بعد موافقه "فؤاد" على ان "حبيبه" تقدم فى المنحه اتغيرت نفسيه "حبيبه" واتحولت شخصيتها لحماس ونشاط وبرغم قلقه عليها لكن كل ما يشوفها سعيده ومبتسمه كان بيطمن ,, قدمت "حبيبه" الاستماره اونلاين واتحدد موعد الاختبار و "وليد" عرض عليها انه هيوصلها ويرجعها .. فى يوم الاختبار كانت "حبيبه" جاهزه واقفه قدام المرايه بتهدى من توترها وبتاخد نفس شهيق وزفير .. لمست رجلها "كوكا " راحت شالتها وقعدت :
_ ادعيلى يا كوكا .. انا واثقه جداا انى هنجح فى الاختبار لكن انى اكون من 5 مش متاكده لكن انا واثقه فى ربنا والفرصه الل بعتهالى .. انا هكمل وان شاء الله هنجح وهسافر وهيبقى اول باب يتفتحلى ع الدنيا والعالم حتى لو 6 شهور انا موافقه .. يلا اسيبك انا وهرجع احكيلك الل عملته باى ..
نزلتها ع الارض وكان "وليد" مستنيها مع باباها فى المحل نزلت وكلها حماس ونشاط .. فتح لها باب العربيه وركبت وبصت ل باباها وهى مبتسمه بعتتله بوسه وهو كان سعيد لانه شايفها سعيده .. فى الطريق .. كانت حبيبه قلقانه وحاول "وليد" يخرجها من قلقها وقعد يتكلم معاها ..
وصلوا لمكان الاختبار وكانت "حبيبه" متوتره وكانت بتحاول تتماسك كانت بتغمض عينيها للحظات وتردد لنفسها " هتقدرى يا حبيبه هتقدرى متخافيش متخافيش " كانت بتشجع نفسها بنفسها .. دخلت الاختبار وبصت ع الاسئله وابتدت تجاوب ,, خلصت وخرجت طمنت باباها ف الموبيل واستاذن "وليد" باباها واخدها وخرجو كان مجهزلها مفاجاءه وطلعوا المقطم ودخلوا مطعم وطلبوا الاكل :
_ ايه رايك فى المكان ..
با ابتسامه: جميل اوووى هو ينفع اروح هناك ( شاروت ع تله عاليه )
_ اها يلا ..
قاموا واتجهوا لتله العاليه ووقفت "حبيبه" قرب الحافه : رايحه فين يا مجنونه
_ متخفش مش هقع ..المكان هنا تحفه ..
بص ليها "وليد" وهو واقف جنبها ومتكلمش وكان بيبصلها بس
_ نفسى اجى المكان دا وقت الشروق انا متاكده انه هيبقى جميل جداا
وهما واقفين بنت بتبيع ورد قربت منهم : ربنا يخليهالك يا استاذ ..يارب تفضلوا مع بعض
ضحكت "حبيبه" وو"وليد": شكرا ..
_يبقى انت مبتحبهاش اشتريلها ورده
ضحك"وليد": لا بحبها بس هى الل مبتحبش الورد
_ اشتريهالها بس وهى هتحبها مدام هتحبك هتحبها ..
ضحكت " حبيبه " وطلعت فلوس من جيبها : اتفضلى دول والورد كمان
مشيت البنت وفرحانه بالفلوس والويتر نده عليهم علشان الاكل ورجعوا قعدوا ع الترابيزه :
_ ايه الاكل الجميل دا هو انا فى مستشفى يا وليد سوتيه يا وليد سوتيه فينك يا حووس
ضحك" وليد": اكل صحى ولا انتى عاوزه تتعبى واعرفى ان اكلك لازم يكون بحدود
_ امرى لله ..
وهما بياكلوا : حبيبه ..هو لو اديتك الورده كنتى هتاخديها ؟
من غير تفكير : لا ..
حس ب احراج وضحك : البنت قالت لو بتحبك هتاخدها ..
ضحكت "حبيبه": الاتنين ملهمش علاقه ببعض .. انت عارف انا مبحبش الورد لان الورد اسرع حاجه ف الدنيا بتموت برغم جمالها يعنى ممكن تقول كل ما اشوف الورد افتكر انى هموت قريب علشان كده بتجنبه وبتجنب اى حاجه ممكن تسببلى اكتئاب او تدينى طاقه سلبيه وتحبطنى وتفكرنى بحالتى الل انا مش نسياها .. لكن انا بحبك وفكره ان شخص بحبه يهادينى بحاجه مبحبهاش لا وحاجه معناها مش لطيف خالص دا هيخلينى اقفل منه وليه عاوزنى اقفل منك ها ..الهدايا تكون مفرحه وتشحنك طاقه ايجابيه وتبهجك غير كده يبقى بلاش هدايا اصلا ...
ضحك "وليد": مبتحبيش الورد لكن بتحبينى صح ..
بتلقائيه: اكيد طبعا انت لسه هتسئل بعد العمر دا انت ليك مكانه مميزه فى حياتى يا دكتور
برغم اجابه "حبيبه" التلقائيه الغير واضحه لكن "وليد" مطلبش توضيح اكتر وكان سعيد بان مكانته عند "حبيبه" مميزه .. كملوا اكل ورجعت ع البيت قعدت مع "كوكا" وحكتلها الل حصل ومسكت النوتس ووعلمت قدام كلمه اختبار المنحه وقفلت النوتس وفتحت اللاب ع توتير والانستا بتشوف اخبار "جى وو" الجديده كالعاده .. خلصت وقامت اخدت دش واخدت علاجها ونامت ع السرير ولسه هتغمض عينيها باب الشقه خبط قامت فتحت كانت "ندى " مسبتهاش تنام وحكتلها الل حصل كله ..!
بعد مرور يومين "حسام" كان بيكلم "حبيبه" يطمن عليها :
_ النتيجه امتى يا اينشتاين العيله ..
_ الاسبوع الجى يا اديسون االعيله ..
ضحك "حسام": بالفشل ان شاء الله
_ كده تدعى عليا يا حووس ماشى مش هدعى عليك
_ ماهو انا مش عاوزك تسافرى لوحدك قلبى هيتشحتف عليكى والحب الل بينا هيبرد
_ هيبرد ... هو شاى ولا نسكافيه ..
ضحك "حسام": ربنا يكرمك وتنطلقى ع خير
_ يارب يا مسهل الحال
_ انت اخبار شغلك ايه ..؟
_ والله الدنيا خربانه ومش مرتاح ..
_ واخبار الموزه الكوريه .. الصديقه
ضحك" حسام": والله هى الل مصبرانى ع الغلب دا وبصراحه بنت حلال اوى وعاقله ومتفاهمه ومؤدبه و ..
_ وعروسه لقطه ..
_ يابنت الايه اخدتيها ع طرف قلبى ههههههههه
_ من كلامك الكتير الفتره الل فاتت عليها حسيت ان بينكم حاجه ..
_ واللهى كانت زماله اول ما جيت الوحيده الل ارتحت معاها فيها حاجه كده حلوه و بعدين متفهميش ايه الل حصل تصدقى الكورى الل درسته طلع له فايده
ضحكت "حبيبه": علشان انا دعتلك .. وناوى ع امتى بقى ..
_ قريب هى اتكلمت مع اهلها وانا كلمت كريمه وسعيد حجزت قريب ننزل مصر اجازه يومين تشوفكم وكده وبعدها نرجع واسافر ل اهلها اتقدملها ونتجوز لانى مش مخطط ع تقضيه وقت وهى مش من النوع دا .....
_ مقولكش ع "ندى" لما عرفت وطريقه اقناعها الرهيبه ل كريمه توافق بعد ما كانت معترضه
ضحك"حسام" ماانا عرفت بس لما اتكلمت فيديو مع "مى سون " وكلمتين العربى الل حفظتهم ليها دخلوا ع "كريمه.. وارتاحت اكتر لما عرفت انها مسلمه معان كنت طمعان فى الثواب بنت الايه اخدتو لوحدها وانا هاخدها بثوابها ..
ضحكت "حبيبه": يلا ربنا يتمملك ع خير ..
_ عقبالك ان شاء الله ...
سكتت "حبيبه" ومعرفتش تقول ايه ل "حسام" لان كان خبر السنه الل باقيه كان بين وليد وهى ووالدها بس ومحبتش تعرف حد : ان شاء الله يلا سلام ..
عرفت "حبيبه" نتيجتها وانها نجحت وقدامها 20 يوم تجهز جواز سفرها والاوراق وتجهز لسفر وكانت فى منتهى السعاده بالخبر وكل الل حواليها رغم قلقهم لكن كانوا فرحانين ليها .. فى خلال الفتره دى نزل "حسام" ومعاه "مى سون" واتعرفت ع اهله وهى كانت انسانه حبوبه واتصاحبت ع "حبيبه" ولما عرفت انها هتسافر الصين منحه نصحتها ب امكان تروحها سياحه وسافر "حسام" تانى بعد يومين .. وابتدت "حبيبه" تجهز فى اورقها وساعدها "وليد"... !
فى يوم "سعيد" جوز "كريمه" وهو راجع من الشغل عربيه خبطته فقعد فى البيت متجبس رجله فكانت زيارات من اهله ليطمنوا عليه وكانت "كريمه" مش فاضيه تنزل وتسيبه لوحده فكانت "حبيبه" و "ندى" بيشتروا الطلبات ويروحوا السوق .. فى يوم نزلوا "حبيبه" هى و "ندى " يشتروا الخضار ورجعوا البيت كانت "كريمه" قاعده مع واحده قريبتهم جتلهم زياره ..شافتها "ندى" ملامح" وشها اتغيرت ودخلت ع المطبخ ع طول لكن "حبيبه" راحت تسلم عليها :
_ السلام عليكم
_ حبيبه.. ازيك يا حبيببتى
_ الحمد الله ياطنط .. حضرتك عامله ايه وفين داليا ..؟
_ داليا مع خطيبها
_ ماشاء الله خطبت امتى
_ الشهر الل فات
_مبرووك
_ تسلمى يا حبيببتى كنت عاوزه اقولك عقبالك لكن المهم انك تخفى الاول ربنا يكمل شفاكى ع خير
_ ميرسى يا طنط .. عمتو انا داخله المطبخ
_ ماشى يا حبيببتى واعمليلنا كوبيتين شاى
_ حاضر
قامت "حبيبه" دخلت المطبخ لكن كانت نسيت محفظتها ف رجعت تاخدها سمعت كلام عمتها مع قريبتها :
_هى "حبيبه" لسه تعبانه
_ الحمد الله كويسه انتى شايفه ايه ..؟
بنبره صعبانيه : ياحرام سنها صغير على الل عايشاه دا واخوكى تعب اوى معاها ومع امها,, حبه ل "رجاء" بهدله انا كل مره اشوفه احس انه عجز قبل اوانه معرفش عمل ف نفسه كده ليه
_ النصيب بقى
بنبره استفزاز : معرفش انا "فؤاد" ليه اتحمل مسؤليه تربيه بنت مش بنته ..بصراحه العيله كلها بيقولوا ان " رجاء" وبنتها كانوا وشهم نحس ع "فؤاد" اول ما اتجوزها والدنيا اتشقلبت معاه وباع ميراثه وبعد ماكان محاسب كبير بقى بياع لبن بسببهم ...
حاولت تتمالك نفسها "كريمه" وتسكتها : ماقلتلك نصيب بقى يا سعاد خلاص بقى ..
_ مش ناسيه انا انه يرفضنى علشان "رجاء" وبنتها الل زى الشجره الل ملهاش ورق ومحكوم عليها بالموت فى اى ثانيه
اتعصبت "كريمه": سعاد انتى جايه تشوفى ابن عمك ولا تقلبى فى الل فات هتقلبى فى الل فات يادوب تلحقى ترجعى بيتك انتى قدامك سفر
اضايقت "سعاد": بتطردينى يا كريمه..
بنبره عصبيه": رجاء مرات اخويا فؤاد و "حبيبه" تبقى بنت اخويا فؤاد والل شايف غير كده ميتعبش نفسك ويوفر المشوار وميجيش ..
خرجت "سعاد" متعصبه وشافت " حبيبه" وخرجت وقفلت الباب وشافتها "كريمه ": حبيبه
_ انا كنت عاوزه المحفظه ..
_ اكيد سمعتى كلام سعاد .. متاخديش ع كلامها دى لتاته وطول عمرها غيران من امك حتى من بعد ما اتوفت متشغليش بالك ..
هزت راسها "حبيبه" ولاحظت ان اغلب الناس بيبصلها بنظره شفقه وبنظره غيره وحقد زى سعاد واتاكدت ان فرصه السفر احسن قرار اخدته تهرب من النظرات والكلام ...!
فى احدى الزيارات الكتيره من عيله "سعيد" جوز "كريمه" كان اخواته عزمهم ع الغدا وكانت "حبيبه" مع "كريمه" بتساعدها مع "ندى" بعد الغدا والكل قاعده واحده من بنات الموجوده شافت "حبيبه" ماسكه موبيل و"ندى" عماله تشاورلها عليه فضولها خلاها تروح تبص وكانت صور ممثليين كوريين :
_ يااااادى الكورى الل هتتجننوا بسببه ..
بصتلها "ندى": نعم يا هدير "خير يا حبيببتى
_ يعنى مندمجين اوى بناس كده غريبه عننا كلهم شبه بعض متعرفيش الواد من البنت فين ؟
ضحكت"حبيبه" وردت "ندى": انتى متعرفيش تميزيهم علشان مبتتفرجيش عليهم احنا نعرف نميزهم او بمعنى اصح واضحين بالنسبالنا ..
تدخلت فى الكلام واحده تانيه وهى " هبه ": بس دول ماسخين كده مفيهمش روح مش زى الهنود كده فخامه وحاجه جامده شاروخان ولا رانبير ولا شاهيد حاجات كده مبهجه ..
بصتلها "ندى": انتى شايفه الهنود كده انا كمان شايفه الكوريين كده اذواق يا حبايبى اذواق
ردت " هدير ": بس دول يابنتى بياكلوا كلاب حاجه يع كده
ردت "ندى ": احنا بنحبهم بكلابهم انتى ايه مضايقك بالنسبالنا دول حاجه كده فوق الفظيع فوق المريع فوق اى حاجه البهجه والسعاده عندنا هما ياسلااام
ردت "هدير": انتى هبله وبتحبى ناس اهبل منك
اضايقت "ندى " ولسه هترد تدخلت " حبيبه ":
_ انتى بناء على ايه شايفاها هبله يا "هدير "؟
_ ع حبها وهوسها بالكوريين الل ملهمش طعم دول ولا ميزه
_ على كده بقى انتى هبله انتى كمان
_ نعم .. ليه ان شاء الله
_ علشان بتشجعى الاهلى وبتشترى تيشيرتاته وبتنزلى بوستات عنه وبتغيرى صوره البروفيل لصور لاعيبه و " هبه" هبله علشان بتتفرج ع افلام ودرامات هنديه و "دينا" اختك" هبله لانها مهووسه بالتركى والدرامات التركيه وع طول كاتبه يوما ما فى تركيا ...
_ بس ...
قاطعتها "حبيبه": مفيش بس .. زى ماانتى داخله فى اختيار غيرك لحاجه بيحبها ..غيرك له حق يدخل فى حاجه بتحبيها ويقول رايه .. ودى مفيهاش زعل ولا ايه ..
_ بس الكوريين دول ..
قاطعتها "حبيبه": مالهم الكوريين بشر زينا زى الهنود والاتراك ولاعيبه الاهلى .. الفكره انتى حابه تشوفى ايه حابه تتابعى ايه .. الدنيا اتنبت فى 7 ايام والايام مختلفه وايدك صوابعها مش زى بعض مختلفين فالبشر مختلفيين فى اذواقهم واهتمامتهم واتجاهاتهم الل بتحسسهم بسعاده وفرحه .. فلانه بتحب حاجه مش مطلوب منك تحبيه انتى كمان المطلوب منك تحترم اختيارها مدام مبضركيش ... انت حر ما لم تضر .. لكن الاسفاف والهزار الاوفر بتريقه والتقلييل من حاجه صاحبتك او اختك بتحبها دا بيدل ع ان عقلك محصلش عقل عصفوره لانك لو واعيه كويس هتعرفى انها حره مدام مفيش ضرر زى ماانتى حره فى اختياراتك ...
البنات سكتوا وكملت "حبيبه": ع فكره احنا بنتفرج ع كورى وبنتفرج ع هندى وتركى واجنبى عادى يعنى مش لازم كل ما نتفرج ع حاجه نقول هيييه احنا اهو .. دى اهتمامات شخصييه يا تقابلى الل زيك يا تقابلى الل عكسك ووقتها كل واحد حر ...
حبت "هدير" تحرج "حبيبه": طيب ع الاقل الكوره رياضه لكن ايه الاستفاده من الكورى
_ بنشوف بلاد تانيه عايشه ازاى ثقافتهم عامله ازاى معاملاتهم مع بعض طبيعه حياتهم ازاى ,, مش قصص رومانسيه وحب وممثليين حلوين لا ثقافتهم وحياتهم ومواضيع دراماتهم مش كلها رومانسيه فى الطبيه والمدرسيه والعائليه والجريمه والاكشن والقانونيه فيها كل حاجه لكل الاذواق
_ اصلكم مهووسين اوى بيهم ودول ملحديين
_ انتى شوفتينا بنعبدهم مثلا.. احنا بننبهر بحاجات مش موجوده هنا اصلا زى ماانتى بنتبهرى ب حركه كوره معينه .. كل واحد حر بقى ينبهر ازاى من غير اسفاف ولا تريقه .. مبتحبيش حاجه اعملى نفسك مش شايفاها بدل ما بينتهى الحوار بزعل ولا ايه ..
ندى تدخلت : بالظبط كده انتى مااكلتيش باميه لانك مبتحبهاش لكن احنا اكلنا منها حد قالك ايه الهبل دا ولا سيبناكى تاكلى براحتك هى كده كل واحد حر مدام مبيتعداش ع حريه غيره
_ ماشى يا ستى انتم احرار ..
ضحكت "ندى": ما كان من الاول
ضحكوا كلهم ... وكملوا القاعده وشويا ونزلت "حبيبه" قعدت شويا مع كوكا ونامت .. !
قبل ما تسافر طلب "وليد" من "حبيبه" تروح المستشفى يومين علشان يطمن عليها قبل ما تسافر ,, كانت هناك وعملت اشاعات وتحاليل وكانت فى غرفتها وكانت صاحيه الساعه 3 بليل خبط على باب غرفتها ودخل :
_ انا قولت لسه صاحيه اكيد
_ قولت اصلى الفجر وانام
_ طيب قومى البسى
_ نعم .. هو انا هروح البيت دلواقتى
ضحك"وليد":لا فى مفاجاءه ..
قامت لبست وجهزت "حبيبه" واخدها "وليد" وركبوا العربيه واتجهوا للمقطم لنفس المكان الل اخدها فيه وكان المطعم شغال 24 ساعه .. الفجر أذن ودخلوا صلوا فى مسجد وخرجوا .. اخد كرسيين وقعدوا بره ع التله وكانت "حبيبه" مبهوره بالمكان بليل :
_ ايه رايك فى المفاجاءه دى ..؟
_ بجد مش قادره اوصفلك السعاده الل حساها كان نفسى اووى اشوف الشروق من مكان عالى كده
_ انا حبيت قبل ما تسافرى اعملك مفاجاءه علشان لما تسافرى ترجعى بسرعه ووعد لما ترجعى هيتكرر المفاجاءه دى واكتر كمان
ابتسمت"حبيبه": ميرسى يا "وليد" بجد مش عارفه اقول ايه ؟
_ متقوليش مش انتى مبسوطه ؟
_ جداااا ..
_ وهو دا المطلوب ...
ابتدا الشروق قامت وقفت "حبيبه" وغمضت عينيها وقرب وقف جنبها "وليد" وفضل باصص عليها وردد فى سره " هتوحشينى يا "حبيبه" هتوحشينى جداا ,, مش عارف ال 6 شهور هيعدو عليا ازاى من غير ما اشوفك ولا احس بوجودك ,, هفتقدك وهصبر نفسى ع انك راجعه تانى ,, "
فتحت عينها "حبيبه" وبصت ل "وليد" وكان باصصلها ولحظت : حد يسيب المنظر الجميل دا ويبصلى انا
_ كل واحد بيبص ع الل عينه عاوزاه ولا ايه
ضحكت "حبيبه" : انت بتعاكسنى ولا ايه ..
ضحك "وليد" مع تنهيده : هتوحشنى لمضاتك يا "حبيبه"
_ مش هتاخر 6 شهور وغير كده يوميا هبعتلك وهكلمك زى ما وعدت بابا متقلقش مش هحسسكم بغيابى ومش هوحشك ..
_ انتى وحشانى من دلواقتى ..
_ بتقول حاجه ..
_ سافرى بالسلامه .. المهم انا هبعتلك عنوان مستشفى تتابعى معاها لمده 6 شهور كل شهر تروحى تتابعى فاهمه لغايه ما ترجعى ..
_ ملوش لازمه التكاليف دى
_ ملكيش دعوه الل باباكى كان بيدفعوا هنا هيدفعلك هناك ولا يرجع ف كلامه
_ لالالا خلاص اتفقنا ...
_ يلا نفطر بقى ..
_ يلا نفطر بس بلاش فطار المستشفى عاوزه حاجه شوارع
_ ماشى بس مش شوارع اوى ماشى
_ ماشى ...
وصل "وليد" "حبيبه" لبيت وطلعت غيرت هدومها وكانت بتعد الساعات علشان موعد الطياره .. دخلت نامت ونزلت قعدت معاها "ندى" شويا وجهزت شنطتها وبليل قعدت ع السرير مسكت النوت وحطتها ف شنطتها ومسكت "كوكا" واتكلمت معاها :
_ هتوحشينى يا كوكا .. انا مسافره منحه للصين 6 شهور وراجعه اول مره اسافر واكون لوحدى خايفه ومتحمسه ف نفس اللحظه .. تجربه جديده فى بلد غريبه بس ان شاء الله هتكون تجربه حلوه اختم بيها قايمه احلامى .. هتوحشينى .. "
فى اليوم الل هتسافر فيه "حبيبه" كانت جاهزه وخرجت من غرفتها كان والدها واقف مستنيه و"ندى" و "كريمه" واقفين بيعيطوا .. :
ب ابتسامه : فى ايه يا جماعه هو انا مسافره مش راجعه دول 6 شهور بس وراجعالكم تانى
اترمت "ندى" فى حضنها : هتوحشينى يا "حبيبه" الاول كان "حسام" ودلواقتى انتى كمان
ضحكت"حبيبه": لا انا راجعه متقلقيش مسافه درامتين تلاته هتلاقينى قدامك المهم خالك مش هوصيكى عليه و "كوكا "
_ متقلقيش هو انا بقى فاضيلى غيرهم ..
حضنتها وباستها وحضنت "كريمه : خلى بالك ع نفسك يا حبيبه
_ متقلقيش يا عمتو عليا
_ تسافرى بالسلامه يا حبيتبى ويبعد عنك اى سوء
بصت ل باباها كان بيتمالك دموعه راحت وقفت قدامه وهى مبتسمه : بابا
اول ما سمعها دموعه نزلت راحت شالتها ب ايديها واترمت فى حضنه :
_ هتوحشنى يا بابا
_ خلاص متسافريش وخليكى
ضحكت وهى بتعيط : انت بتستغل ضعفى يا "فؤاد" ولا ايه ؟
حضنها اوى : هتوحشينى يا "حبيبه" روحى مسافره معاكى متتاخريش وارجعى بسرعه
_ حاضر ..
بتبصله : وكل يوم هكلمك انا اول ما اوصل واعرف يومى هيكون ازاى هبعت ل "ندى" ع ميعاد كل يوم اكلمك فيديو تمام ..
_ وعلاجك وصحتك اهم ..
_ وانت كمان عاوزه ارجع تكون كويس وبخير
_ انتى ليه مش عاوزه اوصلك لمطار
_ مش عاوزه احس انى مفارقاك مش عاوزه احس الاحساس دا دلواقتى انا راجعه تانى وهرجع لحضنك تانى انا لسه مشبعتش منه ..
حضنها "فؤاد": سافرى وانبسطى وارجعيلى بالسلامه
ندى: يلا بقى دكتور "وليد" مستنيكى تحت هتتاخرى ..
مشيت اتجاه الباب ووقفت للحظه ورجعت بسرعه لحضن ابوها والاتنين دموع نازله من عينهم .. تمالك نفسه "فؤاد" و ب ابتسامه بصلها وب ايده مسحلها دموعها :
_ لا مش هينفع كده لو هتفضلى كده هرجع فى كلامى ومفيش سفر
ابتسمت"حبيبه": انت بتتلكك بقى ..
مسك ايديها : ايوه بتلكك اول مره من وقت ما عينى جت عليكى ل اول مره تبعدى عنى .. يلا انزلى علشان مضعفش ومش هسفرك ..
مسكتها "ندى" وبتزقها اتجاه الباب : يلا يا بنتى ابوكى لو قفش مش هتفكى يلا ..
ضحكوا ونزلت "حبيبه" ودموع "فؤاد" مستمره قربت منه "كريمه" وطبطبت ع ضهره :
_ هترجع بالسلامه متقلقش يافؤاد ..
_ ان شاء الله ..
نزلت "حبيبه" ووصلها "وليد" لمطار وكانت المجموعه الل مسافره معاهم موجودين سلم عليها "وليد" واتجهت "حبيبه" للطياره وفضل "وليد" واقف لغايه ما الطياره انطلقت وهو باصص ع الطياره " انا مستنيكى يا حبيبه " .. !
وسط توتر وقلق وخوف وفرحه كانت حاله "حبيبه" لغايه ما الطياره نزلت المطار ووقفت مع المجموعه فى انتظار المشرف الل هيساعدهم للوصول للسكن ويعرفهم مكان دراستهم وكانت المجموعه مكونه من ولدين و3 بنات "حبيبه" منهم .. وصل المشرف وركبوا العربيه ووصلوا لمكان السكن وكانت ال 3 بنات مع بعض فى غرفه والولدين فى غرفه تانيه .. اول ما دخلت "حبيبه" كانت اتكلمت مع واحده منهم وهى "رغده" لكن التانيه "منى" كانت واخده جنب منهم .. مهتمتش "حبيبه" اختارت السرير والمكتب والدولاب وابتدت تحط حاجتها .. اجتمع بيهم المشرف ع الغدا وعرفهم جدولهم رجعت "حبيبه" وفتحت اللاب وكلمت "ندى" وكلمت" وليد" و "حسام" تطمنهم عليها ونامت ع السرير وهى مبتسمه ومتفائله بالايام الجايه وهى نايمه لمحت "منى" بتبصلها ب استغراب وهى مش عارفه مالها مركزتش سمعت "رغده" بتنده عليها :
_ ايوه ..
_ ممكن استخدم اللاب بتاعك بس ابعت ل اهلى علشان باين ماجبتش الشاحن وهشترى واحده لسه
_ طبعا اتفضلى ..
فتحت اللاب وكانت صوره الخلفيه ل "جى وو" ضحكت "رغده ": جى وو
ضحكت "حبيبه": عادى يعنى ..
_ انا من فانزه شوفتى اخر فيلم
اتحمست "حبيبه": ايوه انا مستنش الترجمه واتفرجت عليه كان جامد
_ بس دا كورى ؟
_ ماهو انا اعرف كورى شويا
ضحكت"رغده": لا كده هنبقى اصحاب وتعلمينى
ضحكت"حبيبه": اتفقنا ..
سمعوا "منى": احنا جايين نتعلم كورى ولا ايه
مسكت "رغده" ايد " حبيبه": متركزيش معاها
_ انتى تعرفيها ..؟
_ للاسف اه .. كانت معايا فى المعهد .. هى مضايقه انها اخدت المنحه وانتيمتها لا متركزيش معاها
_ ماشى ..
_قوليلى بقى بتتفرجى لمين تانى ..
_ وابتدت "حبيببه" تتكلم مع "رغده " ومع الوقت بقوا اصحاب مر شهر ع وجود "حبيبه" والكل حبها والخوف والتوتر اختفى وبالعكس كانت نشيطه والكل لاحظ اجتهادها ففى مره بتتكلم مع "حسام" واتفاجئت من كلامه :
_ انت بتتكلم بجد انت مرجعتش دبى ؟
_ لا صفيت عقدى واستقريت فى كوريا "مى سون" ابوها شاف شغل لينا فى شركه حد يعرفه وهى حبت الفكره انها جنب اهلها والظروف هنا كويسه والحياه لقيتها شغاله مفيش مانع والفلوس حلوه ..
_ وكريمه قالتلك ايه ؟
_ كريمه رمت طوبتى خلاص و"ندى" بتزن عليا ابعتلها تكمل تعليم هنا وانا عارف لو جت ما هتعتبها خليها تتعاقب فى مصر ولما تخلص وظروفى اتحسنت هبعتلها تيجى انا اتفقت معاها ..
_ والله يا حسام انت دماغ ..
_ طبعا يا بنتى هو انتى لوحدك الل بيشطح احنا عيله واحده نشطح مع بعضينا
ضحكت "حبيبه": المهم تكون مبسوط
_ اه الحياه جميله والشعب الكورى طيب هو بيخاف يقربك فى الاول لكن مع الوقت بياخد عليكى والجميل هنا انك تشتغل بتاخد ع قد شغلك والكل بيشتغل هنا ..
_ طيب كويس ..
_ وانتى عامله ايه عندك ؟
_ الحمد الله مبسوطه ..كنت خايف الاول ومتوتره لكن شجعت نفسى والحياه جميله والمذاكره سهله
_ انتى عارفه ان الفرق بينى وبينك ساعه يعنى بالظبط مترو المرج لحلوان نفس الوقت
_ خلاص تعالى ..
_ هفاجئك انا و "مى سون"
_ وانا مستنيه ..
خلصت كلامها مع "حسام وكلمت باباها وندى واطمنت عليهم وع كوكا وبعدها "وليد" اكد عليها تروح ميعادها ف المستشفى بعتلها اسم المستشفى .. دخلت "رغده" الغرفه :
_ رغده .. تعرفى اروح ازاى المستشفى دى
_ تعالى نسئل المشرف
فى الوقت الل خرجوا فيه كانت "منى" فى الغرفه نايمه صحيت وكانت متجهه لحمام شافت دولاب "حبيبه" مفتوح راحت خبطته برجلها الباب متقفلش اتخبط ووقع ع الارض علب علاج "حبيبه" راحت اتفاجئت ومسكتهم : ايه دا
راحت اخدت شريط منهم وشالت الباقى وقفلت الدولاب ... راحت "رغده" مع "حبيبه" المستشفى وحكتلها "حبيبه" عن مرضها لكن مقالتلهاش كل حاجه عرفت "رغده" انها بتتعالج بس .. وشجعتها وحمستها اكتر ..قابلت الدكتورواتفق معاها انها كل شهر هتيجى للمتابعه ورجعوا ع السكن كانت "منى" قاعده ع مكتب "حبيبه" وماسكه النوتس وع وشها ضحكه سخريه شافتها "حبيبه" وبسرعه مسكت النوتس وقفلتها :
_ انتى بتعملى ايه ..؟
_ كنتى بشوف اشطر واحده فينا جابت الشطاره دى منين
تدخلت"رغده": اتكلمى عدل يا "منى ..؟
_ اه ماهو انتم اصحاب دلواقتى نسيت .. بس ياترى صاحبتك قالتلك انها مريضه سرطان
اتفاجئت "حبيبه" ووقفت ساكته وبسرعه قربت "رغده" من "منى : وطى صوتك
_ اها تبقى عارفه .. ياترى هى تعرف انها اخدت مكان واحده كانت بتحلم ب المنحه دى .. بالعقل كده واحده قدامها حياه ومستقبل متاخدهاش وواحده حالتها متاخره وفى اى لحظه هتنهار تاخدها جايه ترفيهه اصلنا طالعين رحله ..
"حبيبه" وقفت ساكته بتتمالك نفسهاوشافت "منى" مطلعه شريط العلاج وحطاه فى ايد "رغده "
_ انتى عارفه ايه دا دا علاج لمرضى السرطان المرحله المتاخره الل ملهاش علاج
اتجههت "منى" اتجاه الباب وهتخرج .. اتكلمت "حبيبه" بكل ثقه :
_ ومالها مريضه السرطان .. مش انسانه زيها زيك .. زيكم كلكم .. تحلم وتعيش ..
بصتلها "منى" كملت "حبيبه"ومسكت شريط العلاج: ايوه دا علاجى وباخده علشان لو مااخدتوش ممكن انزف واتعب ..وبرغم حالتى المتاخره لكن مستسلمتش .. انا ربنا ادانى حياه اعيشها مش اتسلى بيها وانا هعيشها وهحقق حلمى مهما حصل ل اخر يوم .. دا حقى فى الدنيا وانا متمسكه به .. !
خرجت "حبيبه" من الغرفه ووقفت "منى" محرجه من ثقه "حبيبه" والكل واقف بصتلها "رغده" بقرف " وخرجت ورا "حبيبه" شافتها قعده بعيد بتتمالك نفسها وسمعتها بتقول " متعيطيش يا "حبيبه" متعيطيش هتكملى هتكملى " وشافتها بتمسح دموعها اتحرجت وسابتها لوحدها ,, الل ضايق "حبيبه" ان الكل عرف انها مريضه سرطان ف النظرات اتغيرت فى الل كان شايفها شجاعه وبيشجعها وفى الل بيبصلها بنظره الشفقه لكن هى كانت بتتجاهل الكل ومكمله .. !
قررت "حبيبه" متهتمش بالناس زى ما كانت فى مصر وركزت ع هدفها لكن مكنتش حكت ل اى حد علشان ميقلقوش عليها وبرغم مذاكرتها الا انها منستيتش شغفها بالكورى وبالاخص الممثل "جى وو" وكانت بتابع اخباره وكانت بتسأل اصدقائها عن اى Fan Meeting هيعمله فى الصين تحضره لكن للاسف كان مفيش بسبب انشغاله دراما فى دراما فى كوريا ... !
مر شهرين ونص ع سفر "حبيبه " ..فى يوم "حسام " رجع من شغله وكانت "مى سون" فى انتظاره وكانت فاتحه اللاب وقامت تحضر الغدا ل "حسام " غير هدومه ورجع بص ع اللاب شاف صفحه نادى معجبين "جى وو " مفتوحه لان "مى سون" واحده منهم .. وعرف ان فى Fan meeting هيعمله "جى وو" بمناسبه درامته الجديده والخبر لفت انتباه "حسام" .. قعد قدام اللاب وسرح رجعت "مى سون " وشافته :
_ حسام .. مالك ؟
_ لا مفيش ..
_ طيب الاكل جاهز يلا ..
قعدوا ياكلوا وسرح "حسام "..:
_ "مى سون"
_ ايوه
_ هو فان ميتنج "جى وو" هيكون امتى ؟
_ كمان اسبوعين .. انا حتى هشترى تذاكرليا انا واصحابى
_ اشترى تذكرتين ذياده
_ لمين ..؟
_ انا هروح
_ ومين تانى ..؟
ابتسم "حسام": "حبيببه".. هعزمها تقضى اسبوعين الاجازه الل عندها تقضيه معانا ونفس الوقت تحضرFan Meeting ( لقاء المعجبين )
استغربت "مى سون" من ملامح السعاده ع وش "حسام ": انت مبسوط ان "حبيبه" هتيجى ..
بصلها وابتسم : مبسوط لانى واثق انها هتكون فى منتهى السعاده ودا كفايه ..
ابتسمت "مى سون": اوكيه هحجز 3 تذاكر ..
_ وانا هحجزلها التذكره الطيران ...
تانى يوم حجزت "مى سون" التذاكر وفى نفس الوقت بليل اتصل "حسام" ب "حبيبه" فيديو لانه عاوز يشوف رد فعلها ..
_ حسام يااااه ..
_ حبيببه يااااه .. ازيك بتعملى ايه متاخر كده ؟
_ اممم هشرب اللبن وهنام .. قاعد بقراء شويا
_ مخرجتيش يعنى
_ حسيت انى مش قادره وقعدت واصحابى خرجو
قلق "حسام": تعبانه .. مالك .. حاسه بحاجه ولا ايه ؟
ضحكت "حبيبه": لالا متقلقش مفيش حاجه انا الل كنت عاوزه اقعد وبعدين سيبنى اتكلم مع "مى سون"
اتكلمت كورى : ميانييه "اسفه" "اونى "(زى ابله فى مصر ) احنا بنتكلم ونسيت اسلم عليك عامله ايه
_ بخير .. وانتى ؟
_الحمد الله ..عاوزاكى تتعلمى العربى بسرعه بقى
_ كسل بقى انا شخصيه كسوله يا"حبيبه"
ضحكوا ...
"حسام" كلم "حبيبه" عربى : انا قولت هتتنططى لما تسافرى الصين ..
_ بخرج وكده بس مش عارفه ليه حاسه ان فى حاجه ناقصانى مش عارفه اقفشها صح ..
_ علشان انا بعيد عنك مين بيخرجك غيرى
_ هعيط ..
_ هتعملى ايه فى الاسبوعين الاجازه ؟
_ يوووه متفكرنيش انا من دلواقتى بخطط انامهم كل اصحابى ف السكن هيسافروا يقضوه مع عائلاتهم والمغتربين هيقضوها فى مكان
_ وهو انتى مقطوعه من شجره ولا ايه ..
_ اعمل ايه .. فى مجموعه رايحه لباندا هروح اقعد معاها
_ هتروحى تقعدى مع الباندا المسافه قد ايه
_ بيقولوا ساعتين بالقطر
_ وليه تشحططتى نفسك ساعتين لما ممكن فى ساعه تبقى هنا
ضحكت "حبيبه": اها وماله ..
_ طيب جهزى نفسك الاسبوع الجى تكونى فى كوريا هكون مستنيكى فى مطار انتشون
مسكت "مى سون" التذاكر وكلمتها بالكورى : يلا "حبيبه" تعالى نحضر الحفله مع بعض مستنياكى
تنحت "حبيبه" من المفاجاءه وقربت من الشاشه : حفله .. fan meeting ل "جى وو"
ضحك "حسام " ع رد فعل "حبيبه" : ايوه حجزنا وهنحضر مع بعض اتفقنا
كانت هتتنطط "حبيبه" من الفرحه : بتتكلم بجد يا "حسام "
مسك "حسام " التذاكر : ايوه اهو اوعى تكسلى ومتجيش انا حجزتلك التذاكر الطيران كمان
قامت "حبيبه" تطنطط من الفرحه و"حسام" شايفها وبيضحك وبيبص ل "مى سون": مش قولتلك
كانت حبيبه بتعد الاسبوع يعدى بسرعه علشان تسافر وعرفت "وليد" وفرح انها مبسوطه وهتكون مع "حسام " وجهزت "حبيبه" شنطتها واخدت تاكسى واتجهت للمطار وكانت قاعده ف انتظار الطياره بشغف وب ابتسامه ع وشها مبتختفيش كل شويا تبص ع التذكره الطيران كل الل يشوفها يستغرب عليها بتضحك لوحدها ...ركبت الطياره ووصلت مطار "انتشون" فى "كوريا": وكانت مش مستوعبه ومن بعيد شافت "حسام " و "مى سون" وبسرعه جريت عليهم وخرجوا ركبوا التاكسى متوجهيين ع بيتهم فى منطقه "ايتوان " وكانت "حبيبه" مش مستوعبه فى حاله صدمه ..
_ معقوله انا فى كوريا .. معقوله بجد ..
ضحك "حسام" ولاحظ سواق التاكسى مستغرب من تصرفات "حبيبه " : اهدى الراجل فاكرك مجنونه ..
بصتله "حبيبه" ب ابتسامه : انيونغ ها سيو اجاشى ( اهلا _ واجاشى زى عمو فى مصر )
وطى راسه كتحيه : انيونغ ها سيو ..
"حبيبه" بالكورى : انا اول مره اكون فى كوريا
السواق ب ابتسامه : استمتعى ب اجازتك
ابتسمت : هستمتع .. ان شاء الله هستمتع ..
وصلوا البيت ودخلت الغرفه الل جهزوها "حسام" و "مى سون":
_ كوماو (شكرا ) " اونى"
مى سون ب ابتسامه : غيرى هدومك ووضبى شنطته فى الدولاب هكون جهزت الاكل ..
خرجت "مى سون" و "حبيبه" الابتسامه مغبتش عن وشها ... خبط "حسام ":
_ انتى لسه مغيرتيش هدومك ..
_ معقوله انا فى كوريا
_ تحبى اديكى بالقلم علشان تعرفى
_ غبى وتعملها .. ليه انت مش كيوت زى الكوريين انت عايش معاهم اتعلم منهم بلاش العرق المصرى دا
_ ع فكره الكوريين مش ملايكه فيهم الكويس والوحش زى عندنا الاختلاف هنا البلد متطوره شويا وعمليه ونضيفه شويا ..
_ شويا يا كداب قول كتير وبعدين اتعلم من الكويسين عندك مثلا "جى وو اوبا " اتعلم منه ..
ضحك" حسام": اتعلم منه .. يابنتى احنا الرومانسيه احنا الاساس ..
لاحظ "حسام" نظره الاستحقار من "حبيبه": انتى قد البصه دى اخدك ارجعك المطار ع الصين
_ انت مفيش زيك انت ملك الرومانسيه ..
ضحك "حسام"
_ بس واضح دنيتك اتظبطتت هنا
_ نوعا ما .. الحياه حلوه هنا الحمد الله
_ تمام .. هو صحيح fan meeting امتى ..
_ كمان يومين ..
_طيب كويس ..
_ اوعى تكونى نسيتى علاجك
_ متقلقش اول حاجه حطيتها ووليد اكد عليا
_ والله وليد له الجنه بمعاملته معاكى دا مفيش دكتور بيعمل كده مع مريضته
_ علاقتى ب وليد مش مريضه ودكتور علاقتنا اصحاب
_ بس هو مش شايف كده ..
_ شايف ايه ..
_ شايف انك مجنونه .. يلا غيرى هدومك هناكل
خرج "حسام" وهو بيتنهد " : هبله ... !
اول يوم و "حبيبه" كانت مش عاوزه تنام مش عاوز تضيع لحظه فى وجودها فى كوريا .. قبل الحفله بيوم خرجت هى و "حسام" و "مى سون" يلفوا شويا ويتمشوا وقبل ما يرجعوا دخلوا مطعم قريب من البيت اكل حلال واتفاجئت "حبيبه" ان الل بتعمل الاكل ست كبيره فى السن ..
_ ماشاء الله المكان زحمه
رد "حسام": بعيد عن انه اكل هنا حلال لمسلمين الا ان الكوريين بيحبوا طريقه الهلمونى"جده"
شويا وطلبوا الاكل وقامت "حبيبه" تدخل الحمام وهى خارجه شافت صاحبه المطعم باين عليها التعب وراحت اتجاهها واتكلمت كورى :
_ "هالمونى" (جده) انتى بخير ..
_ بخير ..
_ اتفضلى كوبايه المايه ..
مسكتها وشربتها : كوماو (شكرا)
ابتسمت:حبيبه" واطمنت عليها ورجعت قعدت مع حسام ومى سون ..
خلصوا الاكل ورجعوا البيت واليوم دا فعليا منمتش "حبيبه" من فرحتها ..
اخد "حسام " اليوم دا اجازه وراحت "مى سون" تصحى "حبيبه" لاقتها لبسه وجاهزه ومتحمسه اوى .. نزلوا كلهم واتجهوا لمكان وقرب الميعاد ودخلوا القاعه وحاولت "حبيبه" تكون من الصفوف الاوليه وفعلا تذكرتها كانت ف الصفوف الاماميه ..شويا وظهر "جى وو" وقتها "حبيبه" كانت مش مصدقه وصرخت مع الل صرخوا و متحمسه وابتدت تصور زى الموجودين وكانت مستمتعه جدا ..كانت اخر فقره من الفقرات ان "جى وو" يختار 5 ارقام عشوائى ارقام التذاكر ويحقق امنيه لكل واحد من اصحاب التذاكر ..ابتدى سحب الارقام من البلوره وكانت "حبيبه" بتدعى وكانت متوتره قرب منها "حسام ":
_ مالك ..
_ نفسى اطلع هناك من الارقام المحظوظه دى ..
"حسام" بيضحك: اوعى تقولى امنيتك يحضنك ..؟
ضحكت "حبيبه": مجاش فى بالك بس تصدق ممكن
_ والله اطلع اجيبك من الطرحه وامسح بيكى الاستيتج كله وارميكى ف اول طياره ع مصر مش الصين
ضحكت "حبيبه" انت صدقت احنا بنتشعبط فى رضا ربنا يا "حسام" ..
فى الوقت دا كان فاضل اخر ورقه ومسكها "جى وو" وكانت رقم 27 وكان رقم "حبيبه" شافت الرقم مكنتش مصدقه نفسها وصرخت من الفرحه وبسرعه وهى مش حاسه بالموجودين عينها كانت متثبته ع "جى وو" وطلعت ع المسرح
وقربت منه ..المذيع سألها : انتى بتتكلمى كورى ولا انجليش
وقتها نسيت الكورى وردت بالانجليش وكان "جى وو" بيتكلم انجليش ..
سالها المذيع ايه هى امنتيها وقفت للحظات ساكته وع وشها ابتسامه متنحه ودا استغربوا الجميع .كرر المذيع ايه امنيتك ؟
ردت ببساطه انها تسلم عليه وتوقيع .. راح قرب منها "جى وو" ومد ايده بصت "حبيبه" ب اندهاش ومش مصدقه نفسها ومدت ايديها وسلمت عليه وقبل ما تمشى كتبتلها توقيعه ع صوره له اخدتها ونزلت وهى نازله اتكعبلت وقعت بسرعه راح اتجاهها "حسام " : فضحتينا
_ بجد الل حصل دا يا "حسام"
وسط الاحراج شالها : انا قولت هتلسعى والله ..
اخدها ورجعوا فى مكانهم وهى ف حاله عدم استيعاب انها قابلته وسلمت عليه واخدت توقيعه كمان ..
خلصت الحفله وفضلت طول الطريق "حبيبه" فى حاله سرحان وهيبره اتخض "حسام " من تصرفاتها وبسرعه طلعوا شقتهم :
_ حبيبه ..انتى كويسه فى حاجه وجعاكى
حطت ايديها ع قلبها : دا يا "حسام" هيقف من السعاده
ضحك "حسام" كل دا من سلام اومال لو حضنك بجد
_ يالهوى يالهوى
_ طيب ارتاحى لانك هبلتينا ..نامى
خرج "حسام " وحبيبه ماسكه الصوره بالتوقيع وبتبصلها وبتبص ل ايدها الل سلم بيها عليها : وانا هنام ازاى عاوزه افهم انا ها ...
قامت فتحت النوت بوك وفتحت قايمه الامنيات وب استيكرز علمت ع امنيتين انها تسافر كوريا وانها تحضر ايفينت ل "جى وو" وتسلم عليه ب ايدها وتاخد توقيع ليها ..!
__________________________
يتبع
ليست هناك تعليقات:
إرسال تعليق