_ هو انت فين كده ع الصبح ..؟
_ اممم .. كنت عاوز اعملها مفاجاءه ؟
_ ليه انت فين ..سافرت ؟
_ اه فعلا ..
_ فين كده ..
_ انا قاعده فى جنينه السكن عندك مستنيكى تحت يلا انزلى
اتفاجئت "حبيبه": ايه .. انت فى الصين ..
_ ايوه .. يلا مستنيكى انزلى .. !
_ ايه
ضحك "وليد": مالك اتخضيتى كده ليه ..؟
_ انت بتتكلم بجد .. انت عند السكن
ضحك "وليد" : وانا الل كنت فاكرك هتنزلى جرى ..لا بهزر معاكى انا فى المستشفى بس قاعد بره
_ يعنى انت فى مصر ..؟
_ ايوه والله تحبى احلفلك اهو بصى اسم المستشفى اهو ..
لف شاشه التاب وشافت اسم المستشفى اتنهدت واخدت نفسها : خضتنى
_ لدرجه دى مش عاوزه تشوفينى زعلتينى
_ لالا مقصدش اصلى اتفاجئت
_ ماشى .. المهم متنسيش كمان اسبوعين المتابعه هتروحى
_ اها اكيد ..
_ انتى كويسه ..
_ الحمد الله باخد العلاج فى وقته وكله تمام ..
اتكلمت معاه شويا وقفلت وخرجت بهدؤء مكنش موجود "جى وو" دخلت المطبخ تعمل ليها حاجه تشربها وشويا شافته خارج بيتكلم فى الموبيل الل سمعته "انا فى الطريق " وخرج من غير ما يقولها حاجه .. قعدت اليوم كله مع القطه "ليز" .. !
تانى يوم كالعاده "حضرت الفطار وخبطت ع غرفته وفتح الباب وقالب وشه : ايوه
ابتسمت "حبيبه": الفطار
خرج من الغرفه واتجهه للسفره ورجعت للمطبخ والوقت دا كان وصل مدير اعماله " مين سوك " واول ما دخل اتفاجئ بوجود "جى وو" ع السفره وبياكل :
_ ايه دا معقوله ..انت بتفطر
_ اجبارى ..فطرت اقعد
_ لا لسه .. بس مين الل اجبرك ع الصبح ؟
ظهرت "حبيبه" ومعاها عصير وقربت وابتسمت وحنت راسها كتحيه واتكلمت بالانجليش :
هاى .. انا "حبيبه" موجوده هنا مكان الاجوما موقتا
هز راسه "مين سوك" ومش فاهم الانجليزى ترجمله "جى وو":
_ بتقولك هى هنا يومين وماشيه اسمها حاجه كده
اتكلم "جى وو" من منطلق ان "حبيبه" مبتفهمش كورى لكنها كانت بتتمالك نفسها :
_ اسمى حبيبه .. حبيبه
بصلها "جى وو": انتى بتعرفى كورى
انكرت "حبيبه": لالا انجليش بس
_ طيب امشى ..
_ اعتقد انك مدير اعماله
_ بتسألك انت مدير اعمالى
رد "مين سوك" بالكورى : "انيو هاسيو" (مرحبا ) انا مين سوك مدير اعمال جى وو
_ بيقولك ايوه .. عاوزه ايه ..؟
_ قوله مواعيدك يكتبها اعرفها لو سمحت وانا داخله
مردش هايها وشاورلها ب ايده تمشى ودخلت المطبخ وبص عليها "مين سوك":
_ مين دى ؟
_دى معرفش ظهرتلى منين موجوده موقتا مكان اجوما لانها سافرت ل ابنها وانا قولت اجازه من المراقبه .."هارمونى" طلبت من دى انها تكون مكانها ..
_ وجبتها منين دى ..؟
_ بتشتغل فى المطعم ,,باين عليها طالبه بتدرس وبتشتغل
_ بس دى عربيه عارفه تتعامل معاها ؟
_ بتتكلم انجليزى ..
_ بس انت ليه مضايق من وجودها ماهى زى اجوما مفيش فرق
_ هتنقل انفاسى ..
_ خلاص مشيها ..
_ انا مش همشيها انا هخليها تطلب من نفسها تمشى علشان هارمونى ماتزعلش هى لما تطلب تمشى هارمونى مش هتزعل منى ...
_ انت لدرجه دى مش حابب وجودها ..
_ من اول مره قابلتها هنا ومرتحتلهاش
_ وهى الل اجبرتك ع الفطار
سكت "جى وو" :
_ بس الفطار شكله يشهى هارمونى اكلها لذيذ
_ كل وانت ساكت
_ خلص اكلك انت كمان ..
شويا خلص فطار ودخل لبس وكانت "حبيبه" بتحط اكل للقطه وكان بيبص عليها "مين سوك" ومش فاهم كلامها العربى لكن كان مبتسم ..خرج "جى وو" وخبطه ع كتفه : يلا
رد "مين سوك": كيوبتاه (كيوت/ لطيفه )
راح خبطه ع راسه ومشيوا خرجوا .. فتحت اللاب "حبيبه" وكلمت "ندى" ووليد وباباها وكانت مضايقه انها مخبيه عليهم لكن كانت بتقنع نفسها انها هتقولهم فى الوقت المناسب ,,لما خلصت اتكلمت مع " رغده" صديقتها ف السكن تطمن عليها وقالتلها انها فتره وهترجع .. !
مر اسبوع من اقامه "حبيبه" مع "جى وو" وكانت فعلا بتراقب تصرفاته وتبلغ "هارمونى" ان رفض ياكل الاكل الل بتبعته او مبياخدش المقويات الل بتبعتها او شرب سجاير او كحول(خمور) بذياده .. وعرف "جى وو" ان "حبيبه" هى الل بتبلغها .. ففى مره رجع من بره شاف "حبيبه" قاعده مع القطه وبتلعب معاها وبتكلمها دخل غرفته وخرج وحط ظرف ع الترابيزه جنب "حبيبه":
_ خدى دول ..؟
استغربت "حبيبه": انا ..
_ اعتقد مفيش غيرى انا وليز وانتى
مسكت الظرف "حبيبه" وفتحته وكان فيه فلوس : ايه دا ؟
_ فلوس .. انا عارف اكيد بتشتغلى علشان مصاريف دراستك ولا حياتك اعتقد المبلغ دا كويس
استغربت "حبيبه" ووقفت : لكن انا اخدت مرتبى خلاص
_ خدى دول كمان ..
_ ليه ..؟
_ ليه ..؟
_ اها .. ايه المقابل ..انا بشتغل مقابل مبلغ واخدته اخد دول ليه ؟
_ علشان تغطى بيهم عينك
استغربت "حبيبه": مش فاهمه ممكن توضح
_ انتى بتنقلى اى تصرف هنا بتشوفيه ل "هارمونى" ودا بيعمل مشاكل بينا .. اقبلى المبلغ دا واعتبرى نفسك مش شايفه حاجه وبس
ضحكت "حبيبه": رشوه ..علشان اعمل نفسى عاميه ؟
_ اعتبريها زى ما تعتبريها ..
قفلت الظرف ومسكت ايده وحطت الظرف : شكرا ..
_ نعم ..
_ انا لما جيت هنا جيت علشان "هارمونى" ووعدتها انى ههتم بوجباتك وبتقديم الوجبات فى مواعيدها وتطمن عليك لغايه (اجوما) ما ترجع وانا مش مستعده اكدب علشان مبلغ من الفلوس
_ عاوزه ذياده
_ ولا ذياده .. انا اخدت مرتبى وخلاص .. بعد اذنك
مشيت خطوتين وبصتله : "هارمونى" بتحبك وخايفه عليك مهما عملت من خوفها لانك عيلتها الصح انك تقدر دا متهربش منه .. انت فى نعمه
سابته ودخلت "غرفتها" واستغرب انها مقبلتش بالفلوس زى ما كان متوقع ... كانت "حبيبه" فتره تواجد "جى وو" فى البيت كانت بتراقب تصرفاته ولما كان بيشرب سجاير او كحول كانت بتقرب منه وتشغل الريكود بصوت "هارمونى" فبيسيب الل فى ايده كانت بالنسباله شئ مرعب بيعد الايام تمشى ... !
مر الاسبوعين و"اجوما " اتاخرت وكملت "حبيبه",, فى الوقت دا حب "وليد" يفاجئ " حبيبه" وسافر الصين .. اتجه للمستشفى يطمن ع نتيجه المتابعه لكن عرف ان "حبيبه" مرحتش فى الموعد قلق وبسرعه اتجه الى السكن الل هى فيه وقابل صديقتها "رغده" وعرف منها ان "حبيبه" مرجعتش من وقت ما كانت فى "كوريا " وكانت المفاجاءه والصدمه ل "وليد" اتصل ب "حسام" :
_ وليد ..
_ "حبيبه" فين يا حسام ..؟
_ هتكون فين يا تلاقيها نايمه يا فى محاضره ..
_ "حبيبه" مش فى الصين كلها .. "حبيبه" مرجعتش الصين يا "حسام "
_ انت بتقول ايه ..؟
_ مش انا الل بقول اصحابها هنا والمستشفى .. انا هحجز طيران لكوريا وهكون عندك
قفل "وليد" واتجه للمطار وفى نفس الوقت ملامح "حسام" متغيره ولحظت "مى سون :
_ مالك يا حسام ..؟
_"حبيبه" مرجعتش الصين هتكون راحت فين ولا رجعت مصر ..
ملامح "مى سون" اتغيرت ولاحظ "حسام " سكوتها :
_ انتى تعرفى حاجه انا معرفهاش ..؟
بنبره توتر : انا اعرف "حبيبه" موجوده فين ؟
بنبره عصبيه: فين ..؟
عرف "حسام" من "مى سون" ان "حبيبه" رجعت يوم ما سافروا الى مطعم بتاع "هرمونى" واشتغلت هناك وقاعده معاها .. من غير ما يكمل كلام بسرعه اتجه لمحطه الاتوبيسات وحجز تذكره من "بوسان" ل "سيئول " ... وصل "حسام" قبل "وليد" واتجهه لمطعم وطلب من "الهارمونى" تتصل ب "حبيبه" ترجع ع البيت هو منتظرها .. كلمتها فعلا ع تليفون البيت واتفاجئت "حبيبه" برجوع "حسام" من "بوسان" وانه عرف الل عملته .. بسرعه غيرت هدومها ووصلت بالتاكسى للبيت وطلعت وكانت خايفه ومتوتره ومش متوقعه رد فعل "حسام " استجمعت نفسها وحاولت تهدى ورنت الجرس وفتح "حسام" وملامح وجه كلها غضب .. دخلت وبتبص ع الليفنج كان "وليد" قاعد وهو كمان كان ملامح وجه غضب .. دخلت قعدت ورسمت ابتسامه ع وجهها وبتبصلهم وهما بصين ليها وساكتين :
_ ايه هتفضلوا باصين ليا كتير كده
رد "حسام": مستنين حضرتك تتكلمى ..
_ اتكلم اقول ايه ..
بنبره عصبيه : دى مش عارفه عملت ايه .. انتى بجد مش عارفه ؟
اتفجئت "حبيبه" بنبره صوت "حسام" العصبيه : انا اسفه ..
ضحك "حسام": كده خلاص المشكله اتحلت ..
خلاص يا "وليد" يلا اعمل حسابك هى راجعه معاك مصر
بسرعه ردت : لا مش هرجع مصر انا ..
بصلها "وليد" ومسك ايد "حسام" يسكت :
_ لا مصر ايه هى هترجع على "الصين" تكمل المنحه وترجع مصر هى اساسا سافرت علشان كده ولا ايه يا "حبيبه"
_ ولا عاوزه ارجع الصين ..
بعصبيه اتكلم "حسام": نعم يا ختى ..ودا من ايه ؟
_ مش عاوزه ارجع انا عاوزه افضل هنا شويا
حاول "وليد" يتكلم بهدوء: بصى يا "حبيبه" احنا مش هنسالك عملتى كده ليه لكن مفيش اختيار غير بين اتنين يا هترجعى مصر يا هترجعى الصين
_ ليه ..هو انا مليش رأى انا مش عاوزه ارجع لا مصر ولا الصين
اتكلم "حسام": انتى بتفكرى ازاى .. مفكرتيش فينا ولا فى ابوكى فى ايه يا "حبيبه"
سكتت "حبيبه " اتكلم " وليد" بعد ما فكروفكره رجوعها "مصر" مسيطره عليه ترجع معاه فعرف ان الوحيد الل هيرجعها هو باباها وقبل ما يتكلم "حسام" قاطعه :
_ ماشى .. احنا هنكلم باباكى وهو يقول ايه الل هيتعمل تمام ..
اتفاجئت "حبيبه": وليد ..
رد حسام بثقه : ايوه ابوكى هيجيب الاخر
فى اللحظه دى اتصل "حسام " ب "ندى" وقالها تحب الاسكاى وفتحت وقعد " فؤاد" وحكاله "وليد" كل الل حصل واتفاجئ فؤاد بتصرف "حبيبه" الغير متوقع منها اطلاقا .. :
_ مفيش نقاش "حبيبه" ترجع معاك ع مصر يا "وليد"
_ بابا ..
_ ولا حتى ترجع الصين .. ترجعى ع مصر يا "حبيبه" دا اخر كلام
بنبره عاليه: لا مش اخر كلام ..انتوا ليه مش حاسين بيا انا مش عاوزه ارجع
رد "وليد": علشان الممثل الل حلمتى به عاوزه تفضلى هنا عاوزه تبعدى عننا كلنا علشانه
_ لا مش هو السبب ..
باباها : وايه السبب ..؟
بدموع نازله من عينيها : السبب ان انا عاوزه اعيش ولو فتره قصيره ك انسانه طبيعيه .. اعيش وسط ناس من غير ما اخاف من نظرتهم ولا معاملتهم ..اعيش وسط ناس تعاملنى ان انا طبيعيه مفيش فيا حاجه محسسونيش ولا يفكرونى بمرضى وبفرصتى الضعيفه انى هعيش ,, لا بيكلمونى بالمحسوسيه ولا بيخبطوا الكلام يوجعنى ولا بيتكلمو بنبره عطف ولا يبصولى بنظره شفقه ان انا مريضه .. انا تعبت يا بابا .. تعبت من انى اسمع ان شاء الله تخفى ربنا يشفيكى طول الوقت بسمع كلام يحسسنى ان انا مريضه وبياكدولى ان انا هموت.. لما اسمعهم بيتهمسوا ويقولوا بنت "رجاء" هتحصلها .. تعبت واحساس العجز بيموتنى ان مفيش حاجه اعملها غير اخد العلاج وادخل عمليات .. جسمى تعب من الكيماوى والابر ..ايام عمرى الل بتروح من قدامى فى حبستى فى البيت .. تعبت من كتر ما بكدب ع نفسى وبضحك ومببينش حاجه ..تعبت من نظره الخوف الل فى عيونكم ليا .. وقت ما اكون تعبانه وتدخل تطمن عليا وتشوفنى بتنفس ولا لا .. .. حبستى فى البيت .. نومى الل بيكون اغلبه سببه العلاج .. دخولى المستشفى والعمليات .. حياه المرض الل عشتها كلها تعبت منها ..انا ربنا بعتلى فرصه اعيش فيها حتى لو ايام قليله .. انا هنا محدش يعرف عنى حاجه وبيعاملونى احسن معامله .. ولا حد جرحنى بكلمه ولا بمعامله وحشه .. حسسونى انى طبيعيه .. انا محتاجه احس انى طبيعيه ولو لفتره قليله بما انى فى جميع الاحوال هموت ..
_ حبيبه انتى ..
_ انا عارفه يا بابا ان مفيش متبرع ولا هعمل العمليه دا وهم بنعلق عليه امل انه هيحصل واحنا متاكدين انه مش هيحصل والسنه الل ربنا ادهالى اعيش فيها عاوزه اعيشها وانا سعيده ع الاقل عاوزه اموت وانا حاسه براحه .. حقى يا بابا ..انا راضيه الحمد الله ع حياتى الل عشتها ونصيبى ..انا مكنتش اتوقع يحصلى كده .. ربنا وهبلى حياه اعيشها وانا عاوزه اعيشها مش عاوزه انام ع السرير مستنيه امتى اخر نفس وامتى هموت ..انا عاوزه اموت وانا واقفه وحاسه بالحياه ,,انا رافضه احساس الموت وانا ربنا وهبلى حياه اعيشها .. ارجوك افهمنى يا بابا انا عاوزه اعيش ..
دموع "حبيبه" اثرت فى "وليد" "وحسام" و "فؤاد" واتكلم "حسام :
_ فى حل للموضوع دا يرضى جميع الاطراف .. "حبيبه" نشوف نتيجه اخر متابعه ليها ونقارنها بنتيجه تحاليل والاشاعات هتعملها لو النتيجه زى ماهى هتفضل هنا ومتقلقش عليها يا خال هتكون فى عينى وتحت متابعتى واكيد وجودها معايا هيكون اضمن من وجودها لوحدها ..لكن لو اختلفت وفيها ضرر ليها هترجع ع مصر بدون نقاش .. ها يا "حبيبه "
_ موافقه .. ..
"وليد" اتفاجئ : انت بتقول ايه اسلم حل ترجع مصر معايا
_ "حبيبه" ليها حق تختار وهى اختارت واحنا معاها فى اى قرار هيخليها سعيده
سكت"فؤاد" لحظات و "وليد" مستنى رفضه وتاكيد ع رجوع "حبيبه" :
_ لما تظهر النتيجه بكره هقولكم اخر كلام ..
قفلوا الشات وقامت "حبيبه" تغسل وشها وبص "وليد" ل "حسام":
_ ايه الل قولتله دا انت بتشجعها ع قرارتها دى انت مش عارف وضعها الصحى ولا ايه
_ انا اكتر حد عارف "حبيبه" .. كلامها الل قالته دا معناه انها كانت عايشه بوجع مش وجع المرض لا وجع نفسى لوحدها طول السنين دى ومحبوسه واحنا بخوفنا عليها خنقناها واحنا مش حاسين ..كانت بتضحك وبتهزر وع طول شاغله نفسها كانت بتهرب وبتحارب علشان تثبتلنا انها كويسه واحنا مهتمناش وفضلنا زى مااحنا نخنق عليها بااهتمامنا وخوفنا .. "حبيبه" كلامها دا عرفنى ان الحاجه لما بتبقى ااقل او اكتر من المطلوب بتدى نتيجه عكسيه لان لكل شئ قدر معين ودا احنا كنا جاهلين .. اهتمامنا بيها الاوفر خنقها ومن غير ما نقصد كنا بنفكرها بمرضها ..
سكت "وليد " وكمل "حسام " :
_انت عارف "حبيبه" كدبت علينا ليه مش علشان الكدب .. "حبيبه" بتسرق من اخر ايامها احلى لحظات تكون سعيده فيها لانها كانت متاكده ان مفيش حد فينا هيسمحلها تعمل كده لان مفيش حد فينا عاوز يخرجها من الدايره الل حطناها فيها .. بشجاعتها وقدرتها اخدت قرارها وانا واثق انها مش ندمانه عليه ,, انت مش ملاحظ "حبيبه" شكلها من وقت ما سافرت عامل ازاى متغير كتير عن ما كانت فى مصر .. الحكايه حكايه نفسيه اكتر منها علاج وهى كانت محتاجه ومحتاجه دا دلواقتى .. نفسيتها احسن بكتير ولا ايه ..
_ يعنى رايك تفضل هنا ..
_ هى مش هتكون لوحدها ..انا هكون معاها ..انا مش متقبل فكره ان حبيبه هتختفى من حياتنا وانا اخدت عهد ع نفسى مهما كان رغبه "حبيبه"فى حاجه وممكنه هعمله ليها .. لو فعلا "حبيبه" ملهاش غير سنه بالكتير ف ع الاقل تعمل الل هى عاوزاه واحنا عارفين وشايفين ..عاوزك تطمن ع الاقل خلينا نساعدها تعمل حاجه بتخليها مبسوطه ولا ايه ..
سكت "وليد" وخرجت "حبيبه" ونزلوا ووصلوا لمستشفى كان عارفها "وليد" لانه يعرف دكتوره "نورهان" صديقه من الدراسه وهى فى بعثه فى كوريا .. رحبت بيهم وعملت الاشاعات والتحاليل ل "حبيبه" وقالتلهم النتيجه هتظهر تانى يوم .. رجعوا ع البيت اكلوا وشويا دخل "حسام" ينام وقعد "وليد" عملت "حبيبه" كوبايتين شاى وقعدت جنبه :
_ كوبايتين شاى بالنعاع وصايه
ابتسم وليد ومتكلمش ..
_ وليد..
بصلها : انا اسفه ..
_ حبيبه.. انتى عارفه انا كنت قلقان عليكى ازاى ..
_ بجد اسفه .. انا مكنتش اقصد اسببلكم اى زعل .. انا للحظه فكرت انها فرصه اعيش حياه مختلفه بشخصيه حبيبه الانسانه العاديه من غير ما حد يقولها خلى بالك ولا اخدتى علاجك ولا يوم ما اخرج اروح مستشفى اعيش بحريه وبراحه من غير ضغوطات ولا تحذيرات .. وقت ما سمعت تنويه الطياره حسيته بيقولى ارجعى متسافريش ..فرصه جتلى وانتهزتها لانها مش هتتكرر لانى مش هكون موجوده وقتها
_ ايه الل بتقوليه دا
اتنهدت "حبيبه": وليد انا عارفه انه من الصعب او شبه مستحيل اعمل العمليه الزرع لان ببساطه مفيش متبرع
_ انا مش ساكت يا حبيبه
_ عارفه انك مش ساكت لكن دى الحقيقه الل لازم نسلم بيها خلاص
_ متستسلميش لان انا مش هستأسلم
_ انا بقولك كده مش علشان استسلم ولا لا .. انا كده كده راضيه بالل عشته وعملته وبكفاح وهحارب فى الباقى لكن لو حصل حاجه ليا عاوزاك تعرف ان انت عملت اكتر من الل عليك ..انا ربنا بيحبنى لانك موجود فى حياتى انت وحسام وندى وعمتو كريمه وبابا من غيركم بجد مكنتش هقدر استحمل لغايه دلواقتى ..
_ حبيبه انتى غاليه اوى عندنا ..وجودك فارق اوى فى حياتنا
_ وانتم الل سبب الرئيسى الل خلانى عايشه لغايه دلواقتى وخصوصا انت يا وليد ..
كتير بحسد نفسى عليك ان انت فى حياتى بجد مهما قولت مش هوفيك حقك
نظر اليها "وليد" للحظات ولف راسه واتنهد :
_ قوليلى احلامك حققتيها كلها ولا لسه هتفاجئينا ؟
ضحكت "حبيبه": انا نفسى مش مصدقه الل حصل ولا الل بيحصلى ..حاجه تحصل وتكون سبب فى حاجه تانيه تحصل .. يعنى اسافر الصين وتكون سبب اروح كوريا واجى كوريا تكون سبب اشوف "جى وو" فى الحقيقه واشوفه يكون سبب اعرف جددته وجددته تكون السبب ادخل بيته بجد انا ابتديت اصدق ان انا فى ايامى الاخيره وربنا بيفرحنى ..
ابتسم "وليد": لسه بدرى .. بس باين من وشك انك مبسوطه بكل دا
ب ابتسامه كبيره: مع كل حاجه بتحصل بتبعد فكره الموت عن تفكيرى وبكون مبسوطه .. انت عارف ان انا اول مره اشتغل فى حياتى واول مره امسك فلوس نتيجه شغل مش مصروف من بابا .. بجد احساس ملوش وصف كان نفسى احسه وحسيته ..
_ علشان كده قلبتى تشتغلى فى بيت الممثل صاحب الحلم
_ مش كان السبب لكن دى كانت خدمه.. الشغل الاساسى كان فى المطعم فكره الشغل نفسها مبهجه لروح تحسسك انك ليك وجود ..
_ وياترى هتكملى فى بيت الممثل دا ؟
_ لا لغايه مدبره المنزل ما ترجع هرجع المطعم ..
_ يعنى افهم من كده المنحه ملهاش وجود فى حياتك ..؟
_ بصراحه انا مكنتش بحلم بمنحه مكنش هدف لكن هى كانت فرصه انى احقق حلم من احلامى وهو انى اسافر يعنى كانت وسيله
_ تمام .. اعملى حسابك النتيجه بكره لو عكس هترجعى معايا بليل ..
_ان شاء الله مش هتكون وحشه ..
_ ان شاء الله ..
بص "وليد" ل "حبيبه": وحشتينى يا "حبيبه" مفتقدك جدا فى مصر
ابتسمت "حبيبه": انت كمان مفتقده منقارتك معايا
فضل باصص عليها للحظات وحست "حبيبه" فحبت تهرب :
_عارف يا وليد من احلامى ايه تانى ؟
_ ايه ؟
_ انى اشوف "حسام" مع انسانه بيحبها وتحبه وانت كمان مع انسانه بتحبك وتحبها ممكن تقول اطمن عليكم قبل ما افلسع ..
ضحك وليد:لدرجه دى انا ع قايمه احلامك
_ اكيد ..انت من الاساسيات فيها ..
_ يعنى انا فى نفس مستوى انك تشوفى "جى وو"
_ ياااه المصرى يكسب ..
ضحك "وليد" وكملت "حبيبه" :
_ انا عاوزه اقابلها علشان اعتذرلها انك اتاخرت عليها بسبب انشغالك بيا
_ واعتذارك مرفوض
_ ليه
_ لان انشغالى بيكى ب ارادتى لان ببساطه انا مش عاوز ابعد عنك
ضحكت "حبيبه" هروب : انا الل كنت لزقه اعترف
ضحك "وليد":
_ وليد مفكرتش ترتبط زى حسام كده ؟
_ افكر ارتبط ازاى وانا اصلا مربوط
_ ايه ..
_ الل يفكر ب ارتباط دا يكون حر لكن المربوط خلاص
_ ومين دى الل ربطتك كده وانا معرفش
اتنهد وبص ل "حبيبه": ماهى كمان متعرفش او عامله نفسها متعرفش
_ ليه ..؟
_ لانها ببساطه رافضه فكره الارتباط
_ تلاقيها متعقده اهرب منها ..
_ لا عندها اعتقاد انها متستحقش الحياه وتعيش الحاله ..خايفه تربط حد معاه وتسيبه
اتفاجئت "حبيبه": مش يمكن علشان مش عاوزه تسيب حد يتألم بعدها وتسببله ألم
_ ليه هى بتفكر فى الجزء المؤلم ومفكرتش فى الجزء السعيد ,, اوقات لحظه مع الل بنحبه بتكون عمر
_ ولحظه فراقه بتفضل وجعها طول العمر ..
_خوفها دا حارمها من حاجات كتير ياريت تدى لنفسها فرصه وتسمح لقلبها يعيش
_ مش يمكن قلبها مش هيطاوعها تأذى حد غالى عندها لمجرد لحظات هتعيشها وهو بعدها هيتألم ليه تأذى قلب حد وهى عارفه النتيجه .. مش يمكن انها اتاكدت ان كده افضل
_الافضل ان وقت الالم ووقت الفرح تكون مشاركه احنا مش عارفين بكره فيه ايه نعيش اللحظه السعيده
_ اللحظه السعيده ..
_ هى بقى خايفه تعيش وسيبانى واقف قدام بابها مستنى ..
_نصيحه متستناش لانها مش هتفتح
_ وانا مش هستسلم ومش هتحرك لغايه ما تفتح ..
_ وليد ..
اتنهد" وليد": الوقت اتاخر يلا قومى نامى علشان ترتاحى ..!
_ حاضر ..وانت مش هتنام..
_ هقوم شويا ..
_ تصبح ع خير ..
_ تصبحى ع خير ..
دخلت "حبيبه" غرفتها وملامح وشها متوتره بسبب كلام "وليد " فى الوقت دا كان سامعهم "حسام" ولما دخلت "حبيبه " الغرفه خرج وقعد جنب "وليد" :
_ مش قادر تخطفها بدل تلميحاتك دى
_ انت تقصد ايه مش فاهمك ؟
_ . الكل عارف انك بتحب "حبيبه" وانت لغايه دلواقتى مقولتلهاش
_ لانى عارف ردها وانا مش عاوز اخسرها ولا ابعدها عنى
_ مش بيقولوا ان الحب قوه..
وجودك فى حياه "حبيبه" الكل عارف من غيرك كانت حالتها اتدهورت
_ انا مستنى القى متبرع يديها الامل انها هتعيش وخوفها انها تفارق الل بتحبهم يختفى وقتها مش هسيبها
_ انت متاكد انك هتلاقى ؟
_ انا مش ساكت ومش هسيبها ...
يعتبر "وليد" منمش وكان بيتمنى نتيجه تكون عكس توقع "حبيبه" وترجع معاه ع مصر .. لبسوا ونزلوا ع المستشفى وقابلوا دكتوره "نورهان" وكانت النتيجه متطابقه مع نفس نتيجه اخر متابعه فى مستشفى الصين كانت صدمه ل "وليد" وفرحه ل "حبيبه "..فى الوقت دا صحى "جى وو" وخرج مشفش "حبيبه" فى البيت بيبص حواليه مش موجوده وبص ع السفره كانت فاضيه ,, خبط ع الباب ودخل مكنتش فى الغرفه بص ع السرير شافه زى ماهو فتح الدولاب افتكرها مشيت شاف هدومها موجوده مسك الموبيل افتكر انه مش معاه رقمها ,,اتصل بجددته قالتله "حبيبه" مشغول مع قرايبها ..قفل وهو مستغرب ... فى الوقت دا كانت "حبيبه" وصلت هى "وحسام" و "وليد" للمطار ...وقف "وليد " قدام "حبيبه" ومبتسم وهى كمان مبتسمه :
_ حبيبه .. اتمنى يكون قرارك صح
_ انا بعمل حاجه نفسى اعملها وببقى مبسوطه بيها الحاله معشتهاش يا "وليد" انى اكون طبيعيه انا مش طالبه اكتر من كده ..
_ اوكيه .. معاكى فرصتك اهو لكن بشرط
_ لوحصل اى تطورت وتعبت من غير تردد اسيب كل حاجه وارجع
_ تمام ..
_ ميرسى يا "وليد"
_ ع ايه ..هو احنا عندنا كام حبيبه
_ ربنا يخليك ليا ..
ابتسم "وليد" واتنهد : يلا اقولكم سلام
سلم ع "حبيبه" ومسك ايديها للحظات ولاحظ "عمرو" وعمل انه بيتكلم ف الموبيل
_ خلى بالك ع نفسك يا حبيبه
_ وانت كمان متقلقش
_ سلام
_ مشى وحس بدقات قلبه وقف وبص ع "حبيبه" بتشاورله من بعيد شاورلها واتحرك بسرعه .. الوقت دا رجع "حسام"
_مشى ..
_ اها ..
_ يلا احنا ..
_ لا يلا انت ارجع ع بوسان مينفعش تسيب "مى سون" لوحدها
_ لا هرجع معاكى نظبط الدنيا
_ اوك..
_ يلا ...
رجع "حسام" مع "حبيبه" ع الشقه وشويا الباب خبط وكانت الهارمونى دخلت وقعدت واتكلمت مع "حسام" :
_ انا جايه بعتذرلك ع المشكله الل حصلت بسببى مع "حبيبه"
_ لا مفيش مشكله ..هى "حبيبه" متهوره بس
_ انا الل طلبت منها
_ هى حكتلنا
_ انا حبيت اوضح سوء الفهم انها ملهاش ذنب
_ المشكله مش فى انها قعدت المشكله انها مينفعش تجهد نفسها
_ ليه فى حاجه ..
_ اصل حبيبه ..
خرجت بسرعه حبيبه: هارمونى .. انا جبتلك عصير اتفضلى
بصت "حبيبه" ل "حسام " وافتكر انها مقالتش وسكت .. اتكلمت معاها انها هتكمل ونزلت الهارمونى :
_ انت رايح تقولها هتقولها ان انا مريضه
_ لازم تعرف علشان متحملش عليكى
_ هو انا اشتكيت ها .. وبعدين انا عارفه اقدر ع ايه ومقدرش ع ايه ..انت مسمعتش نتيجه المستشفى دا معناه انى مهتميه بنفسى وباخد العلاج فى اوقاته ..
_ خلاص سورى انتى هتضربينى
_ تستاهل ومتفتكرش انك اطول منى مش هقدر هقف ع الكرسى واديك بالقفا عادى
_ قفا يا اوزعه يابنتى انا بخاف اقوم امشى بليل ادوس عليكى من غير ما اقصد .. داانتى مفيش فرق بينك وبين الكوميدنو
_ كوميدينو فى عينك .. يا ابو طويله
_ بس يا اوزعه ..
راحت مسكت مخده من ع الصوفه وخبطته وهو خبطها وقعدوا الاتنين يضحكوا :
_ انا مش عايزه اى مخلوق هنا يعرف ياحسام ..
_ حاضر بس بالمقابل تخلى بالك ع نفسك ..
_ حاضر
_ وتكلمى ابوكى وتفهميه
_ ماهو انا قولت ل "وليد" يقابله ويفهمه براحه وهكلمه يكون هادى
_ انا مش عارف وليد دا من غيره كنتى هتعملى ايه ؟
_ ولا اى حاجه ..هديه ربنا ليا
_ عارفه امنيه حياتى ايه
_ايه
_انك تبطلى نشفان دماغ ويظهر متبرع و ...
قاطعته "حبيبه" : و ايه ها ..
_ لا ولا حاجه المهم انا هسيبلك المفتاح تقعد فى الشقه هنا ومتطوليش فى بيت الفارس الاسيوى
_ اوكيه
_ وتشغلى الخط دا فى الموبيل وتطمنينى عليكى كل شويا وانا هنجز شغلى وهطلب ارجع ومش هتاخر
_ اوكيه ..
_ وانا هكلم ابو "مى سون" علشان نظبطلك موضوع الاقامه هنا علشان لو اتقفشتى هتطيرى غصب عنك هنا فحاولى متتجاوليش كتير لتتقفشى ماشى ..
_ حاضر خلاص .. اطمن
تانى يوم الصبح صحى "جى وو" وكان فاكر "حبيبه" مش موجود زى اليومين الل عدو ..خارج من غرفته عادى بيفتح عينيه شاف "حبيبه" قدامه اتخض :
_ انتى ..
ابتسمت"حبيبه": صباح الخير
_صباح الخير ..جيتى امتى ؟
_ من شويا ..الفطار هيكون جاهز فى خلال 5 دقائق ..
بسرعه اتجهت "حبيبه" لتجهيز السفره واتجه "جى وو" لغرفته وشويا وخرج وكان الفطار جاهز ..
وهو بياكل : انا كنت فاكرك هربتى بس كانت هدومك هنا
_ انا بعتذر ع الل حصل بس حصلت ظروف
_ قرايبك ..هو انتى ليكى قرايب هنا
_ اها ..
_ هو انتى هنا بتدرسى ولا زياره
_ يعنى ..
_ اوك .. المهم لو حصلت تانى ظروف ليكى مترجعيش تانى
_ اوك.. واسفه .
رجعت ع المطبخ ومسكت النوتس وقرت كل الل كاتباه عن "جى وو" فقررت تتاكد ان المعلومات دى صحيحه ولا لا .. مسكت طبق فاكهه واتجهت وحطتهم ع السفره :
_ ممكن اسئل سؤال ؟
_ ايه ..
_ انت بتعرف تعمل الراميون (الاندومى فى مصر )
استغرب من سؤالها :ايه ؟
_ الراميون .. انت فى اخر دراما كنت بتعمله انتى الل عملته صح ..
بصلها ولاحظ اهتمامها بالسؤال التافهه دا :
_ هو مهم عندك اجاوب ..
ب ابتسامه : ايوه ممكن ..؟
بصلها وبملامح حاده : انا خلصت اكل
وقام من غير ما يرد :
_ يعنى بتعمله ولا لا ؟
وقف وبصلها ورجع اتجه لغرفته وقفل الباب :
_ يعنى افهم انه بيعمله ولا لا ...
تانى مره وهو خارج من الاستوديو الخاص به لغرفته وقفته "حبيبه ":
_ انت بتحب الموسيقى الغربيه صح ..؟
بصلها ومردش عليها ودخل غرفته
مسكت النوتس وبتفكر ومصره تعرف ان المعلومات الل جمعتها حقيقيه ولا لا ..
وهو قاعد مع "مين سوك" مدير اعماله بيتكلموا حطت طبق فاكهه كان مكتوب انه بيحبها وفضلت تراقبه من بعيد هياكل منها ولا لا وهى مترقبه واول ما مسك الشوكه وحطتها فى قطعه من الاناناس عملت صوت خبطت كوبايه وقعت وعملت صوت بصوا اتجاهها : sorry sorry
قعدت ع الارض وفتحت النوتس وعلامه ب فرحه قدام الفاكهه .. فى مره كان بره ودخل وهى كانت مشغله اغانى فى موابيلها وحاطه سماعات الهاند فرى وبتغنى ومحستش بدخوله وكانت عايشه اللحظه وهو وقف يتفرج عليها لغايه ما لفت وفتحت عينيها كان فى وشها اتخضت ووقعت ع الارض واتخبطت ووقفت :
_ انتى بتعرفى كورى ..
ردت برفض : لالالا
_ وعارفه الاغنيه دى كلماتها
سكتت لحظات: اها ترجمتها شوفتها ع الانترنت ونطقها كمان
ابتسمت وهو سابها ودخل غرفته وهى دخلت غرفتها من الخبطه دراعها وجعها اخدت مسكن ..
.. كانت "حبيبه" محبتش تعرفه انها تعرف "كورى" علشان كان بيتكلم كورى بحريه عليها وهى كانت بتسمع وكانت بترد عليه بعديها فى مواقف وكان مستغرب هى بتعرف منين ... استمرت "حبيبه" تستشف المعلومات مدى صحتها الل مكتوبه ولا لا لغايه ما فى مره شافها وهى بتكتب فى النوتس شدها منها وطبعا بالعربى وهو مش فاهمه :
_ ايه دا ..؟
_ ها ..
_ ايه دا الل بتكتبيه كل شويا .. دايما معاكى وبتكتبى حاجات انتى بتراقبينى
للحظه اتخضت لكن افتكرت انه مش هيعرف عربى واتشجعت :
_ يومياتى
_ يومياتك ..؟
_ ايوه
مسك النوتس وقلب فيها وكانت كاتبه كلمات بالكورى والصينى والانجليزى وهو قراهم واغلبهم كانت عنه ..
_ يومياتك عنى .. واسالتك الفضوليه تخص يومياتك ..
حست انها اتزنقت ..:
_ انتى بتنقلى اخبارحياتى وتنزل على الانترنت
اتفاجئت من كلامه: لالالا خالص
_ ايه الل بتكتبيه دا ... ؟
_ هتصدقنى ..
_ ايه الل بتكتبيه دا ..
_ فعلا اغلب الل مكتوب هنا عنك ..
_ بتعترفى ..
_ لكن مش علشان انشرها فى الانترنت .. دى معلومات عنك مكتوبه ع مواقع كتيره جمعتها وحبيت اعرف هى حقيقيه ولا لا ..
_ ليه ..
بملامح جد : لانى مش قادره اصدق انك كده ..انك شخص تانى غير الل كلنا عارفينه وحبناه وبنستى اخباره .. مش قادره اصدق ان السنين دى والحلم كلهم كدبه ..
_ حلم ..
انتبهت بكلامها : انت شخصيه بارده وعصبيه ومبتضحكش دا غير خالص الل ظهر فى البرامج واللقاءات والدرامات والافلام .. اه التمثيل حاجه والواقع حاجه لكن استحاله تكون بالقسوه دى .. انا مش مصدقه وقررت اتاكد بنفسى علشان اصدق .. فكنت بسالك عن حاجات مكتوبه عنك ومستنيه ردك لكنك كنت بتتجاهلنى فكنت بعرفها بطريقتى هى دى الحكايه .. هو تصرف غلط عارفه لكن انت مخلتش قدامى طريقه غير كده .. ماهو انت لو بتجاوب ع اسالتى مكنتش اعمل حاجه تضايقك ..لكن انت الل خلتنى اعمل كده ..
بعد ما كان هو مركز القوه "حبيبه" بطريقتها عكستها وحس انه فى استجواب اتفاجئ من طريقتها واداها النوتس ودخل غرفته وهى اخدت نفسها بعد ما كانت خايفه ... قعدت مع نفسها فى غرفتها راجعت الموقف ورددت " هو تصرف دا معناه انه مش كده صح لو كان شخصيه زحشه كان زعق او طردنى لكن هو سابنى ودخل غرفته" وفى نفس الوقت فى غرفته "هى اتكلمت كده ليه ..وانا مردتش عليها ليه " ... !
مر يومين والاجوما رجعت مع ابن ابنها الصغير يوم وقعدت مع "حبيبه" وكان "جى وو" مش فى البيت كان فى تصوير بره لكن الاجوما كانت راجعه يومين بس وطلبت من "حبيبه" تفضل مكانها فتره لغايه ما ترجع لان ابنها تعبان لسه .. فى اخر اليوم "حبيبه" كانت قاعده مع حفيد الاجوما ماسكه قصه بالانجليزى وكانت بتحكيهاله بالكورى فى الوقت دا دخل البيت "جى وو" رحبت به الاجوما ودخل ع غرفته هينام .. شويا وخرج من الغرفه وداخل غرفه الاستوديو سمع "حبيبه" بتتكلم كورى لفت انتباهه وبهدوء قرب وبص كانت بتحكى الحكايه من القصه للطفل وسمع نطقها بالكورى الصح واتفاجئ انها كدبت .. شويا ودخلت نامت ورجع مسك القصه من ع الترابيزه وقراها واتاكد انها بتتكلم كورى ... تانى يوم مشيت الاجوما الصبح و"حبيبه" كانت بتنضف المكتبه والكتب لفت نظرها كتاب فتحته وابتدت تقرا فيه واندمجت ومحستش بنفسها فى اللحظه دى خرج "جى وو" من غرفته خارج ع بره شافها فى المكتب واقفه ماسكه كتاب قرب منها بهدوء ووقف جنبها وبص لاقاها فاتحه الكتاب ومندمجه وب صباعها بتشاور ع الكلمات وعند اخر كلمه اتكلم بالكورى :
_ بيقول الانسان ايه
بتلقائيه ردت عليه بالكورى : الانسان مراءه نفسه يعلم مدى خطاياه ومدى الصلاح فى افعاله و ..
انتبهت لنفسها وبصتله الكتاب وقع .. ف ابتسم نص ابتسامه : بتتكلمى كورى ..
_ انا ..انا ..
سابها وخرج وهى حست انها اتقفشت ... !
رجع بليل شاف "حبيبه" قاعده فى الليفنج ومعاها ليز ومعاها دباديب وكانت بتتكلم معاهم بالعربى لاحظ مدى اندماجها معاهم وطريقتها ضحكته برغم انه مش فاهم حاجه .. من غير ما تحس "حبيبه" برجوعه دخل غرفته وحست بقفله الباب ورجعت كملت لعبها مع ليز ...!
مر شهرونص ع وجود "حبيبه" فى بيت "جى وو" وكان موعد متابعتها مع دكتوره "نورهان" بعد ما نزل "جى وو" نزلت واتجهت ع المستشفى وقابلت "نورهان ":
_ ايه الاخبار ..
_ الحمد الله ..
_ مفيش اى شكاوى
_ اممم حاليا لا مفيش باخد العلاج فى وقته لكن فى حاجه
_ ايه ..
_ لما بتخبط جسمى بيعلم ازرق ع طول
_ علشان جهاز المناعه عندك ضعيف انا هكتبلك ع حقن تاخديها
_حقن كفايه شكشكه
_ مش ع طول كورس بس خديه ولو مرتحتيش هكتبلك حبوب
_ طيب تمام ..
_ يلا نعمل الاشاعه
_ يلا ..
خلصت "حبيبه" وفكرت تروح ل "الهارمونى" المطعم تسلم عليهم لانها فتره مشافوهاش .. فرحوا بيها وقعدت معاهم وساعدتهم فى المطعم طول اليوم .. الوقت اتاخر وخرجت علشان ترجع البيت ولان الاقامه لسه متعملتش ل "حبيبه" "حسام" قريب حماه بيعمل الاجراءات فكانت حريصه متمشيش فى شوارع واضحه لان الشرطه الكوريه بتوقف اى حد غريب تتاكد من جواز سفره والل بيكون متهرب بيتمسك وبيترحل لبلده .. فقررت تمشى فى زقاق ضيق جانبى لغايه ما توصل ل اخر الشارع وتركب التاكسى .. وهى ماشيه والزقاق فاضى حست بحد ماشى وراها .. خافت واتوترت لكن شجعت نفسها ومشيت بخطوات سريعه وحست الشخص دا بيمشى بخطوات سريعه وقبل ما توصل ل اخر الشارع الفاضى حست به مسك ايدها وشدها ع جنب وحط ايده ع بوقها وماسك سكينه وبيقولها :MONEY.. MONEY من خوفها مش عارفه تتصرف مد ايده فى جيوبها مسك موابيلها ومسك محفظتها ولسه هيخبطها بالسكينه لاقته اتخبط ع راسه ووقع ع الارض .. بتبص مين الل خبطه واتفاجئت ...!
__________________________
يتبع
ليست هناك تعليقات:
إرسال تعليق