أستمر الحلم يتكرر مع "حبيبه" ع فترات وكل مره بتصحى وهى مبسوطه وسعيده ..
فى يوم صحيت بدرى ولبست وكانت قاعده بتفطر مع والدها والباب خبط وكان "حسام " :
_ياصباح الخير يا خال
_ صباح الخير يا "حسام"
دخل "حسام" وشاف "حبيبه" وهى بتفطر :
_ انتى لسه بتاكلى
_خلصت خلاص اهو ..
_ نفسى اعرف بتودى الاكل الل بتاكليه فين وانتى مشروع خله سنان صينى تحت الانشاء..
وقفت "حبيبه": غيران علشان انا سمباتك وانت ليك كرش
حسس "حسام " ع بطنه: كرش .. دا عضلات يا حبيببتى
ضحك "فؤاد": او عز
_قولها يا خال .. داانا ف الكليه كانت البنات مبيعرفوش ياكلوا من غيرى
خرجت "حبيبه" من الغرفه :هما على مبيعرفوش ياكلوا فعلا كانوا مبيعرفوش يلحقوا منك علشان طفس من يومك فى المدرسه كنت بتجيلى فى الفسحه وتاخد سندوتشاتى وبترخم على اصحابى لانك بتكون خلصت سندوتشاتك ..
_يااااه ... يااااه ع قلبك الكروهات وبعدين مش انتى الل كنتى بتقوليلى اجى اخدهم اوزعهم كنت ارميهم يعنى ولا ارميهم
_ كنت بقولك ليك انت واصحابك مش ليك لوحدك داانت مبتلحقش تخرج من الفصل تكون خلصتهم يا طفس
_ انا غلطان كنت اخليهم معاكى وتسمعى البوقين من "كريمه" علشان راجعه بيهم ادى جزاء الخير ..زمن
_ ع اساس انك مكنتش بتفتن عليا .. باكو بسكويت وكنت بتقول "لكريمه" كل حاجه
اتنهد "حسام": انتى مش قادره تفهمى انا البسكويت دا كان له معزه عندى خاصه علشان انا كنت بجمع العجله ومكنش ناقص غير الدريكسيون ومصروفى بيخلص وهى كانت بتستغلنى وقتها ..
_ وانت بقى جبت العجله فين دى ..
_ لا ماهو طلع كانت بتجيبلى نوع تانى ومبصتش ع الورقه غير لما اكلته ..
_ علشان طفس .. طفس ..
ضحك "فؤاد" ع مناقرتهم لبعض : هتفضلوا كده كتير انا نازل افتح المحل
بص ل "حسام ": انت عارف هقولك ايه "حبيبه" معاك وترجع معاها مترجعش لوحدها فاهم
_تمام يا خال ومن أمتى بسيبها لوحدها انا اجازه انهارده ليها و متقلقش هنخلص مشاورينا ونرجع ع البيت "كريمه" عامله محشى
بتضحك "حبيبه" : مش بقولك طفس
ضحك "حسام": ميرسى كتير ...
نزلت "حبيبه" ركبت العربيه جنب "حسام" وسرحت ومبتسمه ولاحظ "حسام" :
_ ايه الحكايه صاحيه انهارده وشك منور .. حلمتى بالفارس المجهول ولا ايه ؟
ضحكت "حبيبه": والله انت رخم ..
_ يبقى حلمتى به .. مبشوفكيش رايقه كده غير لما بتحلمى به او ب مامتك ..جربى احلمى بيا كده اهو يكون تغيير واصلا مش بعيد اكون انا وانتى مش واخده بالك
ضحكت "حبيبه": لا كده كتير تبقى واقع وفى أحلامى لا شكرا
_ بتضيعى فرصه نص بنات مصر بيتمنوها
_ هاتلى واحده تقولى كده
_ وليه احرجها خلى الل فى قلبها فى قلبها ..
ضحكت "حبيبه: انت يا حوس كابوس مش حلم من غير زعل معلش
_ ويفيد ب ايه معلش بعد ما خبطتى الكلمه
ضحكوا الاتنين :
_ بجد انا بشكر الفارس المجهول الل هو انا الل بيخلينى اشوف ابتسامتك دى
اتنهدت "حبيبه": 5 سنين بحلم نفس الحلم مبيتغيرش مع نفس الشخص الل انا معرفهوش ولا شوفته قبل كده ..حاسه انه مش موجود فى الدنيا
_ هو انا ومتنكر ركزى انتى بس كده هتلاقينى انا مش بتقولى شوفتيه من ضهره انا مفيش فيا احلى من ضهرى يابنتى جذاب كده وبعدين انتى بتشوفى مين يعنى علشان عقلك الباطن يخزن صورته مفيش غيرى انا و انا غيرى وغيرى مفيش ..
ضحكت "حبيبه":ليه ما انا بشوفك ودكاتره والمعيدين فى الكليه لما بروح ووليد وبابا وابوك ..
_ بتخونينى فى احلامك وانا الل اخدت اجازه من الشغل انهارده علشانك
_ ميبقاش حلم وواقع يا حوس وبعدين هو شعره طويل مش ااقرع زيك
_ مين قالك ان شعرى مش طويل فاكره فى اعدادى كان طويل وسايح ونايح كده
_ سايح ونايح ايه دا كان منكوش ومن قله الحمى كان بيبقى فى حاجات بتمشى كده
_ انتوا مكنتوش فاهمين دا كان مشروع "امل" بربيه واصدره للخارج
_ يععع الله يقرفك .. استحاله تكون انت الل فى الحلم مستحيل
_ طيب ركزى كده بس الحلم انهارده طازه يعنى اكيد هتجمعى حاجه ركزى ..ها ..ها ..
بصت "حبيبه" بتركيز : لا لا لا انت لونك اغمق
_ من الشمس بلف طول اليوم
_ متحاولش يا حوس .. دا حلمى وانا ادرى به
_ وانا بكلمك بلغه الواقع مفيش قدامك غيرى انا و"وليد" وانا وانا وانا ...
ضحكوا وكانوا وصلوا قدام باب الجامعه: ووصلنا الجامعه هتاخدى جدول الامتحان وتقابلى "نور" وتنجزى علشان نلحق ميعاد "وليد " اتصل بيا من امبارح بيأكد عليا وانا هروح مشوار هنا نص ساعه وهكون مخلص تمام .
_ تمااام يا فندم ...
_ مش هقولك تانى ..
_ متقلقش بقى و"نور" معايا
فتحت الباب ونزلت وقفلت باب العربيه نده عليها "حسام": حبيبه
_ ها
_ متاكده انه مش انا الل بتحلمى به اطولك شعرى طيب
_ وتفتح تانى المشروع
_ اهو نصدره للصين ونبقى مختلفين هنكسب دهب انا وانتى ..
ضحكت "حبيبه".."حسام": صباحك كل حاجه حلوه زى ضحكتك ..يلا ادخلى
_سلام
دخلت الكليه وكانت صديقتها "نور" مستنياها :
_ وحشتينى يا "حبيبه" عامله ايه ؟
_ تمام يا حبيببتى انتى اخبارك
_ انا تمام .. لو مكنتيش هتيجى انهارده انا كنت هجيبلك الجدول واجيلك بما ان خلاص مفيش كليه تانى ودى اخر سنه .. بس طمنينى انتى كويسه لما كلمتك "عمو فؤاد" قالى انك تعبانه
_ لا انا الحمد الله احسن
_ وهو فين "حسام"
_ راح مشوار هيخلصه وهيجى متقلقيش هتاخدى شويا من البرطمان
ضحكت "نور" : برطمان ايه ..؟
_ عسل "حسام" الل بينقط ع طول
ضحكت "حبيبه " و "نور " :
_طيب يلا بينا احنا نجيب الجدول ونروح الكافتيريا هعزمك ع عصير برتقال فريش
_ اوكيه ..
مشيت "حبيبه" مع "نور" واخدوا الجدول واتجهوا لـ الكافتيريا طلبوا العصير ووقفوا مستنين يجهز وهما واقفين وبيتكلموا وبيضحكوا سمعوا صوت من وراهم بصوا كانت "مروه" صديقتهم ..:
_ ازيكم يا بنات
بنظره عدم راحه "نور": الحمد الله
بصت "مروه" ل "حبيبه": "حبيبه" مفاجاءه حلوه انى شوفتك انا كنت خلاص اتاكدت انك بتتدرسى من منازلهم يارب تكونى بخير وبقيتى احسن
ابتسمت "حبيبه" : الحمد الله ..
بلهجه سخريه: والله قلقت عليكى لما مكنتيش بشوفك مع "نور" انا قلت هتقدمى التماس وتأجلى السنه
ضحكت "حبيبه": وهأجل السنه ليه مش مستهله يعنى ..
_ بجد برافو عليكى حد غيرك كانت استسلمت للتعب خصوصا سمعت ان الكيماوى بيتعب وبتنامى كتير و ..
دخلت فى الكلام "نور ": وهو انتى شايفاها تعبانه قدامك "حبيبه" زى الفل ولا انتى مش شايفه كده
ضحكت "مروه" بسخريه : "نور" انتى مكانك كليه حقوق مش ألسن
_الحق والكلام الكويس مش محتاج كليه ندرسه فيه دا محتاج تربيه حضرتك
اتغيرت ملامح "مروه" وفضلت "حبيبه" فى حاله صمت :
العصير كان جهز مسكته "نور": يلا يا "حبيبه" ..
مروه لحقتهم قبل ما يمشوا : نسيت اقولكم حاجه ..
نور بصتلها بقرف: خير ..
_ انا عازماكوا ع خطوبتى ع "ايمن" بعد الامتحانات ب اسبوع انا كنت متردده اتصل بيكى يا "حبيبه" علشان عارفه انك هتكونى تعبانه ولا حاجه ,,لكن اللى شايفاها قدامى وكلام "نور" بيقولى انك زى الفل لازم تيجى متقوليش تعبانه ولا اى عذر ولا لسه زعلانه ..؟
قاطعتها "نور ": مبرووك ان شاء الله .. يلا يا حبيبه
مسكت "مروه" ايد "حبيبه": هبعتلك العنوان فى رساله ع الواتس هستناكى
ابتسمت "حبيبه": ان شاء الله والف مبرووك
بصت "مروه" ل "نور" وبسخريه وبتضحك: هستناكى يا "نور" ماهو "حبيبه" مينفعش تيجى من غير محاميتها
بصتلها "نور": مبرروك
مشيت "حبيبه" وبتضحك و"نور" بتمتم بكلام: بت رخمه اعوذ بالله
بصت ل "حبيبه" وشافتها ساكته : اوعى تتضايقى منها دى متستهلش تشغلى بالك اصلا بيها و ..
بتضحك "حبيبه":لا خالص هزعل منها ليه هى مقالتش حاجه مبتحصلش فعلا العلاج بيتعب
_ بس انتى رغم كده بتذكرى وكل سنه تقدير.. اه مبتحضريش كتير وخصوصا اخر سنتين بس درجاتك وتقديراتك عاليه انتى من الناس المتوقعه تاخد البعثه للصين الل قسمك عاملها
ابتسمت "حبيبه" : ان شاء الله
بتنفخ "نور" : كل ما اشوف "مروه" بجد مش قادره انسى الل عملته معاكى وقال ايه كانت عامله صاحبتك وحبيبتك
_ متكبريش الحكايه ..
_ مكبرش ايه ..دا احنا اصحاب من ثانوى ولما دخلنا كليه مع بعض كنا فرحانين اه كل واحده دخلت قسم مختلف بس ع طول كنا مع بعض وانتى قولتلنا منقولش لحد حكايه تعبك ويبقى سر وسطينا واتعاهدنا ع كده و لما هى لحظت أهتمام "أيمن" ليكى وانه كان بيجهزلك محاضرات الل مكنتيش بتحضريها وكان بيحب يقعد معاكى وتتكلموا تروح هى تقول لمجموعه كلها ع سبب تغيبك انك مريضه وتحكيلهم التفاصيل ومع الوقت فى غيابك قربت من "أيمن" وبعدته عنك واتغير معاكى .. بجد بنت حقيره
_ على فكره يا "ندى" هى مكدبتش ..!
_ لكن خانت .. خانت سر صاحبتها ودا افظع من الكدب بين الاصحاب ,, هما الاصحاب بيكونوا اصحاب ليه علشان فى ثقه بينهم وبين بعض فــ لما صاحبتها تأمنلها على سر وتثق فيها عن غيرها وتاكل وتشرب معاها وتروح من ورا ضهرها بسبب غيرتها وحقدها تقوله قاصده للكل تبقى حقيره ولا لا ..!
_ بصى .. مهما قالت لو فعلا كان فى حاجه اتجاه "أيمن" ليا برغم الل سمعه مكنش هيتغير ويبعد لكن فعلا مكنش فى حاجه .. فهو وهى مغلطوش فى حاجه ..
_ازاى يعنى واهتمامه بيكى الل كان واضح والكل كان بيتكلم وكان فى تلميح انه عاوز يرتبط بيكى لولا العرسه "مروه"
_ لا مش مروه السبب ..انا السبب .. انا الل كدبت وخبيت تعبى والل عمله تصرف طبيعى ازاى هو يوافق يرتبط ب واحده فى ظروفى كان معاه حق يتراجع اكيد دا لو كان فكر فى حاجه .. عموما ربنا يسعدهم
_ بس "مروه" حقيره برضه لانها فركشتنا وسبب انك متنزليين الكليه كتير
_ لا بجد ببقى مش قادره انزل
_ متكدبيش عليا يا "حبيبه" سبب عدم نزولك فى الكليه كان باين اوى من بعد ما عرفوا مرضك بقيتى تتجنبيهم ..
بصت ل "نور": انا مش بتجنب الناس انا بتجنب نظره الشفقه الل فى عينهم ,,
سكتت "نور" وغيرت الكلام : بصى لا انا ولا انتى هنروح الخطوبه احنا اصلا هنقابلها فين بعد كده و ..
_ لا نروح عادى دى عزمتنا
_ مش هيفرق معاها اسمعينى بس
_ اسمعينى انتى يا "نور" اى حاجه هقدر اعملها هعملها حاجه واحده بس الل هتمنعنى انى هكون موت غير كده معتقدش ...
_ بعد الشر عليكى .. انا مش عاوزاها تتضايقك بس مش اكتر
_انا مبحطش فى دماغى متقلقيش ويلا عقبال فرحك
_ربنا هيفرح قلبك ان شاء الله بفرحه مكنتيش تتوقعيها
_ وماله ولنا فى الخيال حياه
_ اسمعى منى بس ربنا مفاجاءاته غير متوقعه وانا حاسه ان فى حاجات حلوه كتير مستنياكى
ضحكت "حبيبه": وكانت معكم منجم المستقبل "نور رجب " انا عاوزه انجح يا ست يلا بينا
موبيل "نور" رن وكان "حسام" بصت "حبيبه" ع موابيلها وكان فى اتصالات كتيره من "حسام " بسرعه خرجوا من الكليه وكان خطيب "نور" مستنيها سلموا ع "حسام" ومشيت "نور" ولحظت "حبيبه" ملامح "حسام المتغيره وهما فى طريق :
_ حسام ...
بملامح غضب : مبترديش ع موبيلك ليه نفسى افهم هو معمول لديكور
اتفاجئت "حبيبه" من نبرته العصبيه : خضتنى
_ مبهزرش انا
_ ايديا مكنتش فاضيه ماسكه العصير ب ايد والمراجع فى ايد وهو كان فى الشنطه
_يعنى لولا انى اتصلت ب "نور" وردت كنت هدخل ادور عليكى انا
_ انت قلقان ليه متقلقش لو حصلى حاجه كانت ندى كلمتك
بعصبيه: ماهو مش هستنى ندى يعنى و .(انتبه لعصبيته) سورى يا حبيبه
ابتسمت "حبيبه" يلا يا رخم سورى ايه انا الل اسفه انى قلقتك عليا ..
قعدوا يتكلموا ويهزروا وصلوا المستشفى : اجهزى بقى لمحاضره وليد
بتتنهد : يلا بينا ...
دخلو مستشفى "الحياه " مشيوا فى ممر طويل كله عيادات وقف "حسام" وفتحت "حبيبه" باب عياده ودخلت ,, كان "دكتور وليد" مش موجود فدخلت تتنظره و "حسام" بينتظرها بره .. اتاخر "وليد" قامت اتحركت "حبيبه" اتجاه الشباك تقف تبص وكان فيه ورد وزرع موجودين ووقفت تبص عليهم وبتلمسهم وسرحت لدرجه انها محستش بدخول "وليد" ..
وقف بص ع "حبيبه " وهى سرحانه لل ورد والزرع وافتكر اول مره شافها ف المستشفى ...!
(فلاش باك من 5 سنين )
خلص "وليد" كليه الطب واتخصص فى جراحه عامه واستلم وظيفته ك طبيب مستجد فى مستشفى والده وبعد مرور شهر حصلت اول مقابله مع "حبيبه" ,, كان هو الطبيب الورديه الليليه وهو واقف فى الاستقبال شاف راجلين كبار وشاب وترولى عليه بنت فى حاله ايعاء حاد ونزييف بسرعه كشف عليها والده الدكتور "عاطف " (كان الدكتور المعالج ل "رجاء" ويربطه معرفه شخصيه مع "فؤاد ") بسرعه بعد الكشف دخلت العنايه المركزه عرف انها من حالات دكتور "عاطف" وانها مصابه بمرض وراثى من والدتها وهو "سرطان الكبد" ولصغر عمرها اشفق عليها .. قرر وقتها الدكتور"عاطف" انها تستقر ف المستشفى فتره لغايه ما حالتها تستقر وكان "وليد" مساعد لدكتور "عاطف " فكان من متابعين حالتها فى فتره وجودها فى المستشفى ,, تم احتواء النزيف ومع العلاج اتحسنت نوعا ما حاله "حبيبه",, لفت انتباه "وليد" حاله شخصيه"حبيبه" برغم الالمها كانت مبتشتكيش و الابتسامه مبتغبش عن وشها ودا كان محبب فيها كل الناس ف المستشفى وكانت مبتحبش تقعد فى غرفتها ودايما بتعرض و بتساعد مرضى تانين وكانت نشيطه نوعا ما ومع الوقت اتكونت بينهم علاقه صداقه قويه ..!
ابتسم وبصوت عالى : انتى بتحبى فى الورد ولا ايه ..؟
انتبهت "حبيبه" وب ابتسامه: دكتور "وليد "
ابتسم "وليد": ايه السرحان دا كله ..ايه الحلم برضه
ابتسمت "حبيبه": يعنى تخيل كده ورد فى الحلم وورد هنا اوعى تكون انت الل بتطلعلى
ضحك "وليد": مش بعيد ركزى انتى يمكن اكون انا
ضحكت "حبيبه": والل يعرفك انت وحسام تعرف تركز
_ ضحك"وليد" :متضحكيش عليا ..اتاخرتى ليه ميعادك كان الساعه 11 دلواقتى 12:30
_سورى يا دكتور روحت الكليه اجيب الجدول واشوف اصحابى وعارف انت رغى البنات
_ امم ..
_ وايه الاخبار .؟
_ الحمد الله ..
_ والعلاج الجديد عامل معاكى ايه ..؟
_ اممم بصراحه انا اخدت يوم ويوم بينيمنى كتيرومش بكون قادره خالص اقوم وانا ورايا مذاكره و..
بنظره غضب: "حبيبه" كذا مره اقول متوقفيش اى علاج بمزاجك ..
_ ماهو انا ع طول نايمه ومش بلحق اذاكر والامتحانات قربت خلاص
_ قولتلك قدمى اعتذار واجلى السنه
_ وانا هضمن منين انى هعيش لسنه دى انا عايشه دلواقتى
_ ايه لغه التشاؤم دى .. احنا اتفقنا ان العلاج فتره لغايه ما نحدد مع دكتور "مايكل" موعد للعمليه وهتعملى عمليه بسيطه والدنيا هتتظبط
ضحكت "حبيبه": انت قولت نسبه نجاح العمليه 50 % الل هى نسبه نجاح ان انا مش احتاج متبرع يعنى ممكن برغم العمليه احتاج لمتبرع زى ماما يعنى احتمال تدهور حالتىمع مرور الوقت من غير وجود متبرع عن الاول اكيده ..انا حاليا كويسه وقادره..ليه مستغلش الفرصه دى واحقق حاجه نفسى فيها
_ تمام ودى حاجه كويسه لكن مش معناها تيجى ع نفسك احنا اتفقنا تاخدى العلاج وتيجى الجلسات فى مواعيدها وبعدين انا قولتلك هتاخدى العلاج فتره والعمليه هتعمليها وكله هيبقى تمام واكيد هيكون فى متبرع انا مش ساكت وبدور
_ اوكيه ..لغايه ما تلاقى انا هعمل الل مخططاله طول ماانا قادره اعمله بسيطه
_ كفايه عند ,,الل بتتكلمى عنها دى صحتك
_ ماهو انا مش هقعد فى البيت نايمه ع السرير طول الوقت وبعدين انا معايا وقت استغله
_ مش هخلص انا عارف
_ انا بس عاوزاك تتطمن انا واخده بالى كويس ..
اتنهد "وليد": ماااشى ..المهم اعملى حسابك بعد امتحاناتك هتيجى هنا نستضيفك اسبوع بعد امتحاناتك يعنى هتخلصى امتحان وبليل هتكونى هنا علشان دكتور "مايكل" عاوز اشاعات وتحليل جديده ليكى يشوفها ومنها هيحدد ميعاد نزوله مصر والعمليه
_ بسرعه كده ..
_ وهو انتى عندك حاجه هتكونى خلصتى امتحاناتك الل بتلككى بيها
_اها ..عندى خطوبه عاوزه احضرها
ب استغراب : من امتى بتحضرى خطوبه ولا فرح ..
_ اممم ممكن تقول هجرب المرادى وهحضر خطوبه
استغرب "وليد": خطوبه.. مين المهم دا ؟
_ ايمن الل كنت بحكيلك عنه ,, زميلى ف الدفعه خطوبته هو و مروه
_ ايمن... مش دا الل حكتيلى انه كان مهتم بيكى و ..
قاطعته فى الكلام : ك اصدقاء بس مش اكتر ..
_ وقت ما حكتيلى عنه كان غير كده
_ امممم يمكن كنت بتوهم ولا حاجه .. ربنا يسعدهم
_ يلا عقبالك انتى كمان تكونى عيله وتشاركى حياه مع انسان و..
بسرعه قاطعته ومبتسمه: يمكن ..
_نعم ..
_ الواقع بيقول غير كده اكيد مش هحكيلك لانك عارف ,, انا اهدافى فى الحياه مش حب وجواز والحاجات دى انا هدفى اكبر من كده انا بتسابق ضد الوقت انا عاوزه اخلص دراستى واحاول انجز الوقت فى تحقيق بعض احلامى
_يعنى من احلامك مش عاوزه تحبى وتتحبى ولو فى حد بيحبك فعلا ..؟
_ اممم انا الحاجات الحلوه اللطيفه دى مكتفيه بيها فى أحلامى
_ ياادى الحلم ..
_ تصدق من تكراره ابتديت اصدق انها بشره من ربنا انه يمكن المكان دا الجنه والشخص دا اقابله فيها مش احتمال ..
ابتسم "وليد": ان شاء الله تعيشى وتعملى كل حاجه ف الواقع ..المهم تاخدى علاجك ب انتظام وهستناكى ف المتابعه الجايه وعاوزك تتباشرى خير ف العمليه
_ ان شاء الله ..
خرجت "حبيبه" وع وشها ابتسامه و"وليد" نظره منزلش عليها ومع قفله الباب اتنهد وقام وقف لمس الزرع والورد الل كانت بتلمسه حبيبه وسرح ...!
رجعت "حبيبه" ع البيت وهى طول الطريق بتناقر هى و "حسام " مع بعض ووصلوا البيت كان "فؤاد" قاعد فى المحل دخلت "حبيبه" طمنته عليها وطلعت ع شقتهم ..شويا والباب خبط وكانت "ندى" اخت "حسام" الصغيره وهى بنوته فى تانيه ثانوى عام ...
بنبره سخريه: "ندى " صاحيه فى الوقت دا ايه الل حصل
دخلت " ندى " وهى بتتأوب : ونبى يا "حبيبه" قايمه بالعافيه كان عندى دروس روحتها ورجعت لقيت ماما دبستنى معاها ف تقطيف 4 كيلو ملوخيه متفهميش فى ايه لو حصلت ازمه هيبقى سببها "كريمه " وكل شويا تنادى عليا ومش عارفه انام ولقيتها قالتلى انزلكم بالاكل دا انتى وخالو قولت فرصه بالمره اخطف ساعتين عندك ..
ضحكت "حبيبه": تخطفى ساعتين ايه يابنتى كائن الكولا قاعد معايا ع طول نايمه طول النهار كده حتى وانتى صاحيه نايمه ..
بتتأوب "ندى ": حلو كائن الكولا دا اهو منه حيوان ومنه حاجه ساقعه هاهاهاها ..
_ يا لهوى ع العسل اخت "حسام" هتوقع منها ايه يعنى
_ يلا ضحكت حبه اهو هنام بيهم ماشى
_ بجد يا "ندى " هتفضلى كده يعنى ..؟
_ اعمل ايه طول الليل مش فاضيه مشغوله
_ الل يسمع يقول مذاكره مش سهرك ع الكورى
سهرك ع الدرامات الكورى دى مش هتنجحك فى حياتك
_ياماما .. حسيت للحظه ان "كريمه" بتتكلم بس فوقت لما مقولتيش يا محروسه .. انتوا مالكم انا حياتى كده وعجبانى فككوا منى بقى ولا اروح اضرب مخدرات
ضحكت "حبيبه": وماله ...دا كويس انك مبتروحيش المدرسه ...
_ الحمد الله ان بابا قدملى ثانوى منازل بعد ما ريحت السنه الل فاتت وكفايا الدروس عليا
_ اه جتلك ع الطبطاب لو امتحنوكى فى الدرامات متهيالى هتنجحى بتفوق
_ ياااااه لو كده انا موافقه هو فى احلى ولا امتع من كوريا ودرامات كوريا واوبهات كوريا ومزز كوريا وايدول كوريا و ..
_خلاص انتى هتسمعيلى نشيد كوريا ..
_ تعرفى يا "حبيبه" انتى بس لو تهاودينى وتتفرجى ع درامتين تلاته اربعه خمسه عشرين بس كتجربه صدقينى هتعرفى سبب حبى دول عشق
ضحكت "حبيبه": لا شكرا.. الوقت الل هتفرج عليه ع درامات اذاكر فيه انا امتحاناتى قربت ..
_ جربى بس وانا هنشلك ع دراما تمتعك الل متعرفه ع كام اوبا جداد معرفش انا سهيت عنهم اززاى حاجه كده هيييح بقى ..
_انسى .. ويلا روحى اندهى خالك يطلع يتغدى عقبال ما احط الاكل ع السفره ..
بتتأوب "ندى ": لا اندهيله انتى انا هريح فى اوضتك شويا ولو ماما سالت قوليلها انك الل قعدتينى
دخلت بسرعه"ندى" الاوضه وخرجت "حبيبه" ندهت ع باباها وطلع يتغدى وهما ع السفره :
_ هى "ندى" هربت من "كريمه" لهنا
ضحكت "حبيبه": اها نايمه فى الاوضه
_ الموبيل والكمبيوتر والكورى بتاعها دا لسعها ..
_ مش لسع ولا حاجه هى حاجه بتحبها وبتعملها وبتكون مبسوطه هى دى الحكايه
_ مبتاكليش ليه يا حبيبه ؟
_ باكل اهو
_ لا اكلك زى ماهو ..انتى حاسه بحاجه تعبانه تروحى مستشفى ..
_ لالالا متقلقش انا كنت هناك الصبح ..
هو بس العلاج اخدته فمخلينى قرفانه انا هشرب الشوربه وهبقى كويسه
_ هو "وليد" مقالكيش حاجه غير الل قولتهولى
_ لا خالص
حط ايده ع ايديها: انا متفائل خير وان شاء الله بعد العمليه دى لما تعمليها مش هتحتاجى عمليه نقل برغم انها بنسبه 50 % لكن رحمه ربنا كبيره
اتنهدت "حبيبه" وب ابتسامه : ان شاء الله ..
قامت "حبيبه" واخدت طبق الشوربه واكل من الل موجودين وقامت ..
_ رايحه فين ؟
ب ابتسامه : هااكل عيالى هو ينفع ااكل وهما لا
ضحك "فؤاد": تلاقيهم قدام باب الشقه مستنينك ..
راحت حبيبه فتحت باب الشقه لقت القطط واقفه قدام طبق الل بتحطلهم فيه اكل :
_ بشويش استنوا كده واحده واحده ..
وحطت الاكل وابتدوا ياكلوا وقفت تبص عليهم وشويا ودخلت شقتها ...!
مرت مده وقربت الامتحانات و "حسام" ساعد "حبيبه" وكان بيجبلها المراجعات واهم الاسئله واسطوانات المحاضرات لان "حبيبه" بسبب العلاج مكنتش بتقدر اغلب الوقت تنزل ...
ابتدت الامتحانات و "حسام " كان بيوصل "حبيبه" الامتحانات ويستناها و"حبيبه" مكنش ليها اصحاب فى القسم الل فيها فالعلاقات سطحيه اخر يوم الامتحانات خلصت ووصلها "حسام " للبيت ورجع هو راح مشوار وقبل ما تدخل العماره شافت عمتها قاعده مع "فؤاد":
_ السلام عليكم
_ وعليكم السلام عملتى ايه ف اخر امتحاناتك ..؟
_ الحمد الله ..
ردت عمتها : بالتوفيق يا حبيببتى بجد يا حبيبه بدعى ربنا يهدى "ندى" وتبقى زيك كده
_متقلقيش يا عمتو "ندى" هتبقى احسن منى كمان
_ بالكورى وسهر طول الليل قدام موابيلها والكمبيوتر مش هتفلح ..
_ لا لا لا "ندى" عارفه هى عاوزه ايه بالظبط
وهما واقفين سمعوا صوتها : ايون عاوزه اسافر كوريا وااقابل اوبا واحد من الابهات بتوعى
ضحكوا كلهم وجهت "كريمه" كلامها : مش قولتلكم بنتى الوحيده لسعت ..رايحه فين يا محروسه
_ المحروسه رايحه عند "هناء" اخد منها ورق الدرس علشان ورقى وقع عليه نسكافيه والكلام باش هصوره منها علشان الامتحان
_طيب متتاخريش علشان تتغدى..
_لا مش جعانه
حبيبه: انا طالعه عاوزانى اساعدك ف حاجه يا عمتو انا خلصت
مسكتها من ايديها "ندى": تعالى معايا عند "هناء" .."صفاء" عاوزاكى
_انا رايحه ل صفاء يا بابا
_ متتاخريش مش هتغدى لغايه ما ترجعى
_ اوك ..
مشيت "ندى" وحبيبه" ودخلوا عماره جنب عمارتهم ودخلت "ندى" ل "هناء" الغرفه ودخلت "حبيبه "ل صفاء غرفتها ,,منظر "صفاء" كان متوتر ومتغير لحظت "حبيبه" كده :
_ مالك يا صفاء فى حاجه ولا ايه ؟
_ فى عريس متقدم وماما مصممه عليه شايفاه كويس وجاهز ومعاه عربيه وشقه تمليك فى فيصل لكن انا مش عاوزاه وهما مصممين ..
_ شوفتيه.. شوفيه الاول واتكلمى معاه وبعدين قولى رأيك ..؟
_ شوفته بدل المره مرتين ..اول مره قولت اشوفه اول ما قعدنا نظرته ليا مريحتنيش كان بيبصلى من فوق لتحت وكان بيركز بنظره ع اماكن كده انا اتحرجت من القعده وقمت قولتلهم مش عاوزاه قالولى شوفيه تانى خالتو عملت عزومه وروحنا وانا اتعمدت البس حاجه واسعه وقعدنا وبرضه نظراته مش مريحه عارفه نظره الل بتحسسك انك عريانه وهو مستحلى البص انا حسيت بكده فعلا وأشمئزيت منه ولما سابونا نتكلم مع بعض مرتحتش لطريقه كلامه وحسيت ب ايده هتسرح منه قومت وخرجت .. رجعنا قولت ل ماما مش عاوزاه وهى مصممه عليه وبابا كمان
_ طيب اهدى كده واحده واحده ... انتى مقولتلهمش ليه ع الل حصل ونظراته ليكى..؟
_ قولت ل ماما قالتلى عادى اى عريس بيبص لعروسه كده
_نظره تعيين البضاعه يعنى هو بيعان كرسى ولا دولاب ..؟
_مش عارفه كتر كلامهم حسسونى انى انا غلط وهما صح ..بيقولولى دا خوف ورهبه .. هو دا فعلا كده يا حبيبه .. ؟
_ اممم بصى انا مجربتش الاحساس دا علشان احكم صح انا مشوفتهوش ..طيب صليتى استخاره ما ممكن يكون علشان انتى رافضه فعقلك الباطن رافض اى حد يتقدم او خايفه زى ما بيقولوا
_ صليت وبعد ما بخلص الصلاه بحس بخنقه وبحلم بكوابيس
_ طيب خلاص لو انتى متاكده واحساسك يقين ومؤكد مش عاوزه ارفضيه واتمسكى بقرارك
_ وماما وبابا ..
_ اتكلمى معاهم او شوفى حد يتكلم معاهم
_ عمى ممكن ..
_ خلاص اتكلمى مع عمك يتكلم مع باباكى وهو لما يقتنع هيقنع مامتك.. اصل الجواز مش عافيه ومدام انتى مش مرتاحه ومش عاوزه خلاص مش غصب ..واعرفى انها حياه هتعيشيها انتى مش هما ..هما عليهم هيوصلوكى له وبعدها انتى الل هتعيشى سواء بفرح او نكد .. احنا بنختار حياه علشان نعيش مينفعش تهدريها كده .. اتمسكى بقرارك مهما حصل وواجهى وعريس راح فى غيره دا نصيب ورزق ربنا موزعه كل حاجه فى وقتها ..المهم الاختيار الصح ع الاقل تكونى مرتاحه فى اختيارك مش خايفه ...
نوعا ما كلام "حبيبه" هدى من خوف وتوتر "صفاء": انتى شايفه كده اتمسك بقرارى مهما حصل
_ ايوه طبعا دى حياتك مش هقولك اتجوزى الل بتحبيه لكن ع الاقل اتجوزى مع شخص ترتحيله مش تخافى ولا تشتمئزى منه ازاى هتعيشى مع شخص الكل شايفه كويس وجاهز لكن انتى مش مبسوطه .. انتى صح وانا معاكى ولو عاوزه بابا يكلم باباكى وعمو سعيد جوز عمتى انا هقولهم انتى مش لوحدك
_ تسلميلى يا حبيبه انا فعلا كنت محتاجه اتكلم معاكى ومش عارفه انزل ربنا يخليكى ليا
_ انا موجوده فى اى وقت المهم روقى كده ومتعقدهاش واعرفى ان النصيب ملوش مهرب وربنا ادانا عقل نميز ونختار به ونعيش حياتنا صح لانها حياه واحده ..
فى اللحظه دى موابيل حبيبه رن : طيب انا هستأذن بقى علشان عمتو بترن وواضح ان"ندى" مش سامعه الموبيل
_اوكيه ..
خرجت "حبيبه" ولسه هتروح تخبط ع باب اوضه "هناء" سمعت مامت صفاء بتندهلها :
_ حبيبه
_ ايوه يا طنط
_ عاوزاكى تعالى
_ راحت دخلت الصالون وقعدت ..
_ اممم انتى عارفه يا حبيبه ااننا مش جيران احنا اهل صح
_ طبعا يا طنط
_ وطبعا صفاء وهناء اخواتك
_اكيد
_ طبعا ميرضكيش ان اختك الناس تتكلم عليها ..؟
ب استغراب : مش فاهمه ..
_ يعنى فسخت خطوبتها مرتين وكل عريس ما يتقدم يترفض كده هيتقال عليها حاجه انها بترفض لسبب
_ سببها معروف يا طنط مش مرتاحه مش حاسه انه هو مناسب ..
_ يا حبيببتى مناسب او مش مناسب دا بتعرف بالمعاشره الل هى بعد الجواز انما تحكم بالرفض قبل الجواز دا مش صح
_ ع اساس ان الجواز زى البطيخه يعنى
_ ايوه..انا ماختارتش و كلنا اتجوزنا كده مكناش نعرف الل هنتجوزهم لكن مع الوقت والعشره عشنا حياتنا وجبنا اولاد واهو عايشين
_ لكن يا طنط ..
قاطعتها : مفيش لكن .. كتر رفض العريسان من "صفاء" هيسمعنا كلام مش ظريف واحنا مش عايشين لوحدنا احنا عايشيين وسط ناس وفى منطقه شعبيه زى منطقتنا الكلام كتير ..
_لكن صفاء ليها حق تختار الل تعيش معاه يا طنط هى الل هتعيش مش الناس
_ احنا دورنا نساعدها ع اختيار عيشه مناسبه والعريس دا مناسب
_ حضرتك كنتى عاوزانى علشان تقوليلى كده دا بينك وبينها
_ عاوزاكى اقولك مينفعش تشجعيها ع قرار غلط وتخليها تتمسك به .. انتى ظروفك غير ظروفها .. انتى اتحكم عليكى بوضع عايشاها يعنى متزعليش منى حياتك عباره عن مستشفيات وعلاج يعنى عاوزه اقولك انتى معندكيش الخبره ولا التجربه الل تخليكى تنصحيها و تتكلمى بثقه وتقنعى غيرك . مينفعش ولا ايه
كلام "ام صفاء" كان زى السكينه فى قلب "حبيبه" وحقيقه انها مش عايشه زى باقى البنات ولا هتعيش زيهم وبتأكدالها انها مجرد روح مؤقته فسكتت "حبيبه" ومكنتش عارفه ترد :
_ انا مش عاوزاكى تزعلى منى يا حبيبه انا ام وخايفه ع بنتى ..
قامت وقفت وابتسمت: لا يا طنط مفيش زعل
مشيت خطوتين ووقفت للحظه ورجعت ليها : بس عاوزه اقولك حاجه يا طنط انا اه عايشه حياه مؤقته ومتوقع اموت ف اى لحظه لكن برغم كده ربنا كتبلى حياه وهعيشها بكل لحظه هقدر ومش هستسلم .. والتجربه والخبره بسبب ظروفى انا معنديش منهم لكن عندى عقل ربنا ادهولى افكر به كويس فى مواقف العقل نفسه لمجرد التفكير فيها رافضهم .. ربنا انعم علينا بالعقل ليه علشان نفكر ونميز ونختار .. العقل بيتكلم بالمنطق والوقائع .. والواقع بيقول ان صفاء مش مرتاحه لشخص دا عقلها وقلبها رافضينه برغم انتم موافقين عليه برغم انها هى الل هتعيش معاه مش انتم ,, مش شرط انه جاهز يبقى لا غبار عليه كتير الستاره الحلوه بيكون وراء ابشع المناظر ,,
سكتت "ام صفاء" وكملت "حبيبه" كلامها : ربنا ادانا حياه واحده هنعيشها سواء طويله او قصيره الله اعلم نعيشها صح بقى ومن غير ندم فكرى من منظورها وقربيلها انتى عيشتى تجربه الاجبار فى جوازك بلاش تعيشيها لبنتك لان الزمن بيتغيير لكن نتيجه الاختيار الغلط مبتتغيرش واثارها بيكون اصعب واعتقد انك عاوزه بنتك تكون سعيده مش عاوزه انك تتباهى بجوزها وتفرحى الناس ..وبعتذرلك انى ضايقتك لمجرد فضفضه بنات مع بعض ..
كانت "ندى" واقفه جنب الباب منبهره بطريقه "حبيبه " شافتها "حبيبه" واخدتها : يلا
_ يلا
وهما نازلين ع السلم : ايه الكلام الل رستيه الكتب عامله شغل معاكى انا كنت هدخل اخبط بالكلام وانتى لحقتينى بكلامك
ضحكت "حبيبه": ورايا رجاله يا ناس
_ مبهزرش بجد كنت هدخل اقولها ايه الكلام دا ماهو انا كده كده عارفين انى لسانى طويل
_ وليه نطول لسانا مدام بالعقل هتسكتى الل قدامك
_ ياعقل انت يا مثقف
_ المهم الل سمعتيه دا ميتقالش لا لعمتو ولا لا بابا فاهمه ولا اكنك سمعتى .. لو عرفت انهم عرفوا انسى انك تباتى عندى ولا اشحنلك موابيلك واللاب لما عمتو بتشيل الشاحن
_ ايه هو فى حاجه حصلت اصلا ..انا جعانه يلا
ضحكت "حبيبه" يلا ..
رجعت "حبيبه" وكانت بتضحك"مع ندى" وطلعت شقتها واول ما فتحت الباب شافت علبه كبيره ملفوفه ع السفره ..: ايه دا ..
دخلت معاها "ندى": اكيييد "وليد"
قربت من العلبه الكبيره وبصت فيها لقيتها قطه ومعاها كارت " Happy birth day
" :ابتسمت "حبيبه" : فعلا دا "وليد "
مسكت "ندى" القطه: سليفيلى "وليد" شويا .. السنه الل فاتت لما اللاب بتاعك باظ اشترالك غيره هديه والسنادى "قطه" السنه الجايه هيجيب ايه ..؟
ابتسمت "حبيبه" وبعتت رساله ل "وليد " : شكرا ع الهديه
قعدت شويا "حبيبه" و "ندى" يلعبوا بالقطه وشويا طلعت "ندى" شقتهم .. مرت ساعتين
الباب كان بيخبط وكانت فاكراها "ندى" ولقت فى وشها "حسام ":
_ هو انت انا قولت "ندى" وبعدين خبط براحه ياعم
_ حبيت اعمل عليكى كبسه بس من غير لحمه ترارارارار
ضحكت "حبيبه": سكر والله سكر بس من عسل اسود
طلع علبه ملفوفه : اعتقد هترجعى فى كلامك بعد الهديه دى كل سنه وانتى طيبه يا بوب يابوب
ضحكت "حبيبه" : عيد ميلادى بعلامه حووس جبتلى ايه السنادى
فتحت اللفه واتفاجئت : اكل من "ماك" ياقلبى
_ قولنا نكسر القاعده انهارده محرومه انتى ياعينى من اكل الشارع كلمت وليد وقالى مفيش مشاكل وجبه صغيره بس تاخدى علاجك وقولت اكيد هتفرحى بيها ايه رايك
فرحت "حبيبه" : ياااه ياحووس يخليك ليا
_ مين غيرى هياكلك ويشربك الحاجات الل نفسك فيها غيرى مفيش ..
_ لا "وليد" ساعات بيشتريلى عادى
_ متحاوليش يا "حبيبه" تطفشينى انا مصيرك المحسوم مين هيرضى بيكى بحقنك بعلاجك وتمرمطيه معاكى فى مستشفياتك
لحظت كلام "حسام ": يبقى "ندى" قالتلك ..
وبملامح ضيقه: ومكنتيش عاوزاها تقولى ..
دخلت بعده "ندى": انتى قولتيلى خالو وماما مجبتيش سيره حسام خالص
ب استغراب بصتلها حبيبه : لا بجد ..
"ندى" بنبره ثقه : طبعا .. وبعدين انا ممكن اخسر اى حد فى البيت ماما او بابا او خالو ذات نفسه الا انتم الاتنين .. انتم الكنز بتاعى المترجمين بتوعى الخاص انتم حاجه واحده لا تتجزء اتجوزوا علشان اعيش معاكم واسيبلهم البيت
ضحكت "حبيبه": يخربيت خيالك من الدرامات الل بتشوفيها ..
ضحك "حسام " والله انا موافق مأذون من ع اول الشارع ووقتى اهو
ضحكت "حبيبه" : فشر ..هو انا اصوم واصوم وافطر عليك هى ناقصه مش كفايه انت فى وشى ع طول جوه البيت وبره البيت
_ مش هتهربى منى انسى ..
_يارب انت قادر ..
"ندى": انا هروح العب مع كوكا لغايه ما تخلصوا خناق
_ دايما" وليد" بيسبقى بخطوه كل مره اقول اشترى هديتى الاول يروح هو يسبقنى ابن الايه
_ بجد مكنتش اتخيل انه هيشتريلى قطه
_ هو سالنى وانا قولتله انك نفسك فى قطه فاكره واحنا بنتفرج ع فيلم الاجنبى الشهر الل فات البطله كان عندها قطه قولتى انا نفسى فى قطه زيها ..حتى انا قولتلك اخرجى بره جو الافلام دا
_ لا بجد انا كنت بقول عادى
_ امنياتك يعنى اوامر يا بوب
_ مش عارفه بجد اقول ايه
_ اممم انا الل مش عارف اعمل ايه مع "وليد" انا المره الجايه هقوله ع ديناصور وقتها هسبقه وهجبلك انا
متفاجئه :هتجبلى ديناصور
بنبره كلها ثقه : استيكر طبعا هاهاها
_ انا هاكل احسن بدل السكر دا ..
ابتدوا ياكلوا ..: مش هنسى انك مش كنتى عاوزه تحكيلى يا حبيبه
_ مش عاوزاك تتضايق بس ..
_اضايق طبعا هى لا عندها دم ولا احساس اصلا ازاى تكلمك كده انتى علشان خايفه ع بنتها وبتتكلمى لمصلحتها تروح تتكلم كده ..ليها روقه عليا ..
_لالالا هتعمل ايه هتروح تتخانق مع واحده قد امك من امتى انت بتعمل كده وبعدين هى اتكلمت وانا رديت عليها وخلصت انا عندى لسان شغال
_ نفسى تبطلى تحشرى نفسك فى الل ملكيش فيه
_كل وانت ساكت
_ انا لما اشوفها هاكلمها افهمها بس غلطها واعرفها ان انتى لسانك طويل وكنتى مؤدبه معاها كده متعرفكيش هى انك المودام
_ موادم فى عينك
_ طيب هجبلك الديناصور وهشوف ديناصورى ولا قطه "وليد"..
_ هخليها تخربشك
_ نياووووو
________________________
يتبع
ليست هناك تعليقات:
إرسال تعليق