_
سافر "حسام" ورغم سفره حاجه أثرت فى "حبيبه" لكن كانت مبسوطه لانه سافر علشان مستقبله ,, كانت "حبيبه" مبتحاولش تضيع دقيقه من وقتها وتستغله فى قرايه او تعليم لغه .. كانت "ندى" دخلت معهد خدمه اجتماعيه مجموعها ف الثانويه كان وحش جداا دخلت وهى مش فى دماغها وفى المعهد اتعرفت ع بنات فى منهم زيها فانز لكوريا واتعاملت من غير قلق ولا خوف ,, كان عند "ندى " فى المعهد ماده لغه انجليزيه وكانت ضايعهفيها فكانت "حبيبه" بتساعدها ,, ففى يوم نزلت ل "حبيبه":
_ أونى ..( أونى فى كوريا بتتقال من بنت لبنت اكبر منها زى ابله فى مصر )
_ نعم يا قدرى ..
_ عندى مراجعه بكره على ماده الانجليزى فى الميد ترم انقذينى تشيبال
( تشيبال يعنى ارجوكى بـ الكورى )
مسكت "حبيبه"الملازمه وقلبت فى الصفحات :
_ وانتى مش عارفه تذاكرى دا لوحدك دا ملخص
_ نص الكلام مش عارفه ترجمته وعقبال ما افتح القاموس ولا جوجل هاخد وقت
_ وكنتى بتعملى ايه كل الوقت دا ..
ابتسمت " ندى ": كنت ناسيه
ضحكت "حبيبه": نعم .. كنتى ناسيه ان عندك امتحان فى المعهد الى بتروحيه كل يوم
_وهو انا بروح كل يوم علشان امتحاناتهم ما كده كده هعرفها حتى لو فى بيتنا
_ اومال بتروحى ليه يا محروسه
_ علشان اقابل اصحابى ونروح الكافتيريا ونقعد ننم ع الاوبهات وناخد الصور من بعض ونحضر الايفنتات وكده يعنى
_ لا بجد ...
_ انا فاكره انا سمعت الميعاد فى محاضره بس مش فاكره امتى بالظبط الل فاكره الاسبوع الل فات اننا كنا بنتفق ع الاينفنت هنتجمع ازاى ونروح
تنحت "حبيبه" ل "ندى ": وايه الل فكرك يامحروسه ..؟
_هقولك انا امبارح كنت بتفرج ع حلقه الدراما بتاعت امبارح هوبا قولت ابص ع جروب المعهد هوبا القيهم بيتكلموا ع الامتحان هوبا افتكرت هوبا بصيت ع الساعه هوبا لقيتها الساعه 8 هوبا مسكت الملزمه هوبا ادركت انى محتاجه اسبوع علشان اترجمه هوبا قولت اونى حبيببتى هتنقذنى كالعاده ,,ها بقى
مسكت "حبيبه" الملزمه وخبطت "ندى" فى دماغها: هوبا انا ممكن ابيعك عادى ..
بملامح حزينه: واهووون عليكى افشل
_ وهو انتى مستنيانى افشلك انتى فاشله خلقه
_ وانا الل كنت مجهزالك هديه
طلعت من موابيلها صور فوتو كارد ل "جى وو" وميداليه عليه صورته وشافتها "حبيبه" وتنحت : ايه داااااا
_ دا الل اشترتهولك من الايفنت الل كنت فيه الاسبوع الل فات
_ مشفتهمش يعنى لما جيتى مع الل اشترتيه
_ ماهو انا وقتها البنات فكرونى ان فى امتحان لغه وقتها عرفت انى مش هلحق واتاكدت انا لما انزلك هتذلينى فقولت اخليهم رشوه وابتزك بيهم ههاهاهاهاها شريره انا
ضحكت "حبيبه": وهما فين فى الشقه فوق ..؟
_فى مكان سرى محدش يعرفه غيرى .. هتنجزى الملزمه وترجميهالى هتلاقيهم معاكى
_ واطيه يا "ندى " دى مش اول مره تعملى كده مااشى
_ اعملك ايه من وقت ما سافر "حسام" ومعنديش حد اعتمد عليه غيرك ماشاء الله معهد لغات انجليزى تلاقى .. صينى تلاقى .. وسعى كده كورى تلاقى .. وحاليا فى بدايات الفرنساوى استغل انا المواهب دى .. وبعدين انتى دايما تقولى اللغه بتثبت بالممارسه اهو بنشطلك الذاكره الانجليزيه ونهى وشيماء بتنشطلك الذاكره الصينى يعنى
_ يعنى لو كنتى سمعتى كلامى من سنتين واتعلمتى معايا الانجليزى وقولتلك تعالى معايا نبدء قولتيلى لا
_ انا مكنش عندى وقت وقتها اسيب دراماتى وابهاتى لمين ها واقعد اتعلم انجليزى ..
_ حوشى الكورى الل واقع منك
_ الكورى مش عاوز تعليم ..الكورى عاوز احساس
_ طيب تخيلى كده قابلتى اوبا من اوبهاتك هتعملى ايه هتتكلمى معاه ازاى لا كورى تعرفيه ولا انجليزى .. قوليلى كده ..؟
بنبره كلها ثقه وقفت "ندى": ولا هحتاجهم انا هشوف اوبا من اوباهاتى من دول على طول هقوله "بوغشبيتا اوبا " (وحشتنى ) " سارانيهه اوبا " (بحبك) واترمى فى حضنه ومش بعيد ابوسه بوسه مشبك مصرى ويبقى دا تخالط الثقافات بالاحساس
ضحكت "حبيبه" ع كلام "ندى": يخرب عقلك هو دا الل هتعمليه
_ ايون .. ومن غير تفكير .. وبعدين دا هيحصل يوما ما .. انا متدربه ع دا كتير
_ مدربه فين ..؟
_ فى احلامى .. كل يوم بحلم ب اوبا من اوباتى بعد كل مسلسل اشوفه قبل ماانام باخده معايا الحلم
_ عقلك الباطن لحس ..
_ حوشى حوشى الادب .. ددا انتى اول واحده تحلمى ب كورى فينا نسيتى
_ قرك دا مبقتش بحلم اسكتى ..
_ انتى بس قبل ما تنامى اتفرجى ع حاجه كده واسحبيه معاكى للحلم وسيبى بقى عقلك الباطن يشتغل
_ اخرسى يابت
_ انتى فهمتينى غلط .. انا اقصد تعزميه على عصير قصب ولا حاجه وشجعى السياحه المصريه
_ انا فعلا مش حاسه بغياب "حسام" سايبلى زير عسل هنا ..
بصت "ندى "على الساعه : هننجز بقى الساعه بقت 10
_ خلاص هاتى ..
_ بقولك يا "حبيبه" عاوزاكى فى حاجه كده ..
_ ايه تانى اروح امتحن بدالك ..
_ ياريت ينفع والله ما كنت هتاخر
_ تعمليها .. خير ..
_ امممم .. عارفه "نهى" طبعا ..
_ اكيد .. مالها ..؟
_ اممم انا من فتره كده فى المعهد مسكت اللاب بتاعها شوفت حاجات مش لطيفه خالص ..
_ مش فاهمه ..؟
_ انا كنت عاوزه اخد من عندها صور هى نزلتهم HD ليا انا والبنات قلبت فى الصور وبقلب كده تكون مخبيه حاجه لانها واطيه ممكن تخبى صورنا المعفنه الل فيها اعاقات وتذلنا بيها ع الفيس وجروب المعهد,, المهم لقيت فولدر كده مكتوب "Secret" فضولى خلانى افتحه قلت اقفشها بالجرم المشهود واشردلها فى المجموعه يعنى لكن اتفاجئت لما فتحته ..
_ لقيتى ايه ..؟
بصت "ندى" حواليها وقربت من "حبيبه" وبصوت واطى : لقيت حاجات قليله الادب صور وفيديوهات
اتفاجئت "حبيبه": ايه ..؟
_ والله زى ما بقولك كده ... روحت قفلت بسرعه ومعرفش حسيت انى رزعت اللاب ومش عارفه اعمل ايه .. قولت هى حره لكن من اسبوع فى واحده فى المعهد مش كويسه مصاحباها وعلى طول الاتنين بشوفهم حطين اللاب وبينقلوا حاجات من بعض روحت بصيت كده وهى مش واخده بالها لمحت حاجه راحت هى قفلت اللاب ووشها اتغير وعملت نفسى ما شوفتش حاجه لكن فى نفس الوقت مش عاجبنى الل بتعمله دا علشان هى صاحبتى وبحبها ..
_ وعملتى ايه ..
_ اضحكى عليا اتقمصت شخصيه شيخه واحنا قاعدين قولت بالمعنى يعنى اى حاجه بتتعمل فى الخفا مفيش بنادم شافها لكن ربنا شايف وهيحاسب كل واحد على اعماله سواء قال او شاف او نفذ وشغلت فيديو لشيخ كده بيتكلم على الحاجات دى وتاثيرها وانها حرام ..
_ كويس ..
_ كويس ايه دى ولا كانت قاعده معانا ماسكه موابيلها ولا بصت ع الفيديو وشويا ومشيت قبل ما يخلص ..قوليلى اعمل ايه ..انا عاوزه اخليها تبطل تتفرج على الحاجات دى ومش عاوزه اقاطعها لانى حاسه انها محتجاه حد يساعدها ..
_ حد يعرف الكلام دا ..
_ لا خالص .. حتى "شيماء" مقولتش ليها حاجه برغم اننا اصحاب احنا التلاته لكن حسيت ان دا سر واحافظ عليه وفى نفس الوقت ادورلها على حل اساعدها به من غير ما تحس علشان محرجهاش لان اكيد هى محتاجه مساعده صح ؟
_امممم مدام هى تهمك اوى كده متقلقيش كل حاجه وليها حل
_ يعنى ايه اسيبها كده ..؟
_ لا طبعا استمرى انتى فى دور الشيخه ع قد ما تقدرى وسيبى الباقى ع ربنا وعليا وان شاء الله هلاقى حل من غير ما تزعليها ولا تجرحيها ولا تخسريها
_ طيب يلا كفايه رغى ترجمى
_ واطيه وبتاعه مصلحتك
_ اى خدعه ...
خلصت "حبيبه" ترجمه ومراجعه ل "ندى" :
_ اكتر من كده مش هقدر اعملك غير اجى امتحنلك
_ بصى انا هروح ارزع الل فاكراه وربنا يستر
_ طيب يلا اطلعى نامى ..
اتجهت اتجاه الباب وبصتلها : "حبيبه" فى ايفنت بعد الامتحانات ايه رايك تيجىمعانا ؟
بملامح يأس: معتقدش .. ابقى صوريه وفرجينى عليه ..
_ اكلم خالو واشغل اسطوانه الزن وهيوافق
_ لالالا متحاوليش مش هيرضى
_ ماهو انتى السبب فى المره الل صممتى تروحى وكنتى تعبانه ومقولتيش ورجعتى تعبانه و
قاطعتها "حبيبه ":خلاص بقى ..انا حياتى هنا ومش هعدى الحدود دى تانى خلاص
_ يلا تصبحى ع خير وانا راجعه بكره هجبلك الحاجه
مسكت "ايديها ": على مين يا ماما هطلع معاكى اخدهم فى حضنى يباتوا انهارده
_ اه يا سافله ..
_مش اسفل منك يا بتاعه بوسه مشبك مصرى هتبوظى سمعه مصر
ضحكوا الاتنين وطلعت "حبيبه" مع "ندى" واخدت منها الحاجات ونزلت وهى مبسوطه ودخلت اوضتها وحطتهم قدامها ع المكتب وفضلت باصه ليهم وهى مبتسمه ... !
مر أسبوعين "حبيبه" كانت قاعده فى شقتها فاتحه اللاب ومشغله كورس الفرنساوى الباب خبط وكانت "ندى"و "نهى " و "شيماء" اصحابها :
_ اتاخرتوا ليه ..؟
ضحكت "ندى": كنا بنتسرمح طبعا ..
_ يافاشلين بحسدكم ع فشلكم انا ادخلوا ..
دخلوا وقعدوا فى أوضتها وهى صبت عصير ليهم ودخلت :
"نهى" بصت ع ورق كتير ع المكتب : انتى بتحضرى دكتوراه ولا ايه يا "حبيبه"
ضحكت "ندى ": دا كده بعيد عنكم بتذاكر فرنساوى
ضحكت "حبيبه": وبعيد ليه "شيماء" و "نهى" اشطر منك يا فاشله انتى
_ لا بجد انتى بتذاكرى ليه ..؟
_ مش مذاكره بمعنى مذاكره وامتحان دا كورس تعليمى للغه يعنى بشغل وقتى وبتعلم لغه جديده
ضحكوا البنات واتكلمت "نهى": يعنى تشغلى نفسك بمذاكره ايه الملل دا ..
ضحكت " حبيبه" وقعدت جنبهم : طيب قوليلى كده انتى وقت فراغكم بتعملوا ايه غير الكورى ها يا شيمو بتعملى ايه فى وقت فراغك ..؟
_ امممم .. بتفرج ع درامات جديده وبعيد القديمه ومفيش اصلا وقت لحاجه تانيه
حضنتها "نور": حبيببتشى والله
ضحكوا كلهم ..وجهت "حبيبه" السؤال ل "نهى ":
_ وانتى يا "نهى" بتعملى ايه فى وقت فراغك ..؟
_ اممم .. ولا حاجه ..
_ اهو ولا حاجه الل بتعمليه دا غلط
ملامح "ندى" اتغيرت هى و "نهى ": هو ايه الل غلط ..؟
_ انك سايبه وقت فراغك فاضى دا غلط ..
_ ماهو انا مليش فى الكورى زيهم ..
_ محدش قالك اشغلى وقتك بالكورى ولا بالتركى ولا بالهندى ولا بالمكسيسكى حتى دى اختيارات شخصيه كل واحد حر .. فى مليون حاجه الوقت ينشغل بيهم الوقت احنا يومنا عباره عن 24 ساعه لو نمتى 8 ساعات واكلتى وشربتى وصليتى وادلعتى ساعتين يبقى قدامك 14 دول ممكن تعملى فيهم معجزات وهتحتاجى وقت عليهم دا فى الايام العاديه غير الدراسه
_ زى ايه ..؟
_ يعنى مثلا وقت ما بتحسى بملل ايه اول حاجه بتشغل تفكيرك ..
تهتهت "نهى": عادى يعنى ..
_ علشان انتى محاولتيش تفكرى تشغلى وقتك ازاى والممل دا يختفى ازاى .. قدامك حاجات حواليكى تتفرجى ع درامات لممثليين بتحبيهم ,, تسمعى اغانى ,,عندك النت محيط واسع مليان حاجات كتيره فيها الل بيأذى ع فكره لكن فيه حاجات كتيره مفيده ..اتعلمى لغات زى ما انا بعمل تنفعك بعدين وتفتح عقلك وتعرفى ثقافات غيرك ولفى العالم وانتى مكانك .. اقرى كتب وروايات واعرفى الدنيا فيها ايه والعالم حواليكى بيفكر ازاى وانتى قاعده مكانك ,, اتعلمى حاجه جديده كروشيه اى اعمال يدويه بخامات بسيطه تعملى حاجات جميله .. ارسمى ,, او اكتبى ,, بره البيت عندك هوايه نميها اتعلمى رياضه سباحه ,, سله,, حتى لو هتنطى الحبل ,, او عمل خيرى تشاركى فيه او اخرجى مع اصحابك وغيرى جو بجانب الحاجات دى وكل يوم بليل صلى ركعتين ليل واقرى قران اختمى يومك بحاجه مبهجه لقلبك ,,فى شغل لما تخلصى دراسه وفى حاجات كتيره تانيه اكيد ,,اختارى حاجه تخليكى سعيده ومبسوطه وانتى بتعمليه علشان متندميش على وقت ضيعتيه فى حاجه غلط هتحسسك بندم وخنقه وضيقه حتى لو متعتها كانت لحظه ,, استغلى وقتك فى حاجات بتحبيها وتفيدك وصدقينى لو جربتى حاجه او اتنين وقررتى تبتدى الملل مش هيلاقى فرصه يدخل حياتك والفراغ هيختفى وهتحسى بقيمه وقتك وبقيمتك وهتحتاجى وقت ع وقتك علشان تلحقى تخلصى ..
سكتت "نهى" وكلام "حبيبه" نبيهها لحاجات كتيره كملت حبيبه كلامها :
_ الفراغ يا بنات .. الفراغ زى الوحش بيفترس روحنا حته حته لما بنستسلم له وبيدخلنا فى ضلمه ووهم وبنعمل حاجات بيصورهلنا انها حاجه جميله وممتعه لكن هى للاسف حاجه مضره وبتتعب روحنا .. الفراغ بيخلينا نوصل ل اقسى مراحل اليأس والاكتئاب لاننا بنديله مساحه فى حياتنا ميستهلهاش .. لما الفراغ دا يتملى هيختفى هتبنى حيطه سد قدامه مش هيقدر يدخلك ويشغلك بتفاهات وحاجات الل بتأذيكى سواء سمعتيها او قرتيها او شوفتيها بعينك ,,اشغلوا وقتكم وحاربوا الفراغ والملل بااختيارات تنمى حياتكم وتساعدكم تعيشوا حياه افضل اعتمدوا على نفسكم ازاى تسعدوا نفسكم بنفسكم .. حياتكم وايامكم دا كنز وهبه من ربنا استخدموها فى حاجات صح بالمختصر عيشوها صح علشان تحسوا بالسعاده ..
ابتسمت "ندى" من كلام "حبيبه" وخصوصا لما لحظت "نهى" ملامحها مقتنعه وكانت مستمعه ل "حبيبه" ومركزه ودا غير عادتها وعرفت ان كلام "حبيبه" أثر فيها ووصلتلها النصيحه بطريقه كويسه من غير جرح ولا زعل .. قلبت "ندى" القعده هزار : وكانت معكم "حبيبه" تنميه بشريه
ضحكت "حبيبه": طيب ابقى شوفى التنميه البشريه هتعملك حاجه تانى
_ داانتى الحب يا اوونى
ضحكوا كلهم وابتسمت "نهى " وكملوا قعدتهم وراجعت ل البنات شويا ومشيوا .. وصلتهم "ندى" ورجعت ل "حبيبه" :
_ ايه الكلام العميق الكتب ليها اثار جامده
_ القرايه فعلا حاجه جميله جدا بتفتح العقول لكن الصح بيبقى واضح من الغلط احنا عندنا عقل ليه علشان نفكر ونميز و القرايه توسيع افاق ومعرفه
_ ابراهيم الفقى ياناس
_ امشى يابت
ضحكت "حبيبه" : بجد يا حبيبه انا مكنتش متوقعه هتوصليلها النصيحه كده
_ انا مكنتش بنصح "نهى" بس انا كنت بنصحكم وبنصحى نفسى معاكم ان اى وقت فى حياتنا فيه فراغ نشغله بحاجه مفيده لان دا الصح ..
_ صح.. انا هروح بقى اشغل فراغى بدرامتين كده
فى يوم نزلت "ندى" وسهرت مع "حبيبه" ومشغلين فيلم اجنبى والفيلم شغال اتكلمت "حبيبه ":
_ البنت دى شجاعه اوى
_ علشان طفشت من بيتهم ماهو ابوها بيعاملها وحش طبيعى هتطفش
_ لا انها فكرت تسافر وتعتمد ع نفسها رغم صعوبه ظروفها ولوحدها القرار دا محتاج تفكير كتير لانه مش سهل ..
_ شكلك بتفكرى تطفشى هقول ل خالو
ضحكت "حبيبه": اروح فين انا مبعرفش انزل لوحدى لسوق هطفش بره مصر لوحدى ازاى
ضحكت "ندى": بس قوليلى لو جتلك الفرصه تسافرى هتسافرى ..
سكتت "حبيبه": مش عارفه انا مبعرفش اخد قرار فى حاجه مجهوله انا بحب اواجهه الموقف وقتها هاخد القرار ..لانى ممكن اقولك رد دلواقتى يتغير لما تحصل دا لو حصلت ..
_ ردك مقنع
_ هو دا الصح لان الانسان ميعرفش قدرته غير لما يواجهه الموقف لان غالبا كلامه بيكون حاجه وتنفيذه وقتها بيكون حاجه تانيه ومن هنا تظهر المفاجاءات طاخ طاخ طاخ
ضحكت "ندى": قلبتيها اكشن بووووم ..
والفيلم شغال كان فيه مشهد رومانسى بين البطل والبطله :
ندى اتنهدت : هييييييييح اوعدنا يارب بدل الفرجه الل بتفرول نفسيتنا بحاجه تلمها
ضحكت "حبيبه" : يخرب عقلك ..
_ ال يعنى انتى مش نفسك فى حاجه من الل بنتفرج عليها دى عينى ف عينك كدهو
ضحكت "حبيبه": اهو ..
_ لا بجد يا بوب منفسكيش تحبى فى قصه حب وتفركشى وتنجرحى وكده
ضحكت"حبيبه": مفكرتش بصراحه ..
_ دا انتى لو تشوفى البنات ف المعهد بيحبوا ع نفسهم ولا ع الفيس انت حياتى انت فيشتى انت معرفش ايه وفى الحقيقه هى سينجل او مرتبطه وبيديها بالجزمه ..
_ وانتى مالك سيبى الخلق للخالق ..
_ ماهو انا سيباهم لغايه ما ارتبط هفكنى منهم خالص علشان انا وهو ننكد ع بعض براحتنا وانتى هتعملى ايه يا بوب ..
سكتت "حبيبه": هعمل ايه ف ايه ..؟
_ لما تحبى وتتحبى وتتشحتفى كده
_ معتقدش انه هيحصل ؟
_ وليه يعنى هو انتى مش أنثى وليكى حق زى بنات حواء
ابتسمت "حبيبه" واتنهدت : ودا هيحصل ازاى وانا فى البيت هنا مبشوفش بنادمين هيجيلى طاير ولا هيطلعلى فى كيس الشيبسى
_ ما وليد اهو من غير ما تدورى
ضحكت"حبيبه": وليد ...
_ اها .. واضح جدااا من زمان انه بيحبك حتى "حسام" ملاحظ .. دا بيخليكى تعملى كل حاجه عاوزاها وبيجبلك حاجات كتيره واقربهم "كوكا" الل بقت اقرب حد ليكى وفى المستشفى معامله خاصه .. وخضته واهتمامه اقولك ايه ولا ايه ولا ايه ...
_ متقوليش حاجه خالص ...وليد صديق قبل ما يكون الدكتور بتاعى وانا مرضاش له ب واحده فى حالتى لا هتنفع تكون زوجه ولا حبيبه ..فترتى فى الدنيا قصيره يا "ندى " وانا عارفه كده
_ متقوليش كده انتى كويسه اهو وبتتحسنى ..
_ انا بحارب وبقاوم ع قد ما بقدر لكن انا واثقه ان فى يوم مش هقدر وهقع ف اربط نفسى مع شخص اسببله ذكرى كلها وجع وفراق ليه وانا عارفه انى مش هعيش كتير .. "وليد" ربنا هيرزقه بواحده تعيش معاه .. وانا عايشه علشان ربنا وهبلى حياه اعيشها وبعمل حاجات كتيره فيها انما حب وارتباط لا ملوش مكان فى حياتى ولا وقتى ..
_ هتندمى والله ..
_ هندم لو علقت انسان ملوش ذنب وسبته بوجع ..بابا لغايه دلواقتى منسيش ماما وبليل لما بدخل اوضته بشوفه ماسك جواباتها وصورتها ودموعه نازله .. انا مش هقدر اوجع قلب حد كده مقدرش ..
_ ياريت كل الرجاله يحبوا زى خالو كده ..
_ ياريت .. يلا كملى الفيلم وبطلى رغى ..
_ اوكيه ...
فى يوم نزلت "حبيبه" فى يوم محل باباها وهى قاعده لمحت "صفاء" معديه من امامها ندهت عليها :
_ صفاء .. صفاء
بصتلها"صفاء": حبيبه .. ازيك ..
بتهزر "حبيبه": مالك ماشيه موطيه راسك وبتخبى نفسك من الناس انتى متراقبه
سكتت "صفاء" وملامحها حزينه وفى دموع فى عنيها مسكت ايديها "حبيبه" : مالك
تنهدت"صفاء": انا بعد طلاقى الانفاس بقت محسوبه عليا يا "حبيبه" محبوسه فى البيت مينفعش انزل ..مينفعش اخرج.. مينفعش اسافر ..
_ ودا من ايه ..؟
_ علشان كلام الناس انتى ناسيه بعد طلاقى الكلام الل اتقال انا مكملتش سنه واطلقت وروحت قعدت عند خالتى ولولا ان بابا تعبان مكنتش جيت هنا ..
_ ماهو كنتى هتعملى ايه يعنى هتستحملى وتكملى مع حيوان زى دا الطلاق يابنتى احسن كتير
_ احسن .. انا اهلى بيعاملونى دلواقتى اصعب من الاول لانى صممت ع الطلاق
_ لدرجه دى ..
_ واصعب يا حبيبه انتى ف نعمه
الوقت دا رن موبيل ام صفاء وردت :ايوه يا ماما
بزعيق: انتى فين يا صفاء كل دا بتشترى خضار
_ مع حبيبه فى المحل
_ قاعده فى محل فى الشارع قدام الل رايح والل جى يابنت عوض ارجعى البيت اصلها ناقصه يقولوا اطلقت وقعدت ف الشارع كمان
قلت الموبيل وصوتها كان واضح سمعته حبيبه وبملامح توتر وخوف مشيت "صفاء" وطلعت ع عمارتهم و"حبيبه" فى حاله استغراب وبتحاول تستوعب الل حصل ... !
شويا وباباها نزل وطلعت هى ترتاح وطلع ع العشا قاعدين :
_ مالك يا حبيبه ؟
_ بابا .. هو الطلاق حاجه كويسه ولا وحشه
_ ابغض الحلال عند الله الطلاق ..لكن لو صعب الحياه والمعاشره يبقى الطلاق الحل
_ طيب ليه الناس بتعامل المطلقه زى الفيروس كده وانها غلطت لما اطلقت لانها ببساطه مستحملتش تكمل مع انسان صعب الحياه معاه .. ليه ..؟
_ مش كلهم اكيد يعنى هى ظروف بس
بنبره عصبيه : علشان كلام الناس تتحبس صفاء فى البيت وعلشان انت خايف عليا من الناس محبوسه انا فى البيت .. مين الناس دى الل بنفكر فيهم قبل مانفكر فى نفسنا ...
استغرب"فؤاد": مالك يا حبيبه ..؟
_ اسفه يا بابا اصل مضايقه علشان صفاء .. انا داخله انام تصبح ع خير
وهى قاعده ع السرير ومضايقه مسكت اللاب وشغلت دراما كورى تشغل تفكيرها ونامت وهى بتتفرج .. دخل "فؤاد" غرفتها يطمن عليها وشافها نايمه واللاب شغال قفله بشويش وغطاها وبسها ع راسها وخرج ... !
بعدها بيومين "حبيبه" كانت فى موعد ليها فى المستشفى تعمل اشاعات وتحاليل طلبها "وليد" وهتقعد يومين وصحيت من بدرى ونزل والدها يفتح المحل لاقت اتصال فيديو من "حسام ":
_ حسااااام
_ حبيبببه|
_ عاوزه اخدك حضن مطارات وحشتنى
_ انتى كمان والله معلش الاسبوع دا مكنتش عارف اكلمك لان كان عندى شغل كتير وقولت اشوفك قبل ما تروحى ل "وليد" بس ايه القمر دا انتى احلويتى كده ليه
_طول عمرى حلوه .. عامل ايه ؟
_مش لقى حد انقار فيه اغلبهم اجانب هنا
_ تلاقيك بتشجع السياحه صح
_ لا ابدا السياحه فى دبى متشجعه لوحدها يا حبيبه مش محتاجه مجهود محتاجه تنفيذ
ضحكت "حبيبه": السفاله دى وراثه انت واختك
_ مش كان فى حفله ل الكى بوب هنا حضرتها مع اصحابى هبعتلكم فيديو وصور ليها بجد اتمنيت تكونوا معايا
_ نكون معاك فى دبى وخالك مانعنى اخرج ع اول الشارع
_ انزل اجازه وانا هظبتك متقلقيش هاخدك معايا ف الشنطه
_ بتتريق ماشى انا هطفش قريب منكم
_ انتى محدش قالك ان اخر العمليه حطولك جهاز انذار لو بعدتى 3 متر تزمرى لوحدك
ضحكت"حبيبه": انت تقولى ازمر ووليد يقولى انور وانا هفرقع
_ هانت يا "حبيبه" .. واطمنى خير من نتيجه الاشاعه والتحاليل
اتنهدت": هانت فعلا ...
وصلت المستشفى وعملت الاشاعات والتحاليل وقعدت ف غرفتها دخلت عليها "ندى " وكانت سعيده :
_خير ان شاء الله ايه الل مخليكى منشكحه كده
ب "ابتسامه"": "بعد ما كنا عندك من شهر وبعدها لقينا "نهى" اختفت ومبتردش ع اتصالتنا وفاجاءه لقيناها رجعت باللوك الجديد و جت قالتلى انها عاوزه تشارك معانا فى مشروع المستشفى الل انا واصحابى بنعمله معاكى بنجمع تبرعات ونشترى لعب ل الاطفال وحاجات لكبار السن كده يعنى
_ لا بجد ..
_ اها وقالتلى انها قدمت ع كورس انجليزى فى الاجازه وشافت فيديوهات تريكوه قالت هتتفرج وتتعلم
_ دا حاجه جميله
_ والاجمل بقى انا خطف بصيت ع اللاب بتاعهها ملقتش الفولدراياه قولت خفته لكن لقيته مش موجود .. ومبقتش تقف مع البنت الل حكتلك عنها وبقت معانا ع طول وانتظمت فى الصلاه وقالتلى اسالك ع كتب تقراها بماانى مبقراش انتى عارفه بحب اتفرج بس
ضحكت"حبيبه": دا حاجه جميله اوى والله فرحتينى
_ انتى الل جميله ..انا بقى عملت نفسى ولا كنت اعرف حاجه وسرها امانه ومحدش هيعرفه ابدا لانى بجد مبسوطه بتغييرها دا وحاليا بحاول اجرجرها لكورى
_ جرجريها ياحبيبتى
فى المستشفى فى مكتب "وليد" الباب خبط ودخل وكان والده الدكتور "عاطف" وع وجهه ملامح غضب :
_دكتور فؤاد تشرب ايه
_ من غير ما اشرب ممكن تعرفنى انت رفضت السفر ل انجلترا ليه ؟
_ مش عاوز اسافر ..
بعصبيه: دى فرصه اى حد بيتمناها ومش اى حد بيروح هناك انت ازاى ب استهتار منك من غير ما تبلغنى ولا تاخد رأى ترد عليهم بالرفض ..
_ لان ببساطه دى حياتى وقراراتى وانا مش عاوز اسيب مصر
_ مش عاوز تسيب مصر ولا تسيب "حبيبه"
سكت "وليد".. كمل والده : يا "وليد" مينفعش تربط حياتك ومستقبلك ب اى حد مهما كان ..و"حبيبه" انت عارف اكتر منى حالتها وانت لو من باب الشفقه عليها انت بتحاول وبتدور ليها ع متبرع وواثقين انه صعب ..و
قاطعه فى الكلام : انا مش ساكت وهلاقى متبرع وهتخف وهتبقى احسن .. وانا مش هسيبها
_ دا اخر قرارك ..
_ ايوه اخر قرارى ..
_ ماشى يا "وليد" انا هسيبك تعمل الل انت عاوزه لكن مش هسمحلك تخلف وعدك معايا ..
خرج والده فى حاله غضب وقعد وليد ع الكرسى فى حاله ضيقه من كلام والده ... !
كان يوم رجوع "حبيبه" للبيت وتعرف نتيجه المتابعه وهى فى غرفتها دخل "وليد" وحاول يكون مبتسم .. كان معاه الاشاعات والتحاليل ..:
وجهه "فؤاد" الكلام : خير يا دكتور
ابتسم "وليد": خير كله تمام مفيش قلق
ب ابتسامه "فؤاد" بص ل "حبيبه"" الحمد الله
لكن حبيبه حست ان فى حاجه ابتسمت وسكتت :يعنى افهم من كده انا خفيت خلاص
وليد بنبره قلق وملامح متوتره : الحمد الله احسن من الاول
ضحكت "حبيبه " : مينفعش يا دكتور تخبى الحقيقه عن مريضتك
تفاجئ "فؤاد": مش فاهم فى ايه ..؟
وليد حاول يجمع نفسه : انتى وضعك دلواقتى مستقر يا حبيبه مفيش قلق
ابتسمت "حبيبه": بس ممكن يتغيير بعدين
_ انتى محتاجه تخلى بالك ع نفسك اكتر
ابتسمت "حبيبه" : وليد انا مش صغيره وفاهمه وعارفه وضعى وحالتى قولى قدامى قد ايه ..
_ حبيبه ..
الكلمه صدمت كلا من "فؤاد" و "وليد" والاكتر صدمهم ثبات "حبيبه" :
_ انتوا متفاجئين ليه يا جماعه دى حاجه متوقعه من زمااان اوى واطول من كده تبقى بايخه بصراحه وطمع ..انا عارفه حالتى كويس مش جاهله وعارفه ان العلاج مبيعملش غير بيثبت وضعى الصحى لكن مبيخففنيش واحتماليه انهيار حالتى ممكن فى اى وقت ..
دموع "فؤاد" نزلت مسكت ايده "حبيبه": بابا انا مش عاوزاك تزعل دى حقيقه ومينفعش نهرب منها مهما حصل
_ حبيبه ...
اتنهدت "حبييبه" وب ابتسامه: انا الحمد الله راضيه بكل الل عشته والل عملته والل شوفته منكم انا جوايا سعاده وفرحه بسببكم تملى الدنيا ..لكن الموت كان هيحصل فى كل الاحوال ..انا مش هستسلم غير لما ربنا يأذن متخافش عليا لانى حاسه انى اقدر اكمل حتى لو فاضلى يوم ..
_ انا ممكن اعمل عمليه التبرع ليكى وتعيشى
مسحت ب ايديها دموع والدها : واعيش انا ازاى بعدك انت متوقع منى انى هقدر اعيش فى الدنيا وانت مش فيها ..هو انا ليا مين غيرك يا بابا ..انت دنيتى وحياتى واكبر سبب يخلينى احارب ومستسلمش كل الفتره دى وهكمل ل اخر نفس ..
_ حبيبه ..
قاطعته واترمت فى حضنه : انت متقولش حاجه انت عملتلى كتير انا وماما خلينى بس اطمن عليك واشبع منك حبه الوقت دول ..
حضنها "فؤاد" ودموعه نازله وحضنته "حبيبه" وهى مبتسمه لكن خانتها دموعها : عاوز تحرمنى من الحضن دا .. ازاى بس وهو الحضن دا الل مطمنى فى الدنيا
وقف "وليد" مكنش عارف يقول ايه سابهم وخرج .. شويا ومسحت دموعها "حبيبه" ومسكت ايد والدها وب ابتسامه خرجت من غرفتها ل مكتب "وليد ومبتسمه : يلا يا دكتور اكتبلى العلاج عاوزه اروح البيت
_ كان مجهز "الروشته":"حبيبه" انا مش عاوزك تقلقى نا هلاقى حل قبل السنه ما تخلص
_ وحتى لو ملقتش صدقنى ما هعاتب ولا هزعل انا راضيه بنصيبى وبحمد ربنا لل وصلتله انا مكنتش اتوقع اعيش كل دا اصلا انا ميته من زمان يا وليد .. نعمه ربنا عليا وهبلى حياه على حياتى والحمد الله راضيه عنها ومش طماعه انا .. ومتقلقش هستمر فى العلاج والمتابعه ومش هستسلم ولا هضعف ..
معرفش يرد "وليد" وخرجت "حبيبه" ورجعت ع البيت وطلبت من باباها ميقولش لحد وسابته يدخل غرفته وهى دخلت غرفتها .. قعدت ع حرف السرير مغمضه عنيها لمده نص ساعه تستوعب فى مكانها لغايه ما قربت منها "كوكا" وقعدت ع رجلها فتحت عينها "حبيبه":
_ كوكا ... خوفتك معلش النور مطفى هغير هدومى ونقعد مع بعض ..
غيرت هدومها وقعدت ع السرير وقعدت "كوكا" جنبها وابتدت تحسس على راسها براحه :
_ كوكا .. يؤسفنى الل هقولهولك بس علشان تعرفى قريب مكان اقامتك هيتغير هيكون فوق عند "ندى" لانى مش هكون موجوده ومش هكدب عليكى اقولك شويا وراجعه لان المرادى ذهاب بلا عوده .. انا سمعت من "دكتور" احمد دكتور الاشاعه وهو بيتكلم مع "وليد" وبيقوله صاحبه النتيجه دى اقصاها سنه تعيشها وضرورى متبرع .. انا خفت للحظه لكن رجعت قولت ماهو دا الطبيعى وفكره الموت مش مرعبه زى ما الناس فاكرينها ويقولولى بعد الشر .. ليه مبصوش انها راحه لمشوار طووويل عشته .. انا الحمد الله راضيه ع حياتى الل عشتها وفرحانه جداا بكل حاجه عملتها وسعيده بعيلتى الل هى مش من دمى لكن اقربلى من روحى ..ربنا رزقنى ب "أب"احن "أب" فى الدنيا حنيته كانت بتدفينى فى كل لحظه احس برعشه حرمانى من "أمى" حضنه امان الدنيا وراحه ..بجد بشكر ربنا على النعمه دى .. عاوزاكى لما تنزلى هنا متكركبيش الدنيا ولو شوفتيه زعلان خليكى جنبه .. انا مش خايفه ومش هضعف ولا هستسلم هكمل الل بعمله ولما يجى الموت هيجى يلاقينى واقفه مستنياه مش نايمه ع السرير ودا وعد اوعدهولك انا هنفذه ...
مسكت "النوتس" بتاعتها وقرتها كلها مسكت النوتس وقالت : بما ان الل باقى قليل والل انا بحلم به كتير فنكتبه هنا ونعيش الحلم
وابتدت تكتب كل حاجه بتحلم بيها ومن وجهه نظرها قالت مستحيل تحصل لكن مجرد انها بتكتبها كانت سعيده وفعلا هربت من حاله الزعل والخوف الل كانت هتحاوطها بتفائل وكانت طريقه ناجحه جدااا ,,وقامت تخرج تتوضى علشان الفجر كان غرفه والدها الباب مفتوح قربت تصحيه شافته من بعيد صاحى وقاعد ماسك صوره "رجاء" وبصوت باكى سمعته "حبيبه":
_ انا اسف يا "رجاء" ..اسف ..
يوم عيد ميلاد "حبيبه" كالعاده "فؤاد" اشترالها تورته وقبل ما تطفى الشمع غمضت عينيها واتمنت امنيه" يارب ضوء امل بسيط اشوفه يساعدنى ويقوينى اكمل " وطفت الشمع
دخلت غرفتها وبصت ع موابيلها وكانت "نور" صاحبتها بتكلمها وردت :
_ نور ..وحشانى
_ كل سنه وانتى طيبه يا بيبه
_ وانتى طيبه ياقمر
_ انا عارفه انى مقصره معاكى بس حمزه مجنن امى وابوه طراوه
_ مفيش بينا كده كل واحد فيه الل مكفيه المهم انتى بخير
_ الحمد الله .. صحيح يا "حبيبه" سمعتى عن منحه الل عملاها الوزاره
_ منحه ايه ..
_ منحه تعاون بين جامعتنا وجامعه ف الصين مدتها 6 شهور متقدمى وانا واثقه انك هتنجحى
_ موجوده فين دى
_ على موقع الوزاره مدتها 6 شهور سكن وتعليم وفلوس نقديه عليكى تجهزى جواز سفرك وتنجحى فى الاختبار بتاعها وتطيرى ..
سكتت "حبيببه": فكرى كده وجربى بس لازم تقدمى فاضل اسبوعين ع التقديم يلا ربنا يوفقك
فقلت "حبيبه" مع "نور" والفكره شغلت تفكيرها مسكت اللاب وفتحت موقع الوزاره ودخلت تقرا عن المنحه وهى منحه متبادله هيقبلوا 5 طلاب ينجحوا ف الاختبار ويسافروا ..
الفكره شدتها وحست ان امنيها اتحققت وطول الليل بتفكر وحست انها مش ناقصها حاجه وواثقه انها هتتقبل وتنجح لكن العقبه كانت ياترى هيوافقوا على السفر ولا لا .. مسكت النوتس وكتبت فى قايمه الاحلام ( اسافر الصين ) وحطت خط تحتها
وقفلت النوتس وهى عندها اصرار انها تسافر وتقنعهم .. حست انها ضوء امل فى ضلمه ليها يقويها ويشجعها وقررت متستسلمش :
حاولت تانى يوم تتكلم مع باباها لكن كان خايفه من رد فعله وهى واثقه انه بالرفض :
_ بابا ..
_ ايوه
_ انا عاوزه اتكلم معاك فى موضوع
_ خير يا حبيببتى ..عاوزه حاجه ؟
_ عاوزه طلب ومترفضهوش
_ أومرى طبعا ..
_ فى منحه عاملها الوزاره للصين عاوزه اقدم فيها
ضحك "فؤاد": بتهزرى صح
_ لا انا بتكلم بجد (فتحت اللاب وشاف خبر المنحه والاستماره الاونلاين "حبيبه" ملياها فاضل انها تضغط ترسلها )
اتفاجئ "فؤاد" وبص ل حبيبه : وكتبتى الاستماره
_ مبعتهاش لسه انا قولت مش هعمل حاجه غير بأذنك
_ مينفعش يا "حبيبه" وانتى عارفه انه مينفعش تسافرى ..اذا كان بقلق عليكى من مشوار عاوزه تسافرى بره مصر ..لا طبعا .. اسف طلبك مرفوض
_ ليه بس يا بابا دى 6 شهور بس وهيعدوا بسرعه وانا نفسى اسافر وهتبقى تعليم كمان تحت اشراف من الوزاره يعنى مش هبقى لوحدى
_ وهى الوزاره دى تقربلنا ايه ولا انتى هتهميها فى ايه انتى واحده من مليون طالب مسافر وهيسافر ..اسف مش هجازف بيكى انا
_ دى فرصه الكل بيتمناها وربنا بعتهالى .. ارجوك لو سمحت وافق
سكت"فؤاد" لحظات وقام وقف : انا نازل المحل وانا هعتبرك مقولتليش حاجه
ونزل "فؤاد" واحساس الاحباط وخيبه الامل سيطرت ع "حبيبه" .. فى نفس الوقت احساس كان "فؤاد" زعلان لانه رفض طلب وكان حاسس بانها عاوزاه لكن خوفه عليها حسسه انه كان صح برفضه ..مر يومين و"حبيبه" مش عارفه تعمل ايه وتقنع والدها ازاى كلمت "حسام" وطلبت منه يقنع "فؤاد" ورفض وكان قدامها " وليد ,,كانت فى المستشفى فى موعد متابعتها وقاعده فى عياده "وليد" بتحاول تفتح كلام مش عارفه ازاى ولاحظ "وليد "
_ مالك يا "حبيبه"
_ ها مفيش ..انت عامل ايه
ابتسم "وليد": انا كويس وانتى
_ انا الحمد الله كويسه جداا والعلاج باخده فى وقته ولا بحس بتعب ولا ب ارهاق وحياه زى الفل
ضحك "وليد": اول مره متشتكيش من علاج
_ لا الل فات دا دلع انا بكلمك بجد انا كويسه جدا جدا انت مش ملاحظ كده ولا ايه
_ اها باين جداا .. وباين ان دا بسبب حاجه .. حلمتى تانى ولا ايه ؟
ضحكت "حبيبه": لا خلاص بقى انا بتفرج ع الحلم ع النت
ضحك"وليد": طيب ايه ..
_ انتى مش عاوزه تقولى حاجه
_ انا ..
_ اعتقد مفيش غيرنا
_بصراحه ايوه وعاوزه خدمه منك ..
_ اقنع باباكى انك تقدمى ف المنحه وتسافرى 6 شهور
_ انت عرفت حسام قالك
_ لا باباكى كلمنى وقالى وطلب منى اقنعك تلغى الفكره
_ انا مش عارفه هو معترض ع ايه دى منحه من الوزاره اى حد بيتمناها
_ 6 شهور فى الصين وهتكونى لوحدك
_هو انا اول واحده تسافر بره مصر لوحدها فى كتير بيسافر شغل او تعليم مسافرين لهدف ومحدد المده
_ باباكى خايف عليكى انتى عارفه انه ملوش غيرك
_ وانا معنديش غيره ومش عاوزاه يزعل منى بس بجد دى فرصه ربنا بعتهالى وتعتبر اخر فرصه هتجيبلى وانا مش عاوزه اضيعها يا وليد
سكت "وليد " و كملت "حبيبه : ولو هو خايف عليا اموت ماانا فى كل الحالات هموت سواء هنا او هناك
_ هتبقى لوحكد يا حبيبه
_ معايا ربنا يا وليد انا طول عمرى معايا ربنا ومها بعدت انتم معايا ودول 6 شهور هيعدوا بسرعه ..هو انا عمرى الباقى فيه كام 6 شهور
_اممم صعب تكونى لوحدك انتى هنا معانا ولو حصل حاجه ..
_ وليد ..انا عاوزه اعيش .. انا زى ما بتقول قدامى سنه عاوزه اعيشها ل اخر يوم مش عاوزه اقعد مستنيه الموت لانه جى جى ..
_ احنا خايفين عليكى يا "حبيبه"
_ مش مستاهل الموضوع .. انا قدامى فرصه لحاجه هكون مبسوطه وانا بعملها مش انت دايما بتشجعنى انا عاوزه اسافر المنحه دى
دخل "فؤاد": وانا مش موافق يا "حبيبه"
_ بابا
_ مش موافق تبعدى وتكونى لوحدك معرفش هتكونى كويسه ولا تعبانه مين مهتم بيكى
_ متقلقش يا بابا انا هكون كويسه وانا مش صغيره علشان تقلق عليا ...
_ مش هينفع يا حبيبه
بدموع نازله من عينيها : ارجوك يا بابا دى فرصه ربنا يبعتهالى وانا مش عاوزه استسلم .. انا عاوزه اعيش السنه الل فضاللى بعد اذنكم عاوزه اعيشها مش هقعد استنى الموت انا مش عاوزه كده
دموع "حبيبه" اثرت فى وليد وفؤاد": انا خايف عليكى يا بنتى
_ متقلقش يا بابا انا مش هغيب عنك ويوميا هكون معاك ادينى فرصه احقق حلم كنت فاكراه مستحيل
استجمع نفسه "وليد ": متقلقش يا استاذ "فؤاد" انا مش هسفر "حبيبه" غير لما اطمن عليها كويس جداا وهظبط معاها كل حاجه
_ بابا
بص ل "حبيبه" ودموعها وهز فؤاد راسه وحضنته "حبيبه": ربنا يخليك يااحن اب فى الدنيا
__________________________
يتبع
ليست هناك تعليقات:
إرسال تعليق