الاغنيه خلصت وشافت "حبيبه" دموع "جى وو" مقدرتش تفضل موجوده قامت من ع الكرسى ونزلت خرجت وطبعا الموجودين عجبتهم الاغنيه وطلبو منه يغنيها تانى اعتذز ومشى خرج ورا "حبيبه" شافها ركبت تاكسى مع "حسام" و "مى سون" و "فيفى" واتحرك ملحقهمش .. رجع ع بيته طلع فى الروف قعد واتنهد تنهيده جامده وقعد باصص للسما .. فى الوقت دا رجعت "حبيبه" البيت ودخلت ع غرفتها وقالتلهم انها هتنام وفتحت ف البكاء ويعتبر منامتش ..تانى يوم خرجت من غرفتها طبيعيه و"حسام" متكلمش معاها واتعامل طبيعى فطرت ونزلت ع المطعم استغربت "مى سون " من رد فعل "حسام ":
_ حسام .. انت متكلمتش معاها ليه امبارح قلت نسيبها ومحدش فينا يتكلم
اتنهد "حسام": هى لما تحتاج تتكلم هتتكلم غير كده حتى لو اجبرناها ع الكلام مش هتقول الل جواها
_ ازاى مش ممكن تكون محتاجه ومستنيه حد فينا يبدء معاها
_ اوقات الانسان بيحتاج وقت يختلى بنفسه يعيد حساباته ويعيد قراراته مع نفسه بدون تدخل من حد ودا بيساعده اكتر انه يهدى ويصفى ذهنه لانه وقتها بيكون محدد هو عاوز ايه وفاهم ايه الل بيحصل .. وقتها لما بيحس انه محتاج لحد بيتوجه طبيعى ل اقرب شخص يساعده ..غير كده هيبقى اغلب الل هنسمعه كدب مجرد تقفيل كلام علشان الموضوع يخلص
_ كدب ..؟
_ اها .. لما يكون فى حياتك شخص قريب منك وانتى شايفاه فى مشكله وهو محتاج يكون مع نفسه وهتتدخلى علشان تساعديه وهو وقتها مش محتاج دا فعلشان يطمنك هيقول الل يريحك علشان متزعليش وبيبقى كدب لكن الحقيقه هو محتفظ بيها لنفسه .. فى مشاعر واحاسيس بيعجز الكلام عن وصفها هو نفسه بيبقى مش فاهم ومش هيقدر يعبرلك ,, مش دايما التدخل بيكون حاجه كويسه .. كل انسان له حق انه ياخد وقته مع نفسه وللاسف فى ناس بتفهمها غلط ..انها عزله ووحده ومبتحبنيش وكلام ملوش لازمه اختصارا هو انسان محتاج يختال مع نفسه لشويا وقت .. !
_ وانا هعرف ازاى ؟
_ لو مش قريبه للشخص دا وفاهمه شخصيته جربى واسئليه لو قالك انا عاوز اكون لوحدى اديله مساحته وبعدها هيرجع يقولك
_ يعنى انت شايف ان كده صح ..
_ انا بقولك هى لما هتحتاج تتكلم هتتكلم لوحدها لانها واثقه ان فى حواليها ناس هيسمعوها ..
نزلت "حبيبه" المطعم والكل اتعامل معاها عادى اتصلت بيها "نورهان " وطلبت منها تروحلها المستشفى .. استأذنت "حبيبه" واتجهت للمستشفى وقعدت مع "نورهان" :
_ حبيبه انا طلبت اشوفك انهارده علشان اتاكد واخد اخر قرار ليكى موافقه تبتدأى العلاج ؟
ابتسمت "حبيبه": مفيش قدامى غيره
_ بس النتائج مش اكيده زى ماانتى عارفه واثاره الجانبيه و ..
_ يا دكتور .. انا عارفه كل حاجه واخر قرار هبدا بس انا وعدت بابا استناه لما يجى وهو قرب فى خلال اسبوع هيكون هنا ..
فكرت "نورهان" فى "وليد": طيب اصبرى شويا مش ممكن يكون فى متبرع او هيظهر يعنى ؟
ابتسمت "حبيبه": لو فى متبرع كان ظهر من زمان هو مفيش ومفيش غير العلاج وانا متعودش استسلم للمرض حتى لو النتيجه مش اكيده انا ربنا كتبلى ايام اعيشها ودا علشان اثبت ان انا استحق الحياه الل عشتها او الكام يوم الل هعيشهم .. بسيطه
مسكت ايديها وطبطت عليهم وابتسمت "نورهان: انا واثقه ان ربنا مش هيسيبك تتألمى تانى
_ كل عطايا ربنا خير ..
و"حبيبه" فى المطعم قربت منها "فيفى ":
_ عرفتى ال حصل ؟
_ ايه
_ "جى وو" سافر بريطانيا من يومين ومكتوب ع النت انه اخد عطله ..
_ عادى يعنى ..
_ اول مره يسافر وهو عنده تصوير فيلم كمان اسبوع
اتنهدت "حبيبه" ولاحظت "فيفى" سكوتها : انا اسفه يا حبيبه انا مش قصدى افكرك به و ..
ابتسمت "حبيبه": هتتأسفى ليه .. انتى تتأسفى ع حاجه اتنست لكن حاجه موجوده لا ..
_ حبيبه ..
_ انا راجعه البيت ارتاح حاسه انى تعبانه ..
مشيت "حبيبه" وفعلا كانت تعبانه طلعت البيت ودخلت غرفتها قعدت مسكت النوتس فتحتها وبتبص عليها وسرحانه .. رجع "حسام" و "مى سون" من الشغل وخبط ع باب "حبيبه":
_ حبيبه... حبيبه
انتبهت لباب : ايوه يا حسام ادخل
_ مالك فى ايه "فيفى" قالتلى انك تعبانه
_ لا مفيش ارهاق بس ارتاح وهبقى كويسه
_ طيب انا هغير هدومى ونتغدى وبعد الغدا هنتمشى انا وانتى و "مى سون" وصديقه العيله "فيفى" اخدت مكافاه انهارده عوضى ع الله اوزعها عليكم وعوضى عليك يارب
ضحكت "حبيبه" وبصلها "حسام": ايوه كده اضحكى خلي الشمس تنور
قرب منها "حسام" وباس راسها : اخرج القيكى قاعده ع السفره
_ اوكيه ..
خرج "حسام" وقفل وراه الباب وحست "حبيبه" بنفسها مش قادره تاخده وكحت جامد وحطت ايديها ع بوقها لاقت دم لكن كان كتير وقامت علشان تجيب منديل اول ما وقفت داخت ووقعت اغمى عليها .. شويا و"حسام" بينده عليها مسمعش رد منها قام خبط ع الباب مسمعش رد :
_ انا داخل يا "حبيبه" انتى نمتى انتى عاوزه تهربى و..
فتح الباب شافها مرميه ع الارض قرب منها بسرعه وشافها لقى دم فى ايديها ومن بوقها بسرعه شالها ونزل وراح بيها مستشفى دكتوره "نورهان" ودخلت الطوارى وبعدها الرعايه وكان فى حاله توتر وقلق ومش عارف يعمل ايه ولا فاهم فى ايه ..
خرجت "نورهان" ووشها مش مريح ملامح توتر :
_ فى ايه يا دكتور .. حبيبه كويسه مش كده ؟
بملامح حزينه : مش عارفه اقولك ايه ؟
بعصبيه بتوتر : قوليلى وفهمينى .. ايهالل محتاجاه و عاوزاه هى ليه وصلت لكده
_ الل محتاجاه "حبيبه" دلواقتى فى خلال 15 يوم الجايين ااقل تقدير تعمل عمليه الزرع غير كده
قاطعها "حسام": مفيش غير كده هى قالت هتاخد العلاج اديها العلاج
_ مينفعش مناعتها انهارت وجسمها مش هيقبل اى حاجه ..
_ الحل دلواقتى ايه انا اعمل ايه ..؟
_ كلم باباها يقدم سفره ع الاقل يلحق يشوفها
_ يعنى هى مش هتصحى
_ "حبيبه" دخلت فى غيبوبه يا "حسام"
الصدمه شلت "حسام" ودموع نزلت من عينيه وقعد ع الارض مسكت ايده "نورهان":
_ مينفعش تكون كده يا "حسام" الايام الجايه منعرفش ايه الل هيحصل انت كلم باباها وانا هكلم "وليد" لازم اكلم "وليد " ...
مشيت "نورهان" ع مكتبها ومسكت موابيلها اتصلت ب "وليد " اول حاجه قالتهاله :
_ "حبيبه" انهارت ودخلت فى كومه يا "وليد" اعتقد انك لازم تكون هنا فى اسرع وقت
قفلت"نورهان" مع "وليد" وهى تأمل ان "وليد" هيجى يعمل العمليه ويتبرع لان مفيش غيره قدامها ..!
فى الوقت دا "حسام" بلغ "فؤاد" وقدم حجزه الطيران وفى المطعم عرفو وزعلوا عليها و"جى وو" عرف عن طريق جددته اخد اول طياره ورجع كوريا واتجه للمستشفى ووقف قدام العنايه وشايف "حبيبه" نايمه وممنوع اى حد يدخل .. وواقف جنبه "فواد" وحاطط ايده ع الازاز وباصص لحبيبه وبيقولها : مش دلواقتى يا "حبيبه" متنسبناش دلواقتى
"جى وو" مش فاهم طبعا عربى دور ع دكتوره "نورهان" وراحلها المكتب وفهم منها وضع الحاله وكان هو لقى متبرع فى بريطانيا كان مستنيه يوصل وياخده ويرجع ع كوريا اتصل ب "مارك" واستعجله انه يوصل كوريا .. الوقت دا وصل "وليد" للمستشفى وشاف "حبيبه" نايمه شافته "نورهان" وندهت عليه فى مكتبها ووضحتله حاله "حبيبه" وصدمها رد فعله دخل فى صدمه مبيتكلمش ..:
_ وليد .. وليد انا بكلمك
_ ايوه .. ايوه يا نورهان
_ بقولك حل "حبيبه" دلواقتى العمليه مفيش حل تانى
_ ما انا سمعتك
_ طب ايه بعد ما سمعت وشوفتها
بصلها "وليد": مش عارف ..
اتصدمت "نورهان": مش عارف .. مش عارف ازاى انت لازم تقرر يا "وليد " دلواقتى
_ اقرر ايه ..؟
_ تقرر انك تعمل العمليه وتتبرع ل "حبيبه"
اتفاجئ"وليد": انتى ..
_ مقصدش اكيد افتش وراك لكن انا عرفت ومش هسئلك انت لسنتين شايفها قدامك بتعانى وبتتالم وعندها امل ان يظهر متبرع وانت جنبها وبتدور على حد تانى .. التاخير الل وصلها لكده وصلها انها تاخد العلاج .. حبيبه بتحارب القدر لوحدها وهو سرق منها فرصه العلاج ..هى محتاجه عمليه لانها متاخره ع الاقل نلحقها ..
ساكت "وليد"... بصوت عصبيه: وليد .. هتعمل ايه ..؟
_ انتى بتقولى حالتها متاخره يعنى ممكن العمليه متنجحش لو عملتها
_ احتمال لكن مش اكيد المهم دلواقتى قرر بسرعه الساعه بحساب
بصلها "وليد" وهو ساكت ... !
مر يومين ومفيش جديد "وليد" مش قادر يقرر و"جى وو" بيحاول يتواصل مع المتبرع ومش عارف لغايه ما فى يوم دخل المكتب ل "نورهان " ومعاه فايل وحطه قدامها :
_ ممكن تحددى العمليه ل "حبيبه" المتبرع موجود
مسكت "نورهان " الفايل وهى فرحانه ان ظهر متبرع بصت عليه وع الاسم والمفاجئه كان اسم "يو جى وو"
بصتله وهى متفاجئه: انت ..
بنبه اصرار وتوتر وخوف : ايوه وفى اسرع وقت العمليه تتم كفايه الل عدى انا مجاش فى بالى ان انا ممكن اكون متطابق ليها لكن لما كنت ف بريطانيا عملت الفحوصات ولما عرفت قررت انزل اعملها لكن كان ظهر المتبرع ودلواقتى مش عارف اوصله ومش هستناه اكتر من كده .. ارجوكى العمليه تتحدد بسرعه ومش عاوز حد يعرف عاوز العمليه تتم فى هدوء ..
بصت "نورهان": انت عارف ان فى احتمال تتاثر بالعمليه لان مناعتك ضعيفه و ..
_ مش مهم هعيش تعبانه شويا كل الناس بتتعب المهم "حبيبه" تعيش ..
مع اصرار "جى وو" عرفت "نورهان " الكل ان ظهر متبرع لكن مقالتش حفاظا ع السر وفرح "وليد" انه لقى منقذ لحيرته .. و"نورهان" داخله ع غرفه العمليات نظرت ل "وليد" نظره صدمه بغضب ..!
دخلو "حبيبه" و"جى وو" العمليات وابتدا وقت العمليه والكل فى حاله ترقب وقلق وتوتر "فؤاد" ماسك المصحف بيقرا قران و"حسام" ملامح توتر و"مى سون" بتحاول تطمنه و"فيفى" بتدعى و"وليد" قاعد بعيد عنهم باصص ع الساعه ... مر وقت العمليه وخرجت "نورهان " والكل اتجه ليها :
_ ايه الاخبار يا دكتور ..
ابتسمت : الحمد الله العمليه نجحت لكن هنستنى شويا لغايه ما تفوق هتكون تحت الملاحظه فى العنايه وبعد ما تفوق هتدخل غرفتها ..
حسوا براحه و"فؤاد" بكى و"حسام" اتجه حضنه وبكى : مش قولتلك يا خال "حبيبه" مش هتسيبنا
اتجه "وليد" يتكلم مع "نورهان" مردتش عليه واتجهت لغرفتها وهو راح وراها :
_ نورهان هو فى حاجه ف العمليه ؟
بصتله بنظره غضب : العمليه نجحت يا "وليد" و"حبيبه" هتكون بخير ان شاء الله
_ اومال مالك فى ايه ؟
ضحكت من الصدمه : فى ايه .. انا مستغرباك بصراحه .. مش دى "حبيبه" الل انت بتحبها ورفضتنى فى يوم وقولتلى ان حياتك مرهونه بحياه "حبيبه" وانا احترمت قرارك وبعدت قولت هو فى حب كده .. ازاى تكون محتجالك وتتخلى عنها فى لحظاتها الاخيره مش فاهمه ..
_ انا مجبر ع كده يا "نورهان" مكنش سهل عليا اعمل العمليه
_ ليه ..؟
_ لانى وعدت بابا انى اهتم بحاله "حبيبه" وافضل جنبها بشرط متبرعش ليها لان العمليه احتمال هتاثر عليا ومش هقدر اكمل حياتى كدكتور و..
_ انت خفت ع نفسك ..
_ لا انا عاوز اعيش مع "حبيبه" قولت الفتره دى ادور ع متبرع يتبرع وقتها هكون جنب "حبيبه" هيفيد ب ايه لو عملت العمليه وموت وعاشت هى و ..
قاطعته "نورهان": انت بتحب نفسك اكتر من حبك ليها ..انت عارف مين المتبرع يا "وليد"
_ مش هو من بريطانيا
مسكت الفايل وحطت فى ايدك وليد: المتبرع "جى وو" .. "جى وو" مقدرش يستنى المتبرع الل هو دور عليه وعمل العمليه برغم انه هيتأذى منها لكن هو صمم لان ببساطه قالى جمله واحده " المهم "حبيبه" تعيش " فكر فيها عن نفسه وهو فنان مشهور هنا ومستقبله هو التمثيل يعنى ممكن ميقدرش يمثل تانى يعنى حياته الفنيه تنتهى برغم كده عمل العمليه ..
اتفاجئ "وليد" وهو باصص ع الفايل : انت شايفها سنين بعينك بتعانى وب ايدك تنقذها لكن حبيت تستغل حد تانى ممكن يتأذى بالعمليه المهم انت لا .. انت جبان وانانى يا "وليد" انت مبتحبش حد انت بتحب نفسك بس يا خساره انى فى يوم حبيتك ..
سابته فى الغرفه وخرجت وهو فى حاله من المفاجئه والصدمه ... !
كانت مفاجئه للكل ان "جى وو" هو المتبرع .. مر 72 ساعه بعد العمليه وفاق "جى وو" واول حاجه قالها : "حبيبه" بخير ..
ابتسمت "نورهان": بخير .. انت انقذتها
ابتسم وملامح التعب ع وجهه : دى اخبار جميله ..
_ المهم ارتاح لانك محتاج راحه
_ "حبيبه" فين ..؟
_ حبيبه لسه مفاقتش
ااتخض "جى وو": ازاى .. مش قولتى انها بخير
_ اهدى ..هى بخير بس جسمها لسه فى مرحله اعاده تهيئه هى غيرك انت اخدنا منك انما هى حطينا عندها فهى هتاخد وقت عنك لما تفوق ..
_ انا عاوز اروح عندها
_ انت لسه تعبان مينفعش تتحرك ..
_ لو سمحت انا مش هرتاح وانا بعيد عنها ممكن اكون جنبها لو سمحت يا دكتور ..
من اصرار "جى وو" نقلوا سريره لغرفه "حبيبه" بجانب سريرها وقربوا السرير وقرب ايده ومسك ايديها :
_ "حبيبه" .. متناميش كتير احنا فى ايام كتير هنعيشها مع بعض .. بلاش طمع وتنامى وتسيبنى لوحدى .. انا اسف انى اتاخرت انا مكنتش اعرف ان انا ممكن اتبرعلك صدقينى لو كنت اعرف مكنتش اتاخر الوقت دا كله .. "حبيبه" حاربى ومتستسلميش ومتنسبنيش لوحدى ..
مسك ايديها وغمض عينه ودموع نازله من عينه ونام ... !
فى يوم "وليد" واقف بيبص ع "حبيبه" وهى نايمه لسه مصحيتش و"جى وو" فى السرير جنبها ماسك ايديها وعينه على مسكته ل ايديها وقفت جنبه "نورهان" وبتبص عليهم :
_ لو فاكر الل انت حاسه دا حب ف الل انت شايفه قدامك دا عشق .. والعشق ملوش حدود تمنعه او اسباب توقفه مهما كانت ...
سابته ودخلت تطمن عليهم ووليد واقف وباصص عليهم واحساسه انه خسر "حبيبه" واحساسه بالندم سيطر عليه ..!
فى يوم دخل "فؤاد" و"حسام" علشان يطمنوا ع "حبيبه" ودخلوا شافوا "جى وو" ماسك ايد "حبيبه" وباصص عليها وبص "فؤاد" ع مسكه ايده ونظرته ع "حبيبه" ابتسم لكن رسم ملامح جد :
_ احم احم
بص "جى وو" عليهم ومسبش ايديها وحاول يقوم شاورله "فؤاد" يفضل مرتاح واتكلم "فؤاد" مع "جى وو" وطبعا كان "حسام" المترجم :
قرب "فؤاد" اتجاه" جىوو" ومسك ايده وطبطب عليها :
_ انا مهما قولتلك كلمات الشكر كلها مش هتكفيك انت رجعتلى حياتى
ابتسم "جى وو": انا الل رجعت حياتى انا من غير "حبيبه" حياتى منتهيه فعلا وانا اسف ان انا اتاخرت لانى مجاش فى بالى خالص و ..
قاطعه"حسام": انت متتاسفش انت الل عملته هنفضل عمرنا كله نشكرك كفايه انك كنت بتدور ومهتم انك تلاقى متبرع ومقدرتش تستنى وعملت العمليه ..ع فكره المتبرع كان وصل يوم العمليه بعد دخولكم بساعه يعنى لو اتاخرت ساعه كان هو ..
ابتسم"جى وو" وقاطعه : لو معملتش كده ل "حبيبه" هعمل لمين .
طبطب "فؤاد" ع ايده وباس راسه كقبله ابويه : انا كده اطمنت ع "حبيبه"
ابتسم "جى وو" وخرجوا ورجع مسك ايديها وبصلها ومبتسم : يلا اصحى رجعيلى روحى
دخلت "نورهان" تطمن عليهم واتكلمت مع "جى وو":
_ انت عامل ايه
_ هبقى بخير لما تصحى
_ اطمن هى بخير وقريب هتصحى وتكون وسطنا
بص ل "حبيبه": انا متاكد
_ هو فى شويا مشاكل عندك بسبب المناعه لكن متقلقش قبل ما تخرج من هنا هنطمن عليك من كل الفحوصات متقلقش كل حاجه هنظبطها ...
_ انا مش قلقان عليا ولا بفكر فى نفسى هكون ازاى حتى لو عشت نايم ع السرير باقى عمرى .. المهم ان "حبيبه" تقوم وتعيش حياتها لسه قدامها حاجات كتير بتحلم بيها تحققها .. حقها تحلم وتعيش احلامها وتترحم من الالم والوجع والادويه ونظرات الناس .. انا مهم عندى انها تاخد الحياه الل تستحقها من زمان وتعيش .. غير كده مش مهم صدقينى
_ لدرجه دى بتحبها ..؟
_اممم انا معرفتش يعنى ايه حب اه مثلت مشاهد وافلام رومانسيه لكن مجرد لحظه مفيهاش روح لكن عرفته لما عرفتها وقربتلها احساس انى اعمل المستحيل علشان اكون معاه ودايما اشوفها بتبتسم هو دا الل اتملكنى .. حب .. عشق .. شغف كل المعانى دى معناها عندى حاجه واحده "حبيبه"
ابتسمت "نورهان": انت هديه من السما ليها
ابتسم "جى وو" وباصص ع "حبيبه": هى هديتى فى الدنيا ..!
مرت ايام وفى يوم و"جى وو" نايم فتحت "حبيبه" عينيها وحركت ايديها وحس بيها "جى وو" فتح عينه وشافها : حبيبه
حاولت تجمع كرر يندهلها تانى : حبيبه ..
بصت ع الصوت وبصوت تعبان : هو انا لسه فى الحلم ولا ايه ..؟
ضحك "جى وو": اخيرا
_ هو انا فين فى المستشفى
_ ايوه
_ وانت بتعمل ايه هنا ؟
_ انا .. اصل السرير بتاعى بصلحه وأستاذنتهم انام هنا لغايه ما يتصلح
حاولت تضحك"حبيبه" ومكنتش قادره ..ضغط"جى وو" وطلب الممرضه طلب "نورهان " :
_ حمد الله ع سلامتك يا "حبيبه"
_ الله يسلمك يا دكتور
_ حاسه ب ايه دلواقتى .
_ دايخه وجسمى تقيل
_ معلش يومين كده مع التغذيه وهتبقى تمام ..
"جى وو" مش فاهم عربى : لا كده غش احنا متفقناش على عربى انجليش يا دكتور
ضحكت " نورهان وابتسمت "حبيبه": اتعلم عربى وهتفهم
_ تمام هحطتها فى الجدول ..
ضحكوا وطمنوا على "حبيبه" .. بصت "حبيبه" ل "جى وو":
_ مش هتقولى انت دخلت هنا ليه ؟
_ اكلت اكله مش كويسه عملتلى تسمم وعملت غسيل معده ولما عرفت انك هنا قولت خلينا مع بعض فى غرفه واحده توفير لمصاريف ايه رايك ؟
حاولت تضحك "حبيبه": لا بجد
_ اها .. انا مزنوق الايام دى معاكى تدفعيلى فاتوره المستشفى ؟
_ انت هتاخد منى الل كنت بتدفعهولى ؟
_ ههون عليكى تسبينى هنا ..
_ هدفعلك يلا علشان ادخل الجنه
_ انت الجنه نفسها يا "حبيبه"
ابتسم "حبيبه": تعرف مين الل اتبرعلى وكان فين ؟
_ ركزى دلواقتى ف صحتك وانك تقومى بخير وبعدين انا هخليكى تقابليه
_ عاوزه اشكره ع الل عمله
_ الل انتى عاوزاه هيحصل ..
بصلها "جى وو" ومبتسم " بصت "حبيبه" ع مسكه ايديها :
_ انت طول الوقت ماسك ايدى كده متعتبتش ؟
_ مينفعش اسيبها بيها حاسس ان انا عايش
_ انت عارف انك ظهرت ف احلامى
ضحك "جى وو": تانى .. المرادى ايه ؟
_ كنت ماشيه فى شارع ضلمه وكل شويا عماله اقع كان فى شخص معايا كل مااحاول امسك فيه يسبنى وااقع واتعورت كتير ببص حواليا ظهرت ماما بتمدلى ايديها وبمد ايدى ليها تلحقنى ..ظهرتلى انت وشدتنى من ايدى وضمتنى فى حضنك وفجاه ببص لقينا نفسنا فى مكان تانى كله شمس وبحر ..
_ كويس ... يعنى افهم من كده ان الحلم بيقول انى احضنك اوكيه دلواقتى ولا امتى ؟
ضحكت "حبيبه": انت مابتصدق .. اعتقد انه معناه انك لحقتنى وانقذتنى من الطريق دا
_ وفى تفسير تانى ..؟
_ ايه هو ..؟
_ ان انا كنت ماشى فى طريق ضلمه كله مطبات وبقع واتجاهاتى مجهوله وكنت محتاج ضوء بسيط يوجهنى لطريق الصح وظهرلى الضوء وعرفت طريقى فين ومشيت لغايه ما وصلت لضوء ولمسته وروحه اتمزجت بروحى وقتها حسيت انى عايش ,,روحى كانت مفنقده الامان ووجودك حسسنى بالحياه ...روحك بتكمل روحى من غيرها اكون تايهه ولمسه ايدك بتحسسنى بوجودى وانفاسك بتحسسنى انى عايش ب اختصار انتى الحياه بمعناه الاجمل ..!
بصتله "حبيبه" ودموع نازله من عينيها وهو كمان ف دموع نزلت من عينيها :
_ "وحشتينى .. انا كنت ضايع من غيرك لانك ببساطه بوصله اتجاهاتى فى الحياه دى
ابتسمت "حبيبه" وسكتت ودموعها نازله :
_ بس انا محتاج اتاكد من حاجه ف الحلم
_ ايه ؟
_ الحضن كان ازاى دا لازم عملى ومنه نتاكد انا وانتى هو الاحساس واحد ولا ايه
ضحكت "حبيبه": انت مجنون
بصلها وهى بتضحك: انتى وحشتينى كنت مفتقد ضحكتك ..مفتقد احس ب انفاسك الل بتحسسنى ان انا عايش .. بحبك ..!
مرت ايام واعمال "جى وو" توقفت كلها وكان خبر العمليه سر وكتبوا انه فى تصوير خارج البلاد لفتره .. وقرر "جى وو" ميخرجش من المستشفى غير و"حبيبه" معاه .. كانوا مع بعض فى كل حاجه فى الاكل وفى التحركات والفحوصات مع بعض .. ساعدوا بعض ع تحسن حالتهم ..فى يوم"حبيبه" قعدت مع "نورهان" لوحدهم وخرجت من عندها حزينه رجعت ع غرفتها ونامت وبصت ع "جى وو" ودموعها نازله ..تانى يوم "حبيبه" نايمه سمعت حوار "جى وو" مع "نورهان ":
_ الفحوصات نوعا ما كويسه انت بس مطلوب منك راحه تامه فى الفتره الاولى وعدم الاجهاد فتره لان لو اجهدت نفسك هتتعب ف مع العلاج كل حاجه هتتظبط وانت كنت عارف ان دا ممكن يحصل ..
ابتسم"جى وو": المهم ان "حبيبه" بخير صدقينى انا مش مهم
_ ان شاء الله هتكون بخير .. تفائل وجودك فى حياه "حبيبه" وانقاذها معجزه ..
_ انا متفائل ..
خرجت "نورهان" والكلام زعل "حبيبه" ودموعها نزلت حست انها أذته .. شويا خرجت من الغرفه وطلعت فوق سطح المستشفى وقلق "جى وو" ودور عليها وفكر فى سطح المستشفى وطلع وشافها قاعده وباصه للسما .. قرب ليها وحط عليها جاكت وقعد جنبها :
_ رجعنا تانى للقعده دى لوحدك ؟
_ السما جميله اوى والنجوم بتلمع فيها بس مش كتير
ابتسم "جى وو" وهو باصص للسما : اه صح يبقى امنيات ناس كتيره اتحققت والل موجودين مستنين وقتهم وهيتحقق ل اصحابهم ..
_ تيجى نتمنى امنيه ونحجز مكان هناك ولما يحين وقتها تنزل ..
_ اوكيه ..بما ان السما نجومها قليله تعالى نتمنى كل واحد 3 امنيات ايه رايك
_ اوكيه ..
_ تبداى ولا ابدا ..؟
_ لا هبدء انا ..
_ اوكيه يلا متنسيش تغمضى عينك وفى سرك
بصت للسما ومغمضتش عينيها وقالت امنيتها بصوت :
_الامنيه الاولى :انك تخف بسرعه وصحتك تتحسن وترجع تانى "جى وو" الفنان المشهور وتحقق نجاح كبير وتاخد جوايز ..
ابتسم "جى وو" وكملت "حبيبه":
_ الامنيه التانيه : يكون عندك اطفال وتسمع كلمه بابا وتعيش احلى احساس فى الدنيا
_الامنيه التالته: بعد ما تتحقق الامنيه الاولى والامنيه التانيه انى اقابلك حتى لو صدفه
اتفاجئ من كلامها : مش فاهم
بصتله "حبيبه": بعد اسبوعين انا راجعه مصر
_ ايه ..؟
_ انا قولت لبابا عاوزه ارجع مصر ..
_ ماشى هرتب امورى و ..
_ انت هتفضل هنا ..؟
بصلها "جى وو" وملامح المفاجئه ع وجهه : انتى بتقولى ايه انتى فى مصر وانا هنا الل يسمع كده يقول بتنفصلى عنى ؟
_ دا حقيقى ..احنا مش هينفع نكون مع بعض اكتر من كده
_ حبيبه
_"جى وو" اسمعنى انا عارفه انك انت الل اتبرعت برغم كلكم مخبين عليا
_ مقصدناش احنا ..
_ عارفه .. برغم الل عملته انقذنى لكن كان تصرف غلط
_ حبيبه ..
قاطعته: اسمعنى للاخر ..اكيد شوفت بابا "فؤاد" شوفت شكله ازاى شكله اكبر من عمره لان جسمه تعبمن الادويه لسنين بعد ما عمل عمليه التبرع ل ماما ..كان شغال محاسب كبير وقدامه مستقبل فى شركه كبيره لكن بعد ما عمل العمليه جسمه مستحملش الاجهاد فسابه وفتح محل الالبان صغير وبرغم كده تعب واى اجهاد بسيط يرهقه .. انا فاكره نظره الندم والذنب فى عين ماما لما كانت بتبصله وهو بيدارى تعبه علشان ميقلقهاش .. انت لو خيرتنى انك تتبرع كنت اختار اموت لان هيكون اسهل كتير عليا عن لما اشوفك تعبان بسببى ومش عايش حياتك الطبيعيه لان ببساطه هتكون حكمت ع نفسك انك تعيش حياه مقيده ب مستشفيات وادويه وتعب بسببى .. انا الحياه دى عمرى ما كنت اختارها ليك ولا ليا ..
_ حبيبه انا اى حاجه عملتها كنت ع اقتناع ومش ندمان وانا هكون كويس
_ هو كمان عمل كل حاجه ع اقتناع ومش ندمان .. انا الل ندمانه وحاسه بذنب كل ما بشوفه بيتعذب ع فقدانه لماما وفقدانه صحته .. ومش مستعده اعيش الاحساس دا معاك ..
_ والحل اننا نبعد
_ انا عمليتى مش متاكده اغلب الل اعرفهم وعملوها فى نفس ظروفى ماما او سحر سنتين بالكتير وحالتهم ادهورت ( بتبص حواليها ) يعنى انا مش ضامنه الوقت دا هكون عايشه فيه السنه الجايه .. ( بتبصله ) انا هرجع مصر لحياتى الل كنت عايشاها ومتعوده عليها لانها قدرى ..وانت عيش حياتك واثبت لنفسك انك لما قررت تعمل العمليه كان مش تسرع وانك هتكون بخير ..
_ انتى مصدقه كلامك دا
_ جداا لانى زى ما اخدت جزء من حياتك علشان اعيش مش هقدر اخليك تعيش العمر كله لوحدك
_ انتى معايا
بنبره عاليه ودموع نازله من عينيها : انا مش هقدر احققلك الامنيه التانيه ..انا مش هقدر اكون ام لا ليك ولا لغيرك انا اتحكم عليا اعيش لوحدى
_ مش فاهم ..لكن مهما كان الل حصل انا مش عاوز غيرك
_ وانا مش هحرمك من حقك تكون اب كفايه الل اخدته منك
ابتسمت "حبيبه" ودموعها نازله : رجوعى مصر افضل حل .. كفايه احلام الل عشتها جه الوقت الل هرجع فيه ل ارض الواقع واوجهه مصيرى ..
بصت للسما :انا همشى لكن امنياتى موجوده وانا هستناها تتحقق
_ حبيبه انتى ازاى قدرتى تقولى الكلام دا بتقوليلى ببساطه اننا نسيب بعض وكل واحد فينا يختفى من حياه التانى ..انتى فاكراها سهله .. انتى هنا يومين مقدرتش مشوفكيش ؟
_ فى الاول هيكون صعب عارفه ومتاكده لكن مع الوقت هيبقى عادى
_ انتى مش حاسه انك قاسيه اوى علينا
بدموع : جدا جدا لدرجه احساسى ان روحى بتخرج منى كل مره اكون بتوجع فيها الوجع المرادى افظع لكن مش هقدر اعمل غير كده مش مستعده اعيش تجربه "رجاء " و"فؤاد" تانى بوجعها كل واحد فينا لما يبص لتانى ويشوفه تعبان هيحس بالوجع والالم .. مش هقدر احرمك من حلم كل واحد يكون أب .. صدقنى الموت وقتها يكون اهون ليا ودا اخر طلب ليا ممكن ..
بصلها "جى وو" ومش قادر يرد ودموع فى عينيه :
_ انا موافق يا "حبيبه" ع كل الل بتقوليه انا موافق اعيشه
_ وانا مش موافقه .."جى وو" لو فعلا بتحبنى من امنياتى الكتيره الل حققتهالى حققلى دى ارجوك
_ حبيبه انا بحبك ..
_ انا علشان بحبك مش عاوزه فى يوم ابص فى عينك اشوف وجع والالم مش هستحمل صدقنى ..
احنا نبعد والل قدر كاتبه لينا هيحصل امنياتنا متعلقه مع امنيات ناس كتيره اكيد ليها وقت تتحقق ..
سكت "جى وو" واحساسه ب اصرار "حبيبه" حسسه بعجز عن كل محاولاته :
_ اوكيه يا "حبيبه"
ابتسمت "حبيبه": يلا غمض عينك واتمنى امنياتك
بص للسما للحظات واتكلم بصوت :
الامنيه الاولى : اثبتلك انى هكمل حياتى الطبيعيه من غير اى تأثير
الامنيه التانيه : اثبتلك انى مش محتاج من الدنيا دى غيرك
بصلها : الامنيه التالته : اقابلك تانى واضمك بين دراعى ومش هسيبك وقتها مهما قولتى ومهما حصل دا وعد وافتكريه
وافق "جى وو" ع طلب "حبيبه" وانفصلوا مؤقتا حتى القدر يقرر يجمعهم تانى تاركين امنيه لقائهم متعلقه فى السما منتظره الوقت الل يتحقق فيها .. خرجوا ع بيوتهم وقرروا الانفصال ويعيشوا حياتهم ومصيرهم المنتظر وكل واحد يحارب مصيره ويعيش حياته .. قبل ما ترجع "حبيبه" مصر قرر "جى وو" يجمعهم كلهم فى رحله تخييم ليوم واحد ك حفله وداع .. وافق "فؤاد" و"حسام" وكان معاهم جده "جى وو" ومين سوك" و "نورهان" و"فيفى" واتجهوا لمكان لتخييم عملوا الخيم واشعلوا النار وكانت "حبيبه" بتتعامل عادى والجميع كان مراقبهم ولاحظوا "جى وو" عينه مبتنزلش عنها ..عملوا الاكل وقعدوا اكلوا وولعوا النار وحسوا بغرابه فحب "حسام" يكسر الحاله :
_ ايه رايكوا نلعب ؟
"مين سون" و "فيفى": ياريت
_ احنا هنكتب اسماء لعب فى ورق و"الهالمونى" تختار بما انها اكبر
_ انا اصغر واحده فيكم يا ولد
_ انا موافق نتجوز ولا انتى نشلتى ع "فؤاد" لكن للاسف دا محجوز من زمان
ضحكوا كلهم ع كلام "حسام " وكتبوا الورق واختارت "هالمونى" لعبه الاعتراف ( اسف _شكرا _ بحبك_ اوعدك_ طلب ) وكله اتحمس ليها وكتبوا ورق ب اسماء اول اتنين وكانوا "مى سون وحسام"
وقفوا قدام بعض ماسكين ايد بعض وعينهم فى عين بعض :
حسام : "اسف " انى كدبت عليكى وقولتلك انك انتى الل شيلتى فيشه التلاجه وانا الل شلتها
"شكرا" لانك صدقتينى برغم انك كنتى عارفه
"بحبك" ومحرم عليا ابص لغيرك
"اوعدك" مش هشيل فيشه التلاجه تانى
"طلب" متوعقيش كتير ممكن
"مى سون": "اسفه" انى بزعقلك لكن انت مستفز
" شكرا" لانك لما حاجه بتعطل بتصلحها
"بحبك" كده
"اوعدك" هحاول اتحكم ف عصبيتى
"طلب" بطل استفزاز
اعترافهم كان مضحك وكلهم ضحكوا .. تانى ورقه كانت "حبيبه" و "فؤاد "
وقفوا مبتسمين :
فؤاد : " اسف " انى مكنتش فاهمك صح فى الاول وحبستك وخنقتك ب اهتمامى ونسيت انك عاوزه تعيشى طبيعى
"شكرا" لانك موجوده فى حياتى
"بحبك" انت برغم مش من دمى لكن انتى بنت روحى بحبك
"اوعدك" انى هكون دايما فى ضهرك ومعاكى فى اى قرار
"طلب" متسبنيش لوحدى
دموعهم نازله وكان دور "حبيبه " :
"اسفه" على كل الل عشته بسببى انا وماما
"شكرا" لانك قبلتنى اكون بنتك
"بحبك" بحبك يا اغلى واحن اب فى الدنيا
"اوعدك"انى هثبتلك انى حبيبه بنت فؤاد وانى قد الاسم دا
"طلب" ممكن تحضنى
حضنوا بعض وكان مشهد مؤثر الكل اتاثر واختاروا الورقه التانيه كانت "جى وو وحبيبه" اتفاجئوا ومع اصرار الكل وافقوا ووقفوا قدام بعض ماسكين ايد بعض وباصين فى عين بعض .. :
جى وو:"اسف" انى اخدت النوتس لكن مكنش بقصد التطفل والتسليه لكن لفضولى اعرف مين "حبيبه" الل دخلت حياتى ل اغمق الاماكن وحولتها ل ابيض
"شكرا" لانك حسستينى ان انا عايش
"بحبك" كلمه بسيطه لمشاعرى سواء حب او عشق او شغف كلها ملهاش معنى لان كلمه واحده هى الل بتعبر عن مشاعرى والل حاسه "حبيبه"
"اوعدك" انى مهما مرت الايام والسنين هتكونى ف مكانك لان ببساطه مملكش فى الدنيا غيرك
سكتت لحظات "حبيبه" :
_ "اسفه" .. ع اى حاجه ازعجتك كنت السبب فيها وكنت سبب أذيه من غير ما احس
"شكرا" انك حولتلى الحلم المستحيل حقيقه وخلتنى اعيش احلامى بسعاده حتى لو فتره
"بحبك" مكنتش اعرف يعنى ايه حب غير فى الكتب والدرامات لكن انت عرفتنى ان مهما اتكتب فى الكتب مش هيقدر يوصفه هو حاله يحسها اصحابها حاله من السعاده ملهاش وصف بالكلمات
"اوعدك".. انى هنفذ وعدى ومش هستسلم ابدا ..
"الطلب" ..انك تنفذ وعدك
"جى وو": ممكن اقول طلبى ؟
_ اتفضل
قرب منها خطوتين وضمها وباس راسها وقرب منها وشوشها : هتوحشينى واعرفى انك هترجعى مصر ومعاكى روحى
سابها وراح قعد ... الجو اتغير ودموع كانت فى عيونهم :
" حسام" حب يغير الجو : نشغل موسيقى ايه رايكم ولا نشغل ليه واحنا معنا الموسيقى نفسها
"جى وو" مسك موبيله وشغل موسيقى اغنيه له واول ما شغلها بص ل "حبيبه " وهى بصتله :
" ربما حبى لا يتماشى مع قواعد ايامنا هذه
الناس يقولون ان الشباب قصير
يجب ان نتحرر اذا كانت هناك مشاعر
لكن هذا لا يعنى اننى لا امتلك الشجاعه
ل اقول لكى احبك
عندما اضمك بين ذراعى
لا اريد حقا ان انفصل عنكى
هل تصدقين ..؟
ان دفئ الحب مستمربيننا
مازال هناك وقت لكل شئ
ببطئ اتقرب الى قلبك
واقرا اسرارك العميقه
ان الحب يحتاج الى الوقت ليتم اثباته
ارجوكى ثقى بى
اننى اعدك
قلتى ب انك خائفه ان تفقديه قبل ان يبدا الصيف
ما لاتعرفيه هو ان الصيف ياتى الى بسببك
قلبى يتألم عندما سقطت دموعك
كما لو انك همستى انك تحبيبنى
عندما احضنك بين ذراعى
لا اريد حقا ان انفصل عنك
لا تفكرى فى ذلك عميقا
تاكدى ان دفى الحب مستمر بيننا
ارجوكى ثقى بى
اننى اعدك
استخدمى انفاسك لتبعدى تنهدى
عندما نكون معا حبيببتى المستقبل يصبح اكثر وضوحا
هذه المره اشعر انى على صواب
الحب الحقيقى يستحق الانتظار عندما لا تحتاجين للقلق بعد الان
يا فتاه انا سوف اعدكى بذلك "
مر يومين وسافرت "حبيبه" ع مصر رجعت لحياتها وكان فى استقابلها "كوكا" و"ندى" وكريمه دخلت غرفتها الل وحشتها واحساس مسيطر عليها انها كانت فى حلم وصحيت .. رجعت لحياتها والمستشفى والمتابعه وسر "وليد" معرفتهوش وفضل فى حياتها الصديق المقرب .. رجعت معاها "فيفى" وراحوا ل اهلها هى و "فؤاد" و"كريمه" و "وليد" ورجعت "فيفى" لبيتها وربطتها صداقه قويه مع "حبيبه" .. فى يوم قاعده مع كوكا :
_ "كوكا" برغم مرور فتره عن رجوعى حاسه ان فى حاجه ناقصانى .. ياترى هو كويس مفش اخبار عنه لسه اخر خبر انه سافر "بريطانيا " ياترى هو بخير .. خبر واحد اطمن عليه ..يارب هونها عليا وقوينى ..!
مسكت النوتس ورجعت تكتب احلامها تانى وامنياتها ..!
مرت سنه ع رجوع "حبيبه" لمصر و"وليد" شايفها شاغله نفسها بكورسات اللغات ومبتخرجش رجعت لحياتها الاولى فعليا وفى مره قالتله انها عاوزه تشتغل شغل يناسبها لظروفها لان وضعها بقى افضل عن الاول بكتير .. قرر انه يفاجئها وزارها فى البيت :
_ ايه المفاجاءه؟
_ انتى مستعجله اوى
اتنهدت"حبيبه" : عاوزه اسمع خبر يفرحنى
_ امم طيب هاتيلى اوراقك علشان فى شغل
فرحت "حبيبه" : بجد
فرح "فؤاد" لما شافها سعيده :
_ اه بجد فى شركه سياحه حد اعرفه طالبين مترجمين وقولت خساره اللغات الل اتعلمتيها دى استفادى بيها ف بلدك
فرحت "حبيبه" وقامت بسرعه جابت الورق واخده "وليد" وبليل طلبت منه يشغل معاها "فيفى" لانها ليسانس اداب انجليش ومعاها لغتين كوريه وفرنسيه .. بعدها ب اسبوع جهزت "حبيبه" ل الانترفيو وخارجه وكان "فؤاد" مستنيها ومبتسم :
_ ايه الجمال دا
_ بجد حلو الطقم يا بابا
_ جميل انتى الل محلياه
_ ميرسى يا رافع معنوياتى
_ يلا علشان متتاخريش "فيفى" مستنياكى تحت
راحت "حبيبه" وباسته: شكرا يا بابا انك شجعتنى ع الخطوه دى وواثق فيا
_ يلا متتاخريش ومتنسيش تطمنينى واركبى تاكسى
_ حاضر
نزلت "كريمه" وشايفه "حبيبه" نازله فرحانه وشافت "فؤاد" :
_ ايه دا يا "فؤاد" سايبها لوحدها تنزل
ابتسم "فؤاد": مش هكرر الل عملته زمان "حبيبه" ليها حق تعيش حياه طبيعيه زيها زى اى بنت انا هدخل وقت ما تحتاجنى انا هراقبها من بعيد وواثق انها هتحافظ ع نفسها ..الل عاشته "حبيبه" مكنش سهل .. وانا مش عاوز غير انى اشوف ابتسامتها دى متغبش ..؟
قابلت "حبيبه" "فيفى" واتجهوا لمكان المقابله فى الشركه وعملوا الانترفيو وبتوصيه من "وليد" اتقبلوا وقالولهم يستلموا الشغل كمان اسبوع وخرجوا وكانوا مبسوطين .. رجعوا ع بيوتهم وكانت سعيده "حبيبه" انها هتشتغل وقعدت مع كوكا :
_ اخيرا هعمل حاجه كان نفسى فيها يا كوكا هشتغل ومش هسمح للحزن ولا الماضى يشغلنى انا هعيش لبكره وهعيش احقق احلامى وامنياتى ..!
مر اول شهر بعد استلام "حبيبه" شغلها وكانت نشيطه ومن الاول لفتت انتباه زملائها فى الشغل ففى يوم راحت متابعتها ف المستشفى مع "وليد" :
_ ايه الابتهاج دا
_ الحمد الله .. ربنا ادانى فرصه تانيه اعيش ف انا قررت اعيشها مش هضيع ساعه فيها .. قولتلى مروحش لانك عاوزنى خير .. الفحوصات كلها تمام ولا فى حاجه ؟
قام "وليد" وقعد قدامها وحط قدامها علبه صغيره :
بتضحك "حبيبه" :ايه دى
_ افتحيها
مسكتها "حبيبه" واتفاجئت بخاتم :ايه دا
_ انتى قولتى ربنا وهبلك فرصه حياه جديده تعيشيها وانتى قررتى تعيشيها ف ايه رايك نعيشها مع بعض هتقوليلى اطفال هقولك مش عاوز غيرك .. تتجوزينى يا "حبيبه " ..!
________________
يتبع
الاغنيه صينيه اسمها Promise _ Luhan
ليست هناك تعليقات:
إرسال تعليق