسمعه اغانى الكينج وانتم
انتم وضعكم وحالتكم اكبر رد ع سؤالكم.. اعجابكم وانكم مشدودين للاشخاص سببه ايه..كنتم حاطين شروط ودورتوا ولاقيتوها
ماريا وسلمى بصوا لبعض : لا
فاطيما مسكت طبق فيه حته بسبوسه: يبقى انا صح ... شوفوا حل لوضعكم وبعدين احكموا عليا يا مواكيس واحده بتروح الكنيسه كل يوم حد وغالبا كل الاسبوع وال يشوفها يقول الايمان هيفط منها وهى بتروح تدعى تشوفه ولما بتشوفه بتقضيها نظرات وبيسلم بس والتانيه عرفته من طريق الفيس واتكلموا شويا صغيريين ومقضينها شات تلميحات من غير مصارحه
وتحت مسمى اصدقاء ... وضحوا وضعكم وبطلوا هبل
لاحظت فاطيما انهم تنحوا وحسوا انهم وضعهم صعب لانهم مش متاكدين من احساس ال بيكلموهم راحت فاطيما مسكت مخدتين وحدفتها ع وشهم راحوا هما كمان حدفوها عليهم وفيشار وقع وقعدوا يهزروا ويتكلموا لغايه الصبح وناموا التلاته جنب بعض ع السرير ...!!
الاجازه ال نزلتها سلمى كانت لا هى ولا فاطيما ولا ماريا بيفتحوا النت وطول الوقت قاعدين مع بعض .. اجازه سلمى كانت اسبوعين ..اسبوع هتقضيه مع اهل باباها ف السنطه واسبوع هتقضيه مع اهل مامتها ف القاهره .... وسافرت سلمى القاهره مع باباها ومامتها ..!!1
فى يوم نزلت فاطيما رايحه محل ملابس بتاع قريبه لمامتها داخله فاطيما من باب المحل ومعاها كيس شيبسى كبير ..
فاطيما: السلام عليكم يا نانى
نانى كانت واقفه مع زبونه بتقيس : وعليكم السلام يا طيما
ثوانى وجايه
راحت قعدت فاطيما ع المكتب وبتاكل كيس الشيبسى .. وشويا نانى راحتلها سلمت عليها : ازيك يا طيما وحشانى
فاطيما: وانتى كمان ..مبتجيش ليه عندنا توحا بتسئل عليكى كتير
نانى: المحل شاغلنى وخصوصا الفتره دى موسم دخول جامعات ودراسه
والكل بيجى يشترى انتى عارفه بقى والبنات هنا مش بيلحقوا
فاطيما: ماشاء الله ربنا يزيد ويبارك.. ها جبتيلى حاجتى
نانى: طبعا بس مش كلها .. فى بنطلونين وجيبه هيجوا كمان اسبوع
انما الطرح والتىشرتات والتونكات كله موجود
راحت نانى ندهت ع بنت معاها تجيب الحاجه من المخزن وجت
فاطيما بتتفرج عليها: جميل .. المهم نفس المقاس ولا
نانى: اكيد .. انا طلبته مخصوص عيب عليكى
قامت فاطيما تقوم تمشى : طيب انا هسيبهم هنا ماما هتعدى عليكى تدهملها
كلمت فاطيما مامتها وقالتلها تستنى ف المحل هى قربت من المكان علشان هيشتروا حاجه مع بعض وهما قاعدين فاطيما فاتحه الكمبيوتر وعماله تحط اغانى لمحل .. لاقت نانى اشترت من محل جنبها
كوكتيل بالايس كريم كبير لفاطيما وفاطيما فرحت اوى .. وقعدوا يتكلموا ..
فى الوقت ال قاعدين يتكلموا كان فى بنت مليانه بس مليانه كتير لفتت نظر فاطيما وشافتها وهى محرجه وماسكه مقاسات صغيره .. وهى قاعده فاطيما لاقت نانى جايه وبتضحك
فاطيما بتشرب عصير : ضحكينى معاكى
نانى بتضحك وماسكه نفسها: شايفه البنت ال هناك دى
فاطيما: مالها
نانى: مش لاقيين ليها مقاس وكل مقاس تمسكه مش هيخش من دراعها
فاطيما بصت لنانى وبعدين بصت ع البنت وشفتها جايه ناحيه نانى ..ف نانى عدلت نفسها
نانى: ايوه ياقمر .. ملقتيش حاجه تعجبك
البنت وهى مكسوفه: لاقيت بس ملقتش المقاس ..انا قالولى انك بتبيعى مقاسات كبيره
نانى بصتلها وبتضحك: اه فى مقاسات كبيره بس مش الكبر دا
البنت : نعم
نانى: اقصد يعنى لو عملتى دايت شويا هتلاقى مقاسات ليكى ..
البنت حست بااهانه وزعلت ومشيت ورجعت نانى لضحك: عاوزه مقاس قدها اجبهولها منين دى وهى داخله شفطت الاكسجين مش كده يا طيما
بصت نانى ع فاطيما لاقتها باصلها بنظره حاده : مالك يا طيما
فاطيما باصه بااستغراب : ايه ال بتقوليه دا ..
انتى بتتريقى عليها وكمان بتحرجيها
نانى: ايه يابنتى مانتى شايفه داخله وماسكه مقاسات اصغر منها بكتير
عاوزه تلبس تخس بدل ماهى هتنفجر كده
فاطيما بنرفزه : ايه ال بتقوليه دا ..انتى مين علشان تحكمى عليها تلبس ايه ولا تعمل ايه مدام هى راضيه ع نفسها يبقى خلاص ... ومغلطتش لما شافت حاجه مش مقاسها مااجرمتش يعنى يا نفسيه
نانى متفاجئه: نفيسه .. نفيسه ايه يا طيما
فاطيما بنرفزه : نفيسه مش اسمك كده ولا انتى اتبريتى منه ..
وبعدين عاوزه اعرف هو انا لما باجى وبتجبيلى هدومى بتعملى كده .. بتتكلموا ورا ضهرى طخينه وكده يعنى
نانى : لالالا طبعا انتى هتجيبى نفسك ليها ليه
انتى مش تخينه لدرجه انتى مليانه ..انما هى ...
قامت فاطيما قاطعتها : هى انسانه وليها حق تعيش وتلبس وتاكل وتشرب براحتها مدام مبتلغطش يبقى خلاص .. انتى او غيرك مين .. قبل ما تشوفى عيوب الناس وتعملوا نفسكم ملايكه بصى لنفسك مغيره اسمك ومخلياه اسرار حرب علشان مش عاجبك .. وبتتكلمى بلهجه اهل القاهره
علشان يقولوا انك منها وبتقولى دايما انك اصلا كنتى عايشه ف القاهره وانتى بتروحيها زياره و هى القاهره والسنطه دول ايه محافظتين فى بلد واحد ولا ف قارتين
نانى لاحظت عصبيه فاطيما: اهدى انا مقصدش حاجه
فاطيما بتزقها : جتكم الارف مليتوا البلد .. ع فكره لو دى معاملتك مع الناس
تبتسمى ف وشهم وتضحكى عليهم ف ضهرهم ..دا نفاق وعقابه كبير عند ربنا اتقى الله ف معاملتك مع زباينك والناس علشان ربنا يكرمك يا نفيسه
نانى: مش هتستنى مامتك
فاطيما:لا يادوب الحق الطياره سلام
مشيت فاطيما وهى مضايقه من الموقف ال حصل قدامها .. وكلمت ماريا لاقتها ف الكنيسه فراحتلها ع هناك ... كان الحارس واقف قدام الباب
فاطيما باابتسامه: مساء الخير يا مقدس
مينا: مساء الخير يا طيما ..عامله ايه
فاطيما: الحمد الله .. ممكن تندهلى ميمى
مينا: ادخليلها هى ف مبنى دار الايتام
فاطيما : اوك...عاوز حاجه
مينا: سلامتك يا بنتى
دخلت فاطيما وراحت تدور ع ماريا وكانت الصدمه ..ماريا واقفه مع عماد بيتكلموا فاطيما وقفت تنحت ليها ..شافتها ماريا واستئذنت عماد وراحت لفاطيما
ماريا: فاطيما
فاطيما بعد ما كانت متكدره ابتسمت: نطق ولا ايه ..قوليلى نطق ها
ماريا شدتها وخرجت بره ف الطرقه: وطى صوتك هتفضحينى
فاطيما: احكيلى حصل ايه كل حاجه
ماريا : اصبرى هخلص حاجه ونخرج مع بعض
فاطيما شدتها: هتسبينى وتروحيله ..ها ..ماشيه معاكى
ماريا خبطتها: وطى صوتك يا مصيبه هيسمع
فاطيما قفلت بوقها: خلاص متتاخريش طيب
دخلت ماريا الفصل وبصت فاطيما عليها من الشباك وشايفه ماريا وهى عنيها بتلمه وهى بتتكلم مع عماد
وشويا خرجت ماريا وبتدور ع فاطيما ..لاقتها واقفه بتبص ع عماد من الشباك ومبتسمه راحت ناحيتها لاقت ان عماد شافها راحت فاطيما هزت راسها وعملت باى ليه ..راحت ماريا شدتها : بتعملى ايه
فاطيما: دا طلع حاجه حلوه غير وصفك يابت
ماريا شدتها : يلا بينا يا مصيبه اخر الزمن ليا
خرجت ماريا وفاطيما من الكنيسه وماشين ف الشارع ..فاطيما: احكيلى كل حرف ايه حصل
ماريا مبتسمه: انهارده كان ف نشاط انتى عارفه انى متطوعه ف الكنيسه لدار الايتام ولمساعده المساكين و..
فاطيما: عارفه انك بتعملى كل دا علشان ربنا فى الاول وعلشان يسهلك امورك مع عماد وتتكلمى معاه لانه هو كمان موجود فى الاماكن دى .. انجزى ايه حصل انهارده
ماريا: كنت موجوده وكان فى بنت معايا المفروض كانت تروح الفصل دا تراعى الاطفال مع عماد البنت اعتذرت وطلبوا منى اروح وروحت واتفاجئت بقى لما شفته
فاطيما بسعاده: كملى
ماريا: قلبى دق بطريقه مكنتش قادره وخطواتى لاقيتها بطيئه اوى مش قادره اسرع لاقته قرب منى وبيقولى ..انسه ماريا تنحت وقلتله ايوه انا ... راح قالى فرصه سعيده اننا مع بعض انهارده ..انا كنت عاوزه اقوله يخربيتك انا كنت مستنيه الفرصه دى من اول ما شوفتك .. راح معايا عرفنى حاجات وقعدنا نتكلم وعرفنى بنفسه انه اخر سنه كليه تجاره طنطا ومبسوط انه هنا واتكلمنا
فاطيما: وانتى قولتى ايه
ماريا بصت لفاطيما: متكلمتش ..مكنتش قادره اتكلم اصلا .. فضلت ساكته واسمعه لغايه ما جيتى انتى وبس
فاطيما خبطت ماريا ف دراعها: يا موكوسه ربنا بعتلك فرصه استغليها
كنتى اتلككى باى حاجه ..
ماريا: معرفش بقى ..انا مكنتش عامله حسابى فى ان دا يحصل
فاطيما: انا كنت جايلك مش طايقه نفسى ال شوفته دا روقتننى
ماريا: ليه ايه حصل .. ملقتيش هدومك عند نانى
فاطيما: يحرق نانى وهدوم نانى ومحل نانى
ماريا: مالك ايه حصل
فاطيما: ال حصل ..
وحكت فاطيما لماريا ال حصل لغايه ما وصلوا البيت وكلمت فاطيما مامتها عرفتها انها قاعده مع ماريا ..!!!
شويا ونزلت فاطيما راحت ع البيت وفتحت النت ودخلت الجروب ومن غيظها من الموقف كتبته وحكت ال حصل ..تشارك فيه مع اصحابها وتسمع ارئهم ايه ..وفعلا ابدا الناس يتفاعلوا مع فاطيما وكان فاتح موجود خالد وماريا ومعتز وسلمى واتنين من اصحابهم
خالد: بس انتى مش حاسه انك اوفر يا طيما يعنى بتتكلمى كده مع واحده اكبر منك
فاطيما: لا مش اوفر وهى اصلا مش كبيره اوى عنى دى اخر العشرينات
وبعدين انا اعرف ان الادب ملوش علاقه بالسن .. يعنى هى لو بتحترم غيرها وشعورهم وبتقدرهم وسنها صغير هتبقى كبيره قدام نفسها وقدام غيرها.. انما تصرفها دا صغرها اووى ... دا ابن بتاع الخضار ال ف ابتدائى اعقل منها
سلمى: طيما ياجماعه مع المساواه الاجتماعيه والفكريه
طيما: انتى بتتريقى يا سلمى
سلمى: لا والله مااقصد بس بوضح لناس انك مبتحبيش التعالى والفشخره
واننا كلنا واحد
فاطيما: احنا كلنا واحد ومخلوقيين تكوينها الخارجى واحد..مقسموم راجل وست بنفس عدد الصوابع والارجل وفتاحات المناخير .. يعنى ربنا مميزش حد عن حد..هتتكلموا عن الجمال ..هقولكم دا نسبى يختلف من واحد لتانى ومن رؤيه ال حواليه ليه ولغيره.. انما التعامل بين البنادمين قاعدته معروفه ..الاحترام والتقدير وقبلهم الانسانيه.. مش نقلل من شخص علشان نضحك او احس انى احسن منه... الله اعلم بكل واحد بال فيه..
يعنى مثلا البنت ال شوفتها انهارده دى ..حد عارف ظروفها ايه مش يمكن هى جسمها كده علشان مرض..او مشكله فى جسمها او حالتها النفسيه او او او |.. مفكرش ف كده واستسهل واتريق عليها.. لا دى مش من اخلاق بنادمين ربنا خلقه وكرمه عن الحيونات
احمد: والله معاكى حق يا طيما ..احنا بقينا نتعامل مع بعض باثبات انى احسن منكمش اخليك احسن منى ونتطور مع بعض ونحسن من اخلاق بعض
فاطيما: مشكلتنا حبنا لنفسنا ... حب لااخيك ما تحبه لنفسك
يعنى لو عاوز حد يحترمك ..يبقى احترمه عاوز حد يقدرك..قدره ... عاوز حد ميتريقش عليك ..مبتدش انت بالتريقه وتقلل منه علشان ضحكه تبقى سبب فى وجع لشخص تانى ... انسانيتنا فى خطر والله بتنقرض زى الديناصورات
سلمى لاحظت اسلوب فاطيما وانها متعصبه : خلاص يا طيما حصل خير
واعتقد ان نانى ولا هتفكر تعمل كده تانى وهتفكر كويس
فاطيما: وهو انا هسيبها لو كررت كده تانى انا هظبتها
قعدوا يتكلموا خرجوا عن الموضوع وفاطيما لاحظت الايكات ع الكومنتات بتاعتها وكان معتز موجود بيعمل لايك من غير مشاركه
فراحت كتبت بوست : اولا نرحب بالعضو الجديد هى متاخره بس للاسباب شخصيه وانى مكنتش بدخل غير قليل وحاليا ربنا فرجها عليا وهكون موجوده ع طول .. واحب اقول لحضرتك عرفنا بنفسك اححنا هنا كلنا عارفين بعض ومتتكسفش احنا زى اخواتك برضه هههههههه ولا انت داخل تتفرج وتعمل لايكات بس لو كده عندك مليون جروب بره وبيدجات بتعشق الايكات روح هناك احنا هنا لمتفاعلين فقط نرغى علشان نخرج كبتنا ف بعض ومبنحبش نحس اننا متراقبين اتفضل استاذ معتز معاك الكيبورد ..
B| خالد: ههههههههههههههه يخرب عقلك يا طيما براحه ع الواد دا جديد وميعرفكيش
:vفاطيما: هههههههه اهو عرفنى
:Dمعتز: اولا شكرا ليكى ع قبولكم ليا معاكم .. وانا مش داخل اتفرج ع فكره
الحكايه انى محبتش ادخل ف كلام بينكم واحنا منعرفش بعض كويس
:Dفاطيما: ماهو لما تتفاعل وتكتب رائيك وترد معانا هنعرف بعض ..اغلب ال هنا منعرفش بعض شخصيا لكن بنتجمع هنا وبنرغى مع بعض فدا الطبيعى .. انطلق وسلمها لربنا
;)معتز: هههههههه اوك.. معتز اخر سنه كليه تجاره مع خالد من القاهره :)
فاطيما : يا اهلا وسهلا بك معانا :D لو حابب تتعرف ع الموجودين ف الجروب فى بوست كان موجود بيتجدد فيه بيانات ع الاعضاء الموجودين
هما اه مش كتار بس احنا مبسوطين بعددنا واهلا بيك (Y)
معتز: شكرا :D
ومره واحده فاطيما اختفت هى وماريا كلمتهم سلمى وعرفت ان النور قطع
وعرفت الموجودين وكملوا هما كلام>>>
ف الوقت ال اختفت فيه فاطيما ..خالد كلم معتز خاص
خالد: زيزو
معتز: ايوه
خالد: متضايقش من فاطيما هى صريحه كده واسلوبها كده مبتجاملش :D
معتز : ههههههه لا بالعكس شخصيتها حلوه اوى وانا مضايقتش (Y)
خالد: ان شاء الله لما هتتفاعل معانا وهتدخل ف المود معانا هتعرفها اكتر (Y)
معتز: ان شاء الله ..انا قايم اشرب سيجاره ف البلكونه وراجع
خالد: اوك (Y)
قام معتز يشرب سيجاره وسرح شويا ورجع فتح الجروب وراجع كلام فاطيما وع وشه ابتسامه ...!!!
_________________
يتبع
ليست هناك تعليقات:
إرسال تعليق