(1)
الحياه ماهى الا تجارب ودروس .. تاتى التجارب على هيئه فرص والدروس هى تعلم كيف عدم اضاعه الفرص .. تعلمنا الحياه ان فقدان فرصه لا تعنى نهايه الكون .. فالحياه منذ نشائها وهى محمله بالفرص للجميع فالبعض لا يشعر بالفرصه والبعض يستحوذ عليها .. ولكن تعنى اننا ف انتظار فرصه اخرى لاصلاح ما فقدناه سابقا .. فهل سيتم اصلاح الماضى بفرصه اخرى ام ستاتى الفرصه الثانيه لبدايه جديده ..؟
_______________________________
الساعه 8:45 صباحا وفى شقه بسيطه فى حى "عين شمس" منطقه اهلها متوسطين الحال عايشين حياه بسيطه بعيده عن التكلف .. فى بيت رقم "4" الدور الرابع كانت فى أسره مكونه من أم وشاب وبنت بيفطروا:
على : الحمد الله ..تسلم ايدك يا بيبو
هبه: تسلملى يا حبيبى .. استنى اعملك الشاى بسرعه
على بص ع الساعه ف ايده: لالا كده هتاخر يادوب الحق .محتاجه حاجه ياست الكل
مامته: سلامتك يا حبيبى ..ربنا يسهلك طريقك ويرزقك بالخير
"على" باس ايد مامته وراسها : انا نازل يا بيبو
هبه: مع السلامه يا حبيبى
فى الوقت دا فى البيت رقم "8" كان فى بنوته طولها متوسط ولون بشرتها ابيض وعيونها عسلى فاتح وجسمها متوسط ولابسه بنطلون جينز وتونك رمادى وطرحه كحلى ف رمادى وواقفه ف بلكونه شقتها وكانت بتبص بلهفه ع الساعه وعلى مدخل بيت رقم "4" مستنيه حد يخرج منه .. بتبص ف ساعتها و ترجع خطوتين تبص ع الساعه الحيطه والساعه بتقرب من "9" ..ودقت الساعه 9 وبتبص ع مدخل البيت ..خرج شاب طويل قمحى البشره شعره قصير وعيونه عسلى لابس بنطلون جينز كحلى وشوز ابيض وتيشيرت بيج ولابس نضاره و شنطه كورس "على" وباابتسامه بيسلم ع جيرانه واصحاب المحلات الفاتحين .. ابتسمت البنوته اول ما شافته وبسرعه دخلت من البلكونه وبصوت عالى : ماما انا نازله اجيب فطار ها ماشى
مامتها: فطار ايه ولمين احنا فطرنا ..
مسمعتش البنت كلام مامتها ونزلت بسرعه تجرى ع السلم وقفت ف المدخل تهدى نفسها وبتبص من بعيد تشوفه هو واقف فين.. لاقته واقف عند محل المكوجى بيتكلم مع عم عبده المكوجى وبيضحكوا .. خرجت من المدخل وحاولت تهدى خطواتها وتهدى نفسها وماشيه ببط قاصده كده يكون خلص كلام مع عم عبده المكوجى..وهى بتقرب ببطئ خلص كلامه ومشى وكانت قدامه وكانت هتخبطه ..:
ايمان باابتسامه: على .. صباح الخير
على باابتسامه: ايمى ..صباح الخير
ايمان: عامل ايه .؟
على: الحمد الله ..انتى اخبارك ايه
ايمان وابتسامتها ماليه وشها : الحمد الله .. شكلك كده رايح الجامعه
على: لا ورايا مشوار وبعدها رايح الجامعه ..وانتى اجازه ولا ايه
ايمان: لا رايحه فتره بعد الضهر المدرسه
على بيضحك: وماشاء الله ايه النشاط دا بقالك فتره بتصحى بدرى ع كده بتذاكرى بقى
ايمان متنحه: ها .. اه طبعا طبعا ..
ماانت عارف انا عاوزه اجيب مجموع ف الدبلوم علشان ادخل كليه تجاره
مش انت قلتلى ينفع وانى مكتفيش بالدبلوم التجاره واكمل
على: اه طبعا.. التعليم دا حاجه مهمه لانسان بيبقى مدخل لدنيا
ايمان: بصراحه البركه فيك انت الل شجعتنى انا كنت مكبره دماغى
ولولا مساعدتك ليا ومذاكرتك ليا المحاسبه مكنتش هطلع منها
على بيضحك: لالا بالعكس انتى الل شاطره بس كنتى محتاجه زقه بسيطه
ايمان بتضحك: تسلم زقاتك
على: ميعادنا بكره ان شاء الله
لسه ايمان هترد سمعت صوت بيقرب منهم : "على" .. صباح الخير
بصت ايمان لاقت هدى جارتهم اتقلب وش ايمان :
هدى باابتسامه بارده ل ايمان: ايمى ازيك..
ايمان بنفس الابتسامه البارده : هدى ازيك..
هدى باابتسامه وهى باصه ل على : الحمد الله طبعا كفايه اليوم يبتدى ب "على "
ايمان: ليه شايفاه على صباح الخير يا مصر
ضحك على ع كلام ايمان : يخرب عقلك يا ايمى
هدى بتضحك بتقل: ها ها ها ..عسل عسل
ايمان بتبص ل هدى : على فين كده رايحه درس ؟
هدى: اه وشوفت "على" قلت اصبح عليه وافكره ان انهارده ميعادنا ..الدرس
على: فاكر متقلقيش ع ميعادنا
هدى بتبص نص بصه ل ايمان: وياريت ميبقاش ف ازعاج يعنى انا ثانويه عامه مش دبلوم تجاره محتاجه تركيز علشان دا مستقبل
ايمان اضايقت: نعم يعنى ايه مش فاهمه
هدى: يعنى الثانويه العامه اهم واصعب و..
على قاطعها : لا لا لا يا "هدى" مفيش حاجه اهم ولا اصعب من حاجه كل مرحله وليها صعوبيتها و الاتنين همهم تقيل ورينا يعينكم ... يلا اسيبكم انا وصباح الفل ع احلى بنات
ايمان باابتسامه: صباح الفل
هدى: انا خارجه ع الشارع خدنى ف سكتك
على: اوكيه يلا ..سلام ياايمى وذاكرى كويس
ايمان ملامح وشها متغيره : سلام...
وقفت ايمان باصه ع "على" و"هدى" من ضهرهم :الهى ياخدك اتوبيس سواقه أحول.. او تتكعبلى وانتى ماشيه تلذقى ف عمود يحولك متعرفيش يمينك من شمالك يا بعيده .. كدرتينى
رجعت ايمان وطلعت شقتهم وملامح وشها متغيره شافتها مامتها
مامتها: فين الفطار
ايمان بصت لمامتها: فطار ايه ..مش انتوا لسه فاطرين من شويا مع بابا
انتوا لحقتوا تجوعوا..؟
مامتها: مش انتى نزلتى وقولتيلى هتجيبى فطار قلت هتجيبى سندوتشات
زى كل مره.فين بقى ؟
ايمان بتبص ع ايديها : فطار .. اه اه فطار
ماانا نسيت الفلوس هنا وغير كده لاقيت نفسى مش عاوزه سندوتشات
انا داخله اوضتى ..!
وبسرعه دخلت اوضتها ورزعت الباب وقعدت تبرطم بالكلام بنرفزه وشغلت نور الاوضه
وقعدت ترزع ف حاجات قلقت اختها اسماء :
اسماء بصوت عصبيه: انتى بتعملى ايه مش عارفه انام منك ارحمينىىىىى
ايمان : اتخمدى اتخمدى
اسماء بنص عين نايمه: مالك شايطه كده ليه
ايمان بنرفزه : عاوزه اولع ف "هدى "
اسماء قامت قعدت ع السرير : ياادى "هدى" الل عاملالك اكلان ف دماغك كل ما تشوفيها
ايمان بعصبيه : ماهو انتى مشفتهاش انهارده عملت ايه .. بنت المفكوكه لابسه الل ع الحبل وضاربه ميكب بالهبل وظابطه الساعه ع ميعاد نزول "على" علشان تتلكك تمشى معاه ف وسط الشارع ويوصلها ف سكته بنت المفقعه
اسماء بتتأوب وبتضحك ع اختها : ع فكره "على" بيعمل مع الكل كده مش قاصد "هدى" بعينها يعنى .. لو انتى او انا او اى بنت من المنطقه هيعمل كده ..دى الصدفه الل بترميها ف وشه ... زى بالظبط كده صدفه صحيانك بدرى كل يوم وتنزلى تجيبى انتى بنفسك سندوتشات الساعه 9 الصبح ومبتفطريش معانا
ايمان بغيظ : لا "هدى" بترسم ع "على" انا متاكده ..
بنت المفكوكه انهارده بتعايرنى ان انا دبلوم تجاره وهى ف ثانويه عامه
لكن "على" رد عليها ولحقنى قبل ما اعضها والله
اسماء بتضحك: ونبى دلقتك ع "على" دى مش هتجبلك غير وجع القلب
ايمان بتتنهد وملامح وشها اتغيرت ل ابتسامه : مش عارفه يا سمسم لما بشوفه بحس بان كل حاجه ف الدنيا حلوه ومبعرفش اشوفه غير وهو نازل الصبح وهو راجع متاخر بليل ووقت الدرس بتاعى ..غير كده "على" غير متاح
اسماء : والدرس بتاعى انا و"هبه" ودرس "هدى" الل مبتفوتيش حصه ..غير التلكيك الى بتخترعيها علشان تروحى شقتهم ...
ايمان: ماهو انا مش هسيبه ليها ابدا ع جثتى .. هعرفها انا بتاعه الدبلوم هتعمل ايه
قامت اسماء من ع السرير بتتمطع: خليكى كده كلى ف نفسك و"على" اصلا ربنا معاه مش فاضى لهرى دا كله من شغله ف مكتب المحاسبه لجامعته وحضور محاضرات وشغله ع تاكسى بليل والدورس الل بيديها.. غير انه مع جيرانه مش مقصر معاهم اى حد عنده ظروف حد عيان او مات او مسافر مبيقصرش وبيسأل.. باباه مات وساب عليه حمل يهد جبل وهو ماشاء الله سادد ومتهزش قدامه جامعته يخلصها وهبه اخته ومصاريف علاج مامته بمعاش باباه الميت دا .. هقولك ايه ولا ايه ماانتى عارفه وشايفه ...فهبلك دا انتى و"هدى" مش ف دماغه انا واثقه ... سيبو الراجل ف حاله يهدكم
ايمان: ماهو انا لاسباب دى كلها مش هسيبوا .. "على" استحاله يتساب ..مش قادره انسى من شهرين لما وقعت ودراعى اتشرخ اخدنى بسرعه ع المستشفى ورفض ياخد فلوس من بابا وجبلى العلاج وكان بيطمن عليا .."على" تحسيه راجل فى زمن شح فيه الرجاله و الل حساه ناحيته ميتحكيش بس بس بس ....
اسماء واقفه بتضحك: واللهى انتى هبله .. ذاكريلك كلمتين ينفعوكى خليكى تعدى ولا ناوى تريحى السنادى كمان يا فاشله ...
ايمان راحت خبطت اسماء بفوطه جنبها: امشى
خرجت اسماء من الاوضه بتضحك وقعدت ايمان فتحت كتاب المحاسبه ومسكت قلم
وقعدت ترسم ف قلب وتكتب اسم "على" .....
ايمان بتكلم نفسها وهى باصه ل اسم "على" : انت ليا انا وبس
...!!راح "على" الجامعه بعد مشوار الصبح وكان عنده محاضرتين بس وقابل اصحابه سلم عليهم ع السريع وطلع المحاضره الاولى وكان فى وقت فاصل بين المحاضرتين نص ساعه راح الكافتيريا يشرب نسكافيه يصحصح و يراجع المحاضره
حد خبطه ع كتفه : انا قلت هلاقيك هنا مع كوبايه النسكافيه البلاك دى |
على بص : ابو حميد .. ما لسه بدرى
احمد: صحيت متاخر يادوب لبست ونطيت ف تاكسى وجيت قلت الحق المحاضره التانيه
على : عارف انك مش هتصحى بدرى علشان كده طلعت ع المحاضره ع طول
احمد: وطبعا مش هتبخل عليا بالملخص بتاع المحاضره
على بيضحك: طبعا .. وانا ماشى اخرج معايا صورها
احمد بيبص ع الورق الملخص : يابنى انت خساره تبقى طالب بكالوريوس انت مكانتك معيد ولا دكتور يا ابنى
على بيضحك: مش اوى كده ياعم احنا ع باب الله
احمد: انت لو متعينتش السنادى ف الكليه هيبقى حرام انت تقديراتك عاليه
على : يسمع منك ربنا ..لكن انت عارف من كتر زراعه الكوسه بيفكروا يحولوا النيل صلصه
" احمد" ضحك وشايف "على" بيلم ف الورق وقايم: على فين
على: المحاضره هتبدء ياعم النايم ..علشان نلحق مكان
احمد : اه صح يلا بينا
وهما ماشين وداخلين ع المدرج ..احمد: انا واثق ان مكانك محجوز
بيبص ع المدرج لاقى زميلتهم "جيهان" بتشاور ليهم .
. احمد باابتسامه: مش قلتلك انا
على بيخبطه ع راسه : ياريت تركز ف مذاكرتك زى ما بتركز ع الناس كده
على بص ل جيهان : جيهان ...
راحوا قعدوا وخلصت المحاضره ...
جيهان: "على" انا ملحقتش اكتب اخر جزئيه هو الدكتور قال ايه ؟
"احمد" زق "على" ومسك الورق : هصورهولك انا وانتى ارتاحى يا جيحجى
بتضحك جيهان : ميرسى يااحمد
على بيضحك: هصورلك الورق وهسيبلك نسخه مع "احمد" ..
انا ماشى يلا سلام
جيهان بسرعه: ع فين بسرعه كده انت مبتقعدش معانا خالص يا "على"
على باابتسامه: معلش مشغول ومره تانيه اعمل حسابى .. يلا يا "احمد"
احمد باصص ل جيهان وبيغمز : هصورلك الورق وانتى اطلبيلى كوبايه شاى ماشى ونتقابل ف الكافتيريا
جيهان هزت راسها و ابتسمت : اوكيه
ومشى احمد وعلى ....
احمد: مالك ياعم براحه ع البنت انت مديها وش خشب ليه كده
على : انا .. لا خالص
احمد: يعنى انت مش ملاحظ اهتمامها بيك .. يلى مبتحسش
على بيضحك: احنا زمايل يا ظريف .. وغير كده انا مبفكرش ف اى حاجه غير
دراستى وشغلى والحمل الل عليا معنديش وقت لتسبيل والتلميح زيك
احمد : يعنى انت مفيش حاجه اتجاه جيهان خالص خالص
على: لا خالص
احمد: متاكد
على وقف وبص ل احمد: احمد انا معنديش وقت احب ولا اتحب ..انا عاوز اخلص اخر سنه على خير انا ورايا حاجات كتير وانت عارف
احمد: يعنى ادخل انا بقلب جامد
على خبط ع كتفه: ادخل بقلب وفشه وكل حاجه انت عاوزها
احمد اخد نفس : نقول توكلنا ع الله وندبح حلال الله اكبر
على ضحك وراحوا عند ماكينه تصوير ...
كانوا واقفين عند ماكينه التصوير وخلصوا التصوير : اتفضل نسختك انت وجيهان ودى نسخه لمحاضرتين انت عارف هتعمل ايه ؟
احمد: عارف هشوف كام حد عاوزها اصورهلهم ونتقابل اديك فلوسهم
على: ايون شاطر .. يلا انا هطير
احمد: ع طول مستعجل كده
بص "على" ع الساعه : الاسطى عبدالله صاحب التاكسى ميعادى معاه كمان ربع ساعه هستلم ورديتى يادوب يلا سلام يامان
مشى "على" بسرعه و"احمد" باصصله : الله يكون ف عونك يا لول
رجع بص لبت الل واقفه عند ماكينه التصوير : صوريلى دول 10 نسخ واحتمال ارجع اصورهم تانى ..تمام ..!
رجع احمد بسرعه ع الكليه ع الكافتيريا ومعاه الورق المصور وكانت جيهان قاعده ف الكافتيريا .. احمد بيجرى وبينهج: سورى يا جيجى اتاخرت المكان كان زحمه عند التصوير اوى
جيهان: اكيد الامتحانات قربت ..
احمد طلع نسخه جيهان: اتفضلى نسختك
جيهان بتطلع الفلوس : اتفضل
احمد: خليها عليا
جيهان: لا احنا مش متفقين ع كده وبعدين دى فلوس ومجهود "على" .. مش بدهوملك انت
احمد بيضحك: ف دى عندك حق ..طيب هينفع نشرب حاجه ساقعه ع حسابى
جيهان ابتسمت : اوكيه
راح احمد يجيب الحاجه الساقعه وقعدوا ... وفى زمايل ليهم راحوا ل احمد اخدوا منه نسخ من الورق ودفعوا فلوسها
جيهان: "على" اتغير اوى مبقناش نشوفه زى الاول
احمد : من بعد ما باباه اتوفى من سنتين واحنا ف تانيه الحياه اتغيرت مع "على" خالص ..
بقى هو المسئول عن اخته ومامته وعلاجها ومصاريف بيت وتعليم اخته غير تعليمه هو
معاش باباه بسيط جدااا وقضيه التعويض متحكمش ليهم فيها وخسروها .. فمفيش طريقه قدامه غير كده يعمل مشاوير وتخليص ورق لمكتب المحاسبه بتاع خالى ويشتغل ع التاكسى غير الدورس الل بيديها ف بيته ومع ورق المراجعات دا ...واهو ماشى الحال معاه .. "على" موجود ع كتافه هم ما يتلم الله يعينه
جيهان: وبيلاقى وقت لمذاكره وبينام امتى انا مش عارفه بجد
احمد: هو مرتب نفسه ولخطواته .. وان شاء الله هيكون معيد ف الكليه هنا قد الدنيا
جيهان باابتسامه: ان شاء الله "على" يستاهل كل خير
احمد : انا جعت يلا ناكل
جيهان بصت ع الساعه: لا انا طالعه محاضره دلواقتى اشوفك بعديها
احمد: خلاص هستناكى ناكل مع بعض
جيهان: هتاخر
احمد بيسبل : استناكى العمر كله انا ..
جيهان بتضحك: بكاش بشكل
احمد: جعان بشكل ... متتاخريش هتلاقينى قاعد هنا
جيهان: اوكيه .. سلام
مشيت جيهان خطوتين وراح "احمد" طلب سندوتشات : اهو تصبيره لغايه ما ترجع
شويا وجيهان رجعت : اتاخرت
احمد: لا خالص ... ناكل بقى علشان جعان اوى
جيهان:اوكيه
راح احمد طلب اكل تانى ورجع لجيهان واداها سندوتش
احمد : كنا بنقول ايه بقى ....
قعد "احمد" مع "جيهان" يتكلموا شويا ومشيوا ..!!
"ايمان" فى اليوم دا مرحتش المدرسه وفضلت قاعده ف البيت حاطه ترابيزه وكرسى وكتابها وبتذاكر ف البلكونه وعينيها ع مدخل بيت "على" وع الساعه... شويا وهى بتبص ع مدخل البيت شافت "على" داخل الشارع وبيسلم ع اصحاب المحلات وهو ماشى ودخل البيت وبعده بدقيقه بالظبط شافت "هدى" دخلت وراه .. "ايمان" شافت كده مستحملتش قامت وقفت بصت قدامها طلعت كتاب المحاسبه وقلبت ف الصفحات ومسكت القلم وعلمت ع مسائلتين وغيرت هدومها وراحت خرجت ع الصاله ..
ايمان بسربعه : ماما انا رايحه عند "على" ف مسئله مش فاهمها وعندى امتحان شفوى بكره ف المدرسه ماشى
اتكلمت بسرعه ايمان ونزلت بسرعه وطلعت اسرع ع بيت "على" ورنت الجرس وفتحت الباب "هبه" اخت "على" :
هبه : ايمى.. تعالى
ايمان باابتسامه: ازيك يا بيبو .. معلش جيت من غير ميعاد
هبه قاطعتها: هو فى بينا استاذان والحاجات دى تعالى يا هبله
"ايمان" بتبص ع الصاله ملاقتش "هدى" : اصل عندى امتحان بكره ومش عارفه احل المساله دى .. هو "على" فين ؟
هبه بتضحك : "على" ف اوضته
ايمان مخضوضه: نعم ..ف اوضته .. ازاى مش هو بيدينا الدوروس ف الصاله هنا و ..
ف اللحظه دى وهى منفعله شافت "هدى" خارجه من اوضه "هبه" "
هدى:ايمان
ايمان ارتاحت : هدى
"هدى" قربت من "ايمان" وربعت ايديها : خير اشوفك مره الصبح ومره بليل ..فى حاجه
قربت "ايمان" خطوتين منها وبلهجه حاده : ع اساس انى ببقى ملهوفه اشوفك هى الصدفه الل بتحكم
هدى بنفس اللهجه : صدف برضه ولا
ايمان اتعصبت : ولا ايه كملى ...
ف اللحظه دى "على" خرج من اوضته وباابتسامه: ايمى هنا كمان
بص "على" ع الساعه لاقها 9 ونص وضحك : فى ميعادك زى كل مره
ايمان نفضت ل "هدى" وراحت اتجاه "على" : سورى بجد .. بس انا عندى امتحان بكره ومش عارفه احل المساله دى
"على" راح اتجاه ترابيزه السفره : تعالى ورينى
هدى :: على .. دا ميعاد الدرس بتاعى مينفعش كده
ايمان: متقلقيش يا هدهد مش هاخد من وقتك كتير
على بيضحك: متقلقيش مش هنتاخر اقعدى هخلص بسرعه يا هدى ....
راح "على" بص ع المساله وشرحها ل "ايمان" و"ايمان" كانت مركزه مع "على" اكتر من المساله و "هدى لاحظت انها كانت بتلكك واتغاظت منها ...
على: خلاص كده وصلت
ايمان انتبهت: ها .. اه .. شكرا
هدى:: نبتدى احنا بقى الوقت هيتاخر
ايمان : زياده تاكيد انا هقعد مع هبه ف اوضتها احل المسالتين علشان لو وقفت حاجه قدامى وانا عندى امتحان الصبح مرجعش تانى وكده يعنى
هدى: باستغراب : مش هتمشى يعنى ؟
ايمان بتتك ع سنانها: هو بيت ابوكى مش عاجبك امشى
هدى:: بتقولى ايه ؟
ايمان باابتسامه بارده : بقول هدخل الاوضه اهو واسيبكم لدرس ..
على بيضحك ع تصرفات ايمان وهى داخله الاوضه :
هدى: ينفع كده
على مهتمش ل كلام هدى : يلا نبدء الدرس وركزى معايا ..
دخلت "ايمان" الاوضه مع "هبه" وبتفتح الباب موارب وبتبص عليهم
هبه بتضحك: لدرجه دى يا ايمى داانتى واقعه واقعه
"ايمان" قفلت الباب براحه وراحت قعدت ع السرير : انتى ومامتك واسماء وماما وعم جلال وعم عبده حتى عبد الله ابن سعاد الل بيرضع عرف انى بحب اخوكى وياريت اخوكى بيحس .. والبت هدى دى كل شويا القيها ف وشى
هبه بتضحك: متقلقيش "على" اخويا مبيفكرش ف اى حاجه من اللى ف دماغك
ايمان راحت ل هبه : بيبو .. حبيببتى .. يعنى مفيش حد ف الكليه "على" عينه منها ولا حاجه
هبه: بصراحه فى كتير بس "على" الل مش مركز معاهم .. "على" مركز ع البكالوريوس
وانتى كمان ركزى علشان تجيبى مجموع كبير تدخلى كليه تجاره زى "على"
ايمان بتتنهد : اكيد ..
شويا مشيت ناحيه الباب وفتحته بسيط ورجعت لمراقبه "على " و"هدى " ..اتصلت "اسماء" ع تليفون البيت وخرجت "هبه" ترد وسالت ع "ايمان" وخرجت "ايمان" تكلم "اسماء" وقالتلها ماما بتقولها تعالى دلواقتى بسرعه .. كان الدرس بتاع "هدى " لسه مخلصش فنزلت "ايمان " وهى متضايقه ..شويا وخلص "على" الدرس مع "هدى" وراح ل "هبه" ف اوضتها قبل ما يدخل أوضته ينام .. خبط ع الباب :
هبه: ادخل يا على
"على" فتح الباب ووقف: بيبو ممكن تعمليلى سندوتش جبنه مع فنجان قهوه دبل عندى حاجات ومذاكره وعاوز اصحصح شويا
هبه : يا سلام ..من عنيا حاضر
خرج "على" من عند "هبه" وخبط ع اوضه مامته ودخل
على: مساء الخير يا ست الكل
راح ناحيتها ع السرير ومسك ايديها باسها
مامته: مساء الهنا ياحبيبب قلبى
على: عامله ايه .. اتعشيتى واخدتى علاجك ؟
مامته: "هبه" الله يكرمها عشتنى واخدت من شويا العلاج .. انت عامل ايه يا حبيبى اتعشيت ؟
على: الشيف "هبه" بتظبطتى دلواقتى اهو ..
طلع من جيبه مبلغ من الفلوس : اتفضلى ياست الكل
مامته: معايا فلوس خليهم ليك
على ب ابتسامه : هيعملوا ايه معايا انا معايا مصروفى وفلوس تكفينى الحمد الله وبعدين انا عارف ان علاجك فاضل فيه يومين ويخلص هاتى علاجك والباقى خليه معاكى فى الاحتياطى لو البيت احتاج حاجه وانا لو احتجت حاجه هقولك
مامته بتطبط على ايد: تسلم يا حبيبى .. انت مش مخلينا محتاجين حاجه وع طول بتفكر فينا قبل نفسك
على باس ايد مامته: انتم اهم من نفسى ياست الكل ..
مامته: ربنا يخليك لينا ويوسع رزقك ويكرمك
على : الله ..مفيش بعد كده الدعوتين الحلويين دول
راح باس ايد مامته : عاوزه حاجه منى يا ست الكل انا رايح اوضتى ورايا مذاكره
مامته: يخليك لينا ويوفقك وينولك الل فى بالك يا قادر يا كريم
على: ويخليكى لينا يا ست الكل ..هسيبك ترتاحى تصبحى ع خير
باس على ايد وراسها وخرج من الاوضه ومامته قعدت تدعيله
: ربنا يقويك ع الحمل الل ع ضهرك يا على ياابن بطنى ..!
خرجت "هبه" من اوضتها ودخلت المطبخ عملت سندوتشات ل "على" والقهوه وراحتله اوضته
على : تسلميلى يا بيبو تعبتك معلش
هبه : تعبتنى ..ياريت تتعبنى ع طول كده
على باابتسامه: حبيببتى انا ..
راح طلع فلوس من درج المكتب : امسكى
هبه: ايه دا
على: ورق بفره لفيلنا سيجارتين (ضحك) فلوس خديهم
هبه: لا ياعلى انا مش عاوزه فلوس
على مسك ايديها وحط الفلوس وضمهم: انتى الاسبوع الجى لازم تحضرى مراجعات
وهتحتاجيهم فااحجزى بكره لانه اخر يوم وهاتى الملازم الل ناقصاكى انتى ثانويه عامه
هبه بصوت واطى: انا عارفه ان حملى عليك تقيل انا قلتلك اسيب المدرسه وانت مردتش
على رفع راسها : وتسبيها ليه .. طول ماانا عايش مفيش حاجه نفسك فيها ومتعملهاش
والتعليم هتتعلمى وهتتدخلى الجامعه وهصرف عليكى لغايه ما اوديكى باايدى لابن الحلال
انتى مسؤؤله منى ... متقوليش كده تانى فاهمه ؟
هبه اترمت ف حضنه : يخليك ليا يا "على" يا احن اخ واطيب اخ ف الدنيا .. عوضتنى ع فراق بابا وحسستنى انى مش لوحدى وانك ضهرى وسندى .. ربنا يخليك ليا
على حضنها: ويخليكى ليا يا احلى بنوته ف الدنيا
يلا بقى روحى ذاكرى وانا كمان هذاكر
هبه باابتسامه وبتمسح دموعها : ماشى ..لو عوزت حاجه انده عليا انا سهرانه بذاكر
على: ماشى
هبه مشيت خطوتين ورجعت : على
على: ها ..
هبه: لا خلاص
على : عاوزه تسألينى ع ايه
هبه بتضحك: قافشنى ع طول كده
على : انا الل مربيكى يا بيبو .. ها عاوزه ايه
هبه :عاوزه اقولك حاجه ؟
على: قولى
هبه: انت مفيش حد فى قلبك كده ولا كده
على بص ل هبه: بتقولى ايه ؟
هبه: يعنى اطمن على اخويا قلبه دق ولا لسه
على: وبتسالى ليه .. عاوزه تطمنى مين .. هدى ولا ايناس ولا مروه ولا ..
هبه بسرعه: ايمان .. "ايمان" عندها هسهس ان ف حد ف حياتك
ضحك على : "ايمان" دى لاسعه بجد
"هبه" قربت من "على" : بس زى العسل وحبوبه وبتحبك اوى
على ابتسم: روحى يا "هبه" ذاكرى وبلاش تشغلى بالط بالمواضيع دى ..انتى ف ثانويه
"هبه" قربت من "على" : طيب طمنى فى حد ولا ها .. ها .. ها
على : هبببببه روحى ع اوضتك
هبه: حاضر حاضر ...
خرجت هبه واترسمت ابتسامه ع وش على : مجنونه بجد مجنونه
وفتح الكتب وابتدا يذاكر ....!!!
فى يوم كان ميعاد درس ل "ايمان" مع "على" وزى كل مره فتحت الدولاب
وقعدت تدور ع لابس وتقيس وتغير قبل ميعاد الدرس ب ساعتين
اسماء : هتخلصى امتى الفرح دا ورايا مذاكره
ايمان: اصبرى بس انا مش عارفه هلبس ايه ..
مسكت تيشيرت : لا دا لابسته من اسبوعين ودا كمان ودا ... و...
اسماء بصوت عالى : استغفر الله العظيم ..
البسى اى حاجه انتى رايحه يذاكرلك مش هيصورك ع فكره
ايمان بصتلها: ماهو انتى مبتشوفيش "هدى" بتبقى عامله ايه
اسماء: والله انتى هبله مالك ومالها
ايمان : مبتفهيش انتى .. اقولك خليكى ف الل قدامك دا
اسماء ضحكت ورجعت لمذاكرتها ..
خلصت "ايمان" لبس ولفت الطرحه وحطت ميكب وجهزت : انا نازله يادوب الحق
اسماء بصتلها: ايه الاوفر دا .. لبس وقلنا ماشى هبله
لكن ايه الميكب دا كله .. شيلى الل عملتيه دا
ايمان: بصى .. ماهو انا مش هسيب هدى المعصعصه ام شعر خيش تلفت انتباه "على"
انتى مشفتهاش المره الل فاتت كانت عامله ايه وهى رايحه ل "على" .. البرفان ريحته من مدخل البيت لغايه شقه "على" مفحفحه .. والمكيب الكامل والمحزء ..و
اسماء قاعتها : وانتى مالك بيها ..خليكى نفسك يا هبله ..البساطه بتشد عن البهرجه
ايمان بااستهتار: اسكتى اسكتى انتى مش فاهمه حاجه
خرجت "ايمان" بسرعه ونزلت واسماء مستغربه من تصرفات اختها
وصلت "ايمان" عند باب شقه "على" وطلعت البرفان ورشت عليها وبصت ف المرايه وظبطت نفسها ورنت الجرس و "على" الل فتحلها الباب :
"على" متفاجئ من شكل "ايمان" : ايمان
ايمان باابتسامه: مساء الخير يا على
على مبتسم: الحمد الله تعالى ادخلى
ايمان بصت ع الساعه: وصلت فى ميعادى تمام المهم تكون فاضى
على : اكيد فاضى تعالى اقعدى
خرجت مامت "على" من الاوضه ورايحه لمطبخ : ايمى حبيببتى عامله ايه
ايمان قامت وسلمت عليها: الحمد الله ياطنط
مامت على: ايه الجمال دا كله ..بقيتى عروسه حلوه اهو
ايمان بكسوف: ميرسى يا طنط
على: مش هنبدء ولا ايه انا ورايا مذاكره
مامته : ماشى يا استاذ "على" هسيبكم انا ..عاوز حاجه من المطبخ ؟
على: كوبايه شاى
مامته: وانتى يا ايمى
ايمان: شاى زى "على"
ضحكت مامته ودخلت المطبخ وقعدت "ايمان" جنب "على" ...
"على" بيفتح الورق وباصص ع الورق وبلهجه جاد : انتى راجعه من فرح ولا ايه ولا هتروحى بعد ما تخلصى ؟
ايمان : لا لا ولا روحت ولا هروح ..بس ليه
على بصلها بضيق : علشان الل ف وشك دا ..
ايمان بملامح وشها مبتسمه: ماله
على: مش حلو لو عاملاه علشان تنزلى خطوتين من بيتكم لبيتنا هنا
ايمان ملامح وشها اتغيرت : وحش
على ابتسم : "ايمى " انتى جميله من غير كل دا .. ربنا خلقك جميله ليه تبوظى الجمال بحاجات تشوه
ايمان: ها
على: ربنا خلقك جميله والل عندك مش عند حد ليه تخبيه وتشوهييه ... ربنا خلق كل البنات حلوه كلهم وكل واحده تتميز عن التانيه بحاجه ..الطبيعه والبساطه احلى حاجه ربنا خلقها فى الدنيا .. الميكب دا ستاره لكل واحده مش واثقه من نفسهاولا عندها يقين ان ربنا خلقها حلوه ..يعنى عندها هى مشكله
ايمان متنحه: ها
على بيضحك ومسك منديل واداه ل ايمان: روحى الحمام اغسلى وشك وتعالى
قامت ايمان وهى محبطه وحاسه ان مجهودها ضاع ..دخلت الحمام غسلت وشها وعدلت الطرحه ..وخرجت بهدوء وباصه ف الارض وقعدت .. وكانت مامت "على" عملت الشاى وحطته
على : معاكى مرايا اكيد مفيش بنت معهاش مرايا ف شنطتها
ايمان: ها
على بيضحك: مرايا ..مرايا
ايمان فتحت شنطتها وطلعت المرايا
على : بصى فيها كده
بصت ايمان ... على : ليه بقى تدارى الجمال دا بالحاجات الل ملهاش لازمه دى
ايمان بصت لنفسها اوى وابتسمت : بجد
على: بجد ايه
ايمان: انا جميله ..انت شايفنى جميله
على باابتسامه: مش مهم انا شايفك ايه ..المهم انتى شايفه نفسك ايه ..
لازم تقتنعى ان ربنا خلقك جميله لان ربنا مخلقش حاجه ف الدنيا وحشه .. لان الله جميل يحب الجمال .. صدقى نفسك انك جميله وان مفيش حد زيك .. لان اكيد فى حاجه فيكى مميزاكى عن غيرك ومش لازم تكونى زى غيرك .. انتى كونى نفسك .. كونى ايمان .. وبعدين متركزيش مع الناس شايفاكى ايه ..المهم انتى تكونى شايفه نفسك وواثقه ف نفسك والناس خليهم اخر حاجه تشغلك طول ماانتى صح ..لكنك لو حاولتى ترضى اذواق الناس انتى هتتعبى ومش هيحصل .. فاانتى ارضى نفسك وربنا اكيد ..
ايمان با ابتسامه: وعد مش هحط ميكب تانى كده
على بيضحك: تانى ... متوعدنيش انا يا ايمان .. اوعدى نفسك ... وبعدين هو ملوش لازمه بصراحه ..الميكب اتعمل علشان يدارى عيوب زى النقاشه.. النقاش يكون عنده حيطه مخرمه يقوم بشويا معجون ودهان يظبط شكلها ... بس عمره ما بيجى عند حيطه مفهاش حاجه وبيحط عليها تانى معجون ودهان ولا ايه ..؟
ايمان : صح ..
على : بصى يا ايمان هقولك حاجه ..
ايمان: ها
على :البساطة
ايمان :يعنى ايه ؟
على: يعنى البنت كل ما تكون بسيطه فى طريقه لبسها وطريقه كلامها و أسلوبها .. حياتها تكون بسيطه دى بتكون اكتر بنت تلفت نظر وانتباه الناس عن البنت الل بتتعمد لفت انتباه الل حواليها بالميكب والبس والأسلوب الأوفر
ايمان :اممممم.. يعنى عاوز تقنعنى انك مبتبصش ع البنت الل لبسه وحاطه ميكب وشعرها سايح كده وبتغض البصر يعنى ..
على ضحك: ابقى كداب لو قولتلك مببصش او اى راجل مبيبصش .. ال انتى بتقولى عليهم دول بيلفتوا الانتباه مش اكتر لكن مبيشدوش انتباه ..
ايمان: نعم مش فاهمه وايه الفرق بين لفت الانتباه وشد الانتباه بقى ؟
على اخد نفس : بصى الفرق شاسع جدا .. لفت الانتباه دا معناه حاجه لفتت نظرك وقتها ولما بتختفى الاحساس نفسه بيروح معاها .. لكن شد الانتباه دا احساس بيطول لما الحاجه تكون تستاهل ...
"على" لاحظ "ايمان" مش فاهمه : مثلا يعنى شوفت بنت موزه هبصلها لانها لفتت نظرى بالمهرجانات الل هى عاملها وربنا مدينى عيون ف اكيد هبص علشان جت قدامى ..لكن لحظه ما بتختفى خلاص ولا اكنها كانت موجوده .. انما البنت البسيطه ف لبسها وميكب وحياتها ..الجمال الربانى الل ربنا خلقها بيه بتشد نظر اى بنادم حتى لما بتختفى بتعلق فى الذاكره ... ودا ميمنعش ان ف رجاله عينهم زايغه لكن انا بكلمك ع فئه كبيره مفهومه غلط ولوتلاحظى اى شاب بيفكر يرتبط بجد بيدور ع الل تشد نظره وتركيزه وتشغل حياته لانه بيدور ع الل تعيش معاه مش هيحطها ف باترينه يتفرج عليها ولو عمل كده دا مريض لانها لما تكبر والجمال هيروح هيبص لغيرها لان هدفه واضح الجمال الخارجى ودول فئه موجوده ... الروح الجميله بتعيش اطول بتعيش العمر كله ومفيش اجمل من الروح والبساطه ..
ايمان من كلام "على" حست انها تنحت وعلى لاحظ كده :
على باابتسامه:بإختصار كل ما البنت تكون بسيطه كل ما بتكون جميله .. وبعدين عاوزه تحطى ميكب وتلبسى نصيحه لان كل البنات كده حطى الهادى البسيط الل يليق عليكى والبسى الل يناسبك مش الموضه لان مش كل موضه مناسبه .. ببساطه متقلديش حد مهما كان كونى انتى ..وصلت ؟
حست "ايمان" انه بيلمح ع "هدى" ابتسمت بخجل : حاضر
على بص لورق: يلا نبدء الدرس بقى
ايمان بسرعه: "على" ممكن اسالك سؤال قبل ما نبدء
على: اتفضلى
ايمان: فتاه احلامك الل راسمها يعنى ف خيالك عاوزها تكون ازاى
على بيضحك: بالمختصر ونبدء الدرس ..
ايمان : ها
على : بسيطه
ايمان: نعم
على: عاوزها تكون بسيطه ..
ايمان: بس
على حب يقصر الكلام : اه.. يلا نبدء بقى
ايمان بسرعه: ولقتها ولا لسه
على بص ل ايمان للحظات وسكت وبعدين ابتسم وبلهجه جد : كده بقوا سؤالين والوقت بيجرى وانا ورايا مذاكره ..
ايمان: اه صح .. يلا نبدء
على ابتسم : يلا بينا
خلصت "ايمان" الدرس ونزلت ورجعت ع البيت ودخلت لاقت "اسماء" قاعده بتذاكر فى الاوضه .."اسماء" شافت وشها لاقته من غير ميكب خالص زى ما نزلت
اسماء : ايه دا ايه الل حصل لوشك ؟
ايمان فكت الطرحه وقعدت قدام التسريحه وباصه ف المرايا : ايه الل حصل لوشى ؟
اسماء: وشك ..غير ما نزلتى
ايمان باابتسامه: بذمتك مش كده احلى .. مفيش احلى من البساطه
وبعدين انا جميله ادارى جمالى دا بشويا الالوان ليه ها ؟
اسماء مستغربه: لا بجد .. لا حول ولا قوه الا بالله .. ايه التغيير دا .. انا قلتلك كده قبل ما تنزلى وبقالى فتره صوتى راح ع الل بتعمليه ف وشك ومسمعتيش ..ايه حصل وغيرك بقى ؟
ايمان بصت ل اسماء ومبتسمه : "على" قالى انتى جميله من غير حاجه وهو شايفنى جميله
لان انا جميله وجميله اووى كمان ..
اسماء بتضحك : على .. كتر خيره انقذ ناس كانوا هيترعبوا من منظرك
ايمان حدفت اسماء بالطرحه: اخرسى
اسماء قايمه تخرج من الاوضه : دلواقتى بقت كلمه السر "على"
رجعت بصت ايمان ف المرايا : انا جميله .."على" شايفنى جميله هعوز ايه تانى انا ...
اسماء شايفاها وهى بتكلم نفسها : مجنونه والله ..اختى الكبيره اتجننت
استمرت "ايمان" كل يوم الصبح تتلكك وتنزل تشوف "على" قبل ما يخرج وتشوف "هدى" ويلقحوا ع بعض كلام ... تانى مره راحت "ايمان" للدرس لبست بسيط جداا وشبه محطتطش ميكب ونزلت راحت عند "على" .. "هبه" فتحت الباب لان "على" كان فى اوضته .. دخلت "ايمان" سبقته وقعدت ع السفره خرج "على" من اوضته شافها سلم عليها وقعدوا ولاحظت "ايمان" انه معلقش ع حاجه وابتد الدرس بسرعه ...خلصت وقامت تمشى راحت ناحيه الباب الشقه ولسه هتفتحه نادى عليها "على" ..: ايمى
ايمان لفت وبصتله: نعم
على باابتسامه عمل علامه
بايده : هو دا الكلامابتسمت "ايمان" وخرجت بسرعه فرحانه بان "على" اخد باله منها مكنش زى ما فاكره ...وروحت البيت فرحانه وقعدت تناكف ف اسماء ومامتهم...!!
__________________________
يتبع
ليست هناك تعليقات:
إرسال تعليق