مقدر فى السماء (16) الاخيره

(16) والاخيره <3 

مشيت رقيه وكل مره تتفاجئ بمنظر الورد وطلعت دخلت مكتبها لاقت كميه ورد وجمله مكتوب ع الارض
**Welcome My beautiful smile **
من المفاجاءه رقيه مش مصدقه بصت لهيثم : ايه كل دا
هيثم مسك ايدها وباسها : دا اقل حاجه ممكن اعملها ليكى
رقيه اتحرجت : لا مش اوى كده هتغر ولا هتاخد شغل ولا حاجه
هيثم ضحك: براحتك يا باشا الشركه شركتك داانا كنت مستنى اليوم دا من زماااان
رقيه بتضحك: انت كنت بتخطط تخطفنى هنا ولا ايه
هيثم : بصراحه اه
رقيه: اهو جيت اهو بس بجد كتير كل دا
هيثم: التشريفه بقى .. المهم دا مكتبك تعالى اوريكى مكتبى
اخد هيثم رقيه وراح ع مكتبه ودخلوا المكتب
هيثم: دا مكتبى المتواضع
رقيه: كل دا متواضع اومال لو كان فاخر كنت هتقول ايه
هيثم بتناكه: دى اقل حاجه عندى
ف الوقت دا دخلت هديل ..
هيثم: اعرفك بمساعدتى وصديقتى واقرب الناس ليا هنا هديل
رقيه باابتسامه : اهلا بيكى رقيه
هيثم جاله موبيل راح يرد عليه بعيد شويا :
هديل شافت رقيه لاقتها عاديه جدااا غير ما تخيلت خالص بنت عاديه ومليانه غير مقايييس هيثم ف البنات
هديل باابتسامه: اخيرا شوفتك داانا كنت متشوقه اشوفك جدا
رقيه باابتسامه: تلاقى هيثم كان بيجيب ف سيرته
هديل باابتسامه: هيثم مكنش فاضى غير لروكا
رقيه بتضحك: هو هيثم كده بيحب يكبر الحاجات المهم انا معاكم هنا واتمنى تساعدينى زى ما بتساعدى هيثم
هديل: ان شاء الله
هيثم رجع :يلا بينا نتغدى بقى
رقيه: يلا انا جوعت فعلا.. يلا يا هديل
هديل بسرعه: لا شكرا انا ورايا شغل مره تانيه
هيثم : يلا يا رقيه علشان اوريكى الشقه ال هتقعدى فيها مش بعيده جنب الشركه
__________________________
فى يوم مهاب ف شركته قاعده السكرتيره دخلت
السكرتيره: مستر مهاب ..مدام نهله بره
مهاب بفرحه: خليها تدخل بسرعه
دخلت نهله : بيبوو
مهاب: ايه المفاجاءه الحلوه دى
نهله: قلت اجى اباركلك ع شركتك معانها متاخره كتيرر
مهاب:نورتى يا نونو .. عمار وعمر عامالين ايه
مهاب: عمار مشغول جداا انا جيت لوحدى انا وعمر وسيبته مع ماما وجيت انا انفع
مهاب بيضحك: نورتينى طبعا
نهله بتبص حواليها ع المكتب شافت الورد والزرع: ايه دا انت عملت حديقه ف مكتبك ولا ايه
مهاب بيبص ع الزرع والورد: حاجه تغيرلى المود وتغيير بذمتك مش حلويين
نهله: فكرتنى برقيه ..دا لما شوفت الحديقه ال ف البيت زعلت ع منظرها الجناينى الجديد مش عارف يظبطها
تحس ان الارض زعلانه ع مشيان رقيه
مهاب سكت .. نهله: بيبو عاوزاك ف حاجه
مهاب : خير
نهله:فى واحده صاحبتى عاوزاها ...
مهاب قاطع نهله : متكمليش يا نهله انا عارف انتى عاوزه ايه
نهله اتحرجت : مهاب اصل بصراحه انت بتظلم نفسك كده بتضيع احلى سنين ف عمرك كله شغل شغل فين حياتك مش عاوز تبقى بابا ولا ايه
مهاب : انا مش لسه هضيع انا ضيعت اجمل سنه ف عمرى وبايدى
وغير كده انا مبسوط ومرتاح مشتكتش لحد
نهله : ماهو يا مهاب لازم تقابل غير رقيه وتشوف غيرها رقيه مش اخر واحده
مهاب قام واتمشى ناحيه الزرع وبيلمس الورد : رقيه مش واحده عاديه بالنسبالى ..رقيه علمتنى يعنى ايه اعيش صح .. افكر ف غيرى قبل ما افكر ف نفسى احط مشاعر غيرى ف الاعتبار لان جرح المشاعر صعب جدااا ... رقيه عملتنى ازاى احلم واصمم احقق حلمى يبقى واقع علمتنى ابص قدامى وامشى ع طول ومبصش ع ال فات ..خلتنى بعدت عن حاجات غلط كتير شرب وسهر عرفتنى مغزى الحاجات فى جواه مش شكلها ..المضمون .. رقيه عرفتنى يعنى ايه حب ويعنى ايه الم الحب
نهله شايفه مهاب متاثر اوى وهو بيتكلم: طيب محاولتش تانى ترجعوا
مهاب رجع قعد : كل محاولاتى فشلت رقيه رافضه حتى تشوفنى مش ترجعلى انا جرحت رقيه اووى وخيبت ظنها فيا ومش سهل تغفرلى
انا احترمت رغبتها ومش هقربلها تانى مش عاوز اجرحها اكتر ماهى مجروحه منى
نهله: يعنى هتفضل كده يا مهاب عايش ع ذكريات
مهاب باابتسامه: هفضل كده لغايه ما الاقى ال تنسينى رقيه دى لو عرفت
وانا الحمد الله راضى بال ربنا كاتبه
قعدت نهله شويا مع مهاب ومشيت رجعت البيت وحكت لمامتها ع ال حصل وسلموا امرهم لله ..!!
_________________________________
مرت سنتين ع سفر رقيه وشغلها مع هيثم و ابتدا مهاب يركز ع شغله ورقيه ابتدت الشغل مع هيثم وكانت ع اتصال دايم مع اهلها بس مش كانت بتنزل تزورهم كانت بتتللك بانشغالها والسبب الحقيقى مش عاوزه تصادف مهاب
وكان يوم رقيه مع هيثم طول اليوم لدرجه انهم افتكروا رقيه حبيببه هيثم وطلع اشاعه انها خطيبته
فى يوم رقيه فى المكتب دخلت ليها هديل
رقيه: ايه يا بنتى مش عارفه اقعد معاكى انتى بتتجنبينى فى حاجه
هديل: لا ابدا بس زى مانتى شايفه شغل وكده
رقيه: طيب اقعدى نشرب كوبايتين شاى بنعناع كده
قعدت رقيه مع هديل ... هديل باصه ف وش رقيه ومبتسمه ورقيه لاحظت
رقيه بتضحك: لدراجاتى انا حلوه ولا ايه
هديل : تعرفى يارقيه انتى فعلا ال يقرب منك يحبك من يوم ما جيتى والكل حبك لما اتعامل معاكى انا كنت دايما بسأل سبب حب هيثم ليكى ايه
رقيه بتضحك: حب حب ايه ..انا علاقتى مع هيثم صداقه بس متعمقه شويا
هديل : ولا علشان انتم اصحاب جرح واحد
رقيه بتضحك نص ضحكه: مفيش جرح شبه جرح .. ف شخص بيتحمل وف شخص بينهار
هديل: بس بجد مبسوط انك جيتى هيثم الضحكه مش بتغيب عن وشه بفضلك
رقيه بتلقائيه: هيثم دا مفيش زيه جدع اووى واقرب حد ليا بجد ربنا يخليه ليا
هديل ابتسمت نص ابتسامه وبتبص لرقيه : طيب انا هقوم ورايا شغل
هتيجى تشوفى القاعه بتاعه الحفله
رقيه: اها وراكى ارد ع الايميلاات دى
خرجت هديل وبعد شويا الباب خبط .. رقيه: اتفضل
لاقت هيثم داخل وف ايده علبه بيتزا : الاورد وصل يا فندم
رقيه بتضحك: جيت ف وقتك انا جعانه جدااا ومفيش وقت اخرج بره
هيثم مد ايده: البقشيش لو سمحت
رقيه بتبص ف عين هيثم عن قرب وبتقرب منه: انا تاخد منى بقشيش
هيثم ارتبك والعلبه وقعت.. رقيه بتضحك: مش قد حاجه متعملهاش
جابت العلبه وفتحتها وبصت لهيثم لاقته واقف مكانه: هيثم هااااااى
هيثم فاق: ها .. ايوه ايوه
رقيه : تعالى يلا تاكل علشان هنروح نشوف القاعه
هيثم: تمام
قعد هيثم وارتبك اوى وقلبه دق اووى ومبينش حاجه ..خلصوا اكل واخدها هيثم راحوا ع مكان حفله يشوفوا القاعه علشان يبتدوا يشتغلوا فيها
دخل هيثم ورقيه القاعه وابتدا يشتغلوا ويشرفوا ع الترتيبات ...هيثم عينه منزلتش عن رقيه وهديل عنيها منزلتش على هيثم ولا رقيه ورقيه مركزه ف شغلها ..
هيثم: براحه مش كده ياعم المدير ال يشوفك اول ماجيتى كنتى بتتلغبطى بين انواع الحاجات واخرك الورد والزرع دلواقتى دخلتى ع شغلى الاضاءه والديكور
رقيه بتضحك وبتغمز ل هيثم: احم احم .. الفضل ليك يا ثومى
هيثم: اتعلموا بقى وخدوا خبرتنا واطلعوا برا انا عارفكم
رقيه بتبص لهيثم: انا اسيبك لا ابدا ولا فكرت فيها ولا هعملها
هيثم: بجد يارقيه
رقيه : بجد يا ثومى يلا شوف شغلنا
رقيه وهى ماشيه كانت هتتكعبل وهتقع مسكها هيثم ولحقها مسكها وضمها عليه ..رقيه اتحرجت وهيثم نسى نفسه لثوانى ..الكل كان بيتفرج منهم هديل رقيه بطريقه لطيفه خبطت هيثم ع كتفه: كنت عاوز توقعنى ماشى
هيثم فاق وضحك: ها هاهاهاهاا احسن
ضحكت رقيه وعدا الموقف بالرغم انها اتوترت .. هديل وهى واقفه وشافت الموقف دا سمعت اتنين من ال شغالين ف القاعه : واضح جداا ان بينهم حاجه يبقى هيعلنوا خطوبتهم قريب
هديل : كل واحد يشوف شغله وبلاش رغى اتفضلوا
خلص اليوم وهما بيوضبوا القاعه لحفله شركتهم راحت رقيه قعدت بره ع ديسك قرب القاعه شافها هيثم جاب اتنين حاجه ساقعه وراح ناحيتها ..هيثم: بخ
رقيه بتضحك: مبتخضش خلاص
هيثم ادها الحاجه الساقعه: اتفضلى ياست روكى
رقيه: ميرسى يا سى ثومى
هيثم بيضحك: حلوه روكى وثومى زى بوجى وطمطم
رقيه بتضحك: لا ياراجل
سكت هيثم ثوانى : رقيه
رقيه : اممم
هيثم: انتى فعلا مش بتفكرى بالارتباط
رقيه سكتت لحظه : والله ياهيثم انا تعبت وقررت مرتبطش ورضيت بنصيبى
اخترت مره بقلبى ومره بعقلى والاتنين منصفونيش واخدت وقت لغايه ماابقى زى ماانت شايف مش عارفه ايه ال مكتوبلى انا سيباها لربنا لانى مش عاوزه اظلم حد تانى معايا الظلم بيوجع اووى يا هيثم
هيثم : يعنى ممكن تفكرى لو لاقيتى ولا هترفضى
رقيه سكتت لحظات : مش عارفه ممكن ومش ممكن وقتها ال يحكم
هيثم : طيب اشربى العصير علشان نقفل القاء وننزل التتر علشان انا فصلت وعاوز انام هفرش هنا
ضحكت رقيه: مجنون وتعملها
هيثم: هعدى عليكى اخدك نروح الحفله مع بعض
رقيه: اتفقنا
روحت رقيه البيت وقبل ما تنام راجعت كلام هيثم ليها ع الارتباط سرحت شويا وطلعت سلسله مهاب بتبص عليها وبعدها نامت تانى يوم كان اجازه ف الشركه وكانت الحفله بتوسع الشركه ووصل هيثم جاب رقيه من بيتها
هيثم: ايوه بقى ادينى ف الفضيات وانا اعيش
رقيه اتكسفت: بطل بقى ياهيثم
فتح هيثم العربيه وركبت رقيه ووصلوا الحفله وكانوا بيستقبلوا ضيوفهم
والكل كان بيمدح ف شغل رقيه ال وصل صيتها لشركات كتير ..
والكل بيبارك وهيثم مبسوط ورقيه والكل بيشكر فيها ومجهودها
هيثم كان واقف مع مجموعه شافته رقيه
رقيه راحت ناحيه هيثم : هيثم
هيثم ببطئ بيبص ع رقيه ..رقيه: مشغول
صاحبه من الواقفين : انتى موظفه جديده ولا ايه
هيثم راح لف دراعه ع كتف رقيه : اعرفك بخطيبتى روكا
رقيه سمعت اتفاجئت وبصت ل هيثم .. هيثم: عصام صاحبى يا روكا
صاحبه عصام : اها ..اهلا بيكى مبرووك
رقيه بتلجلج: ميرسى
هيثم باس خد رقيه : من غير رقيه مش عارف كنت هكمل وهكبر الشركه ازاى
هى ال شجعتنى وخلتنى اوصل لكده بثقتها فيا واخلاصها ليا
عصام : ايووووووه يا ثومى اخيرا متنساش تعزمنا ع الفرح بقى
هيثم: ان شاء الله
مشي صاحب هيثم ورقيه بتبص لهيثم باستغراب: ايه ال عملت دا
هيثم رجع خطوه: قصدك ع انى موصلتهوش
رقيه مسكت خدها: البوسه دى وخطيبتك دى ايه دا
هيثم بيضحك: دا وقته دا هيقولوا اتنين خطاب بيتخانقوا ف يوم حفله شركه بعدين
مشى هيثم راح لضيوفه ورقيه واقفه مش فاهمه حاجه وهديل بتراقب الوضع ..!!
__________________________________
من بعد الحفله رقيه كل ما تتكلم مع هيثم يتهرب منها وكلامه مع صاحبه انتشر والكل اكد ع انهم مخطوبين ..فى يوم كان عيد ميلاد رقيه نزلت الشغل عادى وراحت الشركه دخلت مكتبها لاقت تورته وورد وشيكولاته كتير ..دخلت هديل : كل سنه وانتى طيبه يا روكا
رقيه بفرحه: تسلميلى يارب ايه كل دا
هديل: دا موظفين الشركه والعمال جمعوا وجبولك الحاجات دى هديه
رقيه: بجد ميرسى اووووى اشكرهملى جداااا
بصت رقيه : غريبه هيثم فين اول مره ميعيدش عليا
السنه ال فاتت كان اول واحد
هديل : مش عارفه انا رايحه مكتبى وكل سنه وانتى طيبه يا حبيببتى
خرجت هديل ورقيه فضلت تتصل ع تليفون هيثم مبيردش وبيكنسل
جه وقت الخروج هيثم اتصل عليها وقالها تروحله مكان الحفله ال عملوها قبل كده نزلت رقيه وراحت ودخلت القاعه مش لاقت حاجه بصت ع الحديقه اتفاجئت من ال شايفاه ولاد وبنات صغيريين واقفين معاهم ورد وورقه .. وطريق معمول من الورد مش فاهمه رقيه حاجه واخدت اول ورقه وورقه مكتوب فيها **امشى 5 خطوات قدام **مشيت رقيه وراحت عند الوره التانيه والورقه التانيه **امشى كمان 5 خطوات ** مشيت رقيه راحت عند الورده التالته والورقه التالته ** بصى ع يمينك ** اول ما بصت رقيه شاشه عرض اشتغلت مع العاب ناريه **Happy birth day my lovely smile**
رقيه فرحت اوى بالمشهد دا وفضلت مركزه لاقت ال جه وغمض عنيها
هيثم: قولى مين
رقيه شالت ايه : هيثم ...ايه ال انت عامله دا
هيثم: دا اقل حاجه ليكى انا لو اطول كنت عملتلك اكتر من كده
رقيه مسكت الورد : ميرسى جدااا انا كنت فاكراك هتنسى كنت هزعل
هيثم : مقدرش ..بس المفاجاءه لسه مخلصتش
رقيه بتضحك: ف ايه تانى
هيثم مسك ايد رقيه ومشى شويا وقفها ف النص
ورقيه واقفه شافت يافته كبيره بيفردها هيثم مكتوبه فيها
**will you marry me **
رقيه اتفاجئت : هيثم
هيثم راح عندها وطلع العلبه ال فيها الدبله : تتجوزينى يارقيه
رقيه بتبص ع الدبل فى حاله ذهول : هيثم ..ايه دا
هيثم: الكلام ال سمعتيه يوم الحفله مكنش كدب دا كان ال انا حاسس بيه
انا عاوزك تكونى عيلتى يارقيه ونكمل مع بعض ..انا عارف انها مفاجاءه ليكى بس دا ال انا حاسه اتجاهك انا من بعد تجربتى مع منى مفيش واحده قلبى اتحركلها غيرك ومن وقتها وانا بتمناكى زوجه ليا
رقيه واقفه متصلبه مبتنطقش .. هيثم : رقيه فكرى وخدى قرارك بس انا فعلا محتاجك ف حياتى اكتر وهنبتدى بخطوبه مش هنتجوز دلواقتى لغايه ماانتى تقررى وعاوز تبقى خطيبتى رسمى قدام الدنيا كلها بموافقتك دنيتى هتنور لانك ببساطه نورتيلى سكتى
رقيه متفاجئه مش عارفه ترد على هيثم: هيثم انا ...
هيثم قاطعها: فكرى يارقيه ال فات خلاص صفحه واتقفلت تعالى نبتدى من جديد انا وانتى ...بحببك
رقيه باصه لهيثم ولعلبه الدبله .. هيثم: انا بقولك مش نتجوز ع طول خطوبه مجرد خطوبه خطوه هنشوف هتوصلنا لاايه ..خطوه تحطك ع سكه تشوفى هتمشى فيها ازاى خطوبه مش اكتر دلواقتى .. موافقه
رقيه مش عارفه تعمل ايه : هيثم انا محتاجه فرصه افكر انت فاجئتنى
هيثم : خدى وقتك والدبله معاكى موافقه البسيها مش موافقه رجعهالى وهحترم اختيارك حط هيثم العلبه ف ايد رقيه وجاب تورته : يلا نطفى شمع سنه راحت ونستقبل سنه جايه مع بعض
قامت رقيه طفت الشمع وهيثم مسك ايدها باسها: كل سنه وانتى معايا
روحت رقيه البيت وهى متفاجئ لسه ومش عارفه تفكر لا قادره تقول اه ولا قادره تقول لا لهيثم لانه الشخص الوحيد ال حس بيها وبمعانتها ووقف جنبها ف كل الظروف الوحشه وشاركها همومها واقرب شخص ليها ... وهى قاعده فتحت الدرج حطت علبه ال فيها الدبله وبصت لاقت العلبه ال حاطه فيها السلسه بتاعت مهاب مسكتها وفتحتها نزلت من عينها دمعه .....!!!
وفضلت طول اليل تفكر ...
تانى يوم راحت الشركه هيثم اتعامل عادى ورقيه بعد تفكير قالت لهيثم ردها
انها موافقه بس شرط يروح يتقدملها لااهلها ف مصر .. وافق هيثم وسافر ع طول مصر واتقدم لاااهلها ولما عرفوا انها موافقه معترضوش واتفقوا انهم لما يحددوا الفرح اهلها هيجوا يحضروا رجع هيثم ولبس رقيه الدبله وباسها ف راسها : اول خطوه وان شاء الله ربنا يجمعنا ف بيت واحد
المفاجاءه نزلت ع هديل مش مصدقه لكن مبينتش كده واتعاملت عادى وبقت رقيه مخطوبه رسمى لهيثم .. وبقت رقيه تتعامل عادى مع هيثم اتنين مخطوبين وبتحاول تتأقلم مع الوضع الجديد ...!!!
____________________________________
فى يوم هيثم جاله شغل فى مكان سافر اسبوع وكانت رقيه ف الشركه مع هديل رقيه خرجت لشغل فى مكان فى الوقت دا جه مدير اعمال مهاب عاوز من الشركه ينظمولوا حفله وكانت رقيه مش موجوده فااخدت الطلب هديل ولما رجعت رقيه اخدت الطلب وابتدت تنفذ فيه من غير ماتعرف اسم الشركه او صاحبها مين هى ليها شغل يتعمل وخلاص وكان فى مكان بعيد منتجع وراحت رقيه وسابت هديل ف الشركه لغايه ما هيثم ما يرجع
وصلت رقيه المكان واستقبلوها وكانت راحت من بدرى على انها ترجع بليل
نزلت رقيه المكان وابتدت تاخد المقاسات وايه ال محتاجينه ورجعت تانى ...!!
قبل يوم الحفله رقيه كانت بتلبس علشان تنزل تروح تشرف ع التجهيزات وهى واقفه كانت بتدور ع سلسله تلبسها بصت ع سلسله مهاب راحت لبستها ...فراحت رقيه بدرى علشان تشرف ع التحضيرات .. وهى واقفه شافها مهاب وكان بيشبه واتفاجئ اول ما شافها وهى مااخدتش بالها منه لانها مشغوله .. سأل مدير اعماله : هى الشركه دى مين اصحابها
مدير اعماله: يملكها شخص اسمه هيثم بس هو مش كان موجود واتكلمت مع المساعده بتاعته
مهاب بيشاور ع رقيه : ومين دى
مدير اعماله بيبص : اها .. دى خطيبته وشغاله معاه ف الشركه
مهاب كان بقاله كتير مبيسمعش اى اخبار عن رقيه اتفاجئ لما سمع ان رقيه اتخطبت ل هيثم راح براحه يقرب من رقيه وهى عماله تشرف وتشيل وتحط وقف يبص عليها هى :هى رقيه متغيرتش من سنتين ال اتغير انها اشتغلت وباين ع وشها الجديه ... رقيه وهى بترجع تبص ع الاضاءه بضهرها اتخبطت ف مهاب ...رقيه بتبص : سورى...مهاب
مهاب باابتسامه: ازيك يا رقيه
رقيه اتفاجئت واتصلبت مكانها وحاولت متبينش : الحمد الله
مهاب بسرعه: انا مش جاى علشانك الحفله دى تخص شركتى واتفاجئت بيكى زى ماانتى متفاجئه بيا
رقيه ماسكه ملف ف ايديها مهاب شاف الدبله: مبرووك ع الخطوبه
نزلت رقيه ايدها بسرعه: شكرا ..بعد اذنك عندى شغل
مشيت رقيه ومدير اعماله بيبص لمهاب: تعرفها
مهاب باابتسامه: اعرفها اكتر من نفسى ..
مهاب بيبتسم وبيبص ع رقيه وهى ماشيه ورقيه اول مره تشوف مهاب من سنتين وكانت بتتعمد متنزلش مصر علشان متصادفهوش حاولت تتمالك وتبان عادى مش عاوزه تبينله ضعفها ويشوف ازاى بقت جامده ...!!!

مهاب فضل يراقب رقيه وهى شغاله وفرح بيها جدااا انها بقت ست عمليه اتغيرت عن رقيه بتاعت زمان لكن احساسه اتجاها متغيرش وقلبه دق لما شافها .. حاولت رقيه تخلص بدرى وتمشى مش عاوزه تصادف مهاب وتتكلم معاه دخل اليل ورقيه شغاله تظبط الاضاءه واقفه ع سلم ..النور قطع فى المكان كله بتطلع موابيلها وقع وكان فى حد معدى خبط السلم وقعت لاقت نفسها ف حضن حد وكان مهاب .. كان مهاب مراقبها من بعيد واول النور ما قطع قرب منها وبنور التليفون شافها ولاحقها قبل ما تقع ع الارض وهى فى حضن مهاب حست بدقات قلبه وقلبها دق بعدت نفسها عنه لما شافته: شكرا
مهاب : مفيش شكر بين الاقارب
رقيه : احنا هنا مش قرايب احنا هنا شغل
راحت رقيه تسأل ع النور ايه حصل لاقت ان قدام القاعه حصل ماس ف الكابل وعمل قفله ف المكان كله وصعب حد يخرج دلواقتى وابتدوا يصلحوا فيه ...
وشغلوا شموع تنور لغايه ما يصلحوا العطل ..قاعده رقيه مش عارفه تروح فين ولا تعمل ايه طلعت موابيلها وشغلت اغانى وحطت سمعات الهاند فرى حاجه تشغلها عن توترها وهى حاطه السماعات مهاب قرب منها وجاب كرسى وقعد وراها رقيه حست بيه شغلت اغنيه ومهاب ابتدى يتكلم :
انا عارفه انك ممكن تكونى مش سامعه من الاغانى بس انا عاوز اقولك حاجه
انا مبسوط جدا انى شوفتك بالصدفه كده القدر بيجمعنا من غير ترتيب معانى كنت هموت واشوفك حتى لو ثوانى لكنى حافظت ع وعدى ليكى
ومقربتش ليكى وبعدت زى ماانتى قررتى وبعدتى ...مبسوط انى شايف نجحتى تتغلبى ع احساسك وتعيشى ع اد ما كنت عاوز اطمن عليكى كنت بمنع نفسى علشان مش اضايقك كنت بحلم اقعد بقرب منك كده ..احس بنفسك ..المس ايدك حتى لو بالسلام .. رقيه ... وحشتينى جداااا مفتقدك لدرجه متتوصفش .. بعد ما سبتينى مش عارف اعيش دايما حاسس بانى مفتقد حاجه كبيره ال هى انتى .. لما باكل او بشرب او بتفرج ع التليفزيون
دايما بفتكر الحظات دى ومش نسيتها .. انا عمرى ما نسيتك وكل كلمه وتصرف عملته معاكى مش كنت بكدب كان قلبى ال بيقولى اعمل كده
رقيه انا عارف انى ظلمتك وجرحتك لكن انتى كمان جرحتينى وظلمتينى لما مصدقتنيش رقيه انا عارف انتى اتصرفتى ليه كدهسواء جوزتك ال بسرعه ورفضك ترجعيلى وسفرك كنتى بتهربى مش بارادتك كان غصب عنك
اسف انى وصلتك لمرحله دى ..اسف انى جرحتك ووجعتك لدرجه انك اخدتى قرراتك ضرتك اسف انى كنت السبب ف كل ال حصلك
.. وقت ما كنتى معايا كنت عاوز اقولك بحبك .. ودلواقتى هقولك بحبك
لان مهما طال بيا العمر هفضل احبك لانك الوحيده ال قلبى دق ليها وحس بيها ومحتاجلها بحبك يا رقيه .. ومش هقولك ارجعيلى معان امنيه حياتى ترجعيلى ترجعيلى روحى وحياتى
رقيه ف الوقت دا كانت سامعه كل كلام مهاب لانها مشغلتش اغنيه وهى بتسمع الكلام دموع نزلت من عنيها وبتتمالك نفسا ومش بيتين حاجه
قام مهاب وقف بره وتليفون رقيه رن وكان هيثم وصل لمكان ورقيه وصفتله دخل عرف هيثم ان الحفله لشركه مهاب والنور اشتغل وبان ف عين مهاب انه كان بيدمع ..مهاب قرب لهيثم : رب صدفه يا هيثم
هيثم مسك ايد رقيه : اتمنى شغلنا يكون عجبك
مهاب بص ع هيثم وماسك ايد رقيه : كويس جدااا وذوق رقيه معروف
هيثم اضايق انه شاف مهاب وحس بايد رقيه بتنتفض : كويس انك لحقتنا لو كانت حفلتك متاخره كنا مش هنلحق نعملهالك لاننا هنجهز لفرحنا قريب
مهاب سمع الكلمه وتمالك نفسه : مبررروك ..مبررووك يا رقيه
رقيه بتتمالك نفسها هزت راسها .. هيثم: يلا يا روكا
رقيه بصت لهيثم: يلا
مشيت رقيه وهيثم ماسك ايدها ومهاب باصص عليها وهما ماشين
ولاحظ مكان رقيه السلسله وقعت مسكها عرف انها ال جابها ليها وعرف ان رقيه احتفظت بيها مش رمتها ...ركبت رقيه العربيه وحاولت تتمالك نفسها وهيثم حس انها اتغيرت ...هيثم: رقيه مالك مهاب ضايقك ف حاجه
رقيه: ها .. لالالا مفيش بس عاوزه اروح حاسه بتعب
هيثم : تمام هنوصل اهو
هيثم لاحظ تغيير ع رقيه وانها ماسكه دموعها بالعافيه وصلت البيت نزلت بسرعه وطلعت ودخلت بابا الشقهوقفلته وقعدت ع الارض وفتحت ف العياط ..
دخلت تنام ع السرير وافتكرت كلام مهاب واتاثرت بيه اوى وبصت ع دبله هيثم وحطت ايدها ع قلبها ,,,!!!
__________________________________
تانى يوم الحفله راحت رقيه مع هيثم الحفله يشرفوا ع التجهيزات الاخيره
هيثم كان ف مكان ورقيه ف مكان ورقيه واقفه لاقت حد مسكها من ايديها وبيشدها لبيعيد وكان مهاب .. رقيه : ايه دا فى ايه
مهاب : رقيه لازم نتكلم
رقيه بعصبيه: نتكلم ف ايه ف الشغل مش لازم تشدنى كده و ..
قاطعها مهاب : السلسله دى كانت معاكى امبارح
رقيه بصت ع السلسله وافتكرت انها كانت لابساها : لا
مهاب : لا هى ووقعت منك
رقيه بتبص لمهاب: فرضا لو هى ايه المشكله
مهاب : مفيش مشاكل بس سؤال انتى ليه متخصلتيش منها
رقيه معرفتش ترد واتلجلجت: نسيت
مهاب : نسيتى 3 سنين تتخلصى منها وبتلبسيها كمان
رقيه بتمشى مهاب شدها بقت قريبه منه ف حضنه.. مهاب: ليه يارقيه احتفظتى بالسلسله ومتخلصتيش منها علشان انتى منستنيش ولسه بتحبينى ومكرهتنيش زى ما كنتى بتقولى
رقيه اتوترت وبتزق نفسها من حضن مهاب .. رقيه: ممكن تبعد ايدك عنى
مهاب بيقرب من رقيه : انتى بتحبينى صح ومقدرتيش تنسينى وكنتى بتقاوحى
رقيه بصت ف عين مهاب: لا نسيتك
مهاب بيقرب اكتر : قولى مش بتحبينى وكرهتينى
رقيه مش عارفه تنطق وبتتمالك نفسها ولسه هتنطق راح مهاب قرب منها وباسها رقيه اتفاجئت اتصلبت مكانها متحركتش ولا زقته وبعد ما استوعبت راحت زقته ... رقيه بعصبيه : انت مجنون ايه ال عملته دا ..
مهاب بيبص لرقيه: بتحبينى يارقيه زى ماانا بحبك
رقيه مشيت بسرعه تهرب من المكان ومهاب واقف وع وشه ابتسامه وبيقول: بتحبنى ..بتحبنى
راحت رقيه وقفت متوتره وهيثم شافها: فى حاجه يارقيه
رقيه : ها ..لالا مفيش يلا نشوف شغلنا
اشتغلت الحفله وبرغم انشغال مهاب الا انه كان مراقب رقيه وبيبص عليها ورقيه متوتره وهيثم لاحظ كده .. اخد رقيه ومشى وروحوا البيت وهما ف العربيه قبل ما تطلع شقتها
هيثم: رقيه
رقيه: ايوه
هيثم: ايه رأيك الشهر الجى الفرح
رقيه اتفاجئت: بسرعه كده
هيثم: احنا طولنا اووى وبدل ماانتى قاعده لوحدك وانا لوحدى نبقى مع بعض ع الاقل اطمن
رقيه بتهرب من الاجابه: بعدين ياهيثم نشوف انا تعبانه دلواقتى نتكلم بعدين سلام
هيثم شد ايد رقيه وكان هيبوسها لكن رقيه بالذوق بعدت عنه وخرجت
طلعت رقيه شقتها واخدت دش ومش مجمعه ال حصلها وهجوم مهاب المفاجئ ال كانت مش متوقعاه قلبها دق جامد واتوترت اوى لما افتكرت البوسه ...!!!
__________________________________
فى يوم مهاب راح الشركه يسأل ع رقيه لاقاها بره وهيثم شافه
وقف قدام الشركه ونده ع مهاب .. هيثم: مهاب
مهاب بص : ايوه
هيثم: انا سمعت انك سألت ع رقيه ..خير ف حاجه
مهاب بيضحك: انت ناسى ان رقيه قريبتى
هيثم بيوريله ايده وفيها الدبله: وانت ناسى ان رقيه خطيبتى
مهاب قرب من هيثم: معتقدش انك هتتجوز واحده مش بتحبك قلبها فى مكان تانى
هيثم بعلامات غضب: تقصد ايه
مهاب : اقصد اتاكد الاول انها بتحبك مش انها بتكرر ال عملته قبل كده
ركب مهاب العربيه ومشى وساب هيثم محتار ...شويا ورقيه رجعت الشركه هيثم راح ليها مكتبها ..هيثم: ايه الاخبار خلصتى مشوارك
رقيه: اه تمام
هيثم : مفكرتيش ف ال قلتلك عليه
رقيه عملت نفسها مشغوله: بعدين ياهيثم
هيثم مشى ورقيه اتحطت ف حيره مش عارف تعمل ايه
خرجت رقيه راحت مكتب عند هديل مش لاقتها قعدت تستناها شافت اجنده فتحتها لاقتها مذاكرات هديل فضولها خلالها تقراها لاقت مكتوب فيها ان ها بتحب هيثم وهو مش حاسس بيها وان دا بيعذبها لكن المهم عندها انه يكون سعيد ... حست رقيه بالوجع ف الكلام وازاى انها ماخدتش بالها من هديل ..!!
___________________________
قبل رجوع مهاب المانيا راح استنى رقيه عند بيتها ولما شافها نزل من العربيه ونده عليها ... مهاب: رقيه
رقيه بصت اتفاجئت: مهاب
مهاب طلع من جيبه السلسله: اتفضلى
رقيه بصت ع السلسله: ومدت ايدها خدتها
مهاب : رقيه رجاء متكرريش نفس الغلط قبل كده وتظلمى نفسك وتظلمينى وتظلمى غيرك انا فعلا محتاجك معايا وبندم كل لحظه وانت م معايا ولا نسيتك لحظه كفايه عذاب ليا وليكى واتعلمنا من الدرس واخدت عقابى بحرمانى منك المده دى كلها رقيه أسألى قلبك عاوز ايه هيدلك .. انا طيارتى بكره الساعه 3 لو عند كلامك ومش عاوزانى هحترم دا ومش هتشوفى وشى تانى ابدا ولا هزعجك ...
وقفت رقيه متصلبه راح مهاب قرب منها وباس راسها : تصبحى ع خير
وركب العربيه ومشى وكان هيثم واقف وشاف رد فعل رقيه ودموع ال نزلت من عنيها

تانى يوم ف الشركه رقيه قاعده وماسكه السلسه وبتبص ع الدبله وع الساعه
دخل هيثم عليها المكتب .. هيثم: سرحانه ف ايه
رقيه: ها لا مفيش
هيثم : رقيه
رقيه: ايوه
هيثم قعد : رقيه انتى بتحبى مهاب
رقيه اتصلبت ومعرفتش تتكلم: ايه
هيثم بنص ضحكه: انتى بتحبى مهاب ومحبتيش ولا هتحبى غيره
رقيه ساكته من عارفه تنطق ... هيثم مسك ايد رقيه وقلعها الدبله
هيثم باابتسامه: انتى اغلى حد ف حياتى ووجودك فرق كتير معايا
بس مش علشان انا بحبك تتجبرى تكونى معايا وقلبك ف مكان تانى
انتى مكانك مش هنا يارقيه انتى مكانك زى زمان زى ما اتولدتى واتقدر تكونى لمهاب قدرك انك لمهاب مس لحد تانى ... روحى الحقى قدرك علشان متندميش
رقيه ودموع نازله من عنيها: هيثم
هيثم بيبتسم:انتى بتحبى مهاب و مهاب ال عرفته ندم واخد عقابه ودا فرق بين ال بيغلط ومبيندمش وبيكرر غلطه مهاب غير نفسه علشانك لانك انتى غيرتيه ..وكل دا بيحبك .. انتى زمان كنتى موجوعه من الصدمه
معرفتيش تاخدى قرار .. انما بعد فتره انتى نفسك منستهوش
رقيه بدموع فى عنيها: معرفتش
هيثم : يبقى نلحق الفرصه ال ربنا بعتهالنا احسن ما نندم عليها بعدين
وصدقينى انا مش زعلان لان سعادتك تهمنى وانتى سعادتك مع مهاب
بص هيثم ع الساعه : يادوب تلحقى طياره مهاب .. روحى الحقى عمرك ال جى
رقيه زى ال كانت محتاجه حد يشجعها قامت وقفت بس قبل ما تخرج ادت هيثم اجنده هديل
رقيه : وانت كمان يا هيثم محتاج تتحط ع طريق سعادتك وتشوفها صح
فى الاجنده دى هتساعدك انا واثقه
مشيت رقيه وهيثم فتح الاجنده وابتدا يقرا واتفاجئ بال موجود فيه من كلام هديل ...!!!

خرجت رقيه بسرعه راحت ع المطار وقعدت تدور ع مهاب مش لاقياه سألت ع الطياره عرفت ان معادها عدى وطارت والفرصه ضاعت وهى واقفه لاقت ال حضنها من ضهرها اتخضت ..: كنت واثق انك هتيجى
رقيه : مهاب
مهاب بيلف رقيه وشها ف وشه: كنت واثق قلبك ال بيحبنى صعب يبعد عنى كل دا كنت واثق انك رجعالى تانى لان انتى قدرى ال ربنا كتبهولى
بحبك يا رقيه
حضن مهاب رقيه ورقيه دموعها عماله تنزل : متعملش كده تانى
مهاب وهو حاضن رقيه: استحاله ابعدك عنى تانى
_____________________________
ف الشركه هيثم بيجمع ال حصل انفصاله عن رقيه والمفاجاءه بتاعت هديل ال ملاحظش حاجه مرت ايام وهيثم بيستوعب انفصاله عن رقيه وال قراه ف اجنده هديل قعد يفكر وحس ان الفرص مش بتتكرر وكان سمع ان هديل هتتخطب طلبها ف مكتبه وراحتله قام قعد قدامها ومسك ايدها
هيثم: هديل ممكن طلب
هديل متوتره : خير
هيثم وماسك ايد هديل: ممكن تدينى شويا وقت اراجع نفسى واظبط الدنيا معايا كركبه ال جوايا محتاجه ترتيب علشان عاوز ابتدئ صفحه جديده معاكى من غير ماابص ع ورا ممكن
هديل مش مصدقه رسمت ابتسامه وهزت راسها: وانا هستناك
ابتسم هيثم وهديل وقرر هيثم انه يعيد ترتيب حسابته ويوافق القدر ..!!
__________________________
رجعت رقيه مع مهاب ع الالمانيا واتفاجئ عمها وخالتها بيها وهى داخله معاه البيت وقالولهم انهم هيتجوزوا بعتوا لعمار ونهله وابو رقيه ومامتها وجم ورقيه اتفقت مع مهاب انه كتب كتاب بسيط فى يوم مهاب رجع من الشغل ورقيه كانت تحت ف الحديقه بتعتنى بيها لاقت ال حضنها من ضهرها وهى واقفه : مهاب
مهاب : قلب مهاب ياااااااه الواحد كان مفتقد الاندروفين بشكل
راح لفت رقيه راح مهاب قعد ع ركبه ونص وطلع علبه الدبله ال كان جايبه قبل كده ...مهاب: رقيه .. تتجوزينى
رقيه بتضحك بكسوف: احم احم افكر
مهاب : بسرعه رجلى وجعتنى
رقيه بتضحك : خلاص صعبت عليا موافقه
قام مهاب لبسها الدبله وهى لبسته الدبله راح مهاب مسك ايدها باسها : بكره كتب الكتاب
رقيه بسعاده: ان شاء الله
مهاب : مش هنكتب هنا
رقيه: ليه وهنكتب فين
مهاب: ف الفرح انا مجهز وعامل كل حاجه وف مكان بتحبيه حديقه اون اير ف الهوا الطلق
رقيه: هلبس فستان تانى
مهاب : المرادى غير.. المرادى انا ال اتقدمت وانا ال قررت وانا ال بحبك
رقيه حضنت مهاب : ربنا يخليك ليا
مهاب : ويخليكى ليا يااغلى هديه من ربنا

تانى يوم رقيه لبست فستان مهاب اشتراه وعملت هى طوق من الورد وحطته ع راسها وبوكيه الورد فى ايديها من عمايلها وراحت معاه ع المكان ال فيه الفرح واتفاجئت بالمنظر واتفاجئت اكتر لما شافت هيثم : هيثم
مهاب : هيثم قال هيتكفل بكل الديكور هديه منه ليكى
هيثم باابتسامه: هو انا عندى اغلى من روكى
مهاب : احم احم
هيثم بيضحك: متقلقش مهما حاولت مفيش ف قلبها غيرك
رقيه: هديل معاك
هيثم : هناك اهى ومتقلقيش كله تمام ومش هضيع هديل انا اتعلمت ان القدر صعب تعانده مهما عملت ...
بصت رقيه ع هديل لاقت لااول مره مبتسمه وفرحانه غير لما شافتها فاارتاحت رقيه

كتبوا الكتاب وسمعوا الزغاريط وهيثم مسك المايك فى التجمع دا العريس عاوز يقول حاجه لعروسه ومسك مهاب مايك :
عاوز اقول حاجه والكل الموجودين يشهدوا عليه
مسك المايك وراحه قدام رقيه مسك ايد والايد التانيه المايك: اقسم بالله العظيم بــ انى احبك واعشقك فى كل يوم من حياتى حتى يفرق بنا الموت وانك هتكونى الوحيده فى قلبى وحياتى لانك الوحيده الموجوده ... اقسم انى احبك الى الابد ... وان دموعك وقت ما هتنزل هتبقى من سعاده انتى ال ربنا قدرهالى من يوم ما اتولد اعيش معاها وبيها ..بحــــبك <3
رقيه : بحبـــــــك <3
باس مهاب ايدها وراسها وباسها بوسه بدايه حياتهم الجديده والكل زغرط وصفر وفرحوا باليوم ..!!
بعد 9 اشهر بالظبط ربنا كرم رقيه
رقيه بتصرخ: مهاب الحقنى يامهاب
مهاب مخضوض: هتولدى ولا ايه
رقيه : ع المستشفى بسررررررررعه
راحت رقيه ع المستشفى وربنا كرمهم بتؤام ندى ونور
والمفاجاءه لرقيه انها شافت عبد الله : عبدالله
عبدالله باابتسامه: مبروك يا روكا
رقيه باابتسامه: انا مبسوطه اوى انى شفتك
عبدالله_ انا هنا ف منحه 3 شهور وراجع تانى مصر
رقيه: واخبارك
عبدالله بيطلع صوره ع الموبيل : هشام الصغير اهو
فرحت رقيه اوى بالخبر : ماشاء الله ربنا يباركلك فيه ويسعدك
عبدالله : بالرغم انى محبتش حد قدك بس نصيب واقدار ومقدر لينا كده
رقيه: الحمد الله .. ف الوقت دا دخل مهاب
وعاشوا ف سعاده والحياه ال كانت دايما تتخيلها رقيه والحياه ال افتقدها مهاب
فى يوم رقيه نيمت نور وندى سمعت مهاب بينادى عليها بصوت غريب اتخضت... مهاب: رقيه .الحقينى يارقيه
رقيه مخضوضه: مهاب فى ايه مالك
مهاب بيبص ع رقيه وفاتح دراعه: عندى هبوط حاد فى الاندروفين الحقينى بحضن بسرعه
رقيه ضحكت واترمت فى حضنه : الاندروفين وصل بجرعه مكثفه <3

تمت بحمد الله <3
رأيكم فى القصه ^_^ <3
__________________________
الغرض من كتابتى القصه :D
_ مش دايما اختيار الاهل لشريك الحياه لااولادهم وبناتهم بيبقى صح
_ البنت لما بتحب بجد بتلقائيه وتدى الامان وتتصدم وتنجرح بيبقى صعب تنسى وتسامح الا ف حالات قليله وبتتغير شخصياتها اوقات لااسوء
_مفيش كدب ابيض او اسود علشان تحافظ ع علاقه .. الكدبه مهما استخبت بتيجى يوم وتكتشف وبتنهار العلاقه
_الكدب وجه تانى لخيانه والمصارحه لو بتوجع الكدب بيوجع اكتر فصارح افضل
_فى فرق بين الاعجاب والتعود والحب الفرق بينهم شعره والاختلاط بينهم بيدمر المشاعر
_الحب الحقيقى بيدوم مهما طالت السنين وصعب يتنسى مهما حاولت
_ كلمه بحبك سهله لكن اثباتها صعب واثباتها بيبقى اصدق دليل
_الانانيه وحب الذات بيدمر صاحبها قبل ما يدمر ال حواليه
_ لو محتاج اجابه وقلبك مجاوبش الالم والوجع هيجاوب عليك
_ التسرع فى الارتباط كوسيله هروب لنسيان بتبقى تعذيب ليك وال ارتبطت معاه خد وقتك ورتب مشاعرك والكركبه ال جواك علشان لما تاخد قرار تبقى قده وصح وتتجنب الخطا مره تانيه>>!!
_االشكل الحلو والملامح الجميله مؤقته بتتغير مع السن ومرور الوقت
انما الروح الجميله والكويسه هى ال بتعيش العمر كله <3
_الشخص الصح بيجيلك مره ف العمر ولو ضيعته يبقى انت المسئول
_ القدر صعب نعانده وصعب نهرب منه مهما طال الوقت لان المقدر والمكتوب بيبقى عند علام الغيوب <3