الفراشة الزرقاء (2)

(2)
مر على زواج "سميه" و "احمد" شهور وبعد تعارف "سميه" على "نضال" ساعدتها انها تتعرف على معظم جيرانها فى العماره عن طريق تجمعات نسائيه اسبوعيه فى بيت واحده منهم بعيدا عن ازعاج البيت والاطفال والازواج ,, الجميع استلطف "سميه" واصبحت علاقتهم كويسه ومع اطفالهم .. كانت "سميه" دايما بتشترى شوكولاته وحلويات فى شنطتها لما تقابل طفل اى طفل حتى لو ابن بائع الخضار كانت بتديله منهم وبتفرح لما تشوف فرحتهم بالحلويات  وكانت تعمل كيك فى بيتها وكانت بتلعب معاهم لو حد منهم قعد معاها ودا سبب ان الاطفال كلهم بيحبوا "سميه" اكتر واحده فى العماره   ,, كانت فكره الشغل اتلغت من تفكير "سميه" رغم الحاح "نضال"الدائم  وطلبها تتكلم هى مع "احمد" لكن "سميه" رفضت لانها اقتنعت ان حلمها هو البيت و"احمد" واولادهم وهى مش محتاجه اكتر من كده  ,,لاحظ "احمد" علاقات "سميه" مع جيرانها وبالاخص "نضال" وحب فكره اندماجها فى محيط العماره وارتاح انها نسيت فكره الشغل نهائى  ,, فى يوم "سميه" صحيت بدرى وبتحضر الفطار ل "احمد" موابيلها رن وكانت "نضال" :
_ معقوله منمتش ,, الو يا نضال
_ "سمسم جوزك يتكل ع الله وتعالى انا مستنياكى ضرورى
_ فى حاجه ولا ايه ؟
_ لما تيجى فى حاجه مهمه جدا جدا جدااا يلا هستناكى
 قفلت "سميه" مع "نضال" متعجبه ولاحظ "احمد:
_ فى حاجه ولا ايه ؟
_ لا مفيش "نضال" عاوزانى اروحلها
_ علاقتك بيها بقت اعمق عن ما كنت اتصور اعتقد انتى ضربتى الرقم القياسى فى اسرع واحده تصاحب جارتها بالشكل دا
 ضحكت "سميه": بصراحه بكون مرتاحه معاها حاسه انى اعرفها من زمان واتقابلنا اخيرا ,, احساس حلو انك ترتاح لشخص
_ اها جدا .. لكن خلى بالك
_ اخلى بالى من ايه ؟
_ يعنى انا عارفك طيبه زياده عن الزوم وخدومه زياده عن اللزوم فيعنى متخليش حد يستغلك انتى ليكى بيت زيك زيهم
_ لا لا ,,انا واخده بالى متقلقش
_ طيب تمام ,, انا هنزل وانتى روحى شوفى "نضال" عاوزه ايه ع الصبح كده
 ابتسمت "سميه": ماشى يا حبيبى متتاخرش ع الغدا
_ اكيد
 وصلت "سميه" "احمد" لباب الشقه وباسها ع خدها ورجعت دخلت غرفه نومها غيرت هدوم البيت واتجهت ع شقه "نضال ":
_ خير يا "نضال" قولتيلى عاوزانى "احمد" نزل وانا جيت اهو
 بملامح سعاده : خبر اللى كان نفسى اسمعه سمعته اخيرااا 

_ ايه هتجيبى الغساله الاطباق بدل اللى باظت 

_ ايه تفكير ربات البيوت دا لا طبعا 

_ خير ..؟

_ اخيرا هنزل شغل 

_ لا بجد ..

_  وهو دا ينفع اكدب ,, اه  مش بشهادتى وفى حاجه معرفهاش  بس كبدايه حاجه كويسه وهتعلم منها اكيد حاجه
_ فين الشغل دا ؟
_ هنزل فى شركه مقاولات فى قسم العلاقات العامه
_ علاقات عامه ,, وانتى تعرفى ايه فى العلاقات العامه ؟
_ علاقات عامه هيحتاجو ايه اكتر من لسان كويس والعماره كلها تشهد ان انا السبب انهم عرفوا بعض عن طريقى اتعرفت عليهم كلهم  واسلوب لبق مع العملاء وانتى عارفه مكتبه متنقله قدامك 

ضحكت "سميه": وهو انتى علشان متحدثه العماره يبقى كده متخصصه علاقات عامه
_ تعرفى انتى تشتغلى زى كده وبعدين لو جالى شغل ومن غير ما اجرب اقول مش هعرف يبقى لما يجى اللى اعرفه مش هعرف اشتغله ,, مينفعش اضيع الفرص كده وبقول اهو هتعلم حاجه ع الاقل سواء نفعت ولا فشلت ..
_  مين اللى جبهالك دى ولا انتى كنتى مقدمه  ؟

_" اشرف"
_ جوزك
_ طبعا يا بنتى جوزى من الازواج اللى بيسعوا لسعاده زوجاتهم وهو عارف انى شغفى اشتغل فكان بيدورلى ع حاجه مناسبه لظروفى ,, قال ل ابن خالته من فتره ولسه رادد عليه امبارح قاله اروح اعمل انترفيو اى كلام كده بس واستلم الشغل كمان اسبوع ...!

_ ودى مفرحاكى اوى كده انتى مش خايفه تتبهدلى وانتى نازله مكان مش عارفاه ولا شغل اشتغلتيه قبل كده ؟

_ اخاف ليه حتى لو خوفت دا جزء من فكره الشغل نفسها مكان جديد وناس جديده انا مش رايحه بيت اهلى ,,وبعدين  المجازفه فى حاجه جديده معرفهاش ومع التعود هعرفها والخوف  هيروح  ويختفى وهيجى مكانه حاجه اسمها الخبره والثقه 

_ مش خايفه تغلطى ..؟

_ طبيعى هغلط مين مبيغلطش لغايه ما يتعلم .. وبعدين ايه نبره الاحباط اللى فى صوتك دى  دا بدل ما تفرحيلى وتقومى تاخدينى بالحضن وتشجعينى عماله تحبطى فيا 

_ هههههه لا مقصدش بس بجد بحسدك ع شجاعتك دى ..

_ لو عاوزه تشتغلى "اشرف" قالى انهم كانوا عاوزين ناس تانيه تقدمى واحنا فيها اهو وباب الكوسه مفتوح 

_ لا .. "احمد" مش موافق وانا لغيت الفكره خلاص 

_ خساره يا بنتى والله  ,, فكرى كده الفرص مبتتكررش تانى ..

سكتت "سميه" لحظه : المهم خلينا فيكى .. هتنزلى من امتى ؟

_ بكره  الانتريفيو الكوسه وهستلم من الاسبوع الجى انتى نسيتى 

_ اها افتكرت ,,طيب وولادك هتعملى ايه ؟

_ ماما هتيجى تقعد معايا الفتره الاولانيه لغايه ما اظبط مواعيدى 

_ يعنى كل حاجه مترتبه 

_ اها .. بس بكره هسيب معاكى "سامر "  و "سما" هترجع من المدرسه عليكى ماشى 

_ اوكيه .. 

_ يلا تفطرى ولا تشربى نسكافيه معايا 

_ لا نسكافيه انا فطرت مع "احمد" 

_ ثوانى ..

 قامت "نضال" وكانت "سميه" سعيده ل "نضال" انها بتعمل اللى نفسها فيه ,, جواها احساس اتمنت فى اللحظه دى تكون مكانها وافتكرت "احمد" وابتسمت وقالت لنفسها " كفايه احمد "...! 

تانى يوم بعد ما "احمد" نزل الشغل بعده بساعتين باب الشقه خبط وكانت "نضال",, فتحت الباب "سميه" ومعاها فى ايديها ابن جاره ليهم ضحكت "نضال" لما دخلت الشقه عند "سميه": 

_ هو انا غلطت ودخلت روضه "سميه" 

 ضحكت "سميه": "اميره" مامتها هتعمل عمليه انهارده ومفيش حد يقعد معاهم  

_ كده "سامر " هيبقى  كتير عليكى انا هوديه ل خالتو و 

قاطعتها "سميه": لا خالص انتى شايفاهم اهو  هاديين وبصراحه شاغليين وقتى ماانا مش هعمل حاجه خصوصا بقى لما تشتغلى مش هتكونى فاضيالى ياعم الموظف 

_ ما قولتلك اشتغلى انتى كمان معايا ونبقى رايحين مع بعض وراجعين مع بعض 

_  بطلى زن بقى  ..

_ بس تصدقى مشروع حلو افتحى شقتك حضانه هتكسبى دهب دا كفايه عيال العماره 

ضحكت "سميه": انا قولت من  وقت ما عرفتك ان انا طلاقى على ايدك 

_ اطلقى انتى بس المهم خدى الشقه علشان تعملى مشروعك 

ضحكت " سميه": لسه اقسطها مخلصتش و هاتى "سامر" وغورى يلا الحقى قبل ما يجبو غيرك 

_ هههه ماشى

 خرجت "نضال" وقعدت "سميه" مع الاطفال ,, مر الوقت  وخلصت "نضال" المقابله ورجعت حكت ل "سميه" اللى حصل فى المقابله كلها وكانت سعيده لانها شايفه "نضال" سعيده  ...! 

مر شهور  على شغل "نضال" وكان اغلب الوقت ولادها قاعدين مع "سميه" ومكنش اطفالها هى لوحدها لكن اغلب اطفال العماره اهاليهم بيسيبوهم عند "سميه" ودى كانت حاجه مفرحه "سميه" جداا لكن فى المقابل كان بتضايق "احمد" برغم انه فى الاول كان متقبل وسعيد لانه شايف "سميه" سعيده ب انها بتقعد معاهم وشاغليين وقتها لكن اضايق مع مرور الوقت ,, لحظت "سميه" تغيير "احمد" وحاولت يكون راجع من الشغل يكون البيت فاضى مفيش ولا طفل فى الشقه  لكن مكنتش تعرف ان الفكره نفسها مضيقاه انها بتقعد مع اطفال العماره  ,, ففى يوم كانوا معزومين عند ام "احمد " وهما بياكلو خاله "احمد" فتحت الكلام :

_ ايه يا "احمد" مفيش اخبار كده ولا كده 

_ ربنا يسهل يا خالتو 

_ مش ملاحظ انك طولت انا قولت من بعد ما تتجوز ب 9 شهور هنقولك يا بابا 

 ابتسمت "سميه": مطولناش ولا حاجه احنا بقالنا سنه ونص لسه يعنى 

_ دى "مروه " بنتى اول ما اتجوزت حملت ع طول واهى قربت تولد 

 لحظت "سميه"  سكوت "احمد" :  ربنا يقومها بالسلامه 

 دخلت فى الكلام "ام احمد": عاوزينك بقى يا سمسم تغيرى كده من "مروه" وقبل ماهى تولد تسمعينها خبر حلو ان فى نونو فى الطريق عاوزين عيالكم يملوا البيت ومش 1 ولا 2  لا 3 قولى 4 على قد ما تقدرى
 ضحكت "سميه": لا كده هكون ارنبه
 خاله احمد بخبث : تجيب الاول وبعدين ربنا يسهل 

 اتكلم "احمد" بنبره غضب :  مش لما تفضى باين من كتر قعادها مع ولاد الجيران نسوها نفسها واكتفت بيهم 

 حست "سميه" من طريقته الحاده : مش فاهمه ؟

 بصلها "احمد": لا انتى فاهمه 

 بصوت واطى : مش فاهمه يا ااحمد ؟

 بنفس النبره : لما نروح البيت هبقى افهمك 

خلصوا الاكل ورجعوا على البيت : انا داخل انام تصبحى على خير 

مسكت ايده : مالك يا "احمد" 

_ مفيش 

_ لا فى .. اتكلم مالك هو انا ضايقتك فى حاجه ؟

بصلها "احمد" انتى مش ملاحظه انك بتعملى حاجه تضايق 

سكتت لحظات : مش فاهمه ؟؟

 بنبره عصبيه : الحضانه اللى انتى فاتحاها للعماره هنا فى الشقه 

_ حضانه ..؟

_ ايوه حضانه لما كل واحده تتزنق فى مشوار تسيب ولادها معاكى عاوزه تقعد مع نفسها تبعتلك ولادها  وانتى على طول موافقه ,, "نضال" من وقت ما اشتغلت وانتى ع طول مع ولادها هو انتى امهم ولا هى تاكليهم وتشربيهم وتلعبيهم ايه يا "سميه" 

_ انا مكنتش اعرف ان الموضوع دا بيضايقك كده ؟

حاول يهدى من عصبيته : "سميه" اللى  بيضايقنى ان الموضوع دا  مخليكى ناسيه نفسك وسايبه نفسك غيرك يستغل طيبتك دى ,, يعنى لو مكنتيش انتى موجوده كانوا هيعملوا ايه كانوا هيكونوا ملتزمين ويقعدوا بيهم و"نضال" اللى بتقولى عليها اختك كانت قعدت بعيالها تربيهم مش ترميهم لجارتها ,, "سميه" انت مهما كان غريبه عنها هى مش عيلتك ؟

_ دول جيرانى وانا معرفش غيرهم والجيران لبعض يا "احمد" 

_ الجيران لبعض دا انك تسلفيها بصله او شويا ملح يكون عندها عزا تعملى معاها الواجب تكون فى مصيبه وانتى بس اللى قدامها لوقتها لكن مش ع طول انتى ع الحال دا بقالك 7 شهور وانا ساكت قولت شويا وهتعدى لكن القى العدد يزيد حضانه البيت بقى حضانه  ,, انتم مخلياهم يستغلوكى كده 

_ ماهو انا فاضيه يا "احمد" اعمل ايه بدل ما اطق من الفراغ "نضال" قولت نشغل وقتنا مع بعض نزلت شغل ومفيش حد فاضيلى ,, انا بشغل وقتى معاهم 

_ يعنى مفيش غير انك تعملى كده علشان تشغلى وقتك ؟

_ ايوه ,, لانك رافض ان انزل شغل اعمل ايه ؟

_ وهو يا تنزلى شغل يا تقلبى البيت حضانه ؟

_ يعنى اعمل ايه قولى انا الفراغ قاتلنى وانت مشغول فى شغلك  اغلب النهار اعمل ايه,, طول النهار انام مبعرفش وانت عارف  مبعرفش انام وانت مش موجود فى البيت ,, تليفزيون ممل ,, نت مليش فيه كتير ,, انا معنديش اصحاب يا "احمد"  

 لاحظ "احمد" دموع "سميه" قرب منك ومسكها من كتافها وضمها لحضنه : 

_انا مقصدش اضايقك يا "سميه" بس عاوزك تبصى لنفسك اكتر من كده كل واحده عايشه حياتها وانتى وهبالهم وقتك وحياتك 

_ انت فى حاجه ناقصاك ؟
_  انتى .. انتى يا "سميه" ليا انا بس
_ ماهو انا لك فعلا يا حبيبى
 ضمها لحضنه:  حياتك ووقتك وعمرك كله ليا يا "سميه" ومش بحب حد يشاركنى فيهم فيكى غير فى حاله واحده بس هوافق يكون ليا شريك ..
_ مين دا ؟
بصلها وبصوت هادى : يعنى انتى مش نفسك يتقالك ماما ويشغل وقتك بجد وهو دا الوحيد اللى يستاهل وقتك
_ اكيد طبعا نفسى بس اعمل ايه ربنا لسه مأذنش
_ علشان انت شاغله نفسك بحاجات تانيه,, بصى انا مبعترضش على حاجه بتحبيها تعمليها لكن اعتراضى على حاجه تاخدك منى ومن ابننا اللى جى
_ حاضر
ضمها لحضنه: انتى عارفه انا بحبك قد ايه انتى ليا لوحدى ول ابننا بس يا "سميه" العيله الصغيره اللى حلمتى بيها طول عمرك حضنته : انا اسفه انى ضايقتك بجد واوعدك انا هحل الموضوع دا ومش هخلى حاجه تضايقك تانى 

مر شهور وحاولت "سميه" تخفف من وجود الاطفال معاها باى تلكيكه علشان "احمد" واتكلمت مع "نضال" :
_ متشتغليش بالك انا هكلمهم وهعرفهم
_ بجد كنت محرجه اوى اقولهم  لكن انا وعدت "احمد"
_ لدرجه دى بتحبيه يا "سميه"؟
_ "احمد" دا كل حاجه فى حياتى لو اطول ياخد عمرى هدهوله
_ يااااه ايه حب الروايات دا انتى مر سنتين ع جوازكم ولسه بتحبيه
 ابتسمت "سميه"  وهفضل احبه ,, دا اول حب فى حياتى ومن وانا عندى 12 سنه وهو اللى كان معايا فى الوقت اللى بابا بعد عنى ,, انتى عارفه انا فاكر تفاصيل اول يوم شوفته كان يوم وفاه ماما فى المستشفى روحت ع بيت "احمد" مامته شافتنى اخدتنى فى حضنها وعيطت كتير اوى وانا عيطت اكتر خوفت قاعده مع ناس معرفهمش وبابا مش موجود لكن لما "احمد" ظهر وقرب منى وادانى مصاصه فرحت بيها وقعد جنبى ساكت وابتدا يتكلم معايا ,,فاكره انا الفتره اللى كنت قاعده معاهم مكنش بينزل من بيتهم وقاعد معايا وقتها باباها فاتح بابا ان انا و"احمد" لبعض وبابا وافق ولقيت عمو عبد العظيم بيقولى "احمد هيفضل معاكى ع طول ومش هيسيبك "  فجاءه حسيت ان فى حبل اتحدفلى مسكت فيه وانا بغرق واكتر لما بابا اتجوز وسافر ,, انا قعدت فى بيت "احمد" 3 سنين وبعدها سافرت مع خالتو ولا مره حسيت انه بعيد عنى ,, العمر دا كله اتلون ب "احمد" فى حياتى اكتر حد بيحبنى فى الدنيا هو .. فبالتالى مهما يطلب منى كلامه نافذ ,,
_ بس انتى حبك له لاغى شخصيتك او اقصد يعنى رغباتك وارائك انتى سايبه كل حاجه ليه
_ "نضال"انا مليش فى الدنيا دى غير "احمد" هو دنيتى وقراراتى وحياتى
_ ياستى ربنا يهنيكم ببعض بس احب اقولك حب الافلاطونى دا فى الواقع له اضرار واثار جانبيه ,, لانه مينفعش تحبى حد لدرجه تلغى نفسك لان اساسا الحب هو انه يساعدك تظهرى نفسك ,, انا كمان حبيت واتجوزت اللى بحبه واحنا مع بعض ع اساس المناقشه والتفاهم مينفعش حد يمشى رأيه ع التانى ,, بس مدام انتى مرتاحه ومبسوطه اوكيه
_ انا بس دلواقتى بتمنى من ربنا يرزقنى بطفل منه علشان افرحه واشوف الفرحه فى عينيه  كده سعادتى هتكمل
_ عاوزه تحملى علشان تسعدى جوزك يعنى مفكرتيش فى نفسك طيب خليه هو اللى يحمل انتى ذنبك ايه ؟
 ضحكت "سميه": رخمه
_ انتى اوفر وجوزك دا اكتر واحد بيستغلك اسمعى منى والايام هتقولك
_ جوزى بيحبنى وانا بحبه  ودا مش غلط
_ انتى معميه يا روحى مش بتحبى ,, لكن هقول ايه طول ماانتى مصدقه كلامك كلام غيرك هيكون هوا  وع راى المثل سيب الحلوه على هواها لغايه ما هتاخد "سميه" ع قفاها ..
_ انتى رخمه
_ وانتى حبيببتى الهبله

فى يوم و "احمد" كان فى الشغل اتصلت به مامته وطلبت منه انه يروحلها لوحده بعد الشغل ,, اتصل ب "سميه" قالها انه هيتأخر شويا لانه هيروح لمامته  وخلص شغله وطلع على بيت مامته حضرتله الغدا :

_ يسلم ايديكى يا ست الكل 

_ تسلم يا حبيبى بس انت ماكلتش يعنى مش اكلتك دى 

_ ماهو انا هكمل اكل مع "سميه" علشان انا عارف انها مش هتاكل غير لما ارجع 

_ اممم .. ماشى يا حبيبى براحتك 

- المهم ايه الموضوع المهم اللى انتى عاوزانى فيه من غيرها ؟

_ نخلص اكل بس ونشرب مع بعض كوبيتين شاى واقولك 

_ طيب

خلصوا اكل وقعوا يشربوا الشاى : 

_ خير يا ام احمد 

_ كل خير يا عيون ام احمد ان شاء الله 

_ ايه محتاجه فلوس ومحرجه ولا ايه ؟

_ يا واد دا انا اغرقك فلوس 

 ضحك "احمد": عارف انك قدها يا كبير .. بجد ايه الموضوع السرى اللى طلبتينى فيه  مش عاوز اتاخر عن "سميه" ؟

 بملامح توتر : بص انا عاوزاك تسمعنى للاخر من غير عفرته ماشى 

_ خير قلقتينى .

_ انت عارف عمك "محمد"  اتجوز  لكن مخلفش صح لغايه ما مات الله يرحمه 

_ الله يرحمه .. مش فاهم برضه ايه فكرك ب عمى اللى مات من 7 سنين  ؟

_ اصل بصراحه انا فكرت فى وضعك كده وفى حاجه قلقانى 

_ مش فاهم وضحى يا ماما 

_  من الاخر كده انا عاوزاك تروح تكشف 

_ اكشف ايه هو انا تعبان انا زى الفل 

_ ماهو انا عاوزه اتاكد انك زى الفل بقى 

_ ايه ..؟

_ انت مش ملاحظ ان موضوع الخلفه اتاخر  الشهر الجى هتكون سنتين  متجوز ومفيش اى علامه 

_ ماقولنا كل حاجه بوقته لما ربنا يأذن 

_يا حبيبى ونعم بالله بس برضه ربنا حكمنا بالعقل ,,   عمك "محمد" اتاخر فى الخلفه وكان هو السبب وابوك نفسه كان عنده مشاكل واتعالج احنا جبناك ع كبر ومش بسهوله كمان ,, ف انا عاوزاك تروح لدكتور تطمن قلبى عليك علشان لو فرضا فى حاجه نلحقها 

_ ايه يا ماما اللى بتقوليه دا ؟

_ مش عيب يا حبيبى ,, انت مش نفسك فى عيل صغير عيل واحد يقولك يا بابا ويملى دنيتك 

 ملامح وش "احمد" اتغيرت : يعنى قصدك ممكن اكون انا سبب التأخير 

_ ممكن لكن لا ان شاء الله ,,انا كنت هتكلم مع "سميه" بس انا عاوزه اطمن عليك الاول  اللى حصل ل ابوك وعمك شاغلنى وتاخير حمل مراتك قلقنى والكل بيسألنى مفيش حاجه وايه الاخبار ومش عارفه ارد اقول ايه ؟

قام وقف :قولى كل حاجه بوقتها لما ربنا يأذن ,, انا ماشى 

 مسكت ايده : عاوزاك تعرف انا عايشه علشانك يا "احمد" ونفسى اشوف عوض ليك على حياه عينى دا حقى عليك وع عمرى اللى قعدت فى تربيتك  وملكش حق تحرمنى منه ,, وربنا قالنا اسعى يا عبد وانا اسعى معاك ,, فكر فيها كده يا حبيبى ربنا يهديك ... 

خرج "احمد" من عند  مامته والموضوع شغل تفكيره وبعد ما نبهته مامته لموضوع باباه وعمه ... رجع البيت وكانت "سميه" مستنياه بصلها وابتسم لما شافها مبتسمه :
_ حمد الله على السلامه يا حبيبى
_ الله يسلمك يا حبيببتى
_ اتغديت صح ؟
_ انتى اتغديتى ؟
_ لا ..
_  اممم  علشان مبقاش كداب كلت لقمه كده بسيطه علشان ماما متزعلش
_ صحيح هى كانت عاوزاك فى ايه ؟
بنبره تردد: لا مفيش كانت بتقولى نروح ل "مروه" علشان اجهضت تانى  عاوزانا نزورها يعنى
_ لا حول الله يارب .. تانى ايه دى تالت  ربنا يعوض عليها خير
_ ان شاء الله
_ بس كان ممكن تقولك كده فى الموبيل يعنى ؟
بص ل "سميه" ودخل غرفه النوم يغير ودخلت وراه "سميه" تساعده فى تغيير هدومه :
_ يعنى بس كده مفيش حاجه تانيه
_انتى عارفه ماما بقى بتتلكك على اى حاجه علشان اروحلها فاكره لما قالتلى انا تعبانه اوى وطلع فى الاخر صداع بسيط ,,
_ قلب الام مبيحبش يبعد عن اولاده انا مجربتش الاحساس دا بس حاسه انه احساس جميل اوى ,, ان شاء الله ربنا يرزقنا وانت هتعرف بنفسك لما تسمع كلمه بابا ومش هتعرف تبعد عنه ثوانى
ابتسم "احمد" : ان شاء الله .. يلا مش هناكل ..
_ ثوانى وهيكون الاكل جاهز
 دخلت "سميه" المطبخ و"احمد" كلام مامته شاغل تفكيره  قرر ما يسمعش ل مامته ويسيبها ع ربنا ,, بعد قعده "احمد" مع مامته كانت بتستغل وجوده عندها  ووسط  كلامها تسئله  راح لدكتور ولا لا وكانت قلقان ان "سميه" تلاحظ حاجه فكان بيسكت مامته  ,, من كتر الضغط عليه من كلام مامته قعد مع دكتور واتكلم معاه وعرف ان نسبه عدم قدرته ع الانجاب كبير لان العامل وراثى بنسبه كبيره ممكن يكون متاثر به لكن اكدله كل حاجه هتبان اكتر مع الفحوصات ,, خاف "احمد" ورفض يعمل الفحوصات ورجع ع البيت و لحظت "سميه" وقعدت جنبه وشدت من ايده الريموت وهو سرحان :
_ بتفكر وسرحان فى مين غيرى ..؟
_ ها .. لا ابدا هو انا اقدر
_ انا بقول كده طبعا هتلاقى زى حبيبتك انا فين
ضحك "احمد": لا طبعا مفيش
_ حلو الفيلم دا نتفرج سوا بس متنمش فى نصه ماشى
_حاضر
اثناء مشاهدتهم ع الفيلم الاجنبى كان فى مشهد لطفل رضيع مع والدته :
_الله ,, بص يا "احمد" على الطعامه
_ اه ماشاء الله
_ انا متاكده ان اولادنا هيكونوا زى القمر
_ ليكى صح  ملونين  عيون زرقا وشعر دهبى
_لا طبعا هيطلعوا زى القمر ل باباهم يااااه ع اللحظه دى
_ نفسك فى اطفالك يا "سميه"؟
_ اكيد طبعا ,,انا عاوزاهم علشانك لانى واثقه انك هتفرح اووى
_اه طبعا
_ عارف يا "احمد" انا جيرانى كتير حكولى ع اول مره مشيوا فيهم ولادهم واحساسهم بالفرحه ولا اول مره يسمعوا كلمه ماما وبابا ,, انا نفسى اوى اعيش اللحظات دى معاك  ونشوف اول خطوه ليهم مع بعض وهما بينطقوا بابا وماما ياااه يا "احمد" 
_  كله بأوانه منتسعجلش
_ مش مستعجله يجوا براحتهم ,,
_ "سميه" لو فرضا فرضا يعنى طلعت مشكله الخلفه دى انا سببها وان مفيش اطفال هتيجى
_ بعد الشر عنك يا حبيبى  ليه بتقول كده
_ لا دا فرض وبعدين الموضوع دا عادى بيحصل ,, فلو حصل هيبقى رد فعلك ايه عادى ولا رغبته تكونى ام و
قاطعته "سميه": "متكملش كلامك ,, انا الاطفال مشفتهمش اه جوايا احساس بحبى ليهم لكن مشفتهمش لكن شفت انت (لمست خده) ولمستك انت (باست ايده) وحسيت بك انت ودا كفايه عندى لو مليش نصيب فيهم ,, هما روق ربنا رايد يبعت هيبعتهم مش رايد مش هنعترض ع قضائه لكن حياتى معاك واحساسى اللى حساه فى بيتنا دا حقيقى وملموس  صعب اسيبه او افكر ابعد عنه ,, انا لو بعدت عنك او عن البيت دا مش هكون عايشه يا احمد
_ انتى عارفه انا بحبك ليه ؟
 ابتسمت "سميه" : انا اتحب اصلا
ابتسمت "احمد" ومسك ايديها باسها: لانى واثق ومتاكد انا لو لفيت الدنيا دى كلها مش هلاقى واحده تحبنى واحبها كده ,, انتى نعمه ربنا بعتهالى يا "سميه" ,, هديه مستحيل ,, مستحيل هفرت فيها ولا ابعد عنها ,, لان انا اللى لو بعدت عنك مش هكون عايش ...
_ طيب ينفع يعنى حد بيحب حد كده ويسيبه دا انا ابقى مجنونه وموضوع الاطفال دا متشتغلش تفكيرك كل شئ بأوانه وبعدين انت بيبى بالنسبالى (مسكت خدوده) واطعم بيبى عندى كمان
ضحك "احمد" ومسك خدودها : وانتى اجمل بيبى   يلا بطلى رغى وكملى الفيلم
_ اوكيه
 قعد "احمد" بيتفرج مع "سميه" على الفيلم لكن مقدرش رغم كلام "سميه" انه ميفكرش فى كلام مامته وكلام الدكتور  خوف وقلق سيطروا عليه انه احتمال كبير تكون مشكله عنده و مش قادر ياخدو قرار هيعمل ايه ...!

فى يوم تجمع النسائى كان يوم خميس خبطت "نضال" على "سميه" وفتحت الباب :
_ جوزك جوه
 ضحكت "سميه": لا جوزى خرج مع اصحابه  تعالى ادخلى

_ لا يلا بينا ننزل ل "كريمه"
_ مش قولتى مش هتروحى تعبانه
_ ماهو "اشرف" منزلش واتلككت انه يقعد مع العيال ,, صعب اوى عليا اضيع قعده نميمه وتقطيع فى فروه الرجاله  يلا بقى
_استنى هجيب المفتاح
 نزلت "نضال" و"سميه" ودخلوا وقعدوا ولاحظت "سميه" حوار بين اتنين وشافتها "نضال":
_ انتى مركزه فين كده ؟
_ "مها" مستلمه ودن "تغريد" وسمعاهم بتقولها حقك واتمسكى به
_ بتلمعى اوكر يا "سميه" بوظتى يا "سميه"
_ لا اصلى شاكه فى حاجه ,,"تغريد" من فتره قالت انها رايحه تعمل فحوصات هى وجوزها علشان الخلفه المتاخره 5 سنين دى ومنعرفش النتيجه ايه و"مها" انتى عارفاها صاروخ فى خراب البيوت
 _ طيب ليه تشغلى دماغك انا هجبلك الديب وديله استنى
قامت "نضال" وندهت عليهم وقعدوا وفتحت معاها الموضوع:
_ ايه الاخبار يا "تغريد" مقولتليش يعنى الدكتور قالكم ايه ؟
ردت "مها": كويس ان "نضال" فتحت السيره اهو قوليلهم بقى هيقولولك عندى حق
_ تقولنا ايه ؟
_ جوزها طلع المشكله من عنده ومفيش امل فبقولها حقك تتطلقى وتتجوزى وتكونى ام دا حقها
_ وهى عاوزه ايه ؟
ردت "تغريد": عاوزه اكون ام طبعا ,,اى واحده جواها الرغبه دى
_ وجوزك
_ماله جوزى ؟
_يعنى انتى هتطلقى .. دا "عزت " بيموت فيكى دا اهلك مرمطوه علشان يتجوزك
_ مش عارفه
_ طيب هو قالك ايه ؟
_ سابلى حريه القرار
_ وانتى عاوزه تطلقى دلواقتى
_ ايوه عاوزه الحق عمرى
_ واهلك رأيهم ايه ؟
_ انى مستعجلش
 ردت "سميه": وانتى شايفه ايه هو يستاهل تديله فرصه,, تديله امل حتى لو ضعيف ولا ميستهلش ؟
_ ها
_انتى حبتيه ؟
_ ايوه طبعا
_ الحقيقه ان انتى كل كلامك معانا على حبك له كان كدب لانك محبتهوش ؟
_كل دا علشان عاوزه حق من حقوقى
_ لا علشان فكرتى فى نفسك بس ومفكرتيش فيه ودا مش حب دى انانيه
_ لا بحبه الا مكنتش اتجوزته ...
_هو طلب منك الانفصال ؟
_ لا سابلى حريه القرار
_ يعنى طرف بيشد وطرف سايب طرف الحبل ,,هو بيحبك بس مش قادر يقولك استنى لانه عارف انه كده هيظلمك معاه فسيبلك انتى حريه الاختيار والقرار
_  هو عارف اننا مستحيل نكمل مع بعض
_ لكن اكيد مكنش يعرف  انه بسهوله ترميه ولا اكنه فى حياتك وتروحى تترمى فى حضن راجل تانى ببساطه كده ,, انتى بتقولى بحبه انتى اتوهملك انك بتحبيه انتى ممكن انجذبتى لمستواه الاجتماعى وانه بيحبك وتمسك بيكى  ف اتوهمتى انك بتحبيه ووافقتى تتجوزيه وعشتى معاه ,, الحب اللى بجد خارجه قراره من قلبك وعقلك وروحك وان الانسان دا  موافقه ارتبط به  وقتها بتكونى اخدتى عهد مع نفسك انك هتكونى معاه فى الظروف الوحشه قبل الحلوه  هتسنديه ويسندك مش هتفكرى فى نفسك _ لا بحبه وحقى اكون ام ولا علشان طالبت بحقى اكون انانيه ؟
_ اكيد هو كمان نفسه يكون اب لكن اراده ربنا اكبر ومنعت اللهم لا اعتراض ع قضائه  ,,"تغريد" معنى الجواز العلاقه بين الزوجين موده ورحمه ,, الموده من العشره الطيبه والرحمه هى انك تكونى ايد اللى تطبطب على شريكك فى ازمته ,, انسانيا نراعى مشاعر بعض لفتره الازمه وبعدها نقرر ,, اوكيه معاكى اطلقتى واتجوزتى وخلفتى بدل العيل اتنين هتبقى متجوزه علشان منفعه مش علشان تعيشى اه هتكونى سعيده وعايشه حياه طبيعيه دا خارجيا لكن داخليا هتحسى بفراغ ووجع لانك مفتقده مشاعر معينه من شريكك اللى ارتبطتى به بس علشان الاولاد وقتها هتوجهى مشاعرك ل اولادك وحياتك مع جوزك هتكون روتين ولادكم لما يكبروا هيعيشوا فى فتور ليه تعملى كده فيكى وفيهم ,,,
_ سميه ,,,
_انا مبقولش ان كل الحالات كده لكن اغلبهم كده اللى بيفكروا فى نفسهم وبينسوا انهم عايشين مع شخص تانى قراراتهم وتصرفاتهم هتاثر اكيد عليه من غير ما يحسوا ,,
ردت "نضال": فعلا فى ناس كتير حوالينا كده وفى نوعيه غريبه من البنادمين اللى هما بيجوا الدنيا حاطين قدامهم مخطط يمشوا عليه وراكنين احساسهم ورغباتهم واستمتاعهم بحياتهم وعمرهم خططتهم  اخلص جامعه اتجوز واخلف واربى عيال واكبرهم ويتجوزو واموت لكن عاشوا ايه  مفيش ...
ردت "سميه": مش غلط ان العمر يضيع فى تربيه الاولاد لكن يرتبوا  فى حياه طبيعيه فيها حب من الاب والام ميبقاش الجواز تم عن المنفعه  هو علشان فلوسه وهى علشان تخلف عيال  كل طرف بيستنفع من التانى ,, ولا فكروا ان ممكن يحصل مطب فى نص الطريق دا يغير من خطتهم ,, دا الجواز علشان الجواز وقت الازمه كل طرف بيقول انا وينسى التانى ,,
_"سميه" انزلى ع ارض الواقع بلاش كلام كتب دا ,, يعنى انتى لو مكانها هتعملى ايه هتفضلى معاه ؟
_ انا ايوه مش هسيب "احمد" مهما حصل ,, الاطفال رزق وله ميعاده وانا واحمد بنحب بعض انى اعيش مع انسان بيحبى بدون غرض استنفاع منى دا كفايه عندى ,,, الحب عندى انى اكون مع الشخص دا ل اخر العمر لا رجوع  ولا ندم  معاه فى كل الازمات والظروف معاه ووقت الازمات بتكون اختبارات بتأكدلك اختارتى صح ولا اتخدعتى فى اختيارك من الانسان دا وتوثيق للعلاقه ع قوتها ولا هى هاشه  ,, ولو فعلا مفيش نصيب ووصلنا لنقطه الانفصال يبقى نراعى مشاعر بعض وتمر الازمه وننفصل ,, ليه دايما لازم نسيب بعض بوجع وجرح يعلم جوانا ,,"تغريد" انتى زى ما فكرتى فى نفسك مفكرتيش فى جوزك هيكون عامل ازاى لما تسبيه فى عز ازمته ,, مفكرتيش هو دلواقتى احساسه ايه  ان الانسانه الوحيده اللى حارب علشانها سابته ع طول من غير تفكير..
_يعنى انتى بتقوليلى مطلقش وافضل معاه اجى ع نفسى
_ ااقل تقدير متسبهوش بالسرعه دى تعملى حتى حساب للعشره انسانيا تراعيه تراعى مشاعره واوجاعه واللغبطه اللى حسها وبعد فتره يكون استوعب مشكلته و بهدوءانفصلوا  .. ليه تنفصلوا  بوجع وتسيبوا لبعض ذكريات مؤلمه تفكركم ببعض ..!

 سكتوا الكل وفتحوا موضوع تانى وكملت القاعده ورجعت ع شقتها  واول ما دخلت رن تليفون البيت :
_ الو
_ ايوه يا سمسم يا حبيببتى
_ ازيك يا ماما
_ كنتى فين عماله اتصل بيكى مبترديش
_ كنت عند جارتى ,,اصل "احمد" مش هنا وقالولى اروح اقعد معاهم شويا
_ طيب يا حبيببتى .. كنتى عاوزاكى فى حاجه كده ؟
_ خير يا ماما
_تقدرى تمرى عليا الصبح بعد ما "احمد" ينزل يروح الشغل ؟
_ اكيد طبعا ,, بس ليه فى حاجه
_ لما تيجى هقولك ,, بس متقوليش ل احمد انا كلمتك
_ فى حاجه ولا ايه ؟
_ لا يا حبيببتى خير ان شاء الله
 قفلت معاه المكلمه و"احمد" فتح باب الشقه ودخل ...!

تانى يوم الصبح نزلت "سميه" واتجهت على بيت حماتها :
_ كوبيتين شاى بنعناع يستاهلوا سمسم حبيببتى
_ شكرا يا ماما تسلميلى
_ بصى يا "سميه" انتى زى بنتى مش كده واكتر داانا اللى مربياكى
_ طبعا يا ماما
_ كنت عاوزه اتكلم معاكى فى موضوع كده بينى وبينك "احمد" ميعرفش عنه حاجه
_ خير ؟
_ الخلفه ,,امنيه حياتى اشوف ولادكم قدامى والعمر مفيهوش تير
_ كله باامر الله يا ماما
_ ونعم بالله يا حبيببتى ,, بس ربنا قالنا اسعى ياعبد وانا اسعى معاك ,, بقالكم سنتين اهو
_ اعمل ايه طيب ؟
_ مشوار صغير تكشفى ونطمن وقتها "احمد" هيروح لما يعرف انك بتسعى فى موضوع الاطفال هيتحرك هو كمان
_ يعنى اروح من وراه
_ ايوه لانه لو عرف هيمنعك ابنى وعارفاه هيرفض,, انتى مبتشفهوش بيلعب مع عيال العيله ازاى مش من حقه طفل كده
_ اه طبعا يا ماما
_ طيب افهم من كده انك وافقتى
سكتت "سميه": انا مستعده اعمل اى حاجه علشان "احمد" حاضر
_ يحضرلك الخير يا حبيببتى ,,,

قعدت "سميه" تفكر فى كلام حماتها واتكلمت مع "نضال" ورغم رفض "نضال" لكن "سميه" اصرت تروح تعمل فحوصات  اتصلت بالمستشفى حددت يوم وكان اليوم اللى قبله "احمد" اخد قرار انه يروح يعمل الفحوصات فى مكان تانى وبتردد شديد وخوف من النتيجه عملها واتحددله اسبوع وياخد النتيجه ويعرضها ع الدكتور ,,, فى نفس اليوم رجع "احمد" البيت وحاول يتعامل عادى علشان "سميه" متلاحظش حاجه ,, قعدوا يتعشوا :
_ احمد
_ ايوه
_ انا بكره نازله مع "نضال" المستشفى
_ ليه فى حاجه دى فى الخامس لسه اعتقد
_ متابعه .. متابعه وهكون معاه وبالمره قولت اعمل شيك اب ليا
_ ليه انتى تعبانه ؟
_ لا الحمد الله ..بس يعنى اطمئنان

_ طيب انا مش هروح الشغل وهاجى معاكى 

بسرعه:  لا لا  "نضال" جايه معايا انا حبيت بس اقولك علشان لو اتاخرت ورجعت ملقتنيش 

_ طيب ابقى طمنينى ؟

_ حاضر ..

 تانى يوم نزلت هى و"نضال" وقاعدين  مستنيه تسمع اسمها :

_ انتى بجد غريبه اوى يا "سميه"

_ ليه يعنى ؟

_ يعنى حماتك تقولك روحى لدكتور تسمعى كلامها ومن ورا جوزك كمان

_ عاوزه تطمن على ابنها عادى 

_ عادى .. دا انا لو حماتى كانت قالتلى كده كنت طربقت الدنيا عليها وع ابنها 

 ابتسمت "سميه": لكن ربنا بيحبك حملتى على طول بعد جوازك وماشاء الله معاكى اتنين زى القمر والتالت جى اهو 

_ طيب انا مستعده اتنازلك عن التالت دا لو عاوزه اطفال وحماتك عاوزه اوى كده 

ضححكت "سميه": يا شيخه فى ام بتتنازل عن عيالها 

_ يابنتى دا عيالى بيحبوكى اكتر منى ,,"سما" بتقول ياريت طنط "سميه" تكون مراتك بدل ماما يا بابا 

"سميه" ضحكت : يخرب عقلها  تلاقيكى طرقعتيلها  

_ والله ابدا قولتلها  معلش يا حبيبتى هى متجوزه لكن لو اطلقت معنديش مشاكل تتجوز ابوكى عادى انا موافقه جدااا لكنى مرضهاش ليكى ابدا بصراحه اشرف وكرشه لا مرضاش 

ضحكت"سميه": انتى فقر 

_ اضحكى كده ..ومتخافيش ان شاء الله النتيجه هتبقى ناجحه بمرتبه الشرف

_ انتى فظيعه
_بقولك  انتى كده هتطمنى حماتك عليكى الدور على ابنها بقى هى اللى هتقوله صح
_ ايوه
_ طيب لما يعرف انك عملتى الفحوصات من وراه موقفك هيكون ايه ؟
_ مش عارفه بس ماما قالتلى مش هتسيبنى وهتقوله انها هى اللى قالتلى
_ ونبى ماما دى هتلبسك فى الحيطه وهتشيلك الليله
_ لا يا شيخه
_خليكى فى هبلك دا ,, صحيح يا سمسم لما "احمد" يعمل فحوصاته وفرضا يعنى طلعت فستك هتعملى ايه
_ هو ايه اللى هعمل مش هسيبه طبعا
_ اه طبعا لغايه ما يستوعب وتنفصلوا
_ لا هفضل معاه ع طول
_ نعم وتحرمى نفسك ليه يا حبيببتى دا حقك وكده هو هيكون انانى

_  لانى وقت ما حبيت "احمد" انا اخدت قرار اكمل معاه حياتى سواء فى اطفال ولا لا 

_ نعم ..

_ انا لما ارتبطت ب" احمد" من صغرى اول ما قالولنا انتم هتتجوزوا لما تكبروا انا ارتبطت به لوحده يعنى مكنش فى اطفال معاه ,, الاولاد دا نصيب علمه عند ربنا يرزق به عباده وقت ما يحب ويشاء ,,وبعدين  مفيش سبب فى الدنيا يخلينى اسيبه
_ حتى لو خانك ؟
_ ميعملهاش ,, بقولك انا حفظاه اكتر من نفسى ولو حصلت هعرف
_ يعنى مفيش سبب يبعدكم عن بعض ؟
_  فى سبب واحد ومستحيل يحصل 

_ ايه بقى الموت لا هيحصل كلها هنموت 

_ لا يا ظريفه .. ان حبه ليا يقل ويختفى ويلغينى من حياته

_ دا يبقى حمار الل يفكر ميحبش حد زيك هو يطول 

_ اهو طال ,, ومستحيل يسيبنى عارفه 

_  طيب لوالعكس هو ممكن يسيبك ؟

_ لا طبعا  

_ واثقه

_ بحبه ومتاكده 

 اتنهدت "نضال : غالبا مرايه الحب عاميه الكلام قبل الموقف حاجه ورد الفعل بيكون حاجه تانيه عموما  ان شاء الله ميحصلش حاجه وربنا يزرقكم بتؤام علشان تشدو فى شعركم

ضحكت "سميه" : ياريت
_ اديها يارب من عندك  وكورها زى ماانا متكعوره كده وخليها تحس بالنعمه اللى هى فيها دلواقتى وتتحسر

فى الوقت اللى "سميه" و "نضال" فيه فى المستشفى خرج "احمد" طلع من شغله على بيت مامته وهو بياكل لاحظ مامته ساكته :

_ فى ايه يا "ام احمد" ساكته غير العاده 

_ سلامتك يا حبيبى 

_ لا اقصد الاسطوانه اللى على طول بتقوليهالى بقالى يومين مبقتيش تقوليها بعد الشر زهقتى 

_ ها .. 

_ باين عليكى مخبيه حاجه خير قولى ؟

_ مفيش 

_ قولى يا ماما بدل مااعرف بعدين وانتى عارفه ايه اللى ممكن يحصل 

_ بصراحه كده ياابنى انا اتكلمت مع "سميه" وطلبت منها تروح لدكتور و ..

 وقعت المعلقه من ايده فى الطبق : استنى استنى .. انتى تقصدى انها دلواقتى فى المستشفى علشان كده

_ بصراحه اه .. دى بتحبك اوى اول ما قولتلها قالتلى حاضر مترددتش 

 قام وقف  وساب مامته بتتكلم : كمل اكلك 

_ شبعت 

مسك موبيله واتصل ب "سميه" : انتى فين يا "سميه"
_ ماانا قولتلك ؟

_ انا بسالك انتى فى انهى مستشفى بتعملى فيها فحوصات الحمل 

 اتصلبت مكانها "سميه"  وقالتله المكان وقفلت  و"نضال" شافتها :

_ جوزك عرف .. ليلتك مطينه انا كنت معترضه من الاول عن انك تخبى عليه شيلى بقى

 وهى قاعده ومتوتره بتفكر تقول ايه ل "احمد"  وقبل ما تدخل ندهت ع اسمها الممرضه وقفت وقبل ما تدخل سمعت صوت "احمد" 

_ سميه ... 

بصوا ع اتجاه الصوت : احمد 

قرب منهم ومسك ايديها : انا جوزها وانا اللى هدخل معاها
 

نضال سابت ايديها : انا هستناكو هنا
مسك ايديها وملامح الغضب ع وشه ودخلو لدكتور ,, خلصوا الفحص وخرجوا والنتيجه كمان اسبوع ,, رجعوا ع البيت و "احمد" قاعد ساكت و "سميه" مش عارفه تبدء كلام وقعدت جنبه :
_ احمد انا
_ بتكدبى عليا يا "سميه" و "نضال" جارتك حبيبتك تساعدك ع الكدب انتى عمرك ما كدبتى عليا يا "سميه" عمرك
_ لا والله انا كنت هقولك
_هتقوليلى يعنى بدل ما اكون اول واحد يعرف هكون اخر واحد يعرف
_ لا والله انا كنت هقولك اول ما هرجع
_ ممكن تقوليلى كدبتى ليه ؟
_مكنتش عاوزاك تدخل فى مود قلق
_ فقولتى تعيشيه لوحدك
_ ايوه ,, انا اعيشه لكن انت لا انا مش هستحمل اشوفك قلقان
_ ومقولتيش ليه ان ماما كلمتك وطلبت منك تروحى لدكتور
_ هى قالتلى مقولش ليك ووعدتها
_ وهى قالتلى ,,
قعد "احمد" ومتعصب قعدت جنبه "سميه" ومسكت ايده :
_ انا اسفه بجد ,, صدقنى مكنش فى نيتى اخبى عليك
_ انتى مش متخيله القلق  اللى حسيت به لما عرفت ,, فى موقف زى دا انا اللى اكون جنبك ومعاكى مش "نضال"
_ انا اسفه بجد ها بقى فكها كده ,,
بصلها وشافها مبتسمه شدها لصدره وحضنها:
_ انا بخاف عليكى يا "سميه" والموقف دا صعب
_ ماهو "نضال" قلبتهالى سيرك بنت الايه كان ليها فايده برضه بتشتت تفكيرى لبعيد
_ ممكن متعمليش كده تانى ,, اى حاجا اى جاحه انا اكون اول حد اعرفها مش عاوز احس انى بعيد عنك كده
حضنته: حاضر ,, اوعدتك مش هكرر اللى حصل دا
باس راسها : اسف انى اتعصبت عليكى
_ عارف لما شوفتك داخل علينا المستشفى انا قولت هتدينى بالبوكس
_ تستاهليه والله بس انا مقدرش
_مكنتش اعرف ان مامتك هى اللى تقولك بصراحه دى اكدت عليا
_ ماهو انا بعرفها لما بتخبى عليا حاجه هو انا عندى غيركم حافظكم اكتر من نفسى
_ النتيجه امتى
_ كمان اسبوع
_ خير ان شاء الله
_انا كمان عملت فحوصات امبارح
 بعدت عن حضنه وبصتله بتعجب : ايه
_ بما اننا فى قاعده مصارحه علشان كله يبقى واضح
_  ومقولتليش اهو و
 حط ايده على شفايفها وشدها من دراعها فى حضنه :
_ بس بس ... انا اسف انى خبيت عليكى لكن لنفس اسبابك وكده نبقى خالصين
_ والنتيجه امتى
_ فى نفس يوم نتيجتك
_ خير ان شاء الله انا متفائله خير
_"سميه" عاوز احكيلك على حاجه ؟
_ ايه هى ...؟
( حكلها قصه عمه وباباه )
_ انت عاوز تقول ايه
_ عاوز اقولك احتمال كبير اكون كده
_ لا ان شاء الله مفيش حاجه من كده ولو حتى انا ع قلبك  واعتبرنى بيبى بتاعك واللى كنت هتعملهوله اعملهولى
ابتسم "احمد": سميه انا بتكلم بجد
_ يعنى انا لو عندى المشكله هتسيبنى
_ لا طبعا مقدرش
_ يبقى ازاى انا اسيبك ,," احمد" سيب بكره باللى فيه احنا فى انهارده علشان ببساطه منعرفش بكره فيه ايه ,, سيبها ع ربنا وربنا كريم
_ ونعم بالله

 حاولت "سميه" الاسبوع دا متبينش اى ملامح توتر ولا قلق واتعاملت عادى علشان "احمد" وكلامه وخوفه وكانت دايما بتصلى وتدعى نتيجته تكون كويسه علشان يطمن ,, وفى ليله ظهور النتيجه "سميه" و "احمد" قاعدين بيتفرجوا ع التليفزيون وساكتين ,,  "احمد " بص ل "سميه" وفى سره :
_ بكره الصبح هعرف مشكلتى ايه ومش عارف انانيه منى اتمسك بيكى يا سميه ولا اسيبك تعيشى حياتك وتبقى ام ,,هتقدرى تعيشى معايا وانتى محرومه من كلمه ماما بسببى ,,
"سميه" بتبص عليه لف وشه لتليفزيون بصتله وفى سرها :
_ يارب ,, انت كريم ولطيف بعبادك ريح قلب "احمد" ونتيجته تكون مفيهاش حاجه ويرجع البيت مبسوط ,, ربنا انا مش طالبه غير انى اشوفه سعيد ومش قلقان كده ..
 بص عليها "احمد" وحط راسه على رجله ونام و"سميه" بصاله وبتحرك صوابعها على شعره وهو غمض ,, اتنهدت "سميه" ودعت فى سرها  يوم بكره يمر على خير ...!
____________________________
يتبع