رجعت "حبيبه" بعد ما سمعت حكايه "جى وو" مع والده ..مكنتش عارفه تعمل ايه احساسها انه مظلوم لانه اتحرم من والده وهو عايش ولا ظالم انه مش قادر يسامح والده برغم محاولاته .. رجعت البيت وهى فى حيره وهو مكنش موجود ..دخلت غرفتها تفكر وشافت رساله ع الموبيل من "ندى" وفتحت السكاى وكلمتها وكلمت باباها وحست انه اكتر حد هيفيدها وهيساعدها وحكتله القصه وقالها لازم الابن والاب يتقابلوا ويتكلموا مع بعض ..!
تانى يوم مكنش رجع "جى وو" من التصوير وفضلت "حبيبه" فى البيت لوحدها اخدت المفتاح ودخلت غرفه الكراكيب وشدت صندوق الل فيه الصور واوراق وقعدت ع الارض ومسكتهم ..كانوا عباره عن صور بين والده ووالدته وجددته والاغلب كان والده ووالدته وكان باين من صورهم قد ايه بيحبوا بعض وخصوصا الاب كان بيحب والدته وكان فى كروت ومكتوب فى ضهرها كلمات ورسايل بالانجليش وكانت رسايل حب بينهم .. اتنهدت "حبيبه" ومسكت صوره ل والده ووالدته :
_ انا شايفه "فؤاد" و "رجاء" النسخه الاجنبيه لكن قصتين مختلفتين واحد كمل حياته وعاش وعوض حبه ل مراته ل بنتها وركن ذكرياته معاها ليهم لوحدهم والتانى دفن نفسه معاها لما ماتت ونسى ابنه وفاق متاخر ... مشاكل الفراق فى الدنيا كلها وجعها واحد مفيش فرق ولا اختلاف ولا دين ولا ثقافه تفرقهم الوجع هو الوجع مهما مرت السنين ...
قامت ورجعت كل حاجه لمكانها وخرجت فى الليفنج علشان تاكل "ليزا " وقعدت جنبها ع الارض وبتحسس ع راسها :
_ "هالمونى" طلبت منى اتكلم مع "جى وو" واقنعه يقابل باباه ويتكلم معاه مش عارفه اعمل ايه .. ازاى هخليه هو وباباه يتقابلوا..ازاى هقنعه انه ضرورى يتكلم معاه ويسمعه .. ازاى هخليه بينتهز الفرصه علشان ميندمش عليها بعد كده .. ازاى يا ليزا ازاى ..
فضلت قاعده مستنياه كانت عاوزه تعتذرله وكل شويا تبص ع الباب والساعه ولاحظت انه اتاخر وعرفت انه مش هيرجع البيت انهارده دخلت غرفتها اخدت علاجها ونامت ... بعد 5 ساعات رجع "جى وو" ومعاه (دكبوكي) حطها فى المطبخ وجهز الراميون واتصل ب "حبيبه" صحيت :
_ انتى نايمه
_ لا فى حاجه
_ ممكن تخرجى 5 دقائق انا فى المطبخ
_ اوكيه
كانت متفاجئه ب اتصاله وخرجت وشافته واقف بيعمل الراميون ومبتسم :
_ الساعه 2 بليل
_ الجوع ملوش وقت ..
شافت علبه (الدبوكى) : وااااه (دكبوكي) ..
فرح ان "حبيبه" فرحت بالاكل : ومش حار وصلصته قليله
وابتدوا ياكلوا ومسك عيدان العصيان وحط فى طبق "حبيبه" (دكبوكى) من غير الصلصه :
_ انا اسف ..
_ ها
_ اسف انى زعقت ليكى
_ لا لا انا الل غلطت انا الل اسفه
_ لا مفيش اسف انا مقدرتش اتمالك نفسى ومن غير قصد اتعصبت .. اسف ..
سكتت "حبيبه" ومش عارفه تتكلم وتقول ايه حست الكلام محبوس مردتش تستغل الفرصه وتتكلم معاه لانها مش متوقعه رده فعله هتكون ازاى وملامح وشه مش مشجعاها .. خلصوا اكل وهو داخل ع الاستوديو شاف "حبيبه" لبسه جاكت وكوفيه وخارجه :
_ رايحه فين فى الوقت دا
_ هطلع الروف اشم بعد الاكل دا صعب انام
_ اها طيب ..
طلعت "حبيبه" وقعدت ع الكرسى وباصه ع السما والنجوم والمنظر الرائع وبتفكر وبتتنهد .. كان "جى وو" فى الاستوديو حس انه مش مركز راح مسك جاكت ولبسه ومسك بطانيه وجاكت تانى وطلع ع الروف شاف "حبيبه" برغم البرد قاعده راح حط عليها الجاكت وع رجلها البطانيه وطلع من جيوبه اكياس سخنه تدفيها وعمل اتنين مشروب دافى وقعد جنبها :
_ انت مش وراك شغل ..
ابتسم وهو باصص ع السما : اممم محبتش افوت المنظر دا اتعلمت انى امتع عينى بكل هدايا السما
ابتسمت "حبيبه" وبتبص ع الجاكت والبطانيه :شكرا
ابتسم "جى وو" وقام شغل الدفايه وولع النار وقعدوا هما الاتنين قاعدين ساكتين :
_ احكيلك حكايه بدل الصمت دا ؟
_ احكى ..
_ هتسمعها للاخر ..
_ اوكيه
_ اممم حكايه بنت ماخترتش انها تيجى فى الدنيا .. لكن نصيبها ومكتوب انها تيجى عاشت مع امها وجوز امها لان ابوها سابها وهى عمرها 3 سنوات ..سابها لوحدها فى الدنيا وتخبيط الدنيا ليها ولمامتها .. وبرغم القسوه والوجع والالم الل عاشوه لكن دايما كان فى ضوء امل جواها ان فى يوم الامور هتتصلح وعاشت مع جوز امها الل عوضها عن ابوها فى حنيته وطيبته وفعلا بقى ابوها برغم الناس كانوا بيندهوها ب اسم مامتها لكن مكنش بيهمها .. عاشت وكبرت ورغبه ملحه انها عاوزه تشوف والدها الحقيقى تسئله ليه عملت معانا كده وتسمع رده كانت سنين كتير بتفكر فى اللحظه دى وفى الوقت دا خسرت مامتها وعاشت مع جوز امها وعيلته وبقوا اكتر من عيلتها الل محدش فكر يسئل عنها ولا فكر ابوها يسئل عنها ... الدنيا مرحمتهاش من وجعها وقدرها عرفته لكن اصرارها تقابل باباها كان من اولوياتها عاوزه تشوفه بس مره واحده طلبت من جوز امها يدور علي مكانه بعد فتره عرفوا انه فى مستشفى بقاله اكتر من سنتين فى حاله حرجه .. راحت البنت للمستشفى ودخلت غرفته وشافت راجل كبير فى السن خارج منه سلوك كتيره ومحطوط تحت جهاز تنفس .. انسان لا حول له ولا قوه .. قربت منه مسكت ايده وقالتله " بابا .. انا مسامحاك وماما كمان مسامحاك " فى اللحظه دى كانت اخر انفاسه واتوفى برغم وجع الموقف لا انها كانت مرتاحه لانها قابلت باباها لمره واحده فى الدنيا قابلته وجملتها اختصرت كل اسئلتها عاشت راضيه بنصيبها وقدرها ومستسلمتش ...
مركز "جى وو" وكملت "حبيبه": عارف مين البنت دى ؟
_ مين ؟
ابتسمت "حبيبه" ودموعها نازله وبتمسحها : انا ..
_ انتى .
_ اها ..انا عشت تجربه فراق ام واب وانا صغيره .. اب تخلى عنى وام الموت خلاها تتخلى عنى .. انا لو مكنتش شوفت بابا فى الدقايق دى واتكلمت معاه كنت هندم انى محاولتش حتى اوصله حتى لو هو محاولش فرصه ظهرتلى وانتهزتها ..معرفش اسبابه وليه عمل كده اعتقد لو كنت شوفته بدرى كان هيقولى لكن لو كنت انا اتاخرت ومشوفتهوش كنت مش هرتاح عمرى..
سكت "جى وو".. كملت "حبيبه" وبصه ل "جي وو" : انت كمان قدامك فرصه مش لازم تضيعها لانك هتندم لو ضاعت ..
بصلها "جى وو": انا .. فرصه ايه ؟
_ انك تقابل والدك وتتكلم معاه وتكسر الحاجز الل بينكم علشان ترتاح
ملامح وشه اتغيرت : ايه الل بتقوليه دا انا معنديش اب
_ لا عندك وعايش والقدر بيبعتلك فرص انت محتاجها لكن بتعاند انت محتاج تسمعه وهو محتاج يسمعك انتم الاتنين محتاجين تشوفوا بعض عن قرب وكل واحد يقول الل سنين مخزناه
_ مستحيل انا اعتبرته مات ..
_ لكن هو حى ومحتاجك وانت محتاجه انا معرفش تفاصيل ومش عاوزه اعرف لكن الل واثقه منه وعارفاه انت محتاج تسمعه وتتكلم معاه .. صدقنى عندك هيندمك فى الاخر من هتخسر حاجه قابله لمره مره واحده وحاول تحط نفسك مكانه علاقته بمامتك قويه وبص فى الصور وجواباتهم لبعض هتشوف هى كانت عنده ايه ..لمده 10 سنين بيحاول يكلمك ويشوفك وانت رافض ..قابله واسمعه واتكلم قول الل جواك مخزنه السنين دى كلها ... حياتنا عباره عن غروب بعده بيكون فى شروق لكن فى وقت بنشوف الغروب وبيختفى وقت الشروق لابد .. العمر مفيهوش كتير علشان نضيعه الحياه عمرها قصير والندم مش هيرجع الل فات وقتها .. قابله مره واحده مش هتخسر ..
سكت "جى وو" وقام ونزل البيت ووقف بص ع غرفه الكراكيب للحظه وبعدها دخل غرفته و"حبيبه" قاعده بتعيد تفكيرها صح انها اتكلمت ولا لا ..!
بعد حوار "حبيبه" مع "جى وو" متكلموش تانى فى الموضوع مر يومين وكان بيتكلم معاها فى اى حاجه تانيه ... فى يوم رجع من بره وبيبص ع المطبخ شاف "حبيبه" ومعاها الاجوما :
_ اجوما
ب ابتسامه : انا عارفه اخدت اجازه طويله لكن خلاص رجعت ..
اتفاجى لان كده "حبيبه" هتمشى بص ل "حبيبه": يعنى ..
ابتسمت "حبيبه": ايوه اخيرا هتخلص منى انا كده مهمتى خلصت وكويس انى شوفتك اسلم عليك
ملامح وجهه اتغيرت : مينفعش تقعدى عادى فى غرف كتير البيت كبير ع اجوما وهتكون لوحدها ..(بص ل الاجوما) مش انتى ع طول كنتى بتقولى انك بتقعدى لوحدك و ..
قاطعته "حبيبه" وبتضحك: ايه دا انا قولت ما هتصدق .. انا كده خلصت مهمتى وبعتذر ع اى تصرف ضايقك اكيد غير مقصود ..
مسكت شنطتها : انا ماشيه باى ..
مسك ايديها "جى وو" وقفها : استنى
اتفاجئت وبصتله : ها ..
_ استنى هوصلك انا مش انتى رايحه المطعم بيت قريبك هناك
_ اها ..
_ ثوانى اغير وانزل اوصلك ..
دخل غرفته بسرعه والاجوما و "حبيبه" متفاجئين من تصرفه والاخص الاجوما :
_ "حبيبه" ..هو ايه حصله ؟
_ مش عارفه ..
خرج بسرعه وشال شنطتها وخرجوا حطها ف العربيه وفتحلها الباب وركب .. :
_ اربطى الحزام ..
"حبيبه" بتحاول ومكنتش عارفه لانها متعوودتش ع كده ف راح قرب منها هى اتفاجئت وتنحنت مكانها وقفل الحزام وبصلها وشه فى وشها بص فى عينيها : كده بيتقفل ..
"حبيبه" متصلبه مكانها : اه ..اه اوكيه اوكيه
رجع قعد ع الكرسى بتاعه وابتسم و"حبيبه" حست بقلبها دق بسرعه حاولت تهدى وهديت :
_ اكيد مبسوط انى انا مشيت خلاص
_ بصراحه اه هرجع لحياتى الطبيعيه
_ ايه ..
ضحك "جى وو": بهزر اكيد الل كان بيحصل مش هيتغيير
_ تمام ..
_ بس ابقى تعالى علشان "ليزا" صديقتك ولا مش عاوزه تشوفيها
_ لا اكيد هاجى طبعا
_ ابقى عرفينى وقت ما تكونى جايه
_ ليه .. اجوما هناك
_ علشان اقول ل اجوما متفتحش ليكى الباب اكيد
ضحكت "حبيبه" وضحك "جى وو" : حبيبه
_ ها ..
_ اى وقت عاوزه ترجعى مكانك موجود
_ اوكيه
واتكلموا لغايه ما وصلوا وكانت "حبيبه" مش عارفه تفك قفل الحزام وبتحاول :
_ مش عارفه تفتحيه افتحهولك
بسرعه: لالالا انا هفتحه اهو
وبتحاول مش عارفه هو ضحك ونزل من العربيه وفتح الباب وفتحلها القفل : كده
ابتسمت: شكرا ..
نزلت من العربيه ومسكت شنطتها : شكرا ع التوصيله
باصصلها : حبيبه
_ ايوه
_ احنا اصحاب
_ ها
_ يلا علشان الوقت ليل
مشيت ومتحركش غير لما شافها دخلت العماره .. رجع ع البيت ول اول لحظه دخوله حس بغرابه فى البيت وبيبص حواليه ودخل الاستوديو كان بيكتب اغنيه جديده ومكنش مجمع لبس هدومه وطلع ع الروف وقعد ع الكرسى الل كانت بتقعد عليه "حبيبه" وبص ل السما لغايه وقت الشروق .. !
دخلت "حبيبه" الشقه وكان "حسام " و "مى سون" رجعوا خلاص اول ما شافها "حسام :
_ حبيبه ياااااااه
حسام يااااااه
راح حضنها : وحتينى يا جزمه
_ وانت كمان يا معفن
"مى سون" واقفه مش فاهمه حاجه :
_ ميانيه (اسفه) اونى عامل ايه ؟
سلمت عليها وقعدوا "حسام" باصصلها :
_ ايه يا بت انتى قلوظتى كده ازاى هما كانوا بينفخوكى هناك هاهاهاها
مسكت مخده وحدفته بيها : يا نهارى ع خفه الدم يابنى هترجع مصر مترحل بالطريقه دى
ضحكوا ولاحظ "حسام" سكوتها : ايه مالك فى حاجه ولا ايه ؟
_ مش عارفه حاسه بحاجه كده لما سبت البيت هناك مش فاهمه ايه دا
_ هو دا الل كنت عامل حسابه
_ هو ايه ؟
_ انك يا بنت "فؤاد" تتعودى ع البيوت الواسعه وهتتنمردى ع بيتى الصغنن الاوزى دا
ضحكت "حبيبه": تصدق صح دى شقتك مساحتها الليفنج هناك
_ وبقينا بنقول ليفنج الله يرحم الانترررريه
ضحكت" حبيبه": انا هقوم انام مش هخلص
دخلت "حبيبه" تنام لكن معرفتش :
_ هو انا مش عارفه انام ليه يمكن علشان غبت عن المكان فتره ممكن ..
فضلت "حبيبه" تتقلب فى مكانها لغايه ما نامت ... تانى يوم نزلت المطعم الكل رحب بيها وفرحو برجوعها واكترهم كان "فيفى" .. مر يومين نفس الحاله "جى وو" الاكل يتحطله مبقاش يعرف ياكل ..يفتح التلاجه يشوف علب العصير زى ماهى .. كل يوم بليل يطلع ع الروف يقعد لوحده او يقعد فى الاستوديو بيتخيل وجود "حبيبه" ..حس بغرابه فى البيت بعد ما مشيت "حبيبه " تفكيره انحسر فى "حبيبه" وكل حاجه كانت بتعملها لدرجه انه قعد مع "ليزا" القطه وبيسالها كانوا بيتكلموا فى ايه .. تفكيره انشغل ب "حبيبه" كان هيعمل فان ميتنج وبيجهز ل اغنيه هيغنيها وقتها كل لحظاته مع "حبيبه" شغلت تفكيره طلع فى الروف وقعد ومسك ورقه وقلم وابتدا يكتب والابتسامه ع وجه ..!
فى يوم فى الاستوديو بيراجع كلمات الاغنيه شافه "مين سوك" وقرا كلمات الاغنيه :
_ انت الل كاتب الكلمات دى
_ اها
_ متاكد انت
_ مش مصدقنى
_ ايه الحكايه ..؟
_ حكايه ايه
_ من القليل لما تكتب كلمات اغانى لحفلاتك والكلمات دى خارجه من شخص فى قصه حب
_ عادى يعنى
مسك "مين سوك"الورقه : انت بتحب صح ؟
سكت "جى وو" للحظات وابتسم : لو الحاله الل انا فيها حب اوكيه
بملامح الاندهاش : حبيبه ..
ابتسم "جى وو" ولسه هيتكلم : اوعى تقول كده ل اى حد
_ ليه ؟
_ ليه ..." سى را" هتقلب الدنيا خليك معقد زى ماانت
_ انا حر هى ملهاش حق تتدخل فى حياتى اصلا هى صديقه بس
_اسمع الكلام لو مش عاوز حد يتأذى ركز فى شغلك
اتحدد موعد الفان ميتنج وكان مع "جى وو" 4 تذاكر طلب من "حبيبه" تاخدهم من البيت وراحت اخدتهم وكانت مبسوطه قررت تروح هى و فيفى وحسام و"مى سون" وكان حجزلهم صف الاول .. جهزت "حبيبه" وراحوا وقعدوا ارسلها رساله " اسمعى الاغنيه وقوليلى رأيك " استغربت من الرساله ومهتمتش ابتدا الفان ميتنج والفقرات وكانت اخر فقره الاغنيه الهديه :
_ الاغنيه دى انا كتبتها بنفسى كل حرف فيها كان مصدر سعاده ليا اتمنى انها تعجبكم ( بص ع حبيبه) اتمنى انها تعجبكم ...
محدش لاحظ وابتدت الاغنيه :
"
مرحبا الملـآاكـ انت كاللوحة فنيه ، عندما أنظر إلى السماء أستطيع أن أراك أنـتِ فقط
أضواء شوارع المدينه عندما تنطفئ الانوار ويختفي القمر، لا تزال مشرقة
لأنك النجم الذي نزل من السماء
انه أنـتِ
أضحك لسبب ما كل ليله
أغمض عيناي ولكننى لا أستطيع أن أغفو
أظل مستيقظا طوال الليل أفكر بك
ابتسامتك المشرقة تجعلنى أتنفس
هل أنـتِ على الأرجح تخفين أجنحتك خلف ظهرك
الجميع يمكنه الرؤيه بأنك ملاكى الوحيد
أستطيع التحليق أذا كنت برفقتك
انه أنـتِ
السماء أعطتك كل شئ والعالم اعطاكى لى
سوف أبقيك بجانبى لذا لا يمكنك الركض بعيدا الى السماء
سوف التقطك ..سوف اسجنك ..سوف اتمسك بك
السماء أعطتك كل شئ والعالم اعطاكى لى
سأحميكى لذا قلبك لن ينكسر او يتشقق
أعدك بأننى سأعيش لأجلك
أغلى جوهره فى السماء
لايمكنها ان تلمع مثلك
لا ترحلى بعيدا
ايمكنك البقاء سوف أحبك دائما ..انه أنـتِ "
كلمات الاغنيه حسست "حبيبه" بقشعره ودقات قلبها لان اغلب الاغنيه كان بيغنيها ويبصلها ..الجميع عجبته الاغنيه وطلبو يغنيها تانى وغناها .. خلصت الفان ميتنج وخرجت مشيت "حبيبه" بسرعه وارسلها رساله يسألها ع الاغنيه بعتتله كلمه واحده "جميله" هو استغرب من رده ... !
مر 10 ايام من بعد الفان ميتنج فى يوم و"حبيبه" فى المطعم اتصل بيها هى اتفاجئت اخدت موابيلها بعيد وردت :
_ الو ..
_ حبيبه علبه السيدهات الل لونها بنى مش لقيها
_ فين دى واجوما موجود و ..
قاطعها : انتى كنتى موجوده قبل ماهى ترجع ممكن تيجى البيت تدوريلى عليها محتاجها ضرورى
_ اوكيه بكره ممكن
_ لا دلواقتى انا عاوزها بليل اصلا
_ اوكيه ..
قفلت "حبيبه" وهى مستغربه استاذنت مقالتش رايحه فين قالت مشوار وقفل "جى وو" وع وشه ابتسامه وكان مبسوط جداا ان "حبيبه" هيشوفها .. والاجوما شايفاه خارج من غرفه الاستوديو معاه علبه دخل حطها فى غرفه نومه ورجع تانى ع الاستوديو مش فاهمه فيه ايه .. شويا ووصلت "حبيبه" ودخلت وكان هو فى غرفه الاستوديو سلمت ع الاجوما وخبطت ع باب الاستوديو وفتحت الباب ودخلت :
_ حبيبه انتى جيتى
_ اها .. سيدهات ايه الل لونها بنى
وقف محتار : سيديهات .. سيدهات كانت هنا
_ انا مبدخلش الاستوديو دا خالص ومعرفش مكانه فين
_ طيب ساعدينى ادور عليها مش احنا اصحاب
_ اوكيه
وابتدت تدور "حبيبه" ع السيديهات الل هى متعرفش اصلا شكلها ايه ووقف "جى وو" يبص عليها ومبتسم بصتله "حبيبه": دور معايا
_ اه ..اوكيه اوكيه ..
قعدوا يدورو وبعدين قعد : كفايه كده باين انها مش هنا ممكن تكون فى الاستوديو فى الوكاله و
بصتله "حبيبه": نعم .. ومدورتش هناك ليه ؟
_ها ..
_ اوكيه .. انا همشى بقى
مسك ايديها: استنى 10 دقايق موحشتكيش ليزا
_ اوكيه ..
خرجت "حبيبه" قعدت مع الاجوما وليزا و"جى وو" قاعد باصص عليها من غير ما يتكلم .. بصت فى ساعتها : انا همشى ..
_ استنى اوصلك
_ لا انا هاخد تاكسى
_ لا هوصلك استنى ..
مسك الجاكت وخرجوا وقفت "حبيبه" قدام باب العربيه : اركبى
_ اوكيه ..
دخلت وقعدت وحاولت تقفل الحزام واتكرر تانى انها مش عارفه ونفس الحركه قرب منها "جى وو" وقفله وبصلها وهو قريب منها وابتسم وحست قلبها دق اوى.. طول الطريق اتكلموا ووصلها ونزلت وقفها : حبيبه استنى
نزل من العربيه وفتح شنطه عربيته وطلع كرتونه فيها علب العصير
_ ايه دا
_ دا العصير نصيبك انا مش هقدر اشرب كل دا قسمته بينى وبينك كل يوم الصبح كل واحد فينا يشرب واحده دا لمده 30 يوم
متفاجئه "حبيبه": ليه تتعب نفسك
_ مفيش تعب يلا عاوزك تخلصيهم علشان اجيب غيرهم
ضحكت "حبيبه": شكرا
مشيت "حبيبه" وهى مستغربه تصرفه وهو واقف اتنهد ورجع ركب العربيه .. طلعت "حبيبه" البيت وشافها "حسام" :ايه دا
_ عصير تشرب
مسك علبه : هو انتى بتقبضى كام بالظبط اعتقد مرتبك ميكفيش نص الكرتونه دى ..
_ ليه يعنى
_ العصير دا مش من هنا دا من اليابان بيتعمل وبيبتباع بالطلب مفيد للصحه ومكلف
_ نعم
_ عموما ميرسى يا حبيببتى
مسك"حسام" الكرتونه ودخل المطبخ و"حبيبه" بتحاول تجمع ومش فاهمه .. !
استمر كل يومين يتصل بيها "جى وو" بيتلكك ب اى حاجه وتروح البيت وميكنش فى حاجه ويقعدها تاكل معاه من اكل هو بيطلبه مخصوص واغلبه اكل صحى وبعدها يوصلها للبيت ويديها حاجات اشتراها عصاير ومقويات حاولت ترفض لكن هو قالها انها بتشجعه يشربها هو كمان و"حسام" استغرب لما عرف منها وقالها ان دى يمكن طريقه شكر ع الل عملتيه معاه.. فى نفس الوقت لحظت "فيفى" غياب "حبيبه" من وسط اليوم ومتقولش ع المكان وتقول مشوار .. قلقت "فيفى" على "حبيبه" ممكن يكون شخص ضحك عليها فى كوريا فقررت فى يوم تراقبها .. ففى مره لما استاذنت "حبيبه" خرجت وراها "فيفى" ووصلت لغايه بيت "جى وو" كانت بتشبهه ع البيت فضلت واقفه لغايه ما خرجت "حبيبه" ومعاها "جى وو" وشافته "فيفى" ومكنتش مصدقه الل شايفاه .. ركبت تاكسى واستنت "حبيبه" قدام بيتها واتفاجئت بيها "حبيبه" وشافتها "فيفى" وهى ماسكه شنط ..!
_ فيفى ..
_ كنتى فين يا "حبيبه"؟
_ كنت فى مشوار
_ طيب تعالى عاوزاكى ..
اخدتها "فيفى" وقعدو فى كافيه ومكنتش عارفه تقولها ايه واتكلمت بصراحه :
_ انا شوفتك يا حبيبه
_ شوفتينى ازاى يعنى
_ شوفتك وانتى بتركبى العربيه مع الممثل "جى وو" مش مره لا مرتين
اتفاجئت"حبيبه": شوفتينى ازاى ؟
_ بصى انتى ممكن تزعلى ودا حقك لكن حقك عليا ان انا لو شوفتك بتغلطى انبهك واوجهك .. هنا التعارف بين الشباب والبنات سهل والارتباطات كتيره واغلبهم بيبقى فتره واقلب وانبهارك بالكوريين ميكونش سبب اى شاب شايف نفسه حلو ومشهور يعميكى ويدخلك فى علاقه معاه انا مش هسمحلك تمرى بالتجربه دى ..
_ فيفى ..
_ انا فاهمه ان دا انتى فان له وكتير يتمنو انهم ياخدوا توقيعه بس مينفعش انك تدخلى فى علاقه معاه وان حصل وطلعت اشاعه انتى الل هتتاذى وهتتبهدلى هنا معاملتهم وحشه الفانز بتوعه
ضحكت "حبيبه": فيفى .. فوقى كده واهدى انتى فاهمه غلط انا لا مرتبطه به ولا فى بينا حاجه
_ اومال بتركبى عربيته وبتروحى بيته ليه ؟
_ علشان ببساطه دا حفيد "هالمونى" الل كنت شغاله عنده
اتفاجئت "فيفى" ايه انتى قولتى رجل اعمال ؟
_ ماهو مكنش ينفع اقولك ولا اقول لحد لانه سر ولانها وسعت منك وممكن توسعيها قولت اعرفك بس دا سر محدش يعرفه غير حسام ومراته واهلى فى مصر وانتى صاحبتى
_ ماشى لو فرضنا كده ليه بيوصلك وبتروحى البيت مش قولتى خلاص ؟
_ اهو دا الل حاولت اعرفه ومعرفتش اوصل ل اجابه كل مره اروح فيها ملقيش الل هو عاوزه ويتحكم انه يوصلنى ويكون مجهز حاجات ليا كده فى شنطه العربيه ..
_ هو بيعمل مع الاجوما كده او اى حد يشتغل عنده ..؟
_ بصراحه مشفتش .. اصل هو قرر نبقى اصحاب فبيعاملنى ك اصحاب برغم انى موافقتش هو قرر من نفسه كده ..
_ وانتى مش بتمنعيه ليه ولا انتى مبسوطه ؟.
سكتت "حبيبه": مش عارفه .. هو غلط الل بيحصل ؟
سكتت"فيفى": مش عارفه ارد عليكى بصى هما 3 احتمالات .. ياام فعلا بيعاملك صحاب يااما معجب بيكى يا اما بيتسلى ملهاش غير دول
_ اكيد لاننا اصحاب
بصت "فيفى" فى عين "حبيبه" : ممكن بس دا ميمنعش انك مبسوط صح
ابتسمت "حبيبه": بصراحه اه بس احنا اصحاب ..
رجعت "حبيبه" ع البيت وكلام "فيفى" شغلها لكن حاولت متفكرش فيه وللحظه حست بتعب وحطت ايديها ع صدرها وحاولت تتنفس وقتها قررت متروحش البيت لو اتصل بيها تانى ... !
اتجاهلت "حبيبه" مكالمته مرتين ومر اسبوع من غير ما تشوفه ولا تروح البيت .."حبيبه" كانت بتنزل بدرى تتمشى الصبح فى مره خبطها "شخص لابس كاب وماسك وجاكت متخفى سابته ومشيت قرب منها : عادى كده تسيبنى امشى وانا الل خبطتك
الصوت مكنش غريب عليها نزل الماسك شويا واتفاجئت " جى وو
ابتسم : رياضه والهوا جميل جميل
وقفت : انت بتعمل ايه هنا وسط الزحمه دى والناس
شاور ع الماسك والكاب : دول بيعملوا ايه ..
_ انت بتعمل ايه ؟
مسكها من دراعها : يلا امشى انتى كده هتجمعى الناس حوالينا
ابتدت تتمشى وتحاول تجمع وحست بلغبطه :
_ مبترديش ع مكالماتى ليه ؟
_ لانها تضيع وقت
_ تضيع وقت
_ ايوه ..كل مره تكلمنى اروح وملقيش الحاجه الل عاوزها يااما تكون انت حاططها فى مكان تانى .. انت ليه بتطلبنى اروح البيت كتير انا مش فاهمه
_ بتوحشينى ..
وقفت "حبيبه" بصتله ومتفاجئه : ها ..
وقف ووقف قدامها وبصلها : بتوحشينى .. البيت بعد ما مشيتى اتحول لصحرا بعد ما كان حديقه كبيره .. مبعرفش اكل زى الاول ولا اعمل اى حاجه ..حتى ليزا اغلب الوقت قاعده مبتتحركش .. هدوء قاتل فى البيت بعد ما مشيتى .. كل يوم اطلع الروف واقعد وللحظه احس انك جنبى .. ملقتش قدامى غير انى اشوفك بدل ما اتجنن من الخيلات .. وبعرض عليكى شغل ترجعى البيت تانى ممكن ..
"حبيبه" مش قادره تستوعب ومش مجمعه وواقفه بصاله وساكته : ممكن نتكلم جد
ضحك"جى وو" : نتكلم جد .. اوكيه .. انا بقدملك وظيفه تشتغلى تانى فى البيت ومرتب 3 اضعاف الل كنتى بتاخديه
_ انا كنت بشتغل فى بيتك علشان اجوما مكنتش موجوده دلواقتى هى رجعت
_ هتكونى معاها .. عاوزك ترجعى روح البيت يا "حبيبه" واحنا اصدقاء ودا واجب اصداقه ..
ضحكت "حبيبه" : حلوه نكته ع الصبح مفيده للصحه
مشيت "حبيبه" مسكها من دراعها ووقفها وبنبره جد: انا مبهزرش وبتكلم بجد انتى عاوزانى استغل الفرصه واقابل بابا صح ؟
_ ايوه
_ لو عاوزانى اقابله ارجعى البيت
_ ها .. واقولهم ايه و ..
انا هتكلم مع "هالمونى" انهارده وانتى اجهزى بكره بالكتير الصبح تكونى فى البيت .. باى
وجرى "جى وو" و"حبيبه" واقفه مكانها مش مصدقه بصت حواليها الناس كانت بتعمل رياضه لفت ورجعت ع البيت .. شويا ونزلت المطعم وندهت عليها "الهالمونى" وطلبت منها ترجع البيت تساعد الاجوما فى اعمال المنزل وقالتلها ان الاجوما الل طلبت منها فمحبتش تحرجهم ووافقت ..
"حبيبه" مكنتش فاهمه حاجه وحاسه انها بتتسحب وهى مش حاسه اتكلمت مع "حسام" سابلها حريه الاختيار لكن فى المقابل اعترض "وليد وبشده .. اتصلت ب "جى وو" واعتذرت وقالتله يومين هتظبط امورها قالها " ع اخر الاسبوع فى عيد راس السنه القمريه(سولنال) بابا هيكون فى كوريا زى كل سنه يحتفل مع "هالمونى" وهو طلب يشوفنى لو مجتيش قبل كده انا مش هروح وانتى هتتحملى مسئوليه انى مرحتش اوكيه .. القرار معاكى .."
وقفل الموبيل وهو متاكد انها هترجع البيت لان من طبيعتها بتساعد غيرها وهى قفلت الموبيل وهى محتاره قعدت لوحدها فى غرفتها ساعتين وقامت قعدت ع السرير : هو انا متردده ليه دا شغل اه دا شغل ..
قامت جهزت شنطتها ووهى واقفه حست بكحه وداخت رجعت قعدت ع السرير تانى غمضت عينيها وبتاخد نفسها : ايه يا "حبيبه" لسه شويا متستسلميش دلواقتى لسه شويا
تانى يوم اتجهت ع المستشفى وقابلت دكتوره نورهان وحكتلها "حبيبه" ع الاعراض الاخيره ولاحظت نظرات "نورهان" المتوتره : قولى يا دكتور انا عارفه حالتى
_ بصراحه يا "حبيبه" مش عارفه اقول ايه اخر نتيجه لتحاليل والاشاعه مش مطمنه حالتك مع الوقت هتسوء جسمك ابتدا يرفض العلاج
ابتسمت "حبيبه" وبتبص ع جسمها : ليه كده يا جسمى انا عملتلك حاجه زعلتك
قامت "نورهان" وقعدت قدامها ومسكت ايديها : الحل الوحيد هو النقل ..
ابتسمت "حبيبه": وللاسف مفيش متبرع علشان يدينى جزء صغير من كبده علشان اقدر اعيش ولو اتاخر هيبقى زى قلته من الاخر هكون رجاء القرن 21
لحظت "حبيبه" بتحاول تضحك وببتدارى حزنها مسكت ايديها : هو فى حل ممكن يطول المده شويا لغايه ما يظهر متبرع بس مش اكيد
بصتلبها "حبيبه": حل .. حل ايه ؟
_ فى علاج جديد لسه نازل بس استخدامه محظور ل اثاره الجانبيه
_ مش فاهمه هيعمل ايه ..؟
_ هو بيساعد ع تجميد خلايا الورم ل اطول فتره لكن ..
_ لكن ايه ..
_ اثاره الجانبيه الهذيان وبيطول ( فقدان ذاكره )
سكتت "حبيبه ": علشان كده يا "حبيبه" متشجعتش علشان اقولك عليه لان "وليد" رفض بشده انى اقترح عليكى لانه عارف انك ممكن توافقى ..
بصتلها "حبيبه": احتمال نجاح مفعول العلاج ايه ؟
_ 70%
_ نسبه كويسه اهى ..
_ مش اكيده يا حبيبه دى هتعتبر تجربه يا هتنجح يا حالتك هتدهور وقتها ..
_ وقتها هكون بموت ..
_ حبيبه انا عاوزاكى متستسلميش انا بدور مع "وليد" و ..
وقفت "حبيبه" وابتسامتها ع وشها : انا مش هموت دلواقتى يعنى لسه قدامى وقت هفضل اخد العلاج ومش هخاف من الموت لان فى حاجات عاوزه اعملها .. وهفكر فى العلاج ..
مشيت "حبيبه" من المستشفى وخرجت قعدت ع ديسك قدام المستشفى وباصه للارض وبعدها بصت للسما : بسرعه كده مكانى جاهز انا مش معترضه لكن ممكن شويا وقت ..
تانى يوم جهزت نفسها واستجمعت شجاعتها وقفت قدام المرايه : هتقدرى يا "حبيبه" كملى ..
شالت شنطتها وخرجت وقفت تاكسى واتجهت للبيت قعدت مع الاجوما وبيتكلموا دخل البيت "جى وو" عادى واتفاجى ب "حبيبه" قاعده مع الاجوما واترسمت ع وشه ابتسامه : حبيبه ..
ابتسمت "حبيبه": انا جيت بمزاجى لان الاجوما كلمتنى مبتهددش انا
ضحك " جى وو " .. الاجوما : تتعشى ولا زى كل يوم
بكل بهجه : اكيد .. مش "حبيبه" هنا ..
دخل الغرفه يغير هدومه وكان فى منتهى السعاده ان "حبيبه" رجعت واستغربت الاجوما بتصرفاته :
_ اجوما ..مالك ..؟
_ من وقت ما رجعت اول مره اشوفه بيضحك وبيبتسم كده ..
ضحكت "حبيبه": بعد كده مش هتشوفيه غير كده لان هو يستحق كده
حضروا الاكل وقعدوا ياكلوا وكانوا بيضحكوا وبيتكلموا خلصوا ودخلوا ناموا .. !
والد "جى وو" وصل كوريا عند "هالمونى" و "جى وو" عرف و"حبيبه" عرفت وتانى يوم لغى اغلب مواعيده وخرج من غرفته وملامح جد ع وشه قربت منه "حبيبه " ومسكت ايده وحطت فيها شوكولاته وابتسمت وقفلت ع ايده وطبطبت عليه : هيمر اليوم اسمع وقول الل انت عاوزه اسمع ..
خرج "جى وو" وركب عربيته واتجه ل بيت جددته وقف كتير فى العربيه لكن اتشجع كلام "حبيبه" شجعه .. نزل من العربيه ودخل البيت خبط ع الباب ووالده فتح الباب وقف مكانه اتصلب .. والده شكله اتغير وكبر فى السن دخل وحنى راسه كتحيه وقعد كانت موجوده مرات ابوه واخوه الاصغر "جو وو " وكان بيحاول يبتسم خلصوا اكل وكان فى غرفه والده دخل "جى وو" شاف والده ماسك صوره والدته :
فضل واقف بصله والده : انت فاكر ان انا نسيت امك انا ولا لحظه نسيتها ولا قادر انساها
ولا نسيتك لانك ببساطه جزء منها وهى ضحت بروحها علشان تعيش انت
_ انا يعنى الل موتها
قرب منه : انا مقولتش ليك انك موتها القدر هو الل خطفها منى وانت كنت قدامى غصب عنى انفجرت فيك ..امك هى فكرت وقررت ونفذت وحطتنى قدام امر الواقع بالحمل وهى عارفه خطره عليها لكن هى حبت تسيبلى ذكره منها هى متعرفش ان انا عاوزها هى .. بعد ما اتوفت حسيت ان الحياه ملهاش قيمه ولا وجود كرهت كل حاجه فيها كرهت نفسى و كرهتها ..ايوه كرهتها انها سابتنى وهى عارفه انا بحبها قد ايه .. استسلمت ليأس والاكتئاب والعزله انت مكنتش المقصود انا كنت بعاقب نفسى انى مهتمتش بيها اكتر كنت لحقتها ..هى اهتمت بيا لدرجه نسيت نفسها .. انا كنت بعاقب نفسى ع اهمالى ليها لبعض وقت انشغالى .. 19 سنه كانوا عقاب انى مستحقش هديه جميله زيك تكون فى حياتى ..مستحقش انى اكون أب لان انا السبب انها ماتت .. انا عاقبت نفسى وعاقبتك معايا بحرمانك من الام ومن الاب .. عجزى ع قبول الحقيقه ورفضها هو الل وصلنى لكده .. وللاسف فوقت متاخر كنت انت رجعت كوريا ومن وقتها بحاول اوصلك وانت كنت رافض .. انا اسف .. اسف كل كل الوقت الل بعدت عنك فيه ..
بدموع نازله من "جى وو" : ببساطه كده .. 91 سنه عايش لوحدى كنت محتاج حضنك يطمنى .. لما كنت بشوف اصحابى وكل واحد معاه والده بيحضنه او لما يقع ع الارض بيلحقه او لما كان بيمرض بيبقى معاه .. حفلات المدرسه كل الحضور اهلهم وانا "هالمونى" كانت موجوده .. اقولك ايه .. اقولك انى كنت بحتاج وقت لما اقع اشوف ايد ممدوده ليا تقومنى .. لما امرض احس ب ايدك عليا .. دايما حسيت انى لوحدى .. انت عارف انا رجعت كوريا وقبلت ادخل التمثيل وهو اساسا مش رغبتى .. كنت بدور ع اهتمام .. كنت بدور ع حد لما اتعب يسئل عليا حد لما اعمل حاجه يشجعنى ويفرح ليا .. دورت مع الناس ع معنى الاب الل اتحرمت منه .. قد ايه كرهت وجودى فى الدنيا بسببك واتمنيت كنت اموت انا وهى تعيش علشانك ... ياريت كنت موت انا وهى عاشت ..
قرب والده وحضنه : اسف .. اسف "جى وو" اسف ع كل لحظه ووقت كنت بعيد ولوحدك
فى لحظه حضن والده له استسلم لحضنه وحضنه والاتنين كانوا بيبكو بشده ع كل لحظه بعدو فيها عن بعض ... !
رجع "جى وو" وكانت فى انتظاره "حبيبه" لكن لاحظت انه مدخلش ع البيت وطلع ع الروف لبست جاكت وطلعت ع الروف شافته قاعد وباصص ع السما قربت وقعدت جنبه : اليوم مر
_ اها .. مر اتكلمنا وكل واحد قال كل حاجه
_ حاسس ب ايه ..؟
اتنهد : امم راحه بوجع .. انى محاولتش افهمه وانه محاولش يخرج من عزلته ليا..
بصلها : عارفه ..
_ ها
_ وانا قبل ما ادخل كنت هرجع لكن فكرت فيكى والرضا والراحه الل انتى فيها حبيت اقلدك
ابتسمت "حبيبه": وعرفت
ابتسم: ممكن اقولك محاوله ناجحه نوعا ما
_ كويس
مسك ايديها وضمها باايده الاتنين : شكرا يا حبيبه .. شكرا لانك موجوده
ابتسمت "حبيبه" :فى اى وقت ..
ابتسمت "حبيبه" و "جى وو" كمان للحظات ارتبكت "حبيبه : يلا ننزل الجو برد اوى
_ اوكيه يلا
سابت ايده ونزلت جرى دخلت غرفتها وحست بدقات قلبها .. دخل "جى وو" غرفته ومسك ورق النوتس المترجمه وبص ع امنيات "حبيبه" وعلم ع "كونسرت stars " تانى يوم طلب من "مين سوك " تذاكرتين لحفله فرقه stars رجع ع البيت بليل ومعاه التذاكر مر يومين وميعاد الحفله رجع بدرى ع البيت ودخل : حبيبه البسى يلا
_ ها ليه
طلع تذاكر الحفله : كونسرت Stars انهارده هنحضره
"حبيبه" مكنتش مصدقه وقفت قدامه بصت ع التذاكر : دا بجد
_ بسرعه البسى
اتنطط : ثوانى هكون جاهزه ..
دخلت غرفتها وهى مبسوطه جداا ولبست بسرعه وخرجت وركبت العربيه وحاولت تقفل الحزام وقفلته وبصت ع الكنبه كان فيه بانر وحاجات خاصه بالكونسرت : ايه دا
_ كونسرت اكيد مش هنكون ايدينا فاضيه ...
فرحت "حبيبه" جدااا وفرح "جى وو" علشان شافها مبسوطه .. وصلوا الكونسرت و وابتدى وكانت "حبيبه" هايبر مع الفانز وفرحانه وبترقص وبتغنى حست بالوجع لكن مبينتش دخلت الحمام اخدت العلاج واتمالكت نفسها وخرجت كانت الحفله خلصت طلبت "حبيبه توقيع منهم اخدها "جى وو" واتجهه لغرفتهم وكانوا بيصوروا "جى وو" ودخلوا غرفه فرقه Stars واتصورت معاهم واخدت توقيع ليها ول ندى وكانت فرحان وهى راجعه فى الطريق وقفوا عند نهر الهان واستغربت "حبيبه " : ايه دا
_ هنتفرج ع العرض المائى
بصت ع الساعه كانت 2 بليل : بجد ...
_ اها يلا انزلى ..
وهى واقفه اشترالها غزل البنات وعصير وشوكولاته غامقه وبلونه على شكل نجمه وكانت فرحانه جدا وكان"جى وو" مش مركز فى اى حاجه غير انه يشوف "حبيبه" وهى بتضحك محبتش "حبيبه" تضيع اللحظه رغم تعبها اخدت علاج وشافها "جى وو" وهما قاعدين ع الديسك رمت راسها ع كتفه وعرف انها نامت شالها بهدوء وقعدها ع الكرسى وربط الحزام وحط الجاكت بتاعه عليها ووصلوا للبيت شالها ونايمها ع سريرها وقفل الباب ودخل غرفته مسك النوتس وعلم ع نهر الهان العرض المائى والحفله ابتسم ونام ..!
تانى يوم كانت فى صور ل "جى وو" انه حضر كونسرت ل STARS وكانت فى صور باينه فيها "حبيبه" شافتها "سى را" واتعصبت وكانت هى بره كوريا ومعرفتش تسافر كوريا .. فى يوم وهو قاعد فى الوكاله كان عاوز يشترى هديه ل حبيبه وفتح الانترنت وابتدى يقلب ولفت نظره سلسله رقائق الثلج شدت انتباهه واشتراها ..تانى يوم كانت وصلت ..اخدها رجع ع البيت ودور ع "حبيبه" مكنتش موجوده عرف من الاجوما انها فى الروف فطلع ع الروف شافها قاعده ع الكرسى قرب منها بهدوء شافها مده ايديها ورقائق التلج بتنزل فى ايديها وهى بتنفخها تبعد راح طلع السلسله وحطها فى ايديها : جربى تحركيها كده
اتفاجئت"حبيبه " : انا محستش بك انت جيت امتى وايه دا
_ جربى كده حركيها طيريها كده زى ما بتطيرى التلج
ضحكت "حبيبه" : كنت بلعب
_ جربى
ضحكت "حبيبه" وحاولت تنفخ : مبتتحركش
_ علشان ايدك سنداها ومش عاوزاها تقع ولا تتحرك
بصتله "حبيبه": انت اشترتها علشان تقولى كده
بصراحه لا اشترتها علشان عيد ميلادك
_ عيد ميلادى وعرفته منين ..
_ انتى قولتيلى
_ انا مقولتلكش
_ لا انتى قولتى افتكرى بس
حاولت تفتكر "حبيبه" : مش فاكره
_ عموما هو كمان 4 ايام لكن انا هكون مش موجود فحبيت هديتى تكون الاولى
_ جميله ..
_جربى البسيها كده
حاولت تلبسها قام وقف ومسك القفل وقفله وابتسمت "حبيبه": جميله
قعد جنبها وبصلها وهى بتلمس السلسله : كل ما تبصيلها افتكرى ان انا مش هفرط فيكى واخليكى تبعدى بعيد مهما حصل هفضل ساندك ومحافظ عليكى مهما حصل .. !
__________________
يتبع
ليست هناك تعليقات:
إرسال تعليق