خلصوا أكل و "حسام" نزل مشوار و"ندى" مسكت اللاب وقعدت ع السرير وشغلت دراما كورى وحطت سماعات فى ودنها كانت "حبيبه" مبسوطه اوى بالقطه فقعدت جنبها ع الارض وبتحسس ع راسها براحه : كوكا ..يا كوكا .. اهلا بيكى فى بيتنا المتواضع يارب تعجبك القاعده معايا ..مش قادره اوصفلك قد ايه مبسوطه بيكى ,,أعرفك ع دنيتى الصغيره انا حبيبه و بابا فؤاد وحسام وندى ودكتور وليد الل اختارك وعمتو كريمه وعمو سعيد جوزها مش هتشوفى حد غيرهم للاسف لان دول الل بشوفهم بس غير الدكاتره فى المستشفى .. امم موعدكيش انى ممكن اخرجك لان انا مبخرجش حياتى كلها هنا او فى المستشفى .. انتى عارفه انا كنت عاوزاكى ليه علشان متاكده انك الوحيده لما اتكلم معاكى وافضفضلك وااحكيلك هتسمعينى من غير نظره خوف ولا قلق ولا شفقه وعطف الل بشوفها دايما ..انا مهما اتكلمت معاهم بشوف فى عينهم خوف وقلق وانا مش عاوزاهم يشغلوا بالهم بيا علشان لما امشى فراقى يكون خفيف..انا بحبهم جداا لانهم عيلتى الوحيده ومش عاوزه اشغلهم بيا علشان كده اغلب الوقت بضحك وبهزر علشان اطمنهم واشجع نفسى من لحظات يأس كتير حصرتنى ,,حياتى ببساطه كلها عايشاها فى كلمه واحده ممنوعه ..ممنوعه من الخروج ممنوع من السفر لمصايف ممنوع انزل لوحدى ممنوعه اعيش حياتى زى الناس الطبيعيه عارفه ليه لانى ممكن فى اى لحظه اموت ..ايوه هموت انا عارفه كده وهما مانعنى عن حاجات خوف يحصلى حاجه مع ان الل انا عايشاها دى من حياه ,,لكن انا هحارب الوقت وهحارب مرضى ل اخر نفس فيا ومش هستسلم لان دا امتحان وانا هواصل ل اخره وهعيش مش هستسلم .. نسيت اقولك انا اوقات مش هكون موجوده بكون فى المستشفى يا تعبانه يا لمتابعه بس هحاول مغبش عليكى و انا لو مش موجوده الل هنا هيهتموا بيكى ..عارفه انا رغيت كتير بس احنا اصحاب وانتى اكتر حد هيسمعنى من غير ما اخاف اسببه زعل .. اهلا بيكى معايا ووسطنا يا كوكا ...
فى الوقت دا باب الشقه فتح وكان "فؤاد" : حبيبه ..
_ ايوه يا بابا ثوانى
_ خرجت "حبيبه" شافت تورته ع السفره وفيها شمع : كل سنه وانتى اجمل بنوته
راحت حضنته : وانتى طيب يا احن أب
ندى خرجت من الغرفه : يلا نقول هووف
سمعوا "حسام": هووف فى عينك مش لما اكون موجود دا انا الل موصى عليها
ضحكت" حبيبه":علشان كده بقولك فين الحلوبعد الاكل بتقولى عند الحلوانى
_ اومال .. يلا غمضى عينك واتمنى امنيه الساعه قربت ع 12 اهو يلا
قبل ما تغمض عنيها : ربنا يخليكوا ليا ..
غمضت "حبيبه" عينيها" وهى بتردد كلمه واحده "يارب قوينى " ..!
يوم خطوبه "مروه"لبست "حبيبه" لبس بسيط لكن شيك واخدها "حسام "ووصلوا لمكان القاعه قبل ما يدخلو وقفت "حبيبه" بتستجمع نفسها لانها كانت تعبانه ومااخدتش العلاج يومين ورا بعض و لان دى اول مناسبه بعد مده طويله تحضرها لاحظ "حسام" : مالك يا "حبيبه" نرجع
_ لالا نرجع ايه انا كويسه ..
راح "حسام" مسكها من ايديها ودخل القاعه وشافوها اصحابها من ثانوى واتفاجئوا ب "حسام " وقربوا منها : حبيبه ..
واخدوها ع جنب : ابن عمتك دا صح ..دا بقى امور اوى وحاجه جامده
بتضحك "حبيبه" : لا مش اوى يعنى
_ مكناش نعرف انك خبيثه ومخبيه علينا انكم مرتبطين
بتضحك"حبيبه" : انا
_يبقى بقى قعدتك فى البيت كان ليها طعم وكنتى بتقولى تعبانه ومستشفى وعلاج الل يشوفك وانتى تعبانه كان ..
قرب حسام ومسك ايد "حبيبه": كان هيقول امتى القمر نزل من السما على الارض
ضحكت "حبيبه" رد "حسام ": هو دا المطلوب تعالى بقى علشان الجو هنا عتمه اوى
كلام "حسام" ضحك "حبيبه" وغاظ اصحابها واتجهت تبارك ل "مروه وايمن" و"حسام " صمم ميسبش ايديها ولحظت "مروه" ولحظت اكتر الثقه الل كانت فيها "حبيبه" انها حضرت فعلا الخطوبه ولا باين عليها ملامح ضيقه ولا خانقه ولا تعب و كانت بتضحك ومبتسمه
_ "حبيببه" ميرسى يا حبيببتى انك جيتى مكنتش اتوقع بصراحه
رد "حسام ": لا دا كله الا انتى يا "مروه" ,, "حبيبه" قالتلى خطوبه "مروه و أيمن " من هنا حسيت بنور طلع من وشها قمر يا ناس منور من يومها ومقولكيش واحنا بنرتب تلبس ايه والبس ايه يوووه احتارنا كتير فى الاخر قولتلها اى حاجه هتلبسيها يا بوب هتحليها مش هتحليكى
"مروه" ب استغراب : اه طيب
خبطت "حبيبه" رجل "حسام ": مبروك يا "مروه" ربنا يسعدكم
مشيت ومروه عينها ع "حسام" و" حبيبه" وهما بيضحكوا ولاحظ "ايمن" باصص ع حبيبه واضايقت .. البنات مستغربين من معامله حسام ليها يشدلها الكرسى ويشربها العصير بنفسه وماسك ايديها مبيسبهاش واتوهموا ان "حبيبه" برغم تعبها الا انها مرتبطه بشاب زى "حسام " ..
ميلت عليه "حبيبه": خف بقى يا ظريف
_ ايه فى ايه ..
_ ايه يا واد السهوكه الل انت فيها دى
_ معجب وانتى قمر كده اعمل ايه ..؟
_ اعمل خط وامشى عليه ولا جعان اعملك بانيه
_ بفكر اختمها و اخدك دلواقتى حضن مطار انما ايه هاهاهاهاها
ضحكت "حبيبه": يخرب عقلك اتلم بدل ما احرجك بقى
_ متبوظليش برستيجى لو سمحت خلينا نكمل الليله دى الكل باصصلك هما نسيوا الخطوبه ولا ايه اغلبهم باصين علينا
_ مكنوش يتوقعوا انى هحضر الخطوبه اصلا وغالبا "نور" بتكون معايا مش انت خالص
راح حط ايده ع كتفها : خليهم يتوقعوا وياخدوا صور كمان ولا يهمنا ..مش قولتلك مين غيرى هيشيل صدقينى انا الل فى الحلم بس ركزى ..
ضحكت "حبيبه" وخبطته ف كتفه وحست بكحه وطلعت منديل تكح لاحظت فيه دم بسيط استاذنت "حسام" واتجهت للحمام وكل ما بتكح بينزل دم فى المنديل حاولت تتماسك ومتبينش حاجه خرجت وقضتها هزار وضحك مع "حسام" وهو طول الفرح بيتريق على البنات شويا وبيغيظ فيهم بتصرفاته .. طلبت من "حسام" يمشوا وهما ف الطريق كانت مبتردش ع "حسام" كالعاده وبتغيب فى الرد ف لاحظ "حسام" وشها متغير وبتعرق :
بنظره "قلق" :"حبيبه" انتى كويسه ..
بنبره تعب وواطيه : " حسام" انا ...
اتخض "حسام" ان "حبيبه" اغمى عليها وبسرعه اتجه للمستشفى ودخلت طوارى واتصلوا ب "وليد" ووصل وعملولها الاسعافات الاوليه واتصل "حسام" ب "فؤاد" ووصل المستشفى بعد مرور 8 ساعات فاقت "حبيبه" لقت نفسها فى غرفه فى المستشفى وشافت فى الغرفه معاها "حسام" كان نايم ع الكرسى ..:
بصوت مرهق: حسام .. حسام
انتبه "حسام": "حبيبه" انتى صحيتى ..
_ هو ايه الل حصل ..
_ انتى قوليلى ايه الل حصل انتى مااخدتيش علاجك قبل ما تنزلى
_ انا مااخدتوش بقالى يومين علشان اقدر اروح الخطوبه وميبنش عليا التعب قولت لما ارجع من الخطوبه اخده
دخل "وليد": هو دا الل اتفقنا عليه ..شوفتى عندك عمل فيكى ايه كويس ان "حسام" جابك هنا بسرعه ولحقنا الوضع وسيطرنا عليه ..
ابتسمت "حبيبه": اسفه ع الازعاج يا دكتور
بنبره غضب اتكلم بيها "وليد":مبهزرش انا يا "حبيبه" اتأسفى لنفسك مش لينا ..
سكتت "حبيبه" ولاحظ "حسام": خلاص يا دكتور المهم هى كويسه دلواقتى احسن اهو
بص ليها "وليد" وبنبره عصبيه : اعرفى انك مش هتخرجى من هنا غير بعد العمليه لما تتحدد ودا عقاب ليكى انسى رجوع البيت دلواقتى ..
ابتسمت "حبيبه": مينفعش تقولى الكلام دا وانت مبتسم انت بتخوفنى ولا ايه لا احنا مبنخافش ولا ايه ياحوس
ضحك"حسام":اكيد يا بوب احنا جامدين اوى
ضحكت"حبيبه" : قوله يا حوس قوله
"وليد" واقف بينهم فى ذهول: بجد الل يكون بينكم يغرق ولو احتاجتى حاجه كلمينى
خرج "وليد" و"حسام" بطريقه مضحكه : نرفوز اوى "وليد" هو ابن 7 ولا ايه
ضحكت "حبيبه": عنده حق بصراحه
_ المهم انتى كويسه دلواقتى
_ الحمد الله
_ انا هروح اجبلك عصير فريش من الكافتيريا عاوزه حاجه تانى ..
_لا شكرا
قام اتجاه الباب وندهت عليه "حبيبه":
_ حسام ..
_ ايوه
_ شكرا
_ ودا من ايه ..
_ع الل انت عملته امبارح وكميه الضحك الل ضحكته
_ انا معملتش حاجه دا الطبيعى ..
_ لا عملت ..انا بصراحه سبب الل خلانى مااخدش الدوا محبتش يبان عليا ارهاق ولا تعب علشان نظراتهم ولا يتقال عليك مرافق لمريضه .. انت امبارح خلتنى محسش بنظرات شفقه منهم وحولتها لنظرات حقد وغيره منهم ليا ودا اول مره احسه وفاجئتهم و انك توصلهم فكره انى زى زيهم زى اى بنت طبيعيه ممكن ارتبط واتحب وحد يعجب بيا ومرضى مش عائق ,,مش اى حد يعمل كده ..
_ حبيبه ..
_ متقولش حاجه انا مش مضايقه خالص انت نعمه ربنا بعتهالى مبضحكش غير معاك بجد بسببك انت وبابا وندى وكريمه وعمو سعيد حياتى ليها طعم غير الوجع والالم ..تسلم ويخليك ليا الحبه الصغنين المكتوبين ليا ..
قرب منها "حسام" : حبه صغنينين ايه احنا بنربى كتاكيت انتى هتعيشى حبه كتاررر وهتشوفى ولادك وولاد ولادك ومتتكلميش كلام ملوش لازمه دلواقتى ويلا علشان ترتاحى
_ حاضر .. حسام
_ ها ..العصير هيسخن كده
بدموع فى عنيها : موصكش ع بابا يا "حسام " .. ملوش غيركم و ..
قاطعها "حسام": هما حطولك ايه فى المحاليل دى تهيئات روقى كده انا مش هتاخر
ابتسمت "حبيبه" وخرج "حسام" وبعد ما كان بيضحك ظهرت على وجهه ملامح القلق والخوف على "حبيبه" اتجه لمكتب "وليد" ودخل :
_ حسام
_ انا مش عاوزك تتضايق منى يا "وليد" ولا من "حبيبه"
شال"وليد" النظاره من على عينه وحطها ع المكتب واخد نفس: انا مش مضايق منكم يا "حسام" لكن عدم حرص "حبيبه" ع صحتها وهى فى وضع مينفعش فيه تكاسل ولا هزار دا غلط .. يومين متاخدش علاج وهى عارفه حالتها متاخره وممكن تنزف فى اى وقت يعنى فرضا لو مكنتش معاها وملحقنهاش ايه كان هيحصل
_ بعد الشر ..اعذرها ظروفها مختلفه عن اى واحده هى بتبقى عاوزه تعمل حاجات وبتحارب نفسها وبتحارب المرض انه ميغلبهاش متقصدش اكيد تضر نفسها لان "حبيبه" اكتر واحده فينا عاوزه تعيش يا "وليد" وهتعيش انا واثق فى ربنا انه مش هيوجعلنا قلبنا عليها وواثق فى ارادتها وتفائلها ..
اتنهد "وليد": ان شاء الله ..
_ فى حاجه يا "وليد" صح ..
_ اكلمك بصراحه يا "حسام" انا خايف من نتيجه العمليه رغم انها ضروريه لكن صعبه الورم منتشر فى اماكن كتيره صعبه وانه يتم استئصال اكبر قدر منه مع عمليه التجميد للخلايا الورم الاساسى فى الكبد هتاخد وقت كتير واخر اشاعات وتحاليل "حبيبه" الشهر الل فات متطمنش ودكتور "مايكل" بيقول حاله ميئوس منها نسبه نجاحها ااقل من 50% انك تخرج منها وانا دورت ع متبرع مفيش حد من الل ظهروا متطابقين مع "حبيبه" وخايف الوقت يعدى وملحقش ..
قاطعه "حسام" بنبره كلها ثقه: انا معرفش ولا افهم فى كلام الدكاتره دا انا الل اعرف ان "حبيبه" هتبقى كويسه ودا ثقه فى ربنا ورحمته ل انسانه عاوزه تعيش ..
_ ان شاء الله خير ..
_ انا رايحلها ومش هسيبها وتفائل خير ..!
ابتدت العمليه وسط جو ملئ بالتوتر والقلق من الجميع اسرتها والدكاتره ولانها حاله حرجه وحضر العمليه "وليد" لكن مكنش من طقم المسئول عن العمليه لكن قلقه هو الل طلب يحضر ويتابع كل خطوه داخل غرفه العمليات ... فى لحظه بص ل "حبيبه" وهى نايمه ومتبنجه والدكتور " مايكل" بيكمل العمليه افتكر "وليد اخر كلمات "حبيبه معاه ..:
( فلاش باك لليوم قبل العمليه )
كانت "حبيبه" نايمه ع السرير الباب خبط ودخل "وليد :
_ وليد .. اقصد دكتور "وليد "
_ ايه دكتور وليد دى ..
_ يعنى احنا فى المستشفى والبرستيج يا دكتور ع راى "حسام" ماهو متفضلش تدرس سنين كتير علشان يتقالك يا دكتور ومقولهاش دى يبقى ضيعت فلوسك ع الدروس الخصوصيه كده
ضحك "وليد":انتى وحسام فظاع .. المهم طمنينى عليكى جاهزه للعمليه الصبح
ب ابتسامه مبهجه: جدا جداا ..جدااا
سرح "وليد لحظات : مالك يا دكتور
_ مفيش ..
_ اكيد مستغرب بتقول ايه البنت الل معندهاش دم دى داخله تعمل عمليه صعبه نسبه نجاحها 50 % يعنى احتمال دى تكون اخر يوم ليا وبضحك
_ لا مقصدش ومتقوليش كده ...
ب ابتسامه : انا متفائله خير,,فمهما حصلى انا راضيه ..انا اصلا مكنتش اتوقع انى هعيش كل دا ولو ليا باقى شويا فى عمرى اعيشه هعيشه فالامر كله بايد ربنا وربنا رحيم وكريم وحنين اووى
وكل عطايا ربنا خير وانا راضيه ..
ابتسم "وليد": يااااه ع مصالحتك مع نفسك دى يا "حبيبه" هو انتى مش خايفه من الموت
_ اخاف ليه وانا كده كده هموت سواء دلواقتى او بعدين احنا اموات مع ايقاف التنفيذ يا دكتور وبعدين المكان التانى الل هروحه مش هتعب فيه ولا هحتاج علاج فيه ولا هنزف ولا هقلق الل حواليا
_ فين المكان دا ؟
_ عند ربنا فى جنه ربنا نعيم ملوش وصف ولا اخر يعنى هكون فى مكان افضل واحسن وع الاقل هتطمنوا عليا بدل القلق الل عملهولكم دا ..
ملامح حزن اترسمت ع وجهه"وليد": متقوليش كده هتعيشى وهتفرحى وهنتطمن عليكى بعد العمليه انسانه بالتفائل دا والطاقه الايجابيه الل بتوزعيها دى اكيد هترجع ليكى ..
بتضحك : ولو مرجعتش ابقى خليها معاك وافتكرنى بيها وانا راضيه
_ تقومى من العمليه بالسلامه وهاخد كورسات منك انتى هتسكتينى بمره
ضحكت "حبيبه" : اضمن حقك دلواقتى يا دكتور
_ دلواقتى وبعد كده كمان .. يلا كفايه عليكى كده متسهريش الساعه 1 والعمليه الساعه 7 الصبح
_ هقوم اصلى ركعتين الليل واقرا شويا فى القران
_ نامى وارتاحى
_ ماهو انا بكره هنام كتير خلينى استمتع بالحبه الل صاحيه فيهم يا دكتور
ابتسم "وليد": اوكيه ..لو احتاجتى حاجه كلمينى انا هنا مش هروح
_ اوكيه ..
اتجهه "وليد" اتجاه الباب : وليد ..
بصلها "نعم ..
_ممكن طلب ؟
_ اتفضلى اكيد ..
_ لو حصل حاجه عكس الل احنا مستنينه فى رساله عاوزاك توصلها بما انك اخر حد اشوفه
اتفاجئ "وليد": ايه الل بتقوليه دا ..؟
ابتسمت "حبيبه": انا سمعتك وانت بتتكلم مع دكتور مايكل ان حالتى حرجه
_ لا طبعا ..
_ اسمعنى بس انا متوقعه كل حاجه .. عاوزاك تبلغ بابا رساله
_ قولى
_ قوله ان انا بحبه جدااا وانه نعمه ربنا بعتهالى وميزعلش لانه عملى كتير ومقصرش
ابتسم "وليد": انتى هتقوليله كده بنفسك يلا نامى ..
ابتسمت "حبيبه" وخرج "وليد" من الغرفه واتنهد واتجهه لغرفته وملامحه قلق وتوتر ..!
(فى العمليات)
فى سره وهو واقف وهى بيبص ع "حبيبه" وهى متخدره ونايمه : هتقومى يا "حبيبه" وهتبقى احسن كمان هتقومى ..
استمرت العمليه اكتر من 7 ساعات لان الورم كان منتشر فى اماكن كتيره وكانوا منتبهين جداا لان اى غلطه هياثر عليها ...وخلصت العمليه ولاحظ "وليد" نظرات دكتور "مايكل" ل "حبيبه" حط ايده ع راسها وقالها " you`re Strong Girl "
استغرب " وليد " واتكلم معاه واتفاجئ من كلام الدكتور :
_ لانتشار الورم بالطريقه المفجعه دى توقعت انها مش هتستحمل لاخر العمليه واحتمال نجاتها بسيطه لكن هى متمسكه بالحياه كانت بتحارب معايا الورم هى عاوزه تعيش ودا سبب نجاح العمليه هى مش انا ,,هى فتاه قويه اتمنى تعيش وتلاقى متبرع ف اسرع وقت ..
أبتسم "وليد" من كلام دكتور "مايكل" ,,كان فى انتظار "حبيبه" قدام غرفه العمليات "فؤاد" و "حسام " و "ندى" و"كريمه" خرج "وليد" وطمنهم انها هتكون ف العنايه المركزه لمده 72 ساعه لغايه ما تستقر حالتها وتفوق لكن ملامح وشه كانت متغيره ..برغم ابتسامته الل كان بيحاول يخبى بيها ملامحه الحقيقيه حس "فؤاد" ان فى حاجه .. مقدرش يستنى واتجهه "ل "وليد" لغرفته وعرف منه من دكتور "مايكل" ان "حبيبه" محتاجه لمتبرع ف اسرع وقت وان العمليه دى قدرت تأخر من تطور الورم لفتره مع العلاج لكن مش هيستمر كتير ضرورى متبرع ..عرض "فؤاد" انه يتبرع لانه الشخص الوحيد المتوافق معاها رفض "وليد" لانها خطيره على صحته وانه لو حصل "حبيبه" هتعيش بتأنيب الضمير لخسارتها ابوها .. طمنه "وليد" انه هيستمر انه يدور ع متبرع ومش هيتكاسل ..خرج "فؤاد" من غرفه "وليد" واتجهه ل العنايه ومن ورا الزجاج بص ع "حبيبه" ودموعه نازله من عينيه وبيقول "يارب نجيها " ..!
مرت 72 ساعه ولسه "حبيبه" مفقتش واتحول الجو لقلق وتوتر وخوف,, تانى يوم وابتدت تفوق واتنقلت لغرفه واول ما فتحت عنيها شافت "فؤاد"ماسك ايديها و "حسام" و "ندى" وابتسمت : انتم تانى هو انا مورنيش غيركم
ضحك "حسام ": ياااه اهى ظهرت ع الساحه "حبيبه" اقيموا الافراح
_اهرب منك اروح فين يارب ...
_ الحق يا خال بنتك كانت عاوزه تشوف حد تانى عاوزه تشوفى مين اعترفى ها ..
ضحكت "حبيبه": اكيد بابا يعنى
ضحكت "ندى" وبتغمزلها: هو الفارس مظهرش ولا ايه احنا قولنا اليوم الذياده اخدك فى مكان ابعد ولا حاجه
رد "حسام" : تحلم بمين يا ماما وانا قاعد هنا اهو
_يارخم ..
مسك "فؤاد" ايديها": حمد الله ع سلامتك يا حبيبه
_ الله يسلمك يا حبيبى .. شكلك مجهد
"ندى" دخلت ف الكلام : مبياكلش يا "حبيبه" ولا بياخد علاجه
راح "حسام " خبطها ع راسها تسكت : افصلى يا رويتر
_ اه .. مش لازم اقولها مش هو قال مش هاكل ولا هاخد العلاج غير لما تصحى "حبيبه" الله
بصت "حبيبه" بقلق ل والدها وبنبره تعب : ايه دا يا بابا و دا الل اتفاقنا عليه ..؟
_انتى لو جرالك حاجه انا مش هقدر اعيش يا حبيبه انا عايش علشانك
دموع نزلت من عين "حبيبه": انا مهما قولت مش هقدر اوصف الل حساه انت اغلى حاجه فى حياتى يا بابا انا من غيرك مليش وجود ربنا يخليك ليا
الموقف كان مؤثر ولاحظ "حسام" دموعهم وحب يخرجهم من المود :
_ "كريمه" قالت لما تقومى بالسلامه هتدبح البطتين الل شايلاهم لسعيد شوفتى هتبيع ابويا علشانك "ندى" دخلت فى كلامه: ع هواك يا خويا انت اول واحد فرح بيهم
_ طيب ايه رأيك هديكى الجناح بس علشان تطيرى به على كوريا واخلص منك
_ طيب قول جناحين علشان اطير بواحد والتانى اخليه احتياطى لو الجناح الاولاانى ريح يبقى فى استبن ترضى ل اختك تاخدها مشى
كلام"ندى" و"حسام" ومناقرتهم لبعض ضحك "حبيبه" وغيروا من مود العام مطولوش معاها وسابوها ترتاح ورحوا على البيت ,, شويا ودخل "وليد" يطمن عليها وشافها صاحيه وع وشها ابتسامه :
_ يااهلا بالل مطلعه عينى
_ حرام عليك دا انا غلبانه وعيانه اه ..
ضحك "وليد": حمد الله ع سلامتك يا "حبيبه"
_ الله يسلمك يا دكتور ..
_ انتى عملتى معجزه ان العمليه عدت ع خير ارجوكى اسمعى الكلام
ابتسمت "حبيبه": حاضر حاضر ..
قبل ما يسافر دكتور "مايكل" طلب من "وليد" ان "حبيبه" تقعد فى المستشفى فتره علشان يطمنوا ع استقرار حالتها لما تخرج .. اول ما قدرت تتحرك "حبيبه" مستسلمتش لنوم السرير وخرجت واتعاملت مع جو المستشفى فكانت بتساعد المرضى الل محتاج مساعده والممرضات فى علاج المرضى كانت بهجه ونشاط وطاقه ايجابيه لكل الل حواليها وتعاملها مع الناس وارادتها ساعدها ع شفائها .. فى يوم لاحظت "حبيبه" عنبر فيه 15 طفل وعرفت انهم مرضى سرطان كبد حالات متاخره محتاجه لتبرع وان المستشفى عامله القسم دا لحالات الحرجه تعالجهم ع حسابها دخلت واتكلمت معاهم كان اعمارهم من 8 سنين ل 14 سنه ,, خرجت قعدت فى غرفتها تفكر ليهم تعملهم ايه يفرحهم ,, تانى يوم الصبح باب مكتب "وليد" خبط وكانت "حبيبه" :
_ حبيبه فى المكتب انا كنت جايلك
_ ماهو انا مقدرتش استنى
_ليه فى حاجه تعباكى فين ..
_ لالا انا الحمد الله ..بس انا عاوزه طلب لو ينفع ولو مينفعش نفعه انت
_ مفيش خروج من المستشفى انسى
_ ومين قال عاوز اخرج انا اصلا قررت اغير عنوانى ف البطاقه اكتبه على هنا خلاص
ضحك"وليد": ايه الطلب ..؟
_ عاوزاك تعمل حفله صغيره كده تجيب عرايس ومهرج وهدايا
_لمين دا وليه ..؟
_ ل اطفال عنبر (B) عاوزه اعملهم حاجه يفرحوا بيها بدل ماهما طول اليوم نايمين ع السرير بيتوجعوا .. حاجه تشغل تفكيرهم حتى للساعتين عن الوجع حاجه توصلهم ان الوجع والالم مش كل حاجه بيشوفوها فى حياتهم .. انا لو امكانياتى تسمح كنت عملت بس للاسف انت عارف الل فيها .. فقولت انت اكيد هتقدر تجمع من الدكاتره هنا مبلغ وتنفذ الحفله دى ها قولت ايه اكيد اه صح ..
ابتسم "وليد": فكره مجتش ع بالى
_ اكيد مش هتيجى ع بالك لانك دكتور لكن الل زى حالتنا بيحتاج اى حاجه تفرحه تشغله ..المهم افهم كده انك موافق ..تمام قدامك 6 ايام ع اليوم السابع تنفذ لان الاطفال مستنين ..
_ وهو انتى قولتلهم ..
ب احراج: بصراحه واحد فيهم طلب يشوف الارجوز قولتله هيجى اخر الاسبوع هينفع تطلعنى عيله ..
_ لا خالص .. واعتبرى الحفله اتعملت بس بشرط
_ ايه هو ..؟
_ انتى الل هتكونى المسئوله عنها يعنى تنفيذ لغايه ما تخلص تمام
فرحت "حبيبه":بجد ..اوكيه موافقه اكيد .. هروح اقولهم بقى باى ..
خرجت "حبيبه" بكل بهجه وفرحه وو"وليد" سعيد بانه شايف "حبيبه" فرحانه ..
فعلا تمت الحفله و"حبيبه" اصرت انها تكون احلى ما يمكن والاطفال اتفاجئوا باللعب والبلاليين وضحكوا وكان يوم جميل ل الاطفال و حبيبه ول وليد ... مقتصرش الموضوع ع الاطفال لكن وصل ل اى شخص محتاج حاجه كانت "حبيبه" بتفكر وتساعده ع قد ما بتقدر ودا وصلها انها محستش بفتره اقامتها ف المستشفى ,, مرت 4 شهور على عمليه "حبيبه" .. ففى مره وهى قاعده فى غرفتها دخل "حسام" ومعاه "كوكا " و "ندى" ومعاهم شنط :
_ بوب يا بوب
شالت القطه : كوكاااا
ب استغراب : بتبعنا ع طول لما بتشوفها امسكى يا ام كوكا قاعدالى انتى هنا وسيبانى معكوك مع الاستاذه كوكا .. هو "وليد" مكنش ينفع يجيب قط لازم قطه
ضحكت " ندى": اقول ايه اخويا عنده حول مشاعر دى هديه لبنوته يجبلها قطه اكيد
_ يعنى هو مش عارف ان البنوته قاعده فى بيت فى رجاله يجيب قط ع الاقل كنت اعرف اتعامل معاه راجل ل راجل
بتضحك "ندى": ع اساس انك بتسيبها دى لو بنتك مش هتهتم بيها كده داانت بتنفضلى ياجدع علشانها
_انتى عاوزه "حبيبه" تعلقنى ولا ايه ...انتى عادى يعنى انما كوكا لا
بتضحك "حبيبه" بطلوا مناقره بقى ..
انت مبتاكلهاش كده ليه ( بصت لقطه) الواد دا بياكل اكلك يا كوكا ولا ايه ؟
_ لا موصلتش ل اكل القطط يا بوب وبعدين حاولى تلميها بتغرغر بيا كتير وانا مليش فى كده انا مؤدب واوقات بجبها من على السلم وهى مع قطط الشارع واخر مره قفشتها وهى بتنونو مع قط كده وباين كان بيغرغر بيها تنزل معاه وانا لحقتها ..
ضحكت"حبيبه" : لا لا يا كوكا اسمعى كلام حووس ..
"ندى" : مقولتليش طلبتى مننا نشترى لعب اطفال و 15 لعبه
_ فى طفلين فى قسم ( B) عيد ميلادهم انهارده قلت اجيب لباقين علشان يفرحوا كلهم يعنى كل واحد ينام وجنبه هديته ..
ضحك"حسام": دانتى خليتنا نلم فلوس ولا بنلم تبرعات نبنى مسجد
ندى " : بس ب شويا لعب .. كنتى قولتى وحطينا حقههم لتبرع كان افيدلهم ..
"حبيبه" ابتسمت : وايه الجديد الل هنقدمهالهم هنا كده ...دول محتاجين يفرحوا وابسط حاجه تفرحهم .. الهدايا واللعب ونقعد معاهم شويا هيحفزهم ويديهم طاقه ايجابيه وتزود من ارادتهم ويقدروا يحاربوا مرضهم ..
"حسام" مبتسم: "حبيبه محمد " تنميه بشريه ..
خبطته "ندى" ع كتفه: " حسام سعيد" استظراف ورخامه
قامت وقفت "حبيبه" وهى شايله كوكا : يلا بينا
"حسام" شغال ابوكم انا شيل يا حسام هات يا حسام ماشى ..
ضحكت "حبيبه": مش لوحدك " وليد " سبقك ..
خرجوا من الغرفه واتجهوا لقسم الاطفال وفعلا شافوا الاطفال وكانوا تعبانين اوى من العلاج وزعوا عليهم الهدايا ووليد اشترى تورته يحتفل معاهم وقعدوا معاهم و"حسام" و"ندى" اتحولوا ل ارجوزات والاطفال حبوهم ولعبوا مع القطه وكانت من اللحظات السعيده ل "حبيبه" فى الوقت دا باصص عليهم "وليد" من بعيد" وشايف الاطفال فرحانين و"حبيبه" كمان .. !
فى احدى المرات خرجت "حبيبه" من غرفتها كانت بتتمشى فى حديقه المستشفى لحظت NoteBook واقعه فى الحديقه مسكتها وتبص عليها وحواليها مشافتش حد فتحتها لقت اول جمله " my Wishing list " فضولها خلاها تقراه وهى بتقرا ابتسمت لان الامنيات الل فيها شبه مستحيله منها " تسافر باريس _تقابل صدفه "ممثل اجنبى معروف ""_ يعترفلها بحبه بطريقه رومانسيه _ تقضى شهر العسل ع يخت بتاعه _ تلف العالم فى 30 يوم _تورث مليون جنيه " وغيرهم ,, حاولت تدور ع الاسم وكان " سحر عبد الحميد" اتجهت ع الاستقبال وسالتهم ع الاسم فى مريضه بالاسم دا وعرفت غرفتها واكتشفت انها فى غرفه الل جنبها وانها من المرضى الدائمين لانها مصابه بنفس المرض الل عند "حبيبه" اتجهت الى الغرفه واخدت معاها شوكولاته من عندها وخبطت ع الباب ودخلت شافت فتاه عمرها 35 سنه لكن من كتر الكيماوى والعلاج شكلها باين اكبر .. قربت منها لحظت انها معلقه انبوبه اكسجين صغيره جنبها متوصله بخراطيم بتتنفس منها ابتسمت وقربت "حبيبه" :
_ مساء الخير
ابتسمت "سحر" : مساء الخير
_ انا اسفه ع الازعاج
_ اتفضلى ..
_ انا "حبيبه" الل فى الغرفه الل جنبك
_ الملاك القوى ..
ضحكت :حبيبه" ب ابتسامه ومدت ايديها بالشوكولاته : اتفضلى
ابتسمت "سحر ": الله شوكولاته ..
_ انا عارفه ان كتير بيبقى نفسك فى حاجه حلوه والشوكولاته الغامقه احسن حاجه لينا
ضحكت "سحر" ردت حبيبه": خبره بقى سنين
مدت ايديها ب notebook : انا لقيت دى واقعه ف الجنينه
فرحت "سحر" :كنت بدور عليها ميرسى كتير ..
لحظت "حبيبه" فرحه "سحر" بالنوتس بتاعتها وجه سؤال فضول منها وكانت عاوز تسال لكن "سحر" سبقتها :
_ فتحتيها ..؟
حست ب احراج "حبيبه": بصراحه مكنتش اقصد كنت بدور ع الاسم
ضحكت "سحر": واكيد ضحكتى من الل قرتيه صح ..؟
باحراج : انا اسفه بس مكنتش اقصد بس كنت بدور ع اسم او اى حاجه و ..
قاطعتها "سحر": عادى ع فكره .. انا عرفت من عنيكى ان فى سؤال وهو ايه الامنيات العجيبه دى الل مش هتحصل صح ..؟
_بصراحه استغربت
_ انتى مجربتيش تكتبى قائمه امنياتك الحاجات الل نفسك تعمليها
_ اممم لا بصراحه مفكرتش فيها ..
_ حاولى تكتبيها هتحسى احساس مختلف
_بس الحاجات دى شبه مستحيله تحصل
_انا عارفه انها مش هتحصل ..
اتفاجئت "حبيبه": وكتبتيها ..؟
_ هو انا مليش حق احلم ..
_ تحلمى ..
_ اها .. احلم . الحلم مكان بنهرب فيه ,,مسمعتيش مقوله درويش ولنا فى الخيال حياه .. اهو انا خلقت حياه مستحيله فى الواقع خلتها تحصل فى احلامى وخيالى ..فى الاحلام كل المستحيل بيحصل الحلم بيهون قساوه الواقع ...
سكتت "حبيبه " وكملت "سحر: شكلك مبتحلميش ..؟
_ لا بحلم مفيش انسان مبيحلمش لكن بصراحه مفكرتش اشغل تفكيرى بحاجات مش هتحصل انا حبيت اركز فى الل اقدر اعمله خصوصا ان وقتى مش ملكى ..
_ كويس جداا علشان وقتنا مش ملكنا وفى حاجات كتيره مش هنلحق نعملها مفيش حل غير نحلم بيها ونحققها فى حلمنا ..اقولك حاجه ..؟
_ ها
ابتسمت "سحر": وانا بكتب كل امنيه من دى حسيت انها حصلت وفرحت ودا كفايه ..فى الحلم المستحيل بيكون واقع جميل حتى لو لحظات ع الاقل بيخفف علينا وجعنا ..فى ناس حلمت وحلمها بقى حقيقيه مفيش مستحيل لا فى واقع ولا فى الحلم ..
سكتت "حبيبه" مستغربه .. كملت "سحر" كلامها : انا مش هحكيلك ع مرضى لان الواضح اننا اصدقاء كفاح الل فى حالتنا قدامهم حاجه من الاتنين لما يسمعوا انهم هيموتوا يا يستسلموا ويستنوا الموت يا يستغلوا كل لحظه ويحاربوا الوقت .. احنا منفذنا الوحيد الل محدش يقدر ياخده احلامنا ...المكان الل فيه كل حاجه حلوه والمستحيل بيكون ,,ليه نحرم نفسنا واحنا فى ايدينا حاجه غيرنا مش شايفها بالرغم انهم هيموتوا فى يوم .. الاحلام علاج للوجع لينا .. جربى كده وامسكى ورقه وقلم ومتقوليش على حاجه مش هقدر اعملها اكتبيها وعيشيها فى حلمك وصدقينى هتلاقى فرق هتحسى انك اقوى برغم كل الل حواليكى شايفينك ضعيفه ..الحلم طاقه وامل ..
ابتسمت "حبيبه": انا بيقولوا عليا انى متفائله وع طول ببتسم ومبخفش من الموت لكن بعد ما شوفتك انا مجيش جنبك حاجه ينفع نكون اصحاب
_اكيد طبعا ..
الممرضه دخلت : انسه "سحر" ميعاد جلستك ..
قامت "حبيبه": يلا بينا
"سحر" بصتلها": لا روحى ارتاحى انتى ..
ابتسمت" حبيبه": مش احنا اصحاب وانا مبسيبش اصحابى نروح سوا ونرجع ونرتاح سوا يلا بينا
ابتسمت "سحر" ومسكت "حبيبه" كرسى بالعجلات وزقته واتجهت مع "سحر" لجلستها ورجعت بيها نامت ع السرير وغطيتها ورجعت ل غرفتها بتفكر فى كلامها ..!
يوميا كانت "حبيبه" لما بتكون احسن والعلاج مش تاعبها كانت بتقعد مع "سحر"فى غرفتها وتاخدها ييقعدوا ف الحديقه ..:
_ مكتبتيش امنياتك لسه يا "حبيبه" ؟
_ اممم .. لا بصراحه
_ليه..؟
_ انا فكرت فى كلامك لكن مش عارفه اصل انا عودت نفسى من صغرى انى محلمش او معنى اصح مفكرش فى بكره لانى مش متاكده هعيش لبكره ولا لا فتفكيرى ف اللحظه دى الل انا عايشاها ازاى اعيشها
_يعنى مفيش حاجه نفسك فيها ..؟
اتنهدت "حبيبه": اعيش اكيد ..
_اكتبيها ...
الامنيات ب اصرارك عليها ممكن تكون حقيقه اكتبيها واتمنيها بشده واتمسكى بحلمك ..
_اممم هحاول .. بس قوليلى هو مفيش حد بيجيلك ..؟
_اخويا كل شهر يجى يشوفنى ..
_ مره فى الشهر ..
_ ماهو مش من القاهره احنا من بورسعيد وهو متجوز ومشغول مع ولاده وبيته و ..
_ مهما كان مينفعش يسيبك لوحدك كده مش عذر دا ..
بملامح حزينه اتنهدت "سحر": انا من بعد "محمود" مبقتش مستنيه حاجه من حد وكتر خيره انه بيسأل برغم انه عنده حق لو قاطعنى
_ مين "محمود" ويقاطعك ليه ..؟
_ محمود اخويا التانى
_ هو مات ..
_ بعد ما عمل عمليه تبرع ليا بشهر دخل كومه انا صحيت وهو مصحيش
_اهااا .. ..انا اسفه ..بس دا يخليكم قريبين لبعض مش يقاطعك
_ "احمد" اعترض ع العمليه وانها خطر عليه وكانت حالتى متاخره "محمود" قرر من ورانا يتبرعلى ومات علشان اعيش لكن مكنش يعرف ان انا مش هعيش كتير بعده ..
_ انتى عملاها امتى ..؟
_ من سنه ..
_ والدكاتره قالولك ايه ..
_ الحاله بتتدهور زى ماانتى شايفه مينفعش حتى التبرع انا عايشه اخر لحظاتى
سكتت "حبيبه": بعد الشر عليكى ان شاء الله هتكونى احسن
ابتسمت "سحر": عرفتى ليه انا بكتب احلامى علشان الواقع الل عايشاه مش لذيذ عايشاه لوحدى مليان وجع والالم لكن فى خيالى واحلامى بعيشه مع الل انا عاوزاه بسعاده ..
ابتسمت "حبيبه" : انا لما هخرج مش هسيبك وهجيلك كتير لو بتعيشى واقعك لوحدك هشاركك فيه ايه رايك
مسكت "سحر" ايد "حبيبه": حاربى وعيشى يا حبيبه ..انا 10 سنين بحارب وبعد العمليه سنه بحارب مع كل نكسه بقاوم وبنجى متستسلميش للموت بسهوله حاربى للنعمه الل ربنا وهبهالك
اتنهدت "حبيبه" : ان شاء الله ...!
كانت "حبيبه" بتقعد مع "سحر" كتير عن اى حد فى المستشفى ودا لاحظه "وليد" وكان مبسوط لان "حبيبه" نفسيتها كانت بتتحسن وحالتها بتستقر اكتر وكان بيشجعها اكتر تقعد مع "سحر" تساعدها فى تخطى لحظات الالم والوجع فالاتنين كانوا بيساعدوا بعض ..!
فى يوم كان موجود "فؤاد" و "حسام " وكانت "حبيبه" بتجهز ودخل "وليد :
_ ايه السرعه دى
_اخيرا هرجع البيت بعد 6 شهور حبس
ضحك "وليد":اسمعى الكلام وانتظمى ع علاجك وجلساتك علشان مجبكيش احبسك هنا
_ لالا متقلقش الاتنين دول مش هيخلونى ابص جنبى متقلقش
ضحك"فؤاد": ماهو علشان مصلحتك
بلهجه جد: زى ما اتفقنا كل شهر تيجى متابعتك فاهمه
_حاضر يا دكتور .. يلا يا بابا لاحسن يرجع فى كلامه ويخلينى
ضحكوا كلهم وقبل ما تمشى راحت سلمت ع "سحر" وكانت تعبانه واتفقت معاها "هتزورها " ..!
رجعت البيت "حبيبه " وسط تحذيرات من الجميع وكانت مبتنزلش من البيت ع طول نايمه وكانت "ندى "بتقعد معاها :
_انتى يابنتى معندكيش امتحانات
_ عندى هخلص الحلقتين دول من الدراما دى وهذاكر
_ بتبص ع الساعه " الساعه 2 بليل هتذاكرى امتى امك لو عرفت انى مخلياكى تتفرجى مش هتنزلك هنا
_ لا خلاص يا بيبه بقى حلقتين بس مش هعرف اذاكر انا ودماغى مشغوله ان حلقتين الاسبوع دا نزلوا ومشفتهمش
_ مش اتفقتى انك هتخبطى الدراما مره واحده لما تخلص تكونى خلصتى امتحانات
_ ماهو انا مدام فتحت اول حلقتين مبعرفش بيجروا ورا بعض اعمل ايه انا ادمان
_ انتى كده مش هتجيبى مجموع عدل
_ وهحتاجه فى ايه .. انا اصلا قايالاهم هدخل معهد خاص وبابا موافق المهم مسقطش البنت لبيتها وتليفونها ودرامتها
ضحكت "حبيبه" : لا بجد .. كملى وخلصى
بصت "ندى " شافت "حبيبه" ماسكه كتاب تقراه
_ حبيبه
_ ها
_ ماتجربى كده يا حبيبه واتفرجى معايا ع دراما والله هيعجبك عليهم شويا موزز مقولكيش هيسدوا نفسك عن المصريين
ضحكت حبيبه: ليه يعنى ومتقوليش كده شجعى منتج بلدك دا فى يوم هيبقى واحد منهم ابو عيالك
_ فشر هو انا بعد الفرجه دى هتهف واتجوز واحد مصرى
_ هو انتى فاكره ان الكوريين او الاجانب حلووين فى منهم الكويس والوحش دول بنادمين زينا يعنى الاختلاف ثقافه وعادات لكل كتكوين انسان هما زى اى ناس فى الطبيبين وفى الاشرار ..المكان الوحيد الل فيه الناس كلها كويسه وطيبه هى الجنه غير كده مفيش انسى ..
_ انا مشوفتش الوحش هو مفيش وحش فيهم اصلا انتى بطلى عقد وكلام "كريمه" دا
ضحكت " حبيبه": لا ونبى يا محروسه
_ هى "كريمه" بذات نفسويتها اهى .. انا اعرف واحده اتعرفت على واحد كورى واتجوزته بس ايه حاجه كده انتاج نضيف انا هعمل زيها
_ انتى هبله .. انتى مالك بغيرك وايه عرفك ان دا حد كويس
_ وانتى بتقفليها ليه ماهو ان شاء الله هتجمعنى ظروف مع اوبا حلو كده يفتح النفس
_ انتى مفيش فايده منك ..
_ طيب جربى معايا كده ..
_انتى عاوزانى اتفرج معاكى ..
_ اه ونعمل تحالف يااااه بقى
_ ذاكرى الاول وخلصى الل عليكى وانا هتابع معاكى الل بتشوفيه
_بتتكلمى بجد ؟
_ هو انا ورايا حاجه .. انا عماله اراجع الل درسته فى الكليه وفاضيه بس تسمعى الكلام
_ 10 دقايق هكون قفلت العربى
_ ياهبله ..
_ حبيببتى يا اونى لازم ابوسك اموووووووواه
ضحكت "حبيبه": لسعه بجد
خارجه "ندى" من الغرفه : صدقينى هيصيبك الفيروس انتى كمان لانك مش هتقولى شبه بعض وعينهم ضيقه انتى متعوده عليهم الصين وكوريا زى القاهره والاسكندريه كده
ضحكت " حبيبه": بجد
_ اصلا فى دراما جديده العيال بيقولولى مشكله نشوفها سوا
_خلصى الل وراكى الاول يلا
_ اوكيه .... !
خلصت "ندى" مذاكرتها وراحت تنده ع حبيبه لقتها نايمه : يابنت الايه بتضحكى عليا علشان اذاكر ماشى يا "حبيبه" ..!
_____________
يتبع
ليست هناك تعليقات:
إرسال تعليق