(18)
من المفاجاءه "زين" مقدرش يتحرك من مكانه وهو شايف "ايهاب" مع "مريم" ومعاهم "حمزه " رجع ع مصر فى نفس اليوم وكله بؤس وحزن واحساسه ان كل حاجه راحت و"مريم" راحت خلاص ,, واتفاجئ "زين" لما سئل "كرم" ع "مريم" انها اتجوزت وكانت صدمته ان " كرم" كان عارف وخبى بناء ع طلب ورغبه "مريم" ,, فى مره قاعد فى المطعم ماسك فرشه تلوين "مريم" وسرحان فى ورقه بيضا والدته قربت منه :
_ ل امتى هتفضل كده يا زين وانت مبتتكلمش ..؟
بص ل والدته وبنبره عاليه : انتى السبب
سمعته "سناء" وقربت منه : مالك يا "زين"
بصلها: وانتى كمان السبب "بص ل محمود و كرم" وانتم كمان السبب .. كلكم السبب فى الل وصلته انا ومريم خططكم للمستقبل ومين يتجوز مين وكدبكم علينا وجهلكم بالل هيحصل قدام هو الل وصلنا لنقطه دى ,,انتوا بسبب الل عملتوه دمرتوا حياتنا مش حافظتوا عليها ,, انا خسرت "مريم" و"مريم" خسرتنى و "كريم" لغايه دلواقتى مش عارف يرجع ل "ملك" لانها مش راضيه تسامحه ع الجرح الل عملهولها بسببكم ,, انتم خليتونا ب ايدنا نجرح حبايبنا وهما فى حضنا ,, الله يسامحكم ,,الله يسامحكم
خرج "زين" مشتعل الغضب والخنقه والكل موجود قاعد مش مصدق الل وصلوله راح وقف "كريم" واتكلم :
_ للاسف كلام "زين" صح انتم اقرب ناس لينا وصلتونا لمرحله نأذى نفسنا ونأذى الل بنحبهم ب ايدينا .. كنتم بتدورو ع سعادتنا السعاده مش ناكل كويس ولا نلبس كويس ولا حتى نتعلم كويس السعاده انكم تدونا حريتنا فى اختيار مستقبلنا هنعيشه ازاى ومع مين سعادتكم هتكون من سعادتنا مش العكس انتم غلطتوا غلطه افظع من الل حصلكم زمان انتم زمان كنتم حرين القرار واختيار حياتكم لكن معانا سرقتوا حريتنا فى القرار وادى النتيجه احنا التلاته قدامكم مفيش حد فينا سعيد عايشين ومش عايشين ,,,
كانت "ملك" واقفه وسمعت كلام "زين" و "كريم" واتاثرت اوى بكلامهم ووجعها احساسهم بالوجع الل سببه اهلهم وهما مش عارفين كان "زين"خرج قعد ع البحر وهو مخنوق جدااا قربت منه ملك :
_ زين.. انا مهما قولت عارفه كلامى مش هيعملك حاجه لكن عزلتك واكتئابك مش حل
_حاسس بكلام كتير فى صدرى ومخنووق يا ملك
_ يبقى اتكلم وفضفض الل عندك مهما كان ارمى الل فى صدرك لبرا علشان ترتاح ,, انت غلطان وقت ما شوفتها كنت تتكلم معاها وتواجهها تتكلموا ..
_ مكنتش قادر يا "ملك" حسيت انى اتشليت وقت ما لقيتها مع ايهاب وابنهم
_ روح واتكلم معاها مفيش حل تانى علشان ترتاح لانك لو متكلمتش هتعيش عمرك فى احساس خنقه الكلام احنا منعرفش لغايه دلواقتى سبب الل خلاها تعمل كده انتم بس الل عارفين ورفضين تتكلموا ف انتم الاتنين اكتر اتنين هتعرفوا تحلوا الخلاف دا ,, 3 سنين وانت بتدور عليها علشان عاوز تكلمها وجتلك فرصه انتهزها قبل ما تختفى 3 سنين كمان ..!
كلام "ملك" حرك رغبه "زين" انه يسافر علشان يقابل "مريم" وقرر انه يقابلها مهما كلفه الامر ,,, فعلا حجز طيران وسافر ل "مريم" عرف جدولها ومواعيد نزولها المرسم لتحضير المعرض لكن مكنش قادر يقرب منها ويتكلم وكل لما بيشوفها ويشوف معاها "حمزه" حاجه بتمسك رجله وتخليه ميتحركش ..فى مره وهو قاعد فى العربيه قدام المرسم السما ابتدت تمطر ردد فى نفسه " هتخرج دلواقتى "مريم" وفعلا خرجت ووقفت قدام الباب وبصت ل السما " هتمد ايديها تلمس المطر " وفعلا مدت ايديها ولمست المطر " هتتقدم خطوتين وهتقف تحت المطر وهتغمض عنيها " وفعلا اتحركت خطوتين ووقفت وغمضت عنيها وابتسمت فى اللحظه دى قرر "زين" يروح يكلمها ,, خرج من عربيته وبخطوات هادئه اتوجهه اتجاهها ووقف قدامها وفضل باصص عليها وهى مغمضه عنيها ومبتسمه ,, متكلمش لكن استنى لغايه ما تفتح عنيها ,, بعد لحظات بدءت "مريم" تفتح عنيها واتفاجئت ب "زين" قدامها اتخضت ورجعت خطوتين : زين
ب ابتسامه : عامله ايه يا "مريم"
بصت حواليها وبتوتر وبلهجه حاده: انت بتعمل هنا ايه ؟
_ انا جيت علشانك .. عاوز اتكلم معاكى ممكن ..؟
_ لا طبعا ,,مفيش كلام بينا هتتكلم فى ايه
قرب منها خطوتين : هتكلم معاكى عن اسوء 3 سنين مرو فى حياتى بسببك
بعدت "مريم" خطوتين: انا بالنسبالى مش عاوزه اسمع حاجه وبعد اذنك مش عاوزه اشوفك تانى هنا مش عاوزه مشاكل ..
مشيت "مريم" واتكلم "زين": خايفه من المشاكل ولا خايفه من جوزك ابو ابنك ..
اتفاجئت "مريم" وبصتله: ايوه ,, وياريت تحترم رغبتى
ودخلت "مريم" بسرعه المرسم و"زين" واقف باصص عليها وفى الاتجاه التانى كان واقف "ايهاب" ومعاه شمسيه وبيبص ع "زين " .. لاحظه "زين" وقرب منه : ممكن 5 دقائق من وقتك يا دكتور ..
_ وافق "ايهاب" وراحوا قعدوا ف كافيه : اتفضل سامعك يا "زين"
_ غريبه انك مش متفاجئ بوجودى
_ لانى كنت عارف ومستنى اليوم الل هشوفك فيه وعرفت انك سالت علينا كتير
_ اها .. بما انك دخلت ف الموضوع انا كمان هدخل ف الموضوع .
_ اتفضل سامعك ..؟
بنظره غضب ونبره عصبيه: ازاى تسمح ل نفسك بعد الل عملته ترجع تانى ل "مريم "
ابتسم" ايهاب": تعالى نبدل الادوار ,, وفى يوم قابلت "مريم" ونفسيتها مدمره هتعمل ايه هتسيبها ولا هتساعدها ,, واجبى اتجاه "مريم" مخلصش ب طلاقنا يا "زين" وطبيعى اننا نكون مع بعض دلواقتى ..
_ اها طبعا ومعاكم "حمزه " ربنا يخليهلكم
_ شكرا ..فى حاجه تانى ولا اقوم "مريم" مستنيانى علشان نرجع البيت ..؟
بملامح ضيقه : عاوز اتكلم مع "مريم" ممكن ؟
_ ما انت اتكلمت معاها ع ما اعتقد وقالتلك مفيش حاجه تتكلموا فيها ..
_ انا عارف انه مش من حقى اطلب منك كده لكن ارجو اسمحلى اتكلم مع مريم نص ساعه ,,الل محتاجه "نص ساعه "بس ..
نظر "ايهاب" لوجهه "زين": هحاول لكن مش هجبرها ؟
_ اوكيه ...
مشى "ايهاب" و"زين" دخل فى دايره تفكير وخنقه ان الايام لفت ورجعته تانى من الاول بس الوضع اسوء ... !
اتكلم "ايهاب" مع " مريم" ورفضت وبلغ "زين" برفض "مريم" واصرار "زين" انه عاوز يقابلها خلاه يراقبها طول اليوم ينتهز فرصه ,, فى يوم اتصل به صديقه وقابله :
_ كان فى حاجه عرفتها وحبيت اعرفهالك يا "زين" عن البنت الل خلتنى ادور عليها ؟
_خير ..؟
_ هى ممكن تكون اتجوزت قبل "ايهاب"
_ليه قولت كده ..؟
_ لان هى سافرت فرنسا من سنتين ومعاها الطفل بس ورجعت هى وايهاب والطفل
تفاجئ "زين": يعنى "حمزه" مش ابن "ايهاب" ؟
_ لا معتقدش
فى اللحظه دى دخلت شكوك فى دماغ "زين" ان احتمال "حمزه" يكون ابنه وقبل ما يتسرع ويتكلم مع "مريم" قرر انه يتقرب ل "حمزه " ويكون طريقه سهله يقرب ل "مريم" تانى ... وكان كل ما يخرج "حمزه" مع الداده فى الحديقه يلعب كان "زين" يروح يلعب معاه ويجبله حلويات وبلونات والالعاب وكانت "مريم" بتستغرب لما بيرجع "حمزه" ومعاه هدايا وتسأل الداده تقولها شخص لطيف اتعرفوا عليه ,, مع تكرر المقابلات بين "زين" و "حمزه" قررت "مريم" تروح تشكر الشخص دا على انه بيسعد طفل صغير ,, ف اتفقت مع الداده انها هتعدى عليهم ف الحديقه وفعلا فى الوقت الل "زين" راح ل "حمزه" وبيلعب معاه جت "مريم" وقربت منه وكان "زين" مديها ضهره :مساء الخير
_ سكت "زين" ومتحركش لما سمع صوت "مريم" وكملت "مريم" كلامها :
_ انا بشكرك جداا ع اهتمامك وانك بتفرح طفل صغير و ..
فى اللحظه دى لف "زين" وشافته "مريم" واتفاجئت: زين
ابتسم"زين": ازيك يا "مريم"
تحولت ملامح "مريم" ومسكت "حمزه" : ايه الل بتعمله دا ها
مسكت حمزه ومشيت اتكلم "زين" بصوت عالى : حمزه ابن ايهاب بجد يا مريم ولا ابن حد تانى وانتى مخبيه عليه
وقفت "مريم" دقيقه مكانها وبصت ل "زين": شئ ما يخصكش يا "زين" سواء هو ابن ايهاب او ابن حد تانى ,,
_ لا يخصنى اكيد لو كان "ابنى "
وقفت لحظه ومشيت ومشيت بسرعه "مريم" و"زين" واقف مكانه ..!
قرر "زين" مينزلش مصر غير لما يتكلم مع "مريم" فكان بيتواجد ف اغلب الاماكن الل هى بتروحها مع ايهاب ومعاهم حمزه ,, قرب موعد المعرض وفى يوم "مريم" و "ايهاب" فى المرسم بيختاروا اللوحات الل هتشارك بيها واتفاجئت مريم باختيارات "ايهاب ": ايه دا يا ايهاب بتركن اللوحات دى ليه انا مخلصاهم من قريب
مسك "ايهاب" لوحتين وحطهم جنب بعض ووقف وربع ايده وبصلهم بتركيز ووقفت "مريم" جنبه : فى حاجه ولا ايه ..؟
_ اممم .. هى المعارض الفنيه يا "مريم" بتتعمل ليه ؟
_ علشان تعرض اعمال الفنانين
_ والل بيشتروا اللوحات بيبشتروها ليه ؟
_ علشان عجبتهم اكيد
وقف وبص للوحات: وتعرفى سبب اعجابهم ايه ؟
_ كل واحد وميوله ..
_انتى رديتى ع سبب رفضى للوحاتك الل مخلصاهم من قريب
_ مش فاهمه يا ايهاب ..؟
_ "مريم" انتى بريشتك بتعبرى عن السعاده والفرحه والحزن والالم والامل وكل دى ميول بتجذب الناس المهتمين باللوحات لكن انك ترسمى لوحات فى 3 سنين عباره عن حزن ووجع والالم ومعاناه الوحده دا مش كويس وانا غلطت انى سبتك تتعمقى وقلت الرسم هيخرج الل جواكى لكن انتى علشان رافضه الوضع الل انتى فيه ومش عاوزه ترجعى مصر بتعانى والمعاناه ظاهره فى لوحاتك ,,
سكتت "مريم".. استكمل "ايهاب": مستغربتيش لما كنت برفض تشاركى فى اى معرض غير دا فى ال 3 سنين الل فاتت ؟
_ دايما بتقولى مش جاهزه ..
_ مش جاهزه ولغايه دلواقتى انتى مش جاهزه .. اللوحتين الل قدامك دول اول واحده رسمتيها لما كنتى ف مصر والتانيه لما جيتى هنا انا هحط الاتنين دول ب اسمك ف المعرض جنب بعض علشان توصلى حاجه لل هيشوفها ولنفسك كل ما تشوفيهم ان الانسان مهما مر بظروف وايام سيئه الايام الجميله موجوده وهتيجى الامل يا "مريم" الامل ,
_ لدرجه دى باين لوحاتى انها مش مناسبه ..
_ مش حكايه مناسبه . الحكايه ان الل واقفه قدامى دى مش انتى ومش هقدر اسيبك تكملى وانتى كده يا "مريم" .. مسألتيش نفسك ليه صممت اننا ننزل ايطاليا برغم ان المعرض دا ممكن كان يتأخر ع السنه الجديده ..
بصتله ب استغراب .. كمل كلامه: علشان كنت واثق انك اول ماهتظهرى زين هيظهر ووقتها تخرجى من الل عايشاه دا ,, انا من وقت ما قابلتك لا سألتك مالك ولا صممت اعرف ايه الحكايه وسيبتك مع الوقت وقلت هتحكى لكن ل 3 سنين ساكته ومبتتكلميش غير للوحاتك وكل مره بيكون اسوء وانا مقدرتش استحمل اشوفك كده قدامى ,,, ادى "زين" فرصه واسمعيه يا "مريم" واتكلمى معاه وخرجى كل الل جواكى لو فعلا عاوزه تبعدى يبقى لازم تصفى وتقفلى صفحه الماضى ..
_ انا اصلا نسيت الماضى
_ بتكذبى لان اخبار "زين" عندك وبتعرفيها شبه يوميا من والدك "زين" لو نستيه فعلا مكنتيش تهتمى ب اخباره ولا السؤال عنه ,, ووالدك من حبه ليكى واحساسه بالذنب بسبب الكدبه الل حصلت زمان مهاودك وبيسمع كلامك فى الحالتين انتى بتتصرفى غلط ووالدك بيتصرف غلط ,, حطى اخر يا مريم يا تحلى سوء التفاهم يا تقفلى خالص القرار معاكى ...!
سكت "ايهاب" و"مريم" بصت ع لوحاتها ودموعها نازله من عينيها ..!
مر يومين و"مريم" فى حاله من الصمت قرر "ايهاب" انه يجبرها ع الكلام لانه شايف حالتها النفسيه بتتدهور برغم ظاهريا باينه انها كويسه ,, اتصل ب "زين" وطلب يقابله واتفاجئ "زين" وراح فى الموعد وكان "ايهاب " قاعد مستنيه :
_ اسف ع تأخيرى ..
_ ولا يهمك .. تشرب ايه ؟
_ قهوه
طلب "ايهاب" القهوه وقعدوا ,,
_ انا اتفاجئت ب اتصالك ليا ؟
_ لانى اتفاجئت ب انك راجع مصر اخر الاسبوع
اتفاجئ "زين" ب ان "ايهاب" عارف : وعرفت ازاى هو انت بتراقبنى ..؟
ابتسم "ايهاب": زى ماانت بتراقبنا وزى ما كنت بتسأل عن اخبارنا وزى ما كنت بتدور على "مريم" فى ال 3 سنين
من المفاجاءه "زين" سكت ..
_ "زين" انا مش هتكلم كتير وهحكى لان مفيش حاجه تتحكى لكن الل هقولهولك انك ضرورى تقابل "مريم" وتتكلم معاها وهى تتكلم معاك انتم لو متكلمتوش مع بعض حياتكم مش هتستقر ,,
_ مش مصدق انك انت بتطلب منى كده ..؟
ابتسم "ايهاب" وبملامح حزن: انا ومريم مش متجوزين يا "زين"
اتفاجئ "زين" ايه .. ازاى و "حمزه " وساكنين مع بعض
_ احنا ساكنين مع بعض لكن فى شقتين قصاد بعض و"حمزه" مش ابنى ولا ابن "مريم" .. "حمزه" ابن صديقه "مريم" المقربه "ليندا "
تذكر "زين" اسم "ليندا" فعلا .. وكمل "ايهاب" كلامه ": "مريم" و "ليندا كانوا ع تواصل دايما مع بعض ولما قررت "مريم" تيجى ايطاليا اتكلمت مع "ليندا" وساعدتها تبيع الشقه ويعيشوا مع بعض ف شقه تانيه وقتها كانت "ليندا" حامل واهتمت "مريم" ب"حمزه" لما اتولد لدرجه انه اول ما اتكلم قالها ماما .. لما سافروا "فرنسا" قابلتهم هناك وكانت "مريم" متغيره وكان مينفعش اسيبها لوحدها ومن وقتها كنت معاهم بعد مده اتعرض ع "ليندا" شغل فى الضيافه الجويه لمده سنتين ومكنش هينفع معاها "حمزه" طلبت منها "مريم" انه يفضل معاها ومن وقتها وهو معاها وكله فاكر انه ابنها ..
_ لكن اتقالى انكم متجوزين ..؟
_ الكل كان عارف اننا كنا متجوزين وحد من المعارف شفنا ف فرنسا اعتقد اننا رجعنا وخلفنا وبالتالى نشر الاشاعه واحنا مكدبناش لاننا مكناش هنقعد كتير بعد المعرض هنرجع فرنسا
_ مش مصدق الل سامعه دا ..
_ زين..علاقتى ب "مريم" صداقه مش اكتر وبرغم كده من وقت "مريم" ما شوفتها لا اتكلمت ولا قالت حصل ايه بينكم خلاها تبعد بالشكل دا لوقتنا دا متكلمتش ومش هتتكلم انا عارف حاولت اقرب ل "مريم" لقيت مفيش مكان ليا فى قلبها فشلت اخرجها من الل هى فيه رغم محاولاتى .. علشان كده قررت اعمل المعرض دا هنا علشان كنت واثق انك هتيجى وجيت مينفعش ترجع من غير ما تتكلموا ع الاقل ..
_ حاولت وهى مش موافقه
_ سيب الموضوع دا عليا المهم ضرورى تحضر المعرض
_ اوكيه ...
بعد الل سمعه "زين" من مفاجاءات مكنش مستوعب ان "مريم" عايشه فى كدبه الوقت دا كله وبعندها بتخسر كل حاجه فكان ع اتصال ب "ايهاب" لغايه يوم المعرض وحضر "زين" هو وصديقه ووجود "زين" وتر "مريم" خلص المعرض ورجعت "مريم" المرسم وقعدت مسكت الفرشه والالوان وبترسم وسرحانه "ايهاب" شافها بعد لحظات وهى قاعده سمعت صوت : مريم
بصت وكان "زين": زين .. دخلت هنا ازاى و ..
قرب منها خطوتين: انا مش هتحرك من هنا غير لما تسمعينى ونتكلم
وقفت ساكته .. كمل "زين": ايه الل بتعمليه فى نفسك دا وفيا ايه الل بتعمليه فينا دا ..
سكتت "مريم" وصمم "زين" انها ترد عليه وانفجرت :
_ عاوزنى اقولك ايه يا "زين" غلطه وانا بعدت خالص من قدامك
_ايه الل بتعمليه دا ؟
_ الل عملته انا عملته لنفسى مش ليك من وقت ما عرفت اننا مش اخوات من واحنا فى 2 اعدادى
اتفاجئ "زين": 2 اعدادى ..؟
_ ايوه يا "زين" انا عارفه اننا اخوات قبل ما انت تعرف بسنين ومن وقتها بحاول اتعامل عادىوكنت فاكره ان الحكايه عادى ونسيت ودى كانت غلطتى لانى مع السنين والوقت وانا جنبك بتعلق بك اكتر ,, انا كنت بفضلك عن كل حاجه فى حياتى عن اصحابى طول الوقت بفكر فيك انت وعن عذابى كل ما احس اتجاهك بحاجه واراجع نفسى واقول اخويا برغم انا عارفه انك مش كده ,, عن فرحتى وسعادتى وانا معاك عن ضحكتى الل مبتطلعش من قلبى غير بسببك .. عن دعواتى ف صلاتى اقابل شخص زيك وارتبط به لانى حسيت انه مش هينفع ارتبط بيك انت لانك شايفنى اختك ومتعرفش .. "ايهاب" للاسف كان محاوله منى انساك بيها لانى وصلت لمرحله انا مبقتش فاهمه نفسى واهتمامه وقربه استغليتها واتقربت له وهمت نفسى ب انى بحبه علشان انت اخويا مينفعش افكر فيك غير كده ,, واتجوزت ومنستكش وكنت موجود فى كل حاجه لدرجه انى كنت بنادى "ايهاب" ب اسمك واتخيل وجودك معايا مكان "ايهاب" فى كل مكان اروحله .. احساسى لما كنت بتاخدنى فى حضنك علشان انسى اى زعل .. ولما اطلقت ورجعت مصر ملقتكش كنت ارتبطت خلاص وقتها قررت ابعد وكنت فى صراع مع قلبى وبين الل انا عاوزاه والل ينفع يحصل وقتها فكرت ارجع ايطاليا هنا لكن مقدرتش ابعد عنك قلت اخوات اخوات لكن مبعدش عنك ولما ربنا اراد وكل العقبات اتحلت وفى اسعد لحظات سعادتى اتصدم بكلامك الل وجعنى .. غلطه .. علاقتنا وسنين عمرى كلها اتكونت فى كلمه "غلطه " .. غلطه اهلنا لما كدبوا وقرروا عنا .. غلطه لما سامحولنا نقرب لبعض لدرجه محدش يتخيلها .. غ غلطه انى استغليت حب شخص ليا وظلمته معايا ,, غلطه لما عشنا واحاسيسنا هى الل حركتنا ومحكمناش عقلنا .. غلطه لما ضعفنا واستسلمنا لنفسنا .. غلطه انى مقاومتش وبعدت من وقت ما حسيت اى فقدت السيطره ع نفسى ,,
_ مريم ..
قاطعته "مريم" ودموعها نازله: يوم ما حصل الل حصل انا كنت خايفه وفعلا حسيت انها غلطه مكنش لازم تحصل وحصلت . احساسى بتأنيب الضمير بسبب الل حصل كان مدمرنى وكنت محتاجاك تطمنى جتلك علشان تطمنى انك مش هتسيبنى ان مهما حصل بينا انت معايا .. استحملت تجاهلك وردوك الناشفه ولما جيت تبلغنى اننا نتجوز ببساطه "لازم نتجوز علشان نصلح الغلطه " غلطه .. الكلمه ضربت فى قلبى وتاكيدك عليها وجعنى .. ازاى كنت عاوزنى ابنى حياتى ع تصليح غلطه ..ازاى نعيش مع بعض واحنا الاتنين عارفين اننا بنصلح غلطه .. ازاى نعذب نفسنا فى حياه بسبب غلطه ,,الكلمه جرحتنى ووجعتنى اوى اووى ,, وقتها حسيت انى لازم ابعد ابعد عن كل حاجه ليها علاقه بك ومش مستعده ارجع تانى اعانى
قرب منها خطوتين ": اسف يا "مريم" انا مكنتش عارف اقول ايه ولا اعمل ايه لان الموقف كان فوق احتمالى وغير متوقع .. انا خانى التعبير وخانى التصرف انى بعدت وكنت بتجنب مواجهتك عارف انى غلطان انى بدل ما امسك ايد سيبتك لوحدك ومطمنتكيش
_ خلاص يا "زين" مفيش كلام هيتقال
مسك ايديها الاتنين وكانت بتحاول تسحب ايديها فمسكها جامد : "مريم" انا بجد كنت بتعذب السنين دى بسبب بعدك عنى .. انا طول الوقت وحاسس ان فى حاجه اتجاهك ومش فاهمها ولما عرفت بجد ندمت ع كل لحظه عدت انا بجد مبعرفش اعيش من غيرك .. "مريم" روحى بتروح معاكى .. اسف يا "مريم" بجد .. اسف
نظرت فى عينيه ودموع نازله سكتت وسحبت ايديها ولفت ظهرها ووقف "زين" وشعور الحزن مسيطره عليه : انا ماشى يا "مريم" واعرفى واتاكدى ان انتى مالكه روحى وانك حكمتى عليها بالموت بعندك دا ...
مشى "زين" بخطوات وخرج وابتدت "مريم" فى البكاء الشديد ودخل "ايهاب" وشايفاها منهارده : متسبيش "زين" يمشى يا "مريم" روحى معاه .. انتى مش هتعرفى تعيشى من غيره زى ماهو مش عايش من غيرك .. متعذبيش نفسك بسبب عندك ومهما كانت الاسباب وجودكم جنب بعض اهم ..
وهما واقفين سمعوا صوت تصادم عربيات اتاخدت "مريم" ودخل عامل من المرسم : فى ايه ؟
_ الشخص الل كان هنا وهو بيعدى الطريق عربيه خبطته
فى اللحظه دى "مريم"بصوت عالى "زين" وخرجت بسرعه وكان "زين" نايم ع الارض وكانت الخبطه بسيطه و"مريم" بتعيط: زين انت كويس ..
فتح عينيه وابتسم: ياااه اخيرا قررت ترجعيلى روحى
بتعيط "مريم" مسح دموعها ب ايديه: وحشتينى
فى اللحظه دى مترددتش "مريم" وارتمت فى حضنه وبتعيط وهو ضمها لصدره وبيقولها : وحشتينى .. وحشتينى ..!
كانت اصابه "زين" بسيطه وقرر كلا من "زين" و"مريم" يرجعوا مصر مع بعض صفت "مريم" حاجاتها وودعت "ايهاب :
_ بجد يا ايهاب مش عارفه اقولك ايه ..؟
ب ابتسامه: متقوليش اى حاجه كفايه انى شايف روح مريم رجعتلها والابتسامه الحقيقيه ظهرت ... انا الل هطلب منك طلب
_ اتفضل اكيد
_ مهما حصل متاخديش قرار فردى وشاركى "زين" معاكى انتم الاتنين بتكملوا بعض ومينفعش تتفرقوا عن بعض ..
ابتسمت "مريم" : ان شاء الله
_ كنت اتمنى تكملى هنا لكن سعادتك تكونى وسط الل بتحبيهم
_ وانت لما تنزل مصر لازم تيجى وتزورنى
_ اكيد ..
سلمت ع "ايهاب" و"ليندا" وابنها حمزه ورجعت هى و"زين" ع الطياره "زين" ماسك ايديها وقافش فيهم : فى ايه انا مش هطير ..
_ لالالا بعد الل عملتيه والمرمطه الل شوفتها مبقتيش مضمونه ابص الناحيه التانيه مش هلاقيكى لاسعه وتعمليها ..
بتضحك "مريم" : خلاص ياعم علق فى ايدى جهاز انذار لما ابعد يرن تسمعه وتلحقنى
طلع "زين" من جيبه علبه : لا هعلقها ف رقبتك علشان لما تتوهى يعرفو يرجعوكى ليا تانى ولما اوصفلهم
فتحت العلبه ولقت سلسله وفيها فيل صغنن وضحكت "مريم": فيل صغنن
_ ايوه علشان لما اقولهم تاه منى فيل صغنن يا ولاد الحلال هيعرفوكى وش
ضحكت "مريم" بجد مش عارفه اقولك ايه ..؟
_لا استنى هو انتى شوفتى حاجه .."نده ع المضيفه وجت ومعاها بيتزا واتفاجت "مريم" : ايه دا
_ بيتزا وصايه جبتهاالك من عم ادوار صاحب محل بيتزا فى رايفيرا
ضحكت "مريم": عم ادوار
_ اها .. يلا يا صغنن اضرب البيتزا علشان شكلك هفتانه هى فرنسا مفيهاش اكل شوفتى الل بيطلع من داره بيقل جسمه ومقداره
ضحكت "مريم وبصت ل زين : زين
_ متقوليش حاجه انا عاهدت نفسى انى هعمل المستحيل علشان تنسى الل فات وتنسى الل جى من الاخر ههبل اهلك
ضحكت "مريم": وانا موافقه ...
وصلوا الاسكندريه وفاجئوا الجميع بقرار "مريم" انها هتستقر فى مصر وهتسافر ع فترات لما يبعتولها وفى الوقت دا فكرت تفتح ورشه لتعليم الرسم وساعدها "زين" بتوسيعها لتعليم النحت كمان ...!
بعد رجوع "مريم" بفتره عرض "زين" ع "مريم" الزواج وكانت طريقته علشان مترفض عمل "بيتزا "كبيره وكتبلها عليها اتجوزينى وحياه اهلك ضحكت "مريم" ووافقت وفى الوقت دا قرر "كريم" ياخد موقف جدى مع "ملك".. فى يوم وهما فى المطعم وكان زحمه و"ملك" مشغوله مع الزباين وهى وافقه عند الكاشير لقت بوكيه ورد محطوطه فى وشها
بتبص لقت "كريم": تتجوزينى "
زقت ايده : بلاش استظراف يا كريم انا مشغوله
وقف وسط المطعم وبصوت عالى : لو سمحت ممكن ثوانى من وقتكم
الموسيقى انطفت والناس انتبهت ل "كريم": الحكايه ببساطه انا بحب الل واقفه هناك دى "شاور على ملك" وعاوز اتجوزها وهى بتعاند صابر 8 سنين وكل يوم بتاكد انى محبتش غيرها " اتكسفت ملك وقرب منها خطوتين ": قدام الناس دى كلها بقولك يا "ملك" انا اسف ع كل لحظه وجعتك فيها ,, اسف ع تفكيرى ف نفسى ونسيتك ..اسف انى سيبتك لوحدك .. اسف ع كل حاجه ضايقتك
راح قدامها وقدم بوكيه الورد ونزل ع ركبه : اسف اسف وبحبك ومقدرش استغنى عنك بحبك يا ملك بحبكككككككك
ملك اتوترت والناس عماله تصور وبيقولولها وافقى وشافت محمود وكرم وسناء وسوسن واقفين وبيقولها توافق ومريم وزين كمان من الموقف معرفتش تقول ايه حست بالموافقه بقلبها لكن عقلها لسه مسكت بوكيه الورد وبصتله: هفكر وارد عليك
وقف "كريم " اخيرااااااااااااا عقبال عندكم يا جماعه هيبقى عندنا فرح قريب
ضحكت "ملك": لاسع ...
قررت "مريم" مع "زين" انهم مش هيعملوا فرح توفيرا لتكاليف ويستفيدوا بالفلوس ب اى حاجه تانيه ويسافروا لكن "زين" صمم انه عاوز يقطع التورته :
_ داانت رخم بجد ايه هبقى اجبلك تورته وتقطعها
_ لا يا حبيببتى لا مش انا الل يضحك عليا لازم نتصور وانا بنقطع التورته ويعملوا حركات بتاعتها دى
_ يعنى هتعمل ايه
_ ملكيش فيه انتى سيبلى نفسك ..
_ نعم ..
_ وارقصى مسمعتيش عدويه ..
ضحكت "مريم" و مرت مده صغيره وتم تجهيز مكان للفرح ع الشط جنب المطعم ولبست "مريم الفستان الابيض و"زين" بالبدله وقعدوا ف الكوشه كانت ع مركب : يخرب عقلك انت جبت الافكار دى منين
_ الفكره كانت موجوده من زماااان وكانت مستنيه الوقت المناسب لكن انتى لسه مشوفتيش حاجه اصبرى ...بس قوليلى الاول بتحبيها بالسى فوود ولا بدبل شيز
_ايه دى ..
_ البيتزا يا عنيا .. تعالى
سابوا الضيوف ودخلوا المطعم "مريم" وبتبص ع البوفيه الل هيتقدم للمعازيم كانت عباره عن بيتزا والتحليه ايس كريم بس
_ ايه دا ..
_ يلا كلى وزقططى براحتك
_ والناس هتجبرهم ليه ياكلوا بيتزا
_ هو دا الل عندنا عاجبهم عاجبهم مش عاجبهم يروحوا فرح تانى .. احنا عملنا الفرح دا علشان احنا نفرح مش الناس تفرح ...
فى اللحظه دى "ملك" جت : مريم الاكل جاهز
_ اكل ايه ماهو دا البوفيه
ضحكت "مريم": لا ماهو انت حرقتلى المفاجاءه تعالى ..
كان فى جزء من البوفيه السرى جهزته "مريم" ل "زين" عباره عن سندوتشات كبده وسدق مشطشطين : ايوه بقى
"الاكل نسى "زين" و "مريم" الناس والفرح الل معمول بره المطعم وقعدوا ف البوفيه فرشوا ع الارض وقعدوا ياكلو ولحوسو نفسهم وكان منظر يضحك الكل عليهم اطفال ومستخبين بياكلوا ... !
مرت 10 شهور ع زواج "مريم" و "زين" ومريم كانت حامل فى الشهر ال7 وبرغم حملها لكن كانت نشيطه ومش كسوله ف ففى يوم كان عليها تلف ع العمارات تجمع منهم فلوس تنضيف الشارع ففى احدى العمارات وهى بتاخد الفلوس : ايه دا يا ميما طالعه بنفسك وبتلفى وانتى حامل
_ مفيش مشاكل يا طنط اهى رياضه القعده مش هتعملى حاجه
_ و "زين" سايبك كده عادى
فى اللحظه دى سمعت صوت: مين بينده عليا
كان "زين" طالع ومعاه فوطه وكرسى وازازه مايه وعصير
_ ايه دا يا زيزو ؟
_ دا حاجات بسيطه علشان الفيل الصغنن بتاعى لما يحب ياخد رست
_ ياحبيبى وشايل ع قلبك كده
_ ماهى كمان شايله ع قلبها واحنا اتفقنا نشيل مع بعض لغايه ما نفرفر سوا ..
ضحكت الست : ربنا يخليكم لبعض ..
قفلت الشقه وطالعين الدور التانى مريم بصت ل "زين" : زيزو
راح بسرعه وحط الكرسى : براحه اقعدى .." عصير ولا مايه "
_ مايه
مريم بتشرب : يؤغتى ع الطعامه الصغنن بتاعى وهو بيشرب مايه
_ هاهاها .. يلا نكمل
_ انتى متعبتيش تعالى نرجع وبعدين نكمل بكره
_ لا طبعا انا مهمتى لازم اعملها صح علشان اى حد هيكسل اعرف اتكلم معاه المساواه
_ ماشى ماشى يلا ادحرجى قدامى يلا
قرب ميعاد ولاده "مريم" وجسمها ملى عن الاول و قاعده طول الوقت بتاكل ففى مشهد ملفت لكل الناس وهما قاعدين فى المطعم مريم قاعده ومده رجليها ع كرسى وزين قاعد جنبها هى ماسكه كوبايه العصير وبتتفرج ع كارتون ع اللاب ومركزه و "زين" بياكلها فى بوقها بيتزا : يلا افتحى بوقك
_ لا هاتلى حته فيها شيزز كتيره
_ شيزز كتيره هو انتى بنت مين ؟
_ مريم كرم معاك
_ اهلا وسهلا عاوز اقول ل مريم كرم انك هتفلسى اهلى دى 5 بيتزا فى 3 ساعات وهنا بيدفعونى مفيش حاجه لله
_ الله يا زيزو هو انا باكلها لنفسى
_ اه .. فيل صغنن بياكل فيل اصغن منه يلا يا صغنن افتح بوقك
_ هممم
_ فيل صغنن مش لاقيه زلومه ياناس ع مقاسه
ضحكت "مريم" انت رخم
_ يلا بسرعه البيتزايه دى رايحه فين
ولسه "مريم" هتفتح بوقها حست بالوجع وملامح وشها اتغيرت : ايه دا مالك .. هترجعى ولا ايه ..؟
_ زين الحقى اه ه ه ه ه
وبسرعه خدوها ع المستشفى وقت ولادتها ماسكه فى ايد "زين": متسبنيش يا "زين" لوحدى
_ وهو انا بالمنظر دا هسيبك ازاى غير لو قطعوا ايدى انتى قافشه ف حرامى يا مريم
_ يا زين متسبنيش .
_ مش هسيبك اهدى بس كده
مريم من الوجع وتر الكل و"زين" معاهم ولانها رافضه تولد غير بوجود "زين" لانها مش راضيه تسيب ايده دخل معاها والحظه دى ف حياه زين مش هينساها وهو اول حد يشوف الاستاذه مريم .. ولدت "مريم" بالسلامه ورجعت البيت وسمو فعلا المولوده "مريم" وكانت فرحه العيليتين ... فى الوقت دا "ملك" وافقت واتجوزت "كريم" .. مرت 4 سنين فى يوم "زين" راجع من الشغل دخل الشقه شاف "مريم" الكبيره والصغيره بياكلوا بيتزا ومندمجين ومبهدلين : مريم
_ بصوله الاتنين .. :نعم ..
ضحك "زين" : انا بعد كده هيسمونى مربى الافيال تخصص افيال صغننه ماشاء الله
قامت مريم ومريم حاطين كاتشب ع ايديهم وبيجروا ورا "زين" عاوزين يحطوه ع وشه وسط ضحك وهزار وسنين سعاده ووضوح وحب .. !
نامت "مريم" ودخلت "مريم هى و"زين" يناموا ..:
_ ميما
_ها
_ فى حاجه غريبه لسه مكتشفها انهارده ؟
_ايه هى ؟
_ احنا مقلناش لبعض بحبك
ضحكت "مريم": اه تصدق ..
_ وياترى ليه ..
_ علشان احنا اخوات انت ناسى ولا ايه
_لا يا حبيببتى ماخلاص عرفنا ان انتى الل رضعتى نيدو انا طبيعى 100%علشان كده الصناعى مربربك وانا مشفوط ...
_ لا بجد طيب امشى من جنبى الدنيا حر
بص حواليه "زين": الدنيا حر فى يناير انتى اتهبلتى ياحبيببتى
_ شوفت ليه مقولناش بحبك علشان انت عندك اعاقه ف المشاعر يا حبيبى
شدها ل حضنه: لا علشان احنا مش محتاجين كلام يثبت اننا بنحب بعض ,, الل بينا صعب كلام يوصفه ,, انا روحى وروحك اندمجوا مع بعض بقى صعب انفصالهم احنا تؤام روح
_ بس انا عاوزه اسمع
_ لا انا هسمعك كل حاجه دلواقتى ..
بتضحك"مريم": هتعمل ايه ..؟
_ هنرسم خطه محوريه داخليه لفيل صغنن تالت ماهو انا مرود الافيال ..
بتضحك طمريم" وبتهزر مع "زين" بنتهم دخلت عليهم : ماما السما بتشتى
مريم وزين بصوا لبعض وبسرعه مسكوا ايد "مريم" وطلعوا ع السطح بيرقصوا تحت المطر مهما الايام مرت بيهم عاداتهم مبتتغيرش وبتتوارثها اولادهم .. !
_____________________
توته توته خلصت الحدوته
القصه ممله القصه ممتعه
لايك ورايكم الاجمالى عن القصه بصراحه مطلقه نقد او اعجاب
واصدقائى ذو القراءه الصامته الل نطقوا قبل كده واختفوا
كومنتكم يهمنى او الايك
فى انتظاركم
_____________________
عن القصه :
القصه دى 80% حقيقيه وخصوصا اول 5 حلقات مفيش فيهم خيال ,,
انا كنت مع ماما فى عياده مستنيه الدكتور وقعده طولت سمعت واحده بتحكى لقريبتها ع جوازهم شدت انتباهى ودخلت معاهم ف الكلام
وكانت الفكره من هنا انهم قالولهم انهم اخوات لكن مكونش اخوات وحصل فراق ورجوع وفراق يعنى الموجز الل حكته انا رتبته .. وقصه تانيه عن اتنين كانوا فاكرين نفسهم اخوات حصل فيها احداث حلقه امبارح وانهارده لكن بالتاتش بتاعى 
__________________________
الغرض من القصه
1_ تؤام الروح مش شرط اتنين بيحبوا بعض ممكن اصحاب ممكن اخوات ممكن اتني اغراب القدر جمعهم ببعض ..تؤام روح الل بيفهموا بعض بيحسوا ببعض
2_ الكلمه بتفرح وبتجرح حتى لو كانت بسيطه
3_ من حقك تقعد فى مكان نضيف فبالتالى شجع نفسك والل حواليك ونضفوا المكان ..
4_ الاطفال وحقوقهم المسلوبه سواء تعليم او رعايه لو ب ايدك تساعد حد فيهم متترددش ..
5_ الايتام محتاجين رعايه طول السنه مش يوم واحد توجعهم فيه ..
6_الاهل بيبقى تركيزهم اكل وشرب وتعليم اولادهم اهم لكن الاهم انهم يعلموهم ازاى يعيشوا حياتهم بقرارتهم واختيارتهم ويتعلموا لو اخطائو لاننا كلنا بشر ..
7_الفرق بين الاعجاب والحب شعره بلاش الاستعجال فى الارتباط
8_ الحب الحقيقى الل مهما طالت به سنين عمره ما بيتغير او بيتأثر ..
9_الاخ .. سند وضهر البنت او الام بعد الاب لو مكنش كده ميعتبش ع اخته لما تروح لواحد حسسها ب اهتمام هى محرومه منه وبيتغدر بيها لان ملهاش ضهر وراها ولوحدها ..
10_ الاحتياج .. احساسه صعب لما تكون محتاج ل اقرب الناس ليك وهو مش حاسس بك
11_الاهتمام والاحتواء .. اقوى اثباتات الحب انه بجد مش كلام ..
12_ السعاده فى ابسط الاشياء لا بالفلوس الكتير ولا الاماكن الفاخره ولا باللبس الغالى ممكن قعده ع الرصيف مع انسان بترتحله وبتحبه مع كيسين شيبسى ب 5 جنيه هتحس بسعاده اكتر من الل قاعد فى كافيه ع النيل ...
13_اى علاقه ع وجه الارض اخوه او صداقه او حب بتكون بين اتنين مهما كانت المشاكل والازمات حطوا فى حسابكم الطرف التانى واتناقشوا معاه واتكلموا معاه وخدوا قرار مع بعض القرارات الفرديه مبتعالجش الامور بتسوء اكتر العلاقه وبتوصل للجرح والوجع .. فتلاشوها من الاول ..
14_ الاهل وتربيتهم ل اولادهم بيبقى اساس لتكوين الانسان لو بنوا صح هيطلعوا كويسين لكن لو ربوه كويس مش هيبقوا متربين صح لان فى فرق بين التربيه الصح والتربيه الكويسه
15_ الازمات والاحزان بتبين معدن الانسان الل قدامك
16_الشخص الل بيحب بجد بيحب كل حاجه فى الل بيحبه وحش وحلو فيه مبينقيش ..
17_سلب الحقوق المعنويه "اهتمام_حب_رعايه_احتواء" بتضعف تكوين الانسان
18_ب ايدك تساعد غيرك متترددش لانك فى يوم اكيد هتحتاج الل يساعدك الدنيا دواره ..
19_الحب بيتثبت بالافعال مش كلام رومانسى
20_الل بيحبك هيكون فاهمك مش معجب بشخصيتك
21_الحب الل مفهيوش حدود خسائره كتيره اتجنبوا وحافظوا ع حبايبكم
22_ متستعجلوش ع الارتباط هيجى ف وقته الصح مع الشخص الصح
23_ بلاش حب النسيان او الطمع انك تاخد مكان حد فى قلب حد وانت عارف انه فيه هتعذب نفسك وهتوجع قلبك انت ,, الضرر هيكون انت مش حد تانى ..
24_ الحب مفيهوش الانانيه والانا .. الحب زى القفه ب ودنين بيشيلوها اتنين ..
__________________________
بجد بجد انا بشكر كل شخص تابع معايا القصه من اولها الابطال المكافحين الصابرين
انا بكركم ع استحمالكم ليا من الاول بجد بدون ذكر اسماء كنت بستنى كومنتكم لانها تهمنى
انا قولت قبل ما تنزل القصه انها مختلفه عن الل قبلها بكتير برغم اعتراضات البعض وكره البعض ليها وتوصيفها ب انها ازبل حاجه اتكتب "اتقالتلى كده بالنص" ف انا الحمد الله مبكتبش حاجه مش حباها ولا مش مقتنعه بيها وفعلاكنت مبسوطه جدا بيها لان معانيها جميله جدااا
احنا مش عايشين فى المدينه الفاضله لكن ب ايدنا نعيش فيها ودا بحاول اوضحه فى قصصى ..
بكرر قصصى مش رومانسيه بحته قصصى خيال ممزوج بواقع وواقع ممزوج بخيال
بشكر كل الل تابع وكل الل كتب كومنت وبعت رساله بجد تسلمولى جدااا جداا
وشكرا لكل الل قال رائيه انه هيتابع او لا القصه بجد مبزعلش لان المتابعه اختياريه لو 10 بس الل تابعونى عندى بالدنيا المهم يوصلهم الل قصداه من كل موقف يحصل
شكرا ليكم والى اللقاء فى قصه تانيه مش دلواقتى خالص ان شاء الله تكون احسن من دى ليكم
ليست هناك تعليقات:
إرسال تعليق