خلصت "حبيبه" وفكرت تروح ل "الهالمونى" المطعم تسلم عليهم لانها فتره مشافوهاش .. فرحوا بيها وقعدت معاهم وساعدتهم فى المطعم طول اليوم .. الوقت اتاخر وخرجت علشان ترجع البيت ولان الاقامه لسه متعملتش ل "حبيبه" "حسام" قريب حماه بيعمل الاجراءات فكانت حريصه متمشيش فى شوارع واضحه لان الشرطه الكوريه بتوقف اى حد غريب تتاكد من جواز سفره والل بيكون متهرب بيتمسك وبيترحل لبلده .. فقررت تمشى فى زقاق ضيق جانبى لغايه ما توصل ل اخر الشارع وتركب التاكسى .. وهى ماشيه والزقاق فاضى حست بحد ماشى وراها .. خافت واتوترت لكن شجعت نفسها ومشيت بخطوات سريعه وحست الشخص دا بيمشى بخطوات سريعه وقبل ما توصل ل اخر الشارع الفاضى حست به مسك ايدها وشدها ع جنب وحط ايده ع بوقها وماسك سكينه وبيقولها :MONEY.. MONEY من خوفها مش عارفه تتصرف مد ايده فى جيوبها مسك موابيلها ومسك محفظتها ولسه هيخبطها بالسكينه لاقته اتخبط ع راسه ووقع ع الارض .. بتبص مين الل خبطه واتفاجئت ومكنتش عارفه تتكلم :
_ انتى مين ..
قربت منها بنت وبتحاول تطمنها وكلمتها بالعربى : متخافيش تعالى معايا يلا من هنا ..
مشيت "حبيبه" مع البنت لغايه ما بعدوا عن المكان ووقفوا فى مكان فيه نور وكانت البنت ملامحها مريحه شعرها قصير لابسه بنطلون جينز وجاكت وسكارف ب ابتسامه مدت ايديها :
_ فيفى ..
مدت ايديها "حبيبه": حبيبه ..
_ باين عليكى اول زياره جديده او اول مره تنزلى لوحدك
_ها
_ انتى ازاى تمشى فى مكان زى دا متاخر كده وضلمه هو انتى ماخدتيش فى المدرسه ان فى حراميه ومجرمين فى الاماكن الضلمه ولا ايه
خفه دم "فيفى" ضحكت "حبيبه": سورى اصلى مخلصه من زمان ونسيت
_ ايوه كده اضحكى وبلاش خوف ..انا لفت نظرى حجابك وافتكرتك من ماليزيا او اندونيسيا لكن لما شوفتك بتلعبى مع طفل صغير عرفت من ملامحك انك عربيه وبعدين شوفتك ماشيه لوحدك فى الشارع الضيق دا والشارع دا قليل اوى الناس تمشى فيه وغالبا بيحصل حالات سرقه واغتصاب وقتل اوقات ومشيت وراكى ولما شوفته اخد نصيبه بقى .. متكررهاش تانى المرادى كنت موجوده الله اعلم ايه هيحصل بعد كده ....
_ هو انتى مصريه .. ؟
_ اها .. وانتى اكيد ..
_ ايوه من السيده زينب
_ شالله ياست انا من الهرم ..
_ اجازه ولا زياره هنا ..؟
_ امممم من دا ع دا اصلها حكايه كده .. المهم فرصه سعيده وخلى بالك ع نفسك هنا .. كوريا زى اى بلد فى العالم فيها الكويس والوحش ..
_ اها .. اكيد ..
_ يلا اوقفلك تاكسى ولا هتعرفى توقفيه ..؟
_ متقلقيش عليا هعرف ..
_ يلا سلام ..
ومشيت "فيفى" ..و"حبيبه" برغم الخضه والموقف الا انها كانت مبسوطه بشخصيه "فيفى" وقفت تاكسى وركبت واختفت "فيفى" من قدامها ... وصلت للبيت دخلت غرفتها مكان الخبطه ع الحيطه كتفها علم اخدت المسكن واخدت الحقنه وخرجت تاخدها فى العياده جنب البيت .. وطبعا العيادات فى كوريا او المستشفيات غير اغلبها فى مصر ضرورى الروشته علشان يتاكدوا انها للعلاج مش حاجه تانيه ودا الل اكتشفته "حبيبه" ..!
رجعت البيت "حبيبه" وكان "جى وو" بره فى تصوير وكانت حاسه ب تعب بسيط دخلت غرفتها تنام لكن قبل ما تنام اتصل بيها "حسام " :
_ حسام ..
_ مردتيش ليه من ساعتين كده كلمتك كتير
_ افتكرت الل حصل ومحبتش تعرفه يقلق : كنت عاملاه سايلنت كنت بحاول انام ..
_من ساعتين بتحاولى تنامى ليه فيل بينام
_ يا ظريف
_ ها رجعتى البيت ولا لسه ؟
_ لا لسه شويا "اجوما" طلبت منى اقعد مكانها فتره لغايه ما تطمن ع ابنها
_ وانتى جايه ع هواكى ..
_ والله ابدا انتوا فاهمين غلط اصلا هو مش طايقنى من غير ما اعمله حاجه وع طول يا بره يا فى غرفته .. ولما بكامه مبيردش
_ ليكون مبيفهمش كورى هاهاهاها
_ ظريف يا واد .. اقفل عاوزه انام ..
_ بقولك انا حاولت انجز الفتره ونرجع لكن حصل ظروف وفى شغل كتير ومش هينفع نرجع دلواقتى ولسه قاعدين فى "بوسان" شويا كده وهحاول .. معلش يا "حبيبه" سايبك لوحدك ودا الل مكنتش قلتله ل ابوكى ول وليد بس انا عارف انى سايب راجل ورايا ..
ضحكت "حبيبه": لا لا متشغلش بالك بيا انت مش سايبنى لوحدى انت يوميا بتكلمنى ومعاك اخبارى وبابا ووليد فاهمين ان دى طبيعه شغلك وانا كمان بشتغل يعنى مش فاضيه
_ ايوه بقى هنتغر اول ما مسكنا الفلوس ب ايدينا .. اوعى يا بت تنسى انا الل كنت بستلف علشان اجبلك حاجات حلوه .. ها ..اوعى
_ اه كنت بتجبلى حاجات حلوه علشان انت طفس وبتاكلها لوحدك ها ..
ضحك "حسام": يا قلبك الكروهات ..
_ انا مبنساش حاجه اطلاقا ..
_ طيب فى نص جنيه واحنا فى اعدادى اخدتيه منى لو ضيعتى مصروفك عاوزه
_ يا قلبك الكروهات انت منستش ..
_ اطلاقا اومال هذل مين ها دا بسبب النص جنيه كنتى بتعمليلى واجب الدرس
_ يخربيت ذكرياتك الهباب ..
ضحك"حسام" و"حبيبه" .. :
_ يلا اقفل بقى العلاج عمل مفعوله ومسطوله عاوزه انام
_ طيب خلاص .. انا اصلا بتصل علشان عاوز اقولك حاجه مهمه ؟
_ خير ..؟
_فى خلال الاسبوع دا انا هبعتلك فلوس فى واحد نازل اجازه هيقابلك فى مطعم "الهلمونى" تمام
_ لا لا متبعتش فلوس انا معايا فلوس المرتب ولسه قابضه كمان ..
_ مليش دعوه انا بمرتبك دا اعملى بيهم عصافير وطيريهم انتى حره لكن الفلوس الل هتجيلك دى دى تنزلى تشترى بيهم لبس شتوى وجاكتين كده لان الشتا داخل اهو وانتى هتلجى.. هنا غير مصر هنا فى تلج ودرجه الحراره بتسافر تحت الصفر .. وانا مش عاوز ارجع القيكى اتحولتى ل لوح تلج
ضحكت "حبيبه": لوح .. لوح تلج يسلم الفاظك ..وبعدين انا مش قادره اقولك مبسوطه ان انا موجوده فى الوقت دا فى الشتا بدايه الشتا كان نفسى اوى اشوف التلج
_ هتشوفيه يا حبيببتى .. المهم متطنشيش وانزلى اشترى لبسك هتعرفى ولا اخد يوم اجازه واجيلك
_ لالا خليك انا هتعامل لو معرفتش هكلمك تمام ..
_ تمام ..
_ بتاخدى علاجك فى وقته ..
_ متقلقش فى ميعاده وكله تمام ..
_ اوكيه .. يلا نامى
_تصبح ع خير .. سلملى ع "مى سون"
قفل حسام و"مى سون" كانت قاعده :
_ لو قلقان عليها ممكن ناخد اجازه يومين ونروح ليها تشترى الملابس
اتنهد "حسام": انا مش هغلط تانى .. "حبيبه" عاوزه تعيش حياه طبيعيه وتكون صاحبه قرارها واختياراتها وانها تتصرف لوحدها وانا هساعدها تعمل كده ..مش هفرض اختيارى ولا اجبرها ع تصرف تحت مبدء ان دا الصح وخايف عليها .. هى هتعيش حياتها وانا مش هسيبها ومعاها وفى اى لحظه هى تطلب تدخلى هدخل ع طول الا فى الذروريات هتلاقينى اول حد معاها ..هى معاه فرصه تعيش طبيعى وانا هساعدها تعيش طبيعى ..وهى سعيده ودا المهم ..
مر يومين واتفاجئت "حبيبه" بتليفون من "هالمونى" بتعرفها ان انهارده عيد ميلاد "جى وو" وانها هتبعت "حساء الاعشاب البحريه"( شوربه بيشربوها فى عيد ميلادهم ) واستغربت لما بصت فى النوتس لقت الل مكتوب مختلف فعرفت ان فى عيد ميلاد الحقيقى وفى عيد ميلاد للفانز .. وصل العامل من المطعم ومعاه "الحساء" وبعض الاطباق الجانبيه وابتدت تجهزه ع السفره الجرس رن فتحت وكان طرد استلمته "حبيبه ".. شويا وصحى "جى وون" وقعد ع السفره يفطر واتفاجئ ب "الحساء" واتصلت به "جددته" هنتئته بعيد ميلاده وكان فرحان ..قفل معاها وقربت "حبيبه" ومعاها كيكه صغيره كاب كيك وفيها شمعه وحطتها قدامه وب ابتسامه : saengil chukhahamnida
اتفاجئ من تصرفها .. وكملت كلامها بالانجليزى :
_ هابى بيرز داى .. اتمنى امنيه ..؟
بصلها وساكت وهى ابتسمت :
_ يلا اتمنى امنيه ..؟
ابتسم..: نفخ طفى الشمعه ع طول
_ معنديش امنيات اتمناها
اتفاجئت"حبيبه" بكلامه:
_ ازاى معندكش امنيات ..
مردش عليها وخلص اكل وقام دخل غرفته ولبس وخرج قبل ما يخرج ندهت عليه :
_ الطرد دا جه وانا استلمته
مسكه وبص عليه وادهولها : ارميه
بصت ع العلبه : ارميه ..
بتبص عليه كان خرج وفتحت الطرد كان نوع من "شوكولاته الغامقه " وواضح انها غاليه بصت ع الكارت وكان (From your Dad ) .. استغربت "حبيبه" انه من والده واتعامل كده .. وقفت لحظات محتاره تعمل ايه لكن قررت تحتفظ بيها و اخدتها وحطتها فى غرفتها ... !
علاج "حبيبه" لما بتاخده ضرورى تنام ساعه لكن بيخليها فى حاله عدم اتنزان .. ف اخدت "حبيبه" علاجها ونامت وصحيت خرجت من غرفتها بليل اتخضت لما شافت "جى وو" نايم ع كنبه الليفنج بهدومه .. قربت بهدوء وندهت عليه مردش .. قربت تحركه يقوم ينام فى غرفته مردش .. لحظت وشه احمر وعرق حطت ايديها ع راسه كانت سخنه ..اتخضت ومش عارفه تتصرف ازاى .. حاولت تقومه وقام معاها وكان تقيل عليها وبيطوحوا الاتنين ودخلته غرفته وحدفته ع السرير وعدلته وغطته بغطيان تقيله وبسرعه عملت كمادات تلج ودورت ع اى علاج معاها خافض للحراره واخدته اديتهوله وسهرت طول الليل تعمل كمادات .. لغايه ما اتصلت من تليفون ب "مين سوك" مدير اعماله واتفاجئ بيها بتتكلم كورى وجه ومعاه الدكتور وعرفت ان الكمادات وخافض الحراره افادوه جداا وطلب منه يرتاح يومين لان الل حصله بسبب الارهاق ... لغى كل مواعيده لمده يومين وكانت "هالمونى" تبعت مع عامل اكل للبيت و"حبيبه" بتجهزه وتقدمه وتاكله غصب عنه وتشغله الريكوردكل ما بيرفض .. اتحسن فى تانى يوم ..جهزت "حبيبه" كوبايه عصير وخبطت ع الباب ودخلت الغرفه وب ابتسامه واتكلمت بالانجليزى :
_صباح الخير
_ صباح الخير
_ انت حاسس ب ايه دلواقتى ..
_ بخير ..
_ اتصل ب مدير اعمالك تانى
_ "مين سوك" هيونج فى الطريق
دخل ع السمع : انا سمعت اسمى ..
حنت راسها "حبيبه" :انا هجبلكم الفاكهه
خرجت من الغرفه :
_ عامل ايه دلواقتى ..
_ بخير ..
_ "حبيبه" يعتبر انقذتك .."الهالمونى"كان معاها حق انت مينفعش تعيش لوحدك .. فكره ان حد يعيش معاك مفيده تخيل لو فضلت تعبان ودرجه حرارته عاليه كده ومحدش لحقك كان ممكن يحصلك حاجه ..
_ انا مش فاكر الل حصل اصلا
_ انت كنت تعبان واحنا قاعدين وقبل ما نطفى الشمع زى كل سنه حسيت بصداع ووشك اتغير وقولتلى انك هتروح لوحدك وسيبتك مكنتش اتوقع تتعب كده
_ طبعا التصوير اتأجل ..
_ اها اتأجل يومين لغايه ما تتحسسن بس مينفعش تطول فى وقت عرض ملتزمين به فهما اليومين دول هيصوروا المشاهد التانيه ومشاهدك هنصورها بعدين ..
_ اوك..
تانى يوم و"حبيبه" بعد ما "جى وو" اخد علاجه وقالها انه هينام ..قعدت ماسكه الموبيل بتكلم "ندى" سمعت الباب اتفتح وقفت تبص وكان "مين سوك" و معاه بنوته طويله لبسه جيب قصير وكات رغم البرد وشعرها ملون .. شاف "مين سوك" "حبيبه" وسلم عليها واتكلموا بالكورى ..:
_ حبيبه ..ازيك
_ بخير ..
_ "جى وو" صاحى ..
_ لا اخد العلاج ونام ..
البنت الل واقفه مهتمتش بكلام "حبيبه" وبصت ل "مين سوك": اوبا انا داخله
مشيت وقربت من الغرفه بسرعه وقفت "حبيبه" قدامها ومنعتها :
_ انتى رايحه فين ؟
اتفاجئت "البنت وضحكت :
_ انتى بتقوليلى انا كده انتى مش عارفه انا مين ..؟
بملامح عدم معرفه : لا معرفش .. مين ؟
قرب "مين سوك" وبنبره توتر : "سى را" الفنانه المعروفه
حركت راسها "حبيبه" كتحيه :اها .. اهلا بيكى
_ ممكن تبعدى عن الباب
_ وهتدخلى ليه .. هو تعبان ونايم
_اوبا .. مين دى وابعدها من قدامى
_ سبيها تدخل هما متعودين مع بعض عادى
_ لا طبعا ..ازاى تدخل الاوضه وهو نايم لو ضرورى تشوفه تتفضل تقعد لغايه ما يصحى
ضحكت "سى را": اقعد ... ابعدى عن الباب
_ لا ..
_ ابعدى بقولك بالذوق
_ لا ..
وقربت منها ومسكت "حبيبه" بتزقها فزقتها "حبيبه" وقعت ع "مين سوك"والاتنين وقعوا ع الارض .. صوتهم كان عالى خرج "جى وو" من الغرفه وكانت "حبيبه" واقفه :
_ انتى واقفه هنا ليه ..؟
اتخضت "حبيبه": سورى
"سى را" بنبره عياط وملامح زعلان: اوبا .. الكائن الغريب دى منعتنى اشوفك
ردت "حبيبه": اسمى حبيبه .. حبيبه
_ وبترد عليا ازاى دى زقتنى وقعتنى
_ انتى الل زقتينى الاول و...
"جى وو" بصوت عالى : خلاص كفايه .. "حبيبه" ادخلى غرفتك .."سى را " اقعدى وانا جى ..
مسكت " ليزا" "حبيبه" ودخلت غرفتها وفتحت الباب موارب تسمع ...
_ هى مين دى ..؟
رد "مين سوك": دى "حبيبه" قاعده هنا مع "جى وو" مؤقتا مكان اجوما لما تيجى
_ وظهرت منين دى ..؟
_ "هلمونى " .. شغاله عندها فى المطعم ..
_ متوحشه ..
_ انتى الل استفزتيها
_ اوووبا ..
رجع "جى وو" وقعد وقربت منه "سى را" : اووبا ..وحشتنى جدااا
بيبعد عنها : "سى را" انا لسه تعبان
بتقرب منه : اوووبا .. انا خوفت اوى لما عرفت انك تعبان انا اجلت تصويرى يوم وجيت علشان اشوفك
_ من اليابان جيتى ..
_ من اى مكان اجى علشانك ..
فى اللحظه دى "حبيبه" مكنتش سامعه اوى فخرجت "ليزا" وخرجت وراها : ليزا ..ليزا ..
بصولها الكل ابتسمت وبصتلهم : سورى .. بدور ع ليزا
شافتها ومسكتها : سورى تانى اتفضلوا كملوا ..
ومشيت ودخلت غرفتها ..:
_انت مستحمل الكائن دا ازاى عارف تتفاهم معاها ..
_ اها عادى ..
_ متمشيها اواديها فلوس ذياده وهتمشى
_ جربت ومفيش فايده .. هى فتره وماشيه
_ اهااا .. طيب يلا البس علشان نخرج نتعشى بره بمناسبه عيد ميلادك
_ انا تعبان ..
_ اوووبا انا مسافره الصبح ..
قام لبس وخرج وشافته "حبيبه ": على فين ؟
استغربوا السؤال : ادخلى نامى
_ انت تعبان ازاى تخرج
ردت "سى را" بنبره غضب : قالك ابعدى ..
وخرجوا وكانت "حبيبه" مضايقه انه تعبان وخرج .. فتحت اللاب ودورت ع اخبار "جى وو" والاشاعات الل طلعت عليه ولحظت كان منعم انه ع علاقه مع الممثله المشهوره "سى را " ..:
_ هى دى السلعوه الل قالوا انهم مرتبطين ..لكن هو قال كذا مره مفيش لكن قال انهم اصدقاء لكن الل شوفته اكتر من اصدقاء .. ايه الصح لا مش هينفع لازم اعرف ...
فضلت قاعده سهرانه منمتش وبتبص ع الباب .. شويا وفتح الباب ودخل وكان بيطوح وعرفت "حبيبه" انه شرب .. ولسه هيوصل لغرفته دخل الحمام وسمعت "حبيبه" صوت الترجيع خرج ملامح وشه تعبانه سندته فى الغرفه وعملته عسل بلمون سخن وشربته وادته علاج ونام ...تانى يوم الصبح صحى وكان فى اثار تعب خرج من غرفته شاف "حبيبه" محضره الفطار وكان "حساء " وجنب الحساء حطت ازازه صغيره لعلاج الكحل والشرب وللمعده . :
_ الل حصل امبارح دا مش هيوصل ل "هلمونى" لانى مش حابه تبان ليها انك بتكسر وعود وهعتبره صدفه لكن مش هينفع تكرره تانى لانك تعبت .. ف الل حصل ميتكررش
بصلها "جى وو": انتى بتهددينى
_ اعتبرها زى ما تعتبرها تهديد او نصيحه دا شئ يرجعك
_نعم
_ ممكن تعتبرها تهديد دا لو انت حاسس انك هتكرر الل عملته تانى وممكن تعتبرها نصيحه نبهتك ع غلطه عملتها ومش هتعملها تانى .. كله يرجعلك ..
سابته " حبيبه" وراحت حطت اكل ل "ليزا" وقعدت تتكلم معاها عربى وهو مش فاهم .. !
مر يومين ويوم تصوير ل "جى وو" كان جاهز وهيخرج جهزت "حبيبه" شنطه فيها اكل معين علشانه علشان تعبان وعلاجه :
_ مكتوب فى الورقه دى مواعيد علاجك انت هتقعد 3 ايام بره وانت لسه تعبان
مردش عليها وسمعت "مين سوك": دا لو افتكر
_ خلاص انا هفكرك .. انا جايه معاكم
اتفاجئوا : ايه ..؟
_ مش هسمح يتكرر الل حصل امبارح ومش هكدب ع "هلمونى" تانى يا اما هبلغها دلواقتى واعتقد انت بتحبها ومش هتحب تسببلها قلق لما تعرف انك تعبان ولا ايه ..
سكتوا ..: 5 دقايق وهكون جاهزه :
جهزت "حبيبه" وركبت معاهم عربيته ولما وصلوا الموقع التصوير قالهم عليها من مساعدينه ..
استمر التصوير وف الاستراحه كانت "حبيبه" بتهتم ب وجباته وبعلاجه .. فى اول يوم خلص التصوير و"حبيبه" كانت مرقباه وماسكه النوتس بتكتب الل حصل والل كانت كاتباه وحصل وانها تحضر مكان تصوير .. شافته بيتمشى وقت الاستراحه وشافت فى ايده علبه السجاير بسرعه اتجهت له ومعاها قهوه سخنه وقربت منه واتكلم بالانجليزى :
_ رايح فين ؟
_ هتمشى شويا
_ ينفع اجى معاك
_ لا ..
مسكت ايده ومسكت علبه السجاير وحطت مكانها القهوه :
_ يلا بينا ...
تصرفها استغرب منه واتمشوا لغايه ما وصلوا ل تله عاليه :
_ وااااه ... المنظر جميل ..
_ اها ..
_ انا قريت فى الاخبار تساقط التلج الاول اليومين دول دا صح ..
_ مبهتمش انا ب اخبار الطقس ..
_ انا من امنياتى انى اشوف التلج
_ مفيش فى مصر تلج ..
_ انك تشوف تلج لا لكن تحس بالتلج الشتا فى مصر بيبقى صعب
سكت "جى وو" :
_ الدنيا دى فيها حاجات كتير جميله من لحظه ما تشوفها الابتسامه بتترسم ع وشك من غير اى مجهود .. بس محتاجه الل يبص ع الجزء الجميل ويبعد عينه عن الجزء السيئ فيها ..
بصلها "جى وو": ايه الحاجات الجميله ..؟
_ اممم ..الطبيعه .. الهوا لما يلمسك ..القمر ..الشمس .. الشروق .. الليل وهدوءه .. النجوم .. المطر .. التلج .. الورود .. البحر .. الشجر ..كل دا هدايا سماويه من غير مقابل الاحساس بيهم يبهج القلب لان دول الحياه بمعناها الواسع او الاصح الحياه بمعناها الاجمل ..
_ انتى خياليه اوى ..
_ وهو الخيال وحش بالعكس دى نعمه واحلى نعمه تكون عند الانسان وخصوصا لما يكون فى ظروف وحياه صعبه عليه .. نهرب فى خيالنا ونكون مع ناس مستحيل نكون معاهم ومكان مستحيل نكون فيه .. هتكون لحظات لكن تاثيرها امتع اللحظات ..الخيال يعنى حياه عند بعض الناس ..!
بصلها "جى وو" وسكت .. فى اللحظه دى حسوا برقائق التلج بتتساقط عليهم مدت "حبيبه" ايديها :
_ ايه دا ..؟
ابتسم "جى وو": هديه سماويه .. اخبار الطقس صحيحه وحصل اول سقوط للتلج
بملامح بهجه وفرحه واتنططت "حبيبه" بسعاده وهى باصه ع السما واستغرب "جى وو" من تصرفها الطفولى .. بصتله "حبيبه" وبتلقائيه :
_ كده انت ممكن تحبنى خلى بالك
تفاجئ من كلامها : ايه ..؟
_ مش هنا بتقولوا لما تكون موجود مع شخص فى اول سقوط تلج دا معناه انكم هتحبوا بعض .. خلى بالك ..
قالت "حبيبه" الكلمه وهى مش حاسه واتمتعت بالتلج كانت فرحانه جدااا .. و"جى وو" متفاجئ من تصرفاتها وكلامها .. موبيله رن وعرف ان الاستراحه خلصت وفى تصوير .. سابها ومشى وهى شافته وجريت وراه ترجع لكن كانت زى الطفل الفرحانه بالتلج وهو بينزل ..رجعوا التصوير ومسكت "حبيبه" موابيلها وبتصور نفسها وكان منظرها يضحك لدرجه ان "جى وو" ضحك على تصرفاتها وحس ان معاه طفله .. كملوا التصوير ونامت "حبيبه" ع الكرسى .. طقم التصوير صحوها ودخلت السكن ونامت ...!
تانى يوم كان التصوير فى مكان ابعد زرع وشجر وبيوت صغيره منطقه ريفيه ..طول النهار كان تصوير والليل دخل وصوروا مشهدين وكان فى استراحه .. حست حبيبه ب ارهاق وتعب اخدت علاجها وكالعاده حست انها عاوزه تنام مكنش قدامها غير عربيه "جى وو" ودخلت نامت فى كنبه العربيه من غير ما تقول لحد ..كان فى استراحه ساعتين ف اخد "جى وو" مفاتيح عربيه من "مين سوك" :
_ رايح فين ؟
_ صدعت من الدوشه هتمشى بالعربيه شويا فى هدوء لغايه ما تجهزوا كلمنى
_ اوكيه
واتحرك بالعربيه وفضل ماشى فى طريق كله زرع وفاضى ومفيهوش عمار .. بعد مسافه بعيده وقفت العربيه منه عطلت وسمع صوت "اى " من الكنبه وراه بص وشاف حد قعد اتخض ولما ركز طلعت "حبيبه" :
_انتى ..
حبيبه بتفتح عينها وشافت مكان فاضى :
_ معقوله خلصتوا تصوير خلاص وهنمشى ..
ارتاح من الخضه ونزل من العربيه وبيكلم نفسه : وانا الل هربان من الدوشه ..
نزلت من العربيه وبتبص حواليها "حبيبه" : احنا فين ..
قالها الل حصل وهى قالتله انها حبت تنام شويا ... بيجرب يتصل بموبيله الشبكه كانت مش مجمعه قعدت "حبيبه" ع دسك موجودوبتبص قدامها كان فراغ والسما حستها قريبه منها ومليانه نجوم من جمال المنظر مكنتش بتتكلم من الروعه .. راح قعد جنبها وشافها مبهوره :
_ انتى اول مره تشوفى نجوم
_ اول مره اشوف السما بالقرب دا
_ نعم ..؟
_ اول مره احس انى قريبه من السما كده مكنتش اعرف انها جميله اوى كده بليل
_ ليه هى مصر مفيهاش سما ..
ضحكت"حبيبه": لا فيها بس مش بالصفا دا لان العماير والمبانى مغطيه على جمالها ومعندناش نجوم بالطريقه دى ..دى سجاده حرير منقوشه بالفضه والولوء ..
بص عليها : اممم جميله ..
جمعت الشبكه واتصل ب "مين سوك" وقاله العربيه عطلت ف اتصل ب اعطال الطريق وهما ف الطريق له وفضل قاعد جنب "حبيبه " وسالته سؤال فضولى :
_ انت شوفت نيازك بيقع قبل كده ؟
_ لا
_ ازاى وانت شوفته فى فيلم نجم فى السماء هتكدب ؟
_ اهاا .. دا كان تمثيل
_ بس صح انك تشوف نيزك وتتمنى امنيه تتحقق
_ مبصدقش انا الخرافات دى ..
_ جربت تتمنى امنيه وتتمسك بيها ..
_ لا ..لان الامنيات دى اوهام
_ انت مكنتش امنيتك تكون ممثل ولا مطرب ؟
_ لا جت بالحظ
_ كنت بتتمنى ايه وانت صغير ..؟
_ اكون طيار والف العالم
_ مش بعيد .. انت دلواقتى فنان وبتلف العالم وانت نفسك امنيه لناس كتير بس تسلم عليك
بص ل "حبيبه" وكملت كلامها :
_ انت امنيتك اتحققت بس بالشكل المناسب ليك
_ يمكن ..
بصتله "حبيبه": مش يمكن انت بتقول كده علشان مجربتش تتمنى ب ايمان ..جرب اتمنى وخليك واثق من امنيتك هتتحقق .. الخرافات الل بتتكلم عليها دى بالنسبه لناس كتير حياه .. ناس كتير بتتمنى وبتحلم وتأمن ان فى يوم هيتحقق حتى لو محصلتش لكن حسو بسعاده .. الخيال علاج ل اوجاع الحياه ..وكل انسان له حق يحلم ويتمنى اى حاجه فى الدنيا ...
ضحك: ايه الثقه دى ..
ابتسمت "حبيبه":ممكن اقول عن تجربه ..
_اها ..
ب ابتسامتها بصاله : الامنيات والاحلام دى احلى حاجه موجوده للانسان بتغير فى حياتنا كتير بيها بتنسى قسوه الايام والوجع والالم وبتشوف كل حاجه جميله .. هتقول تخيل ووهم .. هقولك تخيل ووهم لذيذ انك تحس ب احساس سعاده وتكون مبسوط دا كفايه عن انك تكون متشاؤم على طول .. مثلا بص لسما كده .. بص
بص "جى وو" للسما :
_ متفكرش فى اى حاجه ورد بصراحه ايه رايك فيها ؟
_ جميله
_ كل النجوم دى الل انت شايفها مش اجسام صلبه حجر ..دول عباره عن امنيات واحلام اشخاص متعلقه مستنيه وقت المناسب وتنزل لصاحبها وتتحقق ..الامنيات والاحلام مبتختفيش موجوده هى بتحتاج صبر وايمان ووقت لغايه ما تتحقق ومجرد احساسك انها هتتحقق فى يوما ما دى سعاده بتحفزك وتشجعك انك متستسلمش وتحارب وفى الوقت المناسب تتفاجئ ان حلمك اتحقق وانت مش حاسس او اتحقق اكتر ما كنت بتحلم وبتتمنى ..
بص "جى وو" ل "حبيبه" وكملت كلامها وهى باصه للنجوم :
_ لكل انسان قدر من احلام وامنيات يستحقها فى حياته من غيرهم هيكون معنى حياته ايه وهيحارب اليأس والالم والوجع ب ايه غير صبر وايمان وامنيات واحلام انه هيكون احسن ..الايمان بالحلم انه هيتحقق دا سلاح مواجهه الحياه وان طول مافى ايمان الامنيات هتكون حقيقه ومفيش مستحيل ..
كلام "حبيبه" ونبرتها الهاديه وابتسامتها فصلت "جى وو" عن المكان وعاش وسرح وهو باصصلها مع كلامها .. بصتله شافته بيبصلها كملت كلامها .. :
_ تيجى نلعب لعبه
_ ها
_بص ع السما والنجوم بص ع احلام وامنيات ناس كتير و غمض عينك لحظه واتمنى امنيه وابعتها تكون معاهم فوق لغايه ما الوقت يقرب هتنزل ..جرب كده اى امنيه ..
بتلقائيه بص "جى وو" ع السما غمض عينه فعلا واتمنى "امنيه" .. و"حبيبه" كمان غمضت عينيها وبالهدوء الل حواليهم للحظات نعست "حبيبه" ورمت راسها ع كتفه اتخض ولكن حس بحاجه منها وقت ما لمست راسها كتفه ..ابتسم انها بعد كل الكلام دا نامت وفضل قاعد شويا باصص للسما وبيراجع كلام "حبيبه" وبعد ما كان شايف المنظر عادى كلام "حبيبه" غير رايه وحس انه اروع منظر ..!
شويا وحس ان "حبيبه " بردانه شالها وركبها العربيه وحط الجاكت بتاعه عليها وقعد ع الديسك وبص عليها وهى نايمه وبقى عنده فضول يعرف مين "حبيبه"..!
وصلوا وصلحوا العربيه و"حبيبه" مش حاسه رجعوا صوروا مشهد وكانت ف العربيه نايمه ورجعوا تانى ع "البيت" شالها "جى وو" وحطها ع سريرها وخرج ...محستش "حبيبه" بنفسها غير لما صحيت من النوم لقت نفسها ع سريرها وعرفت ان العلاج خلاها عاوزه تنام وحاولت تفتكر الل حصل افتكرت انها كانت بتتكلم مع "جى وو" وبعدها مش فاكره .. غيرت هدومها وخرجت من الغرفه لقت "جى وو" فى المطبخ بيعمل نسكافيه ومعاه طبق كيك :
_ صباح الخير
حست "حبيبه" انها اتاخرت ع تحضير الفطار : انا اسفه انا ..
_ لا عادى متتاسفيش المشوار كان مرهق ومتعب وواضح انك بتجهدى من المشاوير الطويله
_ اه يعنى ..
_ عادى ..
خرج "جى وو" للتصوير ولبست "حبيبه" واتجهت لمطعم "الهالمونى" علشان الفلوس وصلت الل ارسلها "حسام" وهى هناك شافت "فيفى" اتجهت ليها وب ابتسامه:
_ فيفى
ابتسمت "فيفى": حبيبه ..
_ عامله ايه انتى ساكنه هنا ؟
_ اممم يعنى ..انتى ساكنه هنا ؟
_ اها بس حاليا لا .. انا عزاماكى تمام
ضحكت" فيفى": وانا موافقه ..
طلبت "حبيبه" وجبه خفيفه واتنين عصير وقعدت معاها :
_ قوليلى اخبارك ايه لسه بتنزلى لوحدك ؟
ضحكت"حبيبه": لا خالص حرمت واعتبرت الل حصل دا انذار من ربنا احترس
ضحكت"فيفى": طيب كويس ..
_ هو احنا ممكن نكون اصحاب
_طبعا يا حبيببتى
_ بما اننا اصحاب بقى عاوزه منك خدمه
_ من اولها كده استغلال
_ هههه ماهو انتى بقالك سنتين هنا ف اكيد اشطر منى ..عاوزه اشترى لبس شتوى تقيل وانا معرفش الاماكن وفى نفس الوقت هيضحك عليا ..عاوزه مكان سعره كويس
_ يااااه طلبك سهل جداا .. فى مكان قريب من هنا فيه كل حاجه وبسعر ارخص
_ هو دا المطلوب
يلا بينا ..
يلا بينا ..
خرجت "حبيبه" مع "فيفى" واتمشوا وهما ماشين اتعرفوا ع بعض اكتر .. "فيفى" اكبر من "حبيبه" بسنه هى 26 و حبيبه 25 سنه ..:
_ يعنى انتى يا "حبيبه" معندكيش لسه اقامه بتتعمل يعنى ؟
_ ايوه علشان كده مبخرجش كتير ..
_ محبوسه يعنى ..
_ اها.. بس مبسوطه يعنى كفايه انى فى كوريا
ابتسمت "فيفى": كوريا دى حلم للبعض وكابوس للبعض الاخر
_ ليه كده .. انتى صح مقولتليش انتى بتعملى ايه هنا وسبب انك جيتى ؟
_ امممم .. غلطه
_ غلطه ..
_ اها .. غلطه وقرار متسرع ودا نتيجته ..؟
_ ازاى ..
_ ببساطه انا زيك كده ادمنت الدرامات الكورى واتعلمت كورى برغم انى خريجه تجاره وكان عندى شغف انى اقابل شاب كورى واتعرف عليه واعيش فى كوريا وع الانترنت اتعرفت ع شاب كورى وكنت فرحانه اوى واتكلمنا فتره وارتبطنا ..
_ ايه ..؟
_ زى مابقولك كده ..
_ وبعدين ..
_ اممم .. طبعا كان صعب ينزل مصر فقولتله انا هاجى مع اصحابى لزياره لكوريا واشوفه ..
وكنت متفقه مع اصحابى ع رحله اسبوع هنا وجيت معاهم وقابلته وممكن تقولى احلى اسبوع قضيته معاه .. قالى مرجعش مصر واقعد هنا الفكره عجبتنى وانه قالى انه هيتجوزنى .. هربت من اصحابى وقعدت هنا فى اوتيل بسعر رخيص لانه كان قايلى بيدور ع شقه وهنتجوز .. شويا وفلوسى خلصت وفى نفس الوقت الايام الحلوه خلصت لانه اختفى .. العنوان الل قالى انه ساكن هناك طلع غلط وتليفونه اتقفل ومعرفش عنه اى حاجه وكان سرق منى اللاب والموبيل وسلسله وخاتم ع انه هيبعهم واخدهم واختفى .. ومكنش معايا تذكره الرجوع .. قررت اشتغل وحاولت لغايه ما لقيت شغل ف مطعم فى المطبخ واتعاملت لفتره ولما قررت انزل مصر خوفت من بابا تهديده بطردى وان العيله كلها قالت عليا انى مش متربيه وكده قررت اقعد هنا خوفى خلانى منزلش مصر واعتمدت ع نفسى هنا وقولت دا اختيارى .. واكتشفت ان الاختيار ع قرار غلط بيكون اختيار غلط ونتيجته صعبه .. اتعرضت ل مضايقات كتيره لغايه صدفه جمعتنى بشاب مصرى مقيم هنا ف كوريا بطريقه ما عرف ظروفى وساعدنى وعملى اقامه هنا 3 سنين واعجبت به بصراحه شخص مدلى ايده فى ازمه وقربنا لبعض وعرفت انه متجوز لكن مقدرتش ابعد عنه وكان رافض نتجوز علشان مراته كانت خروجات ولما مراته عرفت قطع علاقته بيا واطردت من شغلى وحاليا قدامى سنه هنا ومقضياها فى كل مكان شغل شويا .. بس دى حكايتى ببساطه ومنتهى الصراحه
_ انتى حبيتيهم الاتنين ؟
_ الكورى حسيت انه شغف بحاجه جديده لانى مفكرتش فى ايه ممكن يحصل ودا سبب تهورى والل حصلى لما جيت هنا ممكن لو كان صادق معايا وواضح من الاول او انا كنت مش متسرعه وانبهرت بحاجه من غير تفكير كويس مكنش كل دا حصلى ..لكن المصرى حسيت ب امان وحبيبته ..عارفه الاحساس الل يخليكى تستغنى عن اى حاجه وتكونى مع الشخص الل بتحبيه .. هو دا الل حصلى برغم معرفتى انه متجوز مقدرتش ابعد عنه لانى حبيته لكن هو الل بعد عنى وكانت صدمه .. انا حسيت ان سفرى لكوريا كان درس وانى بعد ما الكورى ضحك عليا او معنى اصح انخدعت فيه ومرجعتش اخدت الدرس التانى الاصعب ..
_ انا بصراحه مجربتش الاحساس دا لكن واضح من كلامك انك اتوجعتى ..
_انا غلطت لما اخدت تجربه واحده انها ارتبطت بكورى ان كل التجارب زى بعض او بمعنى ان كوريا جنه ومفكرتش اننا اساسا مخلوقين من ادم وحواء ومتوزعين فى الارض يعنى فى كل مكان فيه الكويس والوحش .. اختيارنا وقرارنا هو الل بيحدد مصيرنا .. دا استوعبته متاخر ..الظروف والواقع بيخلوكى تنتبهى لنفسك وتفوقى ..
حبت "حبيبه" تغير الكلام بس ما حست بوجع فى نبره "فيفى" و ملامح وشها حزينه :
_ يعنى انتى حاليا من غير شغل ..؟
_ اممم يعنى ..
_ وهتعملى ايه ..
_ هدور هعمل ايه يعنى ..
فكرت "حبيبه" تساعد "فيفى" ازاى وفى الوقت دا كانت ساعدتها "فيفى واشترت حاجات بسعر قليل ..!
رجع "جى وو" ع البيت وكانت "حبيبه" مش موجوده .. فضوله يعرف مين "حبيبه" وافتكر النوتس الل ع طول معاها وبتكتب فيها وبما انه ميعرفش حد يعرفها وبمعنى اصح مش عاوز يلفت انتباه حد ..فكر فى النوتس وحب يعرف ايه الل كتباه فى النوتس .. دخل غرفتها بهدوء وبيدور ع النوتس وكان هيفتح الدولاب ويشوف علبه الشوكولاته لكن ملحقش لانه شاف النوتس ع كرسى فى الغرفه .. فتحها وكان مش فاهم اغلبها ..مسك موبيله وصورها كلها ورجعها مكانها وخرج من الغرفه ودخل المطبخ يشرب وقتها رجعت "حبيبه" وهو قالها انه داخل ينام ... دخل غرفته وفتح اللاب ووصله بالموبيل ونقل الصور واتصل ب "مين سوك ":
_ عاوزك تشوفلى حد بيعرف عرف يترجملى حاجات مكتوبه بالعربى هبعتلك الحاجات دى وبسرعه ..
بعد تفكير "حبيبه" توصلت ازاى تساعد "فيفى" فقررت تكلم "هالمونى" تشغلها فى المطعم عندها لغايه ما تلاقى شغل تانى او لما تقرر ترجع مصر . فعلا فى يوم راحت المطعم واتكلمت مع "هالمونى" ووقفت كرد ع الل "حبيبه" بتعمله مع حفيدها .. واستلمت "فيفى" الشغل وكانت فرحانه جداا به وعلاقتها مع "حبيبه" بقت اقرب .. !
فى يوم "جى وو" نزل من البيت كالعاده الصبح وكانت "حبيبه" حست بتعب فمن غير تفكير قابلت "دكتور نورهان " وكشفت عليها وكتبتلها علاج ونصحتها انها تمشى فى اليوم ساعه كرياضه وانها تهتم ب اكلها .. والمتابعه بعد ما كانت كل شهر مره بقت كل اسبوعين مره .. لاحظ "جى وو" "حبيبه" بتنزل بتصحى بدرى وبتنزل تتمشى حوالين البيت وبترجع ..مركزش فى يوم خرج من البيت ع اعتقاد ان "حبيبه" فى البيت اتصل عليها مردتش ف اتصل فى المطعم يسئل عليها قالته جددته انها مجتش انهارده وهو كان محتاج حاجه من البيت وكان هيبعت حد لكن هو رجع ع البيت دور عليها مكنتش موجوده شويا ودخلت وكان معاها شنطه الادويه بسرعه لما شافته حطتهم فى شنطتها :
_ كنتى فين ..؟
_ كنتى فى مشوار
_ مشوار فين ..؟
_ ها ..
موبيله رن دخل غرفه الاستوديو وخرج مشى وقعدت "حبيبه" طلعت العلاج اخدت منه ودخلت تنام ... !
فى يوم و"جى وو" فى البيت اتصل به "مين سوك":
_ انتى فين ؟
_ انا فى البيت ..
_ انا جى ..
بعد نص ساعه كان موجود لكن "حبيبه" كانت فى متابعتها والبيت فاضى ..
_ فى ايه ..
_ انت شوفت الاخبار ع الانترنت ..
_ اخبار ايه
_ فى موضوع نازل عنك ..
_ جوزونى مين المرادى ولا ورثت مين ..
مسك "مين سوك" التاب وفتح الخبر وكان عن بيت "جى وو" وصور داخل البيت واتفاجئ "جى وو" لانه كان مانع اى حد يصور بيته ولا الصور توصل ل الاعلام كنوع من الخصوصيه وخط احمر واتفاجئ بالصور وصور غرفه نومه والاستوديو البيت كله ..
_ ايه دا ..الصور وصلتللهم ازاى ومين دخل هنا ومفيش حد بيدخل غريب ..
_ الصور دى من حد واثق انه مش هيتمسك وصور وهو مرتاح الصور ثابته ومش مهزوزه .. دى من شخص بيتعامل فى البيت بمنتهى الاريحيه ..
بنبره شك " جى وو" : مين الل ممكن يعمل كده .. مين ؟
فى الوقت دا دخلت "حبيبه" : مساء الخير
"جى وو" و "مين سوك" بصوا ل "حبيبه" ونظرات الشك فيها ... !
__________________________
يتبع ..
ليست هناك تعليقات:
إرسال تعليق