(2)
استمر الوضع دا لفتره من مراقبه "ايمان" لتحركات "على" ميعاد خروجه من البيت
لميعاد رجوعه البيت وعلى طول بتتلكك باى حاجه وتروح علشان يشرحلها ..
وجت فتره الامتحانات الترم وكله امتحن واخدوا اجازه نص السنه وطبعا اجازه من كله الا
"على" اخد اجازه الكليه لكن مش من الشغل .. شغل الصبح ف المكتب والتاكسى بقيت اليوم و"ايمان" فضيت ومفيش تلكيكه تروح بيها عند "على" وخصوصا ان "على" بينزل بدرى اووى وبيرجع متاخر البيت غير المواعيد الاولاانيه .... !!
فى يوم "على" خلص شغل المكتب وع بعد الضهر رجع البيت بسرعه غير هدومه ونزل راح جراج حج " عبدالله" يستلم التاكسى ..
على : السلام عليكم
حج عبدالله: وعليكم السلام ورحمه الله وبركاته .. مواعيدك مظبوطه يا لول
على بيبتسم: وهو احنا ليا ايه غير المظبوط
حج عبدالله: يبقى تشرب معايا فنجان قهوه مظبوط عقبال ما التاكسى يتغسل
على بيضحك: ايوه بقى هو دا الكلام المظبوط
قعد "على" وشرب فنجان القهوه وشويا التاكسى جه قدام الجراج ..
على: أستأذن انا بقى يا حج
حج عبدالله: والله القاعده معاك ميتشبعش منها يا لول بتفكرنى دايما ب أبوك الله يرحمه
على باابتسامه: الله يرحمه .. وبعدين احنا هنروح من بعض فين راجعلك تانى ونكمل
حج عبد الله : مستنيك يا لول
مشى "على" راح اتجاه التاكسى وكان واقف ولد الل بيساعد فى الجراج واقف ساكت مش بيتكلم زى كل مره ...
على: مالك يا جلال
جلال: مفيش يا استاذ "على" سلامتك
على حط ايده ع كتفه : لا بجد فى ايه ..
جلال بيتنهد: الدنيا يا استاذ "على" بتخبط فينا واحنا صابرين
على باابتسامه: الدنيا تخبط فينا ..نخبط احنا كمان فيها .. هى دى الحياه يا ابو جلال .. روق كده وسلم امورك ع الله والله وكيلك هيفرجها بس انت اضحك وقول يا باسط
جلال ابتسم: يا باسط
مشى "على" وركب التاكسى واول حاجه عملها شغل قران : توكلنا ع الله
اتحرك وابتدا يومه وهو ماشى ف الطريق الراديو عطل وقف ع جنب يظبط فيه وهو بيظبط فيه شاف ست كبيره واقفه بتشاور لكذا تاكسى ومحدش راضى يوقف والل يوقف ميوفقش ... راح ناحيتها وشاورتله ووقفته : حلوان يا ابنى وواكتوبر وترجعنى حلوان
على باابتسامه: تحت امرك يا امى اتفضلى
ركبت التاكسى : الله يكرمك يا ابنى بقالى ساعه واقفه مش لاقيه تاكسى يودينى حلوان ويروح معايا اكتوبر وبعدها يرجعنى ع حلوان
على ب ابتسامه: تلاقيهم مشغولين ولا حاجه
الست: او مستبعدين المكان من وسط البلد ل حلوان مسافه كبيره واليوم هيطير كده ..مع انى هدفعلهم اجرتهم والله
على بيضحك: معلش يا امى متعرفيش ظروف كل واحد ..اصل اغلب السواقيين ربنا عالم بحالهم دماغهم مشغوله وكمان الطرق بتخرب العربيات فبيستقربوا الاماكن وكده ..
الست: ماهو انت وافقت اهو وع طول ومن غير ما تقولى هتدفعى كام حتى؟
على باابتسامه : كفايه انك يا امى ركبتى معايا..
الست باابتسامه: الله يكرمك يا حبيبى ..
ومشى "على" فى طريقه نص اليوم طار مع الست الكبيره ولما وصل لمكان الست ف حلوان عند بيتها بصت ع شنطتها وملامح وشها اتغيرت : ايه دا ... "على" باصص عليها من المرايا: فى حاجه يا امى
الست بقلق : البوك مش لاقياه والله كان موجود باين وقع ولا ايه
على باابتسامه: دورى براحه كده يا امى وهتلاقيه بلاش توترى نفسك
الست ووشها اتغير من التوتر : باين عليا نسيته عند اختى ..معلش ياابنى بص هقولك حاجه تاخد بطاقتى وبكره هكلمك اديك الفلوس واخدها ..
على ضحك وبص ليها: ليه كل دا ..
اتفضلى انتى انزلى ولو عاوزانى اوصلك لمكان تانى انا معنديش مشاكل
الست اتفاجئت من سلاسه "على" : الله يكرمك يابنى بس انا بتكلم بجد دا حقك والمشوار بعيد ودا رزقك و..
على قاطعها: رزقى ربنا الل بيبعتهولى وانتى زى والدتى واعتبرينى ابنك وبوصلك يا ستى ايه رايك ..هتدى ابنك فلوس التوصيله ..؟
الست بدموع ف عنيها : ياريت ابنى كده .. تصدق انى لما بطلبه ف مشوار اوقات مبيردش وان رد يقولى هتفوليلى العربيه وانهارده كلمته قالى مش فاضى علشان رايح النادى مع ابنه ومراته ..
"على" اضايق من الكلام دا لكن ابتسم: بيدلل عليكى .. ربنا يخليكى ليه
الست ابتسمت : ربنا يكتر من امثالك يا ابنى ممكن رقمك ؟
على : اتفضليه بس ليه
الست: علشان اكلمك واديك حقك
على ابتسم: اعتبرينى ابنك والمرادى مطلبتش منك تفوليلى العربيه تمام ... واى وقت عاوزه تاكسى اتفضلى الرقم اهو كلمينى اجى اخدك من مكان ماتكونى وهوديكى مكان ما تروحى ..!
الست باابتسامه: ربنا يفتحلك ابواب رزقه ويحبب فيك خلقه ويبعد عنك ولاد الحرام
على بفرحه: الله ..
اهو انا كده اخدت اجرتى واكتر منها كمان ..وكنتى عاوزه تحرمينى من كده ...
الست باابتسامه نزلت ... و"على" شغل الراديو ع ام كلثوم : ايوه ياست
ومشى وكمل واخد زباين وكمل يومه ورجع بالعربيه الجراج
على باابتسامته: مساء الخير يا ابو جلال
جلال مردش عليه
"على" دخل والسواقيين التانين كانوا موجودين : فى ايه ماله ؟
سواق من الموجودين: متركزش معاه هو كده
راح "على" ل حج "عبدالله " : مساء الخير يا حج
حج عبدالله: مساء الخير يا لول
على : ايراد اليوم اتفضل ..
حج عبد الله: ايه دا الايراد انهارده قليل كده ليه يا لول
قعد "على" يحكى ع الموقف الى حصل فسواق من الموجودين ضحك: دايما يضحكوا عليك يا لول كده ...
على ابتسم: برضيا يا عم ملكش دعوه .
على بص ل حج عبدالله: همشى بقى عاوز حاجه منى ..
حج عبدالله: سلامتك
على قبل ما يمشى : بقولك يا حج ماله الواد جلال ؟
سواق من الل قاعدين: مزنوق ف مبلغ ومش راضى ياخد من حد كرامته وجعاه
على راح لجلال واتكلم معاه وعرف بعد الحاح انه محتاج 500 جنيه علشان اخو الصغير يعمل عمليه اللوز وهو مش معاه ومستنى اول الشهر لما يقبض واخوه الصغير تعبان .. واستغرب "على" ان مفيش حد جرب يساعده حتى فمشى ورجع البيت متاخر وكانت " ايمان " مستنياه واطمنت انه رجع ودخلت نامت ... !!
تانى يوم الصبح اول حاجه "على" عملها اول ما شاف "جلال" اداله فلوس
"كان "على" اول ما دخل اوضته امبارح طلع الفلوس دى الل كان محوشها علشان هيشترى بيها هدوم ليه لكن حس ان "جلال" محتاجها اكتر منه وقال : الهدوم تتأجل عادى "
جلال اتفاجئ : ايه دا يااستاذ على
على : دا رزق ربنا بعتهولك متقولش لا ياعم بقى
جلال مستغرب ولاقى المبلخ 700 جنيه : دا كتير
على باابتسامه: ماهو اخوك عاوز رعايه ولا ايه .. ان شاء الله هيكون احسن يلا انا داخل للحج..
جلال ابتسم اوى لما جتله الفلوس ودخل "على" وشافه سواق من الموجودين ودخل وهو قاعد مع الحج عبد الله ...
السواق: ايه يا على هى الناس بتستهيفك اوى كده ليه ..امبارح تضيع نص يومك مع ست متعرفهاش وانهارده تدى مبلغ كبير كده لجلال وانت عارف واحنا ان الفلوس مش هترجع علشان جلال مش هيعرف يرجعهم .. فلوسك كتير ولا ايه
على بص ل السواق: انت شايف ان كده الناس بتستهيفنى
السواق : بصراحه اه
على : تعرف ايه عن الجدعنه ؟
السواق: عادى .. انك تكون جدع مع اصحابك وتقف جنبهم
على بيضحك: لا .. الجدعنه انك تقف مع الغريب قبل القريب وتساعدهم مش القريب بس .. انك متقفش مع صاحبك ف خناقه ومشوار .لا دا انك تلاقيه ف ازمه وتكون معاه وخطوتك قبل خطوته .. الجدعنه انك تساعد من غير ماحد يطلب منك لانك عندك عينين وشايف وودنين وسامع وقلب تحس بيه وعقل تحكم بيه ... الجدعنه ان يكون معاك حاجه غيرك محتاجها وتديهاله عنك .وبعدين "من فرج عن أخيه كربة من كرب الدنيا فرج الله عنه بها كربة من كرب يوم القيامه " احنا عايشين لبعض هتسميها هبل ..هتسميها طيب ذياده لكن دى عندى هى دى الجدعنه الل اعرفها وهى دى الل انا عملتها وطريقتى ... صباح الفل ..
مشى "على" وخبط ع كتف "جلال" ومشى .. السواق واقف مش عارف يرد لكن الحج عبد الله رد : جدع يا على يسلم البطن الل شالتك ..!!
خلصت اجازه نص السنه ف العادى و"على" مطحون ف الشغل صبح وع التاكسى ... وابتدا الترم التانى ورجع وضع الدروس والجامعه ..وابتدت امتحانات الترم التانى والكل انشغل فيها وخلصت الامتحانات والكل مستنى النتيجه ...قرب شهر رمضان فى يوم دخلت "اسماء" من البلكونه بسرعه تنده ع "ايمان"
اسماء: ايمى .. ايمى .. انتى يابت
ايمان قدام التليفزيون: فى ايييه
اسماء: تعالى بسرعه البلكونه
ايمان: فى ايه ف البلكونه
اسماء وقفت: ع العموم انتى الخسرانه ..كنت عاوزاكى تشوفيهم وهما بيعلقوا الزينه والنور
ايمان بلا مبالااه : عادى يعنى
اسماء: دا شباب المنطقه هما الل بيعلقوا و"على" معاهم ب ...
لسه "اسماء" هتكمل الكلمه لاقت "ايمان" شدت طرحه وبسرعه ع البلكونه
"اسماء" ضحكت وراحت وقفت جنبها : ما كنتى جيتى من بدرى
ايمان باابتسامه: انا شوفته نازل الصبح ومكنتش اعرف انه هيرجع بدرى كده
اسماء: عاده كل سنه .."على" هو المسئول عن الزينه والنور بتاعه رمضان المتعهد يعنى ..وبصراحه هو عنده ذوق جميل بيخلى شارعنا احلى شارع ..حاجه تفرح كده
ايمان بانشكاح : مش "على" طبعا لازم حاجه تفرح ..وبعدين اسكتى بقى خلينى اتفرج
اسماء : ايه دا الحقى هيروحوا يعلقوا عند "هدى"
ايمان ملامحها اتقلبت : الهى تتكهرب وهى واقفه ..مبيعلقوش عندنا ليه ها
اسماء: احنا عالى يافالحه الدور الرابع ..هما بيعلقوا من زمان من الدور التالت
ايمان: ابوكى السبب الل تحتينا عزلوا قلتله نبدل الشقق مرداش معانه بيتعب من السلم
اسماء بتضحك: عاوزه ابوكى يغير الشقه علشان يتعلق عندنا زينه ونور ياهايفه
ايمان: واكلم "على" واشوفه عن قرب
اسماء: الهى تتوكسى ..
"ايمان" واقفه وباصه على "على" ومركزه اوى .."على" بص عليها وابتسم وهى ابتسم له وشافتهم "هدى" واتغاظت من ايمان ..خلص تعليق الزينه والنور وبعد يومين ابتدا الشهر الكريم ...."على" كان مشغول ويادوب كان بيجى ع الفطار علشان مامته واخته ميفطروش لوحدهم وينزل تانى بالتاكسى ويرجع متاخر ع السحور ودايما وهو داخل البيت شايل فاكهه وحلويات وشيكولاتات لاخته ....فى يوم "ايمان" حبت تلحق "على" قبل ما ينزل بعد الفطار اخدت طبق كنافه وقطايف وبسرعه بعد الفطار وراحت توديه ل مامت "على" .. نزلت وراحت رنت الجرس وهبه فتحت الباب ..:
هبه: ايمى
ايمان دخلت: ازيك يا بيبو
هبه: الحمد الله .. ايه رايحه تصلى التراويح
ايمان بتبص حواليها: اها .. قلت اجيبلكم تدوقوا عمايل ماما واخدك وننزل هو على فين ..
انا مشفتوش نزل..
هبه بتضحك: فى اوضته بيصلى المغرب وبيغير علشان نازل
ايمان باابتسامه: طيب اندهيه علشان يدوق
هبه : ماشى
لسه هتروح "هبه" ناحيه الاوضه كان "على" خرج وشاف "ايمان" : ايمى
ايمان باانشكاح: ازيك يا على
على: الحمد الله ..انتى عامله ايه .. مقضيها اكل وتليفزيون صح
هبه: لا يا "على".. "ايمان" بتتفرج ع التليفزيون بعد ما بنرجع من الصلاه التراويح
ايمان: ايون انا عند مبدئى
على: ونعم المبادى .. ايه الل معاكى دا
ايمان قربت منه وشالت الغطا عن الطبق: دى كنافه وقطايف عمايل ماما دوقها كده
مد ايده واخد قطعه كنافه واكلها : الله .. تسلم ايديها
ايمان باابتسامه: المره الجايه هعملها وادوقك عمايلى
على مبتسم : وانا ف الانتظار
هبه بصت ع الساعه: يلا يا ايمى علشان نلحق مكان فى المسجد
مسكت "هبه" الطبق وادته ل "على" : خلى دا معاك وماما لما تخلص صلاه عرفها انى نزلت
مسكت "هبه" دراع "ايمان" وشدتها و"ايمان" باصه ل "على" و"على" بيضحك على منظر "ايمان" وهى بتتجر شويا وخرجت مامت "على" من الاوضه وشافت "على" واقف ومعاه طبق وبياكل : ايه دا يا على
على: دى كنافه وقطايف "ايمان" جبتها تدوقنا عمايل مامتها
مامته بتضحك: عسوله ايمان ..
على: طبعا انتى ممنوعه حته واحده كفايه والباقى سبوه لما ارجع
مامته : غريبه ..
"هدى" بعتت طبق امبارح وانت ولا قربت ايدك فيه وطبق ايمان قرب يخلص
دا اسمه ايه بقى
على هرب من الكلام: اسمه انى مستعجل يا ست الكل
مسك ايد مامته باسها وباس راسها ونزل
مامته: ربنا يريح قلبك يا ابن بطنى
عدى شهر رمضان و. وابتدا تجهيزات العيدالكحك والبسكويت والتنفيض :
اسماء رمت نفسها ع السرير : انا خلصت خلاص فرفرت
ايمان دخلت جنبها: وانا كمان
اسماء: لا ياحبيببتى متفكريش انتى وراكى سجاده اوضه ماما واوضه الصالون انجزى
ايمان بصوت تعبان: انا مش قادره بجد
اسماء: والله ما مقربه منهم خلينا نخلص ف ليلتك دى ..امك جايبنا تستعبدنا الله يسامحها ...
ايمان ضحكت ... اسماء : الام من دول تقعد تددعى يارب بنت يارب بنت والكل فاكر دلع وكده طلع كل دا علشان تلاقى الل تشيل عنها وتبقى خدامتها باللقمه وماشاء الله علينا ... ريا وسكينه ..
ايمان بتضحك: طيب اختك حبيببتك عندها مشوار ع السريع لجيران ها سمسم حبيببتى
اسماء : مشوار ايه ؟
ايمان: انا مجهزه طبق كحك معتبر كده ل "على" ومامته واخته هروح اوصله
اسماء: يابنتى استنى بكره الوقفه وديه
ايمان: بكره امك هتقفل علينا الشقه لغايه ما نخلص ومش هعرف اخلع منها .. يلا قومى
اسماء: هتخلعى يعنى وهلبس انا الشغل ...حسبنا الله ونعم الوكيل
ايمان: فى السجاد اكيد تقصدى
اسماء : غورى
غيرت ايمان هدومها واخدت طبق الكحك ونزلت ودخلت بيت "على" وع وشها ابتسامه وهى طالعه لسه سمعت صوت وراها : ايمان
بصت لاقتها "هدى" ومعاها طبق كحك وبسكويت : هدى
هدى بتقرب بملامح بارده : معقوله يكون الطبق دا ل "على" ..اقصد ل ام على
ايمان بصتلها فى ايديها : واعتقد ان دا رايح نفس المكان ولا ايه
هدى بطريقه مستفزه: ايوه طبعا انا قلتلهم لما هعمل هدوقهم عمايل ايدي انا الل عجبنته وخبزته بنفسى ليهم ..هما اى حد دول الحبايب
ايمان بصوت واطى : حبك عزراءيل يا شيخه
هدى: نعم بتقولى حاجه
ايمان ادتها ضهرها: بقول يلا بينا نطلع
"هدى" بتحنتف ف الطبق وطالعه ورا "ايمان" راحت "ايمان" اتعمدت تقف وتعمل نفسها هتقع راحت وقعت طبق الكحك بتاع "هدى" ع السلم
ايمان بملامح خضه: اووبس سورى يا ديدى
هدى بملامح غضب من ايمان: سورى
ايمان: اصلى اتكبلت وكنت هقع فاايدى خبطت الطبق سورى
هدى واقفه مضايقه فى الوقت دا "هبه" فتحت الباب : ايمان .. هدى
ايمان باابتسامه بارده ل هدى: عن اذنك بقى يا هدى انا داخله علشان ادوقهم الكحك بتاعنا
هبه : تعالى ياهدى ادخلى
ايمان بتضحك: معلش هدى جت غلط نشوفك بعدين يا ديدى باى باى
دخلت "ايمان" و"هدى" نزلت متضايقه من "ايمان" ودخلت "ايمان" بتضحك وحكت ل "هبه" والاتنين قعدوا يضحكوا وسلمت ع مامت "على" وشويا ونزلت ولان "على" مش ف البيت وصت "هبه" ان "على" ياكل من الكحك ونزلت رجعت ع البيت لاعمال الشاقه ... ولما رجع "على" بليل قالتله "هبه" وحكتله ع الل حصل وقعد يضحك وطلب شاى وشربوا مع الكحك وهو بيضحك ...!!
يوم وقفه العيد الكل كان سهران علشان صلاه العيد .. واغلب الشباب سهرانين ع القهاوى
او تحت البيوت متجمعين .. لكن على كان غيرهم .. كان شغال ع التاكسى لغايه الفجر رجع البيت دخل اخد دش وصلى وقرا قران شويا كان مامته صحيت و"هبه" اخته كمان ..صبح ع مامته واخد "هبه" اخته ونزلوا علشان يصلوا وكانت مستنياهم "اسماء" و"ايمان" و"هدى"
على باابتسامه: صباح الجمال ع احلى بنات عندنا
هدى : صباح الور يا على
ايمان: صباح الفل
اسماء بتشد هبه: مش هنقضيها هنا يلا علشان نلحق مكان
مسكت "اسماء" ايد "هبه" ومن الناحيه التانيه ايد "ايمان" اختها و"ايمان" لاحظت "هدى" بتسبل ل "على" راحت شدتها وقابل "على" جيرانه ومشى معاهم لغايه الجامع .. وصلوا صلاه العيد وخلصوا وهما ماشين
على : بيبو يلا علشان نفطر
هبه : حاضر جايه
هبه بصت لبنات : شوفوا هتقعدوا عند مين وعرفونى اشطه سلام
ايمان بسرعه راحت اتجاه على : "على" فين العيديه ؟
على بيضحك : عيديه
ايمان: اها العيديه ..
مدت ايديها ايمان .. هدى راحت جنبها: وانما كمان عاوزه
ايمان بصتله بغيظ .. على طلع المحفظه وادى كل واحده فيهم 10 جنيه ورق جديده
ايمان مسكتها فرحت بيها اوى : "على" اكتبلى عليها زى كل عيد
هدى بسرعه : وانا كمان
ايمان بصت ل هدى بغيظ : خلاص مش عاوزه
هدى بغيظ: يبقى اكتبلى انا بس
ايمان بغيظ : يا سلام
هدى : وانت مالك انتى .. يلا ياعلى
على بيضحك عليهم : معيش قلم دلواقتى .. بصوا هكتبلكم عليها وهسيبلكم مع "هبه" تمام
يلا كل عيد وانتم اجمل بنات
ايمان مبتسمه : كل عيد وانت معانا
على : صحيح يا "هدى" "محمد" منزلش يصلى معانا ليه ؟
هدى ملامح وشها متغير لكن رسمت ابتسامه: نايم ونومه تقيل انت عارف بقى
على بيضحك: مبقتش اشوفه غير صدف..سلميلى عليه وقوليله "على" مستحلفلك
هدى: حاضر
هبه: يلا ياعلى اتاخرنا ع ماما كده
مشي "على" وهو حاطط ايده حوالين كتف "هبه" وباس راسها وضاممها ليه وبيناكف فيها
"ايمان" سرحت شويا ولاحظت "هدى" واقفه متنحه عليهم منزلتش عنيها ..
ايمان بصوت عالى : يلا يا اسماء نطلع
اتفزت هدى : انا ماشيه سلام
ومشيت دخلت بيتهم ... اسماء : ابوكى تلاقيه سمع صوتك عليتى صوتك كده ليه
ايمان بغيظ: البت "هدى" دى مش هتجيبها لبر ... عنيها مبتنزلش ع "على" خالص
اسماء: ع اساس ان انتى عينك الل بتنزل ..احنا خلاص هننقل ليكى سرير ف البلكونه
ايمان خبطتها ع كتفها: يلا يا رخمه.. وعقابا ليكى انهارده مش هغسل مواعين ولا هساعدك ف الفطار ولا الغدا ولا الهجوم العائلى لما يحصل ههرب منك وهروح ل "هبه" ..علشان ابص ع "على" براحتى
اسماء حبت تغيظها : يارب تسبقك هدى
ايمان خبطتها : والله انتى رخمه ..
طلع "على" البيت مع "هبه" ودخل ع مامته ف اوضته وهى كانت قاعده ع السرير
على باابتسامه : كل سنه وانتى طيبه يا ست الكل
باس ايديها وراسها ..مامته: وانت طيب وبخير يا حبيبى
على طلع فلوس من جيبه : كل سنه وانتى منورانا دايما
مامته : ايه دا يا "على" معايا فلوس ياابنى والله
على: الل معاكى دا حاجه ودا حاجه .. دى العيديه ياست الكل
مامته عنيها دمعت : مقطعتش عاده ابوك يا على
على : طول ماانا موجود مفيش حاجه هتتغير .. يلا بينا نفطر بقى علشان انام ساعتين وانزل
مامته: هتنزل .خد انهارده اجازه واقعد معانا ع الاقل ترتاح
على باس ايد مامته: انا طول ما شايفك بخير وشايف هبه كويسه انا بكون مرتاح ..
مامته: جسمك يا حبيبى عليه حق عليك
على مبتسم: والرزق مبيستناش حد يا امى ..
العيد موسم وانا اتفقت مع حج عبد الله هاخد التاكسى من بدرى الكليه خلصت وموضوع الورق خلاص مش هينفع دلواقتى فلازم اسد مكانه ..لغايه ما النتيجه تظهر وهشوف هيحصل ايه
مامته طبطبت على ايده: الحمل عليك بيزيد وديون الل عليك اكتر
على مبتسم : ادعيلى انتى بس دعوه حلوه كده ودا كفايه عندى
مامته: ربنا يبعد عنك اولاد الحرام ويحبب فيك خلقه ويرزقك برزقنا
على: بس كده مش عاوز حاجه تانى .. يلا بقى نفطر ..هبه تلاقيها ظبطت طبق الفول اتمام
مامته: يلا يا حبيبى
مسك على ايد مامته ونزلت من ع السرير وخرجوا وكانت هبه جهزت الفطار
وراحت حضنت "على " : وانت طيب يا حبيبى زى كل عيد رجعت اوضتى بعد الصلاه لاقيتك حاططلى عيديتى ع مخدتى زى ما بابا كان بيعمل
على : هفضل كده ع طول لغايه ما جوزك يديكى العيديه وانا هديكى كمان
مامته: ربنا يخليكوا لبعض يا ولادى ..
وقعدوا يفطروا وبيتكلموا وبيضحكوا ... !!
فى بيت "هدى" طلعت لاقت مامتها قاعده قدام التليفزيون مستنياها
هدى: فى ايه يا ماما قاعده كده ليه؟
مامتها: مستنياكى يا حبيببتى علشان نفطر سوا
هدى بصت ع باب اوضه اخوها : ومحمد مش هيفطر ؟
مامتها: هو هيقوم دلواقتى دا راجع بعد الفجر وهيصحى ع المغرب علشان ينزل يقابل صحابه
واخد اجازه العيد من الشغل يومين بالعافيه .. ثوانى وهحضر الفطار
هدى بملامح زعل: حتى ف مناسبه زى دى مش عاوز يقعد معانا وسايبنا لوحدنا
الله يرحمك يا بابا روحت واخدت كل حاجه حلوه معاك
مامتها : اخص عليكى يا "هدى" وهو انا مش كفايه عليكى
هدى باابتسامه: انتى كل حاجه ربنا يخليكى ليا
مامتها: يلا نحضر الفطار
هدى: لا خليكى انا هغير وهحضره
مامتها طلعت فلوس من البوك : امسكى "محمد" سايبلك العيديه اهى من امبارح
هدى مسكت الفلوس بملامح زعل : ومقدرش هو يديهالى و يقولى كل سنه وانا طيبه حتى
مامتها: كتر خيره تعبان وشقيان وشايل البيت ربنا يقويه
هدى بصت لمامتها بضيقه : البيت مش مصاريف بس يا ماما ..البيت احاسيس ومشاعر الاشخاص الل فيه انتى مبتشفيش "على" بيتعامل ازاى مع "هبه" اخته ومامته وحالتهم زى حالتنا واسوء كمان من بعد ما اتوفى باباه .."محمد" فاهم غلط ان مدام مدينا مصاريفنا يبقى عمل الل عليه .. ولا بيسئل انا عامله ايه ولا بيتكلم معايا وفى المناسبات سايبنا لوحدنا يانايم يا بره .... الحياه مش كده يا ماما..الاخوه والبيت مش كده
مامتها راحت حضنتها لما شافتها بتتكلم ودموع نازله من عنيها : مش عارفه اقولك ايه
ربنا يرزقك ب ابن الحلال الل يعوضك عن كل دا ويجعل صبرك خير
هدى حست ان مامتها مش قادره تفهم الل حاسه بيه لكن مامتها فاهمه ومبتتكلمش
لان هى بنتها والتانى ابنها ومش هينفع تيجى ع حد فيهم .... !!!
فطر "على" ودخل اوضته و"هبه" كانت فاكرته بالعيديات لبنات ويكتبلهم عليها
طلع الفلوس وكتب ليهم وجه ع ورقه ايمان سرح شويا وابتسم وكاتبلها
" الناس بتستنى العيد كل سنه .. وانتى وجودك عيد .... "
وابتسم "على" واداه الفلوس ل "هبه" وانها تدى كل واحده عيديتها ... نام "على" وشويا وصحى ونزل راح يستلم التاكسى ويشتغل وهو فى وسط اليوم اتصل بيه "احمد" صاحبه واتفقوا يتقابلوا ف كافيه ف وسط البلد ...!
نزلت "ايمان" راحت عند "هبه" تقعد معاها شويا وعلشان تاخد العيديه بتاعه "على"
راحت ودخلت وقعدت و"هبه" اداتها العيديه : امسكى يا ستى "على" سابلك دى
مسكتها وفتحتها وقرت الل فيها وابتسمت ..
ايمان بخبث: وفين عيديه هدى
هبه: معايا لما هتصحى من النوم هتيجى ادهالها
ايمان بخبث: ومكتوب ايه فيها ياترى ؟
هبه: معرفش .."على" قالى متفتحيش ولا واحده فيهم
ايمان بتميل ع هبه : طيب متيجى نشوف كتب ايه ل هدى
هبه بتضحك: لا لما تيجى ابقى شوفى وهى معاها دى امانه
ايمان بغيظ: ماشى ياام امانه ..
شويا وجت "هدى" واداتها هبه العيد وكانت "ايمان" بتراقبها وهى بتقرا الكلام الل مكتوب ع العيديه ولاحظت انها ابتسمت فاضيقت اوى وحاولت تسيطر ع ضيقها : ايه الل مفرحك كده يا هدى ايه الل مكتوب؟
بصت هدى ل ايمان: انتى ايه الل مكتوبلك
ايمان بلجلجه: ها ..انا .. كل سنه وانتى طيبه بس
هدى: طيب ورينى
ايمان: اوريكى ايه ماانا قولتلك
هدى: خلاص مش عاوزه
ايمان: ورينى كده عيديتك
هدى: مكتوب فيها زيك بالظبط
ايمان اتغيرت ملامحها : زى ؟
هدى: اه ..كل سنه وانتى طيبه
ايمان اضايقت من هدى : طيب انا همشى علشان زمان عمى جه واسماء لوحدها
هدى: باى باى
هبه: لو مشى بدرى تعالى احنا قاعدين
ايمان: ان شاء الله
نزلت ايمان وهى متغاظه من هدى .. هبه: مكتوبلك ايه صحيح
هدى فتحت الفلوس : زى ما قولت "كل سنه وانتى طيبه "
ضحكت "هبه " ع انفعال " ايمان ..... وكانت "ايمان كل شويا تبص ع عيديه "على" بقيت اليوم عن العيديات التانيه ..!
مرت فتره قصيره والنتيجه ظهرت لكل ونجح "على" بتقدير كبير ونجحت اخته "هبه" بمجموع كويس هى و"اسماء" لانهم ثانويه عامه ونجحت "هدى" بمجموع قليل هى وايمان ... الكل فرح بنتيجته الا "ايمان" كانت زعلانه
اسماء: خلاص بقى يا ست نكد ماهو انتى الل مكنتيش مركزه ف المذاكره
ايمان بملامح زعل: مش ناقصه تقطيم وحياه ابوكى
اسماء بتضحك: يابت انتى المفروض تفرحى انتى نجحتى مش سقطى
زى السنه الل فات يعنى افرحى بلاش الوش دا
ايمان بملامح زعل: مش هدخل كليه تجاره .. هدخل معهد من المعاهد المعفنه
اسماء: ومين قالك ان المعاهد معفنه الل بيخلى المعاهد معفنه الل فيها وبعدين مين قالك مش ممكن تكون دى احسن ليكى بدل ما تدخلى الكليه وتعرينا هناك بفشلك
ايمان خبطتها ع كتفها : رخمه وغلسه
اسماء : بجد خلاص بقى بلاش نكد
ايمان: دلواقتى هدى هتدخل كليه وانا هدخل معهد ..هى كده دراجتها زادت قدام "على"
وانا مكنتش عاوزه ابقى ااقل منها
اسماء: مين الل قال انها اعلى منك وانتى اقل منها اصلا ؟
ايمان : العقل بيقول كده بالمجاميع دى
اسماء: والله انا اختى الكبيره هبله والله هبله ...خليكى منكده ع نفسك كده
انا هخرج افرح بنجاحى
خرجت اسماء وهى مش عارفه تقنع ايمان انها تفرح وبلاش تكدير ونكد ....!!
فى بيت "على" كان "على" قاعد مع "هبه" اخته ومامته
"على" حاضن "هبه": مبرووك يا بيبو ع النجاح ..
شدى حيلك بقى الكليه حملها اتقل من الثانويه
"هبه" باست خد "على" : طول مانت معايا وجبنى يا "على" هتبقى كل حاجه بخير
لولاك مكنتش قدرت اكمل الثانويه واجيب المجموع دا ..هو اه مش من الاوائل بس هيدخلنى كليه وانتظام كمان يعنى مصاريف ااقل شويا
على حضنها : طول ماانا عايش متشيليش هم حاجه ابدا
هبه ملامح وشها متغيره : انا عارفه انك بتدارى حزن وزعلك انك ف الجامعه متعينتش
على بيضحك: تعين ايه لا خالص مكنش ف دماغى اصلا .. المهم ركزى انتى ف الل جى واى حاجه محتاجاها عرفينى
هبه: يخليك ليا يا على يااجدع واحن اخ
على: ويخليكى ليا يااحلى بنوته
مامتهم: ربنا يخليكم لبعض
على وهبه اترموا ف حضن مامتهم: ويخليكى لينا ياست الكل ....
فى بيت "هدى" المشهد كان عكس مافى بيت "هبه"
هدى قاعده زعلانه علشان المجموع و"محمد" اخوها قالب وشه عليها ومامتها ساكته
محمد بينفخ: استغفر الله العظيم ...
عاوز اعرف انا قصرت معاكى ف ايه علشان تنجى بالعافيه كده ..الل بتطلبيه بسبهولك مع ماما .. فلوس دروس وفلوس مراجعات .. كان ناقصك ايه
هدى بدموع نازله ساكته .. محمد بعصبيه : كان ناقصك ايه عرفينى ؟
هدى بصتله ودموعها نازله: كان ناقصنى انت .. كان ناقصنى احس انى بنادمه عايشه
مش حيوان قاعد ف البيت بتاكله وتصرف عليه من غير احساس ولا مشاعر
محمد متفاجئ: ايه ..
هدى بتعيط وانفجرت : مفكرتش مره تسأل عليا وتسالى مالى ولا ايه مضايقنى ولا محتاجه حاجه على طول سايب الفلوس مع ماما وهى بتديهالى .. انتى حولت نفسك بالنسبالى من اخويا الوحيد المفروض تعوضنى عن حرمانى من بابا ل فلوس .. حرمتنى من حنيتك ومن حبك مقابل فلوس تجبهالى لمصاريفى اهتميت بالفلوس وشغلك وطلبات البيت اكتر من اهتمامك بالبيت نفسه والل عايشين فيه معاك .. سالت ماما عامله ايه .. تعبتى كام مره بليل و"على" كتر خيره بياخدنا بالتاكسى لمستشفى تعلق المحاليل ... الل عليك لما تعرف ترجع وتسيب الفلوس ل ماما ترجعهم ل "على" وهو مبياخدش حاجه.. مستخسر نص ساعه تروح تكلمه تشكره .. تشكر الغريب لاهتمامه ل اهل بيتك عاوزنى ف الجو دا اذاكر وانجح واجيب مجموع .. انا انسانه وليا احسايس ومشاعر وطلبات غير الفلوس ... محتاجه احس انى بنادمه عايشه زى الل حواليا .. انا بضحك وبهزر ولا حد حاسس بيا انا من جوه مش عايشه ..انت نفسك مفكرتش تسال ولا تتكلم معايا . انت فاكر انك بتعمل كتير لكن للاسف انت مبتعملش حاجه اصلا غير ماكنه لفلوس بس ..متعرفش انت الحرمان العاطفى ودفئ البيت الل تعرفه انت تكفى ازاى مصاريف البيت .. ياخساره ياخساره
قامت هدى ودخلت اوضتها وهى منهاره من العياط ومحمد متفاجئ ومامتها حايشه دموعها
..قام محمد بيقرب من اوضه هدى مامته مسكت ايده
مامته: وغلاوتى عندك يا محمد سيبها لوحدها متكلمهاش دلواقتى
محمد بعصبيه: يعنى ينفع الل سمعتيه دا ..
مامته: معلش .. امسحها فيا وشوف انت رايح فين وسيبها دلواقتى
محمد بينفخ بعصبيه: استغفر الله العظيم .. استغفر الله العظيم
نزل محمد بعصبيه من البيت و"هدى" قاعده ف الاوضه ماسكه العيديه بتاعه على وحضناها
ومامتها بره بتعيط ومش عارفه تعمل ايه ولا تتصرف ازاى والل عليها بتقول: يارب
مر فتره وجه تنسيق الكليات ل "هبه" و"اسماء" دخول كليه اداب انتظام و"هدى" دخلت حقوق انتساب و"ايمان" دخلت معهد حاسب الى خاص .. "على" بعد الجامعه بقى شغال بينمكتب المحاسبه والتاكسى بقيت اليوم علشان المصاريف ...!
فى يوم "على" كان راجع متاخر الساعه 12 بليل ع البيت وقبل ما ينزل من التاكسى
لاقى موبيله بيرن وكان رقم "ايمان" استغرب انها بتكلمه وبتكلمه متاخر كده ...
على: الو
ايمان بصوت عياط ومنهاره : على .. الحقنا يا"على" بابا تعبان اوى
بسرعه "على" قفل معاها الموبيل وكان قدام البيت طلع بسرعه ورن الجرس فتحت "اسماء" وهى بتعيط وبسرعه شاله "على" وسنده وركبه التاكسى وركبوا كلهم معاه ووده مستشفى ودخل الطوارى ومن الكشف عرفوا انه عنده ازمه قلبيه لانه مريض قلب ودخل العنايه المركزه
"على" بيسال الدكتور :طمنا يا دكتور ف ايه؟
الدكتور: هو دلواقتى ف العنايه تمر 24 ساعه على خير وان شاء الله هيكون بخير اطمن
على: ان شا ء الله
"على" باصص ع"ايمان" و"اسماء" ومامتهم وهما منهارين قدام اوضه العنايه وبيعيطوا
"على" بيجمع نفسه ويطمنهم: اطمنوا يا جماعه الدكتور قالى هيكون بخير بلاش القلق دا والعياط
اسماء بتعيط: انا خايفه عليه اوى
على: اطمنى.. ادعيله انتى بس وان شاء الله الصبح لما هتيجو هيكون بخير
ايمان بتعيط: لا انا مش همشى غير لما اطمن عليه
على: مش هينفع تفضلوا هنا علشان ع الاقل تقدروا تكملوا اليوم بكره معاه
انا هفضل موجود وهطمنكم
ايمان بتعيط: انا مش همشى من هنا ..
بعد اصرار ايمان ... على : خلاص انا هفضل معاكى هنا لصبح واسماء ومامتك يروحوا يرتاحوا ويجوا الصبح
مامت ايمان: هنتعبك يا على
على: متقوليش كده يا ماما .. الحج محمود زى ابويا بالظبط وربنا يعلم
مامت "ايمان" مسكت ايد "على" وطبطبت عليها: وانت الابن الل مولدتهوش من بطنى
على: يلا هوصلكم للبيت وهرجع ل ايمان وانتى ياايمان لو احتجتى حاجه كلمينى
ايمان: حاضر
مشى "على" وحاول يهدى فيهم ونوعا ما هديوا ووصلهم لبيت وطلع البيت عنده عرف مامته وهبه علشان ميقلقوش عليه وغير هدومه ورجع بسرعه ع المستشفى ومعاه اكل وعصير وراح مكان ما "ايمان" قاعده ف الاستراحه وعماله تعيط
قعد جنبها وفتح علبه عصير : امسكى يا ايمى اشربى العصير دا
ايمان بتعيط: مش عاوزه
على : مينفعش كده هتقعى انتى كمان
ايمان : بجد يا"على" مش قادره ..حاسه لو شربته هرجعه تانى
على: اشربى شويا شويا .. يلا بقى والا مش هشرب انا كمان وهتشيلى ذنبى
بصتله" ايمان" لاقته مبتسم ليها اخدت العلبه وابتدت تشرب واحده واحده
سكت شويا "ايمان" وشويا رجعت تانى تعيط وحس بيها "على" ف راح تلقائى مسك ايديها يطمنها
على: ايمى .. كفايه بقى كده اطمنى ان شاء الله بابا هيكون كويس صدقينى
ادعيله لان عياطك دا مش هيعمله حاجه وبلاش لما يفتح عينه ويشوفك يلاقيكى كده
ايمان بتعيط : انا خايفه اوى يا على ... خايفه لو حصل لبابا حاجه اكون لوحدى
خايفه على اسماء وعلى ماما ... احنا لوحدنا ملناش اخ يساندنا بعد بابا عمامى هياكلونا لو حصل لبابا حاجه .. خايفه اوى
على تلقائى حط ايد ايمان بين ايديه الاتنين وبيطبطب عليهم وباصص ل ايمان
على: متخافيش طول ماانا موجود
ايمان بصتله وساكته..
على باابتسامه: انا موجود يا ايمان ومعاكى وهفضل معاكى ومش هسيبك مهما حصل ولا خوف ولا عمامك ولا اى حاجه هتبعدنى .. اطمنى وانتى معايا كل حاجه هتكون احسن
ايمان حست بقلبها بيدق اوووى ومش مصدقه الل سمعاه .. و"على" باص ف عين ايمان وايمان باصه فى عين "على" وفاجاءه "على" استوعب نفسه ...
على : احم احم .. انا رايح الكافتيريا اشرب قهوه عاوزه حاجه لا اوكه..
مشى "على" وهو مستغرب نفسه من الكلام الل قاله والل حاسه لما مسك ايديها وايمان قاعده باصه ع ايديها ومتنحه وحاطت ايديها ع صدرها وقلبها بيدق اوووى ومش مصدقه ان "على" بيقولها الكلام دا...!
_____________________يتبع
استمر الوضع دا لفتره من مراقبه "ايمان" لتحركات "على" ميعاد خروجه من البيت
لميعاد رجوعه البيت وعلى طول بتتلكك باى حاجه وتروح علشان يشرحلها ..
وجت فتره الامتحانات الترم وكله امتحن واخدوا اجازه نص السنه وطبعا اجازه من كله الا
"على" اخد اجازه الكليه لكن مش من الشغل .. شغل الصبح ف المكتب والتاكسى بقيت اليوم و"ايمان" فضيت ومفيش تلكيكه تروح بيها عند "على" وخصوصا ان "على" بينزل بدرى اووى وبيرجع متاخر البيت غير المواعيد الاولاانيه .... !!
فى يوم "على" خلص شغل المكتب وع بعد الضهر رجع البيت بسرعه غير هدومه ونزل راح جراج حج " عبدالله" يستلم التاكسى ..
على : السلام عليكم
حج عبدالله: وعليكم السلام ورحمه الله وبركاته .. مواعيدك مظبوطه يا لول
على بيبتسم: وهو احنا ليا ايه غير المظبوط
حج عبدالله: يبقى تشرب معايا فنجان قهوه مظبوط عقبال ما التاكسى يتغسل
على بيضحك: ايوه بقى هو دا الكلام المظبوط
قعد "على" وشرب فنجان القهوه وشويا التاكسى جه قدام الجراج ..
على: أستأذن انا بقى يا حج
حج عبدالله: والله القاعده معاك ميتشبعش منها يا لول بتفكرنى دايما ب أبوك الله يرحمه
على باابتسامه: الله يرحمه .. وبعدين احنا هنروح من بعض فين راجعلك تانى ونكمل
حج عبد الله : مستنيك يا لول
مشى "على" راح اتجاه التاكسى وكان واقف ولد الل بيساعد فى الجراج واقف ساكت مش بيتكلم زى كل مره ...
على: مالك يا جلال
جلال: مفيش يا استاذ "على" سلامتك
على حط ايده ع كتفه : لا بجد فى ايه ..
جلال بيتنهد: الدنيا يا استاذ "على" بتخبط فينا واحنا صابرين
على باابتسامه: الدنيا تخبط فينا ..نخبط احنا كمان فيها .. هى دى الحياه يا ابو جلال .. روق كده وسلم امورك ع الله والله وكيلك هيفرجها بس انت اضحك وقول يا باسط
جلال ابتسم: يا باسط
مشى "على" وركب التاكسى واول حاجه عملها شغل قران : توكلنا ع الله
اتحرك وابتدا يومه وهو ماشى ف الطريق الراديو عطل وقف ع جنب يظبط فيه وهو بيظبط فيه شاف ست كبيره واقفه بتشاور لكذا تاكسى ومحدش راضى يوقف والل يوقف ميوفقش ... راح ناحيتها وشاورتله ووقفته : حلوان يا ابنى وواكتوبر وترجعنى حلوان
على باابتسامه: تحت امرك يا امى اتفضلى
ركبت التاكسى : الله يكرمك يا ابنى بقالى ساعه واقفه مش لاقيه تاكسى يودينى حلوان ويروح معايا اكتوبر وبعدها يرجعنى ع حلوان
على ب ابتسامه: تلاقيهم مشغولين ولا حاجه
الست: او مستبعدين المكان من وسط البلد ل حلوان مسافه كبيره واليوم هيطير كده ..مع انى هدفعلهم اجرتهم والله
على بيضحك: معلش يا امى متعرفيش ظروف كل واحد ..اصل اغلب السواقيين ربنا عالم بحالهم دماغهم مشغوله وكمان الطرق بتخرب العربيات فبيستقربوا الاماكن وكده ..
الست: ماهو انت وافقت اهو وع طول ومن غير ما تقولى هتدفعى كام حتى؟
على باابتسامه : كفايه انك يا امى ركبتى معايا..
الست باابتسامه: الله يكرمك يا حبيبى ..
ومشى "على" فى طريقه نص اليوم طار مع الست الكبيره ولما وصل لمكان الست ف حلوان عند بيتها بصت ع شنطتها وملامح وشها اتغيرت : ايه دا ... "على" باصص عليها من المرايا: فى حاجه يا امى
الست بقلق : البوك مش لاقياه والله كان موجود باين وقع ولا ايه
على باابتسامه: دورى براحه كده يا امى وهتلاقيه بلاش توترى نفسك
الست ووشها اتغير من التوتر : باين عليا نسيته عند اختى ..معلش ياابنى بص هقولك حاجه تاخد بطاقتى وبكره هكلمك اديك الفلوس واخدها ..
على ضحك وبص ليها: ليه كل دا ..
اتفضلى انتى انزلى ولو عاوزانى اوصلك لمكان تانى انا معنديش مشاكل
الست اتفاجئت من سلاسه "على" : الله يكرمك يابنى بس انا بتكلم بجد دا حقك والمشوار بعيد ودا رزقك و..
على قاطعها: رزقى ربنا الل بيبعتهولى وانتى زى والدتى واعتبرينى ابنك وبوصلك يا ستى ايه رايك ..هتدى ابنك فلوس التوصيله ..؟
الست بدموع ف عنيها : ياريت ابنى كده .. تصدق انى لما بطلبه ف مشوار اوقات مبيردش وان رد يقولى هتفوليلى العربيه وانهارده كلمته قالى مش فاضى علشان رايح النادى مع ابنه ومراته ..
"على" اضايق من الكلام دا لكن ابتسم: بيدلل عليكى .. ربنا يخليكى ليه
الست ابتسمت : ربنا يكتر من امثالك يا ابنى ممكن رقمك ؟
على : اتفضليه بس ليه
الست: علشان اكلمك واديك حقك
على ابتسم: اعتبرينى ابنك والمرادى مطلبتش منك تفوليلى العربيه تمام ... واى وقت عاوزه تاكسى اتفضلى الرقم اهو كلمينى اجى اخدك من مكان ماتكونى وهوديكى مكان ما تروحى ..!
الست باابتسامه: ربنا يفتحلك ابواب رزقه ويحبب فيك خلقه ويبعد عنك ولاد الحرام
على بفرحه: الله ..
اهو انا كده اخدت اجرتى واكتر منها كمان ..وكنتى عاوزه تحرمينى من كده ...
الست باابتسامه نزلت ... و"على" شغل الراديو ع ام كلثوم : ايوه ياست
ومشى وكمل واخد زباين وكمل يومه ورجع بالعربيه الجراج
على باابتسامته: مساء الخير يا ابو جلال
جلال مردش عليه
"على" دخل والسواقيين التانين كانوا موجودين : فى ايه ماله ؟
سواق من الموجودين: متركزش معاه هو كده
راح "على" ل حج "عبدالله " : مساء الخير يا حج
حج عبدالله: مساء الخير يا لول
على : ايراد اليوم اتفضل ..
حج عبد الله: ايه دا الايراد انهارده قليل كده ليه يا لول
قعد "على" يحكى ع الموقف الى حصل فسواق من الموجودين ضحك: دايما يضحكوا عليك يا لول كده ...
على ابتسم: برضيا يا عم ملكش دعوه .
على بص ل حج عبدالله: همشى بقى عاوز حاجه منى ..
حج عبدالله: سلامتك
على قبل ما يمشى : بقولك يا حج ماله الواد جلال ؟
سواق من الل قاعدين: مزنوق ف مبلغ ومش راضى ياخد من حد كرامته وجعاه
على راح لجلال واتكلم معاه وعرف بعد الحاح انه محتاج 500 جنيه علشان اخو الصغير يعمل عمليه اللوز وهو مش معاه ومستنى اول الشهر لما يقبض واخوه الصغير تعبان .. واستغرب "على" ان مفيش حد جرب يساعده حتى فمشى ورجع البيت متاخر وكانت " ايمان " مستنياه واطمنت انه رجع ودخلت نامت ... !!
تانى يوم الصبح اول حاجه "على" عملها اول ما شاف "جلال" اداله فلوس
"كان "على" اول ما دخل اوضته امبارح طلع الفلوس دى الل كان محوشها علشان هيشترى بيها هدوم ليه لكن حس ان "جلال" محتاجها اكتر منه وقال : الهدوم تتأجل عادى "
جلال اتفاجئ : ايه دا يااستاذ على
على : دا رزق ربنا بعتهولك متقولش لا ياعم بقى
جلال مستغرب ولاقى المبلخ 700 جنيه : دا كتير
على باابتسامه: ماهو اخوك عاوز رعايه ولا ايه .. ان شاء الله هيكون احسن يلا انا داخل للحج..
جلال ابتسم اوى لما جتله الفلوس ودخل "على" وشافه سواق من الموجودين ودخل وهو قاعد مع الحج عبد الله ...
السواق: ايه يا على هى الناس بتستهيفك اوى كده ليه ..امبارح تضيع نص يومك مع ست متعرفهاش وانهارده تدى مبلغ كبير كده لجلال وانت عارف واحنا ان الفلوس مش هترجع علشان جلال مش هيعرف يرجعهم .. فلوسك كتير ولا ايه
على بص ل السواق: انت شايف ان كده الناس بتستهيفنى
السواق : بصراحه اه
على : تعرف ايه عن الجدعنه ؟
السواق: عادى .. انك تكون جدع مع اصحابك وتقف جنبهم
على بيضحك: لا .. الجدعنه انك تقف مع الغريب قبل القريب وتساعدهم مش القريب بس .. انك متقفش مع صاحبك ف خناقه ومشوار .لا دا انك تلاقيه ف ازمه وتكون معاه وخطوتك قبل خطوته .. الجدعنه انك تساعد من غير ماحد يطلب منك لانك عندك عينين وشايف وودنين وسامع وقلب تحس بيه وعقل تحكم بيه ... الجدعنه ان يكون معاك حاجه غيرك محتاجها وتديهاله عنك .وبعدين "من فرج عن أخيه كربة من كرب الدنيا فرج الله عنه بها كربة من كرب يوم القيامه " احنا عايشين لبعض هتسميها هبل ..هتسميها طيب ذياده لكن دى عندى هى دى الجدعنه الل اعرفها وهى دى الل انا عملتها وطريقتى ... صباح الفل ..
مشى "على" وخبط ع كتف "جلال" ومشى .. السواق واقف مش عارف يرد لكن الحج عبد الله رد : جدع يا على يسلم البطن الل شالتك ..!!
خلصت اجازه نص السنه ف العادى و"على" مطحون ف الشغل صبح وع التاكسى ... وابتدا الترم التانى ورجع وضع الدروس والجامعه ..وابتدت امتحانات الترم التانى والكل انشغل فيها وخلصت الامتحانات والكل مستنى النتيجه ...قرب شهر رمضان فى يوم دخلت "اسماء" من البلكونه بسرعه تنده ع "ايمان"
اسماء: ايمى .. ايمى .. انتى يابت
ايمان قدام التليفزيون: فى ايييه
اسماء: تعالى بسرعه البلكونه
ايمان: فى ايه ف البلكونه
اسماء وقفت: ع العموم انتى الخسرانه ..كنت عاوزاكى تشوفيهم وهما بيعلقوا الزينه والنور
ايمان بلا مبالااه : عادى يعنى
اسماء: دا شباب المنطقه هما الل بيعلقوا و"على" معاهم ب ...
لسه "اسماء" هتكمل الكلمه لاقت "ايمان" شدت طرحه وبسرعه ع البلكونه
"اسماء" ضحكت وراحت وقفت جنبها : ما كنتى جيتى من بدرى
ايمان باابتسامه: انا شوفته نازل الصبح ومكنتش اعرف انه هيرجع بدرى كده
اسماء: عاده كل سنه .."على" هو المسئول عن الزينه والنور بتاعه رمضان المتعهد يعنى ..وبصراحه هو عنده ذوق جميل بيخلى شارعنا احلى شارع ..حاجه تفرح كده
ايمان بانشكاح : مش "على" طبعا لازم حاجه تفرح ..وبعدين اسكتى بقى خلينى اتفرج
اسماء : ايه دا الحقى هيروحوا يعلقوا عند "هدى"
ايمان ملامحها اتقلبت : الهى تتكهرب وهى واقفه ..مبيعلقوش عندنا ليه ها
اسماء: احنا عالى يافالحه الدور الرابع ..هما بيعلقوا من زمان من الدور التالت
ايمان: ابوكى السبب الل تحتينا عزلوا قلتله نبدل الشقق مرداش معانه بيتعب من السلم
اسماء بتضحك: عاوزه ابوكى يغير الشقه علشان يتعلق عندنا زينه ونور ياهايفه
ايمان: واكلم "على" واشوفه عن قرب
اسماء: الهى تتوكسى ..
"ايمان" واقفه وباصه على "على" ومركزه اوى .."على" بص عليها وابتسم وهى ابتسم له وشافتهم "هدى" واتغاظت من ايمان ..خلص تعليق الزينه والنور وبعد يومين ابتدا الشهر الكريم ...."على" كان مشغول ويادوب كان بيجى ع الفطار علشان مامته واخته ميفطروش لوحدهم وينزل تانى بالتاكسى ويرجع متاخر ع السحور ودايما وهو داخل البيت شايل فاكهه وحلويات وشيكولاتات لاخته ....فى يوم "ايمان" حبت تلحق "على" قبل ما ينزل بعد الفطار اخدت طبق كنافه وقطايف وبسرعه بعد الفطار وراحت توديه ل مامت "على" .. نزلت وراحت رنت الجرس وهبه فتحت الباب ..:
هبه: ايمى
ايمان دخلت: ازيك يا بيبو
هبه: الحمد الله .. ايه رايحه تصلى التراويح
ايمان بتبص حواليها: اها .. قلت اجيبلكم تدوقوا عمايل ماما واخدك وننزل هو على فين ..
انا مشفتوش نزل..
هبه بتضحك: فى اوضته بيصلى المغرب وبيغير علشان نازل
ايمان باابتسامه: طيب اندهيه علشان يدوق
هبه : ماشى
لسه هتروح "هبه" ناحيه الاوضه كان "على" خرج وشاف "ايمان" : ايمى
ايمان باانشكاح: ازيك يا على
على: الحمد الله ..انتى عامله ايه .. مقضيها اكل وتليفزيون صح
هبه: لا يا "على".. "ايمان" بتتفرج ع التليفزيون بعد ما بنرجع من الصلاه التراويح
ايمان: ايون انا عند مبدئى
على: ونعم المبادى .. ايه الل معاكى دا
ايمان قربت منه وشالت الغطا عن الطبق: دى كنافه وقطايف عمايل ماما دوقها كده
مد ايده واخد قطعه كنافه واكلها : الله .. تسلم ايديها
ايمان باابتسامه: المره الجايه هعملها وادوقك عمايلى
على مبتسم : وانا ف الانتظار
هبه بصت ع الساعه: يلا يا ايمى علشان نلحق مكان فى المسجد
مسكت "هبه" الطبق وادته ل "على" : خلى دا معاك وماما لما تخلص صلاه عرفها انى نزلت
مسكت "هبه" دراع "ايمان" وشدتها و"ايمان" باصه ل "على" و"على" بيضحك على منظر "ايمان" وهى بتتجر شويا وخرجت مامت "على" من الاوضه وشافت "على" واقف ومعاه طبق وبياكل : ايه دا يا على
على: دى كنافه وقطايف "ايمان" جبتها تدوقنا عمايل مامتها
مامته بتضحك: عسوله ايمان ..
على: طبعا انتى ممنوعه حته واحده كفايه والباقى سبوه لما ارجع
مامته : غريبه ..
"هدى" بعتت طبق امبارح وانت ولا قربت ايدك فيه وطبق ايمان قرب يخلص
دا اسمه ايه بقى
على هرب من الكلام: اسمه انى مستعجل يا ست الكل
مسك ايد مامته باسها وباس راسها ونزل
مامته: ربنا يريح قلبك يا ابن بطنى
عدى شهر رمضان و. وابتدا تجهيزات العيدالكحك والبسكويت والتنفيض :
اسماء رمت نفسها ع السرير : انا خلصت خلاص فرفرت
ايمان دخلت جنبها: وانا كمان
اسماء: لا ياحبيببتى متفكريش انتى وراكى سجاده اوضه ماما واوضه الصالون انجزى
ايمان بصوت تعبان: انا مش قادره بجد
اسماء: والله ما مقربه منهم خلينا نخلص ف ليلتك دى ..امك جايبنا تستعبدنا الله يسامحها ...
ايمان ضحكت ... اسماء : الام من دول تقعد تددعى يارب بنت يارب بنت والكل فاكر دلع وكده طلع كل دا علشان تلاقى الل تشيل عنها وتبقى خدامتها باللقمه وماشاء الله علينا ... ريا وسكينه ..
ايمان بتضحك: طيب اختك حبيببتك عندها مشوار ع السريع لجيران ها سمسم حبيببتى
اسماء : مشوار ايه ؟
ايمان: انا مجهزه طبق كحك معتبر كده ل "على" ومامته واخته هروح اوصله
اسماء: يابنتى استنى بكره الوقفه وديه
ايمان: بكره امك هتقفل علينا الشقه لغايه ما نخلص ومش هعرف اخلع منها .. يلا قومى
اسماء: هتخلعى يعنى وهلبس انا الشغل ...حسبنا الله ونعم الوكيل
ايمان: فى السجاد اكيد تقصدى
اسماء : غورى
غيرت ايمان هدومها واخدت طبق الكحك ونزلت ودخلت بيت "على" وع وشها ابتسامه وهى طالعه لسه سمعت صوت وراها : ايمان
بصت لاقتها "هدى" ومعاها طبق كحك وبسكويت : هدى
هدى بتقرب بملامح بارده : معقوله يكون الطبق دا ل "على" ..اقصد ل ام على
ايمان بصتلها فى ايديها : واعتقد ان دا رايح نفس المكان ولا ايه
هدى بطريقه مستفزه: ايوه طبعا انا قلتلهم لما هعمل هدوقهم عمايل ايدي انا الل عجبنته وخبزته بنفسى ليهم ..هما اى حد دول الحبايب
ايمان بصوت واطى : حبك عزراءيل يا شيخه
هدى: نعم بتقولى حاجه
ايمان ادتها ضهرها: بقول يلا بينا نطلع
"هدى" بتحنتف ف الطبق وطالعه ورا "ايمان" راحت "ايمان" اتعمدت تقف وتعمل نفسها هتقع راحت وقعت طبق الكحك بتاع "هدى" ع السلم
ايمان بملامح خضه: اووبس سورى يا ديدى
هدى بملامح غضب من ايمان: سورى
ايمان: اصلى اتكبلت وكنت هقع فاايدى خبطت الطبق سورى
هدى واقفه مضايقه فى الوقت دا "هبه" فتحت الباب : ايمان .. هدى
ايمان باابتسامه بارده ل هدى: عن اذنك بقى يا هدى انا داخله علشان ادوقهم الكحك بتاعنا
هبه : تعالى ياهدى ادخلى
ايمان بتضحك: معلش هدى جت غلط نشوفك بعدين يا ديدى باى باى
دخلت "ايمان" و"هدى" نزلت متضايقه من "ايمان" ودخلت "ايمان" بتضحك وحكت ل "هبه" والاتنين قعدوا يضحكوا وسلمت ع مامت "على" وشويا ونزلت ولان "على" مش ف البيت وصت "هبه" ان "على" ياكل من الكحك ونزلت رجعت ع البيت لاعمال الشاقه ... ولما رجع "على" بليل قالتله "هبه" وحكتله ع الل حصل وقعد يضحك وطلب شاى وشربوا مع الكحك وهو بيضحك ...!!
يوم وقفه العيد الكل كان سهران علشان صلاه العيد .. واغلب الشباب سهرانين ع القهاوى
او تحت البيوت متجمعين .. لكن على كان غيرهم .. كان شغال ع التاكسى لغايه الفجر رجع البيت دخل اخد دش وصلى وقرا قران شويا كان مامته صحيت و"هبه" اخته كمان ..صبح ع مامته واخد "هبه" اخته ونزلوا علشان يصلوا وكانت مستنياهم "اسماء" و"ايمان" و"هدى"
على باابتسامه: صباح الجمال ع احلى بنات عندنا
هدى : صباح الور يا على
ايمان: صباح الفل
اسماء بتشد هبه: مش هنقضيها هنا يلا علشان نلحق مكان
مسكت "اسماء" ايد "هبه" ومن الناحيه التانيه ايد "ايمان" اختها و"ايمان" لاحظت "هدى" بتسبل ل "على" راحت شدتها وقابل "على" جيرانه ومشى معاهم لغايه الجامع .. وصلوا صلاه العيد وخلصوا وهما ماشين
على : بيبو يلا علشان نفطر
هبه : حاضر جايه
هبه بصت لبنات : شوفوا هتقعدوا عند مين وعرفونى اشطه سلام
ايمان بسرعه راحت اتجاه على : "على" فين العيديه ؟
على بيضحك : عيديه
ايمان: اها العيديه ..
مدت ايديها ايمان .. هدى راحت جنبها: وانما كمان عاوزه
ايمان بصتله بغيظ .. على طلع المحفظه وادى كل واحده فيهم 10 جنيه ورق جديده
ايمان مسكتها فرحت بيها اوى : "على" اكتبلى عليها زى كل عيد
هدى بسرعه : وانا كمان
ايمان بصت ل هدى بغيظ : خلاص مش عاوزه
هدى بغيظ: يبقى اكتبلى انا بس
ايمان بغيظ : يا سلام
هدى : وانت مالك انتى .. يلا ياعلى
على بيضحك عليهم : معيش قلم دلواقتى .. بصوا هكتبلكم عليها وهسيبلكم مع "هبه" تمام
يلا كل عيد وانتم اجمل بنات
ايمان مبتسمه : كل عيد وانت معانا
على : صحيح يا "هدى" "محمد" منزلش يصلى معانا ليه ؟
هدى ملامح وشها متغير لكن رسمت ابتسامه: نايم ونومه تقيل انت عارف بقى
على بيضحك: مبقتش اشوفه غير صدف..سلميلى عليه وقوليله "على" مستحلفلك
هدى: حاضر
هبه: يلا ياعلى اتاخرنا ع ماما كده
مشي "على" وهو حاطط ايده حوالين كتف "هبه" وباس راسها وضاممها ليه وبيناكف فيها
"ايمان" سرحت شويا ولاحظت "هدى" واقفه متنحه عليهم منزلتش عنيها ..
ايمان بصوت عالى : يلا يا اسماء نطلع
اتفزت هدى : انا ماشيه سلام
ومشيت دخلت بيتهم ... اسماء : ابوكى تلاقيه سمع صوتك عليتى صوتك كده ليه
ايمان بغيظ: البت "هدى" دى مش هتجيبها لبر ... عنيها مبتنزلش ع "على" خالص
اسماء: ع اساس ان انتى عينك الل بتنزل ..احنا خلاص هننقل ليكى سرير ف البلكونه
ايمان خبطتها ع كتفها: يلا يا رخمه.. وعقابا ليكى انهارده مش هغسل مواعين ولا هساعدك ف الفطار ولا الغدا ولا الهجوم العائلى لما يحصل ههرب منك وهروح ل "هبه" ..علشان ابص ع "على" براحتى
اسماء حبت تغيظها : يارب تسبقك هدى
ايمان خبطتها : والله انتى رخمه ..
طلع "على" البيت مع "هبه" ودخل ع مامته ف اوضته وهى كانت قاعده ع السرير
على باابتسامه : كل سنه وانتى طيبه يا ست الكل
باس ايديها وراسها ..مامته: وانت طيب وبخير يا حبيبى
على طلع فلوس من جيبه : كل سنه وانتى منورانا دايما
مامته : ايه دا يا "على" معايا فلوس ياابنى والله
على: الل معاكى دا حاجه ودا حاجه .. دى العيديه ياست الكل
مامته عنيها دمعت : مقطعتش عاده ابوك يا على
على : طول ماانا موجود مفيش حاجه هتتغير .. يلا بينا نفطر بقى علشان انام ساعتين وانزل
مامته: هتنزل .خد انهارده اجازه واقعد معانا ع الاقل ترتاح
على باس ايد مامته: انا طول ما شايفك بخير وشايف هبه كويسه انا بكون مرتاح ..
مامته: جسمك يا حبيبى عليه حق عليك
على مبتسم: والرزق مبيستناش حد يا امى ..
العيد موسم وانا اتفقت مع حج عبد الله هاخد التاكسى من بدرى الكليه خلصت وموضوع الورق خلاص مش هينفع دلواقتى فلازم اسد مكانه ..لغايه ما النتيجه تظهر وهشوف هيحصل ايه
مامته طبطبت على ايده: الحمل عليك بيزيد وديون الل عليك اكتر
على مبتسم : ادعيلى انتى بس دعوه حلوه كده ودا كفايه عندى
مامته: ربنا يبعد عنك اولاد الحرام ويحبب فيك خلقه ويرزقك برزقنا
على: بس كده مش عاوز حاجه تانى .. يلا بقى نفطر ..هبه تلاقيها ظبطت طبق الفول اتمام
مامته: يلا يا حبيبى
مسك على ايد مامته ونزلت من ع السرير وخرجوا وكانت هبه جهزت الفطار
وراحت حضنت "على " : وانت طيب يا حبيبى زى كل عيد رجعت اوضتى بعد الصلاه لاقيتك حاططلى عيديتى ع مخدتى زى ما بابا كان بيعمل
على : هفضل كده ع طول لغايه ما جوزك يديكى العيديه وانا هديكى كمان
مامته: ربنا يخليكوا لبعض يا ولادى ..
وقعدوا يفطروا وبيتكلموا وبيضحكوا ... !!
فى بيت "هدى" طلعت لاقت مامتها قاعده قدام التليفزيون مستنياها
هدى: فى ايه يا ماما قاعده كده ليه؟
مامتها: مستنياكى يا حبيببتى علشان نفطر سوا
هدى بصت ع باب اوضه اخوها : ومحمد مش هيفطر ؟
مامتها: هو هيقوم دلواقتى دا راجع بعد الفجر وهيصحى ع المغرب علشان ينزل يقابل صحابه
واخد اجازه العيد من الشغل يومين بالعافيه .. ثوانى وهحضر الفطار
هدى بملامح زعل: حتى ف مناسبه زى دى مش عاوز يقعد معانا وسايبنا لوحدنا
الله يرحمك يا بابا روحت واخدت كل حاجه حلوه معاك
مامتها : اخص عليكى يا "هدى" وهو انا مش كفايه عليكى
هدى باابتسامه: انتى كل حاجه ربنا يخليكى ليا
مامتها: يلا نحضر الفطار
هدى: لا خليكى انا هغير وهحضره
مامتها طلعت فلوس من البوك : امسكى "محمد" سايبلك العيديه اهى من امبارح
هدى مسكت الفلوس بملامح زعل : ومقدرش هو يديهالى و يقولى كل سنه وانا طيبه حتى
مامتها: كتر خيره تعبان وشقيان وشايل البيت ربنا يقويه
هدى بصت لمامتها بضيقه : البيت مش مصاريف بس يا ماما ..البيت احاسيس ومشاعر الاشخاص الل فيه انتى مبتشفيش "على" بيتعامل ازاى مع "هبه" اخته ومامته وحالتهم زى حالتنا واسوء كمان من بعد ما اتوفى باباه .."محمد" فاهم غلط ان مدام مدينا مصاريفنا يبقى عمل الل عليه .. ولا بيسئل انا عامله ايه ولا بيتكلم معايا وفى المناسبات سايبنا لوحدنا يانايم يا بره .... الحياه مش كده يا ماما..الاخوه والبيت مش كده
مامتها راحت حضنتها لما شافتها بتتكلم ودموع نازله من عنيها : مش عارفه اقولك ايه
ربنا يرزقك ب ابن الحلال الل يعوضك عن كل دا ويجعل صبرك خير
هدى حست ان مامتها مش قادره تفهم الل حاسه بيه لكن مامتها فاهمه ومبتتكلمش
لان هى بنتها والتانى ابنها ومش هينفع تيجى ع حد فيهم .... !!!
فطر "على" ودخل اوضته و"هبه" كانت فاكرته بالعيديات لبنات ويكتبلهم عليها
طلع الفلوس وكتب ليهم وجه ع ورقه ايمان سرح شويا وابتسم وكاتبلها
" الناس بتستنى العيد كل سنه .. وانتى وجودك عيد .... "
وابتسم "على" واداه الفلوس ل "هبه" وانها تدى كل واحده عيديتها ... نام "على" وشويا وصحى ونزل راح يستلم التاكسى ويشتغل وهو فى وسط اليوم اتصل بيه "احمد" صاحبه واتفقوا يتقابلوا ف كافيه ف وسط البلد ...!
نزلت "ايمان" راحت عند "هبه" تقعد معاها شويا وعلشان تاخد العيديه بتاعه "على"
راحت ودخلت وقعدت و"هبه" اداتها العيديه : امسكى يا ستى "على" سابلك دى
مسكتها وفتحتها وقرت الل فيها وابتسمت ..
ايمان بخبث: وفين عيديه هدى
هبه: معايا لما هتصحى من النوم هتيجى ادهالها
ايمان بخبث: ومكتوب ايه فيها ياترى ؟
هبه: معرفش .."على" قالى متفتحيش ولا واحده فيهم
ايمان بتميل ع هبه : طيب متيجى نشوف كتب ايه ل هدى
هبه بتضحك: لا لما تيجى ابقى شوفى وهى معاها دى امانه
ايمان بغيظ: ماشى ياام امانه ..
شويا وجت "هدى" واداتها هبه العيد وكانت "ايمان" بتراقبها وهى بتقرا الكلام الل مكتوب ع العيديه ولاحظت انها ابتسمت فاضيقت اوى وحاولت تسيطر ع ضيقها : ايه الل مفرحك كده يا هدى ايه الل مكتوب؟
بصت هدى ل ايمان: انتى ايه الل مكتوبلك
ايمان بلجلجه: ها ..انا .. كل سنه وانتى طيبه بس
هدى: طيب ورينى
ايمان: اوريكى ايه ماانا قولتلك
هدى: خلاص مش عاوزه
ايمان: ورينى كده عيديتك
هدى: مكتوب فيها زيك بالظبط
ايمان اتغيرت ملامحها : زى ؟
هدى: اه ..كل سنه وانتى طيبه
ايمان اضايقت من هدى : طيب انا همشى علشان زمان عمى جه واسماء لوحدها
هدى: باى باى
هبه: لو مشى بدرى تعالى احنا قاعدين
ايمان: ان شاء الله
نزلت ايمان وهى متغاظه من هدى .. هبه: مكتوبلك ايه صحيح
هدى فتحت الفلوس : زى ما قولت "كل سنه وانتى طيبه "
ضحكت "هبه " ع انفعال " ايمان ..... وكانت "ايمان كل شويا تبص ع عيديه "على" بقيت اليوم عن العيديات التانيه ..!
مرت فتره قصيره والنتيجه ظهرت لكل ونجح "على" بتقدير كبير ونجحت اخته "هبه" بمجموع كويس هى و"اسماء" لانهم ثانويه عامه ونجحت "هدى" بمجموع قليل هى وايمان ... الكل فرح بنتيجته الا "ايمان" كانت زعلانه
اسماء: خلاص بقى يا ست نكد ماهو انتى الل مكنتيش مركزه ف المذاكره
ايمان بملامح زعل: مش ناقصه تقطيم وحياه ابوكى
اسماء بتضحك: يابت انتى المفروض تفرحى انتى نجحتى مش سقطى
زى السنه الل فات يعنى افرحى بلاش الوش دا
ايمان بملامح زعل: مش هدخل كليه تجاره .. هدخل معهد من المعاهد المعفنه
اسماء: ومين قالك ان المعاهد معفنه الل بيخلى المعاهد معفنه الل فيها وبعدين مين قالك مش ممكن تكون دى احسن ليكى بدل ما تدخلى الكليه وتعرينا هناك بفشلك
ايمان خبطتها ع كتفها : رخمه وغلسه
اسماء : بجد خلاص بقى بلاش نكد
ايمان: دلواقتى هدى هتدخل كليه وانا هدخل معهد ..هى كده دراجتها زادت قدام "على"
وانا مكنتش عاوزه ابقى ااقل منها
اسماء: مين الل قال انها اعلى منك وانتى اقل منها اصلا ؟
ايمان : العقل بيقول كده بالمجاميع دى
اسماء: والله انا اختى الكبيره هبله والله هبله ...خليكى منكده ع نفسك كده
انا هخرج افرح بنجاحى
خرجت اسماء وهى مش عارفه تقنع ايمان انها تفرح وبلاش تكدير ونكد ....!!
فى بيت "على" كان "على" قاعد مع "هبه" اخته ومامته
"على" حاضن "هبه": مبرووك يا بيبو ع النجاح ..
شدى حيلك بقى الكليه حملها اتقل من الثانويه
"هبه" باست خد "على" : طول مانت معايا وجبنى يا "على" هتبقى كل حاجه بخير
لولاك مكنتش قدرت اكمل الثانويه واجيب المجموع دا ..هو اه مش من الاوائل بس هيدخلنى كليه وانتظام كمان يعنى مصاريف ااقل شويا
على حضنها : طول ماانا عايش متشيليش هم حاجه ابدا
هبه ملامح وشها متغيره : انا عارفه انك بتدارى حزن وزعلك انك ف الجامعه متعينتش
على بيضحك: تعين ايه لا خالص مكنش ف دماغى اصلا .. المهم ركزى انتى ف الل جى واى حاجه محتاجاها عرفينى
هبه: يخليك ليا يا على يااجدع واحن اخ
على: ويخليكى ليا يااحلى بنوته
مامتهم: ربنا يخليكم لبعض
على وهبه اترموا ف حضن مامتهم: ويخليكى لينا ياست الكل ....
فى بيت "هدى" المشهد كان عكس مافى بيت "هبه"
هدى قاعده زعلانه علشان المجموع و"محمد" اخوها قالب وشه عليها ومامتها ساكته
محمد بينفخ: استغفر الله العظيم ...
عاوز اعرف انا قصرت معاكى ف ايه علشان تنجى بالعافيه كده ..الل بتطلبيه بسبهولك مع ماما .. فلوس دروس وفلوس مراجعات .. كان ناقصك ايه
هدى بدموع نازله ساكته .. محمد بعصبيه : كان ناقصك ايه عرفينى ؟
هدى بصتله ودموعها نازله: كان ناقصنى انت .. كان ناقصنى احس انى بنادمه عايشه
مش حيوان قاعد ف البيت بتاكله وتصرف عليه من غير احساس ولا مشاعر
محمد متفاجئ: ايه ..
هدى بتعيط وانفجرت : مفكرتش مره تسأل عليا وتسالى مالى ولا ايه مضايقنى ولا محتاجه حاجه على طول سايب الفلوس مع ماما وهى بتديهالى .. انتى حولت نفسك بالنسبالى من اخويا الوحيد المفروض تعوضنى عن حرمانى من بابا ل فلوس .. حرمتنى من حنيتك ومن حبك مقابل فلوس تجبهالى لمصاريفى اهتميت بالفلوس وشغلك وطلبات البيت اكتر من اهتمامك بالبيت نفسه والل عايشين فيه معاك .. سالت ماما عامله ايه .. تعبتى كام مره بليل و"على" كتر خيره بياخدنا بالتاكسى لمستشفى تعلق المحاليل ... الل عليك لما تعرف ترجع وتسيب الفلوس ل ماما ترجعهم ل "على" وهو مبياخدش حاجه.. مستخسر نص ساعه تروح تكلمه تشكره .. تشكر الغريب لاهتمامه ل اهل بيتك عاوزنى ف الجو دا اذاكر وانجح واجيب مجموع .. انا انسانه وليا احسايس ومشاعر وطلبات غير الفلوس ... محتاجه احس انى بنادمه عايشه زى الل حواليا .. انا بضحك وبهزر ولا حد حاسس بيا انا من جوه مش عايشه ..انت نفسك مفكرتش تسال ولا تتكلم معايا . انت فاكر انك بتعمل كتير لكن للاسف انت مبتعملش حاجه اصلا غير ماكنه لفلوس بس ..متعرفش انت الحرمان العاطفى ودفئ البيت الل تعرفه انت تكفى ازاى مصاريف البيت .. ياخساره ياخساره
قامت هدى ودخلت اوضتها وهى منهاره من العياط ومحمد متفاجئ ومامتها حايشه دموعها
..قام محمد بيقرب من اوضه هدى مامته مسكت ايده
مامته: وغلاوتى عندك يا محمد سيبها لوحدها متكلمهاش دلواقتى
محمد بعصبيه: يعنى ينفع الل سمعتيه دا ..
مامته: معلش .. امسحها فيا وشوف انت رايح فين وسيبها دلواقتى
محمد بينفخ بعصبيه: استغفر الله العظيم .. استغفر الله العظيم
نزل محمد بعصبيه من البيت و"هدى" قاعده ف الاوضه ماسكه العيديه بتاعه على وحضناها
ومامتها بره بتعيط ومش عارفه تعمل ايه ولا تتصرف ازاى والل عليها بتقول: يارب
مر فتره وجه تنسيق الكليات ل "هبه" و"اسماء" دخول كليه اداب انتظام و"هدى" دخلت حقوق انتساب و"ايمان" دخلت معهد حاسب الى خاص .. "على" بعد الجامعه بقى شغال بينمكتب المحاسبه والتاكسى بقيت اليوم علشان المصاريف ...!
فى يوم "على" كان راجع متاخر الساعه 12 بليل ع البيت وقبل ما ينزل من التاكسى
لاقى موبيله بيرن وكان رقم "ايمان" استغرب انها بتكلمه وبتكلمه متاخر كده ...
على: الو
ايمان بصوت عياط ومنهاره : على .. الحقنا يا"على" بابا تعبان اوى
بسرعه "على" قفل معاها الموبيل وكان قدام البيت طلع بسرعه ورن الجرس فتحت "اسماء" وهى بتعيط وبسرعه شاله "على" وسنده وركبه التاكسى وركبوا كلهم معاه ووده مستشفى ودخل الطوارى ومن الكشف عرفوا انه عنده ازمه قلبيه لانه مريض قلب ودخل العنايه المركزه
"على" بيسال الدكتور :طمنا يا دكتور ف ايه؟
الدكتور: هو دلواقتى ف العنايه تمر 24 ساعه على خير وان شاء الله هيكون بخير اطمن
على: ان شا ء الله
"على" باصص ع"ايمان" و"اسماء" ومامتهم وهما منهارين قدام اوضه العنايه وبيعيطوا
"على" بيجمع نفسه ويطمنهم: اطمنوا يا جماعه الدكتور قالى هيكون بخير بلاش القلق دا والعياط
اسماء بتعيط: انا خايفه عليه اوى
على: اطمنى.. ادعيله انتى بس وان شاء الله الصبح لما هتيجو هيكون بخير
ايمان بتعيط: لا انا مش همشى غير لما اطمن عليه
على: مش هينفع تفضلوا هنا علشان ع الاقل تقدروا تكملوا اليوم بكره معاه
انا هفضل موجود وهطمنكم
ايمان بتعيط: انا مش همشى من هنا ..
بعد اصرار ايمان ... على : خلاص انا هفضل معاكى هنا لصبح واسماء ومامتك يروحوا يرتاحوا ويجوا الصبح
مامت ايمان: هنتعبك يا على
على: متقوليش كده يا ماما .. الحج محمود زى ابويا بالظبط وربنا يعلم
مامت "ايمان" مسكت ايد "على" وطبطبت عليها: وانت الابن الل مولدتهوش من بطنى
على: يلا هوصلكم للبيت وهرجع ل ايمان وانتى ياايمان لو احتجتى حاجه كلمينى
ايمان: حاضر
مشى "على" وحاول يهدى فيهم ونوعا ما هديوا ووصلهم لبيت وطلع البيت عنده عرف مامته وهبه علشان ميقلقوش عليه وغير هدومه ورجع بسرعه ع المستشفى ومعاه اكل وعصير وراح مكان ما "ايمان" قاعده ف الاستراحه وعماله تعيط
قعد جنبها وفتح علبه عصير : امسكى يا ايمى اشربى العصير دا
ايمان بتعيط: مش عاوزه
على : مينفعش كده هتقعى انتى كمان
ايمان : بجد يا"على" مش قادره ..حاسه لو شربته هرجعه تانى
على: اشربى شويا شويا .. يلا بقى والا مش هشرب انا كمان وهتشيلى ذنبى
بصتله" ايمان" لاقته مبتسم ليها اخدت العلبه وابتدت تشرب واحده واحده
سكت شويا "ايمان" وشويا رجعت تانى تعيط وحس بيها "على" ف راح تلقائى مسك ايديها يطمنها
على: ايمى .. كفايه بقى كده اطمنى ان شاء الله بابا هيكون كويس صدقينى
ادعيله لان عياطك دا مش هيعمله حاجه وبلاش لما يفتح عينه ويشوفك يلاقيكى كده
ايمان بتعيط : انا خايفه اوى يا على ... خايفه لو حصل لبابا حاجه اكون لوحدى
خايفه على اسماء وعلى ماما ... احنا لوحدنا ملناش اخ يساندنا بعد بابا عمامى هياكلونا لو حصل لبابا حاجه .. خايفه اوى
على تلقائى حط ايد ايمان بين ايديه الاتنين وبيطبطب عليهم وباصص ل ايمان
على: متخافيش طول ماانا موجود
ايمان بصتله وساكته..
على باابتسامه: انا موجود يا ايمان ومعاكى وهفضل معاكى ومش هسيبك مهما حصل ولا خوف ولا عمامك ولا اى حاجه هتبعدنى .. اطمنى وانتى معايا كل حاجه هتكون احسن
ايمان حست بقلبها بيدق اوووى ومش مصدقه الل سمعاه .. و"على" باص ف عين ايمان وايمان باصه فى عين "على" وفاجاءه "على" استوعب نفسه ...
على : احم احم .. انا رايح الكافتيريا اشرب قهوه عاوزه حاجه لا اوكه..
مشى "على" وهو مستغرب نفسه من الكلام الل قاله والل حاسه لما مسك ايديها وايمان قاعده باصه ع ايديها ومتنحه وحاطت ايديها ع صدرها وقلبها بيدق اوووى ومش مصدقه ان "على" بيقولها الكلام دا...!
_____________________يتبع
ليست هناك تعليقات:
إرسال تعليق