الفراشة الزرقاء (3)

(3)

 اتفق "احمد" مع "سميه" انهم هيروحوا ياخدوا نتيجه الفحوصات وزياره الدكتور ,, صحيت "سميه" قبل "احمد" واتحركت بهدوء حواليه اتوضت وصلت ودعت وبعدها حضرت الفطار ودخلت صحت "احمد" وابتدوا يفطروا وكان الصمت لغه المكان :
_ اشرب النسكافيه بتاعك قبل ما يبرد
_ حاضر وانتى يلا افطرى انتى ماكلتيش حاجه
_ حاضر .. هتخلص شغلك وتكلمنى هكون جاهزه
_ اتفقنا
 قام وقف وقرب لراس "سميه" وباسها : لا اله الا الله
_ سيدنا محمد رسول الله
 خرج "احمد" ورجعت "سميه" تكمل فطار حست ملهاش نفس قامت شالت الفطار ,,اتصلت بيها "نضال" واتكلموا شويا وقعدت "سميه" تقرا فى القران,,, "احمد" فى الشغل كان بيبص ع الساعه ف استاذن بدرى وخرج واتجه للمستشفى ومعاها نتيجه فحواته هو و "سميه" بعد تفكير حب هو يعرف النتيجه الاول ممها كانت  وهو قاعد  اتصلت "سميه" رد عليها :
_ خرجت ولا لسه ؟
_ لا انا لسه فى الشغل
_ طيب كده مش هنلحق ميعادنا اسبقك انا
_ لالا انا اتصلت والنتيجه لسه مظهرتش قالولى بكره مش انهارده
_ احنا حسبناها غلط
_ ايوه حسبناها غلط
_ طيب خلاص
 خرجت الممرضه وبتشاور ل "احمد" يدخل لدكتور :
_ طيب انا هقفل يا "سميه" فى عميل دخل دلواقتى باى
قفل معاها  واتحرك ودخل للدكتور حط ملف الفحوات والدكتور بيبص عليهم وملامح وشه متغيره ,, اتيقن انه هيقوله المشكله عنده
_ خير يا دكتور فى حاجه ولا ايه؟
_انت قولتى متجوزين بقالكم قد ايه ؟
_ يعنى سنتين وشهرين يعنى ليه
_ هو انتم عملتوا فحوصات قبل الزواج
_ بصراحه دفعت فلوس واخدت الشهاده عادى يعنى زى كتير ما بيعملو
_ ودا اكبر غلط بيحصل ,, الكشف الطبى لزوجين قبل الزواج شئ ضرورى علشان يتطمنوا ع نفسهم وع حياتهم بعد كده ,, بيتجنبوا مشاكل صعب حلها ومشاكل حلها يكون بدرى ,,مينفعش تبدء حياه جديده وانت جاهل الايام الجايه وتتفاجئ باللى فيها
_ هو فى حاجه يا دكتور ؟

_ اممم .. انا هتكلم معاك بصراحه 

_ فى مشكله ولا حاجه 

_ نتيجه فحوصاتك مفيهاش اى مشاكل لكن المشكله عند مدام "سميه "
لسه هيبتسم "احمد" اتفاجى بكلام الدكتور عن "سميه "

 ب ابتسامه : كل مشكله وليها حل يا دكتور ولا ايه ..

_ لكن المشكله دى ملهاش حل للاسف 

بملامح قلق :  بمعنى؟ 

_ مدام "سميه" عندها تشوهات فى الرحم 

_ مش فاهم يعنى محتاجه علاج طويل ولا عمليه ولا ايه اكيد يعنى فى حل ?

_ للاسف مفيش لانها مولوده بالمشكله دى بمعنى دا مش مرض يتعالج ,, ومهما روحت لدكاتره وسافرت الاجابه واحده 

_ طيب طفل الانابيب والحقن او ..

_ ولا اى حاجه هتنفع للاسف  مدام "سميه" مش هتقدر تخلف 

 خرج "احمد" وهو مش مستوعب الكلام مش قادر يفرح ان فحوصاته سليمه ولا علشان اللى حصل ل "سميه " دخل العربيه وقعد وبيبص ع فحوصات "سميه" ومش قادر يرجع ع البيت موبيله رن وكانت مامته مردش عليها وشغل العربيه واتحرك لبيت مامته ,, دخل وشافته متغير وبعد الحاح قالها وكانت صدمه :

- لا حول الله يارب ,, لا حول الله يارب يا حبيببتى يا "سميه" هى الدنيا ملطشه معاها كده ليه ؟

_ مش عارف انا هعرفها ازاى ولا هى هتبقى عامله ازاى .؟

_ الله يكون فى عونك وعونها ,, صعبه انك تقول لواحده عمرك ما هتكونى ام 

_ اعمل ايه يا ماما مش عارف ..

_ هى لازم تعرف اكيد لانها لو معرفتش انهارده هتعرف بعدين ( ابتسمت وحضنته واتفاجى احمد من تصرفها )
_ ايه دا ؟
_ الحمد الله يا حبيبى شكوكنا كانت غلط وانت زى الفل اهو
_ ماما انا فى ايه دلواقتى ..
_ لا حقى افرح الله,, انا الايام اللى فاتت ربنا اللى يعلم بحالى كنت ازاى
_ و "سميه" ؟
_ الله يكون فى عونها وبعدين هى كده كده هتعرف

بملامح حيره :  طيب اعمل ايه ؟

_ بص يا حبيبى فكره انها تعرف ولا لا دى مش الموضوع  دلواقتى ,, 

_ مش فاهم؟

_ المهم  دلواقتى انت هتعمل ايه لما عرفت ,, دا الموضوع اللى يستاهل تفكر فيه ؟

_ اعمل ايه فى ايه ؟

_ فى انك ممكن تكون بابا ويبقى قدامك ولادك لكن مش من "سميه" بس...

 اتعصب "احمد"وقاطعها : انتى بتتكلمى فى ايه يا ماما 

_ انا بكلمك فى العقل والكلام الصح 

_ انا مش هسيب "سميه" ومش هتجوز غيرها 

_ انت يا حبيبى بتتكلم علشان الموج عالى دلواقتى لكن بعدين لما الدنيا تمشى هتحس ان فى حاجه ناقصاك ,, ليه تحرم نفسك من حق ربنا بعتهولك ,, انت مش عاوز تسمع بابا 

_ عاوز اكيد لكن من "سميه" 

_ لكن "سميه" ربنا مش رايد ليها .. نصيبها كده لكن مش نصيبك يا حبيبى متطلقهاش مقولتش تطلقها لكن الشرع محللك فى الظروف دى مره تانيه تتجوز وتالته ورابعه و

 قام وقف وهو متعصب : انا ماشى 

 وقفت مامته : انا هسيبك دلواقتى لكن فكر فى كلامى لانك بعدين هتفكر فيه اكيد ,,
 بصلها "احمد": وكلامنا محصلش يا ماما ونتيجه الفحوصات سليمه احنا الاتنين تمام ولو "سميه" عرفت صدقينى مش هدخلك بيت هنا تانى ,,

مشى "احمد" وهو مضايق من كلام مامته ,, وبعد ما هدى اتجه على معمل تحاليل لصديقه  دكتور هناك وطلب منه يعمل نسخه من التحاليل "سميه"  لكن بنفس نتيجته وان كل حاجه تمام  لانه قرر يقول ل "سميه"  ان النتيجه كويسه ,,! 

 رجع على البيت ومعاه نتيجه الفحوصات واتفاجئت "سميه" لكن هو قالها انهم اتصالوا به تانى وكان راجع ع البيت والدكتور شافهم وطمنه  وبالرغم انه عرفها ان النتيجه كويسه لكن  عينيه كانت بتقول ل "سميه" حاجه تانيه ,,  مر يومين وفى يوم نزلت "سميه" العربيه علشان بتدور على حاجه وقعت منها وكان "احمد" نسى ان فى التابلوه الفحوصات التانيه الحقيقيه ,, وهى بتدور  شافته واستغربت ومكنتش فاهمه اللى فيها  واستغربت اكتر ان "احمد" سايبه فى العربيه ,, شكت فى الموضوع وطلعت به الشقه :

_ "احمد" ايه دا ؟

 اتفاجئ احمد : جبتيه منين دا ؟

_ من تابلوه العربيه .. انا عملت فحوصات واحده ايه التانيه دى الاولانيه جوه فى الاوضه 

 قام بسرعه وشده منها : دا .. دا .. دا هو بس نسخه تانيه لانى مكنتش مرتاح لدكتور وقلت اروح به لدكتور تانى 

_ وروحت ؟

 مسك الورق وقطعه : اها .. وطمنى عليكى زيه زى الاولاانى انت كويسه ومفيش اى حاجه وزى ما قولتلك كل شئ بوقته ..

_ اتفاجئت "سميه" من رد فعل احمد المتوتر ,, قعدت فى يوم مع "نضال" بيتكلموا وحكتلها :

_ يعنى انتى عاوزه ايه ؟

_  عاوزه افهم ايه حكايه النسختين دول ؟

_ طيب يا ستى ولا تشغلى دماغك نروح المستشفى ونطلب نسخه ونعرف بنفسنا ايه الحكايه 

_ طيب 

تانى  يوم  نزلت "سميه" و "نضال" اتجهوا للمستشفى اخدوا نسخه من الفحوصات ودخلوا لدكتور وعرفت الحقيقه ومكنتش مستوعبه وفى حاله ذهول و"نضال" مكنتش عارفه تعمل ليها ايه واقترحت ليها يروحوا لدكتور تانى ,, اتعلقت "سميه" بالامل ان ممكن يكون حصل خطا  وخصوصا انها عرضت على الدكتور نتائجها اللى كانت مع "احمد" خرجوا من المستشفى واتفقوا تانى يوم يروحوا المستشفى من غير علم "احمد" ,, وفعلا راحوا وعملت الفحوصات واتعاملت عادى لوقت ما ظهرت النتيجه وكان فعلا زى ما الدكتور قالها واتفاجئت والامل اتبخر وعرفت ان "احمد" كدب عليها وانها مبتخلفش ,, رجعت البيت وقاعده فى ذهول و"احمد" شافها واستغرب من ملامحها ,, :

_ فى ايه يا "سميه" ؟

_ كدبت عليا ليه يا"احمد" 

_ فى ايه.. ؟

_ طلعت ورق الفحوصات ..

اتفاجئ "احمد" : ايه دا ؟

_ كنت صارحنى يا"احمد" بالحقيقه ليه تكدب عليا وتعيشنى فى وهم وامل كداب ان ممكن فى يوم هكون ام  ومش هيحصل اصلا .. كنت قولى وانا هتقبل الواقع 

_ انا مكنتش عاوزك تزعلى وتتضايقى كده وكنت هقولك لكن لما الظروف تسمح 

_ وانا عرفت اهو ..

 قرب منها ومسك كتفها وهى منهاره فى الدموع : "سميه" ,,انتى قولتى مش عاوزه غيرى وانا عيلتك والاطفال دا حاجه مش مؤكده تحصل المهم ان احنا مع بعض ...
_ احمد ..
_ انتى دلواقتى هتغيرى كلامك .. انا مش عاوز غيرك وعاوز بيتنا دا وعليتنا اللى هى انا وانتى ..
(حضنها)  انا مش عاوز غيرك  ..انا بحبك ومش عاوز غيرك ...

مرت فتره و"سميه" حالتها النفسيه كانت صعبه اخدت فتره تتقبل الوضع والواقع اللى اتفرض عليها وساعدها "احمد" و"نضال" ,, بعد فتره قصيره حالتها النفسيه استقرت لكن فى المقابل بعد الخبر ما اتعرف ابتدا الكل يتكلم كلام يجرح "سميه" والاخص كلام "ام احمد " ففى يوم كانوا معزومين عندها  وكانت بنت خاله "احمد" "سلوى " حامل :
سميه كانت فى المطبخ بتحضر الغدا  ودخلتلها مامت احمد :
_ ونبى يا سمسم كوبايه عصير ليمون ل سلوى لانها تعبانه حامل بقى والحوامل بيبقوا محتاجين اهتمام وانتى عارفه بقى
 ابتسمت "سميه": حاضر يا ماما
_ يا حبيببتى مقصدش والله
_ ولا يهمك يا ماما
 عملت كوبايه الليمون وخرجت لاحظت اهتمام الكل ب سلوى والكلام عن الحمل والاطفال وهى قاعده ساكته مش عارفه تدخل فى الكلام معاهم ولا تتكلم فى اى موضوع ,, ولحظت "احمد" وهو فرحان وهو بيلعب مع ولاد "سلوى" ومعاه "مروه " وقربت منهم وسمعت الحوار :
_ حلووين اوى ان يكون عندك اطفال يا "احمد"
_ اه طبعا دى نعمه
 اتنهدت "مروه" : باين انا وانت ربنا مش كاتبلنا نكون اب وام ,, انت بسبب "سميه" وانا حملت 4 مرات  ومكملش 
_ نصيب كل حاجه نصيب
_ يعنى مش يمكن احنا اختارنا غلط وربنا عاقبنا ع اختيارنا الغلط دا
_ ازاى مش فاهم ؟
_ يعنى انت اختارت سميه وانا اختارت جوزى والاتنين حياتنا معاهم مش كامله
 قاطعها "احمد": حياتك انتى مش كامله دى مشكلتك لكن حياتى مع سميه كامله بوجودنا مع بعض لاننا ببساطه اختارنا بعض ب ارادتنا وبقلبنا وعقلنا ببساطه بنحب بعض  ..
_ انا مقصدتش حاجه
_ ولا يهمك ,, ان شاء الله ربنا يعوضك
 كلام "احمد" فرح "سميه" وحسسها ان "احمد" متمسك بيها  ,, وهو قايم شاف "سميه" واقفه ودموع نازله من عنيها اتجهه ليها ومسح دموعها وضمها لحضنه : تيجى نمشى يلا
 استاذنوا الموجودين ونزلوا رجعوا على بيتهم شغلوا فيلم وقعدوا يتفرجوا عليه لكن تاثير الزياره ماثر فى "سميه" لكن متكلمتش ,, مرسنتين وفى خلال السنتين  استقر وضع وحياه "احمد وسميه" واتغيرت "سميه" وشخصيتها اصبحت متقبله اى كلام من اى حد من غير زعل ولا محسوسيه وكانت دايما مبتسمه ورجعت لطبيعتها  ,, فى يوم كان عيد ميلاد "سما" بنت "نضال" وطلبت من "سميه" تساعدها فى التجهيزات وكانت سعيده جدااا ونظمت معاها العيد الميلاد وديكورات وفقرات وكل حاجه ابهرت الجميع لدرجه انهم سالو "نضال" انها اتفقت مع مكتب منظم حفلات وقالتلهم انها "سميه" ...! 

 فى يوم كانت قاعده "نضال" مع "سميه":
_ انا هسيب الشغل اللى كنت فيه دا
_ ليه كده دا انتى كنتى فرحانه انك نزلتى شغلانه رقم كام دى ياترى ؟
_ مبعدش يا جيمى
_ ع رائك واهى كلها اكسبرينس
_ايون احنا عايشين علشان الاكسبرينس ,,وبعدين  اصلا الشغل دا مش شغلى هو كان شغل موجود قولت اجرب وجربت واكتسبت خبره وتمام كده كفايه عليهم ع قد فلوسهم
_ هتعملى ايه بقى  هتدورى ع شغل فين تانى  ؟
قربت من "سميه" ومبتسمه: اهو دا اللى انا جيتلك علشانه يا سمسم
_ خير
_ انتى بتعملى اعياد الميلاد مفيش زيها الكل بيحكى عليها
_ دا ل اطفال العماره وعيالك
_ ماهو كل واحد فينا عنده معارف وقعد يرغى ويتكلم عليكى  انا فى واحده طلبت منى اقولك تعمليلها عيد ميلاد ابنها وسالتنى ع التكاليف  قولتلها لا دى مبتاخدش فلوس استغربت وانا استغربت معاها بصراحه
_ مش فاهمه عاوزه توصلى ل ايه ؟
_عاوزه اقولك تعالى نعمل مشروع انا وانتى  ها ايه رأيك؟
ضحكت "سميه": مشروع شغل يعنى ؟
_ لا هنوزع فلوس .. ايوه يا بنتى ومفيهوش اى تعب
_ ودا ايه هنطبع فلوس
_  لطيفه اوى يا "سميه"
_ نتكلم جد ,,مشروع ايه ؟
_حضانه وفى نفس الوقت تنظيم اعياد ميلاد ل الاطفال فيها يعنى الاتنين فى واحد
_ يا ماشاء الله ..
_ شغل الحضانه مفيهوش اى تعب بس محتاج شريك مضمون ومفيش غيرك قدامى ,, فلوسك اللى ورثتيها من ابوكى بعد ما سددتى قسط الشقه وراكنه الباقى فى البنك اشتغلى بيهم
_ ماهو انتى عارفه ان" احمد" مش موافق ع مبدأ الشغل
_ يا حبيببتى دا لو هتشتغلى عند حد ,, انتى هتشتغلى فى مالك وهتبقى انتى البوس يعنى والاطفال بيحبوكى بطريقه وانتى بتعرفى تتعاملى معاهم احسن منى وانتى بتكونى مبسوطه وانتى معاهم وبتعملى اعياد ميلادهم  ,, اهو يبقى الاتنين مع بعض ,,
_ هى فكره حلوه ..
_ وخصوصا ان جوزك بقى اغلب الوقت بره البيت وانتى لوحدك اغلب اليوم تشغلى نفسك فيه
_ مش عارفه هيوافق ولا لا بس اعتقد لا ,, انتى بنفسك شوفتى كل ما يجيلى شغل يقول لا لغايه ما بقيت ارفض من نفسى
_ جربى بس انتى كده وهيوافق لما يعرف انه مختلف
كلام"نضال" شغل تفكير "سميه" ,, ففى يوم قاعده مع احمد قبل ما ينام بعد تردد شديد  :
_ احمد ..
_ ايوه
_ انت هتنام
_ تعبان طول اليوم شغل عاوز ادخل فى غيبوبه
_ طيب  ينفع تقعد 5 دقايق بس اتكلم معاك فى حاجه كده
 قعد على السرير : سامعك فى ايه ؟
 بملامح توتر : بصراحه كده من غير لف ولا دوران وانجاز لوقتك علشان تنام
 ضحك"احمد" : انا كلى ليكى فى ايه بقى ؟
_ عاوزه اعمل مشروع واشتغل
للحظات ضحك "احمد": مشروع مره واحده
_انا عارفه انك رافض لفكره انى انزل شغل لكن  بص الحكايه ببساطه *حكتله فكره المشروع وان معاها نضال وسكت لحظه *
_ وانتى عاوزه تعملى كده ؟
بنبره قلق : بصراحه ايوه ,, انت الشهور الاخيره دى  بتكون اغلب اليوم بره بترجع بليل  ولما بتيجى بتكون تعبان وبتنام ع طول  وانا فاضيه طول اليوم من بعد ما منعت اولاد الجيران يجوا ولما بيجوا ساعه وبيمشوا اهو  اشغل وقتى ع الاقل بحاجه بحبها ,,
_ ماشى
_ يعنى موافق
_ ايوه ..
 فرحت "سميه" وبصتله ب تعجب : احمد
_ مش هنام ولا ايه
_انت موافق بجد ؟
بصله :  ايوه فيها حاجه هو المفروض ارفض
_ الطبيعى بتاعك انك بترفض الغريب انك وافقت بسهوله اكتر مما كنت متوقعه
 ابتسم ليها : يعنى لما ارفض بتستغربى ولما اوافق تستغربى فى ايه يا "سميه"
_ فى انك  مسالتنيش حتى ع التفاصيل وفقت ع الفكره ع طول متعرفش اصلا مكانها فين
_ سميه يا حبيببتى اعتقد انك كبيره كفايه ع انك تختارى المكان الكويس و"نضال" مش هتفوت الفرصه دى علشان ولادها وانا عارف انك هتحكيلى كل حاجه لما تجهز من اول المكان ل يوم الافتتاح صح ولا انا غلطان  المهم بس مياخدكيش منى ولا البيت
_ لو حسيت بكده قولى وانا هقعد ع طول  بس انت افضالى
_ الحياه دى عاوزه اللى يسبقها يا حبيببتى وانا معاكى اهو
_ انا عاوزه اقعد معاك زى زمان نتكلم ونحكى احنا كلامنا بقى صدفه
_ ضغط الشغل مخلينى مش قادر بجد استحملينى شويا وهعوضك كل دا
_ انت عارف انا كنت مجهزالك وصله زن واحاول اقنعك علشان توافق لكن انت وافقت من اول 5 دقائق
_ علشان باين انك عاوزه كده وفعلا انا بقالى مده كبيره بسيبك لوحدك فى البيت فاانا عندى نظر يعنى واكيد الوقت اللى مش موجود فيه هتكونى مشغوله والوقت اللى هكون فيه فى البيت
_ هتلاقينى جنبك كده وعد
_ يبقى خلاص على بركه الله ,,تصبحى ع خير بقى
_انا بكره هنزل مع "نضال" نشوف مكان هى عارفاه تيجى معايا تشوفه وتقولى رأيك
_لالالا انتم مع نفسكم واكيد يعنى مش هتختارى مكان وحش والفلوس فلوسك انتى حره
_بس انا متعودتش منك تسيبنى لوحدى اقرر دايما بتساعدنى
_ مش محتاجه مساعده وانتى معاكى "نضال " يلا تصبحى ع خير بقى يا "سميه"
_احمد
_ايوه
_انت منستش حاجه
_ها,,,اه (قام باسها ع خدها ) تعب الشغل بقى نسيت ...
 خرجت "سميه وهى بتضحك وفرحانه واتصلت ب "نضال" وبعد ما قفلت مع نضال رجعت الموقف اللى حصل وتصرف "احمد"  واستغربت من موافقته السريعه لكن كان المهم يوافق واتفقوا ينزلوا الصبح ع المكان يحجزوه ويبتدو الترتيبات ..!

الصبح الساعه 9 نزلت "نضال" و "سميه" واتجهو للمكان وابتدو يتفرجوا وكان عباره عن دور ارضى فى عماره وفيها حديقه كبيره :
_ ها يا سمسم ايه رائيك المكان تحفه واللوكيشن ممتاز ع الشارع والجاردن كمان مساحتها تحفه هتبقى للاطفال يلعبوا براحتهم وفى امان واى بارتى يتعمل المكان يساعد
_ اه جميله اوى
_ انتى عارفه لو كمل الترتيب زى ما مرتبالها ,,الحضانه دى هتكون احسن حضانه فى المنطقه وهتشوفى
_ هههههه متحمسه اوى انتى ؟
_ طبعا يا بنتى ,,احنا مع بعض وبنعمل حاجه بنحبها لازم اكون متحمسه ,
-ان شاء الله تكون بشره خير ونكون قدها
_انا شايفاكى مش مبسوطه
_ لا بالعكس لكن كان نفسى "احمد" يكون معايا فى اول مشروع وشغل فى حياتى  وجوده فارق كتير
_ يا شيخه كبرى دماغك ,,انا "اشرف" قالى هاجى معاكم قولتله لا شكرا وجودهم لا هيزود ولا هينقص
_ يمكن معاكى لكن معايا يفرق ,,يفرق انك تحسى ان شريكك بيدعمك ومعاكى فى كل خطوه بتعمليها بيديكى باور وحماس مفيش حد غير يقدر يعمل كده
_ لا فى انتى ,, شجعى نفسك بنفسك لانه ببساطه دا شغلك انتى ونجحتى هيكون نجاحك لو فشلتى هيكون فشلك ,, فكى كده  وقوليلى  اقول لسمسار اوكيه ..؟
_ اوكيه
حضنت "نضال" "سميه",, خرجت "نضال" ووقفت "سميه" وابتسامه على وجهها بتنظر لمكان حواليها بسعاده بصت ع موابيلها كانت صورت المكان ل "احمد" وارسلتله الصور يقولها رايه  لكن رسايلها اتشافت من غير رد قدمتله عذر و قالت انه مشغول رجعت بصت للمكان  واحساسها انها بدايه لحاجه جميله واخدت نفس : الحمد الله

ابتدت "سميه" فى تجهيزات المكان مع "نضال" ووسط انشغالها مفقدتش تركيزها عن بيتها وجوزها اهتمامها الاول كان هما وكان مشروعها فى المرتبه التانيه فى حياتها ,, جهزوا كل حاجه وحددوا موعد الافتتاح ,,ففيوم زارت حماتها علشان تعزمها على الافتتاح وقاعدين بعد الغدا الكل ساكت غير المعتاد  فبدءت "سميه" الكلام واتكلمت عن الحضانه وتجهيزات الافتتاح واكدت على حماتها تحضر
خرجت "سميه" و "احمد" وطول الطريق موبيله كان بيرن وكان بيظهر رقم ويكنسل عليه استغربت من ملامحه اللى اتغيرت سالته مين قالها رقم غلط  ,,رجعوا البيت ودخل "احمد" على غرفه المكتب واتكلم فى الموبيل بصوت واطى دقيقه وخرج مبتسم :
_ سميه ,, ممكن كوبايه شاى ؟
_ حاضر يا حبيبى
 قامت جهزت الشاى وقعدت جنبه :
_ متتاخرش ع يوم الافتتاح بقى
_ اكيد يعنى
_ مش ملاحظ حاجه يااحمد
_ ايه؟
_ مامتك بقالها فتره كبيره مبقتش تتكلم عن الاطفال قدامى زى الاول انت قولتلها حاجه
_ لا هقولها ايه ؟
_ يعنى ع اساس ان الكلام ممكن يضايقنى وكده انا قولتلك انا مبقتش ازعل من كلامها لانى بعتبرها امى زيك فلو كنت كلمتها كده بليز متخليهاش تكون مربوطه فى كلامها معايا خليها تكون ع راحتها انا مش بزعل والله منها
_ لا يا حبيببتى انا مقولتلهاش حاجه وغلاوتك وبعدين ممكن تلاقيها زهقت وتعبت حكم السن بقى
_ ماتخليها تيجى تقعد معانا ولا احنا نروح نقعد معاها
 اتوتر واتفاجى وبسرعه : لالالا هى مرتاحه فى بيتها انتى عارفه ,, انا هقوم انام
_ والشاى
_ معلش  اشربيه انتى
 سابها ودخل غرفه النوم بصتله "سميه": اشربه هو عارف انا مبشربش الشاى مسكر كده ..
,تصرفات "احمد"كانت غريبه قبل الافتتاح بيومين  لكن كان احدى توقعاتها انه هيعملها مفاجاءه من مفاجاءاته يوم الاحتفال وبيجهزها ومش عاوزها تعرف ابتسمت علشان كده مكنتش بتتكلم  وكانت فى انتظار المفاجاءه ..!

يوم الافتتاح كان كل حاجه جاهزه ووقفت "نضال" و "سميه" فى استقبال المدعووين واطفالهم و"احمد" اتاخر وملامحها اتغيرت وهى واقفه وبتبص على الساعه  قربت منها "نضال" :
_ مالك يا سمسم الناس بيسألو عليكى تعالى اتكلمى معايا
_ احمد اتاخر اوى ومامته  والساعه قربت على 9
_ متقلقيش تلاقيه مجهزلك مفاجاءه من مفاجاءته فى اخر الحفله وبعدين اول مره اسمع ان واحده مستنيه حماتها واهل جوزها يا بنتى دول مبيحبوكيش متستنيش حاجه منهم
ملامح"سميه" اتغيرت ونبره صوتها : نضال دول اهلى مينفعش تتكلمى عليهم كده وبعدين مفيش حد فيهم غلط فيا ولو غلطوا بيبقى عادى زى اى خلافات بين العيله ,,ماهو انتى ع طول فى خناق مع اهل جوزك
_ بهزر معاكى يا بنتى قفشتى كده ليه
_ انا اسفه ..بس عدم وجود احمد معايا فى يوم مهم كده موترنى وقلقنى
_ طيب كلميه
_ طول اليوم رد مرتين عليا ومن بعدها بيكنسل ودلواقتى مقفول
_ خلاص ان شاء الله خير وهتلاقيه ظهر فى اى لحظه كده ,,روقى كده وتعالى قابلى معايا الناس
_ حاضر روحى انتى ودقيقه هكون معاكى
 مشيت "نضال" ورجعت "سميه" عينيها على الشارع والساعه وبتقول "يارب خير "

مرت ساعتين والحفله بتخلص كانت الساعه 11 ,, ظهر "احمد" وملامح وجهه متغيره
_ انا اسف اسف جدا يا سميه
_ فاكر تيجى دلواقتى
مسك ايديها  وباسهم: بجد اسف جدااا متعرفيش اللى حصل
_ واعرف منين وانت مبتردش وع طول بتكنسل ومامتك موبيلها مقفول
_ ماما تعبت واتصلوا بيا وانا خارج من الشغل ومعرفتش اعمل اى حاجه روحت ع البيت ع طول
 ملامح "سميه" اتغيرت من زعل ل خضه : ماما .. مالها حصل ايه ؟
_ السكر على عليها لكن الحمد الله مسبتهاش غير لما ظبطت كل حاجه واطمنت عليها
مسكت ايده : يلا بينا اروح اطمن عليها
شدها : لا لا استنى هى نايمه ومرتاحه دلواقتى
_ وسايبها لوحدها يا "احمد"  فى البيت لا تعالى نروح نقعد معاها او هى تيجى تقعد معانا
_لا ما "مروه" معاها وهطمن عليها دايما متقلقيش
_ طيب الحمد الله ,,ان شاء الله من بدرى هروحلها اطمن عليها
_ هتروحيلها ازاى مش بكره اول يوم للحضانه
_ فى داهيه الحضانه المهم ماما نطمن عليها وهفضل قاعده معاها اعملها اللى هى عاوزاه
 ضمها لصدره وضمها : انا بحبك اوى يا سميه بحبك اووى
حضنته "سميه": وانا اكتر

رجعوا ع البيت ودخلت "سميه" الحمام تاخد شاور ودخل"احمد" غرفه المكتب :
_ ايوه يا ماما
_ خير يا حبيبى حصل حاجه "سميه" زعلت منك
_ لالا الموضوع عدى على خير بس هى احتمال تجيلك بكره
_ ملوش لازمه تيجى هتيجى ليه بقى ؟
_ عادى يا ماما قلقت وعاوزه تطمن انتى عارفه مش هتطمن غير لما تشوفك قدامها ,, المهم زى ما اتفقنا ماشى متزوديش حاجه
_ ماشى يا حبيبى متقلقش ..
_ و مروه عامله ايه دلواقتى  ويوسف
_ حلوووين يا حبيبى انا عارفه انى قلقتك لما سخن يوسف 
_ متقوليش كده اى وقت كلمونى انا لو عليا مسبهوش انهارده لكن "سميه"
_ ماشى يا حبيبى يلا ادخل نام انت
 قفل "احمد" مع مامته وقفل الموبيل خالص وحطه ع المكتب ورجع براسه ع الكرسى واتنهد  وابتسم : الحمد الله ..الحمد الله

 تانى يوم حضرت الفطار "سميه" وكانت جاهزه وحاول "احمد" يقنعها متروحش ل مامته مكنتش راضيه ومصممه نزلت معاه فى طريقه وصلها ونزلت من العربيه وسمعته بينده عليها :
_ سميه
_ ايوه
_ استنى هطلع معاكى
_ هتتاخر كده على الشغل
_ يعنى انتى سايبه شغلك علشان تتطمنى على ماما وانا اروح الشغل هتصل اخد اجازه
ابتسمت"سميه": اوكيه
 طلعوا وخبطوا على الباب فتحت ليهم "مروه " رحبت ب "سميه" و "احمد":
_ سميه .. ايه اخبارك ؟
_ الحمد الله .. انتى عامله ايه ؟
_ الحمد الله اوى
استغربت"سميه" من ملامح واسلوب "مروه" وادخل "احمد" فى الحوار :
_ ماما فين يا مروه ؟
_ فى اوضتها لسه واخده علاجها
_ طيب يلا ندخلها يا "سميه "
 لسه هتتكلم"سميه" مسك احمد ايديها وشدها ودخلوا غرفه مامته وكانت قاعده على السرير :
_ صباح الخير يا ماما
 بصوت مرهق: صباح الخير يا حبايبى
قربت منها "سميه" : الف سلامه عليكى يا ماما
_ ليه تتعبى نفسك وتيجى بدرى كده وانهارده اول يوم لشغلك
_ اى حاجه تانيه مش مهمه المهم صحتك يا ماما
_ حبيببتى تسلميلى وبجد كان نفسى اكون معاكى امبارح لكن اللى حصل بقى
 _ المهم صحتك يا ماما انا لو كنت اعرف كنت جيتلك والله
_ حبيببتى تسلميلى
دخلت "مروه" ومعاها صينيه الشاى وبسرعه قرب منها "احمد" ومسك الصينيه واستغربت "سميه" من تصرفه  ولاحظ "احمد" انها لحظته وحاول يستجمع نفسه وبيحط الصينيه :
_ اصل "مروه" من امبارح مع ماما ومنمتش طول الليل ف اكيد تعبانه ولا ايه
بصتله "سميه": اها .. بجد مش عارفين نقولك ايه يا "مروه"
ابتسمت"مروه": متقوليش حاجه يا حبيببتى انا مستعده اعمل اكتر من كده
بصت"سميه" ل حماتها : انتى تيجى معانا يا ماما البيت وانا مش هسيبك لحظه
_ لا يا حبيبتى انا مش هسيب بيتى انتى عارفه
_ طيب احنا نيجى نقعد معاكى مينفعش تقعدى لوحدك
 ضحكت "مروه" ضحكه سخريه: تقعد لوحدها .. انتى مش شايفانى ولا ايه يا "سميه"
انتبهت"سميه": لا مقصدش بس اكيد انتى هترجعى البلد هتسيبى خالتو لوحدها
_ لا متقلقيش على ماما انا قولتلها انا هقعد مع خالتو وشكلى مطوله مش عاوزاكى تقلقى عليها
_ اكيد مفيش قلق انتى بنت اختها فى الاول والاخر
_ واكتر وغلاوتك
 الكل اتفاجئ من كلام "مروه " وكملت كلامها : فى مقام بنتها يعنى
دخلت "ام احمد" فى الكلام وغيرت الموضوع : وبعدين انتى لسه فاتحه مشروعك مينفعش تهمليه فى الاول كده
_ "نضال"  موجوده وهتحافظ عليه اكتر من اى حد
 دخلت "مروه" فى الكلام : فى الايام دى مينفعش تأمنى ل اى حد حتى لو كان اقرب حد ليكى ,,الطعنه مبتجيش غير منهم لانك بتكونى مطمنالهم
 قاطع "احمد" كلام "مروه": المهم يا ماما انتظمى انتى على علاجك وانا هبقى امر عليكى تانى
_ ماشى يا حبيبى .. يلا خد "سميه" علشان تروح شغلها انهارده اول يوم
_ماشى يا ماما
 خرجوا ونزلوا وركبوا العربيه :
_ هى "مروه" مالها ياا احمد متغيره خالص
_ لا مفيش هو موضوع طلاقها مأثر فى نفسيتها
_ طلاقها اللى من 8 شهور لسه مأثر فيها ؟
_ انتى عارفه بقى هى قاعده فى الارياف ونظريه الارياف للمطلقه او الارمله بتبقى ازاى
_ على اساس انه ذنبها هى ,, مسألوش نفسهم مره اذا كانت هى سعيده ولا لا ,, ايه السبب اللى خلاها تتطلق ,, ليه يحكموا حكم مسبق كده ويتعبوا انسانه ملهاش ذنب غير انها اختارت غلط مره ويحكموا عليها بالعذاب من نظراتهم وكلامهم ..
_ هتعملى ايه عقليات زباله ,,
_ ربنا ان شاء الله هيعوضها بشخص احسن وحياه احسن
_ ان شاء الله .. ممكن طلب ؟
_ يااااه انت أومرنى ..
_ حبيببتى انا ,, انا بس مش عاوزك تركزى مع "مروه" لا كلامها ولا افعالها ,, بصى عامليها انها مريضه نفسيه مش بيقولوا ليس على المريض حرج ..
ضحكت"سميه": ليه بتقول كده ,,ومينفعش تقول عليها مريضه نفسيه دى انسانه
_علشان بس هى بتحدف كلام دبش مش فاهماه واللى قدامها بيبقى مش فاهمها وانا مش عاوزك تزعلى ولا تتضايقى ..
_ لا متشغلش بالك انتم عيلتى الوحيده يا "ااحمد" ومينفعش ازعل منكم مهما حصل
 مسك ايديها "احمد" وباسها: ربنا يخليكى ليا
_ ويخليك ليا يا حبيبى

وصلها "احمد" لمكان الحضانه ودخلت وكانت "نضال" قاعده فى المكتب :
_ سميه .. ايه جابك مش قولتيلى هتقعدى عند حماتك حبيببتك طول اليوم
ضحكت "سميه": عسل يا نضال وانتى بتتريقى وبتتكى على حرف الياء ,,ايوه حماتى حبيببتى وام حبيبى
ضحكت"نضال": يا بختهم بيكى ,, انتى شكلك اخدتى جرعه حب ع الصبح انتى كنتى بتزورى حماتك ولا روحتى فين انتى وجوزك
 ضحكت"سميه": كنت عند حماتى والله ,,بس ميمنعش يعنى ان كان فى تخاطيف كده
 _ يارب يزيدك يا حبيببتى ,, مش "اشرف" بيهتم بكرشه اكتر منى
_ بس بيحبك
_ ماهو انا متنيله وبحبه اخر صبرى وابو عيالى ,,
_ ربنا يخليكم لبعض ..

استمرت "سميه" فى شغلها واهتمامها قسمته بين شغلها و"احمد" ومامته لغايه ما اطمنت عليها خالص وكانت بتتصل بس بيها يوميا وتروحلها زياره كل اسبوع فى اجازتها وشرط عليها "احمد" انه يكون موجود معاها ومترحش .. ولاحظت "اختفاء" مروه" فتره ومركزتش لما عرفت انها رجعت قعدت مع مامتها وبعدها سمعت انها اتجوزت من غير ما تعزم حد ....!
فى يوم وهى فى الحضانه قاعده سرحانه حطت قدامها "نضال" كوبايه الشاى :
_ خير سرحانه فى ايه ؟
_ لا مفيش
بصت حواليها "نضال": فى حاجه هنا مش مظبوطه ولا بتفكرى فى افتكاسه لعيد ميلاد اللى جى
_ لا انا محضره كل حاجه ..
_ امممم .. يبقى البيت فى ايه بقى ؟
_ الشهريين الاخريين احمد بقى بيتكلم فى الموبيل كتير بصوت واطى اكتر من الاول
_ يمكن علشان عارف انك بترجعى تعبانه الفتره الاخيره ضغط الشغل زاد ماشاء الله وانتى مبتسبيش اى حفله غير لما تخلص الراجل حسيس
_ ومامته ,, مبقتش تكلمنى خالص ولا تلمح وترمى كلام الدبش بتاع الاطفال وكده خالص
_ تلاقيها استسلمت وعرفت ان "احمد" متمسك بيكى وعاوزك انتى والست كبيره فى السن معندهاش صحه لمهاتيه يعنى ..
_ بجد كده ..؟
_ يعنى هيكون ايه يعنى ,, احمد متجوز عليكى ومخبى وحماتك عارفه وسكتت يا شيخه بطلى وسوسه .. انتى وهو بتحبوا بعض  واكتر من سنتين  اهو حياتكم زى الفل
_ يعنى مش ممكن يكون زهق من حياته معايا واشتاق ل الاطفال و ..
_ ايه الفيلم العربى القديم دا يا امينه رزق ,, روقى كده ومتنكديش على نفسك لان النكد ما بيصدق يدخل ولما بيدخل مبيخرجش ,,متديلهوش فرصه
_ طيب ..
 مسكت كوبايه الشاى وشربتها ... !

مر فتره والوضع زى ماهو "احمد" بيتاخر وبعد فتره ابتدا "احمد" يبات بره البيت وكان بيقول ل "سميه" انه فى مأموريه للشغل وكانت بتتصل ب الشغل ويقولولها كده .. كان ب يبات بره البيت ليله مع مرور الوقت الليله بقت ليليتين فى الاسبوع بجانب رجوعه متاخر وكل ما تسأله يقولها فى الشغل .. فى  يوم وهما قاعدين يتعشو :
_ سميه فاضيه بكره ساعتين ؟
ابتسمت "سميه" : لو مش فاضيه افضالك اكيد بس ليه
_عاوزك فى مشوار معايا كده مش هعرف اعمله لوحدى
_ خير
_ المدير بتاعى ربنا رزقه بطفل وعازمنا على عقيقه  وعاوز اشترى هديه للطفل وانتى عارفه انا معرفش حاجه وانتى بقى بتعاملك مع الاطفال وكده هتتعرفى اكتر منى
 ابتسمت "سميه": حاضر ..عاوزنى على الساعه كام
_ انا هعدى عليكى فى الحضانه
_ اوكيه .. وانا هستناك
تانى يوم اتصل بيها واتجهوا لمول ودخلوا محل هدايا وكل مستلزمات الاطفال حديثى الولاده سالته "سميه" على عمر الطفل بالظبط قالها 4 شهور  وكانت "سميه" بتختار حاجات كتير ولاحظت "احمد" انه كان مبسوط بالحاجات اوى واستغربت من فرحته للحاجات دى وحيرته فى اختيار حاجه ,, اشترى 4 حاجات :
_ احمد .. 4 حاجات كتير دا غير انها مش رخيصه
_ مش مهم
_ ايه ؟
_ اقصد انا 3 من اصحابى قالولى اشتريلهم معايا وهيحاسبونى عليهم
_اها .. بس بجد عجبوك
_ كل حاجه جميله واللى اخترتيهم اجمل لو عليا اشترى المحل كله
ضحكت"سميه": اللى يشوفك يقول انك بتشترى ل ابنك
 اتفاجئ "احمد" من رد فعله واتوتر للحظات وابتسم : زى ماانتى بتكونى فرحانه لما بتكونى مع الاطفال وتفرحيهم بحفلاتك وهداياكى انا كمان بفرح لما بشترى هديه ل اى طفل مهما كان ابن مين ..

باس راسها واتجهوا للكاشير ورجعها على الحضانه ومشى ودخلت الحضانه :
_ خلصتى بسرعه كده انا قولت هيستغل خروجك وتزوغوا سوا
_ انهارده عقيقه ابن مديره وهيقابل اصحابه ياخدهم معاه وكده
_ ومرحوتيش ليه معاه هوعلشان  عقيقه ولد بقى  للرجال فقط
ضحكت "سميه": فقريه ,, انا معنديش مشاكل بس "احمد" قالى مش هرتاح لان علاقتى مع مرتات زمياله مش قد كده وكلامهم مش ظريف وخايف اسمع كلام يضايقنى فقالى هيعمل الواجب ويمشى ..
_ طيب ابو الواجب اشترى هديه محترمه ولا استرخص
_ لا بالعكس اشترى حاجات غاليه جدااا ,, تشوفيه تقولى بيشتريها ل ابنه فرحته بيهم فرحه اب بيشترى هدايا ل ابنه
_ المهم ميكسفكيش قدام اصحابه
_ لا خالص اشترى له ول 3 اصحاب معاه هيقابلهم وهيروحوا
_ يعنى يا سمسمتى هتتغدى لوحديكى
_ اها ..
_ لا مينفعش "اشرف" هياخد العيال ويروح لحماتى وانا هقعد معاكى نلغوص اكل من الشارع تضربى شاروما ولا كبده 
_ مشطشه
_ مشطشه واكسترا جبنه وكاتشب

مر سنه والوضع زى ماهو وبين فتره والتانيه "احمد" يطلب من "سميه" تنزل معاه  يشترى هدايا ل اطفال  ولحظت انهم بيكونوا ل اولاد مش بنات وكان بيشترى هدايا حريمى وكانت تسأله يرد عليها " انا بحب الاولاد اكتر وبفرح بولادتهم وحاجات الحريمى بتبقى هديه ل ام الطفل كتعبير امتنان ليها يعنى " كانت بتسكت ... ومع مرور الوقت غياب "احمد" عن البيت اصبح بالايام بمعنى يبات يومين ويرجع متاخر فى اغلب الاوقات ينام ويصحى ينزل كلامهم قل عن الاول ... !
فى يوم قررت تروح تزور مامته وتتكلم معاها تشكيلها ,, وكانت زياره بدون اعلام مسبق ,, رنت الجرس فتحت ليها الباب "مروه" وهى شايله بين ايديها طفل ,,ملامح مروه اتغيرت وب ابتسامه من "سميه" دخلت وسلمت عليها بترحاب  وبصت للطفل وهو نايم :
_ ماشاء الله ,,الله اكبر ابنك دا يا "مروه "
بتهته: ايوه ابنى انا ايوه ..
_ ممكن اشيله ؟
بتردد قربت الطفل من "سميه" و"سميه" شالته بحب وب ابتسامه واستمرت فى ترديد جمله "ماشاء الله  الله اكبر " اسمه ايه بقى ؟
ردت "مروه": يوسف .. يوسف
_ الله اسم جميل للطفل اجمل ربنا يباركلك فيه هو وباباها هو هنا
_ لا لا هو مسافر وانا هنا يومين وراجعه على البلد
فى الوقت دا سمعوا صوت ام احمد : مين يا "مروه "
_ دى "سميه" يا خالتو
 وقفت مامت احمد وقربت لباب الشقه وملامح وشها متغيره : "سميه" ايه اللى جابك ؟
 استغربت"سميه" من الكلام : هو مينفعش اجى ..؟
_لا لا لا يا حبيبتى اقصد يعنى تعالى ادخلى اقعدى
 شافتها وهى شاليه "يوسف" ومبسوطه وقعدت وبتهته  : يوسف ابن مروه وجوزها فى ماموريه فى القاهره وقاعدين معايا يومين
_ ماموريه .. دى مروه قالتلى مسافر
اتوترت"ام احمد": ها .. اها يبقى سافر هى ادرى بجوزها بقى ,,"احمد" عارف انك جايه هنا
_ لا انا قولت اقعد معاكى شويا يا ماما محتاجه اتكلم معاكى
_ خير يا حبيببتى اتكلمى
 قربت منها "مروه" هاتى يوسف واقعدوا براحتكم
_ لا سبيه شويا انا مرتاحه متقلقيش عليا
_ طيب هقوم اعملكم شاى
 قامت "مروه "  وابتدا حوار بين "سميه" ومامت احمد :
_ خير يا سميه يا بنتى فى حاجه ؟
_ بصراحه يا ماما انا معنديش حد فى الدنيا غيركم لانكم اهلى وعيلتى الوحيده
_ طبعا يا بنتى
_ واحمد اول ما قالولنا احنا لبعض انا بنيت حياتى وايام كلها بوجوده معايا
_ ربنا يخليكوا لبعض يا حبيببتى وهو معاكى هيروح فين يعنى
_ احمد مش معايا ,, بقاله فتره طويله متغير جدااا كلامه قل وبيسافر كتير مش عارفه
_ شغله .. مش بيسافر علشان شغله
_ ايوه قالى كده وانه بيحسن من دخله رغم اننا الحمد الله عايشين كويس جدااا ومعايا فلوس ومش محتاجين حاجه
_ البحر بيحب الذياده وانتى متعرفيش بكره شايل ايه ممكن تتزنقوا وتحتاجوا هو بيعمل للمستقبل
_ لكن هعيش معاه وهو مضيع عمره فى الشغل وبيجمع فلوس اومال هنعيش مع بعض امتى ,, انا اتجوزت احمد علشان عاوزه اعيش معاه مش اسمى واسمه يتكتب فى ورقه وختم يقول اننا متجوزين ,, انا عاوزه حياه وهو شايف ان الفلوس اهم ..
_ الدنيا بتغلى وهو بيعمل حساب بعدين
_ انا عاوزه اعيش دلواقتى باللى موجود دلواقتى انا مش ضامنه هعيش بكره ولا لا
_ خلاص انا هتكلم معاه
_ ياريت يا ماما ومتقوليش له انى قولتلك حاجه
_ اكيد يا بنتى
_ انا هقوم بقى
_ ماشى يا حبيببتى
ضحكت"سميه": ممسكتيش فيا على الغدا يعنى
_ يوووه يقطعنى  ثوانى والغدا يكون موجود
 ضحكت "سميه" وقربت منها وباست راسها : ربنا يخليكى لينا انا بهزر اخر الاسبوع هاجى وانا اللى هعمل الاكل ..
دخلت"مروه" بصينيه الشاى : والشاى
_ اشربيه انتى وماما بقى علشان هتاخر على "نضال" ,, ومدام انتى هنا خليكى ل اخر الاسبوع علشان مشبعتش من ابنك العسل دا ويكون جوزك موجود نتعرف عليه
_ ان شاء الله

نزلت"سميه " واتجهت على الحضانه ورغم ان كلام مامت احمد مدهاش حل لكن مجرد فضفضتها معاها لانها عارفه ان مامته كلام مؤثر فيه,,
مر اسبوع عادى جداااا لوقت العزومه عند مامت احمد اخدت "سميه" اجازه وراحت من اول اليوم وكانت هناك "مروه" :
_ فين جوزك مش اتفقنا انه يكون هنا ؟
_ لسه مرجعش بقى ولما يرجع اكيد هيتعرف عليكوا
_ طيب هاتى الولد الحلو دا
 قربت "يوسف" من "سميه" وحضنته وباسته  وبصت على هدومه :
_ مين اللى جايبلك الطقم الحلو دا ماما صح
ضحكت"مروه": ماما ايه هى ماما تعرف تمشى لغايه اول الشارع ,,دا باباها كل ما يرجع من سفر يكون جايب حاجات كتير كده
_ اها وباين ليكى كمان جميله العبايه دى ؟
_ ميرسى اتفضليها
_ لا يا حبيببتى تسلملى .. بس تعرفى بس هى اكيد صدفه
_ ايه ؟
_ الطقم دا وطقم اللى كان لبسه يوسف المره اللى فاتت حتى العبايه انا اشتريت زيهم مع احمد ل ابن زميله فى الشغل ومراته
 اتوترت "مروه": بجد .. انا مكنتش اعرف
ضحكت"سميه": لا عادى ماهو موجود فى كل مكان.. وواضح ان بابا يوسف بيحبكم لانه مبيسترخصش فيكم حاجه
_ بصراحه هو بيشتريلنا حاجات كتير
_ ربنا يخليكوا لبعض
_ تسلمى ..هاتى يوسف بقى اغيرله وااكله
_ ماشى وانا هدخل اكمل الاكل "احمد" قرب يوصل
 دخلت "مروه " بسرعه غيرت ل "يوسف" لطقم  غير اطقم اللى احمد اشتراه وهى كمان وهى بتاكل "يوسف" كل ما تحط اكل فى بوقه يرجعه وبيعيط حطت ايديها على راسه كان  سخن خرجت من الغرفه :خالتى الحقينى يا خالتى
_ فى ايه يا "مروه"
 بتعيط "مروه" : يوسف يا خالتى سخن وبيعيط
_ متخافيش تلاقيه دور سخنيه بتاع الاطفال دا
خرجت" سميه" بسرعه من المطبخ : فى ايه ..؟
 بتعيط "مروه": يوسف سخن اووى
متقلقيش يابنتى قولتلك دور سخنيه بسيط هياخد علاج السخنيه ويخف
 مسكته "سميه" وشافت حبوب ع جسمه : لا يا ماما مينفعش ياخد اى حاجه دا يروح لمستشفى حالا
_ ليه ..
_ كان فى طفل عندنا سخن وتعب وعرفنا انه جاله دور الحصبه
 بعصبيه اتكلمت ام احمد: متفوليش عليه يا شيخه اسكتى
 مروه بتعيط : ابنى هيروح منى الحقينى يا خالتى  كلمى احمد يجى دلواقتى
 اتفادجئت من طلب "مروه" الملح ع الاتصال ب احمد : يلا بينا  انا معايا عربيه ونطمن
 اتصلت مامته به وقالتله على مكان المستشفى ودخلوا الاستقبال ومن الكشف المبدائى  عرفوا انه عنده الحصبه ولازم يتعزل عنهم ضرورى وعرفوا ان "سميه" كانت صح وكانوا طالبين نوع حقنه مش موجود اخدت سميه الروشته وخرجت بسرعه تجيبها من صيداليه كبيره وفى رجوعها كان "احمد" وصل  بتركن العربيه ونزلت علشان تلحقه ملحقتهوش كان داخل وملامح وشه كلها خوف ورعب ومش حاسس وبيخبط فى الناس دخل ل امه و مروه كانوا بيعيطوا اتخض منهم وخرجت الممرضه :
_ مين ولى امر الطفل
رد احمد : انا ابوه
 وقفت "سميه" مكانها من الكلمه لكن فى لحظه كدبت اللى سمعته وقالت " اكيد يقصد انه زى باباه علشان باباه مسافر " كملت الممرضه كلامها
_ اسم الطفل بالكامل لو سمحت ؟
 فى اللحظه دى احمد قال " يوسف احمد عبد العظيم "
 الشنطه من ايد "سميه وقعت ووقفت فى حاله ذهول من الصدمه ...!
_________
يتبع