حاولت تلبسها قام وقف ومسك القفل وقفله وابتسمت "حبيبه": جميله
قعد جنبها وبصلها وهى بتلمس السلسله : كل ما تبصيلها افتكرى ان انا مش هفرط فيكى واخليكى تبعدى بعيد مهما حصل هفضل ساندك ومحافظ عليكى مهما حصل .. !
"حبيبه" سمعت الكلام مع مسكه ايد "جى وو" ل ايديها حست انها اتحولت لقطعه تلج مش قادره تتحرك وقلبها دق كتير وهو لاحظ ارتباكها وضحك :
_ مالك
تهتهت "حبيبه": ها .. اه ..اه ..
ضحك "جى وو" ع تصرفات "حبيبه" وقامت "حبيبه" من مكانها :
_ الجو برد اوى انا نازله هنام تصبح ع خير
مشيت بسرعه عند السلم ورجعت تانى : شكرا ع الهديه وفعلا عيد ميلادى كمان 4 ايام
ورجعت مشيت بسرعه ونزلت ع السلم بسرعه ودخلت غرفتها وحطت ايديها ع قلبها .. احساس غريب اول مره تحسه ومش فاهماه نامت ع السرير وماسكه السلسله وابتسمت ..!
تانى يوم خرج "جى وو" من غرفته و"حبيبه" مع الاجوما اتصرفت "حبيبه" عادى مفيش حاجه حاجه حصلت وهو كمان حس بهروبها ومحبش يحرجها اكتر واتعامل عادى لكن فرح اكتر لما لمح السلسله باينه من تحت الايشارب وانها مشلتهاش .. قعدوا فطروا ... !
عيد ميلاد جده "جى وو" اتفق مع "حبيبه" يحتفل به فى بيته مع اقرب الناس فقط وعزم "حسام ومراته و"حبيبه" و"فيفى" و"مين سوك" وكان العدد قليل بس كانت حفله جميله .. بعد تطفيه الشمع وتقطيع التورته "حبيبه" مبتاكلش الكريمه ممنوعه منها ودايما بتاكل الكيكه تشيل منها الكريمه .. ف لاحظوا "جى وو" اخد قطعه من التورته وشال منها الكريمه وحط عليها من الفاكهه وحطها قدام "حبيبه" ودا لفت نظر حسام و"فيفى" .. وان "حبيبه" متشلش حاجات تقيله وكان هو بيشيلها .. والمشروب كان بيصب عصير مخصوص ل "حبيبه" غيرهم كلهم واستغربت "حبيبه" من تصرفاته مسكها "حسام" ووقف ع جنب :
_ ايه الحكايه ..؟
_ حكايه ايه
_ ايه الاهتمام الملفت دا هو كده
_ها .. اه ..
_ ها .. اه .. فى ايه يابنت فؤاد ؟
_ ماقولتلك مفيش حاجه ..متكبرهاش هو بيحب يهتم بالناس كده
_ ع اساس انك انتى ناس واحنا اباجورات ولا ايه ..كويس ان وليد مش هنا كان حولك ل اباجوره
_ ليه يعنى
_ هو الل اشترالك السلسله دى صح ؟
_ ايوه قولتلك علشان عيد ميلادى
_ عيد ميلادك يشتريلك سلسله غاليه كده انتى بقى هتهاديه ب ايه فى عيد ميلاده ؟
سكتت "حبيبه": كل واحد بيهادى ع قد مقدرته ياعم .. وبعدين هو مش مستنى هدايا انت شايف
_ اهااا .. حبيبه انتى عارفه بتعملى ايه صح ؟
_ ايوه طبعا
_ طيب تمام .. نصيحه لو حسيتى انك فى خطر او الامور فلتت منك سيبى البيت دا وتعالى
بصتله"حبيبه": ليه بتقول كده ؟
_ انا بس بعرفك ان انا واثق فيكى وواثق فى دماغك وفى اى وقت هتحتاجينى هتلاقينى
_ متقلقش
_ اوكيه ...
فى اللحظه دى ندهت "هالمونى "ع "حبيبه" وقعدت معاها وكملوا الحفله ..!
فى الوكاله موبيل "جى وو" رن وكان من صديق فى بريطانيا :
_ الو مارك
_ جى وو ..
_ ايه الاخبار ..
_ انا بعتلك ايميل فيه الحاجات المطلوبه وانت ابعتهم وانا هشوف وارد عليك
_ اوكيه
فتح اللاب وفتح الايميلات وشاف ايميل "مارك" ودخل "مين سوك" : يلا نلحق موعدنا
_ ثوانى ارد ع الايميل دا
شاف "اسم مارك" قلق ع "جى وو":
_ "مارك" دا دكتورجراحه قلب فى مستشفى فى بريطانيا
_ اها
_ وعاوز خدمه ايه منه ؟
_ مش ليا .. او هى ليا بس من بعيد
_ هالمونى " تعبانه ..
_ لا .. حبيبه
اتفاجئ " مين سوك" : بتقول ايه ؟
اتنهد "جى وو": "حبيبه" مريضه ومحتاجه عمليه زراعه كبد بسرعه وانا كلمت "مارك" يشوف متبرع ليها علشان تعملها
_ وانت تعرف منين حالتها
_ عادى جبت صوره من ملفها ف المستشفى الل بتعمل متابعه فيه وبعتهوله وهو هيدور وهيرد عليا
_ انت عملت كده .
بصله : الل زى "حبيبه" تستحق انها تعيش اطول من كده .. يلا وصلنا ..
فى العربيه "مين سوك" مش فاهم اهتمام "جى وو" ب "حبيبه ":
_ جى وو
_ ها
_ انت بتتصرف مع "حبيبه" من مبدء انها مريضه وشفقه ولا ..
قاطعه: بحبها .. ايوه بحبها وكل لحظه معاها بتاكد بكده ولما بتكون بعيده بتاكد اكتر
اتفاجئ"مين سوك": انت فاهم كلامك
_ الل فاهمه دلواقتى انها تعيش ودا الل هساعدها عليه ..
نزلوا من العربيه و"جى وو" اكد ع "مين سوك" ان مرض "حبيبه" سر .. !
فى يوم الاجازه ل "فيفى" قابلتها "حبيبه" وخرجوا يقضوا اليوم كله مع بعض وقعدوا يتكلموا لاحظت "فيفى" ان "حبيبه" ع طول بتلمس السلسله وكان فى اعلان فى التليفزيون ل "جى وو" ابتسمت "حبيبه" وهى بتتفرج وسرحت من وسط كلامها :
_ لدرجه دى بتحبيه
اتوترت "حبيبه": ها .. مين ؟
_ اقصد السلسله
نزلت ايديها : اه السلسله جميله
_ "حبيبه".. اوصفيلى احساسك كده وانت ماسكه السلسله
ابتسمت "حبيبه": اممم مش عارفه اقول ايه عارفه احساس الحضن السلسله محسسانى انى فى حضن ومطمنه اوووى
_ حضن "جى وو"
اتوترت "حبيبه": ايه بتقوليه دا ..؟
_ عينى فى عينك كده
_ اهو
_ انتى بتحبى "جى وو"
بعدت عينها "حبيبه" ع طول :
_ شوفتى
_ انت عارفه يا "فيفى" الحكايه انا مش فاهمهاها لكن احساسى وانا معاه بيكون نفس احساس حسيته من سنين فى حلم ودا الل مش قادره اصدقه
_ حلم
حكت "حبيبه" ل "فيفى" الحلم بالمختصر واتفجئت "فيفى":
_ بتتكلمى جد
_ زى ما بقولك كده هو نفس الشخص والاحساس هو نفس الاحساس انا مش مصدقه نفسى
_ يااااه ..هو فى كده .. دا ربنا بيحبك اووى
_ هو كده انا بحب ؟
_ هقولك .. لما تحسى بعزله عن الكون وهو معاكى وانتى وهو بس يبقى حب ..لما تحسى ب امان من لمسه ايده دا حب لما الابتسامه مبتغبش عن وشك طول ماهو موجود او تفتكريه دا حب ..لما تحسى ب اشتياق انك عاوزه تشوفيه دا حب ..لما تكونى متلغبطه ومش عارفه ايه دا دا حب ..لما تحسى بمعنى السعاده بوجوده دا حب ..
سكتت "حبيبه" وابتسمت :
_ "حبيبه" الحب الل بجد صعب نقابله فى حياتنا متحرميش نفسك من الاحساس دا لانك ببساطه تستحقيه .. عيشى وحبى ومتفكريش فى حاجه تانيه سيبى بعدين لبعدين ..
سكتت "حبيبه" : انا بجد مش عارفه انا عاوزه ايه بالظبط بس الل متاكده منه انى سعيده حاليا
_ اتمسكى بسعادتك ومتسيبهاش ..
فى يوم و"حبيبه" والاجوما فى البيت بيتفرجوا ع دراما دخل "جى وو" وملاحظوش دخوله بتركيزهم فى الدراما و"حبيبه" كان باين عليها الاندماج ومبتسمه لمشاهد بطل الدراما بص ع الشاشه وكان ممثل زميل : حبيبه ..اجوما
اجوما : انت جيت ..
_ ممكن تجبيلى مايه
_ حاضر ..
قامت الاجوما وقعد جنب "حبيبه" وهى مركزه ومبتسمه : حبيبه
_ ها
_ بصيلى
_ لما الدراما تخلص .. "ووك" ايه الجمال والفخامه دى
_ ووك .. انتى معجبه ب ووك
_ جدااا ..
مسك الريموت وطفى التليفزيون واتفاجئت "حبيبه": فى ايه ؟
_ ازاى تكونى فى بيت ممثل وتعجبى بممثل تانى الاولى اعجبى بالممثل الل هنا
استغربت "حبيبه": وانتى عصبى ليه ؟
قام وقف : ممنوع مشاهده درامات او افلام فىبيتى غيرى اعمالى بس
سابها ودخل "غرفته" وهو مضايق وبيردد: معندهاش انتماء ازاى بتحبنى وتحب معايا حد تانى ..
"حبيبه" بره مسستغربه قربت منها الاجوما : دا غيران
_ غيران
ضحكت "اجوما" ورجعت ع المطبخ وبصت "حبيبه" ع الريموت تكمل الحلقه كان اخد الريموت معاه .. !
مر اسبوع ونقار وخناق بين "حبيبه" و"جى وو" ع التليفزيون ولما بيشوفها ماسكه موابيلها وبتتفرج كان يشد منها الموبيل وكان بيخبى شاحن موابيلها وشاحن اللاب وعرفت "حبيبه" وسالته بيعمل كده ليه قالها " عندك سيديهات لكل اعمالى اتفرجى عليها براحتك واستمتعى حد غيرى فى بيتى ممنوع " تصرفات الطفوليه بينهم كانت مضحكه .. لغايه فى يوم وهو قاعد بيناكف مع "حبيبه" موبيله رن وكان موبيله والده .. رد وكانت مرات والده وعرف منها انه تعبان ومحجوز فى مستشفى بسرعه لبس وحجز طيران وسافر وكانت "حبيبه" معاه طول الطريق فى الموبيل بتطمنه ولغايه ما وصل المستشفى وكانت حالته حرجه وعرفه انها ازمه قلبيه .. بعد وصوله بساعتين دخل الرعايه وشافه ومسك ايده وباس راسه فى اللحظه دى الجهاز طلع صوت دخلت الممرضات والدكتور كان قلبه وقف واتوفى .. كانت صدمه ومفاجاءه صعبه عليه لكنه تماسك .. كانت وصيه والده انه يدفن بجانب والدته ودفنه واطمن ع مرات ابوه واخوه ورجع ع كوريا وكانت "حبيبه" فى انتظاره وقلقانه اول ما فتح الباب ودخل كانت "حبيبه" واقفه مستنياه اول ما شافها راح اتجاهها واخدها فى حضنه وضمها بشده وبكى .."حبيبه" طبطبت عليه وسابته يبكى من غير ما تتكلم ..شويا هدى ودخل غرفته وكل شويا "حبيبه" تبص تشوف النور موجود ودا معناه انه صاحى محبتش يقضى اليوم دا لوحده خبطت ع باب غرفته وفتح وب ابتسامه :
_ انا عزماك ع اتنين شوكولاه دافيه فوق فى الروف
بصلها للحظات ووافق وطلعوا قعدوا وولعوا النار وقعدت وحاولت "حبيبه" تخرجه من المود وتتكلم فى اى حاجه وتحاول تضحكه نوعا ما ..سكتوا والشروق كان بدا :
_ الجو جميل
وهو باصص ع السما : كان معاكى حق
_ فى ايه
_ ان انا لو مكنتش اتكلمت معاه سمعته وسمعنى كنت هحس بندم انا دلواقتى حاسس براحه
_ طيب كويس ..
ابتسم ليها وبص للسماء تانى : هو دلواقتى معاها صح ؟
بصت "حبيبه" ومبتسمه: اها .. لقاء بعد 29 سنه
_ هما مبسوطين صح
_ اكيد..
_ انا كمان سعيد انهم مع بعض دلواقتى
سكتت "حبيبه" وباصه للسما : وانا كمان هكون مبسوطه
لاحظ نظرتها للسما ومسك ايديها وبصلها :
_"حبيبه " : انا حاسس بوحده وفراغ جوايا ووجودك مطمنى
_ كلنا معاك
_ انا مش محتاج حد غير انا عاوزك انتى
لاحظت "حبيبه" ملامحه الحزينه مفكرتش تراجعه فى كلامه حطت ايدها ع ايده وابتسمت :
_ انا هنا .. انت مش لوحدك ..
مسك ايديها وباسها وحط ايده عليها : شكرا
"حبيبه" اتصلبت مكانها واتاخدت واتلغبطت ومعرفتش تعمل حاجه غير انها ابتسمت .. شويا وطلبت "حبيبه" انهم ينزلوا يتعشى وكان رافض الاكل وهى صممت واكل ودخل نام وهو نايم ع السرير عينه كانت ع النوتس قام من ع السرير مسك الورق : برغم ان فى حاجات هنا مش هقدر اعملها لكن هعمل الل اقدر عليه مهما كان .. فى نفس الوقت "حبيبه" بتفكر ازاى تخرجه من مود الحزن ع والده .. فى الوقت دا اتصل بيها "وليد" وكلمته :
_ "حبيبه" انت لازم ترجعى مصر
_ ليه
_ نتيجه تحاليك والاشاعه مش مطمنه ارجعى مصر هنا تكون تحت رعايتنا
_ مش هنزل مصر دلواقتى ولسه اقامتى مخلصتش
_ صحتك اهم من الاقامه
سكتت "حبيبه": انا لو هنزل مصر مش هينفع الفتره دى ع الاقل
_ ليه فى حاجه ؟
_ مش هقدر انزل واسيب "جى وو" فى الظروف دى لوحده
اتفاجئ "وليد": هتضحى بنفسك علشانه يعنى
_ انا قولتلك هنزل بس مش دلواقتى يا "وليد "
لاحظ "وليد" "حبيبه" وهى ماسكه السلسله : مين جابلك السلسله دى ؟
ابتسمت "جى وو" فى عيد ميلادى
_ واضح انها غاليه
_ علشان كده ااقل حاجه اقدر اعملها واردوله الهديه انى مسبهوش فى الظروف دى
_ براحتك يا "حبيبه" لكن عاوز اقولك ان حالتك بتتاخر وانت مش حاسه وقتها هو مش هينفعك
سكتت "حبيبه" وقفل "وليد" وزعلت من كلامه لكن اخدت نفس ومسكت السلسله وكلها اصرار تساعد "جى وو" ... تانى يوم صحيت "حبيبه" وكان "جى وو" فى الاستوديو خرجت من غرفتها وخبطت ع باب الاستوديو ودخلت وع وشها ابتسامه :
_ صباح الخير
_ صباح الخير
_ انت مش نازل انهارده
_ لغيت مواعيدى وأجلتها لبكره
_ تمام جداا .. انا عزماك انهارده
_ عزمانى ..؟
_ اها ع قدى بس هننبسط هخرجك انا
ابتسم "جى وو": هتخرجينى فين ؟
_ اممم هو انا محددتش بالظبط بس هنعمل زى ما بيعملوا هنا لما بيخرجوا هنلعب وناكل ونتمشى وكل حاجه انا انهارده عاوزاك تنسى "جى وو" الممثل وتكون الانسان العادى ..
_ لكن ..
_ مفيش لكن ولا رفض .. خلص الل بتعمله وانا هكون جهزت وحددت هنروح فين ونخرج باى
خرجت "حبيبه" وهى سعيده وابتسم "جى وو" .. مرت ساعتين و"حبيبه" كلمه "فيفى" تسالها ع اماكن الخروج لانها متعرفش ودبست نفسها .. مر ساعتين وكان "جى وو" جاهز طبعا بالماسك والكاب والنظاره وركبوا عربيته وبالعافيه ركبت الحزام .. :
_ ع فين ؟
_ ايتوان
_ انتى رايحه المطعم
_ انا اصلا معرفش اماكن الا هناك يلا بس
نزلوا فى ايتوان وابتدوا يتمشوا ويتفرجوا ع الحاجات المباعه بره المحلات وكان فى الالعاب قعدوا يلعبوا وضحكوا وفعلا الخروجه غيرت فى نفسيه "جى وو" والاخص ان "حبيبه" كانت تايهه ويعتبر هو الل كان بيوديهم الاماكن مش هى .. فى الاخر ركبوا العربيه واتجهوا ل برج "نامسان" ودا كان اختيار "جى وو" واتفاجئت "حبيبه" بالمكان لانها طول الوقت مرحتش هناك وقفت واشترى قفل وكتب عليه No End j&H وعلقه من غير ما تشوفه "حبيبه" وهو اشترى ايس كريم شوكولاته وكانت فى ايد حبيبه حلويات ..:
_ وااااه .. المكان والمنظر من هنا تحفه
_ انا ولا مره جيت هنا
_ ايه .. ازاى ؟
_ مكنش فى حد يجى معايا وانا مكنتش عاوز اجى لوحدى كفايه عشت لوحدى
لاحظت نبرته الحزينه: انا معاك انت مش لوحدك
ابتسم "جى وو": متستمتعه
_ جدا جدااا .انت مبسوط
قرب منها : انتى مبسوطه انا كمان هكون مبسوط
اتوترت "حبيبه" ومسكت الايس كريم تاكله ومن توترها وقع ع شفايفها وايديها الاتنين مشغولين بتبص تحطهم فيهم علشان تطلع منديل : امسك
_ ليه
بتحرك وشها تبينله الشوكولاته الل وقعت على شفايفها : اشيل دى
بمنتهى التلقائيه قرب منها وبشفايفه شال الشوكولا : حلوه الشوكولا
اتصلبت"حبيبه" من الحركه وتنحتله وبصلها : ايه دا هى متشلتش كلها
وبيقرب منها بعدت نفسها ومسحت بوقها فى هدومها ونزلت بسرعه وهو ضحك عليها ونده عليها وهى موقفتش .. طول الطريق كانت باصه الاتجاه التانى وعامله نفسها نايمه وهو عارف وصلوا البيت لاحظت "حبيبه" لكن كان قافل اللوك العربيه كانت مستنيه يفتحه وتنزل راح قال بصوت : حبيبه .. (مردتش عليه ) كده هشيلك لسرير ..
فى اللحظه دى صحيت : انا صاحيه افتح الباب
فتحت الباب ونزلت بسرعه ودخلت البيت ودخلت ع غرفتها وشافها جى وو وكان بيضحك ع تصرفها .. قعدت "حبيبه" ع السرير بتفتكر الموقف حطت ايديها ع شفايفها ومش مصدقه,, فى غرفه "جى وو" كان بيفتكر الموقف وبيضحك لانه مكنتش مرتبله واتصرف طبيعى وضحكه رد فعل "حبيبه" ... تانى يوم كانت بتتهرب منه وهو لاحظ ومحبش يحرجها اكتر مر يومين ورجعهوا لحياتهم الطبيعيه ...!
فى يوم حست "حبيبه" بتعب وطلعت ع الروف بتفكر ترجع مصر ولا تستنى شويا كانت بتفكر تاخد القرار وكانت واقفه قرب السور شافها"جى وو" لما وصل وطلع ووقف جنبها اتخضت :
_ اعمل صوت
_ انا قولت بتفكرى تنتحرى فقولت ننتحر سوا
ضحكت" حبيبه": لا مش انا الل بنتنتحر انا اكون سبب فى انتحار ناس
ضحك" جى وو": ايه الثقه دى ..
_ اخبار شغلك والتصوير ايه تمام ..
بص ل "حبيبه": مسافر ل "جيجو" 4 ايام تصوير اعلانات
_ طيب كويس يعتبر تغيير جو ..
_ وانتى هتيجى معايا
_ انا .. هعمل ايه هناك
_ ايوه .. هردلك الخروجه الل عزمتينى عليها
_ بس ..
_ مفيش بس ويلا انزلى الجو برد ..
سابها ونزل ونزلت دخلت غرفتها تانى يوم جهزت "حبيبه" وكان"جى وو" مستنيها شال شنطتها وحطها ف العربيه وصلوا للمطار وركبت الطياره وكانت درجه رجال الاعمال وكانت مستغربه ومتوتره انهم هما الاتنين بس ومفيش حد من مساعدينه موجود :
_ هو مفيش حد من المساعدين ليك جايين
حط ايده ع ايدها ومسكها : اهدى كده ومتتوريش انا مش خاطفك .. هما سابقونا ع هناك انا حبيت اكون انا وانتى بس من غير زحمه ...
ابتسمت"حبيبه" : اوكيه
_ انا هنام لغايه ما نوصل
_ اوكيه
كان لبس نضاره سوده ومريح راسه ع الكرسى ومغمض عينيه وهى قاعده جنبه حطت ايديها ع ايد الكرسى راح حط ايده ع ايديها ومسكها هى بصتله وهو ماسك فى ايديها حاولت تبعد ايديها معرفتش استسلمت للنوم ونامت وميلت راسها ع كتفه فتح عينه وابتسم ومقلقهاش لغايه ما وصلو فتحت عينيها اتخضت بصلها ب ابتسامه: يلا ..
نزلوا من الطياره كانت فى عربيه مستنياهم ووصلوا للفندق وطلعت غرفتها وكانت الغرفه المقابله لغرفه "جى وو" قعدت فى غرفتها والباب خبط وكان خدمه الغرف ومعاه اكل وعصير ومعاه كارت مسكته قراته كان من "جى وو" :
_ استمتعى بوجبتك وارتاحى اعتبريه اجازه لغايه ما اخلص واكلمك
استغربت وبصت ع الاكل كله فاكهه وخضار وعصاير واكل صحى ابتدت تاكل واخدت علاجها ونامت وكانت مرهقه والعلاج نيمها يوم كامل لغايه تانى يوم صحيت مخضوضه ع صوت الموبيل وكان "جى وو":
_ انتى فين كل دا
_ انا نمت كنت فى غيبوبه باين ..
_ ضحك "جى وو": طيب اجهزى وهاتى شنطتك وانزلى
_ خلاص راجعين
_ يعنى .. يلا انا مستنيكى ف العربيه
نزلت وكان هو قاعد مكان السواق وشاورلها راحت حطت شنطتها وركبت :
_ فين السواق مش هنروح المطار
_ لا فى مكان تانى هنروحه ..
_ احنا مش هنرجع ؟
_ انا قولتلك احنا مسافرين 4 ايام لسه فاضل يومين وقولتلك هردلك الخروجه ..
_ مش فاهمه ..
_ هتفهمى لما نوصل ..
وانطلق بالعربيه ل اخر جزيزه "جيجو" المكان دا قليل حد يروحه ودايما هادى وشبه فاضى وكان حاجز فى فندق هناك ب اسمه غرفتين قدام بعض ونزلت "حبيبه" من العربيه وطلعوا وقفوا قدام الغرفه ومسك ايديها وحط فيه المفتاح :
_ غيرى هدومك علشان ننزل نتغدى
_ اوكيه
وقفت قدام باب الغرفه وهى مش فاهمه حاجه هو لاحظ انها مفتحتش الباب راح مسك المفتاح وفتح الباب ودخل شنطتها وزقها وقفل الباب وكان بيضحك عليها ..دخل غرفته وغير هدومه وخرج ووقف يستناها حس انها اتاخرت اتصل بيها واستعجلها وخبط ع الباب ..خرجت ونزلوا قعدوا ف مطعم وطلب الاكل وشبه المكان كان فاضى ..:
_ ممكن اسئل سؤال ؟
_ اتفضلى
_ هو المكان دا فاضى كده ولا انت مفضيه زى الافلام ؟
ضحك"جى وو": لا هو فاضى ودايما قليل الناس تيجى فيه
_ واحنا هنا ليه بقى داالسؤال ؟
_ اممم ممكن تقولى استرخاء ليا
_ وانا معاك اعمل ايه ؟
_ ماهو انا مبرتحش غير معاكى
_ ها
ضحك"جىوو": كملى اكلك يلا ..
طلعت "حبيبه" علاجها واخدته وقالت "فيتامينات وكده " وعمل "جى وو" انه مشفش حاجه ..خلصوا اكل وقام مسكها من ايديها واتجهوا اتجاه يخت وطلعوا فيه وقعدوا ولاحظت "حبيبه" انه فاضى :
_ دا كمان عادى انه يكون افاضى ..
_ لا انا الل مفضيه علشان نكون ع راحتنا
قعدت وهى بتستوعب وبتحاول تفهم .. و"جى وو" قاعد وعينه ع "حبيبه" ومبتسم :
_ انتى خايفه ..؟
_ بصراحه اول مره اقعد فى يخت وبليل كمان :
راح مسك ايديها وشدها ناحيه : متخافيش
شدت ايديها "حبيبه": اوكيه اوكيه
بعدت عنه شويا ..كانوا ساكتين للحظات وكانت متوتره "حبيبه " :
_ ليه جينا هنا وكنا قعدنا فى الفندق الاولانى
_ لان هنا مفيش مراقبه ولا زحمه وانا عاوز اكون ع راحتى وانتى كمان تكونى مرتاحه
_ اها ..
_ حبيبه ..؟
_ ايوه
_ انتى حبيتى قبل كده ؟
_ انا لا محصلش
_ ولا انا ..
_ معقوله فى حياتك مفيش واحده لفتت نظرك واعجبت بيها
_ اممم حياتى الل فاتت محصلش فيها كده مفيش واحده شغلت تفكيرى كلهم شبه بعض
_ يبقى لسه مقابلتهاش الل هتحسسك انهم مش زى بعض
بنبره هادئه: قابلتها خلاص ..
_ ايه ..
_ بقولك تعرفى ايه هو احساس الحب وتعامل المرتبطين مع بعض ؟
_ امممم معرفش بصراحه غير الل بتفرج عليه وفى الكتب انما عن تجربه لا محصلش
_ ولا انا ..
اتفاجئت "حبيبه": نعم .. ازاى وانت ليك مشاهد كتير تمثيل مشاهد رومانسيه انا بصدق انك بتحب البطله لما بتفرج عليك ..استحاله محستش بحاجه
_ دا تمثيل انا بكلمك عن الحقيقى محصلش ..
_ اممم متستعجلش ..
_ بس انا نفسى اجرب
ضحكت"حبيبه": تجرب .. اوكيه اول ما نرجع اختار واحده من الل مثلت معاهم وجرب
_ لا عاوز اجرب معاكى
كانت بتشرب ووقعت المايه ع نفسها من المفاجئه وهو ضحك مسكت منديل وبتمسح المايه :
_ ايه الهزار التقيل دا
بنبره "جد" : انا بتكلم بجد انا عاوز اخرج فى ميعاد معاكى ك اتنين بيحبوا بعض
بصتله "حبيبه": ازاى .. وايه الاستفاده يعنى ؟
_ انا وانتى منعرفش الارتباط والكابلز بيبقوا ازاى نجرب مع بعض وكل واحد يتقمص شخصيه انه بيحب التانى اعتبريه فيلم وانتى بطله فيه قدامى ودا دورك ..
ضحكت"حبيبه": ومين قال انى عاوزه امثل انا فاشله
مسك ايديها : نجرب مش يمكن تكونى عارف .. 4 ساعات مش طالب اكتر من كده
مكنتش مصدقه "حبيبه" وهى شايفه "جى وو" مصمم وملامح وشه الجاده ومسكه ايده فى اللحظه دى قلبها دق وصوت من جواها بيقولها وافقى مش هتخسرى حاجه دا يوم واحد وهى كانت كاتبه فى امنيتها تعيش تجربه حب لمده يوم وحست امنيتها قدامها ...!
.شدت ايديها مسكها تانى : قولتى ايه ..؟
_ اوكيه يعنى لو وافقت ايه الل هنعمله انا وانت منعرفش حاجه ..
ابتسم : يعنى موافقه .. سيبى نفسك وانا الل هتصرف .. احنا راجعين دلواقتى بكره اليوم ملكى ..الشروط كونى ع طبيعتك وحبينى لانى هكون ع طبيعتى بحبك ..
وصل اليخت وهى بتنزل مكنتش عارفه راح شالها ونزلها جسمها قشعر وقلبها دق وبسرعه شبه جريت ع غرفتها دخلت حطت ايديها ع قلبها مش مصدقه نفسها .. وقفت قدام المرايه بتكلم نفسها :
_ ايه الل بتدبسى نفسك فيه دا بس يا "حبيبه" ..
رمت نفسها ع السرير وقعدت تتقلب مش عارفه تنام ... صحيت بدرى واتصل بيها "جى وو" :
_ الو..
_ صباح الخير
_ ها .. اه صباح الخير
_ اجهزى وانا مستنيكى تحت ع الشاطى ..
قفلت معاه ولسه هتقوم من ع السرير .. الباب خبط فتحت شافت بنت واقفه ومعاه فستان اخدته منها وقرت الكارت : البسى دا وانا هستناكى متتاخريش ..
كيس الفستان كان غامق فتحته تبص عليه كان المفاجاءه وصدمه بالنسبالها لما شافته الفستان نفس الفستان الل كان فى الحلم لون سماوى واطرافه منقوشه ب البنى والاخضر والطرحه حرير مسكت الفستان ومن المفاجاءه مش مصدقه نفسها مسكته ولبسته كان مقاسها بالظبط وبتبص ف المرايه نفس شكلها فى الحلم واتفاجئت اكتر لان تفاصيل الحلم الملابس محدش يعرفها اطلاقا ولا حتى كاتباه فى النوتس احتفظت بيها ف ذاكرتها .. نزلت واتجهت مكان ما مستنيها وكانت المفاجاءه والصدمه التانيه الشاطى معمولها طريق من الورد والاناره والزرع طول الشاطى واصلين ل ترابيزه وكرسين و"جى وو" واقف باصص للبحر وحاطط ايديه فى جيوبه بصت ع هدومه كان نفس الحلم بنطلون بنى وقميص لون فستانها وقفت مكانها بتبص حواليها حست انها ف الحلم لكن مع اختلافات بسيطه قلبها دق بسرعه بتحاول تستوعب .. حس "جى وو" بوجودها بصلها وابتسم نفس ابتسامه الحلم وقرب منها ومد ايده نفس الحلم تلقائى مدت ايديها ومسكها الاحساس ال كانت حساه ف الحلم تملكها فى اللحظه دى احساس العزله عن العالم مع الشخص الل كان ف الحلم بتتحقق قدامها شد كرسى وقعدها وقعدت وقعد هو قدامها .. قلبها بيدق وبتبص حواليها مكنش فى اى حد غيرهم ملامح خوف وتوتر وصدمه من المفاجاءه حاسه انها فى حلم .. شايفها "جى وو" وابتسم :
_ مالك ..
_ هو احنا بجد .. المكان وانت وانا ؟
_ انتى شايفه ايه
_ شايفه انى فى حلم ..
ضحك"جى وو": انهاردده كل حاجه حقيقه يلا كلى
"جى وو" كان قراء فى النوتس انها بتتمنى تعيش قصه حب ليوم واحد واول لقاء يكون ع البحر وهو نفذه ع طريقته لانه ميعرفش الحلم ولا هى كتبته ..!
_ ممكن اسئلك سؤال ؟
_ اتفضلى
_ انت اشتريت الفستان دا ازاى اقصد الالوان والاستيل وانت كمان نفس الالوان ..
_ بسيطه .. لقيته فى موقع ع النت عارض ملابس كابلز وكان دول منهم اختارتهم مناسبين لمكان بحر وسما ووصلوا امبارح بليل ..
_ يعنى انت اختارتهم .
_ ايوه ..مش عاجبك الفستان ؟
بصت "حبيبه": لا خالص ..
_ ايه رايك فى المكان ..
بتبص "حبيبه": مختلف عن امبارح خالص ..
_ انهارده هيكون مختلف عن كل الايام الل عدت
بصت "حبيبه" وكان باصصلها ارتبكت وبصت للاكل .. قعد جنبها وابتدا ياكلها :
_ ايه دا
_ ايه احنا مرتبطين انتى ناسيه
_ اه بس
_ مفيش بس ..
قرب الاكل واكلته وكان فيه صوص واقع ع طرف شفايفها حست "حبيبه" ان حركه الشوكولا هتتكرر وهو بص عليها بعدت الكرسى وهو ضحك مد صباعه وشاله وجسمها قشعر لحظتها وبصتله ومقدرتش تبص له كتير :
_ انا هاكل لوحدى
_ طيب ايه مش هتاكلينى ..
قطعت حته لحمه وقربتها منه وهى متوتره اكلها والصوص وقع ع طرف شفايفه :
_ هتسبيه كده
دورت ع مناديل ومسحت مسك ايديها وباس كف ايديها : شكرا ..
.شويا ولاحظت انه عمل قاعده ع الرمل وراحت قعدت وهو قعد جنبها وباصين للبحر وسرحانه "حبيبه" وبتضحك :
_ بتضحكى ع ايه ؟
_ مش هتصدق
_ لا هصدقك
_ انا مش مصدقه الل احنا فيه دا
_ ليه ..
_ حاسه انى بحلم
بص ل السما : شايفه النجوم دى كلها مش هى امنيات اشخاص ومستنيه وقت وتتحقق
_ ايوه
_ فكرى فيها ان امنيه من امنياتك نزلت واتحققت بسيطه
ابتسمت "حبيبه": فكره ..
بص "جى وو" ع السما :
_ وايه المسافه الل بين النجمين دول
_ يلا اتمنى امنيه علشان تكون هناك ..
بص ل "حبيبه" : واتمنى امنيه ليه وامنيتى اتحققت من وقت ما اتمنيتها
بصتله "حبيبه": امنيتك اتحققت
_ فاكره لما شوفنا النجوم اول مره وقولتيلى اتمنى اتمنيت انى احس بالراحه والامان جتلى الاشاره فى وقتها (لما نامت ع كتفه ) حسستنى ان امنيتى قريبه منى مع الوقت ابتديت اتاكد انها حقيقيه وانا قررت اتمسك بيها ..
كلام "جى وو" ونظرته ل "حبيبه" حست ب اختلاف عن كل مره وقلبها دق مع كل كلمه بيقولها مسكت السلسله وحطت ايديها ع قلبها كان بيدق ..حاولت تقوم بصت ع الساعه :
_ اعتقد كده خلاص الوقت خلص نرجع للواقع بقى
ضحك : اوكيه
قام ومسك ايديها تقوم اتكعبلت وكانت هتقع لحقها وقربها لحضنه ارتبكت بتبعد نفسها فضل ماسكها ومقربه لحضنه :
_ رايحه فين ؟
_ ها ..
شاور ب ايده واشتغلت موسيقى بصت "حبيبه" ع مكان الموسيقى معرفتش :
_ تسمحيلى بالرقصه دى فى اخر خمس دقايق من موعدنا
_ انا
مسكها وقربها منه وحط ايده حوالين وسطها وابتدوا يرقصوا وعينه منزلتش من عليها وهى كانت متوتره وكانت بتتجنب تبص لعينيه وهو مبتسم لحظات كانوا ساكتين و"حبيبه" عاوزه ال 5 دقايق خلصوا :
_ حبيبه
_ ايوه
_ انتى جميله اوى
ابتسمت وهى بتتجنب نظراته : شكرا
_ انتى جميله اوى
_ شكرا
_ انتى جميله اوى
بصتله عينيها فى عينيه : شكرا
_ بحبك
وقفت "جبيبه" وبصتله وكررها تانى : انا بحبك
قلبها دق جامد واتلغبطت واتوترت كررها تانى : انا بحبك
_ بس
_ بس ايه ..انا بحبك
بصت ع الساعه وضحكت تخرج من الموقف : كده عدينا ال 5 دقايق وذياده نرجع للواقع بقى
حبت تمشى شدها لحضنه ووشه فى وشها : انا بحبك
_ ايه الل بتقوله دا
قرب منها وبصوت واطى بيهمس : بحبك ..انا " يو جى وو" بحب "حبيبه"
اتصلبت "حبيبه" مكانها قرب وباس راسها وحست بنفسه وبيقرب منها اكتر وهى مش قادره تتحرك وكان هيبوسها وحبت تهرب عملت نفسها اغمى عليها وقعت :
_ حبيبه .. حبيبه
_ عاوزه اروح اوضتى لو سمحت
راح شالها ودا حسسها بتوتر اكتر ولاحظ "جى وو" عينيها وهى عماله تفتحها ودخلت غرفتها ووقفت ع رجلها ولسه هيتكلم قفلت الباب فى وشه وضحك ع تصرفها ودخلت قعدت ع السرير قلبها مبطلش دق وقفت قدام المرايه بتستوعب احساسها الل حساه ... "جى وو" فى غرفته مش قاعد بيتمشى فيها رايج جاى وبيمسك الموبيل عاوز يكلمها مش عارف .. "حبيبه" مقدرتش تقعد لبست ونزلت تتمشى ع البحر فى الوقت دا خرج "جى وو" من غرفته بص ع غرفه "حبيبه" ونزل يتمشى وشافها واقفه ع الشط وباصه للسما قرب منها :
_ انا بحبك يا حبيبه
اتفاجئت "حبيبه" بوجوده وضحكت : الوقت عدى خلاص
قرب خطوتين : انا بحبك يا حبيبه
ارتبكت وحبت تمشى لحقها وشدها ناحيته وحطت ايديها الاتنين ورا ضهرها :
_ ليه بتهربى منى ليه مش مصدقانى ولا مصدقه قلبك
_ ايه الل بتعمله دا ممكن تسيبنى ؟
_ انا كتير اترددت اتكلم وقولت احساس مؤقت انبهر مؤقت لكن قلبى مقالش كده قالى انتى الل مستنيها .. مش مهم منين ولا مين ..قالى انتى الل اختارها تعيش جواه
_ انت بتقول ايه ..
_ بقول الل حاسه والل عاوز اقوله ليكى ليكى انتى بس .. انتى صدقتى ان كل الل حصل دا تمثيل لا خالص دا حقيقى لانى مهما مثلت مشاعرى اتجاهك مستحيل تكون تمثيل ..انتى امنيتى الل اتمنتها تتحقق واتحققتلى ..انتى الراحه والامان الل انا كنت محتاجه فى حياتى ..انتى الل حسستينى بقيمتى وقيمه الل حواليا .. انتى الل بحبها ومحبتش غيرها ومش عاوز حد تانى ..ومتاكد انك بتحبينى
"حبيبه" بصاله وساكته عقلها رافض وقلبها موافق ولسانها مش مطاوعها تتكلم
قرب منها : انا بحبك ومش هسيبك امنيه حياتى قدامى وفى حضنى وهتمسك بيها
حست "حبيبه" ب احساس عزلها عن العالم وهو فى حضنه والخوف اختفى ومش قادره تتحرك من مكانها وبصاله بصوت ضعيف : انت .. انت
فى اللحظه دى من غير مقدمات قرب منها وحست ب انفاسه وبيقولها "بحبك" وقرب منها و كانت القبله التانيه بعد قبله الشوكولا لكن دى كانت قبله الاعتراف فى اللحظه دى فقدت "حبيبه" ادراكها وسيطرتها واستسلمت وكان دا اعترافها بحبها له .... !
رجعت "حبيبه" هى و "جى وو" ورغبتها بالحياه وانها تعيش بعد عاشت حلمها بقى اقوى فقررت تروح المستشفى ل "نورهان " .. راحت قابلتها وشافت اخر نتائج التحاليل والاشاعه ولاحظت ملامحها متغيره :
ابتسمت"حبيبه": زى الل قبلها
_ مفيش تحسن ..
اتنهدت "حبيبه" وب ابتسامه: انا عاوزه اجرب العلاج الجديد يا دكتور
اتفاجئت" نورهان": بتقولى ايه ؟
_ بقول عاوزه اجرب العلاج الجديد انتى قولتى نسبه نجاحه 70% ودى نسبه كويسه مش وحشه
_ لكن اثاره الجانبيه و..
قاطعتها "حبيبه": انا فى كل الاحوال هموت سواء مااخدتوش او اخدته ومنجحش بس ع الاقل لما اخده هكون عملت كل حاجه ممكنه قدامى ومستسلمتش ..انا مش عاوزه اخف ومش هطلب المستحيل لكن عاوزه اعيش شويا لسه فى ايام عاوزه اعيشها
_ انا ملاحظه اختلاف عن المره الل فاتت واصرارك على العلاج هما اهلك موافقين ؟
_ اهلى لو عرفوا هيمنعونى ..انا عاوزه اجربه واضح ان جسمى بيضعف فمحاوله اخيره ..انا عاوزه احاول مش عاوزه استسلم يا دكتور ارجوكى ساعدينى ..
ملامح "حبيبه" الحزينه برغم ابتسامتها ودموع فى عينيها واصرارها : اوك يا "حبيبه" انا هشوف الموضوع دا وهكلمك
_ اوك..
مشيت"حبيبه" ورجعت ع البيت وطلعت ع الروف وقعدت تتنهد وتبص ع السما :انا مش عارفه نتيجه العلاج ايه وانا قرارى صح ولا غلط ..ايام اعيشها ..يارب قوينى ..
مر يومين من مقابله "حبيبه" مع "نورهان " وسافر "جى وو" لتصوير بره كوريا وهى قاعده مع اجوما موبيلها رن وكان "وليد" واتفاجئت انه موجود فى كوريا نزلت وركبت تاكسى واتجهت لمكان الكافيه الل هو فيه ودخلت كان قاعد:
_ وليد..
ابتسم: حبيبه ..
سلم عليها وقعدت وركز فى ملامحها للحظات : انتى تعبانه
_ لا انا الحمد الله
_هاتى ايدك كده
مسك ايديها ولاحظ اطرافها بارده ..
_ انتى بتاخدى العلاج ..
_ اها فى مواعيده ..
_ مدام حاسه انك بخير ليه عاوزه تجربى العلاج الجديد ..
اتفاجئت "حبيبه" : ها ..
_ مفيش ها .. انا هنا علشان "نورهان" كلمتنى وقالتلى انك لوحدك كده قررتى تاخدى العلاج برغم انها قالتلك ع اثار الجانبيه والل ممكن يحصلك . هو انتى فاكراه شوكولاته تجربيها وخلاص
_ عارفه وعاوزه اجرب ..
_ لا يا "حبيبه"
_ لا ليه .. من حقى اقرر حياتى الباقيه اقضيها ازاى
_انتى كده بنتنحرى
_ اعمل ايه عرفنى انت اعمل ايه متبرع مش موجود .. ومش هيظهر .. اقعد استنى الموت ولما تظهر فرصه احتمال اقعد اكتر مجربش ليه ..
لاحظ"اصرارها: ايه السبب القوى انك عاوزه تجربيه يا "حبيبه"
بعدت عينيها عنه : مفيش اسباب .. اعتقد مفيش سبب اقوى من انى عاوزه اعيش يا وليد
_ العلاج مش هيعالجك دا هيبطى من انتشار الورم ..
_ وانا موافقه ع الاقل هكون عشت ايامى الاخيره وانا واقفه ع رجلى
_ فى حاجه جديده حصلت يا "حبيبه"
_ حاجه ايه ..
_ اخبار الممثل الل انتى عنده ايه
_ كويس
_ واخبارك معاه ايه
السؤال فاجئ "حبيبه": اخبارى .. ؟
_ اها
_ انا الحمد الله ..
سكت "وليد" للحظات "ولاحظ توتر "حبيبه" وماسكه السلسله :
_ ممكن نتمشى انا مخنوقه من القعده
حاسب"وليد" وقاموا وهما بيتمشوا مسكها من ايديها ووقفها قدامه :
_ صارحينى يا "حبيبه"
_ اصارحك ب ايه يا "وليد "
_ انتى لو جربتى العلاج وحالتك اتحسنت هترجعى مصر ولا هتفضلى هنا ؟
سكتت "حبيبه" : مش عارفه
_ لازم تعرفى انتى كده كده قدامك شهر واقامتك تخلص عاوزه ترجعى مصر ولا لا ؟
سكتت "حبيبه" ومسكت السلسله ب ايديها ولاحظها "وليد ":
_ واضح انك اتعلقتى بيها ..
_ ها
من غير ما تحس "حبيبه" مد ايده وشد السلسله اتقطعت : وليد
_ انتى قررتى انك مش هترجعى مصر يا "حبيبه" .. هو السبب ف انك عاوزه تاخدى العلاج وتضحى بنفسك علشان تقعدى شويا لحظات ذياده معاه
انفجرت"حبيبه": ايوه يا وليد هو السبب .. انا من حقى اعيش زى اى بنت احب واتحب .. الحلم الل كنت فاكراه خيال اتجسد قدامى لواقع ولمسته ب ايدى .. حقى اعيش حلمى حتى لو فتره قليله
كلام "حبيبه" صدم "وليد": انتى بتحبيه
_ ايوه ..
_ وهو
_ ايوه
_ وياترى هو عارف ظروفك وحياتك ومرضك
سكتت "حبيبه" : لا
بنبره كلها قسوه : انتى مريضه يا "حبيبه" انتى متوقعه انه لما يعرف ان ايامك قليله هيوافق يكمل معاكى هيوافق انه يرتبط بمريضه سرطان حالتها متاخره .. هيوافق يكون مرافق لمريضه انتى عاوزاه كده .. انتى مش "حبيبه" الل انا اعرفها .. "حبيبه" بتفكر فى غيرها قبل نفسها ..
كلام "وليد" زى السكينه فى قلب "حبيبه" ودموعها نازله وساكته :
_ انا مبقولكيش كده علشان تعيطى انا بواجهك بالحقيقه انتى حياتك غير اى واحده ظروفك مختلفه .. ومينفعش تظلمى واحد معاكى فى ظروفه دى .. حبك له محكوم عليه بالفشل وقت ما هيعرف
وقفت "حبيبه" دموعها نازله مسك ايدها وحط فيها السلسله :
_ قبل ما تجربى علاج منعرفش نتيجته ايه وعلشان واحد ميعرفش عنك حاجه فاتحيه فى الموضوع وعرفيه انك هتعيشى معاه ايام وبعدها هتختفى من حياته صارحيه واقبلى النتيجه ..
مشى "وليد" وهو حاسس بوجع من كلامه ومن اعتراف "حبيبه" قدامه بحبها ل "جى وو" و"حبيبه" دموعها نزلت بعد ما كانت بتحلم صدمها "وليد" بالواقع ... !
اتجه للمطار وليد وهو فى حاله غضب فى الوقت دا كان نسى شنطته فى تاكسى وسواق التاكسى وصلها لمستشفى "نورهان " واستلمتها وهى بتحطها ع الكرسى وقعت وشافت ملفات بتشيلهم لمحت اسم حبيبه مسكت الفايل وفتحته شافت نتيجه تحاليل واشاعات حبيبه ونتيجه تانيه متطابقه معاها بصت عن الاسم واتفاجئت : وليد ... !
__________________________
يتبع
ليست هناك تعليقات:
إرسال تعليق